𑁧𑁦. 𑀤𑀲𑀓𑀦𑀺𑀧𑀸𑀢𑁄

𑁪𑁩𑁯. 𑀘𑀢𑀼𑀤𑁆𑀯𑀸𑀭𑀚𑀸𑀢𑀓𑀁 (𑁧)

𑁧. 𑀘𑀢𑀼𑀤𑁆𑀯𑀸𑀭𑀫𑀺𑀤𑀁 𑀦𑀕𑀭𑀁, 𑀆𑀬𑀲𑀁 𑀤𑀴𑁆𑀳𑀧𑀸𑀓𑀸𑀭𑀁;

𑀑𑀭𑀼𑀤𑁆𑀥𑀧𑀝𑀺𑀭𑀼𑀤𑁆𑀥𑁄𑀲𑁆𑀫𑀺, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸.

𑁨. 𑀲𑀩𑁆𑀩𑁂 𑀅𑀧𑀺𑀳𑀺𑀢𑀸 𑀤𑁆𑀯𑀸𑀭𑀸, 𑀑𑀭𑀼𑀤𑁆𑀥𑁄𑀲𑁆𑀫𑀺 𑀬𑀣𑀸 𑀤𑀺𑀚𑁄;

𑀓𑀺𑀫𑀸𑀥𑀺𑀓𑀭𑀡𑀁 𑀬𑀓𑁆𑀔, 𑀘𑀓𑁆𑀓𑀸𑀪𑀺𑀦𑀺𑀳𑀢𑁄 𑀅𑀳𑀁.

𑁩. 𑀮𑀤𑁆𑀥𑀸 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀢𑀺𑀭𑁂𑀓𑀸𑀦𑀺 𑀯𑀻𑀲𑀢𑀺;

𑀅𑀦𑀼𑀓𑀫𑁆𑀧𑀓𑀸𑀦𑀁 𑀜𑀸𑀢𑀻𑀦𑀁, 𑀯𑀘𑀦𑀁 𑀲𑀫𑁆𑀫 𑀦𑀸𑀓𑀭𑀺.

𑁪. 𑀮𑀗𑁆𑀖𑀺𑀁 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺, 𑀲𑀸𑀕𑀭𑀁 𑀅𑀧𑁆𑀧𑀲𑀺𑀤𑁆𑀥𑀺𑀓𑀁;

𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀸𑀳𑀺𑀧𑀺 𑀘 𑀲𑁄𑀴𑀲.

𑁫. 𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂.

𑁬. 𑀉𑀧𑀭𑀺𑀯𑀺𑀲𑀸𑀮𑀸 𑀤𑀼𑀧𑁆𑀧𑀽𑀭𑀸, 𑀇𑀘𑁆𑀙𑀸 𑀯𑀺𑀲𑀝𑀕𑀸𑀫𑀺𑀦𑀻 [𑀯𑀺𑀲𑀝𑀕𑀸𑀫𑀺𑀦𑀺𑀁 (𑀧𑀻. 𑀓.)];

𑀬𑁂 𑀘 𑀢𑀁 𑀅𑀦𑀼𑀕𑀺𑀚𑁆𑀛𑀦𑁆𑀢𑀺, 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄.

𑁭. 𑀩𑀳𑀼𑀪𑀡𑁆𑀟𑀁 [𑀩𑀳𑀼𑀁 𑀪𑀡𑁆𑀟𑀁 (𑀲𑀻. 𑀧𑀻.)] 𑀅𑀯𑀳𑀸𑀬, 𑀫𑀕𑁆𑀕𑀁 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀬;

𑀬𑁂𑀲𑀜𑁆𑀘𑁂𑀢𑀁 𑀅𑀲𑀗𑁆𑀔𑀸𑀢𑀁, 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄.

𑁮. 𑀓𑀫𑁆𑀫𑀁 𑀲𑀫𑁂𑀓𑁆𑀔𑁂 𑀯𑀺𑀧𑀼𑀮𑀜𑁆𑀘 𑀪𑁄𑀕𑀁, 𑀇𑀘𑁆𑀙𑀁 𑀦 𑀲𑁂𑀯𑁂𑀬𑁆𑀬 𑀅𑀦𑀢𑁆𑀣𑀲𑀁𑀳𑀺𑀢𑀁;

𑀓𑀭𑁂𑀬𑁆𑀬 𑀯𑀸𑀓𑁆𑀬𑀁 𑀅𑀦𑀼𑀓𑀫𑁆𑀧𑀓𑀸𑀦𑀁, 𑀢𑀁 𑀢𑀸𑀤𑀺𑀲𑀁 𑀦𑀸𑀢𑀺𑀯𑀢𑁆𑀢𑁂𑀬𑁆𑀬 𑀘𑀓𑁆𑀓𑀁.

𑁯. 𑀓𑀻𑀯𑀘𑀺𑀭𑀁 𑀦𑀼 𑀫𑁂 𑀬𑀓𑁆𑀔, 𑀘𑀓𑁆𑀓𑀁 𑀲𑀺𑀭𑀲𑀺 𑀞𑀲𑁆𑀲𑀢𑀺;

𑀓𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁧𑁦. 𑀅𑀢𑀺𑀲𑀭𑁄 𑀧𑀘𑁆𑀘𑀲𑀭𑁄 [𑀅𑀘𑁆𑀘𑀲𑀭𑁄 (𑀲𑀻. 𑀲𑁆𑀬𑀸. 𑀧𑀻.)], 𑀫𑀺𑀢𑁆𑀢𑀯𑀺𑀦𑁆𑀤 𑀲𑀼𑀡𑁄𑀳𑀺 𑀫𑁂;

𑀘𑀓𑁆𑀓𑀁 𑀢𑁂 𑀲𑀺𑀭𑀲𑀺 [𑀲𑀺𑀭𑀲𑁆𑀫𑀺 (𑀲𑁆𑀬𑀸.)] 𑀫𑀸𑀯𑀺𑀤𑁆𑀥𑀁, 𑀦 𑀢𑀁 𑀚𑀻𑀯𑀁 𑀧𑀫𑁄𑀓𑁆𑀔𑀲𑀻𑀢𑀺.

𑀘𑀢𑀼𑀤𑁆𑀯𑀸𑀭𑀚𑀸𑀢𑀓𑀁 𑀧𑀞𑀫𑀁.

