𑁫𑁪𑁫. 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑀁 (𑁮)

𑁧𑁧𑁫𑁩. ‘‘𑀅𑀳𑀼 𑀭𑀸𑀚𑀸 𑀯𑀺𑀤𑁂𑀳𑀸𑀦𑀁, 𑀅𑀗𑁆𑀕𑀢𑀺 [𑀅𑀗𑁆𑀕𑀸𑀢𑀺 (𑀲𑀻.) 𑀏𑀯𑀫𑀼𑀧𑀭𑀺𑀧𑀺] 𑀦𑀸𑀫 𑀔𑀢𑁆𑀢𑀺𑀬𑁄;

𑀧𑀳𑀽𑀢𑀬𑁄𑀕𑁆𑀕𑁄 𑀥𑀦𑀺𑀫𑀸, 𑀅𑀦𑀦𑁆𑀢𑀩𑀮𑀧𑁄𑀭𑀺𑀲𑁄.

𑁧𑁧𑁫𑁪. 𑀲𑁄 𑀘 𑀧𑀦𑁆𑀦𑀭𑀲𑀺𑀁 [𑀧𑀦𑁆𑀦𑀭𑀲𑁂 (𑀲𑁆𑀬𑀸. 𑀓.)] 𑀭𑀢𑁆𑀢𑀺𑀁, 𑀧𑀼𑀭𑀺𑀫𑀬𑀸𑀫𑁂 𑀅𑀦𑀸𑀕𑀢𑁂;

𑀘𑀸𑀢𑀼𑀫𑀸𑀲𑀸 [𑀘𑀸𑀢𑀼𑀫𑀲𑁆𑀲 (𑀲𑀻. 𑀧𑀻.)] 𑀓𑁄𑀫𑀼𑀤𑀺𑀬𑀸, 𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑀬𑀺.

𑁧𑁧𑁫𑁫. ‘‘𑀧𑀡𑁆𑀟𑀺𑀢𑁂 𑀲𑀼𑀢𑀲𑀫𑁆𑀧𑀦𑁆𑀦𑁂, 𑀫𑀺𑀢𑀧𑀼𑀩𑁆𑀩𑁂 [𑀫𑀺𑀳𑀺𑀢𑀧𑀼𑀩𑁆𑀩𑁂 (𑀲𑀻. 𑀧𑀻.)] 𑀯𑀺𑀘𑀓𑁆𑀔𑀡𑁂;

𑀯𑀺𑀚𑀬𑀜𑁆𑀘 𑀲𑀼𑀦𑀸𑀫𑀜𑁆𑀘, 𑀲𑁂𑀦𑀸𑀧𑀢𑀺𑀁 𑀅𑀮𑀸𑀢𑀓𑀁.

𑁧𑁧𑁫𑁬. ‘‘𑀢𑀫𑀦𑀼𑀧𑀼𑀘𑁆𑀙𑀺 𑀯𑁂𑀤𑁂𑀳𑁄, ‘‘𑀧𑀘𑁆𑀘𑁂𑀓𑀁 𑀩𑁆𑀭𑀽𑀣 𑀲𑀁 𑀭𑀼𑀘𑀺𑀁;

𑀘𑀸𑀢𑀼𑀫𑀸𑀲𑀸 𑀓𑁄𑀫𑀼𑀤𑀚𑁆𑀚, 𑀚𑀼𑀡𑁆𑀳𑀁 𑀩𑁆𑀬𑀧𑀳𑀢𑀁 [𑀩𑁆𑀬𑀧𑀕𑀢𑀁 (𑀲𑀻. 𑀧𑀻.)] 𑀢𑀫𑀁;

𑀓𑀸𑀬𑀚𑁆𑀚 𑀭𑀢𑀺𑀬𑀸 𑀭𑀢𑁆𑀢𑀺𑀁, 𑀯𑀺𑀳𑀭𑁂𑀫𑀼 𑀇𑀫𑀁 𑀉𑀢𑀼𑀁’’.

𑁧𑁧𑁫𑁭. ‘‘𑀢𑀢𑁄 𑀲𑁂𑀦𑀸𑀧𑀢𑀺 𑀭𑀜𑁆𑀜𑁄, 𑀅𑀮𑀸𑀢𑁄 𑀏𑀢𑀤𑀩𑁆𑀭𑀯𑀺;

‘‘𑀳𑀝𑁆𑀞𑀁 𑀬𑁄𑀕𑁆𑀕𑀁 𑀩𑀮𑀁 𑀲𑀩𑁆𑀩𑀁, 𑀲𑁂𑀦𑀁 𑀲𑀦𑁆𑀦𑀸𑀳𑀬𑀸𑀫𑀲𑁂.

𑁧𑁧𑁫𑁮. ‘‘𑀦𑀺𑀬𑁆𑀬𑀸𑀫 𑀤𑁂𑀯 𑀬𑀼𑀤𑁆𑀥𑀸𑀬, 𑀅𑀦𑀦𑁆𑀢𑀩𑀮𑀧𑁄𑀭𑀺𑀲𑀸;

𑀬𑁂 𑀢𑁂 𑀯𑀲𑀁 𑀦 𑀆𑀬𑀦𑁆𑀢𑀺, 𑀯𑀲𑀁 𑀉𑀧𑀦𑀬𑀸𑀫𑀲𑁂 [𑀉𑀧𑀦𑀺𑀬𑁆𑀬𑀸𑀫𑀲𑁂 (𑀓.)];

𑀏𑀲𑀸 𑀫𑀬𑁆𑀳𑀁 𑀲𑀓𑀸 𑀤𑀺𑀝𑁆𑀞𑀺, 𑀅𑀚𑀺𑀢𑀁 𑀑𑀚𑀺𑀦𑀸𑀫𑀲𑁂.

𑁧𑁧𑁫𑁯. 𑀅𑀮𑀸𑀢𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀲𑀼𑀦𑀸𑀫𑁄 𑀏𑀢𑀤𑀩𑁆𑀭𑀯𑀺;

‘‘𑀲𑀩𑁆𑀩𑁂 𑀢𑀼𑀬𑁆𑀳𑀁 𑀫𑀳𑀸𑀭𑀸𑀚, 𑀅𑀫𑀺𑀢𑁆𑀢𑀸 𑀯𑀲𑀫𑀸𑀕𑀢𑀸.

𑁧𑁧𑁬𑁦. ‘‘𑀦𑀺𑀓𑁆𑀔𑀺𑀢𑁆𑀢𑀲𑀢𑁆𑀣𑀸 𑀧𑀘𑁆𑀘𑀢𑁆𑀣𑀸, 𑀦𑀺𑀯𑀸𑀢𑀫𑀦𑀼𑀯𑀢𑁆𑀢𑀭𑁂;

𑀉𑀢𑁆𑀢𑀫𑁄 𑀉𑀲𑁆𑀲𑀯𑁄 𑀅𑀚𑁆𑀚, 𑀦 𑀬𑀼𑀤𑁆𑀥𑀁 𑀫𑀫 𑀭𑀼𑀘𑁆𑀘𑀢𑀺.

