𑁯. 𑀦𑀯𑀓𑀦𑀺𑀧𑀸𑀢𑁄

𑁪𑁨𑁭. 𑀕𑀺𑀚𑁆𑀛𑀚𑀸𑀢𑀓𑀁 (𑁧)

𑁧. 𑀧𑀭𑀺𑀲𑀗𑁆𑀓𑀼𑀧𑀣𑁄 𑀦𑀸𑀫, 𑀕𑀺𑀚𑁆𑀛𑀧𑀦𑁆𑀣𑁄 𑀲𑀦𑀦𑁆𑀢𑀦𑁄;

𑀢𑀢𑁆𑀭𑀸𑀲𑀺 𑀫𑀸𑀢𑀸𑀧𑀺𑀢𑀭𑁄, 𑀕𑀺𑀚𑁆𑀛𑁄 𑀧𑁄𑀲𑁂𑀲𑀺 𑀚𑀺𑀡𑁆𑀡𑀓𑁂;

𑀢𑁂𑀲𑀁 𑀅𑀚𑀕𑀭𑀫𑁂𑀤𑀁, 𑀅𑀘𑁆𑀘𑀳𑀸𑀲𑀺 𑀩𑀳𑀼𑀢𑁆𑀢𑀲𑁄 [𑀧𑀳𑀼𑀢𑁆𑀢𑀢𑁄 (𑀓. 𑀲𑀻.), 𑀧𑀳𑀽𑀢𑀲𑁄 (𑀲𑁆𑀬𑀸. 𑀧𑀻.), 𑀩𑀳𑀼𑀥𑀲𑁄 (𑀓.)].

𑁨. 𑀧𑀺𑀢𑀸 𑀘 𑀧𑀼𑀢𑁆𑀢𑀁 𑀅𑀯𑀘, 𑀚𑀸𑀦𑀁 𑀉𑀘𑁆𑀘𑀁 𑀧𑀧𑀸𑀢𑀺𑀦𑀁;

𑀲𑀼𑀧𑀢𑁆𑀢𑀁 𑀣𑀸𑀫𑀲𑀫𑁆𑀧𑀦𑁆𑀦𑀁 [𑀧𑀓𑁆𑀔𑀲𑀫𑁆𑀧𑀦𑁆𑀦𑀁 (𑀲𑀻. 𑀲𑁆𑀬𑀸. 𑀧𑀻.)], 𑀢𑁂𑀚𑀲𑁆𑀲𑀺𑀁 𑀤𑀽𑀭𑀕𑀸𑀫𑀺𑀦𑀁.

𑁩. 𑀧𑀭𑀺𑀧𑁆𑀮𑀯𑀦𑁆𑀢𑀁 𑀧𑀣𑀯𑀺𑀁, 𑀬𑀤𑀸 𑀢𑀸𑀢 𑀯𑀺𑀚𑀸𑀦𑀳𑀺;

𑀲𑀸𑀕𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀘𑀓𑁆𑀓𑀁𑀯 𑀧𑀭𑀺𑀫𑀡𑁆𑀟𑀮𑀁;

𑀢𑀢𑁄 𑀢𑀸𑀢 𑀦𑀺𑀯𑀢𑁆𑀢𑀲𑁆𑀲𑀼, 𑀫𑀸𑀲𑁆𑀲𑀼 𑀏𑀢𑁆𑀢𑁄 𑀧𑀭𑀁 𑀕𑀫𑀺.

𑁪. 𑀉𑀤𑀧𑀢𑁆𑀢𑁄𑀲𑀺 [𑀉𑀤𑁆𑀥𑀁 𑀧𑀢𑁆𑀢𑁄𑀲𑀺 (𑀓. 𑀲𑀻.)] 𑀯𑁂𑀕𑁂𑀦, 𑀩𑀮𑀻 𑀧𑀓𑁆𑀔𑀻 𑀤𑀺𑀚𑀼𑀢𑁆𑀢𑀫𑁄;

𑀑𑀮𑁄𑀓𑀬𑀦𑁆𑀢𑁄 𑀯𑀓𑁆𑀓𑀗𑁆𑀕𑁄, 𑀧𑀩𑁆𑀩𑀢𑀸𑀦𑀺 𑀯𑀦𑀸𑀦𑀺 𑀘.

𑁫. 𑀅𑀤𑁆𑀤𑀲𑁆𑀲 𑀧𑀣𑀯𑀺𑀁 𑀕𑀺𑀚𑁆𑀛𑁄, 𑀬𑀣𑀸𑀲𑀸𑀲𑀺 [𑀬𑀣𑀸𑀲𑁆𑀲𑀸𑀲𑀺 (𑀲𑁆𑀬𑀸. 𑀅𑀝𑁆𑀞. 𑀧𑀸𑀞𑀦𑁆𑀢𑀭𑀁)] 𑀧𑀺𑀢𑀼𑀲𑁆𑀲𑀼𑀢𑀁;

𑀲𑀸𑀕𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀘𑀓𑁆𑀓𑀁𑀯 𑀧𑀭𑀺𑀫𑀡𑁆𑀟𑀮𑀁.

𑁬. 𑀢𑀜𑁆𑀘 𑀲𑁄 𑀲𑀫𑀢𑀺𑀓𑁆𑀓𑀫𑁆𑀫, 𑀧𑀭𑀫𑁂𑀯𑀘𑁆𑀘𑀯𑀢𑁆𑀢𑀣 [𑀧𑀭𑀫𑁂𑀯 𑀧𑀯𑀢𑁆𑀢𑀣 (𑀲𑀻. 𑀲𑁆𑀬𑀸.)];

𑀢𑀜𑁆𑀘 𑀯𑀸𑀢𑀲𑀺𑀔𑀸 𑀢𑀺𑀓𑁆𑀔𑀸, 𑀅𑀘𑁆𑀘𑀳𑀸𑀲𑀺 𑀩𑀮𑀺𑀁 𑀤𑀺𑀚𑀁.

