𑁩𑁫𑁧. 𑀫𑀡𑀺𑀓𑀼𑀡𑁆𑀟𑀮𑀚𑀸𑀢𑀓𑀁 (𑁫-𑁧-𑁧)

𑁧. 𑀚𑀻𑀦𑁄 𑀭𑀣𑀲𑁆𑀲𑀁 𑀫𑀡𑀺𑀓𑀼𑀡𑁆𑀟𑀮𑁂 𑀘, 𑀧𑀼𑀢𑁆𑀢𑁂 𑀘 𑀤𑀸𑀭𑁂 𑀘 𑀢𑀣𑁂𑀯 𑀚𑀻𑀦𑁄;

𑀲𑀩𑁆𑀩𑁂𑀲𑀼 𑀪𑁄𑀕𑁂𑀲𑀼 𑀅𑀲𑁂𑀲𑀓𑁂𑀲𑀼 [𑀅𑀲𑁂𑀲𑀺𑀢𑁂𑀲𑀼 (𑀲𑀻. 𑀧𑀻.), 𑀅𑀲𑁂𑀲𑀺𑀓𑁂𑀲𑀼 (𑀓.)], 𑀓𑀲𑁆𑀫𑀸 𑀦 𑀲𑀦𑁆𑀢𑀧𑁆𑀧𑀲𑀺 𑀲𑁄𑀓𑀓𑀸𑀮𑁂.

𑁨. 𑀧𑀼𑀩𑁆𑀩𑁂𑀯 𑀫𑀘𑁆𑀘𑀁 𑀯𑀺𑀚𑀳𑀦𑁆𑀢𑀺 𑀪𑁄𑀕𑀸, 𑀫𑀘𑁆𑀘𑁄 𑀯𑀸 𑀢𑁂 [𑀘 𑀦𑁂 (𑀧𑀻.), 𑀥𑀦𑁂 (𑀓.)] 𑀧𑀼𑀩𑁆𑀩𑀢𑀭𑀁 𑀚𑀳𑀸𑀢𑀺;

𑀅𑀲𑀲𑁆𑀲𑀢𑀸 𑀪𑁄𑀕𑀺𑀦𑁄 𑀓𑀸𑀫𑀓𑀸𑀫𑀺, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂.

𑁩. 𑀉𑀤𑁂𑀢𑀺 𑀆𑀧𑀽𑀭𑀢𑀺 𑀯𑁂𑀢𑀺 [𑀧𑀽𑀭𑁂𑀢𑀺 𑀔𑀻𑀬𑀢𑀺 (𑀲𑁆𑀬𑀸.)] 𑀘𑀦𑁆𑀤𑁄, 𑀅𑀢𑁆𑀣𑀁 𑀢𑀧𑁂𑀢𑁆𑀯𑀸𑀦 [𑀅𑀦𑁆𑀥𑀁 𑀢𑀧𑁂𑀢𑁆𑀯𑀸𑀦 (𑀓.), 𑀅𑀢𑁆𑀣𑀗𑁆𑀕𑀫𑁂𑀢𑁆𑀯𑀸𑀦 (𑀲𑁆𑀬𑀸.), 𑀏𑀢𑁆𑀣 ‘‘𑀢𑀧𑁂𑀢𑁆𑀯𑀸𑀦 𑀅𑀢𑁆𑀣𑀁 𑀧𑀮𑁂𑀢𑀻’’𑀢𑀺 𑀲𑀫𑁆𑀩𑀦𑁆𑀥𑁄] 𑀧𑀮𑁂𑀢𑀺 𑀲𑀽𑀭𑀺𑀬𑁄;

𑀯𑀺𑀤𑀺𑀢𑀸 [𑀯𑀺𑀚𑀺𑀢𑀸 (𑀲𑁆𑀬𑀸.)] 𑀫𑀬𑀸 𑀲𑀢𑁆𑀢𑀼𑀓 𑀮𑁄𑀓𑀥𑀫𑁆𑀫𑀸, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂.

𑁪. 𑀅𑀮𑀲𑁄 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼, 𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻, 𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀼.

𑁫. 𑀦𑀺𑀲𑀫𑁆𑀫 𑀔𑀢𑁆𑀢𑀺𑀬𑁄 𑀓𑀬𑀺𑀭𑀸, 𑀦𑀸𑀦𑀺𑀲𑀫𑁆𑀫 𑀤𑀺𑀲𑀫𑁆𑀧𑀢𑀺;

𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀭𑀸𑀚 [𑀭𑀜𑁆𑀜𑁄 (𑀲𑀻. 𑀲𑁆𑀬𑀸.)], 𑀬𑀲𑁄 𑀓𑀺𑀢𑁆𑀢𑀺 𑀘 𑀯𑀟𑁆𑀠𑀢𑀻𑀢𑀺.

𑀫𑀡𑀺𑀓𑀼𑀡𑁆𑀟𑀮𑀚𑀸𑀢𑀓𑀁 𑀧𑀞𑀫𑀁.