𑁩𑁮𑁪. 𑀥𑀫𑁆𑀫𑀥𑀚𑀚𑀸𑀢𑀓𑀁 (𑁬-𑁧-𑁯)

𑁬𑁪. 𑀥𑀫𑁆𑀫𑀁 𑀘𑀭𑀣 𑀜𑀸𑀢𑀬𑁄, 𑀥𑀫𑁆𑀫𑀁 𑀘𑀭𑀣 𑀪𑀤𑁆𑀤𑀁 𑀯𑁄 [𑀪𑀤𑁆𑀤 𑀯𑁄 (𑀓.)];

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘.

𑁬𑁫. 𑀪𑀤𑁆𑀤𑀓𑁄 𑀯𑀢𑀬𑀁 𑀧𑀓𑁆𑀔𑀻, 𑀤𑀺𑀚𑁄 𑀧𑀭𑀫𑀥𑀫𑁆𑀫𑀺𑀓𑁄;

𑀏𑀓𑀧𑀸𑀤𑁂𑀦 𑀢𑀺𑀝𑁆𑀞𑀦𑁆𑀢𑁄, 𑀥𑀫𑁆𑀫𑀫𑁂𑀯𑀸𑀦𑀼𑀲𑀸𑀲𑀢𑀺.

𑁬𑁬. 𑀦𑀸𑀲𑁆𑀲 𑀲𑀻𑀮𑀁 𑀯𑀺𑀚𑀸𑀦𑀸𑀣, 𑀅𑀦𑀜𑁆𑀜𑀸𑀬 𑀧𑀲𑀁𑀲𑀣;

𑀪𑀼𑀢𑁆𑀯𑀸 𑀅𑀡𑁆𑀟𑀜𑁆𑀘 𑀧𑁄𑀢𑀜𑁆𑀘 [𑀙𑀸𑀧𑁂 𑀘 (𑀲𑀻. 𑀧𑀻.)], 𑀥𑀫𑁆𑀫𑁄 𑀥𑀫𑁆𑀫𑁄𑀢𑀺 𑀪𑀸𑀲𑀢𑀺.

𑁬𑁭. 𑀅𑀜𑁆𑀜𑀁 𑀪𑀡𑀢𑀺 𑀯𑀸𑀘𑀸𑀬, 𑀅𑀜𑁆𑀜𑀁 𑀓𑀸𑀬𑁂𑀦 𑀓𑀼𑀩𑁆𑀩𑀢𑀺;

𑀯𑀸𑀘𑀸𑀬 𑀦𑁄 𑀘 𑀓𑀸𑀬𑁂𑀦, 𑀦 𑀢𑀁 𑀥𑀫𑁆𑀫𑀁 𑀅𑀥𑀺𑀝𑁆𑀞𑀺𑀢𑁄.

𑁬𑁮. 𑀯𑀸𑀘𑀸𑀬 𑀲𑀔𑀺𑀮𑁄 𑀫𑀦𑁄𑀯𑀺𑀤𑀼𑀕𑁆𑀕𑁄, 𑀙𑀦𑁆𑀦𑁄 𑀓𑀽𑀧𑀲𑀬𑁄𑀯 𑀓𑀡𑁆𑀳𑀲𑀧𑁆𑀧𑁄;

𑀥𑀫𑁆𑀫𑀥𑀚𑁄 𑀕𑀸𑀫𑀦𑀺𑀕𑀫𑀸𑀲𑀼𑀲𑀸𑀥𑀼 [𑀕𑀸𑀫𑀦𑀺𑀕𑀫𑀸𑀲𑀼 𑀲𑀸𑀥𑀼𑀲𑀫𑁆𑀫𑀢𑁄 (𑀲𑀻.), 𑀕𑀸𑀫𑀦𑀺𑀕𑀫𑀲𑀸𑀥𑀼 (𑀧𑀻.)], 𑀤𑀼𑀚𑁆𑀚𑀸𑀦𑁄 𑀧𑀼𑀭𑀺𑀲𑁂𑀦 𑀩𑀸𑀮𑀺𑀲𑁂𑀦.

𑁬𑁯. 𑀇𑀫𑀁 𑀢𑀼𑀡𑁆𑀟𑁂𑀳𑀺 𑀧𑀓𑁆𑀔𑁂𑀳𑀺, 𑀧𑀸𑀤𑀸 𑀘𑀺𑀫𑀁 𑀯𑀺𑀳𑁂𑀞𑀣 [𑀯𑀺𑀧𑁄𑀣𑀣 (𑀧𑀻.)];

𑀙𑀯𑀜𑁆𑀳𑀺𑀫𑀁 𑀯𑀺𑀦𑀸𑀲𑁂𑀣, 𑀦𑀸𑀬𑀁 𑀲𑀁𑀯𑀸𑀲𑀦𑀸𑀭𑀳𑁄𑀢𑀺.

𑀥𑀫𑁆𑀫𑀥𑀚𑀚𑀸𑀢𑀓𑀁 𑀦𑀯𑀫𑀁.