𑁮. 𑀅𑀝𑁆𑀞𑀓𑀦𑀺𑀧𑀸𑀢𑁄

𑁪𑁧𑁭. 𑀓𑀘𑁆𑀘𑀸𑀦𑀺𑀚𑀸𑀢𑀓𑀁 (𑁧)

𑁧. 𑀑𑀤𑀸𑀢𑀯𑀢𑁆𑀣𑀸 𑀲𑀼𑀘𑀺 𑀅𑀮𑁆𑀮𑀓𑁂𑀲𑀸, 𑀓𑀘𑁆𑀘𑀸𑀦𑀺 𑀓𑀺𑀁 𑀓𑀼𑀫𑁆𑀪𑀺𑀫𑀥𑀺𑀲𑁆𑀲𑀬𑀺𑀢𑁆𑀯𑀸 [𑀓𑀼𑀫𑁆𑀪𑀺𑀫𑀧𑀲𑁆𑀲𑀬𑀺𑀢𑁆𑀯𑀸 (𑀧𑀻.)];

𑀧𑀺𑀝𑁆𑀞𑀸 𑀢𑀺𑀮𑀸 𑀥𑁄𑀯𑀲𑀺 𑀢𑀡𑁆𑀟𑀼𑀮𑀸𑀦𑀺, 𑀢𑀺𑀮𑁄𑀤𑀦𑁄 𑀳𑁂𑀳𑀺𑀢𑀺 𑀓𑀺𑀲𑁆𑀲 𑀳𑁂𑀢𑀼.

𑁨. 𑀦 𑀔𑁄 𑀅𑀬𑀁 𑀩𑁆𑀭𑀸𑀳𑁆𑀫𑀡 𑀪𑁄𑀚𑀦𑀢𑁆𑀣𑀸 [𑀪𑁄𑀚𑀦𑀢𑁆𑀣𑀁 (𑀲𑁆𑀬𑀸.)], 𑀢𑀺𑀮𑁄𑀤𑀦𑁄 𑀳𑁂𑀳𑀺𑀢𑀺 𑀲𑀸𑀥𑀼𑀧𑀓𑁆𑀓𑁄;

𑀥𑀫𑁆𑀫𑁄 𑀫𑀢𑁄 𑀢𑀲𑁆𑀲 𑀧𑀳𑀼𑀢𑁆𑀢𑀫𑀚𑁆𑀚 [𑀧𑀳𑀽𑀦𑀫𑀚𑁆𑀚 (𑀲𑁆𑀬𑀸.), 𑀧𑀳𑀽𑀢𑀫𑀚𑁆𑀚 (𑀲𑀻.), 𑀩𑀳𑀽𑀢𑀫𑀚𑁆𑀚𑀸 (𑀧𑀻.)], 𑀅𑀳𑀁 𑀓𑀭𑀺𑀲𑁆𑀲𑀸𑀫𑀺 𑀲𑀼𑀲𑀸𑀦𑀫𑀚𑁆𑀛𑁂.

𑁩. 𑀅𑀦𑀼𑀯𑀺𑀘𑁆𑀘 𑀓𑀘𑁆𑀘𑀸𑀦𑀺 𑀓𑀭𑁄𑀳𑀺 𑀓𑀺𑀘𑁆𑀘𑀁, 𑀥𑀫𑁆𑀫𑁄 𑀫𑀢𑁄 𑀓𑁄 𑀦𑀼 𑀢𑀯𑁂𑀯 [𑀢𑀯𑁂𑀢 (𑀲𑀻. 𑀲𑁆𑀬𑀸. 𑀧𑀻.)] 𑀲𑀁𑀲𑀺;

𑀲𑀳𑀲𑁆𑀲𑀦𑁂𑀢𑁆𑀢𑁄 𑀅𑀢𑀼𑀮𑀸𑀦𑀼𑀪𑀸𑀯𑁄, 𑀦 𑀫𑀺𑀬𑁆𑀬𑀢𑀻 𑀥𑀫𑁆𑀫𑀯𑀭𑁄 𑀓𑀤𑀸𑀘𑀺.

𑁪. 𑀤𑀴𑁆𑀳𑀧𑁆𑀧𑀫𑀸𑀡𑀁 𑀫𑀫 𑀏𑀢𑁆𑀣 𑀩𑁆𑀭𑀳𑁆𑀫𑁂, 𑀥𑀫𑁆𑀫𑁄 𑀫𑀢𑁄 𑀦𑀢𑁆𑀣𑀺 𑀫𑀫𑁂𑀢𑁆𑀣 𑀓𑀗𑁆𑀔𑀸;

𑀬𑁂 𑀬𑁂𑀯 𑀤𑀸𑀦𑀺 𑀧𑀸𑀧𑀸 𑀪𑀯𑀦𑁆𑀢𑀺, 𑀢𑁂 𑀢𑁂𑀯 𑀤𑀸𑀦𑀺 𑀲𑀼𑀔𑀺𑀢𑀸 𑀪𑀯𑀦𑁆𑀢𑀺.

