𑁧. 𑀓𑀼𑀓𑁆𑀓𑀼𑀯𑀕𑁆𑀕𑁄

𑁩𑁯𑁬. 𑀓𑀼𑀓𑁆𑀓𑀼𑀚𑀸𑀢𑀓𑀁 (𑁭-𑁧-𑁧)

𑁧. 𑀤𑀺𑀬𑀟𑁆𑀠𑀓𑀼𑀓𑁆𑀓𑀽 𑀉𑀤𑀬𑁂𑀦 𑀓𑀡𑁆𑀡𑀺𑀓𑀸, 𑀯𑀺𑀤𑀢𑁆𑀣𑀺𑀬𑁄 𑀅𑀝𑁆𑀞 𑀧𑀭𑀺𑀓𑁆𑀔𑀺𑀧𑀦𑁆𑀢𑀺 𑀦𑀁;

𑀲𑀸 𑀲𑀺𑀁𑀲𑀧𑀸 [𑀲𑀲𑀺𑀁𑀲𑀧𑀸 (𑀲𑀻. 𑀧𑀻.), 𑀲𑀸 𑀲𑀻𑀲𑀧𑀸 (𑀲𑁆𑀬𑀸.), 𑀬𑀸 𑀲𑀺𑀁𑀲𑀧𑀸 (𑀓. 𑀲𑀻. 𑀦𑀺𑀬𑁆𑀬)] 𑀲𑀸𑀭𑀫𑀬𑀸 𑀅𑀨𑁂𑀕𑁆𑀕𑀼𑀓𑀸, 𑀓𑀼𑀳𑀺𑀁 𑀞𑀺𑀢𑀸 𑀉𑀧𑁆𑀧𑀭𑀺𑀢𑁄 [𑀉𑀧𑀭𑀺𑀢𑁄 (𑀲𑀻. 𑀲𑁆𑀬𑀸. 𑀧𑀻.)] 𑀦 𑀥𑀁𑀲𑀢𑀺.

𑁨. 𑀬𑀸 𑀢𑀺𑀁𑀲𑀢𑀺 𑀲𑀸𑀭𑀫𑀬𑀸 𑀅𑀦𑀼𑀚𑁆𑀚𑀼𑀓𑀸, 𑀧𑀭𑀺𑀓𑀺𑀭𑀺𑀬 [𑀧𑀓𑀺𑀭𑀺𑀬𑀸 (𑀓.)] 𑀕𑁄𑀧𑀸𑀡𑀲𑀺𑀬𑁄 𑀲𑀫𑀁 𑀞𑀺𑀢𑀸 [𑀲𑀫𑀝𑁆𑀞𑀺𑀢𑀸 (𑀲𑀻. 𑀲𑁆𑀬𑀸.)];

𑀢𑀸𑀳𑀺 𑀲𑀼𑀲𑀗𑁆𑀕𑀳𑀺𑀢𑀸 𑀩𑀮𑀲𑀸 𑀧𑀻𑀴𑀺𑀢𑀸 [𑀢𑀸 𑀲𑀗𑁆𑀕𑀳𑀺𑀢𑀸 𑀩𑀮𑀲𑀸 𑀘 𑀧𑀻𑀴𑀺𑀢𑀸 (𑀲𑀻.), 𑀢𑀸𑀳𑀺 𑀲𑀼𑀲𑀗𑁆𑀕𑀳𑀺𑀢𑀸 𑀩𑀮𑀲𑀸 𑀘 𑀧𑀻𑀴𑀺𑀢𑀸 (𑀲𑁆𑀬𑀸.), 𑀢𑀸𑀳𑀺 𑀲𑀗𑁆𑀕𑀳𑀻𑀢𑀸 𑀩𑀮𑀲𑀸 𑀘 𑀧𑀻𑀴𑀺𑀢𑀸 (𑀧𑀻.)], 𑀲𑀫𑀁 𑀞𑀺𑀢𑀸 𑀉𑀧𑁆𑀧𑀭𑀺𑀢𑁄 𑀦 𑀥𑀁𑀲𑀢𑀺.

𑁩. 𑀏𑀯𑀫𑁆𑀧𑀺 𑀫𑀺𑀢𑁆𑀢𑁂𑀳𑀺 𑀤𑀴𑁆𑀳𑁂𑀳𑀺 𑀧𑀡𑁆𑀟𑀺𑀢𑁄, 𑀅𑀪𑁂𑀚𑁆𑀚𑀭𑀽𑀧𑁂𑀳𑀺 𑀲𑀼𑀘𑀻𑀳𑀺 𑀫𑀦𑁆𑀢𑀺𑀪𑀺;

𑀲𑀼𑀲𑀗𑁆𑀕𑀳𑀻𑀢𑁄 𑀲𑀺𑀭𑀺𑀬𑀸 𑀦 𑀥𑀁𑀲𑀢𑀺, 𑀕𑁄𑀧𑀸𑀡𑀲𑀻 𑀪𑀸𑀭𑀯𑀳𑀸𑀯 𑀓𑀡𑁆𑀡𑀺𑀓𑀸.

𑁪. 𑀔𑀭𑀢𑁆𑀢𑀘𑀁 𑀩𑁂𑀮𑁆𑀮𑀁 𑀬𑀣𑀸𑀧𑀺 𑀲𑀢𑁆𑀣𑀯𑀸, 𑀅𑀦𑀸𑀫𑀲𑀦𑁆𑀢𑁄𑀧𑀺 𑀓𑀭𑁄𑀢𑀺 𑀢𑀺𑀢𑁆𑀢𑀓𑀁;

𑀲𑀫𑀸𑀳𑀭𑀁 𑀲𑀸𑀤𑀼𑀁 𑀓𑀭𑁄𑀢𑀺 𑀧𑀢𑁆𑀣𑀺𑀯, 𑀅𑀲𑀸𑀤𑀼𑀁 𑀓𑀬𑀺𑀭𑀸 𑀢𑀦𑀼𑀩𑀦𑁆𑀥𑀫𑀼𑀤𑁆𑀥𑀭𑀁 [𑀢𑀦𑀼𑀯𑀝𑁆𑀝𑀫𑀼𑀤𑁆𑀥𑀭𑀁 (𑀲𑀻. 𑀧𑀻.)].

𑁫. 𑀏𑀯𑀫𑁆𑀧𑀺 𑀕𑀸𑀫𑀦𑀺𑀕𑀫𑁂𑀲𑀼 𑀧𑀡𑁆𑀟𑀺𑀢𑁄, 𑀅𑀲𑀸𑀳𑀲𑀁 𑀭𑀸𑀚𑀥𑀦𑀸𑀦𑀺 𑀲𑀗𑁆𑀖𑀭𑀁;

𑀥𑀫𑁆𑀫𑀸𑀦𑀼𑀯𑀢𑁆𑀢𑀻 𑀧𑀝𑀺𑀧𑀚𑁆𑀚𑀫𑀸𑀦𑁄, 𑀲 𑀨𑀸𑀢𑀺 𑀓𑀬𑀺𑀭𑀸 𑀅𑀯𑀺𑀳𑁂𑀞𑀬𑀁 𑀧𑀭𑀁.

