𑁨. 𑀧𑀼𑀘𑀺𑀫𑀦𑁆𑀤𑀯𑀕𑁆𑀕𑁄

𑁩𑁧𑁧. 𑀧𑀼𑀘𑀺𑀫𑀦𑁆𑀤𑀚𑀸𑀢𑀓𑀁 (𑁪-𑁨-𑁧)

𑁪𑁧. 𑀉𑀝𑁆𑀞𑁂𑀳𑀺 𑀘𑁄𑀭 𑀓𑀺𑀁 𑀲𑁂𑀲𑀺, 𑀓𑁄 𑀅𑀢𑁆𑀣𑁄 𑀲𑀼𑀧𑀦𑁂𑀦 [𑀲𑀼𑀧𑀺𑀢𑁂𑀦 (𑀲𑀻.), 𑀲𑀼𑀧𑀺𑀦𑁂𑀦 (𑀧𑀻. 𑀓.)] 𑀢𑁂;

𑀫𑀸 𑀢𑀁 𑀕𑀳𑁂𑀲𑀼𑀁 [𑀕𑀡𑁆𑀳𑁂𑀬𑁆𑀬𑀼𑀁 (𑀓.)] 𑀭𑀸𑀚𑀸𑀦𑁄, 𑀕𑀸𑀫𑁂 𑀓𑀺𑀩𑁆𑀩𑀺𑀲𑀓𑀸𑀭𑀓𑀁.

𑁪𑁨. 𑀬𑀁 𑀦𑀼 [𑀦𑀽𑀦 (𑀲𑁆𑀬𑀸.)] 𑀘𑁄𑀭𑀁 𑀕𑀳𑁂𑀲𑁆𑀲𑀦𑁆𑀢𑀺, 𑀕𑀸𑀫𑁂 𑀓𑀺𑀩𑁆𑀩𑀺𑀲𑀓𑀸𑀭𑀓𑀁;

𑀓𑀺𑀁 𑀢𑀢𑁆𑀣 𑀧𑀼𑀘𑀺𑀫𑀦𑁆𑀤𑀲𑁆𑀲, 𑀯𑀦𑁂 𑀚𑀸𑀢𑀲𑁆𑀲 𑀢𑀺𑀝𑁆𑀞𑀢𑁄.

𑁪𑁩. 𑀦 𑀢𑁆𑀯𑀁 𑀅𑀲𑁆𑀲𑀢𑁆𑀣 𑀚𑀸𑀦𑀸𑀲𑀺, 𑀫𑀫 𑀘𑁄𑀭𑀲𑁆𑀲 𑀘𑀦𑁆𑀢𑀭𑀁;

𑀘𑁄𑀭𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑁄, 𑀕𑀸𑀫𑁂 𑀓𑀺𑀩𑁆𑀩𑀺𑀲𑀓𑀸𑀭𑀓𑀁;

𑀅𑀧𑁆𑀧𑁂𑀦𑁆𑀢𑀺 [𑀅𑀘𑁆𑀘𑁂𑀦𑁆𑀢𑀺 (𑀲𑁆𑀬𑀸.)] 𑀦𑀺𑀫𑁆𑀩𑀲𑀽𑀮𑀲𑁆𑀫𑀺𑀁, 𑀢𑀲𑁆𑀫𑀺𑀁 𑀫𑁂 𑀲𑀗𑁆𑀓𑀢𑁂 𑀫𑀦𑁄.

𑁪𑁪. 𑀲𑀗𑁆𑀓𑁂𑀬𑁆𑀬 𑀲𑀗𑁆𑀓𑀺𑀢𑀩𑁆𑀩𑀸𑀦𑀺, 𑀭𑀓𑁆𑀔𑁂𑀬𑁆𑀬𑀸𑀦𑀸𑀕𑀢𑀁 𑀪𑀬𑀁;

𑀅𑀦𑀸𑀕𑀢𑀪𑀬𑀸 𑀥𑀻𑀭𑁄, 𑀉𑀪𑁄 𑀮𑁄𑀓𑁂 𑀅𑀯𑁂𑀓𑁆𑀔𑀢𑀻𑀢𑀺.

𑀧𑀼𑀘𑀺𑀫𑀦𑁆𑀤𑀚𑀸𑀢𑀓𑀁 𑀧𑀞𑀫𑀁.

