𑁩𑁮𑁫. 𑀦𑀦𑁆𑀤𑀺𑀬𑀫𑀺𑀕𑀭𑀸𑀚𑀚𑀸𑀢𑀓𑀁 (𑁬-𑁧-𑁧𑁦)

𑁭𑁦. 𑀲𑀘𑁂 𑀩𑁆𑀭𑀸𑀳𑁆𑀫𑀡 𑀕𑀘𑁆𑀙𑁂𑀲𑀺, 𑀲𑀸𑀓𑁂𑀢𑁂 [𑀲𑀸𑀓𑁂𑀢𑀁 (𑀲𑀻. 𑀲𑁆𑀬𑀸.)] 𑀅𑀚𑁆𑀚𑀼𑀦𑀁 [𑀅𑀜𑁆𑀛𑀦𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀦𑀁;

𑀯𑀚𑁆𑀚𑀸𑀲𑀺 𑀦𑀦𑁆𑀤𑀺𑀬𑀁 𑀦𑀸𑀫, 𑀧𑀼𑀢𑁆𑀢𑀁 𑀅𑀲𑁆𑀫𑀸𑀓𑀫𑁄𑀭𑀲𑀁;

𑀫𑀸𑀢𑀸 𑀧𑀺𑀢𑀸 𑀘 𑀢𑁂 𑀯𑀼𑀤𑁆𑀥𑀸, 𑀢𑁂 𑀢𑀁 𑀇𑀘𑁆𑀙𑀦𑁆𑀢𑀺 𑀧𑀲𑁆𑀲𑀺𑀢𑀼𑀁.

𑁭𑁧. 𑀪𑀼𑀢𑁆𑀢𑀸 𑀫𑀬𑀸 𑀦𑀺𑀯𑀸𑀧𑀸𑀦𑀺, 𑀭𑀸𑀚𑀺𑀦𑁄 𑀧𑀸𑀦𑀪𑁄𑀚𑀦𑀁;

𑀢𑀁 𑀭𑀸𑀚𑀧𑀺𑀡𑁆𑀟𑀁 𑀅𑀯𑀪𑁄𑀢𑁆𑀢𑀼𑀁 [𑀅𑀯𑀪𑁄𑀢𑁆𑀢𑀁 (𑀓.)], 𑀦𑀸𑀳𑀁 𑀩𑁆𑀭𑀸𑀳𑁆𑀫𑀡 𑀫𑀼𑀲𑁆𑀲𑀳𑁂.

𑁭𑁨. 𑀑𑀤𑀳𑀺𑀲𑁆𑀲𑀸𑀫𑀳𑀁 𑀧𑀲𑁆𑀲𑀁, 𑀔𑀼𑀭𑀧𑁆𑀧𑀸𑀦𑀺𑀲𑁆𑀲 [𑀔𑀼𑀭𑀧𑁆𑀧𑀸𑀡𑀺𑀲𑁆𑀲 (𑀲𑀻.), 𑀔𑀼𑀭𑀧𑀸𑀡𑀺𑀲𑁆𑀲 (𑀧𑀻.), 𑀔𑀼𑀭𑀧𑁆𑀧𑀧𑀸𑀡𑀺𑀲𑁆𑀲 (?)] 𑀭𑀸𑀚𑀺𑀦𑁄;

𑀢𑀤𑀸𑀳𑀁 𑀲𑀼𑀔𑀺𑀢𑁄 𑀫𑀼𑀢𑁆𑀢𑁄, 𑀅𑀧𑀺 𑀧𑀲𑁆𑀲𑁂𑀬𑁆𑀬 𑀫𑀸𑀢𑀭𑀁.

