𑁧𑁧. 𑀏𑀓𑀸𑀤𑀲𑀓𑀦𑀺𑀧𑀸𑀢𑁄

𑁪𑁫𑁫. 𑀫𑀸𑀢𑀼𑀧𑁄𑀲𑀓𑀚𑀸𑀢𑀓𑀁 (𑁧)

𑁧. 𑀢𑀲𑁆𑀲 𑀦𑀸𑀕𑀲𑁆𑀲 𑀯𑀺𑀧𑁆𑀧𑀯𑀸𑀲𑁂𑀦, 𑀯𑀺𑀭𑀽𑀴𑁆𑀳𑀸 𑀲𑀮𑁆𑀮𑀓𑀻 𑀘 𑀓𑀼𑀝𑀚𑀸 𑀘;

𑀓𑀼𑀭𑀼𑀯𑀺𑀦𑁆𑀤𑀓𑀭𑀯𑀻𑀭𑀸 [𑀓𑀭𑀯𑀭𑀸 (𑀲𑀻. 𑀲𑁆𑀬𑀸.)] 𑀢𑀺𑀲𑀲𑀸𑀫𑀸 𑀘, 𑀦𑀺𑀯𑀸𑀢𑁂 𑀧𑀼𑀧𑁆𑀨𑀺𑀢𑀸 𑀘 𑀓𑀡𑀺𑀓𑀸𑀭𑀸.

𑁨. 𑀓𑁄𑀘𑀺𑀤𑁂𑀯 𑀲𑀼𑀯𑀡𑁆𑀡𑀓𑀸𑀬𑀼𑀭𑀸, 𑀦𑀸𑀕𑀭𑀸𑀚𑀁 𑀪𑀭𑀦𑁆𑀢𑀺 𑀧𑀺𑀡𑁆𑀟𑁂𑀦;

𑀬𑀢𑁆𑀣 𑀭𑀸𑀚𑀸 𑀭𑀸𑀚𑀓𑀼𑀫𑀸𑀭𑁄 𑀯𑀸, 𑀓𑀯𑀘𑀫𑀪𑀺𑀳𑁂𑀲𑁆𑀲𑀢𑀺 𑀅𑀙𑀫𑁆𑀪𑀺𑀢𑁄 [𑀅𑀲𑀫𑁆𑀪𑀻𑀢𑁄 (𑀲𑀻. 𑀲𑁆𑀬𑀸. 𑀧𑀻.)].

𑁩. 𑀕𑀡𑁆𑀳𑀸𑀳𑀺 𑀦𑀸𑀕 𑀓𑀩𑀴𑀁, 𑀫𑀸 𑀦𑀸𑀕 𑀓𑀺𑀲𑀓𑁄 𑀪𑀯;

𑀩𑀳𑀽𑀦𑀺 𑀭𑀸𑀚𑀓𑀺𑀘𑁆𑀘𑀸𑀦𑀺, 𑀢𑀸𑀦𑀺 [𑀬𑀸𑀦𑀺 (𑀲𑀻. 𑀧𑀻.)] 𑀦𑀸𑀕 𑀓𑀭𑀺𑀲𑁆𑀲𑀲𑀺.

𑁪. 𑀲𑀸 𑀦𑀽𑀦𑀲𑀸 𑀓𑀧𑀡𑀺𑀓𑀸, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀺.

𑁫. 𑀓𑀸 𑀦𑀼 𑀢𑁂 𑀲𑀸 𑀫𑀳𑀸𑀦𑀸𑀕, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀺.

𑁬. 𑀫𑀸𑀢𑀸 𑀫𑁂 𑀲𑀸 𑀫𑀳𑀸𑀭𑀸𑀚, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀺𑀓𑀸;

𑀔𑀸𑀡𑀼𑀁 𑀧𑀸𑀤𑁂𑀦 𑀖𑀝𑁆𑀝𑁂𑀢𑀺, 𑀕𑀺𑀭𑀺𑀁 𑀘𑀡𑁆𑀟𑁄𑀭𑀡𑀁 𑀧𑀢𑀺.

𑁭. 𑀫𑀼𑀜𑁆𑀘𑀣𑁂𑀢𑀁 𑀫𑀳𑀸𑀦𑀸𑀕𑀁, 𑀬𑁄𑀬𑀁 𑀪𑀭𑀢𑀺 𑀫𑀸𑀢𑀭𑀁;

𑀲𑀫𑁂𑀢𑀼 𑀫𑀸𑀢𑀭𑀸 𑀦𑀸𑀕𑁄, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺.

𑁮. 𑀫𑀼𑀢𑁆𑀢𑁄 𑀘 𑀩𑀦𑁆𑀥𑀦𑀸 𑀦𑀸𑀕𑁄, 𑀫𑀼𑀢𑁆𑀢𑀫𑀸𑀤𑀸𑀬 𑀓𑀼𑀜𑁆𑀚𑀭𑁄 [𑀓𑀸𑀲𑀺𑀭𑀸𑀚𑁂𑀦 𑀧𑁂𑀲𑀺𑀢𑁄 (𑀲𑀻. 𑀲𑁆𑀬𑀸.), 𑀫𑀼𑀢𑁆𑀢𑁄 𑀤𑀸𑀫𑀸𑀢𑁄 𑀓𑀼𑀜𑁆𑀚𑀭𑁄 (𑀧𑀻. 𑀲𑀻. 𑀦𑀺𑀬𑁆𑀬)];

𑀫𑀼𑀳𑀼𑀢𑁆𑀢𑀁 𑀅𑀲𑁆𑀲𑀸𑀲𑀬𑀺𑀢𑁆𑀯𑀸 [𑀯𑀺𑀲𑁆𑀲𑀫𑀺𑀢𑁆𑀯𑀸𑀦 (𑀲𑀻.)], 𑀅𑀕𑀫𑀸 𑀬𑁂𑀦 𑀧𑀩𑁆𑀩𑀢𑁄.

𑁯. 𑀢𑀢𑁄 𑀲𑁄 𑀦𑀴𑀺𑀦𑀺𑀁 [𑀦𑀺𑀮𑀺𑀦𑀁 (𑀲𑁆𑀬𑀸.)] 𑀕𑀦𑁆𑀢𑁆𑀯𑀸, 𑀲𑀻𑀢𑀁 𑀓𑀼𑀜𑁆𑀚𑀭𑀲𑁂𑀯𑀺𑀢𑀁;

𑀲𑁄𑀡𑁆𑀟𑀸𑀬𑀽𑀤𑀓𑀫𑀸𑀳𑀢𑁆𑀯𑀸 [𑀫𑀸𑀳𑀺𑀢𑁆𑀯𑀸 (𑀲𑁆𑀬𑀸. 𑀓.)], 𑀫𑀸𑀢𑀭𑀁 𑀅𑀪𑀺𑀲𑀺𑀜𑁆𑀘𑀣.

𑁧𑁦. 𑀓𑁄𑀬 𑀅𑀦𑀭𑀺𑀬𑁄 𑀤𑁂𑀯𑁄, 𑀅𑀓𑀸𑀮𑁂𑀦𑀧𑀺 𑀯𑀲𑁆𑀲𑀢𑀺 [𑀅𑀓𑀸𑀮𑁂𑀦 𑀧𑀯𑀲𑁆𑀲𑀢𑀺 (𑀲𑀻. 𑀲𑁆𑀬𑀸.), 𑀅𑀓𑀸𑀮𑁂𑀦’𑀢𑀺𑀯𑀲𑁆𑀲𑀢𑀺 (𑀧𑀻.)];

𑀕𑀢𑁄 𑀫𑁂 𑀅𑀢𑁆𑀭𑀚𑁄 𑀧𑀼𑀢𑁆𑀢𑁄, 𑀬𑁄 𑀫𑀬𑁆𑀳𑀁 𑀧𑀭𑀺𑀘𑀸𑀭𑀓𑁄.