𑁭. 𑀦𑀸𑀲𑀓𑁆𑀔𑀸𑀢𑀺𑀕𑀢𑁄 𑀧𑁄𑀲𑁄, 𑀧𑀼𑀦𑀤𑁂𑀯 𑀦𑀺𑀯𑀢𑁆𑀢𑀺𑀢𑀼𑀁;

𑀤𑀺𑀚𑁄 𑀩𑁆𑀬𑀲𑀦𑀫𑀸𑀧𑀸𑀤𑀺, 𑀯𑁂𑀭𑀫𑁆𑀪𑀸𑀦𑀁 [𑀯𑁂𑀭𑀫𑁆𑀩𑀸𑀦𑀁 (𑀲𑀻. 𑀧𑀻.)] 𑀯𑀲𑀁 𑀕𑀢𑁄.

𑁮. 𑀢𑀲𑁆𑀲 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘, 𑀬𑁂 𑀘𑀜𑁆𑀜𑁂 𑀅𑀦𑀼𑀚𑀻𑀯𑀺𑀦𑁄;

𑀲𑀩𑁆𑀩𑁂 𑀩𑁆𑀬𑀲𑀦𑀫𑀸𑀧𑀸𑀤𑀼𑀁, 𑀅𑀦𑁄𑀯𑀸𑀤𑀓𑀭𑁂 𑀤𑀺𑀚𑁂.

𑁯. 𑀏𑀯𑀫𑁆𑀧𑀺 𑀇𑀥 𑀯𑀼𑀟𑁆𑀠𑀸𑀦𑀁, 𑀬𑁄 𑀯𑀸𑀓𑁆𑀬𑀁 𑀦𑀸𑀯𑀩𑀼𑀚𑁆𑀛𑀢𑀺;

𑀅𑀢𑀺𑀲𑀻𑀫𑀘𑀭𑁄 𑀤𑀺𑀢𑁆𑀢𑁄, 𑀕𑀺𑀚𑁆𑀛𑁄𑀯𑀸𑀢𑀻𑀢𑀲𑀸𑀲𑀦𑁄;

𑀲 𑀯𑁂 𑀩𑁆𑀬𑀲𑀦𑀁 𑀧𑀧𑁆𑀧𑁄𑀢𑀺, 𑀅𑀓𑀢𑁆𑀯𑀸 𑀯𑀼𑀟𑁆𑀠𑀲𑀸𑀲𑀦𑀦𑁆𑀢𑀺.

𑀕𑀺𑀚𑁆𑀛𑀚𑀸𑀢𑀓𑀁 𑀧𑀞𑀫𑀁.

𑁪𑁨𑁮. 𑀓𑁄𑀲𑀫𑁆𑀩𑀺𑀬𑀚𑀸𑀢𑀓𑀁 (𑁨)

𑁧𑁦. 𑀧𑀼𑀣𑀼𑀲𑀤𑁆𑀤𑁄 𑀲𑀫𑀚𑀦𑁄, 𑀦 𑀩𑀸𑀮𑁄 𑀓𑁄𑀘𑀺 𑀫𑀜𑁆𑀜𑀣;

𑀲𑀗𑁆𑀖𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑀲𑁆𑀫𑀺𑀁, 𑀦𑀸𑀜𑁆𑀜𑀁 𑀪𑀺𑀬𑁆𑀬𑁄 𑀅𑀫𑀜𑁆𑀜𑀭𑀼𑀁.

𑁧𑁧. 𑀧𑀭𑀺𑀫𑀼𑀝𑁆𑀞𑀸 𑀧𑀡𑁆𑀟𑀺𑀢𑀸𑀪𑀸𑀲𑀸, 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄;

𑀬𑀸𑀯𑀺𑀘𑁆𑀙𑀦𑁆𑀢𑀺 𑀫𑀼𑀔𑀸𑀬𑀸𑀫𑀁, 𑀬𑁂𑀦 𑀦𑀻𑀢𑀸 𑀦 𑀢𑀁 𑀯𑀺𑀤𑀽.

𑁧𑁨. 𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀦 𑀲𑀫𑁆𑀫𑀢𑀺.

𑁧𑁩. 𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁, 𑀅𑀚𑀺𑀦𑀺 𑀫𑀁 𑀅𑀳𑀸𑀲𑀺 𑀫𑁂;

𑀬𑁂 𑀘 𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀽𑀧𑀲𑀫𑁆𑀫𑀢𑀺.

𑁧𑁪. 𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦𑀁;

𑀅𑀯𑁂𑀭𑁂𑀦 𑀘 𑀲𑀫𑁆𑀫𑀦𑁆𑀢𑀺, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄.

𑁧𑁫. 𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

𑁧𑁬. 𑀅𑀝𑁆𑀞𑀺𑀘𑁆𑀙𑀺𑀦𑁆𑀦𑀸 𑀧𑀸𑀡𑀳𑀭𑀸, 𑀕𑀯𑀲𑁆𑀲 [𑀕𑀯𑀸𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)] 𑀥𑀦𑀳𑀸𑀭𑀺𑀦𑁄;

𑀭𑀝𑁆𑀞𑀁 𑀯𑀺𑀮𑀼𑀫𑁆𑀧𑀫𑀸𑀦𑀸𑀦𑀁, 𑀢𑁂𑀲𑀫𑁆𑀧𑀺 𑀳𑁄𑀢𑀺 𑀲𑀗𑁆𑀕𑀢𑀺;

𑀓𑀲𑁆𑀫𑀸 𑀢𑀼𑀫𑁆𑀳𑀸𑀓 𑀦𑁄 𑀲𑀺𑀬𑀸.

𑁧𑁭. 𑀲𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺, 𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀻𑀫𑀸.

𑁧𑁮. 𑀦𑁄 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁, 𑀲𑀤𑁆𑀥𑀺𑀁𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬, 𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

𑁧𑁯. 𑀏𑀓𑀲𑁆𑀲 𑀘𑀭𑀺𑀢𑀁 𑀲𑁂𑀬𑁆𑀬𑁄, 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸;

𑀏𑀓𑁄 𑀘𑀭𑁂 𑀦 𑀧𑀸𑀧𑀸𑀦𑀺 𑀓𑀬𑀺𑀭𑀸, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄𑀢𑀺.

