𑁫. 𑀘𑀽𑀴𑀓𑀼𑀡𑀸𑀮𑀯𑀕𑁆𑀕𑁄

𑁩𑁪𑁧. 𑀓𑀡𑁆𑀟𑀭𑀻𑀚𑀸𑀢𑀓𑀁 (𑁪-𑁫-𑁧)

𑁧𑁬𑁧. 𑀦𑀭𑀸𑀦𑀫𑀸𑀭𑀸𑀫𑀓𑀭𑀸𑀲𑀼 𑀦𑀸𑀭𑀺𑀲𑀼, 𑀅𑀦𑁂𑀓𑀘𑀺𑀢𑁆𑀢𑀸𑀲𑀼 𑀅𑀦𑀺𑀕𑁆𑀕𑀳𑀸𑀲𑀼 𑀘;

𑀲𑀩𑁆𑀩𑀢𑁆𑀣 𑀦𑀸𑀧𑀻𑀢𑀺𑀓𑀭𑀸𑀧𑀺 [𑀲𑀩𑁆𑀩’𑀢𑁆𑀢𑀦𑀸’𑀧𑀻𑀢𑀺𑀓𑀭𑀸𑀧𑀺 (𑀲𑀻. 𑀲𑁆𑀬𑀸.)] 𑀘𑁂 𑀲𑀺𑀬𑀸 [𑀲𑀺𑀬𑀼𑀁 (𑀲𑁆𑀬𑀸.)], 𑀦 𑀯𑀺𑀲𑁆𑀲𑀲𑁂 𑀢𑀺𑀢𑁆𑀣𑀲𑀫𑀸 𑀳𑀺 𑀦𑀸𑀭𑀺𑀬𑁄.

𑁧𑁬𑁨. 𑀬𑀁 𑀯𑁂 [𑀬𑀜𑁆𑀘 (𑀲𑁆𑀬𑀸. 𑀓.)] 𑀤𑀺𑀲𑁆𑀯𑀸 𑀓𑀡𑁆𑀟𑀭𑀻𑀓𑀺𑀦𑁆𑀦𑀭𑀸𑀦𑀁 [𑀓𑀺𑀦𑁆𑀦𑀭𑀓𑀺𑀦𑁆𑀦𑀭𑀻𑀦𑀁 (𑀲𑁆𑀬𑀸.), 𑀓𑀺𑀦𑁆𑀦𑀭𑀻𑀓𑀺𑀦𑁆𑀦𑀭𑀸𑀦𑀁 (𑀓.)], 𑀲𑀩𑁆𑀩𑀺𑀢𑁆𑀣𑀺𑀬𑁄 𑀦 𑀭𑀫𑀦𑁆𑀢𑀺 𑀅𑀕𑀸𑀭𑁂;

𑀢𑀁 𑀢𑀸𑀤𑀺𑀲𑀁 𑀫𑀘𑁆𑀘𑀁 𑀘𑀚𑀺𑀢𑁆𑀯𑀸 𑀪𑀭𑀺𑀬𑀸, 𑀅𑀜𑁆𑀜𑀁 𑀤𑀺𑀲𑁆𑀯𑀸 𑀧𑀼𑀭𑀺𑀲𑀁 𑀧𑀻𑀞𑀲𑀧𑁆𑀧𑀺𑀁.

𑁧𑁬𑁩. 𑀩𑀓𑀲𑁆𑀲 𑀘 𑀩𑀸𑀯𑀭𑀺𑀓𑀲𑁆𑀲 [𑀧𑀸𑀯𑀸𑀭𑀺𑀓𑀲𑁆𑀲 (𑀲𑀻.)] 𑀭𑀜𑁆𑀜𑁄, 𑀅𑀘𑁆𑀘𑀦𑁆𑀢𑀓𑀸𑀫𑀸𑀦𑀼𑀕𑀢𑀲𑁆𑀲 𑀪𑀭𑀺𑀬𑀸;

𑀅𑀯𑀸𑀘𑀭𑀻 [𑀅𑀘𑁆𑀘𑀸𑀘𑀭𑀺 (𑀲𑁆𑀬𑀸.), 𑀅𑀦𑀸𑀘𑀭𑀺 (𑀓.)] 𑀧𑀝𑁆𑀞𑀯𑀲𑀸𑀦𑀼𑀕𑀲𑁆𑀲 [𑀩𑀤𑁆𑀥𑀯𑀲𑀸𑀦𑀼𑀕𑀲𑁆𑀲 (𑀲𑀻. 𑀲𑁆𑀬𑀸.), 𑀧𑀢𑁆𑀢𑀯𑀲𑀸𑀦𑀼𑀕𑀢𑀲𑁆𑀲 (𑀓.)], 𑀓𑀁 𑀯𑀸𑀧𑀺 𑀇𑀢𑁆𑀣𑀻 𑀦𑀸𑀢𑀺𑀘𑀭𑁂 𑀢𑀤𑀜𑁆𑀜𑀁.

