𑁪𑁦𑁯. 𑀤𑀴𑁆𑀳𑀥𑀫𑁆𑀫𑀚𑀸𑀢𑀓𑀁 (𑁭-𑁨-𑁪)

𑁯𑁮. 𑀅𑀳𑀁 𑀘𑁂 𑀤𑀴𑁆𑀳𑀥𑀫𑁆𑀫𑀲𑁆𑀲 [𑀤𑀴𑁆𑀳𑀥𑀫𑁆𑀫𑀸𑀬 (𑀧𑀻.)], 𑀯𑀳𑀦𑁆𑀢𑀺 𑀦𑀸𑀪𑀺𑀭𑀸𑀥𑀬𑀺𑀁;

𑀥𑀭𑀦𑁆𑀢𑀻 𑀉𑀭𑀲𑀺 𑀲𑀮𑁆𑀮𑀁, 𑀬𑀼𑀤𑁆𑀥𑁂 𑀯𑀺𑀓𑁆𑀓𑀦𑁆𑀢𑀘𑀸𑀭𑀺𑀦𑀻.

𑁯𑁯. 𑀦𑀽𑀦 𑀭𑀸𑀚𑀸 𑀦 𑀚𑀸𑀦𑀸𑀢𑀺 [𑀦 𑀳 𑀦𑀽𑀦 𑀭𑀸𑀚𑀸 𑀚𑀸𑀦𑀸𑀢𑀺 (𑀲𑀻. 𑀧𑀻.)], 𑀫𑀫 𑀯𑀺𑀓𑁆𑀓𑀫𑀧𑁄𑀭𑀺𑀲𑀁;

𑀲𑀗𑁆𑀕𑀸𑀫𑁂 𑀲𑀼𑀓𑀢𑀦𑁆𑀢𑀸𑀦𑀺, 𑀤𑀽𑀢𑀯𑀺𑀧𑁆𑀧𑀳𑀺𑀢𑀸𑀦𑀺 𑀘.

𑁧𑁦𑁦. 𑀲𑀸 𑀦𑀽𑀦𑀸𑀳𑀁 𑀫𑀭𑀺𑀲𑁆𑀲𑀸𑀫𑀺, 𑀅𑀩𑀦𑁆𑀥𑀼 𑀅𑀧𑀭𑀸𑀬𑀺𑀦𑀻 [𑀅𑀧𑀭𑀸𑀬𑀺𑀡𑀻 (𑀲𑀻.), 𑀅𑀧𑀭𑀸𑀬𑀡𑀻 (?)];

𑀢𑀤𑀸 𑀳𑀺 [𑀢𑀣𑀸 𑀳𑀺 (𑀧𑀻.)] 𑀓𑀼𑀫𑁆𑀪𑀓𑀸𑀭𑀲𑁆𑀲, 𑀤𑀺𑀦𑁆𑀦𑀸 𑀙𑀓𑀡𑀳𑀸𑀭𑀺𑀓𑀸.

𑁧𑁦𑁧. 𑀬𑀸𑀯𑀢𑀸𑀲𑀻𑀲𑀢𑀻 𑀧𑁄𑀲𑁄, 𑀢𑀸𑀯𑀤𑁂𑀯 𑀧𑀯𑀻𑀡𑀢𑀺;

𑀅𑀢𑁆𑀣𑀸𑀧𑀸𑀬𑁂 𑀚𑀳𑀦𑁆𑀢𑀺 𑀦𑀁, 𑀑𑀝𑁆𑀞𑀺𑀩𑁆𑀬𑀸𑀥𑀺𑀁𑀯 𑀔𑀢𑁆𑀢𑀺𑀬𑁄.

𑁧𑁦𑁨. 𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀓𑀢𑀢𑁆𑀣𑁄 𑀦𑀸𑀯𑀩𑀼𑀚𑁆𑀛𑀢𑀺;

𑀅𑀢𑁆𑀣𑀸 𑀢𑀲𑁆𑀲 𑀧𑀮𑀼𑀚𑁆𑀚𑀦𑁆𑀢𑀺, 𑀬𑁂 𑀳𑁄𑀦𑁆𑀢𑀺 𑀅𑀪𑀺𑀧𑀢𑁆𑀣𑀺𑀢𑀸.

𑁧𑁦𑁩. 𑀬𑁄 𑀧𑀼𑀩𑁆𑀩𑁂 𑀓𑀢𑀓𑀮𑁆𑀬𑀸𑀡𑁄, 𑀓𑀢𑀢𑁆𑀣𑁄 𑀫𑀦𑀼𑀩𑀼𑀚𑁆𑀛𑀢𑀺;

𑀅𑀢𑁆𑀣𑀸 𑀢𑀲𑁆𑀲 𑀧𑀯𑀟𑁆𑀠𑀦𑁆𑀢𑀺, 𑀬𑁂 𑀳𑁄𑀦𑁆𑀢𑀺 𑀅𑀪𑀺𑀧𑀢𑁆𑀣𑀺𑀢𑀸.

𑁧𑁦𑁪. 𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀦𑁆𑀢𑁂 [𑀪𑀤𑁆𑀤𑀁 𑀯𑁄 (𑀲𑀻. 𑀲𑁆𑀬𑀸. 𑀧𑀻.)], 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀲𑀩𑁆𑀩𑁂 𑀓𑀢𑀜𑁆𑀜𑀼𑀦𑁄 𑀳𑁄𑀣, 𑀘𑀺𑀭𑀁 𑀲𑀕𑁆𑀕𑀫𑁆𑀳𑀺 𑀞𑀲𑁆𑀲𑀣𑀸𑀢𑀺.

𑀤𑀴𑁆𑀳𑀥𑀫𑁆𑀫𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.