𑁧𑁬. 𑀢𑀺𑀁𑀲𑀦𑀺𑀧𑀸𑀢𑁄

𑁫𑁧𑁧. 𑀓𑀺𑀁𑀙𑀦𑁆𑀤𑀚𑀸𑀢𑀓𑀁 (𑁧)

𑁧. 𑀓𑀺𑀁𑀙𑀦𑁆𑀤𑁄 𑀓𑀺𑀫𑀥𑀺𑀧𑁆𑀧𑀸𑀬𑁄, 𑀏𑀓𑁄 𑀲𑀫𑁆𑀫𑀲𑀺 𑀖𑀫𑁆𑀫𑀦𑀺;

𑀓𑀺𑀁 𑀧𑀢𑁆𑀣𑀬𑀸𑀦𑁄 𑀓𑀺𑀁 𑀏𑀲𑀁, 𑀓𑁂𑀦 𑀅𑀢𑁆𑀣𑁂𑀦 𑀩𑁆𑀭𑀸𑀳𑁆𑀫𑀡.

𑁨. 𑀬𑀣𑀸 𑀫𑀳𑀸 𑀯𑀸𑀭𑀺𑀥𑀭𑁄, 𑀓𑀼𑀫𑁆𑀪𑁄 𑀲𑀼𑀧𑀭𑀺𑀡𑀸𑀳𑀯𑀸 [𑀲𑀼𑀧𑀭𑀺𑀡𑀸𑀫𑀯𑀸 (𑀓.)];

𑀢𑀣𑀽𑀧𑀫𑀁 𑀅𑀫𑁆𑀩𑀧𑀓𑁆𑀓𑀁, 𑀯𑀡𑁆𑀡𑀕𑀦𑁆𑀥𑀭𑀲𑀼𑀢𑁆𑀢𑀫𑀁.

𑁩. 𑀢𑀁 𑀯𑀼𑀬𑁆𑀳𑀫𑀸𑀦𑀁 𑀲𑁄𑀢𑁂𑀦, 𑀤𑀺𑀲𑁆𑀯𑀸𑀦𑀸𑀫𑀮𑀫𑀚𑁆𑀛𑀺𑀫𑁂;

𑀧𑀸𑀡𑀻𑀳𑀺 𑀦𑀁 𑀕𑀳𑁂𑀢𑁆𑀯𑀸𑀦, 𑀅𑀕𑁆𑀬𑀸𑀬𑀢𑀦𑀫𑀸𑀳𑀭𑀺𑀁.

𑁪. 𑀢𑀢𑁄 𑀓𑀤𑀮𑀺𑀧𑀢𑁆𑀢𑁂𑀲𑀼, 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀁 𑀅𑀳𑀁;

𑀲𑀢𑁆𑀣𑁂𑀦 𑀦𑀁 𑀯𑀺𑀓𑀧𑁆𑀧𑁂𑀢𑁆𑀯𑀸, 𑀔𑀼𑀧𑁆𑀧𑀺𑀧𑀸𑀲𑀁 𑀅𑀳𑀸𑀲𑀺 𑀫𑁂.

𑁫. 𑀲𑁄𑀳𑀁 𑀅𑀧𑁂𑀢𑀤𑀭𑀣𑁄, 𑀩𑁆𑀬𑀦𑁆𑀢𑀻𑀪𑀽𑀢𑁄 [𑀩𑁆𑀬𑀦𑁆𑀢𑀺𑀪𑀽𑀢𑁄 (𑀲𑀻. 𑀧𑀻. 𑀓.)] 𑀤𑀼𑀔𑀓𑁆𑀔𑀫𑁄;

𑀅𑀲𑁆𑀲𑀸𑀤𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀨𑀮𑁂𑀲𑁆𑀯𑀜𑁆𑀜𑁂𑀲𑀼 𑀓𑁂𑀲𑀼𑀘𑀺 [𑀓𑁂𑀲𑀼𑀧𑀺 (𑀓. 𑀲𑀻.)].

𑁬. 𑀲𑁄𑀲𑁂𑀢𑁆𑀯𑀸 𑀦𑀽𑀦 𑀫𑀭𑀡𑀁, 𑀢𑀁 𑀫𑀫𑀁 𑀆𑀯𑀳𑀺𑀲𑁆𑀲𑀢𑀺;

𑀅𑀫𑁆𑀩𑀁 𑀬𑀲𑁆𑀲 𑀨𑀮𑀁 𑀲𑀸𑀤𑀼, 𑀫𑀥𑀼𑀭𑀕𑁆𑀕𑀁 𑀫𑀦𑁄𑀭𑀫𑀁;

𑀬𑀫𑀼𑀤𑁆𑀥𑀭𑀺𑀁 𑀯𑀼𑀬𑁆𑀳𑀫𑀸𑀦𑀁, 𑀉𑀤𑀥𑀺𑀲𑁆𑀫𑀸 𑀫𑀳𑀡𑁆𑀡𑀯𑁂.

𑁭. 𑀅𑀓𑁆𑀔𑀸𑀢𑀁 𑀢𑁂 𑀫𑀬𑀸 𑀲𑀩𑁆𑀩𑀁, 𑀬𑀲𑁆𑀫𑀸 𑀉𑀧𑀯𑀲𑀸𑀫𑀳𑀁;

𑀭𑀫𑁆𑀫𑀁 𑀧𑀢𑀺 𑀦𑀺𑀲𑀺𑀦𑁆𑀦𑁄𑀲𑁆𑀫𑀺, 𑀧𑀼𑀣𑀼𑀮𑁄𑀫𑀸𑀬𑀼𑀢𑀸 𑀧𑀼𑀣𑀼.

𑁮. 𑀢𑁆𑀯𑀜𑁆𑀘 𑀔𑁄 𑀫𑁂𑀯 [𑀫𑁂 (𑀲𑀻.), 𑀫𑀫 (?)] 𑀅𑀓𑁆𑀔𑀸𑀳𑀺, 𑀅𑀢𑁆𑀢𑀸𑀦𑀫𑀧𑀮𑀸𑀬𑀺𑀦𑀺;

𑀓𑀸 𑀯𑀸 𑀢𑁆𑀯𑀫𑀲𑀺 𑀓𑀮𑁆𑀬𑀸𑀡𑀺, 𑀓𑀺𑀲𑁆𑀲 𑀯𑀸 𑀢𑁆𑀯𑀁 𑀲𑀼𑀫𑀚𑁆𑀛𑀺𑀫𑁂.

𑁯. 𑀭𑀼𑀧𑁆𑀧𑀧𑀝𑁆𑀝𑀧𑀮𑀺𑀫𑀝𑁆𑀞𑀻𑀯 [𑀭𑀼𑀧𑁆𑀧𑀧𑀝𑁆𑀝𑀧𑁆𑀮𑀫𑀝𑁆𑀞𑀻𑀯 (𑀲𑁆𑀬𑀸.), 𑀭𑀽𑀧𑀧𑀝𑁆𑀝𑀧𑀫𑀝𑁆𑀞𑀻𑀯 (𑀓.)], 𑀩𑁆𑀬𑀕𑁆𑀖𑀻𑀯 𑀕𑀺𑀭𑀺𑀲𑀸𑀦𑀼𑀚𑀸;

𑀬𑀸 𑀲𑀦𑁆𑀢𑀺 𑀦𑀸𑀭𑀺𑀬𑁄 𑀤𑁂𑀯𑁂𑀲𑀼, 𑀤𑁂𑀯𑀸𑀦𑀁 𑀧𑀭𑀺𑀘𑀸𑀭𑀺𑀓𑀸.

