𑁧𑁧. 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀭𑀡𑀧𑀜𑁆𑀳𑁄

𑁧𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀦𑀺𑀩𑁆𑀩𑀸𑀦𑀁 𑀦 𑀅𑀢𑀻𑀢𑀁, 𑀦 𑀅𑀦𑀸𑀕𑀢𑀁, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀦 𑀉𑀧𑁆𑀧𑀦𑁆𑀦𑀁 𑀦 𑀅𑀦𑀼𑀧𑁆𑀧𑀦𑁆𑀦𑀁 𑀦 𑀉𑀧𑁆𑀧𑀸𑀤𑀦𑀻𑀬’𑀦𑁆𑀢𑀺. 𑀇𑀥, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀓𑁄𑀘𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀲𑁄 𑀉𑀧𑁆𑀧𑀦𑁆𑀦𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀉𑀤𑀸𑀳𑀼 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺? ‘‘𑀬𑁄 𑀓𑁄𑀘𑀺, 𑀫𑀳𑀸𑀭𑀸𑀚, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀲𑁄 𑀦 𑀉𑀧𑁆𑀧𑀦𑁆𑀦𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀦 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀘𑁆𑀙𑀺𑀓𑀭𑁄𑀢𑀺, 𑀅𑀧𑀺 𑀘, 𑀫𑀳𑀸𑀭𑀸𑀚, 𑀅𑀢𑁆𑀣𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀬𑀁 𑀲𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺.

‘‘𑀫𑀸, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑀁 𑀧𑀜𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀤𑀻𑀧𑁂𑀳𑀺, 𑀯𑀺𑀯𑀝𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀻𑀧𑁂𑀳𑀺 𑀙𑀦𑁆𑀤𑀚𑀸𑀢𑁄 𑀉𑀲𑁆𑀲𑀸𑀳𑀚𑀸𑀢𑁄, 𑀬𑀁 𑀢𑁂 𑀲𑀺𑀓𑁆𑀔𑀺𑀢𑀁, 𑀢𑀁 𑀲𑀩𑁆𑀩𑀁 𑀏𑀢𑁆𑀣𑁂𑀯𑀸𑀓𑀺𑀭𑀸𑀳𑀺, 𑀏𑀢𑁆𑀣𑀸𑀬𑀁 𑀚𑀦𑁄 𑀲𑀫𑁆𑀫𑀽𑀴𑁆𑀳𑁄 𑀯𑀺𑀫𑀢𑀺𑀚𑀸𑀢𑁄 𑀲𑀁𑀲𑀬𑀧𑀓𑁆𑀔𑀦𑁆𑀤𑁄, 𑀪𑀺𑀦𑁆𑀤𑁂𑀢𑀁 𑀅𑀦𑁆𑀢𑁄𑀤𑁄𑀲𑀲𑀮𑁆𑀮’’𑀦𑁆𑀢𑀺. ‘‘𑀅𑀢𑁆𑀣𑁂𑀲𑀸, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀥𑀸𑀢𑀼 𑀲𑀦𑁆𑀢𑀸 𑀲𑀼𑀔𑀸 𑀧𑀡𑀻𑀢𑀸, 𑀢𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀚𑀺𑀦𑀸𑀦𑀼𑀲𑀺𑀝𑁆𑀞𑀺𑀬𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀭𑁄𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀅𑀦𑁆𑀢𑁂𑀯𑀸𑀲𑀺𑀓𑁄 𑀆𑀘𑀭𑀺𑀬𑀸𑀦𑀼𑀲𑀺𑀝𑁆𑀞𑀺𑀬𑀸 𑀯𑀺𑀚𑁆𑀚𑀁 𑀧𑀜𑁆𑀜𑀸𑀬 𑀲𑀘𑁆𑀙𑀺𑀓𑀭𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀚𑀺𑀦𑀸𑀦𑀼𑀲𑀺𑀝𑁆𑀞𑀺𑀬𑀸 𑀧𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺.

