𑁫𑁪𑁬. 𑀯𑀺𑀥𑀼𑀭𑀚𑀸𑀢𑀓𑀁 (𑁯)

𑀤𑁄𑀳𑀴𑀓𑀡𑁆𑀟𑀁

𑁧𑁩𑁪𑁬. ‘‘𑀧𑀡𑁆𑀟𑀼 𑀓𑀺𑀲𑀺𑀬𑀸𑀲𑀺 𑀤𑀼𑀩𑁆𑀩𑀮𑀸, 𑀯𑀡𑁆𑀡𑀭𑀽𑀧𑀁 [𑀯𑀡𑁆𑀡𑀭𑀽𑀧𑁂 (𑀓.)] 𑀦𑀢𑀯𑁂𑀤𑀺𑀲𑀁 𑀧𑀼𑀭𑁂;

𑀯𑀺𑀫𑀮𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸, 𑀓𑀻𑀤𑀺𑀲𑀻 𑀢𑀼𑀬𑁆𑀳𑀁 𑀲𑀭𑀻𑀭𑀯𑁂𑀤𑀦𑀸’’.

𑁧𑁩𑁪𑁭. ‘‘𑀥𑀫𑁆𑀫𑁄 𑀫𑀦𑀼𑀚𑁂𑀲𑀼 𑀫𑀸𑀢𑀻𑀦𑀁 [𑀫𑀸𑀢𑀺𑀦𑀁 (𑀲𑀻. 𑀧𑀻.)], 𑀤𑁄𑀳𑀴𑁄 𑀦𑀸𑀫 𑀚𑀦𑀺𑀦𑁆𑀤 𑀯𑀼𑀘𑁆𑀘𑀢𑀺;

𑀥𑀫𑁆𑀫𑀸𑀳𑀢𑀁 𑀦𑀸𑀕𑀓𑀼𑀜𑁆𑀚𑀭, 𑀯𑀺𑀥𑀼𑀭𑀲𑁆𑀲 𑀳𑀤𑀬𑀸𑀪𑀺𑀧𑀢𑁆𑀣𑀬𑁂’’.

𑁧𑁩𑁪𑁮. ‘‘𑀘𑀦𑁆𑀤𑀁 𑀔𑁄 𑀢𑁆𑀯𑀁 𑀤𑁄𑀳𑀴𑀸𑀬𑀲𑀺, 𑀲𑀽𑀭𑀺𑀬𑀁 𑀯𑀸 𑀅𑀣 𑀯𑀸𑀧𑀺 𑀫𑀸𑀮𑀼𑀢𑀁;

𑀤𑀼𑀮𑁆𑀮𑀪𑀜𑁆𑀳𑀺 [𑀤𑀼𑀮𑁆𑀮𑀪𑁂 (𑀲𑀻. 𑀧𑀻.)] 𑀯𑀺𑀥𑀼𑀭𑀲𑁆𑀲 𑀤𑀲𑁆𑀲𑀦𑀁 [𑀤𑀲𑁆𑀲𑀦𑁂 (𑀲𑀻. 𑀧𑀻.)], 𑀓𑁄 𑀯𑀺𑀥𑀼𑀭𑀫𑀺𑀥 𑀫𑀸𑀦𑀬𑀺𑀲𑁆𑀲𑀢𑀺’’.

𑁧𑁩𑁪𑁯. ‘‘𑀓𑀺𑀦𑁆𑀦𑀼 𑀢𑀸𑀢 𑀢𑀼𑀯𑀁 𑀧𑀚𑁆𑀛𑀸𑀬𑀲𑀺, 𑀧𑀤𑀼𑀫𑀁 𑀳𑀢𑁆𑀣𑀕𑀢𑀁𑀯 𑀢𑁂 𑀫𑀼𑀔𑀁;

𑀓𑀺𑀦𑁆𑀦𑀼 𑀤𑀼𑀫𑁆𑀫𑀦𑀭𑀽𑀧𑁄𑀲𑀺 𑀇𑀲𑁆𑀲𑀭, 𑀫𑀸 𑀢𑁆𑀯𑀁 𑀲𑁄𑀘𑀺 𑀅𑀫𑀺𑀢𑁆𑀢𑀢𑀸𑀧𑀦’’.

𑁧𑁩𑁫𑁦. ‘‘𑀫𑀸𑀢𑀸 𑀳𑀺 𑀢𑀯 𑀇𑀭𑀦𑁆𑀥𑀢𑀺 [𑀇𑀭𑀦𑁆𑀤𑀢𑀺 (𑀲𑀻. 𑀲𑁆𑀬𑀸. 𑀧𑀻.)], 𑀯𑀺𑀥𑀼𑀭𑀲𑁆𑀲 𑀳𑀤𑀬𑀁 𑀥𑀦𑀺𑀬𑀢𑀺;

𑀤𑀼𑀮𑁆𑀮𑀪𑀜𑁆𑀳𑀺 𑀯𑀺𑀥𑀼𑀭𑀲𑁆𑀲 𑀤𑀲𑁆𑀲𑀦𑀁, 𑀓𑁄 𑀯𑀺𑀥𑀼𑀭𑀫𑀺𑀥 𑀫𑀸𑀦𑀬𑀺𑀲𑁆𑀲𑀢𑀺’’.

𑁧𑁩𑁫𑁧. ‘‘𑀢𑀲𑁆𑀲 𑀪𑀢𑁆𑀢𑀼𑀧𑀭𑀺𑀬𑁂𑀲𑀦𑀁 [𑀪𑀢𑁆𑀢𑀼𑀧𑀭𑀺𑀬𑁂𑀲𑀦𑀁 (𑀲𑀻. 𑀧𑀻.)] 𑀘𑀭, 𑀬𑁄 𑀯𑀺𑀥𑀼𑀭𑀫𑀺𑀥 𑀫𑀸𑀦𑀬𑀺𑀲𑁆𑀲𑀢𑀺’’;

‘‘𑀧𑀺𑀢𑀼𑀦𑁄 𑀘 𑀲𑀸 𑀲𑀼𑀢𑁆𑀯𑀸𑀦 𑀯𑀸𑀓𑁆𑀬𑀁, 𑀭𑀢𑁆𑀢𑀺𑀁 𑀦𑀺𑀓𑁆𑀔𑀫𑁆𑀫 𑀅𑀯𑀲𑁆𑀲𑀼𑀢𑀺𑀁 𑀘𑀭𑀺’’.

𑁧𑁩𑁫𑁨. ‘‘𑀓𑁂 𑀕𑀦𑁆𑀥𑀩𑁆𑀩𑁂 𑀭𑀓𑁆𑀔𑀲𑁂 𑀘 𑀦𑀸𑀕𑁂, 𑀓𑁂 𑀓𑀺𑀫𑁆𑀧𑀼𑀭𑀺𑀲𑁂 𑀘𑀸𑀧𑀺 𑀫𑀸𑀦𑀼𑀲𑁂;

𑀓𑁂 𑀧𑀡𑁆𑀟𑀺𑀢𑁂 𑀲𑀩𑁆𑀩𑀓𑀸𑀫𑀤𑀤𑁂 [𑀲𑀩𑁆𑀩𑀓𑀸𑀫𑀤𑁂 (𑀲𑀻. 𑀧𑀻.)], 𑀤𑀻𑀖𑀭𑀢𑁆𑀢𑀁 𑀪𑀢𑁆𑀢𑀸 𑀫𑁂 𑀪𑀯𑀺𑀲𑁆𑀲𑀢𑀺’’.