𑀓𑁄𑀲𑀫𑁆𑀩𑀺𑀬𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁪𑁨𑁯. 𑀫𑀳𑀸𑀲𑀼𑀯𑀚𑀸𑀢𑀓𑀁 (𑁩)

𑁨𑁦. 𑀤𑀼𑀫𑁄 𑀬𑀤𑀸 𑀳𑁄𑀢𑀺 𑀨𑀮𑀽𑀧𑀧𑀦𑁆𑀦𑁄, 𑀪𑀼𑀜𑁆𑀚𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸 [𑀯𑀺𑀳𑀕𑀸 (𑀲𑀻. 𑀧𑀻.)] 𑀲𑀫𑁆𑀧𑀢𑀦𑁆𑀢𑀸;

𑀔𑀻𑀡𑀦𑁆𑀢𑀺 𑀜𑀢𑁆𑀯𑀸𑀦 𑀤𑀼𑀫𑀁 𑀨𑀮𑀘𑁆𑀘𑀬𑁂 [𑀜𑀢𑁆𑀯𑀸 𑀤𑀼𑀫𑀧𑁆𑀨𑀮𑀘𑁆𑀘𑀬𑁂𑀦 (𑀓.)], 𑀤𑀺𑀲𑁄𑀤𑀺𑀲𑀁 𑀬𑀦𑁆𑀢𑀺 𑀢𑀢𑁄 𑀯𑀺𑀳𑀗𑁆𑀕𑀫𑀸.

𑁨𑁧. 𑀘𑀭 𑀘𑀸𑀭𑀺𑀓𑀁 𑀮𑁄𑀳𑀺𑀢𑀢𑀼𑀡𑁆𑀟 𑀫𑀸𑀫𑀭𑀺, 𑀓𑀺𑀁 𑀢𑁆𑀯𑀁 𑀲𑀼𑀯 𑀲𑀼𑀓𑁆𑀔𑀤𑀼𑀫𑀫𑁆𑀳𑀺 𑀛𑀸𑀬𑀲𑀺;

𑀢𑀤𑀺𑀗𑁆𑀖 𑀫𑀁 𑀩𑁆𑀭𑀽𑀳𑀺 𑀯𑀲𑀦𑁆𑀢𑀲𑀦𑁆𑀦𑀺𑀪, 𑀓𑀲𑁆𑀫𑀸 𑀲𑀼𑀯 𑀲𑀼𑀓𑁆𑀔𑀤𑀼𑀫𑀁 𑀦 𑀭𑀺𑀜𑁆𑀘𑀲𑀺.

𑁨𑁨. 𑀬𑁂 𑀯𑁂 𑀲𑀔𑀻𑀦𑀁 𑀲𑀔𑀸𑀭𑁄 𑀪𑀯𑀦𑁆𑀢𑀺, 𑀧𑀸𑀡𑀘𑁆𑀘𑀬𑁂 [𑀧𑀸𑀡𑀁 𑀘𑀚𑁂 (𑀓.), 𑀧𑀸𑀡𑀘𑁆𑀘𑀬𑁂 𑀫𑀭𑀡𑀓𑀸𑀮𑁂 𑀘 𑀲𑀼𑀔𑀤𑀼𑀓𑁆𑀔𑁂𑀲𑀼 𑀘 𑀦 𑀚𑀳𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄] 𑀤𑀼𑀓𑁆𑀔𑀲𑀼𑀔𑁂𑀲𑀼 𑀳𑀁𑀲;

𑀔𑀻𑀡𑀁 𑀅𑀔𑀻𑀡𑀦𑁆𑀢𑀺 𑀦 𑀢𑀁 𑀚𑀳𑀦𑁆𑀢𑀺, 𑀲𑀦𑁆𑀢𑁄 𑀲𑀢𑀁 𑀥𑀫𑁆𑀫𑀫𑀦𑀼𑀲𑁆𑀲𑀭𑀦𑁆𑀢𑀸.

𑁨𑁩. 𑀲𑁄𑀳𑀁 𑀲𑀢𑀁 𑀅𑀜𑁆𑀜𑀢𑀭𑁄𑀲𑁆𑀫𑀺 𑀳𑀁𑀲, 𑀜𑀸𑀢𑀻 𑀘 𑀫𑁂 𑀳𑁄𑀢𑀺 𑀲𑀔𑀸 𑀘 𑀭𑀼𑀓𑁆𑀔𑁄;

𑀢𑀁 𑀦𑀼𑀲𑁆𑀲𑀳𑁂 𑀚𑀻𑀯𑀺𑀓𑀢𑁆𑀣𑁄 𑀧𑀳𑀸𑀢𑀼𑀁, 𑀔𑀻𑀡𑀦𑁆𑀢𑀺 𑀜𑀢𑁆𑀯𑀸𑀦 𑀦 𑀳𑁂𑀲 𑀥𑀫𑁆𑀫𑁄 [𑀦 𑀲𑁄𑀲 (𑀓.), 𑀦 𑀏𑀲 (𑀲𑁆𑀬𑀸.)].

𑁨𑁪. 𑀲𑀸𑀥𑀼 𑀲𑀓𑁆𑀔𑀺 𑀓𑀢𑀁 𑀳𑁄𑀢𑀺, 𑀫𑁂𑀢𑁆𑀢𑀺 𑀲𑀁𑀲𑀢𑀺 𑀲𑀦𑁆𑀣𑀯𑁄 [𑀫𑀺𑀢𑁆𑀢𑀁 𑀲𑀗𑁆𑀕𑀢𑀺 𑀲𑀦𑁆𑀥𑀯𑁄 (𑀓.)];

𑀲𑀘𑁂𑀢𑀁 𑀥𑀫𑁆𑀫𑀁 𑀭𑁄𑀘𑁂𑀲𑀺, 𑀧𑀸𑀲𑀁𑀲𑁄𑀲𑀺 𑀯𑀺𑀚𑀸𑀦𑀢𑀁.