𑁫. 𑀲𑀼𑀡𑀺𑀲𑀸 𑀳𑀺 𑀫𑀬𑁆𑀳𑀁 𑀯𑀜𑁆𑀛𑀸 𑀅𑀳𑁄𑀲𑀺, 𑀲𑀸 𑀫𑀁 𑀯𑀥𑀺𑀢𑁆𑀯𑀸𑀦 𑀯𑀺𑀚𑀸𑀬𑀺 𑀧𑀼𑀢𑁆𑀢𑀁;

𑀲𑀸 𑀤𑀸𑀦𑀺 𑀲𑀩𑁆𑀩𑀲𑁆𑀲 𑀓𑀼𑀮𑀲𑁆𑀲 𑀇𑀲𑁆𑀲𑀭𑀸, 𑀅𑀳𑀁 𑀧𑀦𑀫𑁆𑀳𑀺 [𑀯𑀲𑀸𑀫𑀺 (𑀲𑁆𑀬𑀸.)] 𑀅𑀧𑀯𑀺𑀤𑁆𑀥𑀸 𑀏𑀓𑀺𑀓𑀸.

𑁬. 𑀚𑀻𑀯𑀸𑀫𑀺 𑀯𑁄𑀳𑀁 𑀦 𑀫𑀢𑁄𑀳𑀫𑀲𑁆𑀫𑀺 [𑀦𑀸𑀳𑀁 𑀫𑀢𑁄𑀲𑁆𑀫𑀺 (𑀲𑀻. 𑀧𑀻.)], 𑀢𑀯𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑁄𑀲𑁆𑀫𑀺;

𑀬𑀸 𑀢𑀁 𑀯𑀥𑀺𑀢𑁆𑀯𑀸𑀦 𑀯𑀺𑀚𑀸𑀬𑀺 𑀧𑀼𑀢𑁆𑀢𑀁, 𑀲𑀳𑀸𑀯 𑀧𑀼𑀢𑁆𑀢𑁂𑀦 𑀓𑀭𑁄𑀫𑀺 𑀪𑀲𑁆𑀫𑀁.

𑁭. 𑀏𑀯𑀜𑁆𑀘 [𑀏𑀢𑀜𑁆𑀘 (𑀲𑀻. 𑀧𑀻.)] 𑀢𑁂 𑀭𑀼𑀘𑁆𑀘𑀢𑀺 𑀤𑁂𑀯𑀭𑀸𑀚, 𑀫𑀫𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑁄𑀲𑀺;

𑀅𑀳𑀜𑁆𑀘 𑀧𑀼𑀢𑁆𑀢𑁄 𑀲𑀼𑀡𑀺𑀲𑀸 𑀘 𑀦𑀢𑁆𑀢𑀸, 𑀲𑀫𑁆𑀫𑁄𑀤𑀫𑀸𑀦𑀸 𑀖𑀭𑀫𑀸𑀯𑀲𑁂𑀫.

𑁮. 𑀏𑀯𑀜𑁆𑀘 𑀢𑁂 𑀭𑀼𑀘𑁆𑀘𑀢𑀺 𑀓𑀸𑀢𑀺𑀬𑀸𑀦𑀺, 𑀳𑀢𑀸𑀧𑀺 𑀲𑀦𑁆𑀢𑀸 𑀦 𑀚𑀳𑀸𑀲𑀺 𑀥𑀫𑁆𑀫𑀁;

𑀢𑀼𑀯𑀜𑁆𑀘 [𑀢𑁆𑀯𑀜𑁆𑀘 (𑀧𑀻. 𑀓.)] 𑀧𑀼𑀢𑁆𑀢𑁄 𑀲𑀼𑀡𑀺𑀲𑀸 𑀘 𑀦𑀢𑁆𑀢𑀸, 𑀲𑀫𑁆𑀫𑁄𑀤𑀫𑀸𑀦𑀸 𑀖𑀭𑀫𑀸𑀯𑀲𑁂𑀣.

𑁯. 𑀲𑀸 𑀓𑀸𑀢𑀺𑀬𑀸𑀦𑀻 𑀲𑀼𑀡𑀺𑀲𑀸𑀬 𑀲𑀤𑁆𑀥𑀺𑀁, 𑀲𑀫𑁆𑀫𑁄𑀤𑀫𑀸𑀦𑀸 𑀖𑀭𑀫𑀸𑀯𑀲𑀺𑀢𑁆𑀣;

𑀧𑀼𑀢𑁆𑀢𑁄 𑀘 𑀦𑀢𑁆𑀢𑀸 𑀘 𑀉𑀧𑀝𑁆𑀞𑀳𑀺𑀁𑀲𑀼, 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀅𑀥𑀺𑀕𑁆𑀕𑀳𑀻𑀢𑀸𑀢𑀺.

𑀓𑀘𑁆𑀘𑀸𑀦𑀺𑀚𑀸𑀢𑀓𑀁 𑀧𑀞𑀫𑀁.

