𑁧𑁨. 𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑁄

𑁪𑁬𑁪. 𑀘𑀽𑀴𑀓𑀼𑀡𑀸𑀮𑀚𑀸𑀢𑀓𑀁 (𑁧)

𑁧. 𑀮𑀼𑀤𑁆𑀥𑀸𑀦𑀁 [𑀔𑀼𑀤𑁆𑀤𑀸𑀦𑀁 (𑀲𑀻. 𑀲𑁆𑀬𑀸. 𑀧𑀻.)] 𑀮𑀳𑀼𑀘𑀺𑀢𑁆𑀢𑀸𑀦𑀁, 𑀅𑀓𑀢𑀜𑁆𑀜𑀽𑀦 𑀤𑀼𑀩𑁆𑀪𑀺𑀦𑀁;

𑀦𑀸𑀤𑁂𑀯𑀲𑀢𑁆𑀢𑁄 𑀧𑀼𑀭𑀺𑀲𑁄, 𑀣𑀻𑀦𑀁 𑀲𑀤𑁆𑀥𑀸𑀢𑀼𑀫𑀭𑀳𑀢𑀺.

𑁨. 𑀦 𑀢𑀸 𑀧𑀚𑀸𑀦𑀦𑁆𑀢𑀺 𑀓𑀢𑀁 𑀦 𑀓𑀺𑀘𑁆𑀘𑀁, 𑀦 𑀫𑀸𑀢𑀭𑀁 𑀧𑀺𑀢𑀭𑀁 𑀪𑀸𑀢𑀭𑀁 𑀯𑀸;

𑀅𑀦𑀭𑀺𑀬𑀸 𑀲𑀫𑀢𑀺𑀓𑁆𑀓𑀦𑁆𑀢𑀥𑀫𑁆𑀫𑀸, 𑀲𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀯𑀚𑀦𑁆𑀢𑀺.

𑁩. 𑀘𑀺𑀭𑀸𑀦𑀼𑀯𑀼𑀝𑁆𑀞𑀫𑁆𑀧𑀺 [𑀘𑀺𑀭𑀸𑀦𑀼𑀯𑀼𑀢𑁆𑀣𑀫𑁆𑀧𑀺 (𑀲𑀻. 𑀧𑀻.)] 𑀧𑀺𑀬𑀁 𑀫𑀦𑀸𑀧𑀁, 𑀅𑀦𑀼𑀓𑀫𑁆𑀧𑀓𑀁 𑀧𑀸𑀡𑀲𑀫𑀫𑁆𑀧𑀺 𑀪𑀢𑁆𑀢𑀼𑀁 [𑀲𑀦𑁆𑀢𑀁 (𑀲𑀻. 𑀲𑁆𑀬𑀸. 𑀧𑀻.)];

𑀆𑀯𑀸𑀲𑀼 𑀓𑀺𑀘𑁆𑀘𑁂𑀲𑀼 𑀘 𑀦𑀁 𑀚𑀳𑀦𑁆𑀢𑀺, 𑀢𑀲𑁆𑀫𑀸𑀳𑀫𑀺𑀢𑁆𑀣𑀻𑀦𑀁 𑀦 𑀯𑀺𑀲𑁆𑀲𑀲𑀸𑀫𑀺.

𑁪. 𑀣𑀻𑀦𑀜𑁆𑀳𑀺 𑀘𑀺𑀢𑁆𑀢𑀁 𑀬𑀣𑀸 𑀯𑀸𑀦𑀭𑀲𑁆𑀲, 𑀓𑀦𑁆𑀦𑀧𑁆𑀧𑀓𑀦𑁆𑀦𑀁 𑀬𑀣𑀸 𑀭𑀼𑀓𑁆𑀔𑀙𑀸𑀬𑀸;

𑀘𑀮𑀸𑀘𑀮𑀁 𑀳𑀤𑀬𑀫𑀺𑀢𑁆𑀣𑀺𑀬𑀸𑀦𑀁, 𑀘𑀓𑁆𑀓𑀲𑁆𑀲 𑀦𑁂𑀫𑀺 𑀯𑀺𑀬 𑀧𑀭𑀺𑀯𑀢𑁆𑀢𑀢𑀺.

𑁫. 𑀬𑀤𑀸 𑀢𑀸 𑀧𑀲𑁆𑀲𑀦𑁆𑀢𑀺 𑀲𑀫𑁂𑀓𑁆𑀔𑀫𑀸𑀦𑀸, 𑀆𑀤𑁂𑀬𑁆𑀬𑀭𑀽𑀧𑀁 𑀧𑀼𑀭𑀺𑀲𑀲𑁆𑀲 𑀯𑀺𑀢𑁆𑀢𑀁;

𑀲𑀡𑁆𑀳𑀸𑀳𑀺 𑀯𑀸𑀘𑀸𑀳𑀺 𑀦𑀬𑀦𑁆𑀢𑀺 𑀫𑁂𑀦𑀁, 𑀓𑀫𑁆𑀩𑁄𑀚𑀓𑀸 𑀚𑀮𑀚𑁂𑀦𑁂𑀯 𑀅𑀲𑁆𑀲𑀁.

𑁬. 𑀬𑀤𑀸 𑀦 𑀧𑀲𑁆𑀲𑀦𑁆𑀢𑀺 𑀲𑀫𑁂𑀓𑁆𑀔𑀫𑀸𑀦𑀸, 𑀆𑀤𑁂𑀬𑁆𑀬𑀭𑀽𑀧𑀁 𑀧𑀼𑀭𑀺𑀲𑀲𑁆𑀲 𑀯𑀺𑀢𑁆𑀢𑀁;

𑀲𑀫𑀦𑁆𑀢𑀢𑁄 𑀦𑀁 𑀧𑀭𑀺𑀯𑀚𑁆𑀚𑀬𑀦𑁆𑀢𑀺, 𑀢𑀺𑀡𑁆𑀡𑁄 𑀦𑀤𑀻𑀧𑀸𑀭𑀕𑀢𑁄𑀯 𑀓𑀼𑀮𑁆𑀮𑀁.

𑁭. 𑀲𑀺𑀮𑁂𑀲𑀽𑀧𑀫𑀸 𑀲𑀺𑀔𑀺𑀭𑀺𑀯 𑀲𑀩𑁆𑀩𑀪𑀓𑁆𑀔𑀸, 𑀢𑀺𑀓𑁆𑀔𑀫𑀸𑀬𑀸 𑀦𑀤𑀻𑀭𑀺𑀯 𑀲𑀻𑀖𑀲𑁄𑀢𑀸;

𑀲𑁂𑀯𑀦𑁆𑀢𑀺 𑀳𑁂𑀢𑀸 𑀧𑀺𑀬𑀫𑀧𑁆𑀧𑀺𑀬𑀜𑁆𑀘, 𑀦𑀸𑀯𑀸 𑀬𑀣𑀸 𑀑𑀭𑀓𑀽𑀮𑀁 𑀧𑀭𑀜𑁆𑀘.

