𑁧𑁩. 𑀢𑁂𑀭𑀲𑀓𑀦𑀺𑀧𑀸𑀢𑁄

𑁪𑁭𑁪. 𑀅𑀫𑁆𑀩𑀚𑀸𑀢𑀓𑀁 (𑁧)

𑁧. 𑀅𑀳𑀸𑀲𑀺 [𑀆𑀳𑀸𑀲𑀺 (?)] 𑀫𑁂 𑀅𑀫𑁆𑀩𑀨𑀮𑀸𑀦𑀺 𑀧𑀼𑀩𑁆𑀩𑁂, 𑀅𑀡𑀽𑀦𑀺 𑀣𑀽𑀮𑀸𑀦𑀺 𑀘 𑀩𑁆𑀭𑀳𑁆𑀫𑀘𑀸𑀭𑀺;

𑀢𑁂𑀳𑁂𑀯 𑀫𑀦𑁆𑀢𑁂𑀳𑀺 𑀦 𑀤𑀸𑀦𑀺 𑀢𑀼𑀬𑁆𑀳𑀁, 𑀤𑀼𑀫𑀧𑁆𑀨𑀮𑀸 𑀧𑀸𑀢𑀼𑀪𑀯𑀦𑁆𑀢𑀺 𑀩𑁆𑀭𑀳𑁆𑀫𑁂.

𑁨. 𑀦𑀓𑁆𑀔𑀢𑁆𑀢𑀬𑁄𑀕𑀁 𑀧𑀝𑀺𑀫𑀸𑀦𑀬𑀸𑀫𑀺, 𑀔𑀡𑀁 𑀫𑀼𑀳𑀼𑀢𑁆𑀢𑀜𑁆𑀘 𑀫𑀦𑁆𑀢𑁂 𑀦 𑀧𑀲𑁆𑀲𑀁 [𑀔𑀡𑀁 𑀫𑀼𑀳𑀼𑀢𑁆𑀢𑀁 𑀦 𑀫𑀁 𑀢𑁄𑀲𑀬𑀦𑁆𑀢𑀺 (𑀲𑀻. 𑀧𑀻.)];

𑀦𑀓𑁆𑀔𑀢𑁆𑀢𑀬𑁄𑀕𑀜𑁆𑀘 𑀔𑀡𑀜𑁆𑀘 𑀮𑀤𑁆𑀥𑀸, 𑀅𑀤𑁆𑀥𑀸𑀳𑀭𑀺𑀲𑁆𑀲𑀫𑁆𑀩𑀨𑀮𑀁 [𑀅𑀣𑀸𑀳𑀭𑀺𑀲𑁆𑀲𑀫𑁆𑀩𑀨𑀮𑀁 (𑀲𑀻. 𑀧𑀻.)] 𑀧𑀳𑀽𑀢𑀁.

𑁩. 𑀦𑀓𑁆𑀔𑀢𑁆𑀢𑀬𑁄𑀕𑀁 𑀦 𑀧𑀼𑀭𑁂 𑀅𑀪𑀸𑀡𑀺, 𑀔𑀡𑀁 𑀫𑀼𑀳𑀼𑀢𑁆𑀢𑀁 𑀦 𑀧𑀼𑀭𑁂 𑀅𑀲𑀁𑀲𑀺;

𑀲𑀬𑀁 𑀳𑀭𑀻 [𑀅𑀣𑀸𑀳𑀭𑀻 (𑀲𑀻. 𑀲𑁆𑀬𑀸. 𑀧𑀻.)] 𑀅𑀫𑁆𑀩𑀨𑀮𑀁 𑀧𑀳𑀽𑀢𑀁, 𑀯𑀡𑁆𑀡𑁂𑀦 𑀕𑀦𑁆𑀥𑁂𑀦 𑀭𑀲𑁂𑀦𑀼𑀧𑁂𑀢𑀁.

𑁪. 𑀫𑀦𑁆𑀢𑀸𑀪𑀺𑀚𑀧𑁆𑀧𑁂𑀦 𑀧𑀼𑀭𑁂 𑀳𑀺 [𑀧𑀼𑀭’𑀲𑁆𑀲 (𑀲𑀻. 𑀧𑀻.), 𑀧𑀼𑀭𑁂𑀧𑀺 (𑀲𑁆𑀬𑀸.)] 𑀢𑀼𑀬𑁆𑀳𑀁, 𑀤𑀼𑀫𑀧𑁆𑀨𑀮𑀸 𑀧𑀸𑀢𑀼𑀪𑀯𑀦𑁆𑀢𑀺 𑀩𑁆𑀭𑀳𑁆𑀫𑁂;

𑀲𑁆𑀯𑀸𑀚𑁆𑀚 𑀦 𑀧𑀸𑀭𑁂𑀲𑀺 𑀚𑀧𑁆𑀧𑀫𑁆𑀧𑀺 𑀫𑀦𑁆𑀢𑀁 [𑀚𑀧𑀫𑁆𑀧𑀺 𑀫𑀦𑁆𑀢𑁂 (𑀲𑀻. 𑀧𑀻.)], 𑀅𑀬𑀁 𑀲𑁄 𑀓𑁄 𑀦𑀸𑀫 𑀢𑀯𑀚𑁆𑀚 𑀥𑀫𑁆𑀫𑁄.

𑁫. 𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀫𑀫 𑀲𑀫𑁆𑀧𑀤𑀸𑀲𑀺, 𑀥𑀫𑁆𑀫𑁂𑀦 𑀫𑀦𑁆𑀢𑁂 𑀧𑀓𑀢𑀺𑀜𑁆𑀘 𑀲𑀁𑀲𑀺;

𑀫𑀸 𑀘𑀲𑁆𑀲𑀼 𑀫𑁂 𑀧𑀼𑀘𑁆𑀙𑀺𑀢𑁄 𑀦𑀸𑀫𑀕𑁄𑀢𑁆𑀢𑀁, 𑀕𑀼𑀬𑁆𑀳𑀺𑀢𑁆𑀣𑁄 𑀅𑀢𑁆𑀣𑀁 [𑀫𑀸 𑀢𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀚𑀳𑁂𑀬𑁆𑀬 𑀫𑀦𑁆𑀢𑁄 [𑀯𑀺𑀚𑀳𑁂𑀬𑁆𑀬𑀼𑀫𑀦𑁆𑀢𑀸 (𑀲𑁆𑀬𑀸.)].

𑁬. 𑀲𑁄𑀳𑀁 𑀚𑀦𑀺𑀦𑁆𑀤𑁂𑀦 𑀚𑀦𑀫𑁆𑀳𑀺 𑀧𑀼𑀝𑁆𑀞𑁄, 𑀫𑀓𑁆𑀔𑀸𑀪𑀺𑀪𑀽𑀢𑁄 𑀅𑀮𑀺𑀓𑀁 𑀅𑀪𑀸𑀡𑀺𑀁;

‘‘𑀫𑀦𑁆𑀢𑀸 𑀇𑀫𑁂 𑀩𑁆𑀭𑀸𑀳𑁆𑀫𑀡𑀲𑁆𑀲𑀸’’𑀢𑀺 𑀫𑀺𑀘𑁆𑀙𑀸, 𑀧𑀳𑀻𑀦𑀫𑀦𑁆𑀢𑁄 𑀓𑀧𑀡𑁄 𑀭𑀼𑀤𑀸𑀫𑀺.