𑁪𑁧𑁮. 𑀅𑀝𑁆𑀞𑀲𑀤𑁆𑀤𑀚𑀸𑀢𑀓𑀁 (𑁨)

𑁧𑁦. 𑀇𑀤𑀁 𑀧𑀼𑀭𑁂 𑀦𑀺𑀦𑁆𑀦𑀫𑀸𑀳𑀼, 𑀩𑀳𑀼𑀫𑀘𑁆𑀙𑀁 𑀫𑀳𑁄𑀤𑀓𑀁;

𑀆𑀯𑀸𑀲𑁄 𑀩𑀓𑀭𑀸𑀚𑀲𑁆𑀲, 𑀧𑁂𑀢𑁆𑀢𑀺𑀓𑀁 𑀪𑀯𑀦𑀁 𑀫𑀫;

𑀢𑁆𑀬𑀚𑁆𑀚 𑀪𑁂𑀓𑁂𑀦 [𑀪𑀺𑀗𑁆𑀕𑁂𑀦 (𑀓.)] 𑀬𑀸𑀧𑁂𑀫, 𑀑𑀓𑀁 𑀦 𑀯𑀚𑀳𑀸𑀫𑀲𑁂 [𑀑𑀓𑀦𑁆𑀢𑀁 𑀦 𑀚𑀳𑀸𑀫𑀲𑁂 (𑀓.)].

𑁧𑁧. 𑀓𑁄 𑀤𑀼𑀢𑀺𑀬𑀁 𑀅𑀲𑀻𑀮𑀺𑀲𑁆𑀲, 𑀩𑀦𑁆𑀥𑀭𑀲𑁆𑀲𑀓𑁆𑀔𑀺 𑀪𑁂𑀘𑁆𑀙𑀢𑀺 [𑀪𑁂𑀚𑁆𑀚𑀢𑀺 (𑀲𑀻. 𑀲𑁆𑀬𑀸. 𑀧𑀻.), 𑀪𑀺𑀦𑁆𑀤𑀢𑀺 (𑀓.)];

𑀓𑁄 𑀫𑁂 𑀧𑀼𑀢𑁆𑀢𑁂 𑀓𑀼𑀮𑀸𑀯𑀓𑀁, 𑀫𑀜𑁆𑀘 𑀲𑁄𑀢𑁆𑀣𑀺𑀁 𑀓𑀭𑀺𑀲𑁆𑀲𑀢𑀺.

𑁧𑁨. 𑀲𑀩𑁆𑀩𑀸 𑀧𑀭𑀺𑀓𑁆𑀔𑀬𑀸 𑀨𑁂𑀕𑁆𑀕𑀼, 𑀬𑀸𑀯 𑀢𑀲𑁆𑀲𑀸 𑀕𑀢𑀻 𑀅𑀳𑀼;

𑀔𑀻𑀡𑀪𑀓𑁆𑀔𑁄 𑀫𑀳𑀸𑀭𑀸𑀚, 𑀲𑀸𑀭𑁂 𑀦 𑀭𑀫𑀢𑀻 𑀖𑀼𑀡𑁄.

𑁧𑁩. 𑀲𑀸 𑀦𑀽𑀦𑀸𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀫𑀼𑀢𑁆𑀢𑀸 𑀦𑀺𑀯𑁂𑀲𑀦𑀸;

𑀅𑀢𑁆𑀢𑀸𑀦𑀁 𑀭𑀫𑀬𑀺𑀲𑁆𑀲𑀸𑀫𑀺, 𑀤𑀼𑀫𑀲𑀸𑀔𑀦𑀺𑀓𑁂𑀢𑀺𑀦𑀻.

𑁧𑁪. 𑀲𑁄 𑀦𑀽𑀦𑀸𑀳𑀁 𑀇𑀢𑁄 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀫𑀼𑀢𑁆𑀢𑁄 𑀦𑀺𑀯𑁂𑀲𑀦𑀸;

𑀅𑀕𑁆𑀕𑁄𑀤𑀓𑀸𑀦𑀺 𑀧𑀺𑀲𑁆𑀲𑀸𑀫𑀺, 𑀬𑀽𑀣𑀲𑁆𑀲 𑀧𑀼𑀭𑀢𑁄 𑀯𑀚𑀁.

𑁧𑁫. 𑀢𑀁 𑀫𑀁 𑀓𑀸𑀫𑁂𑀳𑀺 𑀲𑀫𑁆𑀫𑀢𑁆𑀢𑀁, 𑀭𑀢𑁆𑀢𑀁 𑀓𑀸𑀫𑁂𑀲𑀼 𑀫𑀼𑀘𑁆𑀙𑀺𑀢𑀁;

𑀆𑀦𑀬𑀻 𑀪𑀭𑀢𑁄 [𑀯𑀦𑀢𑁄 (𑀓.)] 𑀮𑀼𑀤𑁆𑀤𑁄, 𑀩𑀸𑀳𑀺𑀓𑁄 𑀪𑀤𑁆𑀤𑀫𑀢𑁆𑀣𑀼 𑀢𑁂.

𑁧𑁬. 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀁, 𑀢𑀼𑀗𑁆𑀕𑁂 𑀉𑀧𑀭𑀺𑀧𑀩𑁆𑀩𑀢𑁂;

𑀲𑀸 𑀫𑀁 𑀲𑀡𑁆𑀳𑁂𑀦 𑀫𑀼𑀤𑀼𑀦𑀸, 𑀫𑀸 𑀧𑀸𑀤𑀁 𑀔𑀮𑀺 [𑀔𑀡𑀺 (𑀲𑀻. 𑀲𑁆𑀬𑀸. 𑀧𑀻.)] 𑀬𑀲𑁆𑀫𑀦𑀺.

