𑁪𑁨𑁨. 𑀘𑁂𑀢𑀺𑀬𑀚𑀸𑀢𑀓𑀁 (𑁬)

𑁪𑁫. 𑀥𑀫𑁆𑀫𑁄 𑀳𑀯𑁂 𑀳𑀢𑁄 𑀳𑀦𑁆𑀢𑀺, 𑀦𑀸𑀳𑀢𑁄 𑀳𑀦𑁆𑀢𑀺 𑀓𑀺𑀜𑁆𑀘𑀦𑀁 [𑀓𑀜𑁆𑀘𑀺𑀦𑀁 (𑀧𑀻.)];

𑀢𑀲𑁆𑀫𑀸 𑀳𑀺 𑀥𑀫𑁆𑀫𑀁 𑀦 𑀳𑀦𑁂, 𑀫𑀸 𑀢𑁆𑀯𑀁 [𑀢𑀁 (𑀲𑁆𑀬𑀸. 𑀧𑀻.)] 𑀥𑀫𑁆𑀫𑁄 𑀳𑀢𑁄 𑀳𑀦𑀺.

𑁪𑁬. 𑀅𑀮𑀺𑀓𑀁 𑀪𑀸𑀲𑀫𑀸𑀦𑀲𑁆𑀲, 𑀅𑀧𑀓𑁆𑀓𑀫𑀦𑁆𑀢𑀺 𑀤𑁂𑀯𑀢𑀸;

𑀧𑀽𑀢𑀺𑀓𑀜𑁆𑀘 𑀫𑀼𑀔𑀁 𑀯𑀸𑀢𑀺, 𑀲𑀓𑀝𑁆𑀞𑀸𑀦𑀸 𑀘 𑀥𑀁𑀲𑀢𑀺;

𑀬𑁄 𑀚𑀸𑀦𑀁 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑀁, 𑀅𑀜𑁆𑀜𑀣𑀸 𑀦𑀁 𑀯𑀺𑀬𑀸𑀓𑀭𑁂.

𑁪𑁭. 𑀲𑀘𑁂 𑀳𑀺 𑀲𑀘𑁆𑀘𑀁 𑀪𑀡𑀲𑀺, 𑀳𑁄𑀳𑀺 𑀭𑀸𑀚 𑀬𑀣𑀸 𑀧𑀼𑀭𑁂;

𑀫𑀼𑀲𑀸 𑀘𑁂 𑀪𑀸𑀲𑀲𑁂 𑀭𑀸𑀚, 𑀪𑀽𑀫𑀺𑀬𑀁 𑀢𑀺𑀝𑁆𑀞 𑀘𑁂𑀢𑀺𑀬.

𑁪𑁮. 𑀅𑀓𑀸𑀮𑁂 𑀯𑀲𑁆𑀲𑀢𑀻 𑀢𑀲𑁆𑀲, 𑀓𑀸𑀮𑁂 𑀢𑀲𑁆𑀲 𑀦 𑀯𑀲𑁆𑀲𑀢𑀺;

𑀬𑁄 𑀚𑀸𑀦𑀁 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑀁, 𑀅𑀜𑁆𑀜𑀣𑀸 𑀦𑀁 𑀯𑀺𑀬𑀸𑀓𑀭𑁂.

𑁪𑁯. 𑀲𑀘𑁂 𑀳𑀺 𑀲𑀘𑁆𑀘𑀁 𑀪𑀡𑀲𑀺, 𑀳𑁄𑀳𑀺 𑀭𑀸𑀚 𑀬𑀣𑀸 𑀧𑀼𑀭𑁂;

𑀫𑀼𑀲𑀸 𑀘𑁂 𑀪𑀸𑀲𑀲𑁂 𑀭𑀸𑀚, 𑀪𑀽𑀫𑀺𑀁 𑀧𑀯𑀺𑀲 𑀘𑁂𑀢𑀺𑀬.

𑁫𑁦. 𑀚𑀺𑀯𑁆𑀳𑀸 𑀢𑀲𑁆𑀲 𑀤𑁆𑀯𑀺𑀥𑀸 𑀳𑁄𑀢𑀺, 𑀉𑀭𑀕𑀲𑁆𑀲𑁂𑀯 𑀤𑀺𑀲𑀫𑁆𑀧𑀢𑀺;

𑀬𑁄 𑀚𑀸𑀦𑀁 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑀁, 𑀅𑀜𑁆𑀜𑀣𑀸 𑀦𑀁 𑀯𑀺𑀬𑀸𑀓𑀭𑁂.

𑁫𑁧. 𑀲𑀘𑁂 𑀳𑀺 𑀲𑀘𑁆𑀘𑀁 𑀪𑀡𑀲𑀺, 𑀳𑁄𑀳𑀺 𑀭𑀸𑀚 𑀬𑀣𑀸 𑀧𑀼𑀭𑁂;

𑀫𑀼𑀲𑀸 𑀘𑁂 𑀪𑀸𑀲𑀲𑁂 𑀭𑀸𑀚, 𑀪𑀺𑀬𑁆𑀬𑁄 𑀧𑀯𑀺𑀲 𑀘𑁂𑀢𑀺𑀬.

