𑁪𑁨𑁩. 𑀇𑀦𑁆𑀤𑁆𑀭𑀺𑀬𑀚𑀸𑀢𑀓𑀁 (𑁭)

𑁬𑁦. 𑀬𑁄 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀸𑀫𑁂𑀦, 𑀯𑀲𑀁 𑀦𑀸𑀭𑀤 𑀕𑀘𑁆𑀙𑀢𑀺;

𑀲𑁄 𑀧𑀭𑀺𑀘𑁆𑀘𑀚𑁆𑀚𑀼𑀪𑁄 𑀮𑁄𑀓𑁂, 𑀚𑀻𑀯𑀦𑁆𑀢𑁄𑀯 𑀯𑀺𑀲𑀼𑀲𑁆𑀲𑀢𑀺 [𑀚𑀻𑀯𑀦𑁆𑀢𑁄𑀧𑀺𑀯𑀺𑀲𑀼𑀲𑁆𑀲𑀢𑀺 (𑀲𑁆𑀬𑀸.), 𑀚𑀻𑀯𑀦𑁆𑀢𑁄 𑀯𑀸𑀧𑀺 𑀲𑀼𑀲𑁆𑀲𑀢𑀺 (𑀓.)].

𑁬𑁧. 𑀲𑀼𑀔𑀲𑁆𑀲𑀸𑀦𑀦𑁆𑀢𑀭𑀁 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀲𑁆𑀲𑀸𑀦𑀦𑁆𑀢𑀭𑀁 𑀲𑀼𑀔𑀁;

𑀲𑁄𑀲𑀺 [𑀲𑁄𑀧𑀺 (𑀲𑁆𑀬𑀸. 𑀧𑀻. 𑀓.)] 𑀧𑀢𑁆𑀢𑁄 𑀲𑀼𑀔𑀸 [𑀲𑀼𑀔 (𑀲𑁆𑀬𑀸.), 𑀲𑀼𑀔𑀁 (𑀓.)] 𑀤𑀼𑀓𑁆𑀔𑀁, 𑀧𑀸𑀝𑀺𑀓𑀗𑁆𑀔 𑀯𑀭𑀁 𑀲𑀼𑀔𑀁.

𑁬𑁨. 𑀓𑀺𑀘𑁆𑀙𑀓𑀸𑀮𑁂 𑀓𑀺𑀘𑁆𑀙𑀲𑀳𑁄, 𑀬𑁄 𑀓𑀺𑀘𑁆𑀙𑀁 𑀦𑀸𑀢𑀺𑀯𑀢𑁆𑀢𑀢𑀺;

𑀲 𑀓𑀺𑀘𑁆𑀙𑀦𑁆𑀢𑀁 𑀲𑀼𑀔𑀁 𑀥𑀻𑀭𑁄, 𑀬𑁄𑀕𑀁 𑀲𑀫𑀥𑀺𑀕𑀘𑁆𑀙𑀢𑀺.

𑁬𑁩. 𑀦 𑀳𑁂𑀯 𑀓𑀸𑀫𑀸𑀦 𑀓𑀸𑀫𑀸, 𑀦𑀸𑀦𑀢𑁆𑀣𑀸 𑀦𑀸𑀢𑁆𑀣𑀓𑀸𑀭𑀡𑀸;

𑀦 𑀓𑀢𑀜𑁆𑀘 𑀦𑀺𑀭𑀗𑁆𑀓𑀢𑁆𑀯𑀸, 𑀥𑀫𑁆𑀫𑀸 𑀘𑀯𑀺𑀢𑀼𑀫𑀭𑀳𑀲𑀺.

𑁬𑁪. 𑀤𑀓𑁆𑀔𑀁 𑀕𑀳𑀧𑀢𑀻 [𑀕𑀳𑀧𑀢𑀁 (𑀲𑀻. 𑀲𑁆𑀬𑀸. 𑀧𑀻.), 𑀕𑀳𑀯𑀢𑀁 (?)] 𑀲𑀸𑀥𑀼, 𑀲𑀁𑀯𑀺𑀪𑀚𑁆𑀚𑀜𑁆𑀘 𑀪𑁄𑀚𑀦𑀁;

𑀅𑀳𑀸𑀲𑁄 𑀅𑀢𑁆𑀣𑀮𑀸𑀪𑁂𑀲𑀼, 𑀅𑀢𑁆𑀣𑀩𑁆𑀬𑀸𑀧𑀢𑁆𑀢𑀺 𑀅𑀩𑁆𑀬𑀣𑁄.

