𑁪𑁩𑁬. 𑀲𑀫𑀼𑀕𑁆𑀕𑀚𑀸𑀢𑀓𑀁 (𑁧𑁦)

𑁮𑁭. 𑀓𑀼𑀢𑁄 𑀦𑀼 𑀆𑀕𑀘𑁆𑀙𑀣 𑀪𑁄 𑀢𑀬𑁄 𑀚𑀦𑀸, 𑀲𑁆𑀯𑀸𑀕𑀢𑀸 𑀏𑀣 [𑀲𑁆𑀯𑀸𑀕𑀢𑀁 𑀏𑀢𑁆𑀣 (𑀲𑀻. 𑀧𑀻.)] 𑀦𑀺𑀲𑀻𑀤𑀣𑀸𑀲𑀦𑁂;

𑀓𑀘𑁆𑀘𑀺𑀢𑁆𑀣 𑀪𑁄𑀦𑁆𑀢𑁄 𑀓𑀼𑀲𑀮𑀁 𑀅𑀦𑀸𑀫𑀬𑀁, 𑀘𑀺𑀭𑀲𑁆𑀲𑀫𑀩𑁆𑀪𑀸𑀕𑀫𑀦𑀁 𑀳𑀺 𑀯𑁄 𑀇𑀥.

𑁮𑁮. 𑀅𑀳𑀫𑁂𑀯 𑀏𑀓𑁄 𑀇𑀥 𑀫𑀚𑁆𑀚 𑀧𑀢𑁆𑀢𑁄, 𑀦 𑀘𑀸𑀧𑀺 𑀫𑁂 𑀤𑀼𑀢𑀺𑀬𑁄 𑀓𑁄𑀘𑀺 𑀯𑀺𑀚𑁆𑀚𑀢𑀺;

𑀓𑀺𑀫𑁂𑀯 𑀲𑀦𑁆𑀥𑀸𑀬 𑀢𑁂 𑀪𑀸𑀲𑀺𑀢𑀁 𑀇𑀲𑁂, ‘‘𑀓𑀼𑀢𑁄 𑀦𑀼 𑀆𑀕𑀘𑁆𑀙𑀣 𑀪𑁄 𑀢𑀬𑁄 𑀚𑀦𑀸’’.

𑁮𑁯. 𑀢𑀼𑀯𑀜𑁆𑀘 𑀏𑀓𑁄 𑀪𑀭𑀺𑀬𑀸 𑀘 𑀢𑁂 𑀧𑀺𑀬𑀸, 𑀲𑀫𑀼𑀕𑁆𑀕𑀧𑀓𑁆𑀔𑀺𑀢𑁆𑀢𑀦𑀺𑀓𑀺𑀡𑁆𑀡𑀫𑀦𑁆𑀢𑀭𑁂;

𑀲𑀸 𑀭𑀓𑁆𑀔𑀺𑀢𑀸 𑀓𑀼𑀘𑁆𑀙𑀺𑀕𑀢𑀸𑀯 [𑀓𑀼𑀘𑁆𑀙𑀺𑀕𑀢𑀸 𑀘 (𑀓.)] 𑀢𑁂 𑀲𑀤𑀸, 𑀯𑀸𑀬𑀼𑀲𑁆𑀲 [𑀳𑀭𑀺𑀲𑁆𑀲 (𑀓.)] 𑀧𑀼𑀢𑁆𑀢𑁂𑀦 𑀲𑀳𑀸 𑀢𑀳𑀺𑀁 𑀭𑀢𑀸.

𑁯𑁦. 𑀲𑀁𑀯𑀺𑀕𑁆𑀕𑀭𑀽𑀧𑁄 𑀇𑀲𑀺𑀦𑀸 𑀯𑀺𑀬𑀸𑀓𑀢𑁄 [𑀧𑀩𑁆𑀬𑀸𑀓𑀢𑁄 (𑀓.), 𑀩𑁆𑀬𑀸𑀓𑀢𑁄 (𑀲𑁆𑀬𑀸. 𑀧𑀻.)], 𑀲𑁄 𑀤𑀸𑀦𑀯𑁄 𑀢𑀢𑁆𑀣 𑀲𑀫𑀼𑀕𑁆𑀕𑀫𑀼𑀕𑁆𑀕𑀺𑀮𑀺;

𑀅𑀤𑁆𑀤𑀓𑁆𑀔𑀺 𑀪𑀭𑀺𑀬𑀁 𑀲𑀼𑀘𑀺 𑀫𑀸𑀮𑀥𑀸𑀭𑀺𑀦𑀺𑀁, 𑀯𑀸𑀬𑀼𑀲𑁆𑀲 𑀧𑀼𑀢𑁆𑀢𑁂𑀦 𑀲𑀳𑀸 𑀢𑀳𑀺𑀁 𑀭𑀢𑀁.

