𑁨𑁨. 𑀫𑀳𑀸𑀦𑀺𑀧𑀸𑀢𑁄

𑁫𑁩𑁮. 𑀫𑀽𑀕𑀧𑀓𑁆𑀔𑀚𑀸𑀢𑀓𑀁 (𑁧)

𑁧. ‘‘𑀫𑀸 𑀧𑀡𑁆𑀟𑀺𑀘𑁆𑀘𑀬𑀁 [𑀧𑀡𑁆𑀟𑀺𑀢𑀺𑀬𑀁 (𑀲𑀻.), 𑀧𑀡𑁆𑀟𑀺𑀘𑁆𑀘𑀺𑀬𑀁 (𑀧𑀻.)] 𑀯𑀺𑀪𑀸𑀯𑀬, 𑀩𑀸𑀮𑀫𑀢𑁄 𑀪𑀯 𑀲𑀩𑁆𑀩𑀧𑀸𑀡𑀺𑀦𑀁;

𑀲𑀩𑁆𑀩𑁄 𑀢𑀁 𑀚𑀦𑁄 𑀑𑀘𑀺𑀦𑀸𑀬𑀢𑀼, 𑀏𑀯𑀁 𑀢𑀯 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀺’’.

𑁨. ‘‘𑀓𑀭𑁄𑀫𑀺 𑀢𑁂 𑀢𑀁 𑀯𑀘𑀦𑀁, 𑀬𑀁 𑀫𑀁 𑀪𑀡𑀲𑀺 𑀤𑁂𑀯𑀢𑁂;

𑀅𑀢𑁆𑀣𑀓𑀸𑀫𑀸𑀲𑀺 𑀫𑁂 𑀅𑀫𑁆𑀫, 𑀳𑀺𑀢𑀓𑀸𑀫𑀸𑀲𑀺 𑀤𑁂𑀯𑀢𑁂’’.

𑁩. ‘‘𑀓𑀺𑀁 𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀓𑀸𑀲𑀼𑀁 𑀔𑀡𑀲𑀺 𑀲𑀸𑀭𑀣𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀓𑀸𑀲𑀼𑀬𑀸 𑀓𑀭𑀺𑀲𑁆𑀲𑀲𑀺’’.

𑁪. ‘‘𑀭𑀜𑁆𑀜𑁄 𑀫𑀽𑀕𑁄 𑀘 𑀧𑀓𑁆𑀔𑁄 𑀘, 𑀧𑀼𑀢𑁆𑀢𑁄 𑀚𑀸𑀢𑁄 𑀅𑀘𑁂𑀢𑀲𑁄;

𑀲𑁄𑀫𑁆𑀳𑀺 𑀭𑀜𑁆𑀜𑀸 𑀲𑀫𑀚𑁆𑀛𑀺𑀝𑁆𑀞𑁄, 𑀧𑀼𑀢𑁆𑀢𑀁 𑀫𑁂 𑀦𑀺𑀔𑀡𑀁 𑀯𑀦𑁂’’.

𑁫. ‘‘𑀦 𑀩𑀥𑀺𑀭𑁄 𑀦 𑀫𑀽𑀕𑁄𑀲𑁆𑀫𑀺, 𑀦 𑀧𑀓𑁆𑀔𑁄 𑀦 𑀘 𑀯𑀻𑀓𑀮𑁄 [𑀦𑀧𑀺 𑀧𑀗𑁆𑀕𑀼𑀮𑁄 (𑀲𑀻. 𑀧𑀻.), 𑀦 𑀘 𑀧𑀺𑀗𑁆𑀕𑀮𑁄 (𑀲𑁆𑀬𑀸.)];

𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸, 𑀫𑀁 𑀘𑁂 𑀢𑁆𑀯𑀁 𑀦𑀺𑀔𑀡𑀁 𑀯𑀦𑁂’’.

𑁬. ‘‘𑀊𑀭𑀽 𑀩𑀸𑀳𑀼𑀁 [𑀩𑀸𑀳𑀽 (𑀲𑀻. 𑀓.)] 𑀘 𑀫𑁂 𑀧𑀲𑁆𑀲, 𑀪𑀸𑀲𑀺𑀢𑀜𑁆𑀘 𑀲𑀼𑀡𑁄𑀳𑀺 𑀫𑁂;

𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸, 𑀫𑀁 𑀘𑁂 𑀢𑁆𑀯𑀁 𑀦𑀺𑀔𑀡𑀁 𑀯𑀦𑁂’’.

𑁭. ‘‘𑀤𑁂𑀯𑀢𑀸 𑀦𑀼𑀲𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 [𑀆𑀤𑀼 (𑀲𑀻.), 𑀆𑀤𑀽 (𑀲𑁆𑀬𑀸.)] 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀁’’.

𑁮. ‘‘𑀦𑀫𑁆𑀳𑀺 𑀤𑁂𑀯𑁄 𑀦 𑀕𑀦𑁆𑀥𑀩𑁆𑀩𑁄, 𑀦𑀸𑀧𑀺 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄;

𑀓𑀸𑀲𑀺𑀭𑀜𑁆𑀜𑁄 𑀅𑀳𑀁 𑀧𑀼𑀢𑁆𑀢𑁄, 𑀬𑀁 𑀓𑀸𑀲𑀼𑀬𑀸 𑀦𑀺𑀔𑀜𑁆𑀜𑀲𑀺 [𑀦𑀺𑀖𑀜𑁆𑀜𑀲𑀺 (𑀲𑀻. 𑀧𑀻.), 𑀦𑀺𑀔𑀜𑁆𑀙𑀲𑀺 (?)].

𑁯. ‘‘𑀢𑀲𑁆𑀲 𑀭𑀜𑁆𑀜𑁄 𑀅𑀳𑀁 𑀧𑀼𑀢𑁆𑀢𑁄, 𑀬𑀁 𑀢𑁆𑀯𑀁 𑀲𑀫𑁆𑀫𑀽𑀧𑀚𑀻𑀯𑀲𑀺 [𑀲𑀫𑀼𑀧𑀚𑀻𑀯𑀲𑀺 (𑀲𑀻. 𑀧𑀻.)];

𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸, 𑀫𑀁 𑀘𑁂 𑀢𑁆𑀯𑀁 𑀦𑀺𑀔𑀡𑀁 𑀯𑀦𑁂.

𑁧𑁦. ‘‘𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀦 𑀢𑀲𑁆𑀲 𑀲𑀸𑀔𑀁 𑀪𑀜𑁆𑀚𑁂𑀬𑁆𑀬, 𑀫𑀺𑀢𑁆𑀢𑀤𑀼𑀩𑁆𑀪𑁄 [𑀫𑀺𑀢𑁆𑀢𑀤𑀽𑀪𑁄 (𑀲𑀻. 𑀧𑀻.)] 𑀳𑀺 𑀧𑀸𑀧𑀓𑁄.

