𑁪𑁨𑁫. 𑀅𑀝𑁆𑀞𑀸𑀦𑀚𑀸𑀢𑀓𑀁 (𑁯)

𑁭𑁭. 𑀕𑀗𑁆𑀕𑀸 𑀓𑀼𑀫𑀼𑀤𑀺𑀦𑀻 𑀲𑀦𑁆𑀢𑀸, 𑀲𑀗𑁆𑀔𑀯𑀡𑁆𑀡𑀸 𑀘 𑀓𑁄𑀓𑀺𑀮𑀸;

𑀚𑀫𑁆𑀩𑀼 𑀢𑀸𑀮𑀨𑀮𑀁 𑀤𑀚𑁆𑀚𑀸, 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁭𑁮. 𑀬𑀤𑀸 𑀓𑀘𑁆𑀙𑀧𑀮𑁄𑀫𑀸𑀦𑀁, 𑀧𑀸𑀯𑀸𑀭𑁄 𑀢𑀺𑀯𑀺𑀥𑁄 𑀲𑀺𑀬𑀸;

𑀳𑁂𑀫𑀦𑁆𑀢𑀺𑀓𑀁 𑀧𑀸𑀯𑀼𑀭𑀡𑀁 [𑀧𑀸𑀧𑀼𑀭𑀡𑀁 (𑀲𑀻. 𑀲𑁆𑀬𑀸. 𑀧𑀻.)], 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁭𑁯. 𑀬𑀤𑀸 𑀫𑀓𑀲𑀧𑀸𑀤𑀸𑀦𑀁 [𑀤𑀸𑀞𑀸𑀦𑀁 (𑀲𑀻. 𑀧𑀻.)], 𑀅𑀝𑁆𑀝𑀸𑀮𑁄 𑀲𑀼𑀓𑀢𑁄 𑀲𑀺𑀬𑀸;

𑀤𑀴𑁆𑀳𑁄 𑀘 𑀅𑀯𑀺𑀓𑀫𑁆𑀧𑀻 𑀘 [𑀅𑀧𑁆𑀧𑀓𑀫𑁆𑀧𑀻 𑀘 (𑀲𑀻. 𑀧𑀻.)], 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁮𑁦. 𑀬𑀤𑀸 𑀲𑀲𑀯𑀺𑀲𑀸𑀡𑀸𑀦𑀁, 𑀦𑀺𑀲𑁆𑀲𑁂𑀡𑀻 𑀲𑀼𑀓𑀢𑀸 𑀲𑀺𑀬𑀸;

𑀲𑀕𑁆𑀕𑀲𑁆𑀲𑀸𑀭𑁄𑀳𑀡𑀢𑁆𑀣𑀸𑀬, 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁮𑁧. 𑀬𑀤𑀸 𑀦𑀺𑀲𑁆𑀲𑁂𑀡𑀺𑀫𑀸𑀭𑀼𑀬𑁆𑀳, 𑀘𑀦𑁆𑀤𑀁 𑀔𑀸𑀤𑁂𑀬𑁆𑀬𑀼 𑀫𑀽𑀲𑀺𑀓𑀸;

𑀭𑀸𑀳𑀼𑀜𑁆𑀘 𑀧𑀭𑀺𑀧𑀸𑀢𑁂𑀬𑁆𑀬𑀼𑀁 [𑀧𑀭𑀺𑀩𑀸𑀳𑁂𑀬𑁆𑀬𑀼𑀁 (𑀲𑁆𑀬𑀸.)], 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁮𑁨. 𑀬𑀤𑀸 𑀲𑀼𑀭𑀸𑀖𑀝𑀁 𑀧𑀺𑀢𑁆𑀯𑀸, 𑀫𑀓𑁆𑀔𑀺𑀓𑀸 𑀕𑀡𑀘𑀸𑀭𑀺𑀡𑀻;

𑀅𑀗𑁆𑀕𑀸𑀭𑁂 𑀯𑀸𑀲𑀁 𑀓𑀧𑁆𑀧𑁂𑀬𑁆𑀬𑀼𑀁, 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁮𑁩. 𑀬𑀤𑀸 𑀩𑀺𑀫𑁆𑀩𑁄𑀝𑁆𑀞𑀲𑀫𑁆𑀧𑀦𑁆𑀦𑁄, 𑀕𑀤𑁆𑀭𑀪𑁄 𑀲𑀼𑀫𑀼𑀔𑁄 𑀲𑀺𑀬𑀸;

𑀓𑀼𑀲𑀮𑁄 𑀦𑀘𑁆𑀘𑀕𑀻𑀢𑀲𑁆𑀲, 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁮𑁪. 𑀬𑀤𑀸 𑀓𑀸𑀓𑀸 𑀉𑀮𑀽𑀓𑀸 𑀘, 𑀫𑀦𑁆𑀢𑀬𑁂𑀬𑁆𑀬𑀼𑀁 𑀭𑀳𑁄𑀕𑀢𑀸;

𑀅𑀜𑁆𑀜𑀫𑀜𑁆𑀜𑀁 𑀧𑀺𑀳𑀬𑁂𑀬𑁆𑀬𑀼𑀁, 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁮𑁫. 𑀬𑀤𑀸 𑀫𑀼𑀴𑀸𑀮 [𑀧𑀼𑀮𑀲 (𑀲𑀻. 𑀧𑀻.), 𑀧𑀼𑀮𑀸𑀲 (𑀲𑁆𑀬𑀸.)] 𑀧𑀢𑁆𑀢𑀸𑀦𑀁, 𑀙𑀢𑁆𑀢𑀁 𑀣𑀺𑀭𑀢𑀭𑀁 𑀲𑀺𑀬𑀸;

𑀯𑀲𑁆𑀲𑀲𑁆𑀲 𑀧𑀝𑀺𑀖𑀸𑀢𑀸𑀬, 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁮𑁬. 𑀬𑀤𑀸 𑀓𑀼𑀮𑀓𑁄 [𑀓𑀼𑀮𑀼𑀗𑁆𑀓𑁄 (𑀲𑀻. 𑀧𑀻.), 𑀓𑀼𑀮𑀼𑀓𑁄 (𑀲𑁆𑀬𑀸.)] 𑀲𑀓𑀼𑀡𑁄, 𑀧𑀩𑁆𑀩𑀢𑀁 𑀕𑀦𑁆𑀥𑀫𑀸𑀤𑀦𑀁;

𑀢𑀼𑀡𑁆𑀟𑁂𑀦𑀸𑀤𑀸𑀬 𑀕𑀘𑁆𑀙𑁂𑀬𑁆𑀬, 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸.

𑁮𑁭. 𑀬𑀤𑀸 𑀲𑀸𑀫𑀼𑀤𑁆𑀤𑀺𑀓𑀁 𑀦𑀸𑀯𑀁, 𑀲-𑀬𑀦𑁆𑀢𑀁 𑀲-𑀯𑀝𑀸𑀓𑀭𑀁 [𑀲𑀧𑀝𑀸𑀓𑀸𑀭𑀁 (𑀓.)];

𑀘𑁂𑀝𑁄 𑀆𑀤𑀸𑀬 𑀕𑀘𑁆𑀙𑁂𑀬𑁆𑀬, 𑀅𑀣 𑀦𑀽𑀦 𑀢𑀤𑀸 𑀲𑀺𑀬𑀸𑀢𑀺.

𑀅𑀝𑁆𑀞𑀸𑀦𑀚𑀸𑀢𑀓𑀁 𑀦𑀯𑀫𑀁.