𑁨𑁫. 𑀲𑁄 𑀢𑁂 𑀲𑀼𑀯 𑀯𑀭𑀁 𑀤𑀫𑁆𑀫𑀺, 𑀧𑀢𑁆𑀢𑀬𑀸𑀦 𑀯𑀺𑀳𑀗𑁆𑀕𑀫;

𑀯𑀭𑀁 𑀯𑀭𑀲𑁆𑀲𑀼 𑀯𑀓𑁆𑀓𑀗𑁆𑀕, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁨𑁬. 𑀯𑀭𑀜𑁆𑀘 𑀫𑁂 𑀳𑀁𑀲 𑀪𑀯𑀁 𑀤𑀤𑁂𑀬𑁆𑀬, 𑀅𑀬𑀜𑁆𑀘 𑀭𑀼𑀓𑁆𑀔𑁄 𑀧𑀼𑀦𑀭𑀸𑀬𑀼𑀁 𑀮𑀪𑁂𑀣;

𑀲𑁄 𑀲𑀸𑀔𑀯𑀸 𑀨𑀮𑀺𑀫𑀸 𑀲𑀁𑀯𑀺𑀭𑀽𑀴𑁆𑀳𑁄, 𑀫𑀥𑀼𑀢𑁆𑀣𑀺𑀓𑁄 𑀢𑀺𑀝𑁆𑀞𑀢𑀼 𑀲𑁄𑀪𑀫𑀸𑀦𑁄.

𑁨𑁭. 𑀢𑀁 𑀧𑀲𑁆𑀲 𑀲𑀫𑁆𑀫 𑀨𑀮𑀺𑀫𑀁 𑀉𑀴𑀸𑀭𑀁, 𑀲𑀳𑀸𑀯 𑀢𑁂 𑀳𑁄𑀢𑀼 𑀉𑀤𑀼𑀫𑁆𑀩𑀭𑁂𑀦;

𑀲𑁄 𑀲𑀸𑀔𑀯𑀸 𑀨𑀮𑀺𑀫𑀸 𑀲𑀁𑀯𑀺𑀭𑀽𑀴𑁆𑀳𑁄, 𑀫𑀥𑀼𑀢𑁆𑀣𑀺𑀓𑁄 𑀢𑀺𑀝𑁆𑀞𑀢𑀼 𑀲𑁄𑀪𑀫𑀸𑀦𑁄.

𑁨𑁮. 𑀏𑀯𑀁 𑀲𑀓𑁆𑀓 𑀲𑀼𑀔𑀻 𑀳𑁄𑀳𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀬𑀣𑀸𑀳𑀫𑀚𑁆𑀚 𑀲𑀼𑀔𑀺𑀢𑁄, 𑀤𑀺𑀲𑁆𑀯𑀸𑀦 𑀲𑀨𑀮𑀁 𑀤𑀼𑀫𑀁.

𑁨𑁯. 𑀲𑀼𑀯𑀲𑁆𑀲 𑀘 𑀯𑀭𑀁 𑀤𑀢𑁆𑀯𑀸, 𑀓𑀢𑁆𑀯𑀸𑀦 𑀲𑀨𑀮𑀁 𑀤𑀼𑀫𑀁;

𑀧𑀓𑁆𑀓𑀸𑀫𑀺 𑀲𑀳 𑀪𑀭𑀺𑀬𑀸𑀬, 𑀤𑁂𑀯𑀸𑀦𑀁 𑀦𑀦𑁆𑀤𑀦𑀁 𑀯𑀦𑀦𑁆𑀢𑀺.

𑀫𑀳𑀸𑀲𑀼𑀯𑀚𑀸𑀢𑀓𑀁 𑀢𑀢𑀺𑀬𑀁.

𑁪𑁩𑁦. 𑀘𑀽𑀴𑀲𑀼𑀯𑀚𑀸𑀢𑀓𑀁 (𑁪)

𑁩𑁦. 𑀲𑀦𑁆𑀢𑀺 𑀭𑀼𑀓𑁆𑀔𑀸 𑀳𑀭𑀺𑀧𑀢𑁆𑀢𑀸 [𑀳𑀭𑀺𑀢𑀧𑀢𑁆𑀢𑀸 (𑀲𑀻. 𑀲𑁆𑀬𑀸. 𑀧𑀻.)], 𑀤𑀼𑀫𑀸 𑀦𑁂𑀓𑀨𑀮𑀸 𑀩𑀳𑀽;

𑀓𑀲𑁆𑀫𑀸 𑀦𑀼 𑀲𑀼𑀓𑁆𑀔𑁂 [𑀲𑀼𑀓𑁆𑀔 (𑀓.)] 𑀓𑁄𑀴𑀸𑀧𑁂, 𑀲𑀼𑀯𑀲𑁆𑀲 𑀦𑀺𑀭𑀢𑁄 𑀫𑀦𑁄.

𑁩𑁧. 𑀨𑀮𑀲𑁆𑀲 𑀉𑀧𑀪𑀼𑀜𑁆𑀚𑀺𑀫𑁆𑀳𑀸, 𑀦𑁂𑀓𑀯𑀲𑁆𑀲𑀕𑀡𑁂 𑀩𑀳𑀽;

𑀅𑀨𑀮𑀫𑁆𑀧𑀺 𑀯𑀺𑀤𑀺𑀢𑁆𑀯𑀸𑀦, 𑀲𑀸𑀯 𑀫𑁂𑀢𑁆𑀢𑀺 𑀬𑀣𑀸 𑀧𑀼𑀭𑁂.