𑁮. 𑀦 𑀢𑀸 𑀏𑀓𑀲𑁆𑀲 𑀦 𑀤𑁆𑀯𑀺𑀦𑁆𑀦𑀁, 𑀆𑀧𑀡𑁄𑀯 𑀧𑀲𑀸𑀭𑀺𑀢𑁄;

𑀬𑁄 𑀢𑀸 𑀫𑀬𑁆𑀳𑀦𑁆𑀢𑀺 𑀫𑀜𑁆𑀜𑁂𑀬𑁆𑀬, 𑀯𑀸𑀢𑀁 𑀚𑀸𑀮𑁂𑀦 𑀩𑀸𑀥𑀬𑁂 [𑀩𑀦𑁆𑀥𑀬𑁂 (𑀲𑁆𑀬𑀸. 𑀓.)].

𑁯. 𑀬𑀣𑀸 𑀦𑀤𑀻 𑀘 𑀧𑀦𑁆𑀣𑁄 𑀘, 𑀧𑀸𑀦𑀸𑀕𑀸𑀭𑀁 𑀲𑀪𑀸 𑀧𑀧𑀸;

𑀏𑀯𑀁 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺 [𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀧𑀼𑀩𑁆𑀩𑀤𑁆𑀥𑀸𑀧𑀭𑀤𑁆𑀥𑀁 𑀯𑀺𑀧𑀭𑀺𑀬𑀸𑀬𑁂𑀦 𑀤𑀺𑀲𑁆𑀲𑀢𑀺 (𑀓.)].

𑁧𑁦. 𑀖𑀢𑀸𑀲𑀦𑀲𑀫𑀸 𑀏𑀢𑀸, 𑀓𑀡𑁆𑀳𑀲𑀧𑁆𑀧𑀲𑀺𑀭𑀽𑀧𑀫𑀸;

𑀕𑀸𑀯𑁄 𑀩𑀳𑀺𑀢𑀺𑀡𑀲𑁆𑀲𑁂𑀯, 𑀑𑀫𑀲𑀦𑁆𑀢𑀺 𑀯𑀭𑀁 𑀯𑀭𑀁.

𑁧𑁧. 𑀖𑀢𑀸𑀲𑀦𑀁 𑀓𑀼𑀜𑁆𑀚𑀭𑀁 𑀓𑀡𑁆𑀳𑀲𑀧𑁆𑀧𑀁, 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀁 𑀧𑀫𑀤𑀸 𑀘 𑀲𑀩𑁆𑀩𑀸;

𑀏𑀢𑁂 𑀦𑀭𑁄 𑀦𑀺𑀘𑁆𑀘𑀬𑀢𑁄 [𑀦𑀺𑀘𑁆𑀘𑀬𑀢𑁆𑀢𑁄 (𑀲𑀻. 𑀧𑀻.)] 𑀪𑀚𑁂𑀣, 𑀢𑁂𑀲𑀁 𑀳𑀯𑁂 𑀤𑀼𑀩𑁆𑀩𑀺𑀤𑀼 𑀲𑀩𑁆𑀩𑀪𑀸𑀯𑁄 [𑀲𑀘𑁆𑀘𑀪𑀸𑀯𑁄 (𑀲𑁆𑀬𑀸.)].

𑁧𑁨. 𑀦𑀘𑁆𑀘𑀦𑁆𑀢𑀯𑀡𑁆𑀡𑀸 𑀦 𑀩𑀳𑀽𑀦𑀁 𑀓𑀦𑁆𑀢𑀸, 𑀦 𑀤𑀓𑁆𑀔𑀺𑀡𑀸 𑀧𑀫𑀤𑀸 𑀲𑁂𑀯𑀺𑀢𑀩𑁆𑀩𑀸;

𑀦 𑀧𑀭𑀲𑁆𑀲 𑀪𑀭𑀺𑀬𑀸 𑀦 𑀥𑀦𑀲𑁆𑀲 𑀳𑁂𑀢𑀼, 𑀏𑀢𑀺𑀢𑁆𑀣𑀺𑀬𑁄 𑀧𑀜𑁆𑀘 𑀦 𑀲𑁂𑀯𑀺𑀢𑀩𑁆𑀩𑀸𑀢𑀺.

𑀘𑀽𑀴𑀓𑀼𑀡𑀸𑀮𑀚𑀸𑀢𑀓𑀁 𑀧𑀞𑀫𑀁.

𑁪𑁬𑁫. 𑀪𑀤𑁆𑀤𑀲𑀸𑀮𑀚𑀸𑀢𑀓𑀁 (𑁨)

𑁧𑁩. 𑀓𑀸 𑀢𑁆𑀯𑀁 𑀲𑀼𑀤𑁆𑀥𑁂𑀳𑀺 𑀯𑀢𑁆𑀣𑁂𑀳𑀺, 𑀅𑀖𑁂 𑀯𑁂𑀳𑀸𑀬𑀲𑀁 [𑀯𑁂𑀳𑀸𑀲𑀬𑀁 (𑀲𑀻. 𑀧𑀻.)] 𑀞𑀺𑀢𑀸;

𑀓𑁂𑀦 𑀢𑁆𑀬𑀸𑀲𑁆𑀲𑀽𑀦𑀺 𑀯𑀢𑁆𑀢𑀦𑁆𑀢𑀺, 𑀓𑀼𑀢𑁄 𑀢𑀁 𑀪𑀬𑀫𑀸𑀕𑀢𑀁.

𑁧𑁪. 𑀢𑀯𑁂𑀯 𑀤𑁂𑀯 𑀯𑀺𑀚𑀺𑀢𑁂, 𑀪𑀤𑁆𑀤𑀲𑀸𑀮𑁄𑀢𑀺 𑀫𑀁 𑀯𑀺𑀤𑀽;

𑀲𑀝𑁆𑀞𑀺 [𑀲𑀝𑁆𑀞𑀺𑀁 (𑀲𑀻. 𑀧𑀻.)] 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀢𑀺𑀝𑁆𑀞𑀢𑁄 𑀧𑀽𑀚𑀺𑀢𑀲𑁆𑀲 𑀫𑁂.

𑁧𑁫. 𑀓𑀸𑀭𑀬𑀦𑁆𑀢𑀸 𑀦𑀕𑀭𑀸𑀦𑀺, 𑀅𑀕𑀸𑀭𑁂 𑀘 𑀤𑀺𑀲𑀫𑁆𑀧𑀢𑀺;

𑀯𑀺𑀯𑀺𑀥𑁂 𑀘𑀸𑀧𑀺 𑀧𑀸𑀲𑀸𑀤𑁂, 𑀦 𑀫𑀁 𑀢𑁂 𑀅𑀘𑁆𑀘𑀫𑀜𑁆𑀜𑀺𑀲𑀼𑀁;

𑀬𑀣𑁂𑀯 𑀫𑀁 𑀢𑁂 𑀧𑀽𑀚𑁂𑀲𑀼𑀁, 𑀢𑀣𑁂𑀯 𑀢𑁆𑀯𑀫𑁆𑀧𑀺 𑀧𑀽𑀚𑀬.

