𑁩. 𑀓𑀼𑀝𑀺𑀤𑀽𑀲𑀓𑀯𑀕𑁆𑀕𑁄

𑁩𑁨𑁧. 𑀓𑀼𑀝𑀺𑀤𑀽𑀲𑀓𑀚𑀸𑀢𑀓𑀁 (𑁪-𑁩-𑁧)

𑁮𑁧. 𑀫𑀦𑀼𑀲𑁆𑀲𑀲𑁆𑀲𑁂𑀯 𑀢𑁂 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀯𑀸𑀦𑀭;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀅𑀕𑀸𑀭𑀁 𑀢𑁂 𑀦 𑀯𑀺𑀚𑁆𑀚𑀢𑀺.

𑁮𑁨. 𑀫𑀦𑀼𑀲𑁆𑀲𑀲𑁆𑀲𑁂𑀯 𑀫𑁂 𑀲𑀻𑀲𑀁, 𑀳𑀢𑁆𑀣𑀧𑀸𑀤𑀸 𑀘 𑀲𑀺𑀗𑁆𑀕𑀺𑀮 [𑀲𑀺𑀗𑁆𑀕𑀸𑀮 (𑀓.), 𑀧𑀺𑀗𑁆𑀕𑀮 (𑀝𑀻𑀓𑀸)];

𑀬𑀸𑀳𑀼 𑀲𑁂𑀝𑁆𑀞𑀸 𑀫𑀦𑀼𑀲𑁆𑀲𑁂𑀲𑀼, 𑀲𑀸 𑀫𑁂 𑀧𑀜𑁆𑀜𑀸 𑀦 𑀯𑀺𑀚𑁆𑀚𑀢𑀺.

𑁮𑁩. 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲, 𑀮𑀳𑀼𑀘𑀺𑀢𑁆𑀢𑀲𑁆𑀲 𑀤𑀼𑀩𑁆𑀪𑀺𑀦𑁄 [𑀤𑀽𑀪𑀺𑀦𑁄 (𑀧𑀻.)];

𑀦𑀺𑀘𑁆𑀘𑀁 𑀅𑀤𑁆𑀥𑀼𑀯𑀲𑀻𑀮𑀲𑁆𑀲, 𑀲𑀼𑀔𑀪𑀸𑀯𑁄 [𑀲𑀼𑀘𑀺𑀪𑀸𑀯𑁄 (𑀲𑀻.), 𑀲𑀼𑀔𑀪𑀸𑀕𑁄 (?)] 𑀦 𑀯𑀺𑀚𑁆𑀚𑀢𑀺.

𑁮𑁪. 𑀲𑁄 𑀓𑀭𑀲𑁆𑀲𑀼 𑀆𑀦𑀼𑀪𑀸𑀯𑀁, 𑀯𑀻𑀢𑀺𑀯𑀢𑁆𑀢𑀲𑁆𑀲𑀼 𑀲𑀻𑀮𑀺𑀬𑀁;

𑀲𑀻𑀢𑀯𑀸𑀢𑀧𑀭𑀺𑀢𑁆𑀢𑀸𑀡𑀁, 𑀓𑀭𑀲𑁆𑀲𑀼 𑀓𑀼𑀝𑀯𑀁 [𑀓𑀼𑀝𑀺𑀓𑀁 (𑀲𑀻. 𑀲𑁆𑀬𑀸.)] 𑀓𑀧𑀻𑀢𑀺.

𑀓𑀼𑀝𑀺𑀤𑀽𑀲𑀓 [𑀲𑀺𑀗𑁆𑀕𑀸𑀮𑀲𑀓𑀼𑀡 (𑀓.)] 𑀚𑀸𑀢𑀓𑀁 𑀧𑀞𑀫𑀁.

𑁩𑁨𑁨. 𑀤𑀼𑀤𑁆𑀤𑀼𑀪𑀚𑀸𑀢𑀓𑀁 (𑁪-𑁩-𑁨)

𑁮𑁫. 𑀤𑀼𑀤𑁆𑀤𑀼𑀪𑀸𑀬𑀢𑀺 [𑀤𑀤𑁆𑀤𑀪𑀸𑀬𑀢𑀺 (𑀲𑀻. 𑀧𑀻.)] 𑀪𑀤𑁆𑀤𑀦𑁆𑀢𑁂, 𑀬𑀲𑁆𑀫𑀺𑀁 𑀤𑁂𑀲𑁂 𑀯𑀲𑀸𑀫𑀳𑀁;

𑀅𑀳𑀫𑁆𑀧𑁂𑀢𑀁 𑀦 𑀚𑀸𑀦𑀸𑀫𑀺, 𑀓𑀺𑀫𑁂𑀢𑀁 𑀤𑀼𑀤𑁆𑀤𑀼𑀪𑀸𑀬𑀢𑀺.

