𑁧𑁫. 𑀯𑀻𑀲𑀢𑀺𑀦𑀺𑀧𑀸𑀢𑁄

𑁪𑁯𑁭. 𑀫𑀸𑀢𑀗𑁆𑀕𑀚𑀸𑀢𑀓𑀁 (𑁧)

𑁧. 𑀓𑀼𑀢𑁄 𑀦𑀼 𑀆𑀕𑀘𑁆𑀙𑀲𑀺 𑀤𑀼𑀫𑁆𑀫𑀯𑀸𑀲𑀻 [𑀭𑀼𑀫𑁆𑀫𑀯𑀸𑀲𑀻 (𑀲𑀻. 𑀧𑀻.)], 𑀑𑀢𑀮𑁆𑀮𑀓𑁄 𑀧𑀁𑀲𑀼𑀧𑀺𑀲𑀸𑀘𑀓𑁄𑀯;

𑀲𑀗𑁆𑀓𑀸𑀭𑀘𑁄𑀴𑀁 𑀧𑀝𑀺𑀫𑀼𑀜𑁆𑀘 [𑀧𑀝𑀺𑀫𑀼𑀘𑁆𑀘 (𑀲𑀻. 𑀧𑀻.)] 𑀓𑀡𑁆𑀞𑁂, 𑀓𑁄 𑀭𑁂 𑀢𑀼𑀯𑀁 𑀳𑁄𑀲𑀺 [𑀳𑁄𑀳𑀺𑀲𑀺 (𑀲𑀻. 𑀧𑀻.)] 𑀅𑀤𑀓𑁆𑀔𑀺𑀡𑁂𑀬𑁆𑀬𑁄.

𑁨. 𑀅𑀦𑁆𑀦𑀁 𑀢𑀯𑁂𑀤𑀁 [𑀢𑀯 𑀇𑀤𑀁 (𑀓. 𑀲𑀻. 𑀧𑀻.), 𑀢𑀯𑀬𑀺𑀤𑀁 (𑀲𑁆𑀬𑀸.)] 𑀧𑀓𑀢𑀁 𑀬𑀲𑀲𑁆𑀲𑀺, 𑀢𑀁 𑀔𑀚𑁆𑀚𑀭𑁂 𑀪𑀼𑀜𑁆𑀚𑀭𑁂 𑀧𑀺𑀬𑁆𑀬𑀭𑁂 𑀘;

𑀚𑀸𑀦𑀸𑀲𑀺 𑀫𑀁 𑀢𑁆𑀯𑀁 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀁, 𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑀁 𑀮𑀪𑀢𑀁 𑀲𑀧𑀸𑀓𑁄.

𑁩. 𑀅𑀦𑁆𑀦𑀁 𑀫𑀫𑁂𑀤𑀁 [𑀫𑀫 𑀇𑀤𑀁 (𑀓. 𑀲𑀻. 𑀧𑀻.), 𑀫𑀫𑀬𑀺𑀤𑀁 (𑀲𑁆𑀬𑀸.)] 𑀧𑀓𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁, 𑀅𑀢𑁆𑀢𑀢𑁆𑀣𑀸𑀬 𑀲𑀤𑁆𑀤𑀳𑀢𑁄 𑀫𑀫𑁂𑀤𑀁 [𑀫𑀫 𑀇𑀤𑀁 (𑀓. 𑀲𑀻. 𑀧𑀻.), 𑀫𑀫𑀬𑀺𑀤𑀁 (𑀲𑁆𑀬𑀸.)];

𑀅𑀧𑁂𑀳𑀺 𑀏𑀢𑁆𑀢𑁄 𑀓𑀺𑀫𑀺𑀥𑀝𑁆𑀞𑀺𑀢𑁄𑀲𑀺, 𑀦 𑀫𑀸𑀤𑀺𑀲𑀸 𑀢𑀼𑀬𑁆𑀳𑀁 𑀤𑀤𑀦𑁆𑀢𑀺 𑀚𑀫𑁆𑀫.

𑁪. 𑀣𑀮𑁂 𑀘 𑀦𑀺𑀦𑁆𑀦𑁂 𑀘 𑀯𑀧𑀦𑁆𑀢𑀺 𑀩𑀻𑀚𑀁, 𑀅𑀦𑀽𑀧𑀔𑁂𑀢𑁆𑀢𑁂 𑀨𑀮𑀫𑀸𑀲𑀫𑀸𑀦𑀸 [𑀫𑀸𑀲𑀲𑀸𑀦𑀸 (𑀲𑀻. 𑀧𑀻.), 𑀫𑀸𑀲𑀺𑀁 𑀲𑀫𑀸𑀦𑀸 (𑀲𑁆𑀬𑀸.)];

𑀏𑀢𑀸𑀬 𑀲𑀤𑁆𑀥𑀸𑀬 𑀤𑀤𑀸𑀳𑀺 𑀤𑀸𑀦𑀁, 𑀅𑀧𑁆𑀧𑁂𑀯 𑀆𑀭𑀸𑀥𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑁂.

𑁫. 𑀔𑁂𑀢𑁆𑀢𑀸𑀦𑀺 𑀫𑀬𑁆𑀳𑀁 𑀯𑀺𑀤𑀺𑀢𑀸𑀦𑀺 𑀮𑁄𑀓𑁂, 𑀬𑁂𑀲𑀸𑀳𑀁 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀧𑁂𑀫𑀺;

𑀬𑁂 𑀩𑁆𑀭𑀸𑀳𑁆𑀫𑀡𑀸 𑀚𑀸𑀢𑀺𑀫𑀦𑁆𑀢𑀽𑀧𑀧𑀦𑁆𑀦𑀸, 𑀢𑀸𑀦𑀻𑀥 𑀔𑁂𑀢𑁆𑀢𑀸𑀦𑀺 𑀲𑀼𑀧𑁂𑀲𑀮𑀸𑀦𑀺.

𑁬. 𑀚𑀸𑀢𑀺𑀫𑀤𑁄 𑀘 𑀅𑀢𑀺𑀫𑀸𑀦𑀺𑀢𑀸 𑀘, 𑀮𑁄𑀪𑁄 𑀘 𑀤𑁄𑀲𑁄 𑀘 𑀫𑀤𑁄 𑀘 𑀫𑁄𑀳𑁄;

𑀏𑀢𑁂 𑀅𑀕𑀼𑀡𑀸 𑀬𑁂𑀲𑀼 𑀘 𑀲𑀦𑁆𑀢𑀺 [𑀬𑁂𑀲𑀼 𑀯𑀲𑀦𑁆𑀢𑀺 (𑀲𑀻. 𑀧𑀻.)] 𑀲𑀩𑁆𑀩𑁂, 𑀢𑀸𑀦𑀻𑀥 𑀔𑁂𑀢𑁆𑀢𑀸𑀦𑀺 𑀅𑀧𑁂𑀲𑀮𑀸𑀦𑀺.

𑁭. 𑀚𑀸𑀢𑀺𑀫𑀤𑁄 𑀘 𑀅𑀢𑀺𑀫𑀸𑀦𑀺𑀢𑀸 𑀘, 𑀮𑁄𑀪𑁄 𑀘 𑀤𑁄𑀲𑁄 𑀘 𑀫𑀤𑁄 𑀘 𑀫𑁄𑀳𑁄;

𑀏𑀢𑁂 𑀅𑀕𑀼𑀡𑀸 𑀬𑁂𑀲𑀼 𑀦 𑀲𑀦𑁆𑀢𑀺 𑀲𑀩𑁆𑀩𑁂, 𑀢𑀸𑀦𑀻𑀥 𑀔𑁂𑀢𑁆𑀢𑀸𑀦𑀺 𑀲𑀼𑀧𑁂𑀲𑀮𑀸𑀦𑀺.

