𑁫𑁪𑁪. 𑀘𑀦𑁆𑀤𑀓𑀼𑀫𑀸𑀭𑀚𑀸𑀢𑀓𑀁 (𑁭)

𑁯𑁮𑁨. ‘‘𑀭𑀸𑀚𑀸𑀲𑀺 𑀮𑀼𑀤𑁆𑀤𑀓𑀫𑁆𑀫𑁄, 𑀏𑀓𑀭𑀸𑀚𑀸 𑀧𑀼𑀧𑁆𑀨𑀯𑀢𑀻𑀬𑀸;

𑀲𑁄 𑀧𑀼𑀘𑁆𑀙𑀺 𑀩𑁆𑀭𑀳𑁆𑀫𑀩𑀦𑁆𑀥𑀼𑀁, 𑀔𑀡𑁆𑀟𑀳𑀸𑀮𑀁 𑀧𑀼𑀭𑁄𑀳𑀺𑀢𑀁 𑀫𑀽𑀴𑁆𑀳𑀁.

𑁯𑁮𑁩. ‘𑀲𑀕𑁆𑀕𑀸𑀦 𑀫𑀕𑁆𑀕𑀫𑀸𑀘𑀺𑀓𑁆𑀔 [𑀲𑀕𑁆𑀕𑀫𑀕𑁆𑀕𑀫𑀸𑀘𑀺𑀓𑁆𑀔 (𑀲𑀻. 𑀧𑀻.)], 𑀢𑁆𑀯𑀁𑀲𑀺 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀯𑀺𑀦𑀬𑀓𑀼𑀲𑀮𑁄;

𑀬𑀣𑀸 𑀇𑀢𑁄 𑀯𑀚𑀦𑁆𑀢𑀺 𑀲𑀼𑀕𑀢𑀺𑀁, 𑀦𑀭𑀸 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸𑀦’.

𑁯𑁮𑁪. ‘𑀅𑀢𑀺𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀅𑀯𑀚𑁆𑀛𑁂 𑀤𑁂𑀯 𑀖𑀸𑀢𑁂𑀢𑁆𑀯𑀸;

𑀏𑀯𑀁 𑀯𑀚𑀦𑁆𑀢𑀺 𑀲𑀼𑀕𑀢𑀺𑀁, 𑀦𑀭𑀸 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸𑀦’.

𑁯𑁮𑁫. ‘𑀓𑀺𑀁 𑀧𑀦 𑀢𑀁 𑀅𑀢𑀺𑀤𑀸𑀦𑀁, 𑀓𑁂 𑀘 𑀅𑀯𑀚𑁆𑀛𑀸 𑀇𑀫𑀲𑁆𑀫𑀺 𑀮𑁄𑀓𑀲𑁆𑀫𑀺𑀁;

𑀏𑀢𑀜𑁆𑀘 𑀔𑁄 𑀦𑁄 𑀅𑀓𑁆𑀔𑀸𑀳𑀺, 𑀬𑀚𑀺𑀲𑁆𑀲𑀸𑀫𑀺 𑀤𑀤𑀸𑀫𑀺 [𑀬𑀚𑀺𑀲𑁆𑀲𑀸𑀫 𑀤𑀤𑀸𑀫 (𑀲𑀻. 𑀧𑀻.)] 𑀤𑀸𑀦𑀸𑀦𑀺’.

𑁯𑁮𑁬. ‘𑀧𑀼𑀢𑁆𑀢𑁂𑀳𑀺 𑀤𑁂𑀯 𑀬𑀚𑀺𑀢𑀩𑁆𑀩𑀁, 𑀫𑀳𑁂𑀲𑀻𑀳𑀺 𑀦𑁂𑀕𑀫𑁂𑀳𑀺 𑀘;

𑀉𑀲𑀪𑁂𑀳𑀺 𑀆𑀚𑀸𑀦𑀺𑀬𑁂𑀳𑀺 𑀘𑀢𑀽𑀳𑀺, 𑀲𑀩𑁆𑀩𑀘𑀢𑀼𑀓𑁆𑀓𑁂𑀦 𑀤𑁂𑀯 𑀬𑀚𑀺𑀢𑀩𑁆𑀩𑀁’’’.

𑁯𑁮𑁭. ‘‘𑀢𑀁 𑀲𑀼𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑁂, 𑀓𑀼𑀫𑀸𑀭𑀸 𑀫𑀳𑁂𑀲𑀺𑀬𑁄 𑀘 𑀳𑀜𑁆𑀜𑀦𑁆𑀢𑀼;

𑀏𑀓𑁄 𑀅𑀳𑁄𑀲𑀺 𑀦𑀺𑀕𑁆𑀖𑁄𑀲𑁄, 𑀪𑀺𑀲𑁆𑀫𑀸 𑀅𑀘𑁆𑀘𑀼𑀕𑁆𑀕𑀢𑁄 𑀲𑀤𑁆𑀤𑁄’’.