𑁧𑁬𑁪. 𑀧𑀺𑀗𑁆𑀕𑀺𑀬𑀸𑀦𑀻 𑀲𑀩𑁆𑀩𑀮𑁄𑀓𑀺𑀲𑁆𑀲𑀭𑀲𑁆𑀲, 𑀭𑀜𑁆𑀜𑁄 𑀧𑀺𑀬𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀪𑀭𑀺𑀬𑀸;

𑀅𑀯𑀸𑀘𑀭𑀻 𑀧𑀝𑁆𑀞𑀯𑀲𑀸𑀦𑀼𑀕𑀲𑁆𑀲, 𑀢𑀁 𑀯𑀸𑀧𑀺 𑀲𑀸 𑀦𑀸𑀚𑁆𑀛𑀕𑀸 𑀓𑀸𑀫𑀓𑀸𑀫𑀺𑀦𑀻𑀢𑀺.

𑀓𑀡𑁆𑀟𑀭𑀻𑀚𑀸𑀢𑀓𑀁 [𑀓𑀺𑀦𑁆𑀦𑀭𑀻𑀚𑀸𑀢𑀓𑀁 (𑀓. 𑀲𑀻. 𑀓.), 𑀓𑀼𑀡𑁆𑀟𑀮𑀺𑀓𑀚𑀸𑀢𑀓𑀁 (𑀲𑁆𑀬𑀸.)] 𑀧𑀞𑀫𑀁.

𑁩𑁪𑁨. 𑀯𑀸𑀦𑀭𑀚𑀸𑀢𑀓𑀁 (𑁪-𑁫-𑁨)

𑁧𑁬𑁫. 𑀅𑀲𑀓𑁆𑀔𑀺𑀁 𑀯𑀢 𑀅𑀢𑁆𑀢𑀸𑀦𑀁, 𑀉𑀤𑁆𑀥𑀸𑀢𑀼𑀁 𑀉𑀤𑀓𑀸 𑀣𑀮𑀁;

𑀦 𑀤𑀸𑀦𑀸𑀳𑀁 𑀧𑀼𑀦 𑀢𑀼𑀬𑁆𑀳𑀁, 𑀯𑀲𑀁 𑀕𑀘𑁆𑀙𑀸𑀫𑀺 𑀯𑀸𑀭𑀺𑀚.

𑁧𑁬𑁬. 𑀅𑀮𑀫𑁂𑀢𑁂𑀳𑀺 𑀅𑀫𑁆𑀩𑁂𑀳𑀺, 𑀚𑀫𑁆𑀩𑀽𑀳𑀺 𑀧𑀦𑀲𑁂𑀳𑀺 𑀘;

𑀬𑀸𑀦𑀺 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲, 𑀯𑀭𑀁 𑀫𑀬𑁆𑀳𑀁 𑀉𑀤𑀼𑀫𑁆𑀩𑀭𑁄.

𑁧𑁬𑁭. 𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀦 𑀔𑀺𑀧𑁆𑀧𑀫𑀦𑀼𑀩𑀼𑀚𑁆𑀛𑀢𑀺;

𑀅𑀫𑀺𑀢𑁆𑀢𑀯𑀲𑀫𑀦𑁆𑀯𑁂𑀢𑀺, 𑀧𑀘𑁆𑀙𑀸 𑀘 𑀅𑀦𑀼𑀢𑀧𑁆𑀧𑀢𑀺.

𑁧𑁬𑁮. 𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀔𑀺𑀧𑁆𑀧𑀫𑁂𑀯 𑀦𑀺𑀩𑁄𑀥𑀢𑀺;

𑀫𑀼𑀘𑁆𑀘𑀢𑁂 𑀲𑀢𑁆𑀢𑀼𑀲𑀫𑁆𑀩𑀸𑀥𑀸, 𑀦 𑀘 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀻𑀢𑀺.

𑀯𑀸𑀦𑀭𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁪𑁩. 𑀓𑀼𑀦𑁆𑀢𑀺𑀦𑀻𑀚𑀸𑀢𑀓𑀁 (𑁪-𑁫-𑁩)

𑁧𑁬𑁯. 𑀅𑀯𑀲𑀺𑀫𑁆𑀳 𑀢𑀯𑀸𑀕𑀸𑀭𑁂, 𑀦𑀺𑀘𑁆𑀘𑀁 𑀲𑀓𑁆𑀓𑀢𑀧𑀽𑀚𑀺𑀢𑀸;

𑀢𑁆𑀯𑀫𑁂𑀯 𑀤𑀸𑀦𑀺𑀫𑀓𑀭𑀺, 𑀳𑀦𑁆𑀤 𑀭𑀸𑀚 𑀯𑀚𑀸𑀫𑀳𑀁.