𑁩𑁧𑁨. 𑀓𑀲𑁆𑀲𑀧𑀫𑀦𑁆𑀤𑀺𑀬𑀚𑀸𑀢𑀓𑀁 (𑁪-𑁨-𑁨)

𑁪𑁫. 𑀅𑀧𑀺 𑀓𑀲𑁆𑀲𑀧 𑀫𑀦𑁆𑀤𑀺𑀬𑀸, 𑀬𑀼𑀯𑀸 𑀲𑀧𑀢𑀺 𑀳𑀦𑁆𑀢𑀺 [𑀲𑀫𑁆𑀧𑀝𑀺𑀳𑀦𑁆𑀢𑀺 (𑀓.)] 𑀯𑀸;

𑀲𑀩𑁆𑀩𑀁 𑀢𑀁 𑀔𑀫𑀢𑁂 𑀥𑀻𑀭𑁄, 𑀧𑀡𑁆𑀟𑀺𑀢𑁄 𑀢𑀁 𑀢𑀺𑀢𑀺𑀓𑁆𑀔𑀢𑀺.

𑁪𑁬. 𑀲𑀘𑁂𑀧𑀺 𑀲𑀦𑁆𑀢𑁄 𑀯𑀺𑀯𑀤𑀦𑁆𑀢𑀺, 𑀔𑀺𑀧𑁆𑀧𑀁 𑀲𑀦𑁆𑀥𑀻𑀬𑀭𑁂 𑀧𑀼𑀦;

𑀩𑀸𑀮𑀸 𑀧𑀢𑁆𑀢𑀸𑀯 𑀪𑀺𑀚𑁆𑀚𑀦𑁆𑀢𑀺, 𑀦 𑀢𑁂 𑀲𑀫𑀣𑀫𑀚𑁆𑀛𑀕𑀽.

𑁪𑁭. 𑀏𑀢𑁂 𑀪𑀺𑀬𑁆𑀬𑁄 𑀲𑀫𑀸𑀬𑀦𑁆𑀢𑀺, 𑀲𑀦𑁆𑀥𑀺 𑀢𑁂𑀲𑀁 𑀦 𑀚𑀻𑀭𑀢𑀺;

𑀬𑁄 𑀘𑀸𑀥𑀺𑀧𑀦𑁆𑀦𑀁 𑀚𑀸𑀦𑀸𑀢𑀺, 𑀬𑁄 𑀘 𑀚𑀸𑀦𑀸𑀢𑀺 𑀤𑁂𑀲𑀦𑀁.

𑁪𑁮. 𑀏𑀲𑁄 𑀳𑀺 𑀉𑀢𑁆𑀢𑀭𑀺𑀢𑀭𑁄, 𑀪𑀸𑀭𑀯𑀳𑁄 𑀥𑀼𑀭𑀤𑁆𑀥𑀭𑁄;

𑀬𑁄 𑀧𑀭𑁂𑀲𑀸𑀥𑀺𑀧𑀦𑁆𑀦𑀸𑀦𑀁, 𑀲𑀬𑀁 𑀲𑀦𑁆𑀥𑀸𑀢𑀼𑀫𑀭𑀳𑀢𑀻𑀢𑀺.

𑀓𑀲𑁆𑀲𑀧𑀫𑀦𑁆𑀤𑀺𑀬𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁧𑁩. 𑀔𑀦𑁆𑀢𑀻𑀯𑀸𑀤𑀻𑀚𑀸𑀢𑀓𑀁 (𑁪-𑁨-𑁩)

𑁪𑁯. 𑀬𑁄 𑀢𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘, 𑀓𑀡𑁆𑀡𑀦𑀸𑀲𑀜𑁆𑀘 𑀙𑁂𑀤𑀬𑀺;

𑀢𑀲𑁆𑀲 𑀓𑀼𑀚𑁆𑀛 𑀫𑀳𑀸𑀯𑀻𑀭, 𑀫𑀸 𑀭𑀝𑁆𑀞𑀁 𑀯𑀺𑀦𑀲𑀸 [𑀯𑀺𑀦𑀲𑁆𑀲 (𑀓. 𑀲𑀻. 𑀲𑁆𑀬𑀸. 𑀓.)] 𑀇𑀤𑀁.

𑁫𑁦. 𑀬𑁄 𑀫𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘, 𑀓𑀡𑁆𑀡𑀦𑀸𑀲𑀜𑁆𑀘 𑀙𑁂𑀤𑀬𑀺;

𑀘𑀺𑀭𑀁 𑀚𑀻𑀯𑀢𑀼 𑀲𑁄 𑀭𑀸𑀚𑀸, 𑀦 𑀳𑀺 𑀓𑀼𑀚𑁆𑀛𑀦𑁆𑀢𑀺 𑀫𑀸𑀤𑀺𑀲𑀸.

