𑁫𑁪𑁭. 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 (𑁧𑁦)

𑀤𑀲𑀯𑀭𑀓𑀣𑀸

𑁧𑁬𑁫𑁫. ‘‘𑀨𑀼𑀲𑁆𑀲𑀢𑀻 [𑀨𑀼𑀲𑀢𑀺 (𑀲𑀻. 𑀧𑀻.)] 𑀯𑀭𑀯𑀡𑁆𑀡𑀸𑀪𑁂, 𑀯𑀭𑀲𑁆𑀲𑀼 𑀤𑀲𑀥𑀸 𑀯𑀭𑁂;

𑀧𑀣𑀩𑁆𑀬𑀸 𑀘𑀸𑀭𑀼𑀧𑀼𑀩𑁆𑀩𑀗𑁆𑀕𑀺, 𑀬𑀁 𑀢𑀼𑀬𑁆𑀳𑀁 𑀫𑀦𑀲𑁄 𑀧𑀺𑀬𑀁’’.

𑁧𑁬𑁫𑁬. ‘‘𑀤𑁂𑀯𑀭𑀸𑀚 𑀦𑀫𑁄 𑀢𑁆𑀬𑀢𑁆𑀣𑀼, 𑀓𑀺𑀁 𑀧𑀸𑀧𑀁 𑀧𑀓𑀢𑀁 𑀫𑀬𑀸;

𑀭𑀫𑁆𑀫𑀸 𑀘𑀸𑀯𑁂𑀲𑀺 𑀫𑀁 𑀞𑀸𑀦𑀸, 𑀯𑀸𑀢𑁄𑀯 𑀥𑀭𑀡𑀻𑀭𑀼𑀳𑀁’’.

𑁧𑁬𑁫𑁭. ‘‘𑀦 𑀘𑁂𑀯 𑀢𑁂 𑀓𑀢𑀁 𑀧𑀸𑀧𑀁, 𑀦 𑀘 𑀫𑁂 𑀢𑁆𑀯𑀫𑀲𑀺 𑀅𑀧𑁆𑀧𑀺𑀬𑀸;

𑀧𑀼𑀜𑁆𑀜𑀜𑁆𑀘 𑀢𑁂 𑀧𑀭𑀺𑀓𑁆𑀔𑀻𑀡𑀁, 𑀬𑁂𑀦 𑀢𑁂𑀯𑀁 𑀯𑀤𑀸𑀫𑀳𑀁.

𑁧𑁬𑁫𑁮. ‘‘𑀲𑀦𑁆𑀢𑀺𑀓𑁂 𑀫𑀭𑀡𑀁 𑀢𑀼𑀬𑁆𑀳𑀁, 𑀯𑀺𑀦𑀸𑀪𑀸𑀯𑁄 𑀪𑀯𑀺𑀲𑁆𑀲𑀢𑀺;

𑀧𑀝𑀺𑀕𑀡𑁆𑀳𑀸𑀳𑀺 𑀫𑁂 𑀏𑀢𑁂, 𑀯𑀭𑁂 𑀤𑀲 𑀧𑀯𑁂𑀘𑁆𑀙𑀢𑁄’’.

𑁧𑁬𑁫𑁯. ‘‘𑀯𑀭𑀁 𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀲𑀺𑀯𑀺𑀭𑀸𑀚𑀲𑁆𑀲 𑀪𑀤𑁆𑀤𑀦𑁆𑀢𑁂, 𑀢𑀢𑁆𑀣 𑀅𑀲𑁆𑀲𑀁 𑀦𑀺𑀯𑁂𑀲𑀦𑁂.

𑁧𑁬𑁬𑁦. ‘‘𑀦𑀻𑀮𑀦𑁂𑀢𑁆𑀢𑀸 𑀦𑀻𑀮𑀪𑀫𑀼, 𑀦𑀺𑀮𑀓𑁆𑀔𑀻 𑀘 𑀬𑀣𑀸 𑀫𑀺𑀕𑀻;

𑀨𑀼𑀲𑁆𑀲𑀢𑀻 𑀦𑀸𑀫 𑀦𑀸𑀫𑁂𑀦, 𑀢𑀢𑁆𑀣𑀧𑀲𑁆𑀲𑀁 𑀧𑀼𑀭𑀺𑀦𑁆𑀤𑀤.

𑁧𑁬𑁬𑁧. ‘‘𑀧𑀼𑀢𑁆𑀢𑀁 𑀮𑀪𑁂𑀣 𑀯𑀭𑀤𑀁, 𑀬𑀸𑀘𑀬𑁄𑀕𑀁 [𑀬𑀸𑀘𑀬𑁄𑀕𑀺𑀁 (𑀓.)] 𑀅𑀫𑀘𑁆𑀙𑀭𑀺𑀁;

𑀧𑀽𑀚𑀺𑀢𑀁 𑀧𑀝𑀺𑀭𑀸𑀚𑀽𑀳𑀺, 𑀓𑀺𑀢𑁆𑀢𑀺𑀫𑀦𑁆𑀢𑀁 𑀬𑀲𑀲𑁆𑀲𑀺𑀦𑀁.

𑁧𑁬𑁬𑁨. ‘‘𑀕𑀩𑁆𑀪𑀁 𑀫𑁂 𑀥𑀸𑀭𑀬𑀦𑁆𑀢𑀺𑀬𑀸, 𑀫𑀚𑁆𑀛𑀺𑀫𑀗𑁆𑀕𑀁 𑀅𑀦𑀼𑀦𑁆𑀦𑀢𑀁;

𑀓𑀼𑀘𑁆𑀙𑀺 𑀅𑀦𑀼𑀦𑁆𑀦𑀢𑁄 𑀅𑀲𑁆𑀲, 𑀘𑀸𑀧𑀁𑀯 𑀮𑀺𑀔𑀺𑀢𑀁 𑀲𑀫𑀁.

𑁧𑁬𑁬𑁩. ‘‘𑀣𑀦𑀸 𑀫𑁂 𑀦𑀧𑁆𑀧𑀧𑀢𑁂𑀬𑁆𑀬𑀼𑀁, 𑀧𑀮𑀺𑀢𑀸 𑀦 𑀲𑀦𑁆𑀢𑀼 𑀯𑀸𑀲𑀯;

𑀓𑀸𑀬𑁂 𑀭𑀚𑁄 𑀦 𑀮𑀺𑀫𑁆𑀧𑁂𑀣, 𑀯𑀚𑁆𑀛𑀜𑁆𑀘𑀸𑀧𑀺 𑀧𑀫𑁄𑀘𑀬𑁂.

