𑁨. 𑀕𑀦𑁆𑀥𑀸𑀭𑀯𑀕𑁆𑀕𑁄

𑁪𑁦𑁬. 𑀕𑀦𑁆𑀥𑀸𑀭𑀚𑀸𑀢𑀓𑀁 (𑁭-𑁨-𑁧)

𑁭𑁬. 𑀳𑀺𑀢𑁆𑀯𑀸 𑀕𑀸𑀫𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑁄𑀴𑀲;

𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀨𑀻𑀢𑀸𑀦𑀺, 𑀲𑀦𑁆𑀦𑀺𑀥𑀺𑀁 𑀤𑀸𑀦𑀺 𑀓𑀼𑀩𑁆𑀩𑀲𑀺.

𑁭𑁭. 𑀳𑀺𑀢𑁆𑀯𑀸 𑀕𑀦𑁆𑀥𑀸𑀭𑀯𑀺𑀲𑀬𑀁, 𑀧𑀳𑀽𑀢𑀥𑀦𑀥𑀸𑀭𑀺𑀬𑀁 [𑀥𑀸𑀦𑀺𑀬𑀁 (𑀲𑀻. 𑀧𑀻.), 𑀥𑀜𑁆𑀜𑀦𑁆𑀢𑀺 𑀅𑀢𑁆𑀣𑁄];

𑀧𑀲𑀸𑀲𑀦𑀢𑁄 [𑀧𑀲𑀸𑀲𑀦𑀺𑀢𑁄 (𑀲𑀻. 𑀲𑁆𑀬𑀸.), 𑀧𑀲𑀸𑀲𑀦𑀸𑀢𑁄 (𑀧𑀻.)] 𑀦𑀺𑀓𑁆𑀔𑀦𑁆𑀢𑁄, 𑀇𑀥 𑀤𑀸𑀦𑀺 𑀧𑀲𑀸𑀲𑀲𑀺.

𑁭𑁮. 𑀥𑀫𑁆𑀫𑀁 𑀪𑀡𑀸𑀫𑀺 𑀯𑁂𑀤𑁂𑀳, 𑀅𑀥𑀫𑁆𑀫𑁄 𑀫𑁂 𑀦 𑀭𑀼𑀘𑁆𑀘𑀢𑀺;

𑀥𑀫𑁆𑀫𑀁 𑀫𑁂 𑀪𑀡𑀫𑀸𑀦𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀺.

𑁭𑁯. 𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦, 𑀧𑀭𑁄 𑀮𑀪𑀢𑀺 𑀭𑀼𑀧𑁆𑀧𑀦𑀁;

𑀫𑀳𑀢𑁆𑀣𑀺𑀬𑀫𑁆𑀧𑀺 𑀘𑁂 𑀯𑀸𑀘𑀁, 𑀦 𑀢𑀁 𑀪𑀸𑀲𑁂𑀬𑁆𑀬 𑀧𑀡𑁆𑀟𑀺𑀢𑁄.

𑁮𑁦. 𑀓𑀸𑀫𑀁 𑀭𑀼𑀧𑁆𑀧𑀢𑀼 𑀯𑀸 𑀫𑀸 𑀯𑀸, 𑀪𑀼𑀲𑀁𑀯 𑀯𑀺𑀓𑀺𑀭𑀻𑀬𑀢𑀼;

𑀥𑀫𑁆𑀫𑀁 𑀫𑁂 𑀪𑀡𑀫𑀸𑀦𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀺.

𑁮𑁧. 𑀦𑁄 𑀘𑁂 𑀅𑀲𑁆𑀲 𑀲𑀓𑀸 𑀩𑀼𑀤𑁆𑀥𑀺, 𑀯𑀺𑀦𑀬𑁄 𑀯𑀸 𑀲𑀼𑀲𑀺𑀓𑁆𑀔𑀺𑀢𑁄;

𑀯𑀦𑁂 𑀅𑀦𑁆𑀥𑀫𑀳𑀺𑀁𑀲𑁄𑀯 [𑀅𑀦𑁆𑀥𑀫𑀳𑀺𑀲𑁄𑀯 (𑀲𑀻. 𑀧𑀻.)] 𑀘𑀭𑁂𑀬𑁆𑀬 𑀩𑀳𑀼𑀓𑁄 𑀚𑀦𑁄.

𑁮𑁨. 𑀬𑀲𑁆𑀫𑀸 𑀘 𑀧𑀦𑀺𑀥𑁂𑀓𑀘𑁆𑀘𑁂, 𑀆𑀘𑁂𑀭𑀫𑁆𑀳𑀺 [𑀆𑀘𑀸𑀭𑀫𑁆𑀳𑀺 (𑀲𑀻. 𑀧𑀻.)] 𑀲𑀼𑀲𑀺𑀓𑁆𑀔𑀺𑀢𑀸;

𑀢𑀲𑁆𑀫𑀸 𑀯𑀺𑀦𑀻𑀢𑀯𑀺𑀦𑀬𑀸, 𑀘𑀭𑀦𑁆𑀢𑀺 𑀲𑀼𑀲𑀫𑀸𑀳𑀺𑀢𑀸𑀢𑀺.

𑀕𑀦𑁆𑀥𑀸𑀭𑀚𑀸𑀢𑀓𑀁 𑀧𑀞𑀫𑀁.

𑁪𑁦𑁭. 𑀫𑀳𑀸𑀓𑀧𑀺𑀚𑀸𑀢𑀓𑀁 (𑁭-𑁨-𑁨)

𑁮𑁩. 𑀅𑀢𑁆𑀢𑀸𑀦𑀁 𑀲𑀗𑁆𑀓𑀫𑀁 𑀓𑀢𑁆𑀯𑀸, 𑀬𑁄 𑀲𑁄𑀢𑁆𑀣𑀺𑀁 𑀲𑀫𑀢𑀸𑀭𑀬𑀺;

𑀓𑀺𑀁 𑀢𑁆𑀯𑀁 𑀢𑁂𑀲𑀁 𑀓𑀺𑀫𑁂 [𑀓𑀺𑀫𑁄 (𑀲𑀻. 𑀧𑀻.), 𑀓𑀺𑀁 𑀫𑁂 (𑀲𑁆𑀬𑀸.)] 𑀢𑀼𑀬𑁆𑀳𑀁, 𑀳𑁄𑀦𑁆𑀢𑀺 𑀏𑀢𑁂 [𑀳𑁂𑀢𑁂 (𑀲𑁆𑀬𑀸.), 𑀲𑁄 𑀢𑁂 (𑀓.)] 𑀫𑀳𑀸𑀓𑀧𑀺.