𑁧𑁬. 𑀢𑀁 𑀇𑀯𑀸𑀳𑀁 [𑀢𑀜𑁆𑀘 𑀅𑀳𑀁 (𑀲𑀻. 𑀲𑁆𑀬𑀸. 𑀧𑀻.)] 𑀦 𑀧𑀲𑁆𑀲𑀸𑀫𑀺, 𑀣𑀽𑀮𑀁 𑀓𑀸𑀬𑁂𑀦 𑀢𑁂 𑀤𑀼𑀫𑀁;

𑀆𑀭𑁄𑀳𑀧𑀭𑀺𑀡𑀸𑀳𑁂𑀦, 𑀅𑀪𑀺𑀭𑀽𑀧𑁄𑀲𑀺 𑀚𑀸𑀢𑀺𑀬𑀸.

𑁧𑁭. 𑀧𑀸𑀲𑀸𑀤𑀁 𑀓𑀸𑀭𑀬𑀺𑀲𑁆𑀲𑀸𑀫𑀺, 𑀏𑀓𑀢𑁆𑀣𑀫𑁆𑀪𑀁 𑀫𑀦𑁄𑀭𑀫𑀁;

𑀢𑀢𑁆𑀣 𑀢𑀁 𑀉𑀧𑀦𑁂𑀲𑁆𑀲𑀸𑀫𑀺, 𑀘𑀺𑀭𑀁 𑀢𑁂 𑀬𑀓𑁆𑀔 𑀚𑀻𑀯𑀺𑀢𑀁.

𑁧𑁮. 𑀏𑀯𑀁 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺, 𑀲𑀭𑀻𑀭𑁂𑀦 𑀯𑀺𑀦𑀸𑀪𑀸𑀯𑁄;

𑀧𑀼𑀣𑀼𑀲𑁄 𑀫𑀁 𑀯𑀺𑀓𑀦𑁆𑀢𑀺𑀢𑁆𑀯𑀸, 𑀔𑀡𑁆𑀟𑀲𑁄 𑀅𑀯𑀓𑀦𑁆𑀢𑀣.

𑁧𑁯. 𑀅𑀕𑁆𑀕𑁂 𑀘 𑀙𑁂𑀢𑁆𑀯𑀸 𑀫𑀚𑁆𑀛𑁂 𑀘, 𑀧𑀘𑁆𑀙𑀸 𑀫𑀽𑀮𑀫𑁆𑀳𑀺 𑀙𑀺𑀦𑁆𑀤𑀣 [𑀫𑀽𑀮𑀜𑁆𑀘 𑀙𑀺𑀦𑁆𑀤𑀣 (𑀲𑀻.), 𑀫𑀽𑀮𑀁 𑀯𑀺𑀙𑀺𑀦𑁆𑀤𑀣 (𑀧𑀻.)];

𑀏𑀯𑀁 𑀫𑁂 𑀙𑀺𑀚𑁆𑀚𑀫𑀸𑀦𑀲𑁆𑀲, 𑀦 𑀤𑀼𑀓𑁆𑀔𑀁 𑀫𑀭𑀡𑀁 𑀲𑀺𑀬𑀸.

𑁨𑁦. 𑀳𑀢𑁆𑀣𑀧𑀸𑀤𑀁 [𑀳𑀢𑁆𑀣𑀧𑀸𑀤𑁂 (𑀓.)] 𑀬𑀣𑀸 𑀙𑀺𑀦𑁆𑀤𑁂 [𑀙𑀺𑀦𑁆𑀦𑁂 (𑀓.)], 𑀓𑀡𑁆𑀡𑀦𑀸𑀲𑀜𑁆𑀘 𑀚𑀻𑀯𑀢𑁄;

𑀢𑀢𑁄 𑀧𑀘𑁆𑀙𑀸 𑀲𑀺𑀭𑁄 𑀙𑀺𑀦𑁆𑀤𑁂, 𑀢𑀁 𑀤𑀼𑀓𑁆𑀔𑀁 𑀫𑀭𑀡𑀁 𑀲𑀺𑀬𑀸.

𑁨𑁧. 𑀲𑀼𑀔𑀁 𑀦𑀼 𑀔𑀡𑁆𑀟𑀲𑁄 𑀙𑀺𑀦𑁆𑀦𑀁, 𑀪𑀤𑁆𑀤𑀲𑀸𑀮𑀯𑀦𑀧𑁆𑀧𑀢𑀺;

𑀓𑀺𑀁 𑀳𑁂𑀢𑀼 𑀓𑀺𑀁 𑀉𑀧𑀸𑀤𑀸𑀬, 𑀔𑀡𑁆𑀟𑀲𑁄 𑀙𑀺𑀦𑁆𑀦𑀫𑀺𑀘𑁆𑀙𑀲𑀺.

𑁨𑁨. 𑀬𑀜𑁆𑀘 𑀳𑁂𑀢𑀼𑀫𑀼𑀧𑀸𑀤𑀸𑀬, 𑀳𑁂𑀢𑀼𑀁 𑀥𑀫𑁆𑀫𑀽𑀧𑀲𑀁𑀳𑀺𑀢𑀁;

𑀔𑀡𑁆𑀟𑀲𑁄 𑀙𑀺𑀦𑁆𑀦𑀫𑀺𑀘𑁆𑀙𑀸𑀫𑀺, 𑀫𑀳𑀸𑀭𑀸𑀚 𑀲𑀼𑀡𑁄𑀳𑀺 𑀫𑁂.

𑁨𑁩. 𑀜𑀸𑀢𑀻 𑀫𑁂 𑀲𑀼𑀔𑀲𑀁𑀯𑀤𑁆𑀥𑀸, 𑀫𑀫 𑀧𑀲𑁆𑀲𑁂 𑀦𑀺𑀯𑀸𑀢𑀚𑀸;

𑀢𑁂𑀧𑀺𑀳𑀁 𑀉𑀧𑀳𑀺𑀁𑀲𑁂𑀬𑁆𑀬𑀁, 𑀧𑀭𑁂𑀲𑀁 𑀅𑀲𑀼𑀔𑁄𑀘𑀺𑀢𑀁.

𑁨𑁪. 𑀘𑁂𑀢𑁂𑀬𑁆𑀬𑀭𑀽𑀧𑀁 [𑀘𑁂𑀢𑀩𑁆𑀩𑀭𑀽𑀧𑀁 (𑀲𑀻. 𑀧𑀻.)] 𑀘𑁂𑀢𑁂𑀲𑀺, 𑀪𑀤𑁆𑀤𑀲𑀸𑀮𑀯𑀦𑀧𑁆𑀧𑀢𑀺;

𑀳𑀺𑀢𑀓𑀸𑀫𑁄𑀲𑀺 𑀜𑀸𑀢𑀻𑀦𑀁, 𑀅𑀪𑀬𑀁 𑀲𑀫𑁆𑀫 𑀤𑀫𑁆𑀫𑀺 𑀢𑁂𑀢𑀺.