𑁫𑁧. 𑀅𑀳𑀽 𑀅𑀢𑀻𑀢𑀫𑀤𑁆𑀥𑀸𑀦𑀁 [𑀅𑀳𑀼 𑀅𑀢𑀻𑀢𑀫𑀤𑁆𑀥𑀸𑀦𑁂 (𑀲𑁆𑀬𑀸. 𑀧𑀻. 𑀓.)], 𑀲𑀫𑀡𑁄 𑀔𑀦𑁆𑀢𑀺𑀤𑀻𑀧𑀦𑁄;

𑀢𑀁 𑀔𑀦𑁆𑀢𑀺𑀬𑀸𑀬𑁂𑀯 𑀞𑀺𑀢𑀁, 𑀓𑀸𑀲𑀺𑀭𑀸𑀚𑀸 𑀅𑀙𑁂𑀤𑀬𑀺.

𑁫𑁨. 𑀢𑀲𑁆𑀲 𑀓𑀫𑁆𑀫 [𑀓𑀫𑁆𑀫𑀲𑁆𑀲 (𑀲𑀻. 𑀧𑀻.)] 𑀨𑀭𑀼𑀲𑀲𑁆𑀲, 𑀯𑀺𑀧𑀸𑀓𑁄 𑀓𑀝𑀼𑀓𑁄 𑀅𑀳𑀼;

𑀬𑀁 𑀓𑀸𑀲𑀺𑀭𑀸𑀚𑀸 𑀯𑁂𑀤𑁂𑀲𑀺, 𑀦𑀺𑀭𑀬𑀫𑁆𑀳𑀺 𑀲𑀫𑀧𑁆𑀧𑀺𑀢𑁄𑀢𑀺.

𑀔𑀦𑁆𑀢𑀻𑀯𑀸𑀤𑀻𑀚𑀸𑀢𑀓𑀁 𑀢𑀢𑀺𑀬𑀁.

𑁩𑁧𑁪. 𑀮𑁄𑀳𑀓𑀼𑀫𑁆𑀪𑀺𑀚𑀸𑀢𑀓𑀁 (𑁪-𑁨-𑁪)

𑁫𑁩. 𑀤𑀼𑀚𑁆𑀚𑀻𑀯𑀺𑀢𑀫𑀚𑀻𑀯𑀺𑀫𑁆𑀳, 𑀬𑁂 𑀲𑀦𑁆𑀢𑁂 [𑀬𑁂𑀲𑀁 𑀦𑁄 (𑀲𑁆𑀬𑀸. 𑀓.)] 𑀦 𑀤𑀤𑀫𑁆𑀳𑀲𑁂;

𑀯𑀺𑀚𑁆𑀚𑀫𑀸𑀦𑁂𑀲𑀼 𑀪𑁄𑀕𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄.

𑁫𑁪. 𑀲𑀝𑁆𑀞𑀺 [𑀲𑀝𑁆𑀞𑀺𑀁 (𑀲𑁆𑀬𑀸.)] 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸𑀦𑀁, 𑀓𑀤𑀸 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀺.

𑁫𑁫. 𑀦𑀢𑁆𑀣𑀺 𑀅𑀦𑁆𑀢𑁄 𑀓𑀼𑀢𑁄 𑀅𑀦𑁆𑀢𑁄, 𑀦 𑀅𑀦𑁆𑀢𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀢𑀤𑀸 𑀳𑀺 𑀧𑀓𑀢𑀁 𑀧𑀸𑀧𑀁, 𑀫𑀫 𑀢𑀼𑀬𑁆𑀳𑀜𑁆𑀘 𑀫𑀸𑀭𑀺𑀲𑀸 [𑀫𑀸𑀭𑀺𑀲 (𑀲𑀻. 𑀲𑁆𑀬𑀸. 𑀧𑀻.)].

𑁫𑁬. 𑀲𑁄𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼𑀦𑁆𑀢𑀺.