𑁧𑁭𑁦. 𑀬𑁄 𑀯𑁂 𑀓𑀢𑁂 𑀧𑀝𑀺𑀓𑀢𑁂, 𑀓𑀺𑀩𑁆𑀩𑀺𑀲𑁂 𑀧𑀝𑀺𑀓𑀺𑀩𑁆𑀩𑀺𑀲𑁂;

𑀏𑀯𑀁 𑀢𑀁 𑀲𑀫𑁆𑀫𑀢𑀻 𑀯𑁂𑀭𑀁, 𑀯𑀲 𑀓𑀼𑀦𑁆𑀢𑀺𑀦𑀺 𑀫𑀸𑀕𑀫𑀸.

𑁧𑁭𑁧. 𑀦 𑀓𑀢𑀲𑁆𑀲 𑀘 𑀓𑀢𑁆𑀢𑀸 𑀘, 𑀫𑁂𑀢𑁆𑀢𑀺 [𑀫𑁂𑀢𑁆𑀢𑀻 (𑀧𑀻.), 𑀫𑀺𑀢𑁆𑀢𑀻 (𑀓.)] 𑀲𑀦𑁆𑀥𑀻𑀬𑀢𑁂 𑀧𑀼𑀦;

𑀳𑀤𑀬𑀁 𑀦𑀸𑀦𑀼𑀚𑀸𑀦𑀸𑀢𑀺, 𑀕𑀘𑁆𑀙𑀜𑁆𑀜𑁂𑀯 𑀭𑀣𑁂𑀲𑀪.

𑁧𑁭𑁨. 𑀓𑀢𑀲𑁆𑀲 𑀘𑁂𑀯 𑀓𑀢𑁆𑀢𑀸 𑀘, 𑀫𑁂𑀢𑁆𑀢𑀺 𑀲𑀦𑁆𑀥𑀻𑀬𑀢𑁂 𑀧𑀼𑀦;

𑀥𑀻𑀭𑀸𑀦𑀁 𑀦𑁄 𑀘 𑀩𑀸𑀮𑀸𑀦𑀁, 𑀯𑀲 𑀓𑀼𑀦𑁆𑀢𑀺𑀦𑀺 𑀫𑀸𑀕𑀫𑀸𑀢𑀺.

𑀓𑀼𑀦𑁆𑀢𑀺𑀦𑀻𑀚𑀸𑀢𑀓𑀁 𑀢𑀢𑀺𑀬𑀁.

𑁩𑁪𑁪. 𑀅𑀫𑁆𑀩𑀚𑀸𑀢𑀓𑀁 (𑁪-𑁫-𑁪)

𑁧𑁭𑁩. 𑀬𑁄 𑀦𑀻𑀮𑀺𑀬𑀁 𑀫𑀡𑁆𑀟𑀬𑀢𑀺, 𑀲𑀡𑁆𑀟𑀸𑀲𑁂𑀦 𑀯𑀺𑀳𑀜𑁆𑀜𑀢𑀺;

𑀢𑀲𑁆𑀲 𑀲𑀸 𑀯𑀲𑀫𑀦𑁆𑀯𑁂𑀢𑀼, 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀺.

𑁧𑁭𑁪. 𑀯𑀻𑀲𑀁 𑀯𑀸 𑀧𑀜𑁆𑀘𑀯𑀻𑀲𑀁 [𑀧𑀡𑁆𑀡𑀼𑀯𑀻𑀲𑀁 (𑀓. 𑀲𑀻. 𑀧𑀻.)] 𑀯𑀸, 𑀊𑀦𑀢𑀺𑀁𑀲𑀁 𑀯 𑀚𑀸𑀢𑀺𑀬𑀸;

𑀢𑀸𑀤𑀺𑀲𑀸 𑀧𑀢𑀺 𑀫𑀸 𑀮𑀤𑁆𑀥𑀸 [𑀧𑀢𑀺𑀁 𑀫𑀸 𑀮𑀤𑁆𑀥𑀸 (𑀧𑀻.), 𑀧𑀢𑀺 𑀫𑀸’𑀮𑀢𑁆𑀣 (?)], 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀺.

𑁧𑁭𑁫. 𑀤𑀻𑀖𑀁 𑀕𑀘𑁆𑀙𑀢𑀼 𑀅𑀤𑁆𑀥𑀸𑀦𑀁, 𑀏𑀓𑀺𑀓𑀸 𑀅𑀪𑀺𑀲𑀸𑀭𑀺𑀓𑀸;

𑀲𑀗𑁆𑀓𑁂𑀢𑁂 𑀧𑀢𑀺 𑀫𑀸 𑀅𑀤𑁆𑀤 [𑀫𑀸 𑀅𑀤𑁆𑀤𑀲 (𑀲𑀻. 𑀧𑀻.)], 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀺.