𑀪𑀤𑁆𑀤𑀲𑀸𑀮𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁪𑁬𑁬. 𑀲𑀫𑀼𑀤𑁆𑀤𑀯𑀸𑀡𑀺𑀚𑀚𑀸𑀢𑀓𑀁 (𑁩)

𑁨𑁫. 𑀓𑀲𑀦𑁆𑀢𑀺 𑀯𑀧𑀦𑁆𑀢𑀺 𑀢𑁂 𑀚𑀦𑀸, 𑀫𑀦𑀼𑀚𑀸 𑀓𑀫𑁆𑀫𑀨𑀮𑀽𑀧𑀚𑀻𑀯𑀺𑀦𑁄;

𑀦𑀬𑀺𑀫𑀲𑁆𑀲 𑀤𑀻𑀧𑀓𑀲𑁆𑀲 𑀪𑀸𑀕𑀺𑀦𑁄, 𑀚𑀫𑁆𑀩𑀼𑀤𑀻𑀧𑀸 𑀇𑀤𑀫𑁂𑀯 𑀦𑁄 𑀯𑀭𑀁.

𑁨𑁬. 𑀢𑀺𑀧𑀜𑁆𑀘𑀭𑀢𑁆𑀢𑀽𑀧𑀕𑀢𑀫𑁆𑀳𑀺 𑀘𑀦𑁆𑀤𑁂, 𑀯𑁂𑀕𑁄 𑀫𑀳𑀸 𑀳𑁂𑀳𑀺𑀢𑀺 𑀲𑀸𑀕𑀭𑀲𑁆𑀲;

𑀉𑀧𑁆𑀮𑀯𑀺𑀲𑁆𑀲𑀁 𑀤𑀻𑀧𑀫𑀺𑀫𑀁 𑀉𑀴𑀸𑀭𑀁, 𑀫𑀸 𑀯𑁄 𑀯𑀥𑀻 𑀕𑀘𑁆𑀙𑀣 𑀮𑁂𑀡𑀫𑀜𑁆𑀜𑀁.

𑁨𑁭. 𑀦 𑀚𑀸𑀢𑀼𑀬𑀁 𑀲𑀸𑀕𑀭𑀯𑀸𑀭𑀺𑀯𑁂𑀕𑁄, 𑀉𑀧𑁆𑀮𑀯𑀺𑀲𑁆𑀲𑀁 𑀤𑀻𑀧𑀫𑀺𑀫𑀁 𑀉𑀴𑀸𑀭𑀁;

𑀢𑀁 𑀫𑁂 𑀦𑀺𑀫𑀺𑀢𑁆𑀢𑁂𑀳𑀺 𑀩𑀳𑀽𑀳𑀺 𑀤𑀺𑀝𑁆𑀞𑀁, 𑀫𑀸 𑀪𑁂𑀣 𑀓𑀺𑀁 𑀲𑁄𑀘𑀣 𑀫𑁄𑀤𑀣𑀯𑁆𑀳𑁄 [𑀫𑁄𑀤𑀣 𑀯𑁄 (𑀓.) 𑁬.𑁩𑁮 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀁 𑀧𑀲𑁆𑀲𑀺𑀢𑀩𑁆𑀩𑀁].

𑁨𑁮. 𑀧𑀳𑀽𑀢𑀪𑀓𑁆𑀔𑀁 𑀩𑀳𑀼𑀅𑀦𑁆𑀦𑀧𑀸𑀦𑀁, 𑀧𑀢𑁆𑀢𑀢𑁆𑀣 𑀆𑀯𑀸𑀲𑀫𑀺𑀫𑀁 𑀉𑀴𑀸𑀭𑀁;

𑀦 𑀯𑁄 𑀪𑀬𑀁 𑀧𑀝𑀺𑀧𑀲𑁆𑀲𑀸𑀫𑀺 𑀓𑀺𑀜𑁆𑀘𑀺, 𑀆𑀧𑀼𑀢𑁆𑀢𑀧𑀼𑀢𑁆𑀢𑁂𑀳𑀺 𑀧𑀫𑁄𑀤𑀣𑀯𑁆𑀳𑁄.

𑁨𑁯. 𑀬𑁄 𑀤𑁂𑀯𑁄𑀬𑀁 𑀤𑀓𑁆𑀔𑀺𑀡𑀸𑀬𑀁 [𑀤𑀓𑁆𑀔𑀺𑀡𑀲𑁆𑀲𑀁 (𑀲𑀻.)] 𑀤𑀺𑀲𑀸𑀬𑀁, 𑀔𑁂𑀫𑀦𑁆𑀢𑀺 𑀧𑀓𑁆𑀓𑁄𑀲𑀢𑀺 𑀢𑀲𑁆𑀲 𑀲𑀘𑁆𑀘𑀁;

𑀦 𑀉𑀢𑁆𑀢𑀭𑁄 𑀯𑁂𑀤𑀺 𑀪𑀬𑀸𑀪𑀬𑀲𑁆𑀲, 𑀫𑀸 𑀪𑁂𑀣 𑀓𑀺𑀁 𑀲𑁄𑀘𑀣 𑀫𑁄𑀤𑀣𑀯𑁆𑀳𑁄.

𑁩𑁦. 𑀬𑀣𑀸 𑀇𑀫𑁂 𑀯𑀺𑀧𑁆𑀧𑀯𑀤𑀦𑁆𑀢𑀺 𑀬𑀓𑁆𑀔𑀸, 𑀏𑀓𑁄 𑀪𑀬𑀁 𑀲𑀁𑀲𑀢𑀺 𑀔𑁂𑀫𑀫𑁂𑀓𑁄;

𑀢𑀤𑀺𑀗𑁆𑀖 𑀫𑀬𑁆𑀳𑀁 𑀯𑀘𑀦𑀁 𑀲𑀼𑀡𑀸𑀣, 𑀔𑀺𑀧𑁆𑀧𑀁 𑀮𑀳𑀼𑀁 𑀫𑀸 𑀯𑀺𑀦𑀲𑁆𑀲𑀺𑀫𑁆𑀳 𑀲𑀩𑁆𑀩𑁂.

