𑁧𑁪. 𑀧𑀓𑀺𑀡𑁆𑀡𑀓𑀦𑀺𑀧𑀸𑀢𑁄

𑁪𑁮𑁪. 𑀲𑀸𑀮𑀺𑀓𑁂𑀤𑀸𑀭𑀚𑀸𑀢𑀓𑀁 (𑁧)

𑁧. 𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭𑀁, 𑀲𑀼𑀯𑀸 𑀪𑀼𑀜𑁆𑀚𑀦𑁆𑀢𑀺 𑀓𑁄𑀲𑀺𑀬;

𑀧𑀝𑀺𑀯𑁂𑀤𑁂𑀫𑀺 𑀢𑁂 𑀩𑁆𑀭𑀳𑁆𑀫𑁂, 𑀦 𑀦𑁂 [𑀢𑁂 (𑀲𑀻. 𑀲𑁆𑀬𑀸.), 𑀦𑀁 (𑀲𑀻. 𑀲𑁆𑀬𑀸. 𑀧𑀻. 𑀅𑀝𑁆𑀞.), 𑀢𑀁 (𑀓. 𑀅𑀝𑁆𑀞.)] 𑀯𑀸𑀭𑁂𑀢𑀼𑀫𑀼𑀲𑁆𑀲𑀳𑁂.

𑁨. 𑀏𑀓𑁄 𑀘 𑀢𑀢𑁆𑀣 𑀲𑀓𑀼𑀡𑁄, 𑀬𑁄 𑀦𑁂𑀲𑀁 [𑀢𑁂𑀲𑀁 (𑀲𑀻. 𑀅𑀝𑁆𑀞.)] 𑀲𑀩𑁆𑀩𑀲𑀼𑀦𑁆𑀤𑀭𑁄;

𑀪𑀼𑀢𑁆𑀯𑀸 𑀲𑀸𑀮𑀺𑀁 𑀬𑀣𑀸𑀓𑀸𑀫𑀁, 𑀢𑀼𑀡𑁆𑀟𑁂𑀦𑀸𑀤𑀸𑀬 𑀕𑀘𑁆𑀙𑀢𑀺.

𑁩. 𑀑𑀟𑁆𑀟𑁂𑀦𑁆𑀢𑀼 [𑀉𑀚𑁆𑀛𑀼𑀦𑁆𑀢𑀼 (𑀲𑁆𑀬𑀸. 𑀓.) 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀧𑀲𑁆𑀲𑀺𑀢𑀩𑁆𑀩𑀁] 𑀯𑀸𑀴𑀧𑀸𑀲𑀸𑀦𑀺, 𑀬𑀣𑀸 𑀯𑀚𑁆𑀛𑁂𑀣 𑀲𑁄 𑀤𑀺𑀚𑁄;

𑀚𑀻𑀯𑀜𑁆𑀘 𑀦𑀁 𑀕𑀳𑁂𑀢𑁆𑀯𑀸𑀦, 𑀆𑀦𑀬𑁂𑀳𑀺 [𑀆𑀦𑀬𑁂𑀣 (𑀲𑀻. 𑀧𑀻.)] 𑀫𑀫𑀦𑁆𑀢𑀺𑀓𑁂.

𑁪. 𑀏𑀢𑁂 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘 [𑀪𑀼𑀢𑁆𑀯𑀸 𑀘 𑀧𑀺𑀢𑁆𑀯𑀸 𑀘 (𑀧𑀻.)], 𑀧𑀓𑁆𑀓𑀫𑀦𑁆𑀢𑀺 𑀯𑀺𑀳𑀗𑁆𑀕𑀫𑀸;

𑀏𑀓𑁄 𑀩𑀤𑁆𑀥𑁄𑀲𑁆𑀫𑀺 𑀧𑀸𑀲𑁂𑀦, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸.