𑁧𑁧. 𑀉𑀝𑁆𑀞𑁂𑀳𑀺 𑀅𑀫𑁆𑀫 𑀓𑀺𑀁 𑀲𑁂𑀲𑀺, 𑀆𑀕𑀢𑁄 𑀢𑁆𑀬𑀸𑀳𑀫𑀢𑁆𑀭𑀚𑁄;

𑀫𑀼𑀢𑁆𑀢𑁄𑀫𑁆𑀳𑀺 𑀓𑀸𑀲𑀺𑀭𑀸𑀚𑁂𑀦, 𑀯𑁂𑀤𑁂𑀳𑁂𑀦 𑀬𑀲𑀲𑁆𑀲𑀺𑀦𑀸.

𑁧𑁨. 𑀘𑀺𑀭𑀁 𑀚𑀻𑀯𑀢𑀼 𑀲𑁄 𑀭𑀸𑀚𑀸, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄;

𑀬𑁄 𑀫𑁂 𑀧𑀼𑀢𑁆𑀢𑀁 𑀧𑀫𑁄𑀘𑁂𑀲𑀺, 𑀲𑀤𑀸 𑀯𑀼𑀤𑁆𑀥𑀸𑀧𑀘𑀸𑀬𑀺𑀓𑀦𑁆𑀢𑀺.

𑀫𑀸𑀢𑀼𑀧𑁄𑀲𑀓𑀚𑀸𑀢𑀓𑀁 𑀧𑀞𑀫𑀁.

𑁪𑁫𑁬. 𑀚𑀼𑀡𑁆𑀳𑀚𑀸𑀢𑀓𑀁 (𑁨)

𑁧𑁩. 𑀲𑀼𑀡𑁄𑀳𑀺 𑀫𑀬𑁆𑀳𑀁 𑀯𑀘𑀦𑀁 𑀚𑀦𑀺𑀦𑁆𑀤, 𑀅𑀢𑁆𑀣𑁂𑀦 𑀚𑀼𑀡𑁆𑀳𑀫𑁆𑀳𑀺 𑀇𑀥𑀸𑀦𑀼𑀧𑀢𑁆𑀢𑁄;

𑀦 𑀩𑁆𑀭𑀸𑀳𑁆𑀫𑀡𑁂 𑀅𑀤𑁆𑀥𑀺𑀓𑁂 𑀢𑀺𑀝𑁆𑀞𑀫𑀸𑀦𑁂, 𑀕𑀦𑁆𑀢𑀩𑁆𑀩 [𑀕𑀦𑁆𑀢𑀩𑁆𑀬 (𑀓.)] 𑀫𑀸𑀳𑀼 𑀤𑁆𑀯𑀺𑀧𑀤𑀺𑀦𑁆𑀤 [𑀤𑀺𑀧𑀤𑀸𑀦 (𑀲𑀻. 𑀧𑀻.), 𑀤𑁆𑀯𑀺𑀧𑀤𑀸𑀦 (𑀲𑁆𑀬𑀸.)] 𑀲𑁂𑀝𑁆𑀞.

𑁧𑁪. 𑀲𑀼𑀡𑁄𑀫𑀺 𑀢𑀺𑀝𑁆𑀞𑀸𑀫𑀺 𑀯𑀤𑁂𑀳𑀺 𑀩𑁆𑀭𑀳𑁆𑀫𑁂, 𑀬𑁂𑀦𑀸𑀲𑀺 [𑀬𑁂𑀦𑀸𑀧𑀺 (𑀲𑁆𑀬𑀸. 𑀓.)] 𑀅𑀢𑁆𑀣𑁂𑀦 𑀇𑀥𑀸𑀦𑀼𑀧𑀢𑁆𑀢𑁄;

𑀓𑀁 𑀯𑀸 𑀢𑁆𑀯𑀫𑀢𑁆𑀣𑀁 𑀫𑀬𑀺 𑀧𑀢𑁆𑀣𑀬𑀸𑀦𑁄, 𑀇𑀥𑀸𑀕𑀫𑀸 𑀩𑁆𑀭𑀳𑁆𑀫𑁂 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺.

𑁧𑁫. 𑀤𑀤𑀸𑀳𑀺 𑀫𑁂 𑀕𑀸𑀫𑀯𑀭𑀸𑀦𑀺 𑀧𑀜𑁆𑀘, 𑀤𑀸𑀲𑀻𑀲𑀢𑀁 𑀲𑀢𑁆𑀢 𑀕𑀯𑀁𑀲𑀢𑀸𑀦𑀺;

𑀧𑀭𑁄𑀲𑀳𑀲𑁆𑀲𑀜𑁆𑀘 𑀲𑀼𑀯𑀡𑁆𑀡𑀦𑀺𑀓𑁆𑀔𑁂, 𑀪𑀭𑀺𑀬𑀸 𑀘 𑀫𑁂 𑀲𑀸𑀤𑀺𑀲𑀻 𑀤𑁆𑀯𑁂 𑀤𑀤𑀸𑀳𑀺.

𑁧𑁬. 𑀢𑀧𑁄 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧𑁄, 𑀫𑀦𑁆𑀢𑀸 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀘𑀺𑀢𑁆𑀢𑀭𑀽𑀧𑀸;

𑀬𑀓𑁆𑀔𑀸 𑀦𑀼 [𑀬𑀓𑁆𑀔𑀸 𑀯 (𑀲𑀻. 𑀧𑀻.)] 𑀢𑁂 𑀅𑀲𑁆𑀲𑀯𑀸 𑀲𑀦𑁆𑀢𑀺 𑀓𑁂𑀘𑀺, 𑀅𑀢𑁆𑀣𑀁 𑀯𑀸 𑀫𑁂 𑀅𑀪𑀺𑀚𑀸𑀦𑀸𑀲𑀺 𑀓𑀢𑁆𑀢𑀁.

𑁧𑁭. 𑀦 𑀫𑁂 𑀢𑀧𑁄 𑀅𑀢𑁆𑀣𑀺 𑀦 𑀘𑀸𑀧𑀺 𑀫𑀦𑁆𑀢𑀸, 𑀬𑀓𑁆𑀔𑀸𑀧𑀺 𑀫𑁂 𑀅𑀲𑁆𑀲𑀯𑀸 𑀦𑀢𑁆𑀣𑀺 𑀓𑁂𑀘𑀺;

𑀅𑀢𑁆𑀣𑀫𑁆𑀧𑀺 𑀢𑁂 𑀦𑀸𑀪𑀺𑀚𑀸𑀦𑀸𑀫𑀺 𑀓𑀢𑁆𑀢𑀁, 𑀧𑀼𑀩𑁆𑀩𑁂 𑀘 𑀔𑁄 [𑀧𑀼𑀩𑁆𑀩𑁂𑀯 𑀔𑁄 (𑀲𑁆𑀬𑀸. 𑀓.)] 𑀲𑀗𑁆𑀕𑀢𑀺𑀫𑀢𑁆𑀢𑀫𑀸𑀲𑀺.