𑁧𑁭𑁬. 𑀅𑀮𑀗𑁆𑀓𑀢𑀸 𑀲𑀼𑀯𑀲𑀦𑀸, 𑀫𑀸𑀮𑀺𑀦𑀻 𑀘𑀦𑁆𑀤𑀦𑀼𑀲𑁆𑀲𑀤𑀸;

𑀏𑀓𑀺𑀓𑀸 𑀲𑀬𑀦𑁂 𑀲𑁂𑀢𑀼, 𑀬𑀸 𑀢𑁂 𑀅𑀫𑁆𑀩𑁂 𑀅𑀯𑀸𑀳𑀭𑀻𑀢𑀺.

𑀅𑀫𑁆𑀩𑀚𑀸𑀢𑀓𑀁 [𑀅𑀫𑁆𑀩𑀘𑁄𑀭𑀚𑀸𑀢𑀓𑀁 (𑀓. 𑀲𑀻. 𑀧𑀻.)] 𑀘𑀢𑀼𑀢𑁆𑀣𑀁.

𑁩𑁪𑁫. 𑀕𑀚𑀓𑀼𑀫𑁆𑀪𑀚𑀸𑀢𑀓𑀁 (𑁪-𑁫-𑁫)

𑁧𑁭𑁭. 𑀯𑀦𑀁 𑀬𑀤𑀕𑁆𑀕𑀺 𑀤𑀳𑀢𑀺, 𑀧𑀸𑀯𑀓𑁄 𑀓𑀡𑁆𑀳𑀯𑀢𑁆𑀢𑀦𑀻;

𑀓𑀣𑀁 𑀓𑀭𑁄𑀲𑀺 𑀧𑀘𑀮𑀓, 𑀏𑀯𑀁 𑀤𑀦𑁆𑀥𑀧𑀭𑀓𑁆𑀓𑀫𑁄.

𑁧𑁭𑁮. 𑀩𑀳𑀽𑀦𑀺 𑀭𑀼𑀓𑁆𑀔𑀙𑀺𑀤𑁆𑀤𑀸𑀦𑀺, 𑀧𑀣𑀩𑁆𑀬𑀸 𑀯𑀺𑀯𑀭𑀸𑀦𑀺 𑀘;

𑀢𑀸𑀦𑀺 𑀘𑁂 𑀦𑀸𑀪𑀺𑀲𑀫𑁆𑀪𑁄𑀫, 𑀳𑁄𑀢𑀺 𑀦𑁄 𑀓𑀸𑀮𑀧𑀭𑀺𑀬𑀸𑀬𑁄.

𑁧𑁭𑁯. 𑀬𑁄 𑀤𑀦𑁆𑀥𑀓𑀸𑀮𑁂 𑀢𑀭𑀢𑀺, 𑀢𑀭𑀡𑀻𑀬𑁂 𑀘 𑀤𑀦𑁆𑀥𑀢𑀺;

𑀲𑀼𑀓𑁆𑀔𑀧𑀡𑁆𑀡𑀁𑀯 𑀅𑀓𑁆𑀓𑀫𑁆𑀫, 𑀅𑀢𑁆𑀣𑀁 𑀪𑀜𑁆𑀚𑀢𑀺 𑀅𑀢𑁆𑀢𑀦𑁄.

𑁧𑁮𑁦. 𑀬𑁄 𑀤𑀦𑁆𑀥𑀓𑀸𑀮𑁂 𑀤𑀦𑁆𑀥𑁂𑀢𑀺, 𑀢𑀭𑀡𑀻𑀬𑁂 𑀘 𑀢𑀸𑀭𑀬𑀺;

𑀲𑀲𑀻𑀯 𑀭𑀢𑁆𑀢𑀺𑀁 𑀯𑀺𑀪𑀚𑀁, 𑀢𑀲𑁆𑀲𑀢𑁆𑀣𑁄 𑀧𑀭𑀺𑀧𑀽𑀭𑀢𑀻𑀢𑀺.

𑀕𑀚𑀓𑀼𑀫𑁆𑀪𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁩𑁪𑁬. 𑀓𑁂𑀲𑀯𑀚𑀸𑀢𑀓𑀁 (𑁪-𑁫-𑁬)

𑁧𑁮𑁧. 𑀫𑀦𑀼𑀲𑁆𑀲𑀺𑀦𑁆𑀤𑀁 𑀚𑀳𑀺𑀢𑁆𑀯𑀸𑀦, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀁;

𑀓𑀣𑀁 𑀦𑀼 𑀪𑀕𑀯𑀸 𑀓𑁂𑀲𑀻, 𑀓𑀧𑁆𑀧𑀲𑁆𑀲 𑀭𑀫𑀢𑀺 𑀅𑀲𑁆𑀲𑀫𑁂 [𑀭𑀫𑀢𑀲𑁆𑀲𑀫𑁂 (𑀓.)].