𑁧𑁦. 𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑀲𑁆𑀫𑀺𑀁, 𑀭𑀽𑀧𑁂𑀦𑀸𑀦𑁆𑀯𑀸𑀕𑀢𑀺𑀢𑁆𑀣𑀺𑀬𑁄;

𑀭𑀽𑀧𑁂𑀦 𑀢𑁂 𑀲𑀤𑀺𑀲𑀻 𑀦𑀢𑁆𑀣𑀺, 𑀤𑁂𑀯𑁂𑀲𑀼 𑀕𑀦𑁆𑀥𑀩𑁆𑀩𑀫𑀦𑀼𑀲𑁆𑀲𑀮𑁄𑀓𑁂 [𑀤𑁂𑀯𑀕𑀦𑁆𑀥𑀩𑁆𑀩𑀫𑀸𑀦𑀼𑀲𑁂 (𑀲𑁆𑀬𑀸.)];

𑀧𑀼𑀝𑁆𑀞𑀸𑀲𑀺 𑀫𑁂 𑀘𑀸𑀭𑀼𑀧𑀼𑀩𑁆𑀩𑀗𑁆𑀕𑀺, 𑀩𑁆𑀭𑀽𑀳𑀺 𑀦𑀸𑀫𑀜𑁆𑀘 𑀩𑀦𑁆𑀥𑀯𑁂.

𑁧𑁧. 𑀬𑀁 𑀢𑁆𑀯𑀁 𑀧𑀢𑀺 𑀦𑀺𑀲𑀺𑀦𑁆𑀦𑁄𑀲𑀺, 𑀭𑀫𑁆𑀫𑀁 𑀩𑁆𑀭𑀸𑀳𑁆𑀫𑀡 𑀓𑁄𑀲𑀺𑀓𑀺𑀁;

𑀲𑀸𑀳𑀁 𑀪𑀼𑀲𑀸𑀮𑀬𑀸 𑀯𑀼𑀢𑁆𑀣𑀸, 𑀯𑀭𑀯𑀸𑀭𑀺𑀯𑀳𑁄𑀖𑀲𑀸.

𑁧𑁨. 𑀦𑀸𑀦𑀸𑀤𑀼𑀫𑀕𑀡𑀸𑀓𑀺𑀡𑁆𑀡𑀸, 𑀩𑀳𑀼𑀓𑀸 𑀕𑀺𑀭𑀺𑀓𑀦𑁆𑀤𑀭𑀸;

𑀫𑀫𑁂𑀯 𑀧𑀫𑀼𑀔𑀸 𑀳𑁄𑀦𑁆𑀢𑀺, 𑀅𑀪𑀺𑀲𑀦𑁆𑀤𑀦𑁆𑀢𑀺 𑀧𑀸𑀯𑀼𑀲𑁂.

𑁧𑁩. 𑀅𑀣𑁄 𑀩𑀳𑀽 𑀯𑀦𑀢𑁄𑀤𑀸, 𑀦𑀻𑀮𑀯𑀸𑀭𑀺𑀯𑀳𑀺𑀦𑁆𑀥𑀭𑀸;

𑀩𑀳𑀼𑀓𑀸 𑀦𑀸𑀕𑀯𑀺𑀢𑁆𑀢𑁄𑀤𑀸, 𑀅𑀪𑀺𑀲𑀦𑁆𑀤𑀦𑁆𑀢𑀺 𑀯𑀸𑀭𑀺𑀦𑀸.

𑁧𑁪. 𑀢𑀸 𑀅𑀫𑁆𑀩𑀚𑀫𑁆𑀩𑀼𑀮𑀩𑀼𑀚𑀸, 𑀦𑀻𑀧𑀸 𑀢𑀸𑀮𑀸 𑀘𑀼𑀤𑀼𑀫𑁆𑀩𑀭𑀸 [𑀢𑀸𑀮𑀫𑀼𑀤𑀼𑀫𑁆𑀩𑀭𑀸 (𑀲𑁆𑀬𑀸. 𑀓.)];

𑀩𑀳𑀽𑀦𑀺 𑀨𑀮𑀚𑀸𑀢𑀸𑀦𑀺, 𑀆𑀯𑀳𑀦𑁆𑀢𑀺 𑀅𑀪𑀺𑀡𑁆𑀳𑀲𑁄.

𑁧𑁫. 𑀬𑀁 𑀓𑀺𑀜𑁆𑀘𑀺 𑀉𑀪𑀢𑁄 𑀢𑀻𑀭𑁂, 𑀨𑀮𑀁 𑀧𑀢𑀢𑀺 𑀅𑀫𑁆𑀩𑀼𑀦𑀺;

𑀅𑀲𑀁𑀲𑀬𑀁 𑀢𑀁 𑀲𑁄𑀢𑀲𑁆𑀲, 𑀨𑀮𑀁 𑀳𑁄𑀢𑀺 𑀯𑀲𑀸𑀦𑀼𑀕𑀁.

𑁧𑁬. 𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀺, 𑀧𑀼𑀣𑀼𑀧𑀜𑁆𑀜 𑀲𑀼𑀡𑁄𑀳𑀺 𑀫𑁂;

𑀫𑀸 𑀭𑁄𑀘𑀬 𑀫𑀪𑀺𑀲𑀗𑁆𑀕𑀁, 𑀧𑀝𑀺𑀲𑁂𑀥 𑀚𑀦𑀸𑀥𑀺𑀧.

𑁧𑁭. 𑀦 𑀯𑀸𑀳𑀁 𑀯𑀟𑁆𑀠𑀯𑀁 [𑀯𑀤𑁆𑀥𑀯𑀁 (𑀲𑀻. 𑀧𑀻.)] 𑀫𑀜𑁆𑀜𑁂, 𑀬𑀁 𑀢𑁆𑀯𑀁 𑀭𑀝𑁆𑀞𑀸𑀪𑀺𑀯𑀟𑁆𑀠𑀦;

𑀆𑀘𑁂𑀬𑁆𑀬𑀫𑀸𑀦𑁄 𑀭𑀸𑀚𑀺𑀲𑀺, 𑀫𑀭𑀡𑀁 𑀅𑀪𑀺𑀓𑀗𑁆𑀔𑀲𑀺.

𑁧𑁮. 𑀢𑀲𑁆𑀲 𑀚𑀸𑀦𑀦𑁆𑀢𑀺 𑀧𑀺𑀢𑀭𑁄, 𑀕𑀦𑁆𑀥𑀩𑁆𑀩𑀸 𑀘 𑀲𑀤𑁂𑀯𑀓𑀸;

𑀬𑁂 𑀘𑀸𑀧𑀺 𑀇𑀲𑀬𑁄 𑀮𑁄𑀓𑁂, 𑀲𑀜𑁆𑀜𑀢𑀢𑁆𑀢𑀸 𑀢𑀧𑀲𑁆𑀲𑀺𑀦𑁄;

𑀅𑀲𑀁𑀲𑀬𑀁 𑀢𑁂𑀧𑀺 [𑀢𑁂 (𑀲𑀻. 𑀧𑀻.)] 𑀚𑀸𑀦𑀦𑁆𑀢𑀺, 𑀧𑀝𑁆𑀞𑀪𑀽𑀢𑀸 [𑀯𑀤𑁆𑀥𑀪𑀽𑀢𑀸 (𑀲𑀻. 𑀧𑀻.)] 𑀬𑀲𑀲𑁆𑀲𑀺𑀦𑁄.