𑁮. 𑀓𑁆𑀯𑁂𑀢𑁆𑀣 𑀕𑀢𑀸 [𑀓𑁆𑀯𑀢𑁆𑀣 𑀕𑀢𑀸 (𑀲𑁆𑀬𑀸.), 𑀓𑀢𑁆𑀣𑁂𑀯 𑀪𑀝𑁆𑀞𑀸 (𑀧𑀻.)] 𑀉𑀧𑀚𑁄𑀢𑀺𑀬𑁄 𑀘, 𑀉𑀧𑀚𑁆𑀛𑀸𑀬𑁄 𑀘 𑀅𑀣𑀯𑀸 𑀕𑀡𑁆𑀟𑀓𑀼𑀘𑁆𑀙𑀺 [𑀅𑀡𑁆𑀟𑀓𑀼𑀘𑁆𑀙𑀺 (𑀲𑀻. 𑀲𑁆𑀬𑀸. 𑀧𑀻.)];

𑀇𑀫𑀲𑁆𑀲 𑀤𑀡𑁆𑀟𑀜𑁆𑀘 𑀯𑀥𑀜𑁆𑀘 𑀤𑀢𑁆𑀯𑀸, 𑀕𑀮𑁂 𑀕𑀳𑁂𑀢𑁆𑀯𑀸 𑀔𑀮𑀬𑀸𑀣 [𑀕𑀮𑀬𑀸𑀣 (𑀓.)] 𑀚𑀫𑁆𑀫𑀁.

𑁯. 𑀕𑀺𑀭𑀺𑀁 𑀦𑀔𑁂𑀦 𑀔𑀡𑀲𑀺, 𑀅𑀬𑁄 𑀤𑀦𑁆𑀢𑁂𑀳𑀺 [𑀤𑀦𑁆𑀢𑁂𑀦 (𑀲𑀻. 𑀧𑀻.)] 𑀔𑀸𑀤𑀲𑀺;

𑀚𑀸𑀢𑀯𑁂𑀤𑀁 𑀧𑀤𑀳𑀲𑀺, 𑀬𑁄 𑀇𑀲𑀺𑀁 𑀧𑀭𑀺𑀪𑀸𑀲𑀲𑀺.

𑁧𑁦. 𑀇𑀤𑀁 𑀯𑀢𑁆𑀯𑀸𑀦 𑀫𑀸𑀢𑀗𑁆𑀕𑁄, 𑀇𑀲𑀺 𑀲𑀘𑁆𑀘𑀧𑀭𑀓𑁆𑀓𑀫𑁄;

𑀅𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁 𑀧𑀓𑁆𑀓𑀸𑀫𑀺 [𑀧𑀓𑁆𑀓𑀫𑀺 (𑀓.)], 𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀤𑀺𑀓𑁆𑀔𑀢𑀁.

𑁧𑁧. 𑀆𑀯𑁂𑀮𑁆𑀮𑀺𑀢𑀁 [𑀅𑀯𑁂𑀞𑀺𑀢𑀁 (𑀲𑀻. 𑀧𑀻.)] 𑀧𑀺𑀝𑁆𑀞𑀺𑀢𑁄 𑀉𑀢𑁆𑀢𑀫𑀗𑁆𑀕𑀁, 𑀩𑀸𑀳𑀼𑀁 [𑀩𑀸𑀳𑀁 (𑀲𑀻. 𑀧𑀻.)] 𑀧𑀲𑀸𑀭𑁂𑀢𑀺 𑀅𑀓𑀫𑁆𑀫𑀦𑁂𑀬𑁆𑀬𑀁 [𑀅𑀓𑀫𑁆𑀧𑀦𑁂𑀬𑁆𑀬𑀁 (𑀓.)];

𑀲𑁂𑀢𑀸𑀦𑀺 𑀅𑀓𑁆𑀔𑀻𑀦𑀺 𑀬𑀣𑀸 𑀫𑀢𑀲𑁆𑀲, 𑀓𑁄 𑀫𑁂 𑀇𑀫𑀁 𑀧𑀼𑀢𑁆𑀢𑀫𑀓𑀸𑀲𑀺 𑀏𑀯𑀁.

𑁧𑁨. 𑀇𑀥𑀸𑀕𑀫𑀸 𑀲𑀫𑀡𑁄 𑀤𑀼𑀫𑁆𑀫𑀯𑀸𑀲𑀻, 𑀑𑀢𑀮𑁆𑀮𑀓𑁄 𑀧𑀁𑀲𑀼𑀧𑀺𑀲𑀸𑀘𑀓𑁄𑀯;

𑀲𑀗𑁆𑀓𑀸𑀭𑀘𑁄𑀴𑀁 𑀧𑀝𑀺𑀫𑀼𑀜𑁆𑀘 𑀓𑀡𑁆𑀞𑁂, 𑀲𑁄 𑀢𑁂 𑀇𑀫𑀁 𑀧𑀼𑀢𑁆𑀢𑀫𑀓𑀸𑀲𑀺 𑀏𑀯𑀁.

𑁧𑁩. 𑀓𑀢𑀫𑀁 𑀤𑀺𑀲𑀁 𑀅𑀕𑀫𑀸 𑀪𑀽𑀭𑀺𑀧𑀜𑁆𑀜𑁄, 𑀅𑀓𑁆𑀔𑀸𑀣 𑀫𑁂 𑀫𑀸𑀡𑀯𑀸 𑀏𑀢𑀫𑀢𑁆𑀣𑀁;

𑀕𑀦𑁆𑀢𑁆𑀯𑀸𑀦 𑀢𑀁 𑀧𑀝𑀺𑀓𑀭𑁂𑀫𑀼 𑀅𑀘𑁆𑀘𑀬𑀁, 𑀅𑀧𑁆𑀧𑁂𑀯 𑀦𑀁 𑀧𑀼𑀢𑁆𑀢 𑀮𑀪𑁂𑀫𑀼 𑀚𑀻𑀯𑀺𑀢𑀁.

𑁧𑁪. 𑀯𑁂𑀳𑀸𑀬𑀲𑀁 𑀅𑀕𑀫𑀸 𑀪𑀽𑀭𑀺𑀧𑀜𑁆𑀜𑁄, 𑀧𑀣𑀤𑁆𑀥𑀼𑀦𑁄 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄;

𑀅𑀧𑀺 𑀘𑀸𑀧𑀺 𑀲𑁄 𑀧𑀼𑀭𑀺𑀫𑀤𑀺𑀲𑀁 𑀅𑀕𑀘𑁆𑀙𑀺, 𑀲𑀘𑁆𑀘𑀧𑁆𑀧𑀝𑀺𑀜𑁆𑀜𑁄 𑀇𑀲𑀺 𑀲𑀸𑀥𑀼𑀭𑀽𑀧𑁄.

𑁧𑁫. 𑀆𑀯𑁂𑀮𑁆𑀮𑀺𑀢𑀁 𑀧𑀺𑀝𑁆𑀞𑀺𑀢𑁄 𑀉𑀢𑁆𑀢𑀫𑀗𑁆𑀕𑀁, 𑀩𑀸𑀳𑀼𑀁 𑀧𑀲𑀸𑀭𑁂𑀢𑀺 𑀅𑀓𑀫𑁆𑀫𑀦𑁂𑀬𑁆𑀬𑀁;

𑀲𑁂𑀢𑀸𑀦𑀺 𑀅𑀓𑁆𑀔𑀻𑀦𑀺 𑀬𑀣𑀸 𑀫𑀢𑀲𑁆𑀲, 𑀓𑁄 𑀫𑁂 𑀇𑀫𑀁 𑀧𑀼𑀢𑁆𑀢𑀫𑀓𑀸𑀲𑀺 𑀏𑀯𑀁.

𑁧𑁬. 𑀬𑀓𑁆𑀔𑀸 𑀳𑀯𑁂 𑀲𑀦𑁆𑀢𑀺 𑀫𑀳𑀸𑀦𑀼𑀪𑀸𑀯𑀸, 𑀅𑀦𑁆𑀯𑀸𑀕𑀢𑀸 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸;

𑀢𑁂 𑀤𑀼𑀝𑁆𑀞𑀘𑀺𑀢𑁆𑀢𑀁 𑀓𑀼𑀧𑀺𑀢𑀁 𑀯𑀺𑀤𑀺𑀢𑁆𑀯𑀸, 𑀬𑀓𑁆𑀔𑀸 𑀳𑀺 𑀢𑁂 𑀧𑀼𑀢𑁆𑀢𑀫𑀓𑀁𑀲𑀼 𑀏𑀯𑀁.