𑁮𑁪. 𑀭𑀸𑀚𑀸𑀳𑀁 𑀇𑀲𑁆𑀲𑀭𑁄 𑀢𑁂𑀲𑀁, 𑀬𑀽𑀣𑀲𑁆𑀲 𑀧𑀭𑀺𑀳𑀸𑀭𑀓𑁄;

𑀢𑁂𑀲𑀁 𑀲𑁄𑀓𑀧𑀭𑁂𑀢𑀸𑀦𑀁, 𑀪𑀻𑀢𑀸𑀦𑀁 𑀢𑁂 𑀅𑀭𑀺𑀦𑁆𑀤𑀫.

𑁮𑁫. 𑀉𑀮𑁆𑀮𑀗𑁆𑀖𑀬𑀺𑀢𑁆𑀯𑀸 [𑀲 𑀮𑀗𑁆𑀖𑀬𑀺𑀢𑁆𑀯𑀸 (𑀧𑀻.), 𑀲𑀼𑀮𑀗𑁆𑀖𑀬𑀺𑀢𑁆𑀯𑀸 (𑀓.)] 𑀅𑀢𑁆𑀢𑀸𑀦𑀁, 𑀯𑀺𑀲𑁆𑀲𑀝𑁆𑀞𑀥𑀦𑀼𑀦𑁄 𑀲𑀢𑀁;

𑀢𑀢𑁄 𑀅𑀧𑀭𑀧𑀸𑀤𑁂𑀲𑀼, 𑀤𑀴𑁆𑀳𑀁 𑀩𑀦𑁆𑀥𑀁 𑀮𑀢𑀸𑀕𑀼𑀡𑀁.

𑁮𑁬. 𑀙𑀺𑀦𑁆𑀦𑀩𑁆𑀪𑀫𑀺𑀯 𑀯𑀸𑀢𑁂𑀦, 𑀦𑀼𑀡𑁆𑀡𑁄 [𑀦𑀼𑀦𑁆𑀦𑁄 (𑀲𑀻.)] 𑀭𑀼𑀓𑁆𑀔𑀁 𑀉𑀧𑀸𑀕𑀫𑀺𑀁;

𑀲𑁄𑀳𑀁 𑀅𑀧𑁆𑀧𑀪𑀯𑀁 𑀢𑀢𑁆𑀣, 𑀲𑀸𑀔𑀁 𑀳𑀢𑁆𑀣𑁂𑀳𑀺 𑀅𑀕𑁆𑀕𑀳𑀺𑀁.

𑁮𑁭. 𑀢𑀁 𑀫𑀁 𑀯𑀺𑀬𑀸𑀬𑀢𑀁 𑀲𑀦𑁆𑀢𑀁, 𑀲𑀸𑀔𑀸𑀬 𑀘 𑀮𑀢𑀸𑀬 𑀘;

𑀲𑀫𑀦𑀼𑀓𑁆𑀓𑀫𑀦𑁆𑀢𑀸 𑀧𑀸𑀤𑁂𑀳𑀺, 𑀲𑁄𑀢𑁆𑀣𑀺𑀁 𑀲𑀸𑀔𑀸𑀫𑀺𑀕𑀸 𑀕𑀢𑀸.

𑁮𑁮. 𑀢𑀁 𑀫𑀁 𑀦 𑀢𑀧𑀢𑁂 𑀩𑀦𑁆𑀥𑁄, 𑀫𑀢𑁄 [𑀯𑀥𑁄 (𑀲𑀻. 𑀲𑁆𑀬𑀸. 𑀧𑀻.)] 𑀫𑁂 𑀦 𑀢𑀧𑁂𑀲𑁆𑀲𑀢𑀺;

𑀲𑀼𑀔𑀫𑀸𑀳𑀭𑀺𑀢𑀁 𑀢𑁂𑀲𑀁, 𑀬𑁂𑀲𑀁 𑀭𑀚𑁆𑀚𑀫𑀓𑀸𑀭𑀬𑀺𑀁.

𑁮𑁯. 𑀏𑀲𑀸 𑀢𑁂 𑀉𑀧𑀫𑀸 𑀭𑀸𑀚, 𑀢𑀁 𑀲𑀼𑀡𑁄𑀳𑀺 𑀅𑀭𑀺𑀦𑁆𑀤𑀫 [𑀅𑀢𑁆𑀣𑀲𑀦𑁆𑀤𑀲𑁆𑀲𑀦𑀻 𑀓𑀢𑀸 (𑀧𑀻.)];

𑀭𑀜𑁆𑀜𑀸 𑀭𑀝𑁆𑀞𑀲𑁆𑀲 𑀬𑁄𑀕𑁆𑀕𑀲𑁆𑀲, 𑀩𑀮𑀲𑁆𑀲 𑀦𑀺𑀕𑀫𑀲𑁆𑀲 𑀘;

𑀲𑀩𑁆𑀩𑁂𑀲𑀁 𑀲𑀼𑀔𑀫𑁂𑀝𑁆𑀞𑀩𑁆𑀩𑀁, 𑀔𑀢𑁆𑀢𑀺𑀬𑁂𑀦 𑀧𑀚𑀸𑀦𑀢𑀸𑀢𑀺.

𑀫𑀳𑀸𑀓𑀧𑀺𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁪𑁦𑁮. 𑀓𑀼𑀫𑁆𑀪𑀓𑀸𑀭𑀚𑀸𑀢𑀓𑀁 (𑁭-𑁨-𑁩)

𑁯𑁦. 𑀅𑀫𑁆𑀩𑀸𑀳𑀫𑀤𑁆𑀤𑀁 𑀯𑀦𑀫𑀦𑁆𑀢𑀭𑀲𑁆𑀫𑀺𑀁, 𑀦𑀻𑀮𑁄𑀪𑀸𑀲𑀁 𑀨𑀮𑀺𑀢𑀁 [𑀨𑀮𑀺𑀦𑀁 (𑀧𑀻.)] 𑀲𑀁𑀯𑀺𑀭𑀽𑀴𑁆𑀳𑀁;

𑀢𑀫𑀤𑁆𑀤𑀲𑀁 𑀨𑀮𑀳𑁂𑀢𑀼 𑀯𑀺𑀪𑀕𑁆𑀕𑀁, 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀸𑀫𑀺.

