𑁪. 𑀓𑁄𑀓𑀺𑀮𑀯𑀕𑁆𑀕𑁄

𑁩𑁩𑁧. 𑀓𑁄𑀓𑀺𑀮𑀚𑀸𑀢𑀓𑀁 (𑁪-𑁪-𑁧)

𑁧𑁨𑁧. 𑀬𑁄 𑀯𑁂 𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂, 𑀅𑀢𑀺𑀯𑁂𑀮𑀁 𑀧𑀪𑀸𑀲𑀢𑀺;

𑀏𑀯𑀁 𑀲𑁄 𑀦𑀺𑀳𑀢𑁄 𑀲𑁂𑀢𑀺, 𑀓𑁄𑀓𑀺𑀮𑀸𑀬𑀺𑀯 𑀅𑀢𑁆𑀭𑀚𑁄.

𑁧𑁨𑁨. 𑀦 𑀳𑀺 𑀲𑀢𑁆𑀣𑀁 𑀲𑀼𑀦𑀺𑀲𑀺𑀢𑀁, 𑀯𑀺𑀲𑀁 𑀳𑀮𑀸𑀳𑀮𑀸𑀫𑀺𑀯 [𑀳𑀮𑀸𑀳𑀮𑀁 𑀇𑀯 (𑀧𑀻.)];

𑀏𑀯𑀁 𑀦𑀺𑀓𑀝𑁆𑀞𑁂 [𑀦𑀺𑀓𑁆𑀓𑀟𑁆𑀠𑁂 (𑀲𑁆𑀬𑀸.), 𑀦𑀺𑀓𑀟𑁆𑀠𑁂 (𑀓.)] 𑀧𑀸𑀢𑁂𑀢𑀺, 𑀯𑀸𑀘𑀸 𑀤𑀼𑀩𑁆𑀪𑀸𑀲𑀺𑀢𑀸 𑀬𑀣𑀸.

𑁧𑁨𑁩. 𑀢𑀲𑁆𑀫𑀸 𑀓𑀸𑀮𑁂 𑀅𑀓𑀸𑀮𑁂 𑀯𑀸 [𑀅𑀓𑀸𑀮𑁂 𑀘 (𑀲𑀻. 𑀲𑁆𑀬𑀸.)], 𑀯𑀸𑀘𑀁 𑀭𑀓𑁆𑀔𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀦𑀸𑀢𑀺𑀯𑁂𑀮𑀁 𑀧𑀪𑀸𑀲𑁂𑀬𑁆𑀬, 𑀅𑀧𑀺 𑀅𑀢𑁆𑀢𑀲𑀫𑀫𑁆𑀳𑀺 𑀯𑀸.

𑁧𑁨𑁪. 𑀬𑁄 𑀘 𑀓𑀸𑀮𑁂 𑀫𑀺𑀢𑀁 𑀪𑀸𑀲𑁂, 𑀫𑀢𑀺𑀧𑀼𑀩𑁆𑀩𑁄 𑀯𑀺𑀘𑀓𑁆𑀔𑀡𑁄;

𑀲𑀩𑁆𑀩𑁂 𑀅𑀫𑀺𑀢𑁆𑀢𑁂 𑀆𑀤𑁂𑀢𑀺, 𑀲𑀼𑀧𑀡𑁆𑀡𑁄 𑀉𑀭𑀕𑀸𑀫𑀺𑀯𑀸𑀢𑀺.

𑀓𑁄𑀓𑀺𑀮𑀚𑀸𑀢𑀓𑀁 [𑀓𑁄𑀓𑀸𑀮𑀺𑀓𑀚𑀸𑀢𑀓𑀁 (𑀲𑀩𑁆𑀩𑀢𑁆𑀣)] 𑀧𑀞𑀫𑀁.

𑁩𑁩𑁨. 𑀭𑀣𑀮𑀝𑁆𑀞𑀺𑀚𑀸𑀢𑀓𑀁 (𑁪-𑁪-𑁨)

𑁧𑁨𑁫. 𑀅𑀧𑀺 𑀳𑀦𑁆𑀢𑁆𑀯𑀸 𑀳𑀢𑁄 𑀩𑁆𑀭𑀽𑀢𑀺, 𑀚𑁂𑀢𑁆𑀯𑀸 𑀚𑀺𑀢𑁄𑀢𑀺 𑀪𑀸𑀲𑀢𑀺;

𑀧𑀼𑀩𑁆𑀩𑀯𑀓𑁆𑀔𑀸𑀬𑀺𑀦𑁄 [𑀧𑀼𑀩𑁆𑀩𑀫𑀓𑁆𑀔𑀸𑀬𑀺𑀦𑁄 (𑀲𑀻. 𑀲𑁆𑀬𑀸.)] 𑀭𑀸𑀚, 𑀅𑀜𑁆𑀜𑀤𑀢𑁆𑀣𑀼 [𑀏𑀓𑀤𑀢𑁆𑀣𑀼 (𑀲𑀻. 𑀧𑀻.)] 𑀦 𑀲𑀤𑁆𑀤𑀳𑁂.