𑁮𑁬. 𑀩𑁂𑀮𑀼𑀯𑀁 𑀧𑀢𑀺𑀢𑀁 𑀲𑀼𑀢𑁆𑀯𑀸, 𑀤𑀼𑀤𑁆𑀤𑀼𑀪𑀦𑁆𑀢𑀺 [𑀤𑀤𑁆𑀤𑀪𑀦𑁆𑀢𑀺 (𑀲𑀻.)] 𑀲𑀲𑁄 𑀚𑀯𑀺;

𑀲𑀲𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀦𑁆𑀢𑀢𑁆𑀢𑀸 𑀫𑀺𑀕𑀯𑀸𑀳𑀺𑀦𑀻.

𑁮𑁭. 𑀅𑀧𑁆𑀧𑀢𑁆𑀯𑀸 𑀧𑀤𑀯𑀺𑀜𑁆𑀜𑀸𑀡𑀁, 𑀧𑀭𑀖𑁄𑀲𑀸𑀦𑀼𑀲𑀸𑀭𑀺𑀦𑁄;

𑀧𑀦𑀸𑀤𑀧𑀭𑀫𑀸 𑀩𑀸𑀮𑀸, 𑀢𑁂 𑀳𑁄𑀦𑁆𑀢𑀺 𑀧𑀭𑀧𑀢𑁆𑀢𑀺𑀬𑀸.

𑁮𑁮. 𑀬𑁂 𑀘 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀸, 𑀧𑀜𑁆𑀜𑀸𑀬𑀽𑀧𑀲𑀫𑁂 𑀭𑀢𑀸;

𑀆𑀭𑀓𑀸 𑀯𑀺𑀭𑀢𑀸 𑀥𑀻𑀭𑀸, 𑀦 𑀳𑁄𑀦𑁆𑀢𑀺 𑀧𑀭𑀧𑀢𑁆𑀢𑀺𑀬𑀸𑀢𑀺.

𑀤𑀼𑀤𑁆𑀤𑀼𑀪𑀚𑀸𑀢𑀓𑀁 [𑀤𑀤𑁆𑀤𑀪𑀚𑀸𑀢𑀓𑀁 (𑀲𑀻. 𑀧𑀻.)] 𑀤𑀼𑀢𑀺𑀬𑀁.

𑁩𑁨𑁩. 𑀩𑁆𑀭𑀳𑁆𑀫𑀤𑀢𑁆𑀢𑀚𑀸𑀢𑀓𑀁 (𑁪-𑁩-𑁩)

𑁮𑁯. 𑀤𑁆𑀯𑀬𑀁 𑀬𑀸𑀘𑀦𑀓𑁄 𑀭𑀸𑀚, 𑀩𑁆𑀭𑀳𑁆𑀫𑀤𑀢𑁆𑀢 𑀦𑀺𑀕𑀘𑁆𑀙𑀢𑀺;

𑀅𑀮𑀸𑀪𑀁 𑀥𑀦𑀮𑀸𑀪𑀁 𑀯𑀸, 𑀏𑀯𑀁 𑀥𑀫𑁆𑀫𑀸 𑀳𑀺 𑀬𑀸𑀘𑀦𑀸.

𑁯𑁦. 𑀬𑀸𑀘𑀦𑀁 𑀭𑁄𑀤𑀦𑀁 𑀆𑀳𑀼, 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪;

𑀬𑁄 𑀬𑀸𑀘𑀦𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀢𑀫𑀸𑀳𑀼 𑀧𑀝𑀺𑀭𑁄𑀤𑀦𑀁.

𑁯𑁧. 𑀫𑀸 𑀫𑀤𑁆𑀤𑀲𑀁𑀲𑀼 𑀭𑁄𑀤𑀦𑁆𑀢𑀁, 𑀧𑀜𑁆𑀘𑀸𑀮𑀸 𑀲𑀼𑀲𑀫𑀸𑀕𑀢𑀸;

𑀢𑀼𑀯𑀁 𑀯𑀸 𑀧𑀝𑀺𑀭𑁄𑀤𑀦𑁆𑀢𑀁, 𑀢𑀲𑁆𑀫𑀸 𑀇𑀘𑁆𑀙𑀸𑀫𑀳𑀁 𑀭𑀳𑁄.