𑁧𑁮. 𑀧𑀞𑀫𑀁 𑀇𑀤𑀁 𑀤𑀲𑁆𑀲𑀦𑀁 𑀚𑀸𑀦𑀢𑁄 𑀫𑁂, 𑀦 𑀢𑀸𑀪𑀺𑀚𑀸𑀦𑀸𑀫𑀺 𑀇𑀢𑁄 𑀧𑀼𑀭𑀢𑁆𑀣𑀸;

𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁, 𑀓𑀤𑀸 𑀓𑀼𑀳𑀺𑀁 𑀯𑀸 𑀅𑀳𑀼 𑀲𑀗𑁆𑀕𑀫𑁄 𑀦𑁄.

𑁧𑁯. 𑀕𑀦𑁆𑀥𑀸𑀭𑀭𑀸𑀚𑀲𑁆𑀲 𑀧𑀼𑀭𑀫𑁆𑀳𑀺 𑀭𑀫𑁆𑀫𑁂, 𑀅𑀯𑀲𑀺𑀫𑁆𑀳𑀲𑁂 𑀢𑀓𑁆𑀓𑀲𑀻𑀮𑀸𑀬𑀁 𑀤𑁂𑀯;

𑀢𑀢𑁆𑀣𑀦𑁆𑀥𑀓𑀸𑀭𑀫𑁆𑀳𑀺 𑀢𑀺𑀫𑀻𑀲𑀺𑀓𑀸𑀬𑀁 [𑀢𑀺𑀫𑀺𑀲𑁆𑀲𑀺𑀓𑀸𑀬𑀁 (𑀲𑀻. 𑀅𑀝𑁆𑀞.), 𑀢𑀺𑀫𑀺𑀲𑁆𑀲𑀓𑀸𑀬𑀁 (𑀲𑁆𑀬𑀸.)], 𑀅𑀁𑀲𑁂𑀦 𑀅𑀁𑀲𑀁 𑀲𑀫𑀖𑀝𑁆𑀝𑀬𑀺𑀫𑁆𑀳.

𑁨𑁦. 𑀢𑁂 𑀢𑀢𑁆𑀣 𑀞𑀢𑁆𑀯𑀸𑀦 𑀉𑀪𑁄 𑀚𑀦𑀺𑀦𑁆𑀤, 𑀲𑀸𑀭𑀸𑀡𑀺𑀬𑀁 [𑀲𑀸𑀭𑀡𑀻𑀬𑀁 (𑀓.)] 𑀯𑀻𑀢𑀺𑀲𑀸𑀭𑀬𑀺𑀫𑁆𑀳 [𑀯𑀻𑀢𑀺𑀲𑀸𑀭𑀺𑀫𑁆𑀳 (𑀲𑀻. 𑀲𑁆𑀬𑀸. 𑀧𑀻.)] 𑀢𑀢𑁆𑀣;

𑀲𑀸𑀬𑁂𑀯 𑀦𑁄 𑀲𑀗𑁆𑀕𑀢𑀺𑀫𑀢𑁆𑀢𑀫𑀸𑀲𑀺, 𑀢𑀢𑁄 𑀦 𑀧𑀘𑁆𑀙𑀸 𑀦 𑀧𑀼𑀭𑁂 𑀅𑀳𑁄𑀲𑀺.

𑁨𑁧. 𑀬𑀤𑀸 𑀓𑀤𑀸𑀘𑀺 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂, 𑀲𑀫𑀸𑀕𑀫𑁄 𑀲𑀧𑁆𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀦 𑀧𑀡𑁆𑀟𑀺𑀢𑀸 𑀲𑀗𑁆𑀕𑀢𑀺𑀲𑀦𑁆𑀣𑀯𑀸𑀦𑀺, 𑀧𑀼𑀩𑁆𑀩𑁂 𑀓𑀢𑀁 𑀯𑀸𑀧𑀺 𑀯𑀺𑀦𑀸𑀲𑀬𑀦𑁆𑀢𑀺.

𑁨𑁨. 𑀩𑀸𑀮𑀸𑀯 [𑀩𑀸𑀮𑀸 𑀘 (𑀲𑀻. 𑀲𑁆𑀬𑀸. 𑀧𑀻.)] 𑀔𑁄 𑀲𑀗𑁆𑀕𑀢𑀺𑀲𑀦𑁆𑀣𑀯𑀸𑀦𑀺, 𑀧𑀼𑀩𑁆𑀩𑁂 𑀓𑀢𑀁 𑀯𑀸𑀧𑀺 𑀯𑀺𑀦𑀸𑀲𑀬𑀦𑁆𑀢𑀺;

𑀩𑀳𑀼𑀫𑁆𑀧𑀺 𑀩𑀸𑀮𑁂𑀲𑀼 𑀓𑀢𑀁 𑀯𑀺𑀦𑀲𑁆𑀲𑀢𑀺, 𑀢𑀣𑀸 𑀳𑀺 𑀩𑀸𑀮𑀸 𑀅𑀓𑀢𑀜𑁆𑀜𑀼𑀭𑀽𑀧𑀸.

𑁨𑁩. 𑀥𑀻𑀭𑀸 𑀘 𑀔𑁄 𑀲𑀗𑁆𑀕𑀢𑀺𑀲𑀦𑁆𑀣𑀯𑀸𑀦𑀺, 𑀧𑀼𑀩𑁆𑀩𑁂 𑀓𑀢𑀁 𑀯𑀸𑀧𑀺 𑀦 𑀦𑀸𑀲𑀬𑀦𑁆𑀢𑀺;

𑀅𑀧𑁆𑀧𑀫𑁆𑀧𑀺 𑀥𑀻𑀭𑁂𑀲𑀼 𑀓𑀢𑀁 𑀦 𑀦𑀲𑁆𑀲𑀢𑀺, 𑀢𑀣𑀸 𑀳𑀺 𑀥𑀻𑀭𑀸 𑀲𑀼𑀓𑀢𑀜𑁆𑀜𑀼𑀭𑀽𑀧𑀸.

𑁨𑁪. 𑀤𑀤𑀸𑀫𑀺 𑀢𑁂 𑀕𑀸𑀫𑀯𑀭𑀸𑀦𑀺 𑀧𑀜𑁆𑀘, 𑀤𑀸𑀲𑀻𑀲𑀢𑀁 𑀲𑀢𑁆𑀢 𑀕𑀯𑀁𑀲𑀢𑀸𑀦𑀺;

𑀧𑀭𑁄𑀲𑀳𑀲𑁆𑀲𑀜𑁆𑀘 𑀲𑀼𑀯𑀡𑁆𑀡𑀦𑀺𑀓𑁆𑀔𑁂, 𑀪𑀭𑀺𑀬𑀸 𑀘 𑀢𑁂 𑀲𑀸𑀤𑀺𑀲𑀻 𑀤𑁆𑀯𑁂 𑀤𑀤𑀸𑀫𑀺.

𑁨𑁫. 𑀏𑀯𑀁 𑀲𑀢𑀁 𑀳𑁄𑀢𑀺 𑀲𑀫𑁂𑀘𑁆𑀘 𑀭𑀸𑀚, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦𑀁;

𑀆𑀧𑀽𑀭𑀢𑀻 𑀓𑀸𑀲𑀺𑀧𑀢𑀻 𑀢𑀣𑀸𑀳𑀁, 𑀢𑀬𑀸𑀧𑀺 𑀫𑁂 𑀲𑀗𑁆𑀕𑀫𑁄 𑀅𑀚𑁆𑀚 𑀮𑀤𑁆𑀥𑁄𑀢𑀺.

