𑁪𑁧𑁫. 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀚𑀸𑀢𑀓𑀁 (𑁭-𑁨-𑁧𑁦)

𑁧𑁪𑁨. 𑀦 𑀓𑀺𑀭𑀢𑁆𑀣𑀺 𑀅𑀦𑁄𑀫𑀤𑀲𑁆𑀲𑀺𑀲𑀼, 𑀧𑀸𑀭𑀺𑀘𑀭𑀺𑀬𑀸 𑀩𑀼𑀤𑁆𑀥𑁂𑀲𑀼 𑀅𑀧𑁆𑀧𑀺𑀓𑀸 [𑀅𑀧𑁆𑀧𑀓𑀸 (𑀓.)];

𑀲𑀼𑀓𑁆𑀔𑀸𑀬 𑀅𑀮𑁄𑀡𑀺𑀓𑀸𑀬 𑀘, 𑀧𑀲𑁆𑀲𑀨𑀮𑀁 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀬𑀸.

𑁧𑁪𑁩. 𑀳𑀢𑁆𑀣𑀺𑀕𑀯𑀲𑁆𑀲𑀸 𑀘𑀺𑀫𑁂 𑀩𑀳𑀽 [𑀳𑀢𑁆𑀣𑀺𑀕𑀯𑀸𑀲𑁆𑀲𑀸 𑀘 𑀫𑁂 𑀩𑀳𑀽 (𑀲𑀻.), 𑀳𑀢𑁆𑀣𑀻 𑀕𑀯𑀸𑀲𑁆𑀲𑀸 𑀘𑀺𑀫𑁂 𑀩𑀳𑀽 (𑀲𑁆𑀬𑀸.), 𑀳𑀢𑁆𑀣𑀻 𑀕𑀯𑀸𑀲𑁆𑀲𑀸 𑀘 𑀫𑁂 𑀩𑀳𑀽 (𑀧𑀻.)], 𑀥𑀦𑀥𑀜𑁆𑀜𑀁 𑀧𑀣𑀯𑀻 𑀘 𑀓𑁂𑀯𑀮𑀸;

𑀦𑀸𑀭𑀺𑀬𑁄 𑀘𑀺𑀫𑀸 𑀅𑀘𑁆𑀙𑀭𑀽𑀧𑀫𑀸, 𑀧𑀲𑁆𑀲𑀨𑀮𑀁 𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀬𑀸.

𑁧𑁪𑁪. 𑀅𑀪𑀺𑀓𑁆𑀔𑀡𑀁 𑀭𑀸𑀚𑀓𑀼𑀜𑁆𑀚𑀭, 𑀕𑀸𑀣𑀸 𑀪𑀸𑀲𑀲𑀺 𑀓𑁄𑀲𑀮𑀸𑀥𑀺𑀧;

𑀧𑀼𑀘𑁆𑀙𑀸𑀫𑀺 𑀢𑀁 𑀭𑀝𑁆𑀞𑀯𑀟𑁆𑀠𑀦, 𑀩𑀸𑀴𑁆𑀳𑀁 𑀧𑀻𑀢𑀺𑀫𑀦𑁄 𑀧𑀪𑀸𑀲𑀲𑀺.

𑁧𑁪𑁫. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀦𑀕𑀭𑁂, 𑀓𑀼𑀮𑁂 𑀅𑀜𑁆𑀜𑀢𑀭𑁂 𑀅𑀳𑀼𑀁;

𑀧𑀭𑀓𑀫𑁆𑀫𑀓𑀭𑁄 𑀆𑀲𑀺𑀁, 𑀪𑀢𑀓𑁄 𑀲𑀻𑀮𑀲𑀁𑀯𑀼𑀢𑁄.

𑁧𑁪𑁬. 𑀓𑀫𑁆𑀫𑀸𑀬 𑀦𑀺𑀓𑁆𑀔𑀫𑀦𑁆𑀢𑁄𑀳𑀁, 𑀘𑀢𑀼𑀭𑁄 𑀲𑀫𑀡𑁂𑀤𑁆𑀤𑀲𑀁;

𑀆𑀘𑀸𑀭𑀲𑀻𑀮𑀲𑀫𑁆𑀧𑀦𑁆𑀦𑁂, 𑀲𑀻𑀢𑀺𑀪𑀽𑀢𑁂 𑀅𑀦𑀸𑀲𑀯𑁂.

𑁧𑁪𑁭. 𑀢𑁂𑀲𑀼 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀦𑀺𑀲𑀻𑀤𑁂𑀢𑁆𑀯𑀸 [𑀦𑀺𑀲𑀸𑀤𑁂𑀢𑁆𑀯𑀸 (?)] 𑀧𑀡𑁆𑀡𑀲𑀦𑁆𑀣𑀢𑁂;

𑀅𑀤𑀁 𑀩𑀼𑀤𑁆𑀥𑀸𑀦 𑀓𑀼𑀫𑁆𑀫𑀸𑀲𑀁, 𑀧𑀲𑀦𑁆𑀦𑁄 𑀲𑁂𑀳𑀺 𑀧𑀸𑀡𑀺𑀪𑀺.