𑁩𑁧. 𑀲𑀩𑁆𑀩𑁂 𑀲𑀫𑀸𑀕𑀫𑁆𑀫 𑀓𑀭𑁄𑀫 𑀦𑀸𑀯𑀁, 𑀤𑁄𑀡𑀺𑀁 𑀤𑀴𑁆𑀳𑀁 𑀲𑀩𑁆𑀩𑀬𑀦𑁆𑀢𑀽𑀧𑀧𑀦𑁆𑀦𑀁;

𑀲𑀘𑁂 𑀅𑀬𑀁 𑀤𑀓𑁆𑀔𑀺𑀡𑁄 𑀲𑀘𑁆𑀘𑀫𑀸𑀳, 𑀫𑁄𑀖𑀁 𑀧𑀝𑀺𑀓𑁆𑀓𑁄𑀲𑀢𑀺 𑀉𑀢𑁆𑀢𑀭𑁄𑀬𑀁;

𑀲𑀸 𑀘𑁂𑀯 𑀦𑁄 𑀳𑁂𑀳𑀺𑀢𑀺 𑀆𑀧𑀤𑀢𑁆𑀣𑀸, 𑀇𑀫𑀜𑁆𑀘 𑀤𑀻𑀧𑀁 𑀦 𑀧𑀭𑀺𑀘𑁆𑀘𑀚𑁂𑀫.

𑁩𑁨. 𑀲𑀘𑁂 𑀘 𑀔𑁄 𑀉𑀢𑁆𑀢𑀭𑁄 𑀲𑀘𑁆𑀘𑀫𑀸𑀳, 𑀫𑁄𑀖𑀁 𑀧𑀝𑀺𑀓𑁆𑀓𑁄𑀲𑀢𑀺 𑀤𑀓𑁆𑀔𑀺𑀡𑁄𑀬𑀁;

𑀢𑀫𑁂𑀯 𑀦𑀸𑀯𑀁 𑀅𑀪𑀺𑀭𑀼𑀬𑁆𑀳 𑀲𑀩𑁆𑀩𑁂, 𑀏𑀯𑀁 𑀫𑀬𑀁 𑀲𑁄𑀢𑁆𑀣𑀺 𑀢𑀭𑁂𑀫𑀼 𑀧𑀸𑀭𑀁.

𑁩𑁩. 𑀦 𑀯𑁂 𑀲𑀼𑀕𑀡𑁆𑀳𑀁 𑀧𑀞𑀫𑁂𑀦 𑀲𑁂𑀝𑁆𑀞𑀁, 𑀓𑀦𑀺𑀝𑁆𑀞𑀫𑀸𑀧𑀸𑀣𑀕𑀢𑀁 𑀕𑀳𑁂𑀢𑁆𑀯𑀸;

𑀬𑁄 𑀘𑀻𑀥 𑀢𑀘𑁆𑀙𑀁 [𑀫𑀚𑁆𑀛𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀯𑀺𑀘𑁂𑀬𑁆𑀬 𑀕𑀡𑁆𑀳𑀢𑀺 [𑀕𑀡𑁆𑀳𑀺 (𑀓.)], 𑀲 𑀯𑁂 𑀦𑀭𑁄 𑀲𑁂𑀝𑁆𑀞𑀫𑀼𑀧𑁂𑀢𑀺 𑀞𑀸𑀦𑀁.

𑁩𑁪. 𑀬𑀣𑀸𑀧𑀺 𑀢𑁂 𑀲𑀸𑀕𑀭𑀯𑀸𑀭𑀺𑀫𑀚𑁆𑀛𑁂, 𑀲𑀓𑀫𑁆𑀫𑀼𑀦𑀸 𑀲𑁄𑀢𑁆𑀣𑀺 𑀯𑀳𑀺𑀁𑀲𑀼 𑀯𑀸𑀡𑀺𑀚𑀸;

𑀅𑀦𑀸𑀕𑀢𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀬𑀸𑀦, 𑀅𑀧𑁆𑀧𑀫𑁆𑀧𑀺 𑀦𑀸𑀘𑁆𑀘𑁂𑀢𑀺 𑀲 𑀪𑀽𑀭𑀺𑀧𑀜𑁆𑀜𑁄.

𑁩𑁫. 𑀩𑀸𑀮𑀸 𑀘 𑀫𑁄𑀳𑁂𑀦 𑀭𑀲𑀸𑀦𑀼𑀕𑀺𑀤𑁆𑀥𑀸, 𑀅𑀦𑀸𑀕𑀢𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀬𑀢𑁆𑀣𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀻𑀤𑀦𑁆𑀢𑀺 𑀅𑀢𑁆𑀣𑀚𑀸𑀢𑁂, 𑀲𑀫𑀼𑀤𑁆𑀤𑀫𑀚𑁆𑀛𑁂 𑀬𑀣𑀸 𑀢𑁂 𑀫𑀦𑀼𑀲𑁆𑀲𑀸.

𑁩𑁬. 𑀅𑀦𑀸𑀕𑀢𑀁 𑀧𑀝𑀺𑀓𑀬𑀺𑀭𑀸𑀣 𑀓𑀺𑀘𑁆𑀘𑀁, ‘‘𑀫𑀸 𑀫𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀓𑀸𑀮𑁂 𑀩𑁆𑀬𑀥𑁂𑀲𑀺’’;

𑀢𑀁 𑀢𑀸𑀤𑀺𑀲𑀁 𑀧𑀝𑀺𑀓𑀢 [𑀧𑀝𑀺𑀓𑀢𑀁 (𑀓.), 𑀧𑀝𑀺𑀕𑀢 (𑀲𑀻. 𑀅𑀝𑁆𑀞.), 𑀧𑀝𑀺𑀓𑀘𑁆𑀘 (?)] 𑀓𑀺𑀘𑁆𑀘𑀓𑀸𑀭𑀺𑀁, 𑀦 𑀢𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀓𑀸𑀮𑁂 𑀩𑁆𑀬𑀥𑁂𑀢𑀻𑀢𑀺.

𑀲𑀫𑀼𑀤𑁆𑀤𑀯𑀸𑀡𑀺𑀚𑀚𑀸𑀢𑀓𑀁 𑀢𑀢𑀺𑀬𑀁.

𑁪𑁬𑁭. 𑀓𑀸𑀫𑀚𑀸𑀢𑀓𑀁 (𑁪)

𑁩𑁭. 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺.

𑁩𑁮. 𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀢𑀢𑁄 𑀦𑀁 𑀅𑀧𑀭𑀁 𑀓𑀸𑀫𑁂, 𑀥𑀫𑁆𑀫𑁂 𑀢𑀡𑁆𑀳𑀁𑀯 𑀯𑀺𑀦𑁆𑀤𑀢𑀺.

𑁩𑁯. 𑀕𑀯𑀁𑀯 𑀲𑀺𑀗𑁆𑀕𑀺𑀦𑁄 𑀲𑀺𑀗𑁆𑀕𑀁, 𑀯𑀟𑁆𑀠𑀫𑀸𑀦𑀲𑁆𑀲 𑀯𑀟𑁆𑀠𑀢𑀺;

𑀏𑀯𑀁 𑀫𑀦𑁆𑀤𑀲𑁆𑀲 𑀧𑁄𑀲𑀲𑁆𑀲, 𑀩𑀸𑀮𑀲𑁆𑀲 𑀅𑀯𑀺𑀚𑀸𑀦𑀢𑁄;

𑀪𑀺𑀬𑁆𑀬𑁄 𑀢𑀡𑁆𑀳𑀸 𑀧𑀺𑀧𑀸𑀲𑀸 𑀘, 𑀯𑀟𑁆𑀠𑀫𑀸𑀦𑀲𑁆𑀲 𑀯𑀟𑁆𑀠𑀢𑀺.