𑁧𑁧𑁬𑁧. ‘‘𑀅𑀦𑁆𑀦𑀧𑀸𑀦𑀜𑁆𑀘 𑀔𑀚𑁆𑀚𑀜𑁆𑀘, 𑀔𑀺𑀧𑁆𑀧𑀁 𑀅𑀪𑀺𑀳𑀭𑀦𑁆𑀢𑀼 𑀢𑁂;

𑀭𑀫𑀲𑁆𑀲𑀼 𑀤𑁂𑀯 𑀓𑀸𑀫𑁂𑀳𑀺, 𑀦𑀘𑁆𑀘𑀕𑀻𑀢𑁂 𑀲𑀼𑀯𑀸𑀤𑀺𑀢𑁂’’.

𑁧𑁧𑁬𑁨. 𑀲𑀼𑀦𑀸𑀫𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀯𑀺𑀚𑀬𑁄 𑀏𑀢𑀤𑀩𑁆𑀭𑀯𑀺;

‘‘𑀲𑀩𑁆𑀩𑁂 𑀓𑀸𑀫𑀸 𑀫𑀳𑀸𑀭𑀸𑀚, 𑀦𑀺𑀘𑁆𑀘𑀁 𑀢𑀯 𑀫𑀼𑀧𑀝𑁆𑀞𑀺𑀢𑀸.

𑁧𑁧𑁬𑁩. ‘‘𑀦 𑀳𑁂𑀢𑁂 𑀤𑀼𑀮𑁆𑀮𑀪𑀸 𑀤𑁂𑀯, 𑀢𑀯 𑀓𑀸𑀫𑁂𑀳𑀺 𑀫𑁄𑀤𑀺𑀢𑀼𑀁;

𑀲𑀤𑀸𑀧𑀺 𑀓𑀸𑀫𑀸 𑀲𑀼𑀮𑀪𑀸, 𑀦𑁂𑀢𑀁 𑀘𑀺𑀢𑁆𑀢𑀫𑀢𑀁 [𑀘𑀺𑀢𑁆𑀢𑀁 𑀫𑀢𑀻 (𑀓.)] 𑀫𑀫.

𑁧𑁧𑁬𑁪. ‘‘𑀲𑀫𑀡𑀁 𑀩𑁆𑀭𑀸𑀳𑁆𑀫𑀡𑀁 𑀯𑀸𑀧𑀺, 𑀉𑀧𑀸𑀲𑁂𑀫𑀼 𑀩𑀳𑀼𑀲𑁆𑀲𑀼𑀢𑀁;

𑀬𑁄 𑀦𑀚𑁆𑀚 𑀯𑀺𑀦𑀬𑁂 𑀓𑀗𑁆𑀔𑀁, 𑀅𑀢𑁆𑀣𑀥𑀫𑁆𑀫𑀯𑀺𑀤𑀽 𑀇𑀲𑁂’’.

𑁧𑁧𑁬𑁫. 𑀯𑀺𑀚𑀬𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀭𑀸𑀚𑀸 𑀅𑀗𑁆𑀕𑀢𑀺 𑀫𑀩𑁆𑀭𑀯𑀺;

‘‘𑀬𑀣𑀸 𑀯𑀺𑀚𑀬𑁄 𑀪𑀡𑀢𑀺, 𑀫𑀬𑁆𑀳𑀫𑁆𑀧𑁂𑀢𑀁𑀯 𑀭𑀼𑀘𑁆𑀘𑀢𑀺.

𑁧𑁧𑁬𑁬. ‘‘𑀲𑀫𑀡𑀁 𑀩𑁆𑀭𑀸𑀳𑁆𑀫𑀡𑀁 𑀯𑀸𑀧𑀺, 𑀉𑀧𑀸𑀲𑁂𑀫𑀼 𑀩𑀳𑀼𑀲𑁆𑀲𑀼𑀢𑀁;

𑀬𑁄 𑀦𑀚𑁆𑀚 𑀯𑀺𑀦𑀬𑁂 𑀓𑀗𑁆𑀔𑀁, 𑀅𑀢𑁆𑀣𑀥𑀫𑁆𑀫𑀯𑀺𑀤𑀽 𑀇𑀲𑁂.

𑁧𑁧𑁬𑁭. ‘‘𑀲𑀩𑁆𑀩𑁂𑀯 𑀲𑀦𑁆𑀢𑀸 𑀓𑀭𑁄𑀣 𑀫𑀢𑀺𑀁, 𑀓𑀁 𑀉𑀧𑀸𑀲𑁂𑀫𑀼 𑀧𑀡𑁆𑀟𑀺𑀢𑀁;

𑀬𑁄 [𑀓𑁄 (𑀲𑀻. 𑀧𑀻.)] 𑀦𑀚𑁆𑀚 𑀯𑀺𑀦𑀬𑁂 𑀓𑀗𑁆𑀔𑀁, 𑀅𑀢𑁆𑀣𑀥𑀫𑁆𑀫𑀯𑀺𑀤𑀽 𑀇𑀲𑁂’’.

𑁧𑁧𑁬𑁮. ‘‘𑀯𑁂𑀤𑁂𑀳𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀅𑀮𑀸𑀢𑁄 𑀏𑀢𑀤𑀩𑁆𑀭𑀯𑀺;

‘‘𑀅𑀢𑁆𑀣𑀸𑀬𑀁 𑀫𑀺𑀕𑀤𑀸𑀬𑀲𑁆𑀫𑀺𑀁, 𑀅𑀘𑁂𑀮𑁄 𑀥𑀻𑀭𑀲𑀫𑁆𑀫𑀢𑁄.

𑁧𑁧𑁬𑁯. ‘‘𑀕𑀼𑀡𑁄 𑀓𑀲𑁆𑀲𑀧𑀕𑁄𑀢𑁆𑀢𑀸𑀬𑀁, 𑀲𑀼𑀢𑁄 𑀘𑀺𑀢𑁆𑀭𑀓𑀣𑀻 𑀕𑀡𑀻;

𑀢𑀁 𑀤𑁂𑀯 [𑀢𑀤𑁂𑀯 (𑀓.)] 𑀧𑀬𑀺𑀭𑀼𑀧𑀸𑀲𑁂𑀫𑀼 [𑀧𑀬𑀺𑀭𑀼𑀧𑀸𑀲𑀬 (𑀲𑀻. 𑀧𑀻.)], 𑀲𑁄 𑀦𑁄 𑀓𑀗𑁆𑀔𑀁 𑀯𑀺𑀦𑁂𑀲𑁆𑀲𑀢𑀺’’.

𑁧𑁧𑁭𑁦. ‘‘𑀅𑀮𑀸𑀢𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀭𑀸𑀚𑀸 𑀘𑁄𑀤𑁂𑀲𑀺 𑀲𑀸𑀭𑀣𑀺𑀁;

‘‘𑀫𑀺𑀕𑀤𑀸𑀬𑀁 𑀕𑀫𑀺𑀲𑁆𑀲𑀸𑀫, 𑀬𑀼𑀢𑁆𑀢𑀁 𑀬𑀸𑀦𑀁 𑀇𑀥𑀸𑀦𑀬’’.

