𑁩. 𑀯𑁂𑀲𑁆𑀲𑀦𑁆𑀢𑀭𑀯𑀕𑁆𑀕𑁄

𑁧. 𑀯𑁂𑀲𑁆𑀲𑀦𑁆𑀢𑀭𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀯 𑀩𑁄𑀥𑀺𑀲𑀢𑁆𑀢𑀸 𑀧𑀼𑀢𑁆𑀢𑀤𑀸𑀭𑀁 𑀤𑁂𑀦𑁆𑀢𑀺, 𑀉𑀤𑀸𑀳𑀼 𑀯𑁂𑀲𑁆𑀲𑀦𑁆𑀢𑀭𑁂𑀦𑁂𑀯 𑀭𑀜𑁆𑀜𑀸 𑀧𑀼𑀢𑁆𑀢𑀤𑀸𑀭𑀁 𑀤𑀺𑀦𑁆𑀦’’𑀦𑁆𑀢𑀺? ‘‘𑀲𑀩𑁆𑀩𑁂𑀧𑀺, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑀸 𑀧𑀼𑀢𑁆𑀢𑀤𑀸𑀭𑀁 𑀤𑁂𑀦𑁆𑀢𑀺, 𑀦 𑀯𑁂𑀲𑁆𑀲𑀦𑁆𑀢𑀭𑁂𑀦𑁂𑀯 𑀭𑀜𑁆𑀜𑀸 𑀧𑀼𑀢𑁆𑀢𑀤𑀸𑀭𑀁 𑀤𑀺𑀦𑁆𑀦’’𑀦𑁆𑀢𑀺. ‘‘𑀅𑀧𑀺 𑀘 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑁂𑀲𑀁 𑀅𑀦𑀼𑀫𑀢𑁂𑀦 𑀤𑁂𑀦𑁆𑀢𑀻’’𑀢𑀺. ‘‘𑀪𑀭𑀺𑀬𑀸, 𑀫𑀳𑀸𑀭𑀸𑀚, 𑀅𑀦𑀼𑀫𑀢𑀸, 𑀤𑀸𑀭𑀓𑀸 𑀧𑀦 𑀩𑀸𑀮𑀢𑀸𑀬 𑀯𑀺𑀮𑀧𑀺𑀁𑀲𑀼 [𑀮𑀸𑀮𑀧𑀺𑀁𑀲𑀼 (𑀲𑀻. 𑀧𑀻.)], 𑀬𑀤𑀺 𑀢𑁂 𑀅𑀢𑁆𑀣𑀢𑁄 𑀚𑀸𑀦𑁂𑀬𑁆𑀬𑀼𑀁, 𑀢𑁂𑀧𑀺 𑀅𑀦𑀼𑀫𑁄𑀤𑁂𑀬𑁆𑀬𑀼𑀁, 𑀦 𑀢𑁂 𑀯𑀺𑀮𑀧𑁂𑀬𑁆𑀬𑀼’’𑀦𑁆𑀢𑀺.

‘‘𑀤𑀼𑀓𑁆𑀓𑀭𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑁄𑀥𑀺𑀲𑀢𑁆𑀢𑁂𑀦 𑀓𑀢𑀁, 𑀬𑀁 𑀲𑁄 𑀅𑀢𑁆𑀢𑀦𑁄 𑀑𑀭𑀲𑁂 𑀧𑀺𑀬𑁂 𑀧𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀲𑀢𑁆𑀣𑀸𑀬 𑀅𑀤𑀸𑀲𑀺.

‘‘𑀇𑀤𑀫𑁆𑀧𑀺 𑀤𑀼𑀢𑀺𑀬𑀁 𑀤𑀼𑀓𑁆𑀓𑀭𑀢𑁄 𑀤𑀼𑀓𑁆𑀓𑀭𑀢𑀭𑀁, 𑀬𑀁 𑀲𑁄 𑀅𑀢𑁆𑀢𑀦𑁄 𑀑𑀭𑀲𑁂 𑀧𑀺𑀬𑁂 𑀧𑀼𑀢𑁆𑀢𑁂 𑀩𑀸𑀮𑀓𑁂 𑀢𑀭𑀼𑀡𑀓𑁂 𑀮𑀢𑀸𑀬 𑀩𑀦𑁆𑀥𑀺𑀢𑁆𑀯𑀸 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀮𑀢𑀸𑀬 𑀅𑀦𑀼𑀫𑀚𑁆𑀚𑀻𑀬𑀦𑁆𑀢𑁂 𑀤𑀺𑀲𑁆𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀺.

‘‘𑀇𑀤𑀫𑁆𑀧𑀺 𑀢𑀢𑀺𑀬𑀁 𑀤𑀼𑀓𑁆𑀓𑀭𑀢𑁄 𑀤𑀼𑀓𑁆𑀓𑀭𑀢𑀭𑀁, 𑀬𑀁 𑀲𑁄 𑀲𑀓𑁂𑀦 𑀩𑀮𑁂𑀦 𑀩𑀦𑁆𑀥𑀦𑀸 𑀫𑀼𑀘𑁆𑀘𑀺𑀢𑁆𑀯𑀸 𑀆𑀕𑀢𑁂 𑀤𑀸𑀭𑀓𑁂 𑀲𑀸𑀭𑀚𑁆𑀚𑀫𑀼𑀧𑀕𑀢𑁂 𑀧𑀼𑀦𑀤𑁂𑀯 𑀮𑀢𑀸𑀬 𑀩𑀦𑁆𑀥𑀺𑀢𑁆𑀯𑀸 𑀅𑀤𑀸𑀲𑀺.

‘‘𑀇𑀤𑀫𑁆𑀧𑀺 𑀘𑀢𑀼𑀢𑁆𑀣𑀁 𑀤𑀼𑀓𑁆𑀓𑀭𑀢𑁄 𑀤𑀼𑀓𑁆𑀓𑀭𑀢𑀭𑀁, 𑀬𑀁 𑀲𑁄 𑀤𑀸𑀭𑀓𑁂 ‘𑀅𑀬𑀁 𑀔𑁄, 𑀢𑀸𑀢, 𑀬𑀓𑁆𑀔𑁄 𑀔𑀸𑀤𑀺𑀢𑀼𑀁 𑀦𑁂𑀢𑀺 𑀅𑀫𑁆𑀳𑁂’𑀢𑀺 𑀯𑀺𑀮𑀧𑀦𑁆𑀢𑁂 ‘𑀫𑀸 𑀪𑀸𑀬𑀺𑀢𑁆𑀣𑀸’𑀢𑀺 𑀦 𑀅𑀲𑁆𑀲𑀸𑀲𑁂𑀲𑀺.

‘‘𑀇𑀤𑀫𑁆𑀧𑀺 𑀧𑀜𑁆𑀘𑀫𑀁 𑀤𑀼𑀓𑁆𑀓𑀭𑀢𑁄 𑀤𑀼𑀓𑁆𑀓𑀭𑀢𑀭𑀁, 𑀬𑀁 𑀲𑁄 𑀚𑀸𑀮𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀭𑀼𑀤𑀫𑀸𑀦𑀲𑁆𑀲 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 ‘𑀅𑀮𑀁, 𑀢𑀸𑀢, 𑀓𑀡𑁆𑀳𑀸𑀚𑀺𑀦𑀁 𑀦𑀺𑀯𑀢𑁆𑀢𑁂𑀳𑀺, 𑀅𑀳𑀫𑁂𑀯 𑀕𑀘𑁆𑀙𑀸𑀫𑀺 𑀬𑀓𑁆𑀔𑁂𑀦 𑀲𑀳, 𑀔𑀸𑀤𑀢𑀼 𑀫𑀁 𑀬𑀓𑁆𑀔𑁄’𑀢𑀺 𑀬𑀸𑀘𑀫𑀸𑀦𑀲𑁆𑀲 𑀏𑀯𑀁 𑀦 𑀲𑀫𑁆𑀧𑀝𑀺𑀘𑁆𑀙𑀺.

‘‘𑀇𑀤𑀫𑁆𑀧𑀺 𑀙𑀝𑁆𑀞𑀁 𑀤𑀼𑀓𑁆𑀓𑀭𑀢𑁄 𑀤𑀼𑀓𑁆𑀓𑀭𑀢𑀭𑀁, 𑀬𑀁 𑀲𑁄 𑀚𑀸𑀮𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 ‘𑀧𑀸𑀲𑀸𑀡𑀲𑀫𑀁 𑀦𑀽𑀦 𑀢𑁂, 𑀢𑀸𑀢, 𑀳𑀤𑀬𑀁, 𑀬𑀁 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀤𑀼𑀓𑁆𑀔𑀺𑀢𑀸𑀦𑀁 𑀧𑁂𑀓𑁆𑀔𑀫𑀸𑀦𑁄 𑀦𑀺𑀫𑁆𑀫𑀦𑀼𑀲𑁆𑀲𑀓𑁂 𑀩𑁆𑀭𑀳𑀸𑀭𑀜𑁆𑀜𑁂 𑀬𑀓𑁆𑀔𑁂𑀦 𑀦𑀻𑀬𑀫𑀸𑀦𑁂 𑀦 𑀦𑀺𑀯𑀸𑀭𑁂𑀲𑀻’𑀢𑀺 𑀯𑀺𑀮𑀧𑀫𑀸𑀦𑀲𑁆𑀲 𑀓𑀸𑀭𑀼𑀜𑁆𑀜𑀁 𑀦𑀸𑀓𑀸𑀲𑀺.

‘‘𑀇𑀤𑀫𑁆𑀧𑀺 𑀲𑀢𑁆𑀢𑀫𑀁 𑀤𑀼𑀓𑁆𑀓𑀭𑀢𑁄 𑀤𑀼𑀓𑁆𑀓𑀭𑀢𑀭𑀁, 𑀬𑀁 𑀢𑀲𑁆𑀲 𑀭𑀼𑀴𑀭𑀼𑀴𑀲𑁆𑀲 𑀪𑀻𑀫𑀪𑀻𑀫𑀲𑁆𑀲 𑀦𑀻𑀢𑁂 𑀤𑀸𑀭𑀓𑁂 𑀅𑀤𑀲𑁆𑀲𑀦𑀁 𑀕𑀫𑀺𑀢𑁂 𑀦 𑀨𑀮𑀺 𑀳𑀤𑀬𑀁 𑀲𑀢𑀥𑀸 𑀯𑀸 𑀲𑀳𑀲𑁆𑀲𑀥𑀸 𑀯𑀸, 𑀧𑀼𑀜𑁆𑀜𑀓𑀸𑀫𑁂𑀦 𑀫𑀦𑀼𑀚𑁂𑀦 𑀓𑀺𑀁 𑀧𑀭𑀤𑀼𑀓𑁆𑀔𑀸𑀧𑀦𑁂𑀦, 𑀦𑀦𑀼 𑀦𑀸𑀫 𑀲𑀓𑀤𑀸𑀦𑀁 𑀤𑀸𑀢𑀩𑁆𑀩𑀁 𑀳𑁄𑀢𑀻’’𑀢𑀺?

‘‘𑀤𑀼𑀓𑁆𑀓𑀭𑀲𑁆𑀲, 𑀫𑀳𑀸𑀭𑀸𑀚, 𑀓𑀢𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑁄 𑀤𑀲𑀲𑀳𑀲𑁆𑀲𑀺𑀬𑀸 𑀮𑁄𑀓𑀥𑀸𑀢𑀼𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀩𑁆𑀪𑀼𑀕𑁆𑀕𑀢𑁄, 𑀤𑁂𑀯𑀸 𑀤𑁂𑀯𑀪𑀯𑀦𑁂 𑀧𑀓𑀺𑀢𑁆𑀢𑁂𑀦𑁆𑀢𑀺, 𑀅𑀲𑀼𑀭𑀸 𑀅𑀲𑀼𑀭𑀪𑀯𑀦𑁂 𑀧𑀓𑀺𑀢𑁆𑀢𑁂𑀦𑁆𑀢𑀺, 𑀕𑀭𑀼𑀴𑀸 𑀕𑀭𑀼𑀴𑀪𑀯𑀦𑁂 𑀧𑀓𑀺𑀢𑁆𑀢𑁂𑀦𑁆𑀢𑀺, 𑀦𑀸𑀕𑀸 𑀦𑀸𑀕𑀪𑀯𑀦𑁂 𑀧𑀓𑀺𑀢𑁆𑀢𑁂𑀦𑁆𑀢𑀺, 𑀬𑀓𑁆𑀔𑀸 𑀬𑀓𑁆𑀔𑀪𑀯𑀦𑁂 𑀧𑀓𑀺𑀢𑁆𑀢𑁂𑀦𑁆𑀢𑀺, 𑀅𑀦𑀼𑀧𑀼𑀩𑁆𑀩𑁂𑀦 𑀢𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑁄 𑀧𑀭𑀫𑁆𑀧𑀭𑀸𑀬 𑀅𑀚𑁆𑀚𑁂𑀢𑀭𑀳𑀺 𑀇𑀥 𑀅𑀫𑁆𑀳𑀸𑀓𑀁 𑀲𑀫𑀬𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀢𑀁 𑀫𑀬𑀁 𑀤𑀸𑀦𑀁 𑀧𑀓𑀺𑀢𑁆𑀢𑁂𑀦𑁆𑀢𑀸 𑀯𑀺𑀓𑁄𑀧𑁂𑀦𑁆𑀢𑀸 𑀦𑀺𑀲𑀺𑀦𑁆𑀦𑀸 𑀲𑀼𑀤𑀺𑀦𑁆𑀦𑀁, 𑀉𑀤𑀸𑀳𑀼 𑀤𑀼𑀤𑁆𑀤𑀺𑀦𑁆𑀦𑀦𑁆𑀢𑀺. 𑀲𑁄 𑀔𑁄 𑀧𑀦𑀸𑀬𑀁, 𑀫𑀳𑀸𑀭𑀸𑀚, 𑀓𑀺𑀢𑁆𑀢𑀺𑀲𑀤𑁆𑀤𑁄 𑀦𑀺𑀧𑀼𑀡𑀸𑀦𑀁 𑀯𑀺𑀜𑁆𑀜𑀽𑀦𑀁 𑀯𑀺𑀤𑀽𑀦𑀁 𑀯𑀺𑀪𑀸𑀯𑀻𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀤𑀲 𑀕𑀼𑀡𑁂 𑀅𑀦𑀼𑀤𑀲𑁆𑀲𑀢𑀺. 𑀓𑀢𑀫𑁂 𑀤𑀲? 𑀅𑀕𑁂𑀥𑀢𑀸 𑀦𑀺𑀭𑀸𑀮𑀬𑀢𑀸 𑀘𑀸𑀕𑁄 𑀧𑀳𑀸𑀦𑀁 𑀅𑀧𑀼𑀦𑀭𑀸𑀯𑀢𑁆𑀢𑀺𑀢𑀸 𑀲𑀼𑀔𑀼𑀫𑀢𑀸 𑀫𑀳𑀦𑁆𑀢𑀢𑀸 𑀤𑀼𑀭𑀦𑀼𑀩𑁄𑀥𑀢𑀸 𑀤𑀼𑀮𑁆𑀮𑀪𑀢𑀸 𑀅𑀲𑀤𑀺𑀲𑀢𑀸 𑀩𑀼𑀤𑁆𑀥𑀥𑀫𑁆𑀫𑀲𑁆𑀲, 𑀲𑁄 𑀔𑁄 𑀧𑀦𑀸𑀬𑀁, 𑀫𑀳𑀸𑀭𑀸𑀚, 𑀓𑀺𑀢𑁆𑀢𑀺𑀲𑀤𑁆𑀤𑁄 𑀦𑀺𑀧𑀼𑀡𑀸𑀦𑀁 𑀯𑀺𑀜𑁆𑀜𑀽𑀦𑀁 𑀯𑀺𑀤𑀽𑀦𑀁 𑀯𑀺𑀪𑀸𑀯𑀻𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀇𑀫𑁂 𑀤𑀲 𑀕𑀼𑀡𑁂 𑀅𑀦𑀼𑀤𑀲𑁆𑀲𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀧𑀭𑀁 𑀤𑀼𑀓𑁆𑀔𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀅𑀧𑀺 𑀦𑀼 𑀢𑀁 𑀤𑀸𑀦𑀁 𑀲𑀼𑀔𑀯𑀺𑀧𑀸𑀓𑀁 𑀳𑁄𑀢𑀺 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀓𑀺𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺. ‘‘𑀇𑀗𑁆𑀖, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑀁 𑀉𑀧𑀤𑀲𑁆𑀲𑁂𑀳𑀻’’𑀢𑀺. ‘‘𑀇𑀥, 𑀫𑀳𑀸𑀭𑀸𑀚, 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀲𑀻𑀮𑀯𑀸 𑀳𑁄𑀢𑀺 𑀓𑀮𑁆𑀬𑀸𑀡𑀥𑀫𑁆𑀫𑁄, 𑀲𑁄 𑀪𑀯𑁂𑀬𑁆𑀬 𑀧𑀓𑁆𑀔𑀳𑀢𑁄 𑀯𑀸 𑀧𑀻𑀞𑀲𑀧𑁆𑀧𑀻 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀩𑁆𑀬𑀸𑀥𑀺𑀁 𑀆𑀧𑀦𑁆𑀦𑁄, 𑀢𑀫𑁂𑀦𑀁 𑀬𑁄 𑀓𑁄𑀘𑀺 𑀧𑀼𑀜𑁆𑀜𑀓𑀸𑀫𑁄 𑀬𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀧𑀢𑁆𑀣𑀺𑀢𑀁 𑀤𑁂𑀲𑀫𑀦𑀼𑀧𑀸𑀧𑁂𑀬𑁆𑀬, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀢𑁄𑀦𑀺𑀤𑀸𑀦𑀁 𑀓𑀺𑀜𑁆𑀘𑀺 𑀲𑀼𑀔𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁 𑀢𑀁 𑀓𑀫𑁆𑀫’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀓𑀺𑀁 𑀯𑀢𑁆𑀢𑀩𑁆𑀩𑀁? 𑀳𑀢𑁆𑀣𑀺𑀬𑀸𑀦𑀁 𑀯𑀸 𑀲𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀮𑀪𑁂𑀬𑁆𑀬 𑀅𑀲𑁆𑀲𑀬𑀸𑀦𑀁 𑀯𑀸 𑀭𑀣𑀬𑀸𑀦𑀁 𑀯𑀸, 𑀣𑀮𑁂 𑀣𑀮𑀬𑀸𑀦𑀁 𑀚𑀮𑁂 𑀚𑀮𑀬𑀸𑀦𑀁 𑀤𑁂𑀯𑁂𑀲𑀼 𑀤𑁂𑀯𑀬𑀸𑀦𑀁 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀬𑀸𑀦𑀁, 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀁 𑀪𑀯𑁂 𑀪𑀯𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀢𑀤𑀦𑀼𑀘𑁆𑀙𑀯𑀺𑀓𑀸𑀦𑀺 𑀢𑀤𑀦𑀼𑀮𑁄𑀫𑀺𑀓𑀸𑀦𑀺 𑀘𑀲𑁆𑀲 𑀲𑀼𑀔𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀼𑀁, 𑀲𑀼𑀕𑀢𑀺𑀢𑁄 𑀲𑀼𑀕𑀢𑀺𑀁 𑀕𑀘𑁆𑀙𑁂𑀬𑁆𑀬, 𑀢𑁂𑀦𑁂𑀯 𑀓𑀫𑁆𑀫𑀸𑀪𑀺𑀲𑀦𑁆𑀤𑁂𑀦 𑀇𑀤𑁆𑀥𑀺𑀬𑀸𑀦𑀁 𑀅𑀪𑀺𑀭𑀼𑀬𑁆𑀳 𑀧𑀢𑁆𑀣𑀺𑀢𑀁 𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀸𑀧𑀼𑀡𑁂𑀬𑁆𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀧𑀭𑀤𑀼𑀓𑁆𑀔𑀸𑀧𑀦𑁂𑀦 𑀤𑀺𑀦𑁆𑀦𑀤𑀸𑀦𑀁 𑀲𑀼𑀔𑀯𑀺𑀧𑀸𑀓𑀁 𑀳𑁄𑀢𑀺 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁, 𑀬𑀁 𑀲𑁄 𑀧𑀼𑀭𑀺𑀲𑁄 𑀩𑀮𑀻𑀩𑀤𑁆𑀤𑁂 𑀤𑀼𑀓𑁆𑀔𑀸𑀧𑁂𑀢𑁆𑀯𑀸 𑀏𑀯𑀭𑀽𑀧𑀁 𑀲𑀼𑀔𑀁 𑀅𑀦𑀼𑀪𑀯𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑀣𑀸 𑀧𑀭𑀤𑀼𑀓𑁆𑀔𑀸𑀧𑀦𑁂𑀦 𑀤𑀺𑀦𑁆𑀦𑀤𑀸𑀦𑀁 𑀲𑀼𑀔𑀯𑀺𑀧𑀸𑀓𑀁 𑀳𑁄𑀢𑀺 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀇𑀥, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀭𑀸𑀚𑀸 𑀚𑀦𑀧𑀤𑀢𑁄 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀉𑀤𑁆𑀥𑀭𑀸𑀧𑁂𑀢𑁆𑀯𑀸 𑀆𑀡𑀸𑀧𑀯𑀢𑁆𑀢𑀦𑁂𑀦 𑀤𑀸𑀦𑀁 𑀤𑀤𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀭𑀸𑀚𑀸 𑀢𑀢𑁄𑀦𑀺𑀤𑀸𑀦𑀁 𑀓𑀺𑀜𑁆𑀘𑀺 𑀲𑀼𑀔𑀁 𑀅𑀦𑀼𑀪𑀯𑁂𑀬𑁆𑀬 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁 𑀢𑀁 𑀤𑀸𑀦’’𑀦𑁆𑀢𑀺? ‘‘𑀆𑀫, 𑀪𑀦𑁆𑀢𑁂, 𑀓𑀺𑀁 𑀯𑀢𑁆𑀢𑀩𑁆𑀩𑀁, 𑀢𑀢𑁄𑀦𑀺𑀤𑀸𑀦𑀁 𑀲𑁄, 𑀪𑀦𑁆𑀢𑁂, 𑀭𑀸𑀚𑀸 𑀉𑀢𑁆𑀢𑀭𑀺𑀁 𑀅𑀦𑁂𑀓𑀲𑀢𑀲𑀳𑀲𑁆𑀲𑀕𑀼𑀡𑀁 𑀮𑀪𑁂𑀬𑁆𑀬. 𑀭𑀸𑀚𑀽𑀦𑀁 𑀅𑀢𑀺𑀭𑀸𑀚𑀸 𑀪𑀯𑁂𑀬𑁆𑀬, 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄 𑀪𑀯𑁂𑀬𑁆𑀬, 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸 𑀪𑀯𑁂𑀬𑁆𑀬, 𑀲𑀫𑀡𑀸𑀦𑀁 𑀅𑀢𑀺𑀲𑀫𑀡𑁄 𑀪𑀯𑁂𑀬𑁆𑀬, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀢𑀺𑀩𑁆𑀭𑀸𑀳𑁆𑀫𑀡𑁄 𑀪𑀯𑁂𑀬𑁆𑀬, 𑀅𑀭𑀳𑀦𑁆𑀢𑀸𑀦𑀁 𑀅𑀢𑀺𑀅𑀭𑀳𑀸 [𑀅𑀢𑀺𑀅𑀭𑀳𑀦𑁆𑀢𑁄 (𑀲𑁆𑀬𑀸. 𑀓.)] 𑀪𑀯𑁂𑀬𑁆𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀧𑀭𑀤𑀼𑀓𑁆𑀔𑀸𑀧𑀦𑁂𑀦 𑀤𑀺𑀦𑁆𑀦𑀤𑀸𑀦𑀁 𑀲𑀼𑀔𑀯𑀺𑀧𑀸𑀓𑀁 𑀳𑁄𑀢𑀺 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁, 𑀬𑀁 𑀲𑁄 𑀭𑀸𑀚𑀸 𑀩𑀮𑀺𑀦𑀸 𑀚𑀦𑀁 𑀧𑀻𑀴𑁂𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑁂𑀦 𑀏𑀯𑀭𑀽𑀧𑀁 𑀉𑀢𑁆𑀢𑀭𑀺𑀁 𑀬𑀲𑀲𑀼𑀔𑀁 𑀅𑀦𑀼𑀪𑀯𑀢𑀻’’𑀢𑀺.

‘‘𑀅𑀢𑀺𑀤𑀸𑀦𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀤𑀺𑀦𑁆𑀦𑀁, 𑀬𑀁 𑀲𑁄 𑀲𑀓𑀁 𑀪𑀭𑀺𑀬𑀁 𑀧𑀭𑀲𑁆𑀲 𑀪𑀭𑀺𑀬𑀢𑁆𑀣𑀸𑀬 𑀅𑀤𑀸𑀲𑀺, 𑀲𑀓𑁂 𑀑𑀭𑀲𑁂 𑀧𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀲𑀢𑁆𑀣𑀸𑀬 𑀅𑀤𑀸𑀲𑀺, 𑀅𑀢𑀺𑀤𑀸𑀦𑀁 𑀦𑀸𑀫, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀮𑁄𑀓𑁂 𑀯𑀺𑀤𑀽𑀳𑀺 𑀦𑀺𑀦𑁆𑀤𑀺𑀢𑀁 𑀕𑀭𑀳𑀺𑀢𑀁, 𑀬𑀣𑀸 𑀦𑀸𑀫, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀺𑀪𑀸𑀭𑁂𑀦 𑀲𑀓𑀝𑀲𑁆𑀲 𑀅𑀓𑁆𑀔𑁄 𑀪𑀺𑀚𑁆𑀚𑀢𑀺, 𑀅𑀢𑀺𑀪𑀸𑀭𑁂𑀦 𑀦𑀸𑀯𑀸 𑀑𑀲𑀻𑀤𑀢𑀺, 𑀅𑀢𑀺𑀪𑀼𑀢𑁆𑀢𑁂𑀦 𑀪𑁄𑀚𑀦𑀁 𑀯𑀺𑀲𑀫𑀁 𑀧𑀭𑀺𑀡𑀫𑀢𑀺, 𑀅𑀢𑀺𑀯𑀲𑁆𑀲𑁂𑀦 𑀥𑀜𑁆𑀜𑀁 𑀯𑀺𑀦𑀲𑁆𑀲𑀢𑀺, 𑀅𑀢𑀺𑀤𑀸𑀦𑁂𑀦 𑀪𑁄𑀕𑀓𑁆𑀔𑀬𑀁 𑀉𑀧𑁂𑀢𑀺, 𑀅𑀢𑀺𑀢𑀸𑀧𑁂𑀦 𑀧𑀣𑀯𑀻 𑀉𑀧𑀟𑀬𑁆𑀳𑀢𑀺, 𑀅𑀢𑀺𑀭𑀸𑀕𑁂𑀦 𑀉𑀫𑁆𑀫𑀢𑁆𑀢𑀓𑁄 𑀳𑁄𑀢𑀺, 𑀅𑀢𑀺𑀤𑁄𑀲𑁂𑀦 𑀯𑀚𑁆𑀛𑁄 𑀳𑁄𑀢𑀺, 𑀅𑀢𑀺𑀫𑁄𑀳𑁂𑀦 𑀅𑀦𑀬𑀁 𑀆𑀧𑀚𑁆𑀚𑀢𑀺, 𑀅𑀢𑀺𑀮𑁄𑀪𑁂𑀦 𑀘𑁄𑀭𑀕𑁆𑀕𑀳𑀡𑀫𑀼𑀧𑀕𑀘𑁆𑀙𑀢𑀺, 𑀅𑀢𑀺𑀪𑀬𑁂𑀦 𑀦𑀺𑀭𑀼𑀚𑁆𑀛𑀢𑀺, 𑀅𑀢𑀺𑀧𑀽𑀭𑁂𑀦 𑀦𑀤𑀻 𑀉𑀢𑁆𑀢𑀭𑀢𑀺, 𑀅𑀢𑀺𑀯𑀸𑀢𑁂𑀦 𑀅𑀲𑀦𑀺 𑀧𑀢𑀢𑀺, 𑀅𑀢𑀺𑀅𑀕𑁆𑀕𑀺𑀦𑀸 𑀑𑀤𑀦𑀁 𑀉𑀢𑁆𑀢𑀭𑀢𑀺, 𑀅𑀢𑀺𑀲𑀜𑁆𑀘𑀭𑀡𑁂𑀦 𑀦 𑀘𑀺𑀭𑀁 𑀚𑀻𑀯𑀢𑀺. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀺𑀤𑀸𑀦𑀁 𑀦𑀸𑀫 𑀮𑁄𑀓𑁂 𑀯𑀺𑀤𑀽𑀳𑀺 𑀦𑀺𑀦𑁆𑀤𑀺𑀢𑀁 𑀕𑀭𑀳𑀺𑀢𑀁, 𑀅𑀢𑀺𑀤𑀸𑀦𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀤𑀺𑀦𑁆𑀦𑀁, 𑀦 𑀢𑀢𑁆𑀣 𑀓𑀺𑀜𑁆𑀘𑀺 𑀨𑀮𑀁 𑀇𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺.

‘‘𑀅𑀢𑀺𑀤𑀸𑀦𑀁, 𑀫𑀳𑀸𑀭𑀸𑀚, 𑀮𑁄𑀓𑁂 𑀯𑀺𑀤𑀽𑀳𑀺 𑀯𑀡𑁆𑀡𑀺𑀢𑀁 𑀣𑀼𑀢𑀁 𑀧𑀲𑀢𑁆𑀣𑀁, 𑀬𑁂 𑀓𑁂𑀘𑀺 𑀬𑀸𑀤𑀺𑀲𑀁 𑀓𑀻𑀤𑀺𑀲𑀁 𑀤𑀸𑀦𑀁 𑀤𑁂𑀦𑁆𑀢𑀺 [𑀓𑁂𑀘𑀺 𑀬𑀸𑀤𑀺𑀲𑀁 𑀢𑀸𑀤𑀺𑀲𑀁 𑀤𑀸𑀦𑀁 𑀤𑁂𑀦𑁆𑀢𑀺 (𑀲𑁆𑀬𑀸.)], 𑀅𑀢𑀺𑀤𑀸𑀦𑀤𑀸𑀬𑀻 𑀮𑁄𑀓𑁂 𑀓𑀺𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀅𑀢𑀺𑀧𑀯𑀭𑀢𑀸𑀬 𑀤𑀺𑀩𑁆𑀩𑀁 𑀯𑀦𑀫𑀽𑀮𑀁 𑀕𑀳𑀺𑀢𑀫𑁆𑀧𑀺 𑀳𑀢𑁆𑀣𑀧𑀸𑀲𑁂 𑀞𑀺𑀢𑀸𑀦𑀁 𑀧𑀭𑀚𑀦𑀸𑀦𑀁 𑀦 𑀤𑀲𑁆𑀲𑀬𑀢𑀺, 𑀅𑀕𑀤𑁄 𑀅𑀢𑀺𑀚𑀘𑁆𑀘𑀢𑀸𑀬 [𑀅𑀢𑀺𑀉𑀲𑀪𑀢𑀸𑀬 (𑀓.)] 𑀧𑀻𑀴𑀸𑀬 𑀲𑀫𑀼𑀕𑁆𑀖𑀸𑀢𑀓𑁄 𑀭𑁄𑀕𑀸𑀦𑀁 𑀅𑀦𑁆𑀢𑀓𑀭𑁄, 𑀅𑀕𑁆𑀕𑀺 𑀅𑀢𑀺𑀚𑁄𑀢𑀺𑀢𑀸𑀬 𑀟𑀳𑀢𑀺, 𑀉𑀤𑀓𑀁 𑀅𑀢𑀺𑀲𑀻𑀢𑀢𑀸𑀬 𑀦𑀺𑀩𑁆𑀩𑀸𑀧𑁂𑀢𑀺, 𑀧𑀤𑀼𑀫𑀁 𑀧𑀭𑀺𑀲𑀼𑀤𑁆𑀥𑀢𑀸𑀬 𑀦 𑀉𑀧𑀮𑀺𑀫𑁆𑀧𑀢𑀺 𑀯𑀸𑀭𑀺𑀓𑀤𑁆𑀤𑀫𑁂𑀦, 𑀫𑀡𑀺 𑀅𑀢𑀺𑀕𑀼𑀡𑀢𑀸𑀬 𑀓𑀸𑀫𑀤𑀤𑁄, 𑀯𑀚𑀺𑀭𑀁 𑀅𑀢𑀺𑀢𑀺𑀔𑀺𑀡𑀢𑀸𑀬 𑀯𑀺𑀚𑁆𑀛𑀢𑀺 𑀫𑀡𑀺𑀫𑀼𑀢𑁆𑀢𑀸𑀨𑀮𑀺𑀓𑀁, 𑀧𑀣𑀯𑀻 𑀅𑀢𑀺𑀫𑀳𑀦𑁆𑀢𑀢𑀸𑀬 𑀦𑀭𑁄𑀭𑀕𑀫𑀺𑀕𑀧𑀓𑁆𑀔𑀺𑀚𑀮𑀲𑁂𑀮𑀧𑀩𑁆𑀩𑀢𑀤𑀼𑀫𑁂 𑀥𑀸𑀭𑁂𑀢𑀺, 𑀲𑀫𑀼𑀤𑁆𑀤𑁄 𑀅𑀢𑀺𑀫𑀳𑀦𑁆𑀢𑀢𑀸𑀬 𑀅𑀧𑀭𑀺𑀧𑀽𑀭𑀡𑁄, 𑀲𑀺𑀦𑁂𑀭𑀼 𑀅𑀢𑀺𑀪𑀸𑀭𑀢𑀸𑀬 𑀅𑀘𑀮𑁄, 𑀆𑀓𑀸𑀲𑁄 𑀅𑀢𑀺𑀯𑀺𑀢𑁆𑀣𑀸𑀭𑀢𑀸𑀬 𑀅𑀦𑀦𑁆𑀢𑁄, 𑀲𑀽𑀭𑀺𑀬𑁄 𑀅𑀢𑀺𑀧𑁆𑀧𑀪𑀢𑀸𑀬 𑀢𑀺𑀫𑀺𑀭𑀁 𑀖𑀸𑀢𑁂𑀢𑀺, 𑀲𑀻𑀳𑁄 𑀅𑀢𑀺𑀚𑀸𑀢𑀺𑀢𑀸𑀬 𑀯𑀺𑀕𑀢𑀪𑀬𑁄, 𑀫𑀮𑁆𑀮𑁄 𑀅𑀢𑀺𑀩𑀮𑀯𑀢𑀸𑀬 𑀧𑀝𑀺𑀫𑀮𑁆𑀮𑀁 𑀔𑀺𑀧𑁆𑀧𑀁 𑀉𑀓𑁆𑀔𑀺𑀧𑀢𑀺, 𑀭𑀸𑀚𑀸 𑀅𑀢𑀺𑀧𑀼𑀜𑁆𑀜𑀢𑀸𑀬 𑀅𑀥𑀺𑀧𑀢𑀺, 𑀪𑀺𑀓𑁆𑀔𑀼 𑀅𑀢𑀺𑀲𑀻𑀮𑀯𑀦𑁆𑀢𑀢𑀸𑀬 𑀦𑀸𑀕𑀬𑀓𑁆𑀔𑀦𑀭𑀫𑀭𑀽𑀳𑀺 𑀦𑀫𑀲𑁆𑀲𑀦𑀻𑀬𑁄, 𑀩𑀼𑀤𑁆𑀥𑁄 𑀅𑀢𑀺𑀅𑀕𑁆𑀕𑀢𑀸𑀬 [𑀅𑀢𑀺𑀯𑀺𑀲𑀺𑀝𑁆𑀞𑀢𑀸𑀬 (𑀲𑁆𑀬𑀸.)] 𑀅𑀦𑀼𑀧𑀫𑁄. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀤𑀸𑀦𑀁 𑀦𑀸𑀫 𑀮𑁄𑀓𑁂 𑀯𑀺𑀤𑀽𑀳𑀺 𑀯𑀡𑁆𑀡𑀺𑀢𑀁 𑀣𑀼𑀢𑀁 𑀧𑀲𑀢𑁆𑀣𑀁, 𑀬𑁂 𑀓𑁂𑀘𑀺 𑀬𑀸𑀤𑀺𑀲𑀁 𑀓𑀻𑀤𑀺𑀲𑀁 𑀤𑀸𑀦𑀁 𑀤𑁂𑀦𑁆𑀢𑀺, 𑀅𑀢𑀺𑀤𑀸𑀦𑀤𑀸𑀬𑀻 𑀮𑁄𑀓𑁂 𑀓𑀺𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺, 𑀅𑀢𑀺𑀤𑀸𑀦𑁂𑀦 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀤𑀲𑀲𑀳𑀲𑁆𑀲𑀺𑀬𑀸 𑀮𑁄𑀓𑀥𑀸𑀢𑀼𑀬𑀸 𑀯𑀡𑁆𑀡𑀺𑀢𑁄 𑀣𑀼𑀢𑁄 𑀧𑀲𑀢𑁆𑀣𑁄 𑀫𑀳𑀺𑀢𑁄 𑀓𑀺𑀢𑁆𑀢𑀺𑀢𑁄, 𑀢𑁂𑀦𑁂𑀯 𑀅𑀢𑀺𑀤𑀸𑀦𑁂𑀦 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀅𑀚𑁆𑀚𑁂𑀢𑀭𑀳𑀺 𑀩𑀼𑀤𑁆𑀥𑁄 𑀚𑀸𑀢𑁄 𑀅𑀕𑁆𑀕𑁄 𑀲𑀤𑁂𑀯𑀓𑁂 𑀮𑁄𑀓𑁂.

‘‘𑀅𑀢𑁆𑀣𑀺 𑀧𑀦, 𑀫𑀳𑀸𑀭𑀸𑀚, 𑀮𑁄𑀓𑁂 𑀞𑀧𑀦𑀻𑀬𑀁 𑀤𑀸𑀦𑀁, 𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑁂 𑀅𑀦𑀼𑀧𑁆𑀧𑀢𑁆𑀢𑁂 𑀦 𑀤𑀸𑀢𑀩𑁆𑀩’’𑀦𑁆𑀢𑀺? ‘‘𑀤𑀲 𑀔𑁄 𑀧𑀦𑀺𑀫𑀸𑀦𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑀸𑀦𑀸𑀦𑀺, 𑀬𑀸𑀦𑀺 𑀮𑁄𑀓𑁂 𑀅𑀤𑀸𑀦𑀲𑀫𑁆𑀫𑀢𑀸𑀦𑀺, 𑀬𑁄 𑀢𑀸𑀦𑀺 𑀤𑀸𑀦𑀸𑀦𑀺 𑀤𑁂𑀢𑀺, 𑀲𑁄 𑀅𑀧𑀸𑀬𑀕𑀸𑀫𑀻 𑀳𑁄𑀢𑀺. 𑀓𑀢𑀫𑀸𑀦𑀺 𑀤𑀲? 𑀫𑀚𑁆𑀚𑀤𑀸𑀦𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀮𑁄𑀓𑁂 𑀅𑀤𑀸𑀦𑀲𑀫𑁆𑀫𑀢𑀁, 𑀬𑁄 𑀢𑀁 𑀤𑀸𑀦𑀁 𑀤𑁂𑀢𑀺, 𑀲𑁄 𑀅𑀧𑀸𑀬𑀕𑀸𑀫𑀻 𑀳𑁄𑀢𑀺. 𑀲𑀫𑀚𑁆𑀚𑀤𑀸𑀦𑀁…𑀧𑁂… 𑀇𑀢𑁆𑀣𑀺𑀤𑀸𑀦𑀁…𑀧𑁂… 𑀉𑀲𑀪𑀤𑀸𑀦𑀁…𑀧𑁂… 𑀘𑀺𑀢𑁆𑀢𑀓𑀫𑁆𑀫𑀤𑀸𑀦𑀁…𑀧𑁂… 𑀲𑀢𑁆𑀣𑀤𑀸𑀦𑀁 …𑀧𑁂… 𑀯𑀺𑀲𑀤𑀸𑀦𑀁…𑀧𑁂… 𑀲𑀗𑁆𑀔𑀮𑀺𑀓𑀤𑀸𑀦𑀁…𑀧𑁂… 𑀓𑀼𑀓𑁆𑀓𑀼𑀝𑀲𑀽𑀓𑀭𑀤𑀸𑀦𑀁…𑀧𑁂… 𑀢𑀼𑀮𑀸𑀓𑀽𑀝𑀫𑀸𑀦𑀓𑀽𑀝𑀤𑀸𑀦𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀮𑁄𑀓𑁂 𑀅𑀤𑀸𑀦𑀲𑀫𑁆𑀫𑀢𑀁 𑀳𑁄𑀢𑀺, 𑀬𑁄 𑀢𑀁 𑀤𑀸𑀦𑀁 𑀤𑁂𑀢𑀺, 𑀲𑁄 𑀅𑀧𑀸𑀬𑀕𑀸𑀫𑀻 𑀳𑁄𑀢𑀺. 𑀇𑀫𑀸𑀦𑀺 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑀲 𑀤𑀸𑀦𑀸𑀦𑀺 𑀮𑁄𑀓𑁂 𑀅𑀤𑀸𑀦𑀲𑀫𑁆𑀫𑀢𑀸𑀦𑀺, 𑀬𑁄 𑀢𑀸𑀦𑀺 𑀤𑀸𑀦𑀸𑀦𑀺 𑀤𑁂𑀢𑀺, 𑀲𑁄 𑀅𑀧𑀸𑀬𑀕𑀸𑀫𑀻 𑀳𑁄𑀢𑀻’’𑀢𑀺.