𑁫. 𑀉𑀤𑀭𑀁 𑀦𑀽𑀦 𑀅𑀜𑁆𑀜𑁂𑀲𑀁, 𑀲𑀼𑀯 𑀅𑀘𑁆𑀘𑁄𑀤𑀭𑀁 𑀢𑀯;

𑀪𑀼𑀢𑁆𑀯𑀸 𑀲𑀸𑀮𑀺𑀁 𑀬𑀣𑀸𑀓𑀸𑀫𑀁, 𑀢𑀼𑀡𑁆𑀟𑁂𑀦𑀸𑀤𑀸𑀬 𑀕𑀘𑁆𑀙𑀲𑀺.

𑁬. 𑀓𑁄𑀝𑁆𑀞𑀁 𑀦𑀼 𑀢𑀢𑁆𑀣 𑀧𑀽𑀭𑁂𑀲𑀺, 𑀲𑀼𑀯 𑀯𑁂𑀭𑀁 𑀦𑀼 𑀢𑁂 𑀫𑀬𑀸;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀼𑀳𑀺𑀁 𑀲𑀸𑀮𑀺𑀁 𑀦𑀺𑀤𑀸𑀳𑀲𑀺 [𑀦𑀺𑀥𑀻𑀬𑀲𑀺 (𑀧𑀻.)].

𑁭. 𑀦 𑀫𑁂 𑀯𑁂𑀭𑀁 𑀢𑀬𑀸 𑀲𑀤𑁆𑀥𑀺𑀁, 𑀓𑁄𑀝𑁆𑀞𑁄 𑀫𑀬𑁆𑀳𑀁 𑀦 𑀯𑀺𑀚𑁆𑀚𑀢𑀺;

𑀇𑀡𑀁 𑀫𑀼𑀜𑁆𑀘𑀸𑀫𑀺𑀡𑀁 𑀤𑀫𑁆𑀫𑀺, 𑀲𑀫𑁆𑀧𑀢𑁆𑀢𑁄 𑀓𑁄𑀝𑀲𑀺𑀫𑁆𑀩𑀮𑀺𑀁;

𑀦𑀺𑀥𑀺𑀫𑁆𑀧𑀺 𑀢𑀢𑁆𑀣 𑀦𑀺𑀤𑀳𑀸𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀓𑁄𑀲𑀺𑀬.

𑁮. 𑀓𑀻𑀤𑀺𑀲𑀁 𑀢𑁂 𑀇𑀡𑀤𑀸𑀦𑀁, 𑀇𑀡𑀫𑁄𑀓𑁆𑀔𑁄 𑀘 𑀓𑀻𑀤𑀺𑀲𑁄;

𑀦𑀺𑀥𑀺𑀦𑀺𑀥𑀸𑀦𑀫𑀓𑁆𑀔𑀸𑀳𑀺, 𑀅𑀣 𑀧𑀸𑀲𑀸 𑀧𑀫𑁄𑀓𑁆𑀔𑀲𑀺.

𑁯. 𑀅𑀚𑀸𑀢𑀧𑀓𑁆𑀔𑀸 𑀢𑀭𑀼𑀡𑀸, 𑀧𑀼𑀢𑁆𑀢𑀓𑀸 𑀫𑀬𑁆𑀳 𑀓𑁄𑀲𑀺𑀬;

𑀢𑁂 𑀫𑀁 𑀪𑀢𑀸 𑀪𑀭𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀇𑀡𑀁 𑀤𑀤𑁂.

𑁧𑁦. 𑀫𑀸𑀢𑀸 𑀧𑀺𑀢𑀸 𑀘 𑀫𑁂 𑀯𑀼𑀤𑁆𑀥𑀸, 𑀚𑀺𑀡𑁆𑀡𑀓𑀸 𑀕𑀢𑀬𑁄𑀩𑁆𑀩𑀦𑀸;

𑀢𑁂𑀲𑀁 𑀢𑀼𑀡𑁆𑀟𑁂𑀦 𑀳𑀸𑀢𑀽𑀦, 𑀫𑀼𑀜𑁆𑀘𑁂 𑀧𑀼𑀩𑁆𑀩𑀓𑀢𑀁 [𑀧𑀼𑀩𑁆𑀩𑁂 𑀓𑀢𑀁 (𑀲𑀻.)] 𑀇𑀡𑀁.