𑁧𑁭. 𑀬𑀓𑁆𑀔𑀸 𑀘 𑀫𑁂 𑀧𑀼𑀢𑁆𑀢𑀫𑀓𑀁𑀲𑀼 𑀏𑀯𑀁, 𑀢𑁆𑀯𑀜𑁆𑀜𑁂𑀯 𑀫𑁂 𑀫𑀸 𑀓𑀼𑀤𑁆𑀥𑁄 [𑀓𑀼𑀤𑁆𑀥 (𑀓.)] 𑀩𑁆𑀭𑀳𑁆𑀫𑀘𑀸𑀭𑀺;

𑀢𑀼𑀫𑁆𑀳𑁂𑀯 [𑀢𑀼𑀬𑁆𑀳𑁂𑀯 (𑀓.)] 𑀧𑀸𑀤𑁂 𑀲𑀭𑀡𑀁 𑀕𑀢𑀸𑀲𑁆𑀫𑀺, 𑀅𑀦𑁆𑀯𑀸𑀕𑀢𑀸 𑀧𑀼𑀢𑁆𑀢𑀲𑁄𑀓𑁂𑀦 𑀪𑀺𑀓𑁆𑀔𑀼.

𑁧𑁮. 𑀢𑀤𑁂𑀯 𑀳𑀺 𑀏𑀢𑀭𑀳𑀺 𑀘 𑀫𑀬𑁆𑀳𑀁, 𑀫𑀦𑁄𑀧𑀤𑁄𑀲𑁄 𑀦 𑀫𑀫𑀢𑁆𑀣𑀺 [𑀫𑀫 𑀦𑀢𑁆𑀣𑀺 (𑀧𑀻.)] 𑀓𑁄𑀘𑀺;

𑀧𑀼𑀢𑁆𑀢𑁄 𑀘 𑀢𑁂 𑀯𑁂𑀤𑀫𑀤𑁂𑀦 𑀫𑀢𑁆𑀢𑁄, 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺 𑀅𑀥𑀺𑀘𑁆𑀘 𑀯𑁂𑀤𑁂.

𑁧𑁯. 𑀅𑀤𑁆𑀥𑀸 𑀳𑀯𑁂 𑀪𑀺𑀓𑁆𑀔𑀼 𑀫𑀼𑀳𑀼𑀢𑁆𑀢𑀓𑁂𑀦, 𑀲𑀫𑁆𑀫𑀼𑀬𑁆𑀳𑀢𑁂𑀯 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀸;

𑀏𑀓𑀸𑀧𑀭𑀸𑀥𑀁 [𑀏𑀢𑀸𑀧𑀭𑀸𑀥𑀁 (𑀓.)] 𑀔𑀫 𑀪𑀽𑀭𑀺𑀧𑀜𑁆𑀜, 𑀦 𑀧𑀡𑁆𑀟𑀺𑀢𑀸 𑀓𑁄𑀥𑀩𑀮𑀸 𑀪𑀯𑀦𑁆𑀢𑀺.

𑁨𑁦. 𑀇𑀤𑀜𑁆𑀘 𑀫𑀬𑁆𑀳𑀁 𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑀁, 𑀢𑀯 [𑀦𑀢𑁆𑀣𑀺 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼] 𑀫𑀡𑁆𑀟𑀩𑁆𑀬𑁄 𑀪𑀼𑀜𑁆𑀚𑀢𑀼 𑀅𑀧𑁆𑀧𑀧𑀜𑁆𑀜𑁄;

𑀬𑀓𑁆𑀔𑀸 𑀘 𑀢𑁂 𑀦𑀁 [𑀢𑁂 𑀧𑀼𑀢𑁆𑀢𑀁 (𑀲𑁆𑀬𑀸.)] 𑀦 𑀯𑀺𑀳𑁂𑀞𑀬𑁂𑀬𑁆𑀬𑀼𑀁, 𑀧𑀼𑀢𑁆𑀢𑁄 𑀘 𑀢𑁂 𑀳𑁂𑀲𑁆𑀲𑀢𑀺 [𑀳𑁄𑀳𑀺𑀢𑀺 (𑀲𑀻. 𑀧𑀻.)] 𑀲𑁄 𑀅𑀭𑁄𑀕𑁄.

𑁨𑁧. 𑀫𑀡𑁆𑀟𑀩𑁆𑀬 𑀩𑀸𑀮𑁄𑀲𑀺 𑀧𑀭𑀺𑀢𑁆𑀢𑀧𑀜𑁆𑀜𑁄, 𑀬𑁄 𑀧𑀼𑀜𑁆𑀜𑀔𑁂𑀢𑁆𑀢𑀸𑀦𑀫𑀓𑁄𑀯𑀺𑀤𑁄𑀲𑀺;

𑀫𑀳𑀓𑁆𑀓𑀲𑀸𑀯𑁂𑀲𑀼 𑀤𑀤𑀸𑀲𑀺 𑀤𑀸𑀦𑀁, 𑀓𑀺𑀮𑀺𑀝𑁆𑀞𑀓𑀫𑁆𑀫𑁂𑀲𑀼 𑀅𑀲𑀜𑁆𑀜𑀢𑁂𑀲𑀼.

𑁨𑁨. 𑀚𑀝𑀸 𑀘 𑀓𑁂𑀲𑀸 𑀅𑀚𑀺𑀦𑀸 𑀦𑀺𑀯𑀢𑁆𑀣𑀸, 𑀚𑀭𑀽𑀤𑀧𑀸𑀦𑀁𑀯 𑀫𑀼𑀔𑀁 𑀧𑀭𑀽𑀴𑁆𑀳𑀁;

𑀧𑀚𑀁 𑀇𑀫𑀁 𑀧𑀲𑁆𑀲𑀣 𑀤𑀼𑀫𑁆𑀫𑀭𑀽𑀧𑀁 [𑀭𑀼𑀫𑁆𑀫𑀭𑀽𑀧𑀺𑀁 (𑀲𑀻. 𑀧𑀻.)], 𑀦 𑀚𑀝𑀸𑀚𑀺𑀦𑀁 𑀢𑀸𑀬𑀢𑀺 𑀅𑀧𑁆𑀧𑀧𑀜𑁆𑀜𑀁.

𑁨𑁩. 𑀬𑁂𑀲𑀁 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀢𑁂𑀲𑀼 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺.

𑀫𑀸𑀢𑀗𑁆𑀕𑀚𑀸𑀢𑀓𑀁 𑀧𑀞𑀫𑀁.

𑁪𑁯𑁮. 𑀘𑀺𑀢𑁆𑀢𑀲𑀫𑁆𑀪𑀽𑀢𑀚𑀸𑀢𑀓𑀁 (𑁨)

𑁨𑁪. 𑀲𑀩𑁆𑀩𑀁 𑀦𑀭𑀸𑀦𑀁 𑀲𑀨𑀮𑀁 𑀲𑀼𑀘𑀺𑀡𑁆𑀡𑀁, 𑀦 𑀓𑀫𑁆𑀫𑀼𑀦𑀸 𑀓𑀺𑀜𑁆𑀘𑀦 𑀫𑁄𑀖𑀫𑀢𑁆𑀣𑀺;

𑀧𑀲𑁆𑀲𑀸𑀫𑀺 𑀲𑀫𑁆𑀪𑀽𑀢𑀁 𑀫𑀳𑀸𑀦𑀼𑀪𑀸𑀯𑀁, 𑀲𑀓𑀫𑁆𑀫𑀼𑀦𑀸 𑀧𑀼𑀜𑁆𑀜𑀨𑀮𑀽𑀧𑀧𑀦𑁆𑀦𑀁.

𑁨𑁫. 𑀲𑀩𑁆𑀩𑀁 𑀦𑀭𑀸𑀦𑀁 𑀲𑀨𑀮𑀁 𑀲𑀼𑀘𑀺𑀡𑁆𑀡𑀁, 𑀦 𑀓𑀫𑁆𑀫𑀼𑀦𑀸 𑀓𑀺𑀜𑁆𑀘𑀦 𑀫𑁄𑀖𑀫𑀢𑁆𑀣𑀺;

𑀓𑀘𑁆𑀘𑀺𑀦𑁆𑀦𑀼 𑀘𑀺𑀢𑁆𑀢𑀲𑁆𑀲𑀧𑀺 𑀏𑀯𑀫𑁂𑀯𑀁, 𑀇𑀤𑁆𑀥𑁄 𑀫𑀦𑁄 𑀢𑀲𑁆𑀲 𑀬𑀣𑀸𑀧𑀺 𑀫𑀬𑁆𑀳𑀁.