‘‘𑀓𑀣𑀁 𑀧𑀦 𑀢𑀁 𑀦𑀺𑀩𑁆𑀩𑀸𑀦𑀁 𑀤𑀝𑁆𑀞𑀩𑁆𑀩𑀦𑁆𑀢𑀺? 𑀅𑀦𑀻𑀢𑀺𑀢𑁄 𑀦𑀺𑀭𑀼𑀧𑀤𑁆𑀤𑀯𑀢𑁄 𑀅𑀪𑀬𑀢𑁄 𑀔𑁂𑀫𑀢𑁄 𑀲𑀦𑁆𑀢𑀢𑁄 𑀲𑀼𑀔𑀢𑁄 𑀲𑀸𑀢𑀢𑁄 𑀧𑀡𑀻𑀢𑀢𑁄 𑀲𑀼𑀘𑀺𑀢𑁄 𑀲𑀻𑀢𑀮𑀢𑁄 𑀤𑀝𑁆𑀞𑀩𑁆𑀩𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀩𑀳𑀼𑀓𑀝𑁆𑀞𑀧𑀼𑀜𑁆𑀚𑁂𑀦 𑀚𑀮𑀺𑀢𑀓𑀝𑁆𑀞𑀺𑀢𑁂𑀦 𑀅𑀕𑁆𑀕𑀺𑀦𑀸 𑀤𑀬𑁆𑀳𑀫𑀸𑀦𑁄 𑀯𑀸𑀬𑀸𑀫𑁂𑀦 𑀢𑀢𑁄 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀭𑀕𑁆𑀕𑀺𑀓𑁄𑀓𑀸𑀲𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀧𑀭𑀫𑀲𑀼𑀔𑀁 𑀮𑀪𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄, 𑀲𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀩𑁆𑀬𑀧𑀕𑀢𑀢𑀺𑀯𑀺𑀥𑀕𑁆𑀕𑀺𑀲𑀦𑁆𑀢𑀸𑀧𑀁 𑀧𑀭𑀫𑀲𑀼𑀔𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀅𑀕𑁆𑀕𑀺, 𑀏𑀯𑀁 𑀢𑀺𑀯𑀺𑀥𑀕𑁆𑀕𑀺 𑀤𑀝𑁆𑀞𑀩𑁆𑀩𑁄; 𑀬𑀣𑀸 𑀅𑀕𑁆𑀕𑀺𑀕𑀢𑁄 𑀧𑀼𑀭𑀺𑀲𑁄, 𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀤𑀝𑁆𑀞𑀩𑁆𑀩𑁄; 𑀬𑀣𑀸 𑀦𑀺𑀭𑀕𑁆𑀕𑀺𑀓𑁄𑀓𑀸𑀲𑁄, 𑀏𑀯𑀁 𑀦𑀺𑀩𑁆𑀩𑀸𑀦𑀁 𑀤𑀝𑁆𑀞𑀩𑁆𑀩𑀁.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀳𑀺𑀓𑀼𑀓𑁆𑀓𑀼𑀭𑀫𑀦𑀼𑀲𑁆𑀲𑀓𑀼𑀡𑀧𑀲𑀭𑀻𑀭𑀯𑀴𑀜𑁆𑀚𑀓𑁄𑀝𑁆𑀞𑀸𑀲𑀭𑀸𑀲𑀺𑀕𑀢𑁄 𑀓𑀼𑀡𑀧𑀚𑀝𑀸𑀚𑀝𑀺𑀢𑀦𑁆𑀢𑀭𑀫𑀦𑀼𑀧𑀯𑀺𑀝𑁆𑀞𑁄 𑀯𑀸𑀬𑀸𑀫𑁂𑀦 𑀢𑀢𑁄 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀓𑁆𑀓𑀼𑀡𑀧𑁄𑀓𑀸𑀲𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀧𑀭𑀫𑀲𑀼𑀔𑀁 𑀮𑀪𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄, 𑀲𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀩𑁆𑀬𑀧𑀕𑀢𑀓𑀺𑀮𑁂𑀲𑀓𑀼𑀡𑀧𑀁 𑀧𑀭𑀫𑀲𑀼𑀔𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀡𑀧𑀁, 𑀏𑀯𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀤𑀝𑁆𑀞𑀩𑁆𑀩𑀸; 𑀬𑀣𑀸 𑀓𑀼𑀡𑀧𑀕𑀢𑁄 𑀧𑀼𑀭𑀺𑀲𑁄, 𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀤𑀝𑁆𑀞𑀩𑁆𑀩𑁄; 𑀬𑀣𑀸 𑀦𑀺𑀓𑁆𑀓𑀼𑀡𑀧𑁄𑀓𑀸𑀲𑁄, 𑀏𑀯𑀁 𑀦𑀺𑀩𑁆𑀩𑀸𑀦𑀁 𑀤𑀝𑁆𑀞𑀩𑁆𑀩𑀁.