𑁧𑁮𑁨. 𑀲𑀸𑀤𑀽𑀦𑀻 [𑀲𑀸𑀥𑀽𑀦𑀺 (𑀓. 𑀲𑀻. 𑀲𑁆𑀬𑀸. 𑀓.)] 𑀭𑀫𑀡𑀻𑀬𑀸𑀦𑀺, 𑀲𑀦𑁆𑀢𑀺 𑀯𑀓𑁆𑀔𑀸 𑀫𑀦𑁄𑀭𑀫𑀸;

𑀲𑀼𑀪𑀸𑀲𑀺𑀢𑀸𑀦𑀺 𑀓𑀧𑁆𑀧𑀲𑁆𑀲, 𑀦𑀸𑀭𑀤 𑀭𑀫𑀬𑀦𑁆𑀢𑀺 𑀫𑀁.

𑁧𑁮𑁩. 𑀲𑀸𑀮𑀻𑀦𑀁 𑀑𑀤𑀦𑀁 𑀪𑀼𑀜𑁆𑀚𑁂, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁;

𑀓𑀣𑀁 𑀲𑀸𑀫𑀸𑀓𑀦𑀻𑀯𑀸𑀭𑀁, 𑀅𑀮𑁄𑀡𑀁 𑀙𑀸𑀤𑀬𑀦𑁆𑀢𑀺 𑀢𑀁.

𑁧𑁮𑁪. 𑀲𑀸𑀤𑀼𑀁 𑀯𑀸 [𑀅𑀲𑀸𑀤𑀼𑀁 (𑀧𑀻.)] 𑀬𑀤𑀺 𑀯𑀸𑀲𑀸𑀤𑀼𑀁, 𑀅𑀧𑁆𑀧𑀁 𑀯𑀸 𑀬𑀤𑀺 𑀯𑀸 𑀩𑀳𑀼𑀁;

𑀯𑀺𑀲𑁆𑀲𑀢𑁆𑀣𑁄 𑀬𑀢𑁆𑀣 𑀪𑀼𑀜𑁆𑀚𑁂𑀬𑁆𑀬, 𑀯𑀺𑀲𑁆𑀲𑀸𑀲𑀧𑀭𑀫𑀸 𑀭𑀲𑀸𑀢𑀺.

𑀓𑁂𑀲𑀯𑀚𑀸𑀢𑀓𑀁 [𑀓𑁂𑀲𑀻𑀚𑀸𑀢𑀓𑀁 (𑀓.)] 𑀙𑀝𑁆𑀞𑀁.

𑁩𑁪𑁭. 𑀅𑀬𑀓𑀽𑀝𑀚𑀸𑀢𑀓𑀁 (𑁪-𑁫-𑁭)

𑁧𑁮𑁫. 𑀲𑀩𑁆𑀩𑀸𑀬𑀲𑀁 𑀓𑀽𑀝𑀫𑀢𑀺𑀧𑁆𑀧𑀫𑀸𑀡𑀁, 𑀧𑀕𑁆𑀕𑀬𑁆𑀳 𑀬𑁄 [𑀲𑁄 (𑀧𑀻.)] 𑀢𑀺𑀝𑁆𑀞𑀲𑀺 𑀅𑀦𑁆𑀢𑀮𑀺𑀓𑁆𑀔𑁂;

𑀭𑀓𑁆𑀔𑀸𑀬 𑀫𑁂 [𑀫𑀁 (𑀲𑀻.)] 𑀢𑁆𑀯𑀁 𑀯𑀺𑀳𑀺𑀢𑁄 𑀦𑀼𑀲𑀚𑁆𑀚, 𑀉𑀤𑀸𑀳𑀼 𑀫𑁂 𑀘𑁂𑀢𑀬𑀲𑁂 [𑀯𑀸𑀬𑀫𑀲𑁂 (𑀲𑀻. 𑀲𑁆𑀬𑀸.)] 𑀯𑀥𑀸𑀬.