𑁧𑁧𑁭𑁧. 𑀢𑀲𑁆𑀲 𑀬𑀸𑀦𑀁 𑀅𑀬𑁄𑀚𑁂𑀲𑀼𑀁, 𑀤𑀦𑁆𑀢𑀁 𑀭𑀽𑀧𑀺𑀬𑀧𑀓𑁆𑀔𑀭𑀁 [𑀭𑀽𑀧𑀺𑀬𑀼𑀧𑀓𑁆𑀔𑀭𑀁 (𑀓.)];

𑀲𑀼𑀓𑁆𑀓𑀫𑀝𑁆𑀞𑀧𑀭𑀺𑀯𑀸𑀭𑀁, 𑀧𑀡𑁆𑀟𑀭𑀁 𑀤𑁄𑀲𑀺𑀦𑀸𑀫𑀼𑀔𑀁.

𑁧𑁧𑁭𑁨. ‘‘𑀢𑀢𑁆𑀭𑀸𑀲𑀼𑀁 𑀓𑀼𑀫𑀼𑀤𑀸𑀬𑀼𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀲𑀺𑀦𑁆𑀥𑀯𑀸 𑀳𑀬𑀸;

𑀅𑀦𑀺𑀮𑀽𑀧𑀫𑀲𑀫𑀼𑀧𑁆𑀧𑀸𑀢𑀸 [𑀅𑀦𑀺𑀮𑀽𑀧𑀫𑀲𑀫𑀼𑀧𑁆𑀧𑀸𑀤𑀸 (𑀓.)], 𑀲𑀼𑀤𑀦𑁆𑀢𑀸 𑀲𑁄𑀡𑁆𑀡𑀫𑀸𑀮𑀺𑀦𑁄.

𑁧𑁧𑁭𑁩. ‘‘𑀲𑁂𑀢𑀘𑁆𑀙𑀢𑁆𑀢𑀁 𑀲𑁂𑀢𑀭𑀣𑁄, 𑀲𑁂𑀢𑀲𑁆𑀲𑀸 𑀲𑁂𑀢𑀩𑀻𑀚𑀦𑀻;

𑀯𑁂𑀤𑁂𑀳𑁄 𑀲𑀳𑀫𑀘𑁆𑀘𑁂𑀳𑀺, 𑀦𑀺𑀬𑁆𑀬𑀁 𑀘𑀦𑁆𑀤𑁄𑀯 𑀲𑁄𑀪𑀢𑀺.

𑁧𑁧𑁭𑁪. ‘‘𑀢𑀫𑀦𑀼𑀬𑀸𑀬𑀺𑀁𑀲𑀼 𑀩𑀳𑀯𑁄, 𑀇𑀦𑁆𑀤𑀺𑀔𑀕𑁆𑀕𑀥𑀭𑀸 [𑀇𑀦𑁆𑀤𑀔𑀕𑁆𑀕𑀥𑀭𑀸 (𑀲𑀻.), 𑀇𑀝𑁆𑀞𑀺𑀔𑀕𑁆𑀕𑀥𑀭𑀸 (𑀧𑀻.)] 𑀩𑀮𑀻;

𑀅𑀲𑁆𑀲𑀧𑀺𑀝𑁆𑀞𑀺𑀕𑀢𑀸 𑀯𑀻𑀭𑀸, 𑀦𑀭𑀸 𑀦𑀭𑀯𑀭𑀸𑀥𑀺𑀧𑀁.

𑁧𑁧𑁭𑁫. 𑀲𑁄 𑀫𑀼𑀳𑀼𑀢𑁆𑀢𑀁𑀯 𑀬𑀸𑀬𑀺𑀢𑁆𑀯𑀸, 𑀬𑀸𑀦𑀸 𑀑𑀭𑀼𑀬𑁆𑀳 𑀔𑀢𑁆𑀢𑀺𑀬𑁄;

𑀯𑁂𑀤𑁂𑀳𑁄 𑀲𑀳𑀫𑀘𑁆𑀘𑁂𑀳𑀺, 𑀧𑀢𑁆𑀢𑀻 𑀕𑀼𑀡𑀫𑀼𑀧𑀸𑀕𑀫𑀺.

𑁧𑁧𑁭𑁬. 𑀬𑁂𑀧𑀺 𑀢𑀢𑁆𑀣 𑀢𑀤𑀸 𑀆𑀲𑀼𑀁, 𑀩𑁆𑀭𑀸𑀳𑁆𑀫𑀡𑀺𑀩𑁆𑀪𑀸 𑀲𑀫𑀸𑀕𑀢𑀸;

𑀦 𑀢𑁂 𑀅𑀧𑀦𑀬𑀻 𑀭𑀸𑀚𑀸, 𑀅𑀓𑀢𑀁 𑀪𑀽𑀫𑀺𑀫𑀸𑀕𑀢𑁂.

𑁧𑁧𑁭𑁭. ‘‘𑀢𑀢𑁄 𑀲𑁄 𑀫𑀼𑀤𑀼𑀓𑀸 𑀪𑀺𑀲𑀺𑀬𑀸, 𑀫𑀼𑀤𑀼𑀘𑀺𑀢𑁆𑀢𑀓𑀲𑀦𑁆𑀣𑀢𑁂 [𑀫𑀼𑀤𑀼𑀘𑀺𑀢𑁆𑀢𑀓𑀴𑀦𑁆𑀤𑀓𑁂 (𑀲𑀻. 𑀧𑀻.)];

𑀫𑀼𑀤𑀼𑀧𑀘𑁆𑀘𑀢𑁆𑀣𑀢𑁂 𑀭𑀸𑀚𑀸, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺.

𑁧𑁧𑁭𑁮. ‘‘𑀦𑀺𑀲𑀚𑁆𑀚 𑀭𑀸𑀚𑀸 𑀲𑀫𑁆𑀫𑁄𑀤𑀺, 𑀓𑀣𑀁 𑀲𑀸𑀭𑀡𑀺𑀬𑀁 𑀢𑀢𑁄;

‘‘𑀓𑀘𑁆𑀘𑀺 𑀬𑀸𑀧𑀦𑀺𑀬𑀁 𑀪𑀦𑁆𑀢𑁂, 𑀯𑀸𑀢𑀸𑀦𑀫𑀯𑀺𑀬𑀕𑁆𑀕𑀢𑀸 [𑀯𑀸𑀢𑀸𑀦𑀫𑀯𑀺𑀲𑀕𑁆𑀕𑀢𑀸 (𑀲𑀻. 𑀧𑀻.), 𑀯𑀸𑀢𑀸𑀦𑀫𑀯𑀺𑀬𑀢𑁆𑀢𑀢𑀸 (𑀲𑁆𑀬𑀸.)].