𑁯𑁧. 𑀲𑁂𑀮𑀁 𑀲𑀼𑀫𑀝𑁆𑀞𑀁 𑀦𑀭𑀯𑀻𑀭𑀦𑀺𑀝𑁆𑀞𑀺𑀢𑀁 [𑀦𑀭𑀯𑀺𑀤𑁆𑀤𑀼𑀦𑀺𑀝𑁆𑀞𑀺𑀢𑀁 (𑀓.)], 𑀦𑀸𑀭𑀻 𑀬𑀼𑀕𑀁 𑀥𑀸𑀭𑀬𑀺 𑀅𑀧𑁆𑀧𑀲𑀤𑁆𑀤𑀁;

𑀤𑀼𑀢𑀺𑀬𑀜𑁆𑀘 𑀆𑀕𑀫𑁆𑀫 𑀅𑀳𑁄𑀲𑀺 𑀲𑀤𑁆𑀤𑁄, 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀸𑀫𑀺.

𑁯𑁨. 𑀤𑀺𑀚𑀸 𑀤𑀺𑀚𑀁 𑀓𑀼𑀡𑀧𑀫𑀸𑀳𑀭𑀦𑁆𑀢𑀁, 𑀏𑀓𑀁 𑀲𑀫𑀸𑀦𑀁 𑀩𑀳𑀼𑀓𑀸 𑀲𑀫𑁂𑀘𑁆𑀘;

𑀆𑀳𑀸𑀭𑀳𑁂𑀢𑀽 𑀧𑀭𑀺𑀧𑀸𑀢𑀬𑀺𑀁𑀲𑀼, 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀸𑀫𑀺.

𑁯𑁩. 𑀉𑀲𑀪𑀸𑀳𑀫𑀤𑁆𑀤𑀁 𑀬𑀽𑀣𑀲𑁆𑀲 𑀫𑀚𑁆𑀛𑁂, 𑀘𑀮𑀓𑁆𑀓𑀓𑀼𑀁 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑀁;

𑀢𑀫𑀤𑁆𑀤𑀲𑀁 𑀓𑀸𑀫𑀳𑁂𑀢𑀼 𑀯𑀺𑀢𑀼𑀦𑁆𑀦𑀁, 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀸𑀫𑀺.

𑁯𑁪. 𑀓𑀭𑀡𑁆𑀟𑀓𑁄 [𑀓𑀭𑀡𑁆𑀟𑀼𑀦𑀸𑀫 (𑀲𑀻. 𑀧𑀻.)] 𑀓𑀮𑀺𑀗𑁆𑀕𑀸𑀦𑀁, 𑀕𑀦𑁆𑀥𑀸𑀭𑀸𑀦𑀜𑁆𑀘 𑀦𑀕𑁆𑀕𑀚𑀺;

𑀦𑀺𑀫𑀺𑀭𑀸𑀚𑀸 𑀯𑀺𑀤𑁂𑀳𑀸𑀦𑀁, 𑀧𑀜𑁆𑀘𑀸𑀮𑀸𑀦𑀜𑁆𑀘 𑀤𑀼𑀫𑁆𑀫𑀼𑀔𑁄;

𑀏𑀢𑁂 𑀭𑀝𑁆𑀞𑀸𑀦𑀺 𑀳𑀺𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁𑀲𑀼 𑀅𑀓𑀺𑀜𑁆𑀘𑀦𑀸.

𑁯𑁫. 𑀲𑀩𑁆𑀩𑁂𑀧𑀺𑀫𑁂 𑀤𑁂𑀯𑀲𑀫𑀸 𑀲𑀫𑀸𑀕𑀢𑀸, 𑀅𑀕𑁆𑀕𑀻 𑀬𑀣𑀸 𑀧𑀚𑁆𑀚𑀮𑀺𑀢𑁄 𑀢𑀣𑁂𑀯𑀺𑀫𑁂;

𑀅𑀳𑀫𑁆𑀧𑀺 𑀏𑀓𑁄 𑀘𑀭𑀺𑀲𑁆𑀲𑀸𑀫𑀺 𑀪𑀕𑁆𑀕𑀯𑀺, 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀺.

𑁯𑁬. 𑀅𑀬𑀫𑁂𑀯 𑀓𑀸𑀮𑁄 𑀦 𑀳𑀺 𑀅𑀜𑁆𑀜𑁄 𑀅𑀢𑁆𑀣𑀺, 𑀅𑀦𑀼𑀲𑀸𑀲𑀺𑀢𑀸 𑀫𑁂 𑀦 𑀪𑀯𑁂𑀬𑁆𑀬 𑀧𑀘𑁆𑀙𑀸;

𑀅𑀳𑀫𑁆𑀧𑀺 𑀏𑀓𑀸 𑀘𑀭𑀺𑀲𑁆𑀲𑀸𑀫𑀺 𑀪𑀕𑁆𑀕𑀯, 𑀲𑀓𑀼𑀡𑀻𑀯 𑀫𑀼𑀢𑁆𑀢𑀸 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀸.

𑁯𑁭. 𑀆𑀫𑀁 𑀧𑀓𑁆𑀓𑀜𑁆𑀘 𑀚𑀸𑀦𑀦𑁆𑀢𑀺, 𑀅𑀣𑁄 𑀮𑁄𑀡𑀁 𑀅𑀮𑁄𑀡𑀓𑀁;

𑀢𑀫𑀳𑀁 𑀤𑀺𑀲𑁆𑀯𑀸𑀦 𑀧𑀩𑁆𑀩𑀚𑀺𑀁, 𑀘𑀭𑁂𑀯 𑀢𑁆𑀯𑀁 𑀘𑀭𑀸𑀫𑀳𑀦𑁆𑀢𑀺.

𑀓𑀼𑀫𑁆𑀪𑀓𑀸𑀭𑀚𑀸𑀢𑀓𑀁 𑀢𑀢𑀺𑀬𑀁.

