𑁪𑁦𑁫. 𑀩𑀓𑀚𑀸𑀢𑀓𑀁 (𑁭-𑁧-𑁧𑁦)

𑁬𑁮. 𑀤𑁆𑀯𑀸𑀲𑀢𑁆𑀢𑀢𑀺 𑀕𑁄𑀢𑀫 [𑀪𑁄 𑀕𑁄𑀢𑀫 (𑀓.)] 𑀧𑀼𑀜𑁆𑀜𑀓𑀫𑁆𑀫𑀸, 𑀯𑀲𑀯𑀢𑁆𑀢𑀺𑀦𑁄 𑀚𑀸𑀢𑀺𑀚𑀭𑀁 𑀅𑀢𑀻𑀢𑀸;

𑀅𑀬𑀫𑀦𑁆𑀢𑀺𑀫𑀸 𑀯𑁂𑀤𑀕𑀽 𑀩𑁆𑀭𑀳𑁆𑀫𑀧𑀢𑁆𑀢𑀺 [𑀩𑁆𑀭𑀳𑁆𑀫𑀼𑀧𑀧𑀢𑁆𑀢𑀺 (𑀲𑁆𑀬𑀸. 𑀓.)], 𑀅𑀲𑁆𑀫𑀸𑀪𑀺𑀚𑀧𑁆𑀧𑀦𑁆𑀢𑀺 𑀚𑀦𑀸 [𑀧𑀚𑀸 (𑀓.)] 𑀅𑀦𑁂𑀓𑀸.

𑁬𑁯. 𑀅𑀧𑁆𑀧𑀜𑁆𑀳𑀺 𑀏𑀢𑀁 [𑀅𑀧𑁆𑀧𑀜𑁆𑀘 𑀳𑁂𑀢𑀁 (𑀲𑁆𑀬𑀸.), 𑀅𑀧𑁆𑀧𑀁𑀲𑀺 𑀏𑀢𑀁 (𑀓.)] 𑀦 𑀳𑀺 𑀤𑀻𑀖𑀫𑀸𑀬𑀼, 𑀬𑀁 𑀢𑁆𑀯𑀁 𑀩𑀓 𑀫𑀜𑁆𑀜𑀲𑀺 𑀤𑀻𑀖𑀫𑀸𑀬𑀼𑀁;

𑀲𑀢𑀁 𑀲𑀳𑀲𑁆𑀲𑀸𑀦𑀺 [𑀲𑀳𑀲𑁆𑀲𑀸𑀦𑀁 (𑀲𑀻. 𑀧𑀻. 𑀲𑀁. 𑀦𑀺. 𑁧.𑁧𑁭𑁫), 𑀲𑀳𑀲𑁆𑀲𑀸𑀦 (𑀲𑁆𑀬𑀸. 𑀓𑀁.)] 𑀦𑀺𑀭𑀩𑁆𑀩𑀼𑀤𑀸𑀦𑀁, 𑀆𑀬𑀼𑀁 𑀧𑀚𑀸𑀦𑀸𑀫𑀺 𑀢𑀯𑀸𑀳 𑀩𑁆𑀭𑀳𑁆𑀫𑁂.

𑁭𑁦. 𑀅𑀦𑀦𑁆𑀢𑀤𑀲𑁆𑀲𑀻 𑀪𑀕𑀯𑀸𑀳𑀫𑀲𑁆𑀫𑀺, 𑀚𑀸𑀢𑀺𑀚𑁆𑀚𑀭𑀁 𑀲𑁄𑀓𑀫𑀼𑀧𑀸𑀢𑀺𑀯𑀢𑁆𑀢𑁄;

𑀓𑀺𑀁 𑀫𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁 [𑀲𑀻𑀮𑀯𑀦𑁆𑀢𑀁 (𑀧𑀻. 𑀓.)], 𑀆𑀘𑀺𑀓𑁆𑀔 𑀫𑁂 𑀢𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁.

𑁭𑁧. 𑀬𑀁 𑀢𑁆𑀯𑀁 𑀅𑀧𑀸𑀬𑁂𑀲𑀺 𑀩𑀳𑀽 𑀫𑀦𑀼𑀲𑁆𑀲𑁂, 𑀧𑀺𑀧𑀸𑀲𑀺𑀢𑁂 𑀖𑀫𑁆𑀫𑀦𑀺 𑀲𑀫𑁆𑀧𑀭𑁂𑀢𑁂;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁, 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀺.