𑁭. 𑀏𑀭𑀡𑁆𑀟𑀸 𑀧𑀼𑀘𑀺𑀫𑀦𑁆𑀤𑀸 𑀯𑀸, 𑀅𑀣 𑀯𑀸 𑀧𑀸𑀮𑀺𑀪𑀤𑁆𑀤𑀓𑀸;

𑀫𑀥𑀼𑀁 𑀫𑀥𑀼𑀢𑁆𑀣𑀺𑀓𑁄 𑀯𑀺𑀦𑁆𑀤𑁂, 𑀲𑁄 𑀳𑀺 𑀢𑀲𑁆𑀲 𑀤𑀼𑀫𑀼𑀢𑁆𑀢𑀫𑁄.

𑁮. 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀬𑀫𑁆𑀳𑀸 𑀥𑀫𑁆𑀫𑀁 𑀯𑀺𑀚𑀸𑀦𑁂𑀬𑁆𑀬, 𑀲𑁄 𑀳𑀺 𑀢𑀲𑁆𑀲 𑀦𑀭𑀼𑀢𑁆𑀢𑀫𑁄.

𑁯. 𑀇𑀫𑀲𑁆𑀲 𑀤𑀡𑁆𑀟𑀜𑁆𑀘 𑀯𑀥𑀜𑁆𑀘 𑀤𑀢𑁆𑀯𑀸, 𑀕𑀮𑁂 𑀕𑀳𑁂𑀢𑁆𑀯𑀸 𑀔𑀮𑀬𑀸𑀣 [𑀩𑀮𑀬𑀸𑀣 (𑀲𑁆𑀬𑀸.), 𑀕𑀮𑀬𑀸𑀣 (𑀓.)] 𑀚𑀫𑁆𑀫𑀁;

𑀬𑁄 𑀉𑀢𑁆𑀢𑀫𑀢𑁆𑀣𑀁 𑀓𑀲𑀺𑀭𑁂𑀦 𑀮𑀤𑁆𑀥𑀁, 𑀫𑀸𑀦𑀸𑀢𑀺𑀫𑀸𑀦𑁂𑀦 𑀯𑀺𑀦𑀸𑀲𑀬𑀺𑀢𑁆𑀣.

𑁧𑁦. 𑀬𑀣𑀸 𑀲𑀫𑀁 𑀫𑀜𑁆𑀜𑀫𑀸𑀦𑁄 𑀧𑀢𑁂𑀬𑁆𑀬, 𑀲𑁄𑀩𑁆𑀪𑀁 𑀕𑀼𑀳𑀁 𑀦𑀭𑀓𑀁 𑀧𑀽𑀢𑀺𑀧𑀸𑀤𑀁;

𑀭𑀚𑁆𑀚𑀽𑀢𑀺 𑀯𑀸 𑀅𑀓𑁆𑀓𑀫𑁂 𑀓𑀡𑁆𑀳𑀲𑀧𑁆𑀧𑀁, 𑀅𑀦𑁆𑀥𑁄 𑀬𑀣𑀸 𑀚𑁄𑀢𑀺𑀫𑀥𑀺𑀝𑁆𑀞𑀳𑁂𑀬𑁆𑀬;

𑀏𑀯𑀫𑁆𑀧𑀺 𑀫𑀁 𑀢𑁆𑀯𑀁 𑀔𑀮𑀺𑀢𑀁 𑀲𑀧𑀜𑁆𑀜 [𑀲𑀧𑀜𑁆𑀜𑀸 (𑀧𑀻.)], 𑀧𑀳𑀻𑀦𑀫𑀦𑁆𑀢𑀲𑁆𑀲 𑀧𑀼𑀦𑀧𑁆𑀧𑀤𑀸𑀳𑀺 [𑀧𑀼𑀦 𑀲𑀫𑁆𑀧𑀤𑀸𑀳𑀺 (𑀲𑁆𑀬𑀸.), 𑀧𑀼𑀦𑀧𑁆𑀧𑀲𑀻𑀤 (𑀲𑀻. 𑀧𑀻.)].

𑁧𑁧. 𑀥𑀫𑁆𑀫𑁂𑀦 𑀫𑀦𑁆𑀢𑀁 [𑀫𑀦𑁆𑀢𑁂 (𑀲𑀻. 𑀲𑁆𑀬𑀸. 𑀧𑀻.)] 𑀢𑀯 𑀲𑀫𑁆𑀧𑀤𑀸𑀲𑀺𑀁, 𑀢𑀼𑀯𑀫𑁆𑀧𑀺 𑀥𑀫𑁆𑀫𑁂𑀦 [𑀢𑁆𑀯𑀫𑁆𑀧𑀺 𑀥𑀫𑁆𑀫𑁂𑀦𑁂𑀯 (𑀓.)] 𑀧𑀭𑀺𑀕𑁆𑀕𑀳𑁂𑀲𑀺;

𑀧𑀓𑀢𑀺𑀫𑁆𑀧𑀺 𑀢𑁂 𑀅𑀢𑁆𑀢𑀫𑀦𑁄 𑀅𑀲𑀁𑀲𑀺𑀁, 𑀥𑀫𑁆𑀫𑁂 𑀞𑀺𑀢𑀁 𑀢𑀁 [𑀧𑀢𑀺𑀝𑁆𑀞𑀁 (𑀓.)] 𑀦 𑀚𑀳𑁂𑀬𑁆𑀬 𑀫𑀦𑁆𑀢𑁄.

𑁧𑁨. 𑀬𑁄 𑀩𑀸𑀮 𑀫𑀦𑁆𑀢𑀁 [𑀩𑀮𑀫𑀦𑁆𑀢𑀁 (𑀓.)] 𑀓𑀲𑀺𑀭𑁂𑀦 𑀮𑀤𑁆𑀥𑀁, 𑀬𑀁 𑀤𑀼𑀮𑁆𑀮𑀪𑀁 𑀅𑀚𑁆𑀚 𑀫𑀦𑀼𑀲𑁆𑀲𑀮𑁄𑀓𑁂;

𑀓𑀺𑀜𑁆𑀘𑀸𑀧𑀺 𑀮𑀤𑁆𑀥𑀸 𑀚𑀻𑀯𑀺𑀢𑀼𑀁 𑀅𑀧𑁆𑀧𑀧𑀜𑁆𑀜𑁄 [𑀓𑀺𑀘𑁆𑀙𑀸 𑀮𑀤𑁆𑀥𑀁 𑀚𑀻𑀯𑀺𑀓𑀁 𑀅𑀧𑁆𑀧𑀧𑀜𑁆𑀜𑁄 (𑀲𑀻. 𑀲𑁆𑀬𑀸.), 𑀓𑀘𑁆𑀙𑀸𑀧𑀺 𑀮𑀤𑁆𑀥𑀸 𑀚𑀻𑀯𑀺𑀓𑀁 𑀅𑀧𑁆𑀧𑀜𑁆𑀜 (𑀧𑀻.)], 𑀯𑀺𑀦𑀸𑀲𑀬𑀻 𑀅𑀮𑀺𑀓𑀁 𑀪𑀸𑀲𑀫𑀸𑀦𑁄.

𑁧𑁩. 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀅𑀓𑀢𑀜𑁆𑀜𑀼𑀦𑁄 𑀘, 𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀅𑀲𑀜𑁆𑀜𑀢𑀲𑁆𑀲;

𑀫𑀦𑁆𑀢𑁂 𑀫𑀬𑀁 𑀢𑀸𑀤𑀺𑀲𑀓𑁂 𑀦 𑀤𑁂𑀫, 𑀓𑀼𑀢𑁄 𑀫𑀦𑁆𑀢𑀸 𑀕𑀘𑁆𑀙 𑀦 𑀫𑀬𑁆𑀳 𑀭𑀼𑀘𑁆𑀘𑀲𑀻𑀢𑀺.