𑁧𑁧. 𑀅𑀜𑁆𑀜𑁂𑀧𑀺 𑀢𑀢𑁆𑀣 𑀲𑀓𑀼𑀡𑀸, 𑀔𑀻𑀡𑀧𑀓𑁆𑀔𑀸 𑀲𑀼𑀤𑀼𑀩𑁆𑀩𑀮𑀸;

𑀢𑁂𑀲𑀁 𑀧𑀼𑀜𑁆𑀜𑀢𑁆𑀣𑀺𑀓𑁄 𑀤𑀫𑁆𑀫𑀺, 𑀢𑀁 𑀦𑀺𑀥𑀺𑀁 𑀆𑀳𑀼 𑀧𑀡𑁆𑀟𑀺𑀢𑀸.

𑁧𑁨. 𑀈𑀤𑀺𑀲𑀁 [𑀏𑀤𑀺𑀲𑀁 (𑀲𑀻. 𑀧𑀻.)] 𑀫𑁂 𑀇𑀡𑀤𑀸𑀦𑀁, 𑀇𑀡𑀫𑁄𑀓𑁆𑀔𑁄 𑀘 𑀈𑀤𑀺𑀲𑁄;

𑀦𑀺𑀥𑀺𑀦𑀺𑀥𑀸𑀦𑀫𑀓𑁆𑀔𑀸𑀫𑀺 [𑀦𑀺𑀥𑀺𑀁 𑀦𑀺𑀥𑀸𑀦𑀁 𑀅𑀓𑁆𑀔𑀸𑀢𑀁 (𑀲𑀻. 𑀧𑀻.)], 𑀏𑀯𑀁 𑀚𑀸𑀦𑀸𑀳𑀺 𑀓𑁄𑀲𑀺𑀬.

𑁧𑁩. 𑀪𑀤𑁆𑀤𑀓𑁄 𑀯𑀢𑀬𑀁 𑀧𑀓𑁆𑀔𑀻, 𑀤𑀺𑀚𑁄 𑀧𑀭𑀫𑀥𑀫𑁆𑀫𑀺𑀓𑁄;

𑀏𑀓𑀘𑁆𑀘𑁂𑀲𑀼 𑀫𑀦𑀼𑀲𑁆𑀲𑁂𑀲𑀼, 𑀅𑀬𑀁 𑀥𑀫𑁆𑀫𑁄 𑀦 𑀯𑀺𑀚𑁆𑀚𑀢𑀺.

𑁧𑁪. 𑀪𑀼𑀜𑁆𑀚 𑀲𑀸𑀮𑀺𑀁 𑀬𑀣𑀸𑀓𑀸𑀫𑀁, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀧𑀼𑀦𑀸𑀧𑀺 𑀲𑀼𑀯 𑀧𑀲𑁆𑀲𑁂𑀫𑀼, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦𑀁.

𑁧𑁫. 𑀪𑀼𑀢𑁆𑀢𑀜𑁆𑀘 𑀧𑀻𑀢𑀜𑁆𑀘 𑀢𑀯𑀲𑁆𑀲𑀫𑀫𑁆𑀳𑀺 [𑀢𑀯𑀲𑁆𑀲𑀩𑁆𑀬𑀫𑁆𑀳𑀺 (𑀓.)], 𑀭𑀢𑁆𑀢𑀺𑀜𑁆𑀘 [𑀭𑀢𑀻 𑀘 (𑀲𑀻. 𑀧𑀻.)] 𑀦𑁄 𑀓𑁄𑀲𑀺𑀬 𑀢𑁂 𑀲𑀓𑀸𑀲𑁂;

𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁂𑀲𑀼 𑀤𑀤𑀸𑀳𑀺 𑀤𑀸𑀦𑀁, 𑀚𑀺𑀡𑁆𑀡𑁂 𑀘 𑀫𑀸𑀢𑀸𑀧𑀺𑀢𑀭𑁄 𑀪𑀭𑀲𑁆𑀲𑀼.