𑁧𑁬𑁬𑁪. ‘‘𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀤𑁂, 𑀦𑀸𑀭𑀺𑀯𑀭𑀕𑀡𑀸𑀬𑀼𑀢𑁂;

𑀔𑀼𑀚𑁆𑀚𑀘𑁂𑀮𑀸𑀧𑀓𑀸𑀓𑀺𑀡𑁆𑀡𑁂, 𑀲𑀽𑀤𑀫𑀸𑀕𑀥𑀯𑀡𑁆𑀡𑀺𑀢𑁂.

𑁧𑁬𑁬𑁫. ‘‘𑀘𑀺𑀢𑁆𑀭𑀕𑁆𑀕𑀴𑁂𑀭𑀼𑀖𑀼𑀲𑀺𑀢𑁂, 𑀲𑀼𑀭𑀸𑀫𑀁𑀲𑀧𑀩𑁄𑀥𑀦𑁂;

𑀲𑀺𑀯𑀺𑀭𑀸𑀚𑀲𑁆𑀲 𑀪𑀤𑁆𑀤𑀦𑁆𑀢𑁂, 𑀢𑀢𑁆𑀣𑀲𑁆𑀲𑀁 𑀫𑀳𑁂𑀲𑀻 𑀧𑀺𑀬𑀸’’.

𑁧𑁬𑁬𑁬. ‘‘𑀬𑁂 𑀢𑁂 𑀤𑀲 𑀯𑀭𑀸 𑀤𑀺𑀦𑁆𑀦𑀸, 𑀫𑀬𑀸 𑀲𑀩𑁆𑀩𑀗𑁆𑀕𑀲𑁄𑀪𑀦𑁂;

𑀲𑀺𑀯𑀺𑀭𑀸𑀚𑀲𑁆𑀲 𑀯𑀺𑀚𑀺𑀢𑁂, 𑀲𑀩𑁆𑀩𑁂 𑀢𑁂 𑀮𑀘𑁆𑀙𑀲𑀻 𑀯𑀭𑁂.

𑁧𑁬𑁬𑁭. ‘‘𑀇𑀤𑀁 𑀯𑀢𑁆𑀯𑀸𑀦 𑀫𑀖𑀯𑀸, 𑀤𑁂𑀯𑀭𑀸𑀚𑀸 𑀲𑀼𑀚𑀫𑁆𑀧𑀢𑀺;

𑀨𑀼𑀲𑁆𑀲𑀢𑀺𑀬𑀸 𑀯𑀭𑀁 𑀤𑀢𑁆𑀯𑀸, 𑀅𑀦𑀼𑀫𑁄𑀤𑀺𑀢𑁆𑀣 𑀯𑀸𑀲𑀯𑁄.

𑀤𑀲𑀯𑀭𑀓𑀣𑀸 𑀦𑀸𑀫.

𑀳𑁂𑀫𑀯𑀦𑁆𑀢𑀁

𑁧𑁬𑁬𑁮. ‘‘𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀸, 𑀧𑀗𑁆𑀓𑀤𑀦𑁆𑀢𑀸 𑀭𑀚𑀲𑁆𑀲𑀺𑀭𑀸;

𑀧𑀕𑁆𑀕𑀬𑁆𑀳 𑀤𑀓𑁆𑀔𑀺𑀡𑀁 𑀩𑀸𑀳𑀼𑀁, 𑀓𑀺𑀁 𑀫𑀁 𑀬𑀸𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸’’.

𑁧𑁬𑁬𑁯. ‘‘𑀭𑀢𑀦𑀁 𑀤𑁂𑀯 𑀬𑀸𑀘𑀸𑀫, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑀁;

𑀤𑀤𑀸𑀳𑀺 𑀧𑀯𑀭𑀁 𑀦𑀸𑀕𑀁, 𑀈𑀲𑀸𑀤𑀦𑁆𑀢𑀁 𑀉𑀭𑀽𑀴𑁆𑀳𑀯𑀁’’.

𑁧𑁬𑁭𑁦. ‘‘𑀤𑀤𑀸𑀫𑀺 𑀦 𑀯𑀺𑀓𑀫𑁆𑀧𑀸𑀫𑀺, 𑀬𑀁 𑀫𑀁 𑀬𑀸𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀧𑀪𑀺𑀦𑁆𑀦𑀁 𑀓𑀼𑀜𑁆𑀚𑀭𑀁 𑀤𑀦𑁆𑀢𑀺𑀁, 𑀑𑀧𑀯𑀬𑁆𑀳𑀁 𑀕𑀚𑀼𑀢𑁆𑀢𑀫𑀁’’.

𑁧𑁬𑁭𑁧. ‘‘𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀑𑀭𑀼𑀬𑁆𑀳, 𑀭𑀸𑀚𑀸 𑀘𑀸𑀕𑀸𑀥𑀺𑀫𑀸𑀦𑀲𑁄;

𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀤𑀸 𑀤𑀸𑀦𑀁, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄’’.

𑁧𑁬𑁭𑁨. ‘‘𑀢𑀤𑀸𑀲𑀺 𑀬𑀁 𑀪𑀺𑀁𑀲𑀦𑀓𑀁, 𑀢𑀤𑀸𑀲𑀺 𑀮𑁄𑀫𑀳𑀁𑀲𑀦𑀁;

𑀳𑀢𑁆𑀣𑀺𑀦𑀸𑀕𑁂 𑀧𑀤𑀺𑀦𑁆𑀦𑀫𑁆𑀳𑀺, 𑀫𑁂𑀤𑀦𑀻 𑀲𑀫𑁆𑀧𑀓𑀫𑁆𑀧𑀣.

