𑁩𑁭𑁨. 𑀫𑀺𑀕𑀧𑁄𑀢𑀓𑀚𑀸𑀢𑀓𑀁 (𑁫-𑁩-𑁨)

𑁧𑁧𑁬. 𑀅𑀕𑀸𑀭𑀸 𑀧𑀘𑁆𑀘𑀼𑀧𑁂𑀢𑀲𑁆𑀲, 𑀅𑀦𑀕𑀸𑀭𑀲𑁆𑀲 𑀢𑁂 𑀲𑀢𑁄;

𑀲𑀫𑀡𑀲𑁆𑀲 𑀦 𑀢𑀁 𑀲𑀸𑀥𑀼, 𑀬𑀁 𑀧𑁂𑀢𑀫𑀦𑀼𑀲𑁄𑀘𑀲𑀺.

𑁧𑁧𑁭. 𑀲𑀁𑀯𑀸𑀲𑁂𑀦 𑀳𑀯𑁂 𑀲𑀓𑁆𑀓, 𑀫𑀦𑀼𑀲𑁆𑀲𑀲𑁆𑀲 𑀫𑀺𑀕𑀲𑁆𑀲 𑀯𑀸;

𑀳𑀤𑀬𑁂 𑀚𑀸𑀬𑀢𑁂 𑀧𑁂𑀫𑀁, 𑀦 𑀢𑀁 𑀲𑀓𑁆𑀓𑀸 𑀅𑀲𑁄𑀘𑀺𑀢𑀼𑀁.

𑁧𑁧𑁮. 𑀫𑀢𑀁 𑀫𑀭𑀺𑀲𑁆𑀲𑀁 𑀭𑁄𑀤𑀦𑁆𑀢𑀺, 𑀬𑁂 𑀭𑀼𑀤𑀦𑁆𑀢𑀺 𑀮𑀧𑀦𑁆𑀢𑀺 𑀘;

𑀢𑀲𑁆𑀫𑀸 𑀢𑁆𑀯𑀁 𑀇𑀲𑀺 𑀫𑀸 𑀭𑁄𑀤𑀺, 𑀭𑁄𑀤𑀺𑀢𑀁 𑀫𑁄𑀖𑀫𑀸𑀳𑀼 𑀲𑀦𑁆𑀢𑁄.

𑁧𑁧𑁯. 𑀭𑁄𑀤𑀺𑀢𑁂𑀦 𑀳𑀯𑁂 𑀩𑁆𑀭𑀳𑁆𑀫𑁂, 𑀫𑀢𑁄 𑀧𑁂𑀢𑁄 𑀲𑀫𑀼𑀝𑁆𑀞𑀳𑁂;

𑀲𑀩𑁆𑀩𑁂 𑀲𑀗𑁆𑀕𑀫𑁆𑀫 𑀭𑁄𑀤𑀸𑀫, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀜𑀸𑀢𑀓𑁂.

𑁧𑁨𑁦. 𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁨𑁧. 𑀅𑀩𑁆𑀩𑀳𑀺 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁;

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀼𑀢𑁆𑀢𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁨𑁨. 𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀯𑀸𑀲𑀯𑀸𑀢𑀺.

𑀫𑀺𑀕𑀧𑁄𑀢𑀓𑀚𑀸𑀢𑀓𑀁 𑀤𑀼𑀢𑀺𑀬𑀁.