𑁧𑁯. 𑀏𑀯𑀁 𑀯𑀺𑀤𑀺𑀢𑁆𑀯𑀸 𑀯𑀺𑀤𑀽 𑀲𑀩𑁆𑀩𑀥𑀫𑁆𑀫𑀁, 𑀯𑀺𑀤𑁆𑀥𑀁𑀲𑀦𑀁 𑀘𑀯𑀦𑀁 𑀚𑀻𑀯𑀺𑀢𑀲𑁆𑀲;

𑀦 𑀘𑀻𑀬𑀢𑀻 𑀢𑀲𑁆𑀲 𑀦𑀭𑀲𑁆𑀲 𑀧𑀸𑀧𑀁, 𑀲𑀘𑁂 𑀦 𑀘𑁂𑀢𑁂𑀢𑀺 𑀯𑀥𑀸𑀬 𑀢𑀲𑁆𑀲.

𑁨𑁦. 𑀇𑀲𑀺𑀧𑀽𑀕𑀲𑀫𑀜𑁆𑀜𑀸𑀢𑁂, 𑀏𑀯𑀁 𑀮𑁄𑀓𑁆𑀬𑀸 𑀯𑀺𑀤𑀺𑀢𑀸 𑀲𑀢𑀺 [𑀧𑀢𑀺 (𑀓. 𑀲𑁆𑀬𑀸. 𑀓.)];

𑀅𑀦𑀭𑀺𑀬𑀧𑀭𑀺𑀲𑀫𑁆𑀪𑀸𑀲𑁂, 𑀧𑀸𑀧𑀓𑀫𑁆𑀫𑀁 𑀚𑀺𑀕𑀻𑀲𑀲𑀺 [𑀚𑀺𑀕𑀺𑀁𑀲𑀲𑀺 (𑀲𑀻. 𑀲𑁆𑀬𑀸. 𑀧𑀻.)].

𑁨𑁧. 𑀲𑀘𑁂 𑀅𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀢𑀻𑀭𑁂 𑀢𑁂 𑀧𑀼𑀣𑀼𑀲𑀼𑀲𑁆𑀲𑁄𑀡𑀺;

𑀅𑀲𑀁𑀲𑀬𑀁 𑀢𑀁 𑀅𑀲𑀺𑀮𑁄𑀓𑁄, 𑀫𑀬𑀺 𑀧𑁂𑀢𑁂 𑀆𑀕𑀫𑀺𑀲𑁆𑀲𑀢𑀺.

𑁨𑁨. 𑀢𑀲𑁆𑀫𑀸 𑀳𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀭𑀓𑁆𑀔𑀲𑁆𑀲𑁂𑀯 [𑀭𑀓𑁆𑀔𑀲𑁆𑀲𑀼 𑀘 (𑀲𑁆𑀬𑀸.)] 𑀲𑀼𑀫𑀚𑁆𑀛𑀺𑀫𑁂;

𑀫𑀸 𑀢𑀁 𑀲𑀩𑁆𑀩𑁄 𑀚𑀦𑁄 𑀧𑀘𑁆𑀙𑀸, 𑀧𑀓𑀼𑀝𑁆𑀞𑀸𑀬𑀺 [𑀧𑀓𑀢𑁆𑀣𑀸𑀲𑀺 (𑀲𑀻. 𑀧𑀻.), 𑀧𑀢𑁆𑀯𑀓𑁆𑀔𑀸𑀲𑀺 (𑀲𑁆𑀬𑀸.)] 𑀫𑀬𑀺 𑀫𑀢𑁂.

𑁨𑁩. 𑀅𑀜𑁆𑀜𑀸𑀢𑀫𑁂𑀢𑀁 𑀅𑀯𑀺𑀲𑀬𑁆𑀳𑀲𑀸𑀳𑀺, 𑀅𑀢𑁆𑀢𑀸𑀦𑀫𑀫𑁆𑀩𑀜𑁆𑀘 𑀤𑀤𑀸𑀫𑀺 𑀢𑁂 𑀢𑀁;

𑀲𑁄 𑀤𑀼𑀘𑁆𑀘𑀚𑁂 𑀓𑀸𑀫𑀕𑀼𑀡𑁂 𑀧𑀳𑀸𑀬, 𑀲𑀦𑁆𑀢𑀺𑀜𑁆𑀘 𑀥𑀫𑁆𑀫𑀜𑁆𑀘 𑀅𑀥𑀺𑀝𑁆𑀞𑀺𑀢𑁄𑀲𑀺.

𑁨𑁪. 𑀬𑁄 𑀳𑀺𑀢𑁆𑀯𑀸 𑀧𑀼𑀩𑁆𑀩𑀲𑀜𑁆𑀜𑁄𑀕𑀁, 𑀧𑀘𑁆𑀙𑀸 𑀲𑀁𑀬𑁄𑀚𑀦𑁂 𑀞𑀺𑀢𑁄;

𑀅𑀥𑀫𑁆𑀫𑀜𑁆𑀘𑁂𑀯 𑀘𑀭𑀢𑀺, 𑀧𑀸𑀧𑀜𑁆𑀘𑀲𑁆𑀲 𑀧𑀯𑀟𑁆𑀠𑀢𑀺.

𑁨𑁫. 𑀏𑀳𑀺 𑀢𑀁 𑀧𑀸𑀧𑀬𑀺𑀲𑁆𑀲𑀸𑀫𑀺, 𑀓𑀸𑀫𑀁 𑀅𑀧𑁆𑀧𑁄𑀲𑁆𑀲𑀼𑀓𑁄 𑀪𑀯;

𑀉𑀧𑀸𑀦𑀬𑀸𑀫𑀺 𑀲𑀻𑀢𑀲𑁆𑀫𑀺𑀁, 𑀯𑀺𑀳𑀭𑀸𑀳𑀺 𑀅𑀦𑀼𑀲𑁆𑀲𑀼𑀓𑁄.

𑁨𑁬. 𑀢𑀁 𑀧𑀼𑀧𑁆𑀨𑀭𑀲𑀫𑀢𑁆𑀢𑁂𑀪𑀺, 𑀯𑀓𑁆𑀓𑀗𑁆𑀕𑁂𑀳𑀺 𑀅𑀭𑀺𑀦𑁆𑀤𑀫;

𑀓𑁄𑀜𑁆𑀘𑀸 𑀫𑀬𑀽𑀭𑀸 𑀤𑀺𑀯𑀺𑀬𑀸, 𑀓𑁄𑀮𑀝𑁆𑀞𑀺𑀫𑀥𑀼𑀲𑀸𑀴𑀺𑀓𑀸;

𑀓𑀽𑀚𑀺𑀢𑀸 𑀳𑀁𑀲𑀧𑀽𑀕𑁂𑀳𑀺, 𑀓𑁄𑀓𑀺𑀮𑁂𑀢𑁆𑀣 𑀧𑀩𑁄𑀥𑀭𑁂.

𑁨𑁭. 𑀅𑀫𑁆𑀩𑁂𑀢𑁆𑀣 𑀯𑀺𑀧𑁆𑀧𑀲𑀸𑀔𑀕𑁆𑀕𑀸 [𑀯𑀺𑀧𑁆𑀧𑀲𑀽𑀦𑀕𑁆𑀕𑀸 (𑀲𑀻. 𑀲𑁆𑀬𑀸. 𑀧𑀻.), 𑀯𑀺𑀧𑁆𑀧𑀑𑀦𑀕𑁆𑀕𑀸 (𑀓.)], 𑀧𑀮𑀸𑀮𑀔𑀮𑀲𑀦𑁆𑀦𑀺𑀪𑀸;

𑀓𑁄𑀲𑀫𑁆𑀩𑀲𑀴𑀮𑀸 [𑀓𑁄𑀲𑀼𑀫𑁆𑀪𑀲𑀮𑀮𑀸 (𑀲𑀻. 𑀲𑁆𑀬𑀸. 𑀧𑀻.)] 𑀦𑀻𑀧𑀸, 𑀧𑀓𑁆𑀓𑀢𑀸𑀮𑀯𑀺𑀮𑀫𑁆𑀩𑀺𑀦𑁄.