𑁧𑁩𑁫𑁩. ‘‘𑀅𑀲𑁆𑀲𑀸𑀲 𑀳𑁂𑀲𑁆𑀲𑀸𑀫𑀺 𑀢𑁂 𑀧𑀢𑀺, 𑀪𑀢𑁆𑀢𑀸 𑀢𑁂 𑀳𑁂𑀲𑁆𑀲𑀸𑀫𑀺 𑀅𑀦𑀺𑀦𑁆𑀤𑀮𑁄𑀘𑀦𑁂;

𑀧𑀜𑁆𑀜𑀸 𑀳𑀺 𑀫𑀫𑀁 𑀢𑀣𑀸𑀯𑀺𑀥𑀸, 𑀅𑀲𑁆𑀲𑀸𑀲 𑀳𑁂𑀲𑁆𑀲𑀲𑀺 𑀪𑀭𑀺𑀬𑀸 𑀫𑀫.

𑁧𑁩𑁫𑁪. ‘‘𑀅𑀯𑀘𑀸𑀲𑀺 𑀧𑀼𑀡𑁆𑀡𑀓𑀁 𑀇𑀭𑀦𑁆𑀥𑀢𑀻 [𑀇𑀭𑀦𑁆𑀤𑀢𑀻 (𑀲𑀻. 𑀧𑀻.)], 𑀧𑀼𑀩𑁆𑀩𑀧𑀣𑀸𑀦𑀼𑀕𑀢𑁂𑀦 𑀘𑁂𑀢𑀲𑀸;

𑀏𑀳𑀺 𑀕𑀘𑁆𑀙𑀸𑀫 𑀧𑀺𑀢𑀼 𑀫𑀫𑀦𑁆𑀢𑀺𑀓𑁂 [𑀧𑀺𑀢𑀼 𑀫𑀫 𑀲𑀦𑁆𑀢𑀺𑀓𑀁 (𑀓.)], 𑀏𑀲𑁄𑀯 𑀢𑁂 𑀏𑀢𑀫𑀢𑁆𑀣𑀁 𑀧𑀯𑀓𑁆𑀔𑀢𑀺.

𑁧𑁩𑁫𑁫. ‘‘𑀅𑀮𑀗𑁆𑀓𑀢𑀸 𑀲𑀼𑀯𑀲𑀦𑀸, 𑀫𑀸𑀮𑀺𑀦𑀻 𑀘𑀦𑁆𑀤𑀦𑀼𑀲𑁆𑀲𑀤𑀸;

𑀬𑀓𑁆𑀔𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸𑀦, 𑀧𑀺𑀢𑀼𑀲𑀦𑁆𑀢𑀺𑀓𑀼𑀧𑀸𑀕𑀫𑀺’’.

𑁧𑁩𑁫𑁬. ‘‘𑀦𑀸𑀕𑀯𑀭 𑀯𑀘𑁄 𑀲𑀼𑀡𑁄𑀳𑀺 𑀫𑁂, 𑀧𑀢𑀺𑀭𑀽𑀧𑀁 𑀧𑀝𑀺𑀧𑀚𑁆𑀚 𑀲𑀼𑀗𑁆𑀓𑀺𑀬𑀁;

𑀧𑀢𑁆𑀣𑁂𑀫𑀺 𑀅𑀳𑀁 𑀇𑀭𑀦𑁆𑀥𑀢𑀺𑀁, 𑀢𑀸𑀬 𑀲𑀫𑀗𑁆𑀕𑀺𑀁 𑀓𑀭𑁄𑀳𑀺 𑀫𑀁 𑀢𑀼𑀯𑀁.

𑁧𑁩𑁫𑁭. ‘‘𑀲𑀢𑀁 𑀳𑀢𑁆𑀣𑀻 𑀲𑀢𑀁 𑀅𑀲𑁆𑀲𑀸, 𑀲𑀢𑀁 𑀅𑀲𑁆𑀲𑀢𑀭𑀻𑀭𑀣𑀸;

𑀲𑀢𑀁 𑀯𑀮𑀪𑀺𑀬𑁄 𑀧𑀼𑀡𑁆𑀡𑀸, 𑀦𑀸𑀦𑀸𑀭𑀢𑁆𑀦𑀲𑁆𑀲 𑀓𑁂𑀯𑀮𑀸;

𑀢𑁂 𑀦𑀸𑀕 𑀧𑀝𑀺𑀧𑀚𑁆𑀚𑀲𑁆𑀲𑀼, 𑀥𑀻𑀢𑀭𑀁 𑀤𑁂𑀳𑀺𑀭𑀦𑁆𑀥𑀢𑀺𑀁’’.

𑁧𑁩𑁫𑁮. ‘‘𑀬𑀸𑀯 𑀆𑀫𑀦𑁆𑀢𑀬𑁂 𑀜𑀸𑀢𑀻, 𑀫𑀺𑀢𑁆𑀢𑁂 𑀘 𑀲𑀼𑀳𑀤𑀚𑁆𑀚𑀦𑁂 [𑀲𑀼𑀳𑀤𑀁𑀚𑀦𑀁 (𑀲𑀻. 𑀧𑀻.)];

𑀅𑀦𑀸𑀫𑀦𑁆𑀢 𑀓𑀢𑀁 𑀓𑀫𑁆𑀫𑀁, 𑀢𑀁 𑀧𑀘𑁆𑀙𑀸 𑀅𑀦𑀼𑀢𑀧𑁆𑀧𑀢𑀺’’.

𑁧𑁩𑁫𑁯. 𑀢𑀢𑁄 𑀲𑁄 𑀯𑀭𑀼𑀡𑁄 𑀦𑀸𑀕𑁄, 𑀧𑀯𑀺𑀲𑀺𑀢𑁆𑀯𑀸 𑀦𑀺𑀯𑁂𑀲𑀦𑀁;

𑀪𑀭𑀺𑀬𑀁 𑀆𑀫𑀦𑁆𑀢𑀬𑀺𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁩𑁬𑁦. ‘‘𑀅𑀬𑀁 𑀲𑁄 𑀧𑀼𑀡𑁆𑀡𑀓𑁄 𑀬𑀓𑁆𑀔𑁄, 𑀬𑀸𑀘𑀢𑀻 𑀫𑀁 𑀇𑀭𑀦𑁆𑀥𑀢𑀺𑀁;

𑀩𑀳𑀼𑀦𑀸 𑀯𑀺𑀢𑁆𑀢𑀮𑀸𑀪𑁂𑀦, 𑀢𑀲𑁆𑀲 𑀤𑁂𑀫 𑀧𑀺𑀬𑀁 𑀫𑀫𑀁’’.

𑁧𑁩𑁬𑁧. ‘‘𑀦 𑀥𑀦𑁂𑀦 𑀦 𑀯𑀺𑀢𑁆𑀢𑁂𑀦, 𑀮𑀩𑁆𑀪𑀸 𑀅𑀫𑁆𑀳𑀁 𑀇𑀭𑀦𑁆𑀥𑀢𑀻;

𑀲𑀘𑁂 𑀘 𑀔𑁄 𑀳𑀤𑀬𑀁 𑀧𑀡𑁆𑀟𑀺𑀢𑀲𑁆𑀲, 𑀥𑀫𑁆𑀫𑁂𑀦 𑀮𑀤𑁆𑀥𑀸 𑀇𑀥 𑀫𑀸𑀳𑀭𑁂𑀬𑁆𑀬;

𑀏𑀢𑁂𑀦 𑀯𑀺𑀢𑁆𑀢𑁂𑀦 𑀓𑀼𑀫𑀸𑀭𑀺 𑀮𑀩𑁆𑀪𑀸, 𑀦𑀸𑀜𑁆𑀜𑀁 𑀥𑀦𑀁 𑀉𑀢𑁆𑀢𑀭𑀺 𑀧𑀢𑁆𑀣𑀬𑀸𑀫’’.