𑁧𑁧𑁭𑁯. ‘‘𑀓𑀘𑁆𑀘𑀺 𑀅𑀓𑀲𑀺𑀭𑀸 𑀯𑀼𑀢𑁆𑀢𑀺, 𑀮𑀪𑀲𑀺 [𑀮𑀩𑁆𑀪𑀢𑀺 (𑀲𑀻. 𑀧𑀻.)] 𑀧𑀺𑀡𑁆𑀟𑀬𑀸𑀧𑀦𑀁 [𑀧𑀺𑀡𑁆𑀟𑀺𑀬𑀸𑀧𑀦𑀁 (𑀲𑁆𑀬𑀸. 𑀓.)];

𑀅𑀧𑀸𑀩𑀸𑀥𑁄 𑀘𑀲𑀺 𑀓𑀘𑁆𑀘𑀺, 𑀘𑀓𑁆𑀔𑀼𑀁 𑀦 𑀧𑀭𑀺𑀳𑀸𑀬𑀢𑀺’’.

𑁧𑁧𑁮𑁦. 𑀢𑀁 𑀕𑀼𑀡𑁄 𑀧𑀝𑀺𑀲𑀫𑁆𑀫𑁄𑀤𑀺, 𑀯𑁂𑀤𑁂𑀳𑀁 𑀯𑀺𑀦𑀬𑁂 𑀭𑀢𑀁;

‘‘𑀬𑀸𑀧𑀦𑀻𑀬𑀁 𑀫𑀳𑀸𑀭𑀸𑀚, 𑀲𑀩𑁆𑀩𑀫𑁂𑀢𑀁 𑀢𑀤𑀽𑀪𑀬𑀁.

𑁧𑁧𑁮𑁧. ‘‘𑀓𑀘𑁆𑀘𑀺 𑀢𑀼𑀬𑁆𑀳𑀫𑁆𑀧𑀺 𑀯𑁂𑀤𑁂𑀳, 𑀧𑀘𑁆𑀘𑀦𑁆𑀢𑀸 𑀦 𑀩𑀮𑀻𑀬𑀭𑁂;

𑀓𑀘𑁆𑀘𑀺 𑀅𑀭𑁄𑀕𑀁 𑀬𑁄𑀕𑁆𑀕𑀁 𑀢𑁂, 𑀓𑀘𑁆𑀘𑀺 𑀯𑀳𑀢𑀺 𑀯𑀸𑀳𑀦𑀁;

𑀓𑀘𑁆𑀘𑀺 𑀢𑁂 𑀩𑁆𑀬𑀸𑀥𑀬𑁄 𑀦𑀢𑁆𑀣𑀺, 𑀲𑀭𑀻𑀭𑀲𑁆𑀲𑀼𑀧𑀢𑀸𑀧𑀺𑀬𑀸’’ [𑀲𑀭𑀻𑀭𑀲𑁆𑀲𑀼𑀧𑀢𑀸𑀧𑀺𑀓𑀸 (𑀲𑀻. 𑀧𑀻.), 𑀲𑀭𑀻𑀭𑀲𑁆𑀲𑀼𑀧𑀢𑀸𑀧𑀦𑀸 (?)].

𑁧𑁧𑁮𑁨. 𑀧𑀝𑀺𑀲𑀫𑁆𑀫𑁄𑀤𑀺𑀢𑁄 𑀭𑀸𑀚𑀸, 𑀢𑀢𑁄 𑀧𑀼𑀘𑁆𑀙𑀺 𑀅𑀦𑀦𑁆𑀢𑀭𑀸;

𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀜𑀸𑀬𑀜𑁆𑀘, 𑀥𑀫𑁆𑀫𑀓𑀸𑀫𑁄 𑀭𑀣𑁂𑀲𑀪𑁄.

𑁧𑁧𑁮𑁩. ‘‘𑀓𑀣𑀁 𑀥𑀫𑁆𑀫𑀁 𑀘𑀭𑁂 𑀫𑀘𑁆𑀘𑁄, 𑀫𑀸𑀢𑀸𑀧𑀺𑀢𑀽𑀲𑀼 𑀓𑀲𑁆𑀲𑀧;

𑀓𑀣𑀁 𑀘𑀭𑁂 𑀆𑀘𑀭𑀺𑀬𑁂, 𑀧𑀼𑀢𑁆𑀢𑀤𑀸𑀭𑁂 𑀓𑀣𑀁 𑀘𑀭𑁂.

𑁧𑁧𑁮𑁪. ‘‘𑀓𑀣𑀁 𑀘𑀭𑁂𑀬𑁆𑀬 𑀯𑀼𑀟𑁆𑀠𑁂𑀲𑀼, 𑀓𑀣𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑁂;

𑀓𑀣𑀜𑁆𑀘 𑀩𑀮𑀓𑀸𑀬𑀲𑁆𑀫𑀺𑀁, 𑀓𑀣𑀁 𑀚𑀦𑀧𑀤𑁂 𑀘𑀭𑁂.

𑁧𑁧𑁮𑁫. ‘‘𑀓𑀣𑀁 𑀥𑀫𑁆𑀫𑀁 𑀘𑀭𑀺𑀢𑁆𑀯𑀸𑀦, 𑀫𑀘𑁆𑀘𑀸 𑀕𑀘𑁆𑀙𑀦𑁆𑀢𑀺 [𑀧𑁂𑀘𑁆𑀘 𑀕𑀘𑁆𑀙𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀲𑀼𑀕𑁆𑀕𑀢𑀺𑀁;

𑀓𑀣𑀜𑁆𑀘𑁂𑀓𑁂 𑀅𑀥𑀫𑁆𑀫𑀝𑁆𑀞𑀸, 𑀧𑀢𑀦𑁆𑀢𑀺 𑀦𑀺𑀭𑀬𑀁 𑀅𑀣𑁄’’.

𑁧𑁧𑁮𑁬. ‘‘𑀯𑁂𑀤𑁂𑀳𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀓𑀲𑁆𑀲𑀧𑁄 𑀏𑀢𑀤𑀩𑁆𑀭𑀯𑀺;

‘‘‘𑀲𑀼𑀡𑁄𑀳𑀺 𑀫𑁂 𑀫𑀳𑀸𑀭𑀸𑀚, 𑀲𑀘𑁆𑀘𑀁 𑀅𑀯𑀺𑀢𑀣𑀁 𑀧𑀤𑀁.

𑁧𑁧𑁮𑁭. ‘‘‘𑀦𑀢𑁆𑀣𑀺 𑀥𑀫𑁆𑀫𑀘𑀭𑀺𑀢𑀲𑁆𑀲 [𑀥𑀫𑁆𑀫𑀲𑁆𑀲 𑀘𑀺𑀡𑁆𑀡𑀲𑁆𑀲 (𑀲𑀻.)], 𑀨𑀮𑀁 𑀓𑀮𑁆𑀬𑀸𑀡𑀧𑀸𑀧𑀓𑀁;

𑀦𑀢𑁆𑀣𑀺 𑀤𑁂𑀯 𑀧𑀭𑁄 𑀮𑁄𑀓𑁄, 𑀓𑁄 𑀢𑀢𑁄 𑀳𑀺 𑀇𑀥𑀸𑀕𑀢𑁄.