𑁨𑁮. 𑀫𑀸𑀮𑀻 𑀢𑀺𑀭𑀺𑀝𑀻 𑀓𑀸𑀬𑀽𑀭𑀻, 𑀅𑀗𑁆𑀕𑀤𑀻 𑀘𑀦𑁆𑀤𑀦𑀼𑀲𑁆𑀲𑀤𑁄 [𑀘𑀦𑁆𑀤𑀦𑀲𑁆𑀲𑀤𑁄 (𑀲𑀻.)];

𑀭𑀢𑁆𑀢𑀺𑀁 𑀢𑁆𑀯𑀁 𑀧𑀭𑀺𑀘𑀸𑀭𑁂𑀲𑀺, 𑀤𑀺𑀯𑀸 𑀯𑁂𑀤𑁂𑀲𑀺 𑀯𑁂𑀤𑀦𑀁.

𑁨𑁯. 𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀬𑀸 𑀢𑁂𑀫𑀸 𑀧𑀭𑀺𑀘𑀸𑀭𑀺𑀓𑀸;

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀲𑀺, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄.

𑁩𑁦. 𑀓𑀺𑀁 𑀓𑀫𑁆𑀫𑀫𑀓𑀭𑀻 𑀧𑀼𑀩𑁆𑀩𑁂, 𑀧𑀸𑀧𑀁 𑀅𑀢𑁆𑀢𑀤𑀼𑀔𑀸𑀯𑀳𑀁;

𑀬𑀁 𑀓𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼, 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀔𑀸𑀤𑀲𑀺.

𑁩𑁧. 𑀅𑀚𑁆𑀛𑁂𑀦𑀸𑀦𑀺 𑀧𑀝𑀺𑀕𑁆𑀕𑀬𑁆𑀳, 𑀓𑀸𑀫𑁂𑀲𑀼 𑀕𑀥𑀺𑀢𑁄 [𑀕𑀣𑀺𑀢𑁄 (𑀲𑀻. 𑀧𑀻.), 𑀕𑀺𑀤𑁆𑀥𑀺𑀢𑁄 (𑀲𑁆𑀬𑀸. 𑀓.), 𑀕𑀺𑀤𑁆𑀥𑀺𑀓𑁄 (𑀓. 𑀅𑀝𑁆𑀞.)] 𑀅𑀳𑀁;

𑀅𑀘𑀭𑀺𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀧𑀭𑁂𑀲𑀁 𑀅𑀳𑀺𑀢𑀸𑀬𑀳𑀁.

𑁩𑁨. 𑀬𑁄 𑀧𑀺𑀝𑁆𑀞𑀺𑀫𑀁𑀲𑀺𑀓𑁄 𑀳𑁄𑀢𑀺, 𑀏𑀯𑀁 𑀉𑀓𑁆𑀓𑀘𑁆𑀘 𑀔𑀸𑀤𑀢𑀺;

𑀬𑀣𑀸𑀳𑀁 𑀅𑀚𑁆𑀚 𑀔𑀸𑀤𑀸𑀫𑀺, 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀅𑀢𑁆𑀢𑀦𑁄𑀢𑀺.

𑀓𑀺𑀁𑀙𑀦𑁆𑀤𑀚𑀸𑀢𑀓𑀁 𑀧𑀞𑀫𑀁.

𑁫𑁧𑁨. 𑀓𑀼𑀫𑁆𑀪𑀚𑀸𑀢𑀓𑀁 (𑁨)

𑁩𑁩. 𑀓𑁄 𑀧𑀸𑀢𑀼𑀭𑀸𑀲𑀻 𑀢𑀺𑀤𑀺𑀯𑀸 𑀦𑀪𑀫𑁆𑀳𑀺, 𑀑𑀪𑀸𑀲𑀬𑀁 𑀲𑀁𑀯𑀭𑀺𑀁 𑀘𑀦𑁆𑀤𑀺𑀫𑀸𑀯;

𑀕𑀢𑁆𑀢𑁂𑀳𑀺 𑀢𑁂 𑀭𑀲𑁆𑀫𑀺𑀬𑁄 𑀦𑀺𑀘𑁆𑀙𑀭𑀦𑁆𑀢𑀺, 𑀲𑀢𑁂𑀭𑀢𑀸 [𑀲𑀢𑁂𑀭𑀺𑀢𑀸 (𑀲𑀻. 𑀲𑁆𑀬𑀸. 𑀓.)] 𑀯𑀺𑀚𑁆𑀚𑀼𑀭𑀺𑀯𑀦𑁆𑀢𑀮𑀺𑀓𑁆𑀔𑁂.

𑁩𑁪. 𑀲𑁄 𑀙𑀺𑀦𑁆𑀦𑀯𑀸𑀢𑀁 𑀓𑀫𑀲𑀻 𑀅𑀖𑀫𑁆𑀳𑀺, 𑀯𑁂𑀳𑀸𑀬𑀲𑀁 𑀕𑀘𑁆𑀙𑀲𑀺 𑀢𑀺𑀝𑁆𑀞𑀲𑀻 𑀘;

𑀇𑀤𑁆𑀥𑀻 𑀦𑀼 𑀢𑁂 𑀯𑀢𑁆𑀣𑀼𑀓𑀢𑀸 𑀲𑀼𑀪𑀸𑀯𑀺𑀢𑀸, 𑀅𑀦𑀤𑁆𑀥𑀕𑀽𑀦𑀁 𑀅𑀧𑀺 𑀤𑁂𑀯𑀢𑀸𑀦𑀁.

𑁩𑁫. 𑀯𑁂𑀳𑀸𑀬𑀲𑀁 𑀕𑀫𑁆𑀫𑀫𑀸𑀕𑀫𑁆𑀫 [𑀓𑀫𑀫𑀸𑀕𑀫𑁆𑀫 (𑀲𑀻. 𑀲𑁆𑀬𑀸.)] 𑀢𑀺𑀝𑁆𑀞𑀲𑀺, 𑀓𑀼𑀫𑁆𑀪𑀁 𑀓𑀺𑀡𑀸𑀣𑀸𑀢𑀺 𑀬𑀫𑁂𑀢𑀫𑀢𑁆𑀣𑀁;

𑀓𑁄 𑀯𑀸 𑀢𑀼𑀯𑀁 𑀓𑀺𑀲𑁆𑀲 𑀯𑀸 𑀢𑀸𑀬 𑀓𑀼𑀫𑁆𑀪𑁄, 𑀅𑀓𑁆𑀔𑀸𑀳𑀺 𑀫𑁂 𑀩𑁆𑀭𑀸𑀳𑁆𑀫𑀡 𑀏𑀢𑀫𑀢𑁆𑀣𑀁.