𑁧𑁨𑁬. 𑀢𑀲𑁆𑀫𑀸 𑀧𑀡𑁆𑀟𑀺𑀢𑀚𑀸𑀢𑀺𑀬𑁄, 𑀲𑀼𑀡𑁂𑀬𑁆𑀬 𑀇𑀢𑀭𑀲𑁆𑀲𑀧𑀺;

𑀉𑀪𑀺𑀦𑁆𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀬𑀣𑀸 𑀥𑀫𑁆𑀫𑁄 𑀢𑀣𑀸 𑀓𑀭𑁂.

𑁧𑁨𑁭. 𑀅𑀮𑀲𑁄 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼, 𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻, 𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀼.

𑁧𑁨𑁮. 𑀦𑀺𑀲𑀫𑁆𑀫 𑀔𑀢𑁆𑀢𑀺𑀬𑁄 𑀓𑀬𑀺𑀭𑀸, 𑀦𑀸𑀦𑀺𑀲𑀫𑁆𑀫 𑀤𑀺𑀲𑀫𑁆𑀧𑀢𑀺;

𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀭𑀸𑀚 [𑀭𑀜𑁆𑀜𑁄 (𑀲𑀻. 𑀲𑁆𑀬𑀸.)], 𑀬𑀲𑁄 𑀓𑀺𑀢𑁆𑀢𑀺 𑀘 𑀯𑀟𑁆𑀠𑀢𑀻𑀢𑀺.

𑀭𑀣𑀮𑀝𑁆𑀞𑀺𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁩𑁩. 𑀧𑀓𑁆𑀓𑀕𑁄𑀥𑀚𑀸𑀢𑀓𑀁 (𑁪-𑁪-𑁩)

𑁧𑁨𑁯. 𑀢𑀤𑁂𑀯 𑀫𑁂 𑀢𑁆𑀯𑀁 𑀯𑀺𑀤𑀺𑀢𑁄, 𑀯𑀦𑀫𑀚𑁆𑀛𑁂 𑀭𑀣𑁂𑀲𑀪;

𑀬𑀲𑁆𑀲 𑀢𑁂 𑀔𑀕𑁆𑀕𑀩𑀤𑁆𑀥𑀲𑁆𑀲, 𑀲𑀦𑁆𑀦𑀤𑁆𑀥𑀲𑁆𑀲 𑀢𑀺𑀭𑀻𑀝𑀺𑀦𑁄;

𑀅𑀲𑁆𑀲𑀢𑁆𑀣𑀤𑀼𑀫𑀲𑀸𑀔𑀸𑀬, 𑀧𑀓𑁆𑀓𑀸 𑀕𑁄𑀥𑀸 𑀧𑀮𑀸𑀬𑀣.

𑁧𑁩𑁦. 𑀦𑀫𑁂 𑀦𑀫𑀦𑁆𑀢𑀲𑁆𑀲 𑀪𑀚𑁂 𑀪𑀚𑀦𑁆𑀢𑀁, 𑀓𑀺𑀘𑁆𑀘𑀸𑀦𑀼𑀓𑀼𑀩𑁆𑀩𑀲𑁆𑀲 𑀓𑀭𑁂𑀬𑁆𑀬 𑀓𑀺𑀘𑁆𑀘𑀁;

𑀦𑀸𑀦𑀢𑁆𑀣𑀓𑀸𑀫𑀲𑁆𑀲 𑀓𑀭𑁂𑀬𑁆𑀬 𑀅𑀢𑁆𑀣𑀁, 𑀅𑀲𑀫𑁆𑀪𑀚𑀦𑁆𑀢𑀫𑁆𑀧𑀺 𑀦 𑀲𑀫𑁆𑀪𑀚𑁂𑀬𑁆𑀬.