𑁧𑁬𑁭𑁩. ‘‘𑀢𑀤𑀸𑀲𑀺 𑀬𑀁 𑀪𑀺𑀁𑀲𑀦𑀓𑀁, 𑀢𑀤𑀸𑀲𑀺 𑀮𑁄𑀫𑀳𑀁𑀲𑀦𑀁;

𑀳𑀢𑁆𑀣𑀺𑀦𑀸𑀕𑁂 𑀧𑀤𑀺𑀦𑁆𑀦𑀫𑁆𑀳𑀺, 𑀔𑀼𑀩𑁆𑀪𑀺𑀢𑁆𑀣 𑀦𑀕𑀭𑀁 𑀢𑀤𑀸.

𑁧𑁬𑁭𑁪. ‘‘𑀲𑀫𑀸𑀓𑀼𑀮𑀁 𑀧𑀼𑀭𑀁 𑀆𑀲𑀺, 𑀖𑁄𑀲𑁄 𑀘 𑀯𑀺𑀧𑀼𑀮𑁄 𑀫𑀳𑀸;

𑀳𑀢𑁆𑀣𑀺𑀦𑀸𑀕𑁂 𑀧𑀤𑀺𑀦𑁆𑀦𑀫𑁆𑀳𑀺, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁂’’.

𑁧𑁬𑁭𑁫. ‘‘𑀉𑀕𑁆𑀕𑀸 𑀘 𑀭𑀸𑀚𑀧𑀼𑀢𑁆𑀢𑀸 𑀘, 𑀯𑁂𑀲𑀺𑀬𑀸𑀦𑀸 𑀘 𑀩𑁆𑀭𑀸𑀳𑁆𑀫𑀡𑀸;

𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸.

𑁧𑁬𑁭𑁬. ‘‘𑀓𑁂𑀯𑀮𑁄 𑀘𑀸𑀧𑀺 𑀦𑀺𑀕𑀫𑁄, 𑀲𑀺𑀯𑀬𑁄 𑀘 𑀲𑀫𑀸𑀕𑀢𑀸;

𑀤𑀺𑀲𑁆𑀯𑀸 𑀦𑀸𑀕𑀁 𑀦𑀻𑀬𑀫𑀸𑀦𑀁, 𑀢𑁂 𑀭𑀜𑁆𑀜𑁄 𑀧𑀝𑀺𑀯𑁂𑀤𑀬𑀼𑀁.

𑁧𑁬𑁭𑁭. ‘‘𑀯𑀺𑀥𑀫𑀁 𑀤𑁂𑀯 𑀢𑁂 𑀭𑀝𑁆𑀞𑀁, 𑀧𑀼𑀢𑁆𑀢𑁄 𑀯𑁂𑀲𑁆𑀲𑀦𑁆𑀢𑀭𑁄 𑀢𑀯;

𑀓𑀣𑀁 𑀦𑁄 𑀳𑀢𑁆𑀣𑀺𑀦𑀁 𑀤𑀚𑁆𑀚𑀸, 𑀦𑀸𑀕𑀁 𑀭𑀝𑁆𑀞𑀲𑁆𑀲 𑀧𑀽𑀚𑀺𑀢𑀁.

𑁧𑁬𑁭𑁮. ‘‘𑀓𑀣𑀁 𑀦𑁄 𑀓𑀼𑀜𑁆𑀚𑀭𑀁 𑀤𑀚𑁆𑀚𑀸, 𑀈𑀲𑀸𑀤𑀦𑁆𑀢𑀁 𑀉𑀭𑀽𑀴𑁆𑀳𑀯𑀁;

𑀔𑁂𑀢𑁆𑀢𑀜𑁆𑀜𑀼𑀁 𑀲𑀩𑁆𑀩𑀬𑀼𑀤𑁆𑀥𑀸𑀦𑀁, 𑀲𑀩𑁆𑀩𑀲𑁂𑀢𑀁 𑀕𑀚𑀼𑀢𑁆𑀢𑀫𑀁.

𑁧𑁬𑁭𑁯. ‘‘𑀧𑀡𑁆𑀟𑀼𑀓𑀫𑁆𑀩𑀮𑀲𑀜𑁆𑀙𑀦𑁆𑀦𑀁, 𑀧𑀪𑀺𑀦𑁆𑀦𑀁 𑀲𑀢𑁆𑀢𑀼𑀫𑀤𑁆𑀤𑀦𑀁;

𑀤𑀦𑁆𑀢𑀺𑀁 𑀲𑀯𑀸𑀴𑀩𑀻𑀚𑀦𑀺𑀁, 𑀲𑁂𑀢𑀁 𑀓𑁂𑀮𑀸𑀲𑀲𑀸𑀤𑀺𑀲𑀁.

𑁧𑁬𑁮𑁦. ‘‘𑀲𑀲𑁂𑀢𑀘𑁆𑀙𑀢𑁆𑀢𑀁 𑀲𑀉𑀧𑀸𑀥𑁂𑀬𑁆𑀬𑀁, 𑀲𑀸𑀣𑀩𑁆𑀩𑀦𑀁 𑀲𑀳𑀢𑁆𑀣𑀺𑀧𑀁;

𑀅𑀕𑁆𑀕𑀬𑀸𑀦𑀁 𑀭𑀸𑀚𑀯𑀸𑀳𑀺𑀁, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀤𑀸 𑀕𑀚𑀁 [𑀥𑀦𑀁 (𑀲𑀻. 𑀧𑀻.), 𑀤𑀸𑀦𑀁 (𑀲𑁆𑀬𑀸.)].

𑁧𑁬𑁮𑁧. ‘‘𑀅𑀦𑁆𑀦𑀁 𑀧𑀸𑀦𑀜𑁆𑀘 𑀬𑁄 [𑀲𑁄 (𑀲𑀻. 𑀲𑁆𑀬𑀸. 𑀓.)] 𑀤𑀚𑁆𑀚𑀸, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘;

𑀏𑀢𑀁 𑀔𑁄 𑀤𑀸𑀦𑀁 𑀧𑀢𑀺𑀭𑀽𑀧𑀁, 𑀏𑀢𑀁 𑀔𑁄 𑀩𑁆𑀭𑀸𑀳𑁆𑀫𑀡𑀸𑀭𑀳𑀁.

