𑁪𑁩𑁭. 𑀧𑀽𑀢𑀺𑀫𑀁𑀲𑀚𑀸𑀢𑀓𑀁 (𑁧𑁧)

𑁯𑁬. 𑀦 𑀔𑁄 𑀫𑁂 𑀭𑀼𑀘𑁆𑀘𑀢𑀺 𑀆𑀴𑀺, 𑀧𑀽𑀢𑀺𑀫𑀁𑀲𑀲𑁆𑀲 𑀧𑁂𑀓𑁆𑀔𑀦𑀸;

𑀏𑀢𑀸𑀤𑀺𑀲𑀸 𑀲𑀔𑀸𑀭𑀲𑁆𑀫𑀸, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.

𑁯𑁭. 𑀉𑀫𑁆𑀫𑀢𑁆𑀢𑀺𑀓𑀸 𑀅𑀬𑀁 𑀯𑁂𑀡𑀻, 𑀯𑀡𑁆𑀡𑁂𑀢𑀺 𑀧𑀢𑀺𑀦𑁄 𑀲𑀔𑀺𑀁;

𑀧𑀚𑁆𑀛𑀸𑀬𑀺 [𑀧𑀚𑁆𑀛𑀸𑀢𑀺 (𑀲𑀻. 𑀧𑀻.), 𑀧𑀚𑁆𑀛𑀸𑀬𑀢𑀺 (𑀲𑀻. 𑀦𑀺𑀬𑁆𑀬)] 𑀧𑀝𑀺𑀕𑀘𑁆𑀙𑀦𑁆𑀢𑀺𑀁, 𑀆𑀕𑀢𑀁 𑀫𑁂𑀡𑁆𑀟 [𑀫𑁂𑀴 (𑀲𑀻. 𑀧𑀻.)] 𑀫𑀸𑀢𑀭𑀁.

𑁯𑁮. 𑀢𑁆𑀯𑀁 𑀔𑁄𑀲𑀺 𑀲𑀫𑁆𑀫 𑀉𑀫𑁆𑀫𑀢𑁆𑀢𑁄, 𑀤𑀼𑀫𑁆𑀫𑁂𑀥𑁄 𑀅𑀯𑀺𑀘𑀓𑁆𑀔𑀡𑁄;

𑀬𑁄 𑀢𑁆𑀯𑀁 [𑀲𑁄 𑀢𑁆𑀯𑀁 (𑀲𑁆𑀬𑀸.)] 𑀫𑀢𑀸𑀮𑀬𑀁 𑀓𑀢𑁆𑀯𑀸, 𑀅𑀓𑀸𑀮𑁂𑀦 𑀯𑀺𑀧𑁂𑀓𑁆𑀔𑀲𑀺.

𑁯𑁯. 𑀦 𑀅𑀓𑀸𑀮𑁂 𑀯𑀺𑀧𑁂𑀓𑁆𑀔𑁂𑀬𑁆𑀬, 𑀓𑀸𑀮𑁂 𑀧𑁂𑀓𑁆𑀔𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀽𑀢𑀺𑀫𑀁𑀲𑁄𑀯 𑀧𑀚𑁆𑀛𑀸𑀬𑀺 [𑀧𑀚𑁆𑀛𑀸𑀢𑀺 (𑀲𑀻. 𑀧𑀻.), 𑀧𑀚𑁆𑀛𑀸𑀬𑀢𑀺 (𑀲𑀻. 𑀦𑀺𑀬𑁆𑀬)], 𑀬𑁄 𑀅𑀓𑀸𑀮𑁂 𑀯𑀺𑀧𑁂𑀓𑁆𑀔𑀢𑀺.