𑁬. 𑀑𑀤𑀸𑀢𑀫𑀽𑀮𑀁 𑀲𑀼𑀘𑀺𑀯𑀸𑀭𑀺𑀲𑀫𑁆𑀪𑀯𑀁, 𑀚𑀸𑀢𑀁 𑀬𑀣𑀸 𑀧𑁄𑀓𑁆𑀔𑀭𑀡𑀻𑀲𑀼 𑀅𑀫𑁆𑀩𑀼𑀚𑀁;

𑀧𑀤𑀼𑀫𑀁 𑀬𑀣𑀸 𑀅𑀕𑁆𑀕𑀺𑀦𑀺𑀓𑀸𑀲𑀺𑀨𑀸𑀮𑀺𑀫𑀁, 𑀦 𑀓𑀤𑁆𑀤𑀫𑁄 𑀦 𑀭𑀚𑁄 𑀦 𑀯𑀸𑀭𑀺 𑀮𑀺𑀫𑁆𑀧𑀢𑀺.

𑁭. 𑀏𑀯𑀫𑁆𑀧𑀺 𑀯𑁄𑀳𑀸𑀭𑀲𑀼𑀘𑀺𑀁 𑀅𑀲𑀸𑀳𑀲𑀁, 𑀯𑀺𑀲𑀼𑀤𑁆𑀥𑀓𑀫𑁆𑀫𑀦𑁆𑀢𑀫𑀧𑁂𑀢𑀧𑀸𑀧𑀓𑀁;

𑀦 𑀮𑀺𑀫𑁆𑀧𑀢𑀺 𑀓𑀫𑁆𑀫𑀓𑀺𑀮𑁂𑀲 𑀢𑀸𑀤𑀺𑀲𑁄, 𑀚𑀸𑀢𑀁 𑀬𑀣𑀸 𑀧𑁄𑀓𑁆𑀔𑀭𑀡𑀻𑀲𑀼 𑀅𑀫𑁆𑀩𑀼𑀚𑀦𑁆𑀢𑀺.

𑀓𑀼𑀓𑁆𑀓𑀼𑀚𑀸𑀢𑀓𑀁 𑀧𑀞𑀫𑀁.

𑁩𑁯𑁭. 𑀫𑀦𑁄𑀚𑀚𑀸𑀢𑀓𑀁 (𑁭-𑁧-𑁨)

𑁮. 𑀬𑀣𑀸 𑀘𑀸𑀧𑁄 𑀦𑀺𑀦𑁆𑀦𑀫𑀢𑀺, 𑀚𑀺𑀬𑀸 𑀘𑀸𑀧𑀺 𑀦𑀺𑀓𑀽𑀚𑀢𑀺;

𑀳𑀜𑁆𑀜𑀢𑁂 𑀦𑀽𑀦 𑀫𑀦𑁄𑀚𑁄, 𑀫𑀺𑀕𑀭𑀸𑀚𑀸 𑀲𑀔𑀸 𑀫𑀫.

𑁯. 𑀳𑀦𑁆𑀤 𑀤𑀸𑀦𑀺 𑀯𑀦𑀦𑁆𑀢𑀸𑀦𑀺, 𑀧𑀓𑁆𑀓𑀫𑀸𑀫𑀺 𑀬𑀣𑀸𑀲𑀼𑀔𑀁;

𑀦𑁂𑀢𑀸𑀤𑀺𑀲𑀸 𑀲𑀔𑀸 𑀳𑁄𑀦𑁆𑀢𑀺, 𑀮𑀩𑁆𑀪𑀸 𑀫𑁂 𑀚𑀻𑀯𑀢𑁄 𑀲𑀔𑀸.

𑁧𑁦. 𑀦 𑀧𑀸𑀧𑀚𑀦𑀲𑀁𑀲𑁂𑀯𑀻, 𑀅𑀘𑁆𑀘𑀦𑁆𑀢𑀁 𑀲𑀼𑀔𑀫𑁂𑀥𑀢𑀺;

𑀫𑀦𑁄𑀚𑀁 𑀧𑀲𑁆𑀲 𑀲𑁂𑀫𑀸𑀦𑀁, 𑀕𑀺𑀭𑀺𑀬𑀲𑁆𑀲𑀸𑀦𑀼𑀲𑀸𑀲𑀦𑀻 [𑀅𑀭𑀺𑀬𑀲𑁆𑀲𑀸𑀦𑀼𑀲𑀸𑀲𑀦𑀻 (𑀲𑀻. 𑀲𑁆𑀬𑀸. 𑀧𑀻.)].

𑁧𑁧. 𑀦 𑀧𑀸𑀧𑀲𑀫𑁆𑀧𑀯𑀗𑁆𑀓𑁂𑀦, 𑀫𑀸𑀢𑀸 𑀧𑀼𑀢𑁆𑀢𑁂𑀦 𑀦𑀦𑁆𑀤𑀢𑀺;

𑀫𑀦𑁄𑀚𑀁 𑀧𑀲𑁆𑀲 𑀲𑁂𑀫𑀸𑀦𑀁, 𑀅𑀘𑁆𑀙𑀦𑁆𑀦𑀁 [𑀲𑀘𑁆𑀙𑀦𑁆𑀦𑀁 (𑀓.)] 𑀲𑀫𑁆𑀳𑀺 𑀮𑁄𑀳𑀺𑀢𑁂.

𑁧𑁨. 𑀏𑀯𑀫𑀸𑀧𑀚𑁆𑀚𑀢𑁂 𑀧𑁄𑀲𑁄, 𑀧𑀸𑀧𑀺𑀬𑁄 𑀘 𑀦𑀺𑀕𑀘𑁆𑀙𑀢𑀺;

𑀬𑁄 𑀯𑁂 𑀳𑀺𑀢𑀸𑀦𑀁 𑀯𑀘𑀦𑀁, 𑀦 𑀓𑀭𑁄𑀢𑀺 𑀅𑀢𑁆𑀣𑀤𑀲𑁆𑀲𑀺𑀦𑀁.

𑁧𑁩. 𑀏𑀯𑀜𑁆𑀘 𑀲𑁄 𑀳𑁄𑀢𑀺 𑀢𑀢𑁄 𑀘 𑀧𑀸𑀧𑀺𑀬𑁄, 𑀬𑁄 𑀉𑀢𑁆𑀢𑀫𑁄 𑀅𑀥𑀫𑀚𑀦𑀽𑀧𑀲𑁂𑀯𑀻;

𑀧𑀲𑁆𑀲𑀼𑀢𑁆𑀢𑀫𑀁 𑀅𑀥𑀫𑀚𑀦𑀽𑀧𑀲𑁂𑀯𑀺𑀢𑀁 [𑀲𑁂𑀯𑀺𑀁 (𑀲𑁆𑀬𑀸.)], 𑀫𑀺𑀕𑀸𑀥𑀺𑀧𑀁 𑀲𑀭𑀯𑀭𑀯𑁂𑀕𑀦𑀺𑀤𑁆𑀥𑀼𑀢𑀁.