𑁧𑁮𑁬. 𑀤𑀽𑀢𑁄 𑀅𑀳𑀁 𑀭𑀸𑀚𑀺𑀥 𑀭𑀓𑁆𑀔𑀲𑀸𑀦𑀁, 𑀯𑀥𑀸𑀬 𑀢𑀼𑀬𑁆𑀳𑀁 𑀧𑀳𑀺𑀢𑁄𑀳𑀫𑀲𑁆𑀫𑀺;

𑀇𑀦𑁆𑀤𑁄 𑀘 𑀢𑀁 𑀭𑀓𑁆𑀔𑀢𑀺 𑀤𑁂𑀯𑀭𑀸𑀚𑀸, 𑀢𑁂𑀦𑀼𑀢𑁆𑀢𑀫𑀗𑁆𑀕𑀁 𑀦 𑀢𑁂 [𑀦 𑀳𑀺 (𑀓. 𑀲𑀻. 𑀧𑀻.), 𑀢𑁂 𑀦 (𑀓.)] 𑀨𑀸𑀮𑀬𑀸𑀫𑀺.

𑁧𑁮𑁭. 𑀲𑀘𑁂 𑀘 𑀫𑀁 𑀭𑀓𑁆𑀔𑀢𑀺 𑀤𑁂𑀯𑀭𑀸𑀚𑀸, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀖𑀯𑀸 𑀲𑀼𑀚𑀫𑁆𑀧𑀢𑀺;

𑀓𑀸𑀫𑀁 𑀧𑀺𑀲𑀸𑀘𑀸 𑀯𑀺𑀦𑀤𑀦𑁆𑀢𑀼 𑀲𑀩𑁆𑀩𑁂, 𑀦 𑀲𑀦𑁆𑀢𑀲𑁂 𑀭𑀓𑁆𑀔𑀲𑀺𑀬𑀸 𑀧𑀚𑀸𑀬.

𑁧𑁮𑁮. 𑀓𑀸𑀫𑀁 𑀓𑀦𑁆𑀤𑀦𑁆𑀢𑀼 [𑀓𑀦𑁆𑀢𑀦𑁆𑀢𑀼 (𑀓.), 𑀓𑀡𑁆𑀟𑀦𑁆𑀢𑀼 (𑀲𑁆𑀬𑀸.)] 𑀓𑀼𑀫𑁆𑀪𑀡𑁆𑀟𑀸, 𑀲𑀩𑁆𑀩𑁂 𑀧𑀁𑀲𑀼𑀧𑀺𑀲𑀸𑀘𑀓𑀸;

𑀦𑀸𑀮𑀁 𑀧𑀺𑀲𑀸𑀘𑀸 𑀬𑀼𑀤𑁆𑀥𑀸𑀬, 𑀫𑀳𑀢𑀻 𑀲𑀸 𑀯𑀺𑀪𑀺𑀁𑀲𑀺𑀓𑀸𑀢𑀺 [𑀯𑀺𑀪𑁂𑀲𑀺𑀓𑀸𑀢𑀺 (𑀲𑁆𑀬𑀸.), 𑀯𑀺𑀳𑁂𑀲𑀺𑀓𑀸𑀢𑀺 (𑀧𑀻.)].

𑀅𑀬𑀓𑀽𑀝𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁩𑁪𑁮. 𑀅𑀭𑀜𑁆𑀜𑀚𑀸𑀢𑀓𑀁 (𑁪-𑁫-𑁮)

𑁧𑁮𑁯. 𑀅𑀭𑀜𑁆𑀜𑀸 𑀕𑀸𑀫𑀫𑀸𑀕𑀫𑁆𑀫, 𑀓𑀺𑀁𑀲𑀻𑀮𑀁 𑀓𑀺𑀁𑀯𑀢𑀁 𑀅𑀳𑀁;

𑀧𑀼𑀭𑀺𑀲𑀁 𑀢𑀸𑀢 𑀲𑁂𑀯𑁂𑀬𑁆𑀬𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁧𑁯𑁦. 𑀬𑁄 𑀢𑀁 𑀯𑀺𑀲𑁆𑀲𑀸𑀲𑀬𑁂 𑀢𑀸𑀢, 𑀯𑀺𑀲𑁆𑀲𑀸𑀲𑀜𑁆𑀘 𑀔𑀫𑁂𑀬𑁆𑀬 𑀢𑁂;

𑀲𑀼𑀲𑁆𑀲𑀽𑀲𑀻 𑀘 𑀢𑀺𑀢𑀺𑀓𑁆𑀔𑀻 𑀘, 𑀢𑀁 𑀪𑀚𑁂𑀳𑀺 𑀇𑀢𑁄 [𑀢𑀁 𑀪𑀚𑁂𑀬𑁆𑀬𑀸𑀲𑀺𑀢𑁄 (𑀓.)] 𑀕𑀢𑁄.

𑁧𑁯𑁧. 𑀬𑀲𑁆𑀲 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀦𑀢𑁆𑀣𑀺 𑀤𑀼𑀓𑁆𑀓𑀝𑀁;

𑀉𑀭𑀲𑀻𑀯 𑀧𑀢𑀺𑀝𑁆𑀞𑀸𑀬, 𑀢𑀁 𑀪𑀚𑁂𑀳𑀺 𑀇𑀢𑁄 𑀕𑀢𑁄.