𑁫𑁨. 𑀚𑀺𑀯𑁆𑀳𑀸 𑀢𑀲𑁆𑀲 𑀦 𑀪𑀯𑀢𑀺, 𑀫𑀘𑁆𑀙𑀲𑁆𑀲𑁂𑀯 𑀤𑀺𑀲𑀫𑁆𑀧𑀢𑀺;

𑀬𑁄 𑀚𑀸𑀦𑀁 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑀁, 𑀅𑀜𑁆𑀜𑀣𑀸 𑀦𑀁 𑀯𑀺𑀬𑀸𑀓𑀭𑁂.

𑁫𑁩. 𑀲𑀘𑁂 𑀳𑀺 𑀲𑀘𑁆𑀘𑀁 𑀪𑀡𑀲𑀺, 𑀳𑁄𑀳𑀺 𑀭𑀸𑀚 𑀬𑀣𑀸 𑀧𑀼𑀭𑁂;

𑀫𑀼𑀲𑀸 𑀘𑁂 𑀪𑀸𑀲𑀲𑁂 𑀭𑀸𑀚, 𑀪𑀺𑀬𑁆𑀬𑁄 𑀧𑀯𑀺𑀲 𑀘𑁂𑀢𑀺𑀬.

𑁫𑁪. 𑀣𑀺𑀬𑁄𑀯 𑀢𑀲𑁆𑀲 𑀚𑀸𑀬𑀦𑁆𑀢𑀺 [𑀣𑀺𑀬𑁄 𑀢𑀲𑁆𑀲 𑀧𑀚𑀸𑀬𑀦𑁆𑀢𑀺 (𑀓.)], 𑀦 𑀧𑀼𑀫𑀸 𑀚𑀸𑀬𑀭𑁂 𑀓𑀼𑀮𑁂;

𑀬𑁄 𑀚𑀸𑀦𑀁 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑀁, 𑀅𑀜𑁆𑀜𑀣𑀸 𑀦𑀁 𑀯𑀺𑀬𑀸𑀓𑀭𑁂.

𑁫𑁫. 𑀲𑀘𑁂 𑀳𑀺 𑀲𑀘𑁆𑀘𑀁 𑀪𑀡𑀲𑀺, 𑀳𑁄𑀳𑀺 𑀭𑀸𑀚 𑀬𑀣𑀸 𑀧𑀼𑀭𑁂;

𑀫𑀼𑀲𑀸 𑀘𑁂 𑀪𑀸𑀲𑀲𑁂 𑀭𑀸𑀚, 𑀪𑀺𑀬𑁆𑀬𑁄 𑀧𑀯𑀺𑀲 𑀘𑁂𑀢𑀺𑀬.

𑁫𑁬. 𑀧𑀼𑀢𑁆𑀢𑀸 𑀢𑀲𑁆𑀲 𑀦 𑀪𑀯𑀦𑁆𑀢𑀺, 𑀧𑀓𑁆𑀓𑀫𑀦𑁆𑀢𑀺 𑀤𑀺𑀲𑁄𑀤𑀺𑀲𑀁;

𑀬𑁄 𑀚𑀸𑀦𑀁 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑀁, 𑀅𑀜𑁆𑀜𑀣𑀸 𑀦𑀁 𑀯𑀺𑀬𑀸𑀓𑀭𑁂.

𑁫𑁭. 𑀲𑀘𑁂 𑀳𑀺 𑀲𑀘𑁆𑀘𑀁 𑀪𑀡𑀲𑀺, 𑀳𑁄𑀳𑀺 𑀭𑀸𑀚 𑀬𑀣𑀸 𑀧𑀼𑀭𑁂;

𑀫𑀼𑀲𑀸 𑀘𑁂 𑀪𑀸𑀲𑀲𑁂 𑀭𑀸𑀚, 𑀪𑀺𑀬𑁆𑀬𑁄 𑀧𑀯𑀺𑀲 𑀘𑁂𑀢𑀺𑀬.

𑁫𑁮. 𑀲 𑀭𑀸𑀚𑀸 𑀇𑀲𑀺𑀦𑀸 𑀲𑀢𑁆𑀢𑁄, 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀼𑀭𑁂;

𑀧𑀸𑀯𑁂𑀓𑁆𑀔𑀺 𑀧𑀣𑀯𑀺𑀁 𑀘𑁂𑀘𑁆𑀘𑁄, 𑀳𑀻𑀦𑀢𑁆𑀢𑁄 𑀧𑀢𑁆𑀯 𑀧𑀭𑀺𑀬𑀸𑀬𑀁 [𑀅𑀢𑁆𑀢𑀧𑀭𑀺𑀬𑀸𑀬𑀁 (𑀲𑀻. 𑀲𑁆𑀬𑀸.), 𑀧𑀢𑁆𑀢𑀧𑀭𑀺𑀬𑀸𑀬𑀁 (𑀓. 𑀲𑀻. 𑀦𑀺𑀬𑁆𑀬)].

𑁫𑁯. 𑀢𑀲𑁆𑀫𑀸 𑀳𑀺 𑀙𑀦𑁆𑀤𑀸𑀕𑀫𑀦𑀁, 𑀦𑀧𑁆𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀅𑀤𑀼𑀝𑁆𑀞𑀘𑀺𑀢𑁆𑀢𑁄 𑀪𑀸𑀲𑁂𑀬𑁆𑀬, 𑀕𑀺𑀭𑀁 𑀲𑀘𑁆𑀘𑀽𑀧𑀲𑀁𑀳𑀺𑀢𑀦𑁆𑀢𑀺.

𑀘𑁂𑀢𑀺𑀬𑀚𑀸𑀢𑀓𑀁 𑀙𑀝𑁆𑀞𑀁.