𑁧𑁪. 𑀦𑀺𑀳𑀻𑀬𑀢𑀺 𑀧𑀼𑀭𑀺𑀲𑁄 𑀦𑀺𑀳𑀻𑀦𑀲𑁂𑀯𑀻, 𑀦 𑀘 𑀳𑀸𑀬𑁂𑀣 𑀓𑀤𑀸𑀘𑀺 𑀢𑀼𑀮𑁆𑀬𑀲𑁂𑀯𑀻;

𑀲𑁂𑀝𑁆𑀞𑀫𑀼𑀧𑀕𑀫𑀁 [𑀫𑀼𑀧𑀦𑀫𑀁 (𑀲𑀻. 𑀧𑀻. 𑀅. 𑀦𑀺. 𑁩.𑁨𑁬)] 𑀉𑀤𑁂𑀢𑀺 𑀔𑀺𑀧𑁆𑀧𑀁, 𑀢𑀲𑁆𑀫𑀸𑀢𑁆𑀢𑀦𑀸 𑀉𑀢𑁆𑀢𑀭𑀺𑀢𑀭𑀁 [𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀁 (𑀲𑀻. 𑀧𑀻.), 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀁 (𑀲𑁆𑀬𑀸.)] 𑀪𑀚𑁂𑀣𑀸𑀢𑀺.

𑀫𑀦𑁄𑀚𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁯𑁮. 𑀲𑀼𑀢𑀦𑀼𑀚𑀸𑀢𑀓𑀁 (𑁭-𑁧-𑁩)

𑁧𑁫. 𑀭𑀸𑀚𑀸 𑀢𑁂 𑀪𑀢𑁆𑀢𑀁 𑀧𑀸𑀳𑁂𑀲𑀺, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀫𑀖𑀤𑁂𑀯𑀲𑁆𑀫𑀺𑀁 [𑀫𑀔𑀸𑀤𑁂𑀯𑀲𑁆𑀫𑀺𑀁 (𑀲𑀻. 𑀧𑀻.), 𑀫𑀸𑀖𑀤𑁂𑀯𑀲𑁆𑀫𑀺𑀁 (𑀓.)] 𑀅𑀥𑀺𑀯𑀢𑁆𑀣𑁂, 𑀏𑀳𑀺 𑀦𑀺𑀓𑁆𑀔𑀫𑁆𑀫 𑀪𑀼𑀜𑁆𑀚𑀲𑁆𑀲𑀼.

𑁧𑁬. 𑀏𑀳𑀺 𑀫𑀸𑀡𑀯 𑀑𑀭𑁂𑀦, 𑀪𑀺𑀓𑁆𑀔𑀫𑀸𑀤𑀸𑀬 𑀲𑀽𑀧𑀺𑀢𑀁;

𑀢𑁆𑀯𑀜𑁆𑀘 𑀫𑀸𑀡𑀯 𑀪𑀺𑀓𑁆𑀔𑀸 𑀘 [𑀪𑀓𑁆𑀔𑁄𑀲𑀺 (𑀲𑁆𑀬𑀸.), 𑀪𑀓𑁆𑀔𑀸𑀯 (𑀓.)], 𑀉𑀪𑁄 𑀪𑀓𑁆𑀔𑀸 𑀪𑀯𑀺𑀲𑁆𑀲𑀣.

𑁧𑁭. 𑀅𑀧𑁆𑀧𑀓𑁂𑀦 𑀢𑀼𑀯𑀁 𑀬𑀓𑁆𑀔, 𑀣𑀼𑀮𑁆𑀮𑀫𑀢𑁆𑀣𑀁 𑀚𑀳𑀺𑀲𑁆𑀲𑀲𑀺;

𑀪𑀺𑀓𑁆𑀔𑀁 𑀢𑁂 𑀦𑀸𑀳𑀭𑀺𑀲𑁆𑀲𑀦𑁆𑀢𑀺, 𑀚𑀦𑀸 𑀫𑀭𑀡𑀲𑀜𑁆𑀜𑀺𑀦𑁄.

𑁧𑁮. 𑀮𑀤𑁆𑀥𑀸𑀬 𑀬𑀓𑁆𑀔𑀸 [𑀮𑀤𑁆𑀥𑀸𑀬𑀁 𑀬𑀓𑁆𑀔 (𑀲𑀻. 𑀲𑁆𑀬𑀸. 𑀧𑀻.)] 𑀢𑀯 𑀦𑀺𑀘𑁆𑀘𑀪𑀺𑀓𑁆𑀔𑀁, 𑀲𑀼𑀘𑀺𑀁 𑀧𑀡𑀻𑀢𑀁 𑀭𑀲𑀲𑀸 𑀉𑀧𑁂𑀢𑀁;

𑀪𑀺𑀓𑁆𑀔𑀜𑁆𑀘 𑀢𑁂 𑀆𑀳𑀭𑀺𑀬𑁄 𑀦𑀭𑁄 𑀇𑀥, 𑀲𑀼𑀤𑀼𑀮𑁆𑀮𑀪𑁄 𑀳𑁂𑀳𑀺𑀢𑀺 𑀪𑀓𑁆𑀔𑀺𑀢𑁂 [𑀔𑀸𑀤𑀺𑀢𑁂 (𑀲𑀻. 𑀲𑁆𑀬𑀸. 𑀧𑀻.)] 𑀫𑀬𑀺.

𑁧𑁯. 𑀫𑀫𑁂𑀯 [𑀫𑀫𑁂𑀲 (𑀲𑀻. 𑀧𑀻.)] 𑀲𑀼𑀢𑀦𑁄 𑀅𑀢𑁆𑀣𑁄, 𑀬𑀣𑀸 𑀪𑀸𑀲𑀲𑀺 𑀫𑀸𑀡𑀯;

𑀫𑀬𑀸 𑀢𑁆𑀯𑀁 𑀲𑀫𑀦𑀼𑀜𑁆𑀜𑀸𑀢𑁄, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀳𑀺 𑀫𑀸𑀢𑀭𑀁.

𑁨𑁦. 𑀔𑀕𑁆𑀕𑀁 𑀙𑀢𑁆𑀢𑀜𑁆𑀘 𑀧𑀸𑀢𑀺𑀜𑁆𑀘, 𑀕𑀘𑁆𑀙𑀫𑀸𑀤𑀸𑀬 [𑀕𑀘𑁆𑀙𑁂𑀯𑀸𑀤𑀸𑀬 (𑀲𑀻. 𑀲𑁆𑀬𑀸. 𑀧𑀻.)] 𑀫𑀸𑀡𑀯;

𑀲𑁄𑀢𑁆𑀣𑀺𑀁 𑀧𑀲𑁆𑀲𑀢𑀼 𑀢𑁂 𑀫𑀸𑀢𑀸, 𑀢𑁆𑀯𑀜𑁆𑀘 𑀧𑀲𑁆𑀲𑀸𑀳𑀺 𑀫𑀸𑀢𑀭𑀁.

𑁨𑁧. 𑀏𑀯𑀁 𑀬𑀓𑁆𑀔 𑀲𑀼𑀔𑀻 𑀳𑁄𑀳𑀺, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀥𑀦𑀜𑁆𑀘 𑀫𑁂 𑀅𑀥𑀺𑀕𑀢𑀁, 𑀭𑀜𑁆𑀜𑁄 𑀘 𑀯𑀘𑀦𑀁 𑀓𑀢𑀦𑁆𑀢𑀺.

