𑁩𑁬𑁯. 𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀁 (𑁫-𑁨-𑁯)

𑁧𑁦𑁦. 𑀓𑁆𑀬𑀸𑀳𑀁 𑀤𑁂𑀯𑀸𑀦𑀫𑀓𑀭𑀁, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀬𑀁 𑀫𑁂 𑀲𑀺𑀭𑀲𑁆𑀫𑀺𑀁 𑀑𑀳𑀘𑁆𑀘 [𑀉𑀳𑀘𑁆𑀘 (𑀓.), 𑀉𑀳𑀘𑁆𑀘 (𑀧𑀻.)], 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂.

𑁧𑁦𑁧. 𑀅𑀢𑀺𑀓𑁆𑀓𑀫𑁆𑀫 𑀭𑀫𑀡𑀓𑀁, 𑀲𑀤𑀸𑀫𑀢𑁆𑀢𑀜𑁆𑀘 𑀤𑀽𑀪𑀓𑀁;

𑀩𑁆𑀭𑀳𑁆𑀫𑀢𑁆𑀢𑀭𑀜𑁆𑀘 𑀧𑀸𑀲𑀸𑀤𑀁, 𑀓𑁂𑀦𑀢𑁆𑀣𑁂𑀦 𑀇𑀥𑀸𑀕𑀢𑁄.

𑁧𑁦𑁨. 𑀇𑀢𑁄 𑀩𑀳𑀼𑀢𑀭𑀸 𑀪𑁄𑀕𑀸, 𑀅𑀢𑁆𑀭 𑀫𑀜𑁆𑀜𑁂 𑀪𑀯𑀺𑀲𑁆𑀲𑀭𑁂;

𑀇𑀢𑀺 𑀏𑀢𑀸𑀬 𑀲𑀜𑁆𑀜𑀸𑀬, 𑀧𑀲𑁆𑀲 𑀫𑀁 𑀩𑁆𑀬𑀲𑀦𑀁 𑀕𑀢𑀁.

𑁧𑁦𑁩. 𑀘𑀢𑀼𑀩𑁆𑀪𑀺 𑀅𑀝𑁆𑀞𑀚𑁆𑀛𑀕𑀫𑀸, 𑀅𑀝𑁆𑀞𑀸𑀳𑀺𑀧𑀺 𑀘 [𑀅𑀝𑁆𑀞𑀸𑀳𑀺 𑀘𑀸𑀧𑀺 (𑀲𑀻. 𑀲𑁆𑀬𑀸.), 𑀅𑀝𑁆𑀞𑀸𑀪𑀺 𑀘𑀸𑀧𑀺 (𑀓.)] 𑀲𑁄𑀴𑀲;

𑀲𑁄𑀴𑀲𑀸𑀳𑀺 𑀘 𑀩𑀸𑀢𑁆𑀢𑀺𑀁𑀲, 𑀅𑀢𑁆𑀭𑀺𑀘𑁆𑀙𑀁 𑀘𑀓𑁆𑀓𑀫𑀸𑀲𑀤𑁄;

𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂.

𑁧𑁦𑁪. 𑀉𑀧𑀭𑀺𑀯𑀺𑀲𑀸𑀮𑀸 𑀤𑀼𑀧𑁆𑀧𑀽𑀭𑀸, 𑀇𑀘𑁆𑀙𑀸 𑀯𑀺𑀲𑀝𑀕𑀸𑀫𑀺𑀦𑀻 [𑀉𑀧𑀭𑀺 𑀯𑀺𑀲𑀸𑀮𑀁 𑀤𑀼𑀧𑁆𑀧𑀽𑀭𑀁, 𑀇𑀘𑁆𑀙𑀸𑀯𑀺𑀲𑀤𑀕𑀸𑀫𑀺𑀦𑀻 (𑀲𑀻.)];

𑀬𑁂 𑀘 𑀢𑀁 𑀅𑀦𑀼𑀕𑀺𑀚𑁆𑀛𑀦𑁆𑀢𑀺, 𑀢𑁂 𑀳𑁄𑀦𑁆𑀢𑀺 𑀘𑀓𑁆𑀓𑀥𑀸𑀭𑀺𑀦𑁄𑀢𑀺.

𑀫𑀺𑀢𑁆𑀢𑀯𑀺𑀦𑁆𑀤𑀓𑀚𑀸𑀢𑀓𑀁 𑀦𑀯𑀫𑀁.