𑁯𑁨. 𑀤𑀤𑀸𑀫𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀭𑁄𑀳𑀺𑀡𑀻𑀦𑀁, 𑀕𑀯𑀁 𑀲𑀳𑀲𑁆𑀲𑀁 𑀲𑀳 𑀧𑀼𑀗𑁆𑀕𑀯𑁂𑀦;

𑀅𑀭𑀺𑀬𑁄 𑀳𑀺 𑀅𑀭𑀺𑀬𑀲𑁆𑀲 𑀓𑀣𑀁 𑀦 𑀤𑀚𑁆𑀚𑀸 [𑀤𑀚𑁆𑀚𑁂 (𑀲𑀻.), 𑀤𑀚𑁆𑀚𑀁 (?)], 𑀲𑀼𑀢𑁆𑀯𑀸𑀦 𑀕𑀸𑀣𑀸 𑀢𑀯 𑀥𑀫𑁆𑀫𑀬𑀼𑀢𑁆𑀢𑀸𑀢𑀺.

𑀩𑁆𑀭𑀳𑁆𑀫𑀤𑀢𑁆𑀢𑀚𑀸𑀢𑀓𑀁 𑀢𑀢𑀺𑀬𑀁.

𑁩𑁨𑁪. 𑀘𑀫𑁆𑀫𑀲𑀸𑀝𑀓𑀚𑀸𑀢𑀓𑀁 (𑁪-𑁩-𑁪)

𑁯𑁩. 𑀓𑀮𑁆𑀬𑀸𑀡𑀭𑀽𑀧𑁄 𑀯𑀢𑀬𑀁 𑀘𑀢𑀼𑀧𑁆𑀧𑀤𑁄, 𑀲𑀼𑀪𑀤𑁆𑀤𑀓𑁄 𑀘𑁂𑀯 𑀲𑀼𑀧𑁂𑀲𑀮𑁄 𑀘;

𑀬𑁄 𑀩𑁆𑀭𑀸𑀳𑁆𑀫𑀡𑀁 𑀚𑀸𑀢𑀺𑀫𑀦𑁆𑀢𑀽𑀧𑀧𑀦𑁆𑀦𑀁, 𑀅𑀧𑀘𑀸𑀬𑀢𑀺 𑀫𑁂𑀡𑁆𑀟𑀯𑀭𑁄 𑀬𑀲𑀲𑁆𑀲𑀻.

𑁯𑁪. 𑀫𑀸 𑀩𑁆𑀭𑀸𑀳𑁆𑀫𑀡 𑀇𑀢𑁆𑀢𑀭𑀤𑀲𑁆𑀲𑀦𑁂𑀦, 𑀯𑀺𑀲𑁆𑀲𑀸𑀲𑀫𑀸𑀧𑀚𑁆𑀚𑀺 𑀘𑀢𑀼𑀧𑁆𑀧𑀤𑀲𑁆𑀲;

𑀤𑀴𑁆𑀳𑀧𑁆𑀧𑀳𑀸𑀭𑀁 𑀅𑀪𑀺𑀓𑀗𑁆𑀔𑀫𑀸𑀦𑁄 [𑀅𑀪𑀺𑀓𑀢𑁆𑀢𑀼𑀓𑀸𑀫𑁄 (𑀲𑁆𑀬𑀸.)], 𑀅𑀯𑀲𑀓𑁆𑀓𑀢𑀻 𑀤𑀲𑁆𑀲𑀢𑀺 𑀲𑀼𑀧𑁆𑀧𑀳𑀸𑀭𑀁.

𑁯𑁫. 𑀊𑀭𑀼𑀝𑁆𑀞𑀺 [𑀊𑀭𑀝𑁆𑀞𑀺 (𑀲𑀻.)] 𑀪𑀕𑁆𑀕𑀁 𑀧𑀯𑀝𑁆𑀝𑀺𑀢𑁄 [𑀧𑀢𑀺𑀢𑁄 (𑀲𑀻. 𑀲𑁆𑀬𑀸.)] 𑀔𑀸𑀭𑀺𑀪𑀸𑀭𑁄, 𑀲𑀩𑁆𑀩𑀜𑁆𑀘 𑀪𑀡𑁆𑀟𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 [𑀩𑁆𑀭𑀸𑀳𑁆𑀫𑀡𑀲𑁆𑀲𑀻𑀥 (𑀓. 𑀲𑀻. 𑀧𑀻.), 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯 (𑀓. 𑀲𑀻. 𑀲𑁆𑀬𑀸. 𑀓.)] 𑀪𑀺𑀦𑁆𑀦𑀁;

𑀉𑀪𑁄𑀧𑀺 𑀩𑀸𑀳𑀸 𑀧𑀕𑁆𑀕𑀬𑁆𑀳 [𑀧𑀕𑁆𑀕𑀬𑁆𑀬𑁂𑀯 (𑀲𑁆𑀬𑀸.), 𑀧𑀕𑁆𑀕𑀳𑀻𑀬 (?)] 𑀓𑀦𑁆𑀤𑀢𑀺 [𑀩𑀸𑀳𑀸 𑀧𑀕𑁆𑀕𑀬𑁆𑀬 𑀓𑀦𑁆𑀤𑀢𑀺 (𑀧𑀻. 𑀓.)], 𑀅𑀪𑀺𑀥𑀸𑀯𑀣 𑀳𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀻.