𑀅𑀫𑁆𑀩𑀚𑀸𑀢𑀓𑀁 𑀧𑀞𑀫𑀁.

𑁪𑁭𑁫. 𑀨𑀦𑁆𑀤𑀦𑀚𑀸𑀢𑀓𑀁 (𑁨)

𑁧𑁪. 𑀓𑀼𑀞𑀸𑀭𑀺𑀳𑀢𑁆𑀣𑁄 [𑀓𑀼𑀥𑀸𑀭𑀺𑀳𑀢𑁆𑀣𑁄 (𑀓.)] 𑀧𑀼𑀭𑀺𑀲𑁄, 𑀯𑀦𑀫𑁄𑀕𑀬𑁆𑀳 𑀢𑀺𑀝𑁆𑀞𑀲𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀤𑀸𑀭𑀼𑀁 𑀙𑁂𑀢𑀼𑀫𑀺𑀘𑁆𑀙𑀲𑀺.

𑁧𑁫. 𑀇𑀲𑁆𑀲𑁄 [𑀇𑀲𑁄 (𑀲𑀻.), 𑀈𑀲𑁄 (𑀲𑁆𑀬𑀸. 𑀧𑀻.)] 𑀯𑀦𑀸𑀦𑀺 𑀘𑀭𑀲𑀺, 𑀲𑀫𑀸𑀦𑀺 𑀯𑀺𑀲𑀫𑀸𑀦𑀺 𑀘;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀤𑀸𑀭𑀼𑀁 𑀦𑁂𑀫𑀺𑀬𑀸 𑀤𑀴𑁆𑀳𑀁.

𑁧𑁬. 𑀦𑁂𑀯 𑀲𑀸𑀮𑁄 𑀦 𑀔𑀤𑀺𑀭𑁄, 𑀦𑀸𑀲𑁆𑀲𑀓𑀡𑁆𑀡𑁄 𑀓𑀼𑀢𑁄 𑀥𑀯𑁄;

𑀭𑀼𑀓𑁆𑀔𑁄 𑀘 [𑀭𑀼𑀓𑁆𑀔𑁄𑀯 (𑀲𑀻. 𑀧𑀻.)] 𑀨𑀦𑁆𑀤𑀦𑁄 𑀦𑀸𑀫, 𑀢𑀁 𑀤𑀸𑀭𑀼𑀁 𑀦𑁂𑀫𑀺𑀬𑀸 𑀤𑀴𑁆𑀳𑀁.

𑁧𑁭. 𑀓𑀻𑀤𑀺𑀲𑀸𑀦𑀺𑀲𑁆𑀲 𑀧𑀢𑁆𑀢𑀸𑀦𑀺, 𑀔𑀦𑁆𑀥𑁄 𑀯𑀸 𑀧𑀦 𑀓𑀻𑀤𑀺𑀲𑁄;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀬𑀣𑀸 𑀚𑀸𑀦𑁂𑀫𑀼 𑀨𑀦𑁆𑀤𑀦𑀁.

𑁧𑁮. 𑀬𑀲𑁆𑀲 𑀲𑀸𑀔𑀸 𑀧𑀮𑀫𑁆𑀩𑀦𑁆𑀢𑀺, 𑀦𑀫𑀦𑁆𑀢𑀺 𑀦 𑀘 𑀪𑀜𑁆𑀚𑀭𑁂;

𑀲𑁄 𑀭𑀼𑀓𑁆𑀔𑁄 𑀨𑀦𑁆𑀤𑀦𑁄 𑀦𑀸𑀫, 𑀬𑀲𑁆𑀲 𑀫𑀽𑀮𑁂 𑀅𑀳𑀁 𑀞𑀺𑀢𑁄.

𑁧𑁯. 𑀅𑀭𑀸𑀦𑀁 𑀘𑀓𑁆𑀓𑀦𑀸𑀪𑀻𑀦𑀁, 𑀈𑀲𑀸𑀦𑁂𑀫𑀺𑀭𑀣𑀲𑁆𑀲 𑀘;

𑀲𑀩𑁆𑀩𑀲𑁆𑀲 𑀢𑁂 𑀓𑀫𑁆𑀫𑀦𑀺𑀬𑁄, 𑀅𑀬𑀁 𑀳𑁂𑀲𑁆𑀲𑀢𑀺 𑀨𑀦𑁆𑀤𑀦𑁄.

𑁨𑁦. 𑀇𑀢𑀺 𑀨𑀦𑁆𑀤𑀦𑀭𑀼𑀓𑁆𑀔𑁄𑀧𑀺, 𑀢𑀸𑀯𑀤𑁂 𑀅𑀚𑁆𑀛𑀪𑀸𑀲𑀣;

𑀫𑀬𑁆𑀳𑀫𑁆𑀧𑀺 𑀯𑀘𑀦𑀁 𑀅𑀢𑁆𑀣𑀺, 𑀪𑀸𑀭𑀤𑁆𑀯𑀸𑀚 𑀲𑀼𑀡𑁄𑀳𑀺 𑀫𑁂.

𑁨𑁧. 𑀇𑀲𑁆𑀲𑀲𑁆𑀲 [𑀇𑀫𑀲𑁆𑀲 (𑀓. 𑀲𑀻. 𑀓.)] 𑀉𑀧𑀓𑁆𑀔𑀦𑁆𑀥𑀫𑁆𑀳𑀸 [𑀉𑀧𑀔𑀦𑁆𑀥𑀫𑁆𑀳𑀸 (𑀓. 𑀲𑀻. 𑀧𑀻. 𑀓.)], 𑀉𑀓𑁆𑀓𑀘𑁆𑀘 𑀘𑀢𑀼𑀭𑀗𑁆𑀕𑀼𑀮𑀁;

𑀢𑁂𑀦 𑀦𑁂𑀫𑀺𑀁 𑀧𑀲𑀸𑀭𑁂𑀲𑀺 [𑀧𑀭𑀺𑀳𑀭𑁂𑀲𑀺 (𑀲𑀻. 𑀧𑀻.)], 𑀏𑀯𑀁 𑀤𑀴𑁆𑀳𑀢𑀭𑀁 𑀲𑀺𑀬𑀸.

𑁨𑁨. 𑀇𑀢𑀺 𑀨𑀦𑁆𑀤𑀦𑀭𑀼𑀓𑁆𑀔𑁄𑀧𑀺, 𑀯𑁂𑀭𑀁 𑀅𑀧𑁆𑀧𑁂𑀲𑀺 𑀢𑀸𑀯𑀤𑁂;

𑀚𑀸𑀢𑀸𑀦𑀜𑁆𑀘 𑀅𑀚𑀸𑀢𑀸𑀦𑀁, 𑀇𑀲𑁆𑀲𑀸𑀦𑀁 𑀤𑀼𑀓𑁆𑀔𑀫𑀸𑀯𑀳𑀺.