𑁩𑁬. 𑀦 𑀲𑀧𑁆𑀧𑀺𑀓𑀼𑀫𑁆𑀪𑁄 𑀦𑀧𑀺 𑀢𑁂𑀮𑀓𑀼𑀫𑁆𑀪𑁄, 𑀦 𑀨𑀸𑀡𑀺𑀢𑀲𑁆𑀲 𑀦 𑀫𑀥𑀼𑀲𑁆𑀲 𑀓𑀼𑀫𑁆𑀪𑁄;

𑀓𑀼𑀫𑁆𑀪𑀲𑁆𑀲 𑀯𑀚𑁆𑀚𑀸𑀦𑀺 𑀅𑀦𑀧𑁆𑀧𑀓𑀸𑀦𑀺, 𑀤𑁄𑀲𑁂 𑀩𑀳𑀽 𑀓𑀼𑀫𑁆𑀪𑀕𑀢𑁂 𑀲𑀼𑀡𑀸𑀣.

𑁩𑁭. 𑀕𑀴𑁂𑀬𑁆𑀬 𑀬𑀁 𑀧𑀺𑀢𑁆𑀯𑀸 [𑀧𑀻𑀢𑁆𑀯𑀸 (𑀲𑀻. 𑀧𑀻.)] 𑀧𑀢𑁂 𑀧𑀧𑀸𑀢𑀁, 𑀲𑁄𑀩𑁆𑀪𑀁 𑀕𑀼𑀳𑀁 𑀘𑀦𑁆𑀤𑀦𑀺𑀬𑁄𑀴𑀺𑀕𑀮𑁆𑀮𑀁;

𑀩𑀳𑀼𑀫𑁆𑀧𑀺 𑀪𑀼𑀜𑁆𑀚𑁂𑀬𑁆𑀬 𑀅𑀪𑁄𑀚𑀦𑁂𑀬𑁆𑀬𑀁, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁩𑁮. 𑀬𑀁 𑀧𑀺𑀢𑁆𑀯𑀸 [𑀬𑀁 𑀯𑁂 𑀧𑀻𑀢𑁆𑀯𑀸 (𑀲𑀻.)] 𑀘𑀺𑀢𑁆𑀢𑀲𑁆𑀫𑀺𑀫𑀦𑁂𑀲𑀫𑀸𑀦𑁄, 𑀆𑀳𑀺𑀡𑁆𑀟𑀢𑀻 𑀕𑁄𑀭𑀺𑀯 𑀪𑀓𑁆𑀔𑀲𑀸𑀭𑀻 [𑀪𑀓𑁆𑀔𑀲𑀸𑀤𑀻 (𑀲𑀻. 𑀲𑁆𑀬𑀸. 𑀅𑀝𑁆𑀞.)];

𑀅𑀦𑀸𑀣𑀫𑀸𑀦𑁄 𑀉𑀧𑀕𑀸𑀬𑀢𑀺 𑀦𑀘𑁆𑀘𑀢𑀺 𑀘, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁩𑁯. 𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀅𑀘𑁂𑀮𑁄𑀯 𑀦𑀕𑁆𑀕𑁄, 𑀘𑀭𑁂𑀬𑁆𑀬 𑀕𑀸𑀫𑁂 𑀯𑀺𑀲𑀺𑀔𑀦𑁆𑀢𑀭𑀸𑀦𑀺;

𑀲𑀫𑁆𑀫𑀽𑀴𑁆𑀳𑀘𑀺𑀢𑁆𑀢𑁄 𑀅𑀢𑀺𑀯𑁂𑀮𑀲𑀸𑀬𑀻, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁦. 𑀬𑀁 𑀧𑀺𑀢𑁆𑀯𑀸 𑀉𑀝𑁆𑀞𑀸𑀬 𑀧𑀯𑁂𑀥𑀫𑀸𑀦𑁄, 𑀲𑀻𑀲𑀜𑁆𑀘 𑀩𑀸𑀳𑀼𑀜𑁆𑀘 [𑀩𑀸𑀳𑀜𑁆𑀘 (𑀧𑀻.)] 𑀧𑀘𑀸𑀮𑀬𑀦𑁆𑀢𑁄;

𑀲𑁄 𑀦𑀘𑁆𑀘𑀢𑀻 𑀤𑀸𑀭𑀼𑀓𑀝𑀮𑁆𑀮𑀓𑁄𑀯, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁧. 𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀅𑀕𑁆𑀕𑀺𑀤𑀟𑁆𑀠𑀸 𑀲𑀬𑀦𑁆𑀢𑀺, 𑀅𑀣𑁄 𑀲𑀺𑀕𑀸𑀮𑁂𑀳𑀺𑀧𑀺 𑀔𑀸𑀤𑀺𑀢𑀸𑀲𑁂;

𑀩𑀦𑁆𑀥𑀁 𑀯𑀥𑀁 𑀪𑁄𑀕𑀚𑀸𑀦𑀺𑀜𑁆𑀘𑀼𑀧𑁂𑀦𑁆𑀢𑀺, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁨. 𑀬𑀁 𑀧𑀺𑀢𑁆𑀯𑀸 𑀪𑀸𑀲𑁂𑀬𑁆𑀬 𑀆𑀪𑀸𑀲𑀦𑁂𑀬𑁆𑀬𑀁, 𑀲𑀪𑀸𑀬𑀫𑀸𑀲𑀻𑀦𑁄 𑀅𑀧𑁂𑀢𑀯𑀢𑁆𑀣𑁄;

𑀲𑀫𑁆𑀫𑀓𑁆𑀔𑀺𑀢𑁄 [𑀲𑀫𑀓𑁆𑀔𑀺𑀢𑁄 (𑀲𑀻.)] 𑀯𑀦𑁆𑀢𑀕𑀢𑁄 𑀩𑁆𑀬𑀲𑀦𑁆𑀦𑁄, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁩. 𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀉𑀓𑁆𑀓𑀝𑁆𑀞𑁄 𑀆𑀯𑀺𑀮𑀓𑁆𑀔𑁄, 𑀫𑀫𑁂𑀯 𑀲𑀩𑁆𑀩𑀸 𑀧𑀣𑀯𑀻𑀢𑀺 𑀫𑀜𑁆𑀜𑁂 [𑀫𑀜𑁆𑀜𑀢𑀺 (𑀲𑀻.)];

𑀦 𑀫𑁂 𑀲𑀫𑁄 𑀘𑀸𑀢𑀼𑀭𑀦𑁆𑀢𑁄𑀧𑀺 𑀭𑀸𑀚𑀸, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁪. 𑀫𑀸𑀦𑀸𑀢𑀺𑀫𑀸𑀦𑀸 𑀓𑀮𑀳𑀸𑀦𑀺 𑀧𑁂𑀲𑀼𑀡𑀻, 𑀤𑀼𑀩𑁆𑀩𑀡𑁆𑀡𑀺𑀦𑀻 𑀦𑀕𑁆𑀕𑀬𑀺𑀦𑀻 𑀧𑀮𑀸𑀬𑀺𑀦𑀻;

𑀘𑁄𑀭𑀸𑀦 𑀥𑀼𑀢𑁆𑀢𑀸𑀦 𑀕𑀢𑀻 𑀦𑀺𑀓𑁂𑀢𑁄, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁫. 𑀇𑀤𑁆𑀥𑀸𑀦𑀺 𑀨𑀻𑀢𑀸𑀦𑀺 𑀓𑀼𑀮𑀸𑀦𑀺 𑀅𑀲𑁆𑀲𑀼, 𑀅𑀦𑁂𑀓𑀲𑀸𑀳𑀲𑁆𑀲𑀥𑀦𑀸𑀦𑀺 𑀮𑁄𑀓𑁂;

𑀉𑀘𑁆𑀙𑀺𑀦𑁆𑀦𑀤𑀸𑀬𑀚𑁆𑀚𑀓𑀢𑀸𑀦𑀺𑀫𑀸𑀬, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁬. 𑀥𑀜𑁆𑀜𑀁 𑀥𑀦𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁, 𑀔𑁂𑀢𑁆𑀢𑀁 𑀕𑀯𑀁 𑀬𑀢𑁆𑀣 𑀯𑀺𑀦𑀸𑀲𑀬𑀦𑁆𑀢𑀺;

