𑁪𑁦𑁦. 𑀤𑀩𑁆𑀪𑀧𑀼𑀧𑁆𑀨𑀚𑀸𑀢𑀓𑀁 (𑁭-𑁧-𑁫)

𑁨𑁯. 𑀅𑀦𑀼𑀢𑀻𑀭𑀘𑀸𑀭𑀻 𑀪𑀤𑁆𑀤𑀦𑁆𑀢𑁂, 𑀲𑀳𑀸𑀬𑀫𑀦𑀼𑀥𑀸𑀯 𑀫𑀁;

𑀫𑀳𑀸 𑀫𑁂 𑀕𑀳𑀺𑀢𑁄 [𑀭𑁄𑀳𑀺𑀢𑁄 (𑀓.)] 𑀫𑀘𑁆𑀙𑁄, 𑀲𑁄 𑀫𑀁 𑀳𑀭𑀢𑀺 𑀯𑁂𑀕𑀲𑀸.

𑁩𑁦. 𑀕𑀫𑁆𑀪𑀻𑀭𑀘𑀸𑀭𑀻 𑀪𑀤𑁆𑀤𑀦𑁆𑀢𑁂, 𑀤𑀴𑁆𑀳𑀁 𑀕𑀡𑁆𑀳𑀸𑀳𑀺 𑀣𑀸𑀫𑀲𑀸;

𑀅𑀳𑀁 𑀢𑀁 𑀉𑀤𑁆𑀥𑀭𑀺𑀲𑁆𑀲𑀸𑀫𑀺, 𑀲𑀼𑀧𑀡𑁆𑀡𑁄 𑀉𑀭𑀕𑀸𑀫𑀺𑀯 [𑀉𑀭𑀕𑀫𑁆𑀫𑀺𑀯 (𑀲𑀻. 𑀲𑁆𑀬𑀸. 𑀧𑀻.)].

𑁩𑁧. 𑀯𑀺𑀯𑀸𑀤𑁄 𑀦𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀤𑀩𑁆𑀪𑀧𑀼𑀧𑁆𑀨 𑀲𑀼𑀡𑁄𑀳𑀺 𑀫𑁂;

𑀲𑀫𑁂𑀳𑀺 𑀫𑁂𑀥𑀕𑀁 [𑀫𑁂𑀥𑀓𑀁 (𑀧𑀻.)] 𑀲𑀫𑁆𑀫, 𑀯𑀺𑀯𑀸𑀤𑁄 𑀯𑀽𑀧𑀲𑀫𑁆𑀫𑀢𑀁.

𑁩𑁨. 𑀥𑀫𑁆𑀫𑀝𑁆𑀞𑁄𑀳𑀁 𑀧𑀼𑀭𑁂 𑀆𑀲𑀺𑀁, 𑀩𑀳𑀽 𑀅𑀟𑁆𑀟𑀸 𑀫𑁂 𑀢𑀻𑀭𑀺𑀢𑀸 [𑀩𑀳𑀼𑀅𑀝𑁆𑀝𑀁 𑀫𑁂 𑀢𑀻𑀭𑀺𑀢𑀁 (𑀲𑀻.), 𑀩𑀳𑀼𑀅𑀝𑁆𑀝𑀁𑀯 𑀢𑀻𑀭𑀺𑀢𑀁 (𑀲𑁆𑀬𑀸.), 𑀩𑀳𑀼 𑀅𑀢𑁆𑀣𑀁 𑀫𑁂 𑀢𑀻𑀭𑀺𑀢𑀁 (𑀧𑀻.)];

𑀲𑀫𑁂𑀫𑀺 𑀫𑁂𑀥𑀕𑀁 𑀲𑀫𑁆𑀫, 𑀯𑀺𑀯𑀸𑀤𑁄 𑀯𑀽𑀧𑀲𑀫𑁆𑀫𑀢𑀁.