𑀮𑁄𑀳𑀓𑀼𑀫𑁆𑀪𑀺𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁩𑁧𑁫. 𑀲𑀩𑁆𑀩𑀫𑀁𑀲𑀮𑀸𑀪𑀚𑀸𑀢𑀓𑀁 (𑁪-𑁨-𑁫)

𑁫𑁭. 𑀨𑀭𑀼𑀲𑀸 𑀯𑀢 𑀢𑁂 𑀯𑀸𑀘𑀸, 𑀫𑀁𑀲𑀁 [𑀲𑀫𑁆𑀫 (𑀧𑀻. 𑀓.)] 𑀬𑀸𑀘𑀦𑀓𑁄 𑀅𑀲𑀺 [𑀘𑀲𑀺 (𑀧𑀻.)];

𑀓𑀺𑀮𑁄𑀫𑀲𑀤𑀺𑀲𑀻 [𑀓𑀺𑀮𑁄𑀫𑀲𑁆𑀲 𑀲𑀤𑀺𑀲𑀸 (𑀧𑀻.)] 𑀯𑀸𑀘𑀸, 𑀓𑀺𑀮𑁄𑀫𑀁 𑀲𑀫𑁆𑀫 𑀤𑀫𑁆𑀫𑀺 𑀢𑁂.

𑁫𑁮. 𑀅𑀗𑁆𑀕𑀫𑁂𑀢𑀁 𑀫𑀦𑀼𑀲𑁆𑀲𑀸𑀦𑀁, 𑀪𑀸𑀢𑀸 𑀮𑁄𑀓𑁂 𑀧𑀯𑀼𑀘𑁆𑀘𑀢𑀺;

𑀅𑀗𑁆𑀕𑀲𑁆𑀲 𑀲𑀤𑀺𑀲𑀻 𑀯𑀸𑀘𑀸 [𑀅𑀗𑁆𑀕𑀲𑁆𑀲𑀤𑀺𑀲𑀻 𑀢𑁂 𑀯𑀸𑀘𑀸 (𑀓.)], 𑀅𑀗𑁆𑀕𑀁 𑀲𑀫𑁆𑀫 𑀤𑀤𑀸𑀫𑀺 𑀢𑁂.

𑁫𑁯. 𑀢𑀸𑀢𑀸𑀢𑀺 𑀧𑀼𑀢𑁆𑀢𑁄 𑀯𑀤𑀫𑀸𑀦𑁄, 𑀓𑀫𑁆𑀧𑁂𑀢𑀺 [𑀲𑀫𑁆𑀫𑁂𑀢𑀺 (𑀓.)] 𑀳𑀤𑀬𑀁 𑀧𑀺𑀢𑀼;

𑀳𑀤𑀬𑀲𑁆𑀲 𑀲𑀤𑀺𑀲𑀻 [𑀳𑀤𑀬𑀲𑁆𑀲𑀤𑀺𑀲𑀻 (𑀓.)] 𑀯𑀸𑀘𑀸, 𑀳𑀤𑀬𑀁 𑀲𑀫𑁆𑀫 𑀤𑀫𑁆𑀫𑀺 𑀢𑁂.

𑁬𑁦. 𑀬𑀲𑁆𑀲 𑀕𑀸𑀫𑁂 𑀲𑀔𑀸 𑀦𑀢𑁆𑀣𑀺, 𑀬𑀣𑀸𑀭𑀜𑁆𑀜𑀁 𑀢𑀣𑁂𑀯 𑀢𑀁;

𑀲𑀩𑁆𑀩𑀲𑁆𑀲 𑀲𑀤𑀺𑀲𑀻 𑀯𑀸𑀘𑀸, 𑀲𑀩𑁆𑀩𑀁 𑀲𑀫𑁆𑀫 𑀤𑀤𑀸𑀫𑀺 𑀢𑁂𑀢𑀺.

𑀲𑀩𑁆𑀩𑀫𑀁𑀲𑀮𑀸𑀪𑀚𑀸𑀢𑀓𑀁 [𑀫𑀁𑀲𑀚𑀸𑀢𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀜𑁆𑀘𑀫𑀁.

𑁩𑁧𑁬. 𑀲𑀲𑀧𑀡𑁆𑀟𑀺𑀢𑀚𑀸𑀢𑀓𑀁 (𑁪-𑁨-𑁬)

𑁬𑁧. 𑀲𑀢𑁆𑀢 𑀫𑁂 𑀭𑁄𑀳𑀺𑀢𑀸 𑀫𑀘𑁆𑀙𑀸, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀸;

𑀇𑀤𑀁 𑀩𑁆𑀭𑀸𑀳𑁆𑀫𑀡 𑀫𑁂 𑀅𑀢𑁆𑀣𑀺, 𑀏𑀢𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲.