𑁯𑁬. 𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀬𑁄 𑀅𑀧𑀽𑀚𑀁 𑀧𑀲𑀁𑀲𑀢𑀺 [𑀦𑀫𑀲𑁆𑀲𑀢𑀺 (𑀧𑀻.)];

𑀬𑀣𑀸𑀳𑀫𑀚𑁆𑀚 𑀧𑀳𑀢𑁄, 𑀳𑀢𑁄 𑀫𑁂𑀡𑁆𑀟𑁂𑀦 𑀤𑀼𑀫𑁆𑀫𑀢𑀻𑀢𑀺.

𑀘𑀫𑁆𑀫𑀲𑀸𑀝𑀓𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁩𑁨𑁫. 𑀕𑁄𑀥𑀭𑀸𑀚𑀚𑀸𑀢𑀓𑀁 (𑁪-𑁩-𑁫)

𑁯𑁭. 𑀲𑀫𑀡𑀁 𑀢𑀁 𑀫𑀜𑁆𑀜𑀫𑀸𑀦𑁄, 𑀉𑀧𑀕𑀘𑁆𑀙𑀺𑀫𑀲𑀜𑁆𑀜𑀢𑀁;

𑀲𑁄 𑀫𑀁 𑀤𑀡𑁆𑀟𑁂𑀦 𑀧𑀸𑀳𑀸𑀲𑀺, 𑀬𑀣𑀸 𑀅𑀲𑁆𑀲𑀫𑀡𑁄 𑀢𑀣𑀸.

𑁯𑁮. 𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥, 𑀓𑀺𑀁 𑀢𑁂 𑀅𑀚𑀺𑀦𑀲𑀸𑀝𑀺𑀬𑀸;

𑀅𑀩𑁆𑀪𑀦𑁆𑀢𑀭𑀁 𑀢𑁂 𑀕𑀳𑀦𑀁, 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀲𑀺.

𑁯𑁯. 𑀏𑀳𑀺 𑀕𑁄𑀥 𑀦𑀺𑀯𑀢𑁆𑀢𑀲𑁆𑀲𑀼, 𑀪𑀼𑀜𑁆𑀚 𑀲𑀸𑀮𑀻𑀦𑀫𑁄𑀤𑀦𑀁;

𑀢𑁂𑀮𑀁 𑀮𑁄𑀡𑀜𑁆𑀘 𑀫𑁂 𑀅𑀢𑁆𑀣𑀺, 𑀧𑀳𑀽𑀢𑀁 𑀫𑀬𑁆𑀳 𑀧𑀺𑀧𑁆𑀨𑀮𑀺.

𑁧𑁦𑁦. 𑀏𑀲 𑀪𑀺𑀬𑁆𑀬𑁄 𑀧𑀯𑁂𑀓𑁆𑀔𑀸𑀫𑀺, 𑀯𑀫𑁆𑀫𑀺𑀓𑀁 𑀲𑀢𑀧𑁄𑀭𑀺𑀲𑀁;

𑀢𑁂𑀮𑀁 𑀮𑁄𑀡𑀜𑁆𑀘 𑀓𑀺𑀢𑁆𑀢𑁂𑀲𑀺 [𑀓𑀺𑀦𑁆𑀢𑁂𑀲𑀺 (𑀲𑁆𑀬𑀸. 𑀧𑀻.)], 𑀅𑀳𑀺𑀢𑀁 𑀫𑀬𑁆𑀳 𑀧𑀺𑀧𑁆𑀨𑀮𑀻𑀢𑀺.

𑀕𑁄𑀥𑀭𑀸𑀚𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁩𑁨𑁬. 𑀓𑀓𑁆𑀓𑀸𑀭𑀼𑀚𑀸𑀢𑀓𑀁 (𑁪-𑁩-𑁬)

𑁧𑁦𑁧. 𑀓𑀸𑀬𑁂𑀦 𑀬𑁄 𑀦𑀸𑀯𑀳𑀭𑁂, 𑀯𑀸𑀘𑀸𑀬 𑀦 𑀫𑀼𑀲𑀸 𑀪𑀡𑁂;

𑀬𑀲𑁄 𑀮𑀤𑁆𑀥𑀸 𑀦 𑀫𑀚𑁆𑀚𑁂𑀬𑁆𑀬, 𑀲 𑀯𑁂 𑀓𑀓𑁆𑀓𑀸𑀭𑀼𑀫𑀭𑀳𑀢𑀺.