𑀲𑀼𑀢𑀦𑀼𑀚𑀸𑀢𑀓𑀁 𑀢𑀢𑀺𑀬𑀁.

𑁩𑁯𑁯. 𑀫𑀸𑀢𑀼𑀧𑁄𑀲𑀓𑀕𑀺𑀚𑁆𑀛𑀚𑀸𑀢𑀓𑀁 (𑁭-𑁧-𑁪)

𑁨𑁨. 𑀢𑁂 𑀓𑀣𑀁 𑀦𑀼 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀸 𑀕𑀺𑀭𑀺𑀤𑀭𑀻𑀲𑀬𑀸;

𑀅𑀳𑀁 𑀩𑀤𑁆𑀥𑁄𑀲𑁆𑀫𑀺 𑀧𑀸𑀲𑁂𑀦, 𑀦𑀺𑀮𑀻𑀬𑀲𑁆𑀲 𑀯𑀲𑀁 𑀕𑀢𑁄.

𑁨𑁩. 𑀓𑀺𑀁 𑀕𑀺𑀚𑁆𑀛 𑀧𑀭𑀺𑀤𑁂𑀯𑀲𑀺, 𑀓𑀸 𑀦𑀼 𑀢𑁂 𑀧𑀭𑀺𑀤𑁂𑀯𑀦𑀸;

𑀦 𑀫𑁂 𑀲𑀼𑀢𑁄 𑀯𑀸 𑀤𑀺𑀝𑁆𑀞𑁄 𑀯𑀸, 𑀪𑀸𑀲𑀦𑁆𑀢𑁄 𑀫𑀸𑀦𑀼𑀲𑀺𑀁 𑀤𑀺𑀚𑁄.

𑁨𑁪. 𑀪𑀭𑀸𑀫𑀺 𑀫𑀸𑀢𑀸𑀧𑀺𑀢𑀭𑁄, 𑀯𑀼𑀤𑁆𑀥𑁂 𑀕𑀺𑀭𑀺𑀤𑀭𑀻𑀲𑀬𑁂;

𑀢𑁂 𑀓𑀣𑀁 𑀦𑀼 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀳𑀁 𑀯𑀲𑀁 𑀕𑀢𑁄 𑀢𑀯.

𑁨𑁫. 𑀬𑀁 𑀦𑀼 𑀕𑀺𑀚𑁆𑀛𑁄 𑀬𑁄𑀚𑀦𑀲𑀢𑀁, 𑀓𑀼𑀡𑀧𑀸𑀦𑀺 𑀅𑀯𑁂𑀓𑁆𑀔𑀢𑀺;

𑀓𑀲𑁆𑀫𑀸 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀲𑀺.

𑁨𑁬. 𑀬𑀤𑀸 𑀧𑀭𑀸𑀪𑀯𑁄 𑀳𑁄𑀢𑀺, 𑀧𑁄𑀲𑁄 𑀚𑀻𑀯𑀺𑀢𑀲𑀗𑁆𑀔𑀬𑁂;

𑀅𑀣 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀢𑀺.

𑁨𑁭. 𑀪𑀭𑀲𑁆𑀲𑀼 𑀫𑀸𑀢𑀸𑀧𑀺𑀢𑀭𑁄, 𑀯𑀼𑀤𑁆𑀥𑁂 𑀕𑀺𑀭𑀺𑀤𑀭𑀻𑀲𑀬𑁂;

𑀫𑀬𑀸 𑀢𑁆𑀯𑀁 𑀲𑀫𑀦𑀼𑀜𑁆𑀜𑀸𑀢𑁄, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀳𑀺 𑀜𑀸𑀢𑀓𑁂.

𑁨𑁮. 𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀪𑀭𑀺𑀲𑁆𑀲𑀁 𑀫𑀸𑀢𑀸𑀧𑀺𑀢𑀭𑁄, 𑀯𑀼𑀤𑁆𑀥𑁂 𑀕𑀺𑀭𑀺𑀤𑀭𑀻𑀲𑀬𑁂𑀢𑀺.

𑀫𑀸𑀢𑀼𑀧𑁄𑀲𑀓𑀕𑀺𑀚𑁆𑀛𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁪𑁦𑁦. 𑀤𑀩𑁆𑀪𑀧𑀼𑀧𑁆𑀨𑀚𑀸𑀢𑀓𑀁 (𑁭-𑁧-𑁫)

𑁨𑁯. 𑀅𑀦𑀼𑀢𑀻𑀭𑀘𑀸𑀭𑀻 𑀪𑀤𑁆𑀤𑀦𑁆𑀢𑁂, 𑀲𑀳𑀸𑀬𑀫𑀦𑀼𑀥𑀸𑀯 𑀫𑀁;

𑀫𑀳𑀸 𑀫𑁂 𑀕𑀳𑀺𑀢𑁄 [𑀭𑁄𑀳𑀺𑀢𑁄 (𑀓.)] 𑀫𑀘𑁆𑀙𑁄, 𑀲𑁄 𑀫𑀁 𑀳𑀭𑀢𑀺 𑀯𑁂𑀕𑀲𑀸.

𑁩𑁦. 𑀕𑀫𑁆𑀪𑀻𑀭𑀘𑀸𑀭𑀻 𑀪𑀤𑁆𑀤𑀦𑁆𑀢𑁂, 𑀤𑀴𑁆𑀳𑀁 𑀕𑀡𑁆𑀳𑀸𑀳𑀺 𑀣𑀸𑀫𑀲𑀸;

𑀅𑀳𑀁 𑀢𑀁 𑀉𑀤𑁆𑀥𑀭𑀺𑀲𑁆𑀲𑀸𑀫𑀺, 𑀲𑀼𑀧𑀡𑁆𑀡𑁄 𑀉𑀭𑀕𑀸𑀫𑀺𑀯 [𑀉𑀭𑀕𑀫𑁆𑀫𑀺𑀯 (𑀲𑀻. 𑀲𑁆𑀬𑀸. 𑀧𑀻.)].

𑁩𑁧. 𑀯𑀺𑀯𑀸𑀤𑁄 𑀦𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀤𑀩𑁆𑀪𑀧𑀼𑀧𑁆𑀨 𑀲𑀼𑀡𑁄𑀳𑀺 𑀫𑁂;

𑀲𑀫𑁂𑀳𑀺 𑀫𑁂𑀥𑀕𑀁 [𑀫𑁂𑀥𑀓𑀁 (𑀧𑀻.)] 𑀲𑀫𑁆𑀫, 𑀯𑀺𑀯𑀸𑀤𑁄 𑀯𑀽𑀧𑀲𑀫𑁆𑀫𑀢𑀁.