𑁬𑁨. 𑀤𑀼𑀲𑁆𑀲 𑀫𑁂 𑀔𑁂𑀢𑁆𑀢𑀧𑀸𑀮𑀲𑁆𑀲, 𑀭𑀢𑁆𑀢𑀺𑀪𑀢𑁆𑀢𑀁 𑀅𑀧𑀸𑀪𑀢𑀁;

𑀫𑀁𑀲𑀲𑀽𑀮𑀸 𑀘 𑀤𑁆𑀯𑁂 𑀕𑁄𑀥𑀸, 𑀏𑀓𑀜𑁆𑀘 𑀤𑀥𑀺𑀯𑀸𑀭𑀓𑀁;

𑀇𑀤𑀁 𑀩𑁆𑀭𑀸𑀳𑁆𑀫𑀡 𑀫𑁂 𑀅𑀢𑁆𑀣𑀺, 𑀏𑀢𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲.

𑁬𑁩. 𑀅𑀫𑁆𑀩𑀧𑀓𑁆𑀓𑀁 𑀤𑀓𑀁 [𑀅𑀫𑁆𑀩𑀧𑀓𑁆𑀓𑁄𑀤𑀓𑀁 (𑀲𑀻. 𑀧𑀻.)] 𑀲𑀻𑀢𑀁, 𑀲𑀻𑀢𑀘𑁆𑀙𑀸𑀬𑀸 𑀫𑀦𑁄𑀭𑀫𑀸 [𑀲𑀻𑀢𑀘𑁆𑀙𑀸𑀬𑀁 𑀫𑀦𑁄𑀭𑀫𑀁 (𑀲𑀻. 𑀲𑁆𑀬𑀸. 𑀧𑀻.)];

𑀇𑀤𑀁 𑀩𑁆𑀭𑀸𑀳𑁆𑀫𑀡 𑀫𑁂 𑀅𑀢𑁆𑀣𑀺, 𑀏𑀢𑀁 𑀪𑀼𑀢𑁆𑀯𑀸 𑀯𑀦𑁂 𑀯𑀲.

𑁬𑁪. 𑀦 𑀲𑀲𑀲𑁆𑀲 𑀢𑀺𑀮𑀸 𑀅𑀢𑁆𑀣𑀺, 𑀦 𑀫𑀼𑀕𑁆𑀕𑀸 𑀦𑀧𑀺 𑀢𑀡𑁆𑀟𑀼𑀮𑀸;

𑀇𑀫𑀺𑀦𑀸 𑀅𑀕𑁆𑀕𑀺𑀦𑀸 𑀧𑀓𑁆𑀓𑀁, 𑀫𑀫𑀁 [𑀫𑀁𑀲𑀁 (𑀓.)] 𑀪𑀼𑀢𑁆𑀯𑀸 𑀯𑀦𑁂 𑀯𑀲𑀸𑀢𑀺.

𑀲𑀲𑀧𑀡𑁆𑀟𑀺𑀢𑀚𑀸𑀢𑀓𑀁 𑀙𑀝𑁆𑀞𑀁.

𑁩𑁧𑁭. 𑀫𑀢𑀭𑁄𑀤𑀦𑀚𑀸𑀢𑀓𑀁 (𑁪-𑁨-𑁭)

𑁬𑁫. 𑀫𑀢𑀁 𑀫𑀢𑀁 𑀏𑀯 [𑀫𑀢𑀫𑀢𑀫𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀭𑁄𑀤𑀣, 𑀦 𑀳𑀺 𑀢𑀁 𑀭𑁄𑀤𑀣 𑀬𑁄 𑀫𑀭𑀺𑀲𑁆𑀲𑀢𑀺;

𑀲𑀩𑁆𑀩𑁂𑀧𑀺 [𑀲𑀩𑁆𑀩𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀲𑀭𑀻𑀭𑀥𑀸𑀭𑀺𑀦𑁄, 𑀅𑀦𑀼𑀧𑀼𑀩𑁆𑀩𑁂𑀦 𑀚𑀳𑀦𑁆𑀢𑀺 𑀚𑀻𑀯𑀺𑀢𑀁.

