𑁪𑁦𑁪. 𑀓𑀧𑀺𑀚𑀸𑀢𑀓𑀁 (𑁭-𑁧-𑁯)

𑁬𑁧. 𑀬𑀢𑁆𑀣 𑀯𑁂𑀭𑀻 𑀦𑀺𑀯𑀲𑀢𑀺, 𑀦 𑀯𑀲𑁂 𑀢𑀢𑁆𑀣 𑀧𑀡𑁆𑀟𑀺𑀢𑁄;

𑀏𑀓𑀭𑀢𑁆𑀢𑀁 𑀤𑀺𑀭𑀢𑁆𑀢𑀁 𑀯𑀸, 𑀤𑀼𑀓𑁆𑀔𑀁 𑀯𑀲𑀢𑀺 𑀯𑁂𑀭𑀺𑀲𑀼.

𑁬𑁨. 𑀤𑀺𑀲𑁄 𑀯𑁂 𑀮𑀳𑀼𑀘𑀺𑀢𑁆𑀢𑀲𑁆𑀲, 𑀧𑁄𑀲𑀲𑁆𑀲𑀸𑀦𑀼𑀯𑀺𑀥𑀻𑀬𑀢𑁄;

𑀏𑀓𑀲𑁆𑀲 𑀓𑀧𑀺𑀦𑁄 𑀳𑁂𑀢𑀼, 𑀬𑀽𑀣𑀲𑁆𑀲 𑀅𑀦𑀬𑁄 𑀓𑀢𑁄.

𑁬𑁩. 𑀩𑀸𑀮𑁄𑀯 [𑀘 (𑀲𑀻. 𑀲𑁆𑀬𑀸. 𑀧𑀻.)] 𑀧𑀡𑁆𑀟𑀺𑀢𑀫𑀸𑀦𑀻, 𑀬𑀽𑀣𑀲𑁆𑀲 𑀧𑀭𑀺𑀳𑀸𑀭𑀓𑁄;

𑀲𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀦𑁆𑀢𑁆𑀯𑀸, 𑀲𑀬𑁂𑀣𑀸𑀬𑀁 [𑀧𑀲𑁆𑀲𑁂𑀣𑀸𑀬𑀁 (𑀓.)] 𑀬𑀣𑀸 𑀓𑀧𑀺.

𑁬𑁪. 𑀦 𑀲𑀸𑀥𑀼 𑀩𑀮𑀯𑀸 𑀩𑀸𑀮𑁄, 𑀬𑀽𑀣𑀲𑁆𑀲 𑀧𑀭𑀺𑀳𑀸𑀭𑀓𑁄;

𑀅𑀳𑀺𑀢𑁄 𑀪𑀯𑀢𑀺 𑀜𑀸𑀢𑀻𑀦𑀁, 𑀲𑀓𑀼𑀡𑀸𑀦𑀁𑀯 𑀘𑁂𑀢𑀓𑁄 [𑀘𑁂𑀝𑀓𑁄 (𑀓.)].

𑁬𑁫. 𑀥𑀻𑀭𑁄𑀯 𑀩𑀮𑀯𑀸 𑀲𑀸𑀥𑀼, 𑀬𑀽𑀣𑀲𑁆𑀲 𑀧𑀭𑀺𑀳𑀸𑀭𑀓𑁄;

𑀳𑀺𑀢𑁄 𑀪𑀯𑀢𑀺 𑀜𑀸𑀢𑀻𑀦𑀁, 𑀢𑀺𑀤𑀲𑀸𑀦𑀁𑀯 𑀯𑀸𑀲𑀯𑁄.

𑁬𑁬. 𑀬𑁄 𑀘 𑀲𑀻𑀮𑀜𑁆𑀘 𑀧𑀜𑁆𑀜𑀜𑁆𑀘, 𑀲𑀼𑀢𑀜𑁆𑀘𑀢𑁆𑀢𑀦𑀺 𑀧𑀲𑁆𑀲𑀢𑀺;

𑀉𑀪𑀺𑀦𑁆𑀦𑀫𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘.

𑁬𑁭. 𑀢𑀲𑁆𑀫𑀸 𑀢𑀼𑀮𑁂𑀬𑁆𑀬 𑀫𑀢𑁆𑀢𑀸𑀦𑀁, 𑀲𑀻𑀮𑀧𑀜𑁆𑀜𑀸𑀲𑀼𑀢𑀸𑀫𑀺𑀯 [𑀲𑀻𑀮𑀁 𑀧𑀜𑁆𑀜𑀁 𑀲𑀼𑀢𑀁𑀧𑀺𑀯 (𑀲𑁆𑀬𑀸.)];

𑀕𑀡𑀁 𑀯𑀸 𑀧𑀭𑀺𑀳𑀭𑁂 𑀥𑀻𑀭𑁄, 𑀏𑀓𑁄 𑀯𑀸𑀧𑀺 𑀧𑀭𑀺𑀩𑁆𑀩𑀚𑁂𑀢𑀺.

𑀓𑀧𑀺𑀚𑀸𑀢𑀓𑀁 𑀦𑀯𑀫𑀁.