𑁧𑁧. ‘‘𑀬𑀣𑀸 𑀭𑀼𑀓𑁆𑀔𑁄 𑀢𑀣𑀸 𑀭𑀸𑀚𑀸, 𑀬𑀣𑀸 𑀲𑀸𑀔𑀸 𑀢𑀣𑀸 𑀅𑀳𑀁;

𑀬𑀣𑀸 𑀙𑀸𑀬𑀽𑀧𑀕𑁄 𑀧𑁄𑀲𑁄, 𑀏𑀯𑀁 𑀢𑁆𑀯𑀫𑀲𑀺 𑀲𑀸𑀭𑀣𑀺;

𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸, 𑀫𑀁 𑀘𑁂 𑀢𑁆𑀯𑀁 𑀦𑀺𑀔𑀡𑀁 𑀯𑀦𑁂.

𑁧𑁨. ‘‘𑀧𑀳𑀽𑀢𑀪𑀓𑁆𑀔𑁄 [𑀩𑀳𑀼𑀢𑁆𑀢𑀪𑀓𑁆𑀔𑁄 (𑀓.)] 𑀪𑀯𑀢𑀺, 𑀯𑀺𑀧𑁆𑀧𑀯𑀼𑀝𑁆𑀞𑁄 [𑀯𑀺𑀧𑁆𑀧𑀯𑀼𑀢𑁆𑀣𑁄 (𑀲𑀻. 𑀧𑀻.), 𑀯𑀺𑀧𑁆𑀧𑀫𑀼𑀢𑁆𑀢𑁄 (𑀓.)] 𑀲𑀓𑀁 [𑀲𑀓𑀸 (𑀲𑀻. 𑀧𑀻.)] 𑀖𑀭𑀸;

𑀩𑀳𑀽 𑀦𑀁 𑀉𑀧𑀚𑀻𑀯𑀦𑁆𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺.

𑁧𑁩. ‘‘𑀬𑀁 𑀬𑀁 𑀚𑀦𑀧𑀤𑀁 𑀬𑀸𑀢𑀺, 𑀦𑀺𑀕𑀫𑁂 𑀭𑀸𑀚𑀥𑀸𑀦𑀺𑀬𑁄;

𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀳𑁄𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺.

𑁧𑁪. ‘‘𑀦𑀸𑀲𑁆𑀲 𑀘𑁄𑀭𑀸 𑀧𑀲𑀸𑀳𑀦𑁆𑀢𑀺 [𑀧𑀲𑀳𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.)], 𑀦𑀸𑀢𑀺𑀫𑀜𑁆𑀜𑀦𑁆𑀢𑀺 𑀔𑀢𑁆𑀢𑀺𑀬𑀸 [𑀦𑀸𑀢𑀺𑀫𑀜𑁆𑀜𑁂𑀢𑀺 𑀔𑀢𑁆𑀢𑀺𑀬𑁄 (𑀲𑀻. 𑀲𑁆𑀬𑀸. 𑀧𑀻.)];

𑀲𑀩𑁆𑀩𑁂 𑀅𑀫𑀺𑀢𑁆𑀢𑁂 𑀢𑀭𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺.

𑁧𑁫. ‘‘𑀅𑀓𑁆𑀓𑀼𑀤𑁆𑀥𑁄 𑀲𑀖𑀭𑀁 𑀏𑀢𑀺, 𑀲𑀪𑀸𑀬𑀁 [𑀲𑀪𑀸𑀬 (𑀲𑀻. 𑀲𑁆𑀬𑀸. 𑀧𑀻.)] 𑀧𑀝𑀺𑀦𑀦𑁆𑀤𑀺𑀢𑁄;

𑀜𑀸𑀢𑀻𑀦𑀁 𑀉𑀢𑁆𑀢𑀫𑁄 𑀳𑁄𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺.

𑁧𑁬. ‘‘𑀲𑀓𑁆𑀓𑀢𑁆𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺, 𑀕𑀭𑀼 𑀳𑁄𑀢𑀺 𑀲𑀕𑀸𑀭𑀯𑁄 [𑀕𑀭𑀼𑀓𑁄 𑀳𑁄𑀢𑀺 𑀕𑀸𑀭𑀯𑁄 (𑀓.)];

𑀯𑀡𑁆𑀡𑀓𑀺𑀢𑁆𑀢𑀺𑀪𑀢𑁄 𑀳𑁄𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺.

𑁧𑁭. ‘‘𑀧𑀽𑀚𑀓𑁄 𑀮𑀪𑀢𑁂 𑀧𑀽𑀚𑀁, 𑀯𑀦𑁆𑀤𑀓𑁄 𑀧𑀝𑀺𑀯𑀦𑁆𑀤𑀦𑀁;

𑀬𑀲𑁄 𑀓𑀺𑀢𑁆𑀢𑀺𑀜𑁆𑀘 𑀧𑀧𑁆𑀧𑁄𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺.

𑁧𑁮. ‘‘𑀅𑀕𑁆𑀕𑀺 𑀬𑀣𑀸 𑀧𑀚𑁆𑀚𑀮𑀢𑀺, 𑀤𑁂𑀯𑀢𑀸𑀯 𑀯𑀺𑀭𑁄𑀘𑀢𑀺;

𑀲𑀺𑀭𑀺𑀬𑀸 𑀅𑀚𑀳𑀺𑀢𑁄 𑀳𑁄𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺.

𑁧𑁯. ‘‘𑀕𑀸𑀯𑁄 𑀢𑀲𑁆𑀲 𑀧𑀚𑀸𑀬𑀦𑁆𑀢𑀺, 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀯𑀺𑀭𑀽𑀳𑀢𑀺;

𑀯𑀼𑀢𑁆𑀢𑀸𑀦𑀁 𑀨𑀮𑀫𑀲𑁆𑀦𑀸𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺.

𑁨𑁦. ‘‘𑀤𑀭𑀺𑀢𑁄 𑀧𑀩𑁆𑀩𑀢𑀸𑀢𑁄 𑀯𑀸, 𑀭𑀼𑀓𑁆𑀔𑀢𑁄 𑀧𑀢𑀺𑀢𑁄 𑀦𑀭𑁄;

𑀘𑀼𑀢𑁄 𑀧𑀢𑀺𑀝𑁆𑀞𑀁 𑀮𑀪𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺.