𑁪𑁦𑁯. 𑀤𑀴𑁆𑀳𑀥𑀫𑁆𑀫𑀚𑀸𑀢𑀓𑀁 (𑁭-𑁨-𑁪)

𑁯𑁮. 𑀅𑀳𑀁 𑀘𑁂 𑀤𑀴𑁆𑀳𑀥𑀫𑁆𑀫𑀲𑁆𑀲 [𑀤𑀴𑁆𑀳𑀥𑀫𑁆𑀫𑀸𑀬 (𑀧𑀻.)], 𑀯𑀳𑀦𑁆𑀢𑀺 𑀦𑀸𑀪𑀺𑀭𑀸𑀥𑀬𑀺𑀁;

𑀥𑀭𑀦𑁆𑀢𑀻 𑀉𑀭𑀲𑀺 𑀲𑀮𑁆𑀮𑀁, 𑀬𑀼𑀤𑁆𑀥𑁂 𑀯𑀺𑀓𑁆𑀓𑀦𑁆𑀢𑀘𑀸𑀭𑀺𑀦𑀻.

𑁯𑁯. 𑀦𑀽𑀦 𑀭𑀸𑀚𑀸 𑀦 𑀚𑀸𑀦𑀸𑀢𑀺 [𑀦 𑀳 𑀦𑀽𑀦 𑀭𑀸𑀚𑀸 𑀚𑀸𑀦𑀸𑀢𑀺 (𑀲𑀻. 𑀧𑀻.)], 𑀫𑀫 𑀯𑀺𑀓𑁆𑀓𑀫𑀧𑁄𑀭𑀺𑀲𑀁;

𑀲𑀗𑁆𑀕𑀸𑀫𑁂 𑀲𑀼𑀓𑀢𑀦𑁆𑀢𑀸𑀦𑀺, 𑀤𑀽𑀢𑀯𑀺𑀧𑁆𑀧𑀳𑀺𑀢𑀸𑀦𑀺 𑀘.

𑁧𑁦𑁦. 𑀲𑀸 𑀦𑀽𑀦𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀅𑀩𑀦𑁆𑀥𑀼 𑀅𑀧𑀭𑀸𑀬𑀺𑀦𑀻 [𑀅𑀧𑀭𑀸𑀬𑀺𑀡𑀻 (𑀲𑀻.), 𑀅𑀧𑀭𑀸𑀬𑀡𑀻 (?)];

𑀢𑀤𑀸 𑀳𑀺 [𑀢𑀣𑀸 𑀳𑀺 (𑀧𑀻.)] 𑀓𑀼𑀫𑁆𑀪𑀓𑀸𑀭𑀲𑁆𑀲, 𑀤𑀺𑀦𑁆𑀦𑀸 𑀙𑀓𑀡𑀳𑀸𑀭𑀺𑀓𑀸.

𑁧𑁦𑁧. 𑀬𑀸𑀯𑀢𑀸𑀲𑀻𑀲𑀢𑀻 𑀧𑁄𑀲𑁄, 𑀢𑀸𑀯𑀤𑁂𑀯 𑀧𑀯𑀻𑀡𑀢𑀺;

𑀅𑀢𑁆𑀣𑀸𑀧𑀸𑀬𑁂 𑀚𑀳𑀦𑁆𑀢𑀺 𑀦𑀁, 𑀑𑀝𑁆𑀞𑀺𑀩𑁆𑀬𑀸𑀥𑀺𑀁𑀯 𑀔𑀢𑁆𑀢𑀺𑀬𑁄.

𑁧𑁦𑁨. 𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀓𑀢𑀢𑁆𑀣𑁄 𑀦𑀸𑀯𑀩𑀼𑀚𑁆𑀛𑀢𑀺;

𑀅𑀢𑁆𑀣𑀸 𑀢𑀲𑁆𑀲 𑀧𑀮𑀼𑀚𑁆𑀚𑀦𑁆𑀢𑀺, 𑀬𑁂 𑀳𑁄𑀦𑁆𑀢𑀺 𑀅𑀪𑀺𑀧𑀢𑁆𑀣𑀺𑀢𑀸.

𑁧𑁦𑁩. 𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀓𑀢𑀢𑁆𑀣𑁄 𑀫𑀦𑀼𑀩𑀼𑀚𑁆𑀛𑀢𑀺;

𑀅𑀢𑁆𑀣𑀸 𑀢𑀲𑁆𑀲 𑀧𑀯𑀟𑁆𑀠𑀦𑁆𑀢𑀺, 𑀬𑁂 𑀳𑁄𑀦𑁆𑀢𑀺 𑀅𑀪𑀺𑀧𑀢𑁆𑀣𑀺𑀢𑀸.

𑁧𑁦𑁪. 𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀦𑁆𑀢𑁂 [𑀪𑀤𑁆𑀤𑀁 𑀯𑁄 (𑀲𑀻. 𑀲𑁆𑀬𑀸. 𑀧𑀻.)], 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀲𑀩𑁆𑀩𑁂 𑀓𑀢𑀜𑁆𑀜𑀼𑀦𑁄 𑀳𑁄𑀣, 𑀘𑀺𑀭𑀁 𑀲𑀕𑁆𑀕𑀫𑁆𑀳𑀺 𑀞𑀲𑁆𑀲𑀣𑀸𑀢𑀺.

𑀤𑀴𑁆𑀳𑀥𑀫𑁆𑀫𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁪𑁧𑁦. 𑀲𑁄𑀫𑀤𑀢𑁆𑀢𑀚𑀸𑀢𑀓𑀁 (𑁭-𑁨-𑁫)

𑁧𑁦𑁫. 𑀬𑁄 𑀫𑀁 𑀧𑀼𑀭𑁂 𑀧𑀘𑁆𑀘𑀼𑀟𑁆𑀟𑁂𑀢𑀺 [𑀧𑀘𑁆𑀘𑀼𑀤𑁂𑀢𑀺 (𑀲𑀻. 𑀲𑁆𑀬𑀸. 𑀧𑀻.), 𑀧𑀘𑁆𑀘𑀼𑀝𑁆𑀞𑁂𑀢𑀺 (𑀓.)], 𑀅𑀭𑀜𑁆𑀜𑁂 𑀤𑀽𑀭𑀫𑀸𑀬𑀢𑁄;

𑀲𑁄 𑀦 𑀤𑀺𑀲𑁆𑀲𑀢𑀺 𑀫𑀸𑀢𑀗𑁆𑀕𑁄, 𑀲𑁄𑀫𑀤𑀢𑁆𑀢𑁄 𑀓𑀼𑀳𑀺𑀁 𑀕𑀢𑁄.