𑁩𑁨. 𑀲𑀼𑀔𑀜𑁆𑀘 𑀭𑀼𑀓𑁆𑀔𑀁 𑀓𑁄𑀴𑀸𑀧𑀁, 𑀑𑀧𑀢𑁆𑀢𑀫𑀨𑀮𑀁 𑀤𑀼𑀫𑀁;

𑀑𑀳𑀸𑀬 𑀲𑀓𑀼𑀡𑀸 𑀬𑀦𑁆𑀢𑀺, 𑀓𑀺𑀁 𑀤𑁄𑀲𑀁 𑀧𑀲𑁆𑀲𑀲𑁂 𑀤𑀺𑀚.

𑁩𑁩. 𑀬𑁂 𑀨𑀮𑀢𑁆𑀣𑀸 𑀲𑀫𑁆𑀪𑀚𑀦𑁆𑀢𑀺, 𑀅𑀨𑀮𑁄𑀢𑀺 𑀚𑀳𑀦𑁆𑀢𑀺 𑀦𑀁;

𑀅𑀢𑁆𑀢𑀢𑁆𑀣𑀧𑀜𑁆𑀜𑀸 𑀤𑀼𑀫𑁆𑀫𑁂𑀥𑀸, 𑀢𑁂 𑀳𑁄𑀦𑁆𑀢𑀺 𑀧𑀓𑁆𑀔𑀧𑀸𑀢𑀺𑀦𑁄.

𑁩𑁪. 𑀲𑀸𑀥𑀼 𑀲𑀓𑁆𑀔𑀺 𑀓𑀢𑀁 𑀳𑁄𑀢𑀺, 𑀫𑁂𑀢𑁆𑀢𑀺 𑀲𑀁𑀲𑀢𑀺 𑀲𑀦𑁆𑀣𑀯𑁄;

𑀲𑀘𑁂𑀢𑀁 𑀥𑀫𑁆𑀫𑀁 𑀭𑁄𑀘𑁂𑀲𑀺, 𑀧𑀸𑀲𑀁𑀲𑁄𑀲𑀺 𑀯𑀺𑀚𑀸𑀦𑀢𑀁.

𑁩𑁫. 𑀲𑁄 𑀢𑁂 𑀲𑀼𑀯 𑀯𑀭𑀁 𑀤𑀫𑁆𑀫𑀺, 𑀧𑀢𑁆𑀢𑀬𑀸𑀦 𑀯𑀺𑀳𑀗𑁆𑀕𑀫;

𑀯𑀭𑀁 𑀯𑀭𑀲𑁆𑀲𑀼 𑀯𑀓𑁆𑀓𑀗𑁆𑀕, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁩𑁬. 𑀅𑀧𑀺 𑀦𑀸𑀫 𑀦𑀁 𑀧𑀲𑁆𑀲𑁂𑀬𑁆𑀬𑀁 [𑀅𑀧𑀺 𑀦𑀸𑀫 𑀦𑀁 𑀧𑀼𑀦 𑀧𑀲𑁆𑀲𑁂 (𑀲𑀻. 𑀲𑁆𑀬𑀸.)], 𑀲𑀧𑀢𑁆𑀢𑀁 𑀲𑀨𑀮𑀁 𑀤𑀼𑀫𑀁;

𑀤𑀮𑀺𑀤𑁆𑀤𑁄𑀯 𑀦𑀺𑀥𑀺 𑀮𑀤𑁆𑀥𑀸, 𑀦𑀦𑁆𑀤𑁂𑀬𑁆𑀬𑀸𑀳𑀁 𑀧𑀼𑀦𑀧𑁆𑀧𑀼𑀦𑀁.

𑁩𑁭. 𑀢𑀢𑁄 𑀅𑀫𑀢𑀫𑀸𑀤𑀸𑀬, 𑀅𑀪𑀺𑀲𑀺𑀜𑁆𑀘𑀺 𑀫𑀳𑀻𑀭𑀼𑀳𑀁;

𑀢𑀲𑁆𑀲 𑀲𑀸𑀔𑀸 𑀯𑀺𑀭𑀽𑀳𑀺𑀁𑀲𑀼 [𑀯𑀺𑀭𑀽𑀴𑁆𑀳𑀲𑁆𑀲 (𑀓.)], 𑀲𑀻𑀢𑀘𑁆𑀙𑀸𑀬𑀸 𑀫𑀦𑁄𑀭𑀫𑀸.

𑁩𑁮. 𑀏𑀯𑀁 𑀲𑀓𑁆𑀓 𑀲𑀼𑀔𑀻 𑀳𑁄𑀳𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀬𑀣𑀸𑀳𑀫𑀚𑁆𑀚 𑀲𑀼𑀔𑀺𑀢𑁄, 𑀤𑀺𑀲𑁆𑀯𑀸𑀦 𑀲𑀨𑀮𑀁 𑀤𑀼𑀫𑀁.

𑁩𑁯. 𑀲𑀼𑀯𑀲𑁆𑀲 𑀘 𑀯𑀭𑀁 𑀤𑀢𑁆𑀯𑀸, 𑀓𑀢𑁆𑀯𑀸𑀦 𑀲𑀨𑀮𑀁 𑀤𑀼𑀫𑀁;

𑀧𑀓𑁆𑀓𑀸𑀫𑀺 𑀲𑀳 𑀪𑀭𑀺𑀬𑀸𑀬, 𑀤𑁂𑀯𑀸𑀦𑀁 𑀦𑀦𑁆𑀤𑀦𑀁 𑀯𑀦𑀦𑁆𑀢𑀺.

𑀘𑀽𑀴𑀲𑀼𑀯𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁪𑁩𑁧. 𑀳𑀭𑀺𑀢𑀘𑀚𑀸𑀢𑀓𑀁 (𑁫)

𑁪𑁦. 𑀲𑀼𑀢𑀁 𑀫𑁂𑀢𑀁 𑀫𑀳𑀸𑀩𑁆𑀭𑀳𑁆𑀫𑁂, 𑀓𑀸𑀫𑁂 𑀪𑀼𑀜𑁆𑀚𑀢𑀺 𑀳𑀸𑀭𑀺𑀢𑁄;

𑀓𑀘𑁆𑀘𑁂𑀢𑀁 𑀯𑀘𑀦𑀁 𑀢𑀼𑀘𑁆𑀙𑀁, 𑀓𑀘𑁆𑀘𑀺 𑀲𑀼𑀤𑁆𑀥𑁄 𑀇𑀭𑀺𑀬𑁆𑀬𑀲𑀺.