𑁧𑁩𑁧. 𑀘𑀚𑁂 𑀘𑀚𑀦𑁆𑀢𑀁 𑀯𑀦𑀣𑀁 𑀦 𑀓𑀬𑀺𑀭𑀸, 𑀅𑀧𑁂𑀢𑀘𑀺𑀢𑁆𑀢𑁂𑀦 𑀦 𑀲𑀫𑁆𑀪𑀚𑁂𑀬𑁆𑀬;

𑀤𑀺𑀚𑁄 𑀤𑀼𑀫𑀁 𑀔𑀻𑀡𑀨𑀮𑀦𑁆𑀢𑀺 [𑀨𑀮𑀁𑀯 (𑀓. 𑀲𑀻. 𑀲𑁆𑀬𑀸. 𑀓.), 𑀤𑀼𑀓𑀦𑀺𑀧𑀸𑀢𑁂 𑀧𑀼𑀝𑀪𑀢𑁆𑀢𑀚𑀸𑀢𑀓𑁂𑀦 𑀲𑀁𑀲𑀦𑁆𑀤𑁂𑀢𑀩𑁆𑀩𑀁] 𑀜𑀢𑁆𑀯𑀸, 𑀅𑀜𑁆𑀜𑀁 𑀲𑀫𑁂𑀓𑁆𑀔𑁂𑀬𑁆𑀬 𑀫𑀳𑀸 𑀳𑀺 𑀮𑁄𑀓𑁄.

𑁧𑁩𑁨. 𑀲𑁄 𑀢𑁂 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸𑀦𑀼𑀪𑀸𑀯𑀁, 𑀓𑀢𑀜𑁆𑀜𑀼𑀢𑀁 𑀔𑀢𑁆𑀢𑀺𑀬𑁂 [𑀔𑀢𑁆𑀢𑀺𑀬𑁄 (𑀲𑁆𑀬𑀸. 𑀓.)] 𑀧𑁂𑀓𑁆𑀔𑀫𑀸𑀦𑁄;

𑀲𑀩𑁆𑀩𑀜𑁆𑀘 𑀢𑁂 𑀇𑀲𑁆𑀲𑀭𑀺𑀬𑀁 𑀤𑀤𑀸𑀫𑀺, 𑀬𑀲𑁆𑀲𑀺𑀘𑁆𑀙𑀲𑀻 𑀢𑀲𑁆𑀲 𑀢𑀼𑀯𑀁 𑀤𑀤𑀸𑀫𑀻𑀢𑀺.

𑀧𑀓𑁆𑀓𑀕𑁄𑀥𑀚𑀸𑀢𑀓𑀁 [𑀕𑁄𑀥𑀚𑀸𑀢𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀢𑀢𑀺𑀬𑀁.

𑁩𑁩𑁪. 𑀭𑀸𑀚𑁄𑀯𑀸𑀤𑀚𑀸𑀢𑀓𑀁 (𑁪-𑁪-𑁪)

𑁧𑁩𑁩. 𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀚𑀺𑀫𑁆𑀳𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀺 [𑀲𑀩𑁆𑀩𑀸 𑀕𑀸𑀯𑀻 𑀚𑀺𑀫𑁆𑀳𑀁 𑀬𑀦𑁆𑀢𑀺 (𑀲𑀻. 𑀲𑁆𑀬𑀸.)], 𑀦𑁂𑀢𑁆𑀢𑁂 𑀚𑀺𑀫𑁆𑀳𑀁 𑀕𑀢𑁂 𑀲𑀢𑀺.

𑁧𑁩𑁪. 𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀘𑁂 𑀅𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀤𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀅𑀥𑀫𑁆𑀫𑀺𑀓𑁄.

𑁧𑁩𑁫. 𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀕𑀸𑀯𑀻 𑀉𑀚𑀼𑀁 𑀬𑀦𑁆𑀢𑀺 [𑀲𑀩𑁆𑀩𑀸 𑀢𑀸 𑀉𑀚𑀼𑀁 𑀕𑀘𑁆𑀙𑀦𑁆𑀢𑀺 (𑀧𑀻. 𑀅. 𑀦𑀺. 𑁪.𑁭𑁦)], 𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀺.

𑁧𑁩𑁬. 𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀲𑀘𑁂 𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀲𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀥𑀫𑁆𑀫𑀺𑀓𑁄𑀢𑀺.