𑁨𑁩. 𑀇𑀘𑁆𑀘𑁂𑀯𑀁 [𑀇𑀘𑁆𑀘𑁂𑀯 (𑀲𑀻. 𑀧𑀻.)] 𑀨𑀦𑁆𑀤𑀦𑁄 𑀇𑀲𑁆𑀲𑀁, 𑀇𑀲𑁆𑀲𑁄 𑀘 𑀧𑀦 𑀨𑀦𑁆𑀤𑀦𑀁;

𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑁂𑀦, 𑀅𑀜𑁆𑀜𑀫𑀜𑁆𑀜𑀫𑀖𑀸𑀢𑀬𑀼𑀁.

𑁨𑁪. 𑀏𑀯𑀫𑁂𑀯 𑀫𑀦𑀼𑀲𑁆𑀲𑀸𑀦𑀁, 𑀯𑀺𑀯𑀸𑀤𑁄 𑀬𑀢𑁆𑀣 𑀚𑀸𑀬𑀢𑀺;

𑀫𑀬𑀽𑀭𑀦𑀘𑁆𑀘𑀁 𑀦𑀘𑁆𑀘𑀦𑁆𑀢𑀺, 𑀬𑀣𑀸 𑀢𑁂 𑀇𑀲𑁆𑀲𑀨𑀦𑁆𑀤𑀦𑀸.

𑁨𑁫. 𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀁 𑀯𑁄 [𑀪𑀤𑁆𑀤𑀦𑁆𑀢𑁂 (𑀓.)], 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀲𑀫𑁆𑀫𑁄𑀤𑀣 𑀫𑀸 𑀯𑀺𑀯𑀤𑀣 [𑀫𑀸𑀯𑀺𑀯𑀤𑀺𑀢𑁆𑀣 (𑀲𑀻. 𑀲𑁆𑀬𑀸. 𑀧𑀻.)], 𑀫𑀸 𑀳𑁄𑀣 𑀇𑀲𑁆𑀲𑀨𑀦𑁆𑀤𑀦𑀸.

𑁨𑁬. 𑀲𑀸𑀫𑀕𑁆𑀕𑀺𑀫𑁂𑀯 [𑀲𑀸𑀫𑀕𑁆𑀬𑀫𑁂𑀯 (𑀲𑁆𑀬𑀸. 𑀓.)] 𑀲𑀺𑀓𑁆𑀔𑁂𑀣, 𑀩𑀼𑀤𑁆𑀥𑁂𑀳𑁂𑀢𑀁 𑀧𑀲𑀁𑀲𑀺𑀢𑀁;

𑀲𑀸𑀫𑀕𑁆𑀕𑀺𑀭𑀢𑁄 𑀥𑀫𑁆𑀫𑀝𑁆𑀞𑁄, 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀻𑀢𑀺.

𑀨𑀦𑁆𑀤𑀦𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁪𑁭𑁬. 𑀚𑀯𑀦𑀳𑀁𑀲𑀚𑀸𑀢𑀓𑀁 (𑁩)

𑁨𑁭. 𑀇𑀥𑁂𑀯 𑀳𑀁𑀲 𑀦𑀺𑀧𑀢, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦𑀁;

𑀇𑀲𑁆𑀲𑀭𑁄𑀲𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀬𑀫𑀺𑀥𑀢𑁆𑀣𑀺 𑀧𑀯𑁂𑀤𑀬.

𑁨𑁮. 𑀲𑀯𑀦𑁂𑀦 𑀏𑀓𑀲𑁆𑀲 𑀧𑀺𑀬𑀸 𑀪𑀯𑀦𑁆𑀢𑀺, 𑀤𑀺𑀲𑁆𑀯𑀸 𑀧𑀦𑁂𑀓𑀲𑁆𑀲 𑀯𑀺𑀬𑁂𑀢𑀺 [𑀯𑀺𑀦𑁂𑀢𑀺 (𑀲𑁆𑀬𑀸.), 𑀯𑀺𑀳𑁂𑀢𑀺 (𑀧𑀻.), 𑀯𑀺𑀕𑁂𑀢𑀺 (𑀓. 𑀅𑀝𑁆𑀞.)] 𑀙𑀦𑁆𑀤𑁄;

𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀧𑀺𑀬𑀸 𑀪𑀯𑀦𑁆𑀢𑀺, 𑀓𑀘𑁆𑀘𑀺𑀦𑁆𑀦𑀼 𑀫𑁂 𑀧𑀻𑀬𑀲𑀺 [𑀧𑀺𑀬𑁆𑀬𑀲𑀺 (𑀲𑀻. 𑀧𑀻.)] 𑀤𑀲𑁆𑀲𑀦𑁂𑀦.

𑁨𑁯. 𑀲𑀯𑀦𑁂𑀦 𑀧𑀺𑀬𑁄 𑀫𑁂𑀲𑀺, 𑀪𑀺𑀬𑁆𑀬𑁄 𑀘𑀸𑀕𑀫𑁆𑀫 𑀤𑀲𑁆𑀲𑀦𑀁;

𑀏𑀯𑀁 𑀧𑀺𑀬𑀤𑀲𑁆𑀲𑀦𑁄 𑀫𑁂 [𑀏𑀯𑀁 𑀧𑀺𑀬𑀤𑀲𑁆𑀲𑀦𑁄 𑀲𑀫𑀸𑀦𑁄 (𑀲𑀻. 𑀲𑁆𑀬𑀸. 𑀧𑀻.)], 𑀯𑀲 𑀳𑀁𑀲 𑀫𑀫𑀦𑁆𑀢𑀺𑀓𑁂 [𑀫𑀫 𑀲𑀦𑁆𑀢𑀺𑀓𑁂 (𑀲𑀻. 𑀲𑁆𑀬𑀸. 𑀧𑀻.)].

𑁩𑁦. 𑀯𑀲𑁂𑀬𑁆𑀬𑀸𑀫 𑀢𑀯𑀸𑀕𑀸𑀭𑁂, 𑀦𑀺𑀘𑁆𑀘𑀁 𑀲𑀓𑁆𑀓𑀢𑀧𑀽𑀚𑀺𑀢𑀸;

𑀫𑀢𑁆𑀢𑁄 𑀘 𑀏𑀓𑀤𑀸 𑀯𑀚𑁆𑀚𑁂 [𑀯𑀚𑁆𑀚𑀸 (𑀲𑀻. 𑀧𑀻.)], ‘‘𑀳𑀁𑀲𑀭𑀸𑀚𑀁 𑀧𑀘𑀦𑁆𑀢𑀼 𑀫𑁂’’.

𑁩𑁧. 𑀥𑀺𑀭𑀢𑁆𑀣𑀼 𑀢𑀁 𑀫𑀚𑁆𑀚𑀧𑀸𑀦𑀁, 𑀬𑀁 𑀫𑁂 𑀧𑀺𑀬𑀢𑀭𑀁 𑀢𑀬𑀸;

𑀦 𑀘𑀸𑀧𑀺 𑀫𑀚𑁆𑀚𑀁 𑀧𑀺𑀲𑁆𑀲𑀸𑀫𑀺 [𑀧𑀺𑀯𑀺𑀲𑁆𑀲𑀸𑀫𑀺 (𑀲𑁆𑀬𑀸.), 𑀧𑀸𑀬𑀸𑀫𑀺 (𑀲𑀻. 𑀧𑀻.)], 𑀬𑀸𑀯 𑀫𑁂 𑀯𑀘𑁆𑀙𑀲𑀻 𑀖𑀭𑁂.