‘‘𑀦𑀸𑀳𑀁 𑀢𑀁, 𑀫𑀳𑀸𑀭𑀸𑀚, 𑀅𑀤𑀸𑀦𑀲𑀫𑁆𑀫𑀢𑀁 𑀧𑀼𑀘𑁆𑀙𑀸𑀫𑀺, 𑀇𑀫𑀁 𑀔𑁆𑀯𑀸𑀳𑀁, 𑀫𑀳𑀸𑀭𑀸𑀚, 𑀢𑀁 𑀧𑀼𑀘𑁆𑀙𑀸𑀫𑀺 ‘𑀅𑀢𑁆𑀣𑀺 𑀧𑀦, 𑀫𑀳𑀸𑀭𑀸𑀚, 𑀮𑁄𑀓𑁂 𑀞𑀧𑀦𑀻𑀬𑀁 𑀤𑀸𑀦𑀁, 𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑁂 𑀅𑀦𑀼𑀧𑁆𑀧𑀢𑁆𑀢𑁂 𑀦 𑀤𑀸𑀢𑀩𑁆𑀩’𑀦𑁆𑀢𑀺. ‘‘𑀦𑀢𑁆𑀣𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀮𑁄𑀓𑁂 𑀞𑀧𑀦𑀻𑀬𑀁 𑀤𑀸𑀦𑀁. 𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑁂 𑀅𑀦𑀼𑀧𑁆𑀧𑀢𑁆𑀢𑁂 𑀦 𑀤𑀸𑀢𑀩𑁆𑀩𑀁, 𑀘𑀺𑀢𑁆𑀢𑀧𑁆𑀧𑀲𑀸𑀤𑁂 𑀉𑀧𑁆𑀧𑀦𑁆𑀦𑁂 𑀓𑁂𑀘𑀺 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀪𑁄𑀚𑀦𑀁 𑀤𑁂𑀦𑁆𑀢𑀺, 𑀓𑁂𑀘𑀺 𑀅𑀘𑁆𑀙𑀸𑀤𑀦𑀁, 𑀓𑁂𑀘𑀺 𑀲𑀬𑀦𑀁, 𑀓𑁂𑀘𑀺 𑀆𑀯𑀲𑀣𑀁, 𑀓𑁂𑀘𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀁, 𑀓𑁂𑀘𑀺 𑀤𑀸𑀲𑀺𑀤𑀸𑀲𑀁, 𑀓𑁂𑀘𑀺 𑀔𑁂𑀢𑁆𑀢𑀯𑀢𑁆𑀣𑀼𑀁, 𑀓𑁂𑀘𑀺 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀁, 𑀓𑁂𑀘𑀺 𑀲𑀢𑀁 𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁, 𑀓𑁂𑀘𑀺 𑀫𑀳𑀸𑀭𑀚𑁆𑀚𑀁, 𑀓𑁂𑀘𑀺 𑀚𑀻𑀯𑀺𑀢𑀫𑁆𑀧𑀺 𑀤𑁂𑀦𑁆𑀢𑀻’’𑀢𑀺. ‘‘𑀬𑀤𑀺 𑀧𑀦, 𑀫𑀳𑀸𑀭𑀸𑀚, 𑀓𑁂𑀘𑀺 𑀚𑀻𑀯𑀺𑀢𑀫𑁆𑀧𑀺 𑀤𑁂𑀦𑁆𑀢𑀺, 𑀓𑀺𑀁 𑀓𑀸𑀭𑀡𑀸 𑀯𑁂𑀲𑁆𑀲𑀦𑁆𑀢𑀭𑀁 𑀤𑀸𑀦𑀧𑀢𑀺𑀁 𑀅𑀢𑀺𑀩𑀸𑀴𑁆𑀳𑀁 𑀧𑀭𑀺𑀧𑀸𑀢𑁂𑀲𑀺 𑀲𑀼𑀤𑀺𑀦𑁆𑀦𑁂 𑀧𑀼𑀢𑁆𑀢𑁂 𑀘 𑀤𑀸𑀭𑁂 𑀘?

‘‘𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀮𑁄𑀓𑀧𑀓𑀢𑀺 𑀮𑁄𑀓𑀸𑀘𑀺𑀡𑁆𑀡𑀁, 𑀮𑀪𑀢𑀺 𑀧𑀺𑀢𑀸 𑀧𑀼𑀢𑁆𑀢𑀁 𑀇𑀡𑀝𑁆𑀝𑁄 𑀯𑀸 𑀆𑀚𑀻𑀯𑀺𑀓𑀧𑀓𑀢𑁄 𑀯𑀸 𑀆𑀯𑀧𑀺𑀢𑀼𑀁 𑀯𑀸 [𑀆𑀥𑀸𑀧𑁂𑀢𑀼𑀁 𑀯𑀸 (𑀲𑁆𑀬𑀸.), 𑀆𑀥𑀧𑀺𑀢𑀼𑀁 𑀯𑀸 (𑀓.)] 𑀯𑀺𑀓𑁆𑀓𑀺𑀡𑀺𑀢𑀼𑀁 𑀯𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀮𑀪𑀢𑀺 𑀧𑀺𑀢𑀸 𑀧𑀼𑀢𑁆𑀢𑀁 𑀇𑀡𑀝𑁆𑀝𑁄 𑀯𑀸 𑀆𑀚𑀻𑀯𑀺𑀓𑀧𑀓𑀢𑁄 𑀯𑀸 𑀆𑀯𑀧𑀺𑀢𑀼𑀁 𑀯𑀸 𑀯𑀺𑀓𑁆𑀓𑀺𑀡𑀺𑀢𑀼𑀁 𑀯𑀸’’𑀢𑀺. ‘‘𑀬𑀤𑀺, 𑀫𑀳𑀸𑀭𑀸𑀚, 𑀮𑀪𑀢𑀺 𑀧𑀺𑀢𑀸 𑀧𑀼𑀢𑁆𑀢𑀁 𑀇𑀡𑀝𑁆𑀝𑁄 𑀯𑀸 𑀆𑀚𑀻𑀯𑀺𑀓𑀧𑀓𑀢𑁄 𑀯𑀸 𑀆𑀯𑀧𑀺𑀢𑀼𑀁 𑀯𑀸 𑀯𑀺𑀓𑁆𑀓𑀺𑀡𑀺𑀢𑀼𑀁 𑀯𑀸, 𑀯𑁂𑀲𑁆𑀲𑀦𑁆𑀢𑀭𑁄𑀧𑀺, 𑀫𑀳𑀸𑀭𑀸𑀚, 𑀭𑀸𑀚𑀸 𑀅𑀮𑀪𑀫𑀸𑀦𑁄 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀉𑀧𑀤𑁆𑀤𑀼𑀢𑁄 𑀤𑀼𑀓𑁆𑀔𑀺𑀢𑁄 𑀢𑀲𑁆𑀲 𑀥𑀫𑁆𑀫𑀥𑀦𑀲𑁆𑀲 𑀧𑀝𑀺𑀮𑀸𑀪𑀸𑀬 𑀧𑀼𑀢𑁆𑀢𑀤𑀸𑀭𑀁 𑀆𑀯𑀧𑁂𑀲𑀺 𑀘 𑀯𑀺𑀓𑁆𑀓𑀺𑀡𑀺 𑀘. 𑀇𑀢𑀺, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 𑀅𑀜𑁆𑀜𑁂𑀲𑀁 𑀤𑀺𑀦𑁆𑀦𑀁 𑀬𑁂𑀯 𑀤𑀺𑀦𑁆𑀦𑀁, 𑀓𑀢𑀁 𑀬𑁂𑀯 𑀓𑀢𑀁. 𑀓𑀺𑀲𑁆𑀲 𑀧𑀦 𑀢𑁆𑀯𑀁, 𑀫𑀳𑀸𑀭𑀸𑀚, 𑀢𑁂𑀦 𑀤𑀸𑀦𑁂𑀦 𑀯𑁂𑀲𑁆𑀲𑀦𑁆𑀢𑀭𑀁 𑀤𑀸𑀦𑀧𑀢𑀺𑀁 𑀅𑀢𑀺𑀩𑀸𑀴𑁆𑀳𑀁 𑀅𑀧𑀲𑀸𑀤𑁂𑀲𑀻’’𑀢𑀺?

‘‘𑀦𑀸𑀳𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀦𑀧𑀢𑀺𑀦𑁄 𑀤𑀸𑀦𑀁 𑀕𑀭𑀳𑀸𑀫𑀺, 𑀅𑀧𑀺 𑀘 𑀧𑀼𑀢𑁆𑀢𑀤𑀸𑀭𑀁 𑀬𑀸𑀘𑀦𑁆𑀢𑁂 𑀦𑀺𑀫𑀺𑀦𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺. ‘‘𑀏𑀢𑀁 𑀔𑁄, 𑀫𑀳𑀸𑀭𑀸𑀚, 𑀅𑀲𑀩𑁆𑀪𑀺𑀓𑀸𑀭𑀡𑀁, 𑀬𑀁 𑀧𑀼𑀢𑁆𑀢𑀤𑀸𑀭𑀁 𑀬𑀸𑀘𑀦𑁆𑀢𑁂 𑀅𑀢𑁆𑀢𑀸𑀦𑀁 𑀤𑀤𑁂𑀬𑁆𑀬, 𑀬𑀁 𑀬𑀁 𑀳𑀺 𑀬𑀸𑀘𑀦𑁆𑀢𑁂 𑀢𑀁 𑀢𑀤𑁂𑀯 𑀤𑀸𑀢𑀩𑁆𑀩𑀁, 𑀏𑀢𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀓𑀫𑁆𑀫𑀁. 𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺 𑀧𑀼𑀭𑀺𑀲𑁄 𑀧𑀸𑀦𑀻𑀬𑀁 𑀆𑀳𑀭𑀸𑀧𑁂𑀬𑁆𑀬, 𑀢𑀲𑁆𑀲 𑀬𑁄 𑀪𑁄𑀚𑀦𑀁 𑀤𑀤𑁂𑀬𑁆𑀬, 𑀅𑀧𑀺 𑀦𑀼 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀢𑀲𑁆𑀲 𑀓𑀺𑀘𑁆𑀘𑀓𑀸𑀭𑀻 𑀅𑀲𑁆𑀲𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀬𑀁 𑀲𑁄 𑀆𑀳𑀭𑀸𑀧𑁂𑀢𑀺, 𑀢𑀫𑁂𑀯 𑀢𑀲𑁆𑀲 𑀤𑁂𑀦𑁆𑀢𑁄 𑀓𑀺𑀘𑁆𑀘𑀓𑀸𑀭𑀻 𑀅𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂 𑀧𑀼𑀢𑁆𑀢𑀤𑀸𑀭𑀁 𑀬𑀸𑀘𑀦𑁆𑀢𑁂 𑀧𑀼𑀢𑁆𑀢𑀤𑀸𑀭𑀁 𑀬𑁂𑀯 𑀅𑀤𑀸𑀲𑀺. 𑀲𑀘𑁂, 𑀫𑀳𑀸𑀭𑀸𑀚, 𑀩𑁆𑀭𑀸𑀳𑁆𑀫𑀡𑁄 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀲𑀭𑀻𑀭𑀁 𑀬𑀸𑀘𑁂𑀬𑁆𑀬, 𑀦 𑀲𑁄, 𑀫𑀳𑀸𑀭𑀸𑀚, 𑀅𑀢𑁆𑀢𑀸𑀦𑀁 𑀭𑀓𑁆𑀔𑁂𑀬𑁆𑀬 𑀦 𑀓𑀫𑁆𑀧𑁂𑀬𑁆𑀬 𑀦 𑀭𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀤𑀺𑀦𑁆𑀦𑀁 𑀧𑀭𑀺𑀘𑁆𑀘𑀢𑁆𑀢𑀁 𑀬𑁂𑀯 𑀲𑀭𑀻𑀭𑀁 𑀪𑀯𑁂𑀬𑁆𑀬. 𑀲𑀘𑁂, 𑀫𑀳𑀸𑀭𑀸𑀚, 𑀓𑁄𑀘𑀺 𑀯𑁂𑀲𑁆𑀲𑀦𑁆𑀢𑀭𑀁 𑀤𑀸𑀦𑀧𑀢𑀺𑀁 𑀉𑀧𑀕𑀦𑁆𑀢𑁆𑀯𑀸 𑀬𑀸𑀘𑁂𑀬𑁆𑀬 ‘𑀤𑀸𑀲𑀢𑁆𑀢𑀁 𑀫𑁂 𑀉𑀧𑁂𑀳𑀻’𑀢𑀺, 𑀤𑀺𑀦𑁆𑀦𑀁 𑀧𑀭𑀺𑀘𑁆𑀘𑀢𑁆𑀢𑀁 𑀬𑁂𑀯𑀲𑁆𑀲 𑀲𑀭𑀻𑀭𑀁 𑀪𑀯𑁂𑀬𑁆𑀬, 𑀦 𑀲𑁄 𑀤𑀢𑁆𑀯𑀸 𑀢𑀧𑁂𑀬𑁆𑀬 [𑀞𑀧𑁂𑀬𑁆𑀬 (𑀲𑀻.)], 𑀭𑀜𑁆𑀜𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀓𑀸𑀬𑁄 𑀩𑀳𑀼𑀲𑀸𑀥𑀸𑀭𑀡𑁄.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀓𑁆𑀓𑀸 𑀫𑀁𑀲𑀧𑁂𑀲𑀺 𑀩𑀳𑀼𑀲𑀸𑀥𑀸𑀭𑀡𑀸, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀓𑀸𑀬𑁄 𑀩𑀳𑀼𑀲𑀸𑀥𑀸𑀭𑀡𑁄. 𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀨𑀮𑀺𑀢𑁄 [𑀨𑀮𑀺𑀦𑁄 (?)] 𑀭𑀼𑀓𑁆𑀔𑁄 𑀦𑀸𑀦𑀸𑀤𑀺𑀚𑀕𑀡𑀲𑀸𑀥𑀸𑀭𑀡𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀓𑀸𑀬𑁄 𑀩𑀳𑀼𑀲𑀸𑀥𑀸𑀭𑀡𑁄. 𑀓𑀺𑀁 𑀓𑀸𑀭𑀡𑀸? ‘𑀏𑀯𑀸𑀳𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀥𑀦𑁄 𑀥𑀦𑀢𑁆𑀣𑀺𑀓𑁄 𑀥𑀦𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄 𑀅𑀚𑀧𑀣𑀁 𑀲𑀗𑁆𑀓𑀼𑀧𑀣𑀁 𑀯𑁂𑀢𑁆𑀢𑀧𑀣𑀁 𑀕𑀘𑁆𑀙𑀢𑀺, 𑀚𑀮𑀣𑀮𑀯𑀸𑀡𑀺𑀚𑁆𑀚𑀁 𑀓𑀭𑁄𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀥𑀦𑀁 𑀆𑀭𑀸𑀥𑁂𑀢𑀺, 𑀥𑀦𑀧𑁆𑀧𑀝𑀺𑀮𑀸𑀪𑀸𑀬 𑀯𑀸𑀬𑀫𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁄 𑀤𑀸𑀦𑀧𑀢𑀺 𑀅𑀥𑀦𑁄 𑀩𑀼𑀤𑁆𑀥𑀥𑀦𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀭𑀢𑀦𑀧𑁆𑀧𑀝𑀺𑀮𑀸𑀪𑀸𑀬 𑀬𑀸𑀘𑀓𑀸𑀦𑀁 𑀥𑀦𑀥𑀜𑁆𑀜𑀁 𑀤𑀸𑀲𑀺𑀤𑀸𑀲𑀁 𑀬𑀸𑀦𑀯𑀸𑀳𑀦𑀁 𑀲𑀓𑀮𑀲𑀸𑀧𑀢𑁂𑀬𑁆𑀬𑀁 𑀲𑀓𑀁 𑀧𑀼𑀢𑁆𑀢𑀤𑀸𑀭𑀁 𑀅𑀢𑁆𑀢𑀸𑀦𑀜𑁆𑀘 𑀘𑀚𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀬𑁂𑀯 𑀧𑀭𑀺𑀬𑁂𑀲𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀅𑀫𑀘𑁆𑀘𑁄 𑀫𑀼𑀤𑁆𑀤𑀓𑀸𑀫𑁄 𑀫𑀼𑀤𑁆𑀤𑀸𑀥𑀺𑀓𑀭𑀡𑀁 𑀬𑀁 𑀓𑀺𑀜𑁆𑀘𑀺 𑀕𑁂𑀳𑁂 𑀥𑀦𑀥𑀜𑁆𑀜𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁, 𑀢𑀁 𑀲𑀩𑁆𑀩𑀁 𑀤𑀢𑁆𑀯𑀸𑀧𑀺 𑀫𑀼𑀤𑁆𑀤𑀧𑁆𑀧𑀝𑀺𑀮𑀸𑀪𑀸𑀬 𑀯𑀸𑀬𑀫𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁄 𑀤𑀸𑀦𑀧𑀢𑀺 𑀲𑀩𑁆𑀩𑀁 𑀢𑀁 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀥𑀦𑀁 𑀤𑀢𑁆𑀯𑀸 𑀚𑀻𑀯𑀺𑀢𑀫𑁆𑀧𑀺 𑀧𑀭𑁂𑀲𑀁 𑀤𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀬𑁂𑀯 𑀧𑀭𑀺𑀬𑁂𑀲𑀢𑀺.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀦𑀧𑀢𑀺𑀦𑁄 𑀏𑀯𑀁 𑀅𑀳𑁄𑀲𑀺 ‘𑀬𑀁 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀬𑀸𑀘𑀢𑀺, 𑀢𑀫𑁂𑀯𑀸𑀳𑀁 𑀢𑀲𑁆𑀲 𑀤𑁂𑀦𑁆𑀢𑁄 𑀓𑀺𑀘𑁆𑀘𑀓𑀸𑀭𑀻 𑀦𑀸𑀫 𑀳𑁄𑀫𑀻’𑀢𑀺, 𑀏𑀯𑀁 𑀲𑁄 𑀢𑀲𑁆𑀲 𑀧𑀼𑀢𑁆𑀢𑀤𑀸𑀭𑀫𑀤𑀸𑀲𑀺. 𑀦 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁄 𑀤𑀸𑀦𑀧𑀢𑀺 𑀤𑁂𑀲𑁆𑀲𑀢𑀸𑀬 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑀤𑀸𑀭𑀫𑀤𑀸𑀲𑀺, 𑀦 𑀅𑀤𑀲𑁆𑀲𑀦𑀓𑀸𑀫𑀢𑀸𑀬 𑀧𑀼𑀢𑁆𑀢𑀤𑀸𑀭𑀫𑀤𑀸𑀲𑀺, 𑀦 𑀅𑀢𑀺𑀩𑀳𑀼𑀓𑀸 𑀫𑁂 𑀧𑀼𑀢𑁆𑀢𑀤𑀸𑀭𑀸, ‘𑀦 𑀲𑀓𑁆𑀓𑁄𑀫𑀺 𑀢𑁂 𑀧𑁄𑀲𑁂𑀢𑀼’𑀦𑁆𑀢𑀺 𑀧𑀼𑀢𑁆𑀢𑀤𑀸𑀭𑀫𑀤𑀸𑀲𑀺, 𑀦 𑀉𑀓𑁆𑀓𑀡𑁆𑀞𑀺𑀢𑁄 ‘𑀅𑀧𑁆𑀧𑀺𑀬𑀸 𑀫𑁂’𑀢𑀺 𑀦𑀻𑀳𑀭𑀺𑀢𑀼𑀓𑀸𑀫𑀢𑀸𑀬 𑀧𑀼𑀢𑁆𑀢𑀤𑀸𑀭𑀫𑀤𑀸𑀲𑀺. 𑀅𑀣 𑀔𑁄 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀭𑀢𑀦𑀲𑁆𑀲𑁂𑀯 𑀧𑀺𑀬𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀓𑀸𑀭𑀡𑀸 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀏𑀯𑀭𑀽𑀧𑀁 𑀅𑀢𑀼𑀮𑀁 𑀯𑀺𑀧𑀼𑀮𑀫𑀦𑀼𑀢𑁆𑀢𑀭𑀁 𑀧𑀺𑀬𑀁 𑀫𑀦𑀸𑀧𑀁 𑀤𑀬𑀺𑀢𑀁 𑀧𑀸𑀡𑀲𑀫𑀁 𑀧𑀼𑀢𑁆𑀢𑀤𑀸𑀭𑀤𑀸𑀦𑀯𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀤𑀸𑀲𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀘𑀭𑀺𑀬𑀸𑀧𑀺𑀝𑀓𑁂 𑁋

‘‘‘𑀦 𑀫𑁂 𑀤𑁂𑀲𑁆𑀲𑀸 𑀉𑀪𑁄 𑀧𑀼𑀢𑁆𑀢𑀸, 𑀫𑀤𑁆𑀤𑀻 𑀤𑁂𑀯𑀻 𑀦 𑀤𑁂𑀲𑁆𑀲𑀺𑀬𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀧𑀺𑀬𑁂 𑀅𑀤𑀸𑀲𑀳’𑀦𑁆𑀢𑀺.

‘‘𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀢𑀭𑁄 𑀭𑀸𑀚𑀸 𑀧𑀼𑀢𑁆𑀢𑀤𑀸𑀦𑀁 [𑀧𑀼𑀢𑁆𑀢𑀤𑀸𑀭𑀁 (𑀓.)] 𑀤𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀢𑀲𑁆𑀲 𑀅𑀢𑀺𑀧𑁂𑀫𑁂𑀦 𑀤𑀼𑀓𑁆𑀔𑀺𑀢𑀲𑁆𑀲 𑀩𑀮𑀯𑀲𑁄𑀓𑁄 𑀉𑀧𑁆𑀧𑀚𑁆𑀚𑀺, 𑀳𑀤𑀬𑀯𑀢𑁆𑀣𑀼 𑀉𑀡𑁆𑀳𑀫𑀳𑁄𑀲𑀺. 𑀦𑀸𑀲𑀺𑀓𑀸𑀬 𑀅𑀧𑁆𑀧𑀳𑁄𑀦𑁆𑀢𑀺𑀬𑀸 𑀫𑀼𑀔𑁂𑀦 𑀉𑀡𑁆𑀳𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀅𑀲𑁆𑀲𑀽𑀦𑀺 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀮𑁄𑀳𑀺𑀢𑀩𑀺𑀦𑁆𑀤𑀽𑀦𑀺 𑀳𑀼𑀢𑁆𑀯𑀸 𑀦𑁂𑀢𑁆𑀢𑁂𑀳𑀺 𑀦𑀺𑀓𑁆𑀔𑀫𑀺𑀁𑀲𑀼. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀤𑀼𑀓𑁆𑀔𑁂𑀦 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑀤𑀸𑀭𑀫𑀤𑀸𑀲𑀺 ‘𑀫𑀸 𑀫𑁂 𑀤𑀸𑀦𑀧𑀣𑁄 𑀧𑀭𑀺𑀳𑀸𑀬𑀻’𑀢𑀺.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑁆𑀯𑁂 𑀤𑀸𑀭𑀓𑁂 𑀅𑀤𑀸𑀲𑀺. 𑀓𑀢𑀫𑁂 𑀤𑁆𑀯𑁂? 𑀤𑀸𑀦𑀧𑀣𑁄 𑀘 𑀫𑁂 𑀅𑀧𑀭𑀺𑀳𑀻𑀦𑁄 𑀪𑀯𑀺𑀲𑁆𑀲𑀢𑀺, 𑀤𑀼𑀓𑁆𑀔𑀺𑀢𑁂 𑀘 𑀫𑁂 𑀧𑀼𑀢𑁆𑀢𑀓𑁂 𑀯𑀦𑀫𑀽𑀮𑀨𑀮𑁂𑀳𑀺 𑀇𑀢𑁄𑀦𑀺𑀤𑀸𑀦𑀁 𑀅𑀬𑁆𑀬𑀓𑁄 𑀫𑁄𑀘𑁂𑀲𑁆𑀲𑀢𑀻𑀢𑀺. 𑀚𑀸𑀦𑀸𑀢𑀺 𑀳𑀺, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 ‘𑀦 𑀫𑁂 𑀤𑀸𑀭𑀓𑀸 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁, 𑀇𑀫𑁂 𑀘 𑀤𑀸𑀭𑀓𑁂 𑀅𑀬𑁆𑀬𑀓𑁄 𑀦𑀺𑀓𑁆𑀓𑀺𑀡𑀺𑀲𑁆𑀲𑀢𑀺, 𑀏𑀯𑀁 𑀅𑀫𑁆𑀳𑀸𑀓𑀫𑁆𑀧𑀺 𑀕𑀫𑀦𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑁆𑀯𑁂 𑀤𑀸𑀭𑀓𑁂 𑀅𑀤𑀸𑀲𑀺.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀚𑀸𑀦𑀸𑀢𑀺 ‘𑀅𑀬𑀁 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀚𑀺𑀡𑁆𑀡𑁄 𑀯𑀼𑀟𑁆𑀠𑁄 𑀫𑀳𑀮𑁆𑀮𑀓𑁄 𑀤𑀼𑀩𑁆𑀩𑀮𑁄 𑀪𑀕𑁆𑀕𑁄 𑀤𑀡𑁆𑀟𑀧𑀭𑀸𑀬𑀡𑁄 𑀔𑀻𑀡𑀸𑀬𑀼𑀓𑁄 𑀧𑀭𑀺𑀢𑁆𑀢𑀧𑀼𑀜𑁆𑀜𑁄, 𑀦𑁂𑀲𑁄 𑀲𑀫𑀢𑁆𑀣𑁄 𑀇𑀫𑁂 𑀤𑀸𑀭𑀓𑁂 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼’𑀦𑁆𑀢𑀺. 𑀲𑀓𑁆𑀓𑀼𑀡𑁂𑀬𑁆𑀬 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀧𑀸𑀓𑀢𑀺𑀓𑁂𑀦 𑀩𑀮𑁂𑀦 𑀇𑀫𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀕𑀳𑁂𑀢𑁆𑀯𑀸 𑀧𑁂𑀴𑀸𑀬 𑀯𑀸 𑀲𑀫𑀼𑀕𑁆𑀕𑁂 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀧𑁆𑀧𑀪𑁂 𑀓𑀢𑁆𑀯𑀸 𑀣𑀸𑀮𑀓𑀧𑀭𑀺𑀪𑁄𑀕𑁂𑀦 [𑀧𑀤𑀻𑀧𑀧𑀭𑀺𑀪𑁄𑀕𑁂𑀦 (𑀲𑁆𑀬𑀸.)] 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑁆𑀧𑀝𑀺𑀪𑀸𑀕𑀲𑁆𑀲 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀦𑁆𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁. 𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀫𑀡𑀺𑀭𑀢𑀦𑀁 𑀲𑀼𑀪𑀁 𑀚𑀸𑀢𑀺𑀫𑀦𑁆𑀢𑀁 𑀅𑀝𑁆𑀞𑀁𑀲𑀁 𑀲𑀼𑀧𑀭𑀺𑀓𑀫𑁆𑀫𑀓𑀢𑀁 𑀘𑀢𑀼𑀳𑀢𑁆𑀣𑀸𑀬𑀸𑀫𑀁 𑀲𑀓𑀝𑀦𑀸𑀪𑀺𑀧𑀭𑀺𑀡𑀸𑀳𑀁 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀧𑀺𑀮𑁄𑀢𑀺𑀓𑀸𑀬 𑀯𑁂𑀞𑁂𑀢𑁆𑀯𑀸 𑀧𑁂𑀴𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀣𑀓𑀦𑀺𑀲𑀸𑀦𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀮𑁄𑀓𑁂 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀫𑀡𑀺𑀭𑀢𑀦𑀧𑁆𑀧𑀝𑀺𑀪𑀸𑀕𑀲𑁆𑀲 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁. 𑀬𑀣𑀸, 𑀫𑀳𑀸𑀭𑀸𑀚, 𑀢𑀺𑀥𑀸 𑀧𑀪𑀺𑀦𑁆𑀦𑁄 𑀲𑀩𑁆𑀩𑀲𑁂𑀢𑁄 𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑀺𑀢𑁄 𑀅𑀝𑁆𑀞𑀭𑀢𑀦𑀼𑀩𑁆𑀩𑁂𑀥𑁄 𑀦𑀯𑀭𑀢𑀦𑀸𑀬𑀸𑀫𑀧𑀭𑀺𑀡𑀸𑀳𑁄 𑀧𑀸𑀲𑀸𑀤𑀺𑀓𑁄 𑀤𑀲𑁆𑀲𑀦𑀻𑀬𑁄 𑀉𑀧𑁄𑀲𑀣𑁄 𑀦𑀸𑀕𑀭𑀸𑀚𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀲𑀼𑀧𑁆𑀧𑁂𑀦 𑀯𑀸 𑀲𑀭𑀸𑀯𑁂𑀦 𑀯𑀸 𑀧𑀺𑀤𑀳𑀺𑀢𑀼𑀁, 𑀕𑁄𑀯𑀘𑁆𑀙𑀓𑁄 𑀯𑀺𑀬 𑀯𑀘𑁆𑀙𑀓𑀲𑀸𑀮𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 𑀯𑀸, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀮𑁄𑀓𑁂 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀝𑀺𑀪𑀸𑀕𑀲𑁆𑀲 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁. 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀤𑀻𑀖𑀧𑀼𑀣𑀼𑀮𑀯𑀺𑀢𑁆𑀣𑀺𑀡𑁆𑀡𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀭𑀼𑀢𑁆𑀢𑀭𑁄 𑀅𑀧𑀭𑀺𑀬𑁄𑀕𑀸𑀴𑁆𑀳𑁄 𑀅𑀦𑀸𑀯𑀝𑁄 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀲𑀩𑁆𑀩𑀢𑁆𑀣 𑀧𑀺𑀤𑀳𑀺𑀢𑁆𑀯𑀸 𑀏𑀓𑀢𑀺𑀢𑁆𑀣𑁂𑀦 𑀧𑀭𑀺𑀪𑁄𑀕𑀁 𑀓𑀸𑀢𑀼𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀮𑁄𑀓𑁂 𑀫𑀳𑀸𑀲𑀫𑀼𑀤𑁆𑀤𑀧𑁆𑀧𑀝𑀺𑀪𑀸𑀕𑀲𑁆𑀲 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁. 𑀬𑀣𑀸, 𑀫𑀳𑀸𑀭𑀸𑀚, 𑀳𑀺𑀫𑀯𑀦𑁆𑀢𑁄 𑀧𑀩𑁆𑀩𑀢𑀭𑀸𑀚𑀸 𑀧𑀜𑁆𑀘𑀬𑁄𑀚𑀦𑀲𑀢𑀁 𑀅𑀘𑁆𑀘𑀼𑀕𑁆𑀕𑀢𑁄 𑀦𑀪𑁂 𑀢𑀺𑀲𑀳𑀲𑁆𑀲𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑁄 𑀘𑀢𑀼𑀭𑀸𑀲𑀻𑀢𑀺𑀓𑀽𑀝𑀲𑀳𑀲𑁆𑀲𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀧𑀜𑁆𑀘𑀦𑁆𑀦𑀁 𑀫𑀳𑀸𑀦𑀤𑀻𑀲𑀢𑀸𑀦𑀁 𑀧𑀪𑀯𑁄 𑀫𑀳𑀸𑀪𑀽𑀢𑀕𑀡𑀸𑀮𑀬𑁄 𑀦𑀸𑀦𑀸𑀯𑀺𑀥𑀕𑀦𑁆𑀥𑀥𑀭𑁄 𑀤𑀺𑀩𑁆𑀩𑁄𑀲𑀥𑀲𑀢𑀲𑀫𑀮𑀗𑁆𑀓𑀢𑁄 𑀦𑀪𑁂 𑀯𑀮𑀸𑀳𑀓𑁄 𑀯𑀺𑀬 𑀅𑀘𑁆𑀘𑀼𑀕𑁆𑀕𑀢𑁄 𑀤𑀺𑀲𑁆𑀲𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀮𑁄𑀓𑁂 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀭𑀸𑀚𑀧𑁆𑀧𑀝𑀺𑀪𑀸𑀕𑀲𑁆𑀲 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁. 𑀬𑀣𑀸, 𑀫𑀳𑀸𑀭𑀸𑀚, 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁 𑀉𑀧𑀭𑀺𑀧𑀩𑁆𑀩𑀢𑀕𑁆𑀕𑁂 𑀚𑀮𑀫𑀸𑀦𑁄 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀼𑀯𑀺𑀤𑀽𑀭𑁂𑀧𑀺 𑀧𑀜𑁆𑀜𑀸𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀧𑀩𑁆𑀩𑀢𑀕𑁆𑀕𑁂 𑀚𑀮𑀫𑀸𑀦𑁄 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀲𑀼𑀯𑀺𑀤𑀽𑀭𑁂𑀧𑀺 𑀧𑀸𑀓𑀝𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁. 𑀬𑀣𑀸, 𑀫𑀳𑀸𑀭𑀸𑀚, 𑀳𑀺𑀫𑀯𑀦𑁆𑀢𑁂 𑀧𑀩𑁆𑀩𑀢𑁂 𑀦𑀸𑀕𑀧𑀼𑀧𑁆𑀨𑀲𑀫𑀬𑁂 𑀉𑀚𑀼𑀯𑀸𑀢𑁂 𑀯𑀸𑀬𑀦𑁆𑀢𑁂 𑀤𑀲 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺 𑀧𑀼𑀧𑁆𑀨𑀕𑀦𑁆𑀥𑁄 𑀯𑀸𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀭𑀜𑁆𑀜𑁄 𑀅𑀧𑀺 𑀬𑁄𑀚𑀦𑀲𑀳𑀲𑁆𑀲𑁂𑀳𑀺𑀧𑀺 𑀬𑀸𑀯 𑀅𑀓𑀦𑀺𑀝𑁆𑀞𑀪𑀯𑀦𑀁 𑀏𑀢𑁆𑀣𑀦𑁆𑀢𑀭𑁂 𑀲𑀼𑀭𑀸𑀲𑀼𑀭𑀕𑀭𑀼𑀴𑀕𑀦𑁆𑀥𑀩𑁆𑀩𑀬𑀓𑁆𑀔𑀭𑀓𑁆𑀔𑀲𑀫𑀳𑁄𑀭𑀕𑀓𑀺𑀦𑁆𑀦𑀭𑀇𑀦𑁆𑀤𑀪𑀯𑀦𑁂𑀲𑀼 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄, 𑀲𑀻𑀮𑀯𑀭𑀕𑀦𑁆𑀥𑁄 𑀘𑀲𑁆𑀲 𑀲𑀫𑁆𑀧𑀯𑀸𑀬𑀢𑀺, 𑀢𑁂𑀦 𑀢𑀲𑁆𑀲 𑀤𑀸𑀭𑀓𑀸 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀤𑀸𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑀼𑀁. 𑀅𑀦𑀼𑀲𑀺𑀝𑁆𑀞𑁄, 𑀫𑀳𑀸𑀭𑀸𑀚, 𑀚𑀸𑀮𑀻 𑀓𑀼𑀫𑀸𑀭𑁄 𑀧𑀺𑀢𑀭𑀸 𑀯𑁂𑀲𑁆𑀲𑀦𑁆𑀢𑀭𑁂𑀦 𑀭𑀜𑁆𑀜𑀸 ‘𑀅𑀬𑁆𑀬𑀓𑁄 𑀢𑁂, 𑀢𑀸𑀢, 𑀢𑀼𑀫𑁆𑀳𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀁 𑀤𑀢𑁆𑀯𑀸 𑀦𑀺𑀓𑁆𑀓𑀺𑀡𑀦𑁆𑀢𑁄 𑀢𑀁 𑀦𑀺𑀓𑁆𑀔𑀲𑀳𑀲𑁆𑀲𑀁 𑀤𑀢𑁆𑀯𑀸 𑀦𑀺𑀓𑁆𑀓𑀺𑀡𑀸𑀢𑀼, 𑀓𑀡𑁆𑀳𑀸𑀚𑀺𑀦𑀁 𑀦𑀺𑀓𑁆𑀓𑀺𑀡𑀦𑁆𑀢𑁄 𑀤𑀸𑀲𑀲𑀢𑀁 𑀤𑀸𑀲𑀺𑀲𑀢𑀁 𑀳𑀢𑁆𑀣𑀺𑀲𑀢𑀁 𑀅𑀲𑁆𑀲𑀲𑀢𑀁 𑀥𑁂𑀦𑀼𑀲𑀢𑀁 𑀉𑀲𑀪𑀲𑀢𑀁 𑀦𑀺𑀓𑁆𑀔𑀲𑀢𑀦𑁆𑀢𑀺 𑀲𑀩𑁆𑀩𑀲𑀢𑀁 𑀤𑀢𑁆𑀯𑀸 𑀦𑀺𑀓𑁆𑀓𑀺𑀡𑀸𑀢𑀼, 𑀬𑀤𑀺 𑀢𑁂, 𑀢𑀸𑀢, 𑀅𑀬𑁆𑀬𑀓𑁄 𑀢𑀼𑀫𑁆𑀳𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀢𑁆𑀣𑀢𑁄 𑀆𑀡𑀸𑀬 𑀩𑀮𑀲𑀸 𑀫𑀼𑀥𑀸 𑀕𑀡𑁆𑀳𑀸𑀢𑀺, 𑀫𑀸 𑀢𑀼𑀫𑁆𑀳𑁂 𑀅𑀬𑁆𑀬𑀓𑀲𑁆𑀲 𑀯𑀘𑀦𑀁 𑀓𑀭𑀺𑀢𑁆𑀣, 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯 𑀅𑀦𑀼𑀬𑀸𑀬𑀺𑀦𑁄 𑀳𑁄𑀣𑀸’𑀢𑀺, 𑀏𑀯𑀫𑀦𑀼𑀲𑀸𑀲𑀺𑀢𑁆𑀯𑀸 𑀧𑀼𑀢𑁆𑀢𑁂 𑀧𑁂𑀲𑁂𑀲𑀺, 𑀢𑀢𑁄 𑀚𑀸𑀮𑀻𑀓𑀼𑀫𑀸𑀭𑁄 𑀕𑀦𑁆𑀢𑁆𑀯𑀸 𑀅𑀬𑁆𑀬𑀓𑁂𑀦 𑀧𑀼𑀝𑁆𑀞𑁄 𑀓𑀣𑁂𑀲𑀺 𑁋

‘‘‘𑀲𑀳𑀲𑁆𑀲𑀕𑁆𑀖𑀁 𑀳𑀺 𑀫𑀁 𑀢𑀸𑀢, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀺𑀢𑀸 𑀅𑀤𑀸;

𑀅𑀣𑁄 𑀓𑀡𑁆𑀳𑀸𑀚𑀺𑀦𑀁 𑀓𑀜𑁆𑀜𑀁, 𑀳𑀢𑁆𑀣𑀻𑀦𑀜𑁆𑀘 𑀲𑀢𑁂𑀦 𑀘𑀸’’’𑀢𑀺.

‘‘𑀲𑀼𑀦𑀺𑀩𑁆𑀩𑁂𑀞𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄; 𑀲𑀼𑀪𑀺𑀦𑁆𑀦𑀁 𑀤𑀺𑀝𑁆𑀞𑀺𑀚𑀸𑀮𑀁; 𑀲𑀼𑀫𑀤𑁆𑀤𑀺𑀢𑁄 𑀧𑀭𑀯𑀸𑀤𑁄; 𑀲𑀓𑀲𑀫𑀬𑁄 𑀲𑀼𑀤𑀻𑀧𑀺𑀢𑁄; 𑀩𑁆𑀬𑀜𑁆𑀚𑀦𑀁 𑀲𑀼𑀧𑀭𑀺𑀲𑁄𑀥𑀺𑀢𑀁; 𑀲𑀼𑀯𑀺𑀪𑀢𑁆𑀢𑁄 𑀅𑀢𑁆𑀣𑁄; 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀯𑁂𑀲𑁆𑀲𑀦𑁆𑀢𑀭𑀧𑀜𑁆𑀳𑁄 𑀧𑀞𑀫𑁄.