𑀭𑀸𑀚𑁄𑀯𑀸𑀤𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁩𑁩𑁫. 𑀚𑀫𑁆𑀩𑀼𑀓𑀚𑀸𑀢𑀓𑀁 (𑁪-𑁪-𑁫)

𑁧𑁩𑁭. 𑀩𑁆𑀭𑀳𑀸 𑀧𑀯𑀟𑁆𑀠𑀓𑀸𑀬𑁄 𑀲𑁄, 𑀤𑀻𑀖𑀤𑀸𑀞𑁄 𑀘 𑀚𑀫𑁆𑀩𑀼𑀓;

𑀦 𑀢𑁆𑀯𑀁 𑀢𑀢𑁆𑀣 𑀓𑀼𑀮𑁂 𑀚𑀸𑀢𑁄, 𑀬𑀢𑁆𑀣 𑀕𑀡𑁆𑀳𑀦𑁆𑀢𑀺 𑀓𑀼𑀜𑁆𑀚𑀭𑀁.

𑁧𑁩𑁮. 𑀅𑀲𑀻𑀳𑁄 𑀲𑀻𑀳𑀫𑀸𑀦𑁂𑀦, 𑀬𑁄 𑀅𑀢𑁆𑀢𑀸𑀦𑀁 𑀯𑀺𑀓𑀼𑀩𑁆𑀩𑀢𑀺;

𑀓𑁄𑀢𑁆𑀣𑀽𑀯 [𑀓𑀼𑀝𑁆𑀞𑀽𑀯 (𑀲𑀻.), 𑀓𑀼𑀢𑁆𑀣𑀼𑀯 (𑀲𑁆𑀬𑀸. 𑀧𑀻)] 𑀕𑀚𑀫𑀸𑀲𑀚𑁆𑀚, 𑀲𑁂𑀢𑀺 𑀪𑀽𑀫𑁆𑀬𑀸 𑀅𑀦𑀼𑀢𑁆𑀣𑀼𑀦𑀁.

𑁧𑁩𑁯. 𑀬𑀲𑀲𑁆𑀲𑀺𑀦𑁄 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲, 𑀲𑀜𑁆𑀚𑀸𑀢𑀔𑀦𑁆𑀥𑀲𑁆𑀲 𑀫𑀳𑀩𑁆𑀩𑀮𑀲𑁆𑀲;

𑀅𑀲𑀫𑁂𑀓𑁆𑀔𑀺𑀬 𑀣𑀸𑀫𑀩𑀮𑀽𑀧𑀧𑀢𑁆𑀢𑀺𑀁, 𑀲 𑀲𑁂𑀢𑀺 𑀦𑀸𑀕𑁂𑀦 𑀳𑀢𑁄𑀬𑀁 𑀚𑀫𑁆𑀩𑀼𑀓𑁄.

𑁧𑁪𑁦. 𑀬𑁄 𑀘𑀻𑀥 𑀓𑀫𑁆𑀫𑀁 𑀓𑀼𑀭𑀼𑀢𑁂 𑀧𑀫𑀸𑀬, 𑀣𑀸𑀫𑀩𑁆𑀩𑀮𑀁 𑀅𑀢𑁆𑀢𑀦𑀺 𑀲𑀁𑀯𑀺𑀤𑀺𑀢𑁆𑀯𑀸;

𑀚𑀧𑁆𑀧𑁂𑀦 𑀫𑀦𑁆𑀢𑁂𑀦 𑀲𑀼𑀪𑀸𑀲𑀺𑀢𑁂𑀦, 𑀧𑀭𑀺𑀓𑁆𑀔𑀯𑀸 𑀲𑁄 𑀯𑀺𑀧𑀼𑀮𑀁 𑀚𑀺𑀦𑀸𑀢𑀻𑀢𑀺.

𑀚𑀫𑁆𑀩𑀼𑀓𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁩𑁩𑁬. 𑀩𑁆𑀭𑀳𑀸𑀙𑀢𑁆𑀢𑀚𑀸𑀢𑀓𑀁 (𑁪-𑁪-𑁬)

𑁧𑁪𑁧. 𑀢𑀺𑀡𑀁 𑀢𑀺𑀡𑀦𑁆𑀢𑀺 𑀮𑀧𑀲𑀺, 𑀓𑁄 𑀦𑀼 𑀢𑁂 𑀢𑀺𑀡𑀫𑀸𑀳𑀭𑀺;

𑀓𑀺𑀁 𑀦𑀼 𑀢𑁂 𑀢𑀺𑀡𑀓𑀺𑀘𑁆𑀘𑀢𑁆𑀣𑀺, 𑀢𑀺𑀡𑀫𑁂𑀯 𑀧𑀪𑀸𑀲𑀲𑀺.