𑁧𑁩𑁬𑁨. 𑀢𑀢𑁄 𑀲𑁄 𑀯𑀭𑀼𑀡𑁄 𑀦𑀸𑀕𑁄, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀺𑀯𑁂𑀲𑀦𑀸;

𑀧𑀼𑀡𑁆𑀡𑀓𑀸𑀫𑀦𑁆𑀢𑀬𑀺𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁩𑁬𑁩. ‘‘𑀦 𑀥𑀦𑁂𑀦 𑀦 𑀯𑀺𑀢𑁆𑀢𑁂𑀦, 𑀮𑀩𑁆𑀪𑀸 𑀅𑀫𑁆𑀳𑀁 𑀇𑀭𑀦𑁆𑀥𑀢𑀻;

𑀲𑀘𑁂 𑀢𑀼𑀯𑀁 𑀳𑀤𑀬𑀁 𑀧𑀡𑁆𑀟𑀺𑀢𑀲𑁆𑀲, 𑀥𑀫𑁆𑀫𑁂𑀦 𑀮𑀤𑁆𑀥𑀸 𑀇𑀥 𑀫𑀸𑀳𑀭𑁂𑀲𑀺;

𑀏𑀢𑁂𑀦 𑀯𑀺𑀢𑁆𑀢𑁂𑀦 𑀓𑀼𑀫𑀸𑀭𑀺 𑀮𑀩𑁆𑀪𑀸, 𑀦𑀸𑀜𑁆𑀜𑀁 𑀥𑀦𑀁 𑀉𑀢𑁆𑀢𑀭𑀺 𑀧𑀢𑁆𑀣𑀬𑀸𑀫’’.

𑁧𑁩𑁬𑁪. ‘‘𑀬𑀁 𑀧𑀡𑁆𑀟𑀺𑀢𑁄𑀢𑁆𑀬𑁂𑀓𑁂 𑀯𑀤𑀦𑁆𑀢𑀺 𑀮𑁄𑀓𑁂, 𑀢𑀫𑁂𑀯 𑀩𑀸𑀮𑁄𑀢𑀺 𑀧𑀼𑀦𑀸𑀳𑀼 𑀅𑀜𑁆𑀜𑁂;

𑀅𑀓𑁆𑀔𑀸𑀳𑀺 𑀫𑁂 𑀯𑀺𑀧𑁆𑀧𑀯𑀤𑀦𑁆𑀢𑀺 𑀏𑀢𑁆𑀣, 𑀓𑀁 𑀧𑀡𑁆𑀟𑀺𑀢𑀁 𑀦𑀸𑀕 𑀢𑀼𑀯𑀁 𑀯𑀤𑁂𑀲𑀺’’.

𑁧𑁩𑁬𑁫. ‘‘𑀓𑁄𑀭𑀩𑁆𑀬𑀭𑀸𑀚𑀲𑁆𑀲 𑀥𑀦𑀜𑁆𑀘𑀬𑀲𑁆𑀲 [𑀥𑀦𑀜𑁆𑀚𑀬𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)], 𑀬𑀤𑀺 𑀢𑁂 𑀲𑀼𑀢𑁄 𑀯𑀺𑀥𑀼𑀭𑁄 𑀦𑀸𑀫 𑀓𑀢𑁆𑀢𑀸;

𑀆𑀦𑁂𑀳𑀺 𑀢𑀁 𑀧𑀡𑁆𑀟𑀺𑀢𑀁 𑀥𑀫𑁆𑀫𑀮𑀤𑁆𑀥𑀸, 𑀇𑀭𑀦𑁆𑀥𑀢𑀻 𑀧𑀤𑀘𑀭𑀸 [𑀧𑀤𑁆𑀥𑀘𑀭𑀸 (𑀲𑀻. 𑀧𑀻.), 𑀧𑀝𑁆𑀞𑀘𑀭𑀸 (𑀲𑁆𑀬𑀸. 𑀓.)] 𑀢𑁂 𑀳𑁄𑀢𑀼.

𑁧𑁩𑁬𑁬. ‘‘𑀇𑀤𑀜𑁆𑀘 𑀲𑀼𑀢𑁆𑀯𑀸 𑀯𑀭𑀼𑀡𑀲𑁆𑀲 𑀯𑀸𑀓𑁆𑀬𑀁, 𑀉𑀝𑁆𑀞𑀸𑀬 𑀬𑀓𑁆𑀔𑁄 𑀧𑀭𑀫𑀧𑁆𑀧𑀢𑀻𑀢𑁄;

𑀢𑀢𑁆𑀣𑁂𑀯 𑀲𑀦𑁆𑀢𑁄 𑀧𑀼𑀭𑀺𑀲𑀁 𑀅𑀲𑀁𑀲𑀺, 𑀆𑀦𑁂𑀳𑀺 𑀆𑀚𑀜𑁆𑀜𑀫𑀺𑀥𑁂𑀯 𑀬𑀼𑀢𑁆𑀢𑀁.

𑁧𑁩𑁬𑁭. ‘‘𑀚𑀸𑀢𑀭𑀽𑀧𑀫𑀬𑀸 𑀓𑀡𑁆𑀡𑀸, 𑀓𑀸𑀘𑀫𑁆𑀳𑀺𑀘𑀫𑀬𑀸 [𑀓𑀸𑀘𑀫𑁆𑀳𑀫𑀬𑀸 (𑀲𑀻.), 𑀓𑀸𑀘𑀫𑁆𑀪𑀫𑀬𑀸 (𑀧𑀻.)] 𑀔𑀼𑀭𑀸;

𑀚𑀫𑁆𑀩𑁄𑀦𑀤𑀲𑁆𑀲 𑀧𑀸𑀓𑀲𑁆𑀲, 𑀲𑀼𑀯𑀡𑁆𑀡𑀲𑁆𑀲 𑀉𑀭𑀘𑁆𑀙𑀤𑁄’’.

𑁧𑁩𑁬𑁮. ‘‘𑀤𑁂𑀯𑀯𑀸𑀳𑀯𑀳𑀁 𑀬𑀸𑀦𑀁, 𑀅𑀲𑁆𑀲𑀫𑀸𑀭𑀼𑀬𑁆𑀳 𑀧𑀼𑀡𑁆𑀡𑀓𑁄;

𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼, 𑀧𑀓𑁆𑀓𑀸𑀫𑀺 𑀯𑁂𑀳𑀸𑀬𑀲𑀫𑀦𑁆𑀢𑀮𑀺𑀓𑁆𑀔𑁂 [𑀅𑀦𑁆𑀢𑀮𑀺𑀓𑁆𑀔𑀁 (𑀓.)].

𑁧𑁩𑁬𑁯. ‘‘𑀲𑁄 𑀧𑀼𑀡𑁆𑀡𑀓𑁄 𑀓𑀸𑀫𑀭𑀸𑀕𑁂𑀦 [𑀓𑀸𑀫𑀯𑁂𑀕𑁂𑀦 (𑀲𑀻. 𑀧𑀻.)] 𑀕𑀺𑀤𑁆𑀥𑁄, 𑀇𑀭𑀦𑁆𑀥𑀢𑀺𑀁 𑀦𑀸𑀕𑀓𑀜𑁆𑀜𑀁 𑀚𑀺𑀕𑀻𑀲𑀁 [𑀚𑀺𑀕𑀺𑀁𑀲𑀁 (𑀲𑀻. 𑀲𑁆𑀬𑀸. 𑀧𑀻.)];

𑀕𑀦𑁆𑀢𑁆𑀯𑀸𑀦 𑀢𑀁 𑀪𑀽𑀢𑀧𑀢𑀺𑀁 𑀬𑀲𑀲𑁆𑀲𑀺𑀁, 𑀇𑀘𑁆𑀘𑀩𑁆𑀭𑀯𑀻 𑀯𑁂𑀲𑁆𑀲𑀯𑀡𑀁 𑀓𑀼𑀯𑁂𑀭𑀁.

