𑁪𑁩𑁮. 𑀤𑀤𑁆𑀤𑀭𑀚𑀸𑀢𑀓𑀁 (𑁧𑁨)

𑁧𑁦𑁫. 𑀬𑁄 𑀢𑁂 𑀧𑀼𑀢𑁆𑀢𑀓𑁂 𑀅𑀔𑀸𑀤𑀺, 𑀤𑀺𑀦𑁆𑀦𑀪𑀢𑁆𑀢𑁄 𑀅𑀤𑀽𑀲𑀓𑁂;

𑀢𑀲𑁆𑀫𑀺𑀁 𑀤𑀸𑀞𑀁 𑀦𑀺𑀧𑀸𑀢𑁂𑀳𑀺, 𑀫𑀸 𑀢𑁂 𑀫𑀼𑀘𑁆𑀘𑀺𑀢𑁆𑀣 𑀚𑀻𑀯𑀢𑁄.

𑁧𑁦𑁬. 𑀆𑀓𑀺𑀡𑁆𑀡𑀮𑀼𑀤𑁆𑀤𑁄 𑀧𑀼𑀭𑀺𑀲𑁄, 𑀥𑀸𑀢𑀺𑀘𑁂𑀮𑀁𑀯 𑀫𑀓𑁆𑀔𑀺𑀢𑁄;

𑀧𑀤𑁂𑀲𑀁 𑀢𑀁 𑀦 𑀧𑀲𑁆𑀲𑀸𑀫𑀺, 𑀬𑀢𑁆𑀣 𑀤𑀸𑀞𑀁 𑀦𑀺𑀧𑀸𑀢𑀬𑁂.

𑁧𑁦𑁭. 𑀅𑀓𑀢𑀜𑁆𑀜𑀼𑀲𑁆𑀲 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀯𑀺𑀯𑀭𑀤𑀲𑁆𑀲𑀺𑀦𑁄;

𑀲𑀩𑁆𑀩𑀁 𑀘𑁂 𑀧𑀣𑀯𑀺𑀁 𑀤𑀚𑁆𑀚𑀸, 𑀦𑁂𑀯 𑀦𑀁 𑀅𑀪𑀺𑀭𑀸𑀥𑀬𑁂.

𑁧𑁦𑁮. 𑀓𑀺𑀦𑁆𑀦𑀼 𑀲𑀼𑀩𑀸𑀳𑀼 𑀢𑀭𑀫𑀸𑀦𑀭𑀽𑀧𑁄, 𑀧𑀘𑁆𑀘𑀸𑀕𑀢𑁄𑀲𑀺 𑀲𑀳 𑀫𑀸𑀡𑀯𑁂𑀦;

𑀓𑀺𑀁 𑀓𑀺𑀘𑁆𑀘𑀫𑀢𑁆𑀣𑀁 𑀇𑀥𑀫𑀢𑁆𑀣𑀺 𑀢𑀼𑀬𑁆𑀳𑀁, 𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁.

𑁧𑁦𑁯. 𑀬𑁄 𑀢𑁂 𑀲𑀔𑀸 𑀤𑀤𑁆𑀤𑀭𑁄 𑀲𑀸𑀥𑀼𑀭𑀽𑀧𑁄, 𑀢𑀲𑁆𑀲 𑀯𑀥𑀁 𑀧𑀭𑀺𑀲𑀗𑁆𑀓𑀸𑀫𑀺 𑀅𑀚𑁆𑀚;

𑀧𑀼𑀭𑀺𑀲𑀲𑁆𑀲 𑀓𑀫𑁆𑀫𑀸𑀬𑀢𑀦𑀸𑀦𑀺 𑀲𑀼𑀢𑁆𑀯𑀸, 𑀦𑀸𑀳𑀁 𑀲𑀼𑀔𑀺𑀁 𑀤𑀤𑁆𑀤𑀭𑀁 𑀅𑀚𑁆𑀚 𑀫𑀜𑁆𑀜𑁂.

𑁧𑁧𑁦. 𑀓𑀸𑀦𑀺𑀲𑁆𑀲 𑀓𑀫𑁆𑀫𑀸𑀬𑀢𑀦𑀸𑀦𑀺 𑀅𑀲𑁆𑀲𑀼, 𑀧𑀼𑀭𑀺𑀲𑀲𑁆𑀲 𑀯𑀼𑀢𑁆𑀢𑀺𑀲𑀫𑁄𑀥𑀸𑀦𑀢𑀸𑀬;

𑀓𑀁 𑀯𑀸 𑀧𑀝𑀺𑀜𑁆𑀜𑀁 𑀧𑀼𑀭𑀺𑀲𑀲𑁆𑀲 𑀲𑀼𑀢𑁆𑀯𑀸, 𑀧𑀭𑀺𑀲𑀗𑁆𑀓𑀲𑀺 𑀤𑀤𑁆𑀤𑀭𑀁 𑀫𑀸𑀡𑀯𑁂𑀦.