𑁧𑁭. 𑀅𑀲𑀁𑀲𑀬𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀦 𑀕𑀩𑁆𑀪𑀲𑁂𑀬𑁆𑀬𑀁 𑀧𑀼𑀦𑀭𑀸𑀯𑀚𑀺𑀲𑁆𑀲𑀁;

𑀅𑀬𑀫𑀦𑁆𑀢𑀺𑀫𑀸 𑀧𑀘𑁆𑀙𑀺𑀫𑀸 𑀕𑀩𑁆𑀪𑀲𑁂𑀬𑁆𑀬𑀸 [𑀅𑀬𑀁 𑀳𑀺 𑀫𑁂 𑀅𑀦𑁆𑀢𑀺𑀫𑀸 𑀕𑀩𑁆𑀪𑀲𑁂𑀬𑁆𑀬𑀸 (𑀲𑀻. 𑀧𑀻.)], 𑀔𑀻𑀡𑁄 𑀫𑁂 𑀲𑀁𑀲𑀸𑀭𑁄 𑀧𑀼𑀦𑀩𑁆𑀪𑀯𑀸𑀬𑀸𑀢𑀺.

𑀅𑀝𑁆𑀞𑀲𑀤𑁆𑀤𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁪𑁧𑁯. 𑀲𑀼𑀮𑀲𑀸𑀚𑀸𑀢𑀓𑀁 (𑁩)

𑁧𑁮. 𑀇𑀤𑀁 𑀲𑀼𑀯𑀡𑁆𑀡𑀓𑀸𑀬𑀽𑀭𑀁, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽;

𑀲𑀩𑁆𑀩𑀁 𑀳𑀭𑀲𑁆𑀲𑀼 𑀪𑀤𑁆𑀤𑀦𑁆𑀢𑁂, 𑀫𑀜𑁆𑀘 𑀤𑀸𑀲𑀻𑀢𑀺 𑀲𑀸𑀯𑀬.

𑁧𑁯. 𑀑𑀭𑁄𑀧𑀬𑀲𑁆𑀲𑀼 𑀓𑀮𑁆𑀬𑀸𑀡𑀺, 𑀫𑀸 𑀩𑀸𑀴𑁆𑀳𑀁 [𑀩𑀳𑀼𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀭𑀺𑀤𑁂𑀯𑀲𑀺;

𑀦 𑀘𑀸𑀳𑀁 𑀅𑀪𑀺𑀚𑀸𑀦𑀸𑀫𑀺, 𑀅𑀳𑀦𑁆𑀢𑁆𑀯𑀸 𑀥𑀦𑀫𑀸𑀪𑀢𑀁.

𑁨𑁦. 𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑀸𑀲𑁆𑀫𑀺 𑀯𑀺𑀜𑁆𑀜𑀼𑀢𑀁;

𑀦 𑀘𑀸𑀳𑀁 𑀅𑀪𑀺𑀚𑀸𑀦𑀸𑀫𑀺, 𑀅𑀜𑁆𑀜𑀁 𑀧𑀺𑀬𑀢𑀭𑀁 𑀢𑀬𑀸.

𑁨𑁧. 𑀏𑀳𑀺 𑀢𑀁 𑀉𑀧𑀕𑀽𑀳𑀺𑀲𑁆𑀲𑀁 [𑀉𑀧𑀕𑀼𑀬𑁆𑀳𑀺𑀲𑁆𑀲𑀁 (𑀓.)], 𑀓𑀭𑀺𑀲𑁆𑀲𑀜𑁆𑀘 𑀧𑀤𑀓𑁆𑀔𑀺𑀡𑀁;

𑀦 𑀳𑀺 𑀤𑀸𑀦𑀺 𑀧𑀼𑀦 𑀅𑀢𑁆𑀣𑀺, 𑀫𑀫 𑀢𑀼𑀬𑁆𑀳𑀜𑁆𑀘 𑀲𑀗𑁆𑀕𑀫𑁄.

𑁨𑁨. 𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀓𑁆𑀔𑀡𑀸.

𑁨𑁩. 𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀮𑀳𑀼𑀁 𑀅𑀢𑁆𑀣𑀁 𑀯𑀺𑀘𑀺𑀦𑁆𑀢𑀺𑀓𑀸 [𑀮𑀳𑀼𑀫𑀢𑁆𑀣𑀯𑀺𑀘𑀺𑀦𑁆𑀢𑀺𑀓𑀸 (𑀲𑀻. 𑀧𑀻.)].

𑁨𑁪. 𑀮𑀳𑀼𑀜𑁆𑀘 𑀯𑀢 𑀔𑀺𑀧𑁆𑀧𑀜𑁆𑀘, 𑀦𑀺𑀓𑀝𑁆𑀞𑁂 𑀲𑀫𑀘𑁂𑀢𑀬𑀺;

𑀫𑀺𑀕𑀁 𑀧𑀼𑀡𑁆𑀡𑀸𑀬𑀢𑁂𑀦𑁂𑀯 [𑀧𑀼𑀡𑁆𑀡𑀸𑀬𑀢𑀦𑁂𑀯 (𑀲𑁆𑀬𑀸.)], 𑀲𑀼𑀮𑀲𑀸 𑀲𑀢𑁆𑀢𑀼𑀓𑀁 𑀯𑀥𑀺.