𑁩𑁩. 𑀅𑀦𑀼𑀢𑀻𑀭𑀘𑀸𑀭𑀺 𑀦𑀗𑁆𑀕𑀼𑀝𑁆𑀞𑀁, 𑀲𑀻𑀲𑀁 𑀕𑀫𑁆𑀪𑀻𑀭𑀘𑀸𑀭𑀺𑀦𑁄;

𑀅𑀘𑁆𑀘𑀸𑀬𑀁 [𑀅𑀣𑀸𑀬𑀁 (𑀲𑀻. 𑀧𑀻.)] 𑀫𑀚𑁆𑀛𑀺𑀫𑁄 𑀔𑀡𑁆𑀟𑁄, 𑀥𑀫𑁆𑀫𑀝𑁆𑀞𑀲𑁆𑀲 𑀪𑀯𑀺𑀲𑁆𑀲𑀢𑀺.

𑁩𑁪. 𑀘𑀺𑀭𑀫𑁆𑀧𑀺 𑀪𑀓𑁆𑀔𑁄 𑀅𑀪𑀯𑀺𑀲𑁆𑀲, 𑀲𑀘𑁂 𑀦 𑀯𑀺𑀯𑀤𑁂𑀫𑀲𑁂;

𑀅𑀲𑀻𑀲𑀓𑀁 𑀅𑀦𑀗𑁆𑀕𑀼𑀝𑁆𑀞𑀁, 𑀲𑀺𑀗𑁆𑀕𑀸𑀮𑁄 𑀳𑀭𑀢𑀺 𑀭𑁄𑀳𑀺𑀢𑀁.

𑁩𑁫. 𑀬𑀣𑀸𑀧𑀺 𑀭𑀸𑀚𑀸 𑀦𑀦𑁆𑀤𑁂𑀬𑁆𑀬, 𑀭𑀚𑁆𑀚𑀁 𑀮𑀤𑁆𑀥𑀸𑀦 𑀔𑀢𑁆𑀢𑀺𑀬𑁄;

𑀏𑀯𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀤𑀺𑀲𑁆𑀯𑀸 𑀧𑀼𑀡𑁆𑀡𑀫𑀼𑀔𑀁 𑀧𑀢𑀺𑀁.

𑁩𑁬. 𑀓𑀣𑀁 𑀦𑀼 𑀣𑀮𑀚𑁄 𑀲𑀦𑁆𑀢𑁄, 𑀉𑀤𑀓𑁂 𑀫𑀘𑁆𑀙𑀁 𑀧𑀭𑀸𑀫𑀲𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀣𑀁 𑀅𑀥𑀺𑀕𑀢𑀁 𑀢𑀬𑀸.

𑁩𑁭. 𑀯𑀺𑀯𑀸𑀤𑁂𑀦 𑀓𑀺𑀲𑀸 𑀳𑁄𑀦𑁆𑀢𑀺, 𑀯𑀺𑀯𑀸𑀤𑁂𑀦 𑀥𑀦𑀓𑁆𑀔𑀬𑀸;

𑀚𑀻𑀦𑀸 𑀉𑀤𑁆𑀤𑀸 𑀯𑀺𑀯𑀸𑀤𑁂𑀦, 𑀪𑀼𑀜𑁆𑀚 𑀫𑀸𑀬𑀸𑀯𑀺 𑀭𑁄𑀳𑀺𑀢𑀁.

𑁩𑁮. 𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀯𑀺𑀯𑀸𑀤𑁄 𑀬𑀢𑁆𑀣 𑀚𑀸𑀬𑀢𑀺;

𑀥𑀫𑁆𑀫𑀝𑁆𑀞𑀁 𑀧𑀝𑀺𑀥𑀸𑀯𑀦𑁆𑀢𑀺, 𑀲𑁄 𑀳𑀺 𑀦𑁂𑀲𑀁 𑀯𑀺𑀦𑀸𑀬𑀓𑁄;

𑀥𑀦𑀸𑀧𑀺 𑀢𑀢𑁆𑀣 𑀚𑀻𑀬𑀦𑁆𑀢𑀺, 𑀭𑀸𑀚𑀓𑁄𑀲𑁄 𑀧𑀯𑀟𑁆𑀠𑀢𑀻𑀢𑀺 [𑀘 𑀯𑀟𑁆𑀠𑀢𑀺 (𑀧𑀻.)].

𑀤𑀩𑁆𑀪𑀧𑀼𑀧𑁆𑀨𑀚𑀸𑀢𑀓𑀁 𑀧𑀜𑁆𑀘𑀫𑀁.