𑁧𑁬𑁮𑁨. ‘‘𑀅𑀬𑀁 𑀢𑁂 𑀯𑀁𑀲𑀭𑀸𑀚𑀸 𑀦𑁄, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄 [𑀭𑀝𑁆𑀞𑀯𑀟𑁆𑀠𑀦𑀁 (𑀲𑀻.), 𑀭𑀝𑁆𑀞𑀯𑀟𑁆𑀠𑀦 (𑀧𑀻.)];

𑀓𑀣𑀁 𑀯𑁂𑀲𑁆𑀲𑀦𑁆𑀢𑀭𑁄 𑀧𑀼𑀢𑁆𑀢𑁄, 𑀕𑀚𑀁 𑀪𑀸𑀚𑁂𑀢𑀺 𑀲𑀜𑁆𑀚𑀬.

𑁧𑁬𑁮𑁩. ‘‘𑀲𑀘𑁂 𑀢𑁆𑀯𑀁 𑀦 𑀓𑀭𑀺𑀲𑁆𑀲𑀲𑀺, 𑀲𑀺𑀯𑀻𑀦𑀁 𑀯𑀘𑀦𑀁 𑀇𑀤𑀁;

𑀫𑀜𑁆𑀜𑁂 𑀢𑀁 𑀲𑀳 𑀧𑀼𑀢𑁆𑀢𑁂𑀦, 𑀲𑀺𑀯𑀻 𑀳𑀢𑁆𑀣𑁂 𑀓𑀭𑀺𑀲𑁆𑀲𑀭𑁂’’.

𑁧𑁬𑁮𑁪. ‘‘𑀓𑀸𑀫𑀁 𑀚𑀦𑀧𑀤𑁄 𑀫𑀸𑀲𑀺, 𑀭𑀝𑁆𑀞𑀜𑁆𑀘𑀸𑀧𑀺 𑀯𑀺𑀦𑀲𑁆𑀲𑀢𑀼;

𑀦𑀸𑀳𑀁 𑀲𑀺𑀯𑀻𑀦𑀁 𑀯𑀘𑀦𑀸, 𑀭𑀸𑀚𑀧𑀼𑀢𑁆𑀢𑀁 𑀅𑀤𑀽𑀲𑀓𑀁;

𑀧𑀩𑁆𑀩𑀸𑀚𑁂𑀬𑁆𑀬𑀁 𑀲𑀓𑀸 𑀭𑀝𑁆𑀞𑀸, 𑀧𑀼𑀢𑁆𑀢𑁄 𑀳𑀺 𑀫𑀫 𑀑𑀭𑀲𑁄.

𑁧𑁬𑁮𑁫. ‘‘𑀓𑀸𑀫𑀁 𑀚𑀦𑀧𑀤𑁄 𑀫𑀸𑀲𑀺, 𑀭𑀝𑁆𑀞𑀜𑁆𑀘𑀸𑀧𑀺 𑀯𑀺𑀦𑀲𑁆𑀲𑀢𑀼;

𑀦𑀸𑀳𑀁 𑀲𑀺𑀯𑀻𑀦𑀁 𑀯𑀘𑀦𑀸, 𑀭𑀸𑀚𑀧𑀼𑀢𑁆𑀢𑀁 𑀅𑀤𑀽𑀲𑀓𑀁;

𑀧𑀩𑁆𑀩𑀸𑀚𑁂𑀬𑁆𑀬𑀁 𑀲𑀓𑀸 𑀭𑀝𑁆𑀞𑀸, 𑀧𑀼𑀢𑁆𑀢𑁄 𑀳𑀺 𑀫𑀫 𑀅𑀢𑁆𑀭𑀚𑁄.

𑁧𑁬𑁮𑁬. ‘‘𑀦 𑀘𑀸𑀳𑀁 𑀢𑀲𑁆𑀫𑀺𑀁 𑀤𑀼𑀩𑁆𑀪𑁂𑀬𑁆𑀬𑀁, 𑀅𑀭𑀺𑀬𑀲𑀻𑀮𑀯𑀢𑁄 𑀳𑀺 𑀲𑁄;

𑀅𑀲𑀺𑀮𑁄𑀓𑁄𑀧𑀺 𑀫𑁂 𑀅𑀲𑁆𑀲, 𑀧𑀸𑀧𑀜𑁆𑀘 𑀧𑀲𑀯𑁂 𑀩𑀳𑀼𑀁;

𑀓𑀣𑀁 𑀯𑁂𑀲𑁆𑀲𑀦𑁆𑀢𑀭𑀁 𑀧𑀼𑀢𑁆𑀢𑀁, 𑀲𑀢𑁆𑀣𑁂𑀦 𑀖𑀸𑀢𑀬𑀸𑀫𑀲𑁂’’.

𑁧𑁬𑁮𑁭. ‘‘𑀫𑀸 𑀦𑀁 𑀤𑀡𑁆𑀟𑁂𑀦 𑀲𑀢𑁆𑀣𑁂𑀦, 𑀦 𑀳𑀺 𑀲𑁄 𑀩𑀦𑁆𑀥𑀦𑀸𑀭𑀳𑁄;

𑀧𑀩𑁆𑀩𑀸𑀚𑁂𑀳𑀺 𑀘 𑀦𑀁 𑀭𑀝𑁆𑀞𑀸, 𑀯𑀗𑁆𑀓𑁂 𑀯𑀲𑀢𑀼 𑀧𑀩𑁆𑀩𑀢𑁂’’.

𑁧𑁬𑁮𑁮. ‘‘𑀏𑀲𑁄 𑀘𑁂 𑀲𑀺𑀯𑀻𑀦𑀁 𑀙𑀦𑁆𑀤𑁄, 𑀙𑀦𑁆𑀤𑀁 𑀦 𑀧𑀦𑀼𑀤𑀸𑀫𑀲𑁂;

𑀇𑀫𑀁 𑀲𑁄 𑀯𑀲𑀢𑀼 𑀭𑀢𑁆𑀢𑀺𑀁, 𑀓𑀸𑀫𑁂 𑀘 𑀧𑀭𑀺𑀪𑀼𑀜𑁆𑀚𑀢𑀼.

𑁧𑁬𑁮𑁯. ‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀲𑁆𑀲𑀼𑀕𑁆𑀕𑀫𑀦𑀁 𑀧𑀢𑀺 [𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀲𑀢𑀺 (𑀓.)];

𑀲𑀫𑀕𑁆𑀕𑀸 𑀲𑀺𑀯𑀬𑁄 𑀳𑀼𑀢𑁆𑀯𑀸, 𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀦𑁆𑀢𑀼 𑀦𑀁’’.