𑁨𑁬. 𑀲𑀩𑁆𑀩𑀁 𑀦𑀭𑀸𑀦𑀁 𑀲𑀨𑀮𑀁 𑀲𑀼𑀘𑀺𑀡𑁆𑀡𑀁, 𑀦 𑀓𑀫𑁆𑀫𑀼𑀦𑀸 𑀓𑀺𑀜𑁆𑀘𑀦 𑀫𑁄𑀖𑀫𑀢𑁆𑀣𑀺;

𑀘𑀺𑀢𑁆𑀢𑀫𑁆𑀧𑀺 𑀚𑀸𑀦𑀸𑀳𑀺 [𑀘𑀺𑀢𑁆𑀢𑀁 𑀯𑀺𑀚𑀸𑀦𑀸𑀳𑀺 (𑀲𑀻. 𑀧𑀻.)] 𑀢𑀣𑁂𑀯 𑀤𑁂𑀯, 𑀇𑀤𑁆𑀥𑁄 𑀫𑀦𑁄 𑀢𑀲𑁆𑀲 𑀬𑀣𑀸𑀧𑀺 𑀢𑀼𑀬𑁆𑀳𑀁.

𑁨𑁭. 𑀪𑀯𑀁 𑀦𑀼 𑀘𑀺𑀢𑁆𑀢𑁄 𑀲𑀼𑀢𑀫𑀜𑁆𑀜𑀢𑁄 𑀢𑁂, 𑀉𑀤𑀸𑀳𑀼 𑀢𑁂 𑀓𑁄𑀘𑀺 𑀦𑀁 𑀏𑀢𑀤𑀓𑁆𑀔𑀸;

𑀕𑀸𑀣𑀸 𑀲𑀼𑀕𑀻𑀢𑀸 𑀦 𑀫𑀫𑀢𑁆𑀣𑀺 𑀓𑀗𑁆𑀔𑀸, 𑀤𑀤𑀸𑀫𑀺 𑀢𑁂 𑀕𑀸𑀫𑀯𑀭𑀁 𑀲𑀢𑀜𑁆𑀘.

𑁨𑁮. 𑀦 𑀘𑀸𑀳𑀁 𑀘𑀺𑀢𑁆𑀢𑁄 𑀲𑀼𑀢𑀫𑀜𑁆𑀜𑀢𑁄 𑀫𑁂, 𑀇𑀲𑀻 𑀘 𑀫𑁂 𑀏𑀢𑀫𑀢𑁆𑀣𑀁 𑀅𑀲𑀁𑀲𑀺;

‘‘𑀕𑀦𑁆𑀢𑁆𑀯𑀸𑀦 𑀭𑀜𑁆𑀜𑁄 𑀧𑀝𑀺𑀕𑀸𑀳𑀺 [𑀧𑀝𑀺𑀕𑀸𑀬𑀺 (𑀲𑁆𑀬𑀸. 𑀓.), 𑀧𑀝𑀺𑀕𑀸𑀬 (?)] 𑀕𑀸𑀣𑀁, 𑀅𑀧𑀺 𑀢𑁂 𑀯𑀭𑀁 𑀅𑀢𑁆𑀢𑀫𑀦𑁄 𑀤𑀤𑁂𑀬𑁆𑀬’’ [𑀅𑀧𑀺 𑀦𑀼 𑀢𑁂 𑀯𑀭𑀁 𑀅𑀢𑁆𑀢𑀫𑀦𑁄 𑀤𑀤𑁂𑀬𑁆𑀬 (𑀲𑁆𑀬𑀸.), 𑀅𑀧𑀺 𑀦𑀼 𑀢𑁂 𑀅𑀢𑁆𑀢𑀫𑀦𑁄 𑀯𑀭𑀁 𑀤𑀤𑁂 (𑀓.)].

𑁨𑁯. 𑀬𑁄𑀚𑁂𑀦𑁆𑀢𑀼 𑀯𑁂 𑀭𑀸𑀚𑀭𑀣𑁂, 𑀲𑀼𑀓𑀢𑁂 𑀘𑀺𑀢𑁆𑀢𑀲𑀺𑀩𑁆𑀩𑀦𑁂;

𑀓𑀘𑁆𑀙𑀁 𑀦𑀸𑀕𑀸𑀦𑀁 𑀩𑀦𑁆𑀥𑀣, 𑀕𑀻𑀯𑁂𑀬𑁆𑀬𑀁 𑀧𑀝𑀺𑀫𑀼𑀜𑁆𑀘𑀣.

𑁩𑁦. 𑀆𑀳𑀜𑁆𑀜𑀦𑁆𑀢𑀼 [𑀆𑀳𑀜𑁆𑀜𑀭𑁂 (𑀲𑁆𑀬𑀸.)] 𑀪𑁂𑀭𑀺𑀫𑀼𑀤𑀺𑀗𑁆𑀕𑀲𑀗𑁆𑀔𑁂 [𑀲𑀗𑁆𑀔𑀸 (𑀲𑁆𑀬𑀸.)], 𑀲𑀻𑀖𑀸𑀦𑀺 𑀬𑀸𑀦𑀸𑀦𑀺 𑀘 𑀬𑁄𑀚𑀬𑀦𑁆𑀢𑀼;

𑀅𑀚𑁆𑀚𑁂𑀯𑀳𑀁 𑀅𑀲𑁆𑀲𑀫𑀁 𑀢𑀁 𑀕𑀫𑀺𑀲𑁆𑀲𑀁, 𑀬𑀢𑁆𑀣𑁂𑀯 𑀤𑀓𑁆𑀔𑀺𑀲𑁆𑀲𑀫𑀺𑀲𑀺𑀁 𑀦𑀺𑀲𑀺𑀦𑁆𑀦𑀁.

𑁩𑁧. 𑀲𑀼𑀮𑀤𑁆𑀥𑀮𑀸𑀪𑁄 𑀯𑀢 𑀫𑁂 𑀅𑀳𑁄𑀲𑀺, 𑀕𑀸𑀣𑀸 𑀲𑀼𑀕𑀻𑀢𑀸 𑀧𑀭𑀺𑀲𑀸𑀬 𑀫𑀚𑁆𑀛𑁂;

𑀲𑁆𑀯𑀸𑀳𑀁 𑀇𑀲𑀺𑀁 𑀲𑀻𑀮𑀯𑀢𑀽𑀧𑀧𑀦𑁆𑀦𑀁, 𑀤𑀺𑀲𑁆𑀯𑀸 𑀧𑀢𑀻𑀢𑁄 𑀲𑀼𑀫𑀦𑁄𑀳𑀫𑀲𑁆𑀫𑀺.

𑁩𑁨. 𑀆𑀲𑀦𑀁 𑀉𑀤𑀓𑀁 𑀧𑀚𑁆𑀚𑀁, 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀦𑁄 𑀪𑀯𑀁;

𑀅𑀕𑁆𑀖𑁂 𑀪𑀯𑀦𑁆𑀢𑀁 𑀧𑀼𑀘𑁆𑀙𑀸𑀫, 𑀅𑀕𑁆𑀖𑀁 𑀓𑀼𑀭𑀼𑀢𑀼 𑀦𑁄 𑀪𑀯𑀁.

𑁩𑁩. 𑀭𑀫𑁆𑀫𑀜𑁆𑀘 𑀢𑁂 𑀆𑀯𑀲𑀣𑀁 𑀓𑀭𑁄𑀦𑁆𑀢𑀼, 𑀦𑀸𑀭𑀻𑀕𑀡𑁂𑀳𑀺 𑀧𑀭𑀺𑀘𑀸𑀭𑀬𑀲𑁆𑀲𑀼;

𑀓𑀭𑁄𑀳𑀺 𑀑𑀓𑀸𑀲𑀫𑀦𑀼𑀕𑁆𑀕𑀳𑀸𑀬, 𑀉𑀪𑁄𑀧𑀺 𑀫𑀁 𑀇𑀲𑁆𑀲𑀭𑀺𑀬𑀁 𑀓𑀭𑁄𑀫.