𑁯𑁮𑁮. ‘‘𑀕𑀘𑁆𑀙𑀣 𑀯𑀤𑁂𑀣 𑀓𑀼𑀫𑀸𑀭𑁂, 𑀘𑀦𑁆𑀤𑀁 𑀲𑀽𑀭𑀺𑀬𑀜𑁆𑀘 𑀪𑀤𑁆𑀤𑀲𑁂𑀦𑀜𑁆𑀘;

𑀲𑀽𑀭𑀜𑁆𑀘 𑀯𑀸𑀫𑀕𑁄𑀢𑁆𑀢𑀜𑁆𑀘, 𑀧𑀘𑀼𑀭𑀸 [𑀧𑀲𑀼𑀭𑀸 (𑀲𑀻. 𑀧𑀻. 𑀓.)] 𑀓𑀺𑀭 𑀳𑁄𑀣 𑀬𑀜𑁆𑀜𑀢𑁆𑀣𑀸𑀬.

𑁯𑁮𑁯. ‘‘𑀓𑀼𑀫𑀸𑀭𑀺𑀬𑁄𑀧𑀺 𑀯𑀤𑁂𑀣, 𑀉𑀧𑀲𑁂𑀦𑀁 [𑀉𑀧𑀲𑁂𑀦𑀺𑀁 (𑀲𑀻.), 𑀉𑀧𑀲𑁂𑀡𑀺𑀁 (𑀧𑀻.)] 𑀓𑁄𑀓𑀺𑀮𑀜𑁆𑀘 𑀫𑀼𑀤𑀺𑀢𑀜𑁆𑀘;

𑀦𑀦𑁆𑀤𑀜𑁆𑀘𑀸𑀧𑀺 𑀓𑀼𑀫𑀸𑀭𑀺𑀁, 𑀧𑀘𑀼𑀭𑀸 [𑀧𑀲𑀼𑀭𑀸 (𑀲𑀻. 𑀧𑀻. 𑀓.)] 𑀓𑀺𑀭 𑀳𑁄𑀣 𑀬𑀜𑁆𑀜𑀢𑁆𑀣𑀸𑀬.

𑁯𑁯𑁦. ‘‘𑀯𑀺𑀚𑀬𑀫𑁆𑀧𑀺 𑀫𑀬𑁆𑀳𑀁 𑀫𑀳𑁂𑀲𑀺𑀁, 𑀏𑀭𑀸𑀯𑀢𑀺𑀁 [𑀏𑀓𑀧𑀢𑀺𑀁 (𑀧𑀻.), 𑀏𑀭𑀸𑀧𑀢𑀺𑀁 (𑀓.)] 𑀓𑁂𑀲𑀺𑀦𑀺𑀁 𑀲𑀼𑀦𑀦𑁆𑀤𑀜𑁆𑀘;

𑀮𑀓𑁆𑀔𑀡𑀯𑀭𑀽𑀧𑀧𑀦𑁆𑀦𑀸, 𑀧𑀘𑀼𑀭𑀸 𑀓𑀺𑀭 𑀳𑁄𑀣 𑀬𑀜𑁆𑀜𑀢𑁆𑀣𑀸𑀬.

𑁯𑁯𑁧. ‘‘𑀕𑀳𑀧𑀢𑀬𑁄 𑀘 𑀯𑀤𑁂𑀣, 𑀧𑀼𑀡𑁆𑀡𑀫𑀼𑀔𑀁 𑀪𑀤𑁆𑀤𑀺𑀬𑀁 𑀲𑀺𑀗𑁆𑀕𑀸𑀮𑀜𑁆𑀘;

𑀯𑀟𑁆𑀠𑀜𑁆𑀘𑀸𑀧𑀺 𑀕𑀳𑀧𑀢𑀺𑀁, 𑀧𑀘𑀼𑀭𑀸 𑀓𑀺𑀭 𑀳𑁄𑀣 𑀬𑀜𑁆𑀜𑀢𑁆𑀣𑀸𑀬’’.

𑁯𑁯𑁨. ‘‘𑀢𑁂 𑀢𑀢𑁆𑀣 𑀕𑀳𑀧𑀢𑀬𑁄, 𑀅𑀯𑁄𑀘𑀺𑀲𑀼𑀁 𑀲𑀫𑀸𑀕𑀢𑀸 𑀧𑀼𑀢𑁆𑀢𑀤𑀸𑀭𑀧𑀭𑀺𑀓𑀺𑀡𑁆𑀡𑀸;

𑀲𑀩𑁆𑀩𑁂𑀯 𑀲𑀺𑀔𑀺𑀦𑁄 𑀤𑁂𑀯 𑀓𑀭𑁄𑀳𑀺, 𑀅𑀣 𑀯𑀸 𑀦𑁄 𑀤𑀸𑀲𑁂 𑀲𑀸𑀯𑁂𑀳𑀺’’.