𑁧𑁪𑁨. 𑀇𑀥𑀸𑀕𑀫𑀸 𑀩𑁆𑀭𑀳𑁆𑀫𑀘𑀸𑀭𑀻, 𑀩𑁆𑀭𑀳𑀸 𑀙𑀢𑁆𑀢𑁄 𑀩𑀳𑀼𑀲𑁆𑀲𑀼𑀢𑁄;

𑀲𑁄 𑀫𑁂 [𑀲𑁄 𑀯𑁂 (𑀓.)] 𑀲𑀩𑁆𑀩𑀁 𑀲𑀫𑀸𑀤𑀸𑀬, 𑀢𑀺𑀡𑀁 𑀦𑀺𑀓𑁆𑀔𑀺𑀧𑁆𑀧 𑀕𑀘𑁆𑀙𑀢𑀺.

𑁧𑁪𑁩. 𑀏𑀯𑁂𑀢𑀁 𑀳𑁄𑀢𑀺 𑀓𑀢𑁆𑀢𑀩𑁆𑀩𑀁, 𑀅𑀧𑁆𑀧𑁂𑀦 𑀩𑀳𑀼𑀫𑀺𑀘𑁆𑀙𑀢𑀸;

𑀲𑀩𑁆𑀩𑀁 𑀲𑀓𑀲𑁆𑀲 𑀆𑀤𑀸𑀦𑀁, 𑀅𑀦𑀸𑀤𑀸𑀦𑀁 𑀢𑀺𑀡𑀲𑁆𑀲 𑀘. ( ) [(𑀢𑀺𑀡𑀲𑁆𑀲 𑀘𑀸𑀝𑀻𑀲𑀼 𑀕𑀢𑁄, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸) (𑀲𑀻. 𑀲𑁆𑀬𑀸.) (𑀘𑀸𑀝𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸𑀦, 𑀢𑀢𑁆𑀣 𑀓𑀸 𑀧𑀭𑀺𑀤𑁂𑀯𑀦𑀸) (𑀓.)]

𑁧𑁪𑁪. 𑀲𑀻𑀮𑀯𑀦𑁆𑀢𑁄 𑀦 𑀓𑀼𑀩𑁆𑀩𑀦𑁆𑀢𑀺, 𑀩𑀸𑀮𑁄 𑀲𑀻𑀮𑀸𑀦𑀺 𑀓𑀼𑀩𑁆𑀩𑀢𑀺;

𑀅𑀦𑀺𑀘𑁆𑀘𑀲𑀻𑀮𑀁 𑀤𑀼𑀲𑁆𑀲𑀻𑀮𑁆𑀬𑀁 [𑀤𑀼𑀲𑁆𑀲𑀻𑀮𑀁 (𑀧𑀻.)], 𑀓𑀺𑀁 𑀧𑀡𑁆𑀟𑀺𑀘𑁆𑀘𑀁 𑀓𑀭𑀺𑀲𑁆𑀲𑀢𑀻𑀢𑀺.

𑀩𑁆𑀭𑀳𑀸𑀙𑀢𑁆𑀢𑀚𑀸𑀢𑀓𑀁 𑀙𑀝𑁆𑀞𑀁.

𑁩𑁩𑁭. 𑀧𑀻𑀞𑀚𑀸𑀢𑀓𑀁 (𑁪-𑁪-𑁭)

𑁧𑁪𑁫. 𑀦 𑀢𑁂 𑀧𑀻𑀞𑀫𑀤𑀸𑀬𑀺𑀫𑁆𑀳𑀸 [𑀫𑀤𑀸𑀲𑀺𑀫𑁆𑀳 (𑀧𑀻. 𑀓.)], 𑀦 𑀧𑀸𑀦𑀁 𑀦𑀧𑀺 𑀪𑁄𑀚𑀦𑀁;

𑀩𑁆𑀭𑀳𑁆𑀫𑀘𑀸𑀭𑀺 𑀔𑀫𑀲𑁆𑀲𑀼 𑀫𑁂, 𑀏𑀢𑀁 𑀧𑀲𑁆𑀲𑀸𑀫𑀺 𑀅𑀘𑁆𑀘𑀬𑀁.