𑁧𑁬. 𑀮𑀓𑁆𑀔𑀻 𑀯𑀢 𑀫𑁂 𑀉𑀤𑀧𑀸𑀤𑀺 𑀅𑀚𑁆𑀚, 𑀬𑁄 𑀅𑀤𑁆𑀤𑀲𑀸𑀲𑀺𑀁 𑀧𑀯𑀭𑀁 [𑀬𑁄𑀳𑀁 𑀅𑀤𑀲𑁆𑀲𑀁 𑀧𑀭𑀫𑀁 (𑀲𑁆𑀬𑀸. 𑀓.)] 𑀤𑀺𑀚𑀸𑀦𑀁;

𑀲𑀼𑀯𑀲𑁆𑀲 𑀲𑀼𑀢𑁆𑀯𑀸𑀦 𑀲𑀼𑀪𑀸𑀲𑀺𑀢𑀸𑀦𑀺, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀺.

𑁧𑁭. 𑀲𑁄 𑀓𑁄𑀲𑀺𑀬𑁄 𑀅𑀢𑁆𑀢𑀫𑀦𑁄 𑀉𑀤𑀕𑁆𑀕𑁄, 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘𑀪𑀺𑀲𑀗𑁆𑀔𑀭𑀺𑀢𑁆𑀯𑀸 [𑀅𑀦𑁆𑀦𑀜𑁆𑀘 𑀧𑀸𑀦𑀁 𑀅𑀪𑀺𑀲𑀁𑀳𑀭𑀺𑀢𑁆𑀯𑀸 (𑀓.)];

𑀅𑀦𑁆𑀦𑁂𑀦 𑀧𑀸𑀦𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀦𑁆𑀢𑀧𑁆𑀧𑀬𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀘𑀸𑀢𑀺.

𑀲𑀸𑀮𑀺𑀓𑁂𑀤𑀸𑀭𑀚𑀸𑀢𑀓𑀁 [𑀓𑁂𑀤𑀸𑀭𑀚𑀸𑀢𑀓𑀁 (𑀓.)] 𑀧𑀞𑀫𑀁.

𑁪𑁮𑁫. 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀁 (𑁨)

𑁧𑁮. 𑀉𑀧𑀦𑀻𑀬𑀢𑀺𑀤𑀁 𑀫𑀜𑁆𑀜𑁂, 𑀘𑀦𑁆𑀤𑁂 [𑀮𑁄𑀳𑀺𑀢𑀫𑀤𑁂𑀦 𑀫𑀚𑁆𑀚𑀸𑀫𑀺; 𑀯𑀺𑀚𑀳𑀸𑀫𑀺 𑀚𑀻𑀯𑀺𑀢𑀁 𑀧𑀸𑀡𑀸, (𑀲𑀻. 𑀧𑀻. 𑀅𑀝𑁆𑀞.)] 𑀮𑁄𑀳𑀺𑀢𑀫𑀤𑁆𑀤𑀦𑁂;

𑀅𑀚𑁆𑀚 𑀚𑀳𑀸𑀫𑀺 𑀚𑀻𑀯𑀺𑀢𑀁, 𑀧𑀸𑀡𑀸 [𑀮𑁄𑀳𑀺𑀢𑀫𑀤𑁂𑀦 𑀫𑀚𑁆𑀚𑀸𑀫𑀺; 𑀯𑀺𑀚𑀳𑀸𑀫𑀺 𑀚𑀻𑀯𑀺𑀢𑀁 𑀧𑀸𑀡𑀸, (𑀲𑀻. 𑀧𑀻. 𑀅𑀝𑁆𑀞.)] 𑀫𑁂 𑀘𑀦𑁆𑀤𑁂 𑀦𑀺𑀭𑀼𑀚𑁆𑀛𑀦𑁆𑀢𑀺.