𑁨. 𑀤𑀼𑀓𑁆𑀓𑀭𑀓𑀸𑀭𑀺𑀓𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀯 𑀩𑁄𑀥𑀺𑀲𑀢𑁆𑀢𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑀺, 𑀉𑀤𑀸𑀳𑀼 𑀕𑁄𑀢𑀫𑁂𑀦𑁂𑀯 𑀩𑁄𑀥𑀺𑀲𑀢𑁆𑀢𑁂𑀦 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀓𑀢𑀸’’𑀢𑀺? ‘‘𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀲𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀸, 𑀕𑁄𑀢𑀫𑁂𑀦𑁂𑀯 𑀩𑁄𑀥𑀺𑀲𑀢𑁆𑀢𑁂𑀦 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀓𑀢𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀤𑀺 𑀏𑀯𑀁 𑀅𑀬𑀼𑀢𑁆𑀢𑀁, 𑀬𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑁂𑀳𑀺 𑀯𑁂𑀫𑀢𑁆𑀢𑀢𑀸 𑀳𑁄𑀢𑀻’’𑀢𑀺. ‘‘𑀘𑀢𑀽𑀳𑀺, 𑀫𑀳𑀸𑀭𑀸𑀚, 𑀞𑀸𑀦𑁂𑀳𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑁂𑀳𑀺 𑀯𑁂𑀫𑀢𑁆𑀢𑀢𑀸 𑀳𑁄𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀓𑀼𑀮𑀯𑁂𑀫𑀢𑁆𑀢𑀢𑀸 𑀧𑀥𑀸𑀦𑀯𑁂𑀫𑀢𑁆𑀢𑀢𑀸 [𑀅𑀤𑁆𑀥𑀸𑀦𑀯𑁂𑀫𑀢𑁆𑀢𑀢𑀸 (𑀲𑀻. 𑀲𑁆𑀬𑀸. 𑀧𑀻.)] 𑀆𑀬𑀼𑀯𑁂𑀫𑀢𑁆𑀢𑀢𑀸 𑀧𑀫𑀸𑀡𑀯𑁂𑀫𑀢𑁆𑀢𑀢𑀸𑀢𑀺. 𑀇𑀫𑁂𑀳𑀺 𑀔𑁄, 𑀫𑀳𑀸𑀭𑀸𑀚, 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑁂𑀳𑀺 𑀯𑁂𑀫𑀢𑁆𑀢𑀢𑀸 𑀳𑁄𑀢𑀺. 𑀲𑀩𑁆𑀩𑁂𑀲𑀫𑁆𑀧𑀺, 𑀫𑀳𑀸𑀭𑀸𑀚, 𑀩𑀼𑀤𑁆𑀥𑀸𑀦𑀁 𑀭𑀽𑀧𑁂 𑀲𑀻𑀮𑁂 𑀲𑀫𑀸𑀥𑀺𑀫𑁆𑀳𑀺 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂 𑀘𑀢𑀼𑀯𑁂𑀲𑀸𑀭𑀚𑁆𑀚𑁂 𑀤𑀲𑀢𑀣𑀸𑀕𑀢𑀩𑀮𑁂 𑀙𑀅𑀲𑀸𑀥𑀸𑀭𑀡𑀜𑀸𑀡𑁂 𑀘𑀼𑀤𑁆𑀤𑀲𑀩𑀼𑀤𑁆𑀥𑀜𑀸𑀡𑁂 𑀅𑀝𑁆𑀞𑀸𑀭𑀲𑀩𑀼𑀤𑁆𑀥𑀥𑀫𑁆𑀫𑁂 𑀓𑁂𑀯𑀮𑁂 𑀘 𑀩𑀼𑀤𑁆𑀥𑀕𑀼𑀡𑁂 [𑀩𑀼𑀤𑁆𑀥𑀥𑀫𑁆𑀫𑁂 (𑀲𑀻. 𑀧𑀻.)] 𑀦𑀢𑁆𑀣𑀺 𑀯𑁂𑀫𑀢𑁆𑀢𑀢𑀸, 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀸 𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀲𑀫𑀲𑀫𑀸’’𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀸 𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀲𑀫𑀲𑀫𑀸, 𑀓𑁂𑀦 𑀓𑀸𑀭𑀡𑁂𑀦 𑀕𑁄𑀢𑀫𑁂𑀦𑁂𑀯 𑀩𑁄𑀥𑀺𑀲𑀢𑁆𑀢𑁂𑀦 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀓𑀢𑀸’’𑀢𑀺? ‘‘𑀅𑀧𑀭𑀺𑀧𑀓𑁆𑀓𑁂, 𑀫𑀳𑀸𑀭𑀸𑀚, 𑀜𑀸𑀡𑁂 𑀅𑀧𑀭𑀺𑀧𑀓𑁆𑀓𑀸𑀬 𑀩𑁄𑀥𑀺𑀬𑀸 𑀕𑁄𑀢𑀫𑁄 𑀩𑁄𑀥𑀺𑀲𑀢𑁆𑀢𑁄 𑀦𑁂𑀓𑁆𑀔𑀫𑁆𑀫𑀫𑀪𑀺𑀦𑀺𑀓𑁆𑀔𑀦𑁆𑀢𑁄 𑀅𑀧𑀭𑀺𑀧𑀓𑁆𑀓𑀁 𑀜𑀸𑀡𑀁 𑀧𑀭𑀺𑀧𑀸𑀘𑀬𑀫𑀸𑀦𑁂𑀦 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀓𑀢𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀓𑀸𑀭𑀡𑁂𑀦 𑀩𑁄𑀥𑀺𑀲𑀢𑁆𑀢𑁄 𑀅𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀅𑀧𑀭𑀺𑀧𑀓𑁆𑀓𑀸𑀬 𑀩𑁄𑀥𑀺𑀬𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄, 𑀦𑀦𑀼 𑀦𑀸𑀫 𑀜𑀸𑀡𑀁 𑀧𑀭𑀺𑀧𑀸𑀘𑁂𑀢𑁆𑀯𑀸 𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀦𑀺𑀓𑁆𑀔𑀫𑀺𑀢𑀩𑁆𑀩’’𑀦𑁆𑀢𑀺?

‘‘𑀩𑁄𑀥𑀺𑀲𑀢𑁆𑀢𑁄, 𑀫𑀳𑀸𑀭𑀸𑀚, 𑀯𑀺𑀧𑀭𑀻𑀢𑀁 𑀇𑀢𑁆𑀣𑀸𑀕𑀸𑀭𑀁 𑀤𑀺𑀲𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺, 𑀢𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀺𑀲𑁆𑀲 𑀅𑀭𑀢𑀺 𑀉𑀧𑁆𑀧𑀚𑁆𑀚𑀺, 𑀅𑀭𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 𑀅𑀜𑁆𑀜𑀢𑀭𑁄 𑀫𑀸𑀭𑀓𑀸𑀬𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 ‘𑀅𑀬𑀁 𑀔𑁄 𑀓𑀸𑀮𑁄 𑀅𑀭𑀢𑀺𑀘𑀺𑀢𑁆𑀢𑀲𑁆𑀲 𑀯𑀺𑀦𑁄𑀤𑀦𑀸𑀬𑀸’𑀢𑀺 𑀯𑁂𑀳𑀸𑀲𑁂 𑀞𑀢𑁆𑀯𑀸 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺 𑁋

‘‘𑀫𑀸𑀭𑀺𑀲, 𑀫𑀸 𑀔𑁄 𑀢𑁆𑀯𑀁 𑀉𑀓𑁆𑀓𑀡𑁆𑀞𑀺𑀢𑁄 𑀅𑀳𑁄𑀲𑀺, 𑀇𑀢𑁄 𑀢𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀺𑀲𑁆𑀲𑀢𑀺 𑀲𑀳𑀲𑁆𑀲𑀸𑀭𑀁 𑀲𑀦𑁂𑀫𑀺𑀓𑀁 𑀲𑀦𑀸𑀪𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁, 𑀧𑀣𑀯𑀺𑀕𑀢𑀸𑀦𑀺 𑀘 𑀢𑁂 𑀭𑀢𑀦𑀸𑀦𑀺 𑀆𑀓𑀸𑀲𑀝𑁆𑀞𑀸𑀦𑀺 𑀘 𑀲𑀬𑀫𑁂𑀯 𑀉𑀧𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀤𑁆𑀯𑀺𑀲𑀳𑀲𑁆𑀲𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀏𑀓𑀫𑀼𑀔𑁂𑀦 𑀆𑀡𑀸 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀧𑀭𑁄𑀲𑀳𑀲𑁆𑀲𑀜𑁆𑀘 𑀢𑁂 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸, 𑀢𑁂𑀳𑀺 𑀧𑀼𑀢𑁆𑀢𑁂𑀳𑀺 𑀧𑀭𑀺𑀓𑀺𑀡𑁆𑀡𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄 𑀘𑀢𑀼𑀤𑁆𑀤𑀻𑀧𑀫𑀦𑀼𑀲𑀸𑀲𑀺𑀲𑁆𑀲𑀲𑀻’𑀢𑀺.

‘‘𑀬𑀣𑀸 𑀦𑀸𑀫 𑀤𑀺𑀯𑀲𑀲𑀦𑁆𑀢𑀢𑁆𑀢𑀁 𑀅𑀬𑁄𑀲𑀽𑀮𑀁 𑀲𑀩𑁆𑀩𑀢𑁆𑀣 𑀉𑀧𑀟𑀳𑀦𑁆𑀢𑀁 𑀓𑀡𑁆𑀡𑀲𑁄𑀢𑀁 𑀧𑀯𑀺𑀲𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀁 𑀯𑀘𑀦𑀁 𑀓𑀡𑁆𑀡𑀲𑁄𑀢𑀁 𑀧𑀯𑀺𑀲𑀺𑀢𑁆𑀣, 𑀇𑀢𑀺 𑀲𑁄 𑀧𑀓𑀢𑀺𑀬𑀸𑀯 𑀉𑀓𑁆𑀓𑀡𑁆𑀞𑀺𑀢𑁄 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀯𑀘𑀦𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀩𑁆𑀩𑀺𑀚𑁆𑀚𑀺 𑀲𑀁𑀯𑀺𑀚𑁆𑀚𑀺 𑀲𑀁𑀯𑁂𑀕𑀫𑀸𑀧𑀚𑁆𑀚𑀺.

‘‘𑀬𑀣𑀸 𑀧𑀦, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀚𑀮𑀫𑀸𑀦𑁄 𑀅𑀜𑁆𑀜𑁂𑀦 𑀓𑀝𑁆𑀞𑁂𑀦 𑀉𑀧𑀟𑀳𑀺𑀢𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀚𑀮𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀧𑀓𑀢𑀺𑀬𑀸𑀯 𑀉𑀓𑁆𑀓𑀡𑁆𑀞𑀺𑀢𑁄 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀯𑀘𑀦𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀩𑁆𑀩𑀺𑀚𑁆𑀚𑀺 𑀲𑀁𑀯𑀺𑀚𑁆𑀚𑀺 𑀲𑀁𑀯𑁂𑀕𑀫𑀸𑀧𑀚𑁆𑀚𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀫𑀳𑀸𑀧𑀣𑀯𑀻 𑀧𑀓𑀢𑀺𑀢𑀺𑀦𑁆𑀢𑀸 𑀦𑀺𑀩𑁆𑀩𑀢𑁆𑀢𑀳𑀭𑀺𑀢𑀲𑀤𑁆𑀤𑀮𑀸 𑀆𑀲𑀺𑀢𑁆𑀢𑁄𑀤𑀓𑀸 𑀘𑀺𑀓𑁆𑀔𑀮𑁆𑀮𑀚𑀸𑀢𑀸 𑀧𑀼𑀦𑀤𑁂𑀯 𑀫𑀳𑀸𑀫𑁂𑀖𑁂 𑀅𑀪𑀺𑀯𑀼𑀝𑁆𑀞𑁂 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀘𑀺𑀓𑁆𑀔𑀮𑁆𑀮𑀢𑀭𑀸 𑀅𑀲𑁆𑀲, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀧𑀓𑀢𑀺𑀬𑀸𑀯 𑀉𑀓𑁆𑀓𑀡𑁆𑀞𑀺𑀢𑁄 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀯𑀘𑀦𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀉𑀩𑁆𑀩𑀺𑀚𑁆𑀚𑀺 𑀲𑀁𑀯𑀺𑀚𑁆𑀚𑀺 𑀲𑀁𑀯𑁂𑀕𑀫𑀸𑀧𑀚𑁆𑀚𑀻’’𑀢𑀺.

‘‘𑀅𑀧𑀺 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑀤𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬 𑀩𑁄𑀥𑀺𑀲𑀢𑁆𑀢𑁄 𑀤𑀺𑀩𑁆𑀩𑁂 𑀘𑀓𑁆𑀓𑀭𑀢𑀦𑁂 𑀦𑀺𑀩𑁆𑀩𑀢𑁆𑀢𑁂’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀅𑀧𑀺 𑀘 𑀧𑀮𑁄𑀪𑀦𑀢𑁆𑀣𑀸𑀬 𑀢𑀸𑀬 𑀤𑁂𑀯𑀢𑀸𑀬 𑀫𑀼𑀲𑀸 𑀪𑀡𑀺𑀢𑀁, 𑀬𑀤𑀺𑀧𑀺, 𑀫𑀳𑀸𑀭𑀸𑀚, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀩𑁄𑀥𑀺𑀲𑀢𑁆𑀢𑁄 𑀦 𑀦𑀺𑀯𑀢𑁆𑀢𑁂𑀬𑁆𑀬. 𑀓𑀺𑀁 𑀓𑀸𑀭𑀡𑀁? ‘𑀅𑀦𑀺𑀘𑁆𑀘’𑀦𑁆𑀢𑀺, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀤𑀴𑁆𑀳𑀁 𑀅𑀕𑁆𑀕𑀳𑁂𑀲𑀺, ‘𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’𑀢𑀺 𑀤𑀴𑁆𑀳𑀁 𑀅𑀕𑁆𑀕𑀳𑁂𑀲𑀺, 𑀉𑀧𑀸𑀤𑀸𑀦𑀓𑁆𑀔𑀬𑀁 𑀧𑀢𑁆𑀢𑁄.

‘‘𑀬𑀣𑀸, 𑀫𑀳𑀸𑀭𑀸𑀚, 𑀅𑀦𑁄𑀢𑀢𑁆𑀢𑀤𑀳𑀢𑁄 𑀉𑀤𑀓𑀁 𑀕𑀗𑁆𑀕𑀁 𑀦𑀤𑀺𑀁 𑀧𑀯𑀺𑀲𑀢𑀺, 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑀢𑁄 𑀧𑀸𑀢𑀸𑀮𑀫𑀼𑀔𑀁 𑀧𑀯𑀺𑀲𑀢𑀺, 𑀅𑀧𑀺 𑀦𑀼, 𑀫𑀳𑀸𑀭𑀸𑀚, 𑀢𑀁 𑀉𑀤𑀓𑀁 𑀧𑀸𑀢𑀸𑀮𑀫𑀼𑀔𑀕𑀢𑀁 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑁂𑀬𑁆𑀬, 𑀫𑀳𑀸𑀲𑀫𑀼𑀤𑁆𑀤𑀢𑁄 𑀕𑀗𑁆𑀕𑀁 𑀦𑀤𑀺𑀁 𑀧𑀯𑀺𑀲𑁂𑀬𑁆𑀬, 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀧𑀼𑀦 𑀅𑀦𑁄𑀢𑀢𑁆𑀢𑀁 𑀧𑀯𑀺𑀲𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁂𑀦 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁 𑀘𑀢𑀼𑀭𑁄 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀓𑀼𑀲𑀮𑀁 𑀧𑀭𑀺𑀧𑀸𑀘𑀺𑀢𑀁 𑀇𑀫𑀲𑁆𑀲 𑀪𑀯𑀲𑁆𑀲 𑀓𑀸𑀭𑀡𑀸, 𑀲𑁄𑀬𑀁 𑀅𑀦𑁆𑀢𑀺𑀫𑀪𑀯𑁄 𑀅𑀦𑀼𑀧𑁆𑀧𑀢𑁆𑀢𑁄 𑀧𑀭𑀺𑀧𑀓𑁆𑀓𑀁 𑀩𑁄𑀥𑀺𑀜𑀸𑀡𑀁 𑀙𑀳𑀺 𑀯𑀲𑁆𑀲𑁂𑀳𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀲𑀩𑁆𑀩𑀜𑁆𑀜𑀽 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀘𑀓𑁆𑀓𑀭𑀢𑀦𑀓𑀸𑀭𑀡𑀸 [𑀘𑀓𑁆𑀓𑀭𑀢𑀦𑀲𑁆𑀲 𑀓𑀸𑀭𑀡𑀸 (𑀲𑀻. 𑀲𑁆𑀬𑀸. 𑀧𑀻.)] 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬𑀸’’𑀢𑀺 [𑀧𑀭𑀺𑀦𑀺𑀯𑀢𑁆𑀢𑁂𑀬𑁆𑀬𑀸𑀢𑀺 (𑀲𑀻. 𑀧𑀻. 𑀓.)]? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀫𑀳𑀸𑀧𑀣𑀯𑀻 𑀧𑀭𑀺𑀯𑀢𑁆𑀢𑁂𑀬𑁆𑀬 𑀲𑀓𑀸𑀦𑀦𑀸 𑀲𑀧𑀩𑁆𑀩𑀢𑀸, 𑀦𑀢𑁆𑀯𑁂𑀯 𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬 𑀅𑀧𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁. 𑀆𑀭𑁄𑀳𑁂𑀬𑁆𑀬𑀧𑀺 𑀘𑁂, 𑀫𑀳𑀸𑀭𑀸𑀚, 𑀕𑀗𑁆𑀕𑀸𑀬 𑀉𑀤𑀓𑀁 𑀧𑀝𑀺𑀲𑁄𑀢𑀁, 𑀦𑀢𑁆𑀯𑁂𑀯 𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬 𑀅𑀧𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁; 𑀯𑀺𑀲𑀼𑀲𑁆𑀲𑁂𑀬𑁆𑀬𑀧𑀺 𑀘𑁂, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀅𑀧𑀭𑀺𑀫𑀺𑀢𑀚𑀮𑀥𑀭𑁄 𑀕𑁄𑀧𑀤𑁂 𑀉𑀤𑀓𑀁 𑀯𑀺𑀬, 𑀦𑀢𑁆𑀯𑁂𑀯 𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬 𑀅𑀧𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁; 𑀨𑀮𑁂𑀬𑁆𑀬𑀧𑀺 𑀘𑁂, 𑀫𑀳𑀸𑀭𑀸𑀚, 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸 𑀲𑀢𑀥𑀸 𑀯𑀸 𑀲𑀳𑀲𑁆𑀲𑀥𑀸 𑀯𑀸, 𑀦𑀢𑁆𑀯𑁂𑀯 𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬 𑀅𑀧𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁; 𑀧𑀢𑁂𑀬𑁆𑀬𑀼𑀫𑁆𑀧𑀺 𑀘𑁂, 𑀫𑀳𑀸𑀭𑀸𑀚, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀲𑀢𑀸𑀭𑀓𑀸 𑀮𑁂𑀟𑁆𑀟𑀼 𑀯𑀺𑀬 𑀙𑀫𑀸𑀬𑀁, 𑀦𑀢𑁆𑀯𑁂𑀯 𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬 𑀅𑀧𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁; 𑀲𑀁𑀯𑀢𑁆𑀢𑁂𑀬𑁆𑀬𑀧𑀺 𑀘𑁂, 𑀫𑀳𑀸𑀭𑀸𑀚, 𑀆𑀓𑀸𑀲𑁄 𑀓𑀺𑀮𑀜𑁆𑀚𑀫𑀺𑀯, 𑀦𑀢𑁆𑀯𑁂𑀯 𑀩𑁄𑀥𑀺𑀲𑀢𑁆𑀢𑁄 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬 𑀅𑀧𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁. 𑀓𑀺𑀁 𑀓𑀸𑀭𑀡𑀸? 𑀧𑀤𑀸𑀮𑀺𑀢𑀢𑁆𑀢𑀸 𑀲𑀩𑁆𑀩𑀩𑀦𑁆𑀥𑀦𑀸𑀦’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀢𑀺 𑀮𑁄𑀓𑁂 𑀩𑀦𑁆𑀥𑀦𑀸𑀦𑀻’’𑀢𑀺? ‘‘𑀤𑀲 𑀔𑁄 𑀧𑀦𑀺𑀫𑀸𑀦𑀺, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀸𑀦𑀺, 𑀬𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀤𑁆𑀥𑀸 𑀲𑀢𑁆𑀢𑀸 𑀦 𑀦𑀺𑀓𑁆𑀔𑀫𑀦𑁆𑀢𑀺, 𑀦𑀺𑀓𑁆𑀔𑀫𑀺𑀢𑁆𑀯𑀸𑀧𑀺 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀺. 𑀓𑀢𑀫𑀸𑀦𑀺 𑀤𑀲? 𑀫𑀸𑀢𑀸, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀁, 𑀧𑀺𑀢𑀸, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀁, 𑀪𑀭𑀺𑀬𑀸, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀁, 𑀧𑀼𑀢𑁆𑀢𑀸, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀁, 𑀜𑀸𑀢𑀻, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀁, 𑀫𑀺𑀢𑁆𑀢𑀁, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀁, 𑀥𑀦𑀁, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀁, 𑀮𑀸𑀪𑀲𑀓𑁆𑀓𑀸𑀭𑁄, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀁, 𑀇𑀲𑁆𑀲𑀭𑀺𑀬𑀁, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀁, 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀫𑀳𑀸𑀭𑀸𑀚, 𑀮𑁄𑀓𑁂 𑀩𑀦𑁆𑀥𑀦𑀁, 𑀇𑀫𑀸𑀦𑀺 𑀔𑁄 𑀫𑀳𑀸𑀭𑀸𑀚 𑀤𑀲 𑀮𑁄𑀓𑁂 𑀩𑀦𑁆𑀥𑀦𑀸𑀦𑀺, 𑀬𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀤𑁆𑀥𑀸 𑀲𑀢𑁆𑀢𑀸 𑀦 𑀦𑀺𑀓𑁆𑀔𑀫𑀦𑁆𑀢𑀺, 𑀦𑀺𑀓𑁆𑀔𑀫𑀺𑀢𑁆𑀯𑀸𑀧𑀺 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀺, 𑀢𑀸𑀦𑀺 𑀤𑀲 𑀩𑀦𑁆𑀥𑀦𑀸𑀦𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀙𑀺𑀦𑁆𑀦𑀸𑀦𑀺 𑀧𑀤𑀸𑀮𑀺𑀢𑀸𑀦𑀺, 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀦 𑀧𑀝𑀺𑀦𑀺𑀯𑀢𑁆𑀢𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀤𑀺 𑀩𑁄𑀥𑀺𑀲𑀢𑁆𑀢𑁄 𑀉𑀧𑁆𑀧𑀦𑁆𑀦𑁂 𑀅𑀭𑀢𑀺𑀘𑀺𑀢𑁆𑀢𑁂 𑀤𑁂𑀯𑀢𑀸𑀬 𑀯𑀘𑀦𑁂𑀦 𑀅𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀅𑀧𑀭𑀺𑀧𑀓𑁆𑀓𑀸𑀬 𑀩𑁄𑀥𑀺𑀬𑀸 𑀦𑁂𑀓𑁆𑀔𑀫𑁆𑀫𑀫𑀪𑀺𑀦𑀺𑀓𑁆𑀔𑀦𑁆𑀢𑁄, 𑀓𑀺𑀁 𑀢𑀲𑁆𑀲 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀓𑀢𑀸𑀬, 𑀦𑀦𑀼 𑀦𑀸𑀫 𑀲𑀩𑁆𑀩𑀪𑀓𑁆𑀔𑁂𑀦 𑀪𑀯𑀺𑀢𑀩𑁆𑀩𑀁 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁂𑀦𑀸’’𑀢𑀺?

‘‘𑀤𑀲 𑀔𑁄 𑀧𑀦𑀺𑀫𑁂, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑀸 𑀮𑁄𑀓𑀲𑁆𑀫𑀺𑀁 𑀑𑀜𑁆𑀜𑀸𑀢𑀸 𑀅𑀯𑀜𑁆𑀜𑀸𑀢𑀸 𑀳𑀻𑀴𑀺𑀢𑀸 𑀔𑀻𑀴𑀺𑀢𑀸 𑀕𑀭𑀳𑀺𑀢𑀸 𑀧𑀭𑀺𑀪𑀽𑀢𑀸 𑀅𑀘𑀺𑀢𑁆𑀢𑀻𑀓𑀢𑀸. 𑀓𑀢𑀫𑁂 𑀤𑀲? 𑀇𑀢𑁆𑀣𑀻, 𑀫𑀳𑀸𑀭𑀸𑀚, 𑀯𑀺𑀥𑀯𑀸 𑀮𑁄𑀓𑀲𑁆𑀫𑀺𑀁 𑀑𑀜𑁆𑀜𑀸𑀢𑀸 𑀅𑀯𑀜𑁆𑀜𑀸𑀢𑀸 𑀳𑀻𑀴𑀺𑀢𑀸 𑀔𑀻𑀴𑀺𑀢𑀸 𑀕𑀭𑀳𑀺𑀢𑀸 𑀧𑀭𑀺𑀪𑀽𑀢𑀸 𑀅𑀘𑀺𑀢𑁆𑀢𑀻𑀓𑀢𑀸. 𑀤𑀼𑀩𑁆𑀩𑀮𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄…𑀧𑁂… 𑀅𑀫𑀺𑀢𑁆𑀢𑀜𑀸𑀢𑀺, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄…𑀧𑁂… 𑀫𑀳𑀕𑁆𑀖𑀲𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄…𑀧𑁂… 𑀅𑀕𑀭𑀼𑀓𑀼𑀮𑀯𑀸𑀲𑀺𑀓𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄…𑀧𑁂… 𑀧𑀸𑀧𑀫𑀺𑀢𑁆𑀢𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄…𑀧𑁂… 𑀥𑀦𑀳𑀻𑀦𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄…𑀧𑁂… 𑀆𑀘𑀸𑀭𑀳𑀻𑀦𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄…𑀧𑁂… 𑀓𑀫𑁆𑀫𑀳𑀻𑀦𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄…𑀧𑁂… 𑀧𑀬𑁄𑀕𑀳𑀻𑀦𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 𑀮𑁄𑀓𑀲𑁆𑀫𑀺𑀁 𑀑𑀜𑁆𑀜𑀸𑀢𑁄 𑀅𑀯𑀜𑁆𑀜𑀸𑀢𑁄 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀧𑀭𑀺𑀪𑀽𑀢𑁄 𑀅𑀘𑀺𑀢𑁆𑀢𑀻𑀓𑀢𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀤𑀲 𑀧𑀼𑀕𑁆𑀕𑀮𑀸 𑀮𑁄𑀓𑀲𑁆𑀫𑀺𑀁 𑀑𑀜𑁆𑀜𑀸𑀢𑀸 𑀅𑀯𑀜𑁆𑀜𑀸𑀢𑀸 𑀳𑀻𑀴𑀺𑀢𑀸 𑀔𑀻𑀴𑀺𑀢𑀸 𑀕𑀭𑀳𑀺𑀢𑀸 𑀧𑀭𑀺𑀪𑀽𑀢𑀸 𑀅𑀘𑀺𑀢𑁆𑀢𑀻𑀓𑀢𑀸. 𑀇𑀫𑀸𑀦𑀺 𑀔𑁄, 𑀫𑀳𑀸𑀭𑀸𑀚, 𑀤𑀲 𑀞𑀸𑀦𑀸𑀦𑀺 𑀅𑀦𑀼𑀲𑁆𑀲𑀭𑀫𑀸𑀦𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀯𑀁 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀺 ‘𑀫𑀸𑀳𑀁 𑀓𑀫𑁆𑀫𑀳𑀻𑀦𑁄 𑀅𑀲𑁆𑀲𑀁 𑀧𑀬𑁄𑀕𑀳𑀻𑀦𑁄 𑀕𑀭𑀳𑀺𑀢𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀬𑀁𑀦𑀽𑀦𑀸𑀳𑀁 𑀓𑀫𑁆𑀫𑀲𑁆𑀲𑀸𑀫𑀻 𑀅𑀲𑁆𑀲𑀁 𑀓𑀫𑁆𑀫𑀕𑀭𑀼 𑀓𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀓𑀫𑁆𑀫𑀲𑀻𑀮𑁄 𑀓𑀫𑁆𑀫𑀥𑁄𑀭𑀬𑁆𑀳𑁄 𑀓𑀫𑁆𑀫𑀦𑀺𑀓𑁂𑀢𑀯𑀸 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀜𑀸𑀡𑀁 𑀧𑀭𑀺𑀧𑀸𑀘𑁂𑀦𑁆𑀢𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀅𑀓𑀸𑀲𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑁄𑀥𑀺𑀲𑀢𑁆𑀢𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑁄 𑀏𑀯𑀫𑀸𑀳 ‘𑀦 𑀔𑁄 𑀧𑀦𑀸𑀳𑀁 𑀇𑀫𑀸𑀬 𑀓𑀝𑀼𑀓𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀅𑀥𑀺𑀕𑀘𑁆𑀙𑀸𑀫𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁, 𑀲𑀺𑀬𑀸 𑀦𑀼 𑀔𑁄 𑀅𑀜𑁆𑀜𑁄 𑀫𑀕𑁆𑀕𑁄 𑀩𑁄𑀥𑀸𑀬𑀸’𑀢𑀺. 𑀅𑀧𑀺 𑀦𑀼 𑀢𑀲𑁆𑀫𑀺𑀁 𑀲𑀫𑀬𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀕𑁆𑀕𑀁 𑀆𑀭𑀩𑁆𑀪 𑀲𑀢𑀺𑀲𑀫𑁆𑀫𑁄𑀲𑁄 𑀅𑀳𑁄𑀲𑀻’’𑀢𑀺?

‘‘𑀧𑀜𑁆𑀘𑀯𑀻𑀲𑀢𑀺 𑀔𑁄 𑀧𑀦𑀺𑀫𑁂, 𑀫𑀳𑀸𑀭𑀸𑀚, 𑀘𑀺𑀢𑁆𑀢𑀤𑀼𑀩𑁆𑀩𑀮𑀻𑀓𑀭𑀡𑀸 𑀥𑀫𑁆𑀫𑀸, 𑀬𑁂𑀳𑀺 𑀤𑀼𑀩𑁆𑀩𑀮𑀻𑀓𑀢𑀁 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀓𑀢𑀫𑁂 𑀧𑀜𑁆𑀘𑀯𑀻𑀲𑀢𑀺? 𑀓𑁄𑀥𑁄, 𑀫𑀳𑀸𑀭𑀸𑀚, 𑀘𑀺𑀢𑁆𑀢𑀤𑀼𑀩𑁆𑀩𑀮𑀻𑀓𑀭𑀡𑁄 𑀥𑀫𑁆𑀫𑁄, 𑀬𑁂𑀦 𑀤𑀼𑀩𑁆𑀩𑀮𑀻𑀓𑀢𑀁 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬, 𑀉𑀧𑀦𑀸𑀳𑁄…𑀧𑁂… 𑀫𑀓𑁆𑀔𑁄…𑀧𑁂… 𑀧𑀴𑀸𑀲𑁄…𑀧𑁂… 𑀇𑀲𑁆𑀲𑀸…𑀧𑁂… 𑀫𑀘𑁆𑀙𑀭𑀺𑀬𑀁…𑀧𑁂… 𑀫𑀸𑀬𑀸…𑀧𑁂… 𑀲𑀸𑀞𑁂𑀬𑁆𑀬𑀁…𑀧𑁂… 𑀣𑀫𑁆𑀪𑁄…𑀧𑁂… 𑀲𑀸𑀭𑀫𑁆𑀪𑁄…𑀧𑁂… 𑀫𑀸𑀦𑁄…𑀧𑁂… 𑀅𑀢𑀺𑀫𑀸𑀦𑁄 …𑀧𑁂… 𑀫𑀤𑁄…𑀧𑁂… 𑀧𑀫𑀸𑀤𑁄…𑀧𑁂… 𑀣𑀺𑀦𑀫𑀺𑀤𑁆𑀥𑀁…𑀧𑁂… 𑀢𑀦𑁆𑀤𑀺 [𑀦𑀦𑁆𑀤𑀻 (𑀧𑀻. 𑀓.)] …𑀧𑁂… 𑀆𑀮𑀲𑁆𑀬𑀁…𑀧𑁂… 𑀧𑀸𑀧𑀫𑀺𑀢𑁆𑀢𑀢𑀸…𑀧𑁂… 𑀭𑀽𑀧𑀸…𑀧𑁂… 𑀲𑀤𑁆𑀤𑀸…𑀧𑁂… 𑀕𑀦𑁆𑀥𑀸…𑀧𑁂… 𑀭𑀲𑀸…𑀧𑁂… 𑀨𑁄𑀝𑁆𑀞𑀩𑁆𑀩𑀸…𑀧𑁂… 𑀔𑀼𑀤𑀸𑀧𑀺𑀧𑀸𑀲𑀸…𑀧𑁂… 𑀅𑀭𑀢𑀺, 𑀫𑀳𑀸𑀭𑀸𑀚, 𑀘𑀺𑀢𑁆𑀢𑀤𑀼𑀩𑁆𑀩𑀮𑀻𑀓𑀭𑀡𑁄 𑀥𑀫𑁆𑀫𑁄, 𑀬𑁂𑀦 𑀤𑀼𑀩𑁆𑀩𑀮𑀻𑀓𑀢𑀁 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀧𑀜𑁆𑀘𑀯𑀻𑀲𑀢𑀺 𑀘𑀺𑀢𑁆𑀢𑀤𑀼𑀩𑁆𑀩𑀮𑀻𑀓𑀭𑀡𑀸 𑀥𑀫𑁆𑀫𑀸, 𑀬𑁂𑀳𑀺 𑀤𑀼𑀩𑁆𑀩𑀮𑀻𑀓𑀢𑀁 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀔𑁄, 𑀫𑀳𑀸𑀭𑀸𑀚, 𑀔𑀼𑀤𑀸𑀧𑀺𑀧𑀸𑀲𑀸 [𑀔𑀼𑀤𑀸𑀧𑀺𑀧𑀸𑀲𑀸 (𑀲𑀻. 𑀧𑀻. 𑀓.)] 𑀓𑀸𑀬𑀁 𑀧𑀭𑀺𑀬𑀸𑀤𑀺𑀬𑀺𑀁𑀲𑀼, 𑀓𑀸𑀬𑁂 𑀧𑀭𑀺𑀬𑀸𑀤𑀺𑀦𑁆𑀦𑁂 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀲𑀢𑀲𑀳𑀲𑁆𑀲𑀁, 𑀫𑀳𑀸𑀭𑀸𑀚, 𑀓𑀧𑁆𑀧𑀸𑀦𑀁 [𑀓𑀧𑁆𑀧𑁂 (𑀓.)] 𑀘𑀢𑀼𑀭𑁄 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀓𑀧𑁆𑀧𑁂 𑀩𑁄𑀥𑀺𑀲𑀢𑁆𑀢𑁄 𑀘𑀢𑀼𑀦𑁆𑀦𑀁 𑀬𑁂𑀯 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑀁 𑀅𑀦𑁆𑀯𑁂𑀲𑀺 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼, 𑀓𑀺𑀁 𑀧𑀦𑀲𑁆𑀲 𑀧𑀘𑁆𑀙𑀺𑀫𑁂 𑀪𑀯𑁂 𑀅𑀪𑀺𑀲𑀫𑀬𑀚𑀸𑀢𑀺𑀬𑀁 𑀫𑀕𑁆𑀕𑀁 𑀆𑀭𑀩𑁆𑀪 𑀲𑀢𑀺𑀲𑀫𑁆𑀫𑁄𑀲𑁄 𑀳𑁂𑀲𑁆𑀲𑀢𑀺? 𑀅𑀧𑀺 𑀘, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀜𑁆𑀜𑀸𑀫𑀢𑁆𑀢𑀁 𑀉𑀧𑁆𑀧𑀚𑁆𑀚𑀺 ‘𑀲𑀺𑀬𑀸 𑀦𑀼 𑀔𑁄 𑀅𑀜𑁆𑀜𑁄 𑀫𑀕𑁆𑀕𑁄 𑀩𑁄𑀥𑀸𑀬𑀸’𑀢𑀺. 𑀧𑀼𑀩𑁆𑀩𑁂 𑀔𑁄, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀏𑀓𑀫𑀸𑀲𑀺𑀓𑁄 𑀲𑀫𑀸𑀦𑁄 𑀧𑀺𑀢𑀼 𑀲𑀓𑁆𑀓𑀲𑁆𑀲 𑀓𑀫𑁆𑀫𑀦𑁆𑀢𑁂 𑀲𑀻𑀢𑀸𑀬 𑀚𑀫𑁆𑀩𑀼𑀘𑁆𑀙𑀸𑀬𑀸𑀬 𑀲𑀺𑀭𑀺𑀲𑀬𑀦𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀘𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀺, 𑀜𑀸𑀡𑀁 𑀧𑀭𑀺𑀧𑀸𑀘𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀅𑀓𑀸𑀲𑀻’’𑀢𑀺.

𑀤𑀼𑀓𑁆𑀓𑀭𑀓𑀸𑀭𑀺𑀓𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀓𑀼𑀲𑀮𑀸𑀓𑀼𑀲𑀮𑀩𑀮𑀯𑀢𑀭𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀢𑀫𑀁 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸’’𑀢𑀺? ‘‘𑀓𑀼𑀲𑀮𑀁, 𑀫𑀳𑀸𑀭𑀸𑀚, 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁, 𑀦𑁄 𑀢𑀣𑀸 𑀅𑀓𑀼𑀲𑀮’𑀦𑁆𑀢𑀺. ‘‘𑀦𑀸𑀳𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀸𑀫𑀺 ‘𑀓𑀼𑀲𑀮𑀁 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁, 𑀦𑁄 𑀢𑀣𑀸 𑀅𑀓𑀼𑀲𑀮’𑀦𑁆𑀢𑀺, 𑀤𑀺𑀲𑁆𑀲𑀦𑁆𑀢𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀥 𑀧𑀸𑀡𑀸𑀢𑀺𑀧𑀸𑀢𑀺𑀦𑁄 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀺𑀦𑁄 𑀫𑀼𑀲𑀸𑀯𑀸𑀤𑀺𑀦𑁄 𑀕𑀸𑀫𑀖𑀸𑀢𑀺𑀓𑀸 𑀧𑀦𑁆𑀣𑀤𑀽𑀲𑀓𑀸 𑀦𑁂𑀓𑀢𑀺𑀓𑀸 𑀯𑀜𑁆𑀘𑀦𑀺𑀓𑀸, 𑀲𑀩𑁆𑀩𑁂 𑀢𑁂 𑀢𑀸𑀯𑀢𑀓𑁂𑀦 𑀧𑀸𑀧𑁂𑀦 𑀮𑀪𑀦𑁆𑀢𑀺 𑀳𑀢𑁆𑀣𑀘𑁆𑀙𑁂𑀤𑀁 𑀧𑀸𑀤𑀘𑁆𑀙𑁂𑀤𑀁 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀁 𑀓𑀡𑁆𑀡𑀘𑁆𑀙𑁂𑀤𑀁 𑀦𑀸𑀲𑀘𑁆𑀙𑁂𑀤𑀁 𑀓𑀡𑁆𑀡𑀦𑀸𑀲𑀘𑁆𑀙𑁂𑀤𑀁 𑀩𑀺𑀮𑀗𑁆𑀕𑀣𑀸𑀮𑀺𑀓𑀁 𑀲𑀗𑁆𑀔𑀫𑀼𑀡𑁆𑀟𑀺𑀓𑀁 𑀭𑀸𑀳𑀼𑀫𑀼𑀔𑀁 𑀚𑁄𑀢𑀺𑀫𑀸𑀮𑀺𑀓𑀁 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀁 𑀏𑀭𑀓𑀯𑀢𑁆𑀢𑀺𑀓𑀁 𑀘𑀻𑀭𑀓𑀯𑀸𑀲𑀺𑀓𑀁 𑀏𑀡𑁂𑀬𑁆𑀬𑀓𑀁 𑀩𑀴𑀺𑀲𑀫𑀁𑀲𑀺𑀓𑀁 𑀓𑀳𑀸𑀧𑀡𑀺𑀓𑀁 𑀔𑀸𑀭𑀸𑀧𑀢𑀘𑁆𑀙𑀺𑀓𑀁 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀁 𑀧𑀮𑀸𑀮𑀧𑀻𑀞𑀓𑀁 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑀁 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑀦𑀁 𑀚𑀻𑀯𑀲𑀽𑀮𑀸𑀭𑁄𑀧𑀦𑀁 𑀅𑀲𑀺𑀦𑀸𑀧𑀺 𑀲𑀻𑀲𑀘𑁆𑀙𑁂𑀤𑀁, 𑀓𑁂𑀘𑀺 𑀭𑀢𑁆𑀢𑀺𑀁 𑀧𑀸𑀧𑀁 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀬𑁂𑀯 𑀯𑀺𑀧𑀸𑀓𑀁 𑀅𑀦𑀼𑀪𑀯𑀦𑁆𑀢𑀺, 𑀓𑁂𑀘𑀺 𑀭𑀢𑁆𑀢𑀺𑀁 𑀓𑀢𑁆𑀯𑀸 𑀤𑀺𑀯𑀸 𑀬𑁂𑀯 𑀅𑀦𑀼𑀪𑀯𑀦𑁆𑀢𑀺, 𑀓𑁂𑀘𑀺 𑀤𑀺𑀯𑀸 𑀓𑀢𑁆𑀯𑀸 𑀤𑀺𑀯𑀸 𑀬𑁂𑀯 𑀅𑀦𑀼𑀪𑀯𑀦𑁆𑀢𑀺, 𑀓𑁂𑀘𑀺 𑀤𑀺𑀯𑀸 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀬𑁂𑀯 𑀅𑀦𑀼𑀪𑀯𑀦𑁆𑀢𑀺, 𑀓𑁂𑀘𑀺 𑀤𑁆𑀯𑁂 𑀢𑀬𑁄 𑀤𑀺𑀯𑀲𑁂 𑀯𑀻𑀢𑀺𑀯𑀢𑁆𑀢𑁂 𑀅𑀦𑀼𑀪𑀯𑀦𑁆𑀢𑀺, 𑀲𑀩𑁆𑀩𑁂𑀧𑀺 𑀢𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀯𑀺𑀧𑀸𑀓𑀁 𑀅𑀦𑀼𑀪𑀯𑀦𑁆𑀢𑀺. 𑀅𑀢𑁆𑀣𑀺 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁄𑀘𑀺 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀺𑀡𑁆𑀡𑀁 𑀯𑀸 𑀘𑀢𑀼𑀦𑁆𑀦𑀁 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀸 𑀤𑀲𑀦𑁆𑀦𑀁 𑀯𑀸 𑀲𑀢𑀲𑁆𑀲 𑀯𑀸 𑀲𑀳𑀲𑁆𑀲𑀲𑁆𑀲 𑀯𑀸 𑀲𑀢𑀲𑀳𑀲𑁆𑀲𑀲𑁆𑀲 𑀯𑀸 𑀲𑀧𑀭𑀺𑀯𑀸𑀭𑀁 𑀤𑀸𑀦𑀁 𑀤𑀢𑁆𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀪𑁄𑀕𑀁 𑀯𑀸 𑀬𑀲𑀁 𑀯𑀸 𑀲𑀼𑀔𑀁 𑀯𑀸 𑀅𑀦𑀼𑀪𑀯𑀺𑀢𑀸 𑀲𑀻𑀮𑁂𑀦 𑀯𑀸 𑀉𑀧𑁄𑀲𑀣𑀓𑀫𑁆𑀫𑁂𑀦 𑀯𑀸’’𑀢𑀺?

‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀢𑁂𑀦𑁂𑀯 𑀲𑀭𑀻𑀭𑀤𑁂𑀳𑁂𑀦 𑀢𑀺𑀤𑀲𑀧𑀼𑀭𑁂 𑀲𑀫𑀦𑀼𑀧𑁆𑀧𑀢𑁆𑀢𑀸’’𑀢𑀺 [𑀬𑀲𑀫𑀦𑀼𑀧𑀢𑁆𑀢𑀸𑀢𑀺 (𑀲𑀻. 𑀧𑀻.)]. ‘‘𑀓𑁄 𑀘 𑀓𑁄 𑀘 𑀪𑀦𑁆𑀢𑁂’’𑀢𑀺? ‘‘𑀫𑀦𑁆𑀥𑀸𑀢𑀸, 𑀫𑀳𑀸𑀭𑀸𑀚, 𑀭𑀸𑀚𑀸, 𑀦𑀺𑀫𑀺 𑀭𑀸𑀚𑀸, 𑀲𑀸𑀥𑀻𑀦𑁄 𑀭𑀸𑀚𑀸, 𑀕𑀼𑀢𑁆𑀢𑀺𑀮𑁄 𑀘 𑀕𑀦𑁆𑀥𑀩𑁆𑀩𑁄’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀦𑁂𑀓𑁂𑀳𑀺 𑀢𑀁 𑀪𑀯𑀲𑀳𑀲𑁆𑀲𑁂𑀳𑀺 𑀅𑀦𑁆𑀢𑀭𑀺𑀢𑀁, 𑀤𑁆𑀯𑀺𑀦𑁆𑀦𑀫𑁆𑀧𑁂𑀢𑀁 𑀅𑀫𑁆𑀳𑀸𑀓𑀁 [𑀤𑀻𑀧𑀺𑀢𑀁, 𑀅𑀫𑁆𑀳𑀸𑀓𑀫𑁆𑀧𑁂𑀢𑀁 (𑀓.)] 𑀧𑀭𑁄𑀓𑁆𑀔𑀁, 𑀬𑀤𑀺 𑀲𑀫𑀢𑁆𑀣𑁄𑀲𑀺 𑀯𑀢𑁆𑀢𑀫𑀸𑀦𑀓𑁂 𑀪𑀯𑁂 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂 𑀓𑀣𑁂𑀳𑀻’’𑀢𑀺? ‘‘𑀯𑀢𑁆𑀢𑀫𑀸𑀦𑀓𑁂𑀧𑀺, 𑀫𑀳𑀸𑀭𑀸𑀚, 𑀪𑀯𑁂 𑀧𑀼𑀡𑁆𑀡𑀓𑁄 𑀤𑀸𑀲𑁄 𑀣𑁂𑀭𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀪𑁄𑀚𑀦𑀁 𑀤𑀢𑁆𑀯𑀸 𑀢𑀤𑀳𑁂𑀯 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑀕𑀢𑁄, 𑀲𑁄 𑀏𑀢𑀭𑀳𑀺 𑀧𑀼𑀡𑁆𑀡𑀓𑁄 𑀲𑁂𑀝𑁆𑀞𑀻𑀢𑀺 𑀧𑀜𑁆𑀜𑀸𑀬𑀺, 𑀕𑁄𑀧𑀸𑀮𑀫𑀸𑀢𑀸 𑀤𑁂𑀯𑀻 𑀅𑀢𑁆𑀢𑀦𑁄 𑀓𑁂𑀲𑁂 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀮𑀤𑁆𑀥𑁂𑀳𑀺 𑀅𑀝𑁆𑀞𑀳𑀺 𑀓𑀳𑀸𑀧𑀡𑁂𑀳𑀺 𑀣𑁂𑀭𑀲𑁆𑀲 𑀫𑀳𑀸𑀓𑀘𑁆𑀘𑀸𑀬𑀦𑀲𑁆𑀲 𑀅𑀢𑁆𑀢𑀝𑁆𑀞𑀫𑀓𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀢𑀤𑀳𑁂𑀯 𑀭𑀜𑁆𑀜𑁄 𑀘𑀦𑁆𑀤𑀧𑀚𑁆𑀚𑁄𑀢𑀲𑁆𑀲 [𑀉𑀤𑁂𑀦𑀲𑁆𑀲 (𑀲𑀻. 𑀧𑀻.)] 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀁 𑀧𑀢𑁆𑀢𑀸. 𑀲𑀼𑀧𑁆𑀧𑀺𑀬𑀸 𑀉𑀧𑀸𑀲𑀺𑀓𑀸 𑀅𑀜𑁆𑀜𑀢𑀭𑀲𑁆𑀲 𑀕𑀺𑀮𑀸𑀦𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀦𑁄 𑀊𑀭𑀼𑀫𑀁𑀲𑁂𑀦 𑀧𑀝𑀺𑀘𑁆𑀙𑀸𑀤𑀦𑀻𑀬𑀁 𑀤𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀬𑁂𑀯 𑀭𑀽𑀴𑁆𑀳𑀯𑀡𑀸 𑀲𑀜𑁆𑀙𑀯𑀻 [𑀲𑀘𑁆𑀙𑀯𑀻 (𑀲𑀻. 𑀧𑀻.)] 𑀅𑀭𑁄𑀕𑀸 𑀚𑀸𑀢𑀸. 𑀫𑀮𑁆𑀮𑀺𑀓𑀸 𑀤𑁂𑀯𑀻 𑀪𑀕𑀯𑀢𑁄 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀁 𑀤𑀢𑁆𑀯𑀸 𑀢𑀤𑀳𑁂𑀯 𑀭𑀜𑁆𑀜𑁄 𑀓𑁄𑀲𑀮𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀚𑀸𑀢𑀸. 𑀲𑀼𑀫𑀦𑁄 𑀫𑀸𑀮𑀸𑀓𑀸𑀭𑁄 𑀅𑀝𑁆𑀞𑀳𑀺 𑀲𑀼𑀫𑀦𑀧𑀼𑀧𑁆𑀨𑀫𑀼𑀝𑁆𑀞𑀻𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑁂𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀬𑁂𑀯 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑁄. 𑀏𑀓𑀲𑀸𑀝𑀓𑁄 𑀩𑁆𑀭𑀸𑀳𑁆𑀫𑀡𑁄 𑀉𑀢𑁆𑀢𑀭𑀲𑀸𑀝𑀓𑁂𑀦 𑀪𑀕𑀯𑀦𑁆𑀢𑀁 𑀧𑀽𑀚𑁂𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀬𑁂𑀯 𑀲𑀩𑁆𑀩𑀝𑁆𑀞𑀓𑀁 𑀮𑀪𑀺, 𑀲𑀩𑁆𑀩𑁂𑀧𑁂𑀢𑁂, 𑀫𑀳𑀸𑀭𑀸𑀚, 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀪𑁄𑀕𑀜𑁆𑀘 𑀬𑀲𑀜𑁆𑀘 𑀅𑀦𑀼𑀪𑀯𑀺𑀁𑀲𑀽’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑀺𑀘𑀺𑀦𑀺𑀢𑁆𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀙 𑀚𑀦𑁂 𑀬𑁂𑀯 𑀅𑀤𑁆𑀤𑀲𑀸𑀲𑀻’’𑀢𑀺. ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀓𑀼𑀲𑀮𑀁 𑀬𑁂𑀯 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁, 𑀦𑁄 𑀢𑀣𑀸 𑀓𑀼𑀲𑀮𑀁. 𑀅𑀳𑀜𑁆𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀓𑀤𑀺𑀯𑀲𑀁 𑀬𑁂𑀯 𑀤𑀲𑀧𑀺 𑀧𑀼𑀭𑀺𑀲𑁂 𑀧𑀲𑁆𑀲𑀸𑀫𑀺 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀲𑀽𑀮𑁂𑀲𑀼 𑀆𑀭𑁄𑀧𑁂𑀦𑁆𑀢𑁂, 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀜𑁆𑀜𑀸𑀲𑀫𑁆𑀧𑀺 𑀧𑀼𑀭𑀺𑀲𑀲𑀢𑀫𑁆𑀧𑀺 𑀧𑀼𑀭𑀺𑀲𑀲𑀳𑀲𑁆𑀲𑀫𑁆𑀧𑀺 𑀧𑀲𑁆𑀲𑀸𑀫𑀺 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀲𑀽𑀮𑁂𑀲𑀼 𑀆𑀭𑁄𑀧𑁂𑀦𑁆𑀢𑁂. 𑀦𑀦𑁆𑀤𑀓𑀼𑀮𑀲𑁆𑀲, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀤𑁆𑀤𑀲𑀸𑀮𑁄 𑀦𑀸𑀫 𑀲𑁂𑀦𑀸𑀧𑀢𑀺𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀢𑁂𑀦 𑀘 𑀭𑀜𑁆𑀜𑀸 𑀘𑀦𑁆𑀤𑀕𑀼𑀢𑁆𑀢𑁂𑀦 𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀔𑁄 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀗𑁆𑀕𑀸𑀫𑁂 𑀉𑀪𑀢𑁄 𑀩𑀮𑀓𑀸𑀬𑁂 𑀅𑀲𑀻𑀢𑀺𑀓𑀩𑀦𑁆𑀥𑀭𑀽𑀧𑀸𑀦𑀺 𑀅𑀳𑁂𑀲𑀼𑀁, 𑀏𑀓𑀲𑁆𑀫𑀺𑀁 𑀓𑀺𑀭 𑀲𑀻𑀲𑀓𑀩𑀦𑁆𑀥𑁂 𑀧𑀭𑀺𑀧𑀸𑀢𑁂 [𑀧𑀭𑀺𑀧𑀼𑀡𑁆𑀡𑁂 (𑀲𑀩𑁆𑀩𑀢𑁆𑀣)] 𑀏𑀓𑀁 𑀓𑀩𑀦𑁆𑀥𑀭𑀽𑀧𑀁 𑀉𑀝𑁆𑀞𑀳𑀢𑀺, 𑀲𑀩𑁆𑀩𑁂𑀧𑁂𑀢𑁂 𑀧𑀸𑀧𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀅𑀦𑀬𑀩𑁆𑀬𑀲𑀦𑀁 𑀆𑀧𑀦𑁆𑀦𑀸. 𑀇𑀫𑀺𑀦𑀸𑀧𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑁂𑀦 𑀪𑀡𑀸𑀫𑀺 𑀅𑀓𑀼𑀲𑀮𑀁 𑀬𑁂𑀯 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁, 𑀦𑁄 𑀢𑀣𑀸 𑀓𑀼𑀲𑀮’’𑀦𑁆𑀢𑀺.

‘‘𑀲𑀼𑀬𑁆𑀬𑀢𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀲𑀸𑀲𑀦𑁂 𑀓𑁄𑀲𑀮𑁂𑀦 𑀭𑀜𑁆𑀜𑀸 𑀅𑀲𑀤𑀺𑀲𑀤𑀸𑀦𑀁 𑀤𑀺𑀦𑁆𑀦’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀲𑀼𑀬𑁆𑀬𑀢𑀻’’𑀢𑀺. ‘‘𑀅𑀧𑀺 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁄𑀲𑀮𑀭𑀸𑀚𑀸 𑀢𑀁 𑀅𑀲𑀤𑀺𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀢𑀢𑁄𑀦𑀺𑀤𑀸𑀦𑀁 𑀓𑀜𑁆𑀘𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀪𑁄𑀕𑀁 𑀯𑀸 𑀬𑀲𑀁 𑀯𑀸 𑀲𑀼𑀔𑀁 𑀯𑀸 𑀧𑀝𑀺𑀮𑀪𑀻’’𑀢𑀺 [𑀧𑀝𑀺𑀮𑀪𑀢𑀻𑀢𑀺 (𑀓.)]? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁄𑀲𑀮𑀭𑀸𑀚𑀸 𑀏𑀯𑀭𑀽𑀧𑀁 𑀅𑀦𑀼𑀢𑁆𑀢𑀭𑀁 𑀤𑀸𑀦𑀁 𑀤𑀢𑁆𑀯𑀸𑀧𑀺 𑀦 𑀮𑀪𑀺 [𑀦 𑀮𑀪𑀢𑀺 (𑀓.)] 𑀢𑀢𑁄𑀦𑀺𑀤𑀸𑀦𑀁 𑀓𑀜𑁆𑀘𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀪𑁄𑀕𑀁 𑀯𑀸 𑀬𑀲𑀁 𑀯𑀸 𑀲𑀼𑀔𑀁 𑀯𑀸, 𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀓𑀼𑀲𑀮𑀁 𑀬𑁂𑀯 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁, 𑀦𑁄 𑀢𑀣𑀸 𑀓𑀼𑀲𑀮’’𑀦𑁆𑀢𑀺.

‘‘𑀧𑀭𑀺𑀢𑁆𑀢𑀢𑁆𑀢𑀸, 𑀫𑀳𑀸𑀭𑀸𑀚, 𑀅𑀓𑀼𑀲𑀮𑀁 𑀔𑀺𑀧𑁆𑀧𑀁 𑀧𑀭𑀺𑀡𑀫𑀢𑀺, 𑀯𑀺𑀧𑀼𑀮𑀢𑁆𑀢𑀸 𑀓𑀼𑀲𑀮𑀁 𑀤𑀻𑀖𑁂𑀦 𑀓𑀸𑀮𑁂𑀦 𑀧𑀭𑀺𑀡𑀫𑀢𑀺, 𑀉𑀧𑀫𑀸𑀬𑀧𑀺, 𑀫𑀳𑀸𑀭𑀸𑀚, 𑀏𑀢𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀬𑀣𑀸, 𑀫𑀳𑀸𑀭𑀸𑀚, 𑀅𑀧𑀭𑀦𑁆𑀢𑁂 𑀚𑀦𑀧𑀤𑁂 𑀓𑀼𑀫𑀼𑀤𑀪𑀡𑁆𑀟𑀺𑀓𑀸 𑀦𑀸𑀫 𑀥𑀜𑁆𑀜𑀚𑀸𑀢𑀺 𑀫𑀸𑀲𑀮𑀽𑀦𑀸 [𑀫𑀸𑀲𑀧𑀽𑀭𑀸 (𑀓.)] 𑀅𑀦𑁆𑀢𑁄𑀕𑁂𑀳𑀕𑀢𑀸 𑀳𑁄𑀢𑀺, 𑀲𑀸𑀮𑀬𑁄 𑀙𑀧𑁆𑀧𑀜𑁆𑀘𑀫𑀸𑀲𑁂𑀳𑀺 𑀧𑀭𑀺𑀡𑀫𑀦𑁆𑀢𑀺, 𑀓𑀺𑀁 𑀧𑀦𑁂𑀢𑁆𑀣, 𑀫𑀳𑀸𑀭𑀸𑀚, 𑀅𑀦𑁆𑀢𑀭𑀁 𑀓𑁄 𑀯𑀺𑀲𑁂𑀲𑁄 𑀓𑀼𑀫𑀼𑀤𑀪𑀡𑁆𑀟𑀺𑀓𑀸𑀬 𑀘 𑀲𑀸𑀮𑀻𑀦𑀜𑁆𑀘𑀸’’𑀢𑀺? ‘‘𑀧𑀭𑀺𑀢𑁆𑀢𑀢𑁆𑀢𑀸, 𑀪𑀦𑁆𑀢𑁂, 𑀓𑀼𑀫𑀼𑀤𑀪𑀡𑁆𑀟𑀺𑀓𑀸𑀬, 𑀯𑀺𑀧𑀼𑀮𑀢𑁆𑀢𑀸 𑀘 𑀲𑀸𑀮𑀻𑀦𑀁. 𑀲𑀸𑀮𑀬𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀭𑀸𑀚𑀸𑀭𑀳𑀸 𑀭𑀸𑀚𑀪𑁄𑀚𑀦𑀁, 𑀓𑀼𑀫𑀼𑀤𑀪𑀡𑁆𑀟𑀺𑀓𑀸 𑀤𑀸𑀲𑀓𑀫𑁆𑀫𑀓𑀭𑀸𑀦𑀁 𑀪𑁄𑀚𑀦’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀭𑀺𑀢𑁆𑀢𑀢𑁆𑀢𑀸 𑀅𑀓𑀼𑀲𑀮𑀁 𑀔𑀺𑀧𑁆𑀧𑀁 𑀧𑀭𑀺𑀡𑀫𑀢𑀺, 𑀯𑀺𑀧𑀼𑀮𑀢𑁆𑀢𑀸 𑀓𑀼𑀲𑀮𑀁 𑀤𑀻𑀖𑁂𑀦 𑀓𑀸𑀮𑁂𑀦 𑀧𑀭𑀺𑀡𑀫𑀢𑀻’’𑀢𑀺.

‘‘𑀬𑀁 𑀢𑀢𑁆𑀣, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀔𑀺𑀧𑁆𑀧𑀁 𑀧𑀭𑀺𑀡𑀫𑀢𑀺, 𑀢𑀁 𑀦𑀸𑀫 𑀮𑁄𑀓𑁂 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁, 𑀢𑀲𑁆𑀫𑀸 𑀅𑀓𑀼𑀲𑀮𑀁 𑀩𑀮𑀯𑀢𑀭𑀁, 𑀦𑁄 𑀢𑀣𑀸 𑀓𑀼𑀲𑀮𑀁. 𑀬𑀣𑀸 𑀦𑀸𑀫, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀓𑁄𑀘𑀺 𑀬𑁄𑀥𑁄 𑀫𑀳𑀢𑀺𑀫𑀳𑀸𑀬𑀼𑀤𑁆𑀥𑀁 𑀧𑀯𑀺𑀲𑀺𑀢𑁆𑀯𑀸 𑀧𑀝𑀺𑀲𑀢𑁆𑀢𑀼𑀁 𑀉𑀧𑀓𑀘𑁆𑀙𑀓𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀔𑀺𑀧𑁆𑀧𑀢𑀭𑀁 𑀲𑀸𑀫𑀺𑀦𑁄 𑀉𑀧𑀦𑁂𑀬𑁆𑀬, 𑀲𑁄 𑀬𑁄𑀥𑁄 𑀮𑁄𑀓𑁂 𑀲𑀫𑀢𑁆𑀣𑁄 𑀲𑀽𑀭𑁄 𑀦𑀸𑀫. 𑀬𑁄 𑀘 𑀪𑀺𑀲𑀓𑁆𑀓𑁄 𑀔𑀺𑀧𑁆𑀧𑀁 𑀲𑀮𑁆𑀮𑀁 𑀉𑀤𑁆𑀥𑀭𑀢𑀺 𑀭𑁄𑀕𑀫𑀧𑀦𑁂𑀢𑀺, 𑀲𑁄 𑀪𑀺𑀲𑀓𑁆𑀓𑁄 𑀙𑁂𑀓𑁄 𑀦𑀸𑀫. 𑀬𑁄 𑀕𑀡𑀓𑁄 𑀲𑀻𑀖𑀲𑀻𑀖𑀁 𑀕𑀡𑁂𑀢𑁆𑀯𑀸 𑀔𑀺𑀧𑁆𑀧𑀁 𑀤𑀲𑁆𑀲𑀬𑀢𑀺, 𑀲𑁄 𑀕𑀡𑀓𑁄 𑀙𑁂𑀓𑁄 𑀦𑀸𑀫. 𑀬𑁄 𑀫𑀮𑁆𑀮𑁄 𑀔𑀺𑀧𑁆𑀧𑀁 𑀧𑀝𑀺𑀫𑀮𑁆𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀢𑁆𑀢𑀸𑀦𑀓𑀁 𑀧𑀸𑀢𑁂𑀢𑀺, 𑀲𑁄 𑀫𑀮𑁆𑀮𑁄 𑀲𑀫𑀢𑁆𑀣𑁄 𑀲𑀽𑀭𑁄 𑀦𑀸𑀫. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀔𑀺𑀧𑁆𑀧𑀁 𑀧𑀭𑀺𑀡𑀫𑀢𑀺 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸, 𑀢𑀁 𑀮𑁄𑀓𑁂 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭’’𑀦𑁆𑀢𑀺.

‘‘𑀉𑀪𑀬𑀫𑁆𑀧𑀺 𑀢𑀁, 𑀫𑀳𑀸𑀭𑀸𑀚, 𑀓𑀫𑁆𑀫𑀁 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀫𑁂𑀯, 𑀅𑀧𑀺 𑀘 𑀔𑁄 𑀅𑀓𑀼𑀲𑀮𑀁 𑀲𑀸𑀯𑀚𑁆𑀚𑀢𑀸𑀬 𑀔𑀡𑁂𑀦 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀧𑀼𑀩𑁆𑀩𑀓𑁂𑀳𑀺, 𑀫𑀳𑀸𑀭𑀸𑀚, 𑀔𑀢𑁆𑀢𑀺𑀬𑁂𑀳𑀺 𑀞𑀧𑀺𑀢𑁄 𑀏𑀲𑁄 𑀦𑀺𑀬𑀫𑁄 ‘𑀬𑁄 𑀧𑀸𑀡𑀁 𑀳𑀦𑀢𑀺, 𑀲𑁄 𑀤𑀡𑁆𑀟𑀸𑀭𑀳𑁄…𑀧𑁂… 𑀬𑁄 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺…𑀧𑁂… 𑀬𑁄 𑀧𑀭𑀤𑀸𑀭𑀁 𑀕𑀘𑁆𑀙𑀢𑀺…𑀧𑁂… 𑀬𑁄 𑀫𑀼𑀲𑀸 𑀪𑀡𑀢𑀺…𑀧𑁂… 𑀬𑁄 𑀕𑀸𑀫𑀁 𑀖𑀸𑀢𑁂𑀢𑀺…𑀧𑁂… 𑀬𑁄 𑀧𑀦𑁆𑀣𑀁 𑀤𑀽𑀲𑁂𑀢𑀺…𑀧𑁂… 𑀬𑁄 𑀦𑀺𑀓𑀢𑀺𑀁 𑀓𑀭𑁄𑀢𑀺…𑀧𑁂… 𑀬𑁄 𑀯𑀜𑁆𑀘𑀦𑀁 𑀓𑀭𑁄𑀢𑀺, 𑀲𑁄 𑀤𑀡𑁆𑀟𑀸𑀭𑀳𑁄 𑀯𑀥𑀺𑀢𑀩𑁆𑀩𑁄 𑀙𑁂𑀢𑁆𑀢𑀩𑁆𑀩𑁄 𑀪𑁂𑀢𑁆𑀢𑀩𑁆𑀩𑁄 𑀳𑀦𑁆𑀢𑀩𑁆𑀩𑁄’𑀢𑀺. 𑀢𑀁 𑀢𑁂 𑀉𑀧𑀸𑀤𑀸𑀬 𑀯𑀺𑀘𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀤𑀡𑁆𑀟𑁂𑀦𑁆𑀢𑀺 𑀯𑀥𑁂𑀦𑁆𑀢𑀺 𑀙𑀺𑀦𑁆𑀤𑀦𑁆𑀢𑀺 𑀪𑀺𑀦𑁆𑀤𑀦𑁆𑀢𑀺 𑀳𑀦𑀦𑁆𑀢𑀺 𑀘, 𑀅𑀧𑀺 𑀦𑀼, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀓𑁂𑀳𑀺𑀘𑀺 𑀞𑀧𑀺𑀢𑁄 𑀦𑀺𑀬𑀫𑁄 ‘𑀬𑁄 𑀤𑀸𑀦𑀁 𑀯𑀸 𑀤𑁂𑀢𑀺, 𑀲𑀻𑀮𑀁 𑀯𑀸 𑀭𑀓𑁆𑀔𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸 𑀓𑀭𑁄𑀢𑀺, 𑀢𑀲𑁆𑀲 𑀥𑀦𑀁 𑀯𑀸 𑀬𑀲𑀁 𑀯𑀸 𑀤𑀸𑀢𑀩𑁆𑀩’𑀦𑁆𑀢𑀺; 𑀅𑀧𑀺 𑀦𑀼 𑀢𑀁 𑀯𑀺𑀘𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀥𑀦𑀁 𑀯𑀸 𑀬𑀲𑀁 𑀯𑀸 𑀤𑁂𑀦𑁆𑀢𑀺, 𑀘𑁄𑀭𑀲𑁆𑀲 𑀓𑀢𑀓𑀫𑁆𑀫𑀲𑁆𑀲 𑀯𑀥𑀩𑀦𑁆𑀥𑀦𑀁 𑀯𑀺𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀬𑀤𑀺, 𑀫𑀳𑀸𑀭𑀸𑀚, 𑀤𑀸𑀬𑀓𑀸𑀦𑀁 𑀯𑀺𑀘𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀥𑀦𑀁 𑀯𑀸 𑀬𑀲𑀁 𑀯𑀸 𑀤𑀤𑁂𑀬𑁆𑀬𑀼𑀁, 𑀓𑀼𑀲𑀮𑀫𑁆𑀧𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀪𑀯𑁂𑀬𑁆𑀬, 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀭𑀸𑀚, 𑀤𑀸𑀬𑀓𑁂 𑀦 𑀯𑀺𑀘𑀺𑀦𑀦𑁆𑀢𑀺 ‘𑀥𑀦𑀁 𑀯𑀸 𑀬𑀲𑀁 𑀯𑀸 𑀤𑀲𑁆𑀲𑀸𑀫𑀸’𑀢𑀺, 𑀢𑀲𑁆𑀫𑀸 𑀓𑀼𑀲𑀮𑀁 𑀦 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁. 𑀇𑀫𑀺𑀦𑀸, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀅𑀓𑀼𑀲𑀮𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁, 𑀲𑀫𑁆𑀧𑀭𑀸𑀬𑁂𑀯 𑀲𑁄 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁 𑀯𑁂𑀤𑀦𑀁 𑀯𑁂𑀤𑀬𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀯𑀸𑀤𑀺𑀲𑁂𑀦 𑀩𑀼𑀤𑁆𑀥𑀺𑀫𑀦𑁆𑀢𑁂𑀦 𑀯𑀺𑀦𑀸 𑀦𑁂𑀲𑁄 𑀧𑀜𑁆𑀳𑁄 𑀲𑀼𑀦𑀺𑀩𑁆𑀩𑁂𑀞𑀺𑀬𑁄, 𑀮𑁄𑀓𑀺𑀓𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀮𑁄𑀓𑀼𑀢𑁆𑀢𑀭𑁂𑀦 𑀯𑀺𑀜𑁆𑀜𑀸𑀧𑀺𑀢’’𑀦𑁆𑀢𑀺.