𑁩𑁨. 𑀥𑀫𑁆𑀫𑀝𑁆𑀞𑁄𑀳𑀁 𑀧𑀼𑀭𑁂 𑀆𑀲𑀺𑀁, 𑀩𑀳𑀽 𑀅𑀟𑁆𑀟𑀸 𑀫𑁂 𑀢𑀻𑀭𑀺𑀢𑀸 [𑀩𑀳𑀼𑀅𑀝𑁆𑀝𑀁 𑀫𑁂 𑀢𑀻𑀭𑀺𑀢𑀁 (𑀲𑀻.), 𑀩𑀳𑀼𑀅𑀝𑁆𑀝𑀁𑀯 𑀢𑀻𑀭𑀺𑀢𑀁 (𑀲𑁆𑀬𑀸.), 𑀩𑀳𑀼 𑀅𑀢𑁆𑀣𑀁 𑀫𑁂 𑀢𑀻𑀭𑀺𑀢𑀁 (𑀧𑀻.)];

𑀲𑀫𑁂𑀫𑀺 𑀫𑁂𑀥𑀕𑀁 𑀲𑀫𑁆𑀫, 𑀯𑀺𑀯𑀸𑀤𑁄 𑀯𑀽𑀧𑀲𑀫𑁆𑀫𑀢𑀁.

𑁩𑁩. 𑀅𑀦𑀼𑀢𑀻𑀭𑀘𑀸𑀭𑀺 𑀦𑀗𑁆𑀕𑀼𑀝𑁆𑀞𑀁, 𑀲𑀻𑀲𑀁 𑀕𑀫𑁆𑀪𑀻𑀭𑀘𑀸𑀭𑀺𑀦𑁄;

𑀅𑀘𑁆𑀘𑀸𑀬𑀁 [𑀅𑀣𑀸𑀬𑀁 (𑀲𑀻. 𑀧𑀻.)] 𑀫𑀚𑁆𑀛𑀺𑀫𑁄 𑀔𑀡𑁆𑀟𑁄, 𑀥𑀫𑁆𑀫𑀝𑁆𑀞𑀲𑁆𑀲 𑀪𑀯𑀺𑀲𑁆𑀲𑀢𑀺.

𑁩𑁪. 𑀘𑀺𑀭𑀫𑁆𑀧𑀺 𑀪𑀓𑁆𑀔𑁄 𑀅𑀪𑀯𑀺𑀲𑁆𑀲, 𑀲𑀘𑁂 𑀦 𑀯𑀺𑀯𑀤𑁂𑀫𑀲𑁂;

𑀅𑀲𑀻𑀲𑀓𑀁 𑀅𑀦𑀗𑁆𑀕𑀼𑀝𑁆𑀞𑀁, 𑀲𑀺𑀗𑁆𑀕𑀸𑀮𑁄 𑀳𑀭𑀢𑀺 𑀭𑁄𑀳𑀺𑀢𑀁.

𑁩𑁫. 𑀬𑀣𑀸𑀧𑀺 𑀭𑀸𑀚𑀸 𑀦𑀦𑁆𑀤𑁂𑀬𑁆𑀬, 𑀭𑀚𑁆𑀚𑀁 𑀮𑀤𑁆𑀥𑀸𑀦 𑀔𑀢𑁆𑀢𑀺𑀬𑁄;

𑀏𑀯𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀤𑀺𑀲𑁆𑀯𑀸 𑀧𑀼𑀡𑁆𑀡𑀫𑀼𑀔𑀁 𑀧𑀢𑀺𑀁.

𑁩𑁬. 𑀓𑀣𑀁 𑀦𑀼 𑀣𑀮𑀚𑁄 𑀲𑀦𑁆𑀢𑁄, 𑀉𑀤𑀓𑁂 𑀫𑀘𑁆𑀙𑀁 𑀧𑀭𑀸𑀫𑀲𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀣𑀁 𑀅𑀥𑀺𑀕𑀢𑀁 𑀢𑀬𑀸.

𑁩𑁭. 𑀯𑀺𑀯𑀸𑀤𑁂𑀦 𑀓𑀺𑀲𑀸 𑀳𑁄𑀦𑁆𑀢𑀺, 𑀯𑀺𑀯𑀸𑀤𑁂𑀦 𑀥𑀦𑀓𑁆𑀔𑀬𑀸;

𑀚𑀻𑀦𑀸 𑀉𑀤𑁆𑀤𑀸 𑀯𑀺𑀯𑀸𑀤𑁂𑀦, 𑀪𑀼𑀜𑁆𑀚 𑀫𑀸𑀬𑀸𑀯𑀺 𑀭𑁄𑀳𑀺𑀢𑀁.

𑁩𑁮. 𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀯𑀸𑀤𑁄 𑀬𑀢𑁆𑀣 𑀚𑀸𑀬𑀢𑀺;

𑀥𑀫𑁆𑀫𑀝𑁆𑀞𑀁 𑀧𑀝𑀺𑀥𑀸𑀯𑀦𑁆𑀢𑀺, 𑀲𑁄 𑀳𑀺 𑀦𑁂𑀲𑀁 𑀯𑀺𑀦𑀸𑀬𑀓𑁄;

𑀥𑀦𑀸𑀧𑀺 𑀢𑀢𑁆𑀣 𑀚𑀻𑀬𑀦𑁆𑀢𑀺, 𑀭𑀸𑀚𑀓𑁄𑀲𑁄 𑀧𑀯𑀟𑁆𑀠𑀢𑀻𑀢𑀺 [𑀘 𑀯𑀟𑁆𑀠𑀢𑀺 (𑀧𑀻.)].

𑀤𑀩𑁆𑀪𑀧𑀼𑀧𑁆𑀨𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁪𑁦𑁧. 𑀧𑀡𑁆𑀡𑀓𑀚𑀸𑀢𑀓𑀁 (𑁭-𑁧-𑁬)

𑁩𑁯. 𑀧𑀡𑁆𑀡𑀓𑀁 [𑀤𑀲𑀡𑁆𑀡𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀢𑀺𑀔𑀺𑀡𑀥𑀸𑀭𑀁, 𑀅𑀲𑀺𑀁 𑀲𑀫𑁆𑀧𑀦𑁆𑀦𑀧𑀸𑀬𑀺𑀦𑀁;

𑀧𑀭𑀺𑀲𑀸𑀬𑀁 𑀧𑀼𑀭𑀺𑀲𑁄 𑀕𑀺𑀮𑀢𑀺, 𑀓𑀺𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀬𑀤𑀜𑁆𑀜𑀁 𑀤𑀼𑀓𑁆𑀓𑀭𑀁 𑀞𑀸𑀦𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁪𑁦. 𑀕𑀺𑀮𑁂𑀬𑁆𑀬 𑀧𑀼𑀭𑀺𑀲𑁄 𑀮𑁄𑀪𑀸, 𑀅𑀲𑀺𑀁 𑀲𑀫𑁆𑀧𑀦𑁆𑀦𑀧𑀸𑀬𑀺𑀦𑀁;

𑀬𑁄 𑀘 𑀯𑀚𑁆𑀚𑀸 𑀤𑀤𑀸𑀫𑀻𑀢𑀺, 𑀢𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀲𑀩𑁆𑀩𑀜𑁆𑀜𑀁 𑀲𑀼𑀓𑀭𑀁 𑀞𑀸𑀦𑀁, 𑀏𑀯𑀁 𑀚𑀸𑀦𑀸𑀳𑀺 𑀫𑀤𑁆𑀤𑀯 [𑀫𑀸𑀕𑀥 (𑀲𑀻. 𑀲𑁆𑀬𑀸. 𑀧𑀻.)].