𑁪𑁧. 𑀏𑀯𑀫𑁂𑀢𑀁 𑀫𑀳𑀸𑀭𑀸𑀚, 𑀬𑀣𑀸 𑀢𑁂 𑀯𑀘𑀦𑀁 𑀲𑀼𑀢𑀁;

𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄𑀲𑁆𑀫𑀺, 𑀫𑁄𑀳𑀦𑁂𑀬𑁆𑀬𑁂𑀲𑀼 𑀫𑀼𑀘𑁆𑀙𑀺𑀢𑁄.

𑁪𑁨. 𑀅𑀤𑀼 [𑀆𑀤𑀼 (𑀲𑀻. 𑀧𑀻.)] 𑀧𑀜𑁆𑀜𑀸 𑀓𑀺𑀫𑀢𑁆𑀣𑀺𑀬𑀸, 𑀦𑀺𑀧𑀼𑀡𑀸 𑀲𑀸𑀥𑀼𑀘𑀺𑀦𑁆𑀢𑀺𑀦𑀻 [𑀘𑀺𑀦𑁆𑀢𑀦𑀻 (𑀲𑀻. 𑀧𑀻.)];

𑀬𑀸𑀬 𑀉𑀧𑁆𑀧𑀢𑀺𑀢𑀁 𑀭𑀸𑀕𑀁, 𑀓𑀺𑀁 𑀫𑀦𑁄 𑀦 𑀯𑀺𑀦𑁄𑀤𑀬𑁂.

𑁪𑁩. 𑀘𑀢𑁆𑀢𑀸𑀭𑁄𑀫𑁂 𑀫𑀳𑀸𑀭𑀸𑀚, 𑀮𑁄𑀓𑁂 𑀅𑀢𑀺𑀩𑀮𑀸 𑀪𑀼𑀲𑀸;

𑀭𑀸𑀕𑁄 𑀤𑁄𑀲𑁄 𑀫𑀤𑁄 𑀫𑁄𑀳𑁄, 𑀬𑀢𑁆𑀣 𑀧𑀜𑁆𑀜𑀸 𑀦 𑀕𑀸𑀥𑀢𑀺.

𑁪𑁪. 𑀅𑀭𑀳𑀸 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀲𑀼𑀤𑁆𑀥𑁄 𑀘𑀭𑀢𑀺 𑀳𑀸𑀭𑀺𑀢𑁄;

𑀫𑁂𑀥𑀸𑀯𑀻 𑀧𑀡𑁆𑀟𑀺𑀢𑁄 𑀘𑁂𑀯, 𑀇𑀢𑀺 𑀦𑁄 𑀲𑀫𑁆𑀫𑀢𑁄 𑀪𑀯𑀁.

𑁪𑁫. 𑀫𑁂𑀥𑀸𑀯𑀻𑀦𑀫𑁆𑀧𑀺 𑀳𑀺𑀁𑀲𑀦𑁆𑀢𑀺, 𑀇𑀲𑀺𑀁 𑀥𑀫𑁆𑀫𑀕𑀼𑀡𑁂 𑀭𑀢𑀁;

𑀯𑀺𑀢𑀓𑁆𑀓𑀸 𑀧𑀸𑀧𑀓𑀸 𑀭𑀸𑀚, 𑀲𑀼𑀪𑀸 𑀭𑀸𑀕𑀽𑀧𑀲𑀁𑀳𑀺𑀢𑀸.

𑁪𑁬. 𑀉𑀧𑁆𑀧𑀦𑁆𑀦𑀸𑀬𑀁 𑀲𑀭𑀻𑀭𑀚𑁄, 𑀭𑀸𑀕𑁄 𑀯𑀡𑁆𑀡𑀯𑀺𑀤𑀽𑀲𑀦𑁄 𑀢𑀯;

𑀢𑀁 𑀧𑀚𑀳 𑀪𑀤𑁆𑀤𑀫𑀢𑁆𑀣𑀼 𑀢𑁂, 𑀩𑀳𑀼𑀦𑁆𑀦𑀸𑀲𑀺 𑀫𑁂𑀥𑀸𑀯𑀺𑀲𑀫𑁆𑀫𑀢𑁄.

𑁪𑁭. 𑀢𑁂 𑀅𑀦𑁆𑀥𑀓𑀸𑀭𑀓𑁂 [𑀓𑀭𑀡𑁂 (𑀲𑀻. 𑀲𑁆𑀬𑀸. 𑀧𑀻.)] 𑀓𑀸𑀫𑁂, 𑀩𑀳𑀼𑀤𑀼𑀓𑁆𑀔𑁂 𑀫𑀳𑀸𑀯𑀺𑀲𑁂;

𑀢𑁂𑀲𑀁 𑀫𑀽𑀮𑀁 𑀕𑀯𑁂𑀲𑀺𑀲𑁆𑀲𑀁, 𑀙𑁂𑀘𑁆𑀙𑀁 𑀭𑀸𑀕𑀁 𑀲𑀩𑀦𑁆𑀥𑀦𑀁.

𑁪𑁮. 𑀇𑀤𑀁 𑀯𑀢𑁆𑀯𑀸𑀦 𑀳𑀸𑀭𑀺𑀢𑁄, 𑀇𑀲𑀺 𑀲𑀘𑁆𑀘𑀧𑀭𑀓𑁆𑀓𑀫𑁄;

𑀓𑀸𑀫𑀭𑀸𑀕𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑀽𑀢𑀺.

𑀳𑀭𑀺𑀢𑀘𑀚𑀸𑀢𑀓𑀁 [𑀳𑀸𑀭𑀺𑀢𑀚𑀸𑀢𑀓𑀁 (𑀲𑀻. 𑀧𑀻.)] 𑀧𑀜𑁆𑀘𑀫𑀁.