𑁩𑁨. 𑀲𑀼𑀯𑀺𑀚𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀲𑀓𑀼𑀡𑀸𑀦𑀜𑁆𑀘 [𑀲𑀓𑀼𑀦𑁆𑀢𑀸𑀦𑀜𑁆𑀘 (𑀲𑀻. 𑀲𑁆𑀬𑀸. 𑀧𑀻.)] 𑀯𑀲𑁆𑀲𑀺𑀢𑀁;

𑀫𑀦𑀼𑀲𑁆𑀲𑀯𑀲𑁆𑀲𑀺𑀢𑀁 𑀭𑀸𑀚, 𑀤𑀼𑀩𑁆𑀩𑀺𑀚𑀸𑀦𑀢𑀭𑀁 𑀢𑀢𑁄.

𑁩𑁩. 𑀅𑀧𑀺 𑀘𑁂 𑀫𑀜𑁆𑀜𑀢𑀻 𑀧𑁄𑀲𑁄, 𑀜𑀸𑀢𑀺 𑀫𑀺𑀢𑁆𑀢𑁄 𑀲𑀔𑀸𑀢𑀺 𑀯𑀸;

𑀬𑁄 𑀧𑀼𑀩𑁆𑀩𑁂 𑀲𑀼𑀫𑀦𑁄 𑀳𑀼𑀢𑁆𑀯𑀸, 𑀧𑀘𑁆𑀙𑀸 𑀲𑀫𑁆𑀧𑀚𑁆𑀚𑀢𑁂 𑀤𑀺𑀲𑁄.

𑁩𑁪. 𑀬𑀲𑁆𑀫𑀺𑀁 𑀫𑀦𑁄 𑀦𑀺𑀯𑀺𑀲𑀢𑀺, 𑀅𑀯𑀺𑀤𑀽𑀭𑁂 𑀲𑀳𑀸𑀧𑀺 𑀲𑁄;

𑀲𑀦𑁆𑀢𑀺𑀓𑁂𑀧𑀺 𑀳𑀺 𑀲𑁄 𑀤𑀽𑀭𑁂, 𑀬𑀲𑁆𑀫𑀺𑀁 𑀦𑀸𑀯𑀺𑀲𑀢𑁂 [𑀬𑀲𑁆𑀫𑀸 𑀯𑀺𑀯𑀲𑀢𑁂 (𑀲𑀻. 𑀲𑁆𑀬𑀸. 𑀧𑀻.)] 𑀫𑀦𑁄.

𑁩𑁫. 𑀅𑀦𑁆𑀢𑁄𑀧𑀺 𑀲𑁄 𑀳𑁄𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀧𑀲𑀦𑁆𑀦𑀘𑀺𑀢𑁆𑀢𑁄;

𑀅𑀦𑁆𑀢𑁄𑀧𑀺 𑀲𑁄 𑀳𑁄𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑁄, 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲 𑀧𑀤𑀼𑀝𑁆𑀞𑀘𑀺𑀢𑁆𑀢𑁄.

𑁩𑁬. 𑀲𑀁𑀯𑀲𑀦𑁆𑀢𑀸 𑀯𑀺𑀯𑀲𑀦𑁆𑀢𑀺, 𑀬𑁂 𑀤𑀺𑀲𑀸 𑀢𑁂 𑀭𑀣𑁂𑀲𑀪;

𑀆𑀭𑀸 𑀲𑀦𑁆𑀢𑁄 𑀲𑀁𑀯𑀲𑀦𑁆𑀢𑀺, 𑀫𑀦𑀲𑀸 𑀭𑀝𑁆𑀞𑀯𑀟𑁆𑀠𑀦.

𑁩𑁭. 𑀅𑀢𑀺𑀘𑀺𑀭𑀁 𑀦𑀺𑀯𑀸𑀲𑁂𑀦, 𑀧𑀺𑀬𑁄 𑀪𑀯𑀢𑀺 𑀅𑀧𑁆𑀧𑀺𑀬𑁄;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫 [𑀕𑀘𑁆𑀙𑀸𑀫𑀺 (𑀲𑁆𑀬𑀸.)], 𑀧𑀼𑀭𑀸 𑀢𑁂 𑀳𑁄𑀫 𑀅𑀧𑁆𑀧𑀺𑀬𑀸 [𑀳𑁄𑀫𑀺 𑀅𑀧𑁆𑀧𑀺𑀬𑁄 (𑀲𑁆𑀬𑀸.)].

𑁩𑁮. 𑀏𑀯𑀁 𑀘𑁂 𑀬𑀸𑀘𑀫𑀸𑀦𑀸𑀦𑀁, 𑀅𑀜𑁆𑀚𑀮𑀺𑀁 𑀦𑀸𑀯𑀩𑀼𑀚𑁆𑀛𑀲𑀺;

𑀧𑀭𑀺𑀘𑀸𑀭𑀓𑀸𑀦𑀁 𑀲𑀢𑀁 [𑀲𑀦𑁆𑀢𑀸𑀦𑀁 (𑀲𑀻. 𑀲𑁆𑀬𑀸.), 𑀲𑀢𑁆𑀢𑀸𑀦𑀁 (𑀧𑀻.)], 𑀯𑀘𑀦𑀁 𑀦 𑀓𑀭𑁄𑀲𑀺 𑀦𑁄;

𑀏𑀯𑀁 𑀢𑀁 𑀅𑀪𑀺𑀬𑀸𑀘𑀸𑀫, 𑀧𑀼𑀦 𑀓𑀬𑀺𑀭𑀸𑀲𑀺 𑀧𑀭𑀺𑀬𑀸𑀬𑀁.

𑁩𑁯. 𑀏𑀯𑀁 𑀘𑁂 𑀦𑁄 𑀯𑀺𑀳𑀭𑀢𑀁, 𑀅𑀦𑁆𑀢𑀭𑀸𑀬𑁄 𑀦 𑀳𑁂𑀲𑁆𑀲𑀢𑀺;

𑀢𑀼𑀬𑁆𑀳𑀜𑁆𑀘𑀸𑀧𑀺 [𑀯𑀸𑀧𑀺 (𑀲𑁆𑀬𑀸. 𑀧𑀻. 𑀓.)] 𑀫𑀳𑀸𑀭𑀸𑀚, 𑀫𑀬𑁆𑀳𑀜𑁆𑀘 [𑀯𑀸 (𑀩𑀳𑀽𑀲𑀼)] 𑀭𑀝𑁆𑀞𑀯𑀟𑁆𑀠𑀦;

𑀅𑀧𑁆𑀧𑁂𑀯 𑀦𑀸𑀫 𑀧𑀲𑁆𑀲𑁂𑀫𑀼 [𑀧𑀲𑁆𑀲𑁂𑀫 (𑀲𑀻. 𑀲𑁆𑀬𑀸. 𑀧𑀻.)], 𑀅𑀳𑁄𑀭𑀢𑀸𑀦𑀫𑀘𑁆𑀘𑀬𑁂𑀢𑀺.

𑀚𑀯𑀦𑀳𑀁𑀲𑀚𑀸𑀢𑀓𑀁 𑀢𑀢𑀺𑀬𑀁.

𑁪𑁭𑁭. 𑀘𑀽𑀴𑀦𑀸𑀭𑀤𑀚𑀸𑀢𑀓𑀁 (𑁪)

𑁪𑁦. 𑀦 𑀢𑁂 𑀓𑀝𑁆𑀞𑀸𑀦𑀺 𑀪𑀺𑀦𑁆𑀦𑀸𑀦𑀺, 𑀦 𑀢𑁂 𑀉𑀤𑀓𑀫𑀸𑀪𑀢𑀁;

𑀅𑀕𑁆𑀕𑀻𑀧𑀺 𑀢𑁂 𑀦 𑀳𑀸𑀧𑀺𑀢𑁄 [𑀳𑀸𑀲𑀺𑀢𑁄 (𑀲𑀻. 𑀲𑁆𑀬𑀸.)], 𑀓𑀺𑀁 𑀦𑀼 𑀫𑀦𑁆𑀤𑁄𑀯 𑀛𑀸𑀬𑀲𑀺.