𑁨𑁫. 𑀬𑁄𑀥 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀦 𑀔𑀺𑀧𑁆𑀧𑀫𑀦𑀼𑀩𑀼𑀚𑁆𑀛𑀢𑀺;

𑀲𑁄 𑀳𑀜𑁆𑀜𑀢𑀺 𑀫𑀦𑁆𑀤𑀫𑀢𑀺, 𑀘𑁄𑀭𑁄𑀯 𑀕𑀺𑀭𑀺𑀕𑀩𑁆𑀪𑀭𑁂.

𑁨𑁬. 𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀩𑁄𑀥𑀢𑀺;

𑀫𑀼𑀘𑁆𑀘𑀢𑁂 𑀲𑀢𑁆𑀢𑀼𑀲𑀫𑁆𑀩𑀸𑀥𑀸, 𑀲𑀼𑀮𑀲𑀸 𑀲𑀢𑁆𑀢𑀼𑀓𑀸𑀫𑀺𑀯𑀸𑀢𑀺.

𑀲𑀼𑀮𑀲𑀸𑀚𑀸𑀢𑀓𑀁 𑀢𑀢𑀺𑀬𑀁.

𑁪𑁨𑁦. 𑀲𑀼𑀫𑀗𑁆𑀕𑀮𑀚𑀸𑀢𑀓𑀁 (𑁪)

𑁨𑁭. 𑀪𑀼𑀲𑀫𑁆𑀳𑀺 [𑀪𑀼𑀲𑀫𑁆𑀧𑀺 (𑀓.), 𑀪𑀼𑀲𑀁 𑀳𑀺 (𑀲𑀻. 𑀦𑀺𑀬𑁆𑀬)] 𑀓𑀼𑀤𑁆𑀥𑁄𑀢𑀺 𑀅𑀯𑁂𑀓𑁆𑀔𑀺𑀬𑀸𑀦, 𑀦 𑀢𑀸𑀯 𑀤𑀡𑁆𑀟𑀁 𑀧𑀡𑀬𑁂𑀬𑁆𑀬 𑀇𑀲𑁆𑀲𑀭𑁄;

𑀅𑀝𑁆𑀞𑀸𑀦𑀲𑁄 𑀅𑀧𑁆𑀧𑀢𑀺𑀭𑀽𑀧𑀫𑀢𑁆𑀢𑀦𑁄, 𑀧𑀭𑀲𑁆𑀲 𑀤𑀼𑀓𑁆𑀔𑀸𑀦𑀺 𑀪𑀼𑀲𑀁 𑀉𑀤𑀻𑀭𑀬𑁂.

𑁨𑁮. 𑀬𑀢𑁄 𑀘 𑀚𑀸𑀦𑁂𑀬𑁆𑀬 𑀧𑀲𑀸𑀤𑀫𑀢𑁆𑀢𑀦𑁄, 𑀅𑀢𑁆𑀣𑀁 𑀦𑀺𑀬𑀼𑀜𑁆𑀚𑁂𑀬𑁆𑀬 𑀧𑀭𑀲𑁆𑀲 𑀤𑀼𑀓𑁆𑀓𑀝𑀁;

𑀢𑀤𑀸𑀬𑀫𑀢𑁆𑀣𑁄𑀢𑀺 𑀲𑀬𑀁 𑀅𑀯𑁂𑀓𑁆𑀔𑀺𑀬, 𑀅𑀣𑀲𑁆𑀲 𑀤𑀡𑁆𑀟𑀁 𑀲𑀤𑀺𑀲𑀁 𑀦𑀺𑀯𑁂𑀲𑀬𑁂.

𑁨𑁯. 𑀦 𑀘𑀸𑀧𑀺 𑀛𑀸𑀧𑁂𑀢𑀺 𑀧𑀭𑀁 𑀦 𑀅𑀢𑁆𑀢𑀦𑀁, 𑀅𑀫𑀼𑀘𑁆𑀙𑀺𑀢𑁄 𑀬𑁄 𑀦𑀬𑀢𑁂 𑀦𑀬𑀸𑀦𑀬𑀁;

𑀬𑁄 𑀤𑀡𑁆𑀟𑀥𑀸𑀭𑁄 𑀪𑀯𑀢𑀻𑀥 𑀇𑀲𑁆𑀲𑀭𑁄, 𑀲 𑀯𑀡𑁆𑀡𑀕𑀼𑀢𑁆𑀢𑁄 𑀲𑀺𑀭𑀺𑀬𑀸 𑀦 𑀥𑀁𑀲𑀢𑀺.