𑁧𑁩𑁭𑁦. ‘‘𑀪𑁄𑀕𑀯𑀢𑀻 𑀦𑀸𑀫 𑀫𑀦𑁆𑀤𑀺𑀭𑁂, 𑀯𑀸𑀲𑀸 𑀳𑀺𑀭𑀜𑁆𑀜𑀯𑀢𑀻𑀢𑀺 𑀯𑀼𑀘𑁆𑀘𑀢𑀺;

𑀦𑀕𑀭𑁂 𑀦𑀺𑀫𑁆𑀫𑀺𑀢𑁂 𑀓𑀜𑁆𑀘𑀦𑀫𑀬𑁂, 𑀫𑀡𑁆𑀟𑀮𑀲𑁆𑀲 𑀉𑀭𑀕𑀲𑁆𑀲 𑀦𑀺𑀝𑁆𑀞𑀺𑀢𑀁.

𑁧𑁩𑁭𑁧. ‘‘𑀅𑀝𑁆𑀝𑀸𑀮𑀓𑀸 𑀑𑀝𑁆𑀞𑀕𑀻𑀯𑀺𑀬𑁄, 𑀮𑁄𑀳𑀺𑀢𑀗𑁆𑀓𑀲𑁆𑀲 𑀫𑀲𑀸𑀭𑀕𑀮𑁆𑀮𑀺𑀦𑁄;

𑀧𑀸𑀲𑀸𑀤𑁂𑀢𑁆𑀣 𑀲𑀺𑀮𑀸𑀫𑀬𑀸, 𑀲𑁄𑀯𑀡𑁆𑀡𑀭𑀢𑀦𑁂𑀳𑀺 𑀙𑀸𑀤𑀺𑀢𑀸.

𑁧𑁩𑁭𑁨. ‘‘𑀅𑀫𑁆𑀩𑀸 𑀢𑀺𑀮𑀓𑀸 𑀘 𑀚𑀫𑁆𑀩𑀼𑀬𑁄, 𑀲𑀢𑁆𑀢𑀧𑀡𑁆𑀡𑀸 𑀫𑀼𑀘𑀮𑀺𑀦𑁆𑀤𑀓𑁂𑀢𑀓𑀸;

𑀧𑀺𑀬𑀗𑁆𑀕𑀼 [𑀧𑀺𑀬𑀓𑀸 (𑀲𑀻. 𑀧𑀻.), 𑀧𑀺𑀬𑀗𑁆𑀕𑀼𑀓𑀸 (𑀲𑁆𑀬𑀸.)] 𑀉𑀤𑁆𑀤𑀸𑀮𑀓𑀸 𑀲𑀳𑀸, 𑀉𑀧𑀭𑀺𑀪𑀤𑁆𑀤𑀓𑀸 𑀲𑀺𑀦𑁆𑀤𑀼𑀯𑀸𑀭𑀓𑀸 [𑀪𑀺𑀦𑁆𑀤𑀼𑀯𑀸𑀭𑀺𑀢𑀸 (𑀲𑁆𑀬𑀸. 𑀧𑀻.), 𑀪𑀺𑀦𑁆𑀥𑀯𑀸𑀭𑀺𑀢𑀸 (𑀓.)].

𑁧𑁩𑁭𑁩. ‘‘𑀘𑀫𑁆𑀧𑁂𑀬𑁆𑀬𑀓𑀸 𑀦𑀸𑀕𑀫𑀮𑁆𑀮𑀺𑀓𑀸, 𑀪𑀕𑀺𑀦𑀻𑀫𑀸𑀮𑀸 𑀅𑀣 𑀫𑁂𑀢𑁆𑀣 𑀓𑁄𑀮𑀺𑀬𑀸;

𑀏𑀢𑁂 𑀤𑀼𑀫𑀸 𑀧𑀭𑀺𑀡𑀸𑀫𑀺𑀢𑀸, 𑀲𑁄𑀪𑀬𑀦𑁆𑀢𑀺 𑀉𑀭𑀕𑀲𑁆𑀲 𑀫𑀦𑁆𑀤𑀺𑀭𑀁 [𑀫𑀦𑁆𑀤𑀺𑀭𑁂 (𑀲𑁆𑀬𑀸. 𑀓.)].

𑁧𑁩𑁭𑁪. ‘‘𑀔𑀚𑁆𑀚𑀼𑀭𑁂𑀢𑁆𑀣 𑀲𑀺𑀮𑀸𑀫𑀬𑀸, 𑀲𑁄𑀯𑀡𑁆𑀡𑀥𑀼𑀯𑀧𑀼𑀧𑁆𑀨𑀺𑀢𑀸 𑀩𑀳𑀽;

𑀬𑀢𑁆𑀣 𑀯𑀲𑀢𑁄 𑀧𑀧𑀸𑀢𑀺𑀓𑁄, 𑀦𑀸𑀕𑀭𑀸𑀚𑀸 𑀯𑀭𑀼𑀡𑁄 𑀫𑀳𑀺𑀤𑁆𑀥𑀺𑀓𑁄.

𑁧𑁩𑁭𑁫. ‘‘𑀢𑀲𑁆𑀲 𑀓𑁄𑀫𑀸𑀭𑀺𑀓𑀸 𑀪𑀭𑀺𑀬𑀸, 𑀯𑀺𑀫𑀮𑀸 𑀓𑀜𑁆𑀘𑀦𑀯𑁂𑀮𑁆𑀮𑀺𑀯𑀺𑀕𑁆𑀕𑀳𑀸;

𑀓𑀸𑀮𑀸 𑀢𑀭𑀼𑀡𑀸𑀯 𑀉𑀕𑁆𑀕𑀢𑀸, 𑀧𑀼𑀘𑀺𑀫𑀦𑁆𑀤𑀢𑁆𑀣𑀦𑀻 𑀘𑀸𑀭𑀼𑀤𑀲𑁆𑀲𑀦𑀸.

𑁧𑁩𑁭𑁬. ‘‘𑀮𑀸𑀔𑀸𑀭𑀲𑀭𑀢𑁆𑀢𑀲𑀼𑀘𑁆𑀙𑀯𑀻, 𑀓𑀡𑀺𑀓𑀸𑀭𑀸𑀯 𑀦𑀺𑀯𑀸𑀢𑀧𑀼𑀧𑁆𑀨𑀺𑀢𑀸 [𑀓𑀡𑀺𑀓𑀸𑀭𑁄𑀯 𑀦𑀺𑀯𑀸𑀢𑀧𑀼𑀧𑁆𑀨𑀺𑀢𑁄 (𑀲𑀻. 𑀧𑀻.)];

𑀢𑀺𑀤𑀺𑀯𑁄𑀓𑀘𑀭𑀸𑀯 𑀅𑀘𑁆𑀙𑀭𑀸, 𑀯𑀺𑀚𑁆𑀚𑀼𑀯𑀩𑁆𑀪𑀖𑀦𑀸 𑀯𑀺𑀦𑀺𑀲𑁆𑀲𑀝𑀸.

𑁧𑁩𑁭𑁭. ‘‘𑀲𑀸 𑀤𑁄𑀳𑀴𑀺𑀦𑀻 𑀲𑀼𑀯𑀺𑀫𑁆𑀳𑀺𑀢𑀸, 𑀯𑀺𑀥𑀼𑀭𑀲𑁆𑀲 𑀳𑀤𑀬𑀁 𑀥𑀦𑀺𑀬𑀢𑀺;

𑀢𑀁 𑀢𑁂𑀲𑀁 𑀤𑁂𑀫𑀺 𑀇𑀲𑁆𑀲𑀭, 𑀢𑁂𑀦 𑀢𑁂 𑀤𑁂𑀦𑁆𑀢𑀺 𑀇𑀭𑀦𑁆𑀥𑀢𑀺𑀁 𑀫𑀫𑀁’’.