𑁪𑁧. 𑀦 𑀉𑀲𑁆𑀲𑀳𑁂 𑀯𑀦𑁂 𑀯𑀢𑁆𑀣𑀼𑀁, 𑀓𑀲𑁆𑀲𑀧𑀸𑀫𑀦𑁆𑀢𑀬𑀸𑀫𑀺 𑀢𑀁;

𑀤𑀼𑀓𑁆𑀔𑁄 𑀯𑀸𑀲𑁄 𑀅𑀭𑀜𑁆𑀜𑀲𑁆𑀫𑀺𑀁, 𑀭𑀝𑁆𑀞𑀁 𑀇𑀘𑁆𑀙𑀸𑀫𑀺 𑀕𑀦𑁆𑀢𑀯𑁂.

𑁪𑁨. 𑀬𑀣𑀸 𑀅𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑀲𑁆𑀫𑀺𑀁 𑀚𑀦𑀧𑀤𑁂 𑀯𑀲𑀁;

𑀆𑀘𑀸𑀭𑀁 𑀩𑁆𑀭𑀳𑁆𑀫𑁂 [𑀩𑁆𑀭𑀳𑁆𑀫𑀁 (𑀓.)] 𑀲𑀺𑀓𑁆𑀔𑁂𑀬𑁆𑀬𑀁, 𑀢𑀁 𑀥𑀫𑁆𑀫𑀁 𑀅𑀦𑀼𑀲𑀸𑀲 𑀫𑀁.

𑁪𑁩. 𑀲𑀘𑁂 𑀅𑀭𑀜𑁆𑀜𑀁 𑀳𑀺𑀢𑁆𑀯𑀸𑀦, 𑀯𑀦𑀫𑀽𑀮𑀨𑀮𑀸𑀦𑀺 𑀘;

𑀭𑀝𑁆𑀞𑁂 𑀭𑁄𑀘𑀬𑀲𑁂 𑀯𑀸𑀲𑀁, 𑀢𑀁 𑀥𑀫𑁆𑀫𑀁 𑀦𑀺𑀲𑀸𑀫𑁂𑀳𑀺 𑀫𑁂.

𑁪𑁪. 𑀯𑀺𑀲𑀁 𑀫𑀸 𑀧𑀝𑀺𑀲𑁂𑀯𑀺𑀢𑁆𑀣𑁄 [𑀧𑀝𑀺𑀲𑁂𑀯𑀺𑀢𑁆𑀣 (𑀲𑁆𑀬𑀸. 𑀓.)], 𑀧𑀧𑀸𑀢𑀁 𑀧𑀭𑀺𑀯𑀚𑁆𑀚𑀬;

𑀧𑀗𑁆𑀓𑁂 𑀘 𑀫𑀸 𑀯𑀺𑀲𑀻𑀤𑀺𑀢𑁆𑀣𑁄 [𑀧𑀗𑁆𑀓𑁄 𑀘 𑀫𑀸 𑀯𑀺𑀲𑀺𑀬𑀺𑀢𑁆𑀣𑁄 (𑀓.)], 𑀬𑀢𑁆𑀢𑁄 𑀘𑀸𑀲𑀻𑀯𑀺𑀲𑁂 𑀘𑀭𑁂.

𑁪𑁫. 𑀓𑀺𑀁 𑀦𑀼 𑀯𑀺𑀲𑀁 𑀧𑀧𑀸𑀢𑁄 𑀯𑀸, 𑀧𑀗𑁆𑀓𑁄 𑀯𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑀁;

𑀓𑀁 𑀢𑁆𑀯𑀁 𑀆𑀲𑀻𑀯𑀺𑀲𑀁 𑀩𑁆𑀭𑀽𑀲𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄;

𑁪𑁬. 𑀆𑀲𑀯𑁄 𑀢𑀸𑀢 𑀮𑁄𑀓𑀲𑁆𑀫𑀺𑀁, 𑀲𑀼𑀭𑀸 𑀦𑀸𑀫 𑀧𑀯𑀼𑀘𑁆𑀘𑀢𑀺;

𑀫𑀦𑀼𑀜𑁆𑀜𑁄 [𑀫𑀦𑀼𑀜𑁆𑀜𑀸 (𑀲𑀻. 𑀲𑁆𑀬𑀸. 𑀧𑀻.)] 𑀲𑀼𑀭𑀪𑀻 𑀯𑀕𑁆𑀕𑀼, 𑀲𑀸𑀤𑀼 [𑀫𑀥𑀼 (𑀲𑀻. 𑀲𑁆𑀬𑀸.)] 𑀔𑀼𑀤𑁆𑀤𑀭𑀲𑀽𑀧𑀫𑁄 [𑀭𑀲𑀽𑀧𑀫𑀸 (𑀲𑀻. 𑀲𑁆𑀬𑀸. 𑀧𑀻.)];

𑀯𑀺𑀲𑀁 𑀢𑀤𑀸𑀳𑀼 𑀅𑀭𑀺𑀬𑀸 𑀲𑁂, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀸𑀭𑀤.

𑁪𑁭. 𑀇𑀢𑁆𑀣𑀺𑀬𑁄 𑀢𑀸𑀢 𑀮𑁄𑀓𑀲𑁆𑀫𑀺𑀁, 𑀧𑀫𑀢𑁆𑀢𑀁 𑀧𑀫𑀣𑁂𑀦𑁆𑀢𑀺 𑀢𑀸;

𑀳𑀭𑀦𑁆𑀢𑀺 𑀬𑀼𑀯𑀺𑀦𑁄 𑀘𑀺𑀢𑁆𑀢𑀁, 𑀢𑀽𑀮𑀁 𑀪𑀝𑁆𑀞𑀁𑀯 𑀫𑀸𑀮𑀼𑀢𑁄;

𑀧𑀧𑀸𑀢𑁄 𑀏𑀲𑁄 𑀅𑀓𑁆𑀔𑀸𑀢𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀸𑀭𑀤.

𑁪𑁮. 𑀮𑀸𑀪𑁄 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄, 𑀧𑀽𑀚𑀸 𑀧𑀭𑀓𑀼𑀮𑁂𑀲𑀼 𑀘;

𑀧𑀗𑁆𑀓𑁄 𑀏𑀲𑁄 𑀘 [𑀏𑀲𑁄𑀯 (𑀲𑀻. 𑀲𑁆𑀬𑀸. 𑀧𑀻.)] 𑀅𑀓𑁆𑀔𑀸𑀢𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀸𑀭𑀤.

𑁪𑁯. 𑀲𑀲𑀢𑁆𑀣𑀸 [𑀫𑀳𑀦𑁆𑀢𑀸 (𑀲𑁆𑀬𑀸. 𑀓.)] 𑀢𑀸𑀢 𑀭𑀸𑀚𑀸𑀦𑁄, 𑀆𑀯𑀲𑀦𑁆𑀢𑀺 𑀫𑀳𑀺𑀁 𑀇𑀫𑀁;

𑀢𑁂 𑀢𑀸𑀤𑀺𑀲𑁂 𑀫𑀦𑀼𑀲𑁆𑀲𑀺𑀦𑁆𑀤𑁂, 𑀫𑀳𑀦𑁆𑀢𑁂 𑀢𑀸𑀢 𑀦𑀸𑀭𑀤.