𑁧𑁧𑁮𑁮. ‘‘‘𑀦𑀢𑁆𑀣𑀺 𑀤𑁂𑀯 𑀧𑀺𑀢𑀭𑁄 𑀯𑀸, 𑀓𑀼𑀢𑁄 𑀫𑀸𑀢𑀸 𑀓𑀼𑀢𑁄 𑀧𑀺𑀢𑀸;

𑀦𑀢𑁆𑀣𑀺 𑀆𑀘𑀭𑀺𑀬𑁄 𑀦𑀸𑀫, 𑀅𑀤𑀦𑁆𑀢𑀁 𑀓𑁄 𑀤𑀫𑁂𑀲𑁆𑀲𑀢𑀺.

𑁧𑁧𑁮𑁯. ‘‘‘𑀲𑀫𑀢𑀼𑀮𑁆𑀬𑀸𑀦𑀺 𑀪𑀽𑀢𑀸𑀦𑀺, 𑀦𑀢𑁆𑀣𑀺 𑀚𑁂𑀝𑁆𑀞𑀸𑀧𑀘𑀸𑀬𑀺𑀓𑀸;

𑀦𑀢𑁆𑀣𑀺 𑀩𑀮𑀁 𑀯𑀻𑀭𑀺𑀬𑀁 𑀯𑀸, 𑀓𑀼𑀢𑁄 𑀉𑀝𑁆𑀞𑀸𑀦𑀧𑁄𑀭𑀺𑀲𑀁;

𑀦𑀺𑀬𑀢𑀸𑀦𑀺 𑀳𑀺 𑀪𑀽𑀢𑀸𑀦𑀺, 𑀬𑀣𑀸 𑀕𑁄𑀝𑀯𑀺𑀲𑁄 𑀢𑀣𑀸.

𑁧𑁧𑁯𑁦. ‘‘‘𑀮𑀤𑁆𑀥𑁂𑀬𑁆𑀬𑀁 𑀮𑀪𑀢𑁂 𑀫𑀘𑁆𑀘𑁄, 𑀢𑀢𑁆𑀣 𑀤𑀸𑀦𑀨𑀮𑀁 𑀓𑀼𑀢𑁄;

𑀦𑀢𑁆𑀣𑀺 𑀤𑀸𑀦𑀨𑀮𑀁 𑀤𑁂𑀯, 𑀅𑀯𑀲𑁄 𑀤𑁂𑀯𑀯𑀻𑀭𑀺𑀬𑁄.

𑁧𑁧𑁯𑁧. ‘‘‘𑀩𑀸𑀮𑁂𑀳𑀺 𑀤𑀸𑀦𑀁 𑀧𑀜𑁆𑀜𑀢𑁆𑀢𑀁, 𑀧𑀡𑁆𑀟𑀺𑀢𑁂𑀳𑀺 𑀧𑀝𑀺𑀘𑁆𑀙𑀺𑀢𑀁;

𑀅𑀯𑀲𑀸 𑀤𑁂𑀦𑁆𑀢𑀺 𑀥𑀻𑀭𑀸𑀦𑀁, 𑀩𑀸𑀮𑀸 𑀧𑀡𑁆𑀟𑀺𑀢𑀫𑀸𑀦𑀺𑀦𑁄.

𑁧𑁧𑁯𑁨. ‘‘‘𑀲𑀢𑁆𑀢𑀺𑀫𑁂 𑀲𑀲𑁆𑀲𑀢𑀸 𑀓𑀸𑀬𑀸, 𑀅𑀘𑁆𑀙𑁂𑀚𑁆𑀚𑀸 𑀅𑀯𑀺𑀓𑁄𑀧𑀺𑀦𑁄;

𑀢𑁂𑀚𑁄 𑀧𑀣𑀯𑀻 𑀆𑀧𑁄 𑀘, 𑀯𑀸𑀬𑁄 𑀲𑀼𑀔𑀁 𑀤𑀼𑀔𑀜𑁆𑀘𑀺𑀫𑁂;

𑀚𑀻𑀯𑁂 𑀘 𑀲𑀢𑁆𑀢𑀺𑀫𑁂 𑀓𑀸𑀬𑀸, 𑀬𑁂𑀲𑀁 𑀙𑁂𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺.

𑁧𑁧𑁯𑁩. ‘‘‘𑀦𑀢𑁆𑀣𑀺 𑀳𑀦𑁆𑀢𑀸 𑀯 𑀙𑁂𑀢𑁆𑀢𑀸 𑀯𑀸, 𑀳𑀜𑁆𑀜𑁂 𑀬𑁂𑀯𑀸𑀧𑀺 [𑀳𑀜𑁆𑀜𑀭𑁂 𑀯𑀸𑀧𑀺 (𑀲𑀻. 𑀲𑁆𑀬𑀸. 𑀧𑀻.)] 𑀓𑁄𑀘𑀺 𑀦𑀁;

𑀅𑀦𑁆𑀢𑀭𑁂𑀦𑁂𑀯 𑀓𑀸𑀬𑀸𑀦𑀁, 𑀲𑀢𑁆𑀣𑀸𑀦𑀺 𑀯𑀻𑀢𑀺𑀯𑀢𑁆𑀢𑀭𑁂.

𑁧𑁧𑁯𑁪. ‘‘‘𑀬𑁄 𑀘𑀸𑀧𑀺 [𑀬𑁄𑀧𑀸𑀬𑀁 (𑀲𑀻. 𑀧𑀻.), 𑀬𑁄 𑀘𑀸𑀬𑀁 (𑀲𑁆𑀬𑀸. 𑀓.)] 𑀲𑀺𑀭𑀫𑀸𑀤𑀸𑀬, 𑀧𑀭𑁂𑀲𑀁 𑀦𑀺𑀲𑀺𑀢𑀸𑀲𑀺𑀦𑀸;

𑀦 𑀲𑁄 𑀙𑀺𑀦𑁆𑀤𑀢𑀺 𑀢𑁂 𑀓𑀸𑀬𑁂, 𑀢𑀢𑁆𑀣 𑀧𑀸𑀧𑀨𑀮𑀁 𑀓𑀼𑀢𑁄.

𑁧𑁧𑁯𑁫. ‘‘‘𑀘𑀼𑀮𑁆𑀮𑀸𑀲𑀻𑀢𑀺𑀫𑀳𑀸𑀓𑀧𑁆𑀧𑁂, 𑀲𑀩𑁆𑀩𑁂 𑀲𑀼𑀚𑁆𑀛𑀦𑁆𑀢𑀺 𑀲𑀁𑀲𑀭𑀁;

𑀅𑀦𑀸𑀕𑀢𑁂 𑀢𑀫𑁆𑀳𑀺 𑀓𑀸𑀮𑁂, 𑀲𑀜𑁆𑀜𑀢𑁄𑀧𑀺 𑀦 𑀲𑀼𑀚𑁆𑀛𑀢𑀺.