𑁨𑁧. ‘‘𑀯𑀺𑀭𑀽𑀴𑁆𑀳𑀫𑀽𑀮𑀲𑀦𑁆𑀢𑀸𑀦𑀁, 𑀦𑀺𑀕𑁆𑀭𑁄𑀥𑀫𑀺𑀯 𑀫𑀸𑀮𑀼𑀢𑁄;

𑀅𑀫𑀺𑀢𑁆𑀢𑀸 𑀦𑀧𑁆𑀧𑀲𑀸𑀳𑀦𑁆𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺’’.

𑁨𑁨. ‘‘𑀏𑀳𑀺 𑀢𑀁 𑀧𑀝𑀺𑀦𑁂𑀲𑁆𑀲𑀸𑀫𑀺, 𑀭𑀸𑀚𑀧𑀼𑀢𑁆𑀢 𑀲𑀓𑀁 𑀖𑀭𑀁;

𑀭𑀚𑁆𑀚𑀁 𑀓𑀸𑀭𑁂𑀳𑀺 𑀪𑀤𑁆𑀤𑀦𑁆𑀢𑁂, 𑀓𑀺𑀁 𑀅𑀭𑀜𑁆𑀜𑁂 𑀓𑀭𑀺𑀲𑁆𑀲𑀲𑀺’’.

𑁨𑁩. ‘‘𑀅𑀮𑀁 𑀫𑁂 𑀢𑁂𑀦 𑀭𑀚𑁆𑀚𑁂𑀦, 𑀜𑀸𑀢𑀓𑁂𑀳𑀺 [𑀜𑀸𑀢𑀓𑁂𑀦 (𑀲𑁆𑀬𑀸. 𑀓.)] 𑀥𑀦𑁂𑀦 𑀯𑀸;

𑀬𑀁 𑀫𑁂 𑀅𑀥𑀫𑁆𑀫𑀘𑀭𑀺𑀬𑀸𑀬, 𑀭𑀚𑁆𑀚𑀁 𑀮𑀩𑁆𑀪𑁂𑀣 𑀲𑀸𑀭𑀣𑀺’’.

𑁨𑁪. ‘‘𑀧𑀼𑀡𑁆𑀡𑀧𑀢𑁆𑀢𑀁 𑀫𑀁 𑀮𑀸𑀪𑁂𑀳𑀺 [𑀧𑀮𑀸𑀪𑁂𑀳𑀺 (𑀲𑀻. 𑀧𑀻.)], 𑀭𑀸𑀚𑀧𑀼𑀢𑁆𑀢 𑀇𑀢𑁄 𑀕𑀢𑁄;

𑀧𑀺𑀢𑀸 𑀫𑀸𑀢𑀸 𑀘 𑀫𑁂 𑀤𑀚𑁆𑀚𑀼𑀁, 𑀭𑀸𑀚𑀧𑀼𑀢𑁆𑀢 𑀢𑀬𑀻 𑀕𑀢𑁂.

𑁨𑁫. ‘‘𑀑𑀭𑁄𑀥𑀸 𑀘 𑀓𑀼𑀫𑀸𑀭𑀸 𑀘, 𑀯𑁂𑀲𑀺𑀬𑀸𑀦𑀸 𑀘 𑀩𑁆𑀭𑀸𑀳𑁆𑀫𑀡𑀸;

𑀢𑁂𑀧𑀺 𑀅𑀢𑁆𑀢𑀫𑀦𑀸 𑀤𑀚𑁆𑀚𑀼𑀁, 𑀭𑀸𑀚𑀧𑀼𑀢𑁆𑀢 𑀢𑀬𑀻 𑀕𑀢𑁂.

𑁨𑁬. ‘‘𑀳𑀢𑁆𑀣𑀸𑀭𑁄𑀳𑀸 [𑀳𑀢𑁆𑀣𑀸𑀭𑀽𑀳𑀸 (𑀲𑀻. 𑀧𑀻.) 𑀏𑀯𑀫𑀼𑀧𑀭𑀺𑀧𑀺] 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸;

𑀢𑁂𑀧𑀺 𑀅𑀢𑁆𑀢𑀫𑀦𑀸 𑀤𑀚𑁆𑀚𑀼𑀁 [𑀢𑁂𑀧𑀺 𑀤𑀚𑁆𑀚𑀼𑀁 𑀧𑀢𑀻𑀢𑀸𑀫𑁂 (𑀲𑀻. 𑀧𑀻.)], 𑀭𑀸𑀚𑀧𑀼𑀢𑁆𑀢 𑀢𑀬𑀻 𑀕𑀢𑁂.

𑁨𑁭. ‘‘𑀩𑀳𑀼𑀥𑀜𑁆𑀜𑀸 𑀚𑀸𑀦𑀧𑀤𑀸 [𑀩𑀳𑀽 𑀚𑀸𑀦𑀧𑀤𑀸 𑀘𑀜𑁆𑀜𑁂 (𑀲𑀻.), 𑀩𑀳𑀽 𑀚𑀦𑀧𑀤𑀸 𑀘𑀜𑁆𑀜𑁂 (𑀧𑀻.)], 𑀦𑁂𑀕𑀫𑀸 𑀘 𑀲𑀫𑀸𑀕𑀢𑀸;

𑀉𑀧𑀸𑀬𑀦𑀸𑀦𑀺 𑀫𑁂 𑀤𑀚𑁆𑀚𑀼𑀁, 𑀭𑀸𑀚𑀧𑀼𑀢𑁆𑀢 𑀢𑀬𑀻 𑀕𑀢𑁂’’.

𑁨𑁮. ‘‘𑀧𑀺𑀢𑀼 𑀫𑀸𑀢𑀼 𑀘𑀳𑀁 𑀘𑀢𑁆𑀢𑁄, 𑀭𑀝𑁆𑀞𑀲𑁆𑀲 𑀦𑀺𑀕𑀫𑀲𑁆𑀲 𑀘;

𑀅𑀣𑁄 𑀲𑀩𑁆𑀩𑀓𑀼𑀫𑀸𑀭𑀸𑀦𑀁, 𑀦𑀢𑁆𑀣𑀺 𑀫𑀬𑁆𑀳𑀁 𑀲𑀓𑀁 𑀖𑀭𑀁.

𑁨𑁯. ‘‘𑀅𑀦𑀼𑀜𑁆𑀜𑀸𑀢𑁄 𑀅𑀳𑀁 𑀫𑀢𑁆𑀬𑀸, 𑀲𑀜𑁆𑀘𑀢𑁆𑀢𑁄 𑀧𑀺𑀢𑀭𑀸 𑀫𑀳𑀁;

𑀏𑀓𑁄𑀭𑀜𑁆𑀜𑁂 𑀧𑀩𑁆𑀩𑀚𑀺𑀢𑁄, 𑀦 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬𑁂.

