𑁪𑁧𑁬. 𑀧𑀭𑀦𑁆𑀢𑀧𑀚𑀸𑀢𑀓𑀁 (𑁭-𑁨-𑁧𑁧)

𑁧𑁫𑁪. 𑀆𑀕𑀫𑀺𑀲𑁆𑀲𑀢𑀺 𑀫𑁂 𑀧𑀸𑀧𑀁, 𑀆𑀕𑀫𑀺𑀲𑁆𑀲𑀢𑀺 𑀫𑁂 𑀪𑀬𑀁;

𑀢𑀤𑀸 𑀳𑀺 𑀘𑀮𑀺𑀢𑀸 𑀲𑀸𑀔𑀸, 𑀫𑀦𑀼𑀲𑁆𑀲𑁂𑀦 𑀫𑀺𑀕𑁂𑀦 𑀯𑀸.

𑁧𑁫𑁫. 𑀪𑀻𑀭𑀼𑀬𑀸 𑀦𑀽𑀦 𑀫𑁂 𑀓𑀸𑀫𑁄, 𑀅𑀯𑀺𑀤𑀽𑀭𑁂 𑀯𑀲𑀦𑁆𑀢𑀺𑀬𑀸;

𑀓𑀭𑀺𑀲𑁆𑀲𑀢𑀺 𑀓𑀺𑀲𑀁 𑀧𑀡𑁆𑀟𑀼𑀁, 𑀲𑀸𑀯 𑀲𑀸𑀔𑀸 𑀧𑀭𑀦𑁆𑀢𑀧𑀁.

𑁧𑁫𑁬. 𑀲𑁄𑀘𑀬𑀺𑀲𑁆𑀲𑀢𑀺 𑀫𑀁 𑀓𑀦𑁆𑀢𑀸, 𑀕𑀸𑀫𑁂 𑀯𑀲𑀫𑀦𑀺𑀦𑁆𑀤𑀺𑀢𑀸;

𑀓𑀭𑀺𑀲𑁆𑀲𑀢𑀺 𑀓𑀺𑀲𑀁 𑀧𑀡𑁆𑀟𑀼𑀁, 𑀲𑀸𑀯 𑀲𑀸𑀔𑀸 𑀧𑀭𑀦𑁆𑀢𑀧𑀁.

𑁧𑁫𑁭. 𑀢𑀬𑀸 𑀫𑀁 𑀅𑀲𑀺𑀢𑀸𑀧𑀗𑁆𑀕𑀺 [𑀳𑀲𑀺𑀢𑀸𑀧𑀗𑁆𑀕𑀺 (𑀲𑀻. 𑀲𑁆𑀬𑀸. 𑀧𑀻.)], 𑀲𑀺𑀢𑀸𑀦𑀺 [𑀫𑀺𑀳𑀺𑀢𑀸𑀦𑀺 (𑀲𑀻. 𑀲𑁆𑀬𑀸. 𑀧𑀻.)] 𑀪𑀡𑀺𑀢𑀸𑀦𑀺 𑀘;

𑀓𑀺𑀲𑀁 𑀧𑀡𑁆𑀟𑀼𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀲𑀸𑀯 𑀲𑀸𑀔𑀸 𑀧𑀭𑀦𑁆𑀢𑀧𑀁.

𑁧𑁫𑁮. 𑀅𑀕𑀫𑀸 𑀦𑀽𑀦 𑀲𑁄 𑀲𑀤𑁆𑀤𑁄, 𑀅𑀲𑀁𑀲𑀺 𑀦𑀽𑀦 𑀲𑁄 𑀢𑀯;

𑀅𑀓𑁆𑀔𑀸𑀢𑀁 𑀦𑀽𑀦 𑀢𑀁 𑀢𑁂𑀦, 𑀬𑁄 𑀢𑀁 𑀲𑀸𑀔𑀫𑀓𑀫𑁆𑀧𑀬𑀺.

𑁧𑁫𑁯. 𑀇𑀤𑀁 𑀔𑁄 𑀢𑀁 𑀲𑀫𑀸𑀕𑀫𑁆𑀫, 𑀫𑀫 𑀩𑀸𑀮𑀲𑁆𑀲 𑀘𑀺𑀦𑁆𑀢𑀺𑀢𑀁;

𑀢𑀤𑀸 𑀳𑀺 𑀘𑀮𑀺𑀢𑀸 𑀲𑀸𑀔𑀸, 𑀫𑀦𑀼𑀲𑁆𑀲𑁂𑀦 𑀫𑀺𑀕𑁂𑀦 𑀯𑀸.

𑁧𑁬𑁦. 𑀢𑀣𑁂𑀯 𑀢𑁆𑀯𑀁 𑀅𑀯𑁂𑀤𑁂𑀲𑀺, 𑀅𑀯𑀜𑁆𑀘𑀺 [𑀅𑀯𑀚𑁆𑀛𑀺 (𑀓.)] 𑀧𑀺𑀢𑀭𑀁 𑀫𑀫;

𑀳𑀦𑁆𑀢𑁆𑀯𑀸 𑀲𑀸𑀔𑀸𑀳𑀺 𑀙𑀸𑀤𑁂𑀦𑁆𑀢𑁄, 𑀆𑀕𑀫𑀺𑀲𑁆𑀲𑀢𑀺 𑀫𑁂 [𑀢𑁂 (𑀲𑁆𑀬𑀸. 𑀓.)] 𑀪𑀬𑀦𑁆𑀢𑀺.

𑀧𑀭𑀦𑁆𑀢𑀧𑀚𑀸𑀢𑀓𑀁 𑀏𑀓𑀸𑀤𑀲𑀫𑀁.

𑀕𑀦𑁆𑀥𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀭𑀕𑀸𑀫 𑀫𑀳𑀸𑀓𑀧𑀺 𑀪𑀕𑁆𑀕𑀯 𑀘, 𑀤𑀴𑁆𑀳𑀥𑀫𑁆𑀫 𑀲𑀓𑀼𑀜𑁆𑀚𑀭 𑀓𑁂𑀲𑀯𑀭𑁄;

𑀉𑀭𑀕𑁄 𑀯𑀺𑀥𑀼𑀭𑁄 𑀧𑀼𑀦 𑀚𑀸𑀕𑀭𑀢𑀁, 𑀅𑀣 𑀓𑁄𑀲𑀮𑀸𑀥𑀺𑀧 𑀧𑀭𑀦𑁆𑀢𑀧 𑀘𑀸𑀢𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀅𑀣 𑀲𑀢𑁆𑀢𑀦𑀺𑀧𑀸𑀢𑀫𑁆𑀳𑀺, 𑀯𑀕𑁆𑀕𑀁 𑀫𑁂 𑀪𑀡𑀢𑁄 𑀲𑀼𑀡;

𑀓𑀼𑀓𑁆𑀓𑀼 𑀘 𑀧𑀼𑀦 𑀕𑀦𑁆𑀥𑀸𑀭𑁄, 𑀤𑁆𑀯𑁂𑀯 𑀕𑀼𑀢𑁆𑀢𑀸 𑀫𑀳𑁂𑀲𑀺𑀦𑀸𑀢𑀺.

𑀲𑀢𑁆𑀢𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.