𑁭𑁩. 𑀫𑀺𑀕𑀭𑀸𑀚𑀸 𑀧𑀼𑀭𑁂 𑀆𑀲𑀺𑀁, 𑀓𑁄𑀲𑀮𑀲𑁆𑀲 𑀦𑀺𑀓𑁂𑀢𑀦𑁂 [𑀦𑀺𑀓𑁂𑀢𑀯𑁂 (𑀲𑀻. 𑀲𑁆𑀬𑀸. 𑀧𑀻.)];

𑀦𑀦𑁆𑀤𑀺𑀬𑁄 𑀦𑀸𑀫 𑀦𑀸𑀫𑁂𑀦, 𑀅𑀪𑀺𑀭𑀽𑀧𑁄 𑀘𑀢𑀼𑀧𑁆𑀧𑀤𑁄.

𑁭𑁪. 𑀢𑀁 𑀫𑀁 𑀯𑀥𑀺𑀢𑀼𑀫𑀸𑀕𑀘𑁆𑀙𑀺, 𑀤𑀸𑀬𑀲𑁆𑀫𑀺𑀁 𑀅𑀚𑁆𑀚𑀼𑀦𑁂 𑀯𑀦𑁂;

𑀥𑀦𑀼𑀁 𑀆𑀭𑀚𑁆𑀚𑀁 [𑀆𑀭𑀚𑁆𑀚𑀼𑀁 (𑀦𑀺𑀬𑁆𑀬), 𑀅𑀤𑁂𑀚𑁆𑀛𑀁 (𑀲𑀻. 𑀧𑀻.) 𑀅𑀤𑁆𑀯𑁂𑀥𑀸𑀪𑀸𑀯𑀁 𑀏𑀓𑀻𑀪𑀸𑀯𑀦𑁆𑀢𑀺 𑀅𑀢𑁆𑀣𑁄] 𑀓𑀢𑁆𑀯𑀸𑀦, 𑀉𑀲𑀼𑀁 𑀲𑀦𑁆𑀦𑀬𑁆𑀳 [𑀲𑀦𑁆𑀥𑀸𑀬 (𑀲𑀻. 𑀧𑀻.)] 𑀓𑁄𑀲𑀮𑁄.

𑁭𑁫. 𑀢𑀲𑁆𑀲𑀸𑀳𑀁 𑀑𑀤𑀳𑀺𑀁 𑀧𑀲𑁆𑀲𑀁, 𑀔𑀼𑀭𑀧𑁆𑀧𑀸𑀦𑀺𑀲𑁆𑀲 𑀭𑀸𑀚𑀺𑀦𑁄;

𑀢𑀤𑀸𑀳𑀁 𑀲𑀼𑀔𑀺𑀢𑁄 𑀫𑀼𑀢𑁆𑀢𑁄, 𑀫𑀸𑀢𑀭𑀁 𑀤𑀝𑁆𑀞𑀼𑀫𑀸𑀕𑀢𑁄𑀢𑀺.

𑀦𑀦𑁆𑀤𑀺𑀬𑀫𑀺𑀕𑀭𑀸𑀚𑀚𑀸𑀢𑀓𑀁 𑀤𑀲𑀫𑀁.

𑀅𑀯𑀸𑀭𑀺𑀬𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀓𑀼𑀚𑁆𑀛𑀭𑀣𑁂𑀲𑀪 𑀓𑁂𑀢𑀼𑀯𑀭𑁄, 𑀲𑀤𑀭𑀻𑀫𑀼𑀔 𑀦𑁂𑀭𑀼 𑀮𑀢𑀸 𑀘 𑀧𑀼𑀦;

𑀅𑀧𑀦𑀦𑁆𑀤 𑀲𑀺𑀭𑀻 𑀘 𑀲𑀼𑀘𑀺𑀢𑁆𑀢𑀯𑀭𑁄, 𑀅𑀣 𑀥𑀫𑁆𑀫𑀺𑀓 𑀦𑀦𑁆𑀤𑀺𑀫𑀺𑀕𑁂𑀦 𑀤𑀲𑀸𑀢𑀺.