𑁩𑁦. ‘‘𑀅𑀧𑀺 𑀅𑀢𑀭𑀫𑀸𑀦𑀸𑀦𑀁, 𑀨𑀮𑀸𑀲𑀸𑀯 𑀲𑀫𑀺𑀚𑁆𑀛𑀢𑀺;

𑀯𑀺𑀧𑀓𑁆𑀓𑀩𑁆𑀭𑀳𑁆𑀫𑀘𑀭𑀺𑀬𑁄𑀲𑁆𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀲𑀸𑀭𑀣𑀺.

𑁩𑁧. ‘‘𑀅𑀧𑀺 𑀅𑀢𑀭𑀫𑀸𑀦𑀸𑀦𑀁, 𑀲𑀫𑁆𑀫𑀤𑀢𑁆𑀣𑁄 𑀯𑀺𑀧𑀘𑁆𑀘𑀢𑀺;

𑀯𑀺𑀧𑀓𑁆𑀓𑀩𑁆𑀭𑀳𑁆𑀫𑀘𑀭𑀺𑀬𑁄𑀲𑁆𑀫𑀺, 𑀦𑀺𑀓𑁆𑀔𑀦𑁆𑀢𑁄 𑀅𑀓𑀼𑀢𑁄𑀪𑀬𑁄’’.

𑁩𑁨. ‘‘𑀏𑀯𑀁 𑀯𑀕𑁆𑀕𑀼𑀓𑀣𑁄 𑀲𑀦𑁆𑀢𑁄, 𑀯𑀺𑀲𑀝𑁆𑀞𑀯𑀘𑀦𑁄 𑀘𑀲𑀺 [𑀘 𑀲𑁄 (𑀲𑁆𑀬𑀸. 𑀓.)];

𑀓𑀲𑁆𑀫𑀸 𑀧𑀺𑀢𑀼 𑀘 𑀫𑀸𑀢𑀼𑀘𑁆𑀘, 𑀲𑀦𑁆𑀢𑀺𑀓𑁂 𑀦 𑀪𑀡𑀻 𑀢𑀤𑀸’’.

𑁩𑁩. ‘‘𑀦𑀸𑀳𑀁 𑀅𑀲𑀦𑁆𑀥𑀺𑀢𑀸 [𑀅𑀲𑀢𑁆𑀣𑀺𑀢𑀸 (𑀲𑀻.)] 𑀧𑀓𑁆𑀔𑁄, 𑀦 𑀩𑀥𑀺𑀭𑁄 𑀅𑀲𑁄𑀢𑀢𑀸;

𑀦𑀸𑀳𑀁 𑀅𑀚𑀺𑀯𑁆𑀳𑀢𑀸 𑀫𑀽𑀕𑁄, 𑀫𑀸 𑀫𑀁 𑀫𑀽𑀕𑀫𑀥𑀸𑀭𑀬𑀺 [𑀫𑀽𑀕𑁄 𑀅𑀥𑀸𑀭𑀬𑀺 (𑀲𑀻.)].

𑁩𑁪. ‘‘𑀧𑀼𑀭𑀺𑀫𑀁 𑀲𑀭𑀸𑀫𑀳𑀁 𑀚𑀸𑀢𑀺𑀁, 𑀬𑀢𑁆𑀣 𑀭𑀚𑁆𑀚𑀫𑀓𑀸𑀭𑀬𑀺𑀁;

𑀓𑀸𑀭𑀬𑀺𑀢𑁆𑀯𑀸 𑀢𑀳𑀺𑀁 𑀭𑀚𑁆𑀚𑀁, 𑀧𑀸𑀧𑀢𑁆𑀣𑀁 𑀦𑀺𑀭𑀬𑀁 𑀪𑀼𑀲𑀁.

𑁩𑁫. ‘‘𑀯𑀻𑀲𑀢𑀺𑀜𑁆𑀘𑁂𑀯 𑀯𑀲𑁆𑀲𑀸𑀦𑀺, 𑀢𑀳𑀺𑀁 𑀭𑀚𑁆𑀚𑀫𑀓𑀸𑀭𑀬𑀺𑀁;

𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀦𑀺𑀭𑀬𑀫𑁆𑀳𑀺 𑀅𑀧𑀘𑁆𑀘𑀺𑀲𑀁 [𑀅𑀧𑀘𑁆𑀘𑀲𑀺𑀁 (𑀲𑁆𑀬𑀸.), 𑀅𑀧𑀘𑁆𑀘𑀬𑀺𑀁 (𑀧𑀻.)].

𑁩𑁬. ‘‘𑀢𑀲𑁆𑀲 𑀭𑀚𑁆𑀚𑀲𑁆𑀲𑀳𑀁 𑀪𑀻𑀢𑁄, 𑀫𑀸 𑀫𑀁 𑀭𑀚𑁆𑀚𑀸𑀪𑀺𑀲𑁂𑀘𑀬𑀼𑀁 [𑀭𑀚𑁆𑀚𑁂𑀪𑀺𑀲𑁂𑀘𑀬𑀼𑀁 (𑀲𑁆𑀬𑀸. 𑀓.)];

𑀢𑀲𑁆𑀫𑀸 𑀧𑀺𑀢𑀼 𑀘 𑀫𑀸𑀢𑀼𑀘𑁆𑀘, 𑀲𑀦𑁆𑀢𑀺𑀓𑁂 𑀦 𑀪𑀡𑀺𑀁 𑀢𑀤𑀸.

𑁩𑁭. ‘‘𑀉𑀘𑁆𑀙𑀗𑁆𑀕𑁂 𑀫𑀁 𑀦𑀺𑀲𑀸𑀤𑁂𑀢𑁆𑀯𑀸, 𑀧𑀺𑀢𑀸 𑀅𑀢𑁆𑀣𑀸𑀦𑀼𑀲𑀸𑀲𑀢𑀺;

𑀏𑀓𑀁 𑀳𑀦𑀣 𑀩𑀦𑁆𑀥𑀣, 𑀏𑀓𑀁 𑀔𑀸𑀭𑀸𑀧𑀢𑀘𑁆𑀙𑀺𑀓𑀁 [𑀔𑀭𑀸𑀧𑀢𑀺𑀘𑁆𑀙𑀓𑀁 (𑀲𑁆𑀬𑀸.), 𑀔𑀭𑀸𑀧𑀝𑀺𑀘𑁆𑀙𑀓𑀁 (𑀓.)];

𑀏𑀓𑀁 𑀲𑀽𑀮𑀲𑁆𑀫𑀺𑀁 𑀉𑀧𑁆𑀧𑁂𑀣 [𑀅𑀧𑁆𑀧𑁂𑀣 (𑀲𑀻.), 𑀉𑀩𑁆𑀩𑁂𑀣 (𑀲𑁆𑀬𑀸.), 𑀅𑀘𑁆𑀘𑁂𑀣 (𑀧𑀻.)], 𑀇𑀘𑁆𑀘𑀲𑁆𑀲 𑀫𑀦𑀼𑀲𑀸𑀲𑀢𑀺.