𑁧𑁬𑁯𑁦. ‘‘𑀉𑀝𑁆𑀞𑁂𑀳𑀺 𑀓𑀢𑁆𑀢𑁂 𑀢𑀭𑀫𑀸𑀦𑁄, 𑀕𑀦𑁆𑀢𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑀁 𑀯𑀤;

𑀲𑀺𑀯𑀬𑁄 𑀤𑁂𑀯 𑀢𑁂 𑀓𑀼𑀤𑁆𑀥𑀸, 𑀦𑁂𑀕𑀫𑀸 𑀘 𑀲𑀫𑀸𑀕𑀢𑀸.

𑁧𑁬𑁯𑁧. ‘‘𑀉𑀕𑁆𑀕𑀸 𑀘 𑀭𑀸𑀚𑀧𑀼𑀢𑁆𑀢𑀸 𑀘, 𑀯𑁂𑀲𑀺𑀬𑀸𑀦𑀸 𑀘 𑀩𑁆𑀭𑀸𑀳𑁆𑀫𑀡𑀸;

𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸;

𑀓𑁂𑀯𑀮𑁄 𑀘𑀸𑀧𑀺 𑀦𑀺𑀕𑀫𑁄, 𑀲𑀺𑀯𑀬𑁄 𑀘 𑀲𑀫𑀸𑀕𑀢𑀸.

𑁧𑁬𑁯𑁨. ‘‘𑀅𑀲𑁆𑀫𑀸 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀲𑁆𑀲𑀼𑀕𑁆𑀕𑀫𑀦𑀁 𑀧𑀢𑀺;

𑀲𑀫𑀕𑁆𑀕𑀸 𑀲𑀺𑀯𑀬𑁄 𑀳𑀼𑀢𑁆𑀯𑀸, 𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀦𑁆𑀢𑀺 𑀢𑀁.

𑁧𑁬𑁯𑁩. ‘‘𑀲 𑀓𑀢𑁆𑀢𑀸 𑀢𑀭𑀫𑀸𑀦𑁄𑀯, 𑀲𑀺𑀯𑀺𑀭𑀸𑀚𑁂𑀦 𑀧𑁂𑀲𑀺𑀢𑁄;

𑀆𑀫𑀼𑀢𑁆𑀢𑀳𑀢𑁆𑀣𑀸𑀪𑀭𑀡𑀸, 𑀲𑀼𑀯𑀢𑁆𑀣𑁄 𑀘𑀦𑁆𑀤𑀦𑀪𑀽𑀲𑀺𑀢𑁄.

𑁧𑁬𑁯𑁪. ‘‘𑀲𑀻𑀲𑀁 𑀦𑁆𑀳𑀸𑀢𑁄 𑀉𑀤𑀓𑁂 𑀲𑁄, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑁄;

𑀉𑀧𑀸𑀕𑀫𑀺 𑀧𑀼𑀭𑀁 𑀭𑀫𑁆𑀫𑀁, 𑀯𑁂𑀲𑁆𑀲𑀦𑁆𑀢𑀭𑀦𑀺𑀯𑁂𑀲𑀦𑀁.

𑁧𑁬𑁯𑁫. ‘‘𑀢𑀢𑁆𑀣𑀤𑁆𑀤𑀲 𑀓𑀼𑀫𑀸𑀭𑀁 𑀲𑁄, 𑀭𑀫𑀫𑀸𑀦𑀁 𑀲𑀓𑁂 𑀧𑀼𑀭𑁂;

𑀧𑀭𑀺𑀓𑀺𑀡𑁆𑀡𑀁 𑀅𑀫𑀘𑁆𑀘𑁂𑀳𑀺, 𑀢𑀺𑀤𑀲𑀸𑀦𑀁𑀯 𑀯𑀸𑀲𑀯𑀁.

𑁧𑁬𑁯𑁬. ‘‘𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀭𑀫𑀸𑀦𑁄, 𑀓𑀢𑁆𑀢𑀸 𑀯𑁂𑀲𑁆𑀲𑀦𑁆𑀢𑀭𑀁𑀩𑁆𑀭𑀯𑀺;

𑀤𑀼𑀓𑁆𑀔𑀁 𑀢𑁂 𑀯𑁂𑀤𑀬𑀺𑀲𑁆𑀲𑀸𑀫𑀺, 𑀫𑀸 𑀫𑁂 𑀓𑀼𑀚𑁆𑀛𑀺 𑀭𑀣𑁂𑀲𑀪.

𑁧𑁬𑁯𑁭. ‘‘𑀯𑀦𑁆𑀤𑀺𑀢𑁆𑀯𑀸 𑀭𑁄𑀤𑀫𑀸𑀦𑁄 𑀲𑁄, 𑀓𑀢𑁆𑀢𑀸 𑀭𑀸𑀚𑀸𑀦𑀫𑀩𑁆𑀭𑀯𑀺;

𑀪𑀢𑁆𑀢𑀸 𑀫𑁂𑀲𑀺 𑀫𑀳𑀸𑀭𑀸𑀚, 𑀲𑀩𑁆𑀩𑀓𑀸𑀫𑀭𑀲𑀸𑀳𑀭𑁄.

𑁧𑁬𑁯𑁮. ‘‘𑀤𑀼𑀓𑁆𑀔𑀁 𑀢𑁂 𑀯𑁂𑀤𑀬𑀺𑀲𑁆𑀲𑀸𑀫𑀺, 𑀢𑀢𑁆𑀣 𑀅𑀲𑁆𑀲𑀸𑀲𑀬𑀦𑁆𑀢𑀼 𑀫𑀁;

𑀲𑀺𑀯𑀬𑁄 𑀤𑁂𑀯 𑀢𑁂 𑀓𑀼𑀤𑁆𑀥𑀸, 𑀦𑁂𑀕𑀫𑀸 𑀘 𑀲𑀫𑀸𑀕𑀢𑀸.