𑁬𑁬. 𑀤𑁂𑀯𑀫𑀦𑀼𑀲𑁆𑀲𑀸 𑀘𑀢𑀼𑀧𑁆𑀧𑀤𑀸, 𑀧𑀓𑁆𑀔𑀺𑀕𑀡𑀸 𑀉𑀭𑀕𑀸 𑀘 𑀪𑁄𑀕𑀺𑀦𑁄;

𑀲𑀫𑁆𑀳𑀺 [𑀬𑀫𑁆𑀳𑀺 (𑀲𑁆𑀬𑀸.), 𑀅𑀲𑁆𑀫𑀺𑀁 (𑀧𑀻. 𑀓.)] 𑀲𑀭𑀻𑀭𑁂 𑀅𑀦𑀺𑀲𑁆𑀲𑀭𑀸, 𑀭𑀫𑀫𑀸𑀦𑀸𑀯 𑀚𑀳𑀦𑁆𑀢𑀺 𑀚𑀻𑀯𑀺𑀢𑀁.

𑁬𑁭. 𑀏𑀯𑀁 𑀘𑀮𑀺𑀢𑀁 𑀅𑀲𑀡𑁆𑀞𑀺𑀢𑀁, 𑀲𑀼𑀔𑀤𑀼𑀓𑁆𑀔𑀁 𑀫𑀦𑀼𑀚𑁂𑀲𑁆𑀯𑀧𑁂𑀓𑁆𑀔𑀺𑀬;

𑀓𑀦𑁆𑀤𑀺𑀢𑀭𑀼𑀤𑀺𑀢𑀁 𑀦𑀺𑀭𑀢𑁆𑀣𑀓𑀁, 𑀓𑀺𑀁 𑀯𑁄 𑀲𑁄𑀓𑀕𑀡𑀸𑀪𑀺𑀓𑀻𑀭𑀭𑁂.

𑁬𑁮. 𑀥𑀼𑀢𑁆𑀢𑀸 𑀘 𑀲𑁄𑀡𑁆𑀟𑀸 [𑀥𑀼𑀢𑁆𑀢𑀸 𑀲𑁄𑀡𑁆𑀟𑀸 (𑀲𑀻.), 𑀥𑀼𑀢𑁆𑀢𑀸 𑀲𑁄𑀡𑁆𑀟𑀸 𑀘 (𑀲𑁆𑀬𑀸.)] 𑀅𑀓𑀢𑀸, 𑀩𑀸𑀮𑀸 𑀲𑀽𑀭𑀸 𑀅𑀬𑁄𑀕𑀺𑀦𑁄 [𑀩𑀸𑀮𑀸 𑀲𑀽𑀭𑀸 𑀯𑀻𑀭𑀸 𑀅𑀬𑁄𑀕𑀺𑀦𑁄 (𑀧𑀻.)];

𑀥𑀻𑀭𑀁 𑀫𑀜𑁆𑀜𑀦𑁆𑀢𑀺 𑀩𑀸𑀮𑁄𑀢𑀺, 𑀬𑁂 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸𑀢𑀺.

𑀫𑀢𑀭𑁄𑀤𑀦𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁩𑁧𑁮. 𑀓𑀡𑀯𑁂𑀭𑀚𑀸𑀢𑀓𑀁 (𑁪-𑁨-𑁮)

𑁬𑁯. 𑀬𑀁 𑀢𑀁 𑀯𑀲𑀦𑁆𑀢𑀲𑀫𑀬𑁂, 𑀓𑀡𑀯𑁂𑀭𑁂𑀲𑀼 𑀪𑀸𑀡𑀼𑀲𑀼;

𑀲𑀸𑀫𑀁 𑀩𑀸𑀳𑀸𑀬 𑀧𑀻𑀴𑁂𑀲𑀺, 𑀲𑀸 𑀢𑀁 𑀆𑀭𑁄𑀕𑁆𑀬𑀫𑀩𑁆𑀭𑀯𑀺.

𑁭𑁦. 𑀅𑀫𑁆𑀪𑁄 𑀦 𑀓𑀺𑀭 𑀲𑀤𑁆𑀥𑁂𑀬𑁆𑀬𑀁, 𑀬𑀁 𑀯𑀸𑀢𑁄 𑀧𑀩𑁆𑀩𑀢𑀁 𑀯𑀳𑁂;

𑀧𑀩𑁆𑀩𑀢𑀜𑁆𑀘𑁂 𑀯𑀳𑁂 𑀯𑀸𑀢𑁄, 𑀲𑀩𑁆𑀩𑀫𑁆𑀧𑀺 𑀧𑀣𑀯𑀺𑀁 𑀯𑀳𑁂;

𑀬𑀢𑁆𑀣 𑀲𑀸𑀫𑀸 𑀓𑀸𑀮𑀓𑀢𑀸 [𑀓𑀸𑀮𑀗𑁆𑀓𑀢𑀸 (𑀓.)], 𑀲𑀸 𑀫𑀁 𑀆𑀭𑁄𑀕𑁆𑀬𑀫𑀩𑁆𑀭𑀯𑀺.