𑁩𑁮. ‘‘𑀢𑀸𑀬𑀸𑀳𑀁 [𑀢𑀲𑁆𑀲𑀸𑀳𑀁 (𑀲𑀻. 𑀧𑀻.)] 𑀨𑀭𑀼𑀲𑀁 𑀲𑀼𑀢𑁆𑀯𑀸, 𑀯𑀸𑀘𑀸𑀬𑁄 𑀲𑀫𑀼𑀤𑀻𑀭𑀺𑀢𑀸;

𑀅𑀫𑀽𑀕𑁄 𑀫𑀽𑀕𑀯𑀡𑁆𑀡𑁂𑀦, 𑀅𑀧𑀓𑁆𑀔𑁄 𑀧𑀓𑁆𑀔𑀲𑀫𑁆𑀫𑀢𑁄;

𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑀲𑁆𑀫𑀺𑀁, 𑀅𑀘𑁆𑀙𑀸𑀳𑀁 𑀲𑀫𑁆𑀧𑀭𑀺𑀧𑁆𑀮𑀼𑀢𑁄.

𑁩𑁯. ‘‘𑀓𑀲𑀺𑀭𑀜𑁆𑀘 𑀧𑀭𑀺𑀢𑁆𑀢𑀜𑁆𑀘, 𑀢𑀜𑁆𑀘 𑀤𑀼𑀓𑁆𑀔𑁂𑀦 𑀲𑀁𑀬𑀼𑀢𑀁;

𑀓𑁄𑀫𑀁 [𑀓𑁄 𑀢𑀁 (𑀲𑀻. 𑀧𑀻.)] 𑀚𑀻𑀯𑀺𑀢𑀫𑀸𑀕𑀫𑁆𑀫, 𑀯𑁂𑀭𑀁 𑀓𑀬𑀺𑀭𑀸𑀣 𑀓𑁂𑀦𑀘𑀺.

𑁪𑁦. ‘‘𑀧𑀜𑁆𑀜𑀸𑀬 𑀘 𑀅𑀮𑀸𑀪𑁂𑀦, 𑀥𑀫𑁆𑀫𑀲𑁆𑀲 𑀘 𑀅𑀤𑀲𑁆𑀲𑀦𑀸;

𑀓𑁄𑀫𑀁 [𑀓𑁄 𑀢𑀁 (𑀲𑀻. 𑀧𑀻.)] 𑀚𑀻𑀯𑀺𑀢𑀫𑀸𑀕𑀫𑁆𑀫, 𑀯𑁂𑀭𑀁 𑀓𑀬𑀺𑀭𑀸𑀣 𑀓𑁂𑀦𑀘𑀺.

𑁪𑁧. ‘‘𑀅𑀧𑀺 𑀅𑀢𑀭𑀫𑀸𑀦𑀸𑀦𑀁, 𑀨𑀮𑀸𑀲𑀸𑀯 𑀲𑀫𑀺𑀚𑁆𑀛𑀢𑀺;

𑀯𑀺𑀧𑀓𑁆𑀓𑀩𑁆𑀭𑀳𑁆𑀫𑀘𑀭𑀺𑀬𑁄𑀲𑁆𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀲𑀸𑀭𑀣𑀺.

𑁪𑁨. ‘‘𑀅𑀧𑀺 𑀅𑀢𑀭𑀫𑀸𑀦𑀸𑀦𑀁, 𑀲𑀫𑁆𑀫𑀤𑀢𑁆𑀣𑁄 𑀯𑀺𑀧𑀘𑁆𑀘𑀢𑀺;

𑀯𑀺𑀧𑀓𑁆𑀓𑀩𑁆𑀭𑀳𑁆𑀫𑀘𑀭𑀺𑀬𑁄𑀲𑁆𑀫𑀺, 𑀦𑀺𑀓𑁆𑀔𑀦𑁆𑀢𑁄 𑀅𑀓𑀼𑀢𑁄𑀪𑀬𑁄’’.

𑁪𑁩. ‘‘𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀭𑀸𑀚𑀧𑀼𑀢𑁆𑀢 𑀢𑀯𑀦𑁆𑀢𑀺𑀓𑁂;

𑀅𑀯𑁆𑀳𑀸𑀬𑀲𑁆𑀲𑀼 [𑀅𑀯𑁆𑀳𑀬𑀲𑁆𑀲𑀼 (𑀲𑀻. 𑀧𑀻.)] 𑀫𑀁 𑀪𑀤𑁆𑀤𑀦𑁆𑀢𑁂, 𑀧𑀩𑁆𑀩𑀚𑁆𑀚𑀸 𑀫𑀫 𑀭𑀼𑀘𑁆𑀘𑀢𑀺’’.

𑁪𑁪. ‘‘𑀭𑀣𑀁 𑀦𑀺𑀬𑁆𑀬𑀸𑀤𑀬𑀺𑀢𑁆𑀯𑀸𑀦, 𑀅𑀦𑀡𑁄 𑀏𑀳𑀺 𑀲𑀸𑀭𑀣𑀺;

𑀅𑀦𑀡𑀲𑁆𑀲 𑀳𑀺 𑀧𑀩𑁆𑀩𑀚𑁆𑀚𑀸, 𑀏𑀢𑀁 𑀇𑀲𑀻𑀳𑀺 𑀯𑀡𑁆𑀡𑀺𑀢𑀁’’.

𑁪𑁫. ‘‘𑀬𑀤𑁂𑀯 𑀢𑁆𑀬𑀸𑀳𑀁 𑀯𑀘𑀦𑀁, 𑀅𑀓𑀭𑀁 𑀪𑀤𑁆𑀤𑀫𑀢𑁆𑀣𑀼 𑀢𑁂;

𑀢𑀤𑁂𑀯 𑀫𑁂 𑀢𑁆𑀯𑀁 𑀯𑀘𑀦𑀁, 𑀬𑀸𑀘𑀺𑀢𑁄 𑀓𑀢𑁆𑀢𑀼𑀫𑀭𑀳𑀲𑀺.

𑁪𑁬. ‘‘𑀇𑀥𑁂𑀯 𑀢𑀸𑀯 𑀅𑀘𑁆𑀙𑀲𑁆𑀲𑀼, 𑀬𑀸𑀯 𑀭𑀸𑀚𑀸𑀦𑀫𑀸𑀦𑀬𑁂;

𑀅𑀧𑁆𑀧𑁂𑀯 𑀢𑁂 𑀧𑀺𑀢𑀸 𑀤𑀺𑀲𑁆𑀯𑀸, 𑀧𑀢𑀻𑀢𑁄 𑀲𑀼𑀫𑀦𑁄 𑀲𑀺𑀬𑀸’’.