𑁧𑁦𑁨. 𑀥𑀫𑁆𑀫𑁂𑀦 𑀯𑀺𑀢𑁆𑀢𑀫𑁂𑀲𑁂𑀬𑁆𑀬, 𑀦 𑀦𑀺𑀓𑀢𑁆𑀬𑀸 𑀥𑀦𑀁 𑀳𑀭𑁂;

𑀪𑁄𑀕𑁂 𑀮𑀤𑁆𑀥𑀸 𑀦 𑀫𑀚𑁆𑀚𑁂𑀬𑁆𑀬, 𑀲 𑀯𑁂 𑀓𑀓𑁆𑀓𑀸𑀭𑀼𑀫𑀭𑀳𑀢𑀺.

𑁧𑁦𑁩. 𑀬𑀲𑁆𑀲 𑀘𑀺𑀢𑁆𑀢𑀁 𑀅𑀳𑀸𑀮𑀺𑀤𑁆𑀤𑀁, 𑀲𑀤𑁆𑀥𑀸 𑀘 𑀅𑀯𑀺𑀭𑀸𑀕𑀺𑀦𑀻;

𑀏𑀓𑁄 𑀲𑀸𑀤𑀼𑀁 𑀦 𑀪𑀼𑀜𑁆𑀚𑁂𑀬𑁆𑀬, 𑀲 𑀯𑁂 𑀓𑀓𑁆𑀓𑀸𑀭𑀼𑀫𑀭𑀳𑀢𑀺.

𑁧𑁦𑁪. 𑀲𑀫𑁆𑀫𑀼𑀔𑀸 𑀯𑀸 𑀢𑀺𑀭𑁄𑀓𑁆𑀔𑀸 𑀯𑀸 [𑀧𑀭𑁄𑀓𑁆𑀔𑀸 𑀯𑀸 (𑀧𑀻.), 𑀧𑀭𑀫𑁆𑀫𑀼𑀔𑀸 (𑀓.)], 𑀬𑁄 𑀲𑀦𑁆𑀢𑁂 𑀦 𑀧𑀭𑀺𑀪𑀸𑀲𑀢𑀺;

𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀲 𑀯𑁂 𑀓𑀓𑁆𑀓𑀸𑀭𑀼𑀫𑀭𑀳𑀢𑀻𑀢𑀺.

𑀓𑀓𑁆𑀓𑀸𑀭𑀼𑀚𑀸𑀢𑀓𑀁 𑀙𑀝𑁆𑀞𑀁.

𑁩𑁨𑁭. 𑀓𑀸𑀓𑀯𑀢𑀻𑀚𑀸𑀢𑀓𑀁 (𑁪-𑁩-𑁭)

𑁧𑁦𑁫. 𑀯𑀸𑀢𑀺 𑀘𑀸𑀬𑀁 [𑀯𑀸𑀬𑀁 (𑀓.)] 𑀢𑀢𑁄 𑀕𑀦𑁆𑀥𑁄, 𑀬𑀢𑁆𑀣 𑀫𑁂 𑀯𑀲𑀢𑀻 𑀧𑀺𑀬𑀸;

𑀤𑀽𑀭𑁂 𑀇𑀢𑁄 𑀳𑀺 𑀓𑀸𑀓𑀯𑀢𑀻 [𑀓𑀸𑀓𑀸𑀢𑀻 (𑀲𑀻.), 𑀓𑀸𑀓𑀸𑀢𑀺 (𑀲𑁆𑀬𑀸. 𑀧𑀻.)], 𑀬𑀢𑁆𑀣 𑀫𑁂 𑀦𑀺𑀭𑀢𑁄 𑀫𑀦𑁄.

𑁧𑁦𑁬. 𑀓𑀣𑀁 𑀲𑀫𑀼𑀤𑁆𑀤𑀫𑀢𑀭𑀻, 𑀓𑀣𑀁 𑀅𑀢𑀭𑀺 𑀓𑁂𑀧𑀼𑀓𑀁 [𑀓𑁂𑀩𑀼𑀓𑀁 (𑀲𑀻. 𑀧𑀻.)];

𑀓𑀣𑀁 𑀲𑀢𑁆𑀢 𑀲𑀫𑀼𑀤𑁆𑀤𑀸𑀦𑀺, 𑀓𑀣𑀁 𑀲𑀺𑀫𑁆𑀩𑀮𑀺𑀫𑀸𑀭𑀼𑀳𑀺.