𑁧𑁬𑁯𑁯. ‘‘𑀉𑀕𑁆𑀕𑀸 𑀘 𑀭𑀸𑀚𑀧𑀼𑀢𑁆𑀢𑀸 𑀘, 𑀯𑁂𑀲𑀺𑀬𑀸𑀦𑀸 𑀘 𑀩𑁆𑀭𑀸𑀳𑁆𑀫𑀡𑀸;

𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸;

𑀓𑁂𑀯𑀮𑁄 𑀘𑀸𑀧𑀺 𑀦𑀺𑀕𑀫𑁄, 𑀲𑀺𑀯𑀬𑁄 𑀘 𑀲𑀫𑀸𑀕𑀢𑀸.

𑁧𑁭𑁦𑁦. ‘‘𑀅𑀲𑁆𑀫𑀸 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀲𑀽𑀭𑀺𑀬𑀲𑁆𑀲𑀼𑀕𑁆𑀕𑀫𑀦𑀁 𑀧𑀢𑀺;

𑀲𑀫𑀕𑁆𑀕𑀸 𑀲𑀺𑀯𑀬𑁄 𑀳𑀼𑀢𑁆𑀯𑀸, 𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀦𑁆𑀢𑀺 𑀢𑀁’’.

𑁧𑁭𑁦𑁧. ‘‘𑀓𑀺𑀲𑁆𑀫𑀺𑀁 𑀫𑁂 𑀲𑀺𑀯𑀬𑁄 𑀓𑀼𑀤𑁆𑀥𑀸, 𑀦𑀸𑀳𑀁 𑀧𑀲𑁆𑀲𑀸𑀫𑀺 𑀤𑀼𑀓𑁆𑀓𑀝𑀁;

𑀢𑀁 𑀫𑁂 𑀓𑀢𑁆𑀢𑁂 𑀯𑀺𑀬𑀸𑀘𑀺𑀓𑁆𑀔, 𑀓𑀲𑁆𑀫𑀸 𑀧𑀩𑁆𑀩𑀸𑀚𑀬𑀦𑁆𑀢𑀺 𑀫𑀁’’.

𑁧𑁭𑁦𑁨. ‘‘𑀉𑀕𑁆𑀕𑀸 𑀘 𑀭𑀸𑀚𑀧𑀼𑀢𑁆𑀢𑀸 𑀘, 𑀯𑁂𑀲𑀺𑀬𑀸𑀦𑀸 𑀘 𑀩𑁆𑀭𑀸𑀳𑁆𑀫𑀡𑀸;

𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸;

𑀦𑀸𑀕𑀤𑀸𑀦𑁂𑀦 𑀔𑀺𑀬𑁆𑀬𑀦𑁆𑀢𑀺, 𑀢𑀲𑁆𑀫𑀸 𑀧𑀩𑁆𑀩𑀸𑀚𑀬𑀦𑁆𑀢𑀺 𑀢𑀁’’.

𑁧𑁭𑁦𑁩. ‘‘𑀳𑀤𑀬𑀁 𑀘𑀓𑁆𑀔𑀼𑀫𑁆𑀧𑀳𑀁 𑀤𑀚𑁆𑀚𑀁, 𑀓𑀺𑀁 𑀫𑁂 𑀩𑀸𑀳𑀺𑀭𑀓𑀁 𑀥𑀦𑀁;

𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀫𑀡𑀺.

𑁧𑁭𑁦𑁪. ‘‘𑀤𑀓𑁆𑀔𑀺𑀡𑀁 𑀯𑀸𑀧𑀳𑀁 𑀩𑀸𑀳𑀼𑀁, 𑀤𑀺𑀲𑁆𑀯𑀸 𑀬𑀸𑀘𑀓𑀫𑀸𑀕𑀢𑁂;

𑀤𑀤𑁂𑀬𑁆𑀬𑀁 𑀦 𑀯𑀺𑀓𑀫𑁆𑀧𑁂𑀬𑁆𑀬𑀁, 𑀤𑀸𑀦𑁂 𑀫𑁂 𑀭𑀫𑀢𑁂 𑀫𑀦𑁄.

𑁧𑁭𑁦𑁫. ‘‘𑀓𑀸𑀫𑀁 𑀫𑀁 𑀲𑀺𑀯𑀬𑁄 𑀲𑀩𑁆𑀩𑁂, 𑀧𑀩𑁆𑀩𑀸𑀚𑁂𑀦𑁆𑀢𑀼 𑀳𑀦𑀦𑁆𑀢𑀼 𑀯𑀸;

𑀦𑁂𑀯 𑀤𑀸𑀦𑀸 𑀯𑀺𑀭𑀫𑀺𑀲𑁆𑀲𑀁, 𑀓𑀸𑀫𑀁 𑀙𑀺𑀦𑁆𑀤𑀦𑁆𑀢𑀼 𑀲𑀢𑁆𑀢𑀥𑀸’’.

𑁧𑁭𑁦𑁬. ‘‘𑀏𑀯𑀁 𑀢𑀁 𑀲𑀺𑀯𑀬𑁄 𑀆𑀳𑀼, 𑀦𑁂𑀕𑀫𑀸 𑀘 𑀲𑀫𑀸𑀕𑀢𑀸;

𑀓𑁄𑀦𑁆𑀢𑀺𑀫𑀸𑀭𑀸𑀬 𑀢𑀻𑀭𑁂𑀦, 𑀕𑀺𑀭𑀺𑀫𑀸𑀭𑀜𑁆𑀚𑀭𑀁 𑀧𑀢𑀺;

𑀬𑁂𑀦 𑀧𑀩𑁆𑀩𑀸𑀚𑀺𑀢𑀸 𑀬𑀦𑁆𑀢𑀺, 𑀢𑁂𑀦 𑀕𑀘𑁆𑀙𑀢𑀼 𑀲𑀼𑀩𑁆𑀩𑀢𑁄’’.

𑁧𑁭𑁦𑁭. ‘‘𑀲𑁄𑀳𑀁 𑀢𑁂𑀦 𑀕𑀫𑀺𑀲𑁆𑀲𑀸𑀫𑀺, 𑀬𑁂𑀦 𑀕𑀘𑁆𑀙𑀦𑁆𑀢𑀺 𑀤𑀽𑀲𑀓𑀸;

𑀭𑀢𑁆𑀢𑀺𑀦𑁆𑀤𑀺𑀯𑀁 𑀫𑁂 𑀔𑀫𑀣, 𑀬𑀸𑀯 𑀤𑀸𑀦𑀁 𑀤𑀤𑀸𑀫𑀳𑀁’’.