𑁪𑁭. ‘‘𑀓𑀭𑁄𑀫𑀺 𑀢𑁂𑀢𑀁 𑀯𑀘𑀦𑀁, 𑀬𑀁 𑀫𑀁 𑀪𑀡𑀲𑀺 𑀲𑀸𑀭𑀣𑀺;

𑀅𑀳𑀫𑁆𑀧𑀺 𑀤𑀝𑁆𑀞𑀼𑀓𑀸𑀫𑁄𑀲𑁆𑀫𑀺, 𑀧𑀺𑀢𑀭𑀁 𑀫𑁂 𑀇𑀥𑀸𑀕𑀢𑀁.

𑁪𑁮. ‘‘𑀏𑀳𑀺 𑀲𑀫𑁆𑀫 𑀦𑀺𑀯𑀢𑁆𑀢𑀲𑁆𑀲𑀼, 𑀓𑀼𑀲𑀮𑀁 𑀯𑀚𑁆𑀚𑀸𑀲𑀺 𑀜𑀸𑀢𑀺𑀦𑀁;

𑀫𑀸𑀢𑀭𑀁 𑀧𑀺𑀢𑀭𑀁 𑀫𑀬𑁆𑀳𑀁, 𑀯𑀼𑀢𑁆𑀢𑁄 𑀯𑀚𑁆𑀚𑀸𑀲𑀺 𑀯𑀦𑁆𑀤𑀦𑀁’’.

𑁪𑁯. 𑀢𑀲𑁆𑀲 𑀧𑀸𑀤𑁂 𑀕𑀳𑁂𑀢𑁆𑀯𑀸𑀦, 𑀓𑀢𑁆𑀯𑀸 𑀘 𑀦𑀁 𑀧𑀤𑀓𑁆𑀔𑀺𑀡𑀁;

𑀲𑀸𑀭𑀣𑀺 𑀭𑀣𑀫𑀸𑀭𑀼𑀬𑁆𑀳, 𑀭𑀸𑀚𑀤𑁆𑀯𑀸𑀭𑀁 𑀉𑀧𑀸𑀕𑀫𑀺.

𑁫𑁦. ‘‘𑀲𑀼𑀜𑁆𑀜𑀁 𑀫𑀸𑀢𑀸 𑀭𑀣𑀁 𑀤𑀺𑀲𑁆𑀯𑀸, 𑀏𑀓𑀁 𑀲𑀸𑀭𑀣𑀺𑀫𑀸𑀕𑀢𑀁;

𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺, 𑀭𑁄𑀤𑀦𑁆𑀢𑀻 𑀦𑀁 𑀉𑀤𑀺𑀓𑁆𑀔𑀢𑀺.

𑁫𑁧. ‘‘𑀅𑀬𑀁 𑀲𑁄 𑀲𑀸𑀭𑀣𑀺 𑀏𑀢𑀺, 𑀦𑀺𑀳𑀦𑁆𑀢𑁆𑀯𑀸 𑀫𑀫 𑀅𑀢𑁆𑀭𑀚𑀁;

𑀦𑀺𑀳𑀢𑁄 𑀦𑀽𑀦 𑀫𑁂 𑀧𑀼𑀢𑁆𑀢𑁄, 𑀧𑀣𑀩𑁆𑀬𑀸 𑀪𑀽𑀫𑀺𑀯𑀟𑁆𑀠𑀦𑁄.

𑁫𑁨. ‘‘𑀅𑀫𑀺𑀢𑁆𑀢𑀸 𑀦𑀽𑀦 𑀦𑀦𑁆𑀤𑀦𑁆𑀢𑀺, 𑀧𑀢𑀻𑀢𑀸 𑀦𑀽𑀦 𑀯𑁂𑀭𑀺𑀦𑁄;

𑀆𑀕𑀢𑀁 𑀲𑀸𑀭𑀣𑀺𑀁 𑀤𑀺𑀲𑁆𑀯𑀸, 𑀦𑀺𑀳𑀦𑁆𑀢𑁆𑀯𑀸 𑀫𑀫 𑀅𑀢𑁆𑀭𑀚𑀁.

𑁫𑁩. ‘‘𑀲𑀼𑀜𑁆𑀜𑀁 𑀫𑀸𑀢𑀸 𑀭𑀣𑀁 𑀤𑀺𑀲𑁆𑀯𑀸, 𑀏𑀓𑀁 𑀲𑀸𑀭𑀣𑀺𑀫𑀸𑀕𑀢𑀁;

𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺, 𑀭𑁄𑀤𑀦𑁆𑀢𑀻 𑀧𑀭𑀺𑀧𑀼𑀘𑁆𑀙𑀺 𑀦𑀁 [𑀭𑁄𑀤𑀦𑁆𑀢𑀻 𑀧𑀭𑀺𑀧𑀼𑀘𑁆𑀙𑀢𑀺 (𑀲𑀻. 𑀧𑀻.), 𑀭𑁄𑀤𑀦𑁆𑀢𑀻 𑀦𑀁 𑀧𑀭𑀺𑀧𑀼𑀘𑁆𑀙𑀢𑀺 (𑀲𑁆𑀬𑀸.)].

𑁫𑁪. ‘‘𑀓𑀺𑀦𑁆𑀦𑀼 𑀫𑀽𑀕𑁄 𑀓𑀺𑀁 𑀦𑀼 𑀧𑀓𑁆𑀔𑁄, 𑀓𑀺𑀦𑁆𑀦𑀼 𑀲𑁄 𑀯𑀺𑀮𑀧𑀻 𑀢𑀤𑀸;

𑀦𑀺𑀳𑀜𑁆𑀜𑀫𑀸𑀦𑁄 𑀪𑀽𑀫𑀺𑀬𑀸, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀲𑀸𑀭𑀣𑀺.

𑁫𑁫. ‘‘𑀓𑀣𑀁 𑀳𑀢𑁆𑀣𑁂𑀳𑀺 𑀧𑀸𑀤𑁂𑀳𑀺, 𑀫𑀽𑀕𑀧𑀓𑁆𑀔𑁄 𑀯𑀺𑀯𑀚𑁆𑀚𑀬𑀺;

𑀦𑀺𑀳𑀜𑁆𑀜𑀫𑀸𑀦𑁄 𑀪𑀽𑀫𑀺𑀬𑀸, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’.