𑁩𑁦. 𑀬𑁂 𑀔𑀢𑁆𑀢𑀺𑀬𑀸 𑀲𑁂 𑀅𑀦𑀺𑀲𑀫𑁆𑀫𑀓𑀸𑀭𑀺𑀦𑁄, 𑀧𑀡𑁂𑀦𑁆𑀢𑀺 𑀤𑀡𑁆𑀟𑀁 𑀲𑀳𑀲𑀸 𑀧𑀫𑀼𑀘𑁆𑀙𑀺𑀢𑀸;

𑀅𑀯𑀡𑁆𑀡𑀲𑀁𑀬𑀼𑀢𑀸 [𑀬𑀼𑀢𑁆𑀢𑀸𑀯 (𑀓.)] 𑀚𑀳𑀦𑁆𑀢𑀺 𑀚𑀻𑀯𑀺𑀢𑀁, 𑀇𑀢𑁄 𑀯𑀺𑀫𑀼𑀢𑁆𑀢𑀸𑀧𑀺 𑀘 𑀬𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁩𑁧. 𑀥𑀫𑁆𑀫𑁂 𑀘 𑀬𑁂 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂 𑀭𑀢𑀸, 𑀅𑀦𑀼𑀢𑁆𑀢𑀭𑀸 𑀢𑁂 𑀯𑀘𑀲𑀸 𑀫𑀦𑀲𑀸 𑀓𑀫𑁆𑀫𑀼𑀦𑀸 𑀘;

𑀢𑁂 𑀲𑀦𑁆𑀢𑀺𑀲𑁄𑀭𑀘𑁆𑀘𑀲𑀫𑀸𑀥𑀺𑀲𑀡𑁆𑀞𑀺𑀢𑀸, 𑀯𑀚𑀦𑁆𑀢𑀺 𑀮𑁄𑀓𑀁 𑀤𑀼𑀪𑀬𑀁 𑀢𑀣𑀸𑀯𑀺𑀥𑀸.

𑁩𑁨. 𑀭𑀸𑀚𑀸𑀳𑀫𑀲𑁆𑀫𑀺 𑀦𑀭𑀧𑀫𑀤𑀸𑀦𑀫𑀺𑀲𑁆𑀲𑀭𑁄, 𑀲𑀘𑁂𑀧𑀺 𑀓𑀼𑀚𑁆𑀛𑀸𑀫𑀺 𑀞𑀧𑁂𑀫𑀺 𑀅𑀢𑁆𑀢𑀦𑀁;

𑀦𑀺𑀲𑁂𑀥𑀬𑀦𑁆𑀢𑁄 𑀚𑀦𑀢𑀁 𑀢𑀣𑀸𑀯𑀺𑀥𑀁, 𑀧𑀡𑁂𑀫𑀺 𑀤𑀡𑁆𑀟𑀁 𑀅𑀦𑀼𑀓𑀫𑁆𑀧 𑀬𑁄𑀦𑀺𑀲𑁄.

𑁩𑁩. 𑀲𑀺𑀭𑀻 𑀘 𑀮𑀓𑁆𑀔𑀻 𑀘 𑀢𑀯𑁂𑀯 𑀔𑀢𑁆𑀢𑀺𑀬, 𑀚𑀦𑀸𑀥𑀺𑀧 𑀫𑀸 𑀯𑀺𑀚𑀳𑀺 𑀓𑀼𑀤𑀸𑀘𑀦𑀁;

𑀅𑀓𑁆𑀓𑁄𑀥𑀦𑁄 𑀦𑀺𑀘𑁆𑀘𑀧𑀲𑀦𑁆𑀦𑀘𑀺𑀢𑁆𑀢𑁄, 𑀅𑀦𑀻𑀖𑁄 𑀢𑀼𑀯𑀁 𑀯𑀲𑁆𑀲𑀲𑀢𑀸𑀦𑀺 𑀧𑀸𑀮𑀬.

𑁩𑁪. 𑀕𑀼𑀡𑁂𑀳𑀺 𑀏𑀢𑁂𑀳𑀺 𑀉𑀧𑁂𑀢 𑀔𑀢𑁆𑀢𑀺𑀬, 𑀞𑀺𑀢𑀫𑀭𑀺𑀬𑀯𑀢𑁆𑀢𑀻 [𑀯𑀢𑁆𑀢𑀺 (𑀲𑀻.), 𑀯𑀼𑀢𑁆𑀢𑀺 (𑀓.)] 𑀲𑀼𑀯𑀘𑁄 𑀅𑀓𑁄𑀥𑀦𑁄;

𑀲𑀼𑀔𑀻 𑀅𑀦𑀼𑀧𑁆𑀧𑀻𑀴 𑀧𑀲𑀸𑀲𑀫𑁂𑀤𑀺𑀦𑀺𑀁 [𑀅𑀦𑀼𑀧𑁆𑀧𑀻𑀴𑀁 𑀲𑀳𑀲𑀫𑁂𑀤𑀦𑀺𑀁 (𑀓.)], 𑀇𑀢𑁄 𑀯𑀺𑀫𑀼𑀢𑁆𑀢𑁄𑀧𑀺 𑀘 𑀬𑀸𑀳𑀺 𑀲𑀼𑀕𑁆𑀕𑀢𑀺𑀁.