𑀚𑀼𑀡𑁆𑀳𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁪𑁫𑁭. 𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀚𑀸𑀢𑀓𑀁 (𑁩)

𑁨𑁬. 𑀬𑀲𑁄𑀓𑀭𑁄 𑀧𑀼𑀜𑁆𑀜𑀓𑀭𑁄𑀳𑀫𑀲𑁆𑀫𑀺, 𑀲𑀤𑀸𑀢𑁆𑀣𑀼𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀫𑀕𑁆𑀕𑀸𑀭𑀳𑁄 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑁄, 𑀥𑀫𑁆𑀫𑁄 𑀅𑀳𑀁 𑀤𑁂𑀳𑀺 𑀅𑀥𑀫𑁆𑀫 𑀫𑀕𑁆𑀕𑀁.

𑁨𑁭. 𑀅𑀥𑀫𑁆𑀫𑀬𑀸𑀦𑀁 𑀤𑀴𑁆𑀳𑀫𑀸𑀭𑀼𑀳𑀺𑀢𑁆𑀯𑀸, 𑀅𑀲𑀦𑁆𑀢𑀲𑀦𑁆𑀢𑁄 𑀩𑀮𑀯𑀸𑀳𑀫𑀲𑁆𑀫𑀺;

𑀲 𑀓𑀺𑀲𑁆𑀲 𑀳𑁂𑀢𑀼𑀫𑁆𑀳𑀺 𑀢𑀯𑀚𑁆𑀚 𑀤𑀚𑁆𑀚𑀁, 𑀫𑀕𑁆𑀕𑀁 𑀅𑀳𑀁 𑀥𑀫𑁆𑀫 𑀅𑀤𑀺𑀦𑁆𑀦𑀧𑀼𑀩𑁆𑀩𑀁.

𑁨𑁮. 𑀥𑀫𑁆𑀫𑁄 𑀳𑀯𑁂 𑀧𑀸𑀢𑀼𑀭𑀳𑁄𑀲𑀺 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀅𑀥𑀫𑁆𑀫𑁄 𑀉𑀤𑀧𑀸𑀤𑀺 𑀮𑁄𑀓𑁂;

𑀚𑁂𑀝𑁆𑀞𑁄 𑀘 𑀲𑁂𑀝𑁆𑀞𑁄 𑀘 𑀲𑀦𑀦𑁆𑀢𑀦𑁄 𑀘, 𑀉𑀬𑁆𑀬𑀸𑀳𑀺 𑀚𑁂𑀝𑁆𑀞𑀲𑁆𑀲 𑀓𑀦𑀺𑀝𑁆𑀞 𑀫𑀕𑁆𑀕𑀸.

𑁨𑁯. 𑀦 𑀬𑀸𑀘𑀦𑀸𑀬 𑀦𑀧𑀺 𑀧𑀸𑀢𑀺𑀭𑀽𑀧𑀸, 𑀦 𑀅𑀭𑀳𑀢𑀸 [𑀦 𑀅𑀭𑀳𑀢𑀺 (𑀲𑀻. 𑀧𑀻.), 𑀅𑀭𑀳𑀢𑀺 (𑀓.)] 𑀢𑁂𑀳𑀁 𑀤𑀤𑁂𑀬𑁆𑀬𑀁 𑀫𑀕𑁆𑀕𑀁;

𑀬𑀼𑀤𑁆𑀥𑀜𑁆𑀘 𑀦𑁄 𑀳𑁄𑀢𑀼 𑀉𑀪𑀺𑀦𑁆𑀦𑀫𑀚𑁆𑀚, 𑀬𑀼𑀤𑁆𑀥𑀫𑁆𑀳𑀺 𑀬𑁄 𑀚𑁂𑀲𑁆𑀲𑀢𑀺 𑀢𑀲𑁆𑀲 𑀫𑀕𑁆𑀕𑁄.

𑁩𑁦. 𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀯𑀺𑀲𑀝𑁄𑀳𑀫𑀲𑁆𑀫𑀺, 𑀫𑀳𑀩𑁆𑀩𑀮𑁄 𑀅𑀫𑀺𑀢𑀬𑀲𑁄 𑀅𑀢𑀼𑀮𑁆𑀬𑁄;

𑀕𑀼𑀡𑁂𑀳𑀺 𑀲𑀩𑁆𑀩𑁂𑀳𑀺 𑀉𑀧𑁂𑀢𑀭𑀽𑀧𑁄, 𑀥𑀫𑁆𑀫𑁄 𑀅𑀥𑀫𑁆𑀫 𑀢𑁆𑀯𑀁 𑀓𑀣𑀁 𑀯𑀺𑀚𑁂𑀲𑁆𑀲𑀲𑀺.

𑁩𑁧. 𑀮𑁄𑀳𑁂𑀦 𑀯𑁂 𑀳𑀜𑁆𑀜𑀢𑀺 𑀚𑀸𑀢𑀭𑀽𑀧𑀁, 𑀦 𑀚𑀸𑀢𑀭𑀽𑀧𑁂𑀦 𑀳𑀦𑀦𑁆𑀢𑀺 𑀮𑁄𑀳𑀁;

𑀲𑀘𑁂 𑀅𑀥𑀫𑁆𑀫𑁄 𑀳𑀜𑁆𑀙𑀢𑀺 [𑀳𑀜𑁆𑀜𑀢𑀺 (𑀲𑀻. 𑀲𑁆𑀬𑀸.), 𑀳𑀜𑁆𑀜𑀺𑀢𑀺 (𑀓𑀢𑁆𑀣𑀘𑀺)] 𑀥𑀫𑁆𑀫𑀫𑀚𑁆𑀚, 𑀅𑀬𑁄 𑀲𑀼𑀯𑀡𑁆𑀡𑀁 𑀯𑀺𑀬 𑀤𑀲𑁆𑀲𑀦𑁂𑀬𑁆𑀬𑀁.

𑁩𑁨. 𑀲𑀘𑁂 𑀢𑀼𑀯𑀁 𑀬𑀼𑀤𑁆𑀥𑀩𑀮𑁄 𑀅𑀥𑀫𑁆𑀫 [𑀬𑀼𑀤𑁆𑀥𑀩𑀮𑁄’𑀲𑀺’𑀥𑀫𑁆𑀫 (𑀓. 𑀲𑀻.), 𑀬𑀼𑀤𑁆𑀥𑀩𑀮𑁄’𑀲’𑀥𑀫𑁆𑀫 (𑀧𑀻.)], 𑀦 𑀢𑀼𑀬𑁆𑀳 𑀯𑀼𑀟𑁆𑀠𑀸 [𑀯𑀤𑁆𑀥𑀸 (𑀲𑀻. 𑀧𑀻.)] 𑀘 𑀕𑀭𑀽 𑀘 𑀅𑀢𑁆𑀣𑀺;

𑀫𑀕𑁆𑀕𑀜𑁆𑀘 𑀢𑁂 𑀤𑀫𑁆𑀫𑀺 𑀧𑀺𑀬𑀸𑀧𑁆𑀧𑀺𑀬𑁂𑀦, 𑀯𑀸𑀘𑀸𑀤𑀼𑀭𑀼𑀢𑁆𑀢𑀸𑀦𑀺𑀧𑀺 𑀢𑁂 𑀔𑀫𑀸𑀫𑀺.