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀪𑀻𑀢𑁄 𑀢𑀲𑀺𑀢𑁄 𑀓𑀫𑁆𑀧𑀺𑀢𑁄 𑀯𑀺𑀧𑀭𑀻𑀢𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀯𑀸𑀬𑀸𑀫𑁂𑀦 𑀢𑀢𑁄 𑀫𑀼𑀜𑁆𑀘𑀺𑀢𑁆𑀯𑀸 𑀤𑀴𑁆𑀳𑀁 𑀣𑀺𑀭𑀁 𑀅𑀘𑀮𑀁 𑀅𑀪𑀬𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀧𑀭𑀫𑀲𑀼𑀔𑀁 𑀮𑀪𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄, 𑀲𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀩𑁆𑀬𑀧𑀕𑀢𑀪𑀬𑀲𑀦𑁆𑀢𑀸𑀲𑀁 𑀧𑀭𑀫𑀲𑀼𑀔𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀪𑀬𑀁, 𑀏𑀯𑀁 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀁 𑀧𑀝𑀺𑀘𑁆𑀘 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀪𑀬𑀁 𑀤𑀝𑁆𑀞𑀩𑁆𑀩𑀁; 𑀬𑀣𑀸 𑀪𑀻𑀢𑁄 𑀧𑀼𑀭𑀺𑀲𑁄, 𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀤𑀝𑁆𑀞𑀩𑁆𑀩𑁄; 𑀬𑀣𑀸 𑀅𑀪𑀬𑀝𑁆𑀞𑀸𑀦𑀁, 𑀏𑀯𑀁 𑀦𑀺𑀩𑁆𑀩𑀸𑀦𑀁 𑀤𑀝𑁆𑀞𑀩𑁆𑀩𑀁.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀓𑀺𑀮𑀺𑀝𑁆𑀞𑀫𑀮𑀺𑀦𑀓𑀮𑀮𑀓𑀤𑁆𑀤𑀫𑀤𑁂𑀲𑁂 𑀧𑀢𑀺𑀢𑁄 𑀯𑀸𑀬𑀸𑀫𑁂𑀦 𑀢𑀁 𑀓𑀮𑀮𑀓𑀤𑁆𑀤𑀫𑀁 𑀅𑀧𑀯𑀸𑀳𑁂𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀯𑀺𑀫𑀮𑀤𑁂𑀲𑀫𑀼𑀧𑀕𑀦𑁆𑀢𑁆𑀯𑀸 𑀢𑀢𑁆𑀣 𑀧𑀭𑀫𑀲𑀼𑀔𑀁 𑀮𑀪𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄, 𑀲𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀩𑁆𑀬𑀧𑀕𑀢𑀓𑀺𑀮𑁂𑀲𑀫𑀮𑀓𑀤𑁆𑀤𑀫𑀁 𑀧𑀭𑀫𑀲𑀼𑀔𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀓𑀮𑀮𑀁, 𑀏𑀯𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀤𑀝𑁆𑀞𑀩𑁆𑀩𑁄; 𑀬𑀣𑀸 𑀓𑀮𑀮𑀕𑀢𑁄 𑀧𑀼𑀭𑀺𑀲𑁄, 𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀤𑀝𑁆𑀞𑀩𑁆𑀩𑁄; 𑀬𑀣𑀸 𑀧𑀭𑀺𑀲𑀼𑀤𑁆𑀥𑀯𑀺𑀫𑀮𑀤𑁂𑀲𑁄, 𑀏𑀯𑀁 𑀦𑀺𑀩𑁆𑀩𑀸𑀦𑀁 𑀤𑀝𑁆𑀞𑀩𑁆𑀩𑀁.