𑁪𑁪𑁦. 𑀓𑀡𑁆𑀳𑀚𑀸𑀢𑀓𑀁 (𑁨)

𑁧𑁧. 𑀓𑀡𑁆𑀳𑁄 𑀯𑀢𑀸𑀬𑀁 𑀧𑀼𑀭𑀺𑀲𑁄, 𑀓𑀡𑁆𑀳𑀁 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁;

𑀓𑀡𑁆𑀳𑁂 𑀪𑀽𑀫𑀺𑀧𑀤𑁂𑀲𑀲𑁆𑀫𑀺𑀁, 𑀦 𑀫𑀬𑁆𑀳𑀁 𑀫𑀦𑀲𑁄 𑀧𑀺𑀬𑁄.

𑁧𑁨. 𑀦 𑀓𑀡𑁆𑀳𑁄 𑀢𑀘𑀲𑀸 𑀳𑁄𑀢𑀺, 𑀅𑀦𑁆𑀢𑁄𑀲𑀸𑀭𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄;

𑀬𑀲𑁆𑀫𑀺𑀁 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺, 𑀲 𑀯𑁂 𑀓𑀡𑁆𑀳𑁄 𑀲𑀼𑀚𑀫𑁆𑀧𑀢𑀺.

𑁧𑁩. 𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀩𑁆𑀭𑀸𑀳𑁆𑀫𑀡 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁧𑁪. 𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀲𑀼𑀦𑀺𑀓𑁆𑀓𑁄𑀥𑀁 𑀲𑀼𑀦𑀺𑀤𑁆𑀤𑁄𑀲𑀁, 𑀦𑀺𑀮𑁆𑀮𑁄𑀪𑀁 𑀯𑀼𑀢𑁆𑀢𑀺𑀫𑀢𑁆𑀢𑀦𑁄;

𑀦𑀺𑀲𑁆𑀦𑁂𑀳𑀫𑀪𑀺𑀓𑀗𑁆𑀔𑀸𑀫𑀺, 𑀏𑀢𑁂 𑀫𑁂 𑀘𑀢𑀼𑀭𑁄 𑀯𑀭𑁂.

𑁧𑁫. 𑀓𑀺𑀁 𑀦𑀼 𑀓𑁄𑀥𑁂 𑀯𑀸 [𑀓𑁄𑀥𑁂𑀯 (𑀲𑀻. 𑀧𑀻.)] 𑀤𑁄𑀲𑁂 𑀯𑀸, 𑀮𑁄𑀪𑁂 𑀲𑁆𑀦𑁂𑀳𑁂 𑀘 𑀩𑁆𑀭𑀸𑀳𑁆𑀫𑀡;

𑀆𑀤𑀻𑀦𑀯𑀁 𑀢𑁆𑀯𑀁 𑀧𑀲𑁆𑀲𑀲𑀺 [𑀲𑀫𑁆𑀧𑀲𑁆𑀲𑀲𑀺 (𑀲𑀻. 𑀧𑀻.)], 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁧𑁬. 𑀅𑀧𑁆𑀧𑁄 𑀳𑀼𑀢𑁆𑀯𑀸 𑀩𑀳𑀼 𑀳𑁄𑀢𑀺, 𑀯𑀟𑁆𑀠𑀢𑁂 𑀲𑁄 𑀅𑀔𑀦𑁆𑀢𑀺𑀚𑁄;

𑀆𑀲𑀗𑁆𑀕𑀻 𑀩𑀳𑀼𑀧𑀸𑀬𑀸𑀲𑁄, 𑀢𑀲𑁆𑀫𑀸 𑀓𑁄𑀥𑀁 𑀦 𑀭𑁄𑀘𑀬𑁂.

𑁧𑁭. 𑀤𑀼𑀝𑁆𑀞𑀲𑁆𑀲 𑀨𑀭𑀼𑀲𑀸 [𑀧𑀞𑀫𑀸 (𑀧𑀻. 𑀲𑀻. 𑀦𑀺𑀬𑁆𑀬)] 𑀯𑀸𑀘𑀸, 𑀧𑀭𑀸𑀫𑀸𑀲𑁄 𑀅𑀦𑀦𑁆𑀢𑀭𑀸;

𑀢𑀢𑁄 𑀧𑀸𑀡𑀺 𑀢𑀢𑁄 𑀤𑀡𑁆𑀟𑁄, 𑀲𑀢𑁆𑀣𑀲𑁆𑀲 𑀧𑀭𑀫𑀸 𑀕𑀢𑀺 [𑀧𑀭𑀸𑀫𑀲𑀢𑀺 (𑀓.)];

𑀤𑁄𑀲𑁄 𑀓𑁄𑀥𑀲𑀫𑀼𑀝𑁆𑀞𑀸𑀦𑁄, 𑀢𑀲𑁆𑀫𑀸 𑀤𑁄𑀲𑀁 𑀦 𑀭𑁄𑀘𑀬𑁂.

𑁧𑁮. 𑀆𑀮𑁄𑀧𑀲𑀸𑀳𑀲𑀸𑀓𑀸𑀭𑀸 [𑀲𑀳𑀲𑀸𑀓𑀸𑀭𑀸 (𑀲𑀻. 𑀲𑁆𑀬𑀸. 𑀧𑀻.)], 𑀦𑀺𑀓𑀢𑀻 𑀯𑀜𑁆𑀘𑀦𑀸𑀦𑀺 𑀘;

𑀤𑀺𑀲𑁆𑀲𑀦𑁆𑀢𑀺 𑀮𑁄𑀪𑀥𑀫𑁆𑀫𑁂𑀲𑀼, 𑀢𑀲𑁆𑀫𑀸 𑀮𑁄𑀪𑀁 𑀦 𑀭𑁄𑀘𑀬𑁂.

𑁧𑁯. 𑀲𑁆𑀦𑁂𑀳𑀲𑀗𑁆𑀕𑀣𑀺𑀢𑀸 [𑀲𑀗𑁆𑀕𑀥𑀺𑀢𑀸 (𑀓.), 𑀲𑀗𑁆𑀕𑀦𑁆𑀢𑀺𑀢𑀸 (𑀲𑁆𑀬𑀸.)] 𑀕𑀦𑁆𑀣𑀸, 𑀲𑁂𑀦𑁆𑀢𑀺 𑀫𑀦𑁄𑀫𑀬𑀸 𑀧𑀼𑀣𑀽;

𑀢𑁂 𑀪𑀼𑀲𑀁 𑀉𑀧𑀢𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑁆𑀦𑁂𑀳𑀁 𑀦 𑀭𑁄𑀘𑀬𑁂.

𑁨𑁦. 𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀩𑁆𑀭𑀸𑀳𑁆𑀫𑀡 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁨𑁧. 𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀅𑀭𑀜𑁆𑀜𑁂 𑀫𑁂 𑀯𑀺𑀳𑀭𑀢𑁄, 𑀦𑀺𑀘𑁆𑀘𑀁 𑀏𑀓𑀯𑀺𑀳𑀸𑀭𑀺𑀦𑁄;

𑀆𑀩𑀸𑀥𑀸 𑀫𑀸 [𑀦 (𑀲𑁆𑀬𑀸. 𑀧𑀻.)] 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀅𑀦𑁆𑀢𑀭𑀸𑀬𑀓𑀭𑀸 𑀪𑀼𑀲𑀸.