𑀓𑀼𑀲𑀮𑀸𑀓𑀼𑀲𑀮𑀩𑀮𑀯𑀢𑀭𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀧𑀼𑀩𑁆𑀩𑀧𑁂𑀢𑀸𑀤𑀺𑀲𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑁂 𑀤𑀸𑀬𑀓𑀸 𑀤𑀸𑀦𑀁 𑀤𑀢𑁆𑀯𑀸 𑀧𑀼𑀩𑁆𑀩𑀧𑁂𑀢𑀸𑀦𑀁 𑀆𑀤𑀺𑀲𑀦𑁆𑀢𑀺 [𑀉𑀤𑁆𑀤𑀺𑀲𑀦𑁆𑀢𑀺 (𑀓. 𑀲𑀻.)] ‘𑀇𑀤𑀁 𑀢𑁂𑀲𑀁 𑀧𑀸𑀧𑀼𑀡𑀸𑀢𑀽’𑀢𑀺, 𑀅𑀧𑀺 𑀦𑀼 𑀢𑁂 𑀓𑀺𑀜𑁆𑀘𑀺 𑀢𑀢𑁄𑀦𑀺𑀤𑀸𑀦𑀁 𑀯𑀺𑀧𑀸𑀓𑀁 𑀧𑀝𑀺𑀮𑀪𑀦𑁆𑀢𑀻’’𑀢𑀺? ‘‘𑀓𑁂𑀘𑀺, 𑀫𑀳𑀸𑀭𑀸𑀚, 𑀧𑀝𑀺𑀮𑀪𑀦𑁆𑀢𑀺, 𑀓𑁂𑀘𑀺 𑀦𑀧𑁆𑀧𑀝𑀺𑀮𑀪𑀦𑁆𑀢𑀻’’𑀢𑀺. ‘‘𑀓𑁂, 𑀪𑀦𑁆𑀢𑁂, 𑀧𑀝𑀺𑀮𑀪𑀦𑁆𑀢𑀺, 𑀓𑁂 𑀦𑀧𑁆𑀧𑀝𑀺𑀮𑀪𑀦𑁆𑀢𑀻’’𑀢𑀺? ‘‘𑀦𑀺𑀭𑀬𑀽𑀧𑀧𑀦𑁆𑀦𑀸, 𑀫𑀳𑀸𑀭𑀸𑀚, 𑀦𑀧𑁆𑀧𑀝𑀺𑀮𑀪𑀦𑁆𑀢𑀺, 𑀲𑀕𑁆𑀕𑀕𑀢𑀸 𑀦𑀧𑁆𑀧𑀝𑀺𑀮𑀪𑀦𑁆𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀕𑀢𑀸 𑀦𑀧𑁆𑀧𑀝𑀺𑀮𑀪𑀦𑁆𑀢𑀺, 𑀘𑀢𑀼𑀦𑁆𑀦𑀁 𑀧𑁂𑀢𑀸𑀦𑀁 𑀢𑀬𑁄 𑀧𑁂𑀢𑀸 𑀦𑀧𑁆𑀧𑀝𑀺𑀮𑀪𑀦𑁆𑀢𑀺 𑀯𑀦𑁆𑀢𑀸𑀲𑀺𑀓𑀸 𑀔𑀼𑀧𑁆𑀧𑀺𑀧𑀸𑀲𑀺𑀦𑁄 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀸, 𑀮𑀪𑀦𑁆𑀢𑀺 𑀧𑁂𑀢𑀸 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀦𑁄, 𑀢𑁂𑀧𑀺 𑀲𑀭𑀫𑀸𑀦𑀸 𑀬𑁂𑀯 𑀮𑀪𑀦𑁆𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀤𑀸𑀬𑀓𑀸𑀦𑀁 𑀤𑀸𑀦𑀁 𑀯𑀺𑀲𑁄𑀲𑀺𑀢𑀁 [𑀯𑀺𑀲𑁄𑀢𑀁 (𑀲𑀻. 𑀧𑀻.)] 𑀳𑁄𑀢𑀺 𑀅𑀨𑀮𑀁, 𑀬𑁂𑀲𑀁 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀬𑀤𑀺 𑀢𑁂 𑀦𑀧𑁆𑀧𑀝𑀺𑀮𑀪𑀦𑁆𑀢𑀻’’𑀢𑀺? ‘‘𑀦 𑀳𑀺 𑀢𑀁, 𑀫𑀳𑀸𑀭𑀸𑀚, 𑀤𑀸𑀦𑀁 𑀅𑀨𑀮𑀁 𑀳𑁄𑀢𑀺 𑀅𑀯𑀺𑀧𑀸𑀓𑀁, 𑀤𑀸𑀬𑀓𑀸 𑀬𑁂𑀯 𑀢𑀲𑁆𑀲 𑀨𑀮𑀁 𑀅𑀦𑀼𑀪𑀯𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀻’’𑀢𑀺. ‘‘𑀇𑀥, 𑀫𑀳𑀸𑀭𑀸𑀚, 𑀓𑁂𑀘𑀺 𑀫𑀦𑀼𑀲𑁆𑀲𑀸 𑀫𑀘𑁆𑀙𑀫𑀁𑀲𑀲𑀼𑀭𑀸𑀪𑀢𑁆𑀢𑀔𑀚𑁆𑀚𑀓𑀸𑀦𑀺 𑀧𑀝𑀺𑀬𑀸𑀤𑁂𑀢𑁆𑀯𑀸 𑀜𑀸𑀢𑀺𑀓𑀼𑀮𑀁 𑀕𑀘𑁆𑀙𑀦𑁆𑀢𑀺, 𑀬𑀤𑀺 𑀢𑁂 𑀜𑀸𑀢𑀓𑀸 𑀢𑀁 𑀉𑀧𑀸𑀬𑀦𑀁 𑀦 𑀲𑀫𑁆𑀧𑀝𑀺𑀘𑁆𑀙𑁂𑀬𑁆𑀬𑀼𑀁, 𑀅𑀧𑀺 𑀦𑀼 𑀢𑀁 𑀉𑀧𑀸𑀬𑀦𑀁 𑀯𑀺𑀲𑁄𑀲𑀺𑀢𑀁 𑀕𑀘𑁆𑀙𑁂𑀬𑁆𑀬 𑀯𑀺𑀦𑀲𑁆𑀲𑁂𑀬𑁆𑀬 𑀯𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀲𑀸𑀫𑀺𑀓𑀸𑀦𑀁 𑀬𑁂𑀯 𑀢𑀁 𑀳𑁄𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀤𑀸𑀬𑀓𑀸 𑀬𑁂𑀯 𑀢𑀲𑁆𑀲 𑀨𑀮𑀁 𑀅𑀦𑀼𑀪𑀯𑀦𑁆𑀢𑀺. 𑀬𑀣𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀕𑀩𑁆𑀪𑀁 𑀧𑀯𑀺𑀝𑁆𑀞𑁄 𑀅𑀲𑀢𑀺 𑀧𑀼𑀭𑀢𑁄 𑀦𑀺𑀓𑁆𑀔𑀫𑀦𑀫𑀼𑀔𑁂 𑀓𑁂𑀦 𑀦𑀺𑀓𑁆𑀔𑀫𑁂𑀬𑁆𑀬𑀸’’𑀢𑀺. ‘‘𑀧𑀯𑀺𑀝𑁆𑀞𑁂𑀦𑁂𑀯 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀤𑀸𑀬𑀓𑀸 𑀬𑁂𑀯 𑀢𑀲𑁆𑀲 𑀨𑀮𑀁 𑀅𑀦𑀼𑀪𑀯𑀦𑁆𑀢𑀻’’𑀢𑀺. ‘‘𑀳𑁄𑀢𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀺, 𑀤𑀸𑀬𑀓𑀸 𑀬𑁂𑀯 𑀢𑀲𑁆𑀲 𑀨𑀮𑀁 𑀅𑀦𑀼𑀪𑀯𑀦𑁆𑀢𑀺, 𑀦 𑀫𑀬𑀁 𑀢𑀁 𑀓𑀸𑀭𑀡𑀁 𑀯𑀺𑀮𑁄𑀫𑁂𑀫𑀸𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀤𑀺 𑀇𑀫𑁂𑀲𑀁 𑀤𑀸𑀬𑀓𑀸𑀦𑀁 𑀤𑀺𑀦𑁆𑀦𑀤𑀸𑀦𑀁 𑀧𑀼𑀩𑁆𑀩𑀧𑁂𑀢𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀢𑁂 𑀘 𑀢𑀲𑁆𑀲 𑀯𑀺𑀧𑀸𑀓𑀁 𑀅𑀦𑀼𑀪𑀯𑀦𑁆𑀢𑀺. 𑀢𑁂𑀦 𑀳𑀺 𑀬𑁄 𑀧𑀸𑀡𑀸𑀢𑀺𑀧𑀸𑀢𑀻 𑀮𑀼𑀤𑁆𑀤𑁄 𑀮𑁄𑀳𑀺𑀢𑀧𑀸𑀡𑀻 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀫𑀦𑀼𑀲𑁆𑀲𑁂 𑀖𑀸𑀢𑁂𑀢𑁆𑀯𑀸 𑀤𑀸𑀭𑀼𑀡𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀩𑁆𑀩𑀧𑁂𑀢𑀸𑀦𑀁 𑀆𑀤𑀺𑀲𑁂𑀬𑁆𑀬 ‘𑀇𑀫𑀲𑁆𑀲 𑀫𑁂 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄 𑀧𑀼𑀩𑁆𑀩𑀧𑁂𑀢𑀸𑀦𑀁 𑀧𑀸𑀧𑀼𑀡𑀸𑀢𑀽’𑀢𑀺, 𑀅𑀧𑀺 𑀦𑀼 𑀢𑀲𑁆𑀲 𑀯𑀺𑀧𑀸𑀓𑁄 𑀧𑀼𑀩𑁆𑀩𑀧𑁂𑀢𑀸𑀦𑀁 𑀧𑀸𑀧𑀼𑀡𑀸𑀢𑀻’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁄 𑀢𑀢𑁆𑀣 𑀳𑁂𑀢𑀼 𑀓𑀺𑀁 𑀓𑀸𑀭𑀡𑀁, 𑀬𑁂𑀦 𑀓𑀼𑀲𑀮𑀁 𑀧𑀸𑀧𑀼𑀡𑀸𑀢𑀺 𑀅𑀓𑀼𑀲𑀮𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺? ‘‘𑀦𑁂𑀲𑁄, 𑀫𑀳𑀸𑀭𑀸𑀚, 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀫𑀸 𑀘 𑀢𑁆𑀯𑀁, 𑀫𑀳𑀸𑀭𑀸𑀚, ‘𑀯𑀺𑀲𑀚𑁆𑀚𑀓𑁄 𑀅𑀢𑁆𑀣𑀻’𑀢𑀺 𑀅𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀼𑀘𑁆𑀙𑀺, ‘𑀓𑀺𑀲𑁆𑀲 𑀆𑀓𑀸𑀲𑁄 𑀦𑀺𑀭𑀸𑀮𑀫𑁆𑀩𑁄, 𑀓𑀺𑀲𑁆𑀲 𑀕𑀗𑁆𑀕𑀸 𑀉𑀤𑁆𑀥𑀫𑁆𑀫𑀼𑀔𑀸 𑀦 𑀲𑀦𑁆𑀤𑀢𑀺, 𑀓𑀺𑀲𑁆𑀲 𑀇𑀫𑁂 𑀫𑀦𑀼𑀲𑁆𑀲𑀸 𑀘 𑀤𑀺𑀚𑀸 𑀘 𑀤𑁆𑀯𑀺𑀧𑀤𑀸 𑀫𑀺𑀕𑀸 𑀘𑀢𑀼𑀧𑁆𑀧𑀤𑀸’𑀢𑀺 𑀢𑀫𑁆𑀧𑀺 𑀫𑀁 𑀢𑁆𑀯𑀁 𑀧𑀼𑀘𑁆𑀙𑀺𑀲𑁆𑀲𑀲𑀻’’𑀢𑀺. ‘‘𑀦𑀸𑀳𑀁 𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑀺𑀳𑁂𑀲𑀸𑀧𑁂𑀓𑁆𑀔𑁄 𑀧𑀼𑀘𑁆𑀙𑀸𑀫𑀺, 𑀅𑀧𑀺 𑀘 𑀦𑀺𑀩𑁆𑀩𑀸𑀳𑀦𑀢𑁆𑀣𑀸𑀬 [𑀦𑀺𑀩𑁆𑀩𑀸𑀦𑀢𑁆𑀣𑀸𑀬 (𑀓.)] 𑀲𑀦𑁆𑀤𑁂𑀳𑀲𑁆𑀲 𑀧𑀼𑀘𑁆𑀙𑀸𑀫𑀺, 𑀩𑀳𑀽 𑀫𑀦𑀼𑀲𑁆𑀲𑀸 𑀮𑁄𑀓𑁂 𑀯𑀸𑀫𑀕𑀸𑀫𑀺𑀦𑁄 [𑀧𑀸𑀧𑀕𑀸𑀳𑀺𑀦𑁄 (𑀲𑁆𑀬𑀸.)] 𑀯𑀺𑀘𑀓𑁆𑀔𑀼𑀓𑀸, ‘𑀓𑀺𑀦𑁆𑀢𑀺 𑀢𑁂 𑀑𑀢𑀸𑀭𑀁 𑀦 𑀮𑀪𑁂𑀬𑁆𑀬𑀼’𑀦𑁆𑀢𑀺 𑀏𑀯𑀸𑀳𑀁 𑀢𑀁 𑀧𑀼𑀘𑁆𑀙𑀸𑀫𑀻’’𑀢𑀺. ‘‘𑀦 𑀲𑀓𑁆𑀓𑀸, 𑀫𑀳𑀸𑀭𑀸𑀚, 𑀲𑀳 𑀅𑀓𑀢𑁂𑀦 𑀅𑀦𑀦𑀼𑀫𑀢𑁂𑀦 𑀲𑀳 𑀧𑀸𑀧𑀁 𑀓𑀫𑁆𑀫𑀁 𑀲𑀁𑀯𑀺𑀪𑀚𑀺𑀢𑀼𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀸 𑀉𑀤𑀓𑀦𑀺𑀩𑁆𑀩𑀸𑀳𑀦𑁂𑀦 𑀉𑀤𑀓𑀁 𑀲𑀼𑀯𑀺𑀤𑀽𑀭𑀫𑁆𑀧𑀺 𑀳𑀭𑀦𑁆𑀢𑀺, 𑀅𑀧𑀺 𑀦𑀼, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀖𑀦𑀫𑀳𑀸𑀲𑁂𑀮𑀧𑀩𑁆𑀩𑀢𑁄 [𑀧𑀩𑁆𑀩𑀢𑀢𑁄 (𑀓.)] 𑀦𑀺𑀩𑁆𑀩𑀸𑀳𑀦𑁂𑀦 𑀬𑀣𑀺𑀘𑁆𑀙𑀺𑀢𑀁 𑀳𑀭𑀺𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀓𑀼𑀲𑀮𑀁 𑀲𑀁𑀯𑀺𑀪𑀚𑀺𑀢𑀼𑀁, 𑀦 𑀲𑀓𑁆𑀓𑀸 𑀅𑀓𑀼𑀲𑀮𑀁 𑀲𑀁𑀯𑀺𑀪𑀚𑀺𑀢𑀼𑀁. 𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀢𑁂𑀮𑁂𑀦 𑀧𑀤𑀻𑀧𑁄 𑀚𑀸𑀮𑁂𑀢𑀼𑀁, 𑀅𑀧𑀺 𑀦𑀼, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀉𑀤𑀓𑁂𑀦 𑀧𑀤𑀻𑀧𑁄 𑀚𑀸𑀮𑁂𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀓𑀼𑀲𑀮𑀁 𑀲𑀁𑀯𑀺𑀪𑀚𑀺𑀢𑀼𑀁, 𑀦 𑀲𑀓𑁆𑀓𑀸 𑀅𑀓𑀼𑀲𑀮𑀁 𑀲𑀁𑀯𑀺𑀪𑀚𑀺𑀢𑀼𑀁. 𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑀲𑁆𑀲𑀓𑀸 𑀢𑀴𑀸𑀓𑀢𑁄 𑀉𑀤𑀓𑀁 𑀦𑀻𑀳𑀭𑀺𑀢𑁆𑀯𑀸 𑀥𑀜𑁆𑀜𑀁 𑀧𑀭𑀺𑀧𑀸𑀘𑁂𑀦𑁆𑀢𑀺, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀫𑀳𑀸𑀲𑀫𑀼𑀤𑁆𑀤𑀢𑁄 𑀉𑀤𑀓𑀁 𑀦𑀻𑀳𑀭𑀺𑀢𑁆𑀯𑀸 𑀥𑀜𑁆𑀜𑀁 𑀧𑀭𑀺𑀧𑀸𑀘𑁂𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀓𑀼𑀲𑀮𑀁 𑀲𑀁𑀯𑀺𑀪𑀚𑀺𑀢𑀼𑀁, 𑀦 𑀲𑀓𑁆𑀓𑀸 𑀅𑀓𑀼𑀲𑀮𑀁 𑀲𑀁𑀯𑀺𑀪𑀚𑀺𑀢𑀼’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀓𑀸𑀭𑀡𑁂𑀦 𑀲𑀓𑁆𑀓𑀸 𑀓𑀼𑀲𑀮𑀁 𑀲𑀁𑀯𑀺𑀪𑀚𑀺𑀢𑀼𑀁, 𑀦 𑀲𑀓𑁆𑀓𑀸 𑀅𑀓𑀼𑀲𑀮𑀁 𑀲𑀁𑀯𑀺𑀪𑀚𑀺𑀢𑀼𑀁. 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀺, 𑀦𑀸𑀳𑀁 𑀅𑀦𑁆𑀥𑁄 𑀅𑀦𑀸𑀮𑁄𑀓𑁄 𑀲𑀼𑀢𑁆𑀯𑀸 𑀯𑁂𑀤𑀺𑀲𑁆𑀲𑀸𑀫𑀻’’𑀢𑀺. ‘‘𑀅𑀓𑀼𑀲𑀮𑀁, 𑀫𑀳𑀸𑀭𑀸𑀚, 𑀣𑁄𑀓𑀁, 𑀓𑀼𑀲𑀮𑀁 𑀩𑀳𑀼𑀓𑀁, 𑀣𑁄𑀓𑀢𑁆𑀢𑀸 𑀅𑀓𑀼𑀲𑀮𑀁 𑀓𑀢𑁆𑀢𑀸𑀭𑀁 𑀬𑁂𑀯 𑀧𑀭𑀺𑀬𑀸𑀤𑀺𑀬𑀢𑀺, 𑀩𑀳𑀼𑀓𑀢𑁆𑀢𑀸 𑀓𑀼𑀲𑀮𑀁 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀚𑁆𑀛𑁄𑀢𑁆𑀣𑀭𑀢𑀻’’𑀢𑀺. ‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀭𑀺𑀢𑁆𑀢𑀁 𑀏𑀓𑀁 𑀉𑀤𑀓𑀩𑀺𑀦𑁆𑀤𑀼 𑀧𑀣𑀯𑀺𑀬𑀁 𑀦𑀺𑀧𑀢𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀉𑀤𑀓𑀩𑀺𑀦𑁆𑀤𑀼 𑀤𑀲𑀧𑀺 𑀤𑁆𑀯𑀸𑀤𑀲𑀧𑀺 𑀬𑁄𑀚𑀦𑀸𑀦𑀺 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀬𑀢𑁆𑀣 𑀢𑀁 𑀉𑀤𑀓𑀩𑀺𑀦𑁆𑀤𑀼 𑀦𑀺𑀧𑀢𑀺𑀢𑀁, 𑀢𑀢𑁆𑀣𑁂𑀯 𑀧𑀭𑀺𑀬𑀸𑀤𑀺𑀬𑀢𑀻’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦, 𑀫𑀳𑀸𑀭𑀸𑀚𑀸’’𑀢𑀺? ‘‘𑀧𑀭𑀺𑀢𑁆𑀢𑀢𑁆𑀢𑀸, 𑀪𑀦𑁆𑀢𑁂, 𑀉𑀤𑀓𑀩𑀺𑀦𑁆𑀤𑀼𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀭𑀺𑀢𑁆𑀢𑀁 𑀅𑀓𑀼𑀲𑀮𑀁 𑀧𑀭𑀺𑀢𑁆𑀢𑀢𑁆𑀢𑀸 𑀓𑀢𑁆𑀢𑀸𑀭𑀁 𑀬𑁂𑀯 𑀧𑀭𑀺𑀬𑀸𑀤𑀺𑀬𑀢𑀺, 𑀦 𑀲𑀓𑁆𑀓𑀸 𑀲𑀁𑀯𑀺𑀪𑀚𑀺𑀢𑀼𑀁.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀫𑁂𑀖𑁄 𑀅𑀪𑀺𑀯𑀲𑁆𑀲𑁂𑀬𑁆𑀬 𑀢𑀧𑁆𑀧𑀬𑀦𑁆𑀢𑁄 𑀥𑀭𑀡𑀺𑀢𑀮𑀁, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀫𑀳𑀸𑀫𑁂𑀖𑁄 𑀲𑀫𑀦𑁆𑀢𑀢𑁄 𑀑𑀢𑁆𑀣𑀭𑁂𑀬𑁆𑀬𑀸’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀧𑀽𑀭𑀬𑀺𑀢𑁆𑀯𑀸 𑀲𑁄 𑀫𑀳𑀸𑀫𑁂𑀖𑁄 𑀲𑁄𑀩𑁆𑀪𑀲𑀭 𑀲𑀭𑀺𑀢𑀲𑀸𑀔𑀸𑀓𑀦𑁆𑀤𑀭𑀧𑀤𑀭𑀤𑀳𑀢𑀴𑀸𑀓 [𑀫𑀸𑀢𑀺𑀓𑀸𑀢𑀴𑀸𑀓 (𑀓.)] 𑀉𑀤𑀧𑀸𑀦𑀧𑁄𑀓𑁆𑀔𑀭𑀡𑀺𑀬𑁄 𑀤𑀲𑀧𑀺 𑀤𑁆𑀯𑀸𑀤𑀲𑀧𑀺 𑀬𑁄𑀚𑀦𑀸𑀦𑀺 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬𑀸’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦, 𑀫𑀳𑀸𑀭𑀸𑀚𑀸’’𑀢𑀺? ‘‘𑀫𑀳𑀦𑁆𑀢𑀢𑁆𑀢𑀸, 𑀪𑀦𑁆𑀢𑁂, 𑀫𑁂𑀖𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀼𑀲𑀮𑀁 𑀩𑀳𑀼𑀓𑀁, 𑀩𑀳𑀼𑀓𑀢𑁆𑀢𑀸 𑀲𑀓𑁆𑀓𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺𑀧𑀺 𑀲𑀁𑀯𑀺𑀪𑀚𑀺𑀢𑀼’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂𑀦 𑀓𑀸𑀭𑀡𑁂𑀦 𑀅𑀓𑀼𑀲𑀮𑀁 𑀣𑁄𑀓𑀁 𑀓𑀼𑀲𑀮𑀁 𑀩𑀳𑀼𑀢𑀭’’𑀦𑁆𑀢𑀺? ‘‘𑀇𑀥, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀲𑁄 𑀳𑀝𑁆𑀞𑁄 𑀧𑀳𑀝𑁆𑀞𑁄 𑀳𑀲𑀺𑀢𑁄 𑀧𑀫𑀼𑀤𑀺𑀢𑁄 𑀧𑀲𑀦𑁆𑀦𑀫𑀸𑀦𑀲𑁄 𑀯𑁂𑀤𑀚𑀸𑀢𑁄 𑀳𑁄𑀢𑀺, 𑀢𑀲𑁆𑀲 𑀅𑀧𑀭𑀸𑀧𑀭𑀁 𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀓𑀼𑀲𑀮𑀁 𑀧𑀯𑀟𑁆𑀠𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀤𑀧𑀸𑀦𑁂 𑀩𑀳𑀼𑀲𑀮𑀺𑀮𑀲𑀫𑁆𑀧𑀼𑀡𑁆𑀡𑁂 𑀏𑀓𑁂𑀦 𑀤𑁂𑀲𑁂𑀦 𑀉𑀤𑀓𑀁 𑀧𑀯𑀺𑀲𑁂𑀬𑁆𑀬, 𑀏𑀓𑁂𑀦 𑀦𑀺𑀓𑁆𑀔𑀫𑁂𑀬𑁆𑀬, 𑀦𑀺𑀓𑁆𑀔𑀫𑀦𑁆𑀢𑁂𑀧𑀺 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀲𑀓𑁆𑀓𑀸 𑀳𑁄𑀢𑀺 𑀔𑀬𑀁 𑀧𑀸𑀧𑁂𑀢𑀼𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀓𑀼𑀲𑀮𑀁 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀯𑀟𑁆𑀠𑀢𑀺. 𑀯𑀲𑁆𑀲𑀲𑀢𑁂𑀧𑀺 𑀘𑁂, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀓𑀢𑀁 𑀓𑀼𑀲𑀮𑀁 𑀆𑀯𑀚𑁆𑀚𑁂𑀬𑁆𑀬, 𑀆𑀯𑀚𑁆𑀚𑀺𑀢𑁂 𑀆𑀯𑀚𑁆𑀚𑀺𑀢𑁂 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀓𑀼𑀲𑀮𑀁 𑀧𑀯𑀟𑁆𑀠𑀢𑀺. 𑀢𑀲𑁆𑀲 𑀢𑀁 𑀓𑀼𑀲𑀮𑀁 𑀲𑀓𑁆𑀓𑀸 𑀳𑁄𑀢𑀺 𑀬𑀣𑀺𑀘𑁆𑀙𑀓𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀺𑀪𑀚𑀺𑀢𑀼𑀁, 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀓𑀼𑀲𑀮𑀁 𑀩𑀳𑀼𑀢𑀭𑀁.

‘‘𑀅𑀓𑀼𑀲𑀮𑀁 𑀧𑀦, 𑀫𑀳𑀸𑀭𑀸𑀚, 𑀓𑀭𑁄𑀦𑁆𑀢𑁄 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀘𑀺𑀢𑁆𑀢𑀁 𑀧𑀝𑀺𑀮𑀻𑀬𑀢𑀺 𑀧𑀝𑀺𑀓𑀼𑀝𑀢𑀺 𑀧𑀝𑀺𑀯𑀢𑁆𑀢𑀢𑀺 𑀦 𑀲𑀫𑁆𑀧𑀲𑀸𑀭𑀻𑀬𑀢𑀺 𑀲𑁄𑀘𑀢𑀺 𑀢𑀧𑁆𑀧𑀢𑀺 𑀳𑀸𑀬𑀢𑀺 𑀔𑀻𑀬𑀢𑀺 𑀦 𑀧𑀭𑀺𑀯𑀟𑁆𑀠𑀢𑀺 𑀢𑀢𑁆𑀣𑁂𑀯 𑀧𑀭𑀺𑀬𑀸𑀤𑀺𑀬𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀲𑀼𑀓𑁆𑀔𑀸𑀬 𑀦𑀤𑀺𑀬𑀸 𑀫𑀳𑀸𑀧𑀼𑀴𑀺𑀦𑀸𑀬 𑀉𑀦𑁆𑀦𑀢𑀸𑀯𑀦𑀢𑀸𑀬 𑀓𑀼𑀝𑀺𑀮𑀲𑀗𑁆𑀓𑀼𑀝𑀺𑀮𑀸𑀬 𑀉𑀧𑀭𑀺𑀢𑁄 𑀧𑀭𑀺𑀢𑁆𑀢𑀁 𑀉𑀤𑀓𑀁 𑀆𑀕𑀘𑁆𑀙𑀦𑁆𑀢𑀁 𑀳𑀸𑀬𑀢𑀺 𑀔𑀻𑀬𑀢𑀺 𑀦 𑀧𑀭𑀺𑀯𑀟𑁆𑀠𑀢𑀺 𑀢𑀢𑁆𑀣𑁂𑀯 𑀧𑀭𑀺𑀬𑀸𑀤𑀺𑀬𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀓𑀼𑀲𑀮𑀁 𑀓𑀭𑁄𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀧𑀝𑀺𑀮𑀻𑀬𑀢𑀺 𑀧𑀝𑀺𑀓𑀼𑀝𑀢𑀺 𑀧𑀝𑀺𑀯𑀢𑁆𑀢𑀢𑀺 𑀦 𑀲𑀫𑁆𑀧𑀲𑀸𑀭𑀻𑀬𑀢𑀺 𑀲𑁄𑀘𑀢𑀺 𑀢𑀧𑁆𑀧𑀢𑀺 𑀳𑀸𑀬𑀢𑀺 𑀔𑀻𑀬𑀢𑀺 𑀦 𑀧𑀭𑀺𑀯𑀟𑁆𑀠𑀢𑀺 𑀢𑀢𑁆𑀣𑁂𑀯 𑀧𑀭𑀺𑀬𑀸𑀤𑀺𑀬𑀢𑀺, 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀓𑀼𑀲𑀮𑀁 𑀣𑁄𑀓’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀧𑀼𑀩𑁆𑀩𑀧𑁂𑀢𑀸𑀤𑀺𑀲𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀲𑀼𑀧𑀺𑀦𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀦𑀭𑀦𑀸𑀭𑀺𑀬𑁄 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀺 𑀓𑀮𑁆𑀬𑀸𑀡𑀫𑁆𑀧𑀺 𑀧𑀸𑀧𑀓𑀫𑁆𑀧𑀺, 𑀤𑀺𑀝𑁆𑀞𑀧𑀼𑀩𑁆𑀩𑀫𑁆𑀧𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑀫𑁆𑀧𑀺, 𑀓𑀢𑀧𑀼𑀩𑁆𑀩𑀫𑁆𑀧𑀺 𑀅𑀓𑀢𑀧𑀼𑀩𑁆𑀩𑀫𑁆𑀧𑀺, 𑀔𑁂𑀫𑀫𑁆𑀧𑀺 𑀲𑀪𑀬𑀫𑁆𑀧𑀺, 𑀤𑀽𑀭𑁂𑀧𑀺 𑀲𑀦𑁆𑀢𑀺𑀓𑁂𑀧𑀺, 𑀩𑀳𑀼𑀯𑀺𑀥𑀸𑀦𑀺𑀧𑀺 𑀅𑀦𑁂𑀓𑀯𑀡𑁆𑀡𑀲𑀳𑀲𑁆𑀲𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀓𑀺𑀜𑁆𑀘𑁂𑀢𑀁 𑀲𑀼𑀧𑀺𑀦𑀁 𑀦𑀸𑀫, 𑀓𑁄 𑀘𑁂𑀢𑀁 𑀧𑀲𑁆𑀲𑀢𑀻’’𑀢𑀺? ‘‘𑀦𑀺𑀫𑀺𑀢𑁆𑀢𑀫𑁂𑀢𑀁, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀁 𑀦𑀸𑀫, 𑀬𑀁 𑀘𑀺𑀢𑁆𑀢𑀲𑁆𑀲 𑀆𑀧𑀸𑀢 [𑀆𑀧𑀸𑀣 (𑀲𑀻. 𑀧𑀻.)] 𑀫𑀼𑀧𑀕𑀘𑁆𑀙𑀢𑀺. 𑀙𑀬𑀺𑀫𑁂, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀁 𑀧𑀲𑁆𑀲𑀦𑁆𑀢𑀺, 𑀯𑀸𑀢𑀺𑀓𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀧𑀺𑀢𑁆𑀢𑀺𑀓𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀲𑁂𑀫𑁆𑀳𑀺𑀓𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀤𑁂𑀯𑀢𑀽𑀧𑀲𑀁𑀳𑀸𑀭𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀲𑀫𑀼𑀤𑀸𑀘𑀺𑀡𑁆𑀡𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀢𑀢𑁆𑀭, 𑀫𑀳𑀸𑀭𑀸𑀚, 𑀬𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀢𑀁 𑀬𑁂𑀯 𑀲𑀘𑁆𑀘𑀁, 𑀅𑀯𑀲𑁂𑀲𑀁 𑀫𑀺𑀘𑁆𑀙𑀸’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀓𑀺𑀁 𑀢𑀲𑁆𑀲 𑀘𑀺𑀢𑁆𑀢𑀁 𑀲𑀬𑀁 𑀕𑀦𑁆𑀢𑁆𑀯𑀸 𑀢𑀁 𑀦𑀺𑀫𑀺𑀢𑁆𑀢𑀁 𑀯𑀺𑀘𑀺𑀦𑀸𑀢𑀺, 𑀢𑀁 𑀯𑀸 𑀦𑀺𑀫𑀺𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀆𑀧𑀸𑀢𑀫𑀼𑀧𑀕𑀘𑁆𑀙𑀢𑀺, 𑀅𑀜𑁆𑀜𑁄 𑀯𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀆𑀭𑁄𑀘𑁂𑀢𑀻’’𑀢𑀺? ‘‘𑀦, 𑀫𑀳𑀸𑀭𑀸𑀚, 𑀢𑀲𑁆𑀲 𑀘𑀺𑀢𑁆𑀢𑀁 𑀲𑀬𑀁 𑀕𑀦𑁆𑀢𑁆𑀯𑀸 𑀢𑀁 𑀦𑀺𑀫𑀺𑀢𑁆𑀢𑀁 𑀯𑀺𑀘𑀺𑀦𑀸𑀢𑀺, 𑀦𑀸𑀧𑀺 𑀅𑀜𑁆𑀜𑁄 𑀓𑁄𑀘𑀺 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀆𑀭𑁄𑀘𑁂𑀢𑀺, 𑀅𑀣 𑀔𑁄 𑀢𑀁 𑀬𑁂𑀯 𑀦𑀺𑀫𑀺𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀆𑀧𑀸𑀢𑀫𑀼𑀧𑀕𑀘𑁆𑀙𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀆𑀤𑀸𑀲𑁄 𑀦 𑀲𑀬𑀁 𑀓𑀼𑀳𑀺𑀜𑁆𑀘𑀺 𑀕𑀦𑁆𑀢𑁆𑀯𑀸 𑀙𑀸𑀬𑀁 𑀯𑀺𑀘𑀺𑀦𑀸𑀢𑀺, 𑀦𑀸𑀧𑀺 𑀅𑀜𑁆𑀜𑁄 𑀓𑁄𑀘𑀺 𑀙𑀸𑀬𑀁 𑀆𑀦𑁂𑀢𑁆𑀯𑀸 𑀆𑀤𑀸𑀲𑀁 𑀆𑀭𑁄𑀧𑁂𑀢𑀺 [𑀆𑀭𑁄𑀘𑁂𑀢𑀺 (𑀓.)], 𑀅𑀣 𑀔𑁄 𑀬𑀢𑁄 𑀓𑀼𑀢𑁄𑀘𑀺 𑀙𑀸𑀬𑀸 𑀆𑀕𑀦𑁆𑀢𑁆𑀯𑀸 𑀆𑀤𑀸𑀲𑀲𑁆𑀲 𑀆𑀧𑀸𑀢𑀫𑀼𑀧𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦 𑀢𑀲𑁆𑀲 𑀘𑀺𑀢𑁆𑀢𑀁 𑀲𑀬𑀁 𑀕𑀦𑁆𑀢𑁆𑀯𑀸 𑀢𑀁 𑀦𑀺𑀫𑀺𑀢𑁆𑀢𑀁 𑀯𑀺𑀘𑀺𑀦𑀸𑀢𑀺, 𑀦𑀸𑀧𑀺 𑀅𑀜𑁆𑀜𑁄 𑀓𑁄𑀘𑀺 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀢𑀺, 𑀅𑀣 𑀔𑁄 𑀬𑀢𑁄 𑀓𑀼𑀢𑁄𑀘𑀺 𑀦𑀺𑀫𑀺𑀢𑁆𑀢𑀁 𑀆𑀕𑀦𑁆𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀆𑀧𑀸𑀢𑀫𑀼𑀧𑀕𑀘𑁆𑀙𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀢𑀁 𑀘𑀺𑀢𑁆𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀅𑀧𑀺 𑀦𑀼 𑀢𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺 ‘𑀏𑀯𑀁 𑀦𑀸𑀫 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺 𑀔𑁂𑀫𑀁 𑀯𑀸 𑀪𑀬𑀁 𑀯𑀸’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚, 𑀢𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺 ‘𑀏𑀯𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺 𑀔𑁂𑀫𑀁 𑀯𑀸 𑀪𑀬𑀁 𑀯𑀸’𑀢𑀺, 𑀦𑀺𑀫𑀺𑀢𑁆𑀢𑁂 𑀧𑀦 𑀉𑀧𑁆𑀧𑀦𑁆𑀦𑁂 𑀅𑀜𑁆𑀜𑁂𑀲𑀁 𑀓𑀣𑁂𑀢𑀺, 𑀢𑀢𑁄 𑀢𑁂 𑀅𑀢𑁆𑀣𑀁 𑀓𑀣𑁂𑀦𑁆𑀢𑀻’’𑀢𑀺.

‘‘𑀇𑀗𑁆𑀖, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑀁 𑀫𑁂 𑀤𑀲𑁆𑀲𑁂𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀭𑀻𑀭𑁂 𑀢𑀺𑀮𑀓𑀸 𑀧𑀻𑀴𑀓𑀸 𑀤𑀤𑁆𑀤𑀽𑀦𑀺 𑀉𑀝𑁆𑀞𑀳𑀦𑁆𑀢𑀺 𑀮𑀸𑀪𑀸𑀬 𑀯𑀸 𑀅𑀮𑀸𑀪𑀸𑀬 𑀯𑀸, 𑀬𑀲𑀸𑀬 𑀯𑀸 𑀅𑀬𑀲𑀸𑀬 𑀯𑀸, 𑀦𑀺𑀦𑁆𑀤𑀸𑀬 𑀯𑀸 𑀧𑀲𑀁𑀲𑀸𑀬 𑀯𑀸, 𑀲𑀼𑀔𑀸𑀬 𑀯𑀸 𑀤𑀼𑀓𑁆𑀔𑀸𑀬 𑀯𑀸, 𑀅𑀧𑀺 𑀦𑀼 𑀢𑀸, 𑀫𑀳𑀸𑀭𑀸𑀚, 𑀧𑀻𑀴𑀓𑀸 𑀚𑀸𑀦𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 ‘𑀇𑀫𑀁 𑀦𑀸𑀫 𑀫𑀬𑀁 𑀅𑀢𑁆𑀣𑀁 𑀦𑀺𑀧𑁆𑀨𑀸𑀤𑁂𑀲𑁆𑀲𑀸𑀫𑀸’’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀬𑀸𑀤𑀺𑀲𑁂 𑀢𑀸 𑀑𑀓𑀸𑀲𑁂 𑀧𑀻𑀴𑀓𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀢𑁆𑀣 𑀢𑀸 𑀧𑀻𑀴𑀓𑀸 𑀤𑀺𑀲𑁆𑀯𑀸 𑀦𑁂𑀫𑀺𑀢𑁆𑀢𑀓𑀸 𑀩𑁆𑀬𑀸𑀓𑀭𑁄𑀦𑁆𑀢𑀺 ‘𑀏𑀯𑀁 𑀦𑀸𑀫 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻’’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀁 𑀢𑀁 𑀘𑀺𑀢𑁆𑀢𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀦 𑀢𑀁 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺 ‘𑀏𑀯𑀁 𑀦𑀸𑀫 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺 𑀔𑁂𑀫𑀁 𑀯𑀸 𑀪𑀬𑀁 𑀯𑀸’𑀢𑀺, 𑀦𑀺𑀫𑀺𑀢𑁆𑀢𑁂 𑀧𑀦 𑀉𑀧𑁆𑀧𑀦𑁆𑀦𑁂 𑀅𑀜𑁆𑀜𑁂𑀲𑀁 𑀓𑀣𑁂𑀢𑀺, 𑀢𑀢𑁄 𑀢𑁂 𑀅𑀢𑁆𑀣𑀁 𑀓𑀣𑁂𑀦𑁆𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀲𑁄 𑀦𑀺𑀤𑁆𑀤𑀸𑀬𑀦𑁆𑀢𑁄, 𑀉𑀤𑀸𑀳𑀼 𑀚𑀸𑀕𑀭𑀦𑁆𑀢𑁄 [𑀚𑀕𑁆𑀕𑀦𑁆𑀢𑁄 (𑀲𑀻. 𑀧𑀻.)] 𑀧𑀲𑁆𑀲𑀢𑀻’’𑀢𑀺? ‘‘𑀬𑁄 𑀲𑁄, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀦 𑀲𑁄 𑀦𑀺𑀤𑁆𑀤𑀸𑀬𑀦𑁆𑀢𑁄 𑀧𑀲𑁆𑀲𑀢𑀺, 𑀦𑀸𑀧𑀺 𑀚𑀸𑀕𑀭𑀦𑁆𑀢𑁄 𑀧𑀲𑁆𑀲𑀢𑀺. 𑀅𑀧𑀺 𑀘 𑀑𑀓𑁆𑀓𑀦𑁆𑀢𑁂 𑀫𑀺𑀤𑁆𑀥𑁂 𑀅𑀲𑀫𑁆𑀧𑀢𑁆𑀢𑁂 𑀪𑀯𑀗𑁆𑀕𑁂 𑀏𑀢𑁆𑀣𑀦𑁆𑀢𑀭𑁂 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀫𑀺𑀤𑁆𑀥𑀲𑀫𑀸𑀭𑀽𑀴𑁆𑀳𑀲𑁆𑀲, 𑀫𑀳𑀸𑀭𑀸𑀚, 𑀘𑀺𑀢𑁆𑀢𑀁 𑀪𑀯𑀗𑁆𑀕𑀕𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀕𑀢𑀁 𑀘𑀺𑀢𑁆𑀢𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀅𑀧𑁆𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀲𑀼𑀧𑀺𑀦𑁄 𑀦 𑀳𑁄𑀢𑀺, 𑀧𑀯𑀢𑁆𑀢𑀫𑀸𑀦𑁂 𑀘𑀺𑀢𑁆𑀢𑁂 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀢𑀺𑀫𑀺𑀭𑁂 𑀅𑀦𑁆𑀥𑀓𑀸𑀭𑁂 𑀅𑀧𑁆𑀧𑀪𑀸𑀲𑁂 𑀲𑀼𑀧𑀭𑀺𑀲𑀼𑀤𑁆𑀥𑁂𑀧𑀺 𑀆𑀤𑀸𑀲𑁂 𑀙𑀸𑀬𑀸 𑀦 𑀤𑀺𑀲𑁆𑀲𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀫𑀺𑀤𑁆𑀥𑀲𑀫𑀸𑀭𑀽𑀴𑁆𑀳𑁂 𑀘𑀺𑀢𑁆𑀢𑁂 𑀪𑀯𑀗𑁆𑀕𑀕𑀢𑁂 𑀢𑀺𑀝𑁆𑀞𑀫𑀸𑀦𑁂𑀧𑀺 𑀲𑀭𑀻𑀭𑁂 𑀘𑀺𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀳𑁄𑀢𑀺, 𑀅𑀧𑁆𑀧𑀯𑀢𑁆𑀢𑁂 𑀘𑀺𑀢𑁆𑀢𑁂 𑀲𑀼𑀧𑀺𑀦𑀁 𑀦 𑀧𑀲𑁆𑀲𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀆𑀤𑀸𑀲𑁄, 𑀏𑀯𑀁 𑀲𑀭𑀻𑀭𑀁 𑀤𑀝𑁆𑀞𑀩𑁆𑀩𑀁; 𑀬𑀣𑀸 𑀅𑀦𑁆𑀥𑀓𑀸𑀭𑁄, 𑀏𑀯𑀁 𑀫𑀺𑀤𑁆𑀥𑀁 𑀤𑀝𑁆𑀞𑀩𑁆𑀩𑀁; 𑀬𑀣𑀸 𑀆𑀮𑁄𑀓𑁄, 𑀏𑀯𑀁 𑀘𑀺𑀢𑁆𑀢𑀁 𑀤𑀝𑁆𑀞𑀩𑁆𑀩𑀁.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀫𑀳𑀺𑀓𑁄𑀢𑁆𑀣𑀝𑀲𑁆𑀲 𑀲𑀽𑀭𑀺𑀬𑀲𑁆𑀲 𑀧𑀪𑀸 𑀦 𑀤𑀺𑀲𑁆𑀲𑀢𑀺 𑀲𑀦𑁆𑀢𑀸 𑀬𑁂𑀯 𑀲𑀽𑀭𑀺𑀬𑀭𑀲𑁆𑀫𑀺 𑀅𑀧𑁆𑀧𑀯𑀢𑁆𑀢𑀸 𑀳𑁄𑀢𑀺, 𑀅𑀧𑁆𑀧𑀯𑀢𑁆𑀢𑀸𑀬 𑀲𑀽𑀭𑀺𑀬𑀭𑀲𑁆𑀫𑀺𑀬𑀸 𑀆𑀮𑁄𑀓𑁄 𑀦 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀫𑀺𑀤𑁆𑀥𑀲𑀫𑀸𑀭𑀽𑀴𑁆𑀳𑀲𑁆𑀲 𑀘𑀺𑀢𑁆𑀢𑀁 𑀪𑀯𑀗𑁆𑀕𑀕𑀢𑀁 𑀳𑁄𑀢𑀺, 𑀪𑀯𑀗𑁆𑀕𑀕𑀢𑀁 𑀘𑀺𑀢𑁆𑀢𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀅𑀧𑁆𑀧𑀯𑀢𑁆𑀢𑁂 𑀘𑀺𑀢𑁆𑀢𑁂 𑀲𑀼𑀧𑀺𑀦𑀁 𑀦 𑀧𑀲𑁆𑀲𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀲𑀽𑀭𑀺𑀬𑁄, 𑀏𑀯𑀁 𑀲𑀭𑀻𑀭𑀁 𑀤𑀝𑁆𑀞𑀩𑁆𑀩𑀁; 𑀬𑀣𑀸 𑀫𑀳𑀺𑀓𑁄𑀢𑁆𑀣𑀭𑀡𑀁, 𑀏𑀯𑀁 𑀫𑀺𑀤𑁆𑀥𑀁 𑀤𑀝𑁆𑀞𑀩𑁆𑀩𑀁; 𑀬𑀣𑀸 𑀲𑀽𑀭𑀺𑀬𑀭𑀲𑁆𑀫𑀺, 𑀏𑀯𑀁 𑀘𑀺𑀢𑁆𑀢𑀁 𑀤𑀝𑁆𑀞𑀩𑁆𑀩𑀁.