𑁩𑁫. 𑀏𑀯𑀁 𑀲𑀼𑀦𑀻𑀢𑁂𑀦 [𑀲𑀼𑀯𑀺𑀦𑀻𑀢𑁂𑀦 (𑀧𑀻.)] 𑀲𑀼𑀪𑀸𑀲𑀺𑀢𑁂𑀦, 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀉𑀧𑀸𑀬𑀲𑁄 𑀦𑀬𑀁;

𑀦𑀺𑀩𑁆𑀩𑀸𑀧𑀬𑁂 𑀲𑀗𑁆𑀔𑀼𑀪𑀺𑀢𑀁 𑀫𑀳𑀸𑀚𑀦𑀁, 𑀫𑀳𑀸𑀯 𑀫𑁂𑀖𑁄 𑀲𑀮𑀺𑀮𑁂𑀦 𑀫𑁂𑀤𑀺𑀦𑀺𑀦𑁆𑀢𑀺 [𑀫𑁂𑀤𑀦𑀺𑀦𑁆𑀢𑀺 (𑀲𑁆𑀬𑀸. 𑀓.)].

𑀲𑀼𑀫𑀗𑁆𑀕𑀮𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁪𑁨𑁧. 𑀕𑀗𑁆𑀕𑀫𑀸𑀮𑀚𑀸𑀢𑀓𑀁 (𑁫)

𑁩𑁬. 𑀅𑀗𑁆𑀕𑀸𑀭𑀚𑀸𑀢𑀸 𑀧𑀣𑀯𑀻, 𑀓𑀼𑀓𑁆𑀓𑀼𑀴𑀸𑀦𑀼𑀕𑀢𑀸 𑀫𑀳𑀻;

𑀅𑀣 𑀕𑀸𑀬𑀲𑀺 𑀯𑀢𑁆𑀢𑀸𑀦𑀺 [𑀯𑀢𑁆𑀣𑀸𑀦𑀺 (𑀓.)], 𑀦 𑀢𑀁 𑀢𑀧𑀢𑀺 𑀆𑀢𑀧𑁄.

𑁩𑁭. 𑀉𑀤𑁆𑀥𑀁 𑀢𑀧𑀢𑀺 𑀆𑀤𑀺𑀘𑁆𑀘𑁄, 𑀅𑀥𑁄 𑀢𑀧𑀢𑀺 𑀯𑀸𑀮𑀼𑀓𑀸;

𑀅𑀣 𑀕𑀸𑀬𑀲𑀺 𑀯𑀢𑁆𑀢𑀸𑀦𑀺 [𑀯𑀢𑁆𑀣𑀸𑀦𑀺 (𑀓.)], 𑀦 𑀢𑀁 𑀢𑀧𑀢𑀺 𑀆𑀢𑀧𑁄.

𑁩𑁮. 𑀦 𑀫𑀁 𑀢𑀧𑀢𑀺 𑀆𑀢𑀧𑁄, 𑀆𑀢𑀧𑀸 [𑀆𑀢𑀧𑁆𑀧𑀸 (𑀲𑀻. 𑀲𑁆𑀬𑀸. 𑀧𑀻.)] 𑀢𑀧𑀬𑀦𑁆𑀢𑀺 𑀫𑀁;

𑀅𑀢𑁆𑀣𑀸 𑀳𑀺 𑀯𑀺𑀯𑀺𑀥𑀸 𑀭𑀸𑀚, 𑀢𑁂 𑀢𑀧𑀦𑁆𑀢𑀺 𑀦 𑀆𑀢𑀧𑁄.

𑁩𑁯. 𑀅𑀤𑁆𑀤𑀲𑀁 𑀓𑀸𑀫 𑀢𑁂 𑀫𑀽𑀮𑀁, 𑀲𑀗𑁆𑀓𑀧𑁆𑀧𑀸 𑀓𑀸𑀫 𑀚𑀸𑀬𑀲𑀺;

𑀦 𑀢𑀁 𑀲𑀗𑁆𑀓𑀧𑁆𑀧𑀬𑀺𑀲𑁆𑀲𑀸𑀫𑀺, 𑀏𑀯𑀁 𑀓𑀸𑀫 𑀦 𑀳𑁂𑀳𑀺𑀲𑀺.

𑁪𑁦. 𑀅𑀧𑁆𑀧𑀸𑀧𑀺 𑀓𑀸𑀫𑀸 𑀦 𑀅𑀮𑀁, 𑀩𑀳𑀽𑀳𑀺𑀧𑀺 𑀦 𑀢𑀧𑁆𑀧𑀢𑀺;

𑀅𑀳𑀳𑀸 𑀩𑀸𑀮𑀮𑀧𑀦𑀸, 𑀧𑀭𑀺𑀯𑀚𑁆𑀚𑁂𑀣 [𑀧𑀝𑀺𑀯𑀺𑀚𑁆𑀛𑁂𑀣 (𑀧𑀻. 𑀲𑀻. 𑀅𑀝𑁆𑀞.)] 𑀚𑀕𑁆𑀕𑀢𑁄.

𑁪𑁧. 𑀅𑀧𑁆𑀧𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁 𑀫𑀫𑁂𑀤𑀁, 𑀉𑀤𑀬𑁄 𑀅𑀚𑁆𑀛𑀸𑀕𑀫𑀸 𑀫𑀳𑀢𑁆𑀢𑀧𑀢𑁆𑀢𑀁;

𑀲𑀼𑀮𑀤𑁆𑀥𑀮𑀸𑀪𑁄 𑀯𑀢 𑀫𑀸𑀡𑀯𑀲𑁆𑀲, 𑀬𑁄 𑀧𑀩𑁆𑀩𑀚𑀻 𑀓𑀸𑀫𑀭𑀸𑀕𑀁 𑀧𑀳𑀸𑀬.