𑁨𑁨. 𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀩𑁆𑀭𑀸𑀳𑁆𑀫𑀡 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁨𑁩. 𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀦 𑀫𑀦𑁄 𑀯𑀸 𑀲𑀭𑀻𑀭𑀁 𑀯𑀸, 𑀫𑀁-𑀓𑀢𑁂 𑀲𑀓𑁆𑀓 𑀓𑀲𑁆𑀲𑀘𑀺;

𑀓𑀤𑀸𑀘𑀺 𑀉𑀧𑀳𑀜𑁆𑀜𑁂𑀣, 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂𑀢𑀺.

𑀓𑀡𑁆𑀳𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁪𑁪𑁧. 𑀘𑀢𑀼𑀧𑁄𑀲𑀣𑀺𑀬𑀚𑀸𑀢𑀓𑀁 (𑁩)

𑁨𑁪. 𑀬𑁄 𑀓𑁄𑀧𑀦𑁂𑀬𑁆𑀬𑁂 𑀦 𑀓𑀭𑁄𑀢𑀺 𑀓𑁄𑀧𑀁, 𑀦 𑀓𑀼𑀚𑁆𑀛𑀢𑀺 𑀲𑀧𑁆𑀧𑀼𑀭𑀺𑀲𑁄 𑀓𑀤𑀸𑀘𑀺;

𑀓𑀼𑀤𑁆𑀥𑁄𑀧𑀺 𑀲𑁄 𑀦𑀸𑀯𑀺𑀓𑀭𑁄𑀢𑀺 𑀓𑁄𑀧𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 [𑀲𑀫𑀡𑀁 𑀆𑀳𑀼 (𑀲𑀻.)] 𑀮𑁄𑀓𑁂.

𑁨𑁫. 𑀊𑀦𑀽𑀤𑀭𑁄 𑀬𑁄 𑀲𑀳𑀢𑁂 𑀚𑀺𑀖𑀘𑁆𑀙𑀁, 𑀤𑀦𑁆𑀢𑁄 𑀢𑀧𑀲𑁆𑀲𑀻 𑀫𑀺𑀢𑀧𑀸𑀦𑀪𑁄𑀚𑀦𑁄;

𑀆𑀳𑀸𑀭𑀳𑁂𑀢𑀼 𑀦 𑀓𑀭𑁄𑀢𑀺 𑀧𑀸𑀧𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 𑀮𑁄𑀓𑁂.

𑁨𑁬. 𑀔𑀺𑀟𑁆𑀟𑀁 𑀭𑀢𑀺𑀁 𑀯𑀺𑀧𑁆𑀧𑀚𑀳𑀺𑀢𑁆𑀯𑀸𑀦 𑀲𑀩𑁆𑀩𑀁, 𑀦 𑀘𑀸𑀮𑀺𑀓𑀁 𑀪𑀸𑀲𑀲𑀺 𑀓𑀺𑀜𑁆𑀘𑀺 𑀮𑁄𑀓𑁂;

𑀯𑀺𑀪𑀽𑀲𑀝𑁆𑀞𑀸𑀦𑀸 𑀯𑀺𑀭𑀢𑁄 𑀫𑁂𑀣𑀼𑀦𑀲𑁆𑀫𑀸, 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 𑀮𑁄𑀓𑁂.

𑁨𑁭. 𑀧𑀭𑀺𑀕𑁆𑀕𑀳𑀁 𑀮𑁄𑀪𑀥𑀫𑁆𑀫𑀜𑁆𑀘 𑀲𑀩𑁆𑀩𑀁, 𑀬𑁄 𑀯𑁂 𑀧𑀭𑀺𑀜𑁆𑀜𑀸𑀬 𑀧𑀭𑀺𑀘𑁆𑀘𑀚𑁂𑀢𑀺;

𑀤𑀦𑁆𑀢𑀁 𑀞𑀺𑀢𑀢𑁆𑀢𑀁 𑀅𑀫𑀫𑀁 𑀦𑀺𑀭𑀸𑀲𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 𑀮𑁄𑀓𑁂.

𑁨𑁮. 𑀧𑀼𑀘𑁆𑀙𑀸𑀫 𑀓𑀢𑁆𑀢𑀸𑀭𑀫𑀦𑁄𑀫𑀧𑀜𑁆𑀜𑀁 [𑀫𑀦𑁄𑀫𑀧𑀜𑁆𑀜 (𑀲𑁆𑀬𑀸. 𑀓.)], 𑀓𑀣𑀸𑀲𑀼 𑀦𑁄 𑀯𑀺𑀕𑁆𑀕𑀳𑁄 𑀅𑀢𑁆𑀣𑀺 𑀚𑀸𑀢𑁄;

𑀙𑀺𑀦𑁆𑀤𑀚𑁆𑀚 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺, 𑀢𑀤𑀚𑁆𑀚 [𑀢𑀬𑀸𑀚𑁆𑀚 (𑀲𑀻.)] 𑀓𑀗𑁆𑀔𑀁 𑀯𑀺𑀢𑀭𑁂𑀫𑀼 𑀲𑀩𑁆𑀩𑁂.

𑁨𑁯. 𑀬𑁂 𑀧𑀡𑁆𑀟𑀺𑀢𑀸 𑀅𑀢𑁆𑀣𑀤𑀲𑀸 𑀪𑀯𑀦𑁆𑀢𑀺, 𑀪𑀸𑀲𑀦𑁆𑀢𑀺 𑀢𑁂 𑀬𑁄𑀦𑀺𑀲𑁄 𑀢𑀢𑁆𑀣 𑀓𑀸𑀮𑁂;

𑀓𑀣𑀁 𑀦𑀼 𑀓𑀣𑀸𑀦𑀁 𑀅𑀪𑀸𑀲𑀺𑀢𑀸𑀦𑀁, 𑀅𑀢𑁆𑀣𑀁 𑀦𑀬𑁂𑀬𑁆𑀬𑀼𑀁 𑀓𑀼𑀲𑀮𑀸 𑀚𑀦𑀺𑀦𑁆𑀤𑀸.