𑁩𑁩. 𑀇𑀤𑀜𑁆𑀘 𑀲𑀼𑀢𑁆𑀯𑀸 𑀯𑀘𑀦𑀁 𑀅𑀥𑀫𑁆𑀫𑁄, 𑀅𑀯𑀁𑀲𑀺𑀭𑁄 𑀧𑀢𑀺𑀢𑁄 𑀉𑀤𑁆𑀥𑀧𑀸𑀤𑁄;

‘‘𑀬𑀼𑀤𑁆𑀥𑀢𑁆𑀣𑀺𑀓𑁄 𑀘𑁂 𑀦 𑀮𑀪𑀸𑀫𑀺 𑀬𑀼𑀤𑁆𑀥𑀁’’, 𑀏𑀢𑁆𑀢𑀸𑀯𑀢𑀸 𑀳𑁄𑀢𑀺 𑀳𑀢𑁄 𑀅𑀥𑀫𑁆𑀫𑁄.

𑁩𑁪. 𑀔𑀦𑁆𑀢𑀻𑀩𑀮𑁄 𑀬𑀼𑀤𑁆𑀥𑀩𑀮𑀁 𑀯𑀺𑀚𑁂𑀢𑁆𑀯𑀸, 𑀳𑀦𑁆𑀢𑁆𑀯𑀸 𑀅𑀥𑀫𑁆𑀫𑀁 𑀦𑀺𑀳𑀦𑀺𑀢𑁆𑀯 [𑀯𑀺𑀳𑀦𑀺𑀢𑁆𑀯𑀸 (𑀓.)] 𑀪𑀽𑀫𑁆𑀬𑀸;

𑀧𑀸𑀬𑀸𑀲𑀺 𑀯𑀺𑀢𑁆𑀢𑁄 [𑀘𑀺𑀢𑁆𑀢𑁄 (𑀲𑁆𑀬𑀸.)] 𑀅𑀪𑀺𑀭𑀼𑀬𑁆𑀳 𑀲𑀦𑁆𑀤𑀦𑀁, 𑀫𑀕𑁆𑀕𑁂𑀦𑁂𑀯 𑀅𑀢𑀺𑀩𑀮𑁄 𑀲𑀘𑁆𑀘𑀦𑀺𑀓𑁆𑀓𑀫𑁄.

𑁩𑁫. 𑀫𑀸𑀢𑀸 𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘, 𑀅𑀲𑀫𑁆𑀫𑀸𑀦𑀺𑀢𑀸 𑀬𑀲𑁆𑀲 𑀲𑀓𑁂 𑀅𑀕𑀸𑀭𑁂;

𑀇𑀥𑁂𑀯 𑀦𑀺𑀓𑁆𑀔𑀺𑀧𑁆𑀧 𑀲𑀭𑀻𑀭𑀤𑁂𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀁 𑀯𑀚𑀦𑁆𑀢𑀺 𑀢𑁂 [𑀯𑀚𑀦𑁆𑀢𑀺 (𑀲𑀻. 𑀧𑀻.)];

𑀬𑀣𑀸 𑀅𑀥𑀫𑁆𑀫𑁄 𑀧𑀢𑀺𑀢𑁄 𑀅𑀯𑀁𑀲𑀺𑀭𑁄.

𑁩𑁬. 𑀫𑀸𑀢𑀸 𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘, 𑀲𑀼𑀲𑀫𑁆𑀫𑀸𑀦𑀺𑀢𑀸 𑀬𑀲𑁆𑀲 𑀲𑀓𑁂 𑀅𑀕𑀸𑀭𑁂;

𑀇𑀥𑁂𑀯 𑀦𑀺𑀓𑁆𑀔𑀺𑀧𑁆𑀧 𑀲𑀭𑀻𑀭𑀤𑁂𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁 𑀯𑀚𑀦𑁆𑀢𑀺 𑀢𑁂;

𑀬𑀣𑀸𑀧𑀺 𑀥𑀫𑁆𑀫𑁄 𑀅𑀪𑀺𑀭𑀼𑀬𑁆𑀳 𑀲𑀦𑁆𑀤𑀦𑀦𑁆𑀢𑀺.

𑀥𑀫𑁆𑀫𑀤𑁂𑀯𑀧𑀼𑀢𑁆𑀢𑀚𑀸𑀢𑀓𑀁 [𑀥𑀫𑁆𑀫𑀚𑀸𑀢𑀓𑀁 (𑀲𑀻. 𑀧𑀻.)] 𑀢𑀢𑀺𑀬𑀁.

𑁪𑁫𑁮. 𑀉𑀤𑀬𑀚𑀸𑀢𑀓𑀁 (𑁪)

𑁩𑁭. 𑀏𑀓𑀸 𑀦𑀺𑀲𑀺𑀦𑁆𑀦𑀸 𑀲𑀼𑀘𑀺 𑀲𑀜𑁆𑀜𑀢𑀽𑀭𑀽, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀅𑀦𑀺𑀦𑁆𑀤𑀺𑀢𑀗𑁆𑀕𑀻;

𑀬𑀸𑀘𑀸𑀫𑀺 𑀢𑀁 𑀓𑀺𑀦𑁆𑀦𑀭𑀦𑁂𑀢𑁆𑀢𑀘𑀓𑁆𑀔𑀼, 𑀇𑀫𑁂𑀓𑀭𑀢𑁆𑀢𑀺𑀁 𑀉𑀪𑀬𑁄 𑀯𑀲𑁂𑀫.

𑁩𑁮. 𑀑𑀓𑀺𑀡𑁆𑀡𑀦𑁆𑀢𑀭𑀧𑀭𑀺𑀔𑀁, 𑀤𑀴𑁆𑀳𑀫𑀝𑁆𑀝𑀸𑀮𑀓𑁄𑀝𑁆𑀞𑀓𑀁;

𑀭𑀓𑁆𑀔𑀺𑀢𑀁 𑀔𑀕𑁆𑀕𑀳𑀢𑁆𑀣𑁂𑀳𑀺, 𑀤𑀼𑀧𑁆𑀧𑀯𑁂𑀲𑀫𑀺𑀤𑀁 𑀧𑀼𑀭𑀁.

𑁩𑁯. 𑀤𑀳𑀭𑀲𑁆𑀲 𑀬𑀼𑀯𑀺𑀦𑁄 𑀘𑀸𑀧𑀺, 𑀆𑀕𑀫𑁄 𑀘 𑀦 𑀯𑀺𑀚𑁆𑀚𑀢𑀺;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀲𑀗𑁆𑀕𑀫𑀁 𑀇𑀘𑁆𑀙𑀲𑁂 𑀫𑀬𑀸.

𑁪𑁦. 𑀬𑀓𑁆𑀔𑁄𑀳𑀫𑀲𑁆𑀫𑀺 𑀓𑀮𑁆𑀬𑀸𑀡𑀺, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂 [𑀢𑀯𑀦𑁆𑀢𑀺𑀓𑀁 (𑀲𑀻. 𑀧𑀻.)];

𑀢𑁆𑀯𑀁 𑀫𑀁 𑀦𑀦𑁆𑀤𑀬 [𑀦𑀦𑁆𑀤𑀲𑁆𑀲𑀼 (𑀲𑁆𑀬𑀸. 𑀓.)] 𑀪𑀤𑁆𑀤𑀦𑁆𑀢𑁂, 𑀧𑀼𑀡𑁆𑀡𑀓𑀁𑀲𑀁 𑀤𑀤𑀸𑀫𑀺 𑀢𑁂.