𑁧𑁪𑁬. 𑀦𑁂𑀯𑀸𑀪𑀺𑀲𑀚𑁆𑀚𑀸𑀫𑀺 𑀦 𑀘𑀸𑀧𑀺 𑀓𑀼𑀧𑁆𑀧𑁂, 𑀦 𑀘𑀸𑀧𑀺 𑀫𑁂 𑀅𑀧𑁆𑀧𑀺𑀬𑀫𑀸𑀲𑀺 𑀓𑀺𑀜𑁆𑀘𑀺;

𑀅𑀣𑁄𑀧𑀺 𑀫𑁂 𑀆𑀲𑀺 𑀫𑀦𑁄𑀯𑀺𑀢𑀓𑁆𑀓𑁄, 𑀏𑀢𑀸𑀤𑀺𑀲𑁄 𑀦𑀽𑀦 𑀓𑀼𑀮𑀲𑁆𑀲 𑀥𑀫𑁆𑀫𑁄.

𑁧𑁪𑁭. 𑀏𑀲𑀲𑁆𑀫𑀸𑀓𑀁 𑀓𑀼𑀮𑁂 𑀥𑀫𑁆𑀫𑁄, 𑀧𑀺𑀢𑀼𑀧𑀺𑀢𑀸𑀫𑀳𑁄 𑀲𑀤𑀸;

𑀆𑀲𑀦𑀁 𑀉𑀤𑀓𑀁 𑀧𑀚𑁆𑀚𑀁, 𑀲𑀩𑁆𑀩𑁂𑀢𑀁 𑀦𑀺𑀧𑀤𑀸𑀫𑀲𑁂.

𑁧𑁪𑁮. 𑀏𑀲𑀲𑁆𑀫𑀸𑀓𑀁 𑀓𑀼𑀮𑁂 𑀥𑀫𑁆𑀫𑁄, 𑀧𑀺𑀢𑀼𑀧𑀺𑀢𑀸𑀫𑀳𑁄 𑀲𑀤𑀸;

𑀲𑀓𑁆𑀓𑀘𑁆𑀘𑀁 𑀉𑀧𑀢𑀺𑀝𑁆𑀞𑀸𑀫, 𑀉𑀢𑁆𑀢𑀫𑀁 𑀯𑀺𑀬 𑀜𑀸𑀢𑀓𑀦𑁆𑀢𑀺.

𑀧𑀻𑀞𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁩𑁩𑁮. 𑀣𑀼𑀲𑀚𑀸𑀢𑀓𑀁 (𑁪-𑁪-𑁮)

𑁧𑁪𑁯. 𑀯𑀺𑀤𑀺𑀢𑀁 𑀣𑀼𑀲𑀁 𑀉𑀦𑁆𑀤𑀼𑀭𑀸𑀦𑀁 [𑀉𑀦𑁆𑀤𑀽𑀭𑀸𑀦𑀁 (𑀓.)], 𑀯𑀺𑀤𑀺𑀢𑀁 𑀧𑀦 𑀢𑀡𑁆𑀟𑀼𑀮𑀁;

𑀣𑀼𑀲𑀁 𑀣𑀼𑀲𑀁 [𑀣𑀼𑀲𑀁 𑀣𑀽𑀮𑀁 (𑀲𑀻.)] 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀢𑀡𑁆𑀟𑀼𑀮𑀁 𑀧𑀦 𑀔𑀸𑀤𑀭𑁂.

𑁧𑁫𑁦. 𑀬𑀸 𑀫𑀦𑁆𑀢𑀦𑀸 𑀅𑀭𑀜𑁆𑀜𑀲𑁆𑀫𑀺𑀁, 𑀬𑀸 𑀘 𑀕𑀸𑀫𑁂 𑀦𑀺𑀓𑀡𑁆𑀡𑀺𑀓𑀸;

𑀬𑀜𑁆𑀘𑁂𑀢𑀁 𑀇𑀢𑀺 𑀘𑀻𑀢𑀺 𑀘, 𑀏𑀢𑀫𑁆𑀧𑀺 𑀯𑀺𑀤𑀺𑀢𑀁 𑀫𑀬𑀸.

𑁧𑁫𑁧. 𑀥𑀫𑁆𑀫𑁂𑀦 𑀓𑀺𑀭 𑀚𑀸𑀢𑀲𑁆𑀲, 𑀧𑀺𑀢𑀸 𑀧𑀼𑀢𑁆𑀢𑀲𑁆𑀲 𑀫𑀓𑁆𑀓𑀝𑁄;

𑀤𑀳𑀭𑀲𑁆𑀲𑁂𑀯 𑀲𑀦𑁆𑀢𑀲𑁆𑀲, 𑀤𑀦𑁆𑀢𑁂𑀳𑀺 𑀨𑀮𑀫𑀘𑁆𑀙𑀺𑀤𑀸.