𑁭𑁧. 𑀦 𑀘𑁂𑀯 𑀲𑀸 𑀓𑀸𑀮𑀓𑀢𑀸, 𑀦 𑀘 𑀲𑀸 𑀅𑀜𑁆𑀜𑀫𑀺𑀘𑁆𑀙𑀢𑀺;

𑀏𑀓𑀪𑀢𑁆𑀢𑀺𑀓𑀺𑀦𑀻 [𑀏𑀓𑀪𑀢𑁆𑀢𑀸 𑀓𑀺𑀭 (𑀲𑀻. 𑀲𑁆𑀬𑀸.), 𑀏𑀓𑀪𑀢𑁆𑀢𑀓𑀺𑀦𑀻 (𑀧𑀻.)] 𑀲𑀸𑀫𑀸, 𑀢𑀫𑁂𑀯 𑀅𑀪𑀺𑀓𑀗𑁆𑀔𑀢𑀺.

𑁭𑁨. 𑀅𑀲𑀦𑁆𑀣𑀼𑀢𑀁 𑀫𑀁 𑀘𑀺𑀭𑀲𑀦𑁆𑀣𑀼𑀢𑁂𑀦 [𑀅𑀲𑀦𑁆𑀥𑀢𑀁 𑀫𑀁 𑀘𑀺𑀭𑀲𑀦𑁆𑀥𑀢𑁂𑀦 (𑀓.)], 𑀦𑀺𑀫𑀻𑀦𑀺 𑀲𑀸𑀫𑀸 𑀅𑀥𑀼𑀯𑀁 𑀥𑀼𑀯𑁂𑀦;

𑀫𑀬𑀸𑀧𑀺 𑀲𑀸𑀫𑀸 𑀦𑀺𑀫𑀺𑀦𑁂𑀬𑁆𑀬 𑀅𑀜𑁆𑀜𑀁, 𑀇𑀢𑁄 𑀅𑀳𑀁 𑀤𑀽𑀭𑀢𑀭𑀁 𑀕𑀫𑀺𑀲𑁆𑀲𑀦𑁆𑀢𑀺.

𑀓𑀡𑀯𑁂𑀭𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁩𑁧𑁯. 𑀢𑀺𑀢𑁆𑀢𑀺𑀭𑀚𑀸𑀢𑀓𑀁 (𑁪-𑁨-𑁯)

𑁭𑁩. 𑀲𑀼𑀲𑀼𑀔𑀁 𑀯𑀢 𑀚𑀻𑀯𑀸𑀫𑀺, 𑀮𑀪𑀸𑀫𑀺 𑀘𑁂𑀯 𑀪𑀼𑀜𑁆𑀚𑀺𑀢𑀼𑀁;

𑀧𑀭𑀺𑀧𑀦𑁆𑀣𑁂𑀯 𑀢𑀺𑀝𑁆𑀞𑀸𑀫𑀺, 𑀓𑀸 𑀦𑀼 𑀪𑀦𑁆𑀢𑁂 𑀕𑀢𑀻 𑀫𑀫.

𑁭𑁪. 𑀫𑀦𑁄 𑀘𑁂 𑀢𑁂 𑀦𑀧𑁆𑀧𑀡𑀫𑀢𑀺, 𑀧𑀓𑁆𑀔𑀺 𑀧𑀸𑀧𑀲𑁆𑀲 𑀓𑀫𑁆𑀫𑀼𑀦𑁄;

𑀅𑀩𑁆𑀬𑀸𑀯𑀝𑀲𑁆𑀲 𑀪𑀤𑁆𑀭𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀺.

𑁭𑁫. 𑀜𑀸𑀢𑀓𑁄 𑀦𑁄 𑀦𑀺𑀲𑀺𑀦𑁆𑀦𑁄𑀢𑀺, 𑀩𑀳𑀼 𑀆𑀕𑀘𑁆𑀙𑀢𑁂 𑀚𑀦𑁄;

𑀧𑀝𑀺𑀘𑁆𑀘 𑀓𑀫𑁆𑀫𑀁 𑀨𑀼𑀲𑀢𑀺, 𑀢𑀲𑁆𑀫𑀺𑀁 𑀫𑁂 𑀲𑀗𑁆𑀓𑀢𑁂 𑀫𑀦𑁄.