‘‘𑀢𑀜𑁆𑀘 𑀧𑀦 𑀦𑀺𑀩𑁆𑀩𑀸𑀦𑀁 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀓𑀺𑀦𑁆𑀢𑀺 𑀲𑀘𑁆𑀙𑀺𑀓𑀭𑁄𑀢𑀺? 𑀬𑁄 𑀲𑁄, 𑀫𑀳𑀸𑀭𑀸𑀚, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄, 𑀲𑁄 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀁 𑀲𑀫𑁆𑀫𑀲𑀢𑀺. 𑀧𑀯𑀢𑁆𑀢𑀁 𑀲𑀫𑁆𑀫𑀲𑀫𑀸𑀦𑁄 𑀢𑀢𑁆𑀣 𑀚𑀸𑀢𑀺𑀁 𑀧𑀲𑁆𑀲𑀢𑀺 𑀚𑀭𑀁 𑀧𑀲𑁆𑀲𑀢𑀺 𑀩𑁆𑀬𑀸𑀥𑀺𑀁 𑀧𑀲𑁆𑀲𑀢𑀺 𑀫𑀭𑀡𑀁 𑀧𑀲𑁆𑀲𑀢𑀺, 𑀦 𑀢𑀢𑁆𑀣 𑀓𑀺𑀜𑁆𑀘𑀺 𑀲𑀼𑀔𑀁 𑀲𑀸𑀢𑀁 𑀧𑀲𑁆𑀲𑀢𑀺 𑀆𑀤𑀺𑀢𑁄𑀧𑀺 𑀫𑀚𑁆𑀛𑀢𑁄𑀧𑀺 𑀧𑀭𑀺𑀬𑁄𑀲𑀸𑀦𑀢𑁄𑀧𑀺. 𑀲𑁄 𑀢𑀢𑁆𑀣 𑀓𑀺𑀜𑁆𑀘𑀺 𑀦 𑀕𑀬𑁆𑀳𑀽𑀧𑀕𑀁 𑀧𑀲𑁆𑀲𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀤𑀺𑀯𑀲𑀲𑀦𑁆𑀢𑀢𑁆𑀢𑁂 𑀅𑀬𑁄𑀕𑀼𑀴𑁂 𑀚𑀮𑀺𑀢𑁂 𑀢𑀢𑁆𑀢𑁂 𑀓𑀞𑀺𑀢𑁂 𑀆𑀤𑀺𑀢𑁄𑀧𑀺 𑀫𑀚𑁆𑀛𑀢𑁄𑀧𑀺 𑀧𑀭𑀺𑀬𑁄𑀲𑀸𑀦𑀢𑁄𑀧𑀺 𑀦 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀧𑀤𑁂𑀲𑀁 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀁 𑀲𑀫𑁆𑀫𑀲𑀢𑀺, 𑀲𑁄 𑀧𑀯𑀢𑁆𑀢𑀁 𑀲𑀫𑁆𑀫𑀲𑀫𑀸𑀦𑁄 𑀢𑀢𑁆𑀣 𑀚𑀸𑀢𑀺𑀁 𑀧𑀲𑁆𑀲𑀢𑀺 𑀚𑀭𑀁 𑀧𑀲𑁆𑀲𑀢𑀺 𑀩𑁆𑀬𑀸𑀥𑀺𑀁 𑀧𑀲𑁆𑀲𑀢𑀺 𑀫𑀭𑀡𑀁 𑀧𑀲𑁆𑀲𑀢𑀺, 𑀦 𑀢𑀢𑁆𑀣 𑀓𑀺𑀜𑁆𑀘𑀺 𑀲𑀼𑀔𑀁 𑀲𑀸𑀢𑀁 𑀧𑀲𑁆𑀲𑀢𑀺 𑀆𑀤𑀺𑀢𑁄𑀧𑀺 𑀫𑀚𑁆𑀛𑀢𑁄𑀧𑀺 𑀧𑀭𑀺𑀬𑁄𑀲𑀸𑀦𑀢𑁄𑀧𑀺. 