𑁧𑁪𑁮. 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀼𑀲𑀮𑀲𑁆𑀲, 𑀇𑀤𑀁 𑀫𑁂 𑀏𑀤𑀺𑀲𑀁 𑀨𑀮𑀁;

𑀅𑀦𑀼𑀪𑁄𑀫𑀺 𑀇𑀤𑀁 𑀭𑀚𑁆𑀚𑀁, 𑀨𑀻𑀢𑀁 𑀥𑀭𑀡𑀺𑀫𑀼𑀢𑁆𑀢𑀫𑀁.

𑁧𑁪𑁯. 𑀤𑀤𑀁 𑀪𑀼𑀜𑁆𑀚 𑀫𑀸 𑀘 𑀧𑀫𑀸𑀤𑁄 [𑀤𑀤 𑀪𑀼𑀜𑁆𑀚 𑀘 𑀫𑀸 𑀘 𑀧𑀫𑀸𑀤𑁄 (𑀲𑀻. 𑀧𑀻.)], 𑀘𑀓𑁆𑀓𑀁 𑀯𑀢𑁆𑀢𑀬 𑀓𑁄𑀲𑀮𑀸𑀥𑀺𑀧;

𑀫𑀸 𑀭𑀸𑀚 𑀅𑀥𑀫𑁆𑀫𑀺𑀓𑁄 𑀅𑀳𑀼, 𑀥𑀫𑁆𑀫𑀁 𑀧𑀸𑀮𑀬 𑀓𑁄𑀲𑀮𑀸𑀥𑀺𑀧.

𑁧𑁫𑁦. 𑀲𑁄𑀳𑀁 𑀢𑀤𑁂𑀯 𑀧𑀼𑀦𑀧𑁆𑀧𑀼𑀦𑀁, 𑀯𑀝𑀼𑀫𑀁 𑀆𑀘𑀭𑀺𑀲𑁆𑀲𑀸𑀫𑀺 𑀲𑁄𑀪𑀦𑁂;

𑀅𑀭𑀺𑀬𑀸𑀘𑀭𑀺𑀢𑀁 𑀲𑀼𑀓𑁄𑀲𑀮𑁂, 𑀅𑀭𑀳𑀦𑁆𑀢𑁄 𑀫𑁂 𑀫𑀦𑀸𑀧𑀸𑀯 𑀧𑀲𑁆𑀲𑀺𑀢𑀼𑀁.

𑁧𑁫𑁧. 𑀤𑁂𑀯𑀻 𑀯𑀺𑀬 𑀅𑀘𑁆𑀙𑀭𑀽𑀧𑀫𑀸, 𑀫𑀚𑁆𑀛𑁂 𑀦𑀸𑀭𑀺𑀕𑀡𑀲𑁆𑀲 𑀲𑁄𑀪𑀲𑀺;

𑀓𑀺𑀁 𑀓𑀫𑁆𑀫𑀫𑀓𑀸𑀲𑀺 𑀪𑀤𑁆𑀤𑀓𑀁, 𑀓𑁂𑀦𑀸𑀲𑀺 𑀯𑀡𑁆𑀡𑀯𑀢𑀻 𑀲𑀼𑀓𑁄𑀲𑀮𑁂.

𑁧𑁫𑁨. 𑀅𑀫𑁆𑀩𑀝𑁆𑀞𑀓𑀼𑀮𑀲𑁆𑀲 𑀔𑀢𑁆𑀢𑀺𑀬, 𑀤𑀸𑀲𑁆𑀬𑀸𑀳𑀁 𑀧𑀭𑀧𑁂𑀲𑀺𑀬𑀸 𑀅𑀳𑀼𑀁;

𑀲𑀜𑁆𑀜𑀢𑀸 𑀘 [𑀲𑀜𑁆𑀜𑀢𑀸 (𑀲𑀻. 𑀧𑀻.)] 𑀥𑀫𑁆𑀫𑀚𑀻𑀯𑀺𑀦𑀻, 𑀲𑀻𑀮𑀯𑀢𑀻 𑀘 𑀅𑀧𑀸𑀧𑀤𑀲𑁆𑀲𑀦𑀸.

𑁧𑁫𑁩. 𑀉𑀤𑁆𑀥𑀝𑀪𑀢𑁆𑀢𑀁 𑀅𑀳𑀁 𑀢𑀤𑀸, 𑀘𑀭𑀫𑀸𑀦𑀲𑁆𑀲 𑀅𑀤𑀸𑀲𑀺 𑀪𑀺𑀓𑁆𑀔𑀼𑀦𑁄;

𑀯𑀺𑀢𑁆𑀢𑀸 𑀲𑀼𑀫𑀦𑀸 𑀲𑀬𑀁 𑀅𑀳𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀁 𑀫𑀫𑁂𑀤𑀺𑀲𑀦𑁆𑀢𑀺.

𑀓𑀼𑀫𑁆𑀫𑀸𑀲𑀧𑀺𑀡𑁆𑀟𑀺𑀚𑀸𑀢𑀓𑀁 𑀤𑀲𑀫𑀁.