‘‘𑀤𑁆𑀯𑀺𑀦𑁆𑀦𑀁, 𑀫𑀳𑀸𑀭𑀸𑀚, 𑀲𑀦𑁆𑀢𑁂𑀧𑀺 𑀲𑀭𑀻𑀭𑁂 𑀘𑀺𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀳𑁄𑀢𑀺, 𑀫𑀺𑀤𑁆𑀥𑀲𑀫𑀸𑀭𑀽𑀴𑁆𑀳𑀲𑁆𑀲 𑀪𑀯𑀗𑁆𑀕𑀕𑀢𑀲𑁆𑀲 𑀲𑀦𑁆𑀢𑁂𑀧𑀺 𑀲𑀭𑀻𑀭𑁂 𑀘𑀺𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀳𑁄𑀢𑀺, 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀲𑁆𑀲 𑀲𑀦𑁆𑀢𑁂𑀧𑀺 𑀲𑀭𑀻𑀭𑁂 𑀘𑀺𑀢𑁆𑀢𑀁 𑀅𑀧𑁆𑀧𑀯𑀢𑁆𑀢𑀁 𑀳𑁄𑀢𑀺, 𑀚𑀸𑀕𑀭𑀦𑁆𑀢𑀲𑁆𑀲, 𑀫𑀳𑀸𑀭𑀸𑀚, 𑀘𑀺𑀢𑁆𑀢𑀁 𑀮𑁄𑀮𑀁 𑀳𑁄𑀢𑀺 𑀯𑀺𑀯𑀝𑀁 𑀧𑀸𑀓𑀝𑀁 𑀅𑀦𑀺𑀩𑀤𑁆𑀥𑀁, 𑀏𑀯𑀭𑀽𑀧𑀲𑁆𑀲 𑀘𑀺𑀢𑁆𑀢𑁂 𑀦𑀺𑀫𑀺𑀢𑁆𑀢𑀁 𑀆𑀧𑀸𑀢𑀁 𑀦 𑀉𑀧𑁂𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀁 𑀯𑀺𑀯𑀝𑀁 𑀧𑀸𑀓𑀝𑀁 𑀅𑀓𑀺𑀭𑀺𑀬𑀁 𑀅𑀭𑀳𑀲𑁆𑀲𑀁 𑀭𑀳𑀲𑁆𑀲𑀓𑀸𑀫𑀸 𑀧𑀭𑀺𑀯𑀚𑁆𑀚𑁂𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀚𑀸𑀕𑀭𑀦𑁆𑀢𑀲𑁆𑀲 𑀤𑀺𑀩𑁆𑀩𑁄 𑀅𑀢𑁆𑀣𑁄 𑀆𑀧𑀸𑀢𑀁 𑀦 𑀉𑀧𑁂𑀢𑀺, 𑀢𑀲𑁆𑀫𑀸 𑀚𑀸𑀕𑀭𑀦𑁆𑀢𑁄 𑀲𑀼𑀧𑀺𑀦𑀁 𑀦 𑀧𑀲𑁆𑀲𑀢𑀺. 𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼𑀁 𑀪𑀺𑀦𑁆𑀦𑀸𑀚𑀻𑀯𑀁 𑀅𑀦𑀸𑀘𑀸𑀭𑀁 𑀧𑀸𑀧𑀫𑀺𑀢𑁆𑀢𑀁 𑀤𑀼𑀲𑁆𑀲𑀻𑀮𑀁 𑀓𑀼𑀲𑀻𑀢𑀁 𑀳𑀻𑀦𑀯𑀻𑀭𑀺𑀬𑀁 𑀓𑀼𑀲𑀮𑀸 𑀩𑁄𑀥𑀺𑀧𑀓𑁆𑀔𑀺𑀬𑀸 𑀥𑀫𑁆𑀫𑀸 𑀆𑀧𑀸𑀢𑀁 𑀦 𑀉𑀧𑁂𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀚𑀸𑀕𑀭𑀦𑁆𑀢𑀲𑁆𑀲 𑀤𑀺𑀩𑁆𑀩𑁄 𑀅𑀢𑁆𑀣𑁄 𑀆𑀧𑀸𑀢𑀁 𑀦 𑀉𑀧𑁂𑀢𑀺, 𑀢𑀲𑁆𑀫𑀸 𑀚𑀸𑀕𑀭𑀦𑁆𑀢𑁄 𑀲𑀼𑀧𑀺𑀦𑀁 𑀦 𑀧𑀲𑁆𑀲𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀫𑀺𑀤𑁆𑀥𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀅𑀢𑁆𑀣𑀺 𑀫𑀺𑀤𑁆𑀥𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. ‘‘𑀓𑀢𑀫𑀁 𑀆𑀤𑀺, 𑀓𑀢𑀫𑀁 𑀫𑀚𑁆𑀛𑀁, 𑀓𑀢𑀫𑀁 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺? ‘‘𑀬𑁄, 𑀫𑀳𑀸𑀭𑀸𑀚, 𑀓𑀸𑀬𑀲𑁆𑀲 𑀑𑀦𑀸𑀳𑁄 𑀧𑀭𑀺𑀬𑁄𑀦𑀸𑀳𑁄 𑀤𑀼𑀩𑁆𑀩𑀮𑁆𑀬𑀁 𑀫𑀦𑁆𑀤𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀓𑀸𑀬𑀲𑁆𑀲, 𑀅𑀬𑀁 𑀫𑀺𑀤𑁆𑀥𑀲𑁆𑀲 𑀆𑀤𑀺; 𑀬𑁄, 𑀫𑀳𑀸𑀭𑀸𑀚, 𑀓𑀧𑀺𑀦𑀺𑀤𑁆𑀤𑀸𑀧𑀭𑁂𑀢𑁄 𑀯𑁄𑀓𑀺𑀡𑁆𑀡𑀓𑀁 𑀚𑀕𑁆𑀕𑀢𑀺 [𑀯𑁄𑀓𑀺𑀡𑁆𑀡𑀢𑀁 𑀕𑀘𑁆𑀙𑀢𑀺 (𑀦𑀺𑀲𑁆𑀬)], 𑀇𑀤𑀁 𑀫𑀺𑀤𑁆𑀥𑀲𑁆𑀲 𑀫𑀚𑁆𑀛𑀁; 𑀪𑀯𑀗𑁆𑀕𑀕𑀢𑀺 𑀧𑀭𑀺𑀬𑁄𑀲𑀦𑀁. 𑀫𑀚𑁆𑀛𑀽𑀧𑀕𑀢𑁄, 𑀫𑀳𑀸𑀭𑀸𑀚, 𑀓𑀧𑀺𑀦𑀺𑀤𑁆𑀤𑀸𑀧𑀭𑁂𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺 𑀬𑀢𑀘𑀸𑀭𑀻 𑀲𑀫𑀸𑀳𑀺𑀢𑀘𑀺𑀢𑁆𑀢𑁄 𑀞𑀺𑀢𑀥𑀫𑁆𑀫𑁄 𑀅𑀘𑀮𑀩𑀼𑀤𑁆𑀥𑀺 𑀧𑀳𑀻𑀦𑀓𑁄𑀢𑀽𑀳𑀮𑀲𑀤𑁆𑀤𑀁 𑀯𑀦𑀫𑀚𑁆𑀛𑁄𑀕𑀸𑀳𑀺𑀢𑁆𑀯𑀸 𑀲𑀼𑀔𑀼𑀫𑀁 𑀅𑀢𑁆𑀣𑀁 𑀘𑀺𑀦𑁆𑀢𑀬𑀢𑀺, 𑀦 𑀘 𑀲𑁄 𑀢𑀢𑁆𑀣 𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀲𑁄 𑀢𑀢𑁆𑀣 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀲𑀼𑀔𑀼𑀫𑀁 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀚𑀸𑀕𑀭𑁄 𑀦 𑀫𑀺𑀤𑁆𑀥𑀲𑀫𑀸𑀧𑀦𑁆𑀦𑁄, 𑀫𑀚𑁆𑀛𑀽𑀧𑀕𑀢𑁄 𑀓𑀧𑀺𑀦𑀺𑀤𑁆𑀤𑀸𑀧𑀭𑁂𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀢𑀽𑀳𑀮𑀲𑀤𑁆𑀤𑁄, 𑀏𑀯𑀁 𑀚𑀸𑀕𑀭𑀁 𑀤𑀝𑁆𑀞𑀩𑁆𑀩𑀁; 𑀬𑀣𑀸 𑀯𑀺𑀯𑀺𑀢𑁆𑀢𑀁 𑀯𑀦𑀁, 𑀏𑀯𑀁 𑀓𑀧𑀺𑀦𑀺𑀤𑁆𑀤𑀸𑀧𑀭𑁂𑀢𑁄 𑀤𑀝𑁆𑀞𑀩𑁆𑀩𑁄; 𑀬𑀣𑀸 𑀲𑁄 𑀓𑁄𑀢𑀽𑀳𑀮𑀲𑀤𑁆𑀤𑀁 𑀑𑀳𑀸𑀬 𑀫𑀺𑀤𑁆𑀥𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀫𑀚𑁆𑀛𑀢𑁆𑀢𑀪𑀽𑀢𑁄 𑀲𑀼𑀔𑀼𑀫𑀁 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀏𑀯𑀁 𑀚𑀸𑀕𑀭𑁄 𑀦 𑀫𑀺𑀤𑁆𑀥𑀲𑀫𑀸𑀧𑀦𑁆𑀦𑁄 𑀓𑀧𑀺𑀦𑀺𑀤𑁆𑀤𑀸𑀧𑀭𑁂𑀢𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀲𑀼𑀧𑀺𑀦𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀅𑀓𑀸𑀮𑀫𑀭𑀡𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁂 𑀢𑁂 𑀲𑀢𑁆𑀢𑀸 𑀫𑀭𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀓𑀸𑀮𑁂 𑀬𑁂𑀯 𑀫𑀭𑀦𑁆𑀢𑀺, 𑀉𑀤𑀸𑀳𑀼 𑀅𑀓𑀸𑀮𑁂𑀧𑀺 𑀫𑀭𑀦𑁆𑀢𑀻’’𑀢𑀺? ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀓𑀸𑀮𑁂𑀧𑀺 𑀫𑀭𑀡𑀁, 𑀅𑀢𑁆𑀣𑀺 𑀅𑀓𑀸𑀮𑁂𑀧𑀺 𑀫𑀭𑀡’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁂 𑀓𑀸𑀮𑁂 𑀫𑀭𑀦𑁆𑀢𑀺, 𑀓𑁂 𑀅𑀓𑀸𑀮𑁂 𑀫𑀭𑀦𑁆𑀢𑀻’’𑀢𑀺? ‘‘𑀤𑀺𑀝𑁆𑀞𑀧𑀼𑀩𑁆𑀩𑀸 𑀧𑀦, 𑀫𑀳𑀸𑀭𑀸𑀚, 𑀢𑀬𑀸 𑀅𑀫𑁆𑀩𑀭𑀼𑀓𑁆𑀔𑀸 𑀯𑀸 𑀚𑀫𑁆𑀩𑀼𑀭𑀼𑀓𑁆𑀔𑀸 𑀯𑀸, 𑀅𑀜𑁆𑀜𑀲𑁆𑀫𑀸 𑀯𑀸 𑀧𑀦 𑀨𑀮𑀭𑀼𑀓𑁆𑀔𑀸 𑀨𑀮𑀸𑀦𑀺 𑀧𑀢𑀦𑁆𑀢𑀸𑀦𑀺 𑀆𑀫𑀸𑀦𑀺 𑀘 𑀧𑀓𑁆𑀓𑀸𑀦𑀺 𑀘𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀬𑀸𑀦𑀺 𑀢𑀸𑀦𑀺, 𑀫𑀳𑀸𑀭𑀸𑀚, 𑀨𑀮𑀸𑀦𑀺 𑀭𑀼𑀓𑁆𑀔𑀢𑁄 𑀧𑀢𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀓𑀸𑀮𑁂 𑀬𑁂𑀯 𑀧𑀢𑀦𑁆𑀢𑀺, 𑀉𑀤𑀸𑀳𑀼 𑀅𑀓𑀸𑀮𑁂𑀧𑀻’’𑀢𑀺? ‘‘𑀬𑀸𑀦𑀺 𑀢𑀸𑀦𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀨𑀮𑀸𑀦𑀺 𑀧𑀭𑀺𑀧𑀓𑁆𑀓𑀸𑀦𑀺 𑀯𑀺𑀮𑀻𑀦𑀸𑀦𑀺 𑀧𑀢𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀓𑀸𑀮𑁂 𑀧𑀢𑀦𑁆𑀢𑀺. 𑀬𑀸𑀦𑀺 𑀧𑀦 𑀢𑀸𑀦𑀺 𑀅𑀯𑀲𑁂𑀲𑀸𑀦𑀺 𑀨𑀮𑀸𑀦𑀺 𑀢𑁂𑀲𑀼 𑀓𑀸𑀦𑀺𑀘𑀺 𑀓𑀺𑀫𑀺𑀯𑀺𑀤𑁆𑀥𑀸𑀦𑀺 𑀧𑀢𑀦𑁆𑀢𑀺, 𑀓𑀸𑀦𑀺𑀘𑀺 𑀮𑀕𑀼𑀴𑀳𑀢𑀸𑀦𑀺 [𑀲𑀓𑀼𑀡𑀧𑀳𑀢𑀸 (𑀲𑁆𑀬𑀸.), 𑀮𑀓𑀼𑀝𑀳𑀢𑀸𑀦𑀺 (𑀲𑀻. 𑀧𑀻. 𑀓.)] 𑀧𑀢𑀦𑁆𑀢𑀺, 𑀓𑀸𑀦𑀺𑀘𑀺 𑀯𑀸𑀢𑀧𑁆𑀧𑀳𑀢𑀸𑀦𑀺 𑀧𑀢𑀦𑁆𑀢𑀺, 𑀓𑀸𑀦𑀺𑀘𑀺 𑀅𑀦𑁆𑀢𑁄𑀧𑀽𑀢𑀺𑀓𑀸𑀦𑀺 𑀳𑀼𑀢𑁆𑀯𑀸 𑀧𑀢𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀅𑀓𑀸𑀮𑁂 𑀧𑀢𑀦𑁆𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀚𑀭𑀸𑀯𑁂𑀕𑀳𑀢𑀸 𑀫𑀭𑀦𑁆𑀢𑀺, 𑀢𑁂 𑀬𑁂𑀯 𑀓𑀸𑀮𑁂 𑀫𑀭𑀦𑁆𑀢𑀺, 𑀅𑀯𑀲𑁂𑀲𑀸 𑀓𑁂𑀘𑀺 𑀓𑀫𑁆𑀫𑀧𑁆𑀧𑀝𑀺𑀩𑀸𑀴𑁆𑀳𑀸 𑀫𑀭𑀦𑁆𑀢𑀺, 𑀓𑁂𑀘𑀺 𑀕𑀢𑀺𑀧𑁆𑀧𑀝𑀺𑀩𑀸𑀴𑁆𑀳𑀸 𑀫𑀭𑀦𑁆𑀢𑀺, 𑀓𑁂𑀘𑀺 𑀓𑀺𑀭𑀺𑀬𑀧𑁆𑀧𑀝𑀺𑀩𑀸𑀴𑁆𑀳𑀸 𑀫𑀭𑀦𑁆𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁂 𑀢𑁂 𑀓𑀫𑁆𑀫𑀧𑁆𑀧𑀝𑀺𑀩𑀸𑀴𑁆𑀳𑀸 𑀫𑀭𑀦𑁆𑀢𑀺, 𑀬𑁂𑀧𑀺 𑀢𑁂 𑀕𑀢𑀺𑀧𑁆𑀧𑀝𑀺𑀩𑀸𑀴𑁆𑀳𑀸 𑀫𑀭𑀦𑁆𑀢𑀺, 𑀬𑁂𑀧𑀺 𑀢𑁂 𑀓𑀺𑀭𑀺𑀬𑀧𑁆𑀧𑀝𑀺𑀩𑀸𑀴𑁆𑀳𑀸 𑀫𑀭𑀦𑁆𑀢𑀺, 𑀬𑁂𑀧𑀺 𑀢𑁂 𑀚𑀭𑀸𑀯𑁂𑀕𑀧𑁆𑀧𑀝𑀺𑀩𑀸𑀴𑁆𑀳𑀸 𑀫𑀭𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀓𑀸𑀮𑁂 𑀬𑁂𑀯 𑀫𑀭𑀦𑁆𑀢𑀺, 𑀬𑁄𑀧𑀺 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄 𑀫𑀭𑀢𑀺, 𑀲𑁄 𑀢𑀲𑁆𑀲 𑀓𑀸𑀮𑁄, 𑀓𑀸𑀮𑁂 𑀬𑁂𑀯 𑀲𑁄 𑀫𑀭𑀢𑀺. 𑀬𑁄𑀧𑀺 𑀯𑀺𑀚𑀸𑀢𑀖𑀭𑁂 𑀫𑀭𑀢𑀺, 𑀲𑁄 𑀢𑀲𑁆𑀲 𑀓𑀸𑀮𑁄, 𑀲𑁄𑀧𑀺 𑀓𑀸𑀮𑁂 𑀬𑁂𑀯 𑀫𑀭𑀢𑀺. 𑀬𑁄𑀧𑀺 𑀫𑀸𑀲𑀺𑀓𑁄 𑀫𑀭𑀢𑀺…𑀧𑁂… 𑀬𑁄𑀧𑀺 𑀯𑀲𑁆𑀲𑀲𑀢𑀺𑀓𑁄 𑀫𑀭𑀢𑀺, 𑀲𑁄 𑀢𑀲𑁆𑀲 𑀓𑀸𑀮𑁄, 𑀓𑀸𑀮𑁂 𑀬𑁂𑀯 𑀲𑁄 𑀫𑀭𑀢𑀺, 𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀓𑀸𑀮𑁂 𑀫𑀭𑀡𑀁 𑀦𑀸𑀫 𑀦 𑀳𑁄𑀢𑀺, 𑀬𑁂 𑀓𑁂𑀘𑀺 𑀫𑀭𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀓𑀸𑀮𑁂 𑀬𑁂𑀯 𑀫𑀭𑀦𑁆𑀢𑀻’’𑀢𑀺.

‘‘𑀲𑀢𑁆𑀢𑀺𑀫𑁂, 𑀫𑀳𑀸𑀭𑀸𑀚, 𑀯𑀺𑀚𑁆𑀚𑀫𑀸𑀦𑁂𑀧𑀺 𑀉𑀢𑁆𑀢𑀭𑀺𑀁 𑀆𑀬𑀼𑀲𑁆𑀫𑀺𑀁 𑀅𑀓𑀸𑀮𑁂 𑀫𑀭𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀚𑀺𑀖𑀘𑁆𑀙𑀺𑀢𑁄, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀅𑀮𑀪𑀫𑀸𑀦𑁄 𑀉𑀧𑀳𑀢𑀩𑁆𑀪𑀦𑁆𑀢𑀭𑁄 𑀯𑀺𑀚𑁆𑀚𑀫𑀸𑀦𑁂𑀧𑀺 𑀉𑀢𑁆𑀢𑀭𑀺𑀁 𑀆𑀬𑀼𑀲𑁆𑀫𑀺𑀁 𑀅𑀓𑀸𑀮𑁂 𑀫𑀭𑀢𑀺, 𑀧𑀺𑀧𑀸𑀲𑀺𑀢𑁄, 𑀫𑀳𑀸𑀭𑀸𑀚, 𑀧𑀸𑀦𑀻𑀬𑀁 𑀅𑀮𑀪𑀫𑀸𑀦𑁄 𑀧𑀭𑀺𑀲𑀼𑀓𑁆𑀔𑀳𑀤𑀬𑁄 𑀯𑀺𑀚𑁆𑀚𑀫𑀸𑀦𑁂𑀧𑀺 𑀉𑀢𑁆𑀢𑀭𑀺𑀁 𑀆𑀬𑀼𑀲𑁆𑀫𑀺𑀁 𑀅𑀓𑀸𑀮𑁂 𑀫𑀭𑀢𑀺, 𑀅𑀳𑀺𑀦𑀸 𑀤𑀝𑁆𑀞𑁄, 𑀫𑀳𑀸𑀭𑀸𑀚, 𑀯𑀺𑀲𑀯𑁂𑀕𑀸𑀪𑀺𑀳𑀢𑁄 𑀢𑀺𑀓𑀺𑀘𑁆𑀙𑀓𑀁 𑀅𑀮𑀪𑀫𑀸𑀦𑁄 𑀯𑀺𑀚𑁆𑀚𑀫𑀸𑀦𑁂𑀧𑀺 𑀉𑀢𑁆𑀢𑀭𑀺𑀁 𑀆𑀬𑀼𑀲𑁆𑀫𑀺𑀁 𑀅𑀓𑀸𑀮𑁂 𑀫𑀭𑀢𑀺, 𑀯𑀺𑀲𑀫𑀸𑀲𑀺𑀢𑁄, 𑀫𑀳𑀸𑀭𑀸𑀚, 𑀟𑀬𑁆𑀳𑀦𑁆𑀢𑁂𑀲𑀼 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀲𑀼 𑀅𑀕𑀤𑀁 𑀅𑀮𑀪𑀫𑀸𑀦𑁄 𑀯𑀺𑀚𑁆𑀚𑀫𑀸𑀦𑁂𑀧𑀺 𑀉𑀢𑁆𑀢𑀭𑀺𑀁 𑀆𑀬𑀼𑀲𑁆𑀫𑀺𑀁 𑀅𑀓𑀸𑀮𑁂 𑀫𑀭𑀢𑀺, 𑀅𑀕𑁆𑀕𑀺𑀕𑀢𑁄, 𑀫𑀳𑀸𑀭𑀸𑀚, 𑀛𑀸𑀬𑀫𑀸𑀦𑁄 𑀦𑀺𑀩𑁆𑀩𑀸𑀧𑀦𑀁 𑀅𑀮𑀪𑀫𑀸𑀦𑁄 𑀯𑀺𑀚𑁆𑀚𑀫𑀸𑀦𑁂𑀧𑀺 𑀉𑀢𑁆𑀢𑀭𑀺𑀁 𑀆𑀬𑀼𑀲𑁆𑀫𑀺𑀁 𑀅𑀓𑀸𑀮𑁂 𑀫𑀭𑀢𑀺, 𑀉𑀤𑀓𑀕𑀢𑁄, 𑀫𑀳𑀸𑀭𑀸𑀚, 𑀧𑀢𑀺𑀝𑁆𑀞𑀁 𑀅𑀮𑀪𑀫𑀸𑀦𑁄 𑀯𑀺𑀚𑁆𑀚𑀫𑀸𑀦𑁂𑀧𑀺 𑀉𑀢𑁆𑀢𑀭𑀺𑀁 𑀆𑀬𑀼𑀲𑁆𑀫𑀺𑀁 𑀅𑀓𑀸𑀮𑁂 𑀫𑀭𑀢𑀺, 𑀲𑀢𑁆𑀢𑀺𑀳𑀢𑁄, 𑀫𑀳𑀸𑀭𑀸𑀚, 𑀆𑀩𑀸𑀥𑀺𑀓𑁄 𑀪𑀺𑀲𑀓𑁆𑀓𑀁 𑀅𑀮𑀪𑀫𑀸𑀦𑁄 𑀯𑀺𑀚𑁆𑀚𑀫𑀸𑀦𑁂𑀧𑀺 𑀉𑀢𑁆𑀢𑀭𑀺𑀁 𑀆𑀬𑀼𑀲𑁆𑀫𑀺𑀁 𑀅𑀓𑀸𑀮𑁂 𑀫𑀭𑀢𑀺, 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀲𑀢𑁆𑀢 𑀯𑀺𑀚𑁆𑀚𑀫𑀸𑀦𑁂𑀧𑀺 𑀉𑀢𑁆𑀢𑀭𑀺𑀁 𑀆𑀬𑀼𑀲𑁆𑀫𑀺𑀁 𑀅𑀓𑀸𑀮𑁂 𑀫𑀭𑀦𑁆𑀢𑀺. 𑀢𑀢𑁆𑀭𑀸𑀧𑀸𑀳𑀁, 𑀫𑀳𑀸𑀭𑀸𑀚, 𑀏𑀓𑀁𑀲𑁂𑀦 𑀯𑀤𑀸𑀫𑀺.

‘‘𑀅𑀝𑁆𑀞𑀯𑀺𑀥𑁂𑀦, 𑀫𑀳𑀸𑀭𑀸𑀚, 𑀲𑀢𑁆𑀢𑀸𑀦𑀁 𑀓𑀸𑀮𑀗𑁆𑀓𑀺𑀭𑀺𑀬𑀸 𑀳𑁄𑀢𑀺, 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑁂𑀦 𑀲𑀦𑁆𑀦𑀺𑀧𑀸𑀢𑀺𑀓𑁂𑀦 𑀉𑀢𑀼𑀯𑀺𑀧𑀭𑀺𑀡𑀸𑀫𑁂𑀦 𑀯𑀺𑀲𑀫𑀧𑀭𑀺𑀳𑀸𑀭𑁂𑀦 𑀑𑀧𑀓𑁆𑀓𑀫𑀺𑀓𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀫𑀳𑀸𑀭𑀸𑀚, 𑀲𑀢𑁆𑀢𑀸𑀦𑀁 𑀓𑀸𑀮𑀗𑁆𑀓𑀺𑀭𑀺𑀬𑀸 𑀳𑁄𑀢𑀺. 𑀢𑀢𑁆𑀭, 𑀫𑀳𑀸𑀭𑀸𑀚, 𑀬𑀤𑀺𑀤𑀁 𑀓𑀫𑁆𑀫𑀯𑀺𑀧𑀸𑀓𑁂𑀦 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀲𑀸 𑀬𑁂𑀯 𑀢𑀢𑁆𑀣 𑀲𑀸𑀫𑀬𑀺𑀓𑀸 [𑀲𑀸𑀫𑀸𑀬𑀺𑀓𑀸 (𑀓.)] 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀅𑀯𑀲𑁂𑀲𑀸 𑀅𑀲𑀸𑀫𑀬𑀺𑀓𑀸 𑀓𑀸𑀮𑀗𑁆𑀓𑀺𑀭𑀺𑀬𑀸𑀢𑀺. 𑀪𑀯𑀢𑀺 𑀘 𑁋

‘‘‘𑀚𑀺𑀖𑀘𑁆𑀙𑀸𑀬 𑀧𑀺𑀧𑀸𑀲𑀸𑀬, 𑀅𑀳𑀺𑀤𑀝𑁆𑀞𑀸 [𑀅𑀳𑀺𑀤𑀝𑁆𑀞𑁄 (𑀲𑀻.), 𑀅𑀳𑀺𑀦𑀸 𑀤𑀝𑁆𑀞𑁄 (𑀧𑀻.)] 𑀯𑀺𑀲𑁂𑀦 𑀘;

𑀅𑀕𑁆𑀕𑀺𑀉𑀤𑀓𑀲𑀢𑁆𑀢𑀻𑀳𑀺, 𑀅𑀓𑀸𑀮𑁂 𑀢𑀢𑁆𑀣 𑀫𑀻𑀬𑀢𑀺;

𑀯𑀸𑀢𑀧𑀺𑀢𑁆𑀢𑁂𑀦 𑀲𑁂𑀫𑁆𑀳𑁂𑀦, 𑀲𑀦𑁆𑀦𑀺𑀧𑀸𑀢𑁂𑀦𑀼𑀢𑀽𑀳𑀺 𑀘;

𑀯𑀺𑀲𑀫𑁄𑀧𑀓𑁆𑀓𑀫𑀓𑀫𑁆𑀫𑁂𑀳𑀺, 𑀅𑀓𑀸𑀮𑁂 𑀢𑀢𑁆𑀣 𑀫𑀻𑀬𑀢𑀻’𑀢𑀺.

‘‘𑀓𑁂𑀘𑀺, 𑀫𑀳𑀸𑀭𑀸𑀚, 𑀲𑀢𑁆𑀢𑀸 𑀧𑀼𑀩𑁆𑀩𑁂 𑀓𑀢𑁂𑀦 𑀢𑁂𑀦 𑀢𑁂𑀦 𑀅𑀓𑀼𑀲𑀮𑀓𑀫𑁆𑀫𑀯𑀺𑀧𑀸𑀓𑁂𑀦 𑀫𑀭𑀦𑁆𑀢𑀺. 𑀇𑀥, 𑀫𑀳𑀸𑀭𑀸𑀚, 𑀬𑁄 𑀧𑀼𑀩𑁆𑀩𑁂 𑀧𑀭𑁂 𑀚𑀺𑀖𑀘𑁆𑀙𑀸𑀬 𑀫𑀸𑀭𑁂𑀢𑀺, 𑀲𑁄 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀚𑀺𑀖𑀘𑁆𑀙𑀸𑀬 𑀧𑀭𑀺𑀧𑀻𑀴𑀺𑀢𑁄 𑀙𑀸𑀢𑁄 𑀧𑀭𑀺𑀓𑀺𑀮𑀦𑁆𑀢𑁄 𑀲𑀼𑀓𑁆𑀔𑀫𑀺𑀮𑀸𑀢𑀳𑀤𑀬𑁄 𑀩𑀼𑀪𑀼𑀓𑁆𑀔𑀺𑀢𑁄 [𑀲𑀼𑀓𑁆𑀔𑀺𑀢𑁄 (𑀲𑀻. 𑀧𑀻. 𑀓.)] 𑀯𑀺𑀲𑀼𑀓𑁆𑀔𑀺𑀢𑁄 𑀛𑀸𑀬𑀦𑁆𑀢𑁄 𑀅𑀩𑁆𑀪𑀦𑁆𑀢𑀭𑀁 𑀧𑀭𑀺𑀟𑀬𑁆𑀳𑀦𑁆𑀢𑁄 𑀚𑀺𑀖𑀘𑁆𑀙𑀸𑀬 𑀬𑁂𑀯 𑀫𑀭𑀢𑀺 𑀤𑀳𑀭𑁄𑀧𑀺 𑀫𑀚𑁆𑀛𑀺𑀫𑁄𑀧𑀺 𑀫𑀳𑀮𑁆𑀮𑀓𑁄𑀧𑀺, 𑀇𑀤𑀫𑁆𑀧𑀺 𑀢𑀲𑁆𑀲 𑀲𑀸𑀫𑀬𑀺𑀓𑀫𑀭𑀡𑀁.

‘‘𑀬𑁄 𑀧𑀼𑀩𑁆𑀩𑁂 𑀧𑀭𑁂 𑀧𑀺𑀧𑀸𑀲𑀸𑀬 𑀫𑀸𑀭𑁂𑀢𑀺, 𑀲𑁄 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀧𑁂𑀢𑁄 𑀳𑀼𑀢𑁆𑀯𑀸 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑁄 𑀲𑀫𑀸𑀦𑁄 𑀮𑀽𑀔𑁄 𑀓𑀺𑀲𑁄 𑀧𑀭𑀺𑀲𑀼𑀓𑁆𑀔𑀺𑀢𑀳𑀤𑀬𑁄 𑀧𑀺𑀧𑀸𑀲𑀸𑀬 𑀬𑁂𑀯 𑀫𑀭𑀢𑀺 𑀤𑀳𑀭𑁄𑀧𑀺 𑀫𑀚𑁆𑀛𑀺𑀫𑁄𑀧𑀺 𑀫𑀳𑀮𑁆𑀮𑀓𑁄𑀧𑀺, 𑀇𑀤𑀫𑁆𑀧𑀺 𑀢𑀲𑁆𑀲 𑀲𑀸𑀫𑀬𑀺𑀓𑀫𑀭𑀡𑀁.

‘‘𑀬𑁄 𑀧𑀼𑀩𑁆𑀩𑁂 𑀧𑀭𑁂 𑀅𑀳𑀺𑀦𑀸 𑀟𑀁𑀲𑀸𑀧𑁂𑀢𑁆𑀯𑀸 𑀫𑀸𑀭𑁂𑀢𑀺, 𑀲𑁄 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀅𑀚𑀕𑀭𑀫𑀼𑀔𑁂𑀦𑁂𑀯 𑀅𑀚𑀕𑀭𑀫𑀼𑀔𑀁 𑀓𑀡𑁆𑀳𑀲𑀧𑁆𑀧𑀫𑀼𑀔𑁂𑀦𑁂𑀯 𑀓𑀡𑁆𑀳𑀲𑀧𑁆𑀧𑀫𑀼𑀔𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀢𑁂𑀳𑀺 𑀔𑀸𑀬𑀺𑀢𑀔𑀸𑀬𑀺𑀢𑁄 𑀅𑀳𑀻𑀳𑀺 𑀤𑀝𑁆𑀞𑁄 𑀬𑁂𑀯 𑀫𑀭𑀢𑀺 𑀤𑀳𑀭𑁄𑀧𑀺 𑀫𑀚𑁆𑀛𑀺𑀫𑁄𑀧𑀺 𑀫𑀳𑀮𑁆𑀮𑀓𑁄𑀧𑀺, 𑀇𑀤𑀫𑁆𑀧𑀺 𑀢𑀲𑁆𑀲 𑀲𑀸𑀫𑀬𑀺𑀓𑀫𑀭𑀡𑀁.

‘‘𑀬𑁄 𑀧𑀼𑀩𑁆𑀩𑁂 𑀧𑀭𑁂 𑀯𑀺𑀲𑀁 𑀤𑀢𑁆𑀯𑀸 𑀫𑀸𑀭𑁂𑀢𑀺, 𑀲𑁄 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀟𑀬𑁆𑀳𑀦𑁆𑀢𑁂𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺 𑀪𑀺𑀚𑁆𑀚𑀫𑀸𑀦𑁂𑀦 𑀲𑀭𑀻𑀭𑁂𑀦 𑀓𑀼𑀡𑀧𑀕𑀦𑁆𑀥𑀁 𑀯𑀸𑀬𑀦𑁆𑀢𑁄 𑀯𑀺𑀲𑁂𑀦𑁂𑀯 𑀫𑀭𑀢𑀺 𑀤𑀳𑀭𑁄𑀧𑀺 𑀫𑀚𑁆𑀛𑀺𑀫𑁄𑀧𑀺 𑀫𑀳𑀮𑁆𑀮𑀓𑁄𑀧𑀺, 𑀇𑀤𑀫𑁆𑀧𑀺 𑀢𑀲𑁆𑀲 𑀲𑀸𑀫𑀬𑀺𑀓𑀫𑀭𑀡𑀁.

‘‘𑀬𑁄 𑀧𑀼𑀩𑁆𑀩𑁂 𑀧𑀭𑁂 𑀅𑀕𑁆𑀕𑀺𑀦𑀸 𑀫𑀸𑀭𑁂𑀢𑀺, 𑀲𑁄 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀅𑀗𑁆𑀕𑀸𑀭𑀧𑀩𑁆𑀩𑀢𑁂𑀦𑁂𑀯 𑀅𑀗𑁆𑀕𑀸𑀭𑀧𑀩𑁆𑀩𑀢𑀁 𑀬𑀫𑀯𑀺𑀲𑀬𑁂𑀦𑁂𑀯 𑀬𑀫𑀯𑀺𑀲𑀬𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀤𑀟𑁆𑀠𑀯𑀺𑀤𑀟𑁆𑀠𑀕𑀢𑁆𑀢𑁄 𑀅𑀕𑁆𑀕𑀺𑀦𑀸 𑀬𑁂𑀯 𑀫𑀭𑀢𑀺 𑀤𑀳𑀭𑁄𑀧𑀺 𑀫𑀚𑁆𑀛𑀺𑀫𑁄𑀧𑀺 𑀫𑀮𑀮𑁆𑀮𑀓𑁄𑀧𑀺, 𑀇𑀤𑀫𑁆𑀧𑀺 𑀢𑀲𑁆𑀲 𑀲𑀸𑀫𑀬𑀺𑀓𑀫𑀭𑀡𑀁.

‘‘𑀬𑁄 𑀧𑀼𑀩𑁆𑀩𑁂 𑀧𑀭𑁂 𑀉𑀤𑀓𑁂𑀦 𑀫𑀸𑀭𑁂𑀢𑀺, 𑀲𑁄 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀳𑀢𑀯𑀺𑀮𑀼𑀢𑁆𑀢𑀪𑀕𑁆𑀕𑀤𑀼𑀩𑁆𑀩𑀮𑀕𑀢𑁆𑀢𑁄 𑀔𑀼𑀩𑁆𑀪𑀺𑀢𑀘𑀺𑀢𑁆𑀢𑁄 [𑀔𑀼𑀪𑀺𑀢𑀘𑀺𑀢𑁆𑀢𑁄 (𑀲𑀻. 𑀧𑀻.)] 𑀉𑀤𑀓𑁂𑀦𑁂𑀯 [𑀉𑀤𑀓𑁂 𑀬𑁂𑀯 (𑀩𑀳𑀽𑀲𑀼)] 𑀫𑀭𑀢𑀺 𑀤𑀳𑀭𑁄𑀧𑀺 𑀫𑀚𑁆𑀛𑀺𑀫𑁄𑀧𑀺 𑀫𑀳𑀮𑁆𑀮𑀓𑁄𑀧𑀺, 𑀇𑀤𑀫𑁆𑀧𑀺 𑀢𑀲𑁆𑀲 𑀲𑀸𑀫𑀬𑀺𑀓𑀫𑀭𑀡𑀁.