𑁯𑁯𑁩. ‘‘𑀅𑀪𑀬𑀁𑀓𑀭𑀫𑁆𑀧𑀺 𑀫𑁂 𑀳𑀢𑁆𑀣𑀺𑀁, 𑀦𑀸𑀴𑀸𑀕𑀺𑀭𑀺𑀁 𑀅𑀘𑁆𑀘𑀼𑀕𑁆𑀕𑀢𑀁 𑀯𑀭𑀼𑀡𑀤𑀦𑁆𑀢𑀁 [𑀦𑀸𑀴𑀸𑀕𑀺𑀭𑀺𑀁 𑀅𑀘𑁆𑀘𑀼𑀢𑀁 𑀯𑀭𑀼𑀡𑀤𑀦𑁆𑀢𑀁 (𑀲𑀻.), 𑀭𑀸𑀚𑀕𑀺𑀭𑀺𑀁 𑀅𑀘𑁆𑀘𑀼𑀢𑀯𑀭𑀼𑀡𑀤𑀦𑁆𑀢𑀁 (𑀧𑀻.)];

𑀆𑀦𑁂𑀣 𑀔𑁄 𑀦𑁂 𑀔𑀺𑀧𑁆𑀧𑀁, 𑀬𑀜𑁆𑀜𑀢𑁆𑀣𑀸𑀬 𑀪𑀯𑀺𑀲𑁆𑀲𑀦𑁆𑀢𑀺.

𑁯𑁯𑁪. ‘‘𑀅𑀲𑁆𑀲𑀭𑀢𑀦𑀫𑁆𑀧𑀺 [𑀅𑀲𑁆𑀲𑀢𑀭𑀫𑁆𑀧𑀺 (𑀲𑀻. 𑀧𑀻.), 𑀅𑀲𑁆𑀲𑀭𑀢𑀦𑀫𑁆𑀧𑀺 𑀫𑁂 (𑀲𑁆𑀬𑀸.)] 𑀓𑁂𑀲𑀺𑀁, 𑀲𑀼𑀭𑀸𑀫𑀼𑀔𑀁 𑀧𑀼𑀡𑁆𑀡𑀓𑀁 𑀯𑀺𑀦𑀢𑀓𑀜𑁆𑀘;

𑀆𑀦𑁂𑀣 𑀔𑁄 𑀦𑁂 𑀔𑀺𑀧𑁆𑀧𑀁, 𑀬𑀜𑁆𑀜𑀢𑁆𑀣𑀸𑀬 𑀪𑀯𑀺𑀲𑁆𑀲𑀦𑁆𑀢𑀺.

𑁯𑁯𑁫. ‘‘𑀉𑀲𑀪𑀫𑁆𑀧𑀺 [𑀉𑀲𑀪𑀫𑁆𑀧𑀺 𑀫𑁂 (𑀲𑁆𑀬𑀸.)] 𑀬𑀽𑀣𑀧𑀢𑀺𑀁 𑀅𑀦𑁄𑀚𑀁, 𑀦𑀺𑀲𑀪𑀁 𑀕𑀯𑀫𑁆𑀧𑀢𑀺𑀁 𑀢𑁂𑀧𑀺 𑀫𑀬𑁆𑀳𑀁 𑀆𑀦𑁂𑀣;

𑀲𑀫𑀽𑀳 [𑀲𑀫𑀼𑀧𑀸 (𑀲𑀻. 𑀧𑀻.), 𑀲𑀫𑁆𑀫𑀼𑀔𑀸 (𑀲𑁆𑀬𑀸.)] 𑀓𑀭𑁄𑀦𑁆𑀢𑀼 𑀲𑀩𑁆𑀩𑀁, 𑀬𑀚𑀺𑀲𑁆𑀲𑀸𑀫𑀺 𑀤𑀤𑀸𑀫𑀺 𑀤𑀸𑀦𑀸𑀦𑀺.