𑀲𑁄 𑀢𑀢𑁆𑀣 [𑀇𑀤𑀁 𑀧𑀤𑀤𑁆𑀯𑀬𑀁 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀦 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀕𑀬𑁆𑀳𑀽𑀧𑀕𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 𑀘𑀺𑀢𑁆𑀢𑁂 𑀅𑀭𑀢𑀺 𑀲𑀡𑁆𑀞𑀸𑀢𑀺, 𑀓𑀸𑀬𑀲𑁆𑀫𑀺𑀁 𑀟𑀸𑀳𑁄 𑀑𑀓𑁆𑀓𑀫𑀢𑀺, 𑀲𑁄 𑀅𑀢𑀸𑀡𑁄 𑀅𑀲𑀭𑀡𑁄 𑀅𑀲𑀭𑀡𑀻𑀪𑀽𑀢𑁄 𑀪𑀯𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀚𑀮𑀺𑀢𑀚𑀸𑀮𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀧𑀯𑀺𑀲𑁂𑀬𑁆𑀬, 𑀲𑁄 𑀢𑀢𑁆𑀣 𑀅𑀢𑀸𑀡𑁄 𑀅𑀲𑀭𑀡𑁄 𑀅𑀲𑀭𑀡𑀻𑀪𑀽𑀢𑁄 𑀅𑀕𑁆𑀕𑀺𑀫𑁆𑀳𑀺 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀕𑀬𑁆𑀳𑀽𑀧𑀕𑀁 𑀅𑀧𑀲𑁆𑀲𑀦𑁆𑀢𑀲𑁆𑀲 𑀘𑀺𑀢𑁆𑀢𑁂 𑀅𑀭𑀢𑀺 𑀲𑀡𑁆𑀞𑀸𑀢𑀺, 𑀓𑀸𑀬𑀲𑁆𑀫𑀺𑀁 𑀟𑀸𑀳𑁄 𑀑𑀓𑁆𑀓𑀫𑀢𑀺, 𑀲𑁄 𑀅𑀢𑀸𑀡𑁄 𑀅𑀲𑀭𑀡𑁄 𑀅𑀲𑀭𑀡𑀻𑀪𑀽𑀢𑁄 𑀪𑀯𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀢𑀺.