𑁧𑁫𑁨. 𑀬𑀫𑁂𑀢𑀁 𑀧𑀭𑀺𑀲𑀧𑁆𑀧𑀲𑀺 [𑀧𑀭𑀺𑀲𑀩𑁆𑀩𑁂𑀲𑀺 (𑀓.)], 𑀅𑀚𑀓𑀸𑀡𑁄𑀯 𑀲𑀸𑀲𑀧𑁂;

𑀬𑁄𑀧𑀸𑀬𑀁 𑀳𑁂𑀝𑁆𑀞𑀢𑁄 𑀲𑁂𑀢𑀺 [𑀲𑁂𑀲𑀺 (𑀲𑀻.)], 𑀏𑀢𑀫𑁆𑀧𑀺 𑀯𑀺𑀤𑀺𑀢𑀁 𑀫𑀬𑀸𑀢𑀺.

𑀣𑀼𑀲𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁩𑁩𑁯. 𑀩𑀸𑀯𑁂𑀭𑀼𑀚𑀸𑀢𑀓𑀁 (𑁪-𑁪-𑁯)

𑁧𑁫𑁩. 𑀅𑀤𑀲𑁆𑀲𑀦𑁂𑀦 𑀫𑁄𑀭𑀲𑁆𑀲, 𑀲𑀺𑀔𑀺𑀦𑁄 𑀫𑀜𑁆𑀚𑀼𑀪𑀸𑀡𑀺𑀦𑁄;

𑀓𑀸𑀓𑀁 𑀢𑀢𑁆𑀣 𑀅𑀧𑀽𑀚𑁂𑀲𑀼𑀁, 𑀫𑀁𑀲𑁂𑀦 𑀘 𑀨𑀮𑁂𑀦 𑀘.

𑁧𑁫𑁪. 𑀬𑀤𑀸 𑀘 𑀲𑀭𑀲𑀫𑁆𑀧𑀦𑁆𑀦𑁄, 𑀫𑁄𑀭𑁄 𑀩𑀸𑀯𑁂𑀭𑀼𑀫𑀸𑀕𑀫𑀸;

𑀅𑀣 𑀮𑀸𑀪𑁄 𑀘 𑀲𑀓𑁆𑀓𑀸𑀭𑁄, 𑀯𑀸𑀬𑀲𑀲𑁆𑀲 𑀅𑀳𑀸𑀬𑀣.

𑁧𑁫𑁫. 𑀬𑀸𑀯 𑀦𑀼𑀧𑁆𑀧𑀚𑁆𑀚𑀢𑀻 𑀩𑀼𑀤𑁆𑀥𑁄, 𑀥𑀫𑁆𑀫𑀭𑀸𑀚𑀸 𑀧𑀪𑀗𑁆𑀓𑀭𑁄;

𑀢𑀸𑀯 𑀅𑀜𑁆𑀜𑁂 𑀅𑀧𑀽𑀚𑁂𑀲𑀼𑀁, 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑁂.

𑁧𑁫𑁬. 𑀬𑀤𑀸 𑀘 𑀲𑀭𑀲𑀫𑁆𑀧𑀦𑁆𑀦𑁄, 𑀩𑀼𑀤𑁆𑀥𑁄 𑀥𑀫𑁆𑀫𑀁 𑀅𑀤𑁂𑀲𑀬𑀺;

𑀅𑀣 𑀮𑀸𑀪𑁄 𑀘 𑀲𑀓𑁆𑀓𑀸𑀭𑁄, 𑀢𑀺𑀢𑁆𑀣𑀺𑀬𑀸𑀦𑀁 𑀅𑀳𑀸𑀬𑀣𑀸𑀢𑀺.

𑀩𑀸𑀯𑁂𑀭𑀼𑀚𑀸𑀢𑀓𑀁 𑀦𑀯𑀫𑀁.

𑁩𑁪𑁦. 𑀯𑀺𑀲𑀬𑁆𑀳𑀚𑀸𑀢𑀓𑀁 (𑁪-𑁪-𑁧𑁦)

𑁧𑁫𑁭. 𑀅𑀤𑀸𑀲𑀺 𑀤𑀸𑀦𑀸𑀦𑀺 𑀧𑀼𑀭𑁂 𑀯𑀺𑀲𑀬𑁆𑀳, 𑀤𑀤𑀢𑁄 𑀘 𑀢𑁂 𑀔𑀬𑀥𑀫𑁆𑀫𑁄 𑀅𑀳𑁄𑀲𑀺;

𑀇𑀢𑁄 𑀧𑀭𑀁 𑀘𑁂 𑀦 𑀤𑀤𑁂𑀬𑁆𑀬 𑀤𑀸𑀦𑀁, 𑀢𑀺𑀝𑁆𑀞𑁂𑀬𑁆𑀬𑀼𑀁 𑀢𑁂 𑀲𑀁𑀬𑀫𑀦𑁆𑀢𑀲𑁆𑀲 𑀪𑁄𑀕𑀸.