𑁩𑁪. 𑀤𑀺𑀲𑁆𑀯𑀸 𑀨𑀮𑀁 𑀤𑀼𑀘𑁆𑀘𑀭𑀺𑀢𑀲𑁆𑀲 𑀭𑀸𑀚, 𑀅𑀣𑁄 𑀲𑀼𑀘𑀺𑀡𑁆𑀡𑀲𑁆𑀲 𑀫𑀳𑀸𑀯𑀺𑀧𑀸𑀓𑀁;

𑀅𑀢𑁆𑀢𑀸𑀦𑀫𑁂𑀯 𑀧𑀝𑀺𑀲𑀁𑀬𑀫𑀺𑀲𑁆𑀲𑀁, 𑀦 𑀧𑀢𑁆𑀣𑀬𑁂 𑀧𑀼𑀢𑁆𑀢 [𑀧𑀼𑀢𑁆𑀢𑀁 (𑀲𑀻. 𑀧𑀻.)] 𑀧𑀲𑀼𑀁 𑀥𑀦𑀁 𑀯𑀸.

𑁩𑁫. 𑀤𑀲𑁂𑀯𑀺𑀫𑀸 𑀯𑀲𑁆𑀲𑀤𑀲𑀸, 𑀫𑀘𑁆𑀘𑀸𑀦𑀁 𑀇𑀥 𑀚𑀻𑀯𑀺𑀢𑀁;

𑀅𑀧𑀢𑁆𑀢𑀜𑁆𑀜𑁂𑀯 𑀢𑀁 𑀑𑀥𑀺𑀁, 𑀦𑀴𑁄 𑀙𑀺𑀦𑁆𑀦𑁄𑀯 𑀲𑀼𑀲𑁆𑀲𑀢𑀺.

𑁩𑁬. 𑀢𑀢𑁆𑀣 𑀓𑀸 𑀦𑀦𑁆𑀤𑀺 𑀓𑀸 𑀔𑀺𑀟𑁆𑀟𑀸, 𑀓𑀸 𑀭𑀢𑀻 𑀓𑀸 𑀥𑀦𑁂𑀲𑀦𑀸;

𑀓𑀺𑀁 𑀫𑁂 𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺, 𑀭𑀸𑀚 𑀫𑀼𑀢𑁆𑀢𑁄𑀲𑁆𑀫𑀺 𑀩𑀦𑁆𑀥𑀦𑀸.

𑁩𑁭. 𑀲𑁄𑀳𑀁 𑀏𑀯𑀁 𑀧𑀚𑀸𑀦𑀸𑀫𑀺 [𑀲𑁄 𑀅𑀳𑀁 𑀲𑀼𑀧𑁆𑀧𑀚𑀸𑀦𑀸𑀫𑀺 (𑀲𑀻. 𑀧𑀻.)], 𑀫𑀘𑁆𑀘𑀼 𑀫𑁂 𑀦𑀧𑁆𑀧𑀫𑀚𑁆𑀚𑀢𑀺;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀓𑀸 𑀭𑀢𑀻 𑀓𑀸 𑀥𑀦𑁂𑀲𑀦𑀸.

𑁩𑁮. 𑀚𑀸𑀢𑀺 𑀦𑀭𑀸𑀦𑀁 𑀅𑀥𑀫𑀸 𑀚𑀦𑀺𑀦𑁆𑀤, 𑀘𑀡𑁆𑀟𑀸𑀮𑀬𑁄𑀦𑀺 𑀤𑁆𑀯𑀺𑀧𑀤𑀸𑀓𑀦𑀺𑀝𑁆𑀞𑀸 [𑀤𑀺𑀧𑀤𑀸𑀓𑀦𑀺𑀝𑁆𑀞𑀸 (𑀲𑀻. 𑀧𑀻.)];

𑀲𑀓𑁂𑀳𑀺 𑀓𑀫𑁆𑀫𑁂𑀳𑀺 𑀲𑀼𑀧𑀸𑀧𑀓𑁂𑀳𑀺, 𑀘𑀡𑁆𑀟𑀸𑀮𑀕𑀩𑁆𑀪𑁂 [𑀘𑀡𑁆𑀟𑀸𑀮𑀺𑀕𑀩𑁆𑀪𑁂 (𑀲𑁆𑀬𑀸.)] 𑀅𑀯𑀲𑀺𑀫𑁆𑀳 𑀧𑀼𑀩𑁆𑀩𑁂.

𑁩𑁯. 𑀘𑀡𑁆𑀟𑀸𑀮𑀸𑀳𑀼𑀫𑁆𑀳 𑀅𑀯𑀦𑁆𑀢𑀻𑀲𑀼, 𑀫𑀺𑀕𑀸 𑀦𑁂𑀭𑀜𑁆𑀚𑀭𑀁 𑀧𑀢𑀺;

𑀉𑀓𑁆𑀓𑀼𑀲𑀸 𑀦𑀫𑁆𑀫𑀤𑀸𑀢𑀻𑀭𑁂 [𑀭𑀫𑁆𑀫𑀤𑀸𑀢𑀻𑀭𑁂 (𑀲𑁆𑀬𑀸. 𑀓.)], 𑀢𑁆𑀬𑀚𑁆𑀚 𑀩𑁆𑀭𑀸𑀳𑁆𑀫𑀡𑀔𑀢𑁆𑀢𑀺𑀬𑀸.

𑁪𑁦. 𑀉𑀧𑀦𑀻𑀬𑀢𑀺 𑀚𑀻𑀯𑀺𑀢𑀫𑀧𑁆𑀧𑀫𑀸𑀬𑀼, 𑀚𑀭𑀽𑀧𑀦𑀻𑀢𑀲𑁆𑀲 𑀦 𑀲𑀦𑁆𑀢𑀺 𑀢𑀸𑀡𑀸;

𑀓𑀭𑁄𑀳𑀺 𑀧𑀜𑁆𑀘𑀸𑀮 𑀫𑀫𑁂𑀢 [𑀫𑀫𑁂𑀯 (𑀲𑁆𑀬𑀸. 𑀓.)] 𑀯𑀸𑀓𑁆𑀬𑀁, 𑀫𑀸𑀓𑀸𑀲𑀺 𑀓𑀫𑁆𑀫𑀸𑀦𑀺 𑀤𑀼𑀓𑁆𑀔𑀼𑀤𑁆𑀭𑀬𑀸𑀦𑀺.

𑁪𑁧. 𑀉𑀧𑀦𑀻𑀬𑀢𑀺 𑀚𑀻𑀯𑀺𑀢𑀫𑀧𑁆𑀧𑀫𑀸𑀬𑀼, 𑀚𑀭𑀽𑀧𑀦𑀻𑀢𑀲𑁆𑀲 𑀦 𑀲𑀦𑁆𑀢𑀺 𑀢𑀸𑀡𑀸;

𑀓𑀭𑁄𑀳𑀺 𑀧𑀜𑁆𑀘𑀸𑀮 𑀫𑀫𑁂𑀢 𑀯𑀸𑀓𑁆𑀬𑀁, 𑀫𑀸𑀓𑀸𑀲𑀺 𑀓𑀫𑁆𑀫𑀸𑀦𑀺 𑀤𑀼𑀓𑁆𑀔𑀧𑁆𑀨𑀮𑀸𑀦𑀺.

𑁪𑁨. 𑀉𑀧𑀦𑀻𑀬𑀢𑀺 𑀚𑀻𑀯𑀺𑀢𑀫𑀧𑁆𑀧𑀫𑀸𑀬𑀼, 𑀚𑀭𑀽𑀧𑀦𑀻𑀢𑀲𑁆𑀲 𑀦 𑀲𑀦𑁆𑀢𑀺 𑀢𑀸𑀡𑀸;

𑀓𑀭𑁄𑀳𑀺 𑀧𑀜𑁆𑀘𑀸𑀮 𑀫𑀫𑁂𑀢 𑀯𑀸𑀓𑁆𑀬𑀁, 𑀫𑀸𑀓𑀸𑀲𑀺 𑀓𑀫𑁆𑀫𑀸𑀦𑀺 𑀭𑀚𑀲𑁆𑀲𑀺𑀭𑀸𑀦𑀺.

𑁪𑁩. 𑀉𑀧𑀦𑀻𑀬𑀢𑀺 𑀚𑀻𑀯𑀺𑀢𑀫𑀧𑁆𑀧𑀫𑀸𑀬𑀼, 𑀯𑀡𑁆𑀡𑀁 𑀚𑀭𑀸 𑀳𑀦𑁆𑀢𑀺 𑀦𑀭𑀲𑁆𑀲 𑀚𑀺𑀬𑁆𑀬𑀢𑁄;

𑀓𑀭𑁄𑀳𑀺 𑀧𑀜𑁆𑀘𑀸𑀮 𑀫𑀫𑁂𑀢 𑀯𑀸𑀓𑁆𑀬𑀁, 𑀫𑀸𑀓𑀸𑀲𑀺 𑀓𑀫𑁆𑀫𑀁 𑀦𑀺𑀭𑀬𑀽𑀧𑀧𑀢𑁆𑀢𑀺𑀬𑀸.