𑁬𑁫. 𑀏𑀢𑁆𑀢𑀸𑀯𑀢𑁂𑀢𑀁 𑀧𑀡𑁆𑀟𑀺𑀘𑁆𑀘𑀁, 𑀅𑀧𑀺 𑀲𑁄 [𑀅𑀲𑀺𑀢𑁄 (𑀲𑀻. 𑀲𑁆𑀬𑀸. 𑀧𑀻.)] 𑀤𑀯𑀺𑀮𑁄 [𑀤𑁂𑀯𑀮𑁄 (𑀲𑀻. 𑀧𑀻.)] 𑀩𑁆𑀭𑀯𑀺;

𑀦 𑀬𑀺𑀢𑁄 𑀓𑀺𑀜𑁆𑀘𑀺 𑀧𑀸𑀧𑀺𑀬𑁄, 𑀬𑁄 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑀁 𑀯𑀚𑁂.

𑁬𑁬. 𑀅𑀫𑀺𑀢𑁆𑀢𑀸𑀦𑀁𑀯 𑀳𑀢𑁆𑀣𑀢𑁆𑀣𑀁, 𑀲𑀺𑀯𑀺 𑀧𑀧𑁆𑀧𑁄𑀢𑀺 𑀫𑀸𑀫𑀺𑀯;

𑀓𑀫𑁆𑀫𑀁 𑀯𑀺𑀚𑁆𑀚𑀜𑁆𑀘 𑀤𑀓𑁆𑀔𑁂𑀬𑁆𑀬𑀁, 𑀯𑀺𑀯𑀸𑀳𑀁 𑀲𑀻𑀮𑀫𑀤𑁆𑀤𑀯𑀁;

𑀏𑀢𑁂 𑀘 𑀬𑀲𑁂 𑀳𑀸𑀧𑁂𑀢𑁆𑀯𑀸, 𑀦𑀺𑀩𑁆𑀩𑀢𑁆𑀢𑁄 𑀲𑁂𑀳𑀺 𑀓𑀫𑁆𑀫𑁂𑀳𑀺.

𑁬𑁭. 𑀲𑁄𑀳𑀁 𑀲𑀳𑀲𑁆𑀲𑀚𑀻𑀦𑁄𑀯 𑀅𑀩𑀦𑁆𑀥𑀼 𑀅𑀧𑀭𑀸𑀬𑀡𑁄;

𑀅𑀭𑀺𑀬𑀥𑀫𑁆𑀫𑀸 𑀅𑀧𑀓𑁆𑀓𑀦𑁆𑀢𑁄, 𑀬𑀣𑀸 𑀧𑁂𑀢𑁄 𑀢𑀣𑁂𑀯𑀳𑀁.

𑁬𑁮. 𑀲𑀼𑀔𑀓𑀸𑀫𑁂 𑀤𑀼𑀓𑁆𑀔𑀸𑀧𑁂𑀢𑁆𑀯𑀸, 𑀆𑀧𑀦𑁆𑀦𑁄𑀲𑁆𑀫𑀺 𑀧𑀤𑀁 𑀇𑀫𑀁;

𑀲𑁄 𑀲𑀼𑀔𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀞𑀺𑀢𑁄 [𑀘𑀺𑀢𑁄 (𑀧𑀻. 𑀲𑀻. 𑀅𑀝𑁆𑀞.)] 𑀪𑀸𑀡𑀼𑀫𑀢𑀸𑀫𑀺𑀯𑀸𑀢𑀺.

𑀇𑀦𑁆𑀤𑁆𑀭𑀺𑀬𑀚𑀸𑀢𑀓𑀁 𑀲𑀢𑁆𑀢𑀫𑀁.