𑁩𑁦. 𑀓𑀣𑀁 𑀳𑀯𑁂 𑀪𑀸𑀲𑀢𑀺 𑀦𑀸𑀕𑀭𑀸𑀚𑀸, 𑀕𑀭𑀼𑀴𑁄 𑀧𑀦 𑀯𑁂𑀦𑀢𑁂𑀬𑁆𑀬𑁄 𑀓𑀺𑀫𑀸𑀳;

𑀕𑀦𑁆𑀥𑀩𑁆𑀩𑀭𑀸𑀚𑀸 𑀧𑀦 𑀓𑀺𑀁 𑀯𑀤𑁂𑀲𑀺, 𑀓𑀣𑀁 𑀧𑀦 𑀓𑀼𑀭𑀽𑀦𑀁 𑀭𑀸𑀚𑀲𑁂𑀝𑁆𑀞𑁄.

𑁩𑁧. 𑀔𑀦𑁆𑀢𑀺𑀁 𑀳𑀯𑁂 𑀪𑀸𑀲𑀢𑀺 𑀦𑀸𑀕𑀭𑀸𑀚𑀸, 𑀅𑀧𑁆𑀧𑀸𑀳𑀸𑀭𑀁 𑀕𑀭𑀼𑀴𑁄 𑀯𑁂𑀦𑀢𑁂𑀬𑁆𑀬𑁄;

𑀕𑀦𑁆𑀥𑀩𑁆𑀩𑀭𑀸𑀚𑀸 𑀭𑀢𑀺𑀯𑀺𑀧𑁆𑀧𑀳𑀸𑀦𑀁, 𑀅𑀓𑀺𑀜𑁆𑀘𑀦𑀁 𑀓𑀼𑀭𑀽𑀦𑀁 𑀭𑀸𑀚𑀲𑁂𑀝𑁆𑀞𑁄.

𑁩𑁨. 𑀲𑀩𑁆𑀩𑀸𑀦𑀺 𑀏𑀢𑀸𑀦𑀺 𑀲𑀼𑀪𑀸𑀲𑀺𑀢𑀸𑀦𑀺, 𑀦 𑀳𑁂𑀢𑁆𑀣 𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀣𑀺 𑀓𑀺𑀜𑁆𑀘𑀺;

𑀬𑀲𑁆𑀫𑀺𑀜𑁆𑀘 𑀏𑀢𑀸𑀦𑀺 𑀧𑀢𑀺𑀝𑁆𑀞𑀺𑀢𑀸𑀦𑀺, 𑀅𑀭𑀸𑀯 𑀦𑀸𑀪𑁆𑀬𑀸 𑀲𑀼𑀲𑀫𑁄𑀳𑀺𑀢𑀸𑀦𑀺;

𑀘𑀢𑀼𑀩𑁆𑀪𑀺 𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀁, 𑀢𑀁 𑀯𑁂 𑀦𑀭𑀁 𑀲𑀫𑀡𑀫𑀸𑀳𑀼 𑀮𑁄𑀓𑁂.

𑁩𑁩. 𑀢𑀼𑀯𑀜𑁆𑀳𑀺 [𑀢𑀼𑀯𑀁 𑀦𑀼 (𑀲𑀻. 𑀧𑀻.)] 𑀲𑁂𑀝𑁆𑀞𑁄 𑀢𑁆𑀯𑀫𑀦𑀼𑀢𑁆𑀢𑀭𑁄𑀲𑀺, 𑀢𑁆𑀯𑀁 𑀥𑀫𑁆𑀫𑀕𑀽 𑀥𑀫𑁆𑀫𑀯𑀺𑀤𑀽 𑀲𑀼𑀫𑁂𑀥𑁄;

𑀧𑀜𑁆𑀜𑀸𑀬 𑀧𑀜𑁆𑀳𑀁 𑀲𑀫𑀥𑀺𑀕𑁆𑀕𑀳𑁂𑀢𑁆𑀯𑀸, 𑀅𑀘𑁆𑀙𑁂𑀘𑁆𑀙𑀺 𑀥𑀻𑀭𑁄 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺;

𑀅𑀘𑁆𑀙𑁂𑀘𑁆𑀙𑀺 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺, 𑀘𑀼𑀦𑁆𑀤𑁄 𑀬𑀣𑀸 𑀦𑀸𑀕𑀤𑀦𑁆𑀢𑀁 𑀔𑀭𑁂𑀦.

𑁩𑁪. 𑀦𑀻𑀮𑀼𑀧𑁆𑀧𑀮𑀸𑀪𑀁 𑀯𑀺𑀫𑀮𑀁 𑀅𑀦𑀕𑁆𑀖𑀁, 𑀯𑀢𑁆𑀣𑀁 𑀇𑀤𑀁 𑀥𑀽𑀫𑀲𑀫𑀸𑀦𑀯𑀡𑁆𑀡𑀁;

𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀥𑀫𑁆𑀫𑀧𑀽𑀚𑀸𑀬 𑀥𑀻𑀭.

𑁩𑁫. 𑀲𑀼𑀯𑀡𑁆𑀡𑀫𑀸𑀮𑀁 𑀲𑀢𑀧𑀢𑁆𑀢𑀨𑀼𑀮𑁆𑀮𑀺𑀢𑀁, 𑀲𑀓𑁂𑀲𑀭𑀁 𑀭𑀢𑁆𑀦𑀲𑀳𑀲𑁆𑀲𑀫𑀡𑁆𑀟𑀺𑀢𑀁;

𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀥𑀫𑁆𑀫𑀧𑀽𑀚𑀸𑀬 𑀥𑀻𑀭.

𑁩𑁬. 𑀫𑀡𑀺𑀁 𑀅𑀦𑀕𑁆𑀖𑀁 𑀭𑀼𑀘𑀺𑀭𑀁 𑀧𑀪𑀲𑁆𑀲𑀭𑀁, 𑀓𑀡𑁆𑀞𑀸𑀯𑀲𑀢𑁆𑀢𑀁 [𑀯𑀲𑀺𑀢𑀁 (𑀓.)] 𑀫𑀡𑀺𑀪𑀽𑀲𑀺𑀢𑀁 𑀫𑁂;

𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀥𑀫𑁆𑀫𑀧𑀽𑀚𑀸𑀬 𑀥𑀻𑀭.

𑁩𑁭. 𑀕𑀯𑀁 𑀲𑀳𑀲𑁆𑀲𑀁 𑀉𑀲𑀪𑀜𑁆𑀘 𑀦𑀸𑀕𑀁, 𑀆𑀚𑀜𑁆𑀜𑀬𑀼𑀢𑁆𑀢𑁂 𑀘 𑀭𑀣𑁂 𑀤𑀲 𑀇𑀫𑁂;

𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀕𑀸𑀫𑀯𑀭𑀸𑀦𑀺 𑀲𑁄𑀴𑀲.