𑁧𑁦𑁭. 𑀢𑀬𑀸 𑀲𑀫𑀼𑀤𑁆𑀤𑀫𑀢𑀭𑀺𑀁, 𑀢𑀬𑀸 𑀅𑀢𑀭𑀺 𑀓𑁂𑀧𑀼𑀓𑀁 [𑀓𑁂𑀩𑀼𑀓𑀁 (𑀲𑀻. 𑀧𑀻.)];

𑀢𑀬𑀸 𑀲𑀢𑁆𑀢 𑀲𑀫𑀼𑀤𑁆𑀤𑀸𑀦𑀺, 𑀢𑀬𑀸 𑀲𑀺𑀫𑁆𑀩𑀮𑀺𑀫𑀸𑀭𑀼𑀳𑀺𑀁.

𑁧𑁦𑁮. 𑀥𑀺𑀭𑀢𑁆𑀣𑀼𑀫𑀁 𑀫𑀳𑀸𑀓𑀸𑀬𑀁, 𑀥𑀺𑀭𑀢𑁆𑀣𑀼𑀫𑀁 𑀅𑀘𑁂𑀢𑀦𑀁;

𑀬𑀢𑁆𑀣 𑀚𑀸𑀬𑀸𑀬𑀳𑀁 𑀚𑀸𑀭𑀁, 𑀆𑀯𑀳𑀸𑀫𑀺 𑀯𑀳𑀸𑀫𑀺 𑀘𑀸𑀢𑀺.

𑀓𑀸𑀓𑀯𑀢𑀻𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁩𑁨𑁮. 𑀅𑀦𑀦𑀼𑀲𑁄𑀘𑀺𑀬𑀚𑀸𑀢𑀓𑀁 (𑁪-𑁩-𑁮)

𑁧𑁦𑁯. 𑀩𑀳𑀽𑀦𑀁 𑀯𑀺𑀚𑁆𑀚𑀢𑀻 𑀪𑁄𑀢𑀻, 𑀢𑁂𑀳𑀺 𑀫𑁂 𑀓𑀺𑀁 𑀪𑀯𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀏𑀢𑀁 𑀦 𑀲𑁄𑀘𑀸𑀫𑀺, 𑀧𑀺𑀬𑀁 𑀲𑀫𑁆𑀫𑀺𑀮𑁆𑀮𑀳𑀸𑀲𑀺𑀦𑀺𑀁.

𑁧𑁧𑁦. 𑀢𑀁 𑀢𑀁 𑀘𑁂 𑀅𑀦𑀼𑀲𑁄𑀘𑁂𑀬𑁆𑀬, 𑀬𑀁 𑀬𑀁 𑀢𑀲𑁆𑀲 𑀦 𑀯𑀺𑀚𑁆𑀚𑀢𑀺;

𑀅𑀢𑁆𑀢𑀸𑀦𑀫𑀦𑀼𑀲𑁄𑀘𑁂𑀬𑁆𑀬, 𑀲𑀤𑀸 𑀫𑀘𑁆𑀘𑀼𑀯𑀲𑀁 𑀧𑀢𑀁.

𑁧𑁧𑁧. 𑀦 𑀳𑁂𑀯 𑀞𑀺𑀢𑀁 𑀦𑀸𑀲𑀻𑀦𑀁, 𑀦 𑀲𑀬𑀸𑀦𑀁 𑀦 𑀧𑀤𑁆𑀥𑀕𑀼𑀁 [𑀧𑀢𑁆𑀣𑀕𑀼𑀁 (𑀲𑁆𑀬𑀸.)];

𑀬𑀸𑀯 𑀩𑁆𑀬𑀸𑀢𑀺 𑀦𑀺𑀫𑀺𑀲𑀢𑀺, 𑀢𑀢𑁆𑀭𑀸𑀧𑀺 𑀭𑀲𑀢𑀻 [𑀲𑀭𑀢𑀻 (𑀲𑀻. 𑀲𑁆𑀬𑀸. 𑀧𑀻.)] 𑀯𑀬𑁄.

𑁧𑁧𑁨. 𑀢𑀢𑁆𑀣𑀢𑁆𑀢𑀦𑀺 𑀯𑀢𑀧𑁆𑀧𑀤𑁆𑀥𑁂 [𑀯𑀢 𑀧𑀦𑁆𑀣𑁂 (𑀲𑁆𑀬𑀸.), 𑀯𑀢 𑀩𑀦𑁆𑀥𑁂 (𑀓.) 𑀯𑀢 + 𑀧-𑀅𑀤𑁆𑀥𑁂 = 𑀯𑀢𑀧𑁆𑀧𑀤𑁆𑀥𑁂], 𑀯𑀺𑀦𑀸𑀪𑀸𑀯𑁂 𑀅𑀲𑀁𑀲𑀬𑁂;

𑀪𑀽𑀢𑀁 𑀲𑁂𑀲𑀁 𑀤𑀬𑀺𑀢𑀩𑁆𑀩𑀁, 𑀯𑀻𑀢𑀁 𑀅𑀦𑀦𑀼𑀲𑁄𑀘𑀺𑀬𑀦𑁆𑀢𑀺 [𑀘𑀯𑀺𑀢𑀁 𑀦𑀸𑀦𑀼𑀲𑁄𑀘𑀺𑀬𑀦𑁆𑀢𑀺 (𑀲𑁆𑀬𑀸.), 𑀫𑀢𑀦𑁆𑀢𑀁 𑀦𑀸𑀦𑀼𑀲𑁄𑀘𑀺𑀬𑀁 (𑀓.)].