𑀉𑀘𑁆𑀙𑁂𑀤𑀦𑀻 𑀯𑀺𑀢𑁆𑀢𑀯𑀢𑀁 [𑀉𑀘𑁆𑀙𑁂𑀤𑀦𑀻 𑀯𑀺𑀢𑁆𑀢𑀕𑀢𑀁 (𑀲𑁆𑀬𑀸.), 𑀉𑀘𑁆𑀙𑁂𑀤𑀦𑀺𑀯𑀺𑀢𑁆𑀢𑀕𑀢𑀁 (𑀓.)] 𑀓𑀼𑀮𑀸𑀦𑀁, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁭. 𑀬𑀁 𑀯𑁂 𑀧𑀺𑀢𑁆𑀯𑀸 𑀤𑀺𑀢𑁆𑀢𑀭𑀽𑀧𑁄𑀯 [𑀤𑀼𑀝𑁆𑀞𑀭𑀽𑀧𑁄𑀯 (𑀲𑀻.)] 𑀧𑁄𑀲𑁄, 𑀅𑀓𑁆𑀓𑁄𑀲𑀢𑀺 𑀫𑀸𑀢𑀭𑀁 𑀧𑀺𑀢𑀭𑀜𑁆𑀘;

𑀲𑀲𑁆𑀲𑀼𑀫𑁆𑀧𑀺 𑀕𑀡𑁆𑀳𑁂𑀬𑁆𑀬 𑀅𑀣𑁄𑀧𑀺 𑀲𑀼𑀡𑁆𑀳𑀁, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁮. 𑀬𑀁 𑀯𑁂 𑀧𑀺𑀢𑁆𑀯𑀸 𑀤𑀺𑀢𑁆𑀢𑀭𑀽𑀧𑀸𑀯 𑀦𑀸𑀭𑀻, 𑀅𑀓𑁆𑀓𑁄𑀲𑀢𑀺 𑀲𑀲𑀼𑀭𑀁 𑀲𑀸𑀫𑀺𑀓𑀜𑁆𑀘;

𑀤𑀸𑀲𑀫𑁆𑀧𑀺 𑀕𑀡𑁆𑀳𑁂 𑀧𑀭𑀺𑀘𑀸𑀭𑀓𑀫𑁆𑀧𑀺, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁪𑁯. 𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸𑀦 [𑀬𑀜𑁆𑀘𑁂 𑀧𑀻𑀢𑁆𑀯𑀸𑀦 (𑀧𑀻.)] 𑀳𑀦𑁂𑀬𑁆𑀬 𑀧𑁄𑀲𑁄, 𑀥𑀫𑁆𑀫𑁂 𑀞𑀺𑀢𑀁 𑀲𑀫𑀡𑀁 𑀩𑁆𑀭𑀸𑀳𑁆𑀫𑀡𑀁 𑀯𑀸;

𑀕𑀘𑁆𑀙𑁂 𑀅𑀧𑀸𑀬𑀫𑁆𑀧𑀺 𑀢𑀢𑁄𑀦𑀺𑀤𑀸𑀦𑀁, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁦. 𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀦𑁆𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀘𑁂𑀢𑀲𑀸 𑀘;

𑀦𑀺𑀭𑀬𑀁 𑀯𑀚𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁧. 𑀬𑀁 𑀬𑀸𑀘𑀫𑀸𑀦𑀸 𑀦 𑀮𑀪𑀦𑁆𑀢𑀺 𑀧𑀼𑀩𑁆𑀩𑁂, 𑀩𑀳𑀼𑀁 𑀳𑀺𑀭𑀜𑁆𑀜𑀫𑁆𑀧𑀺 𑀧𑀭𑀺𑀘𑁆𑀘𑀚𑀦𑁆𑀢𑀸;

𑀲𑁄 𑀢𑀁 𑀧𑀺𑀯𑀺𑀢𑁆𑀯𑀸 𑀅𑀮𑀺𑀓𑀁 𑀪𑀡𑀸𑀢𑀺, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁨. 𑀬𑀁 𑀯𑁂 𑀧𑀺𑀢𑁆𑀯𑀸 𑀧𑁂𑀲𑀦𑁂 𑀧𑁂𑀲𑀺𑀬𑀦𑁆𑀢𑁄, 𑀅𑀘𑁆𑀘𑀸𑀬𑀺𑀓𑁂 𑀓𑀭𑀡𑀻𑀬𑀫𑁆𑀳𑀺 𑀚𑀸𑀢𑁂;

𑀅𑀢𑁆𑀣𑀫𑁆𑀧𑀺 𑀲𑁄 𑀦𑀧𑁆𑀧𑀚𑀸𑀦𑀸𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁩. 𑀳𑀺𑀭𑀻𑀫𑀦𑀸𑀧𑀺 𑀅𑀳𑀺𑀭𑀻𑀓𑀪𑀸𑀯𑀁, 𑀧𑀸𑀢𑀼𑀁 𑀓𑀭𑁄𑀦𑁆𑀢𑀺 𑀫𑀤𑀦𑀸𑀬 [𑀫𑀤𑀺𑀭𑀸𑀬 (𑀧𑀻.)] 𑀫𑀢𑁆𑀢𑀸;

𑀥𑀻𑀭𑀸𑀧𑀺 𑀲𑀦𑁆𑀢𑀸 𑀩𑀳𑀼𑀓𑀁 𑀪𑀡𑀦𑁆𑀢𑀺, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁪. 𑀬𑀁 𑀯𑁂 𑀧𑀺𑀢𑁆𑀯𑀸 𑀏𑀓𑀣𑀽𑀧𑀸 𑀲𑀬𑀦𑁆𑀢𑀺, 𑀅𑀦𑀸𑀲𑀓𑀸 𑀣𑀡𑁆𑀟𑀺𑀮𑀤𑀼𑀓𑁆𑀔𑀲𑁂𑀬𑁆𑀬𑀁;

𑀤𑀼𑀩𑁆𑀩𑀡𑁆𑀡𑀺𑀬𑀁 𑀆𑀬𑀲𑀓𑁆𑀬𑀜𑁆𑀘𑀼𑀧𑁂𑀦𑁆𑀢𑀺, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁫. 𑀬𑀁 𑀯𑁂 𑀧𑀺𑀢𑁆𑀯𑀸 𑀧𑀢𑁆𑀢𑀔𑀦𑁆𑀥𑀸 𑀲𑀬𑀦𑁆𑀢𑀺, 𑀕𑀸𑀯𑁄 𑀓𑀼𑀝𑀳𑀢𑀸𑀯 𑀦 𑀳𑀺 𑀯𑀸𑀭𑀼𑀡𑀺𑀬𑀸;