𑁧𑁫𑁮. 𑀅𑀦𑀭𑀺𑀬𑀫𑀭𑀺𑀬𑁂𑀦 𑀲𑀳𑀲𑁆𑀲𑀦𑁂𑀢𑁆𑀢, 𑀲𑀼𑀤𑀼𑀕𑁆𑀕𑀢𑁂𑀦𑀸𑀧𑀺 𑀅𑀓𑀺𑀘𑁆𑀘𑀫𑀸𑀳𑀼;

𑀫𑀸 𑀯𑁄 𑀥𑀦𑀁 𑀢𑀁 𑀅𑀳𑀼 𑀤𑁂𑀯𑀭𑀸𑀚 [𑀅𑀳𑀼𑀯𑀸 𑀚𑀦𑀺𑀦𑁆𑀤 (𑀓. 𑀲𑀻. 𑀲𑁆𑀬𑀸. 𑀧𑀻.)], 𑀬𑀁 𑀪𑁄𑀕𑀳𑁂𑀢𑀼 𑀯𑀺𑀚𑀳𑁂𑀫𑀼 𑀲𑀤𑁆𑀥𑀁.

𑁧𑁫𑁯. 𑀬𑁂𑀦 𑀏𑀓𑁄 𑀭𑀣𑁄 𑀬𑀸𑀢𑀺, 𑀬𑀸𑀢𑀺 𑀢𑁂𑀦𑀸𑀧𑀭𑁄 𑀭𑀣𑁄;

𑀧𑁄𑀭𑀸𑀡𑀁 𑀦𑀺𑀳𑀺𑀢𑀁 𑀯𑀢𑁆𑀢𑀁, 𑀯𑀢𑁆𑀢𑀢𑀜𑁆𑀜𑁂𑀯 [𑀯𑀤𑁆𑀥𑀁, 𑀯𑀤𑁆𑀥𑀢𑀜𑁆𑀜𑁂𑀯 (𑀓. 𑀲𑀻. 𑀧𑀻.)] 𑀯𑀸𑀲𑀯.

𑁧𑁬𑁦. 𑀬𑀤𑀺 𑀳𑁂𑀲𑁆𑀲𑀢𑀺 𑀤𑀲𑁆𑀲𑀸𑀫, 𑀅𑀲𑀦𑁆𑀢𑁂 𑀓𑀺𑀁 𑀤𑀤𑀸𑀫𑀲𑁂;

𑀏𑀯𑀁𑀪𑀽𑀢𑀸𑀧𑀺 𑀤𑀲𑁆𑀲𑀸𑀫, 𑀫𑀸 𑀤𑀸𑀦𑀁 𑀧𑀫𑀤𑀫𑁆𑀳𑀲𑁂𑀢𑀺.

𑀯𑀺𑀲𑀬𑁆𑀳𑀚𑀸𑀢𑀓𑀁 𑀤𑀲𑀫𑀁.

𑀓𑁄𑀓𑀺𑀮𑀯𑀕𑁆𑀕𑁄 [𑀓𑁄𑀓𑀸𑀮𑀺𑀓𑀯𑀕𑁆𑀕𑁄 (𑀓.)] 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀢𑀺𑀯𑁂𑀮𑀧𑀪𑀸𑀲𑀢𑀺 𑀚𑀻𑀢𑀯𑀭𑁄, 𑀯𑀦𑀫𑀚𑁆𑀛 𑀭𑀣𑁂𑀲𑀪 𑀚𑀺𑀫𑁆𑀳𑀕𑀫𑁄;

𑀅𑀣 𑀚𑀫𑁆𑀩𑀼 𑀢𑀺𑀡𑀸𑀲𑀦𑀧𑀻𑀞𑀯𑀭𑀁, 𑀅𑀣 𑀢𑀡𑁆𑀟𑀼𑀮 𑀫𑁄𑀭 𑀯𑀺𑀲𑀬𑁆𑀳 𑀤𑀲𑀸𑀢𑀺.