𑁧𑁩𑁭𑁮. ‘‘𑀲𑁄 𑀧𑀼𑀡𑁆𑀡𑀓𑁄 𑀪𑀽𑀢𑀧𑀢𑀺𑀁 𑀬𑀲𑀲𑁆𑀲𑀺𑀁, 𑀆𑀫𑀦𑁆𑀢𑀬 𑀯𑁂𑀲𑁆𑀲𑀯𑀡𑀁 𑀓𑀼𑀯𑁂𑀭𑀁;

𑀢𑀢𑁆𑀣𑁂𑀯 𑀲𑀦𑁆𑀢𑁄 [𑀲𑀦𑁆𑀢𑀁 (𑀧𑀻.)] 𑀧𑀼𑀭𑀺𑀲𑀁 𑀅𑀲𑀁𑀲𑀺, 𑀆𑀦𑁂𑀳𑀺 𑀆𑀚𑀜𑁆𑀜𑀫𑀺𑀥𑁂𑀯 𑀬𑀼𑀢𑁆𑀢𑀁.

𑁧𑁩𑁭𑁯. ‘‘𑀚𑀸𑀢𑀭𑀽𑀧𑀫𑀬𑀸 𑀓𑀡𑁆𑀡𑀸, 𑀓𑀸𑀘𑀫𑁆𑀳𑀺𑀘𑀫𑀬𑀸 𑀔𑀼𑀭𑀸;

𑀚𑀫𑁆𑀩𑁄𑀦𑀤𑀲𑁆𑀲 𑀧𑀸𑀓𑀲𑁆𑀲, 𑀲𑀼𑀯𑀡𑁆𑀡𑀲𑁆𑀲 𑀉𑀭𑀘𑁆𑀙𑀤𑁄.

𑁧𑁩𑁮𑁦. ‘‘𑀤𑁂𑀯𑀯𑀸𑀳𑀯𑀳𑀁 𑀬𑀸𑀦𑀁, 𑀅𑀲𑁆𑀲𑀫𑀸𑀭𑀼𑀬𑁆𑀳 𑀧𑀼𑀡𑁆𑀡𑀓𑁄;

𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼, 𑀧𑀓𑁆𑀓𑀸𑀫𑀺 𑀯𑁂𑀳𑀸𑀬𑀲𑀫𑀦𑁆𑀢𑀮𑀺𑀓𑁆𑀔𑁂’’.

𑁧𑁩𑁮𑁧. ‘‘𑀲𑁄 𑀅𑀕𑁆𑀕𑀫𑀸 𑀭𑀸𑀚𑀕𑀳𑀁 𑀲𑀼𑀭𑀫𑁆𑀫𑀁, 𑀅𑀗𑁆𑀕𑀲𑁆𑀲 𑀭𑀜𑁆𑀜𑁄 𑀦𑀕𑀭𑀁 𑀤𑀼𑀭𑀸𑀬𑀼𑀢𑀁 [𑀤𑀼𑀭𑀸𑀲𑀤𑀁 (𑀲𑁆𑀬𑀸.)];

𑀧𑀳𑀽𑀢𑀪𑀓𑁆𑀔𑀁 𑀩𑀳𑀼𑀅𑀦𑁆𑀦𑀧𑀸𑀦𑀁, 𑀫𑀲𑀓𑁆𑀓𑀲𑀸𑀭𑀁 𑀯𑀺𑀬 𑀯𑀸𑀲𑀯𑀲𑁆𑀲.

𑁧𑁩𑁮𑁨. ‘‘𑀫𑀬𑀽𑀭𑀓𑁄𑀜𑁆𑀘𑀸𑀕𑀡𑀲𑀫𑁆𑀧𑀖𑀼𑀝𑁆𑀞𑀁, 𑀤𑀺𑀚𑀸𑀪𑀺𑀖𑀼𑀝𑁆𑀞𑀁 𑀤𑀺𑀚𑀲𑀗𑁆𑀖𑀲𑁂𑀯𑀺𑀢𑀁;

𑀦𑀸𑀦𑀸𑀲𑀓𑀼𑀦𑁆𑀢𑀸𑀪𑀺𑀭𑀼𑀤𑀁 𑀲𑀼𑀯𑀗𑁆𑀕𑀡𑀁 [𑀲𑀼𑀪𑀗𑁆𑀕𑀡𑀁 (𑀲𑀻. 𑀧𑀻.)], 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀁 𑀳𑀺𑀫𑀯𑀁𑀯 𑀧𑀩𑁆𑀩𑀢𑀁.

𑁧𑁩𑁮𑁩. ‘‘𑀲𑁄 𑀧𑀼𑀡𑁆𑀡𑀓𑁄 𑀯𑁂𑀧𑀼𑀮𑀫𑀸𑀪𑀺𑀭𑀽𑀳𑀺 [𑀯𑁂𑀧𑀼𑀮𑁆𑀮𑀫𑀸𑀪𑀺𑀭𑀼𑀘𑁆𑀙𑀺 (𑀲𑀻. 𑀧𑀻.)], 𑀲𑀺𑀮𑀼𑀘𑁆𑀘𑀬𑀁 𑀓𑀺𑀫𑁆𑀧𑀼𑀭𑀺𑀲𑀸𑀦𑀼𑀘𑀺𑀡𑁆𑀡𑀁;

𑀅𑀦𑁆𑀯𑁂𑀲𑀫𑀸𑀦𑁄 𑀫𑀡𑀺𑀭𑀢𑀦𑀁 𑀉𑀴𑀸𑀭𑀁, 𑀢𑀫𑀤𑁆𑀤𑀲𑀸 𑀧𑀩𑁆𑀩𑀢𑀓𑀽𑀝𑀫𑀚𑁆𑀛𑁂.

𑁧𑁩𑁮𑁪. ‘‘𑀤𑀺𑀲𑁆𑀯𑀸 𑀫𑀡𑀺𑀁 𑀧𑀪𑀲𑁆𑀲𑀭𑀁 𑀚𑀸𑀢𑀺𑀫𑀦𑁆𑀢𑀁 [𑀚𑀸𑀢𑀺𑀯𑀦𑁆𑀢𑀁 (𑀲𑀻. 𑀲𑁆𑀬𑀸.)], 𑀫𑀦𑁄𑀳𑀭𑀁 [𑀥𑀦𑀸𑀳𑀭𑀁 (𑀲𑀻. 𑀧𑀻. 𑀓.)] 𑀫𑀡𑀺𑀭𑀢𑀦𑀁 𑀉𑀴𑀸𑀭𑀁;

𑀤𑀤𑁆𑀤𑀮𑁆𑀮𑀫𑀸𑀦𑀁 𑀬𑀲𑀲𑀸 𑀬𑀲𑀲𑁆𑀲𑀺𑀦𑀁, 𑀑𑀪𑀸𑀲𑀢𑀻 𑀯𑀺𑀚𑁆𑀚𑀼𑀭𑀺𑀯𑀦𑁆𑀢𑀮𑀺𑀓𑁆𑀔𑁂.

𑁧𑁩𑁮𑁫. ‘‘𑀢𑀫𑀕𑁆𑀕𑀳𑀻 𑀯𑁂𑀴𑀼𑀭𑀺𑀬𑀁 𑀫𑀳𑀕𑁆𑀖𑀁, 𑀫𑀦𑁄𑀳𑀭𑀁 𑀦𑀸𑀫 𑀫𑀳𑀸𑀦𑀼𑀪𑀸𑀯𑀁;

𑀆𑀚𑀜𑁆𑀜𑀫𑀸𑀭𑀼𑀬𑁆𑀳 𑀫𑀦𑁄𑀫𑀯𑀡𑁆𑀡𑁄, 𑀧𑀓𑁆𑀓𑀸𑀫𑀺 𑀯𑁂𑀳𑀸𑀬𑀲𑀫𑀦𑁆𑀢𑀮𑀺𑀓𑁆𑀔𑁂.