𑁭𑁬. 𑀦 𑀧𑀝𑀺𑀘𑁆𑀘 𑀓𑀫𑁆𑀫𑀁 𑀨𑀼𑀲𑀢𑀺, 𑀫𑀦𑁄 𑀘𑁂 𑀦𑀧𑁆𑀧𑀤𑀼𑀲𑁆𑀲𑀢𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀲𑁆𑀲 𑀪𑀤𑁆𑀭𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻𑀢𑀺.

𑀢𑀺𑀢𑁆𑀢𑀺𑀭𑀚𑀸𑀢𑀓𑀁 𑀦𑀯𑀫𑀁.

𑁩𑁨𑁦. 𑀲𑀼𑀘𑁆𑀘𑀚𑀚𑀸𑀢𑀓𑀁 (𑁪-𑁨-𑁧𑁦)

𑁭𑁭. 𑀲𑀼𑀘𑁆𑀘𑀚𑀁 𑀯𑀢 𑀦𑀘𑁆𑀘𑀚𑀺, 𑀯𑀸𑀘𑀸𑀬 𑀅𑀤𑀤𑀁 𑀕𑀺𑀭𑀺𑀁;

𑀓𑀺𑀁 𑀳𑀺𑀢𑀲𑁆𑀲 𑀘𑀚𑀦𑁆𑀢𑀲𑁆𑀲, 𑀯𑀸𑀘𑀸𑀬 𑀅𑀤𑀤 𑀧𑀩𑁆𑀩𑀢𑀁.

𑁭𑁮. 𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁭𑁯. 𑀭𑀸𑀚𑀧𑀼𑀢𑁆𑀢 𑀦𑀫𑁄 𑀢𑁆𑀬𑀢𑁆𑀣𑀼, 𑀲𑀘𑁆𑀘𑁂 𑀥𑀫𑁆𑀫𑁂 𑀞𑀺𑀢𑁄 𑀘𑀲𑀺;

𑀬𑀲𑁆𑀲 𑀢𑁂 𑀩𑁆𑀬𑀲𑀦𑀁 𑀧𑀢𑁆𑀢𑁄, 𑀲𑀘𑁆𑀘𑀲𑁆𑀫𑀺𑀁 𑀭𑀫𑀢𑁂 𑀫𑀦𑁄.

𑁮𑁦. 𑀬𑀸 𑀤𑀮𑀺𑀤𑁆𑀤𑀻 𑀤𑀮𑀺𑀤𑁆𑀤𑀲𑁆𑀲, 𑀅𑀟𑁆𑀠𑀸 𑀅𑀟𑁆𑀠𑀲𑁆𑀲 𑀓𑀺𑀢𑁆𑀢𑀺𑀫 [𑀓𑀺𑀢𑁆𑀢𑀺𑀫𑀸 (𑀲𑀻. 𑀲𑁆𑀬𑀸. 𑀧𑀻.)];

𑀲𑀸 𑀳𑀺𑀲𑁆𑀲 𑀧𑀭𑀫𑀸 𑀪𑀭𑀺𑀬𑀸, 𑀲𑀳𑀺𑀭𑀜𑁆𑀜𑀲𑁆𑀲 𑀇𑀢𑁆𑀣𑀺𑀬𑁄𑀢𑀺.

𑀲𑀼𑀘𑁆𑀘𑀚𑀚𑀸𑀢𑀓𑀁 𑀤𑀲𑀫𑀁.

𑀧𑀼𑀘𑀺𑀫𑀦𑁆𑀤𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀘𑁄𑀭 𑀲𑀓𑀲𑁆𑀲𑀧 𑀔𑀦𑁆𑀢𑀻𑀯𑀭𑁄, 𑀤𑀼𑀚𑁆𑀚𑀻𑀯𑀺𑀢𑀢𑀸 𑀘 𑀯𑀭𑀸 𑀨𑀭𑀼𑀲𑀸;

𑀅𑀣 𑀲𑀲 𑀫𑀢𑀜𑁆𑀘 𑀯𑀲𑀦𑁆𑀢 𑀲𑀼𑀔𑀁, 𑀲𑀼𑀘𑁆𑀘𑀚𑀁𑀯𑀢𑀦𑀘𑁆𑀘𑀚𑀺𑀦𑀸 𑀘 𑀤𑀲𑀸𑀢𑀺.