𑁪𑁧. 𑀤𑁂𑀯𑀁 𑀯 𑀬𑀓𑁆𑀔𑀁 𑀅𑀣 𑀯𑀸 𑀫𑀦𑀼𑀲𑁆𑀲𑀁, 𑀦 𑀧𑀢𑁆𑀣𑀬𑁂 𑀉𑀤𑀬𑀫𑀢𑀺𑀘𑁆𑀘 𑀅𑀜𑁆𑀜𑀁;

𑀕𑀘𑁆𑀙𑁂𑀯 𑀢𑁆𑀯𑀁 𑀬𑀓𑁆𑀔 𑀫𑀳𑀸𑀦𑀼𑀪𑀸𑀯, 𑀫𑀸 𑀘𑀲𑁆𑀲𑀼 𑀕𑀦𑁆𑀢𑁆𑀯𑀸 𑀧𑀼𑀦𑀭𑀸𑀯𑀚𑀺𑀢𑁆𑀣.

𑁪𑁨. 𑀬𑀸 𑀲𑀸 𑀭𑀢𑀺 𑀉𑀢𑁆𑀢𑀫𑀸 𑀓𑀸𑀫𑀪𑁄𑀕𑀺𑀦𑀁, 𑀬𑀁 𑀳𑁂𑀢𑀼 𑀲𑀢𑁆𑀢𑀸 𑀯𑀺𑀲𑀫𑀁 𑀘𑀭𑀦𑁆𑀢𑀺;

𑀫𑀸 𑀢𑀁 𑀭𑀢𑀺𑀁 𑀚𑀻𑀬𑀺 𑀢𑀼𑀯𑀁 𑀲𑀼𑀘𑀺𑀫𑁆𑀳𑀺 𑀢𑁂, 𑀤𑀤𑀸𑀫𑀺 𑀢𑁂 𑀭𑀽𑀧𑀺𑀬𑀁 𑀓𑀁𑀲𑀧𑀽𑀭𑀁.

𑁪𑁩. 𑀦𑀸𑀭𑀺𑀁 𑀦𑀭𑁄 𑀦𑀺𑀚𑁆𑀛𑀧𑀬𑀁 𑀥𑀦𑁂𑀦, 𑀉𑀓𑁆𑀓𑀁𑀲𑀢𑀻 𑀬𑀢𑁆𑀣 𑀓𑀭𑁄𑀢𑀺 𑀙𑀦𑁆𑀤𑀁;

𑀯𑀺𑀧𑀘𑁆𑀘𑀦𑀻𑀓𑁄 𑀢𑀯 𑀤𑁂𑀯𑀥𑀫𑁆𑀫𑁄, 𑀧𑀘𑁆𑀘𑀓𑁆𑀔𑀢𑁄 𑀣𑁄𑀓𑀢𑀭𑁂𑀦 𑀏𑀲𑀺.

𑁪𑁪. 𑀆𑀬𑀼 𑀘 𑀯𑀡𑁆𑀡𑁄 𑀘 [𑀆𑀬𑀼𑀁 𑀘 𑀯𑀡𑁆𑀡𑀁 𑀘 (𑀓. 𑀲𑀻. 𑀧𑀻.)] 𑀫𑀦𑀼𑀲𑁆𑀲𑀮𑁄𑀓𑁂, 𑀦𑀺𑀳𑀻𑀬𑀢𑀺 𑀫𑀦𑀼𑀚𑀸𑀦𑀁 𑀲𑀼𑀕𑁆𑀕𑀢𑁆𑀢𑁂;

𑀢𑁂𑀦𑁂𑀯 𑀯𑀡𑁆𑀡𑁂𑀦 𑀥𑀦𑀫𑁆𑀧𑀺 𑀢𑀼𑀬𑁆𑀳𑀁, 𑀦𑀺𑀳𑀻𑀬𑀢𑀺 𑀚𑀺𑀡𑁆𑀡𑀢𑀭𑀸𑀲𑀺 𑀅𑀚𑁆𑀚.

𑁪𑁫. 𑀏𑀯𑀁 𑀫𑁂 𑀧𑁂𑀓𑁆𑀔𑀫𑀸𑀦𑀲𑁆𑀲, 𑀭𑀸𑀚𑀧𑀼𑀢𑁆𑀢𑀺 𑀬𑀲𑀲𑁆𑀲𑀺𑀦𑀺;

𑀳𑀸𑀬𑀢𑁂𑀯 𑀢𑀯 [𑀳𑀸𑀬𑀢𑁂 𑀯𑀢 𑀢𑁂 (𑀲𑀻. 𑀲𑁆𑀬𑀸. 𑀓.), 𑀳𑀸𑀬𑀢𑁂𑀯 𑀢𑀢𑁄 (𑀧𑀻.)] 𑀯𑀡𑁆𑀡𑁄, 𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂.

𑁪𑁬. 𑀇𑀫𑀺𑀦𑀸𑀯 𑀢𑁆𑀯𑀁 𑀯𑀬𑀲𑀸, 𑀭𑀸𑀚𑀧𑀼𑀢𑁆𑀢𑀺 𑀲𑀼𑀫𑁂𑀥𑀲𑁂;

𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑁂𑀬𑁆𑀬𑀸𑀲𑀺, 𑀪𑀺𑀬𑁆𑀬𑁄 𑀯𑀡𑁆𑀡𑀯𑀢𑀻 𑀲𑀺𑀬𑀸.

𑁪𑁭. 𑀤𑁂𑀯𑀸 𑀦 𑀚𑀻𑀭𑀦𑁆𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸, 𑀕𑀢𑁆𑀢𑁂𑀲𑀼 𑀢𑁂𑀲𑀁 𑀯𑀮𑀺𑀬𑁄 𑀦 𑀳𑁄𑀦𑁆𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀬𑀓𑁆𑀔 𑀫𑀳𑀸𑀦𑀼𑀪𑀸𑀯, 𑀓𑀣𑀁 𑀦𑀼 𑀤𑁂𑀯𑀸𑀦 [𑀓𑀣𑀁 𑀦 𑀤𑁂𑀯𑀸𑀦𑀁 (𑀧𑀻.)] 𑀲𑀭𑀻𑀭𑀤𑁂𑀳𑁄.

𑁪𑁮. 𑀤𑁂𑀯𑀸 𑀦 𑀚𑀻𑀭𑀦𑁆𑀢𑀺 𑀬𑀣𑀸 𑀫𑀦𑀼𑀲𑁆𑀲𑀸, 𑀕𑀢𑁆𑀢𑁂𑀲𑀼 𑀢𑁂𑀲𑀁 𑀯𑀮𑀺𑀬𑁄 𑀦 𑀳𑁄𑀦𑁆𑀢𑀺;

𑀲𑀼𑀯𑁂 𑀲𑀼𑀯𑁂 𑀪𑀺𑀬𑁆𑀬𑀢𑀭𑁄𑀯 [𑀪𑀺𑀬𑁆𑀬𑀢𑀭𑁄 𑀘 (𑀓.)] 𑀢𑁂𑀲𑀁, 𑀤𑀺𑀩𑁆𑀩𑁄 𑀘 𑀯𑀡𑁆𑀡𑁄 𑀯𑀺𑀧𑀼𑀮𑀸 𑀘 𑀪𑁄𑀕𑀸.