𑁪𑁪. 𑀅𑀤𑁆𑀥𑀸 𑀳𑀺 𑀲𑀘𑁆𑀘𑀁 𑀯𑀘𑀦𑀁 𑀢𑀯𑁂𑀢𑀁, 𑀬𑀣𑀸 𑀇𑀲𑀻 𑀪𑀸𑀲𑀲𑀺 𑀏𑀯𑀫𑁂𑀢𑀁;

𑀓𑀸𑀫𑀸 𑀘 𑀫𑁂 𑀲𑀦𑁆𑀢𑀺 𑀅𑀦𑀧𑁆𑀧𑀭𑀽𑀧𑀸, 𑀢𑁂 𑀤𑀼𑀘𑁆𑀘𑀚𑀸 𑀫𑀸𑀤𑀺𑀲𑀓𑁂𑀦 𑀪𑀺𑀓𑁆𑀔𑀼.

𑁪𑁫. 𑀦𑀸𑀕𑁄 𑀬𑀣𑀸 𑀧𑀗𑁆𑀓𑀫𑀚𑁆𑀛𑁂 𑀩𑁆𑀬𑀲𑀦𑁆𑀦𑁄, 𑀧𑀲𑁆𑀲𑀁 𑀣𑀮𑀁 𑀦𑀸𑀪𑀺𑀲𑀫𑁆𑀪𑁄𑀢𑀺 𑀕𑀦𑁆𑀢𑀼𑀁;

𑀏𑀯𑀫𑁆𑀧𑀳𑀁 [𑀏𑀯𑀫𑀳𑀁 (𑀲𑁆𑀬𑀸.)] 𑀓𑀸𑀫𑀧𑀗𑁆𑀓𑁂 𑀩𑁆𑀬𑀲𑀦𑁆𑀦𑁄, 𑀦 𑀪𑀺𑀓𑁆𑀔𑀼𑀦𑁄 𑀫𑀕𑁆𑀕𑀫𑀦𑀼𑀩𑁆𑀩𑀚𑀸𑀫𑀺.

𑁪𑁬. 𑀬𑀣𑀸𑀧𑀺 𑀫𑀸𑀢𑀸 𑀘 𑀧𑀺𑀢𑀸 𑀘 𑀧𑀼𑀢𑁆𑀢𑀁, 𑀅𑀦𑀼𑀲𑀸𑀲𑀭𑁂 𑀓𑀺𑀦𑁆𑀢𑀺 𑀲𑀼𑀔𑀻 𑀪𑀯𑁂𑀬𑁆𑀬;

𑀏𑀯𑀫𑁆𑀧𑀺 𑀫𑀁 𑀢𑁆𑀯𑀁 𑀅𑀦𑀼𑀲𑀸𑀲 𑀪𑀦𑁆𑀢𑁂, 𑀬𑀣𑀸 𑀘𑀺𑀭𑀁 [𑀬𑀫𑀸𑀘𑀭𑀁 (𑀲𑀻. 𑀧𑀻. 𑀓. 𑀅𑀝𑁆𑀞.)] 𑀧𑁂𑀘𑁆𑀘 𑀲𑀼𑀔𑀻 𑀪𑀯𑁂𑀬𑁆𑀬𑀁.

𑁪𑁭. 𑀦𑁄 𑀘𑁂 𑀢𑀼𑀯𑀁 𑀉𑀲𑁆𑀲𑀳𑀲𑁂 𑀚𑀦𑀺𑀦𑁆𑀤, 𑀓𑀸𑀫𑁂 𑀇𑀫𑁂 𑀫𑀸𑀦𑀼𑀲𑀓𑁂 𑀧𑀳𑀸𑀢𑀼𑀁;

𑀥𑀫𑁆𑀫𑀺𑀁 [𑀥𑀫𑁆𑀫𑀁 (𑀲𑀻. 𑀧𑀻.)] 𑀩𑀮𑀺𑀁 𑀧𑀝𑁆𑀞𑀧𑀬𑀲𑁆𑀲𑀼 𑀭𑀸𑀚, 𑀅𑀥𑀫𑁆𑀫𑀓𑀸𑀭𑁄 𑀢𑀯 [𑀅𑀥𑀫𑁆𑀫𑀓𑀸𑀭𑁄 𑀘 𑀢𑁂 (𑀲𑀻. 𑀲𑁆𑀬𑀸. 𑀧𑀻.)] 𑀫𑀸𑀳𑀼 𑀭𑀝𑁆𑀞𑁂.

𑁪𑁮. 𑀤𑀽𑀢𑀸 𑀯𑀺𑀥𑀸𑀯𑀦𑁆𑀢𑀼 𑀤𑀺𑀲𑀸 𑀘𑀢𑀲𑁆𑀲𑁄, 𑀦𑀺𑀫𑀦𑁆𑀢𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀢𑁂 𑀅𑀦𑁆𑀦𑀧𑀸𑀦𑁂𑀦 𑀉𑀧𑀝𑁆𑀞𑀳𑀲𑁆𑀲𑀼, 𑀯𑀢𑁆𑀣𑁂𑀦 𑀲𑁂𑀦𑀸𑀲𑀦𑀧𑀘𑁆𑀘𑀬𑁂𑀦 𑀘.

𑁪𑁯. 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀦𑁆𑀢𑀧𑁆𑀧𑀬 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀘;

𑀤𑀢𑁆𑀯𑀸 𑀘 𑀪𑀼𑀢𑁆𑀯𑀸 𑀘 𑀬𑀣𑀸𑀦𑀼𑀪𑀸𑀯𑀁, 𑀅𑀦𑀺𑀦𑁆𑀤𑀺𑀢𑁄 𑀲𑀕𑁆𑀕𑀫𑀼𑀧𑁂𑀳𑀺 [𑀫𑀼𑀧𑁂𑀢𑀺 (𑀧𑀻. 𑀓.)] 𑀞𑀸𑀦𑀁.

𑁫𑁦. 𑀲𑀘𑁂 𑀘 𑀢𑀁 𑀭𑀸𑀚 𑀫𑀤𑁄 𑀲𑀳𑁂𑀬𑁆𑀬, 𑀦𑀸𑀭𑀻𑀕𑀡𑁂𑀳𑀺 𑀧𑀭𑀺𑀘𑀸𑀭𑀬𑀦𑁆𑀢𑀁;

𑀇𑀫𑀫𑁂𑀯 𑀕𑀸𑀣𑀁 𑀫𑀦𑀲𑀻 𑀓𑀭𑁄𑀳𑀺, 𑀪𑀸𑀲𑁂𑀲𑀺 [𑀪𑀸𑀲𑁂𑀳𑀺 (𑀲𑁆𑀬𑀸. 𑀧𑀻. 𑀓.)] 𑀘𑁂𑀦𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂.

𑁫𑁧. 𑀅𑀩𑁆𑀪𑁄𑀓𑀸𑀲𑀲𑀬𑁄 𑀚𑀦𑁆𑀢𑀼, 𑀯𑀚𑀦𑁆𑀢𑁆𑀬𑀸 𑀔𑀻𑀭𑀧𑀸𑀬𑀺𑀢𑁄;

𑀧𑀭𑀺𑀓𑀺𑀡𑁆𑀡𑁄 𑀲𑀼𑀯𑀸𑀦𑁂𑀳𑀺 [𑀲𑀼𑀧𑀺𑀦𑁂𑀳𑀺 (𑀲𑀻. 𑀧𑀻.)], 𑀲𑁆𑀯𑀸𑀚𑁆𑀚 𑀭𑀸𑀚𑀸𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀘𑀺𑀢𑁆𑀢𑀲𑀫𑁆𑀪𑀽𑀢𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁪𑁯𑁯. 𑀲𑀺𑀯𑀺𑀚𑀸𑀢𑀓𑀁 (𑁩)

𑁫𑁨. 𑀤𑀽𑀭𑁂 𑀅𑀧𑀲𑁆𑀲𑀁 𑀣𑁂𑀭𑁄𑀯, 𑀘𑀓𑁆𑀔𑀼𑀁 𑀬𑀸𑀘𑀺𑀢𑀼𑀫𑀸𑀕𑀢𑁄;

𑀏𑀓𑀦𑁂𑀢𑁆𑀢𑀸 𑀪𑀯𑀺𑀲𑁆𑀲𑀸𑀫, 𑀘𑀓𑁆𑀔𑀼𑀁 𑀫𑁂 𑀤𑁂𑀳𑀺 𑀬𑀸𑀘𑀺𑀢𑁄.