𑁧𑁧𑁯𑁬. ‘‘‘𑀘𑀭𑀺𑀢𑁆𑀯𑀸𑀧𑀺 𑀩𑀳𑀼𑀁 𑀪𑀤𑁆𑀭𑀁, 𑀦𑁂𑀯 𑀲𑀼𑀚𑁆𑀛𑀦𑁆𑀢𑀺𑀦𑀸𑀕𑀢𑁂;

𑀧𑀸𑀧𑀜𑁆𑀘𑁂𑀧𑀺 𑀩𑀳𑀼𑀁 𑀓𑀢𑁆𑀯𑀸, 𑀢𑀁 𑀔𑀡𑀁 𑀦𑀸𑀢𑀺𑀯𑀢𑁆𑀢𑀭𑁂.

𑁧𑁧𑁯𑁭. ‘‘‘𑀅𑀦𑀼𑀧𑀼𑀩𑁆𑀩𑁂𑀦 𑀦𑁄 𑀲𑀼𑀤𑁆𑀥𑀺, 𑀓𑀧𑁆𑀧𑀸𑀦𑀁 𑀘𑀼𑀮𑁆𑀮𑀲𑀻𑀢𑀺𑀬𑀸;

𑀦𑀺𑀬𑀢𑀺𑀁 𑀦𑀸𑀢𑀺𑀯𑀢𑁆𑀢𑀸𑀫, 𑀯𑁂𑀮𑀦𑁆𑀢𑀫𑀺𑀯 𑀲𑀸𑀕𑀭𑁄’’’.

𑁧𑁧𑁯𑁮. 𑀓𑀲𑁆𑀲𑀧𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀅𑀮𑀸𑀢𑁄 𑀏𑀢𑀤𑀩𑁆𑀭𑀯𑀺;

‘‘𑀬𑀣𑀸 𑀪𑀤𑀦𑁆𑀢𑁄 𑀪𑀡𑀢𑀺, 𑀫𑀬𑁆𑀳𑀫𑁆𑀧𑁂𑀢𑀁𑀯 𑀭𑀼𑀘𑁆𑀘𑀢𑀺.

𑁧𑁧𑁯𑁯. ‘‘𑀅𑀳𑀫𑁆𑀧𑀺 𑀧𑀼𑀭𑀺𑀫𑀁 𑀚𑀸𑀢𑀺𑀁, 𑀲𑀭𑁂 𑀲𑀁𑀲𑀭𑀺𑀢𑀢𑁆𑀢𑀦𑁄;

𑀧𑀺𑀗𑁆𑀕𑀮𑁄 𑀦𑀸𑀫𑀳𑀁 𑀆𑀲𑀺𑀁, 𑀮𑀼𑀤𑁆𑀤𑁄 𑀕𑁄𑀖𑀸𑀢𑀓𑁄 𑀧𑀼𑀭𑁂.

𑁧𑁨𑁦𑁦. ‘‘𑀩𑀸𑀭𑀸𑀡𑀲𑀺𑀬𑀁 𑀨𑀻𑀢𑀸𑀬𑀁, 𑀩𑀳𑀼𑀁 𑀧𑀸𑀧𑀁 𑀓𑀢𑀁 𑀫𑀬𑀸;

𑀩𑀳𑀽 𑀫𑀬𑀸 𑀳𑀢𑀸 𑀧𑀸𑀡𑀸, 𑀫𑀳𑀺𑀁𑀲𑀸 𑀲𑀽𑀓𑀭𑀸 𑀅𑀚𑀸.

𑁧𑁨𑁦𑁧. ‘‘𑀢𑀢𑁄 𑀘𑀼𑀢𑁄 𑀇𑀥 𑀚𑀸𑀢𑁄, 𑀇𑀤𑁆𑀥𑁂 𑀲𑁂𑀦𑀸𑀧𑀢𑀻𑀓𑀼𑀮𑁂;

𑀦𑀢𑁆𑀣𑀺 𑀦𑀽𑀦 𑀨𑀮𑀁 𑀧𑀸𑀧𑀁, 𑀬𑁄𑀳𑀁 [𑀧𑀸𑀧𑁂 𑀲𑁄𑀳𑀁 (𑀲𑀻. 𑀧𑀻.)] 𑀦 𑀦𑀺𑀭𑀬𑀁 𑀕𑀢𑁄.

𑁧𑁨𑁦𑁨. 𑀅𑀣𑁂𑀢𑁆𑀣 𑀩𑀻𑀚𑀓𑁄 𑀦𑀸𑀫, 𑀤𑀸𑀲𑁄 𑀆𑀲𑀺 𑀧𑀝𑀘𑁆𑀘𑀭𑀻 [𑀧𑀴𑀘𑁆𑀘𑀭𑀻 (𑀲𑀻. 𑀧𑀻.), 𑀧𑀝𑀚𑁆𑀚𑀭𑀻 (𑀓.)];

𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁄, 𑀕𑀼𑀡𑀲𑀦𑁆𑀢𑀺𑀓𑀼𑀧𑀸𑀕𑀫𑀺.

𑁧𑁨𑁦𑁩. 𑀓𑀲𑁆𑀲𑀧𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀅𑀮𑀸𑀢𑀲𑁆𑀲 𑀘 𑀪𑀸𑀲𑀺𑀢𑀁;

𑀧𑀲𑁆𑀲𑀲𑀦𑁆𑀢𑁄 𑀫𑀼𑀳𑀼𑀁 𑀉𑀡𑁆𑀳𑀁, 𑀭𑀼𑀤𑀁 𑀅𑀲𑁆𑀲𑀽𑀦𑀺 𑀯𑀢𑁆𑀢𑀬𑀺.

𑁧𑁨𑁦𑁪. 𑀢𑀫𑀦𑀼𑀧𑀼𑀘𑁆𑀙𑀺 𑀯𑁂𑀤𑁂𑀳𑁄, ‘‘𑀓𑀺𑀫𑀢𑁆𑀣𑀁 𑀲𑀫𑁆𑀫 𑀭𑁄𑀤𑀲𑀺;

𑀓𑀺𑀁 𑀢𑁂 𑀲𑀼𑀢𑀁 𑀯𑀸 𑀤𑀺𑀝𑁆𑀞𑀁 𑀯𑀸, 𑀓𑀺𑀁 𑀫𑀁 𑀯𑁂𑀤𑁂𑀲𑀺 𑀯𑁂𑀤𑀦𑀁’’.

𑁧𑁨𑁦𑁫. 𑀯𑁂𑀤𑁂𑀳𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀩𑀻𑀚𑀓𑁄 𑀏𑀢𑀤𑀩𑁆𑀭𑀯𑀺;

‘‘𑀦𑀢𑁆𑀣𑀺 𑀫𑁂 𑀯𑁂𑀤𑀦𑀸 𑀤𑀼𑀓𑁆𑀔𑀸, 𑀫𑀳𑀸𑀭𑀸𑀚 𑀲𑀼𑀡𑁄𑀳𑀺 𑀫𑁂.