𑁪𑁧. 𑀩𑁆𑀬𑀸𑀓𑀸𑀲𑀺 𑀆𑀬𑀼𑀭𑁄 𑀧𑀜𑁆𑀳𑀁, 𑀅𑀢𑁆𑀣𑀁 [𑀅𑀢𑁆𑀣 (𑀧𑀻. 𑀲𑀻. 𑀦𑀺𑀬𑁆𑀬)] 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄;

𑀧𑀼𑀓𑁆𑀓𑀼𑀲𑀁 𑀤𑀸𑀦𑀺 𑀧𑀼𑀘𑁆𑀙𑀸𑀫𑀺, 𑀓𑀺𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀬𑀤𑀜𑁆𑀜𑀁 𑀤𑀼𑀓𑁆𑀓𑀭𑀁 𑀞𑀸𑀦𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁪𑁨. 𑀦 𑀯𑀸𑀘𑀫𑀼𑀧𑀚𑀻𑀯𑀦𑁆𑀢𑀺, 𑀅𑀨𑀮𑀁 𑀕𑀺𑀭𑀫𑀼𑀤𑀻𑀭𑀺𑀢𑀁;

𑀬𑁄 𑀘 𑀤𑀢𑁆𑀯𑀸 𑀅𑀯𑀸𑀓𑀬𑀺𑀭𑀸, 𑀢𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀲𑀩𑁆𑀩𑀜𑁆𑀜𑀁 𑀲𑀼𑀓𑀭𑀁 𑀞𑀸𑀦𑀁, 𑀏𑀯𑀁 𑀚𑀸𑀦𑀸𑀳𑀺 𑀫𑀤𑁆𑀤𑀯.

𑁪𑁩. 𑀩𑁆𑀬𑀸𑀓𑀸𑀲𑀺 𑀧𑀼𑀓𑁆𑀓𑀼𑀲𑁄 𑀧𑀜𑁆𑀳𑀁, 𑀅𑀢𑁆𑀣𑀁 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑁄;

𑀲𑁂𑀦𑀓𑀁 𑀤𑀸𑀦𑀺 𑀧𑀼𑀘𑁆𑀙𑀸𑀫𑀺, 𑀓𑀺𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀬𑀤𑀜𑁆𑀜𑀁 𑀤𑀼𑀓𑁆𑀓𑀭𑀁 𑀞𑀸𑀦𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁪𑁪. 𑀤𑀤𑁂𑀬𑁆𑀬 𑀧𑀼𑀭𑀺𑀲𑁄 𑀤𑀸𑀦𑀁, 𑀅𑀧𑁆𑀧𑀁 𑀯𑀸 𑀬𑀤𑀺 𑀯𑀸 𑀩𑀳𑀼𑀁;

𑀬𑁄 𑀘 𑀤𑀢𑁆𑀯𑀸 𑀦𑀸𑀦𑀼𑀢𑀧𑁆𑀧𑁂 [𑀢𑀧𑁂 (𑀲𑀻. 𑀧𑀻.)], 𑀢𑀁 𑀤𑀼𑀓𑁆𑀓𑀭𑀢𑀭𑀁 𑀢𑀢𑁄;

𑀲𑀩𑁆𑀩𑀜𑁆𑀜𑀁 𑀲𑀼𑀓𑀭𑀁 𑀞𑀸𑀦𑀁, 𑀏𑀯𑀁 𑀚𑀸𑀦𑀸𑀳𑀺 𑀫𑀤𑁆𑀤𑀯.

𑁪𑁫. 𑀩𑁆𑀬𑀸𑀓𑀸𑀲𑀺 𑀆𑀬𑀼𑀭𑁄 𑀧𑀜𑁆𑀳𑀁, 𑀅𑀣𑁄 𑀧𑀼𑀓𑁆𑀓𑀼𑀲𑀧𑁄𑀭𑀺𑀲𑁄;

𑀲𑀩𑁆𑀩𑁂 𑀧𑀜𑁆𑀳𑁂 𑀅𑀢𑀺𑀪𑁄𑀢𑀺, 𑀬𑀣𑀸 𑀪𑀸𑀲𑀢𑀺 𑀲𑁂𑀦𑀓𑁄𑀢𑀺.

𑀧𑀡𑁆𑀡𑀓 [𑀤𑀲𑀡𑁆𑀡𑀓 (𑀲𑀻. 𑀲𑁆𑀬𑀸. 𑀧𑀻.)] 𑀚𑀸𑀢𑀓𑀁 𑀙𑀝𑁆𑀞𑀁.

𑁪𑁦𑁨. 𑀲𑀢𑁆𑀢𑀼𑀪𑀲𑁆𑀢𑀚𑀸𑀢𑀓𑀁 (𑁭-𑁧-𑁭)

𑁪𑁬. 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀓𑀼𑀧𑀺𑀢𑀺𑀦𑁆𑀤𑁆𑀭𑀺𑀬𑁄𑀲𑀺, 𑀦𑁂𑀢𑁆𑀢𑁂𑀳𑀺 𑀢𑁂 𑀯𑀸𑀭𑀺𑀕𑀡𑀸 𑀲𑀯𑀦𑁆𑀢𑀺;

𑀓𑀺𑀁 𑀢𑁂 𑀦𑀝𑁆𑀞𑀁 𑀓𑀺𑀁 𑀧𑀦 𑀧𑀢𑁆𑀣𑀬𑀸𑀦𑁄, 𑀇𑀥𑀸𑀕𑀫𑀸 𑀩𑁆𑀭𑀳𑁆𑀫𑁂 𑀢𑀤𑀺𑀗𑁆𑀖 [𑀩𑁆𑀭𑀸𑀳𑁆𑀫𑀡 𑀇𑀗𑁆𑀖 (𑀲𑀻. 𑀲𑁆𑀬𑀸.)] 𑀩𑁆𑀭𑀽𑀳𑀺.

𑁪𑁭. 𑀫𑀺𑀬𑁆𑀬𑁂𑀣 𑀪𑀭𑀺𑀬𑀸 𑀯𑀚𑀢𑁄 𑀫𑀫𑀚𑁆𑀚, 𑀅𑀕𑀘𑁆𑀙𑀢𑁄 𑀫𑀭𑀡𑀫𑀸𑀳 𑀬𑀓𑁆𑀔𑁄;

𑀏𑀢𑁂𑀦 𑀤𑀼𑀓𑁆𑀔𑁂𑀦 𑀧𑀯𑁂𑀥𑀺𑀢𑁄𑀲𑁆𑀫𑀺, 𑀅𑀓𑁆𑀔𑀸𑀳𑀺 𑀫𑁂 𑀲𑁂𑀦𑀓 𑀏𑀢𑀫𑀢𑁆𑀣𑀁.

𑁪𑁮. 𑀩𑀳𑀽𑀦𑀺 𑀞𑀸𑀦𑀸𑀦𑀺 𑀯𑀺𑀘𑀺𑀦𑁆𑀢𑀬𑀺𑀢𑁆𑀯𑀸, 𑀬𑀫𑁂𑀢𑁆𑀣 𑀯𑀓𑁆𑀔𑀸𑀫𑀺 𑀢𑀤𑁂𑀯 𑀲𑀘𑁆𑀘𑀁;

𑀫𑀜𑁆𑀜𑀸𑀫𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀲𑀢𑁆𑀢𑀼𑀪𑀲𑁆𑀢𑀁, 𑀅𑀚𑀸𑀦𑀢𑁄 𑀓𑀡𑁆𑀳𑀲𑀧𑁆𑀧𑁄 𑀧𑀯𑀺𑀝𑁆𑀞𑁄.