𑁪𑁯. 𑀓𑀺𑀁𑀲𑀽𑀥 𑀪𑀻𑀢𑀸 𑀚𑀦𑀢𑀸 𑀅𑀦𑁂𑀓𑀸, 𑀫𑀕𑁆𑀕𑁄 𑀘 𑀦𑁂𑀓𑀸𑀬𑀢𑀦𑀁 𑀧𑀯𑀼𑀢𑁆𑀢𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀬𑀓𑁆𑀔 𑀫𑀳𑀸𑀦𑀼𑀪𑀸𑀯, 𑀓𑀢𑁆𑀣𑀝𑁆𑀞𑀺𑀢𑁄 𑀧𑀭𑀮𑁄𑀓𑀁 𑀦 𑀪𑀸𑀬𑁂.

𑁫𑁦. 𑀯𑀸𑀘𑀁 𑀫𑀦𑀜𑁆𑀘 𑀧𑀡𑀺𑀥𑀸𑀬 𑀲𑀫𑁆𑀫𑀸, 𑀓𑀸𑀬𑁂𑀦 𑀧𑀸𑀧𑀸𑀦𑀺 𑀅𑀓𑀼𑀩𑁆𑀩𑀫𑀸𑀦𑁄;

𑀩𑀳𑀼𑀦𑁆𑀦𑀧𑀸𑀦𑀁 𑀖𑀭𑀫𑀸𑀯𑀲𑀦𑁆𑀢𑁄, 𑀲𑀤𑁆𑀥𑁄 𑀫𑀼𑀤𑀽 𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽;

𑀲𑀗𑁆𑀕𑀸𑀳𑀓𑁄 𑀲𑀔𑀺𑀮𑁄 𑀲𑀡𑁆𑀳𑀯𑀸𑀘𑁄, 𑀏𑀢𑁆𑀣𑀝𑁆𑀞𑀺𑀢𑁄 𑀧𑀭𑀮𑁄𑀓𑀁 𑀦 𑀪𑀸𑀬𑁂.

𑁫𑁧. 𑀅𑀦𑀼𑀲𑀸𑀲𑀲𑀺 𑀫𑀁 𑀬𑀓𑁆𑀔, 𑀬𑀣𑀸 𑀫𑀸𑀢𑀸 𑀬𑀣𑀸 𑀧𑀺𑀢𑀸;

𑀉𑀴𑀸𑀭𑀯𑀡𑁆𑀡𑀁 𑀧𑀼𑀘𑁆𑀙𑀸𑀫𑀺, 𑀓𑁄 𑀦𑀼 𑀢𑁆𑀯𑀫𑀲𑀺 𑀲𑀼𑀩𑁆𑀭𑀳𑀸.

𑁫𑁨. 𑀉𑀤𑀬𑁄𑀳𑀫𑀲𑁆𑀫𑀺 𑀓𑀮𑁆𑀬𑀸𑀡𑀺, 𑀲𑀗𑁆𑀓𑀭𑀢𑁆𑀢𑀸 𑀇𑀥𑀸𑀕𑀢𑁄 [𑀲𑀗𑁆𑀕𑀭𑀢𑁆𑀣𑀸 𑀇𑀥𑀸𑀕𑀢𑁄 (𑀲𑀻. 𑀧𑀻.), 𑀲𑀗𑁆𑀕𑀭𑀢𑁆𑀣𑀸𑀬𑀺𑀥𑀸𑀕𑀢𑁄 (𑀲𑁆𑀬𑀸.)];

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫𑀺, 𑀫𑀼𑀢𑁆𑀢𑁄𑀲𑁆𑀫𑀺 𑀢𑀯 𑀲𑀗𑁆𑀓𑀭𑀸 [𑀲𑀗𑁆𑀕𑀭𑀸 (𑀲𑀻. 𑀲𑁆𑀬𑀸. 𑀧𑀻.)].

𑁫𑁩. 𑀲𑀘𑁂 𑀔𑁄 𑀢𑁆𑀯𑀁 𑀉𑀤𑀬𑁄𑀲𑀺, 𑀲𑀗𑁆𑀓𑀭𑀢𑁆𑀢𑀸 𑀇𑀥𑀸𑀕𑀢𑁄;

𑀅𑀦𑀼𑀲𑀸𑀲 𑀫𑀁 𑀭𑀸𑀚𑀧𑀼𑀢𑁆𑀢, 𑀬𑀣𑀸𑀲𑁆𑀲 𑀧𑀼𑀦 𑀲𑀗𑁆𑀕𑀫𑁄.

𑁫𑁪. 𑀅𑀢𑀺𑀧𑀢𑀢𑀺 [𑀅𑀥𑀺𑀧𑀢𑀢𑀻 (𑀲𑀻. 𑀧𑀻.)] 𑀯𑀬𑁄 𑀔𑀡𑁄 𑀢𑀣𑁂𑀯, 𑀞𑀸𑀦𑀁 𑀦𑀢𑁆𑀣𑀺 𑀥𑀼𑀯𑀁 𑀘𑀯𑀦𑁆𑀢𑀺 𑀲𑀢𑁆𑀢𑀸;

𑀧𑀭𑀺𑀚𑀺𑀬𑁆𑀬𑀢𑀺 𑀅𑀤𑁆𑀥𑀼𑀯𑀁 𑀲𑀭𑀻𑀭𑀁, 𑀉𑀤𑀬𑁂 𑀫𑀸 𑀧𑀫𑀸𑀤 [𑀫𑀸 𑀧𑀫𑀸𑀤𑀁 (𑀲𑀻.)] 𑀘𑀭𑀲𑁆𑀲𑀼 𑀥𑀫𑁆𑀫𑀁.

𑁫𑁫. 𑀓𑀲𑀺𑀡𑀸 𑀧𑀣𑀯𑀻 𑀥𑀦𑀲𑁆𑀲 𑀧𑀽𑀭𑀸, 𑀏𑀓𑀲𑁆𑀲𑁂𑀯 𑀲𑀺𑀬𑀸 𑀅𑀦𑀜𑁆𑀜𑀥𑁂𑀬𑁆𑀬𑀸;

𑀢𑀜𑁆𑀘𑀸𑀧𑀺 𑀚𑀳𑀢𑀺 [𑀚𑀳𑀸𑀢𑀺 (𑀲𑀻. 𑀲𑁆𑀬𑀸. 𑀧𑀻.), 𑀚𑀳𑀸𑀢𑀻 (?)] 𑀅𑀯𑀻𑀢𑀭𑀸𑀕𑁄, 𑀉𑀤𑀬𑁂 𑀫𑀸 𑀧𑀫𑀸𑀤 𑀘𑀭𑀲𑁆𑀲𑀼 𑀥𑀫𑁆𑀫𑀁.

