𑁪𑁩𑁪. 𑀘𑀓𑁆𑀓𑀯𑀸𑀓𑀚𑀸𑀢𑀓𑀁 (𑁮)

𑁬𑁯. 𑀓𑀸𑀲𑀸𑀬𑀯𑀢𑁆𑀣𑁂 𑀲𑀓𑀼𑀡𑁂 𑀯𑀤𑀸𑀫𑀺, 𑀤𑀼𑀯𑁂 𑀤𑀼𑀯𑁂 𑀦𑀦𑁆𑀤𑀫𑀦𑁂 [𑀦𑀦𑁆𑀤𑀺𑀫𑀦𑁂 (𑀲𑀻. 𑀧𑀻.)] 𑀘𑀭𑀦𑁆𑀢𑁂;

𑀓𑀁 𑀅𑀡𑁆𑀟𑀚𑀁 𑀅𑀡𑁆𑀟𑀚𑀸 𑀫𑀸𑀦𑀼𑀲𑁂𑀲𑀼, 𑀚𑀸𑀢𑀺𑀁 𑀧𑀲𑀁𑀲𑀦𑁆𑀢𑀺 𑀢𑀤𑀺𑀗𑁆𑀖 𑀩𑁆𑀭𑀽𑀣.

𑁭𑁦. 𑀅𑀫𑁆𑀳𑁂 𑀫𑀦𑀼𑀲𑁆𑀲𑁂𑀲𑀼 𑀫𑀦𑀼𑀲𑁆𑀲𑀳𑀺𑀁𑀲, 𑀅𑀦𑀼𑀩𑁆𑀩𑀢𑁂 [𑀅𑀦𑀼𑀧𑀼𑀩𑁆𑀩𑀓𑁂 (𑀓.)] 𑀘𑀓𑁆𑀓𑀯𑀸𑀓𑁂 𑀯𑀤𑀦𑁆𑀢𑀺;

𑀓𑀮𑁆𑀬𑀸𑀡𑀪𑀸𑀯𑀫𑁆𑀳𑁂 [𑀪𑀸𑀯’𑀫𑁆𑀳 (𑀲𑀻. 𑀧𑀻.)] 𑀤𑀺𑀚𑁂𑀲𑀼 𑀲𑀫𑁆𑀫𑀢𑀸, 𑀅𑀪𑀺𑀭𑀽𑀧𑀸 [𑀅𑀪𑀻𑀢𑀭𑀽𑀧𑀸 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀘𑀭𑀸𑀫 𑀅𑀡𑁆𑀡𑀯𑁂. ( ) [(𑀦 𑀖𑀸𑀲𑀳𑁂𑀢𑀽𑀧𑀺 𑀓𑀭𑁄𑀫 𑀧𑀸𑀧𑀁) (𑀓.)]

𑁭𑁧. 𑀓𑀺𑀁 𑀅𑀡𑁆𑀡𑀯𑁂 𑀓𑀸𑀦𑀺 𑀨𑀮𑀸𑀦𑀺 𑀪𑀼𑀜𑁆𑀚𑁂, 𑀫𑀁𑀲𑀁 𑀓𑀼𑀢𑁄 𑀔𑀸𑀤𑀣 𑀘𑀓𑁆𑀓𑀯𑀸𑀓𑀸;

𑀓𑀺𑀁 𑀪𑁄𑀚𑀦𑀁 𑀪𑀼𑀜𑁆𑀚𑀣 𑀯𑁄 𑀅𑀦𑁄𑀫𑀸 [𑀅𑀪𑀺𑀡𑁆𑀳𑀁 (𑀓.)], 𑀩𑀮𑀜𑁆𑀘 𑀯𑀡𑁆𑀡𑁄 𑀘 𑀅𑀦𑀧𑁆𑀧𑀭𑀽𑀧𑀸 [𑀅𑀦𑀧𑁆𑀧𑀭𑀽𑀧𑁄 (𑀲𑀻. 𑀲𑁆𑀬𑀸. 𑀧𑀻.)].

𑁭𑁨. 𑀦 𑀅𑀡𑁆𑀡𑀯𑁂 𑀲𑀦𑁆𑀢𑀺 𑀨𑀮𑀸𑀦𑀺 𑀥𑀗𑁆𑀓, 𑀫𑀁𑀲𑀁 𑀓𑀼𑀢𑁄 𑀔𑀸𑀤𑀺𑀢𑀼𑀁 𑀘𑀓𑁆𑀓𑀯𑀸𑀓𑁂;

𑀲𑁂𑀯𑀸𑀮𑀪𑀓𑁆𑀔𑀫𑁆𑀳 [𑀪𑀓𑁆𑀔𑀺𑀫𑁆𑀳 (𑀓.)] 𑀅𑀧𑀸𑀡𑀪𑁄𑀚𑀦𑀸 [𑀅𑀯𑀸𑀓𑀪𑁄𑀚𑀦𑀸 (𑀲𑀻. 𑀧𑀻.)], 𑀦 𑀖𑀸𑀲𑀳𑁂𑀢𑀽𑀧𑀺 𑀓𑀭𑁄𑀫 𑀧𑀸𑀧𑀁.