𑁪𑁯. 𑀆𑀤𑀸𑀬 𑀤𑀡𑁆𑀟𑀁 𑀧𑀭𑀺𑀲𑀼𑀫𑁆𑀪 𑀪𑀲𑁆𑀢𑀁, 𑀧𑀲𑁆𑀲𑁂𑀴𑀫𑀽𑀕𑀁 𑀉𑀭𑀕𑀁 𑀤𑀼𑀚𑀺𑀯𑁆𑀳𑀁 [𑀤𑀺𑀚𑀺𑀯𑁆𑀳𑀁 (𑀲𑀻. 𑀧𑀻.)];

𑀙𑀺𑀦𑁆𑀤𑀚𑁆𑀚 𑀓𑀗𑁆𑀔𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀸𑀦𑀺, 𑀪𑀼𑀚𑀗𑁆𑀕𑀫𑀁 𑀧𑀲𑁆𑀲 𑀧𑀫𑀼𑀜𑁆𑀘 𑀪𑀲𑁆𑀢𑀁.

𑁫𑁦. 𑀲𑀁𑀯𑀺𑀕𑁆𑀕𑀭𑀽𑀧𑁄 𑀧𑀭𑀺𑀲𑀸𑀬 𑀫𑀚𑁆𑀛𑁂, 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑀢𑁆𑀢𑀼𑀪𑀲𑁆𑀢𑀁 𑀧𑀫𑀼𑀜𑁆𑀘𑀺;

𑀅𑀣 𑀦𑀺𑀓𑁆𑀔𑀫𑀺 𑀉𑀭𑀕𑁄 𑀉𑀕𑁆𑀕𑀢𑁂𑀚𑁄, 𑀆𑀲𑀻𑀯𑀺𑀲𑁄 𑀲𑀧𑁆𑀧𑁄 𑀨𑀡𑀁 𑀓𑀭𑀺𑀢𑁆𑀯𑀸.

𑁫𑁧. 𑀲𑀼𑀮𑀤𑁆𑀥𑀮𑀸𑀪𑀸 𑀚𑀦𑀓𑀲𑁆𑀲 𑀭𑀜𑁆𑀜𑁄, 𑀬𑁄 𑀧𑀲𑁆𑀲𑀢𑀻 𑀲𑁂𑀦𑀓𑀁 𑀲𑀸𑀥𑀼𑀧𑀜𑁆𑀜𑀁;

𑀯𑀺𑀯𑀝𑁆𑀝𑀙𑀤𑁆𑀤𑁄 [𑀯𑀺𑀯𑀢𑁆𑀢𑀘𑁆𑀙𑀤𑁆𑀤𑁄 (𑀲𑀻.), 𑀯𑀺𑀯𑀝𑁆𑀝𑀘𑁆𑀙𑀤𑁄 (𑀲𑁆𑀬𑀸.), 𑀯𑀺𑀯𑀝𑁆𑀝𑀘𑁆𑀙𑀤𑁆𑀤𑀸 (𑀧𑀻.)] 𑀦𑀼𑀲𑀺 𑀲𑀩𑁆𑀩𑀤𑀲𑁆𑀲𑀻, 𑀜𑀸𑀡𑀁 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧𑀁.

𑁫𑁨. 𑀇𑀫𑀸𑀦𑀺 𑀫𑁂 𑀲𑀢𑁆𑀢𑀲𑀢𑀸𑀦𑀺 𑀅𑀢𑁆𑀣𑀺, 𑀕𑀡𑁆𑀳𑀸𑀳𑀺 𑀲𑀩𑁆𑀩𑀸𑀦𑀺 𑀤𑀤𑀸𑀫𑀺 𑀢𑀼𑀬𑁆𑀳𑀁;

𑀢𑀬𑀸 𑀳𑀺 𑀫𑁂 𑀚𑀻𑀯𑀺𑀢𑀫𑀚𑁆𑀚 𑀮𑀤𑁆𑀥𑀁, 𑀅𑀣𑁄𑀧𑀺 𑀪𑀭𑀺𑀬𑀸𑀬 𑀫𑀓𑀸𑀲𑀺 𑀲𑁄𑀢𑁆𑀣𑀺𑀁.

𑁫𑁩. 𑀦 𑀧𑀡𑁆𑀟𑀺𑀢𑀸 𑀯𑁂𑀢𑀦𑀫𑀸𑀤𑀺𑀬𑀦𑁆𑀢𑀺, 𑀘𑀺𑀢𑁆𑀭𑀸𑀳𑀺 𑀕𑀸𑀣𑀸𑀳𑀺 𑀲𑀼𑀪𑀸𑀲𑀺𑀢𑀸𑀳𑀺;

𑀇𑀢𑁄𑀧𑀺 𑀢𑁂 𑀩𑁆𑀭𑀳𑁆𑀫𑁂 𑀤𑀤𑀦𑁆𑀢𑀼 𑀯𑀺𑀢𑁆𑀢𑀁, 𑀆𑀤𑀸𑀬 𑀢𑁆𑀯𑀁 𑀕𑀘𑁆𑀙 𑀲𑀓𑀁 𑀦𑀺𑀓𑁂𑀢𑀦𑁆𑀢𑀺.

𑀲𑀢𑁆𑀢𑀼𑀪𑀲𑁆𑀢𑀚𑀸𑀢𑀓𑀁 [𑀲𑁂𑀦𑀓𑀚𑀸𑀢𑀓𑀁 (𑀲𑁆𑀬𑀸.)] 𑀲𑀢𑁆𑀢𑀫𑀁.

𑁪𑁦𑁩. 𑀅𑀝𑁆𑀞𑀺𑀲𑁂𑀦𑀓𑀚𑀸𑀢𑀓𑀁 (𑁭-𑁧-𑁮)

𑁫𑁪. 𑀬𑁂𑀫𑁂 𑀅𑀳𑀁 𑀦 𑀚𑀸𑀦𑀸𑀫𑀺, 𑀅𑀝𑁆𑀞𑀺𑀲𑁂𑀦 𑀯𑀦𑀺𑀩𑁆𑀩𑀓𑁂;

𑀢𑁂 𑀫𑀁 𑀲𑀗𑁆𑀕𑀫𑁆𑀫 𑀬𑀸𑀘𑀦𑁆𑀢𑀺, 𑀓𑀲𑁆𑀫𑀸 𑀫𑀁 𑀢𑁆𑀯𑀁 𑀦 𑀬𑀸𑀘𑀲𑀺.

𑁫𑁫. 𑀬𑀸𑀘𑀓𑁄 𑀅𑀧𑁆𑀧𑀺𑀬𑁄 𑀳𑁄𑀢𑀺, 𑀬𑀸𑀘𑀁 𑀅𑀤𑀤𑀫𑀧𑁆𑀧𑀺𑀬𑁄;

𑀢𑀲𑁆𑀫𑀸𑀳𑀁 𑀢𑀁 𑀦 𑀬𑀸𑀘𑀸𑀫𑀺, 𑀫𑀸 𑀫𑁂 𑀯𑀺𑀤𑁂𑀲𑁆𑀲𑀦𑀸 [𑀯𑀺𑀤𑁆𑀤𑁂𑀲𑀦𑀸 (𑀲𑀻. 𑀧𑀻.)] 𑀅𑀳𑀼.