𑁧𑁦𑁬. 𑀅𑀬𑀁 𑀯𑀸 𑀲𑁄 𑀫𑀢𑁄 𑀲𑁂𑀢𑀺, 𑀅𑀮𑁆𑀮𑀲𑀺𑀗𑁆𑀕𑀁𑀯 𑀯𑀘𑁆𑀙𑀺𑀢𑁄 [𑀅𑀮𑁆𑀮𑀧𑀺𑀗𑁆𑀓𑀯 𑀙𑀺𑀚𑁆𑀚𑀺𑀢𑁄 (𑀲𑀻. 𑀧𑀻.), 𑀅𑀮𑁆𑀮𑀧𑀻𑀢𑀁𑀯 𑀯𑀺𑀘𑁆𑀙𑀺𑀢𑁄 (𑀲𑁆𑀬𑀸.)];

𑀪𑀼𑀫𑁆𑀬𑀸 𑀦𑀺𑀧𑀢𑀺𑀢𑁄 𑀲𑁂𑀢𑀺, 𑀅𑀫𑀭𑀸 𑀯𑀢 𑀓𑀼𑀜𑁆𑀚𑀭𑁄.

𑁧𑁦𑁭. 𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀢𑁂 𑀲𑀢𑁄;

𑀲𑀫𑀡𑀲𑁆𑀲 𑀦 𑀢𑀁 𑀲𑀸𑀥𑀼, 𑀬𑀁 𑀧𑁂𑀢𑀫𑀦𑀼𑀲𑁄𑀘𑀲𑀺.

𑁧𑁦𑁮. 𑀲𑀁𑀯𑀸𑀲𑁂𑀦 𑀳𑀯𑁂 𑀲𑀓𑁆𑀓, 𑀫𑀦𑀼𑀲𑁆𑀲𑀲𑁆𑀲 𑀫𑀺𑀕𑀲𑁆𑀲 𑀯𑀸;

𑀳𑀤𑀬𑁂 𑀚𑀸𑀬𑀢𑁂 𑀧𑁂𑀫𑀁, 𑀢𑀁 𑀦 𑀲𑀓𑁆𑀓𑀸 𑀅𑀲𑁄𑀘𑀺𑀢𑀼𑀁.

𑁧𑁦𑁯. 𑀫𑀢𑀁 𑀫𑀭𑀺𑀲𑁆𑀲𑀁 𑀭𑁄𑀤𑀦𑁆𑀢𑀺, 𑀬𑁂 𑀭𑀼𑀤𑀦𑁆𑀢𑀺 𑀮𑀧𑀦𑁆𑀢𑀺 𑀘;

𑀢𑀲𑁆𑀫𑀸 𑀢𑁆𑀯𑀁 𑀇𑀲𑀺 𑀫𑀸 𑀭𑁄𑀤𑀺, 𑀭𑁄𑀤𑀺𑀢𑀁 𑀫𑁄𑀖𑀫𑀸𑀳𑀼 𑀲𑀦𑁆𑀢𑁄.

𑁧𑁧𑁦. 𑀓𑀦𑁆𑀤𑀺𑀢𑁂𑀦 𑀳𑀯𑁂 𑀩𑁆𑀭𑀳𑁆𑀫𑁂, 𑀫𑀢𑁄 𑀧𑁂𑀢𑁄 𑀲𑀫𑀼𑀝𑁆𑀞𑀳𑁂;

𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀭𑁄𑀤𑀸𑀫, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀜𑀸𑀢𑀓𑁂.

𑁧𑁧𑁧. 𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁧𑁨. 𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁧𑁩. 𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀯𑀸𑀲𑀯𑀸𑀢𑀺.

𑀲𑁄𑀫𑀤𑀢𑁆𑀢𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁪𑁧𑁧. 𑀲𑀼𑀲𑀻𑀫𑀚𑀸𑀢𑀓𑀁 (𑁭-𑁨-𑁬)

𑁧𑁧𑁪. 𑀓𑀸𑀴𑀸𑀦𑀺 𑀓𑁂𑀲𑀸𑀦𑀺 𑀧𑀼𑀭𑁂 𑀅𑀳𑁂𑀲𑀼𑀁, 𑀚𑀸𑀢𑀸𑀦𑀺 𑀲𑀻𑀲𑀫𑁆𑀳𑀺 𑀬𑀣𑀸𑀧𑀤𑁂𑀲𑁂;

𑀢𑀸𑀦𑀚𑁆𑀚 𑀲𑁂𑀢𑀸𑀦𑀺 𑀲𑀼𑀲𑀻𑀫 [𑀲𑀼𑀲𑀺𑀫 (𑀓.)] 𑀤𑀺𑀲𑁆𑀯𑀸, 𑀥𑀫𑁆𑀫𑀁 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑀸𑀮𑁄.

𑁧𑁧𑁫. 𑀫𑀫𑁂𑀯 𑀤𑁂𑀯 𑀧𑀮𑀺𑀢𑀁 𑀦 𑀢𑀼𑀬𑁆𑀳𑀁, 𑀫𑀫𑁂𑀯 𑀲𑀻𑀲𑀁 𑀫𑀫 𑀉𑀢𑁆𑀢𑀫𑀗𑁆𑀕𑀁;

‘‘𑀅𑀢𑁆𑀣𑀁 𑀓𑀭𑀺𑀲𑁆𑀲’’𑀦𑁆𑀢𑀺 𑀫𑀼𑀲𑀸 𑀅𑀪𑀸𑀡𑀺𑀁 [𑀅𑀪𑀸𑀲𑀺𑀁 (𑀓.)], 𑀏𑀓𑀸𑀧𑀭𑀸𑀥𑀁 𑀔𑀫 𑀭𑀸𑀚𑀲𑁂𑀝𑁆𑀞.

𑁧𑁧𑁬. 𑀤𑀳𑀭𑁄 𑀢𑀼𑀯𑀁 𑀤𑀲𑁆𑀲𑀦𑀺𑀬𑁄𑀲𑀺 𑀭𑀸𑀚, 𑀧𑀞𑀫𑀼𑀕𑁆𑀕𑀢𑁄 𑀳𑁄𑀲𑀺 [𑀳𑁄𑀳𑀺 (𑀲𑀻.), 𑀳𑁄𑀢𑀺 (𑀓.)] 𑀬𑀣𑀸 𑀓𑀴𑀻𑀭𑁄;

𑀭𑀚𑁆𑀚𑀜𑁆𑀘 𑀓𑀸𑀭𑁂𑀳𑀺 𑀫𑀫𑀜𑁆𑀘 𑀧𑀲𑁆𑀲, 𑀫𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀻 𑀚𑀦𑀺𑀦𑁆𑀤.