𑁭𑁩. 𑀦 𑀫𑁂 𑀇𑀤𑀁 𑀭𑀼𑀘𑁆𑀘𑀢𑀺 𑀘𑀓𑁆𑀓𑀯𑀸𑀓, 𑀅𑀲𑁆𑀫𑀺𑀁 𑀪𑀯𑁂 𑀪𑁄𑀚𑀦𑀲𑀦𑁆𑀦𑀺𑀓𑀸𑀲𑁄;

𑀅𑀳𑁄𑀲𑀺 𑀧𑀼𑀩𑁆𑀩𑁂 𑀢𑀢𑁄 𑀫𑁂 𑀅𑀜𑁆𑀜𑀣𑀸, 𑀇𑀘𑁆𑀘𑁂𑀯 𑀫𑁂 𑀯𑀺𑀫𑀢𑀺 𑀏𑀢𑁆𑀣 𑀚𑀸𑀢𑀸.

𑁭𑁪. 𑀅𑀳𑀫𑁆𑀧𑀺 𑀫𑀁𑀲𑀸𑀦𑀺 𑀨𑀮𑀸𑀦𑀺 𑀪𑀼𑀜𑁆𑀚𑁂, 𑀅𑀦𑁆𑀦𑀸𑀦𑀺 𑀘 𑀮𑁄𑀡𑀺𑀬𑀢𑁂𑀮𑀺𑀬𑀸𑀦𑀺;

𑀭𑀲𑀁 𑀫𑀦𑀼𑀲𑁆𑀲𑁂𑀲𑀼 𑀮𑀪𑀸𑀫𑀺 𑀪𑁄𑀢𑁆𑀢𑀼𑀁, 𑀲𑀽𑀭𑁄𑀯 𑀲𑀗𑁆𑀕𑀸𑀫𑀫𑀼𑀔𑀁 𑀯𑀺𑀚𑁂𑀢𑁆𑀯𑀸;

𑀦 𑀘 𑀫𑁂 𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀘𑀓𑁆𑀓𑀯𑀸𑀓 𑀬𑀣𑀸 𑀢𑀯.

𑁭𑁫. 𑀅𑀲𑀼𑀤𑁆𑀥𑀪𑀓𑁆𑀔𑁄𑀲𑀺 𑀔𑀡𑀸𑀦𑀼𑀧𑀸𑀢𑀻, 𑀓𑀺𑀘𑁆𑀙𑁂𑀦 𑀢𑁂 𑀮𑀩𑁆𑀪𑀢𑀺 𑀅𑀦𑁆𑀦𑀧𑀸𑀦𑀁;

𑀦 𑀢𑀼𑀲𑁆𑀲𑀲𑀻 𑀭𑀼𑀓𑁆𑀔𑀨𑀮𑁂𑀳𑀺 𑀥𑀗𑁆𑀓, 𑀫𑀁𑀲𑀸𑀦𑀺 𑀯𑀸 𑀬𑀸𑀦𑀺 𑀲𑀼𑀲𑀸𑀦𑀫𑀚𑁆𑀛𑁂.

𑁭𑁬. 𑀬𑁄 𑀲𑀸𑀳𑀲𑁂𑀦 𑀅𑀥𑀺𑀕𑀫𑁆𑀫 𑀪𑁄𑀕𑁂, 𑀧𑀭𑀺𑀪𑀼𑀜𑁆𑀚𑀢𑀺 𑀥𑀗𑁆𑀓 𑀔𑀡𑀸𑀦𑀼𑀧𑀸𑀢𑀻;

𑀢𑀢𑁄 𑀉𑀧𑀓𑁆𑀓𑁄𑀲𑀢𑀺 𑀦𑀁 𑀲𑀪𑀸𑀯𑁄, 𑀉𑀧𑀓𑁆𑀓𑀼𑀝𑁆𑀞𑁄 𑀯𑀡𑁆𑀡𑀩𑀮𑀁 𑀚𑀳𑀸𑀢𑀺.

𑁭𑁭. 𑀅𑀧𑁆𑀧𑀫𑁆𑀧𑀺 𑀘𑁂 𑀦𑀺𑀩𑁆𑀩𑀼𑀢𑀺𑀁 𑀪𑀼𑀜𑁆𑀚𑀢𑀻 𑀬𑀤𑀺, 𑀅𑀲𑀸𑀳𑀲𑁂𑀦 𑀅𑀧𑀭𑀽𑀧𑀖𑀸𑀢𑀻 [𑀅𑀲𑀸𑀳𑀲𑁂𑀦𑀸𑀦𑀼𑀧𑀖𑀸𑀢𑀺𑀦𑁄 (𑀓.)];

𑀩𑀮𑀜𑁆𑀘 𑀯𑀡𑁆𑀡𑁄 𑀘 𑀢𑀤𑀲𑁆𑀲 𑀳𑁄𑀢𑀺, 𑀦 𑀳𑀺 𑀲𑀩𑁆𑀩𑁄 𑀆𑀳𑀸𑀭𑀫𑀬𑁂𑀦 𑀯𑀡𑁆𑀡𑁄𑀢𑀺.

𑀘𑀓𑁆𑀓𑀯𑀸𑀓𑀚𑀸𑀢𑀓𑀁 𑀅𑀝𑁆𑀞𑀫𑀁.