𑁪𑁩𑁨. 𑀧𑀤𑀓𑀼𑀲𑀮𑀫𑀸𑀡𑀯𑀚𑀸𑀢𑀓𑀁 (𑁬)

𑁪𑁯. 𑀩𑀳𑀼𑀲𑁆𑀲𑀼𑀢𑀁 𑀘𑀺𑀢𑁆𑀢𑀓𑀣𑀺𑀁 [𑀘𑀺𑀢𑁆𑀢𑀓𑀣𑀁 (𑀲𑁆𑀬𑀸. 𑀓.)], 𑀕𑀗𑁆𑀕𑀸 𑀯𑀳𑀢𑀺 𑀧𑀸𑀝𑀮𑀺𑀁 [𑀧𑀸𑀝𑀮𑀁 (𑀲𑀻. 𑀧𑀻.)];

𑀯𑀼𑀬𑁆𑀳𑀫𑀸𑀦𑀓 𑀪𑀤𑁆𑀤𑀦𑁆𑀢𑁂, 𑀏𑀓𑀁 𑀫𑁂 𑀤𑁂𑀳𑀺 𑀕𑀸𑀣𑀓𑀁 [𑀕𑀻𑀢𑀓𑀁 (𑀓. 𑀅𑀝𑁆𑀞.)].

𑁫𑁦. 𑀬𑁂𑀦 𑀲𑀺𑀜𑁆𑀘𑀦𑁆𑀢𑀺 𑀤𑀼𑀓𑁆𑀔𑀺𑀢𑀁, 𑀬𑁂𑀦 𑀲𑀺𑀜𑁆𑀘𑀦𑁆𑀢𑀺 𑀆𑀢𑀼𑀭𑀁;

𑀢𑀲𑁆𑀲 𑀫𑀚𑁆𑀛𑁂 𑀫𑀭𑀺𑀲𑁆𑀲𑀸𑀫𑀺, 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀁.

𑁫𑁧. 𑀬𑀢𑁆𑀣 𑀩𑀻𑀚𑀸𑀦𑀺 𑀭𑀽𑀳𑀦𑁆𑀢𑀺, 𑀲𑀢𑁆𑀢𑀸 𑀬𑀢𑁆𑀣 𑀧𑀢𑀺𑀝𑁆𑀞𑀺𑀢𑀸;

𑀲𑀸 𑀫𑁂 𑀲𑀻𑀲𑀁 𑀦𑀺𑀧𑀻𑀴𑁂𑀢𑀺, 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀁.

𑁫𑁨. 𑀬𑁂𑀦 𑀪𑀢𑁆𑀢𑀸𑀦𑀺 𑀧𑀘𑁆𑀘𑀦𑁆𑀢𑀺, 𑀲𑀻𑀢𑀁 𑀬𑁂𑀦 𑀯𑀺𑀳𑀜𑁆𑀜𑀢𑀺;

𑀲𑁄 𑀫𑀁 𑀟𑀳𑀢𑀺 [𑀤𑀬𑁆𑀳𑀢𑀺 (𑀓.)] 𑀕𑀢𑁆𑀢𑀸𑀦𑀺, 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀁.

𑁫𑁩. 𑀬𑁂𑀦 𑀪𑀼𑀢𑁆𑀢𑁂𑀦 [𑀪𑀢𑁆𑀢𑁂𑀦 (𑀲𑁆𑀬𑀸. 𑀓.)] 𑀬𑀸𑀧𑁂𑀦𑁆𑀢𑀺, 𑀧𑀼𑀣𑀽 𑀩𑁆𑀭𑀸𑀳𑁆𑀫𑀡𑀔𑀢𑁆𑀢𑀺𑀬𑀸;

𑀲𑁄 𑀫𑀁 𑀪𑀼𑀢𑁆𑀢𑁄 𑀩𑁆𑀬𑀸𑀧𑀸𑀤𑁂𑀢𑀺, 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀁.

𑁫𑁪. 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂, 𑀯𑀸𑀢𑀫𑀺𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀲𑁄 𑀫𑀁 [𑀲𑁄 𑀫𑁂 (𑀲𑀻. 𑀧𑀻.)] 𑀪𑀜𑁆𑀚𑀢𑀺 𑀕𑀢𑁆𑀢𑀸𑀦𑀺, 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀁.

𑁫𑁫. 𑀬𑀁 𑀦𑀺𑀲𑁆𑀲𑀺𑀢𑀸 𑀚𑀕𑀢𑀺𑀭𑀼𑀳𑀁, 𑀲𑁆𑀯𑀸𑀬𑀁 𑀅𑀕𑁆𑀕𑀺𑀁 𑀧𑀫𑀼𑀜𑁆𑀘𑀢𑀺;

𑀤𑀺𑀲𑀸 𑀪𑀚𑀣 𑀯𑀓𑁆𑀓𑀗𑁆𑀕𑀸, 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀁.

𑁫𑁬. 𑀬𑀫𑀸𑀦𑀬𑀺𑀁 𑀲𑁄𑀫𑀦𑀲𑁆𑀲𑀁, 𑀫𑀸𑀮𑀺𑀦𑀺𑀁 𑀘𑀦𑁆𑀤𑀦𑀼𑀲𑁆𑀲𑀤𑀁;

𑀲𑀸 𑀫𑀁 𑀖𑀭𑀸 𑀦𑀺𑀘𑁆𑀙𑀼𑀪𑀢𑀺 [𑀦𑀻𑀳𑀭𑀢𑀺 (𑀲𑀻. 𑀲𑁆𑀬𑀸.)], 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀁.

