𑁩𑁫𑁨. 𑀲𑀼𑀚𑀸𑀢𑀚𑀸𑀢𑀓𑀁 (𑁫-𑁧-𑁨)

𑁬. 𑀓𑀺𑀁 𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀮𑀸𑀬𑀺𑀢𑁆𑀯𑀸 𑀳𑀭𑀺𑀢𑀁 𑀢𑀺𑀡𑀁;

𑀔𑀸𑀤 𑀔𑀸𑀤𑀸𑀢𑀺 𑀮𑀧𑀲𑀺, 𑀕𑀢𑀲𑀢𑁆𑀢𑀁 𑀚𑀭𑀕𑁆𑀕𑀯𑀁.

𑁭. 𑀦 𑀳𑀺 𑀅𑀦𑁆𑀦𑁂𑀦 𑀧𑀸𑀦𑁂𑀦, 𑀫𑀢𑁄 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂;

𑀢𑁆𑀯𑀜𑁆𑀘 𑀢𑀼𑀘𑁆𑀙𑀁 𑀯𑀺𑀮𑀧𑀲𑀺, 𑀬𑀣𑀸 𑀢𑀁 𑀤𑀼𑀫𑁆𑀫𑀢𑀻 𑀢𑀣𑀸.

𑁮. 𑀢𑀣𑁂𑀯 𑀢𑀺𑀝𑁆𑀞𑀢𑀺 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀯𑀸𑀮𑀥𑀺;

𑀲𑁄𑀢𑀸 𑀢𑀣𑁂𑀯 𑀢𑀺𑀝𑁆𑀞𑀦𑁆𑀢𑀺 [𑀲𑁄 𑀢𑀸𑀢 𑀢𑀣𑁂𑀯 𑀢𑀺𑀝𑁆𑀞𑀢𑀺 (𑀓.)], 𑀫𑀜𑁆𑀜𑁂 𑀕𑁄𑀡𑁄 𑀲𑀫𑀼𑀝𑁆𑀞𑀳𑁂.

𑁯. 𑀦𑁂𑀯𑀬𑁆𑀬𑀓𑀲𑁆𑀲 𑀲𑀻𑀲𑀜𑁆𑀘 [𑀲𑀻𑀲𑀁 𑀯𑀸 (𑀲𑀻. 𑀲𑁆𑀬𑀸. 𑀧𑀻.)], 𑀳𑀢𑁆𑀣𑀧𑀸𑀤𑀸 𑀘 𑀤𑀺𑀲𑁆𑀲𑀭𑁂;

𑀭𑀼𑀤𑀁 𑀫𑀢𑁆𑀢𑀺𑀓𑀣𑀽𑀧𑀲𑁆𑀫𑀺𑀁, 𑀦𑀦𑀼 𑀢𑁆𑀯𑀜𑁆𑀜𑁂𑀯 𑀤𑀼𑀫𑁆𑀫𑀢𑀺.

𑁧𑁦. 𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀁 [𑀑𑀲𑀺𑀜𑁆𑀘𑀺 (𑀓.)], 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭𑀁.

𑁧𑁧. 𑀅𑀩𑁆𑀩𑀳𑀻 [𑀅𑀩𑁆𑀩𑀽𑀴𑁆𑀳𑀁 (𑀲𑀻. 𑀲𑁆𑀬𑀸.), 𑀅𑀩𑁆𑀪𑀽𑀴𑁆𑀳𑀁 (𑀓.)] 𑀯𑀢 𑀫𑁂 𑀲𑀮𑁆𑀮𑀁, 𑀬𑀫𑀸𑀲𑀺 𑀳𑀤𑀬𑀲𑁆𑀲𑀺𑀢𑀁 [𑀲𑁄𑀓𑀁 𑀳𑀤𑀬𑀦𑀺𑀲𑁆𑀲𑀺𑀢𑀁 (𑀲𑀻. 𑀲𑁆𑀬𑀸.)];

𑀬𑁄 𑀫𑁂 𑀲𑁄𑀓𑀧𑀭𑁂𑀢𑀲𑁆𑀲, 𑀧𑀺𑀢𑀼 𑀲𑁄𑀓𑀁 𑀅𑀧𑀸𑀦𑀼𑀤𑀺.

𑁧𑁨. 𑀲𑁄𑀳𑀁 𑀅𑀩𑁆𑀩𑀽𑀴𑁆𑀳𑀲𑀮𑁆𑀮𑁄𑀲𑁆𑀫𑀺, 𑀯𑀻𑀢𑀲𑁄𑀓𑁄 𑀅𑀦𑀸𑀯𑀺𑀮𑁄;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯.

𑁧𑁩. 𑀏𑀯𑀁 𑀓𑀭𑁄𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀬𑁂 𑀳𑁄𑀦𑁆𑀢𑀺 𑀅𑀦𑀼𑀓𑀫𑁆𑀧𑀓𑀸;

𑀯𑀺𑀦𑀺𑀯𑀢𑁆𑀢𑁂𑀦𑁆𑀢𑀺 𑀲𑁄𑀓𑀫𑁆𑀳𑀸, 𑀲𑀼𑀚𑀸𑀢𑁄 𑀧𑀺𑀢𑀭𑀁 𑀬𑀣𑀸𑀢𑀺.

𑀲𑀼𑀚𑀸𑀢𑀚𑀸𑀢𑀓𑀁 𑀤𑀼𑀢𑀺𑀬𑀁.