𑁫𑁬. 𑀬𑁄 𑀯𑁂 𑀬𑀸𑀘𑀦𑀚𑀻𑀯𑀸𑀦𑁄, 𑀓𑀸𑀮𑁂 𑀬𑀸𑀘𑀁 𑀦 𑀬𑀸𑀘𑀢𑀺;

𑀧𑀭𑀜𑁆𑀘 𑀧𑀼𑀜𑁆𑀜𑀸 [𑀧𑀼𑀜𑁆𑀜𑀁 (𑀲𑁆𑀬𑀸. 𑀓.)] 𑀥𑀁𑀲𑁂𑀢𑀺, 𑀅𑀢𑁆𑀢𑀦𑀸𑀧𑀺 𑀦 𑀚𑀻𑀯𑀢𑀺.

𑁫𑁭. 𑀬𑁄 𑀘 [𑀬𑁄 𑀯𑁂 (𑀓.)] 𑀬𑀸𑀘𑀦𑀚𑀻𑀯𑀸𑀦𑁄, 𑀓𑀸𑀮𑁂 𑀬𑀸𑀘𑀜𑁆𑀳𑀺 𑀬𑀸𑀘𑀢𑀺 [𑀬𑀸𑀘𑀁𑀧𑀺 𑀬𑀸𑀘𑀢𑀺 (𑀲𑁆𑀬𑀸.), 𑀬𑀸𑀘𑀸𑀦𑀺 𑀬𑀸𑀘𑀢𑀺 (𑀧𑀻.), 𑀬𑀸𑀘𑀢𑀺 𑀬𑀸𑀘𑀦𑀁 (𑀲𑀻. 𑀦𑀺𑀬𑁆𑀬), 𑀬𑀸𑀘𑀦𑀁 𑀬𑀸𑀘𑀢𑀺 (𑀓.)];

𑀧𑀭𑀜𑁆𑀘 𑀧𑀼𑀜𑁆𑀜𑀁 𑀮𑀩𑁆𑀪𑁂𑀢𑀺, 𑀅𑀢𑁆𑀢𑀦𑀸𑀧𑀺 𑀘 𑀚𑀻𑀯𑀢𑀺.

𑁫𑁮. 𑀦 𑀯𑁂 𑀤𑁂𑀲𑁆𑀲𑀦𑁆𑀢𑀺 [𑀦 𑀯𑁂 𑀤𑀼𑀲𑁆𑀲𑀦𑁆𑀢𑀺 (𑀲𑁆𑀬𑀸.), 𑀦 𑀯𑁂 𑀤𑀺𑀲𑁆𑀲𑀦𑁆𑀢𑀺 (𑀧𑀻.), 𑀦 𑀯𑀺𑀤𑁂𑀲𑁆𑀲𑀦𑁆𑀢𑀺 (𑀓. 𑀅𑀝𑁆𑀞.)] 𑀲𑀧𑁆𑀧𑀜𑁆𑀜𑀸, 𑀤𑀺𑀲𑁆𑀯𑀸 𑀬𑀸𑀘𑀓𑀫𑀸𑀕𑀢𑁂;

𑀩𑁆𑀭𑀳𑁆𑀫𑀘𑀸𑀭𑀺 𑀧𑀺𑀬𑁄 𑀫𑁂𑀲𑀺, 𑀯𑀤 𑀢𑁆𑀯𑀁 [𑀯𑀭 𑀢𑀁 (𑀲𑀻.), 𑀯𑀭 𑀢𑁆𑀯𑀁 (𑀧𑀻.)] 𑀪𑀜𑁆𑀜𑀫𑀺𑀘𑁆𑀙𑀲𑀺 [𑀬𑀜𑁆𑀜𑀫𑀺𑀘𑁆𑀙𑀲𑀺 (?)].

𑁫𑁯. 𑀦 𑀯𑁂 𑀬𑀸𑀘𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀥𑀻𑀭𑁄 𑀘 𑀯𑁂𑀤𑀺𑀢𑀼𑀫𑀭𑀳𑀢𑀺;

𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸.

𑁬𑁦. 𑀤𑀤𑀸𑀫𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀭𑁄𑀳𑀺𑀡𑀻𑀦𑀁, 𑀕𑀯𑀁 𑀲𑀳𑀲𑁆𑀲𑀁 𑀲𑀳 𑀧𑀼𑀗𑁆𑀕𑀯𑁂𑀦;

𑀅𑀭𑀺𑀬𑁄 𑀳𑀺 𑀅𑀭𑀺𑀬𑀲𑁆𑀲 𑀓𑀣𑀁 𑀦 𑀤𑀚𑁆𑀚𑀸, 𑀲𑀼𑀢𑁆𑀯𑀸𑀦 𑀕𑀸𑀣𑀸 𑀢𑀯 𑀥𑀫𑁆𑀫𑀬𑀼𑀢𑁆𑀢𑀸𑀢𑀺.

𑀅𑀝𑁆𑀞𑀺𑀲𑁂𑀦𑀓𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁪𑁦𑁪. 𑀓𑀧𑀺𑀚𑀸𑀢𑀓𑀁 (𑁭-𑁧-𑁯)

𑁬𑁧. 𑀬𑀢𑁆𑀣 𑀯𑁂𑀭𑀻 𑀦𑀺𑀯𑀲𑀢𑀺, 𑀦 𑀯𑀲𑁂 𑀢𑀢𑁆𑀣 𑀧𑀡𑁆𑀟𑀺𑀢𑁄;

𑀏𑀓𑀭𑀢𑁆𑀢𑀁 𑀤𑀺𑀭𑀢𑁆𑀢𑀁 𑀯𑀸, 𑀤𑀼𑀓𑁆𑀔𑀁 𑀯𑀲𑀢𑀺 𑀯𑁂𑀭𑀺𑀲𑀼.

𑁬𑁨. 𑀤𑀺𑀲𑁄 𑀯𑁂 𑀮𑀳𑀼𑀘𑀺𑀢𑁆𑀢𑀲𑁆𑀲, 𑀧𑁄𑀲𑀲𑁆𑀲𑀸𑀦𑀼𑀯𑀺𑀥𑀻𑀬𑀢𑁄;

𑀏𑀓𑀲𑁆𑀲 𑀓𑀧𑀺𑀦𑁄 𑀳𑁂𑀢𑀼, 𑀬𑀽𑀣𑀲𑁆𑀲 𑀅𑀦𑀬𑁄 𑀓𑀢𑁄.

𑁬𑁩. 𑀩𑀸𑀮𑁄𑀯 [𑀘 (𑀲𑀻. 𑀲𑁆𑀬𑀸. 𑀧𑀻.)] 𑀧𑀡𑁆𑀟𑀺𑀢𑀫𑀸𑀦𑀻, 𑀬𑀽𑀣𑀲𑁆𑀲 𑀧𑀭𑀺𑀳𑀸𑀭𑀓𑁄;