𑁫𑁬. 𑀫𑀸𑀢𑀸 𑀘 𑀧𑀺𑀢𑀸 𑀘 𑀪𑀸𑀢𑀭𑁄 𑀘, 𑀪𑀭𑀺𑀬𑀸 𑀬𑀸𑀧𑀺 𑀥𑀦𑁂𑀦 𑀳𑁄𑀢𑀺 𑀓𑀻𑀢𑀸 [𑀪𑀭𑀺𑀬𑀸𑀧𑀺 𑀥𑀦𑁂𑀦 𑀳𑁄𑀦𑁆𑀢𑀺 𑀅𑀢𑀺𑀢𑁆𑀢𑀸 (𑀓.)];

𑀢𑁂 𑀘𑀸𑀧𑀺 𑀚𑀳𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁, 𑀉𑀤𑀬𑁂 𑀫𑀸 𑀧𑀫𑀸𑀤 𑀘𑀭𑀲𑁆𑀲𑀼 𑀥𑀫𑁆𑀫𑀁.

𑁫𑁭. 𑀓𑀸𑀬𑁄 𑀧𑀭𑀪𑁄𑀚𑀦𑀦𑁆𑀢𑀺 𑀜𑀢𑁆𑀯𑀸 [𑀓𑀸𑀬𑁄 𑀘 𑀧𑀭𑀪𑁄𑀚𑀦𑀁 𑀯𑀺𑀤𑀺𑀢𑁆𑀯𑀸 (𑀓.)], 𑀲𑀁𑀲𑀸𑀭𑁂 𑀲𑀼𑀕𑀢𑀺𑀜𑁆𑀘 𑀤𑀼𑀕𑁆𑀕𑀢𑀺𑀜𑁆𑀘 [𑀲𑀼𑀕𑀢𑀻 𑀘 𑀤𑀼𑀕𑁆𑀕𑀢𑀻 𑀘 (𑀲𑀻. 𑀲𑁆𑀬𑀸. 𑀧𑀻.), 𑀲𑀼𑀕𑁆𑀕𑀢𑀺𑀁 𑀤𑀼𑀕𑁆𑀕𑀢𑀺𑀜𑁆𑀘 (𑀓.)];

𑀇𑀢𑁆𑀢𑀭𑀯𑀸𑀲𑁄𑀢𑀺 𑀚𑀸𑀦𑀺𑀬𑀸𑀦, 𑀉𑀤𑀬𑁂 𑀫𑀸 𑀧𑀫𑀸𑀤 𑀘𑀭𑀲𑁆𑀲𑀼 𑀥𑀫𑁆𑀫𑀁.

𑁫𑁮. 𑀲𑀸𑀥𑀼 𑀪𑀸𑀲𑀢𑀺𑀬𑀁 [𑀪𑀸𑀲𑀢𑀬𑀁 (𑀲𑀻. 𑀧𑀻.)] 𑀬𑀓𑁆𑀔𑁄, 𑀅𑀧𑁆𑀧𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀁;

𑀓𑀲𑀺𑀭𑀜𑁆𑀘 𑀧𑀭𑀺𑀢𑁆𑀢𑀜𑁆𑀘, 𑀢𑀜𑁆𑀘 𑀤𑀼𑀓𑁆𑀔𑁂𑀦 𑀲𑀁𑀬𑀼𑀢𑀁;

𑀲𑀸𑀳𑀁 𑀏𑀓𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀳𑀺𑀢𑁆𑀯𑀸 𑀓𑀸𑀲𑀺𑀁 𑀲𑀼𑀭𑀼𑀦𑁆𑀥𑀦𑀦𑁆𑀢𑀺.

𑀉𑀤𑀬𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁪𑁫𑁯. 𑀧𑀸𑀦𑀻𑀬𑀚𑀸𑀢𑀓𑀁 (𑁫)

𑁫𑁯. 𑀫𑀺𑀢𑁆𑀢𑁄 𑀫𑀺𑀢𑁆𑀢𑀲𑁆𑀲 𑀧𑀸𑀦𑀻𑀬𑀁, 𑀅𑀤𑀺𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀺𑀲𑀁;

𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁦. 𑀧𑀭𑀤𑀸𑀭𑀜𑁆𑀘 𑀤𑀺𑀲𑁆𑀯𑀸𑀦, 𑀙𑀦𑁆𑀤𑁄 𑀫𑁂 𑀉𑀤𑀧𑀚𑁆𑀚𑀣 [𑀉𑀧𑀧𑀚𑁆𑀚𑀣 (𑀲𑁆𑀬𑀸. 𑀓.)];

𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁧. 𑀧𑀺𑀢𑀭𑀁 𑀫𑁂 𑀫𑀳𑀸𑀭𑀸𑀚, 𑀘𑁄𑀭𑀸 𑀅𑀕𑀡𑁆𑀳𑀼 [𑀅𑀕𑀡𑁆𑀳𑀼𑀁 (𑀲𑀻. 𑀧𑀻.), 𑀅𑀕𑀡𑁆𑀳𑀺 (𑀓.)] 𑀓𑀸𑀦𑀦𑁂;

𑀢𑁂𑀲𑀸𑀳𑀁 𑀧𑀼𑀘𑁆𑀙𑀺𑀢𑁄 𑀚𑀸𑀦𑀁, 𑀅𑀜𑁆𑀜𑀣𑀸 𑀦𑀁 𑀯𑀺𑀬𑀸𑀓𑀭𑀺𑀁.

𑁬𑁨. 𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁, 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁩. 𑀧𑀸𑀡𑀸𑀢𑀺𑀧𑀸𑀢𑀫𑀓𑀭𑀼𑀁, 𑀲𑁄𑀫𑀬𑀸𑀕𑁂 𑀉𑀧𑀝𑁆𑀞𑀺𑀢𑁂;

𑀢𑁂𑀲𑀸𑀳𑀁 𑀲𑀫𑀦𑀼𑀜𑁆𑀜𑀸𑀲𑀺𑀁, 𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁.

𑁬𑁪. 𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸, 𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁;

𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁫. 𑀲𑀼𑀭𑀸𑀫𑁂𑀭𑀬𑀫𑀸𑀥𑀼𑀓𑀸 [𑀫𑀥𑀼𑀓𑀸 (𑀲𑀻. 𑀲𑁆𑀬𑀸. 𑀧𑀻.)], 𑀬𑁂 𑀚𑀦𑀸 𑀧𑀞𑀫𑀸𑀲𑀼 𑀦𑁄;

𑀩𑀳𑀽𑀦𑀁 𑀢𑁂 𑀅𑀦𑀢𑁆𑀣𑀸𑀬, 𑀫𑀚𑁆𑀚𑀧𑀸𑀦𑀫𑀓𑀧𑁆𑀧𑀬𑀼𑀁.

𑁬𑁬. 𑀢𑁂𑀲𑀸𑀳𑀁 𑀲𑀫𑀦𑀼𑀜𑁆𑀜𑀸𑀲𑀺𑀁, 𑀢𑁂𑀦 𑀧𑀘𑁆𑀙𑀸 𑀯𑀺𑀚𑀺𑀕𑀼𑀘𑁆𑀙𑀺𑀁;

𑀢𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸, 𑀫𑀸 𑀧𑀼𑀦 𑀅𑀓𑀭𑀁 𑀧𑀸𑀧𑀁;

𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄 𑀅𑀳𑀁.

𑁬𑁭. 𑀥𑀺𑀭𑀢𑁆𑀣𑀼 𑀲𑀼𑀩𑀳𑀽 𑀓𑀸𑀫𑁂, 𑀤𑀼𑀕𑁆𑀕𑀦𑁆𑀥𑁂 𑀩𑀳𑀼𑀓𑀡𑁆𑀝𑀓𑁂;