‘‘𑀢𑀲𑁆𑀲 𑀧𑀯𑀢𑁆𑀢𑁂 𑀪𑀬𑀤𑀲𑁆𑀲𑀸𑀯𑀺𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 ‘𑀲𑀦𑁆𑀢𑀢𑁆𑀢𑀁 𑀔𑁄 𑀧𑀦𑁂𑀢𑀁 𑀧𑀯𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀩𑀳𑀼𑀤𑀼𑀓𑁆𑀔𑀁 𑀩𑀳𑀽𑀧𑀸𑀬𑀸𑀲𑀁, 𑀬𑀤𑀺 𑀓𑁄𑀘𑀺 𑀮𑀪𑁂𑀣 𑀅𑀧𑁆𑀧𑀯𑀢𑁆𑀢𑀁 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’𑀦𑁆𑀢𑀺. 𑀇𑀢𑀺 𑀳𑁂𑀢𑀁 [𑀳𑀺𑀢𑀁 (𑀲𑀻.), 𑀳𑀺 𑀇𑀤𑀁 (𑀧𑀻.)] 𑀢𑀲𑁆𑀲 𑀅𑀧𑁆𑀧𑀯𑀢𑁆𑀢𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀧𑀳𑀁𑀲𑀬𑀢𑀺 𑀢𑀼𑀲𑀬𑀢𑀺 [𑀧𑀳𑀁𑀲𑀻𑀬𑀢𑀺 𑀓𑀼𑀳𑀻𑀬𑀢𑀺 (𑀲𑀻. 𑀧𑀻.)]‘𑀧𑀝𑀺𑀮𑀤𑁆𑀥𑀁 𑀔𑁄 𑀫𑁂 𑀦𑀺𑀲𑁆𑀲𑀭𑀡’𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀯𑀺𑀧𑁆𑀧𑀦𑀝𑁆𑀞𑁄 𑀯𑀺𑀤𑁂𑀲𑀧𑀓𑁆𑀔𑀦𑁆𑀤𑁄 𑀦𑀺𑀩𑁆𑀩𑀸𑀳𑀦𑀫𑀕𑁆𑀕𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀧𑀳𑀁𑀲𑀬𑀢𑀺 𑀢𑀼𑀲𑀬𑀢𑀺 [𑀧𑀳𑀁𑀲𑀻𑀬𑀢𑀺 𑀓𑀼𑀳𑀻𑀬𑀢𑀺 (𑀲𑀻. 𑀧𑀻.)] ‘𑀧𑀝𑀺𑀮𑀤𑁆𑀥𑁄 𑀫𑁂 𑀦𑀺𑀩𑁆𑀩𑀸𑀳𑀦𑀫𑀕𑁆𑀕𑁄’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀯𑀢𑁆𑀢𑁂 𑀪𑀬𑀤𑀲𑁆𑀲𑀸𑀯𑀺𑀲𑁆𑀲 𑀅𑀧𑁆𑀧𑀯𑀢𑁆𑀢𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀧𑀳𑀁𑀲𑀬𑀢𑀺 𑀢𑀼𑀲𑀬𑀢𑀺 [𑀧𑀳𑀁𑀲𑀻𑀬𑀢𑀺 𑀓𑀼𑀳𑀻𑀬𑀢𑀺 (𑀲𑀻. 𑀧𑀻.)] ‘𑀧𑀝𑀺𑀮𑀤𑁆𑀥𑀁 𑀔𑁄 𑀫𑁂 𑀦𑀺𑀲𑁆𑀲𑀭𑀡’𑀦𑁆𑀢𑀺.

‘‘𑀲𑁄 𑀅𑀧𑁆𑀧𑀯𑀢𑁆𑀢𑀢𑁆𑀣𑀸𑀬 𑀫𑀕𑁆𑀕𑀁 𑀆𑀬𑀽𑀳𑀢𑀺 𑀕𑀯𑁂𑀲𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀺, 𑀢𑀲𑁆𑀲 𑀢𑀤𑀢𑁆𑀣𑀁 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀤𑀢𑁆𑀣𑀁 𑀯𑀻𑀭𑀺𑀬𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀤𑀢𑁆𑀣𑀁 𑀧𑀻𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀅𑀧𑀭𑀸𑀧𑀭𑀁 𑀫𑀦𑀲𑀺𑀓𑀭𑁄𑀢𑁄 𑀧𑀯𑀢𑁆𑀢𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀁 𑀑𑀓𑁆𑀓𑀫𑀢𑀺, 𑀅𑀧𑁆𑀧𑀯𑀢𑁆𑀢𑀫𑀦𑀼𑀧𑁆𑀧𑀢𑁆𑀢𑁄, 𑀫𑀳𑀸𑀭𑀸𑀚, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 ‘𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻’𑀢𑀺 𑀯𑀼𑀘𑁆𑀘𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀭𑀡𑀧𑀜𑁆𑀳𑁄 𑀏𑀓𑀸𑀤𑀲𑀫𑁄.