𑁧𑁯. 𑀑𑀲𑀻𑀤𑀺 [𑀑𑀲𑀥𑀺 (𑀲𑀻. 𑀲𑁆𑀬𑀸. 𑀧𑀻.), 𑀑𑀲𑀝𑁆𑀞𑀺 (𑀓.), 𑀑𑀲𑀢𑀺 (𑀅𑀪𑀺𑀦𑀯𑀝𑀻𑀓𑀸), 𑀑𑀲𑀻𑀤𑀢𑀺 (?)] 𑀫𑁂 𑀤𑀼𑀓𑁆𑀔𑀁 [𑀤𑀼𑀓𑁆𑀔𑀁 𑀫𑁂 (𑀲𑀻. 𑀧𑀻.)] 𑀳𑀤𑀬𑀁, 𑀫𑁂 𑀟𑀬𑁆𑀳𑀢𑁂 𑀦𑀺𑀢𑀫𑁆𑀫𑀸𑀫𑀺;

𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀺.

𑁨𑁦. 𑀢𑀺𑀡𑀫𑀺𑀯 𑀯𑀦𑀫𑀺𑀯 𑀫𑀺𑀮𑀸𑀬𑀸𑀫𑀺 [𑀫𑀺𑀮𑀬𑀸𑀫𑀺 (𑀲𑀻.), 𑀫𑀺𑀬𑁆𑀬𑀸𑀫𑀺 (𑀲𑀻. 𑀧𑀻. 𑀅𑀝𑁆𑀞.)], 𑀦𑀤𑀻 𑀅𑀧𑀭𑀺𑀧𑀼𑀡𑁆𑀡𑀸𑀯 [𑀅𑀧𑀭𑀺𑀧𑀼𑀡𑁆𑀡𑀺𑀬𑀸𑀯 (𑀲𑀻. 𑀧𑀻.)] 𑀲𑀼𑀲𑁆𑀲𑀸𑀫𑀺;

𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀺.

𑁨𑁧. 𑀯𑀲𑁆𑀲𑀫𑀺𑀯 𑀲𑀭𑁂 𑀧𑀸𑀤𑁂 [𑀯𑀲𑁆𑀲𑀁𑀯 𑀲𑀭𑁂 𑀧𑀸𑀤𑁂 (𑀲𑀻.), 𑀯𑀲𑁆𑀲𑀁𑀯 𑀲𑀭𑁂 𑀧𑀩𑁆𑀩𑀢𑀧𑀸𑀤𑁂 (𑀧𑀻.)], 𑀇𑀫𑀸𑀦𑀺 𑀅𑀲𑁆𑀲𑀽𑀦𑀺 𑀯𑀢𑁆𑀢𑀭𑁂 𑀫𑀬𑁆𑀳𑀁;

𑀢𑀯 𑀘𑀦𑁆𑀤𑀺𑀬𑀸 𑀲𑁄𑀘𑀦𑁆𑀢𑀺𑀬𑀸, 𑀦 𑀦𑀁 𑀅𑀜𑁆𑀜𑁂𑀳𑀺 𑀲𑁄𑀓𑁂𑀳𑀺.

𑁨𑁨. 𑀧𑀸𑀧𑁄 𑀔𑁄𑀲𑀺 [𑀧𑀸𑀧𑁄𑀲𑀺 𑀔𑁄 (𑀲𑀻.), 𑀧𑀸𑀧𑁄 𑀔𑁄 (𑀲𑁆𑀬𑀸. 𑀧𑀻.)] 𑀭𑀸𑀚𑀧𑀼𑀢𑁆𑀢, 𑀬𑁄 𑀫𑁂 𑀇𑀘𑁆𑀙𑀺𑀢𑀁 [𑀇𑀘𑁆𑀙𑀺𑀢 (𑀲𑀻. 𑀲𑁆𑀬𑀸. 𑀧𑀻.)] 𑀧𑀢𑀺𑀁 𑀯𑀭𑀸𑀓𑀺𑀬𑀸;

𑀯𑀺𑀚𑁆𑀛𑀲𑀺 𑀯𑀦𑀫𑀽𑀮𑀲𑁆𑀫𑀺𑀁, 𑀲𑁄𑀬𑀁 𑀯𑀺𑀤𑁆𑀥𑁄 𑀙𑀫𑀸 𑀲𑁂𑀢𑀺.