𑁧𑁨𑁦𑁬. ‘‘𑀅𑀳𑀫𑁆𑀧𑀺 𑀧𑀼𑀭𑀺𑀫𑀁 𑀚𑀸𑀢𑀺𑀁, 𑀲𑀭𑀸𑀫𑀺 𑀲𑀼𑀔𑀫𑀢𑁆𑀢𑀦𑁄;

𑀲𑀸𑀓𑁂𑀢𑀸𑀳𑀁 𑀧𑀼𑀭𑁂 𑀆𑀲𑀺𑀁, 𑀪𑀸𑀯𑀲𑁂𑀝𑁆𑀞𑀺 𑀕𑀼𑀡𑁂 𑀭𑀢𑁄.

𑁧𑁨𑁦𑁭. ‘‘𑀲𑀫𑁆𑀫𑀢𑁄 𑀩𑁆𑀭𑀸𑀳𑁆𑀫𑀡𑀺𑀩𑁆𑀪𑀸𑀦𑀁, 𑀲𑀁𑀯𑀺𑀪𑀸𑀕𑀭𑀢𑁄 𑀲𑀼𑀘𑀺;

𑀦 𑀘𑀸𑀧𑀺 𑀧𑀸𑀧𑀓𑀁 𑀓𑀫𑁆𑀫𑀁, 𑀲𑀭𑀸𑀫𑀺 𑀓𑀢𑀫𑀢𑁆𑀢𑀦𑁄.

𑁧𑁨𑁦𑁮. ‘‘𑀢𑀢𑁄 𑀘𑀼𑀢𑀸𑀳𑀁 𑀯𑁂𑀤𑁂𑀳, 𑀇𑀥 𑀚𑀸𑀢𑁄 𑀤𑀼𑀭𑀺𑀢𑁆𑀣𑀺𑀬𑀸;

𑀕𑀩𑁆𑀪𑀫𑁆𑀳𑀺 𑀓𑀼𑀫𑁆𑀪𑀤𑀸𑀲𑀺𑀬𑀸, 𑀬𑀢𑁄 𑀚𑀸𑀢𑁄 𑀲𑀼𑀤𑀼𑀕𑁆𑀕𑀢𑁄.

𑁧𑁨𑁦𑁯. ‘‘𑀏𑀯𑀫𑁆𑀧𑀺 𑀤𑀼𑀕𑁆𑀕𑀢𑁄 𑀲𑀦𑁆𑀢𑁄, 𑀲𑀫𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄;

𑀉𑀧𑀟𑁆𑀠𑀪𑀸𑀕𑀁 𑀪𑀢𑁆𑀢𑀲𑁆𑀲, 𑀤𑀤𑀸𑀫𑀺 𑀬𑁄 𑀫𑁂 𑀇𑀘𑁆𑀙𑀢𑀺.

𑁧𑁨𑁧𑁦. ‘‘𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁, 𑀲𑀤𑀸 𑀉𑀧𑀯𑀲𑀸𑀫𑀳𑀁;

𑀦 𑀘𑀸𑀧𑀺 [𑀦 𑀅𑀳𑀁 (𑀓.)] 𑀪𑀽𑀢𑁂 𑀳𑀺𑀁𑀲𑀸𑀫𑀺, 𑀣𑁂𑀬𑁆𑀬𑀜𑁆𑀘𑀸𑀧𑀺 𑀯𑀺𑀯𑀚𑁆𑀚𑀬𑀺𑀁.

𑁧𑁨𑁧𑁧. ‘‘𑀲𑀩𑁆𑀩𑀫𑁂𑀯 𑀳𑀺 𑀦𑀽𑀦𑁂𑀢𑀁, 𑀲𑀼𑀘𑀺𑀡𑁆𑀡𑀁 𑀪𑀯𑀢𑀺 𑀦𑀺𑀧𑁆𑀨𑀮𑀁;

𑀦𑀺𑀭𑀢𑁆𑀣𑀁 𑀫𑀜𑁆𑀜𑀺𑀤𑀁 𑀲𑀻𑀮𑀁, 𑀅𑀮𑀸𑀢𑁄 𑀪𑀸𑀲𑀢𑀻 𑀬𑀣𑀸.

𑁧𑁨𑁧𑁨. ‘‘𑀓𑀮𑀺𑀫𑁂𑀯 𑀦𑀽𑀦 𑀕𑀡𑁆𑀳𑀸𑀫𑀺, 𑀅𑀲𑀺𑀧𑁆𑀧𑁄 𑀥𑀼𑀢𑁆𑀢𑀓𑁄 𑀬𑀣𑀸;

𑀓𑀝𑀁 𑀅𑀮𑀸𑀢𑁄 𑀕𑀡𑁆𑀳𑀸𑀢𑀺, 𑀓𑀺𑀢𑀯𑁄𑀲𑀺𑀓𑁆𑀔𑀺𑀢𑁄 𑀬𑀣𑀸.

𑁧𑁨𑁧𑁩. ‘‘𑀤𑁆𑀯𑀸𑀭𑀁 𑀦𑀧𑁆𑀧𑀝𑀺𑀧𑀲𑁆𑀲𑀸𑀫𑀺, 𑀬𑁂𑀦 𑀕𑀘𑁆𑀙𑀸𑀫𑀺 𑀲𑀼𑀕𑁆𑀕𑀢𑀺𑀁;

𑀢𑀲𑁆𑀫𑀸 𑀭𑀸𑀚 𑀧𑀭𑁄𑀤𑀸𑀫𑀺, 𑀲𑀼𑀢𑁆𑀯𑀸 𑀓𑀲𑁆𑀲𑀧𑀪𑀸𑀲𑀺𑀢𑀁’’.

𑁧𑁨𑁧𑁪. 𑀩𑀻𑀚𑀓𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀭𑀸𑀚𑀸 𑀅𑀗𑁆𑀕𑀢𑀺 𑀫𑀩𑁆𑀭𑀯𑀺;

‘‘𑀦𑀢𑁆𑀣𑀺 𑀤𑁆𑀯𑀸𑀭𑀁 𑀲𑀼𑀕𑀢𑀺𑀬𑀸, 𑀦𑀺𑀬𑀢𑀺𑀁 [𑀦𑀺𑀬𑀢𑀁 (𑀲𑁆𑀬𑀸.)] 𑀓𑀗𑁆𑀔 𑀩𑀻𑀚𑀓.

𑁧𑁨𑁧𑁫. ‘‘𑀲𑀼𑀔𑀁 𑀯𑀸 𑀬𑀤𑀺 𑀯𑀸 𑀤𑀼𑀓𑁆𑀔𑀁, 𑀦𑀺𑀬𑀢𑀺𑀬𑀸 𑀓𑀺𑀭 𑀮𑀩𑁆𑀪𑀢𑀺;

𑀲𑀁𑀲𑀸𑀭𑀲𑀼𑀤𑁆𑀥𑀺 𑀲𑀩𑁆𑀩𑁂𑀲𑀁, 𑀫𑀸 𑀢𑀼𑀭𑀺𑀢𑁆𑀣𑁄 [𑀢𑀼𑀭𑀺𑀢𑁄 (𑀲𑁆𑀬𑀸.)] 𑀅𑀦𑀸𑀕𑀢𑁂.