𑁧𑁯𑁨. 𑀳𑀮𑀺𑀤𑁆𑀤𑀺𑀭𑀸𑀕𑀁 𑀓𑀧𑀺𑀘𑀺𑀢𑁆𑀢𑀁, 𑀧𑀼𑀭𑀺𑀲𑀁 𑀭𑀸𑀕𑀯𑀺𑀭𑀸𑀕𑀺𑀦𑀁;

𑀢𑀸𑀤𑀺𑀲𑀁 𑀢𑀸𑀢 𑀫𑀸 𑀲𑁂𑀯𑀺, 𑀦𑀺𑀫𑁆𑀫𑀦𑀼𑀲𑁆𑀲𑀫𑁆𑀧𑀺 𑀘𑁂 𑀲𑀺𑀬𑀸𑀢𑀺.

𑀅𑀭𑀜𑁆𑀜𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁩𑁪𑁯. 𑀲𑀦𑁆𑀥𑀺𑀪𑁂𑀤𑀚𑀸𑀢𑀓𑀁 (𑁪-𑁫-𑁯)

𑁧𑁯𑁩. 𑀦𑁂𑀯 𑀇𑀢𑁆𑀣𑀻𑀲𑀼 𑀲𑀸𑀫𑀜𑁆𑀜𑀁, 𑀦𑀸𑀧𑀺 𑀪𑀓𑁆𑀔𑁂𑀲𑀼 𑀲𑀸𑀭𑀣𑀺;

𑀅𑀣𑀲𑁆𑀲 𑀲𑀦𑁆𑀥𑀺𑀪𑁂𑀤𑀲𑁆𑀲, 𑀧𑀲𑁆𑀲 𑀬𑀸𑀯 𑀲𑀼𑀘𑀺𑀦𑁆𑀢𑀺𑀢𑀁.

𑁧𑁯𑁪. 𑀅𑀲𑀺 𑀢𑀺𑀓𑁆𑀔𑁄𑀯 𑀫𑀁𑀲𑀫𑁆𑀳𑀺, 𑀧𑁂𑀲𑀼𑀜𑁆𑀜𑀁 𑀧𑀭𑀺𑀯𑀢𑁆𑀢𑀢𑀺;

𑀬𑀢𑁆𑀣𑀽𑀲𑀪𑀜𑁆𑀘 𑀲𑀻𑀳𑀜𑁆𑀘, 𑀪𑀓𑁆𑀔𑀬𑀦𑁆𑀢𑀺 𑀫𑀺𑀕𑀸𑀥𑀫𑀸.

𑁧𑁯𑁫. 𑀇𑀫𑀁 𑀲𑁄 𑀲𑀬𑀦𑀁 𑀲𑁂𑀢𑀺, 𑀬𑀫𑀺𑀫𑀁 [𑀬𑀬𑀺𑀫𑀁 (𑀲𑀻. 𑀧𑀻.), 𑀬𑀺𑀫𑀁 (𑀓.)] 𑀧𑀲𑁆𑀲𑀲𑀺 𑀲𑀸𑀭𑀣𑀺;

𑀬𑁄 𑀯𑀸𑀘𑀁 𑀲𑀦𑁆𑀥𑀺𑀪𑁂𑀤𑀲𑁆𑀲, 𑀧𑀺𑀲𑀼𑀡𑀲𑁆𑀲 𑀦𑀺𑀩𑁄𑀥𑀢𑀺.

𑁧𑁯𑁬. 𑀢𑁂 𑀚𑀦𑀸 𑀲𑀼𑀔𑀫𑁂𑀥𑀦𑁆𑀢𑀺, 𑀦𑀭𑀸 𑀲𑀕𑁆𑀕𑀕𑀢𑀸𑀭𑀺𑀯;

𑀬𑁂 𑀯𑀸𑀘𑀁 𑀲𑀦𑁆𑀥𑀺𑀪𑁂𑀤𑀲𑁆𑀲, 𑀦𑀸𑀯𑀩𑁄𑀥𑀦𑁆𑀢𑀺 𑀲𑀸𑀭𑀣𑀻𑀢𑀺.

𑀲𑀦𑁆𑀥𑀺𑀪𑁂𑀤𑀚𑀸𑀢𑀓𑀁 𑀦𑀯𑀫𑀁.