𑁫𑁭. 𑀬𑁂𑀦 𑀚𑀸𑀢𑁂𑀦 𑀦𑀦𑁆𑀤𑀺𑀲𑁆𑀲𑀁, 𑀬𑀲𑁆𑀲 𑀘 𑀪𑀯𑀫𑀺𑀘𑁆𑀙𑀺𑀲𑀁;

𑀲𑁄 𑀫𑀁 𑀖𑀭𑀸 𑀦𑀺𑀘𑁆𑀙𑀼𑀪𑀢𑀺 [𑀦𑀻𑀳𑀭𑀢𑀺 (𑀲𑀻. 𑀲𑁆𑀬𑀸.)], 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀁.

𑁫𑁮. 𑀲𑀼𑀡𑀦𑁆𑀢𑀼 𑀫𑁂 𑀚𑀸𑀦𑀧𑀤𑀸, 𑀦𑁂𑀕𑀫𑀸 𑀘 𑀲𑀫𑀸𑀕𑀢𑀸;

𑀬𑀢𑁄𑀤𑀓𑀁 𑀢𑀤𑀸𑀤𑀺𑀢𑁆𑀢𑀁, 𑀬𑀢𑁄 𑀔𑁂𑀫𑀁 𑀢𑀢𑁄 𑀪𑀬𑀁.

𑁫𑁯. 𑀭𑀸𑀚𑀸 𑀯𑀺𑀮𑀼𑀫𑁆𑀧𑀢𑁂 𑀭𑀝𑁆𑀞𑀁, 𑀩𑁆𑀭𑀸𑀳𑁆𑀫𑀡𑁄 𑀘 𑀧𑀼𑀭𑁄𑀳𑀺𑀢𑁄;

𑀅𑀢𑁆𑀢𑀕𑀼𑀢𑁆𑀢𑀸 𑀯𑀺𑀳𑀭𑀣, 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀦𑁆𑀢𑀺.

𑀧𑀤𑀓𑀼𑀲𑀮𑀫𑀸𑀡𑀯𑀚𑀸𑀢𑀓𑀁 𑀙𑀝𑁆𑀞𑀁.

𑁪𑁩𑁩. 𑀮𑁄𑀫𑀲𑀓𑀲𑁆𑀲𑀧𑀚𑀸𑀢𑀓𑀁 (𑁭)

𑁬𑁦. 𑀅𑀲𑁆𑀲 𑀇𑀦𑁆𑀤𑀲𑀫𑁄 𑀭𑀸𑀚, 𑀅𑀘𑁆𑀘𑀦𑁆𑀢𑀁 𑀅𑀚𑀭𑀸𑀫𑀭𑁄;

𑀲𑀘𑁂 𑀢𑁆𑀯𑀁 𑀬𑀜𑁆𑀜𑀁 𑀬𑀸𑀚𑁂𑀬𑁆𑀬, 𑀇𑀲𑀺𑀁 𑀮𑁄𑀫𑀲𑀓𑀲𑁆𑀲𑀧𑀁.

𑁬𑁧. 𑀲𑀲𑀫𑀼𑀤𑁆𑀤𑀧𑀭𑀺𑀬𑀸𑀬𑀁, 𑀫𑀳𑀺𑀁 𑀲𑀸𑀕𑀭𑀓𑀼𑀡𑁆𑀟𑀮𑀁;

𑀦 𑀇𑀘𑁆𑀙𑁂 𑀲𑀳 𑀦𑀺𑀦𑁆𑀤𑀸𑀬, 𑀏𑀯𑀁 𑀲𑁂𑀬𑁆𑀬 [𑀲𑀬𑁆𑀳 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀚𑀸𑀦𑀳𑀺.

𑁬𑁨. 𑀥𑀺𑀭𑀢𑁆𑀣𑀼 𑀢𑀁 𑀬𑀲𑀮𑀸𑀪𑀁, 𑀥𑀦𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡;

𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸.

𑁬𑁩. 𑀅𑀧𑀺 𑀘𑁂 𑀧𑀢𑁆𑀢𑀫𑀸𑀤𑀸𑀬, 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀲𑀸𑀬𑁂𑀯 𑀚𑀻𑀯𑀺𑀓𑀸 𑀲𑁂𑀬𑁆𑀬𑁄, 𑀬𑀸 𑀘𑀸𑀥𑀫𑁆𑀫𑁂𑀦 𑀏𑀲𑀦𑀸.

𑁬𑁪. 𑀅𑀧𑀺 𑀘𑁂 𑀧𑀢𑁆𑀢𑀫𑀸𑀤𑀸𑀬, 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀅𑀜𑁆𑀜𑀁 𑀅𑀳𑀺𑀁𑀲𑀬𑀁 𑀮𑁄𑀓𑁂, 𑀅𑀧𑀺 𑀭𑀚𑁆𑀚𑁂𑀦 𑀢𑀁 𑀯𑀭𑀁.

𑁬𑁫. 𑀩𑀮𑀁 𑀘𑀦𑁆𑀤𑁄 𑀩𑀮𑀁 𑀲𑀼𑀭𑀺𑀬𑁄, 𑀩𑀮𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀩𑀮𑀁 𑀯𑁂𑀮𑀸 𑀲𑀫𑀼𑀤𑁆𑀤𑀲𑁆𑀲, 𑀩𑀮𑀸𑀢𑀺𑀩𑀮𑀫𑀺𑀢𑁆𑀣𑀺𑀬𑁄.

𑁬𑁬. 𑀬𑀣𑀸 𑀉𑀕𑁆𑀕𑀢𑀧𑀁 𑀲𑀦𑁆𑀢𑀁, 𑀇𑀲𑀺𑀁 𑀮𑁄𑀫𑀲𑀓𑀲𑁆𑀲𑀧𑀁;

𑀧𑀺𑀢𑀼 𑀅𑀢𑁆𑀣𑀸 𑀘𑀦𑁆𑀤𑀯𑀢𑀻, 𑀯𑀸𑀚𑀧𑁂𑀬𑁆𑀬𑀁 [𑀯𑀸𑀘𑀧𑁂𑀬𑁆𑀬𑀁 (𑀧𑀻. 𑀓.)] 𑀅𑀬𑀸𑀚𑀬𑀺.