𑁧𑁨𑁧𑁬. ‘‘𑀅𑀳𑀫𑁆𑀧𑀺 𑀧𑀼𑀩𑁆𑀩𑁂 𑀓𑀮𑁆𑀬𑀸𑀡𑁄, 𑀩𑁆𑀭𑀸𑀳𑁆𑀫𑀡𑀺𑀩𑁆𑀪𑁂𑀲𑀼 𑀩𑁆𑀬𑀸𑀯𑀝𑁄 [𑀯𑀸𑀯𑀝𑁄 (𑀓.)];

𑀯𑁄𑀳𑀸𑀭𑀫𑀦𑀼𑀲𑀸𑀲𑀦𑁆𑀢𑁄, 𑀭𑀢𑀺𑀳𑀻𑀦𑁄 𑀢𑀤𑀦𑁆𑀢𑀭𑀸’’.

𑁧𑁨𑁧𑁭. ‘‘𑀧𑀼𑀦𑀧𑀺 𑀪𑀦𑁆𑀢𑁂 𑀤𑀓𑁆𑀔𑁂𑀫𑀼, 𑀲𑀗𑁆𑀕𑀢𑀺 𑀘𑁂 𑀪𑀯𑀺𑀲𑁆𑀲𑀢𑀺’’;

𑀇𑀤𑀁 𑀯𑀢𑁆𑀯𑀸𑀦 𑀯𑁂𑀤𑁂𑀳𑁄, 𑀧𑀘𑁆𑀘𑀕𑀸 𑀲𑀦𑀺𑀯𑁂𑀲𑀦𑀁.

𑁧𑁨𑁧𑁮. 𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂, 𑀉𑀧𑀝𑁆𑀞𑀸𑀦𑀫𑁆𑀳𑀺 𑀅𑀗𑁆𑀕𑀢𑀺;

𑀅𑀫𑀘𑁆𑀘𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁧𑁨𑁧𑁯. ‘‘𑀘𑀦𑁆𑀤𑀓𑁂 𑀫𑁂 𑀯𑀺𑀫𑀸𑀦𑀲𑁆𑀫𑀺𑀁, 𑀲𑀤𑀸 𑀓𑀸𑀫𑁂 𑀯𑀺𑀥𑁂𑀦𑁆𑀢𑀼 𑀫𑁂;

𑀫𑀸 𑀉𑀧𑀕𑀘𑁆𑀙𑀼𑀁 𑀅𑀢𑁆𑀣𑁂𑀲𑀼, 𑀕𑀼𑀬𑁆𑀳𑀧𑁆𑀧𑀓𑀸𑀲𑀺𑀬𑁂𑀲𑀼 𑀘.

𑁧𑁨𑁨𑁦. ‘‘𑀯𑀺𑀚𑀬𑁄 𑀘 𑀲𑀼𑀦𑀸𑀫𑁄 𑀘, 𑀲𑁂𑀦𑀸𑀧𑀢𑀺 𑀅𑀮𑀸𑀢𑀓𑁄;

𑀏𑀢𑁂 𑀅𑀢𑁆𑀣𑁂 𑀦𑀺𑀲𑀻𑀤𑀦𑁆𑀢𑀼, 𑀯𑁄𑀳𑀸𑀭𑀓𑀼𑀲𑀮𑀸 𑀢𑀬𑁄’’.

𑁧𑁨𑁨𑁧. 𑀇𑀤𑀁 𑀯𑀢𑁆𑀯𑀸𑀦 𑀯𑁂𑀤𑁂𑀳𑁄, 𑀓𑀸𑀫𑁂𑀯 𑀩𑀳𑀼𑀫𑀜𑁆𑀜𑀣;

𑀦 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑀺𑀩𑁆𑀪𑁂𑀲𑀼, 𑀅𑀢𑁆𑀣𑁂 𑀓𑀺𑀲𑁆𑀫𑀺𑀜𑁆𑀘𑀺 𑀩𑁆𑀬𑀸𑀯𑀝𑁄.

𑁧𑁨𑁨𑁨. 𑀢𑀢𑁄 𑀤𑁆𑀯𑁂𑀲𑀢𑁆𑀢𑀭𑀢𑁆𑀢𑀲𑁆𑀲, 𑀯𑁂𑀤𑁂𑀳𑀲𑁆𑀲𑀢𑁆𑀭𑀚𑀸 𑀧𑀺𑀬𑀸;

𑀭𑀸𑀚𑀓𑀜𑁆𑀜𑀸 𑀭𑀼𑀘𑀸 [𑀭𑀼𑀚𑀸 (𑀲𑀻. 𑀧𑀻.) 𑀏𑀯𑀫𑀼𑀧𑀭𑀺𑀧𑀺] 𑀦𑀸𑀫, 𑀥𑀸𑀢𑀺𑀫𑀸𑀢𑀭𑀫𑀩𑁆𑀭𑀯𑀺.

𑁧𑁨𑁨𑁩. ‘𑀅𑀮𑀗𑁆𑀓𑀭𑁄𑀣 𑀫𑀁 𑀔𑀺𑀧𑁆𑀧𑀁, 𑀲𑀔𑀺𑀬𑁄 𑀘𑀸𑀮𑀗𑁆𑀓𑀭𑁄𑀦𑁆𑀢𑀼 [𑀘 𑀓𑀭𑁄𑀦𑁆𑀢𑀼 (𑀲𑀻. 𑀧𑀻.)] 𑀫𑁂;

𑀲𑀼𑀯𑁂 𑀧𑀦𑁆𑀦𑀭𑀲𑁄 𑀤𑀺𑀩𑁆𑀬𑁄, 𑀕𑀘𑁆𑀙𑀁 𑀇𑀲𑁆𑀲𑀭𑀲𑀦𑁆𑀢𑀺𑀓𑁂’ [𑀧𑀺𑀢𑀼𑀲𑁆𑀲 𑀲𑀦𑁆𑀢𑀺𑀓𑁂 (𑀲𑁆𑀬𑀸.)].

𑁧𑁨𑁨𑁪. 𑀢𑀲𑁆𑀲𑀸 𑀫𑀸𑀮𑁆𑀬𑀁 𑀅𑀪𑀺𑀳𑀭𑀺𑀁𑀲𑀼, 𑀘𑀦𑁆𑀤𑀦𑀜𑁆𑀘 𑀫𑀳𑀸𑀭𑀳𑀁;

𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀸𑀭𑀢𑀦𑀁, 𑀦𑀸𑀦𑀸𑀭𑀢𑁆𑀢𑁂 𑀘 𑀅𑀫𑁆𑀩𑀭𑁂.