𑁩𑁮. 𑀲𑀸𑀭𑀺𑀧𑀼𑀢𑁆𑀢𑁄 𑀢𑀤𑀸 𑀦𑀸𑀕𑁄, 𑀲𑀼𑀧𑀡𑁆𑀡𑁄 𑀧𑀦 𑀓𑁄𑀮𑀺𑀢𑁄;

𑀕𑀦𑁆𑀥𑀩𑁆𑀩𑀭𑀸𑀚𑀸 𑀅𑀦𑀼𑀭𑀼𑀤𑁆𑀥𑁄, 𑀭𑀸𑀚𑀸 𑀆𑀦𑀦𑁆𑀤 𑀧𑀡𑁆𑀟𑀺𑀢𑁄;

𑀯𑀺𑀥𑀼𑀭𑁄 𑀩𑁄𑀥𑀺𑀲𑀢𑁆𑀢𑁄 𑀘, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓𑀦𑁆𑀢𑀺.

𑀘𑀢𑀼𑀧𑁄𑀲𑀣𑀺𑀬𑀚𑀸𑀢𑀓𑀁 𑀢𑀢𑀺𑀬𑀁.

𑁪𑁪𑁨. 𑀲𑀗𑁆𑀔𑀚𑀸𑀢𑀓𑀁 (𑁪)

𑁩𑁯. 𑀩𑀳𑀼𑀲𑁆𑀲𑀼𑀢𑁄 𑀲𑀼𑀢𑀥𑀫𑁆𑀫𑁄𑀲𑀺 𑀲𑀗𑁆𑀔, 𑀤𑀺𑀝𑁆𑀞𑀸 𑀢𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘;

𑀅𑀣𑀓𑁆𑀔𑀡𑁂 𑀤𑀲𑁆𑀲𑀬𑀲𑁂 𑀯𑀺𑀮𑀸𑀧𑀁, 𑀅𑀜𑁆𑀜𑁄 𑀦𑀼 𑀓𑁄 𑀢𑁂 𑀧𑀝𑀺𑀫𑀦𑁆𑀢𑀓𑁄 𑀫𑀬𑀸.

𑁪𑁦. 𑀲𑀼𑀩𑁆𑀪𑀽 [𑀲𑀼𑀩𑁆𑀪𑀸 (𑀲𑁆𑀬𑀸.), 𑀲𑀼𑀫𑁆𑀪𑀸, 𑀲𑀼𑀪𑁆𑀫𑀸 (𑀓.)] 𑀲𑀼𑀪𑀸 𑀲𑀼𑀧𑁆𑀧𑀝𑀺𑀫𑀼𑀓𑁆𑀓𑀓𑀫𑁆𑀩𑀼, 𑀧𑀕𑁆𑀕𑀬𑁆𑀳 𑀲𑁄𑀯𑀡𑁆𑀡𑀫𑀬𑀸𑀬 𑀧𑀸𑀢𑀺𑀬𑀸;

‘‘𑀪𑀼𑀜𑁆𑀚𑀲𑁆𑀲𑀼 𑀪𑀢𑁆𑀢𑀁’’ 𑀇𑀢𑀺 𑀫𑀁 𑀯𑀤𑁂𑀢𑀺, 𑀲𑀤𑁆𑀥𑀸𑀯𑀺𑀢𑁆𑀢𑀸 [𑀲𑀤𑁆𑀥𑀸𑀘𑀺𑀢𑁆𑀢𑀸 (𑀲𑀻. 𑀧𑀻. 𑀓.)], 𑀢𑀫𑀳𑀁 𑀦𑁄𑀢𑀺 𑀩𑁆𑀭𑀽𑀫𑀺.

𑁪𑁧. 𑀏𑀢𑀸𑀤𑀺𑀲𑀁 𑀩𑁆𑀭𑀸𑀳𑁆𑀫𑀡 𑀤𑀺𑀲𑁆𑀯𑀸𑀦 [𑀤𑀺𑀲𑁆𑀯 (𑀲𑀻. 𑀧𑀻.)] 𑀬𑀓𑁆𑀔𑀁, 𑀧𑀼𑀘𑁆𑀙𑁂𑀬𑁆𑀬 𑀧𑁄𑀲𑁄 𑀲𑀼𑀔𑀫𑀸𑀲𑀺𑀲𑀸𑀦𑁄 [𑀲𑀼𑀔𑀫𑀸𑀲𑀲𑀸𑀦𑁄 (𑀲𑁆𑀬𑀸.), 𑀲𑀼𑀔𑀫𑀸𑀲𑀺𑀲𑀫𑀸𑀦𑁄 (𑀓.)];

𑀉𑀝𑁆𑀞𑁂𑀳𑀺 𑀦𑀁 𑀧𑀜𑁆𑀚𑀮𑀺𑀓𑀸𑀪𑀺𑀧𑀼𑀘𑁆𑀙, 𑀤𑁂𑀯𑀻 𑀦𑀼𑀲𑀺 𑀢𑁆𑀯𑀁 𑀉𑀤 𑀫𑀸𑀦𑀼𑀲𑀻 𑀦𑀼.

𑁪𑁨. 𑀬𑀁 𑀢𑁆𑀯𑀁 𑀲𑀼𑀔𑁂𑀦𑀸𑀪𑀺𑀲𑀫𑁂𑀓𑁆𑀔𑀲𑁂 𑀫𑀁, 𑀪𑀼𑀜𑁆𑀚𑀲𑁆𑀲𑀼 𑀪𑀢𑁆𑀢𑀁 𑀇𑀢𑀺 𑀫𑀁 𑀯𑀤𑁂𑀲𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀭𑀺 𑀫𑀳𑀸𑀦𑀼𑀪𑀸𑀯𑁂, 𑀤𑁂𑀯𑀻 𑀦𑀼𑀲𑀺 𑀢𑁆𑀯𑀁 𑀉𑀤 𑀫𑀸𑀦𑀼𑀲𑀻 𑀦𑀼.

𑁪𑁩. 𑀤𑁂𑀯𑀻 𑀅𑀳𑀁 𑀲𑀗𑁆𑀔 𑀫𑀳𑀸𑀦𑀼𑀪𑀸𑀯𑀸, 𑀇𑀥𑀸𑀕𑀢𑀸 𑀲𑀸𑀕𑀭𑀯𑀸𑀭𑀺𑀫𑀚𑁆𑀛𑁂;

𑀅𑀦𑀼𑀓𑀫𑁆𑀧𑀺𑀓𑀸 𑀦𑁄 𑀘 𑀧𑀤𑀼𑀝𑁆𑀞𑀘𑀺𑀢𑁆𑀢𑀸, 𑀢𑀯𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑀸𑀲𑁆𑀫𑀺.