‘‘𑀬𑁄 𑀧𑀼𑀩𑁆𑀩𑁂 𑀧𑀭𑁂 𑀲𑀢𑁆𑀢𑀺𑀬𑀸 𑀫𑀸𑀭𑁂𑀢𑀺, 𑀲𑁄 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀙𑀺𑀦𑁆𑀦𑀪𑀺𑀦𑁆𑀦𑀓𑁄𑀝𑁆𑀝𑀺𑀢𑀯𑀺𑀓𑁄𑀝𑁆𑀝𑀺𑀢𑁄 𑀲𑀢𑁆𑀢𑀺𑀫𑀼𑀔𑀲𑀫𑀸𑀳𑀢𑁄 𑀲𑀢𑁆𑀢𑀺𑀬𑀸 𑀬𑁂𑀯 𑀫𑀭𑀢𑀺 𑀤𑀳𑀭𑁄𑀧𑀺 𑀫𑀚𑁆𑀛𑀺𑀫𑁄𑀧𑀺 𑀫𑀳𑀮𑁆𑀮𑀓𑁄𑀧𑀺, 𑀇𑀤𑀫𑁆𑀧𑀺 𑀢𑀲𑁆𑀲 𑀲𑀸𑀫𑀬𑀺𑀓𑀫𑀭𑀡𑀁’’.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀓𑀸𑀮𑁂 𑀫𑀭𑀡𑀁 𑀅𑀢𑁆𑀣𑀻𑀢𑀺 𑀬𑀁 𑀯𑀤𑁂𑀢𑀺, 𑀇𑀗𑁆𑀖 𑀫𑁂 𑀢𑁆𑀯𑀁 𑀢𑀢𑁆𑀣 𑀓𑀸𑀭𑀡𑀁 𑀅𑀢𑀺𑀤𑀺𑀲𑀸𑀢𑀺’’. ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀆𑀤𑀺𑀦𑁆𑀦𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑁄 𑀧𑀭𑀺𑀬𑀸𑀤𑀺𑀦𑁆𑀦𑀪𑀓𑁆𑀔𑁄 𑀉𑀧𑀸𑀤𑀸𑀦𑀲𑀗𑁆𑀔𑀬𑀸 𑀦𑀺𑀩𑁆𑀩𑀸𑀬𑀢𑀺, 𑀲𑁄 𑀅𑀕𑁆𑀕𑀺 𑀯𑀼𑀘𑁆𑀘𑀢𑀺 ‘𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀲𑀫𑀬𑁂 𑀦𑀺𑀩𑁆𑀩𑀼𑀢𑁄 𑀦𑀸𑀫𑀸’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀩𑀳𑀽𑀦𑀺 𑀤𑀺𑀯𑀲𑀲𑀳𑀲𑁆𑀲𑀸𑀦𑀺 𑀚𑀻𑀯𑀺𑀢𑁆𑀯𑀸 𑀚𑀭𑀸𑀚𑀺𑀡𑁆𑀡𑁄 𑀆𑀬𑀼𑀓𑁆𑀔𑀬𑀸 𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀫𑀭𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘𑀲𑀫𑀬𑁂 𑀫𑀭𑀡𑀫𑀼𑀧𑀕𑀢𑁄’𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀫𑀳𑀢𑀺𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀆𑀤𑀺𑀦𑁆𑀦𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑁄 𑀅𑀲𑁆𑀲, 𑀢𑀁 𑀅𑀧𑀭𑀺𑀬𑀸𑀤𑀺𑀦𑁆𑀦𑁂 𑀬𑁂𑀯 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑁂 𑀫𑀳𑀢𑀺𑀫𑀳𑀸𑀫𑁂𑀖𑁄 𑀅𑀪𑀺𑀧𑁆𑀧𑀯𑀲𑁆𑀲𑀺𑀢𑁆𑀯𑀸 𑀦𑀺𑀩𑁆𑀩𑀸𑀧𑁂𑀬𑁆𑀬, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀫𑀬𑁂 𑀦𑀺𑀩𑁆𑀩𑀼𑀢𑁄 𑀦𑀸𑀫 𑀳𑁄𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀲𑁄, 𑀫𑀳𑀸𑀭𑀸𑀚, 𑀧𑀘𑁆𑀙𑀺𑀫𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀼𑀭𑀺𑀫𑀓𑁂𑀦 𑀅𑀕𑁆𑀕𑀺𑀓𑁆𑀔𑀦𑁆𑀥𑁂𑀦 𑀲𑀫𑀲𑀫𑀕𑀢𑀺𑀓𑁄 𑀦𑀸𑀳𑁄𑀲𑀻’’𑀢𑀺? ‘‘𑀆𑀕𑀦𑁆𑀢𑀼𑀓𑁂𑀦, 𑀪𑀦𑁆𑀢𑁂, 𑀫𑁂𑀖𑁂𑀦 𑀧𑀝𑀺𑀧𑀻𑀴𑀺𑀢𑁄 𑀲𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀅𑀲𑀫𑀬𑁂 𑀦𑀺𑀩𑁆𑀩𑀼𑀢𑁄’’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀅𑀓𑀸𑀮𑁂 𑀫𑀭𑀢𑀺, 𑀲𑁄 𑀆𑀕𑀦𑁆𑀢𑀼𑀓𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀯𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀯𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑁂𑀦 𑀯𑀸 𑀲𑀦𑁆𑀦𑀺𑀧𑀸𑀢𑀺𑀓𑁂𑀦 𑀯𑀸 𑀉𑀢𑀼𑀧𑀭𑀺𑀡𑀸𑀫𑀚𑁂𑀦 𑀯𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑁂𑀦 𑀯𑀸 𑀑𑀧𑀓𑁆𑀓𑀫𑀺𑀓𑁂𑀦 𑀯𑀸 𑀚𑀺𑀖𑀘𑁆𑀙𑀸𑀬 𑀯𑀸 𑀧𑀺𑀧𑀸𑀲𑀸𑀬 𑀯𑀸 𑀲𑀧𑁆𑀧𑀤𑀝𑁆𑀞𑁂𑀦 𑀯𑀸 𑀯𑀺𑀲𑀫𑀸𑀲𑀺𑀢𑁂𑀦 𑀯𑀸 𑀅𑀕𑁆𑀕𑀺𑀦𑀸 𑀯𑀸 𑀉𑀤𑀓𑁂𑀦 𑀯𑀸 𑀲𑀢𑁆𑀢𑀺𑀯𑁂𑀕𑀧𑁆𑀧𑀝𑀺𑀧𑀻𑀴𑀺𑀢𑁄 𑀯𑀸 𑀅𑀓𑀸𑀮𑁂 𑀫𑀭𑀢𑀺. 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀓𑀸𑀮𑁂 𑀫𑀭𑀡𑀁 𑀅𑀢𑁆𑀣𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀕𑀕𑀦𑁂 𑀫𑀳𑀢𑀺𑀫𑀳𑀸𑀯𑀮𑀸𑀳𑀓𑁄 𑀉𑀝𑁆𑀞𑀳𑀺𑀢𑁆𑀯𑀸 𑀦𑀺𑀦𑁆𑀦𑀜𑁆𑀘 𑀣𑀮𑀜𑁆𑀘 𑀧𑀭𑀺𑀧𑀽𑀭𑀬𑀦𑁆𑀢𑁄 𑀅𑀪𑀺𑀯𑀲𑁆𑀲𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘𑀫𑁂𑀖𑁄 𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀯𑀲𑁆𑀲𑀢𑀻’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀘𑀺𑀭𑀁 𑀚𑀻𑀯𑀺𑀢𑁆𑀯𑀸 𑀚𑀭𑀸𑀚𑀺𑀡𑁆𑀡𑁄 𑀆𑀬𑀼𑀓𑁆𑀔𑀬𑀸 𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀫𑀭𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘𑀲𑀫𑀬𑁂 𑀫𑀭𑀡𑀫𑀼𑀧𑀕𑀢𑁄’𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀕𑀕𑀦𑁂 𑀫𑀳𑀢𑀺𑀫𑀳𑀸𑀯𑀮𑀸𑀳𑀓𑁄 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑁆𑀢𑀭𑀸𑀬𑁂𑀯 𑀫𑀳𑀢𑀸 𑀯𑀸𑀢𑁂𑀦 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀫𑀳𑀸𑀯𑀮𑀸𑀳𑀓𑁄 𑀲𑀫𑀬𑁂 𑀯𑀺𑀕𑀢𑁄 𑀦𑀸𑀫 𑀳𑁄𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀲𑁄, 𑀫𑀳𑀸𑀭𑀸𑀚, 𑀧𑀘𑁆𑀙𑀺𑀫𑁄 𑀯𑀮𑀸𑀳𑀓𑁄 𑀧𑀼𑀭𑀺𑀫𑁂𑀦 𑀯𑀮𑀸𑀳𑀓𑁂𑀦 𑀲𑀫𑀲𑀫𑀕𑀢𑀺𑀓𑁄 𑀦𑀸𑀳𑁄𑀲𑀻’’𑀢𑀺? ‘‘𑀆𑀕𑀦𑁆𑀢𑀼𑀓𑁂𑀦, 𑀪𑀦𑁆𑀢𑁂, 𑀯𑀸𑀢𑁂𑀦 𑀧𑀝𑀺𑀧𑀻𑀴𑀺𑀢𑁄 𑀲𑁄 𑀯𑀮𑀸𑀳𑀓𑁄 𑀅𑀲𑀫𑀬𑀧𑁆𑀧𑀢𑁆𑀢𑁄 𑀬𑁂𑀯 𑀯𑀺𑀕𑀢𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀅𑀓𑀸𑀮𑁂 𑀫𑀭𑀢𑀺, 𑀲𑁄 𑀆𑀕𑀦𑁆𑀢𑀼𑀓𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀯𑀸…𑀧𑁂… 𑀲𑀢𑁆𑀢𑀺𑀯𑁂𑀕𑀧𑁆𑀧𑀝𑀺𑀧𑀻𑀴𑀺𑀢𑁄 𑀯𑀸 𑀅𑀓𑀸𑀮𑁂 𑀫𑀭𑀢𑀺. 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀓𑀸𑀮𑁂 𑀫𑀭𑀡𑀁 𑀅𑀢𑁆𑀣𑀻𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀩𑀮𑀯𑀸 𑀆𑀲𑀻𑀯𑀺𑀲𑁄 𑀓𑀼𑀧𑀺𑀢𑁄 𑀓𑀺𑀜𑁆𑀘𑀺𑀤𑁂𑀯 𑀧𑀼𑀭𑀺𑀲𑀁 𑀟𑀁𑀲𑁂𑀬𑁆𑀬, 𑀢𑀲𑁆𑀲 𑀢𑀁 𑀯𑀺𑀲𑀁 𑀅𑀦𑀻𑀢𑀺𑀓𑀁 𑀅𑀦𑀼𑀧𑀤𑁆𑀤𑀯𑀁 𑀫𑀭𑀡𑀁 𑀧𑀸𑀧𑁂𑀬𑁆𑀬, 𑀢𑀁 𑀯𑀺𑀲𑀁 𑀯𑀼𑀘𑁆𑀘𑀢𑀺 ‘𑀅𑀦𑀻𑀢𑀺𑀓𑀫𑀦𑀼𑀧𑀤𑁆𑀤𑀯𑀁 𑀓𑁄𑀝𑀺𑀕𑀢’𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀘𑀺𑀭𑀁 𑀚𑀻𑀯𑀺𑀢𑁆𑀯𑀸 𑀚𑀭𑀸𑀚𑀺𑀡𑁆𑀡𑁄 𑀆𑀬𑀼𑀓𑁆𑀔𑀬𑀸 𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀫𑀭𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀚𑀻𑀯𑀺𑀢𑀓𑁄𑀝𑀺𑀕𑀢𑁄 𑀲𑀸𑀫𑀬𑀺𑀓𑀁 𑀫𑀭𑀡𑀫𑀼𑀧𑀕𑀢𑁄’𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀩𑀮𑀯𑀢𑀸 𑀆𑀲𑀻𑀯𑀺𑀲𑁂𑀦 𑀤𑀝𑁆𑀞𑀲𑁆𑀲 𑀅𑀦𑁆𑀢𑀭𑀸𑀬𑁂𑀯 𑀆𑀳𑀺𑀢𑀼𑀡𑁆𑀟𑀺𑀓𑁄 𑀅𑀕𑀤𑀁 𑀤𑀢𑁆𑀯𑀸 𑀅𑀯𑀺𑀲𑀁 𑀓𑀭𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀯𑀺𑀲𑀁 𑀲𑀫𑀬𑁂 𑀯𑀺𑀕𑀢𑀁 𑀦𑀸𑀫 𑀳𑁄𑀢𑀻’’𑀢𑀺? ‘‘𑀦 𑀳𑀺 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑀁, 𑀫𑀳𑀸𑀭𑀸𑀚, 𑀧𑀘𑁆𑀙𑀺𑀫𑀁 𑀯𑀺𑀲𑀁 𑀧𑀼𑀭𑀺𑀫𑀓𑁂𑀦 𑀯𑀺𑀲𑁂𑀦 𑀲𑀫𑀲𑀫𑀕𑀢𑀺𑀓𑀁 𑀦𑀸𑀳𑁄𑀲𑀻’’𑀢𑀺? ‘‘𑀆𑀕𑀦𑁆𑀢𑀼𑀓𑁂𑀦, 𑀪𑀦𑁆𑀢𑁂, 𑀅𑀕𑀤𑁂𑀦 𑀧𑀝𑀺𑀧𑀻𑀴𑀺𑀢𑀁 𑀯𑀺𑀲𑀁 𑀅𑀓𑁄𑀝𑀺𑀕𑀢𑀁 𑀬𑁂𑀯 𑀯𑀺𑀕𑀢’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀅𑀓𑀸𑀮𑁂 𑀫𑀭𑀢𑀺, 𑀲𑁄 𑀆𑀕𑀦𑁆𑀢𑀼𑀓𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀯𑀸…𑀧𑁂… 𑀲𑀢𑁆𑀢𑀺𑀯𑁂𑀕𑀧𑁆𑀧𑀝𑀺𑀧𑀻𑀴𑀺𑀢𑁄 𑀯𑀸 𑀅𑀓𑀸𑀮𑁂 𑀫𑀭𑀢𑀺. 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀓𑀸𑀮𑁂 𑀫𑀭𑀡𑀁 𑀅𑀢𑁆𑀣𑀻𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀲𑁄 𑀲𑀭𑀁 𑀧𑀸𑀢𑁂𑀬𑁆𑀬, 𑀲𑀘𑁂 𑀲𑁄 𑀲𑀭𑁄 𑀬𑀣𑀸𑀕𑀢𑀺𑀕𑀫𑀦𑀧𑀣𑀫𑀢𑁆𑀣𑀓𑀁 𑀕𑀘𑁆𑀙𑀢𑀺, 𑀲𑁄 𑀲𑀭𑁄 𑀯𑀼𑀘𑁆𑀘𑀢𑀺 ‘𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀬𑀣𑀸𑀕𑀢𑀺𑀕𑀫𑀦𑀧𑀣𑀫𑀢𑁆𑀣𑀓𑀁 𑀕𑀢𑁄 𑀦𑀸𑀫𑀸’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀘𑀺𑀭𑀁 𑀚𑀻𑀯𑀺𑀢𑁆𑀯𑀸 𑀚𑀭𑀸𑀚𑀺𑀡𑁆𑀡𑁄 𑀆𑀬𑀼𑀓𑁆𑀔𑀬𑀸 𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀫𑀭𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀲𑀫𑀬𑁂 𑀫𑀭𑀡𑀫𑀼𑀧𑀕𑀢𑁄’𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀲𑁄 𑀲𑀭𑀁 𑀧𑀸𑀢𑁂𑀬𑁆𑀬, 𑀢𑀲𑁆𑀲 𑀢𑀁 𑀲𑀭𑀁 𑀢𑀲𑁆𑀫𑀺𑀁 𑀬𑁂𑀯 𑀔𑀡𑁂 𑀓𑁄𑀘𑀺 𑀕𑀡𑁆𑀳𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀲𑀭𑁄 𑀬𑀣𑀸𑀕𑀢𑀺𑀕𑀫𑀦𑀧𑀣𑀫𑀢𑁆𑀣𑀓𑀁 𑀕𑀢𑁄 𑀦𑀸𑀫 𑀳𑁄𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀲𑁄, 𑀫𑀳𑀸𑀭𑀸𑀚, 𑀧𑀘𑁆𑀙𑀺𑀫𑁄 𑀲𑀭𑁄 𑀧𑀼𑀭𑀺𑀫𑀓𑁂𑀦 𑀲𑀭𑁂𑀦 𑀲𑀫𑀲𑀫𑀕𑀢𑀺𑀓𑁄 𑀦𑀸𑀳𑁄𑀲𑀻’’𑀢𑀺? ‘‘𑀆𑀕𑀦𑁆𑀢𑀼𑀓𑁂𑀦, 𑀪𑀦𑁆𑀢𑁂, 𑀕𑀳𑀡𑁂𑀦 𑀢𑀲𑁆𑀲 𑀲𑀭𑀲𑁆𑀲 𑀕𑀫𑀦𑀁 𑀉𑀧𑀘𑁆𑀙𑀺𑀦𑁆𑀦’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀅𑀓𑀸𑀮𑁂 𑀫𑀭𑀢𑀺, 𑀲𑁄 𑀆𑀕𑀦𑁆𑀢𑀼𑀓𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀯𑀸…𑀧𑁂… 𑀲𑀢𑁆𑀢𑀺𑀯𑁂𑀕𑀧𑁆𑀧𑀝𑀺𑀧𑀻𑀴𑀺𑀢𑁄 𑀯𑀸 𑀅𑀓𑀸𑀮𑁂 𑀫𑀭𑀢𑀺. 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀓𑀸𑀮𑁂 𑀫𑀭𑀡𑀁 𑀅𑀢𑁆𑀣𑀻𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀮𑁄𑀳𑀫𑀬𑀁 𑀪𑀸𑀚𑀦𑀁 𑀆𑀓𑁄𑀝𑁂𑀬𑁆𑀬, 𑀢𑀲𑁆𑀲 𑀆𑀓𑁄𑀝𑀦𑁂𑀦 𑀲𑀤𑁆𑀤𑁄 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀬𑀣𑀸𑀕𑀢𑀺𑀕𑀫𑀦𑀧𑀣𑀫𑀢𑁆𑀣𑀓𑀁 𑀕𑀘𑁆𑀙𑀢𑀺, 𑀲𑁄 𑀲𑀤𑁆𑀤𑁄 𑀯𑀼𑀘𑁆𑀘𑀢𑀺 ‘𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀬𑀣𑀸𑀕𑀢𑀺𑀕𑀫𑀦𑀧𑀣𑀫𑀢𑁆𑀣𑀓𑀁 𑀕𑀢𑁄 𑀦𑀸𑀫𑀸’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀩𑀳𑀽𑀦𑀺 𑀤𑀺𑀯𑀲𑀲𑀳𑀲𑁆𑀲𑀸𑀦𑀺 𑀚𑀻𑀯𑀺𑀢𑁆𑀯𑀸 𑀚𑀭𑀸𑀚𑀺𑀡𑁆𑀡𑁄 𑀆𑀬𑀼𑀓𑁆𑀔𑀬𑀸 𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀫𑀭𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀲𑀫𑀬𑁂 𑀫𑀭𑀡𑀫𑀼𑀧𑀸𑀕𑀢𑁄’𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀮𑁄𑀳𑀫𑀬𑀁 𑀪𑀸𑀚𑀦𑀁 𑀆𑀓𑁄𑀝𑁂𑀬𑁆𑀬, 𑀢𑀲𑁆𑀲 𑀆𑀓𑁄𑀝𑀦𑁂𑀦 𑀲𑀤𑁆𑀤𑁄 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀦𑀺𑀩𑁆𑀩𑀢𑁆𑀢𑁂 𑀲𑀤𑁆𑀤𑁂 𑀅𑀤𑀽𑀭𑀕𑀢𑁂 𑀓𑁄𑀘𑀺 𑀆𑀫𑀲𑁂𑀬𑁆𑀬, 𑀲𑀳 𑀆𑀫𑀲𑀦𑁂𑀦 𑀲𑀤𑁆𑀤𑁄 𑀦𑀺𑀭𑀼𑀚𑁆𑀛𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀲𑀤𑁆𑀤𑁄 𑀬𑀣𑀸𑀕𑀢𑀺𑀕𑀫𑀦𑀧𑀣𑀫𑀢𑁆𑀣𑀓𑀁 𑀕𑀢𑁄 𑀦𑀸𑀫 𑀳𑁄𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦, 𑀫𑀳𑀸𑀭𑀸𑀚, 𑀧𑀘𑁆𑀙𑀺𑀫𑁄 𑀲𑀤𑁆𑀤𑁄 𑀧𑀼𑀭𑀺𑀫𑀓𑁂𑀦 𑀲𑀤𑁆𑀤𑁂𑀦 𑀲𑀫𑀲𑀫𑀕𑀢𑀺𑀓𑁄 𑀦𑀸𑀳𑁄𑀲𑀻’’𑀢𑀺? ‘‘𑀆𑀕𑀦𑁆𑀢𑀼𑀓𑁂𑀦, 𑀪𑀦𑁆𑀢𑁂, 𑀆𑀫𑀲𑀦𑁂𑀦 𑀲𑁄 𑀲𑀤𑁆𑀤𑁄 𑀉𑀧𑀭𑀢𑁄’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀅𑀓𑀸𑀮𑁂 𑀫𑀭𑀢𑀺, 𑀲𑁄 𑀆𑀕𑀦𑁆𑀢𑀼𑀓𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀯𑀸…𑀧𑁂… 𑀲𑀢𑁆𑀢𑀺𑀯𑁂𑀕𑀧𑁆𑀧𑀝𑀺𑀧𑀻𑀴𑀺𑀢𑁄 𑀯𑀸 𑀅𑀓𑀸𑀮𑁂 𑀫𑀭𑀢𑀺. 𑀇𑀤𑀫𑁂𑀢𑁆𑀣 𑀫𑀳𑀸𑀭𑀸𑀚 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀓𑀸𑀮𑁂 𑀫𑀭𑀡𑀁 𑀅𑀢𑁆𑀣𑀻𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀔𑁂𑀢𑁆𑀢𑁂 𑀲𑀼𑀯𑀺𑀭𑀽𑀴𑁆𑀳𑀁 𑀥𑀜𑁆𑀜𑀩𑀻𑀚𑀁 𑀲𑀫𑁆𑀫𑀸 𑀧𑀯𑀢𑁆𑀢𑀫𑀸𑀦𑁂𑀦 𑀯𑀲𑁆𑀲𑁂𑀦 𑀑𑀢𑀢𑀯𑀺𑀢𑀢𑀆𑀓𑀺𑀡𑁆𑀡𑀩𑀳𑀼𑀨𑀮𑀁 𑀳𑀼𑀢𑁆𑀯𑀸 [𑀉𑀝𑁆𑀞𑀺𑀢𑀆𑀓𑀺𑀡𑁆𑀡𑀩𑀳𑀼𑀨𑀮𑀁 𑀪𑀯𑀺𑀢𑁆𑀯𑀸 (𑀲𑁆𑀬𑀸.)] 𑀲𑀲𑁆𑀲𑀼𑀝𑁆𑀞𑀸𑀦𑀲𑀫𑀬𑀁 𑀧𑀸𑀧𑀼𑀡𑀸𑀢𑀺, 𑀢𑀁 𑀥𑀜𑁆𑀜𑀁 𑀯𑀼𑀘𑁆𑀘𑀢𑀺 ‘𑀅𑀦𑀻𑀢𑀺𑀓𑀫𑀦𑀼𑀧𑀤𑁆𑀤𑀯𑀁 𑀲𑀫𑀬𑀲𑀫𑁆𑀧𑀢𑁆𑀢𑀁 𑀦𑀸𑀫 𑀳𑁄𑀢𑀻’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀩𑀳𑀽𑀦𑀺 𑀤𑀺𑀯𑀲𑀲𑀳𑀲𑁆𑀲𑀸𑀦𑀺 𑀚𑀻𑀯𑀺𑀢𑁆𑀯𑀸 𑀚𑀭𑀸𑀚𑀺𑀡𑁆𑀡𑁄 𑀆𑀬𑀼𑀓𑁆𑀔𑀬𑀸 𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀫𑀭𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘𑀅𑀦𑀻𑀢𑀺𑀓𑁄 𑀅𑀦𑀼𑀧𑀤𑁆𑀤𑀯𑁄 𑀲𑀫𑀬𑁂 𑀫𑀭𑀡𑀫𑀼𑀧𑀕𑀢𑁄’𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀔𑁂𑀢𑁆𑀢𑁂 𑀲𑀼𑀯𑀺𑀭𑀽𑀴𑁆𑀳𑀁 𑀥𑀜𑁆𑀜𑀩𑀻𑀚𑀁 𑀉𑀤𑀓𑁂𑀦 𑀯𑀺𑀓𑀮𑀁 𑀫𑀭𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀥𑀜𑁆𑀜𑀁 𑀅𑀲𑀫𑀬𑀲𑀫𑁆𑀧𑀢𑁆𑀢𑀁 𑀦𑀸𑀫 𑀳𑁄𑀢𑀻’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑀁, 𑀫𑀳𑀸𑀭𑀸𑀚, 𑀧𑀘𑁆𑀙𑀺𑀫𑀁 𑀥𑀜𑁆𑀜𑀁 𑀧𑀼𑀭𑀺𑀫𑀓𑁂𑀦 𑀥𑀜𑁆𑀜𑁂𑀦 𑀲𑀫𑀲𑀫𑀕𑀢𑀺𑀓𑀁 𑀦𑀸𑀳𑁄𑀲𑀻’’𑀢𑀺? ‘‘𑀆𑀕𑀦𑁆𑀢𑀼𑀓𑁂𑀦, 𑀪𑀦𑁆𑀢𑁂, 𑀉𑀡𑁆𑀳𑁂𑀦 𑀧𑀝𑀺𑀧𑀻𑀴𑀺𑀢𑀁 𑀢𑀁 𑀥𑀜𑁆𑀜𑀁 𑀫𑀢’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀅𑀓𑀸𑀮𑁂 𑀫𑀭𑀢𑀺, 𑀲𑁄 𑀆𑀕𑀦𑁆𑀢𑀼𑀓𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀯𑀸…𑀧𑁂… 𑀲𑀢𑁆𑀢𑀺𑀯𑁂𑀕𑀧𑁆𑀧𑀝𑀺𑀧𑀻𑀴𑀺𑀢𑁄 𑀯𑀸 𑀅𑀓𑀸𑀮𑁂 𑀫𑀭𑀢𑀺. 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀓𑀸𑀮𑁂 𑀫𑀭𑀡𑀁 𑀅𑀢𑁆𑀣𑀻𑀢𑀺.

‘‘𑀲𑀼𑀢𑀧𑀼𑀩𑁆𑀩𑀁 𑀧𑀦 𑀢𑀬𑀸, 𑀫𑀳𑀸𑀭𑀸𑀚, ‘𑀲𑀫𑁆𑀧𑀦𑁆𑀦𑀢𑀭𑀼𑀡𑀲𑀲𑁆𑀲𑀁 𑀓𑀺𑀫𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀲𑀫𑀽𑀮𑀁 𑀦𑀸𑀲𑁂𑀦𑁆𑀢𑀻’’’𑀢𑀺? ‘‘𑀲𑀼𑀢𑀧𑀼𑀩𑁆𑀩𑀜𑁆𑀘𑁂𑀯 𑀢𑀁, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀤𑀺𑀝𑁆𑀞𑀧𑀼𑀩𑁆𑀩𑀜𑁆𑀘𑀸’’𑀢𑀺. ‘‘𑀓𑀺𑀁 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀲𑀲𑁆𑀲𑀁 𑀓𑀸𑀮𑁂 𑀦𑀝𑁆𑀞𑀁, 𑀉𑀤𑀸𑀳𑀼 𑀅𑀓𑀸𑀮𑁂 𑀦𑀝𑁆𑀞’’𑀦𑁆𑀢𑀺? ‘‘𑀅𑀓𑀸𑀮𑁂, 𑀪𑀦𑁆𑀢𑁂, 𑀬𑀤𑀺 𑀔𑁄 𑀢𑀁, 𑀪𑀦𑁆𑀢𑁂, 𑀲𑀲𑁆𑀲𑀁 𑀓𑀺𑀫𑀬𑁄 𑀦 𑀔𑀸𑀤𑁂𑀬𑁆𑀬𑀼𑀁, 𑀲𑀲𑁆𑀲𑀼𑀤𑁆𑀥𑀭𑀡𑀲𑀫𑀬𑀁 𑀧𑀸𑀧𑀼𑀡𑁂𑀬𑁆𑀬𑀸’’𑀢𑀺. ‘‘𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀆𑀕𑀦𑁆𑀢𑀼𑀓𑁂𑀦 𑀉𑀧𑀖𑀸𑀢𑁂𑀦 𑀲𑀲𑁆𑀲𑀁 𑀯𑀺𑀦𑀲𑁆𑀲𑀢𑀺, 𑀦𑀺𑀭𑀼𑀧𑀖𑀸𑀢𑀁 𑀲𑀲𑁆𑀲𑀁 𑀲𑀲𑁆𑀲𑀼𑀤𑁆𑀥𑀭𑀡𑀲𑀫𑀬𑀁 𑀧𑀸𑀧𑀼𑀡𑀸𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀅𑀓𑀸𑀮𑁂 𑀫𑀭𑀢𑀺, 𑀲𑁄 𑀆𑀕𑀦𑁆𑀢𑀼𑀓𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀯𑀸…𑀧𑁂… 𑀲𑀢𑁆𑀢𑀺𑀯𑁂𑀕𑀧𑁆𑀧𑀝𑀺𑀧𑀻𑀴𑀺𑀢𑁄 𑀯𑀸 𑀫𑀭𑀢𑀺. 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀓𑀸𑀮𑁂 𑀫𑀭𑀡𑀁 𑀅𑀢𑁆𑀣𑀻𑀢𑀺.

‘‘𑀲𑀼𑀢𑀧𑀼𑀩𑁆𑀩𑀁 𑀧𑀦 𑀢𑀬𑀸, 𑀫𑀳𑀸𑀭𑀸𑀚, ‘𑀲𑀫𑁆𑀧𑀦𑁆𑀦𑁂 𑀲𑀲𑁆𑀲𑁂 𑀨𑀮𑀪𑀸𑀭𑀦𑀫𑀺𑀢𑁂 𑀫𑀜𑁆𑀘𑀭𑀺𑀢𑀧𑀢𑁆𑀢𑁂 𑀓𑀭𑀓𑀯𑀲𑁆𑀲𑀁 𑀦𑀸𑀫 𑀯𑀲𑁆𑀲𑀚𑀸𑀢𑀺 𑀦𑀺𑀧𑀢𑀺𑀢𑁆𑀯𑀸 𑀯𑀺𑀦𑀸𑀲𑁂𑀢𑀺 𑀅𑀨𑀮𑀁 𑀓𑀭𑁄𑀢𑀻’𑀢𑀺? ‘‘𑀲𑀼𑀢𑀧𑀼𑀩𑁆𑀩𑀜𑁆𑀘𑁂𑀯 𑀢𑀁, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀤𑀺𑀝𑁆𑀞𑀧𑀼𑀩𑁆𑀩𑀜𑁆𑀘𑀸’’𑀢𑀺. ‘‘𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀲𑀲𑁆𑀲𑀁 𑀓𑀸𑀮𑁂 𑀦𑀝𑁆𑀞𑀁, 𑀉𑀤𑀸𑀳𑀼 𑀅𑀓𑀸𑀮𑁂 𑀦𑀝𑁆𑀞’’𑀦𑁆𑀢𑀺? ‘‘𑀅𑀓𑀸𑀮𑁂, 𑀪𑀦𑁆𑀢𑁂, 𑀬𑀤𑀺 𑀔𑁄 𑀢𑀁, 𑀪𑀦𑁆𑀢𑁂, 𑀲𑀲𑁆𑀲𑀁 𑀓𑀭𑀓𑀯𑀲𑁆𑀲𑀁 𑀦 𑀯𑀲𑁆𑀲𑁂𑀬𑁆𑀬 𑀲𑀲𑁆𑀲𑀼𑀤𑁆𑀥𑀭𑀡𑀲𑀫𑀬𑀁 𑀧𑀸𑀧𑀼𑀡𑁂𑀬𑁆𑀬𑀸’’𑀢𑀺. ‘‘𑀓𑀺𑀁 𑀧𑀦, 𑀫𑀳𑀸𑀭𑀸𑀚, 𑀆𑀕𑀦𑁆𑀢𑀼𑀓𑁂𑀦 𑀉𑀧𑀖𑀸𑀢𑁂𑀦 𑀲𑀲𑁆𑀲𑀁 𑀯𑀺𑀦𑀲𑁆𑀲𑀢𑀺, 𑀦𑀺𑀭𑀼𑀧𑀖𑀸𑀢𑀁 𑀲𑀲𑁆𑀲𑀁 𑀲𑀲𑁆𑀲𑀼𑀤𑁆𑀥𑀭𑀡𑀲𑀫𑀬𑀁 𑀧𑀸𑀧𑀼𑀡𑀸𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀅𑀓𑀸𑀮𑁂 𑀫𑀭𑀢𑀺, 𑀲𑁄 𑀆𑀕𑀦𑁆𑀢𑀼𑀓𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀯𑀸 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀯𑀸 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑁂𑀦 𑀯𑀸 𑀲𑀦𑁆𑀦𑀺𑀧𑀸𑀢𑀺𑀓𑁂𑀦 𑀯𑀸 𑀉𑀢𑀼𑀧𑀭𑀺𑀡𑀸𑀫𑀚𑁂𑀦 𑀯𑀸 𑀯𑀺𑀲𑀫𑀧𑀭𑀺𑀳𑀸𑀭𑀚𑁂𑀦 𑀯𑀸 𑀑𑀧𑀓𑁆𑀓𑀫𑀺𑀓𑁂𑀦 𑀯𑀸 𑀚𑀺𑀖𑀘𑁆𑀙𑀸𑀬 𑀯𑀸 𑀧𑀺𑀧𑀸𑀲𑀸𑀬 𑀯𑀸 𑀲𑀧𑁆𑀧𑀤𑀝𑁆𑀞𑁂𑀦 𑀯𑀸 𑀯𑀺𑀲𑀫𑀸𑀲𑀺𑀢𑁂𑀦 𑀯𑀸 𑀅𑀕𑁆𑀕𑀺𑀦𑀸 𑀯𑀸 𑀉𑀤𑀓𑁂𑀦 𑀯𑀸 𑀲𑀢𑁆𑀢𑀺𑀯𑁂𑀕𑀧𑁆𑀧𑀝𑀺𑀧𑀻𑀴𑀺𑀢𑁄 𑀯𑀸 𑀅𑀓𑀸𑀮𑁂 𑀫𑀭𑀢𑀺. 𑀬𑀤𑀺 𑀧𑀦 𑀆𑀕𑀦𑁆𑀢𑀼𑀓𑁂𑀦 𑀭𑁄𑀕𑁂𑀦 𑀧𑀝𑀺𑀧𑀻𑀴𑀺𑀢𑁄 𑀦 𑀪𑀯𑁂𑀬𑁆𑀬, 𑀲𑀫𑀬𑁂𑀯 𑀫𑀭𑀡𑀁 𑀧𑀸𑀧𑀼𑀡𑁂𑀬𑁆𑀬. 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀅𑀓𑀸𑀮𑁂 𑀫𑀭𑀡𑀁 𑀅𑀢𑁆𑀣𑀻’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀩𑁆𑀪𑀼𑀢𑀁 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀤𑀲𑁆𑀲𑀺𑀢𑀁 𑀓𑀸𑀭𑀡𑀁, 𑀲𑀼𑀤𑀲𑁆𑀲𑀺𑀢𑀁 𑀑𑀧𑀫𑁆𑀫𑀁 𑀅𑀓𑀸𑀮𑁂 𑀫𑀭𑀡𑀲𑁆𑀲 𑀧𑀭𑀺𑀤𑀻𑀧𑀦𑀸𑀬, ‘𑀅𑀢𑁆𑀣𑀺 𑀅𑀓𑀸𑀮𑁂 𑀫𑀭𑀡’𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀢𑀁 𑀧𑀸𑀓𑀝𑀁 𑀓𑀢𑀁 𑀯𑀺𑀪𑀽𑀢𑀁 𑀓𑀢𑀁, 𑀅𑀘𑀺𑀢𑁆𑀢𑀯𑀺𑀓𑁆𑀔𑀺𑀢𑁆𑀢𑀓𑁄𑀧𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀫𑀦𑀼𑀚𑁄 𑀏𑀓𑀫𑁂𑀓𑁂𑀦𑀧𑀺 𑀢𑀸𑀯 𑀑𑀧𑀫𑁆𑀫𑁂𑀦 𑀦𑀺𑀝𑁆𑀞𑀁 𑀕𑀘𑁆𑀙𑁂𑀬𑁆𑀬 ‘𑀅𑀢𑁆𑀣𑀺 𑀅𑀓𑀸𑀮𑁂 𑀫𑀭𑀡’𑀦𑁆𑀢𑀺, 𑀓𑀺𑀁 𑀧𑀦 𑀫𑀦𑀼𑀚𑁄 𑀲𑀘𑁂𑀢𑀦𑁄? 𑀧𑀞𑀫𑁄𑀧𑀫𑁆𑀫𑁂𑀦𑁂𑀯𑀸𑀳𑀁, 𑀪𑀦𑁆𑀢𑁂, 𑀲𑀜𑁆𑀜𑀢𑁆𑀢𑁄 ‘𑀅𑀢𑁆𑀣𑀺 𑀅𑀓𑀸𑀮𑁂 𑀫𑀭𑀡’𑀦𑁆𑀢𑀺, 𑀅𑀧𑀺 𑀘 𑀅𑀧𑀭𑀸𑀧𑀭𑀁 𑀦𑀺𑀩𑁆𑀩𑀸𑀳𑀦𑀁 𑀲𑁄𑀢𑀼𑀓𑀸𑀫𑁄 𑀦 𑀲𑀫𑁆𑀧𑀝𑀺𑀘𑁆𑀙𑀺’’𑀦𑁆𑀢𑀺.

𑀅𑀓𑀸𑀮𑀫𑀭𑀡𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀘𑁂𑀢𑀺𑀬𑀧𑀸𑀝𑀺𑀳𑀸𑀭𑀺𑀬𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀲𑀁 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀳𑁄𑀢𑀺, 𑀉𑀤𑀸𑀳𑀼 𑀏𑀓𑀘𑁆𑀘𑀸𑀦𑀁 𑀬𑁂𑀯 𑀳𑁄𑀢𑀻’’𑀢𑀺? ‘‘𑀏𑀓𑀘𑁆𑀘𑀸𑀦𑀁, 𑀫𑀳𑀸𑀭𑀸𑀚, 𑀳𑁄𑀢𑀺, 𑀏𑀓𑀘𑁆𑀘𑀸𑀦𑀁 𑀦 𑀳𑁄𑀢𑀻’’𑀢𑀺. ‘‘𑀓𑀢𑀫𑁂𑀲𑀁, 𑀪𑀦𑁆𑀢𑁂, 𑀳𑁄𑀢𑀺, 𑀓𑀢𑀫𑁂𑀲𑀁 𑀦 𑀳𑁄𑀢𑀻’’𑀢𑀺? ‘‘𑀢𑀺𑀡𑁆𑀡𑀦𑁆𑀦𑀁, 𑀫𑀳𑀸𑀭𑀸𑀚, 𑀅𑀜𑁆𑀜𑀢𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀳𑁄𑀢𑀺. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀦𑁆𑀦𑀁? 𑀇𑀥, 𑀫𑀳𑀸𑀭𑀸𑀚, 𑀅𑀭𑀳𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀓𑀫𑁆𑀧𑀸𑀬 𑀢𑀺𑀝𑁆𑀞𑀦𑁆𑀢𑁄𑀯 𑀅𑀥𑀺𑀝𑁆𑀞𑀸𑀢𑀺 ‘𑀏𑀯𑀁𑀦𑀸𑀫 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀳𑁄𑀢𑀽’𑀢𑀺, 𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀳𑁄𑀢𑀺, 𑀏𑀯𑀁 𑀅𑀭𑀳𑀢𑁄 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀤𑁂𑀯𑀢𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀓𑀫𑁆𑀧𑀸𑀬 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀤𑀲𑁆𑀲𑁂𑀦𑁆𑀢𑀺 ‘𑀇𑀫𑀺𑀦𑀸 𑀧𑀸𑀝𑀺𑀳𑀻𑀭𑁂𑀦 𑀲𑀤𑁆𑀥𑀫𑁆𑀫𑁄 𑀦𑀺𑀘𑁆𑀘𑀲𑀫𑁆𑀧𑀕𑁆𑀕𑀳𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀫𑀦𑀼𑀲𑁆𑀲𑀸 𑀘 𑀧𑀲𑀦𑁆𑀦𑀸 𑀓𑀼𑀲𑀮𑁂𑀦 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀻’𑀢𑀺, 𑀏𑀯𑀁 𑀤𑁂𑀯𑀢𑀸𑀦𑀁 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀳𑁄𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀬𑁄𑀦𑀺𑀲𑁄 𑀘𑀺𑀦𑁆𑀢𑀬𑀺𑀢𑁆𑀯𑀸 𑀕𑀦𑁆𑀥𑀁 𑀯𑀸 𑀫𑀸𑀮𑀁 𑀯𑀸 𑀤𑀼𑀲𑁆𑀲𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀓𑀺𑀜𑁆𑀘𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀘𑁂𑀢𑀺𑀬𑁂 𑀉𑀓𑁆𑀔𑀺𑀧𑀢𑀺 ‘𑀏𑀯𑀁𑀦𑀸𑀫 𑀳𑁄𑀢𑀽’𑀢𑀺, 𑀢𑀲𑁆𑀲𑀧𑀺 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀳𑁄𑀢𑀺, 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀳𑁄𑀢𑀺.

‘‘𑀇𑀫𑁂𑀲𑀁 𑀔𑁄, 𑀫𑀳𑀸𑀭𑀸𑀚, 𑀢𑀺𑀡𑁆𑀡𑀦𑁆𑀦𑀁 𑀅𑀜𑁆𑀜𑀢𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀳𑁄𑀢𑀺.

‘‘𑀬𑀤𑀺, 𑀫𑀳𑀸𑀭𑀸𑀚, 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀁 𑀦 𑀳𑁄𑀢𑀺, 𑀔𑀻𑀡𑀸𑀲𑀯𑀲𑁆𑀲𑀧𑀺 𑀙𑀴𑀪𑀺𑀜𑁆𑀜𑀲𑁆𑀲 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀲𑁆𑀲 𑀘𑁂𑀢𑀺𑀬𑁂 𑀧𑀸𑀝𑀺𑀳𑀻𑀭𑀁 𑀦 𑀳𑁄𑀢𑀺, 𑀅𑀲𑀢𑀺𑀧𑀺, 𑀫𑀳𑀸𑀭𑀸𑀚, 𑀧𑀸𑀝𑀺𑀳𑀻𑀭𑁂 𑀘𑀭𑀺𑀢𑀁 𑀤𑀺𑀲𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑀁 𑀑𑀓𑀧𑁆𑀧𑁂𑀢𑀩𑁆𑀩𑀁 𑀦𑀺𑀝𑁆𑀞𑀁 𑀕𑀦𑁆𑀢𑀩𑁆𑀩𑀁 𑀲𑀤𑁆𑀤𑀳𑀺𑀢𑀩𑁆𑀩𑀁 ‘𑀲𑀼𑀧𑀭𑀺𑀦𑀺𑀩𑁆𑀩𑀼𑀢𑁄 𑀅𑀬𑀁 𑀩𑀼𑀤𑁆𑀥𑀧𑀼𑀢𑁆𑀢𑁄’’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀘𑁂𑀢𑀺𑀬𑀧𑀸𑀝𑀺𑀳𑀸𑀭𑀺𑀬𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀥𑀫𑁆𑀫𑀸𑀪𑀺𑀲𑀫𑀬𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁂 𑀢𑁂 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀬𑁂𑀯 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀉𑀤𑀸𑀳𑀼 𑀓𑀲𑁆𑀲𑀘𑀺 𑀦 𑀳𑁄𑀢𑀻’’𑀢𑀺? ‘‘𑀓𑀲𑁆𑀲𑀘𑀺, 𑀫𑀳𑀸𑀭𑀸𑀚, 𑀳𑁄𑀢𑀺, 𑀓𑀲𑁆𑀲𑀘𑀺 𑀦 𑀳𑁄𑀢𑀻’’𑀢𑀺. ‘‘𑀓𑀲𑁆𑀲 𑀪𑀦𑁆𑀢𑁂 𑀳𑁄𑀢𑀺, 𑀓𑀲𑁆𑀲 𑀦 𑀳𑁄𑀢𑀻’’𑀢𑀺? ‘‘𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲, 𑀫𑀳𑀸𑀭𑀸𑀚, 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑀽𑀧𑀧𑀦𑁆𑀦𑀲𑁆𑀲…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲…𑀧𑁂… 𑀓𑀼𑀳𑀓𑀲𑁆𑀲…𑀧𑁂… 𑀫𑀸𑀢𑀼𑀖𑀸𑀢𑀓𑀲𑁆𑀲…𑀧𑁂… 𑀧𑀺𑀢𑀼𑀖𑀸𑀢𑀓𑀲𑁆𑀲…𑀧𑁂… 𑀅𑀭𑀳𑀦𑁆𑀢𑀖𑀸𑀢𑀓𑀲𑁆𑀲…𑀧𑁂… 𑀲𑀗𑁆𑀖𑀪𑁂𑀤𑀓𑀲𑁆𑀲…𑀧𑁂… 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀲𑁆𑀲…𑀧𑁂… 𑀣𑁂𑀬𑁆𑀬𑀲𑀁𑀯𑀸𑀲𑀓𑀲𑁆𑀲…𑀧𑁂… 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀲𑁆𑀲…𑀧𑁂… 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀲𑁆𑀲…𑀧𑁂… 𑀢𑁂𑀭𑀲𑀦𑁆𑀦𑀁 𑀕𑀭𑀼𑀓𑀸𑀧𑀢𑁆𑀢𑀻𑀦𑀁 𑀅𑀜𑁆𑀜𑀢𑀭𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀯𑀼𑀝𑁆𑀞𑀺𑀢𑀲𑁆𑀲…𑀧𑁂… 𑀧𑀡𑁆𑀟𑀓𑀲𑁆𑀲…𑀧𑁂… 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺…𑀧𑁂… 𑀬𑁄𑀧𑀺 𑀫𑀦𑀼𑀲𑁆𑀲𑀤𑀳𑀭𑀓𑁄 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑁄, 𑀢𑀲𑁆𑀲 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺. 𑀇𑀫𑁂𑀲𑀁 𑀔𑁄, 𑀫𑀳𑀸𑀭𑀸𑀚, 𑀲𑁄𑀴𑀲𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀼𑀧𑁆𑀧𑀝𑀺𑀧𑀦𑁆𑀦𑀸𑀦𑀫𑁆𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁂 𑀢𑁂 𑀧𑀦𑁆𑀦𑀭𑀲 𑀧𑀼𑀕𑁆𑀕𑀮𑀸 𑀯𑀺𑀭𑀼𑀤𑁆𑀥𑀸 𑀬𑁂𑀯, 𑀢𑁂𑀲𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀼 𑀯𑀸 𑀫𑀸 𑀯𑀸 𑀳𑁄𑀢𑀼, 𑀅𑀣 𑀓𑁂𑀦 𑀓𑀸𑀭𑀡𑁂𑀦 𑀫𑀦𑀼𑀲𑁆𑀲𑀤𑀳𑀭𑀓𑀲𑁆𑀲 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺? 𑀏𑀢𑁆𑀣 𑀢𑀸𑀯 𑀧𑀜𑁆𑀳𑁄 𑀪𑀯𑀢𑀺 ‘𑀦𑀦𑀼 𑀦𑀸𑀫 𑀤𑀳𑀭𑀓𑀲𑁆𑀲 𑀦 𑀭𑀸𑀕𑁄 𑀳𑁄𑀢𑀺, 𑀦 𑀤𑁄𑀲𑁄 𑀳𑁄𑀢𑀺, 𑀦 𑀫𑁄𑀳𑁄 𑀳𑁄𑀢𑀺, 𑀦 𑀫𑀸𑀦𑁄 𑀳𑁄𑀢𑀺, 𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺, 𑀦 𑀅𑀭𑀢𑀺 𑀳𑁄𑀢𑀺, 𑀦 𑀓𑀸𑀫𑀯𑀺𑀢𑀓𑁆𑀓𑁄 𑀳𑁄𑀢𑀺, 𑀅𑀫𑀺𑀲𑁆𑀲𑀺𑀢𑁄 𑀓𑀺𑀮𑁂𑀲𑁂𑀳𑀺, 𑀲𑁄 𑀦𑀸𑀫 𑀤𑀳𑀭𑀓𑁄 𑀬𑀼𑀢𑁆𑀢𑁄 𑀘 𑀧𑀢𑁆𑀢𑁄 𑀘 𑀅𑀭𑀳𑀢𑀺 𑀘 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀼’’’𑀦𑁆𑀢𑀺.