𑁧𑁩𑁮𑁬. ‘‘𑀲𑁄 𑀅𑀕𑁆𑀕𑀫𑀸 [𑀅𑀕𑀫𑀸 (𑀲𑁆𑀬𑀸. 𑀧𑀻. 𑀓.)] 𑀦𑀕𑀭𑀫𑀺𑀦𑁆𑀤𑀧𑀢𑁆𑀣𑀁, 𑀑𑀭𑀼𑀬𑁆𑀳𑀼𑀧𑀸𑀕𑀘𑁆𑀙𑀺 𑀲𑀪𑀁 𑀓𑀼𑀭𑀽𑀦𑀁;

𑀲𑀫𑀸𑀕𑀢𑁂 𑀏𑀓𑀲𑀢𑀁 𑀲𑀫𑀕𑁆𑀕𑁂, 𑀅𑀯𑁆𑀳𑁂𑀢𑁆𑀣 𑀬𑀓𑁆𑀔𑁄 𑀅𑀯𑀺𑀓𑀫𑁆𑀧𑀫𑀸𑀦𑁄.

𑁧𑁩𑁮𑁭. ‘‘𑀓𑁄 𑀦𑀻𑀥 𑀭𑀜𑁆𑀜𑀁 𑀯𑀭𑀫𑀸𑀪𑀺𑀚𑁂𑀢𑀺, 𑀓𑀫𑀸𑀪𑀺𑀚𑁂𑀬𑁆𑀬𑀸𑀫 𑀯𑀭𑀤𑁆𑀥𑀦𑁂𑀦 [𑀯𑀭𑀁𑀥𑀦𑁂𑀦 (𑀲𑀻. 𑀧𑀻.)];

𑀓𑀫𑀦𑀼𑀢𑁆𑀢𑀭𑀁 𑀭𑀢𑀦𑀯𑀭𑀁 𑀚𑀺𑀦𑀸𑀫, 𑀓𑁄 𑀯𑀸𑀧𑀺 𑀦𑁄 𑀚𑁂𑀢𑀺 𑀯𑀭𑀤𑁆𑀥𑀦𑁂𑀦’’.

𑁧𑁩𑁮𑁮. ‘‘𑀓𑀼𑀳𑀺𑀁 𑀦𑀼 𑀭𑀝𑁆𑀞𑁂 𑀢𑀯 𑀚𑀸𑀢𑀺𑀪𑀽𑀫𑀺, 𑀦 𑀓𑁄𑀭𑀩𑁆𑀬𑀲𑁆𑀲𑁂𑀯 𑀯𑀘𑁄 𑀢𑀯𑁂𑀤𑀁;

𑀅𑀪𑀻𑀢𑁄𑀲𑀺 [𑀅𑀪𑀺𑀪𑁄𑀲𑀺 (𑀲𑀻. 𑀧𑀻.)] 𑀦𑁄 𑀯𑀡𑁆𑀡𑀦𑀺𑀪𑀸𑀬 𑀲𑀩𑁆𑀩𑁂, 𑀅𑀓𑁆𑀔𑀸𑀳𑀺 𑀫𑁂 𑀦𑀸𑀫𑀜𑁆𑀘 𑀩𑀦𑁆𑀥𑀯𑁂 𑀘’’.

𑁧𑁩𑁮𑁯. ‘‘𑀓𑀘𑁆𑀘𑀸𑀬𑀦𑁄 𑀫𑀸𑀡𑀯𑀓𑁄𑀲𑁆𑀫𑀺 𑀭𑀸𑀚, 𑀅𑀦𑀽𑀦𑀦𑀸𑀫𑁄 𑀇𑀢𑀺 𑀫𑀯𑁆𑀳𑀬𑀦𑁆𑀢𑀺;

𑀅𑀗𑁆𑀕𑁂𑀲𑀼 𑀫𑁂 𑀜𑀸𑀢𑀬𑁄 𑀩𑀦𑁆𑀥𑀯𑀸 𑀘, 𑀅𑀓𑁆𑀔𑁂𑀦 𑀤𑁂𑀯𑀲𑁆𑀫𑀺 𑀇𑀥𑀸𑀦𑀼𑀧𑀢𑁆𑀢𑁄’’.

𑁧𑁩𑁯𑁦. ‘‘𑀓𑀺𑀁 𑀫𑀸𑀡𑀯𑀲𑁆𑀲 𑀭𑀢𑀦𑀸𑀦𑀺 𑀅𑀢𑁆𑀣𑀺, 𑀬𑁂 𑀢𑀁 𑀚𑀺𑀦𑀦𑁆𑀢𑁄 𑀳𑀭𑁂 𑀅𑀓𑁆𑀔𑀥𑀼𑀢𑁆𑀢𑁄;

𑀩𑀳𑀽𑀦𑀺 𑀭𑀜𑁆𑀜𑁄 𑀭𑀢𑀦𑀸𑀦𑀺 𑀅𑀢𑁆𑀣𑀺, 𑀢𑁂 𑀢𑁆𑀯𑀁 𑀤𑀮𑀺𑀤𑁆𑀤𑁄 𑀓𑀣𑀫𑀯𑁆𑀳𑀬𑁂𑀲𑀺’’.

𑁧𑁩𑁯𑁧. ‘‘𑀫𑀦𑁄𑀳𑀭𑁄 𑀦𑀸𑀫 𑀫𑀡𑀻 𑀫𑀫𑀸𑀬𑀁, 𑀫𑀦𑁄𑀳𑀭𑀁 𑀫𑀡𑀺𑀭𑀢𑀦𑀁 𑀉𑀴𑀸𑀭𑀁;

𑀇𑀫𑀜𑁆𑀘 𑀆𑀚𑀜𑁆𑀜𑀫𑀫𑀺𑀢𑁆𑀢𑀢𑀸𑀧𑀦𑀁, 𑀏𑀢𑀁 𑀫𑁂 𑀚𑀺𑀦𑀺𑀢𑁆𑀯𑀸 𑀳𑀭𑁂 𑀅𑀓𑁆𑀔𑀥𑀼𑀢𑁆𑀢𑁄’’.

𑁧𑁩𑁯𑁨. ‘‘𑀏𑀓𑁄 𑀫𑀡𑀻 𑀫𑀸𑀡𑀯 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀆𑀚𑀸𑀦𑀺𑀬𑁂𑀓𑁄 𑀧𑀦 𑀓𑀺𑀁 𑀓𑀭𑀺𑀲𑁆𑀲𑀢𑀺;

𑀩𑀳𑀽𑀦𑀺 𑀭𑀜𑁆𑀜𑁄 𑀫𑀡𑀺𑀭𑀢𑀦𑀸𑀦𑀺 𑀅𑀢𑁆𑀣𑀺, 𑀆𑀚𑀸𑀦𑀺𑀬𑀸 𑀯𑀸𑀢𑀚𑀯𑀸 𑀅𑀦𑀧𑁆𑀧𑀓𑀸’’.

𑀤𑁄𑀳𑀴𑀓𑀡𑁆𑀟𑀁 𑀦𑀸𑀫.

𑀫𑀡𑀺𑀓𑀡𑁆𑀟𑀁

𑁧𑁩𑁯𑁩. ‘‘𑀇𑀤𑀜𑁆𑀘 𑀫𑁂 𑀫𑀡𑀺𑀭𑀢𑀦𑀁, 𑀧𑀲𑁆𑀲 𑀢𑁆𑀯𑀁 𑀤𑁆𑀯𑀺𑀧𑀤𑀼𑀢𑁆𑀢𑀫;

𑀇𑀢𑁆𑀣𑀻𑀦𑀁 𑀯𑀺𑀕𑁆𑀕𑀳𑀸 𑀘𑁂𑀢𑁆𑀣, 𑀧𑀼𑀭𑀺𑀲𑀸𑀦𑀜𑁆𑀘 𑀯𑀺𑀕𑁆𑀕𑀳𑀸.