𑁯𑁧. 𑀲𑀼𑀤𑀺𑀝𑁆𑀞𑀭𑀽𑀧𑀫𑀼𑀕𑁆𑀕𑀢𑀧𑀸𑀦𑀼𑀯𑀢𑁆𑀢𑀺𑀦𑀸 [𑀲𑀼𑀤𑀺𑀝𑁆𑀞𑀭𑀽𑀧𑀼𑀕𑁆𑀕𑀢𑀧𑀸𑀦𑀼𑀯𑀢𑁆𑀢𑀺𑀦𑀸 (𑀲𑀻. 𑀲𑁆𑀬𑀸. 𑀧𑀻.)], 𑀳𑀻𑀦𑀸 𑀦𑀭𑀸 𑀬𑁂 𑀧𑀫𑀤𑀸𑀯𑀲𑀁 𑀕𑀢𑀸;

𑀬𑀣𑀸 𑀳𑀯𑁂 𑀧𑀸𑀡𑀭𑀺𑀯𑁂𑀢𑁆𑀣 𑀭𑀓𑁆𑀔𑀺𑀢𑀸, 𑀤𑀼𑀝𑁆𑀞𑀸 𑀫𑀬𑀻 𑀅𑀜𑁆𑀜𑀫𑀪𑀺𑀧𑁆𑀧𑀫𑁄𑀤𑀬𑀺.

𑁯𑁨. 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀫𑀬𑀸 𑀉𑀧𑀝𑁆𑀞𑀺𑀢𑀸, 𑀢𑀧𑀲𑁆𑀲𑀺𑀦𑀸 𑀚𑁄𑀢𑀺𑀭𑀺𑀯𑀸 𑀯𑀦𑁂 𑀯𑀲𑀁;

𑀲𑀸 𑀥𑀫𑁆𑀫𑀫𑀼𑀓𑁆𑀓𑀫𑁆𑀫 𑀅𑀥𑀫𑁆𑀫𑀫𑀸𑀘𑀭𑀺, 𑀅𑀓𑀺𑀭𑀺𑀬𑀭𑀽𑀧𑁄 𑀧𑀫𑀤𑀸𑀳𑀺 𑀲𑀦𑁆𑀣𑀯𑁄.

𑁯𑁩. 𑀲𑀭𑀻𑀭𑀫𑀚𑁆𑀛𑀫𑁆𑀳𑀺 𑀞𑀺𑀢𑀸𑀢𑀺𑀫𑀜𑁆𑀜𑀳𑀁, 𑀫𑀬𑁆𑀳𑀁 𑀅𑀬𑀦𑁆𑀢𑀺 𑀅𑀲𑀢𑀺𑀁 𑀅𑀲𑀜𑁆𑀜𑀢𑀁;

𑀲𑀸 𑀥𑀫𑁆𑀫𑀫𑀼𑀓𑁆𑀓𑀫𑁆𑀫 𑀅𑀥𑀫𑁆𑀫𑀫𑀸𑀘𑀭𑀺, 𑀅𑀓𑀺𑀭𑀺𑀬𑀭𑀽𑀧𑁄 𑀧𑀫𑀤𑀸𑀳𑀺 𑀲𑀦𑁆𑀣𑀯𑁄.

𑁯𑁪. 𑀲𑀼𑀭𑀓𑁆𑀔𑀺𑀢𑀁 𑀫𑁂𑀢𑀺 𑀓𑀣𑀁 𑀦𑀼 𑀯𑀺𑀲𑁆𑀲𑀲𑁂, 𑀅𑀦𑁂𑀓𑀘𑀺𑀢𑁆𑀢𑀸𑀲𑀼 𑀦 𑀳𑀢𑁆𑀣𑀺 [𑀅𑀦𑁂𑀓𑀘𑀺𑀢𑁆𑀢𑀸 𑀧𑀼𑀦 𑀳𑁂𑀢𑁆𑀣 (𑀓.)] 𑀭𑀓𑁆𑀔𑀡𑀸;

𑀏𑀢𑀸 𑀳𑀺 𑀧𑀸𑀢𑀸𑀮𑀧𑀧𑀸𑀢𑀲𑀦𑁆𑀦𑀺𑀪𑀸, 𑀏𑀢𑁆𑀣𑀧𑁆𑀧𑀫𑀢𑁆𑀢𑁄 𑀩𑁆𑀬𑀲𑀦𑀁 𑀦𑀺𑀕𑀘𑁆𑀙𑀢𑀺.

𑁯𑁫. 𑀢𑀲𑁆𑀫𑀸 𑀳𑀺 𑀢𑁂 𑀲𑀼𑀔𑀺𑀦𑁄 𑀯𑀻𑀢𑀲𑁄𑀓𑀸, 𑀬𑁂 𑀫𑀸𑀢𑀼𑀕𑀸𑀫𑁂𑀳𑀺 𑀘𑀭𑀦𑁆𑀢𑀺 𑀦𑀺𑀲𑁆𑀲𑀝𑀸;

𑀏𑀢𑀁 𑀲𑀺𑀯𑀁 𑀉𑀢𑁆𑀢𑀫𑀫𑀸𑀪𑀺𑀧𑀢𑁆𑀣𑀬𑀁, 𑀦 𑀫𑀸𑀢𑀼𑀕𑀸𑀫𑁂𑀳𑀺 𑀓𑀭𑁂𑀬𑁆𑀬 𑀲𑀦𑁆𑀣𑀯𑀦𑁆𑀢𑀺.

𑀲𑀫𑀼𑀕𑁆𑀕𑀚𑀸𑀢𑀓𑀁 𑀤𑀲𑀫𑀁.