𑁫𑁬. ‘‘𑀅𑀓𑁆𑀔𑁂𑀬𑁆𑀬𑀁 [𑀅𑀓𑁆𑀔𑀺𑀲𑁆𑀲𑀁 (𑀲𑀻. 𑀧𑀻.)] 𑀢𑁂 𑀅𑀳𑀁 𑀅𑀬𑁆𑀬𑁂, 𑀤𑀚𑁆𑀚𑀸𑀲𑀺 𑀅𑀪𑀬𑀁 𑀫𑀫;

𑀬𑀁 𑀫𑁂 𑀲𑀼𑀢𑀁 𑀯𑀸 𑀤𑀺𑀝𑁆𑀞𑀁 𑀯𑀸, 𑀭𑀸𑀚𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂’’.

𑁫𑁭. ‘‘𑀅𑀪𑀬𑀁 𑀲𑀫𑁆𑀫 𑀢𑁂 𑀤𑀫𑁆𑀫𑀺, 𑀅𑀪𑀻𑀢𑁄 𑀪𑀡 𑀲𑀸𑀭𑀣𑀺;

𑀬𑀁 𑀢𑁂 𑀲𑀼𑀢𑀁 𑀯𑀸 𑀤𑀺𑀝𑁆𑀞𑀁 𑀯𑀸, 𑀭𑀸𑀚𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂’’.

𑁫𑁮. ‘‘𑀦 𑀲𑁄 𑀫𑀽𑀕𑁄 𑀦 𑀲𑁄 𑀧𑀓𑁆𑀔𑁄, 𑀯𑀺𑀲𑀝𑁆𑀞𑀯𑀘𑀦𑁄 𑀘 𑀲𑁄;

𑀭𑀚𑁆𑀚𑀲𑁆𑀲 𑀓𑀺𑀭 𑀲𑁄 𑀪𑀻𑀢𑁄, 𑀅𑀓𑀭𑀸 [𑀅𑀓𑀭𑀻 (𑀲𑀻. 𑀧𑀻.)] 𑀆𑀮𑀬𑁂 𑀩𑀳𑀽.

𑁫𑁯. ‘‘𑀧𑀼𑀭𑀺𑀫𑀁 𑀲𑀭𑀢𑀺 𑀲𑁄 𑀚𑀸𑀢𑀺𑀁, 𑀬𑀢𑁆𑀣 𑀭𑀚𑁆𑀚𑀫𑀓𑀸𑀭𑀬𑀺;

𑀓𑀸𑀭𑀬𑀺𑀢𑁆𑀯𑀸 𑀢𑀳𑀺𑀁 𑀭𑀚𑁆𑀚𑀁, 𑀧𑀸𑀧𑀢𑁆𑀣 𑀦𑀺𑀭𑀬𑀁 𑀪𑀼𑀲𑀁.

𑁬𑁦. ‘‘𑀯𑀻𑀲𑀢𑀺𑀜𑁆𑀘𑁂𑀯 𑀯𑀲𑁆𑀲𑀸𑀦𑀺, 𑀢𑀳𑀺𑀁 𑀭𑀚𑁆𑀚𑀫𑀓𑀸𑀭𑀬𑀺;

𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀦𑀺𑀭𑀬𑀫𑁆𑀳𑀺 𑀅𑀧𑀘𑁆𑀘𑀺 𑀲𑁄.

𑁬𑁧. ‘‘𑀢𑀲𑁆𑀲 𑀭𑀚𑁆𑀚𑀲𑁆𑀲 𑀲𑁄 𑀪𑀻𑀢𑁄, 𑀫𑀸 𑀫𑀁 𑀭𑀚𑁆𑀚𑀸𑀪𑀺𑀲𑁂𑀘𑀬𑀼𑀁;

𑀢𑀲𑁆𑀫𑀸 𑀧𑀺𑀢𑀼 𑀘 𑀫𑀸𑀢𑀼𑀘𑁆𑀘, 𑀲𑀦𑁆𑀢𑀺𑀓𑁂 𑀦 𑀪𑀡𑀻 𑀢𑀤𑀸.

𑁬𑁨. ‘‘𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑁆𑀧𑀦𑁆𑀦𑁄, 𑀆𑀭𑁄𑀳𑀧𑀭𑀺𑀡𑀸𑀳𑀯𑀸;

𑀯𑀺𑀲𑀝𑁆𑀞𑀯𑀘𑀦𑁄 𑀧𑀜𑁆𑀜𑁄, 𑀫𑀕𑁆𑀕𑁂 𑀲𑀕𑁆𑀕𑀲𑁆𑀲 𑀢𑀺𑀝𑁆𑀞𑀢𑀺.

𑁬𑁩. ‘‘𑀲𑀘𑁂 𑀢𑁆𑀯𑀁 𑀤𑀝𑁆𑀞𑀼𑀓𑀸𑀫𑀸𑀲𑀺, 𑀭𑀸𑀚𑀧𑀼𑀢𑁆𑀢𑀁 [𑀭𑀸𑀚𑀧𑀼𑀢𑁆𑀢𑀺 (𑀲𑀻.)] 𑀢𑀯𑀢𑁆𑀭𑀚𑀁;

𑀏𑀳𑀺 𑀢𑀁 𑀧𑀸𑀧𑀬𑀺𑀲𑁆𑀲𑀸𑀫𑀺, 𑀬𑀢𑁆𑀣 𑀲𑀫𑁆𑀫𑀢𑀺 𑀢𑁂𑀫𑀺𑀬𑁄’’.

𑁬𑁪. ‘‘𑀬𑁄𑀚𑀬𑀦𑁆𑀢𑀼 𑀭𑀣𑁂 𑀅𑀲𑁆𑀲𑁂, 𑀓𑀘𑁆𑀙𑀁 𑀦𑀸𑀕𑀸𑀦 [𑀦𑀸𑀕𑀸𑀦𑀺 (𑀲𑁆𑀬𑀸. 𑀓.)] 𑀩𑀦𑁆𑀥𑀣;

𑀉𑀤𑀻𑀭𑀬𑀦𑁆𑀢𑀼 𑀲𑀗𑁆𑀔𑀧𑀡𑀯𑀸, 𑀯𑀸𑀤𑀦𑁆𑀢𑀼 [𑀯𑀤𑀦𑁆𑀢𑀼 (𑀲𑀻.), 𑀦𑀤𑀦𑁆𑀢𑀼 (𑀲𑁆𑀬𑀸. 𑀓.), 𑀯𑀤𑀢𑀁 (𑀧𑀻.)] 𑀏𑀓𑀧𑁄𑀓𑁆𑀔𑀭𑀸.

