𑁪𑁧𑁦. 𑀲𑁄𑀫𑀤𑀢𑁆𑀢𑀚𑀸𑀢𑀓𑀁 (𑁭-𑁨-𑁫)

𑁧𑁦𑁫. 𑀬𑁄 𑀫𑀁 𑀧𑀼𑀭𑁂 𑀧𑀘𑁆𑀘𑀼𑀟𑁆𑀟𑁂𑀢𑀺 [𑀧𑀘𑁆𑀘𑀼𑀤𑁂𑀢𑀺 (𑀲𑀻. 𑀲𑁆𑀬𑀸. 𑀧𑀻.), 𑀧𑀘𑁆𑀘𑀼𑀝𑁆𑀞𑁂𑀢𑀺 (𑀓.)], 𑀅𑀭𑀜𑁆𑀜𑁂 𑀤𑀽𑀭𑀫𑀸𑀬𑀢𑁄;

𑀲𑁄 𑀦 𑀤𑀺𑀲𑁆𑀲𑀢𑀺 𑀫𑀸𑀢𑀗𑁆𑀕𑁄, 𑀲𑁄𑀫𑀤𑀢𑁆𑀢𑁄 𑀓𑀼𑀳𑀺𑀁 𑀕𑀢𑁄.

𑁧𑁦𑁬. 𑀅𑀬𑀁 𑀯𑀸 𑀲𑁄 𑀫𑀢𑁄 𑀲𑁂𑀢𑀺, 𑀅𑀮𑁆𑀮𑀲𑀺𑀗𑁆𑀕𑀁𑀯 𑀯𑀘𑁆𑀙𑀺𑀢𑁄 [𑀅𑀮𑁆𑀮𑀧𑀺𑀗𑁆𑀓𑀯 𑀙𑀺𑀚𑁆𑀚𑀺𑀢𑁄 (𑀲𑀻. 𑀧𑀻.), 𑀅𑀮𑁆𑀮𑀧𑀻𑀢𑀁𑀯 𑀯𑀺𑀘𑁆𑀙𑀺𑀢𑁄 (𑀲𑁆𑀬𑀸.)];

𑀪𑀼𑀫𑁆𑀬𑀸 𑀦𑀺𑀧𑀢𑀺𑀢𑁄 𑀲𑁂𑀢𑀺, 𑀅𑀫𑀭𑀸 𑀯𑀢 𑀓𑀼𑀜𑁆𑀚𑀭𑁄.

𑁧𑁦𑁭. 𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲, 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲 𑀢𑁂 𑀲𑀢𑁄;

𑀲𑀫𑀡𑀲𑁆𑀲 𑀦 𑀢𑀁 𑀲𑀸𑀥𑀼, 𑀬𑀁 𑀧𑁂𑀢𑀫𑀦𑀼𑀲𑁄𑀘𑀲𑀺.

𑁧𑁦𑁮. 𑀲𑀁𑀯𑀸𑀲𑁂𑀦 𑀳𑀯𑁂 𑀲𑀓𑁆𑀓, 𑀫𑀦𑀼𑀲𑁆𑀲𑀲𑁆𑀲 𑀫𑀺𑀕𑀲𑁆𑀲 𑀯𑀸;

𑀳𑀤𑀬𑁂 𑀚𑀸𑀬𑀢𑁂 𑀧𑁂𑀫𑀁, 𑀢𑀁 𑀦 𑀲𑀓𑁆𑀓𑀸 𑀅𑀲𑁄𑀘𑀺𑀢𑀼𑀁.

𑁧𑁦𑁯. 𑀫𑀢𑀁 𑀫𑀭𑀺𑀲𑁆𑀲𑀁 𑀭𑁄𑀤𑀦𑁆𑀢𑀺, 𑀬𑁂 𑀭𑀼𑀤𑀦𑁆𑀢𑀺 𑀮𑀧𑀦𑁆𑀢𑀺 𑀘;

𑀢𑀲𑁆𑀫𑀸 𑀢𑁆𑀯𑀁 𑀇𑀲𑀺 𑀫𑀸 𑀭𑁄𑀤𑀺, 𑀭𑁄𑀤𑀺𑀢𑀁 𑀫𑁄𑀖𑀫𑀸𑀳𑀼 𑀲𑀦𑁆𑀢𑁄.

𑁧𑁧𑁦. 𑀓𑀦𑁆𑀤𑀺𑀢𑁂𑀦 𑀳𑀯𑁂 𑀩𑁆𑀭𑀳𑁆𑀫𑁂, 𑀫𑀢𑁄 𑀧𑁂𑀢𑁄 𑀲𑀫𑀼𑀝𑁆𑀞𑀳𑁂;

𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀭𑁄𑀤𑀸𑀫, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀜𑀸𑀢𑀓𑁂.

𑁧𑁧𑁧. 𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁧𑁨. 𑀅𑀩𑁆𑀩𑀳𑀻 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁧𑁩. 𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀯𑀸𑀲𑀯𑀸𑀢𑀺.

𑀲𑁄𑀫𑀤𑀢𑁆𑀢𑀚𑀸𑀢𑀓𑀁 𑀧𑀜𑁆𑀘𑀫𑀁.