[𑀬𑀁 𑀯𑁂 𑀧𑀺𑀢𑁆𑀯𑀸 𑀧𑀢𑁆𑀢𑀓𑁆𑀔𑀦𑁆𑀥𑀸, 𑀲𑀬𑀦𑁆𑀢𑀺 𑀕𑀸𑀯𑁄 𑀓𑀽𑀝𑀳𑀢𑀸𑀭𑀺𑀯; 𑀦 𑀳𑀺 𑀯𑀸𑀭𑀼𑀡𑀺𑀬𑀸 𑀯𑁂𑀕𑁄, 𑀦𑀭𑁂𑀦 𑀲𑀼𑀲𑁆𑀲𑀳𑁄𑀭𑀺𑀯; (𑀲𑀻.)] 𑀯𑁂𑀕𑁄 𑀦𑀭𑁂𑀦 𑀲𑀼𑀲𑀳𑁄𑀭𑀺𑀯 [𑀬𑀁 𑀯𑁂 𑀧𑀺𑀢𑁆𑀯𑀸 𑀧𑀢𑁆𑀢𑀓𑁆𑀔𑀦𑁆𑀥𑀸, 𑀲𑀬𑀦𑁆𑀢𑀺 𑀕𑀸𑀯𑁄 𑀓𑀽𑀝𑀳𑀢𑀸𑀭𑀺𑀯; 𑀦 𑀳𑀺 𑀯𑀸𑀭𑀼𑀡𑀺𑀬𑀸 𑀯𑁂𑀕𑁄, 𑀦𑀭𑁂𑀦 𑀲𑀼𑀲𑁆𑀲𑀳𑁄𑀭𑀺𑀯; (𑀲𑀻.)], 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁬. 𑀬𑀁 𑀫𑀦𑀼𑀲𑁆𑀲𑀸 𑀯𑀺𑀯𑀚𑁆𑀚𑁂𑀦𑁆𑀢𑀺, 𑀲𑀧𑁆𑀧𑀁 𑀖𑁄𑀭𑀯𑀺𑀲𑀁 𑀫𑀺𑀯 [𑀯𑀺𑀲𑀫𑀺𑀯 (𑀲𑁆𑀬𑀸.), 𑀯𑀺𑀲𑀁 𑀇𑀯 (𑀓.), 𑀯𑀺𑀲𑀸𑀫𑀺𑀯 (?)];

𑀢𑀁 𑀮𑁄𑀓𑁂 𑀯𑀺𑀲𑀲𑀫𑀸𑀦𑀁, 𑀓𑁄 𑀦𑀭𑁄 𑀧𑀸𑀢𑀼𑀫𑀭𑀳𑀢𑀺.

𑁫𑁭. 𑀬𑀁 𑀯𑁂 𑀧𑀺𑀢𑁆𑀯𑀸 𑀅𑀦𑁆𑀥𑀓𑀯𑁂𑀡𑁆𑀟𑀧𑀼𑀢𑁆𑀢𑀸, 𑀲𑀫𑀼𑀤𑁆𑀤𑀢𑀻𑀭𑁂 𑀧𑀭𑀺𑀘𑀸𑀭𑀬𑀦𑁆𑀢𑀸 [𑀅𑀦𑁆𑀥𑀓𑀯𑁂𑀡𑁆𑀳𑀼𑀧𑀼𑀢𑁆𑀢𑀸 (𑀲𑀻. 𑀧𑀻.), 𑀅𑀡𑁆𑀟𑀓𑀯𑁂𑀡𑁆𑀟𑀧𑀼𑀢𑁆𑀢𑀸 (𑀓.)];

𑀉𑀧𑀓𑁆𑀓𑀫𑀼𑀁 𑀫𑀼𑀲𑀮𑁂𑀳𑀜𑁆𑀜𑀫𑀜𑁆𑀜𑀁, 𑀢𑀲𑁆𑀲𑀸 𑀧𑀼𑀡𑁆𑀡𑀁 𑀓𑀼𑀫𑁆𑀪𑀫𑀺𑀫𑀁 𑀓𑀺𑀡𑀸𑀣.

𑁫𑁮. 𑀬𑀁 𑀯𑁂 𑀧𑀺𑀢𑁆𑀯𑀸 𑀧𑀼𑀩𑁆𑀩𑀤𑁂𑀯𑀸 𑀧𑀫𑀢𑁆𑀢𑀸, 𑀢𑀺𑀤𑀺𑀯𑀸 𑀘𑀼𑀢𑀸 𑀲𑀲𑁆𑀲𑀢𑀺𑀬𑀸 𑀲𑀫𑀸𑀬;

𑀢𑀁 𑀢𑀸𑀤𑀺𑀲𑀁 𑀫𑀚𑁆𑀚𑀫𑀺𑀫𑀁 𑀦𑀺𑀭𑀢𑁆𑀣𑀓𑀁, 𑀚𑀸𑀦𑀁 𑀫𑀳𑀸𑀭𑀸𑀚 𑀓𑀣𑀁 𑀧𑀺𑀯𑁂𑀬𑁆𑀬.

𑁫𑁯. 𑀦𑀬𑀺𑀫𑀲𑁆𑀫𑀺𑀁 𑀓𑀼𑀫𑁆𑀪𑀲𑁆𑀫𑀺𑀁 𑀤𑀥𑀺 𑀯𑀸 𑀫𑀥𑀼 𑀯𑀸, 𑀏𑀯𑀁 𑀅𑀪𑀺𑀜𑁆𑀜𑀸𑀬 𑀓𑀺𑀡𑀸𑀳𑀺 𑀭𑀸𑀚;

𑀏𑀯𑀜𑁆𑀳𑀺𑀫𑀁 𑀓𑀼𑀫𑁆𑀪𑀕𑀢𑀸 𑀫𑀬𑀸 𑀢𑁂, 𑀅𑀓𑁆𑀔𑀸𑀢𑀭𑀽𑀧𑀁 𑀢𑀯 𑀲𑀩𑁆𑀩𑀫𑀺𑀢𑁆𑀢.

𑁬𑁦. 𑀦 𑀫𑁂 𑀧𑀺𑀢𑀸 𑀯𑀸 𑀅𑀣𑀯𑀸𑀧𑀺 𑀫𑀸𑀢𑀸, 𑀏𑀢𑀸𑀤𑀺𑀲𑀸 𑀬𑀸𑀤𑀺𑀲𑀓𑁄 𑀢𑀼𑀯𑀁𑀲𑀺;

𑀳𑀺𑀢𑀸𑀦𑀼𑀓𑀫𑁆𑀧𑀻 𑀧𑀭𑀫𑀢𑁆𑀣𑀓𑀸𑀫𑁄, 𑀲𑁄𑀳𑀁 𑀓𑀭𑀺𑀲𑁆𑀲𑀁 𑀯𑀘𑀦𑀁 𑀢𑀯𑀚𑁆𑀚.

𑁬𑁧. 𑀤𑀤𑀸𑀫𑀺 𑀢𑁂 𑀕𑀸𑀫𑀯𑀭𑀸𑀦𑀺 𑀧𑀜𑁆𑀘, 𑀤𑀸𑀲𑀻𑀲𑀢𑀁 𑀲𑀢𑁆𑀢 𑀕𑀯𑀁 𑀲𑀢𑀸𑀦𑀺;

𑀆𑀚𑀜𑁆𑀜𑀬𑀼𑀢𑁆𑀢𑁂 𑀘 𑀭𑀣𑁂 𑀤𑀲 𑀇𑀫𑁂, 𑀆𑀘𑀭𑀺𑀬𑁄 𑀳𑁄𑀲𑀺 𑀫𑀫𑀢𑁆𑀣𑀓𑀸𑀫𑁄.

𑁬𑁨. 𑀢𑀯𑁂𑀯 𑀤𑀸𑀲𑀻𑀲𑀢𑀫𑀢𑁆𑀣𑀼 𑀭𑀸𑀚, 𑀕𑀸𑀫𑀸 𑀘 𑀕𑀸𑀯𑁄 𑀘 𑀢𑀯𑁂𑀯 𑀳𑁄𑀦𑁆𑀢𑀼;

𑀆𑀚𑀜𑁆𑀜𑀬𑀼𑀢𑁆𑀢𑀸 𑀘 𑀭𑀣𑀸 𑀢𑀯𑁂𑀯, 𑀲𑀓𑁆𑀓𑁄𑀳𑀫𑀲𑁆𑀫𑀻 𑀢𑀺𑀤𑀲𑀸𑀦𑀫𑀺𑀦𑁆𑀤𑁄.