𑁧𑁧𑁭. 𑀧𑀲𑁆𑀲𑀸𑀫𑀺 𑀯𑁄𑀳𑀁 𑀤𑀳𑀭𑀺𑀁 𑀓𑀼𑀫𑀸𑀭𑀺𑀁, 𑀲𑀸𑀫𑀝𑁆𑀞𑀧𑀲𑁆𑀲𑀁 𑀲𑀼𑀢𑀦𑀼𑀁 𑀲𑀼𑀫𑀚𑁆𑀛𑀁;

𑀓𑀸𑀴𑀧𑁆𑀧𑀯𑀸𑀴𑀸𑀯 𑀧𑀯𑁂𑀮𑁆𑀮𑀫𑀸𑀦𑀸, 𑀧𑀮𑁄𑀪𑀬𑀦𑁆𑀢𑀻𑀯 [𑀲𑀸 𑀮𑁄𑀪𑀬𑀦𑁆𑀢𑀻𑀯 (𑀧𑀻.)] 𑀦𑀭𑁂𑀲𑀼 𑀕𑀘𑁆𑀙𑀢𑀺.

𑁧𑁧𑁮. 𑀢𑀫𑁂𑀦 𑀧𑀲𑁆𑀲𑀸𑀫𑀺𑀧𑀭𑁂𑀦 𑀦𑀸𑀭𑀺𑀁, 𑀆𑀲𑀻𑀢𑀺𑀓𑀁 𑀦𑀸𑀯𑀼𑀢𑀺𑀓𑀁 𑀯 𑀚𑀘𑁆𑀘𑀸;

𑀤𑀡𑁆𑀟𑀁 𑀕𑀳𑁂𑀢𑁆𑀯𑀸𑀦 𑀧𑀯𑁂𑀥𑀫𑀸𑀦𑀁, 𑀕𑁄𑀧𑀸𑀦𑀲𑀻𑀪𑁄𑀕𑁆𑀕𑀲𑀫𑀁 𑀘𑀭𑀦𑁆𑀢𑀺𑀁.

𑁧𑁧𑁯. 𑀲𑁄𑀳𑀁 𑀢𑀫𑁂𑀯𑀸𑀦𑀼𑀯𑀺𑀘𑀺𑀦𑁆𑀢𑀬𑀦𑁆𑀢𑁄, 𑀏𑀓𑁄 𑀲𑀬𑀸𑀫𑀺 [𑀧𑀲𑁆𑀲𑀸𑀫𑀺 (𑀓.)] 𑀲𑀬𑀦𑀲𑁆𑀲 𑀫𑀚𑁆𑀛𑁂;

‘‘𑀅𑀳𑀫𑁆𑀧𑀺 𑀏𑀯𑀁’’ 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀦 𑀕𑀳𑁂 𑀭𑀫𑁂 [𑀦 𑀕𑁂𑀳𑁂 𑀭𑀫𑁂 (𑀲𑀻.), 𑀕𑁂𑀳𑁂 𑀦 𑀭𑀫𑁂 (𑀲𑁆𑀬𑀸. 𑀓.)] 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑀸𑀮𑁄.

𑁧𑁨𑁦. 𑀭𑀚𑁆𑀚𑀼𑀯𑀸𑀮𑀫𑁆𑀩𑀦𑀻 𑀘𑁂𑀲𑀸, 𑀬𑀸 𑀕𑁂𑀳𑁂 𑀯𑀲𑀢𑁄 𑀭𑀢𑀺;

𑀏𑀯𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸𑀢𑀺.

𑀲𑀼𑀲𑀻𑀫𑀚𑀸𑀢𑀓𑀁 𑀙𑀝𑁆𑀞𑀁.

𑁪𑁧𑁨. 𑀓𑁄𑀝𑀲𑀺𑀫𑁆𑀩𑀮𑀺𑀚𑀸𑀢𑀓𑀁 (𑁭-𑁨-𑁭)

𑁧𑁨𑁧. 𑀅𑀳𑀁 𑀤𑀲𑀲𑀢𑀁𑀩𑁆𑀬𑀸𑀫𑀁, 𑀉𑀭𑀕𑀫𑀸𑀤𑀸𑀬 𑀆𑀕𑀢𑁄;

𑀢𑀜𑁆𑀘 𑀫𑀜𑁆𑀘 𑀫𑀳𑀸𑀓𑀸𑀬𑀁, 𑀥𑀸𑀭𑀬𑀁 𑀦𑀧𑁆𑀧𑀯𑁂𑀥𑀲𑀺 [𑀦 𑀧𑀯𑁂𑀥𑀬𑀺 (𑀓.)].

𑁧𑁨𑁨. 𑀅𑀣𑀺𑀫𑀁 𑀔𑀼𑀤𑁆𑀤𑀓𑀁 𑀧𑀓𑁆𑀔𑀺𑀁, 𑀅𑀧𑁆𑀧𑀫𑀁𑀲𑀢𑀭𑀁 𑀫𑀬𑀸;

𑀥𑀸𑀭𑀬𑀁 𑀩𑁆𑀬𑀣𑀲𑀺 [𑀩𑁆𑀬𑀸𑀥𑀲𑁂 (𑀲𑀻.), 𑀩𑁆𑀬𑀥𑀲𑁂 (𑀧𑀻.), 𑀩𑁆𑀬𑀸𑀥𑀲𑀺 (𑀓.)] 𑀪𑀻𑀢𑀸 [𑀪𑀻𑀢𑁄 (𑀲𑀻. 𑀲𑁆𑀬𑀸. 𑀧𑀻.)], 𑀓𑀫𑀢𑁆𑀣𑀁 𑀓𑁄𑀝𑀲𑀺𑀫𑁆𑀩𑀮𑀺 [𑀓𑁄𑀝𑀺𑀲𑀺𑀫𑁆𑀩𑀮𑀺 (𑀲𑀻. 𑀧𑀻.)].

𑁧𑁨𑁩. 𑀫𑀁𑀲𑀪𑀓𑁆𑀔𑁄 𑀢𑀼𑀯𑀁 𑀭𑀸𑀚, 𑀨𑀮𑀪𑀓𑁆𑀔𑁄 𑀅𑀬𑀁 𑀤𑀺𑀚𑁄;

𑀅𑀬𑀁 𑀦𑀺𑀕𑁆𑀭𑁄𑀥𑀩𑀻𑀚𑀸𑀦𑀺, 𑀧𑀺𑀮𑀓𑁆𑀔𑀼𑀤𑀼𑀫𑁆𑀩𑀭𑀸𑀦𑀺 𑀘;

𑀅𑀲𑁆𑀲𑀢𑁆𑀣𑀸𑀦𑀺 𑀘 𑀪𑀓𑁆𑀔𑀺𑀢𑁆𑀯𑀸, 𑀔𑀦𑁆𑀥𑁂 𑀫𑁂 𑀑𑀳𑀤𑀺𑀲𑁆𑀲𑀢𑀺.