𑁪𑁦. 𑀧𑀣𑀩𑁆𑀬𑀸 𑀲𑀸𑀮𑀺𑀬𑀯𑀓𑀁, 𑀕𑀯𑀲𑁆𑀲𑀁 [𑀕𑀯𑀸𑀲𑀁 (𑀲𑀻. 𑀲𑁆𑀬𑀸. 𑀧𑀻.)] 𑀤𑀸𑀲𑀧𑁄𑀭𑀺𑀲𑀁;

𑀤𑀢𑁆𑀯𑀸 𑀘 [𑀤𑀢𑁆𑀯𑀸𑀧𑀺 (𑀲𑀻. 𑀲𑁆𑀬𑀸.), 𑀤𑀢𑁆𑀯𑀸 𑀯𑀸 (𑀧𑀻.)] 𑀦𑀸𑀮𑀫𑁂𑀓𑀲𑁆𑀲, 𑀇𑀢𑀺 𑀯𑀺𑀤𑁆𑀯𑀸 [𑀯𑀺𑀤𑁆𑀥𑀸 (𑀲𑁆𑀬𑀸.)] 𑀲𑀫𑀁 𑀘𑀭𑁂.

𑁪𑁧. 𑀭𑀸𑀚𑀸 𑀧𑀲𑀬𑁆𑀳 𑀧𑀣𑀯𑀺𑀁 𑀯𑀺𑀚𑀺𑀢𑁆𑀯𑀸, 𑀲𑀲𑀸𑀕𑀭𑀦𑁆𑀢𑀁 𑀫𑀳𑀺𑀫𑀸𑀯𑀲𑀦𑁆𑀢𑁄;

𑀑𑀭𑀁 𑀲𑀫𑀼𑀤𑁆𑀤𑀲𑁆𑀲 𑀅𑀢𑀺𑀢𑁆𑀢𑀭𑀽𑀧𑁄 [𑀅𑀢𑀺𑀢𑁆𑀢𑀺𑀭𑀽𑀧𑁄 (𑀓.)], 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲𑀧𑀺 𑀧𑀢𑁆𑀣𑀬𑁂𑀣.

𑁪𑁨. 𑀬𑀸𑀯 𑀅𑀦𑀼𑀲𑁆𑀲𑀭𑀁 𑀓𑀸𑀫𑁂, 𑀫𑀦𑀲𑀸 𑀢𑀺𑀢𑁆𑀢𑀺 𑀦𑀸𑀚𑁆𑀛𑀕𑀸;

𑀢𑀢𑁄 𑀦𑀺𑀯𑀢𑁆𑀢𑀸 𑀧𑀝𑀺𑀓𑀫𑁆𑀫 𑀤𑀺𑀲𑁆𑀯𑀸, 𑀢𑁂 𑀯𑁂 𑀲𑀼𑀢𑀺𑀢𑁆𑀢𑀸 𑀬𑁂 [𑀢𑀺𑀢𑁆𑀢𑀸 (𑀲𑀻. 𑀲𑁆𑀬𑀸. 𑀧𑀻.)] 𑀧𑀜𑁆𑀜𑀸𑀬 𑀢𑀺𑀢𑁆𑀢𑀸.

𑁪𑁩. 𑀧𑀜𑁆𑀜𑀸𑀬 𑀢𑀺𑀢𑁆𑀢𑀺𑀦𑀁 [𑀢𑀺𑀢𑁆𑀢𑀻𑀦𑀁 (𑀲𑀻. 𑀲𑁆𑀬𑀸.)] 𑀲𑁂𑀝𑁆𑀞𑀁, 𑀦 𑀲𑁄 𑀓𑀸𑀫𑁂𑀳𑀺 𑀢𑀧𑁆𑀧𑀢𑀺;

𑀧𑀜𑁆𑀜𑀸𑀬 𑀢𑀺𑀢𑁆𑀢𑀁 𑀧𑀼𑀭𑀺𑀲𑀁, 𑀢𑀡𑁆𑀳𑀸 𑀦 𑀓𑀼𑀭𑀼𑀢𑁂 𑀯𑀲𑀁.

𑁪𑁪. 𑀅𑀧𑀘𑀺𑀦𑁂𑀣𑁂𑀯 𑀓𑀸𑀫𑀸𑀦𑀁 [𑀓𑀸𑀫𑀸𑀦𑀺 (𑀲𑀻. 𑀲𑁆𑀬𑀸. 𑀧𑀻.)], 𑀅𑀧𑁆𑀧𑀺𑀘𑁆𑀙𑀲𑁆𑀲 𑀅𑀮𑁄𑀮𑀼𑀧𑁄;

𑀲𑀫𑀼𑀤𑁆𑀤𑀫𑀢𑁆𑀢𑁄 𑀧𑀼𑀭𑀺𑀲𑁄, 𑀦 𑀲𑁄 𑀓𑀸𑀫𑁂𑀳𑀺 𑀢𑀧𑁆𑀧𑀢𑀺.

𑁪𑁫. 𑀭𑀣𑀓𑀸𑀭𑁄𑀯 𑀘𑀫𑁆𑀫𑀲𑁆𑀲, 𑀧𑀭𑀺𑀓𑀦𑁆𑀢𑀁 𑀉𑀧𑀸𑀳𑀦𑀁;

𑀬𑀁 𑀬𑀁 𑀘𑀚𑀢𑀺 [𑀚𑀳𑀢𑀺 (𑀲𑁆𑀬𑀸. 𑀓.)] 𑀓𑀸𑀫𑀸𑀦𑀁, 𑀢𑀁 𑀢𑀁 𑀲𑀫𑁆𑀧𑀚𑁆𑀚𑀢𑁂 𑀲𑀼𑀔𑀁;

𑀲𑀩𑁆𑀩𑀁 𑀘𑁂 𑀲𑀼𑀔𑀫𑀺𑀘𑁆𑀙𑁂𑀬𑁆𑀬, 𑀲𑀩𑁆𑀩𑁂 𑀓𑀸𑀫𑁂 𑀧𑀭𑀺𑀘𑁆𑀘𑀚𑁂.

𑁪𑁬. 𑀅𑀝𑁆𑀞 𑀢𑁂 𑀪𑀸𑀲𑀺𑀢𑀸 𑀕𑀸𑀣𑀸, 𑀲𑀩𑁆𑀩𑀸 𑀳𑁄𑀦𑁆𑀢𑀺 𑀲𑀳𑀲𑁆𑀲𑀺𑀬𑁄 [𑀲𑀳𑀲𑁆𑀲𑀺𑀬𑀸 (?) 𑀉𑀧𑀭𑀺 𑀲𑀼𑀢𑀲𑁄𑀫𑀚𑀸𑀢𑀓𑁂 𑀢𑀣𑀸 𑀤𑀺𑀲𑁆𑀲𑀢𑀺];

𑀧𑀝𑀺𑀕𑀡𑁆𑀳 𑀫𑀳𑀸𑀩𑁆𑀭𑀳𑁆𑀫𑁂, 𑀲𑀸𑀥𑁂𑀢𑀁 𑀢𑀯 𑀪𑀸𑀲𑀺𑀢𑀁.