𑁨𑁩. 𑀇𑀫𑀁 𑀫𑀬𑁆𑀳𑀁 𑀳𑀤𑀬𑀲𑁄𑀓𑀁, 𑀧𑀝𑀺𑀫𑀼𑀜𑁆𑀘𑀢𑀼 𑀭𑀸𑀚𑀧𑀼𑀢𑁆𑀢 𑀢𑀯 𑀫𑀸𑀢𑀸;

𑀬𑁄 𑀫𑀬𑁆𑀳𑀁 𑀳𑀤𑀬𑀲𑁄𑀓𑁄, 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑁂𑀓𑁆𑀔𑀫𑀸𑀦𑀸𑀬.

𑁨𑁪. 𑀇𑀫𑀁 𑀫𑀬𑁆𑀳𑀁 𑀳𑀤𑀬𑀲𑁄𑀓𑀁, 𑀧𑀝𑀺𑀫𑀼𑀜𑁆𑀘𑀢𑀼 𑀭𑀸𑀚𑀧𑀼𑀢𑁆𑀢 𑀢𑀯 𑀚𑀸𑀬𑀸;

𑀬𑁄 𑀫𑀬𑁆𑀳𑀁 𑀳𑀤𑀬𑀲𑁄𑀓𑁄, 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑁂𑀓𑁆𑀔𑀫𑀸𑀦𑀸𑀬.

𑁨𑁫. 𑀫𑀸 𑀘 𑀧𑀼𑀢𑁆𑀢𑀁 [𑀧𑀼𑀢𑁆𑀢𑁂 (𑀲𑀻. 𑀧𑀻.)] 𑀫𑀸 𑀘 𑀧𑀢𑀺𑀁, 𑀅𑀤𑁆𑀤𑀓𑁆𑀔𑀺 𑀭𑀸𑀚𑀧𑀼𑀢𑁆𑀢 𑀢𑀯 𑀫𑀸𑀢𑀸;

𑀬𑁄 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑀥𑀺, 𑀅𑀤𑀽𑀲𑀓𑀁 𑀫𑀬𑁆𑀳 𑀓𑀸𑀫𑀸 𑀳𑀺 [𑀫𑀬𑁆𑀳𑀁 𑀓𑀸𑀫𑀸 (𑀓.)].

𑁨𑁬. 𑀫𑀸 𑀘 𑀧𑀼𑀢𑁆𑀢𑀁 𑀫𑀸 𑀘 𑀧𑀢𑀺𑀁, 𑀅𑀤𑁆𑀤𑀓𑁆𑀔𑀺 𑀭𑀸𑀚𑀧𑀼𑀢𑁆𑀢 𑀢𑀯 𑀚𑀸𑀬𑀸;

𑀬𑁄 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑀥𑀺, 𑀅𑀤𑀽𑀲𑀓𑀁 𑀫𑀬𑁆𑀳 𑀓𑀸𑀫𑀸 𑀳𑀺.

𑁨𑁭. 𑀫𑀸 𑀢𑁆𑀯𑀁 𑀘𑀦𑁆𑀤𑁂 𑀭𑁄𑀤𑀺, 𑀫𑀸 𑀲𑁄𑀘𑀺 𑀯𑀦𑀢𑀺𑀫𑀺𑀭𑀫𑀢𑁆𑀢𑀓𑁆𑀔𑀺;

𑀫𑀫 𑀢𑁆𑀯𑀁 𑀳𑁂𑀳𑀺𑀲𑀺 𑀪𑀭𑀺𑀬𑀸, 𑀭𑀸𑀚𑀓𑀼𑀮𑁂 𑀧𑀽𑀚𑀺𑀢𑀸 𑀦𑀸𑀭𑀻𑀪𑀺 [𑀦𑀸𑀭𑀻 (𑀲𑀻. 𑀧𑀻.)].