𑁧𑁨𑁪. 𑀢𑁂 𑀭𑀼𑀓𑁆𑀔𑀸 𑀲𑀁𑀯𑀺𑀭𑀽𑀳𑀦𑁆𑀢𑀺, 𑀫𑀫 𑀧𑀲𑁆𑀲𑁂 𑀦𑀺𑀯𑀸𑀢𑀚𑀸;

𑀢𑁂 𑀫𑀁 𑀧𑀭𑀺𑀬𑁄𑀦𑀦𑁆𑀥𑀺𑀲𑁆𑀲𑀦𑁆𑀢𑀺, 𑀅𑀭𑀼𑀓𑁆𑀔𑀁 𑀫𑀁 𑀓𑀭𑀺𑀲𑁆𑀲𑀭𑁂.

𑁧𑁨𑁫. 𑀲𑀦𑁆𑀢𑀺 𑀅𑀜𑁆𑀜𑁂𑀧𑀺 𑀭𑀼𑀓𑁆𑀔𑀸 𑀲𑁂, 𑀫𑀽𑀮𑀺𑀦𑁄 𑀔𑀦𑁆𑀥𑀺𑀦𑁄 𑀤𑀼𑀫𑀸;

𑀇𑀫𑀺𑀦𑀸 𑀲𑀓𑀼𑀡𑀚𑀸𑀢𑁂𑀦, 𑀩𑀻𑀚𑀫𑀸𑀳𑀭𑀺𑀢𑀸 𑀳𑀢𑀸.

𑁧𑁨𑁬. 𑀅𑀚𑁆𑀛𑀸𑀭𑀽𑀳𑀸𑀪𑀺𑀯𑀟𑁆𑀠𑀦𑁆𑀢𑀺 [𑀅𑀚𑁆𑀛𑀸𑀭𑀽𑀴𑁆𑀳𑀸𑀪𑀺𑀯𑀟𑁆𑀠𑀦𑁆𑀢𑀺 (𑀲𑀻. 𑀧𑀻.)], 𑀩𑁆𑀭𑀳𑀦𑁆𑀢𑀫𑁆𑀧𑀺 𑀯𑀦𑀧𑁆𑀧𑀢𑀺𑀁;

𑀢𑀲𑁆𑀫𑀸 𑀭𑀸𑀚 𑀧𑀯𑁂𑀥𑀸𑀫𑀺, 𑀲𑀫𑁆𑀧𑀲𑁆𑀲𑀁𑀦𑀸𑀕𑀢𑀁 𑀪𑀬𑀁.

𑁧𑁨𑁭. 𑀲𑀗𑁆𑀓𑁂𑀬𑁆𑀬 𑀲𑀗𑁆𑀓𑀺𑀢𑀩𑁆𑀩𑀸𑀦𑀺, 𑀭𑀓𑁆𑀔𑁂𑀬𑁆𑀬𑀸𑀦𑀸𑀕𑀢𑀁 𑀪𑀬𑀁;

𑀅𑀦𑀸𑀕𑀢𑀪𑀬𑀸 𑀥𑀻𑀭𑁄, 𑀉𑀪𑁄 𑀮𑁄𑀓𑁂 𑀅𑀯𑁂𑀓𑁆𑀔𑀢𑀻𑀢𑀺.

𑀓𑁄𑀝𑀲𑀺𑀫𑁆𑀩𑀮𑀺𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁪𑁧𑁩. 𑀥𑀽𑀫𑀓𑀸𑀭𑀺𑀚𑀸𑀢𑀓𑀁 (𑁭-𑁨-𑁮)

𑁧𑁨𑁮. 𑀭𑀸𑀚𑀸 𑀅𑀧𑀼𑀘𑁆𑀙𑀺 𑀯𑀺𑀥𑀼𑀭𑀁, 𑀥𑀫𑁆𑀫𑀓𑀸𑀫𑁄 𑀬𑀼𑀥𑀺𑀝𑁆𑀞𑀺𑀮𑁄;

𑀅𑀧𑀺 𑀩𑁆𑀭𑀸𑀳𑁆𑀫𑀡 𑀚𑀸𑀦𑀸𑀲𑀺, 𑀓𑁄 𑀏𑀓𑁄 𑀩𑀳𑀼 𑀲𑁄𑀘𑀢𑀺.

𑁧𑁨𑁯. 𑀩𑁆𑀭𑀸𑀳𑁆𑀫𑀡𑁄 𑀅𑀚𑀬𑀽𑀣𑁂𑀦, 𑀧𑀳𑀽𑀢𑁂𑀥𑁄 [𑀩𑀳𑀽𑀢𑁂𑀚𑁄 (𑀧𑀻. 𑀓.), 𑀩𑀳𑀼𑀢𑁂𑀦𑁆𑀤𑁄 (𑀲𑁆𑀬𑀸.)] 𑀯𑀦𑁂 𑀯𑀲𑀁;

𑀥𑀽𑀫𑀁 𑀅𑀓𑀸𑀲𑀺 𑀯𑀸𑀲𑁂𑀝𑁆𑀞𑁄, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄.

