𑁪𑁨𑁬. 𑀤𑀻𑀧𑀺𑀚𑀸𑀢𑀓𑀁 (𑁧𑁦)

𑁮𑁮. 𑀔𑀫𑀦𑀻𑀬𑀁 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀫𑀸𑀢𑀼𑀮 𑀢𑁂 𑀲𑀼𑀔𑀁;

𑀲𑀼𑀔𑀁 𑀢𑁂 𑀅𑀫𑁆𑀫𑀸 𑀅𑀯𑀘, 𑀲𑀼𑀔𑀓𑀸𑀫𑀸𑀯 [𑀲𑀼𑀔𑀓𑀸𑀫𑀸 𑀳𑀺 (𑀲𑀻. 𑀲𑁆𑀬𑀸. 𑀧𑀻.)] 𑀢𑁂 𑀫𑀬𑀁.

𑁮𑁯. 𑀦𑀗𑁆𑀕𑀼𑀝𑁆𑀞𑀁 𑀫𑁂 𑀅𑀯𑀓𑁆𑀓𑀫𑁆𑀫 [𑀅𑀧𑀓𑁆𑀓𑀫𑁆𑀫 (𑀓.)], 𑀳𑁂𑀞𑀬𑀺𑀢𑁆𑀯𑀸𑀦 [𑀧𑁄𑀣𑀬𑀺𑀢𑁆𑀯𑀸𑀦 (𑀓.)] 𑀏𑀴𑀺𑀓𑁂 [𑀏𑀴𑀓𑀺 (𑀲𑁆𑀬𑀸.), 𑀏𑀴𑀺𑀓𑀺 (𑀧𑀻.)];

𑀲𑀸𑀚𑁆𑀚 𑀫𑀸𑀢𑀼𑀮𑀯𑀸𑀤𑁂𑀦, 𑀫𑀼𑀜𑁆𑀘𑀺𑀢𑀩𑁆𑀩𑀸 𑀦𑀼 𑀫𑀜𑁆𑀜𑀲𑀺.

𑁯𑁦. 𑀧𑀼𑀭𑀢𑁆𑀣𑀸𑀫𑀼𑀔𑁄 𑀦𑀺𑀲𑀺𑀦𑁆𑀦𑁄𑀲𑀺, 𑀅𑀳𑀁 𑀢𑁂 𑀫𑀼𑀔𑀫𑀸𑀕𑀢𑀸;

𑀧𑀘𑁆𑀙𑀢𑁄 𑀢𑀼𑀬𑁆𑀳𑀁 𑀦𑀗𑁆𑀕𑀼𑀝𑁆𑀞𑀁, 𑀓𑀣𑀁 𑀔𑁆𑀯𑀸𑀳𑀁 𑀅𑀯𑀓𑁆𑀓𑀫𑀺𑀁 [𑀅𑀧𑀓𑁆𑀓𑀫𑀺𑀁 (𑀓.)].

𑁯𑁧. 𑀬𑀸𑀯𑀢𑀸 𑀘𑀢𑀼𑀭𑁄 𑀤𑀻𑀧𑀸, 𑀲𑀲𑀫𑀼𑀤𑁆𑀤𑀸 𑀲𑀧𑀩𑁆𑀩𑀢𑀸;

𑀢𑀸𑀯𑀢𑀸 𑀫𑀬𑁆𑀳𑀁 𑀦𑀗𑁆𑀕𑀼𑀝𑁆𑀞𑀁, 𑀓𑀣𑀁 𑀔𑁄 𑀢𑁆𑀯𑀁 𑀯𑀺𑀯𑀚𑁆𑀚𑀬𑀺.

𑁯𑁨. 𑀧𑀼𑀩𑁆𑀩𑁂𑀯 𑀫𑁂𑀢𑀫𑀓𑁆𑀔𑀺𑀁𑀲𑀼 [𑀫𑁂𑀢𑀁 𑀅𑀓𑁆𑀔𑀁𑀲𑀼 (𑀲𑀻. 𑀧𑀻.)], 𑀫𑀸𑀢𑀸 𑀧𑀺𑀢𑀸 𑀘 𑀪𑀸𑀢𑀭𑁄;

𑀤𑀻𑀖𑀁 𑀤𑀼𑀝𑁆𑀞𑀲𑁆𑀲 𑀦𑀗𑁆𑀕𑀼𑀝𑁆𑀞𑀁, 𑀲𑀸𑀫𑁆𑀳𑀺 𑀯𑁂𑀳𑀸𑀬𑀲𑀸𑀕𑀢𑀸.

𑁯𑁩. 𑀢𑀜𑁆𑀘 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀺𑀁, 𑀅𑀦𑁆𑀢𑀮𑀺𑀓𑁆𑀔𑀲𑁆𑀫𑀺 𑀏𑀴𑀺𑀓𑁂;

𑀫𑀺𑀕𑀲𑀗𑁆𑀖𑁄 𑀧𑀮𑀸𑀬𑀺𑀢𑁆𑀣, 𑀪𑀓𑁆𑀔𑁄 𑀫𑁂 𑀦𑀸𑀲𑀺𑀢𑁄 𑀢𑀬𑀸.

𑁯𑁪. 𑀇𑀘𑁆𑀘𑁂𑀯𑀁 𑀯𑀺𑀮𑀧𑀦𑁆𑀢𑀺𑀬𑀸, 𑀏𑀴𑀓𑀺𑀬𑀸 𑀭𑀼𑀳𑀕𑁆𑀖𑀲𑁄;

𑀕𑀮𑀓𑀁 𑀅𑀦𑁆𑀯𑀸𑀯𑀫𑀤𑁆𑀤𑀺, 𑀦𑀢𑁆𑀣𑀺 𑀤𑀼𑀝𑁆𑀞𑁂 𑀲𑀼𑀪𑀸𑀲𑀺𑀢𑀁.

𑁯𑁫. 𑀦𑁂𑀯 𑀤𑀼𑀝𑁆𑀞𑁂 𑀦𑀬𑁄 𑀅𑀢𑁆𑀣𑀺, 𑀦 𑀥𑀫𑁆𑀫𑁄 𑀦 𑀲𑀼𑀪𑀸𑀲𑀺𑀢𑀁;

𑀦𑀺𑀓𑁆𑀓𑀫𑀁 𑀤𑀼𑀝𑁆𑀞𑁂 𑀬𑀼𑀜𑁆𑀚𑁂𑀣, 𑀲𑁄 𑀘 𑀲𑀩𑁆𑀪𑀺𑀁 𑀦 𑀭𑀜𑁆𑀚𑀢𑀻𑀢𑀺.

𑀤𑀻𑀧𑀺𑀚𑀸𑀢𑀓𑀁 𑀤𑀲𑀫𑀁.

𑀅𑀝𑁆𑀞𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.