𑁨𑁮. 𑀅𑀧𑀺 𑀦𑀽𑀦𑀳𑀁 𑀫𑀭𑀺𑀲𑁆𑀲𑀁, 𑀦𑀸𑀳𑀁 [𑀦 𑀘 𑀧𑀦𑀸𑀳𑀁 (𑀲𑀻. 𑀧𑀻.)] 𑀭𑀸𑀚𑀧𑀼𑀢𑁆𑀢 𑀢𑀯 𑀳𑁂𑀲𑁆𑀲𑀁;

𑀬𑁄 𑀓𑀺𑀫𑁆𑀧𑀼𑀭𑀺𑀲𑀁 𑀅𑀯𑀥𑀺, 𑀅𑀤𑀽𑀲𑀓𑀁 𑀫𑀬𑁆𑀳 𑀓𑀸𑀫𑀸 𑀳𑀺.

𑁨𑁯. 𑀅𑀧𑀺 𑀪𑀻𑀭𑀼𑀓𑁂 𑀅𑀧𑀺 𑀚𑀻𑀯𑀺𑀢𑀼𑀓𑀸𑀫𑀺𑀓𑁂, 𑀓𑀺𑀫𑁆𑀧𑀼𑀭𑀺𑀲𑀺 𑀕𑀘𑁆𑀙 𑀳𑀺𑀫𑀯𑀦𑁆𑀢𑀁;

𑀢𑀸𑀮𑀻𑀲𑀢𑀕𑀭𑀪𑁄𑀚𑀦𑀸, 𑀅𑀜𑁆𑀜𑁂 [𑀢𑀸𑀮𑀺𑀲𑁆𑀲𑀢𑀕𑀭𑀪𑁄𑀚𑀦𑁂, 𑀅𑀭𑀜𑁆𑀜𑁂 (𑀲𑀻. 𑀧𑀻.)] 𑀢𑀁 𑀫𑀺𑀕𑀸 𑀭𑀫𑀺𑀲𑁆𑀲𑀦𑁆𑀢𑀺.

𑁩𑁦. 𑀢𑁂 𑀧𑀩𑁆𑀩𑀢𑀸 𑀢𑀸 𑀘 𑀓𑀦𑁆𑀤𑀭𑀸, [𑀢𑀸 𑀘 𑀕𑀺𑀭𑀺𑀕𑀼𑀳𑀸𑀬𑁄 (𑀲𑀻. 𑀲𑁆𑀬𑀸. 𑀧𑀻.)] 𑀢𑀸 𑀘 𑀕𑀺𑀭𑀺𑀕𑀼𑀳𑀸𑀬𑁄 𑀢𑀣𑁂𑀯 𑀢𑀺𑀝𑁆𑀞𑀦𑁆𑀢𑀺 [𑀢𑀸 𑀘 𑀕𑀺𑀭𑀺𑀕𑀼𑀳𑀸𑀬𑁄 (𑀲𑀻. 𑀲𑁆𑀬𑀸. 𑀧𑀻.)];

𑀢𑀢𑁆𑀣𑁂𑀯 [𑀢𑀢𑁆𑀣 (𑀲𑀻. 𑀲𑁆𑀬𑀸. 𑀧𑀻.)] 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁.

𑁩𑁧. 𑀢𑁂 𑀧𑀡𑁆𑀡𑀲𑀦𑁆𑀣𑀢𑀸 𑀭𑀫𑀡𑀻𑀬𑀸, 𑀯𑀸𑀴𑀫𑀺𑀕𑁂𑀳𑀺 𑀅𑀦𑀼𑀘𑀺𑀡𑁆𑀡𑀸;

𑀢𑀢𑁆𑀣𑁂𑀯 𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀓𑀺𑀫𑁆𑀧𑀼𑀭𑀺𑀲 𑀓𑀣𑀁 𑀅𑀳𑀁 𑀓𑀲𑁆𑀲𑀁 [𑀓𑀸𑀲𑀁 (𑀲𑀻. 𑀲𑁆𑀬𑀸. 𑀧𑀻.)].

𑁩𑁨. 𑀢𑁂 𑀧𑀼𑀧𑁆𑀨𑀲𑀦𑁆𑀣𑀢𑀸 𑀭𑀫𑀡𑀻𑀬𑀸, 𑀯𑀸𑀴𑀫𑀺𑀕𑁂𑀳𑀺 𑀅𑀦𑀼𑀘𑀺𑀡𑁆𑀡𑀸;