𑁧𑁩𑁯𑁪. ‘‘𑀫𑀺𑀕𑀸𑀦𑀁 𑀯𑀺𑀕𑁆𑀕𑀳𑀸 𑀘𑁂𑀢𑁆𑀣, 𑀲𑀓𑀼𑀡𑀸𑀦𑀜𑁆𑀘 𑀯𑀺𑀕𑁆𑀕𑀳𑀸;

𑀦𑀸𑀕𑀭𑀸𑀚𑀸 𑀲𑀼𑀧𑀡𑁆𑀡𑀸 𑀘 [𑀦𑀸𑀕𑀭𑀸𑀚𑁂 𑀲𑀼𑀧𑀡𑁆𑀡𑁂 𑀘 (𑀲𑀻. 𑀲𑁆𑀬𑀸. 𑀧𑀻.)], 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁩𑁯𑁫. ‘‘𑀳𑀢𑁆𑀣𑀸𑀦𑀻𑀓𑀁 𑀭𑀣𑀸𑀦𑀻𑀓𑀁, 𑀅𑀲𑁆𑀲𑁂 𑀧𑀢𑁆𑀢𑀻 𑀘 𑀯𑀫𑁆𑀫𑀺𑀦𑁂 [𑀥𑀚𑀸𑀦𑀺 𑀘 (𑀧𑀻.)];

𑀘𑀢𑀼𑀭𑀗𑁆𑀕𑀺𑀦𑀺𑀫𑀁 𑀲𑁂𑀦𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁩𑁯𑁬. ‘‘𑀳𑀢𑁆𑀣𑀸𑀭𑁄𑀳𑁂 𑀅𑀦𑀻𑀓𑀝𑁆𑀞𑁂, 𑀭𑀣𑀺𑀓𑁂 𑀧𑀢𑁆𑀢𑀺𑀓𑀸𑀭𑀓𑁂;

𑀩𑀮𑀕𑁆𑀕𑀸𑀦𑀺 𑀯𑀺𑀬𑀽𑀴𑁆𑀳𑀸𑀦𑀺 [𑀯𑀺𑀬𑀽𑀳𑀸𑀦𑀺 (𑀲𑁆𑀬𑀸. 𑀓.)], 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁩𑁯𑁭. ‘‘𑀧𑀼𑀭𑀁 𑀉𑀤𑁆𑀥𑀸𑀧𑀲𑀫𑁆𑀧𑀦𑁆𑀦𑀁 [𑀉𑀤𑁆𑀤𑀸𑀧𑀲𑀫𑁆𑀧𑀦𑁆𑀦𑀁 (𑀲𑀻. 𑀧𑀻.), 𑀅𑀝𑁆𑀝𑀸𑀮𑀲𑀫𑁆𑀧𑀦𑁆𑀦𑀁 (𑀲𑁆𑀬𑀸.)], 𑀩𑀳𑀼𑀧𑀸𑀓𑀸𑀭𑀢𑁄𑀭𑀡𑀁;

𑀲𑀺𑀗𑁆𑀖𑀸𑀝𑀓𑁂𑀲𑀼 𑀪𑀽𑀫𑀺𑀬𑁄, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁩𑁯𑁮. ‘‘𑀏𑀲𑀺𑀓𑀸 𑀧𑀭𑀺𑀔𑀸𑀬𑁄 𑀘, 𑀧𑀮𑀺𑀔𑀁 𑀅𑀕𑁆𑀕𑀴𑀸𑀦𑀺 𑀘;

𑀅𑀝𑁆𑀝𑀸𑀮𑀓𑁂 𑀘 𑀤𑁆𑀯𑀸𑀭𑁂 𑀘, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁩𑁯𑁯. ‘‘𑀧𑀲𑁆𑀲 𑀢𑁄𑀭𑀡𑀫𑀕𑁆𑀕𑁂𑀲𑀼, 𑀦𑀸𑀦𑀸𑀤𑀺𑀚𑀸 𑀕𑀡𑀸 𑀩𑀳𑀽;

𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀘𑀓𑁆𑀓𑀯𑀸𑀓𑀸 𑀘 𑀓𑀼𑀓𑁆𑀓𑀼𑀳𑀸.

𑁧𑁪𑁦𑁦. ‘‘𑀓𑀼𑀡𑀸𑀮𑀓𑀸 𑀩𑀳𑀽 𑀘𑀺𑀢𑁆𑀭𑀸, 𑀲𑀺𑀔𑀡𑁆𑀟𑀻 𑀚𑀻𑀯𑀚𑀻𑀯𑀓𑀸;

𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁧. ‘‘𑀧𑀲𑁆𑀲 𑀦𑀕𑀭𑀁 𑀲𑀼𑀧𑀸𑀓𑀸𑀭𑀁, 𑀅𑀩𑁆𑀪𑀼𑀢𑀁 𑀮𑁄𑀫𑀳𑀁𑀲𑀦𑀁;

𑀲𑀫𑀼𑀲𑁆𑀲𑀺𑀢𑀥𑀚𑀁 𑀭𑀫𑁆𑀫𑀁, 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀁.

𑁧𑁪𑁦𑁨. ‘‘𑀧𑀲𑁆𑀲𑁂𑀢𑁆𑀣 [𑀧𑀲𑁆𑀲 𑀢𑁆𑀯𑀁 (𑀲𑀻. 𑀧𑀻.)] 𑀧𑀡𑁆𑀡𑀲𑀸𑀮𑀸𑀬𑁄, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸;

𑀦𑀺𑀯𑁂𑀲𑀦𑁂 𑀦𑀺𑀯𑁂𑀲𑁂 𑀘, 𑀲𑀦𑁆𑀥𑀺𑀩𑁆𑀬𑀽𑀳𑁂 𑀧𑀣𑀤𑁆𑀥𑀺𑀬𑁄.

𑁧𑁪𑁦𑁩. ‘‘𑀧𑀸𑀦𑀸𑀕𑀸𑀭𑁂 𑀘 𑀲𑁄𑀡𑁆𑀟𑁂 𑀘, 𑀲𑀽𑀦𑀸 [𑀲𑀽𑀡𑀸 (𑀲𑀻. 𑀧𑀻.), 𑀲𑀼𑀤𑁆𑀤𑀸 (𑀲𑁆𑀬𑀸. 𑀓.)] 𑀑𑀤𑀦𑀺𑀬𑀸 𑀖𑀭𑀸;

𑀯𑁂𑀲𑀻 𑀘 𑀕𑀡𑀺𑀓𑀸𑀬𑁄 𑀘, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁪. ‘‘𑀫𑀸𑀮𑀸𑀓𑀸𑀭𑁂 𑀘 𑀭𑀚𑀓𑁂, 𑀕𑀦𑁆𑀥𑀺𑀓𑁂 𑀅𑀣 𑀤𑀼𑀲𑁆𑀲𑀺𑀓𑁂;

𑀲𑀼𑀯𑀡𑁆𑀡𑀓𑀸𑀭𑁂 𑀫𑀡𑀺𑀓𑀸𑀭𑁂, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁫. ‘‘𑀆𑀴𑀸𑀭𑀺𑀓𑁂 𑀘 𑀲𑀽𑀤𑁂 𑀘, 𑀦𑀝𑀦𑀸𑀝𑀓𑀕𑀸𑀬𑀺𑀦𑁄;

𑀧𑀸𑀡𑀺𑀲𑁆𑀲𑀭𑁂 𑀓𑀼𑀫𑁆𑀪𑀣𑀽𑀦𑀺𑀓𑁂, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁬. ‘‘𑀧𑀲𑁆𑀲 𑀪𑁂𑀭𑀻 𑀫𑀼𑀤𑀺𑀗𑁆𑀕𑀸 𑀘, 𑀲𑀗𑁆𑀔𑀸 𑀧𑀡𑀯𑀤𑀺𑀦𑁆𑀤𑀺𑀫𑀸;