𑁪𑁭. 𑀦 𑀫𑁂 𑀅𑀢𑁆𑀣𑁄 𑀲𑀳𑀲𑁆𑀲𑁂𑀳𑀺, 𑀲𑀢𑁂𑀳𑀺 𑀦𑀳𑀼𑀢𑁂𑀳𑀺 𑀯𑀸;

𑀧𑀘𑁆𑀙𑀺𑀫𑀁 𑀪𑀸𑀲𑀢𑁄 𑀕𑀸𑀣𑀁, 𑀓𑀸𑀫𑁂 𑀫𑁂 𑀦 𑀭𑀢𑁄 𑀫𑀦𑁄.

𑁪𑁮. 𑀪𑀤𑁆𑀭𑀓𑁄 [𑀲𑀤𑁆𑀤𑁄 (𑀲𑀻.)] 𑀯𑀢𑀸𑀬𑀁 𑀫𑀸𑀡𑀯𑀓𑁄, 𑀲𑀩𑁆𑀩𑀮𑁄𑀓𑀯𑀺𑀤𑀽 𑀫𑀼𑀦𑀺;

𑀬𑁄 𑀇𑀫𑀁 𑀢𑀡𑁆𑀳𑀁 [𑀬𑁄 𑀢𑀡𑁆𑀳𑀁 (𑀲𑀻. 𑀲𑁆𑀬𑀸.)] 𑀤𑀼𑀓𑁆𑀔𑀚𑀦𑀦𑀺𑀁, 𑀧𑀭𑀺𑀚𑀸𑀦𑀸𑀢𑀺 𑀧𑀡𑁆𑀟𑀺𑀢𑁄𑀢𑀺.

𑀓𑀸𑀫𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁪𑁬𑁮. 𑀚𑀦𑀲𑀦𑁆𑀥𑀚𑀸𑀢𑀓𑀁 (𑁫)

𑁪𑁯. 𑀤𑀲 𑀔𑀮𑀼 𑀇𑀫𑀸𑀦𑀺 [𑀔𑀮𑀼𑀫𑀸𑀦𑀺 (𑀲𑁆𑀬𑀸.)] 𑀞𑀸𑀦𑀸𑀦𑀺, 𑀬𑀸𑀦𑀺 𑀧𑀼𑀩𑁆𑀩𑁂 𑀅𑀓𑀭𑀺𑀢𑁆𑀯𑀸;

𑀲 𑀧𑀘𑁆𑀙𑀸 𑀫𑀦𑀼𑀢𑀧𑁆𑀧𑀢𑀺, 𑀇𑀘𑁆𑀘𑁂𑀯𑀸𑀳 [𑀇𑀘𑁆𑀘𑀸𑀳 𑀭𑀸𑀚𑀸 (𑀲𑀻. 𑀲𑁆𑀬𑀸. 𑀧𑀻.)] 𑀚𑀦𑀲𑀦𑁆𑀥𑁄.

𑁫𑁦. 𑀅𑀮𑀤𑁆𑀥𑀸 𑀯𑀺𑀢𑁆𑀢𑀁 𑀢𑀧𑁆𑀧𑀢𑀺, 𑀧𑀼𑀩𑁆𑀩𑁂 𑀅𑀲𑀫𑀼𑀤𑀸𑀦𑀺𑀢𑀁;

𑀦 𑀧𑀼𑀩𑁆𑀩𑁂 𑀥𑀦𑀫𑁂𑀲𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁧. 𑀲𑀓𑁆𑀬𑀭𑀽𑀧𑀁 𑀧𑀼𑀭𑁂 𑀲𑀦𑁆𑀢𑀁, 𑀫𑀬𑀸 𑀲𑀺𑀧𑁆𑀧𑀁 𑀦 𑀲𑀺𑀓𑁆𑀔𑀺𑀢𑀁;

𑀓𑀺𑀘𑁆𑀙𑀸 𑀯𑀼𑀢𑁆𑀢𑀺 𑀅𑀲𑀺𑀧𑁆𑀧𑀲𑁆𑀲, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁨. 𑀓𑀽𑀝𑀯𑁂𑀤𑀻 𑀧𑀼𑀭𑁂 𑀆𑀲𑀺𑀁, 𑀧𑀺𑀲𑀼𑀡𑁄 𑀧𑀺𑀝𑁆𑀞𑀺𑀫𑀁𑀲𑀺𑀓𑁄;

𑀘𑀡𑁆𑀟𑁄 𑀘 𑀨𑀭𑀼𑀲𑁄 𑀘𑀸𑀧𑀺 [𑀘𑀸𑀲𑀺𑀁 (𑀲𑀻. 𑀲𑁆𑀬𑀸. 𑀧𑀻.)], 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁩. 𑀧𑀸𑀡𑀸𑀢𑀺𑀧𑀸𑀢𑀻 𑀧𑀼𑀭𑁂 𑀆𑀲𑀺𑀁, 𑀮𑀼𑀤𑁆𑀤𑁄 𑀘𑀸𑀧𑀺 [𑀘𑀸𑀲𑀺𑀁 (𑀲𑀻. 𑀧𑀻.)] 𑀅𑀦𑀸𑀭𑀺𑀬𑁄;

𑀪𑀽𑀢𑀸𑀦𑀁 𑀦𑀸𑀧𑀘𑀸𑀬𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁪. 𑀩𑀳𑀽𑀲𑀼 𑀯𑀢 𑀲𑀦𑁆𑀢𑀻𑀲𑀼, 𑀅𑀦𑀸𑀧𑀸𑀤𑀸𑀲𑀼 𑀇𑀢𑁆𑀣𑀺𑀲𑀼;

𑀧𑀭𑀤𑀸𑀭𑀁 𑀅𑀲𑁂𑀯𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁫. 𑀩𑀳𑀼𑀫𑁆𑀳𑀺 𑀯𑀢 𑀲𑀦𑁆𑀢𑀫𑁆𑀳𑀺, 𑀅𑀦𑁆𑀦𑀧𑀸𑀦𑁂 𑀉𑀧𑀝𑁆𑀞𑀺𑀢𑁂;

𑀦 𑀧𑀼𑀩𑁆𑀩𑁂 𑀅𑀤𑀤𑀁 [𑀅𑀤𑀤𑀺𑀁 (𑀲𑀻.)] 𑀤𑀸𑀦𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁬. 𑀫𑀸𑀢𑀭𑀁 𑀧𑀺𑀢𑀭𑀜𑁆𑀘𑀸𑀧𑀺, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁 [𑀚𑀺𑀡𑁆𑀡𑀓𑁂 𑀕𑀢𑀬𑁄𑀩𑁆𑀩𑀦𑁂 (𑀲𑀻. 𑀲𑁆𑀬𑀸. 𑀧𑀻.)];