𑁭𑁨. 𑀬𑀁 𑀏𑀡𑀺𑀓𑀽𑀮𑀲𑁆𑀫𑀺 𑀚𑀦𑀁 𑀕𑀳𑀻𑀢𑀁, 𑀅𑀫𑁄𑀘𑀬𑀻 𑀕𑀬𑁆𑀳𑀓 𑀦𑀺𑀬𑁆𑀬𑀫𑀸𑀦𑀁;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁, 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀺.

𑁭𑁩. 𑀕𑀗𑁆𑀕𑀸𑀬 𑀲𑁄𑀢𑀲𑁆𑀫𑀺𑀁 𑀕𑀳𑀻𑀢𑀦𑀸𑀯𑀁, 𑀮𑀼𑀤𑁆𑀤𑁂𑀦 𑀦𑀸𑀕𑁂𑀦 𑀫𑀦𑀼𑀲𑁆𑀲𑀓𑀧𑁆𑀧𑀸;

𑀅𑀫𑁄𑀘𑀬𑀺 𑀢𑁆𑀯𑀁 𑀩𑀮𑀲𑀸 𑀧𑀲𑀬𑁆𑀳, 𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁;

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀺.

𑁭𑁪. 𑀓𑀧𑁆𑀧𑁄 𑀘 𑀢𑁂 𑀩𑀤𑁆𑀥𑀘𑀭𑁄 [𑀧𑀢𑁆𑀣𑀘𑀭𑁄 (𑀲𑁆𑀬𑀸.), 𑀧𑀝𑁆𑀞𑀘𑀭𑁄 (𑀓.)] 𑀅𑀳𑁄𑀲𑀺, 𑀲𑀫𑁆𑀩𑀼𑀤𑁆𑀥𑀺𑀫𑀦𑁆𑀢𑀁 [𑀲𑀫𑁆𑀩𑀼𑀤𑁆𑀥𑀺𑀯𑀦𑁆𑀢𑀁 (𑀲𑁆𑀬𑀸. 𑀧𑀻.), 𑀲𑀫𑁆𑀩𑀼𑀤𑁆𑀥𑀯𑀦𑁆𑀢𑀁 (𑀓.)] 𑀯𑀢𑀺𑀦𑀁 [𑀯𑀢𑀺𑀢𑀁 (𑀲𑁆𑀬𑀸.), 𑀯𑀢𑀺𑀤𑀁 (𑀓.)] 𑀅𑀫𑀜𑁆𑀜𑀁;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁, 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀺.

𑁭𑁫. 𑀅𑀤𑁆𑀥𑀸 𑀧𑀚𑀸𑀦𑀸𑀲𑀺 𑀫𑀫𑁂𑀢𑀫𑀸𑀬𑀼𑀁, 𑀅𑀜𑁆𑀜𑀫𑁆𑀧𑀺 𑀚𑀸𑀦𑀸𑀲𑀺 𑀢𑀣𑀸 𑀳𑀺 𑀩𑀼𑀤𑁆𑀥𑁄;

𑀢𑀣𑀸 𑀳𑀺 𑀢𑀸𑀬𑀁 [𑀢𑁆𑀬𑀸𑀬𑀁 (𑀲𑀁. 𑀦𑀺. 𑁧.𑁧𑁭𑁫)] 𑀚𑀮𑀺𑀢𑀸𑀦𑀼𑀪𑀸𑀯𑁄, 𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀩𑁆𑀭𑀳𑁆𑀫𑀮𑁄𑀓𑀦𑁆𑀢𑀺.

𑀩𑀓𑀚𑀸𑀢𑀓𑀁 𑀤𑀲𑀫𑀁.

𑀓𑀼𑀓𑁆𑀓𑀼𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀭𑀓𑀡𑁆𑀡𑀺𑀓 𑀘𑀸𑀧𑀯𑀭𑁄 𑀲𑀼𑀢𑀦𑁄, 𑀅𑀣 𑀕𑀺𑀚𑁆𑀛 𑀲𑀭𑁄𑀳𑀺𑀢𑀫𑀘𑁆𑀙𑀯𑀭𑁄;

𑀧𑀼𑀦 𑀧𑀡𑁆𑀡𑀓 [𑀤𑀲𑀡𑁆𑀡𑀓 (𑀲𑀻. 𑀲𑁆𑀬𑀸. 𑀧𑀻.)] 𑀲𑁂𑀦𑀓 𑀬𑀸𑀘𑀦𑀓𑁄, 𑀅𑀣 𑀯𑁂𑀭𑀺 𑀲𑀩𑁆𑀭𑀳𑁆𑀫𑀩𑀓𑁂𑀦 𑀤𑀲𑀸𑀢𑀺.