𑀲𑀩𑁆𑀩𑀜𑁆𑀘 𑀢𑀸𑀴𑀸𑀯𑀘𑀭𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁭. ‘‘𑀲𑀫𑁆𑀫𑀢𑀸𑀮𑀜𑁆𑀘 𑀯𑀻𑀡𑀜𑁆𑀘, 𑀦𑀘𑁆𑀘𑀕𑀻𑀢𑀁 𑀲𑀼𑀯𑀸𑀤𑀺𑀢𑀁;

𑀢𑀽𑀭𑀺𑀬𑀢𑀸𑀴𑀺𑀢𑀲𑀗𑁆𑀖𑀼𑀝𑁆𑀞𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁮. ‘‘𑀮𑀗𑁆𑀖𑀺𑀓𑀸 𑀫𑀼𑀝𑁆𑀞𑀺𑀓𑀸 𑀘𑁂𑀢𑁆𑀣, 𑀫𑀸𑀬𑀸𑀓𑀸𑀭𑀸 𑀘 𑀲𑁄𑀪𑀺𑀬𑀸;

𑀯𑁂𑀢𑀸𑀮𑀺𑀓𑁂 [𑀯𑁂𑀢𑁆𑀢𑀮𑀺𑀓𑁂 (𑀓.)] 𑀘 𑀚𑀮𑁆𑀮𑁂 𑀘, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁦𑁯. ‘‘𑀲𑀫𑀚𑁆𑀚𑀸 𑀘𑁂𑀢𑁆𑀣 𑀯𑀢𑁆𑀢𑀦𑁆𑀢𑀺, 𑀆𑀓𑀺𑀡𑁆𑀡𑀸 𑀦𑀭𑀦𑀸𑀭𑀺𑀪𑀺;

𑀫𑀜𑁆𑀘𑀸𑀢𑀺𑀫𑀜𑁆𑀘𑁂 𑀪𑀽𑀫𑀺𑀬𑁄, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁧𑁦. ‘‘𑀧𑀲𑁆𑀲 𑀫𑀮𑁆𑀮𑁂 𑀲𑀫𑀚𑁆𑀚𑀲𑁆𑀫𑀺𑀁, 𑀨𑁄𑀝𑁂𑀦𑁆𑀢𑁂 [𑀧𑀸𑀞𑁂𑀦𑁆𑀢𑁂 (𑀲𑀻. 𑀲𑁆𑀬𑀸. 𑀧𑀻.)] 𑀤𑀺𑀕𑀼𑀡𑀁 𑀪𑀼𑀚𑀁;

𑀦𑀺𑀳𑀢𑁂 𑀦𑀺𑀳𑀢𑀫𑀸𑀦𑁂 𑀘, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁧𑁧. ‘‘𑀧𑀲𑁆𑀲 𑀧𑀩𑁆𑀩𑀢𑀧𑀸𑀤𑁂𑀲𑀼, 𑀦𑀸𑀦𑀸𑀫𑀺𑀕𑀕𑀡𑀸 𑀩𑀳𑀽;

𑀲𑀻𑀳𑀸 𑀩𑁆𑀬𑀕𑁆𑀖𑀸 𑀯𑀭𑀸𑀳𑀸 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀬𑁄.

𑁧𑁪𑁧𑁨. ‘‘𑀧𑀮𑀸𑀲𑀸𑀤𑀸 𑀕𑀯𑀚𑀸 𑀘, 𑀫𑀳𑀺𑀁𑀲𑀸 𑀭𑁄𑀳𑀺𑀢𑀸 𑀭𑀼𑀭𑀽;

𑀏𑀡𑁂𑀬𑁆𑀬𑀸 𑀘 𑀯𑀭𑀸𑀳𑀸 [𑀲𑀭𑀪𑀸 (𑀲𑁆𑀬𑀸.)] 𑀘, 𑀕𑀡𑀺𑀦𑁄 𑀦𑀻𑀓 [𑀦𑀺𑀗𑁆𑀓 (𑀲𑀻. 𑀲𑁆𑀬𑀸. 𑀧𑀻.)] 𑀲𑀽𑀓𑀭𑀸.

𑁧𑁪𑁧𑁩. ‘‘𑀓𑀤𑀮𑀺𑀫𑀺𑀕𑀸 𑀩𑀳𑀽 𑀘𑀺𑀢𑁆𑀭𑀸, 𑀩𑀺𑀴𑀸𑀭𑀸 𑀲𑀲𑀓𑀡𑁆𑀝𑀓𑀸;

𑀦𑀸𑀦𑀸𑀫𑀺𑀕𑀕𑀡𑀸𑀓𑀺𑀡𑁆𑀡𑀁, 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁧𑁪. ‘‘𑀦𑀚𑁆𑀚𑀸𑀬𑁄 𑀲𑀼𑀧𑀢𑀺𑀢𑁆𑀣𑀸𑀬𑁄, 𑀲𑁄𑀡𑁆𑀡𑀯𑀸𑀮𑀼𑀓𑀲𑀦𑁆𑀣𑀢𑀸;

𑀅𑀘𑁆𑀙𑀸 𑀲𑀯𑀦𑁆𑀢𑀺 𑀅𑀫𑁆𑀩𑀽𑀦𑀺, 𑀫𑀘𑁆𑀙𑀕𑀼𑀫𑁆𑀩𑀦𑀺𑀲𑁂𑀯𑀺𑀢𑀸.

𑁧𑁪𑁧𑁫. ‘‘𑀓𑀼𑀫𑁆𑀪𑀻𑀮𑀸 𑀫𑀓𑀭𑀸 𑀘𑁂𑀢𑁆𑀣, 𑀲𑀼𑀲𑀼𑀫𑀸𑀭𑀸 𑀘 𑀓𑀘𑁆𑀙𑀧𑀸;

𑀧𑀸𑀞𑀻𑀦𑀸 𑀧𑀸𑀯𑀼𑀲𑀸 𑀫𑀘𑁆𑀙𑀸, 𑀩𑀮𑀚𑀸 [𑀯𑀮𑀚𑀸 (𑀲𑀻.), 𑀯𑀸𑀮𑀚𑀸 (𑀧𑀻.)] 𑀫𑀼𑀜𑁆𑀚𑀭𑁄𑀳𑀺𑀢𑀸.

𑁧𑁪𑁧𑁬. ‘‘𑀦𑀸𑀦𑀸𑀤𑀺𑀚𑀕𑀡𑀸𑀓𑀺𑀡𑁆𑀡𑀸, 𑀦𑀸𑀦𑀸𑀤𑀼𑀫𑀕𑀡𑀸𑀬𑀼𑀢𑀸;

𑀯𑁂𑀴𑀼𑀭𑀺𑀬𑀓-𑀭𑁄𑀤𑀸𑀬𑁄 [𑀯𑁂𑀴𑀼𑀭𑀺𑀬𑀨𑀮𑀓𑀭𑁄𑀤𑀸𑀬𑁄 (𑀲𑀻.)], 𑀫𑀡𑀺𑀫𑁆𑀳𑀺 𑀧𑀲𑁆𑀲 𑀦𑀺𑀫𑁆𑀫𑀺𑀢𑀁.

𑁧𑁪𑁧𑁭. ‘‘𑀧𑀲𑁆𑀲𑁂𑀢𑁆𑀣 𑀧𑁄𑀓𑁆𑀔𑀭𑀡𑀺𑀬𑁄, 𑀲𑀼𑀯𑀺𑀪𑀢𑁆𑀢𑀸 𑀘𑀢𑀼𑀤𑁆𑀤𑀺𑀲𑀸;