𑁫𑁦. 𑀇𑀲𑁆𑀲𑀭𑀸𑀦𑀁 𑀅𑀥𑀺𑀧𑀢𑀻𑀦𑀁, 𑀦 𑀢𑁂𑀲𑀁 𑀧𑀸𑀤𑀢𑁄 𑀘𑀭𑁂;

𑀆𑀲𑀻𑀯𑀺𑀲𑁄𑀢𑀺 [𑀆𑀲𑀻𑀯𑀺𑀲𑁄 𑀲𑁄 (𑀲𑀻. 𑀧𑀻.)] 𑀅𑀓𑁆𑀔𑀸𑀢𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀸𑀭𑀤.

𑁫𑁧. 𑀪𑀢𑁆𑀢𑀢𑁆𑀣𑁄 𑀪𑀢𑁆𑀢𑀓𑀸𑀮𑁂 𑀘 [𑀬𑀁 (𑀲𑀻. 𑀧𑀻.)], 𑀬𑀁 𑀕𑁂𑀳𑀫𑀼𑀧𑀲𑀗𑁆𑀓𑀫𑁂;

𑀬𑀤𑁂𑀢𑁆𑀣 𑀓𑀼𑀲𑀮𑀁 𑀚𑀜𑁆𑀜𑀸, 𑀢𑀢𑁆𑀣 𑀖𑀸𑀲𑁂𑀲𑀦𑀁 𑀘𑀭𑁂.

𑁫𑁨. 𑀧𑀯𑀺𑀲𑀺𑀢𑁆𑀯𑀸 𑀧𑀭𑀓𑀼𑀮𑀁, 𑀧𑀸𑀦𑀢𑁆𑀣𑀁 [𑀧𑀸𑀦𑀢𑁆𑀣𑁄 (𑀲𑁆𑀬𑀸. 𑀧𑀻.)] 𑀪𑁄𑀚𑀦𑀸𑀬 𑀯𑀸;

𑀫𑀺𑀢𑀁 𑀔𑀸𑀤𑁂 𑀫𑀺𑀢𑀁 𑀪𑀼𑀜𑁆𑀚𑁂, 𑀦 𑀘 𑀭𑀽𑀧𑁂 𑀫𑀦𑀁 𑀓𑀭𑁂.

𑁫𑁩. 𑀕𑁄𑀝𑁆𑀞𑀁 𑀫𑀚𑁆𑀚𑀁 𑀓𑀺𑀭𑀸𑀝𑀜𑁆𑀘 [𑀓𑀺𑀭𑀸𑀲𑀜𑁆𑀘 (𑀲𑀻. 𑀲𑁆𑀬𑀸.), 𑀓𑀺𑀭𑀸𑀲𑀁 𑀯𑀸 (𑀧𑀻.)], 𑀲𑀪𑀸 𑀦𑀺𑀓𑀺𑀭𑀡𑀸𑀦𑀺 𑀘;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀳𑀺, 𑀬𑀸𑀦𑀻𑀯 𑀯𑀺𑀲𑀫𑀁 𑀧𑀣𑀦𑁆𑀢𑀺.

𑀘𑀽𑀴𑀦𑀸𑀭𑀤𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁪𑁭𑁮. 𑀤𑀽𑀢𑀚𑀸𑀢𑀓𑀁 (𑁫)

𑁫𑁪. 𑀤𑀽𑀢𑁂 𑀢𑁂 𑀩𑁆𑀭𑀳𑁆𑀫𑁂 [𑀤𑀽𑀢𑁂 𑀩𑁆𑀭𑀸𑀳𑁆𑀫𑀡 (𑀓.)] 𑀧𑀸𑀳𑁂𑀲𑀺𑀁, 𑀕𑀗𑁆𑀕𑀸𑀢𑀻𑀭𑀲𑁆𑀫𑀺 𑀛𑀸𑀬𑀢𑁄;

𑀢𑁂𑀲𑀁 𑀧𑀼𑀝𑁆𑀞𑁄 𑀦 𑀩𑁆𑀬𑀸𑀓𑀸𑀲𑀺, 𑀤𑀼𑀓𑁆𑀔𑀁 𑀕𑀼𑀬𑁆𑀳𑀫𑀢𑀁 [𑀕𑀼𑀬𑁆𑀳𑀁 𑀫𑀢𑀁 (𑀲𑀻.), 𑀢𑀼𑀬𑁆𑀳𑀁 𑀫𑀢𑀁 (𑀲𑁆𑀬𑀸. 𑀓.)] 𑀦𑀼 𑀢𑁂.

𑁫𑁫. 𑀲𑀘𑁂 𑀢𑁂 𑀤𑀼𑀓𑁆𑀔𑀫𑀼𑀧𑁆𑀧𑀚𑁆𑀚𑁂, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦;

𑀫𑀸 𑀔𑁄 𑀦𑀁 𑀢𑀲𑁆𑀲 𑀅𑀓𑁆𑀔𑀸𑀳𑀺, 𑀬𑁄 𑀢𑀁 𑀤𑀼𑀓𑁆𑀔𑀸 𑀦 𑀫𑁄𑀘𑀬𑁂.

𑁫𑁬. 𑀬𑁄 𑀢𑀲𑁆𑀲 [𑀬𑁄 𑀘 𑀢𑀣𑀸 (𑀧𑀻.)] 𑀤𑀼𑀓𑁆𑀔𑀚𑀸𑀢𑀲𑁆𑀲, 𑀏𑀓𑀗𑁆𑀕𑀫𑀧𑀺 𑀪𑀸𑀕𑀲𑁄 [𑀏𑀓𑀦𑁆𑀢𑀫𑀧𑀺 𑀪𑀸𑀲𑀢𑁄 (𑀲𑀻. 𑀧𑀻.)];

𑀯𑀺𑀧𑁆𑀧𑀫𑁄𑀘𑁂𑀬𑁆𑀬 𑀥𑀫𑁆𑀫𑁂𑀦, 𑀓𑀸𑀫𑀁 𑀢𑀲𑁆𑀲 𑀧𑀯𑁂𑀤𑀬 [𑀧𑀯𑁂𑀤𑀬𑁂 (𑀲𑀻.)].

𑁫𑁭. 𑀲𑀼𑀯𑀺𑀚𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀲𑀓𑀼𑀡𑀸𑀦𑀜𑁆𑀘 𑀯𑀲𑁆𑀲𑀺𑀢𑀁;

𑀫𑀦𑀼𑀲𑁆𑀲𑀯𑀲𑁆𑀲𑀺𑀢𑀁 𑀭𑀸𑀚, 𑀤𑀼𑀩𑁆𑀩𑀺𑀚𑀸𑀦𑀢𑀭𑀁 𑀢𑀢𑁄.

𑁫𑁮. 𑀅𑀧𑀺 𑀘𑁂 𑀫𑀜𑁆𑀜𑀢𑀻 𑀧𑁄𑀲𑁄, 𑀜𑀸𑀢𑀺 𑀫𑀺𑀢𑁆𑀢𑁄 𑀲𑀔𑀸𑀢𑀺 𑀯𑀸;

𑀬𑁄 𑀧𑀼𑀩𑁆𑀩𑁂 𑀲𑀼𑀫𑀦𑁄 𑀳𑀼𑀢𑁆𑀯𑀸, 𑀧𑀘𑁆𑀙𑀸 𑀲𑀫𑁆𑀧𑀚𑁆𑀚𑀢𑁂 𑀤𑀺𑀲𑁄.