𑁧𑁧𑁧. 𑀘𑀺𑀡𑁆𑀡𑀸 𑀓𑀮𑀺𑀗𑁆𑀕𑀸 𑀘𑀭𑀺𑀢𑀸 𑀯𑀡𑀺𑀚𑁆𑀚𑀸, 𑀯𑁂𑀢𑁆𑀢𑀸𑀘𑀭𑁄 𑀲𑀗𑁆𑀓𑀼𑀧𑀣𑁄𑀧𑀺 𑀘𑀺𑀡𑁆𑀡𑁄;

𑀦𑀝𑁂𑀳𑀺 𑀘𑀺𑀡𑁆𑀡𑀁 𑀲𑀳 𑀯𑀸𑀓𑀼𑀭𑁂𑀳𑀺 [𑀯𑀸𑀓𑀭𑁂𑀳𑀺 (𑀧𑀻. 𑀲𑀻. 𑀦𑀺𑀬𑁆𑀬), 𑀯𑀸𑀕𑀼𑀭𑁂𑀳𑀺 (?)], 𑀤𑀡𑁆𑀟𑁂𑀦 𑀬𑀼𑀤𑁆𑀥𑀫𑁆𑀧𑀺 𑀲𑀫𑀚𑁆𑀚𑀫𑀚𑁆𑀛𑁂.

𑁧𑁧𑁨. 𑀩𑀤𑁆𑀥𑀸 𑀓𑀼𑀮𑀻𑀓𑀸 [𑀓𑀼𑀮𑀺𑀗𑁆𑀓𑀸 (𑀲𑀻. 𑀧𑀻.)] 𑀫𑀺𑀢𑀫𑀸𑀴𑁆𑀳𑀓𑁂𑀦, 𑀅𑀓𑁆𑀔𑀸 𑀚𑀺𑀢𑀸 [𑀅𑀓𑁆𑀔𑀸𑀘𑀺𑀢𑀸 (𑀲𑀻. 𑀅𑀝𑁆𑀞.)] 𑀲𑀁𑀬𑀫𑁄 𑀅𑀩𑁆𑀪𑀢𑀻𑀢𑁄;

𑀅𑀩𑁆𑀩𑀸𑀳𑀺𑀢𑀁 [𑀅𑀧𑁆𑀧𑀳𑀺𑀢𑀁 (𑀲𑀻. 𑀲𑁆𑀬𑀸.), 𑀅𑀩𑁆𑀩𑀽𑀳𑀺𑀢𑀁 (𑀧𑀻. 𑀲𑀻. 𑀦𑀺𑀬𑁆𑀬)] 𑀧𑀼𑀩𑁆𑀩𑀓𑀁 [𑀧𑀼𑀧𑁆𑀨𑀓𑀁 (𑀲𑀻. 𑀲𑁆𑀬𑀸.)] 𑀅𑀟𑁆𑀠𑀭𑀢𑁆𑀢𑀁, 𑀳𑀢𑁆𑀣𑀸 𑀤𑀟𑁆𑀠𑀸 𑀧𑀺𑀡𑁆𑀟𑀧𑀝𑀺𑀕𑁆𑀕𑀳𑁂𑀦.

𑁧𑁧𑁩. 𑀢𑀸𑀦𑀺𑀲𑁆𑀲 𑀓𑀫𑁆𑀫𑀸𑀬𑀢𑀦𑀸𑀦𑀺 𑀅𑀲𑁆𑀲𑀼, 𑀧𑀼𑀭𑀺𑀲𑀲𑁆𑀲 𑀯𑀼𑀢𑁆𑀢𑀺𑀲𑀫𑁄𑀥𑀸𑀦𑀢𑀸𑀬;

𑀬𑀣𑀸 𑀅𑀬𑀁 𑀤𑀺𑀲𑁆𑀲𑀢𑀺 𑀮𑁄𑀫𑀧𑀺𑀡𑁆𑀟𑁄, 𑀕𑀸𑀯𑁄 𑀳𑀢𑀸 𑀓𑀺𑀁 𑀧𑀦 𑀤𑀤𑁆𑀤𑀭𑀲𑁆𑀲𑀸𑀢𑀺.

𑀤𑀤𑁆𑀤𑀭𑀚𑀸𑀢𑀓𑀁 𑀤𑁆𑀯𑀸𑀤𑀲𑀫𑀁.

𑀦𑀯𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.