𑁫𑁩. 𑀓𑁂𑀦𑀸𑀦𑀼𑀲𑀺𑀝𑁆𑀞𑁄 𑀇𑀥 𑀫𑀸𑀕𑀢𑁄𑀲𑀺, 𑀯𑀦𑀺𑀩𑁆𑀩𑀓 [𑀯𑀡𑀺𑀩𑁆𑀩𑀓 (𑀲𑀻.)] 𑀘𑀓𑁆𑀔𑀼𑀧𑀣𑀸𑀦𑀺 𑀬𑀸𑀘𑀺𑀢𑀼𑀁;

𑀲𑀼𑀤𑀼𑀘𑁆𑀘𑀚𑀁 𑀬𑀸𑀘𑀲𑀺 𑀉𑀢𑁆𑀢𑀫𑀗𑁆𑀕𑀁, 𑀬𑀫𑀸𑀳𑀼 𑀦𑁂𑀢𑁆𑀢𑀁 𑀧𑀼𑀭𑀺𑀲𑁂𑀦 𑀤𑀼𑀘𑁆𑀘𑀚𑀁.

𑁫𑁪. 𑀬𑀫𑀸𑀳𑀼 𑀤𑁂𑀯𑁂𑀲𑀼 𑀲𑀼𑀚𑀫𑁆𑀧𑀢𑀻𑀢𑀺, 𑀫𑀖𑀯𑀸𑀢𑀺 𑀦𑀁 𑀆𑀳𑀼 𑀫𑀦𑀼𑀲𑁆𑀲𑀮𑁄𑀓𑁂;

𑀢𑁂𑀦𑀸𑀦𑀼𑀲𑀺𑀝𑁆𑀞𑁄 𑀇𑀥 𑀫𑀸𑀕𑀢𑁄𑀲𑁆𑀫𑀺, 𑀯𑀦𑀺𑀩𑁆𑀩𑀓𑁄 𑀘𑀓𑁆𑀔𑀼𑀧𑀣𑀸𑀦𑀺 𑀬𑀸𑀘𑀺𑀢𑀼𑀁.

𑁫𑁫. 𑀯𑀦𑀺𑀩𑁆𑀩𑀢𑁄 [𑀯𑀦𑀺𑀩𑁆𑀩𑀓𑁄 (𑀲𑁆𑀬𑀸. 𑀧𑀻.)] 𑀫𑀬𑁆𑀳 𑀯𑀦𑀺𑀁 [𑀯𑀦𑀁 (𑀓.), 𑀯𑀡𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀅𑀦𑀼𑀢𑁆𑀢𑀭𑀁, 𑀤𑀤𑀸𑀳𑀺 𑀢𑁂 𑀘𑀓𑁆𑀔𑀼𑀧𑀣𑀸𑀦𑀺 𑀬𑀸𑀘𑀺𑀢𑁄;

𑀤𑀤𑀸𑀳𑀺 𑀫𑁂 𑀘𑀓𑁆𑀔𑀼𑀧𑀣𑀁 𑀅𑀦𑀼𑀢𑁆𑀢𑀭𑀁, 𑀬𑀫𑀸𑀳𑀼 𑀦𑁂𑀢𑁆𑀢𑀁 𑀧𑀼𑀭𑀺𑀲𑁂𑀦 𑀤𑀼𑀘𑁆𑀘𑀚𑀁.

𑁫𑁬. 𑀬𑁂𑀦 𑀅𑀢𑁆𑀣𑁂𑀦 𑀆𑀕𑀘𑁆𑀙𑀺 [𑀆𑀕𑀜𑁆𑀙𑀺 (𑀲𑀻. 𑀧𑀻.)], 𑀬𑀫𑀢𑁆𑀣𑀫𑀪𑀺𑀧𑀢𑁆𑀣𑀬𑀁;

𑀢𑁂 𑀢𑁂 𑀇𑀚𑁆𑀛𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀮𑀪 𑀘𑀓𑁆𑀔𑀽𑀦𑀺 𑀩𑁆𑀭𑀸𑀳𑁆𑀫𑀡.

𑁫𑁭. 𑀏𑀓𑀁 𑀢𑁂 𑀬𑀸𑀘𑀫𑀸𑀦𑀲𑁆𑀲, 𑀉𑀪𑀬𑀸𑀦𑀺 𑀤𑀤𑀸𑀫𑀳𑀁;

𑀲 𑀘𑀓𑁆𑀔𑀼𑀫𑀸 𑀕𑀘𑁆𑀙 𑀚𑀦𑀲𑁆𑀲 𑀧𑁂𑀓𑁆𑀔𑀢𑁄, 𑀬𑀤𑀺𑀘𑁆𑀙𑀲𑁂 𑀢𑁆𑀯𑀁 𑀢𑀤𑀢𑁂 𑀲𑀫𑀺𑀚𑁆𑀛𑀢𑀼.

𑁫𑁮. 𑀫𑀸 𑀦𑁄 𑀤𑁂𑀯 𑀅𑀤𑀸 𑀘𑀓𑁆𑀔𑀼𑀁, 𑀫𑀸 𑀦𑁄 𑀲𑀩𑁆𑀩𑁂 𑀧𑀭𑀸𑀓𑀭𑀺 [𑀧𑀭𑀓𑁆𑀓𑀭𑀺 (𑀲𑁆𑀬𑀸. 𑀓. 𑀅𑀝𑁆𑀞.), 𑀧𑀭𑀺𑀓𑁆𑀓𑀭𑀺 (𑀓.) 𑀧𑀭𑀺 + 𑀆 + 𑀓𑀭𑀺 = 𑀧𑀭𑀸𑀓𑀭𑀺];

𑀥𑀦𑀁 𑀤𑁂𑀳𑀺 𑀫𑀳𑀸𑀭𑀸𑀚, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽.

𑁫𑁯. 𑀬𑀼𑀢𑁆𑀢𑁂 𑀤𑁂𑀯 𑀭𑀣𑁂 𑀤𑁂𑀳𑀺, 𑀆𑀚𑀸𑀦𑀻𑀬𑁂 𑀘𑀮𑀗𑁆𑀓𑀢𑁂;

𑀦𑀸𑀕𑁂 𑀤𑁂𑀳𑀺 𑀫𑀳𑀸𑀭𑀸𑀚, 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑁂.

𑁬𑁦. 𑀬𑀣𑀸 𑀢𑀁 𑀲𑀺𑀯𑀬𑁄 [𑀲𑀻𑀯𑀺𑀬𑁄 (𑀲𑁆𑀬𑀸.)] 𑀲𑀩𑁆𑀩𑁂, 𑀲𑀬𑁄𑀕𑁆𑀕𑀸 𑀲𑀭𑀣𑀸 𑀲𑀤𑀸;

𑀲𑀫𑀦𑁆𑀢𑀸 𑀧𑀭𑀺𑀓𑀺𑀭𑁂𑀬𑁆𑀬𑀼𑀁 [𑀧𑀭𑀺𑀓𑀭𑁂𑀬𑁆𑀬𑀼𑀁 (𑀲𑁆𑀬𑀸. 𑀧𑀻.)], 𑀏𑀯𑀁 𑀤𑁂𑀳𑀺 𑀭𑀣𑁂𑀲𑀪.

𑁬𑁧. 𑀬𑁄 𑀯𑁂 𑀤𑀲𑁆𑀲𑀦𑁆𑀢𑀺 𑀯𑀢𑁆𑀯𑀸𑀦, 𑀅𑀤𑀸𑀦𑁂 𑀓𑀼𑀭𑀼𑀢𑁂 𑀫𑀦𑁄;

𑀪𑀽𑀫𑁆𑀬𑀁 [𑀪𑀽𑀫𑁆𑀬𑀸 (𑀲𑀻. 𑀧𑀻.)] 𑀲𑁄 𑀧𑀢𑀺𑀢𑀁 𑀧𑀸𑀲𑀁, 𑀕𑀻𑀯𑀸𑀬𑀁 𑀧𑀝𑀺𑀫𑀼𑀜𑁆𑀘𑀢𑀺.

