𑁪𑁩𑁩. 𑀮𑁄𑀫𑀲𑀓𑀲𑁆𑀲𑀧𑀚𑀸𑀢𑀓𑀁 (𑁭)

𑁬𑁦. 𑀅𑀲𑁆𑀲 𑀇𑀦𑁆𑀤𑀲𑀫𑁄 𑀭𑀸𑀚, 𑀅𑀘𑁆𑀘𑀦𑁆𑀢𑀁 𑀅𑀚𑀭𑀸𑀫𑀭𑁄;

𑀲𑀘𑁂 𑀢𑁆𑀯𑀁 𑀬𑀜𑁆𑀜𑀁 𑀬𑀸𑀚𑁂𑀬𑁆𑀬, 𑀇𑀲𑀺𑀁 𑀮𑁄𑀫𑀲𑀓𑀲𑁆𑀲𑀧𑀁.

𑁬𑁧. 𑀲𑀲𑀫𑀼𑀤𑁆𑀤𑀧𑀭𑀺𑀬𑀸𑀬𑀁, 𑀫𑀳𑀺𑀁 𑀲𑀸𑀕𑀭𑀓𑀼𑀡𑁆𑀟𑀮𑀁;

𑀦 𑀇𑀘𑁆𑀙𑁂 𑀲𑀳 𑀦𑀺𑀦𑁆𑀤𑀸𑀬, 𑀏𑀯𑀁 𑀲𑁂𑀬𑁆𑀬 [𑀲𑀬𑁆𑀳 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀚𑀸𑀦𑀳𑀺.

𑁬𑁨. 𑀥𑀺𑀭𑀢𑁆𑀣𑀼 𑀢𑀁 𑀬𑀲𑀮𑀸𑀪𑀁, 𑀥𑀦𑀮𑀸𑀪𑀜𑁆𑀘 𑀩𑁆𑀭𑀸𑀳𑁆𑀫𑀡;

𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸.

𑁬𑁩. 𑀅𑀧𑀺 𑀘𑁂 𑀧𑀢𑁆𑀢𑀫𑀸𑀤𑀸𑀬, 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀲𑀸𑀬𑁂𑀯 𑀚𑀻𑀯𑀺𑀓𑀸 𑀲𑁂𑀬𑁆𑀬𑁄, 𑀬𑀸 𑀘𑀸𑀥𑀫𑁆𑀫𑁂𑀦 𑀏𑀲𑀦𑀸.

𑁬𑁪. 𑀅𑀧𑀺 𑀘𑁂 𑀧𑀢𑁆𑀢𑀫𑀸𑀤𑀸𑀬, 𑀅𑀦𑀕𑀸𑀭𑁄 𑀧𑀭𑀺𑀩𑁆𑀩𑀚𑁂;

𑀅𑀜𑁆𑀜𑀁 𑀅𑀳𑀺𑀁𑀲𑀬𑀁 𑀮𑁄𑀓𑁂, 𑀅𑀧𑀺 𑀭𑀚𑁆𑀚𑁂𑀦 𑀢𑀁 𑀯𑀭𑀁.

𑁬𑁫. 𑀩𑀮𑀁 𑀘𑀦𑁆𑀤𑁄 𑀩𑀮𑀁 𑀲𑀼𑀭𑀺𑀬𑁄, 𑀩𑀮𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀩𑀮𑀁 𑀯𑁂𑀮𑀸 𑀲𑀫𑀼𑀤𑁆𑀤𑀲𑁆𑀲, 𑀩𑀮𑀸𑀢𑀺𑀩𑀮𑀫𑀺𑀢𑁆𑀣𑀺𑀬𑁄.

𑁬𑁬. 𑀬𑀣𑀸 𑀉𑀕𑁆𑀕𑀢𑀧𑀁 𑀲𑀦𑁆𑀢𑀁, 𑀇𑀲𑀺𑀁 𑀮𑁄𑀫𑀲𑀓𑀲𑁆𑀲𑀧𑀁;

𑀧𑀺𑀢𑀼 𑀅𑀢𑁆𑀣𑀸 𑀘𑀦𑁆𑀤𑀯𑀢𑀻, 𑀯𑀸𑀚𑀧𑁂𑀬𑁆𑀬𑀁 [𑀯𑀸𑀘𑀧𑁂𑀬𑁆𑀬𑀁 (𑀧𑀻. 𑀓.)] 𑀅𑀬𑀸𑀚𑀬𑀺.

𑁬𑁭. 𑀢𑀁 𑀮𑁄𑀪𑀧𑀓𑀢𑀁 𑀓𑀫𑁆𑀫𑀁, 𑀓𑀝𑀼𑀓𑀁 𑀓𑀸𑀫𑀳𑁂𑀢𑀼𑀓𑀁;

𑀢𑀲𑁆𑀲 𑀫𑀽𑀮𑀁 𑀕𑀯𑁂𑀲𑀺𑀲𑁆𑀲𑀁, 𑀙𑁂𑀘𑁆𑀙𑀁 𑀭𑀸𑀕𑀁 𑀲𑀩𑀦𑁆𑀥𑀦𑀁.

𑁬𑁮. 𑀥𑀺𑀭𑀢𑁆𑀣𑀼 𑀓𑀸𑀫𑁂 𑀲𑀼𑀩𑀳𑀽𑀧𑀺 𑀮𑁄𑀓𑁂, 𑀢𑀧𑁄𑀯 𑀲𑁂𑀬𑁆𑀬𑁄 𑀓𑀸𑀫𑀕𑀼𑀡𑁂𑀳𑀺 𑀭𑀸𑀚;

𑀢𑀧𑁄 𑀓𑀭𑀺𑀲𑁆𑀲𑀸𑀫𑀺 𑀧𑀳𑀸𑀬 𑀓𑀸𑀫𑁂, 𑀢𑀯𑁂𑀯 𑀭𑀝𑁆𑀞𑀁 𑀘𑀦𑁆𑀤𑀯𑀢𑀻 𑀘 𑀳𑁄𑀢𑀽𑀢𑀺.

𑀮𑁄𑀫𑀲𑀓𑀲𑁆𑀲𑀧𑀚𑀸𑀢𑀓𑀁 𑀲𑀢𑁆𑀢𑀫𑀁.