𑁪𑁪. 𑀇𑀥𑀦𑁆𑀦𑀧𑀸𑀦𑀁 𑀲𑀬𑀦𑀸𑀲𑀦𑀜𑁆𑀘, 𑀬𑀸𑀦𑀸𑀦𑀺 𑀦𑀸𑀦𑀸𑀯𑀺𑀯𑀺𑀥𑀸𑀦𑀺 𑀲𑀗𑁆𑀔;

𑀲𑀩𑁆𑀩𑀲𑁆𑀲 𑀢𑁆𑀬𑀸𑀳𑀁 𑀧𑀝𑀺𑀧𑀸𑀤𑀬𑀸𑀫𑀺, 𑀬𑀁 𑀓𑀺𑀜𑁆𑀘𑀺 𑀢𑀼𑀬𑁆𑀳𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢𑀁.

𑁪𑁫. 𑀬𑀁 𑀓𑀺𑀜𑁆𑀘𑀺 𑀬𑀺𑀝𑁆𑀞𑀜𑁆𑀘 𑀳𑀼𑀢𑀜𑁆𑀘 [𑀬𑀺𑀝𑁆𑀞𑀁𑀯 𑀳𑀼𑀢𑀁𑀯 (𑀲𑀻. 𑀧𑀻.)] 𑀫𑀬𑁆𑀳𑀁, 𑀲𑀩𑁆𑀩𑀲𑁆𑀲 𑀦𑁄 𑀇𑀲𑁆𑀲𑀭𑀸 𑀢𑁆𑀯𑀁 𑀲𑀼𑀕𑀢𑁆𑀢𑁂;

𑀲𑀼𑀲𑁄𑀡𑀺 𑀲𑀼𑀩𑁆𑀪𑀫𑀼 [𑀲𑀼𑀩𑁆𑀪𑀼 (𑀲𑀻.), 𑀲𑀼𑀩𑁆𑀪𑀸 (𑀲𑁆𑀬𑀸.)] 𑀲𑀼𑀯𑀺𑀮𑀕𑁆𑀕𑀫𑀚𑁆𑀛𑁂 [𑀲𑀼𑀯𑀺𑀮𑀸𑀓𑀫𑀚𑁆𑀛𑁂 (𑀲𑁆𑀬𑀸. 𑀧𑀻. 𑀲𑀻. 𑀅𑀝𑁆𑀞.), 𑀲𑀼𑀯𑀺𑀮𑀸𑀢𑀫𑀚𑁆𑀛𑁂 (𑀓.)], 𑀓𑀺𑀲𑁆𑀲 𑀫𑁂 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄.

𑁪𑁬. 𑀖𑀫𑁆𑀫𑁂 𑀧𑀣𑁂 𑀩𑁆𑀭𑀸𑀳𑁆𑀫𑀡 𑀏𑀓𑀪𑀺𑀓𑁆𑀔𑀼𑀁, 𑀉𑀕𑁆𑀖𑀝𑁆𑀝𑀧𑀸𑀤𑀁 𑀢𑀲𑀺𑀢𑀁 𑀓𑀺𑀮𑀦𑁆𑀢𑀁;

𑀧𑀝𑀺𑀧𑀸𑀤𑀬𑀻 𑀲𑀗𑁆𑀔 𑀉𑀧𑀸𑀳𑀦𑀸𑀦𑀺 [𑀉𑀧𑀸𑀳𑀦𑀸𑀳𑀺 (𑀲𑀻. 𑀧𑀻.)], 𑀲𑀸 𑀤𑀓𑁆𑀔𑀺𑀡𑀸 𑀓𑀸𑀫𑀤𑀼𑀳𑀸 𑀢𑀯𑀚𑁆𑀚.

𑁪𑁭. 𑀲𑀸 𑀳𑁄𑀢𑀼 𑀦𑀸𑀯𑀸 𑀨𑀮𑀓𑀽𑀧𑀧𑀦𑁆𑀦𑀸, 𑀅𑀦𑀯𑀲𑁆𑀲𑀼𑀢𑀸 𑀏𑀭𑀓𑀯𑀸𑀢𑀬𑀼𑀢𑁆𑀢𑀸;

𑀅𑀜𑁆𑀜𑀲𑁆𑀲 𑀬𑀸𑀦𑀲𑁆𑀲 𑀦 𑀳𑁂𑀢𑁆𑀣 [𑀦 𑀳𑀢𑁆𑀣𑀺 (𑀧𑀻.)] 𑀪𑀽𑀫𑀺, 𑀅𑀚𑁆𑀚𑁂𑀯 𑀫𑀁 𑀫𑁄𑀴𑀺𑀦𑀺𑀁 𑀧𑀸𑀧𑀬𑀲𑁆𑀲𑀼.

𑁪𑁮. 𑀲𑀸 𑀢𑀢𑁆𑀣 𑀯𑀺𑀢𑁆𑀢𑀸 𑀲𑀼𑀫𑀦𑀸 𑀧𑀢𑀻𑀢𑀸, 𑀦𑀸𑀯𑀁 𑀲𑀼𑀘𑀺𑀢𑁆𑀢𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸;

𑀆𑀤𑀸𑀬 𑀲𑀗𑁆𑀔𑀁 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁, 𑀉𑀧𑀸𑀦𑀬𑀻 𑀦𑀕𑀭𑀁 𑀲𑀸𑀥𑀼𑀭𑀫𑁆𑀫𑀦𑁆𑀢𑀺.

𑀲𑀗𑁆𑀔𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁪𑁪𑁩. 𑀘𑀽𑀴𑀩𑁄𑀥𑀺𑀚𑀸𑀢𑀓𑀁 (𑁫)

𑁪𑁯. 𑀬𑁄 𑀢𑁂 𑀇𑀫𑀁 𑀯𑀺𑀲𑀸𑀮𑀓𑁆𑀔𑀺𑀁, 𑀧𑀺𑀬𑀁 𑀲𑀫𑁆𑀳𑀺𑀢𑀪𑀸𑀲𑀺𑀦𑀺𑀁 [𑀲𑀫𑁆𑀫𑀺𑀮𑁆𑀮𑀪𑀸𑀲𑀺𑀦𑀺𑀁 (𑀲𑀻. 𑀧𑀻.), 𑀲𑀫𑁆𑀫𑀺𑀮𑁆𑀮𑀳𑀸𑀲𑀺𑀦𑀺𑀁 (𑀲𑁆𑀬𑀸.)];

𑀆𑀤𑀸𑀬 𑀩𑀮𑀸 𑀕𑀘𑁆𑀙𑁂𑀬𑁆𑀬, 𑀓𑀺𑀁 𑀦𑀼 𑀓𑀬𑀺𑀭𑀸𑀲𑀺 𑀩𑁆𑀭𑀸𑀳𑁆𑀫𑀡.