𑁬𑁨. 𑀬𑁄 𑀯𑁂 𑀤𑀲𑁆𑀲𑀦𑁆𑀢𑀺 𑀯𑀢𑁆𑀯𑀸𑀦, 𑀅𑀤𑀸𑀦𑁂 𑀓𑀼𑀭𑀼𑀢𑁂 𑀫𑀦𑁄;

𑀧𑀸𑀧𑀸 𑀧𑀸𑀧𑀢𑀭𑁄 𑀳𑁄𑀢𑀺, 𑀲𑀫𑁆𑀧𑀢𑁆𑀢𑁄 𑀬𑀫𑀲𑀸𑀥𑀦𑀁.

𑁬𑁩. 𑀬𑀜𑁆𑀳𑀺 𑀬𑀸𑀘𑁂 𑀢𑀜𑁆𑀳𑀺 𑀤𑀤𑁂, 𑀬𑀁 𑀦 𑀬𑀸𑀘𑁂 𑀦 𑀢𑀁 𑀤𑀤𑁂;

𑀲𑁆𑀯𑀸𑀳𑀁 𑀢𑀫𑁂𑀯 𑀤𑀲𑁆𑀲𑀸𑀫𑀺, 𑀬𑀁 𑀫𑀁 𑀬𑀸𑀘𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁬𑁪. 𑀆𑀬𑀼𑀁 𑀦𑀼 𑀯𑀡𑁆𑀡𑀁 𑀦𑀼 𑀲𑀼𑀔𑀁 𑀩𑀮𑀁 𑀦𑀼, 𑀓𑀺𑀁 𑀧𑀢𑁆𑀣𑀬𑀸𑀦𑁄 𑀦𑀼 𑀚𑀦𑀺𑀦𑁆𑀤 𑀤𑁂𑀲𑀺;

𑀓𑀣𑀜𑁆𑀳𑀺 𑀭𑀸𑀚𑀸 𑀲𑀺𑀯𑀺𑀦𑀁 𑀅𑀦𑀼𑀢𑁆𑀢𑀭𑁄, 𑀘𑀓𑁆𑀔𑀽𑀦𑀺 𑀤𑀚𑁆𑀚𑀸 𑀧𑀭𑀮𑁄𑀓𑀳𑁂𑀢𑀼.

𑁬𑁫. 𑀦 𑀯𑀸𑀳𑀫𑁂𑀢𑀁 𑀬𑀲𑀲𑀸 𑀤𑀤𑀸𑀫𑀺, 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂 𑀦 𑀥𑀦𑀁 𑀦 𑀭𑀝𑁆𑀞𑀁;

𑀲𑀢𑀜𑁆𑀘 𑀥𑀫𑁆𑀫𑁄 𑀘𑀭𑀺𑀢𑁄 𑀧𑀼𑀭𑀸𑀡𑁄, 𑀇𑀘𑁆𑀘𑁂𑀯 𑀤𑀸𑀦𑁂 𑀭𑀫𑀢𑁂 𑀫𑀦𑁄 𑀫𑀫 [𑀫𑀫𑀁 (𑀲𑀻. 𑀧𑀻.)].

𑁬𑁬. 𑀲𑀔𑀸 𑀘 𑀫𑀺𑀢𑁆𑀢𑁄 𑀘 𑀫𑀫𑀸𑀲𑀺 𑀲𑀻𑀯𑀺𑀓 [𑀲𑀻𑀯𑀓 (𑀲𑀻. 𑀧𑀻.)], 𑀲𑀼𑀲𑀺𑀓𑁆𑀔𑀺𑀢𑁄 𑀲𑀸𑀥𑀼 𑀓𑀭𑁄𑀳𑀺 𑀫𑁂 𑀯𑀘𑁄;

𑀉𑀤𑁆𑀥𑀭𑀺𑀢𑁆𑀯𑀸 [𑀉𑀤𑁆𑀥𑀢𑁆𑀯 (𑀲𑀻.), 𑀮𑀤𑁆𑀥 𑀢𑁆𑀯𑀁 (𑀧𑀻.)] 𑀘𑀓𑁆𑀔𑀽𑀦𑀺 𑀫𑀫𑀁 𑀚𑀺𑀕𑀻𑀲𑀢𑁄, 𑀳𑀢𑁆𑀣𑁂𑀲𑀼 𑀞𑀧𑁂𑀳𑀺 [𑀆𑀯𑁂𑀲𑀺 (𑀲𑀻.)] 𑀯𑀦𑀺𑀩𑁆𑀩𑀓𑀲𑁆𑀲.

𑁬𑁭. 𑀘𑁄𑀤𑀺𑀢𑁄 𑀲𑀺𑀯𑀺𑀭𑀸𑀚𑁂𑀦, 𑀲𑀺𑀯𑀺𑀓𑁄 𑀯𑀘𑀦𑀗𑁆𑀓𑀭𑁄;

𑀭𑀜𑁆𑀜𑁄 𑀘𑀓𑁆𑀔𑀽𑀦𑀼𑀤𑁆𑀥𑀭𑀺𑀢𑁆𑀯𑀸 [𑀘𑀓𑁆𑀔𑀽𑀦𑀺 𑀉𑀤𑁆𑀥𑀢𑁆𑀯𑀸 (𑀲𑀻. 𑀧𑀻.)], 𑀩𑁆𑀭𑀸𑀳𑁆𑀫𑀡𑀲𑁆𑀲𑀽𑀧𑀦𑀸𑀫𑀬𑀺;

𑀲𑀘𑀓𑁆𑀔𑀼 𑀩𑁆𑀭𑀸𑀳𑁆𑀫𑀡𑁄 𑀆𑀲𑀺, 𑀅𑀦𑁆𑀥𑁄 𑀭𑀸𑀚𑀸 𑀉𑀧𑀸𑀯𑀺𑀲𑀺.

𑁬𑁮. 𑀢𑀢𑁄 𑀲𑁄 𑀓𑀢𑀺𑀧𑀸𑀳𑀲𑁆𑀲, 𑀉𑀧𑀭𑀽𑀴𑁆𑀳𑁂𑀲𑀼 𑀘𑀓𑁆𑀔𑀼𑀲𑀼;

𑀲𑀽𑀢𑀁 𑀆𑀫𑀦𑁆𑀢𑀬𑀻 𑀭𑀸𑀚𑀸, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄.

𑁬𑁯. 𑀬𑁄𑀚𑁂𑀳𑀺 𑀲𑀸𑀭𑀣𑀺 𑀬𑀸𑀦𑀁, 𑀬𑀼𑀢𑁆𑀢𑀜𑁆𑀘 𑀧𑀝𑀺𑀯𑁂𑀤𑀬;

𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀸𑀫, 𑀧𑁄𑀓𑁆𑀔𑀭𑀜𑁆𑀜𑁄 𑀯𑀦𑀸𑀦𑀺 𑀘.

𑁭𑁦. 𑀲𑁄 𑀘 𑀧𑁄𑀓𑁆𑀔𑀭𑀡𑀻𑀢𑀻𑀭𑁂 [𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 (𑀲𑀻. 𑀧𑀻.)], 𑀧𑀮𑁆𑀮𑀗𑁆𑀓𑁂𑀦 𑀉𑀧𑀸𑀯𑀺𑀲𑀺;

𑀢𑀲𑁆𑀲 𑀲𑀓𑁆𑀓𑁄 𑀧𑀸𑀢𑀼𑀭𑀳𑀼, 𑀤𑁂𑀯𑀭𑀸𑀚𑀸 𑀲𑀼𑀚𑀫𑁆𑀧𑀢𑀺.

𑁭𑁧. 𑀲𑀓𑁆𑀓𑁄𑀳𑀫𑀲𑁆𑀫𑀺 𑀤𑁂𑀯𑀺𑀦𑁆𑀤𑁄, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂;

𑀯𑀭𑀁 𑀯𑀭𑀲𑁆𑀲𑀼 𑀭𑀸𑀚𑀻𑀲𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁭𑁨. 𑀧𑀳𑀽𑀢𑀁 𑀫𑁂 𑀥𑀦𑀁 𑀲𑀓𑁆𑀓, 𑀩𑀮𑀁 𑀓𑁄𑀲𑁄 𑀘𑀦𑀧𑁆𑀧𑀓𑁄;