𑀅𑀦𑀦𑀼𑀲𑁄𑀘𑀺𑀬𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁩𑁨𑁯. 𑀓𑀸𑀴𑀩𑀸𑀳𑀼𑀚𑀸𑀢𑀓𑀁 (𑁪-𑁩-𑁯)

𑁧𑁧𑁩. 𑀬𑀁 𑀅𑀦𑁆𑀦𑀧𑀸𑀦𑀲𑁆𑀲 𑀧𑀼𑀭𑁂 𑀮𑀪𑀸𑀫, 𑀢𑀁 𑀤𑀸𑀦𑀺 𑀲𑀸𑀔𑀫𑀺𑀕𑀫𑁂𑀯 𑀕𑀘𑁆𑀙𑀢𑀺;

𑀕𑀘𑁆𑀙𑀸𑀫 𑀤𑀸𑀦𑀺 𑀯𑀦𑀫𑁂𑀯 𑀭𑀸𑀥, 𑀅𑀲𑀓𑁆𑀓𑀢𑀸 𑀘𑀲𑁆𑀫 𑀥𑀦𑀜𑁆𑀚𑀬𑀸𑀬 [𑀥𑀦𑀜𑁆𑀘𑀬𑀸𑀬 (𑀓.)].

𑁧𑁧𑁪. 𑀮𑀸𑀪𑁄 𑀅𑀮𑀸𑀪𑁄 𑀬𑀲𑁄 𑀅𑀬𑀲𑁄 𑀘, 𑀦𑀺𑀦𑁆𑀤𑀸 𑀧𑀲𑀁𑀲𑀸 𑀘 𑀲𑀼𑀔𑀜𑁆𑀘 𑀤𑀼𑀓𑁆𑀔𑀁;

𑀏𑀢𑁂 𑀅𑀦𑀺𑀘𑁆𑀘𑀸 𑀫𑀦𑀼𑀚𑁂𑀲𑀼 𑀥𑀫𑁆𑀫𑀸, 𑀫𑀸 𑀲𑁄𑀘𑀺 𑀓𑀺𑀁 𑀲𑁄𑀘𑀲𑀺 𑀧𑁄𑀝𑁆𑀞𑀧𑀸𑀤.

𑁧𑁧𑁫. 𑀅𑀤𑁆𑀥𑀸 𑀢𑀼𑀯𑀁 𑀧𑀡𑁆𑀟𑀺𑀢𑀓𑁄𑀲𑀺 𑀭𑀸𑀥, 𑀚𑀸𑀦𑀸𑀲𑀺 𑀅𑀢𑁆𑀣𑀸𑀦𑀺 𑀅𑀦𑀸𑀕𑀢𑀸𑀦𑀺;

𑀓𑀣𑀁 𑀦𑀼 𑀲𑀸𑀔𑀸𑀫𑀺𑀕𑀁 𑀤𑀓𑁆𑀔𑀺𑀲𑀸𑀫 [𑀤𑀓𑁆𑀔𑀺𑀬𑀸𑀫 (𑀓.), 𑀤𑀓𑁆𑀔𑀸𑀫 (𑀲𑁆𑀬𑀸.)], 𑀦𑀺𑀤𑁆𑀥𑀸𑀯𑀺𑀢𑀁 [𑀦𑀺𑀤𑁆𑀥𑀸𑀧𑀺𑀢𑀁 (𑀲𑀻. 𑀲𑁆𑀬𑀸.), 𑀦𑀺𑀩𑁆𑀩𑀸𑀧𑀺𑀢𑀁 (𑀧𑀻.), 𑀦𑀺𑀘𑁆𑀙𑀤𑀁 (𑀓.)] 𑀭𑀸𑀚𑀓𑀼𑀮𑀢𑁄𑀯 𑀚𑀫𑁆𑀫𑀁.