𑁫𑁦. 𑀉𑀧𑁆𑀧𑀚𑁆𑀚𑁂 [𑀉𑀧𑁆𑀧𑀚𑁆𑀚 (𑀲𑀻. 𑀧𑀻.)] 𑀫𑁂 𑀦 𑀫𑀼𑀘𑁆𑀘𑁂𑀬𑁆𑀬, 𑀦 𑀫𑁂 𑀫𑀼𑀘𑁆𑀘𑁂𑀬𑁆𑀬 𑀚𑀻𑀯𑀢𑁄;

𑀭𑀚𑀁𑀯 𑀯𑀺𑀧𑀼𑀮𑀸 𑀯𑀼𑀝𑁆𑀞𑀺, 𑀔𑀺𑀧𑁆𑀧𑀫𑁂𑀯 𑀦𑀺𑀯𑀸𑀭𑀬𑁂 [𑀦𑀺𑀯𑀸𑀭𑀬𑀺𑀁 (𑀓.)].

𑁫𑁧. 𑀬𑀁 𑀦𑀼 𑀧𑀼𑀩𑁆𑀩𑁂 𑀯𑀺𑀓𑀢𑁆𑀣𑀺𑀢𑁆𑀣𑁄 [𑀯𑀺𑀓𑀢𑁆𑀣𑀺𑀢𑁄 (𑀓. 𑀲𑀻. 𑀲𑁆𑀬𑀸. 𑀓.)], 𑀩𑀮𑀫𑁆𑀳𑀺𑀯 𑀅𑀧𑀲𑁆𑀲𑀺𑀢𑁄;

𑀲𑁆𑀯𑀚𑁆𑀚 𑀢𑀼𑀡𑁆𑀳𑀺𑀓𑀢𑁄 [𑀢𑀼𑀡𑁆𑀳𑀺𑀓𑀢𑁄 (𑀲𑀻.), 𑀢𑀼𑀡𑁆𑀳𑀺𑀓𑁆𑀔𑀓𑁄 (𑀧𑀻.)] 𑀤𑀸𑀦𑀺, 𑀲𑀗𑁆𑀖𑀸𑀝𑀺𑀁 𑀲𑀺𑀩𑁆𑀩𑀫𑀘𑁆𑀙𑀲𑀺.

𑁫𑁨. 𑀉𑀧𑁆𑀧𑀚𑁆𑀚𑀺 𑀫𑁂 𑀦 𑀫𑀼𑀘𑁆𑀘𑀺𑀢𑁆𑀣, 𑀦 𑀫𑁂 𑀫𑀼𑀘𑁆𑀘𑀺𑀢𑁆𑀣 𑀚𑀻𑀯𑀢𑁄;

𑀭𑀚𑀁𑀯 𑀯𑀺𑀧𑀼𑀮𑀸 𑀯𑀼𑀝𑁆𑀞𑀺, 𑀔𑀺𑀧𑁆𑀧𑀫𑁂𑀯 𑀦𑀺𑀯𑀸𑀭𑀬𑀺𑀁.

𑁫𑁩. 𑀓𑀺𑀁 𑀢𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑀺𑀁 𑀢𑁂 𑀦 𑀫𑀼𑀘𑁆𑀘𑀺 𑀚𑀻𑀯𑀢𑁄;

𑀭𑀚𑀁𑀯 𑀯𑀺𑀧𑀼𑀮𑀸 𑀯𑀼𑀝𑁆𑀞𑀺, 𑀓𑀢𑀫𑀁 𑀢𑁆𑀯𑀁 𑀦𑀺𑀯𑀸𑀭𑀬𑀺.

𑁫𑁪. 𑀬𑀫𑁆𑀳𑀺 𑀚𑀸𑀢𑁂 𑀦 𑀧𑀲𑁆𑀲𑀢𑀺, 𑀅𑀚𑀸𑀢𑁂 𑀲𑀸𑀥𑀼 𑀧𑀲𑁆𑀲𑀢𑀺;

𑀲𑁄 𑀫𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑁄𑀥𑁄 𑀤𑀼𑀫𑁆𑀫𑁂𑀥𑀕𑁄𑀘𑀭𑁄.

𑁫𑁫. 𑀬𑁂𑀦 𑀚𑀸𑀢𑁂𑀦 𑀦𑀦𑁆𑀤𑀦𑁆𑀢𑀺, 𑀅𑀫𑀺𑀢𑁆𑀢𑀸 𑀤𑀼𑀓𑁆𑀔𑀫𑁂𑀲𑀺𑀦𑁄;

𑀲𑁄 𑀫𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑁄𑀥𑁄 𑀤𑀼𑀫𑁆𑀫𑁂𑀥𑀕𑁄𑀘𑀭𑁄.

𑁫𑁬. 𑀬𑀲𑁆𑀫𑀺𑀜𑁆𑀘 𑀚𑀸𑀬𑀫𑀸𑀦𑀫𑁆𑀳𑀺, 𑀲𑀤𑀢𑁆𑀣𑀁 𑀦𑀸𑀯𑀩𑀼𑀚𑁆𑀛𑀢𑀺;

𑀲𑁄 𑀫𑁂 𑀉𑀧𑁆𑀧𑀚𑁆𑀚𑀺 𑀦𑁄 𑀫𑀼𑀘𑁆𑀘𑀺, 𑀓𑁄𑀥𑁄 𑀤𑀼𑀫𑁆𑀫𑁂𑀥𑀕𑁄𑀘𑀭𑁄.

𑁫𑁭. 𑀬𑁂𑀦𑀸𑀪𑀺𑀪𑀽𑀢𑁄 𑀓𑀼𑀲𑀮𑀁 𑀚𑀳𑀸𑀢𑀺, 𑀧𑀭𑀓𑁆𑀓𑀭𑁂 𑀯𑀺𑀧𑀼𑀮𑀜𑁆𑀘𑀸𑀧𑀺 𑀅𑀢𑁆𑀣𑀁;

𑀲 𑀪𑀻𑀫𑀲𑁂𑀦𑁄 𑀩𑀮𑀯𑀸 𑀧𑀫𑀤𑁆𑀤𑀻, 𑀓𑁄𑀥𑁄 𑀫𑀳𑀸𑀭𑀸𑀚 𑀦 𑀫𑁂 𑀅𑀫𑀼𑀘𑁆𑀘𑀣.