𑁧𑁭𑁦𑁮. ‘‘𑀆𑀫𑀦𑁆𑀢𑀬𑀺𑀢𑁆𑀣 𑀭𑀸𑀚𑀸𑀦𑀁, 𑀫𑀤𑁆𑀤𑀺𑀁 𑀲𑀩𑁆𑀩𑀗𑁆𑀕𑀲𑁄𑀪𑀦𑀁;

𑀬𑀁 𑀢𑁂 𑀓𑀺𑀜𑁆𑀘𑀺 𑀫𑀬𑀸 𑀤𑀺𑀦𑁆𑀦𑀁, 𑀥𑀦𑀁 𑀥𑀜𑁆𑀜𑀜𑁆𑀘 𑀯𑀺𑀚𑁆𑀚𑀢𑀺.

𑁧𑁭𑁦𑁯. ‘‘𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽;

𑀲𑀩𑁆𑀩𑀁 𑀢𑀁 𑀦𑀺𑀤𑀳𑁂𑀬𑁆𑀬𑀸𑀲𑀺, 𑀬𑀜𑁆𑀘 𑀢𑁂 𑀧𑁂𑀢𑁆𑀢𑀺𑀓𑀁 𑀥𑀦𑀁.

𑁧𑁭𑁧𑁦. ‘‘𑀢𑀫𑀩𑁆𑀭𑀯𑀺 𑀭𑀸𑀚𑀧𑀼𑀢𑁆𑀢𑀻, 𑀫𑀤𑁆𑀤𑀻 𑀲𑀩𑁆𑀩𑀗𑁆𑀕𑀲𑁄𑀪𑀦𑀸;

𑀓𑀼𑀳𑀺𑀁 𑀤𑁂𑀯 𑀦𑀺𑀤𑀳𑀸𑀫𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’.

𑁧𑁭𑁧𑁧. ‘‘𑀲𑀻𑀮𑀯𑀦𑁆𑀢𑁂𑀲𑀼 𑀤𑀚𑁆𑀚𑀸𑀲𑀺, 𑀤𑀸𑀦𑀁 𑀫𑀤𑁆𑀤𑀺 𑀬𑀣𑀸𑀭𑀳𑀁;

𑀦 𑀳𑀺 𑀤𑀸𑀦𑀸 𑀧𑀭𑀁 𑀅𑀢𑁆𑀣𑀺, 𑀧𑀢𑀺𑀝𑁆𑀞𑀸 𑀲𑀩𑁆𑀩𑀧𑀸𑀡𑀺𑀦𑀁.

𑁧𑁭𑁧𑁨. ‘‘𑀧𑀼𑀢𑁆𑀢𑁂𑀲𑀼 𑀫𑀤𑁆𑀤𑀺 𑀤𑀬𑁂𑀲𑀺, 𑀲𑀲𑁆𑀲𑀼𑀬𑀸 𑀲𑀲𑀼𑀭𑀫𑁆𑀳𑀺 𑀘;

𑀬𑁄 𑀘 𑀢𑀁 𑀪𑀢𑁆𑀢𑀸 𑀫𑀜𑁆𑀜𑁂𑀬𑁆𑀬, 𑀲𑀓𑁆𑀓𑀘𑁆𑀘𑀁 𑀢𑀁 𑀉𑀧𑀝𑁆𑀞𑀳𑁂.

𑁧𑁭𑁧𑁩. ‘‘𑀦𑁄 𑀘𑁂 𑀢𑀁 𑀪𑀢𑁆𑀢𑀸 𑀫𑀜𑁆𑀜𑁂𑀬𑁆𑀬, 𑀫𑀬𑀸 𑀯𑀺𑀧𑁆𑀧𑀯𑀲𑁂𑀦 𑀢𑁂;

𑀅𑀜𑁆𑀜𑀁 𑀪𑀢𑁆𑀢𑀸𑀭𑀁 𑀧𑀭𑀺𑀬𑁂𑀲, 𑀫𑀸 𑀓𑀺𑀲𑀺𑀢𑁆𑀣𑁄 [𑀫𑀸 𑀓𑀺𑀮𑀺𑀢𑁆𑀣 (𑀲𑀻. 𑀧𑀻.)] 𑀫𑀬𑀸 𑀯𑀺𑀦𑀸’’.

𑁧𑁭𑁧𑁪. ‘‘𑀅𑀳𑀜𑁆𑀳𑀺 𑀯𑀦𑀁 𑀕𑀘𑁆𑀙𑀸𑀫𑀺, 𑀖𑁄𑀭𑀁 𑀯𑀸𑀴𑀫𑀺𑀕𑀸𑀬𑀼𑀢𑀁;

𑀲𑀁𑀲𑀬𑁄 𑀚𑀻𑀯𑀺𑀢𑀁 𑀫𑀬𑁆𑀳𑀁, 𑀏𑀓𑀓𑀲𑁆𑀲 𑀩𑁆𑀭𑀳𑀸𑀯𑀦𑁂’’.

𑁧𑁭𑁧𑁫. ‘‘𑀢𑀫𑀩𑁆𑀭𑀯𑀺 𑀭𑀸𑀚𑀧𑀼𑀢𑁆𑀢𑀻, 𑀫𑀤𑁆𑀤𑀻 𑀲𑀩𑁆𑀩𑀗𑁆𑀕𑀲𑁄𑀪𑀦𑀸;

‘‘𑀅𑀪𑀼𑀫𑁆𑀫𑁂 𑀓𑀣𑀁 𑀦𑀼 𑀪𑀡𑀲𑀺, 𑀧𑀸𑀧𑀓𑀁 𑀯𑀢 𑀪𑀸𑀲𑀲𑀺.