𑁬𑁩. 𑀫𑀁𑀲𑁄𑀤𑀦𑀁 𑀲𑀧𑁆𑀧𑀺𑀧𑀸𑀬𑀸𑀲𑀁 [𑀲𑀧𑁆𑀧𑀺𑀧𑀸𑀬𑀜𑁆𑀘 (𑀲𑀻.)] 𑀪𑀼𑀜𑁆𑀚, 𑀔𑀸𑀤𑀲𑁆𑀲𑀼 𑀘 𑀢𑁆𑀯𑀁 𑀫𑀥𑀼𑀫𑀸𑀲𑀧𑀽𑀯𑁂;

𑀏𑀯𑀁 𑀢𑀼𑀯𑀁 𑀥𑀫𑁆𑀫𑀭𑀢𑁄 𑀚𑀦𑀺𑀦𑁆𑀤, 𑀅𑀦𑀺𑀦𑁆𑀤𑀺𑀢𑁄 𑀲𑀕𑁆𑀕𑀫𑀼𑀧𑁂𑀳𑀺 𑀞𑀸𑀦𑀦𑁆𑀢𑀺.

𑀓𑀼𑀫𑁆𑀪𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁫𑁧𑁩. 𑀚𑀬𑀤𑁆𑀤𑀺𑀲𑀚𑀸𑀢𑀓𑀁 (𑁩)

𑁬𑁪. 𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀉𑀤𑀧𑀸𑀤𑀺 𑀅𑀚𑁆𑀚, 𑀪𑀓𑁆𑀔𑁄 𑀫𑀳𑀸 𑀲𑀢𑁆𑀢𑀫𑀺𑀪𑀢𑁆𑀢𑀓𑀸𑀮𑁂;

𑀓𑀼𑀢𑁄𑀲𑀺 𑀓𑁄 𑀯𑀸𑀲𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺, 𑀆𑀘𑀺𑀓𑁆𑀔 𑀚𑀸𑀢𑀺𑀁 𑀯𑀺𑀤𑀺𑀢𑁄 𑀬𑀣𑀸𑀲𑀺.

𑁬𑁫. 𑀧𑀜𑁆𑀘𑀸𑀮𑀭𑀸𑀚𑀸 𑀫𑀺𑀕𑀯𑀁 𑀧𑀯𑀺𑀝𑁆𑀞𑁄, 𑀚𑀬𑀤𑁆𑀤𑀺𑀲𑁄 𑀦𑀸𑀫 𑀬𑀤𑀺𑀲𑁆𑀲𑀼𑀢𑁄 𑀢𑁂;

𑀘𑀭𑀸𑀫𑀺 𑀓𑀘𑁆𑀙𑀸𑀦𑀺 𑀯𑀦𑀸𑀦𑀺 𑀘𑀸𑀳𑀁, 𑀧𑀲𑀤𑀁 𑀇𑀫𑀁 𑀔𑀸𑀤 𑀫𑀫𑀚𑁆𑀚 𑀫𑀼𑀜𑁆𑀘.

𑁬𑁬. 𑀲𑁂𑀦𑁂𑀯 𑀢𑁆𑀯𑀁 𑀧𑀡𑀲𑀺 𑀲𑀲𑁆𑀲𑀫𑀸𑀦𑁄 [𑀲𑀬𑁆𑀳𑀫𑀸𑀦𑁄 (𑀲𑁆𑀬𑀸. 𑀓.)], 𑀫𑀫𑁂𑀲 𑀪𑀓𑁆𑀔𑁄 𑀧𑀲𑀤𑁄 𑀬𑀁 𑀯𑀤𑁂𑀲𑀺;

𑀢𑀁 𑀔𑀸𑀤𑀺𑀬𑀸𑀦 𑀧𑀲𑀤𑀁 𑀚𑀺𑀖𑀜𑁆𑀜𑀁 [𑀚𑀺𑀖𑀘𑁆𑀙𑀁 (?)], 𑀔𑀸𑀤𑀺𑀲𑁆𑀲𑀁 𑀧𑀘𑁆𑀙𑀸 𑀦 𑀯𑀺𑀮𑀸𑀧𑀓𑀸𑀮𑁄.

𑁬𑁭. 𑀦 𑀘𑀢𑁆𑀣𑀺 𑀫𑁄𑀓𑁆𑀔𑁄 𑀫𑀫 𑀦𑀺𑀓𑁆𑀓𑀬𑁂𑀦 [𑀯𑀺𑀓𑁆𑀓𑀬𑁂𑀦 (𑀲𑀻.)], 𑀕𑀦𑁆𑀢𑁆𑀯𑀸𑀦 𑀧𑀘𑁆𑀘𑀸𑀕𑀫𑀦𑀸𑀬 𑀧𑀡𑁆𑀳𑁂;

𑀢𑀁 𑀲𑀗𑁆𑀓𑀭𑀁 [𑀲𑀗𑁆𑀕𑀭𑀁 (𑀲𑀻. 𑀲𑁆𑀬𑀸. 𑀧𑀻.)] 𑀩𑁆𑀭𑀸𑀳𑁆𑀫𑀡𑀲𑁆𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀺𑀲𑁆𑀲𑀁.

𑁬𑁮. 𑀓𑀺𑀁 𑀓𑀫𑁆𑀫𑀚𑀸𑀢𑀁 𑀅𑀦𑀼𑀢𑀧𑁆𑀧𑀢𑁂 𑀢𑁆𑀯𑀁 [𑀅𑀦𑀼𑀢𑀧𑁆𑀧𑀢𑀻 𑀢𑀁 (𑀲𑀻. 𑀧𑀻.)], 𑀧𑀢𑁆𑀢𑀁 𑀲𑀫𑀻𑀧𑀁 𑀫𑀭𑀡𑀲𑁆𑀲 𑀭𑀸𑀚;

𑀆𑀘𑀺𑀓𑁆𑀔 𑀫𑁂 𑀢𑀁 𑀅𑀧𑀺 𑀲𑀓𑁆𑀓𑀼𑀡𑁂𑀫𑀼, 𑀅𑀦𑀼𑀚𑀸𑀦𑀺𑀢𑀼𑀁 𑀆𑀕𑀫𑀦𑀸𑀬 𑀧𑀡𑁆𑀳𑁂.

𑁬𑁯. 𑀓𑀢𑀸 𑀫𑀬𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀸𑀲𑀸, 𑀢𑀁 𑀲𑀗𑁆𑀓𑀭𑀁 𑀧𑀝𑀺𑀫𑀼𑀓𑁆𑀓𑀁 𑀦 𑀫𑀼𑀢𑁆𑀢𑀁;

𑀢𑀁 𑀲𑀗𑁆𑀓𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀺𑀲𑁆𑀲𑀁.

𑁭𑁦. 𑀬𑀸 𑀢𑁂 𑀓𑀢𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀸𑀲𑀸, 𑀢𑀁 𑀲𑀗𑁆𑀓𑀭𑀁 𑀧𑀝𑀺𑀫𑀼𑀓𑁆𑀓𑀁 𑀦 𑀫𑀼𑀢𑁆𑀢𑀁;

𑀢𑀁 𑀲𑀗𑁆𑀓𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀲𑁆𑀲𑀼.