𑁫𑁮. 𑀓𑀝𑁆𑀞𑀲𑁆𑀫𑀺𑀁 𑀫𑀢𑁆𑀣𑀫𑀸𑀦𑀲𑁆𑀫𑀺𑀁 [𑀫𑀦𑁆𑀣𑀫𑀸𑀦𑀲𑁆𑀫𑀺𑀁 (𑀧𑀻.), 𑀫𑀤𑁆𑀤𑀫𑀸𑀦𑀲𑁆𑀫𑀺𑀁 (𑀓.)], 𑀧𑀸𑀯𑀓𑁄 𑀦𑀸𑀫 𑀚𑀸𑀬𑀢𑀺;

𑀢𑀫𑁂𑀯 𑀓𑀝𑁆𑀞𑀁 𑀟𑀳𑀢𑀺, 𑀬𑀲𑁆𑀫𑀸 𑀲𑁄 𑀚𑀸𑀬𑀢𑁂 𑀕𑀺𑀦𑀺.

𑁫𑁯. 𑀏𑀯𑀁 𑀫𑀦𑁆𑀤𑀲𑁆𑀲 𑀧𑁄𑀲𑀲𑁆𑀲, 𑀩𑀸𑀮𑀲𑁆𑀲 𑀅𑀯𑀺𑀚𑀸𑀦𑀢𑁄;

𑀲𑀸𑀭𑀫𑁆𑀪𑀸 [𑀲𑀸𑀭𑀩𑁆𑀪𑀸 (𑀓.)] 𑀚𑀸𑀬𑀢𑁂 𑀓𑁄𑀥𑁄, 𑀲𑁄𑀧𑀺 𑀢𑁂𑀦𑁂𑀯 𑀟𑀬𑁆𑀳𑀢𑀺.

𑁬𑁦. 𑀅𑀕𑁆𑀕𑀻𑀯 𑀢𑀺𑀡𑀓𑀝𑁆𑀞𑀲𑁆𑀫𑀺𑀁, 𑀓𑁄𑀥𑁄 𑀬𑀲𑁆𑀲 𑀧𑀯𑀟𑁆𑀠𑀢𑀺;

𑀦𑀺𑀳𑀻𑀬𑀢𑀺 𑀢𑀲𑁆𑀲 𑀬𑀲𑁄, 𑀓𑀸𑀴𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸.

𑁬𑁧. 𑀅𑀦𑁂𑀥𑁄 [𑀅𑀦𑀺𑀦𑁆𑀥𑁄 (𑀲𑀻. 𑀓.), 𑀅𑀦𑀺𑀦𑁆𑀤𑁄 (𑀲𑁆𑀬𑀸.)] 𑀥𑀽𑀫𑀓𑁂𑀢𑀽𑀯, 𑀓𑁄𑀥𑁄 𑀬𑀲𑁆𑀲𑀽𑀧𑀲𑀫𑁆𑀫𑀢𑀺;

𑀆𑀧𑀽𑀭𑀢𑀺 𑀢𑀲𑁆𑀲 𑀬𑀲𑁄, 𑀲𑀼𑀓𑁆𑀓𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸𑀢𑀺.

𑀘𑀽𑀴𑀩𑁄𑀥𑀺𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁪𑁪𑁪. 𑀓𑀡𑁆𑀳𑀤𑀻𑀧𑀸𑀬𑀦𑀚𑀸𑀢𑀓𑀁 (𑁬)

𑁬𑁨. 𑀲𑀢𑁆𑀢𑀸𑀳𑀫𑁂𑀯𑀸𑀳𑀁 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀧𑀼𑀜𑁆𑀜𑀢𑁆𑀣𑀺𑀓𑁄 𑀆𑀘𑀭𑀺𑀁 [𑀅𑀘𑀭𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀩𑁆𑀭𑀳𑁆𑀫𑀘𑀭𑀺𑀬𑀁;

𑀅𑀣𑀸𑀧𑀭𑀁 𑀬𑀁 𑀘𑀭𑀺𑀢𑀁 𑀫𑀫𑁂𑀤𑀁 [𑀫𑀫 𑀬𑀺𑀤𑀁 (𑀲𑁆𑀬𑀸.), 𑀫𑀫𑀸𑀬𑀺𑀤𑀁 (𑀧𑀻.)], 𑀯𑀲𑁆𑀲𑀸𑀦𑀺 𑀧𑀜𑁆𑀜𑀸𑀲 𑀲𑀫𑀸𑀥𑀺𑀓𑀸𑀦𑀺;

𑀅𑀓𑀸𑀫𑀓𑁄 𑀯𑀸𑀧𑀺 [𑀯𑀸𑀳𑀺 (𑀧𑀻. 𑀓.)] 𑀅𑀳𑀁 𑀘𑀭𑀸𑀫𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼;

𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄.

𑁬𑁩. 𑀬𑀲𑁆𑀫𑀸 𑀤𑀸𑀦𑀁 𑀦𑀸𑀪𑀺𑀦𑀦𑁆𑀤𑀺𑀁 𑀓𑀤𑀸𑀘𑀺, 𑀤𑀺𑀲𑁆𑀯𑀸𑀦𑀳𑀁 𑀅𑀢𑀺𑀣𑀺𑀁 𑀯𑀸𑀲𑀓𑀸𑀮𑁂;

𑀦 𑀘𑀸𑀧𑀺 𑀫𑁂 𑀅𑀧𑁆𑀧𑀺𑀬𑀢𑀁 𑀅𑀯𑁂𑀤𑀼𑀁, 𑀩𑀳𑀼𑀲𑁆𑀲𑀼𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘.

𑀅𑀓𑀸𑀫𑀓𑁄 𑀯𑀸𑀧𑀺 𑀅𑀳𑀁 𑀤𑀤𑀸𑀫𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀼;

𑀳𑀢𑀁 𑀯𑀺𑀲𑀁 𑀚𑀻𑀯𑀢𑀼 𑀬𑀜𑁆𑀜𑀤𑀢𑁆𑀢𑁄.

𑁬𑁪. 𑀆𑀲𑀻𑀯𑀺𑀲𑁄 𑀢𑀸𑀢 𑀧𑀳𑀽𑀢𑀢𑁂𑀚𑁄, 𑀬𑁄 𑀢𑀁 𑀅𑀤𑀁𑀲𑀻 [𑀅𑀟𑀁𑀲𑀻 (𑀲𑁆𑀬𑀸.)] 𑀲𑀘𑀭𑀸 [𑀩𑀺𑀮𑀭𑀸 (𑀲𑀻.), 𑀧𑀺𑀴𑀸𑀭𑀸 (𑀲𑁆𑀬𑀸.), 𑀧𑀢𑀭𑀸 (𑀧𑀻.)] 𑀉𑀤𑀺𑀘𑁆𑀘;