𑁧𑁭𑁧𑁬. ‘‘𑀦𑁂𑀲 𑀥𑀫𑁆𑀫𑁄 𑀫𑀳𑀸𑀭𑀸𑀚, 𑀬𑀁 𑀢𑁆𑀯𑀁 𑀕𑀘𑁆𑀙𑁂𑀬𑁆𑀬 𑀏𑀓𑀓𑁄;

𑀅𑀳𑀫𑁆𑀧𑀺 𑀢𑁂𑀦 𑀕𑀘𑁆𑀙𑀸𑀫𑀺, 𑀬𑁂𑀦 𑀕𑀘𑁆𑀙𑀲𑀺 𑀔𑀢𑁆𑀢𑀺𑀬.

𑁧𑁭𑁧𑁭. ‘‘𑀫𑀭𑀡𑀁 𑀯𑀸 𑀢𑀬𑀸 𑀲𑀤𑁆𑀥𑀺𑀁, 𑀚𑀻𑀯𑀺𑀢𑀁 𑀯𑀸 𑀢𑀬𑀸 𑀯𑀺𑀦𑀸;

𑀢𑀤𑁂𑀯 𑀫𑀭𑀡𑀁 𑀲𑁂𑀬𑁆𑀬𑁄, 𑀬𑀁 𑀘𑁂 𑀚𑀻𑀯𑁂 𑀢𑀬𑀸 𑀯𑀺𑀦𑀸.

𑁧𑁭𑁧𑁮. ‘‘𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑀬𑀺𑀢𑁆𑀯𑀸𑀦 [𑀦𑀺𑀚𑁆𑀚𑀸𑀮𑀬𑀺𑀢𑁆𑀯𑀸𑀦 (𑀲𑀻. 𑀧𑀻.)], 𑀏𑀓𑀚𑀸𑀮𑀲𑀫𑀸𑀳𑀺𑀢𑀁;

𑀢𑀢𑁆𑀣 𑀫𑁂 [𑀢𑀢𑁆𑀣𑁂𑀯 (𑀲𑁆𑀬𑀸. 𑀓.)] 𑀫𑀭𑀡𑀁 𑀲𑁂𑀬𑁆𑀬𑁄, 𑀬𑀁 𑀘𑁂 𑀚𑀻𑀯𑁂 𑀢𑀬𑀸 𑀯𑀺𑀦𑀸.

𑁧𑁭𑁧𑁯. ‘‘𑀬𑀣𑀸 𑀆𑀭𑀜𑁆𑀜𑀓𑀁 𑀦𑀸𑀕𑀁, 𑀤𑀦𑁆𑀢𑀺𑀁 𑀅𑀦𑁆𑀯𑁂𑀢𑀺 𑀳𑀢𑁆𑀣𑀺𑀦𑀻;

𑀚𑁂𑀲𑁆𑀲𑀦𑁆𑀢𑀁 𑀕𑀺𑀭𑀺𑀤𑀼𑀕𑁆𑀕𑁂𑀲𑀼, 𑀲𑀫𑁂𑀲𑀼 𑀯𑀺𑀲𑀫𑁂𑀲𑀼 𑀘.

𑁧𑁭𑁨𑁦. ‘‘𑀏𑀯𑀁 𑀢𑀁 𑀅𑀦𑀼𑀕𑀘𑁆𑀙𑀸𑀫𑀺, 𑀧𑀼𑀢𑁆𑀢𑁂 𑀆𑀤𑀸𑀬 𑀧𑀘𑁆𑀙𑀢𑁄;

𑀲𑀼𑀪𑀭𑀸 𑀢𑁂 𑀪𑀯𑀺𑀲𑁆𑀲𑀸𑀫𑀺, 𑀦 𑀢𑁂 𑀳𑁂𑀲𑁆𑀲𑀸𑀫𑀺 𑀤𑀼𑀩𑁆𑀪𑀭𑀸.

𑁧𑁭𑁨𑁧. ‘‘𑀇𑀫𑁂 𑀓𑀼𑀫𑀸𑀭𑁂 𑀧𑀲𑁆𑀲𑀦𑁆𑀢𑁄, 𑀫𑀜𑁆𑀚𑀼𑀓𑁂 𑀧𑀺𑀬𑀪𑀸𑀡𑀺𑀦𑁂;

𑀆𑀲𑀻𑀦𑁂 [𑀆𑀲𑀦𑁂 (𑀓.)] 𑀯𑀦𑀕𑀼𑀫𑁆𑀩𑀲𑁆𑀫𑀺𑀁, 𑀦 𑀭𑀚𑁆𑀚𑀲𑁆𑀲 𑀲𑀭𑀺𑀲𑁆𑀲𑀲𑀺.

𑁧𑁭𑁨𑁨. ‘‘𑀇𑀫𑁂 𑀓𑀼𑀫𑀸𑀭𑁂 𑀧𑀲𑁆𑀲𑀦𑁆𑀢𑁄, 𑀫𑀜𑁆𑀚𑀼𑀓𑁂 𑀧𑀺𑀬𑀪𑀸𑀡𑀺𑀦𑁂;

𑀓𑀻𑀴𑀦𑁆𑀢𑁂 𑀯𑀦𑀕𑀼𑀫𑁆𑀩𑀲𑁆𑀫𑀺𑀁, 𑀦 𑀭𑀚𑁆𑀚𑀲𑁆𑀲 𑀲𑀭𑀺𑀲𑁆𑀲𑀲𑀺.

𑁧𑁭𑁨𑁩. ‘‘𑀇𑀫𑁂 𑀓𑀼𑀫𑀸𑀭𑁂 𑀧𑀲𑁆𑀲𑀦𑁆𑀢𑁄, 𑀫𑀜𑁆𑀚𑀼𑀓𑁂 𑀧𑀺𑀬𑀪𑀸𑀡𑀺𑀦𑁂;

𑀅𑀲𑁆𑀲𑀫𑁂 𑀭𑀫𑀡𑀻𑀬𑀫𑁆𑀳𑀺, 𑀦 𑀭𑀚𑁆𑀚𑀲𑁆𑀲 𑀲𑀭𑀺𑀲𑁆𑀲𑀲𑀺.

𑁧𑁭𑁨𑁪. ‘‘𑀇𑀫𑁂 𑀓𑀼𑀫𑀸𑀭𑁂 𑀧𑀲𑁆𑀲𑀦𑁆𑀢𑁄, 𑀫𑀜𑁆𑀚𑀼𑀓𑁂 𑀧𑀺𑀬𑀪𑀸𑀡𑀺𑀦𑁂;