𑁪𑁨. 𑀢𑀧𑀲𑀸 𑀧𑀚𑀳𑀦𑁆𑀢𑀺 𑀧𑀸𑀧𑀓𑀫𑁆𑀫𑀁, 𑀢𑀧𑀲𑀸 𑀦𑁆𑀳𑀸𑀧𑀺𑀢𑀓𑀼𑀫𑁆𑀪𑀓𑀸𑀭𑀪𑀸𑀯𑀁;

𑀢𑀧𑀲𑀸 𑀅𑀪𑀺𑀪𑀼𑀬𑁆𑀬 𑀕𑀗𑁆𑀕𑀫𑀸𑀮, 𑀦𑀸𑀫𑁂𑀦𑀸𑀮𑀧𑀲𑀚𑁆𑀚 𑀩𑁆𑀭𑀳𑁆𑀫𑀤𑀢𑁆𑀢𑀁.

𑁪𑁩. 𑀲𑀦𑁆𑀤𑀺𑀝𑁆𑀞𑀺𑀓𑀫𑁂𑀯 ‘‘𑀅𑀫𑁆𑀫’’ 𑀧𑀲𑁆𑀲𑀣, 𑀔𑀦𑁆𑀢𑀻𑀲𑁄𑀭𑀘𑁆𑀘𑀲𑁆𑀲 𑀅𑀬𑀁 [𑀬𑁄 (𑀲𑁆𑀬𑀸. 𑀧𑀻. 𑀓.)] 𑀯𑀺𑀧𑀸𑀓𑁄;

𑀬𑁄 [𑀲𑁄 (𑀲𑁆𑀬𑀸. 𑀓.)] 𑀲𑀩𑁆𑀩𑀚𑀦𑀲𑁆𑀲 𑀯𑀦𑁆𑀤𑀺𑀢𑁄𑀳𑀼, 𑀢𑀁 𑀯𑀦𑁆𑀤𑀸𑀫 𑀲𑀭𑀸𑀚𑀺𑀓𑀸 𑀲𑀫𑀘𑁆𑀘𑀸.

𑁪𑁪. 𑀫𑀸 𑀓𑀺𑀜𑁆𑀘𑀺 𑀅𑀯𑀘𑀼𑀢𑁆𑀣 𑀕𑀗𑁆𑀕𑀫𑀸𑀮𑀁, 𑀫𑀼𑀦𑀺𑀦𑀁 𑀫𑁄𑀦𑀧𑀣𑁂𑀲𑀼 𑀲𑀺𑀓𑁆𑀔𑀫𑀸𑀦𑀁;

𑀏𑀲𑁄 𑀳𑀺 𑀅𑀢𑀭𑀺 𑀅𑀡𑁆𑀡𑀯𑀁, 𑀬𑀁 𑀢𑀭𑀺𑀢𑁆𑀯𑀸 𑀘𑀭𑀦𑁆𑀢𑀺 𑀯𑀻𑀢𑀲𑁄𑀓𑀸𑀢𑀺.

𑀕𑀗𑁆𑀕𑀫𑀸𑀮𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁪𑁨𑁨. 𑀘𑁂𑀢𑀺𑀬𑀚𑀸𑀢𑀓𑀁 (𑁬)

𑁪𑁫. 𑀥𑀫𑁆𑀫𑁄 𑀳𑀯𑁂 𑀳𑀢𑁄 𑀳𑀦𑁆𑀢𑀺, 𑀦𑀸𑀳𑀢𑁄 𑀳𑀦𑁆𑀢𑀺 𑀓𑀺𑀜𑁆𑀘𑀦𑀁 [𑀓𑀜𑁆𑀘𑀺𑀦𑀁 (𑀧𑀻.)];

𑀢𑀲𑁆𑀫𑀸 𑀳𑀺 𑀥𑀫𑁆𑀫𑀁 𑀦 𑀳𑀦𑁂, 𑀫𑀸 𑀢𑁆𑀯𑀁 [𑀢𑀁 (𑀲𑁆𑀬𑀸. 𑀧𑀻.)] 𑀥𑀫𑁆𑀫𑁄 𑀳𑀢𑁄 𑀳𑀦𑀺.

𑁪𑁬. 𑀅𑀮𑀺𑀓𑀁 𑀪𑀸𑀲𑀫𑀸𑀦𑀲𑁆𑀲, 𑀅𑀧𑀓𑁆𑀓𑀫𑀦𑁆𑀢𑀺 𑀤𑁂𑀯𑀢𑀸;

𑀧𑀽𑀢𑀺𑀓𑀜𑁆𑀘 𑀫𑀼𑀔𑀁 𑀯𑀸𑀢𑀺, 𑀲𑀓𑀝𑁆𑀞𑀸𑀦𑀸 𑀘 𑀥𑀁𑀲𑀢𑀺;