‘‘𑀢𑀜𑁆𑀜𑁂𑀯𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦𑀸𑀳𑀁 𑀓𑀸𑀭𑀡𑁂𑀦 𑀪𑀡𑀸𑀫𑀺 ‘𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀻’𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑁄 𑀭𑀚𑀦𑀻𑀬𑁂 𑀭𑀚𑁆𑀚𑁂𑀬𑁆𑀬, 𑀤𑀼𑀲𑁆𑀲𑀦𑀻𑀬𑁂 𑀤𑀼𑀲𑁆𑀲𑁂𑀬𑁆𑀬, 𑀫𑁄𑀳𑀦𑀻𑀬𑁂 𑀫𑀼𑀬𑁆𑀳𑁂𑀬𑁆𑀬, 𑀫𑀤𑀦𑀻𑀬𑁂 𑀫𑀚𑁆𑀚𑁂𑀬𑁆𑀬, 𑀤𑀺𑀝𑁆𑀞𑀺𑀁 𑀯𑀺𑀚𑀸𑀦𑁂𑀬𑁆𑀬, 𑀭𑀢𑀺𑀜𑁆𑀘 𑀅𑀭𑀢𑀺𑀜𑁆𑀘 𑀯𑀺𑀚𑀸𑀦𑁂𑀬𑁆𑀬, 𑀓𑀼𑀲𑀮𑀸𑀓𑀼𑀲𑀮𑀁 𑀯𑀺𑀢𑀓𑁆𑀓𑁂𑀬𑁆𑀬, 𑀪𑀯𑁂𑀬𑁆𑀬 𑀢𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄, 𑀅𑀧𑀺 𑀘, 𑀫𑀳𑀸𑀭𑀸𑀚, 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀘𑀺𑀢𑁆𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁 𑀧𑀭𑀺𑀢𑁆𑀢𑀁 𑀅𑀧𑁆𑀧𑀁 𑀣𑁄𑀓𑀁 𑀫𑀦𑁆𑀤𑀁 𑀅𑀯𑀺𑀪𑀽𑀢𑀁, 𑀅𑀲𑀗𑁆𑀔𑀢𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀕𑀭𑀼𑀓𑀸 𑀪𑀸𑀭𑀺𑀓𑀸 𑀯𑀺𑀧𑀼𑀮𑀸 𑀫𑀳𑀢𑀻. 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑁄, 𑀫𑀳𑀸𑀭𑀸𑀚, 𑀢𑁂𑀦 𑀤𑀼𑀩𑁆𑀩𑀮𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀢𑁆𑀢𑀓𑁂𑀦 𑀫𑀦𑁆𑀤𑁂𑀦 𑀅𑀯𑀺𑀪𑀽𑀢𑁂𑀦 𑀦 𑀲𑀓𑁆𑀓𑁄𑀢𑀺 𑀕𑀭𑀼𑀓𑀁 𑀪𑀸𑀭𑀺𑀓𑀁 𑀯𑀺𑀧𑀼𑀮𑀁 𑀫𑀳𑀢𑀺𑀁 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸 𑀕𑀭𑀼𑀓𑁄 𑀪𑀸𑀭𑀺𑀓𑁄 𑀯𑀺𑀧𑀼𑀮𑁄 𑀫𑀳𑀦𑁆𑀢𑁄, 𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀧𑀸𑀓𑀢𑀺𑀓𑁂𑀦 𑀣𑀸𑀫𑀩𑀮𑀯𑀻𑀭𑀺𑀬𑁂𑀦 𑀲𑀓𑁆𑀓𑀼𑀡𑁂𑀬𑁆𑀬 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸𑀦𑀁 𑀉𑀤𑁆𑀥𑀭𑀺𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦 𑀫𑀳𑀸𑀭𑀸𑀚𑀸’’𑀢𑀺? ‘‘𑀤𑀼𑀩𑁆𑀩𑀮𑀢𑁆𑀢𑀸, 𑀪𑀦𑁆𑀢𑁂, 𑀧𑀼𑀭𑀺𑀲𑀲𑁆𑀲, 𑀫𑀳𑀦𑁆𑀢𑀢𑁆𑀢𑀸 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀘𑀺𑀢𑁆𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁 𑀧𑀭𑀺𑀢𑁆𑀢𑀁 𑀅𑀧𑁆𑀧𑀁 𑀣𑁄𑀓𑀁 𑀫𑀦𑁆𑀤𑀁 𑀅𑀯𑀺𑀪𑀽𑀢𑀁, 𑀅𑀲𑀗𑁆𑀔𑀢𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀕𑀭𑀼𑀓𑀸 𑀪𑀸𑀭𑀺𑀓𑀸 𑀯𑀺𑀧𑀼𑀮𑀸 𑀫𑀳𑀢𑀻. 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑁄 𑀢𑁂𑀦 𑀤𑀼𑀩𑁆𑀩𑀮𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀢𑁆𑀢𑁂𑀦 𑀫𑀦𑁆𑀤𑁂𑀦 𑀅𑀯𑀺𑀪𑀽𑀢𑁂𑀦 𑀦 𑀲𑀓𑁆𑀓𑁄𑀢𑀺 𑀕𑀭𑀼𑀓𑀁 𑀪𑀸𑀭𑀺𑀓𑀁 𑀯𑀺𑀧𑀼𑀮𑀁 𑀫𑀳𑀢𑀺𑀁 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀢𑁂𑀦 𑀓𑀸𑀭𑀡𑁂𑀦 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀅𑀬𑀁 𑀫𑀳𑀸𑀧𑀣𑀯𑀻 𑀤𑀻𑀖𑀸 𑀆𑀬𑀢𑀸 𑀧𑀼𑀣𑀼𑀮𑀸 𑀯𑀺𑀢𑁆𑀣𑀢𑀸 𑀯𑀺𑀲𑀸𑀮𑀸 𑀯𑀺𑀢𑁆𑀣𑀺𑀡𑁆𑀡𑀸 𑀯𑀺𑀧𑀼𑀮𑀸 𑀫𑀳𑀦𑁆𑀢𑀸, 𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀫𑀳𑀸𑀧𑀣𑀯𑀺𑀁 𑀲𑀓𑁆𑀓𑀸 𑀧𑀭𑀺𑀢𑁆𑀢𑀓𑁂𑀦 𑀉𑀤𑀓𑀩𑀺𑀦𑁆𑀤𑀼𑀓𑁂𑀦 𑀢𑁂𑀫𑁂𑀢𑁆𑀯𑀸 𑀉𑀤𑀓𑀘𑀺𑀓𑁆𑀔𑀮𑁆𑀮𑀁 𑀓𑀸𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦, 𑀫𑀳𑀸𑀭𑀸𑀚𑀸’’𑀢𑀺? ‘‘𑀧𑀭𑀺𑀢𑁆𑀢𑀢𑁆𑀢𑀸, 𑀪𑀦𑁆𑀢𑁂, 𑀉𑀤𑀓𑀩𑀺𑀦𑁆𑀤𑀼𑀲𑁆𑀲, 𑀫𑀳𑀦𑁆𑀢𑀢𑁆𑀢𑀸 𑀫𑀳𑀸𑀧𑀣𑀯𑀺𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀘𑀺𑀢𑁆𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁 𑀧𑀭𑀺𑀢𑁆𑀢𑀁 𑀅𑀧𑁆𑀧𑀁 𑀣𑁄𑀓𑀁 𑀫𑀦𑁆𑀤𑀁 𑀅𑀯𑀺𑀪𑀽𑀢𑀁, 𑀅𑀲𑀗𑁆𑀔𑀢𑀸 𑀦𑀺𑀩𑁆𑀩𑀸𑀦𑀥𑀸𑀢𑀼 𑀤𑀻𑀖𑀸 𑀆𑀬𑀢𑀸 𑀧𑀼𑀣𑀼𑀮𑀸 𑀯𑀺𑀢𑁆𑀣𑀢𑀸 𑀯𑀺𑀲𑀸𑀮𑀸 𑀯𑀺𑀢𑁆𑀣𑀺𑀡𑁆𑀡𑀸 𑀯𑀺𑀧𑀼𑀮𑀸 𑀫𑀳𑀦𑁆𑀢𑀸. 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑁄 𑀢𑁂𑀦 𑀤𑀼𑀩𑁆𑀩𑀮𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀢𑁆𑀢𑀓𑁂𑀦 𑀫𑀦𑁆𑀤𑁂𑀦 𑀅𑀯𑀺𑀪𑀽𑀢𑁂𑀦 𑀦 𑀲𑀓𑁆𑀓𑁄𑀢𑀺 𑀫𑀳𑀢𑀺𑀁 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀢𑁂𑀦 𑀓𑀸𑀭𑀡𑁂𑀦 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀅𑀩𑀮𑀤𑀼𑀩𑁆𑀩𑀮𑀧𑀭𑀺𑀢𑁆𑀢𑀅𑀧𑁆𑀧𑀣𑁄𑀓𑀫𑀦𑁆𑀤𑀕𑁆𑀕𑀺 𑀪𑀯𑁂𑀬𑁆𑀬, 𑀅𑀧𑀺 𑀦𑀼 𑀔𑁄, 𑀫𑀳𑀸𑀭𑀸𑀚, 𑀢𑀸𑀯𑀢𑀓𑁂𑀦 𑀫𑀦𑁆𑀤𑁂𑀦 𑀅𑀕𑁆𑀕𑀺𑀦𑀸 𑀲𑀓𑁆𑀓𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦 𑀫𑀳𑀸𑀭𑀸𑀚𑀸’’𑀢𑀺? ‘‘𑀫𑀦𑁆𑀤𑀢𑁆𑀢𑀸, 𑀪𑀦𑁆𑀢𑁂, 𑀅𑀕𑁆𑀕𑀺𑀲𑁆𑀲, 𑀮𑁄𑀓𑀲𑁆𑀲 𑀫𑀳𑀦𑁆𑀢𑀢𑁆𑀢𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀘𑀺𑀢𑁆𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁 𑀧𑀭𑀺𑀢𑁆𑀢𑀁 𑀅𑀧𑁆𑀧𑀁 𑀣𑁄𑀓𑀁 𑀫𑀦𑁆𑀤𑀁 𑀅𑀯𑀺𑀪𑀽𑀢𑀁, 𑀫𑀳𑀢𑀸 𑀘 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑁂𑀦 𑀧𑀺𑀳𑀺𑀢𑀁. 𑀢𑀲𑁆𑀫𑀸 𑀤𑀼𑀓𑁆𑀓𑀭𑀁 𑀜𑀸𑀡𑀸𑀮𑁄𑀓𑀁 𑀤𑀲𑁆𑀲𑀬𑀺𑀢𑀼𑀁, 𑀢𑁂𑀦 𑀓𑀸𑀭𑀡𑁂𑀦 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀆𑀢𑀼𑀭𑁄 𑀓𑀺𑀲𑁄 𑀅𑀡𑀼𑀧𑀭𑀺𑀫𑀺𑀢𑀓𑀸𑀬𑁄 𑀲𑀸𑀮𑀓𑀓𑀺𑀫𑀺 𑀳𑀢𑁆𑀣𑀺𑀦𑀸𑀕𑀁 𑀢𑀺𑀥𑀸 𑀧𑀪𑀺𑀦𑁆𑀦𑀁 𑀦𑀯𑀸𑀬𑀢𑀁 𑀢𑀺𑀯𑀺𑀢𑁆𑀣𑀢𑀁 𑀤𑀲𑀧𑀭𑀺𑀡𑀸𑀳𑀁 𑀅𑀝𑁆𑀞𑀭𑀢𑀦𑀺𑀓𑀁 𑀲𑀓𑀝𑁆𑀞𑀸𑀦𑀫𑀼𑀧𑀕𑀢𑀁 𑀤𑀺𑀲𑁆𑀯𑀸 𑀕𑀺𑀮𑀺𑀢𑀼𑀁 𑀧𑀭𑀺𑀓𑀟𑁆𑀠𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀲𑀸𑀮𑀓𑀓𑀺𑀫𑀺 𑀲𑀓𑁆𑀓𑀼𑀡𑁂𑀬𑁆𑀬 𑀢𑀁 𑀳𑀢𑁆𑀣𑀺𑀦𑀸𑀕𑀁 𑀕𑀺𑀮𑀺𑀢𑀼’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦, 𑀫𑀳𑀸𑀭𑀸𑀚𑀸’’𑀢𑀺? ‘‘𑀧𑀭𑀺𑀢𑁆𑀢𑀢𑁆𑀢𑀸, 𑀪𑀦𑁆𑀢𑁂, 𑀲𑀸𑀮𑀓𑀓𑀺𑀫𑀺𑀲𑁆𑀲, 𑀫𑀳𑀦𑁆𑀢𑀢𑁆𑀢𑀸 𑀳𑀢𑁆𑀣𑀺𑀦𑀸𑀕𑀲𑁆𑀲𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀘𑀺𑀢𑁆𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁 𑀧𑀭𑀺𑀢𑁆𑀢𑀁 𑀅𑀧𑁆𑀧𑀁 𑀣𑁄𑀓𑀁 𑀫𑀦𑁆𑀤𑀁 𑀅𑀯𑀺𑀪𑀽𑀢𑀁, 𑀫𑀳𑀢𑀻 𑀅𑀲𑀗𑁆𑀔𑀢𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀲𑁄 𑀢𑁂𑀦 𑀤𑀼𑀩𑁆𑀩𑀮𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀢𑁆𑀢𑀓𑁂𑀦 𑀫𑀦𑁆𑀤𑁂𑀦 𑀅𑀯𑀺𑀪𑀽𑀢𑁂𑀦 𑀦 𑀲𑀓𑁆𑀓𑁄𑀢𑀺 𑀫𑀳𑀢𑀺𑀁 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀢𑁂𑀦 𑀓𑀸𑀭𑀡𑁂𑀦 𑀊𑀦𑀓𑀲𑀢𑁆𑀢𑀯𑀲𑁆𑀲𑀺𑀓𑀲𑁆𑀲 𑀲𑀼𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀥𑀫𑁆𑀫𑀸𑀪𑀺𑀲𑀫𑀬𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀏𑀓𑀦𑁆𑀢𑀲𑀼𑀔𑀦𑀺𑀩𑁆𑀩𑀸𑀦𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀺𑀁 𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁, 𑀉𑀤𑀸𑀳𑀼 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲’’𑀦𑁆𑀢𑀺? ‘‘𑀏𑀓𑀦𑁆𑀢𑀲𑀼𑀔𑀁, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁, 𑀤𑀼𑀓𑁆𑀔𑁂𑀦 𑀅𑀫𑀺𑀲𑁆𑀲’’𑀦𑁆𑀢𑀺.

‘‘𑀦 𑀫𑀬𑀁 𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑀘𑀦𑀁 𑀲𑀤𑁆𑀤𑀳𑀸𑀫 ‘𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦’𑀦𑁆𑀢𑀺, 𑀏𑀯𑀫𑁂𑀢𑁆𑀣 𑀫𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀘𑁆𑀘𑁂𑀫 ‘𑀦𑀺𑀩𑁆𑀩𑀸𑀦𑀁 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲’𑀦𑁆𑀢𑀺, 𑀓𑀸𑀭𑀡𑀜𑁆𑀘𑁂𑀢𑁆𑀣 𑀉𑀧𑀮𑀪𑀸𑀫 ‘𑀦𑀺𑀩𑁆𑀩𑀸𑀦𑀁 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲’𑀦𑁆𑀢𑀺. 𑀓𑀢𑀫𑀁 𑀏𑀢𑁆𑀣 𑀓𑀸𑀭𑀡𑀁? 𑀬𑁂 𑀢𑁂, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀢𑁂𑀲𑀁 𑀤𑀺𑀲𑁆𑀲𑀢𑀺 𑀓𑀸𑀬𑀲𑁆𑀲 𑀘 𑀘𑀺𑀢𑁆𑀢𑀲𑁆𑀲 𑀘 𑀆𑀢𑀸𑀧𑁄 𑀧𑀭𑀺𑀢𑀸𑀧𑁄 𑀞𑀸𑀦𑀘𑀗𑁆𑀓𑀫𑀦𑀺𑀲𑀚𑁆𑀚𑀸𑀲𑀬𑀦𑀸𑀳𑀸𑀭𑀧𑀭𑀺𑀕𑁆𑀕𑀳𑁄 𑀫𑀺𑀤𑁆𑀥𑀲𑁆𑀲 𑀘 𑀉𑀧𑀭𑁄𑀥𑁄 𑀆𑀬𑀢𑀦𑀸𑀦𑀜𑁆𑀘 𑀧𑀝𑀺𑀧𑀻𑀴𑀦𑀁 𑀥𑀦𑀥𑀜𑁆𑀜𑀧𑀺𑀬𑀜𑀸𑀢𑀺𑀫𑀺𑀢𑁆𑀢𑀧𑁆𑀧𑀚𑀳𑀦𑀁. 𑀬𑁂 𑀓𑁂𑀘𑀺 𑀮𑁄𑀓𑁂 𑀲𑀼𑀔𑀺𑀢𑀸 𑀲𑀼𑀔𑀲𑀫𑀧𑁆𑀧𑀺𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀆𑀬𑀢𑀦𑁂 𑀭𑀫𑁂𑀦𑁆𑀢𑀺 𑀩𑁆𑀭𑀽𑀳𑁂𑀦𑁆𑀢𑀺, 𑀫𑀦𑀸𑀧𑀺𑀓𑀫𑀦𑀸𑀧𑀺𑀓𑀩𑀳𑀼𑀯𑀺𑀥𑀲𑀼𑀪𑀦𑀺𑀫𑀺𑀢𑁆𑀢𑁂𑀦 𑀭𑀽𑀧𑁂𑀦 𑀘𑀓𑁆𑀔𑀼𑀁 𑀭𑀫𑁂𑀦𑁆𑀢𑀺 𑀩𑁆𑀭𑀽𑀳𑁂𑀦𑁆𑀢𑀺, 𑀫𑀦𑀸𑀧𑀺𑀓𑀫𑀦𑀸𑀧𑀺𑀓𑀕𑀻𑀢𑀯𑀸𑀤𑀺𑀢𑀩𑀳𑀼𑀯𑀺𑀥𑀲𑀼𑀪𑀦𑀺𑀫𑀺𑀢𑁆𑀢𑁂𑀦 𑀲𑀤𑁆𑀤𑁂𑀦 𑀲𑁄𑀢𑀁 𑀭𑀫𑁂𑀦𑁆𑀢𑀺 𑀩𑁆𑀭𑀽𑀳𑁂𑀦𑁆𑀢𑀺, 𑀫𑀦𑀸𑀧𑀺𑀓𑀫𑀦𑀸𑀧𑀺𑀓𑀧𑀼𑀧𑁆𑀨𑀨𑀮𑀧𑀢𑁆𑀢𑀢𑀘𑀫𑀽𑀮𑀲𑀸𑀭𑀩𑀳𑀼𑀯𑀺𑀥𑀲𑀼𑀪𑀦𑀺𑀫𑀺𑀢𑁆𑀢𑁂𑀦 𑀕𑀦𑁆𑀥𑁂𑀦 𑀖𑀸𑀦𑀁 𑀭𑀫𑁂𑀦𑁆𑀢𑀺 𑀩𑁆𑀭𑀽𑀳𑁂𑀦𑁆𑀢𑀺, 𑀫𑀦𑀸𑀧𑀺𑀓𑀫𑀦𑀸𑀧𑀺𑀓𑀔𑀚𑁆𑀚𑀪𑁄𑀚𑁆𑀚𑀮𑁂𑀬𑁆𑀬𑀧𑁂𑀬𑁆𑀬𑀲𑀸𑀬𑀦𑀻𑀬𑀩𑀳𑀼𑀯𑀺𑀥𑀲𑀼𑀪𑀦𑀺𑀫𑀺𑀢𑁆𑀢𑁂𑀦 𑀭𑀲𑁂𑀦 𑀚𑀺𑀯𑁆𑀳𑀁 𑀭𑀫𑁂𑀦𑁆𑀢𑀺 𑀩𑁆𑀭𑀼𑀳𑁂𑀦𑁆𑀢𑀺, 𑀫𑀦𑀸𑀧𑀺𑀓𑀫𑀦𑀸𑀧𑀺𑀓𑀲𑀡𑁆𑀳𑀲𑀼𑀔𑀼𑀫𑀫𑀼𑀤𑀼𑀫𑀤𑁆𑀤𑀯𑀩𑀳𑀼𑀯𑀺𑀥𑀲𑀼𑀪𑀦𑀺𑀫𑀺𑀢𑁆𑀢𑁂𑀦 𑀨𑀲𑁆𑀲𑁂𑀦 𑀓𑀸𑀬𑀁 𑀭𑀫𑁂𑀦𑁆𑀢𑀺 𑀩𑁆𑀭𑀽𑀳𑁂𑀦𑁆𑀢𑀺, 𑀫𑀦𑀸𑀧𑀺𑀓𑀫𑀦𑀸𑀧𑀺𑀓𑀓𑀮𑁆𑀬𑀸𑀡𑀧𑀸𑀧𑀓𑀲𑀼𑀪𑀸𑀲𑀼𑀪𑀩𑀳𑀼𑀯𑀺𑀥𑀯𑀺𑀢𑀓𑁆𑀓𑀫𑀦𑀲𑀺𑀓𑀸𑀭𑁂𑀦 𑀫𑀦𑀁 𑀭𑀫𑁂𑀦𑁆𑀢𑀺 𑀩𑁆𑀭𑀽𑀳𑁂𑀦𑁆𑀢𑀺. 𑀢𑀼𑀫𑁆𑀳𑁂 𑀢𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀫𑀦𑁄𑀩𑁆𑀭𑀽𑀳𑀦𑀁 𑀳𑀦𑀣 𑀉𑀧𑀳𑀦𑀣, 𑀙𑀺𑀦𑁆𑀤𑀣 𑀉𑀧𑀘𑁆𑀙𑀺𑀦𑁆𑀤𑀣, 𑀭𑀼𑀦𑁆𑀥𑀣 𑀉𑀧𑀭𑀼𑀦𑁆𑀥𑀣. 𑀢𑁂𑀦 𑀓𑀸𑀬𑁄𑀧𑀺 𑀧𑀭𑀺𑀢𑀧𑀢𑀺, 𑀘𑀺𑀢𑁆𑀢𑀫𑁆𑀧𑀺 𑀧𑀭𑀺𑀢𑀧𑀢𑀺, 𑀓𑀸𑀬𑁂 𑀧𑀭𑀺𑀢𑀢𑁆𑀢𑁂 𑀓𑀸𑀬𑀺𑀓𑀤𑀼𑀓𑁆𑀔𑀯𑁂𑀤𑀦𑀁 𑀯𑁂𑀤𑀺𑀬𑀢𑀺, 𑀘𑀺𑀢𑁆𑀢𑁂 𑀧𑀭𑀺𑀢𑀢𑁆𑀢𑁂 𑀘𑁂𑀢𑀲𑀺𑀓𑀤𑀼𑀓𑁆𑀔𑀯𑁂𑀤𑀦𑀁 𑀯𑁂𑀤𑀬𑀢𑀺. 𑀦𑀦𑀼 𑀫𑀸𑀕𑀡𑁆𑀟𑀺𑀬𑁄𑀧𑀺 [𑀫𑀸𑀕𑀦𑁆𑀤𑀺𑀬𑁄𑀧𑀺 (𑀲𑀻. 𑀧𑀻.)] 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀕𑀭𑀳𑀫𑀸𑀦𑁄 𑀏𑀯𑀫𑀸𑀳 ‘𑀪𑀽𑀦𑀳𑀼 [𑀪𑀽𑀢𑀳𑀘𑁆𑀘𑁄 (𑀧𑀻.), 𑀪𑀽𑀦𑀳𑀘𑁆𑀘𑁄 (𑀓.)] 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀇𑀤𑀫𑁂𑀢𑁆𑀣 𑀓𑀸𑀭𑀡𑀁, 𑀬𑁂𑀦𑀸𑀳𑀁 𑀓𑀸𑀭𑀡𑁂𑀦 𑀩𑁆𑀭𑀽𑀫𑀺 ‘𑀦𑀺𑀩𑁆𑀩𑀸𑀦𑀁 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲’’’𑀦𑁆𑀢𑀺.

‘‘𑀦 𑀳𑀺, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲𑀁, 𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁. 𑀬𑀁 𑀧𑀦 𑀢𑁆𑀯𑀁, 𑀫𑀳𑀸𑀭𑀸𑀚, 𑀩𑁆𑀭𑀽𑀲𑀺 ‘𑀦𑀺𑀩𑁆𑀩𑀸𑀦𑀁 𑀤𑀼𑀓𑁆𑀔’𑀦𑁆𑀢𑀺, 𑀦𑁂𑀢𑀁 𑀤𑀼𑀓𑁆𑀔𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫, 𑀦𑀺𑀩𑁆𑀩𑀸𑀦𑀲𑁆𑀲 𑀧𑀦 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀼𑀩𑁆𑀩𑀪𑀸𑀕𑁄 𑀏𑀲𑁄, 𑀦𑀺𑀩𑁆𑀩𑀸𑀦𑀧𑀭𑀺𑀬𑁂𑀲𑀦𑀁 𑀏𑀢𑀁, 𑀏𑀓𑀦𑁆𑀢𑀲𑀼𑀔𑀁 𑀬𑁂𑀯, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁, 𑀦 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲𑀁. 𑀏𑀢𑁆𑀣 𑀓𑀸𑀭𑀡𑀁 𑀯𑀤𑀸𑀫𑀺. 𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀭𑀸𑀚𑀽𑀦𑀁 𑀭𑀚𑁆𑀚𑀲𑀼𑀔𑀁 𑀦𑀸𑀫𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀢𑁆𑀣𑀺 𑀭𑀸𑀚𑀽𑀦𑀁 𑀭𑀚𑁆𑀚𑀲𑀼𑀔’’𑀦𑁆𑀢𑀺. ‘‘𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀭𑀚𑁆𑀚𑀲𑀼𑀔𑀁 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁂, 𑀫𑀳𑀸𑀭𑀸𑀚, 𑀭𑀸𑀚𑀸𑀦𑁄 𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀢𑁂𑀲𑀁 𑀧𑀘𑁆𑀘𑀦𑁆𑀢𑀦𑀺𑀲𑁆𑀲𑀺𑀢𑀸𑀦𑀁 𑀧𑀝𑀺𑀲𑁂𑀥𑀸𑀬 𑀅𑀫𑀘𑁆𑀘𑁂𑀳𑀺 𑀧𑀭𑀺𑀡𑀸𑀬𑀓𑁂𑀳𑀺 𑀪𑀝𑁂𑀳𑀺 𑀩𑀮𑀢𑁆𑀣𑁂𑀳𑀺 𑀧𑀭𑀺𑀯𑀼𑀢𑀸 𑀧𑀯𑀸𑀲𑀁 𑀕𑀦𑁆𑀢𑁆𑀯𑀸 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀧𑀝𑀺𑀧𑀻𑀴𑀺𑀢𑀸 𑀲𑀫𑀯𑀺𑀲𑀫𑁂 𑀧𑀭𑀺𑀥𑀸𑀯𑀦𑁆𑀢𑀺, 𑀫𑀳𑀸𑀬𑀼𑀤𑁆𑀥𑀜𑁆𑀘 𑀓𑀭𑁄𑀦𑁆𑀢𑀺, 𑀚𑀻𑀯𑀺𑀢𑀲𑀁𑀲𑀬𑀜𑁆𑀘 𑀧𑀸𑀧𑀼𑀡𑀦𑁆𑀢𑀻’’𑀢𑀺? ‘‘𑀦𑁂𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀭𑀚𑁆𑀚𑀲𑀼𑀔𑀁 𑀦𑀸𑀫, 𑀭𑀚𑁆𑀚𑀲𑀼𑀔𑀲𑁆𑀲 𑀧𑀭𑀺𑀬𑁂𑀲𑀦𑀸𑀬 𑀧𑀼𑀩𑁆𑀩𑀪𑀸𑀕𑁄 𑀏𑀲𑁄, 𑀤𑀼𑀓𑁆𑀔𑁂𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀭𑀸𑀚𑀸𑀦𑁄 𑀭𑀚𑁆𑀚𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀭𑀚𑁆𑀚𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀏𑀯𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀭𑀚𑁆𑀚𑀲𑀼𑀔𑀁 𑀤𑀼𑀓𑁆𑀔𑁂𑀦 𑀅𑀫𑀺𑀲𑁆𑀲𑀁, 𑀅𑀜𑁆𑀜𑀁 𑀢𑀁 𑀭𑀚𑁆𑀚𑀲𑀼𑀔𑀁, 𑀅𑀜𑁆𑀜𑀁 𑀤𑀼𑀓𑁆𑀔’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁, 𑀦 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲𑀁. 𑀬𑁂 𑀧𑀦 𑀢𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀢𑁂 𑀓𑀸𑀬𑀜𑁆𑀘 𑀘𑀺𑀢𑁆𑀢𑀜𑁆𑀘 𑀆𑀢𑀸𑀧𑁂𑀢𑁆𑀯𑀸 𑀞𑀸𑀦𑀘𑀗𑁆𑀓𑀫𑀦𑀺𑀲𑀚𑁆𑀚𑀸𑀲𑀬𑀦𑀸𑀳𑀸𑀭𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀫𑀺𑀤𑁆𑀥𑀁 𑀉𑀧𑀭𑀼𑀦𑁆𑀥𑀺𑀢𑁆𑀯𑀸 𑀆𑀬𑀢𑀦𑀸𑀦𑀺 𑀧𑀝𑀺𑀧𑀻𑀴𑁂𑀢𑁆𑀯𑀸 𑀓𑀸𑀬𑀜𑁆𑀘 𑀚𑀻𑀯𑀺𑀢𑀜𑁆𑀘 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀼𑀓𑁆𑀔𑁂𑀦 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀪𑀯𑀦𑁆𑀢𑀺, 𑀦𑀺𑀳𑀢𑀧𑀘𑁆𑀘𑀸𑀫𑀺𑀢𑁆𑀢𑀸 𑀯𑀺𑀬 𑀭𑀸𑀚𑀸𑀦𑁄 𑀭𑀚𑁆𑀚𑀲𑀼𑀔𑀁. 𑀏𑀯𑀁, 𑀫𑀳𑀸𑀭𑀸𑀚, 𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁, 𑀦 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲𑀁, 𑀅𑀜𑁆𑀜𑀁 𑀦𑀺𑀩𑁆𑀩𑀸𑀦𑀁, 𑀅𑀜𑁆𑀜𑀁 𑀤𑀼𑀓𑁆𑀔𑀦𑁆𑀢𑀺.

‘‘𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺 𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁, 𑀦 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲𑀁, 𑀅𑀜𑁆𑀜𑀁 𑀤𑀼𑀓𑁆𑀔𑀁, 𑀅𑀜𑁆𑀜𑀁 𑀦𑀺𑀩𑁆𑀩𑀸𑀦𑀦𑁆𑀢𑀺. 𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀆𑀘𑀭𑀺𑀬𑀸𑀦𑀁 𑀲𑀺𑀧𑁆𑀧𑀯𑀦𑁆𑀢𑀸𑀦𑀁 𑀲𑀺𑀧𑁆𑀧𑀲𑀼𑀔𑀁 𑀦𑀸𑀫𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀢𑁆𑀣𑀺 𑀆𑀘𑀭𑀺𑀬𑀸𑀦𑀁 𑀲𑀺𑀧𑁆𑀧𑀯𑀦𑁆𑀢𑀸𑀦𑀁 𑀲𑀺𑀧𑁆𑀧𑀲𑀼𑀔’’𑀦𑁆𑀢𑀺. ‘‘𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀲𑀺𑀧𑁆𑀧𑀲𑀼𑀔𑀁 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁂, 𑀫𑀳𑀸𑀭𑀸𑀚, 𑀆𑀘𑀭𑀺𑀬𑀸 [𑀇𑀤𑀁 𑀧𑀤𑀁 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀆𑀘𑀭𑀺𑀬𑀸𑀦𑀁 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑁂𑀦 𑀉𑀤𑀓𑀸𑀳𑀭𑀡𑀖𑀭𑀲𑀫𑁆𑀫𑀚𑁆𑀚𑀦𑀤𑀦𑁆𑀢𑀓𑀝𑁆𑀞𑀫𑀼𑀔𑁄𑀤𑀓𑀸𑀦𑀼𑀧𑁆𑀧𑀤𑀸𑀦𑁂𑀦 𑀉𑀘𑁆𑀙𑀺𑀝𑁆𑀞𑀧𑀝𑀺𑀕𑁆𑀕𑀳𑀡𑀉𑀘𑁆𑀙𑀸𑀤𑀦𑀦𑀳𑀸𑀧𑀦𑀧𑀸𑀤𑀧𑀭𑀺𑀓𑀫𑁆𑀫𑁂𑀦 𑀲𑀓𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀘𑀺𑀢𑁆𑀢𑀸𑀦𑀼𑀯𑀢𑁆𑀢𑀦𑁂𑀦 𑀤𑀼𑀓𑁆𑀔𑀲𑁂𑀬𑁆𑀬𑀸𑀬 𑀯𑀺𑀲𑀫𑀪𑁄𑀚𑀦𑁂𑀦 𑀓𑀸𑀬𑀁 𑀆𑀢𑀸𑀧𑁂𑀦𑁆𑀢𑀻’’𑀢𑀺? ‘‘𑀦𑁂𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀺𑀧𑁆𑀧𑀲𑀼𑀔𑀁 𑀦𑀸𑀫, 𑀲𑀺𑀧𑁆𑀧𑀧𑀭𑀺𑀬𑁂𑀲𑀦𑀸𑀬 𑀧𑀼𑀩𑁆𑀩𑀪𑀸𑀕𑁄 𑀏𑀲𑁄, 𑀤𑀼𑀓𑁆𑀔𑁂𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀆𑀘𑀭𑀺𑀬𑀸 𑀲𑀺𑀧𑁆𑀧𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀺𑀧𑁆𑀧𑀲𑀼𑀔𑀁 𑀅𑀦𑀼𑀪𑀯𑀦𑁆𑀢𑀺, 𑀏𑀯𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀺𑀧𑁆𑀧𑀲𑀼𑀔𑀁 𑀤𑀼𑀓𑁆𑀔𑁂𑀦 𑀅𑀫𑀺𑀲𑁆𑀲𑀁, 𑀅𑀜𑁆𑀜𑀁 𑀢𑀁 𑀲𑀺𑀧𑁆𑀧𑀲𑀼𑀔𑀁, 𑀅𑀜𑁆𑀜𑀁 𑀤𑀼𑀓𑁆𑀔’’𑀦𑁆𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁, 𑀦 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲𑀁. 𑀬𑁂 𑀧𑀦 𑀢𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀢𑁂 𑀓𑀸𑀬𑀜𑁆𑀘 𑀘𑀺𑀢𑁆𑀢𑀜𑁆𑀘 𑀆𑀢𑀸𑀧𑁂𑀢𑁆𑀯𑀸 𑀞𑀸𑀦𑀘𑀗𑁆𑀓𑀫𑀦𑀺𑀲𑀚𑁆𑀚𑀸𑀲𑀬𑀦𑀸𑀳𑀸𑀭𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀫𑀺𑀤𑁆𑀥𑀁 𑀉𑀧𑀭𑀼𑀦𑁆𑀥𑀺𑀢𑁆𑀯𑀸 𑀆𑀬𑀢𑀦𑀸𑀦𑀺 𑀧𑀝𑀺𑀧𑀻𑀴𑁂𑀢𑁆𑀯𑀸 𑀓𑀸𑀬𑀜𑁆𑀘 𑀚𑀻𑀯𑀺𑀢𑀜𑁆𑀘 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀼𑀓𑁆𑀔𑁂𑀦 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀪𑀯𑀦𑁆𑀢𑀺, 𑀆𑀘𑀭𑀺𑀬𑀸 𑀯𑀺𑀬 𑀲𑀺𑀧𑁆𑀧𑀲𑀼𑀔𑀁. 𑀏𑀯𑀁, 𑀫𑀳𑀸𑀭𑀸𑀚, 𑀏𑀓𑀦𑁆𑀢𑀲𑀼𑀔𑀁 𑀦𑀺𑀩𑁆𑀩𑀸𑀦𑀁, 𑀦 𑀤𑀼𑀓𑁆𑀔𑁂𑀦 𑀫𑀺𑀲𑁆𑀲𑀁, 𑀅𑀜𑁆𑀜𑀁 𑀤𑀼𑀓𑁆𑀔𑀁, 𑀅𑀜𑁆𑀜𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀏𑀓𑀦𑁆𑀢𑀲𑀼𑀔𑀦𑀺𑀩𑁆𑀩𑀸𑀦𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀦𑀺𑀩𑁆𑀩𑀸𑀦𑀭𑀽𑀧𑀲𑀡𑁆𑀞𑀸𑀦𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀲𑀓𑁆𑀓𑀸 𑀧𑀦 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼’’𑀦𑁆𑀢𑀺? ‘‘𑀅𑀧𑁆𑀧𑀝𑀺𑀪𑀸𑀕𑀁, 𑀫𑀳𑀸𑀭𑀸𑀚, 𑀦𑀺𑀩𑁆𑀩𑀸𑀦𑀁, 𑀦 𑀲𑀓𑁆𑀓𑀸 𑀦𑀺𑀩𑁆𑀩𑀸𑀦𑀲𑁆𑀲 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀉𑀧𑀤𑀲𑁆𑀲𑀬𑀺𑀢𑀼’’𑀦𑁆𑀢𑀺. ‘‘𑀏𑀢𑀫𑁆𑀧𑀸𑀳𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀦 𑀲𑀫𑁆𑀧𑀝𑀺𑀘𑁆𑀙𑀸𑀫𑀺, 𑀬𑀁 𑀅𑀢𑁆𑀣𑀺𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀭𑀽𑀧𑀁 𑀯𑀸 𑀲𑀡𑁆𑀞𑀸𑀦𑀁 𑀯𑀸 𑀯𑀬𑀁 𑀯𑀸 𑀧𑀫𑀸𑀡𑀁 𑀯𑀸 𑀑𑀧𑀫𑁆𑀫𑁂𑀦 𑀯𑀸 𑀓𑀸𑀭𑀡𑁂𑀦 𑀯𑀸 𑀳𑁂𑀢𑀼𑀦𑀸 𑀯𑀸 𑀦𑀬𑁂𑀦 𑀯𑀸 𑀅𑀧𑀜𑁆𑀜𑀸𑀧𑀦𑀁, 𑀓𑀸𑀭𑀡𑁂𑀦 𑀫𑀁 𑀲𑀜𑁆𑀜𑀸𑀧𑁂𑀳𑀻’’𑀢𑀺. ‘‘𑀳𑁄𑀢𑀼, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀢𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀺. 𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀦𑀸𑀫𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀅𑀢𑁆𑀣𑁂𑀲𑁄 𑀫𑀳𑀸𑀲𑀫𑀼𑀤𑁆𑀤𑁄’’𑀢𑀺. ‘‘𑀲𑀘𑁂 𑀢𑀁, 𑀫𑀳𑀸𑀭𑀸𑀚, 𑀓𑁄𑀘𑀺 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 ‘𑀓𑀺𑀢𑁆𑀢𑀓𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁, 𑀓𑀢𑀺 𑀧𑀦 𑀢𑁂 𑀲𑀢𑁆𑀢𑀸, 𑀬𑁂 𑀫𑀳𑀸𑀲𑀫𑀼𑀤𑁆𑀤𑁂 𑀧𑀝𑀺𑀯𑀲𑀦𑁆𑀢𑀻’𑀢𑀺, 𑀏𑀯𑀁 𑀧𑀼𑀝𑁆𑀞𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀓𑀺𑀦𑁆𑀢𑀺 𑀢𑀲𑁆𑀲 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺? ‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀓𑁄𑀘𑀺 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬 ‘𑀓𑀺𑀢𑁆𑀢𑀓𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁, 𑀓𑀢𑀺 𑀧𑀦 𑀢𑁂 𑀲𑀢𑁆𑀢𑀸, 𑀬𑁂 𑀫𑀳𑀸𑀲𑀫𑀼𑀤𑁆𑀤𑁂 𑀧𑀝𑀺𑀯𑀲𑀦𑁆𑀢𑀻’𑀢𑀺, 𑀢𑀫𑀳𑀁, 𑀪𑀦𑁆𑀢𑁂, 𑀏𑀯𑀁 𑀯𑀤𑁂𑀬𑁆𑀬𑀁 ‘𑀅𑀧𑀼𑀘𑁆𑀙𑀺𑀢𑀩𑁆𑀩𑀁 𑀫𑀁 𑀢𑁆𑀯𑀁 𑀅𑀫𑁆𑀪𑁄 𑀧𑀼𑀭𑀺𑀲 𑀧𑀼𑀘𑁆𑀙𑀲𑀺, 𑀦𑁂𑀲𑀸 𑀧𑀼𑀘𑁆𑀙𑀸 𑀓𑁂𑀦𑀘𑀺 𑀧𑀼𑀘𑁆𑀙𑀺𑀢𑀩𑁆𑀩𑀸, 𑀞𑀧𑀦𑀻𑀬𑁄 𑀏𑀲𑁄 𑀧𑀜𑁆𑀳𑁄. 𑀅𑀯𑀺𑀪𑀢𑁆𑀢𑁄 𑀮𑁄𑀓𑀓𑁆𑀔𑀸𑀬𑀺𑀓𑁂𑀳𑀺 𑀫𑀳𑀸𑀲𑀫𑀼𑀤𑁆𑀤𑁄, 𑀦 𑀲𑀓𑁆𑀓𑀸 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀧𑀭𑀺𑀫𑀺𑀦𑀺𑀢𑀼𑀁 𑀲𑀢𑁆𑀢𑀸 𑀯𑀸 𑀬𑁂 𑀢𑀢𑁆𑀣 𑀯𑀸𑀲𑀫𑀼𑀧𑀕𑀢𑀸𑀢𑀺 𑀏𑀯𑀸𑀳𑀁 𑀪𑀦𑁆𑀢𑁂 𑀢𑀲𑁆𑀲 𑀧𑀝𑀺𑀯𑀘𑀦𑀁 𑀤𑀤𑁂𑀬𑁆𑀬’’’𑀦𑁆𑀢𑀺.