𑁧𑁩𑁦. 𑀢𑀲𑁆𑀲 𑀢𑀁 𑀥𑀽𑀫𑀕𑀦𑁆𑀥𑁂𑀦, 𑀲𑀭𑀪𑀸 𑀫𑀓𑀲𑀟𑁆𑀟𑀺𑀢𑀸 [𑀫𑀓𑀲𑀤𑁆𑀤𑀺𑀢𑀸 (𑀲𑀻. 𑀲𑁆𑀬𑀸.), 𑀫𑀓𑀲𑀝𑁆𑀝𑀺𑀢𑀸 (𑀧𑀻. 𑀓.)];

𑀯𑀲𑁆𑀲𑀸𑀯𑀸𑀲𑀁 𑀉𑀧𑀸𑀕𑀘𑁆𑀙𑀼𑀁, 𑀥𑀽𑀫𑀓𑀸𑀭𑀺𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁩𑁧. 𑀲𑀭𑀪𑁂𑀲𑀼 𑀫𑀦𑀁 𑀓𑀢𑁆𑀯𑀸, 𑀅𑀚𑀸 𑀲𑁄 𑀦𑀸𑀯𑀩𑀼𑀚𑁆𑀛𑀣;

𑀆𑀕𑀘𑁆𑀙𑀦𑁆𑀢𑀻 𑀯𑀚𑀦𑁆𑀢𑀻 𑀯𑀸 [𑀆𑀕𑀘𑁆𑀙𑀦𑁆𑀢𑀺 𑀯𑀚𑀦𑁆𑀢𑀺 𑀯𑀸 (𑀲𑁆𑀬𑀸. 𑀧𑀻.), 𑀆𑀕𑀘𑁆𑀙𑀦𑁆𑀢𑀺𑀁 𑀯𑀚𑀦𑁆𑀢𑀺𑀁 𑀯𑀸 (𑀓.)], 𑀢𑀲𑁆𑀲 𑀢𑀸 𑀯𑀺𑀦𑀲𑀼𑀁 [𑀯𑀺𑀦𑀲𑁆𑀲𑀼𑀁 (𑀲𑀻.)] 𑀅𑀚𑀸.

𑁧𑁩𑁨. 𑀲𑀭𑀪𑀸 𑀲𑀭𑀤𑁂 𑀓𑀸𑀮𑁂, 𑀧𑀳𑀻𑀦𑀫𑀓𑀲𑁂 𑀯𑀦𑁂;

𑀧𑀸𑀯𑀺𑀲𑀼𑀁 𑀕𑀺𑀭𑀺𑀤𑀼𑀕𑁆𑀕𑀸𑀦𑀺, 𑀦𑀤𑀻𑀦𑀁 𑀧𑀪𑀯𑀸𑀦𑀺 𑀘.

𑁧𑁩𑁩. 𑀲𑀭𑀪𑁂 𑀘 𑀕𑀢𑁂 𑀤𑀺𑀲𑁆𑀯𑀸, 𑀅𑀚𑀸 𑀘 𑀯𑀺𑀪𑀯𑀁 𑀕𑀢𑀸 [𑀅𑀚𑁂 𑀘 𑀯𑀺𑀪𑀯𑀁 𑀕𑀢𑁂 (𑀓.)];

𑀓𑀺𑀲𑁄 𑀘 𑀯𑀺𑀯𑀡𑁆𑀡𑁄 𑀘𑀸𑀲𑀺, 𑀧𑀡𑁆𑀟𑀼𑀭𑁄𑀕𑀻 𑀘 𑀩𑁆𑀭𑀸𑀳𑁆𑀫𑀡𑁄.

𑁧𑁩𑁪. 𑀏𑀯𑀁 𑀬𑁄 𑀲𑀁 𑀦𑀺𑀭𑀁𑀓𑀢𑁆𑀯𑀸, 𑀆𑀕𑀦𑁆𑀢𑀼𑀁 𑀓𑀼𑀭𑀼𑀢𑁂 𑀧𑀺𑀬𑀁;

𑀲𑁄 𑀏𑀓𑁄 𑀩𑀳𑀼 𑀲𑁄𑀘𑀢𑀺, 𑀥𑀽𑀫𑀓𑀸𑀭𑀻𑀯 𑀩𑁆𑀭𑀸𑀳𑁆𑀫𑀡𑁄𑀢𑀺.

𑀥𑀽𑀫𑀓𑀸𑀭𑀺𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁪𑁧𑁪. 𑀚𑀸𑀕𑀭𑀚𑀸𑀢𑀓𑀁 (𑁭-𑁨-𑁯)

𑁧𑁩𑁫. 𑀓𑁄𑀥 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄, 𑀓𑁄𑀥 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑁄;

𑀓𑁄 𑀫𑀫𑁂𑀢𑀁 𑀯𑀺𑀚𑀸𑀦𑀸𑀢𑀺, 𑀓𑁄 𑀢𑀁 𑀧𑀝𑀺𑀪𑀡𑀸𑀢𑀺 𑀫𑁂.

𑁧𑁩𑁬. 𑀅𑀳𑀁 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄, 𑀅𑀳𑀁 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑁄;

𑀅𑀳𑀫𑁂𑀢𑀁 𑀯𑀺𑀚𑀸𑀦𑀸𑀫𑀺, 𑀅𑀳𑀁 𑀧𑀝𑀺𑀪𑀡𑀸𑀫𑀺 𑀢𑁂.

𑁧𑁩𑁭. 𑀓𑀣𑀁 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄, 𑀓𑀣𑀁 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑁄;

𑀓𑀣𑀁 𑀏𑀢𑀁 𑀯𑀺𑀚𑀸𑀦𑀸𑀲𑀺, 𑀓𑀣𑀁 𑀧𑀝𑀺𑀪𑀡𑀸𑀲𑀺 𑀫𑁂.

𑁧𑁩𑁮. 𑀬𑁂 𑀥𑀫𑁆𑀫𑀁 𑀦𑀧𑁆𑀧𑀚𑀸𑀦𑀦𑁆𑀢𑀺, 𑀲𑀁𑀬𑀫𑁄𑀢𑀺 𑀤𑀫𑁄𑀢𑀺 𑀘;

𑀢𑁂𑀲𑀼 𑀲𑀼𑀧𑁆𑀧𑀫𑀸𑀦𑁂𑀲𑀼, 𑀅𑀳𑀁 𑀚𑀕𑁆𑀕𑀸𑀫𑀺 𑀤𑁂𑀯𑀢𑁂.

𑁧𑁩𑁯. 𑀬𑁂𑀲𑀁 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀢𑁂𑀲𑀼 𑀚𑀸𑀕𑀭𑀫𑀸𑀦𑁂𑀲𑀼, 𑀅𑀳𑀁 𑀲𑀼𑀢𑁆𑀢𑁄𑀲𑁆𑀫𑀺 𑀤𑁂𑀯𑀢𑁂.

𑁧𑁪𑁦. 𑀏𑀯𑀁 𑀚𑀸𑀕𑀭𑀢𑀁 𑀲𑀼𑀢𑁆𑀢𑁄, 𑀏𑀯𑀁 𑀲𑀼𑀢𑁆𑀢𑁂𑀲𑀼 𑀚𑀸𑀕𑀭𑁄;