𑁧𑁧𑁬. 𑀘𑀸𑀮𑁂𑀢𑀺 𑀓𑀡𑁆𑀡𑀁 𑀪𑀓𑀼𑀝𑀺𑀁 𑀓𑀭𑁄𑀢𑀺, 𑀫𑀼𑀳𑀼𑀁 𑀫𑀼𑀳𑀼𑀁 𑀪𑀸𑀬𑀬𑀢𑁂 [𑀪𑀸𑀬𑀢𑁂 (𑀲𑁆𑀬𑀸.), 𑀪𑀸𑀬𑀸𑀧𑀢𑁂 (𑀓.)] 𑀓𑀼𑀫𑀸𑀭𑁂;

𑀲𑀬𑀫𑁂𑀯 𑀢𑀁 𑀓𑀸𑀳𑀢𑀺 𑀓𑀸𑀴𑀩𑀸𑀳𑀼, 𑀬𑁂𑀦𑀸𑀭𑀓𑀸 𑀞𑀲𑁆𑀲𑀢𑀺 𑀅𑀦𑁆𑀦𑀧𑀸𑀦𑀸𑀢𑀺.

𑀓𑀸𑀴𑀩𑀸𑀳𑀼𑀚𑀸𑀢𑀓𑀁 𑀦𑀯𑀫𑀁.

𑁩𑁩𑁦. 𑀲𑀻𑀮𑀯𑀻𑀫𑀁𑀲𑀚𑀸𑀢𑀓𑀁 (𑁪-𑁩-𑁧𑁦)

𑁧𑁧𑁭. 𑀲𑀻𑀮𑀁 𑀓𑀺𑀭𑁂𑀯 𑀓𑀮𑁆𑀬𑀸𑀡𑀁, 𑀲𑀻𑀮𑀁 𑀮𑁄𑀓𑁂 𑀅𑀦𑀼𑀢𑁆𑀢𑀭𑀁;

𑀧𑀲𑁆𑀲 𑀖𑁄𑀭𑀯𑀺𑀲𑁄 𑀦𑀸𑀕𑁄, 𑀲𑀻𑀮𑀯𑀸𑀢𑀺 𑀦 𑀳𑀜𑁆𑀜𑀢𑀺.

𑁧𑁧𑁮. 𑀬𑀸𑀯𑀤𑁂𑀯𑀲𑁆𑀲𑀳𑀽 𑀓𑀺𑀜𑁆𑀘𑀺, 𑀢𑀸𑀯𑀤𑁂𑀯 𑀅𑀔𑀸𑀤𑀺𑀲𑀼𑀁;

𑀲𑀗𑁆𑀕𑀫𑁆𑀫 𑀓𑀼𑀮𑀮𑀸 𑀮𑁄𑀓𑁂, 𑀦 𑀳𑀺𑀁𑀲𑀦𑁆𑀢𑀺 𑀅𑀓𑀺𑀜𑁆𑀘𑀦𑀁.

𑁧𑁧𑁯. 𑀲𑀼𑀔𑀁 𑀦𑀺𑀭𑀸𑀲𑀸 𑀲𑀼𑀧𑀢𑀺, 𑀆𑀲𑀸 𑀨𑀮𑀯𑀢𑀻 𑀲𑀼𑀔𑀸;

𑀆𑀲𑀁 𑀦𑀺𑀭𑀸𑀲𑀁 𑀓𑀢𑁆𑀯𑀸𑀦, 𑀲𑀼𑀔𑀁 𑀲𑀼𑀧𑀢𑀺 𑀧𑀺𑀗𑁆𑀕𑀮𑀸.

𑁧𑁨𑁦. 𑀦 𑀲𑀫𑀸𑀥𑀺𑀧𑀭𑁄 𑀅𑀢𑁆𑀣𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘;

𑀦 𑀧𑀭𑀁 𑀦𑀸𑀧𑀺 𑀅𑀢𑁆𑀢𑀸𑀦𑀁, 𑀯𑀺𑀳𑀺𑀁𑀲𑀢𑀺 𑀲𑀫𑀸𑀳𑀺𑀢𑁄𑀢𑀺.

𑀲𑀻𑀮𑀯𑀻𑀫𑀁𑀲𑀚𑀸𑀢𑀓𑀁 𑀤𑀲𑀫𑀁.

𑀓𑀼𑀝𑀺𑀤𑀽𑀲𑀓𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀫𑀦𑀼𑀲𑁆𑀲 -𑀲𑀤𑀼𑀤𑁆𑀤𑀼𑀪-𑀬𑀸𑀘𑀦𑀓𑁄, 𑀅𑀣 𑀫𑁂𑀡𑁆𑀟𑀯𑀭𑀼𑀢𑁆𑀢𑀫-𑀕𑁄𑀥𑀯𑀭𑁄;

𑀅𑀣 𑀓𑀸𑀬𑀲𑀓𑁂𑀧𑀼𑀓 𑀪𑁄𑀢𑀻𑀯𑀭𑁄, 𑀅𑀣 𑀭𑀸𑀥𑀲𑀼𑀲𑀻𑀮𑀯𑀭𑁂𑀦 𑀤𑀲𑀸𑀢𑀺.