𑁩𑁧𑁩. 𑀔𑀦𑁆𑀢𑀻𑀯𑀸𑀤𑀻𑀚𑀸𑀢𑀓𑀁 (𑁪-𑁨-𑁩)

𑁪𑁯. 𑀬𑁄 𑀢𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘, 𑀓𑀡𑁆𑀡𑀦𑀸𑀲𑀜𑁆𑀘 𑀙𑁂𑀤𑀬𑀺;

𑀢𑀲𑁆𑀲 𑀓𑀼𑀚𑁆𑀛 𑀫𑀳𑀸𑀯𑀻𑀭, 𑀫𑀸 𑀭𑀝𑁆𑀞𑀁 𑀯𑀺𑀦𑀲𑀸 [𑀯𑀺𑀦𑀲𑁆𑀲 (𑀓. 𑀲𑀻. 𑀲𑁆𑀬𑀸. 𑀓.)] 𑀇𑀤𑀁.

𑁫𑁦. 𑀬𑁄 𑀫𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘, 𑀓𑀡𑁆𑀡𑀦𑀸𑀲𑀜𑁆𑀘 𑀙𑁂𑀤𑀬𑀺;

𑀘𑀺𑀭𑀁 𑀚𑀻𑀯𑀢𑀼 𑀲𑁄 𑀭𑀸𑀚𑀸, 𑀦 𑀳𑀺 𑀓𑀼𑀚𑁆𑀛𑀦𑁆𑀢𑀺 𑀫𑀸𑀤𑀺𑀲𑀸.

𑁫𑁧. 𑀅𑀳𑀽 𑀅𑀢𑀻𑀢𑀫𑀤𑁆𑀥𑀸𑀦𑀁 [𑀅𑀳𑀼 𑀅𑀢𑀻𑀢𑀫𑀤𑁆𑀥𑀸𑀦𑁂 (𑀲𑁆𑀬𑀸. 𑀧𑀻. 𑀓.)], 𑀲𑀫𑀡𑁄 𑀔𑀦𑁆𑀢𑀺𑀤𑀻𑀧𑀦𑁄;

𑀢𑀁 𑀔𑀦𑁆𑀢𑀺𑀬𑀸𑀬𑁂𑀯 𑀞𑀺𑀢𑀁, 𑀓𑀸𑀲𑀺𑀭𑀸𑀚𑀸 𑀅𑀙𑁂𑀤𑀬𑀺.

𑁫𑁨. 𑀢𑀲𑁆𑀲 𑀓𑀫𑁆𑀫 [𑀓𑀫𑁆𑀫𑀲𑁆𑀲 (𑀲𑀻. 𑀧𑀻.)] 𑀨𑀭𑀼𑀲𑀲𑁆𑀲, 𑀯𑀺𑀧𑀸𑀓𑁄 𑀓𑀝𑀼𑀓𑁄 𑀅𑀳𑀼;

𑀬𑀁 𑀓𑀸𑀲𑀺𑀭𑀸𑀚𑀸 𑀯𑁂𑀤𑁂𑀲𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑁄𑀢𑀺.

𑀔𑀦𑁆𑀢𑀻𑀯𑀸𑀤𑀻𑀚𑀸𑀢𑀓𑀁 𑀢𑀢𑀺𑀬𑀁.