𑁩𑁫𑁦. 𑀤𑁂𑀯𑀢𑀸𑀧𑀜𑁆𑀳𑀚𑀸𑀢𑀓𑀁 (𑁪-𑁫-𑁧𑁦)

𑁧𑁯𑁭. 𑀳𑀦𑁆𑀢𑀺 𑀳𑀢𑁆𑀣𑁂𑀳𑀺 𑀧𑀸𑀤𑁂𑀳𑀺, 𑀫𑀼𑀔𑀜𑁆𑀘 𑀧𑀭𑀺𑀲𑀼𑀫𑁆𑀪𑀢𑀺;

𑀲 𑀯𑁂 𑀭𑀸𑀚 𑀧𑀺𑀬𑁄 𑀳𑁄𑀢𑀺, 𑀓𑀁 𑀢𑁂𑀦 𑀢𑁆𑀯𑀸𑀪𑀺𑀧𑀲𑁆𑀲𑀲𑀺 [𑀫𑀪𑀺𑀧𑀲𑁆𑀲𑀲𑀺 (𑀲𑀻.)].

𑁧𑁯𑁮. 𑀅𑀓𑁆𑀓𑁄𑀲𑀢𑀺 𑀬𑀣𑀸𑀓𑀸𑀫𑀁, 𑀆𑀕𑀫𑀜𑁆𑀘𑀲𑁆𑀲 𑀇𑀘𑁆𑀙𑀢𑀺;

𑀲 𑀯𑁂 𑀭𑀸𑀚 𑀧𑀺𑀬𑁄 𑀳𑁄𑀢𑀺, 𑀓𑀁 𑀢𑁂𑀦 𑀢𑁆𑀯𑀸𑀪𑀺𑀧𑀲𑁆𑀲𑀲𑀺.

𑁧𑁯𑁯. 𑀅𑀩𑁆𑀪𑀓𑁆𑀔𑀸𑀢𑀺 𑀅𑀪𑀽𑀢𑁂𑀦, 𑀅𑀮𑀺𑀓𑁂𑀦𑀸𑀪𑀺𑀲𑀸𑀭𑀬𑁂;

𑀲 𑀯𑁂 𑀭𑀸𑀚 𑀧𑀺𑀬𑁄 𑀳𑁄𑀢𑀺, 𑀓𑀁 𑀢𑁂𑀦 𑀢𑁆𑀯𑀸𑀪𑀺𑀧𑀲𑁆𑀲𑀲𑀺.

𑁨𑁦𑁦. 𑀳𑀭𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀅𑀜𑁆𑀜𑀤𑀢𑁆𑀣𑀼𑀳𑀭𑀸 𑀲𑀦𑁆𑀢𑀸, 𑀢𑁂 𑀯𑁂 𑀭𑀸𑀚 𑀧𑀺𑀬𑀸 𑀳𑁄𑀦𑁆𑀢𑀺;

𑀓𑀁 𑀢𑁂𑀦 𑀢𑁆𑀯𑀸𑀪𑀺𑀧𑀲𑁆𑀲𑀲𑀻𑀢𑀺.

𑀤𑁂𑀯𑀢𑀸𑀧𑀜𑁆𑀳𑀚𑀸𑀢𑀓𑀁 𑀤𑀲𑀫𑀁.

𑀘𑀽𑀴𑀓𑀼𑀡𑀸𑀮𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀦𑀭𑀸𑀦𑀁 𑀅𑀲𑀓𑁆𑀔𑀺𑀯𑀲𑀺𑀫𑁆𑀳𑀯𑀭𑁄, 𑀦𑀻𑀮𑀺𑀬𑀫𑀕𑁆𑀕𑀺𑀯𑀭𑀜𑁆𑀘 𑀧𑀼𑀦;

𑀧𑀼𑀦 𑀭𑀲𑀸𑀬𑀲𑀓𑀽𑀝𑀯𑀭𑁄, 𑀢𑀣𑀸𑀭𑀜𑁆𑀜 𑀲𑀸𑀭𑀣𑀺 𑀳𑀦𑁆𑀢𑀺 𑀤𑀲𑀸𑀢𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀓𑀸𑀮𑀺𑀗𑁆𑀕𑀁 [𑀯𑀺𑀯𑀭𑀁 (𑀩𑀳𑀽𑀲𑀼)] 𑀧𑀼𑀘𑀺𑀫𑀦𑁆𑀤𑀜𑁆𑀘, 𑀓𑀼𑀝𑀺𑀤𑀽𑀲𑀓 𑀓𑁄𑀓𑀺𑀮𑀸 [𑀓𑀼𑀝𑀺𑀤𑀽𑀲𑀁 𑀩𑀳𑀼𑀪𑀸𑀡𑀓𑀁 (𑀩𑀳𑀽𑀲𑀼)];

𑀘𑀽𑀴𑀓𑀼𑀡𑀸𑀮𑀯𑀕𑁆𑀕𑁄 𑀲𑁄, 𑀧𑀜𑁆𑀘𑀫𑁄 𑀲𑀼𑀧𑁆𑀧𑀓𑀸𑀲𑀺𑀢𑁄𑀢𑀺.

𑀘𑀢𑀼𑀓𑁆𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.