𑁩𑁯𑁯. 𑀫𑀸𑀢𑀼𑀧𑁄𑀲𑀓𑀕𑀺𑀚𑁆𑀛𑀚𑀸𑀢𑀓𑀁 (𑁭-𑁧-𑁪)

𑁨𑁨. 𑀢𑁂 𑀓𑀣𑀁 𑀦𑀼 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀸 𑀕𑀺𑀭𑀺𑀤𑀭𑀻𑀲𑀬𑀸;

𑀅𑀳𑀁 𑀩𑀤𑁆𑀥𑁄𑀲𑁆𑀫𑀺 𑀧𑀸𑀲𑁂𑀦, 𑀦𑀺𑀮𑀻𑀬𑀲𑁆𑀲 𑀯𑀲𑀁 𑀕𑀢𑁄.

𑁨𑁩. 𑀓𑀺𑀁 𑀕𑀺𑀚𑁆𑀛 𑀧𑀭𑀺𑀤𑁂𑀯𑀲𑀺, 𑀓𑀸 𑀦𑀼 𑀢𑁂 𑀧𑀭𑀺𑀤𑁂𑀯𑀦𑀸;

𑀦 𑀫𑁂 𑀲𑀼𑀢𑁄 𑀯𑀸 𑀤𑀺𑀝𑁆𑀞𑁄 𑀯𑀸, 𑀪𑀸𑀲𑀦𑁆𑀢𑁄 𑀫𑀸𑀦𑀼𑀲𑀺𑀁 𑀤𑀺𑀚𑁄.

𑁨𑁪. 𑀪𑀭𑀸𑀫𑀺 𑀫𑀸𑀢𑀸𑀧𑀺𑀢𑀭𑁄, 𑀯𑀼𑀤𑁆𑀥𑁂 𑀕𑀺𑀭𑀺𑀤𑀭𑀻𑀲𑀬𑁂;

𑀢𑁂 𑀓𑀣𑀁 𑀦𑀼 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀳𑀁 𑀯𑀲𑀁 𑀕𑀢𑁄 𑀢𑀯.

𑁨𑁫. 𑀬𑀁 𑀦𑀼 𑀕𑀺𑀚𑁆𑀛𑁄 𑀬𑁄𑀚𑀦𑀲𑀢𑀁, 𑀓𑀼𑀡𑀧𑀸𑀦𑀺 𑀅𑀯𑁂𑀓𑁆𑀔𑀢𑀺;

𑀓𑀲𑁆𑀫𑀸 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀲𑀺.

𑁨𑁬. 𑀬𑀤𑀸 𑀧𑀭𑀸𑀪𑀯𑁄 𑀳𑁄𑀢𑀺, 𑀧𑁄𑀲𑁄 𑀚𑀻𑀯𑀺𑀢𑀲𑀗𑁆𑀔𑀬𑁂;

𑀅𑀣 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀢𑀺.

𑁨𑁭. 𑀪𑀭𑀲𑁆𑀲𑀼 𑀫𑀸𑀢𑀸𑀧𑀺𑀢𑀭𑁄, 𑀯𑀼𑀤𑁆𑀥𑁂 𑀕𑀺𑀭𑀺𑀤𑀭𑀻𑀲𑀬𑁂;

𑀫𑀬𑀸 𑀢𑁆𑀯𑀁 𑀲𑀫𑀦𑀼𑀜𑁆𑀜𑀸𑀢𑁄, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀳𑀺 𑀜𑀸𑀢𑀓𑁂.

𑁨𑁮. 𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀪𑀭𑀺𑀲𑁆𑀲𑀁 𑀫𑀸𑀢𑀸𑀧𑀺𑀢𑀭𑁄, 𑀯𑀼𑀤𑁆𑀥𑁂 𑀕𑀺𑀭𑀺𑀤𑀭𑀻𑀲𑀬𑁂𑀢𑀺.

𑀫𑀸𑀢𑀼𑀧𑁄𑀲𑀓𑀕𑀺𑀚𑁆𑀛𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.