𑁪𑁧𑁧. 𑀲𑀼𑀲𑀻𑀫𑀚𑀸𑀢𑀓𑀁 (𑁭-𑁨-𑁬)

𑁧𑁧𑁪. 𑀓𑀸𑀴𑀸𑀦𑀺 𑀓𑁂𑀲𑀸𑀦𑀺 𑀧𑀼𑀭𑁂 𑀅𑀳𑁂𑀲𑀼𑀁, 𑀚𑀸𑀢𑀸𑀦𑀺 𑀲𑀻𑀲𑀫𑁆𑀳𑀺 𑀬𑀣𑀸𑀧𑀤𑁂𑀲𑁂;

𑀢𑀸𑀦𑀚𑁆𑀚 𑀲𑁂𑀢𑀸𑀦𑀺 𑀲𑀼𑀲𑀻𑀫 [𑀲𑀼𑀲𑀺𑀫 (𑀓.)] 𑀤𑀺𑀲𑁆𑀯𑀸, 𑀥𑀫𑁆𑀫𑀁 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑀸𑀮𑁄.

𑁧𑁧𑁫. 𑀫𑀫𑁂𑀯 𑀤𑁂𑀯 𑀧𑀮𑀺𑀢𑀁 𑀦 𑀢𑀼𑀬𑁆𑀳𑀁, 𑀫𑀫𑁂𑀯 𑀲𑀻𑀲𑀁 𑀫𑀫 𑀉𑀢𑁆𑀢𑀫𑀗𑁆𑀕𑀁;

‘‘𑀅𑀢𑁆𑀣𑀁 𑀓𑀭𑀺𑀲𑁆𑀲’’𑀦𑁆𑀢𑀺 𑀫𑀼𑀲𑀸 𑀅𑀪𑀸𑀡𑀺𑀁 [𑀅𑀪𑀸𑀲𑀺𑀁 (𑀓.)], 𑀏𑀓𑀸𑀧𑀭𑀸𑀥𑀁 𑀔𑀫 𑀭𑀸𑀚𑀲𑁂𑀝𑁆𑀞.

𑁧𑁧𑁬. 𑀤𑀳𑀭𑁄 𑀢𑀼𑀯𑀁 𑀤𑀲𑁆𑀲𑀦𑀺𑀬𑁄𑀲𑀺 𑀭𑀸𑀚, 𑀧𑀞𑀫𑀼𑀕𑁆𑀕𑀢𑁄 𑀳𑁄𑀲𑀺 [𑀳𑁄𑀳𑀺 (𑀲𑀻.), 𑀳𑁄𑀢𑀺 (𑀓.)] 𑀬𑀣𑀸 𑀓𑀴𑀻𑀭𑁄;

𑀭𑀚𑁆𑀚𑀜𑁆𑀘 𑀓𑀸𑀭𑁂𑀳𑀺 𑀫𑀫𑀜𑁆𑀘 𑀧𑀲𑁆𑀲, 𑀫𑀸 𑀓𑀸𑀮𑀺𑀓𑀁 𑀅𑀦𑀼𑀥𑀸𑀯𑀻 𑀚𑀦𑀺𑀦𑁆𑀤.

𑁧𑁧𑁭. 𑀧𑀲𑁆𑀲𑀸𑀫𑀺 𑀯𑁄𑀳𑀁 𑀤𑀳𑀭𑀺𑀁 𑀓𑀼𑀫𑀸𑀭𑀺𑀁, 𑀲𑀸𑀫𑀝𑁆𑀞𑀧𑀲𑁆𑀲𑀁 𑀲𑀼𑀢𑀦𑀼𑀁 𑀲𑀼𑀫𑀚𑁆𑀛𑀁;

𑀓𑀸𑀴𑀧𑁆𑀧𑀯𑀸𑀴𑀸𑀯 𑀧𑀯𑁂𑀮𑁆𑀮𑀫𑀸𑀦𑀸, 𑀧𑀮𑁄𑀪𑀬𑀦𑁆𑀢𑀻𑀯 [𑀲𑀸 𑀮𑁄𑀪𑀬𑀦𑁆𑀢𑀻𑀯 (𑀧𑀻.)] 𑀦𑀭𑁂𑀲𑀼 𑀕𑀘𑁆𑀙𑀢𑀺.

𑁧𑁧𑁮. 𑀢𑀫𑁂𑀦 𑀧𑀲𑁆𑀲𑀸𑀫𑀺𑀧𑀭𑁂𑀦 𑀦𑀸𑀭𑀺𑀁, 𑀆𑀲𑀻𑀢𑀺𑀓𑀁 𑀦𑀸𑀯𑀼𑀢𑀺𑀓𑀁 𑀯 𑀚𑀘𑁆𑀘𑀸;

𑀤𑀡𑁆𑀟𑀁 𑀕𑀳𑁂𑀢𑁆𑀯𑀸𑀦 𑀧𑀯𑁂𑀥𑀫𑀸𑀦𑀁, 𑀕𑁄𑀧𑀸𑀦𑀲𑀻𑀪𑁄𑀕𑁆𑀕𑀲𑀫𑀁 𑀘𑀭𑀦𑁆𑀢𑀺𑀁.

𑁧𑁧𑁯. 𑀲𑁄𑀳𑀁 𑀢𑀫𑁂𑀯𑀸𑀦𑀼𑀯𑀺𑀘𑀺𑀦𑁆𑀢𑀬𑀦𑁆𑀢𑁄, 𑀏𑀓𑁄 𑀲𑀬𑀸𑀫𑀺 [𑀧𑀲𑁆𑀲𑀸𑀫𑀺 (𑀓.)] 𑀲𑀬𑀦𑀲𑁆𑀲 𑀫𑀚𑁆𑀛𑁂;

‘‘𑀅𑀳𑀫𑁆𑀧𑀺 𑀏𑀯𑀁’’ 𑀇𑀢𑀺 𑀧𑁂𑀓𑁆𑀔𑀫𑀸𑀦𑁄, 𑀦 𑀕𑀳𑁂 𑀭𑀫𑁂 [𑀦 𑀕𑁂𑀳𑁂 𑀭𑀫𑁂 (𑀲𑀻.), 𑀕𑁂𑀳𑁂 𑀦 𑀭𑀫𑁂 (𑀲𑁆𑀬𑀸. 𑀓.)] 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑀸𑀮𑁄.

𑁧𑁨𑁦. 𑀭𑀚𑁆𑀚𑀼𑀯𑀸𑀮𑀫𑁆𑀩𑀦𑀻 𑀘𑁂𑀲𑀸, 𑀬𑀸 𑀕𑁂𑀳𑁂 𑀯𑀲𑀢𑁄 𑀭𑀢𑀺;

𑀏𑀯𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸𑀢𑀺.

𑀲𑀼𑀲𑀻𑀫𑀚𑀸𑀢𑀓𑀁 𑀙𑀝𑁆𑀞𑀁.