𑁧𑁦𑁦. 𑀧𑀺𑀬𑀁 𑀔𑁄 𑀆𑀴𑀺 𑀫𑁂 𑀳𑁄𑀢𑀼, 𑀧𑀼𑀡𑁆𑀡𑀧𑀢𑁆𑀢𑀁 𑀤𑀤𑀸𑀳𑀺 𑀫𑁂;

𑀧𑀢𑀺 𑀲𑀜𑁆𑀚𑀻𑀯𑀺𑀢𑁄 𑀫𑀬𑁆𑀳𑀁, 𑀏𑀬𑁆𑀬𑀸𑀲𑀺 𑀧𑀺𑀬𑀧𑀼𑀘𑁆𑀙𑀺𑀓𑀸 [𑀧𑀼𑀘𑁆𑀙𑀺𑀢𑀸 (𑀲𑁆𑀬𑀸. 𑀓.)].

𑁧𑁦𑁧. 𑀧𑀺𑀬𑀁 𑀔𑁄 𑀆𑀴𑀺 𑀢𑁂 𑀳𑁄𑀢𑀼, 𑀧𑀼𑀡𑁆𑀡𑀧𑀢𑁆𑀢𑀁 𑀤𑀤𑀸𑀫𑀺 𑀢𑁂;

𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 [𑀧𑀭𑀺𑀳𑀸𑀭𑁂𑀦 (𑀲𑁆𑀬𑀸.)], 𑀏𑀲𑁆𑀲𑀁 [𑀏𑀲𑀁 (𑀲𑀻. 𑀧𑀻.)] 𑀓𑀬𑀺𑀭𑀸𑀳𑀺 [𑀓𑀬𑀺𑀭𑀸𑀲𑀺 (𑀧𑀻.)] 𑀪𑁄𑀚𑀦𑀁.

𑁧𑁦𑁨. 𑀓𑀻𑀤𑀺𑀲𑁄 𑀢𑀼𑀬𑁆𑀳𑀁 𑀧𑀭𑀺𑀯𑀸𑀭𑁄, 𑀬𑁂𑀲𑀁 𑀓𑀸𑀳𑀸𑀫𑀺 𑀪𑁄𑀚𑀦𑀁;

𑀓𑀺𑀁𑀦𑀸𑀫𑀓𑀸 𑀘 𑀢𑁂 𑀲𑀩𑁆𑀩𑁂, 𑀢𑀁 [𑀢𑁂 (𑀲𑀻. 𑀲𑁆𑀬𑀸. 𑀧𑀻.)] 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸.

𑁧𑁦𑁩. 𑀫𑀸𑀮𑀺𑀬𑁄 𑀘𑀢𑀼𑀭𑀓𑁆𑀔𑁄 𑀘, 𑀧𑀺𑀗𑁆𑀕𑀺𑀬𑁄 𑀅𑀣 𑀚𑀫𑁆𑀩𑀼𑀓𑁄;

𑀏𑀤𑀺𑀲𑁄 𑀫𑀬𑁆𑀳𑀁 𑀧𑀭𑀺𑀯𑀸𑀭𑁄, 𑀢𑁂𑀲𑀁 𑀓𑀬𑀺𑀭𑀸𑀳𑀺 [𑀓𑀬𑀺𑀭𑀸𑀲𑀺 (𑀧𑀻.)] 𑀪𑁄𑀚𑀦𑀁.

𑁧𑁦𑁪. 𑀦𑀺𑀓𑁆𑀔𑀦𑁆𑀢𑀸𑀬 𑀅𑀕𑀸𑀭𑀲𑁆𑀫𑀸, 𑀪𑀡𑁆𑀟𑀓𑀫𑁆𑀧𑀺 𑀯𑀺𑀦𑀲𑁆𑀲𑀢𑀺;

𑀆𑀭𑁄𑀕𑁆𑀬𑀁 𑀆𑀴𑀺𑀦𑁄 𑀯𑀚𑁆𑀚𑀁 [𑀯𑀘𑁆𑀙𑀁 (?)], 𑀇𑀥𑁂𑀯 𑀯𑀲 𑀫𑀸𑀕𑀫𑀸𑀢𑀺.

𑀧𑀽𑀢𑀺𑀫𑀁𑀲𑀚𑀸𑀢𑀓𑀁 𑀏𑀓𑀸𑀤𑀲𑀫𑀁.