𑀧𑀳𑀼 𑀲𑀦𑁆𑀢𑁄 𑀦 𑀧𑁄𑀲𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁭. 𑀆𑀘𑀭𑀺𑀬𑀫𑀦𑀼𑀲𑀢𑁆𑀣𑀸𑀭𑀁, 𑀲𑀩𑁆𑀩𑀓𑀸𑀫𑀭𑀲𑀸𑀳𑀭𑀁;

𑀧𑀺𑀢𑀭𑀁 𑀅𑀢𑀺𑀫𑀜𑁆𑀜𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁮. 𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀘𑀸𑀧𑀺, 𑀲𑀻𑀮𑀯𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁂;

𑀦 𑀧𑀼𑀩𑁆𑀩𑁂 𑀧𑀬𑀺𑀭𑀼𑀧𑀸𑀲𑀺𑀲𑁆𑀲𑀁, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁯. 𑀲𑀸𑀥𑀼 𑀳𑁄𑀢𑀺 𑀢𑀧𑁄 𑀘𑀺𑀡𑁆𑀡𑁄, 𑀲𑀦𑁆𑀢𑁄 𑀘 𑀧𑀬𑀺𑀭𑀼𑀧𑀸𑀲𑀺𑀢𑁄;

𑀦 𑀘 𑀧𑀼𑀩𑁆𑀩𑁂 𑀢𑀧𑁄 𑀘𑀺𑀡𑁆𑀡𑁄, 𑀇𑀢𑀺 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁬𑁦. 𑀬𑁄 𑀘 𑀏𑀢𑀸𑀦𑀺 𑀞𑀸𑀦𑀸𑀦𑀺, 𑀬𑁄𑀦𑀺𑀲𑁄 𑀧𑀝𑀺𑀧𑀚𑁆𑀚𑀢𑀺;

𑀓𑀭𑀁 𑀧𑀼𑀭𑀺𑀲𑀓𑀺𑀘𑁆𑀘𑀸𑀦𑀺, 𑀲 𑀧𑀘𑁆𑀙𑀸 𑀦𑀸𑀦𑀼𑀢𑀧𑁆𑀧𑀢𑀻𑀢𑀺.

𑀚𑀦𑀲𑀦𑁆𑀥𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁪𑁬𑁯. 𑀫𑀳𑀸𑀓𑀡𑁆𑀳𑀚𑀸𑀢𑀓𑀁 (𑁬)

𑁬𑁧. 𑀓𑀡𑁆𑀳𑁄 𑀓𑀡𑁆𑀳𑁄 𑀘 𑀖𑁄𑀭𑁄 𑀘, 𑀲𑀼𑀓𑁆𑀓𑀤𑀸𑀞𑁄 𑀧𑀪𑀸𑀲𑀯𑀸 [𑀧𑀢𑀸𑀧𑀯𑀸 (𑀲𑀻. 𑀲𑁆𑀬𑀸. 𑀧𑀻.)];

𑀩𑀤𑁆𑀥𑁄 𑀧𑀜𑁆𑀘𑀳𑀺 𑀭𑀚𑁆𑀚𑀽𑀳𑀺, 𑀓𑀺𑀁 𑀭𑀯𑀺 [𑀥𑀻𑀭 (𑀲𑀻. 𑀧𑀻.), 𑀯𑀻𑀭 (𑀲𑁆𑀬𑀸.)] 𑀲𑀼𑀦𑀔𑁄 𑀢𑀯.

𑁬𑁨. 𑀦𑀸𑀬𑀁 𑀫𑀺𑀕𑀸𑀦𑀫𑀢𑁆𑀣𑀸𑀬, 𑀉𑀲𑀻𑀦𑀓 [𑀉𑀲𑀻𑀦𑀭 (𑀲𑀻. 𑀧𑀻.), 𑀉𑀲𑀻𑀦𑁆𑀦𑀭 (𑀲𑁆𑀬𑀸.)] 𑀪𑀯𑀺𑀲𑁆𑀲𑀢𑀺;

𑀫𑀦𑀼𑀲𑁆𑀲𑀸𑀦𑀁 𑀅𑀦𑀬𑁄 𑀳𑀼𑀢𑁆𑀯𑀸, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁩. 𑀧𑀢𑁆𑀢𑀳𑀢𑁆𑀣𑀸 𑀲𑀫𑀡𑀓𑀸, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀦𑀗𑁆𑀕𑀮𑁂𑀳𑀺 𑀓𑀲𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁪. 𑀢𑀧𑀲𑁆𑀲𑀺𑀦𑀺𑀬𑁄 [𑀢𑀧𑀦𑀻𑀬𑀸 (𑀓.) 𑀤𑀼𑀢𑀺𑀬𑀦𑁆𑀢𑀧𑀤𑀸𑀦𑀺 𑀳𑁂𑀢𑀸𑀦𑀺] 𑀧𑀩𑁆𑀩𑀚𑀺𑀢𑀸, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀬𑀤𑀸 𑀮𑁄𑀓𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁫. 𑀤𑀻𑀖𑁄𑀢𑁆𑀢𑀭𑁄𑀝𑁆𑀞𑀸 𑀚𑀝𑀺𑀮𑀸, 𑀧𑀗𑁆𑀓𑀤𑀦𑁆𑀢𑀸 𑀭𑀚𑀲𑁆𑀲𑀺𑀭𑀸;

𑀇𑀡𑀁 𑀘𑁄𑀤𑀸𑀬 [𑀯𑁄𑀤𑀸𑀬 (𑀲𑀻. 𑀧𑀻.), 𑀘𑁄𑀤𑀬 (𑀲𑁆𑀬𑀸.)] 𑀕𑀘𑁆𑀙𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁬. 𑀅𑀥𑀺𑀘𑁆𑀘 𑀯𑁂𑀤𑁂 [𑀯𑁂𑀤𑀁 (𑀓.)] 𑀲𑀸𑀯𑀺𑀢𑁆𑀢𑀺𑀁, 𑀬𑀜𑁆𑀜𑀢𑀦𑁆𑀢𑀜𑁆𑀘 [𑀢𑀦𑁆𑀢𑁆𑀭𑀜𑁆𑀘 (𑀲𑀻. 𑀲𑁆𑀬𑀸. 𑀧𑀻.)] 𑀩𑁆𑀭𑀸𑀳𑁆𑀫𑀡𑀸;

𑀪𑀢𑀺𑀓𑀸𑀬 𑀬𑀚𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁭. 𑀫𑀸𑀢𑀭𑀁 𑀧𑀺𑀢𑀭𑀜𑁆𑀘𑀸𑀧𑀺, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁;

𑀧𑀳𑀽 𑀲𑀦𑁆𑀢𑁄 [𑀲𑀦𑁆𑀢𑀸 (𑀲𑀻.)] 𑀦 𑀪𑀭𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.