𑁫𑁯. 𑀬𑁄 𑀅𑀢𑁆𑀢𑀦𑁄 𑀤𑀼𑀓𑁆𑀔𑀫𑀦𑀸𑀦𑀼𑀧𑀼𑀝𑁆𑀞𑁄, 𑀧𑀯𑁂𑀤𑀬𑁂 𑀚𑀦𑁆𑀢𑀼 𑀅𑀓𑀸𑀮𑀭𑀽𑀧𑁂;

𑀆𑀦𑀦𑁆𑀤𑀺𑀦𑁄 𑀢𑀲𑁆𑀲 𑀪𑀯𑀦𑁆𑀢𑀺𑀫𑀺𑀢𑁆𑀢𑀸 [𑀪𑀯𑀦𑁆𑀢’𑀫𑀺𑀢𑁆𑀢𑀸 (𑀲𑀻. 𑀧𑀻.)], 𑀳𑀺𑀢𑁂𑀲𑀺𑀦𑁄 𑀢𑀲𑁆𑀲 𑀤𑀼𑀔𑀻 𑀪𑀯𑀦𑁆𑀢𑀺.

𑁬𑁦. 𑀓𑀸𑀮𑀜𑁆𑀘 𑀜𑀢𑁆𑀯𑀸𑀦 𑀢𑀣𑀸𑀯𑀺𑀥𑀲𑁆𑀲, 𑀫𑁂𑀥𑀸𑀯𑀻𑀦𑀁 𑀏𑀓𑀫𑀦𑀁 𑀯𑀺𑀤𑀺𑀢𑁆𑀯𑀸;

𑀅𑀓𑁆𑀔𑁂𑀬𑁆𑀬 𑀢𑀺𑀩𑁆𑀩𑀸𑀦𑀺 [𑀢𑀺𑀧𑁆𑀧𑀸𑀦𑀺 (𑀲𑀻. 𑀲𑁆𑀬𑀸. 𑀧𑀻.)] 𑀧𑀭𑀲𑁆𑀲 𑀥𑀻𑀭𑁄, 𑀲𑀡𑁆𑀳𑀁 𑀕𑀺𑀭𑀁 𑀅𑀢𑁆𑀣𑀯𑀢𑀺𑀁 𑀧𑀫𑀼𑀜𑁆𑀘𑁂.

𑁬𑁧. 𑀲𑀘𑁂 𑀘 𑀚𑀜𑁆𑀜𑀸 𑀅𑀯𑀺𑀲𑀬𑁆𑀳𑀫𑀢𑁆𑀢𑀦𑁄, 𑀦 𑀢𑁂 𑀳𑀺 𑀫𑀬𑁆𑀳𑀁 [𑀦𑀸𑀬𑀁 𑀦𑀻𑀢𑀺 𑀫𑀬𑁆𑀳 (𑀲𑀻. 𑀧𑀻.)] 𑀲𑀼𑀔𑀸𑀕𑀫𑀸𑀬;

𑀏𑀓𑁄𑀯 𑀢𑀺𑀩𑁆𑀩𑀸𑀦𑀺 𑀲𑀳𑁂𑀬𑁆𑀬 𑀥𑀻𑀭𑁄, 𑀲𑀘𑁆𑀘𑀁 𑀳𑀺𑀭𑁄𑀢𑁆𑀢𑀧𑁆𑀧𑀫𑀧𑁂𑀓𑁆𑀔𑀫𑀸𑀦𑁄.

𑁬𑁨. 𑀅𑀳𑀁 𑀭𑀝𑁆𑀞𑀸𑀦𑀺 𑀯𑀺𑀘𑀭𑀦𑁆𑀢𑁄, 𑀦𑀺𑀕𑀫𑁂 𑀭𑀸𑀚𑀥𑀸𑀦𑀺𑀬𑁄;

𑀪𑀺𑀓𑁆𑀔𑀫𑀸𑀦𑁄 𑀫𑀳𑀸𑀭𑀸𑀚, 𑀆𑀘𑀭𑀺𑀬𑀲𑁆𑀲 𑀥𑀦𑀢𑁆𑀣𑀺𑀓𑁄.

𑁬𑁩. 𑀕𑀳𑀧𑀢𑀻 𑀭𑀸𑀚𑀧𑀼𑀭𑀺𑀲𑁂, 𑀫𑀳𑀸𑀲𑀸𑀮𑁂 𑀘 𑀩𑁆𑀭𑀸𑀳𑁆𑀫𑀡𑁂;

𑀅𑀮𑀢𑁆𑀣𑀁 𑀲𑀢𑁆𑀢 𑀦𑀺𑀓𑁆𑀔𑀸𑀦𑀺, 𑀲𑀼𑀯𑀡𑁆𑀡𑀲𑁆𑀲 𑀚𑀦𑀸𑀥𑀺𑀧;

𑀢𑁂 𑀫𑁂 𑀦𑀝𑁆𑀞𑀸 𑀫𑀳𑀸𑀭𑀸𑀚, 𑀢𑀲𑁆𑀫𑀸 𑀲𑁄𑀘𑀸𑀫𑀳𑀁 𑀪𑀼𑀲𑀁.

𑁬𑁪. 𑀧𑀼𑀭𑀺𑀲𑀸 𑀢𑁂 𑀫𑀳𑀸𑀭𑀸𑀚, 𑀫𑀦𑀲𑀸𑀦𑀼𑀯𑀺𑀘𑀺𑀦𑁆𑀢𑀺𑀢𑀸;

𑀦𑀸𑀮𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀢𑀼𑀁, 𑀢𑀲𑁆𑀫𑀸 𑀢𑁂𑀲𑀁 𑀦 𑀩𑁆𑀬𑀸𑀳𑀭𑀺𑀁.

𑁬𑁫. 𑀢𑁆𑀯𑀜𑁆𑀘 𑀔𑁄 𑀫𑁂 𑀫𑀳𑀸𑀭𑀸𑀚, 𑀫𑀦𑀲𑀸𑀦𑀼𑀯𑀺𑀘𑀺𑀦𑁆𑀢𑀺𑀢𑁄;

𑀅𑀮𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀢𑀼𑀁, 𑀢𑀲𑁆𑀫𑀸 𑀢𑀼𑀬𑁆𑀳𑀁 𑀧𑀯𑁂𑀤𑀬𑀺𑀁.

𑁬𑁬. 𑀢𑀲𑁆𑀲𑀸𑀤𑀸𑀲𑀺 𑀧𑀲𑀦𑁆𑀦𑀢𑁆𑀢𑁄, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄;

𑀚𑀸𑀢𑀭𑀽𑀧𑀫𑀬𑁂 𑀦𑀺𑀓𑁆𑀔𑁂, 𑀲𑀼𑀯𑀡𑁆𑀡𑀲𑁆𑀲 𑀘𑀢𑀼𑀤𑁆𑀤𑀲𑀸𑀢𑀺.

𑀤𑀽𑀢𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁪𑁭𑁯. 𑀓𑀸𑀮𑀺𑀗𑁆𑀕𑀩𑁄𑀥𑀺𑀚𑀸𑀢𑀓𑀁 (𑁬)