𑁬𑁫. ‘‘𑀯𑀸𑀤𑀦𑁆𑀢𑀼 [𑀦𑀤𑀦𑁆𑀢𑀼 (𑀲𑀻. 𑀲𑁆𑀬𑀸. 𑀧𑀻.)] 𑀪𑁂𑀭𑀻 𑀲𑀦𑁆𑀦𑀤𑁆𑀥𑀸, 𑀯𑀕𑁆𑀕𑀽 𑀯𑀸𑀤𑀦𑁆𑀢𑀼 𑀤𑀼𑀦𑁆𑀤𑀼𑀪𑀻;

𑀦𑁂𑀕𑀫𑀸 𑀘 𑀫𑀁 𑀅𑀦𑁆𑀯𑁂𑀦𑁆𑀢𑀼, 𑀕𑀘𑁆𑀙𑀁 𑀧𑀼𑀢𑁆𑀢𑀦𑀺𑀯𑁂𑀤𑀓𑁄 [𑀦𑀺𑀯𑀸𑀤𑀓𑁄 (𑀲𑁆𑀬𑀸. 𑀓.)].

𑁬𑁬. ‘‘𑀑𑀭𑁄𑀥𑀸 𑀘 𑀓𑀼𑀫𑀸𑀭𑀸 𑀘, 𑀯𑁂𑀲𑀺𑀬𑀸𑀦𑀸 𑀘 𑀩𑁆𑀭𑀸𑀳𑁆𑀫𑀡𑀸;

𑀔𑀺𑀧𑁆𑀧𑀁 𑀬𑀸𑀦𑀸𑀦𑀺 𑀬𑁄𑀚𑁂𑀦𑁆𑀢𑀼, 𑀕𑀘𑁆𑀙𑀁 𑀧𑀼𑀢𑁆𑀢𑀦𑀺𑀯𑁂𑀤𑀓𑁄 [𑀦𑀺𑀯𑀸𑀤𑀓𑁄 (𑀲𑁆𑀬𑀸. 𑀓.)].

𑁬𑁭. ‘‘𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸;

𑀔𑀺𑀧𑁆𑀧𑀁 𑀬𑀸𑀦𑀸𑀦𑀺 𑀬𑁄𑀚𑁂𑀦𑁆𑀢𑀼, 𑀕𑀘𑁆𑀙𑀁 𑀧𑀼𑀢𑁆𑀢𑀦𑀺𑀯𑁂𑀤𑀓𑁄 [𑀦𑀺𑀯𑀸𑀤𑀓𑁄 (𑀲𑁆𑀬𑀸. 𑀓.)].

𑁬𑁮. ‘‘𑀲𑀫𑀸𑀕𑀢𑀸 𑀚𑀸𑀦𑀧𑀤𑀸, 𑀦𑁂𑀕𑀫𑀸 𑀘 𑀲𑀫𑀸𑀕𑀢𑀸;

𑀔𑀺𑀧𑁆𑀧𑀁 𑀬𑀸𑀦𑀸𑀦𑀺 𑀬𑁄𑀚𑁂𑀦𑁆𑀢𑀼, 𑀕𑀘𑁆𑀙𑀁 𑀧𑀼𑀢𑁆𑀢𑀦𑀺𑀯𑁂𑀤𑀓𑁄’’ [𑀦𑀺𑀯𑀸𑀤𑀓𑁄 (𑀲𑁆𑀬𑀸. 𑀓.)].

𑁬𑁯. ‘‘𑀅𑀲𑁆𑀲𑁂 𑀘 𑀲𑀸𑀭𑀣𑀻 𑀬𑀼𑀢𑁆𑀢𑁂, 𑀲𑀺𑀦𑁆𑀥𑀯𑁂 𑀲𑀻𑀖𑀯𑀸𑀳𑀦𑁂;

𑀭𑀸𑀚𑀤𑁆𑀯𑀸𑀭𑀁 𑀉𑀧𑀸𑀕𑀘𑁆𑀙𑀼𑀁, 𑀬𑀼𑀢𑁆𑀢𑀸 𑀤𑁂𑀯 𑀇𑀫𑁂 𑀳𑀬𑀸’’.

𑁭𑁦. ‘‘𑀣𑀽𑀮𑀸 𑀚𑀯𑁂𑀦 𑀳𑀸𑀬𑀦𑁆𑀢𑀺, 𑀓𑀺𑀲𑀸 𑀳𑀸𑀬𑀦𑁆𑀢𑀺 𑀣𑀸𑀫𑀼𑀦𑀸;

𑀓𑀺𑀲𑁂 𑀣𑀽𑀮𑁂 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀲𑀁𑀲𑀝𑁆𑀞𑀸 𑀬𑁄𑀚𑀺𑀢𑀸 𑀳𑀬𑀸’’.

𑁭𑁧. ‘‘𑀢𑀢𑁄 𑀭𑀸𑀚𑀸 𑀢𑀭𑀫𑀸𑀦𑁄, 𑀬𑀼𑀢𑁆𑀢𑀫𑀸𑀭𑀼𑀬𑁆𑀳 𑀲𑀦𑁆𑀤𑀦𑀁;

𑀇𑀢𑁆𑀣𑀸𑀕𑀸𑀭𑀁 𑀅𑀚𑁆𑀛𑀪𑀸𑀲𑀺 [𑀅𑀪𑀸𑀲𑀣 (𑀓.)], 𑀲𑀩𑁆𑀩𑀸𑀯 𑀅𑀦𑀼𑀬𑀸𑀣 𑀫𑀁.

𑁭𑁨. ‘‘𑀯𑀸𑀮𑀩𑀻𑀚𑀦𑀺𑀫𑀼𑀡𑁆𑀳𑀻𑀲𑀁, 𑀔𑀕𑁆𑀕𑀁 𑀙𑀢𑁆𑀢𑀜𑁆𑀘 𑀧𑀡𑁆𑀟𑀭𑀁;

𑀉𑀧𑀸𑀥𑀺 𑀭𑀣𑀫𑀸𑀭𑀼𑀬𑁆𑀳 [𑀉𑀧𑀸𑀤𑀺𑀭𑀣𑀫𑀸𑀭𑀼𑀬𑁆𑀳 (𑀲𑀻.), 𑀉𑀧𑀸𑀥𑀻 𑀭𑀣𑀫𑀸𑀭𑀼𑀬𑁆𑀳 (𑀲𑁆𑀬𑀸.)], 𑀲𑀼𑀯𑀡𑁆𑀡𑁂𑀳𑀺 𑀅𑀮𑀗𑁆𑀓𑀢𑀸.

𑁭𑁩. ‘‘𑀢𑀢𑁄 𑀲 [𑀘 (𑀲𑀻. 𑀲𑁆𑀬𑀸. 𑀧𑀻.)] 𑀭𑀸𑀚𑀸 𑀧𑀸𑀬𑀸𑀲𑀺, 𑀧𑀼𑀭𑀓𑁆𑀔𑀢𑁆𑀯𑀸𑀦 𑀲𑀸𑀭𑀣𑀺𑀁;