𑁯𑁯𑁬. ‘‘𑀲𑀩𑁆𑀩𑀁 [𑀲𑀩𑁆𑀩𑀫𑁆𑀧𑀺 (𑀲𑁆𑀬𑀸.)] 𑀧𑀝𑀺𑀬𑀸𑀤𑁂𑀣, 𑀬𑀜𑁆𑀜𑀁 𑀧𑀦 𑀉𑀕𑁆𑀕𑀢𑀫𑁆𑀳𑀺 𑀲𑀽𑀭𑀺𑀬𑀫𑁆𑀳𑀺;

𑀆𑀡𑀸𑀧𑁂𑀣 𑀘 𑀓𑀼𑀫𑀸𑀭𑁂 [𑀆𑀡𑀸𑀧𑁂𑀣 𑀘𑀦𑁆𑀤𑀓𑀼𑀫𑀸𑀭𑁂 (𑀲𑁆𑀬𑀸. 𑀓.)], 𑀅𑀪𑀺𑀭𑀫𑀦𑁆𑀢𑀼 𑀇𑀫𑀁 𑀭𑀢𑁆𑀢𑀺𑀁.

𑁯𑁯𑁭. ‘‘𑀲𑀩𑁆𑀩𑀁 [𑀲𑀩𑁆𑀩𑀫𑁆𑀧𑀺 (𑀲𑁆𑀬𑀸.)] 𑀉𑀧𑀝𑁆𑀞𑀧𑁂𑀣, 𑀬𑀜𑁆𑀜𑀁 𑀧𑀦 𑀉𑀕𑁆𑀕𑀢𑀫𑁆𑀳𑀺 𑀲𑀽𑀭𑀺𑀬𑀫𑁆𑀳𑀺;

𑀯𑀤𑁂𑀣 𑀤𑀸𑀦𑀺 𑀓𑀼𑀫𑀸𑀭𑁂, 𑀅𑀚𑁆𑀚 𑀔𑁄 [𑀯𑁄 (𑀧𑀻.)] 𑀧𑀘𑁆𑀙𑀺𑀫𑀸 𑀭𑀢𑁆𑀢𑀺’’.

𑁯𑁯𑁮. ‘‘𑀢𑀁𑀢𑀁 𑀫𑀸𑀢𑀸 𑀅𑀯𑀘, 𑀭𑁄𑀤𑀦𑁆𑀢𑀻 𑀆𑀕𑀦𑁆𑀢𑁆𑀯𑀸 𑀯𑀺𑀫𑀸𑀦𑀢𑁄;

𑀬𑀜𑁆𑀜𑁄 𑀓𑀺𑀭 𑀢𑁂 𑀧𑀼𑀢𑁆𑀢, 𑀪𑀯𑀺𑀲𑁆𑀲𑀢𑀺 𑀘𑀢𑀽𑀳𑀺 𑀧𑀼𑀢𑁆𑀢𑁂𑀳𑀺’’.

𑁯𑁯𑁯. ‘‘𑀲𑀩𑁆𑀩𑁂𑀧𑀺 𑀫𑀬𑁆𑀳𑀁 𑀧𑀼𑀢𑁆𑀢𑀸 𑀘𑀢𑁆𑀢𑀸, 𑀘𑀦𑁆𑀤𑀲𑁆𑀫𑀺𑀁 𑀳𑀜𑁆𑀜𑀫𑀸𑀦𑀲𑁆𑀫𑀺𑀁;

𑀧𑀼𑀢𑁆𑀢𑁂𑀳𑀺 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦, 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀺’’.

𑁧𑁦𑁦𑁦. ‘‘𑀫𑀸 𑀢𑀁 [𑀫𑀸 (𑀲𑀻. 𑀧𑀻.)] 𑀧𑀼𑀢𑁆𑀢 𑀲𑀤𑁆𑀤𑀳𑁂𑀲𑀺, 𑀲𑀼𑀕𑀢𑀺 𑀓𑀺𑀭 𑀳𑁄𑀢𑀺 𑀧𑀼𑀢𑁆𑀢𑀬𑀜𑁆𑀜𑁂𑀦;

𑀦𑀺𑀭𑀬𑀸𑀦𑁂𑀲𑁄 𑀫𑀕𑁆𑀕𑁄, 𑀦𑁂𑀲𑁄 𑀫𑀕𑁆𑀕𑁄 𑀳𑀺 𑀲𑀕𑁆𑀕𑀸𑀦𑀁.

𑁧𑁦𑁦𑁧. ‘‘𑀤𑀸𑀦𑀸𑀦𑀺 𑀤𑁂𑀳𑀺 𑀓𑁄𑀡𑁆𑀟𑀜𑁆𑀜, 𑀅𑀳𑀺𑀁𑀲𑀸 𑀲𑀩𑁆𑀩𑀪𑀽𑀢𑀪𑀩𑁆𑀬𑀸𑀦𑀁’’;

𑀏𑀲 𑀫𑀕𑁆𑀕𑁄 𑀲𑀼𑀕𑀢𑀺𑀬𑀸, 𑀦 𑀘 𑀫𑀕𑁆𑀕𑁄 𑀧𑀼𑀢𑁆𑀢𑀬𑀜𑁆𑀜𑁂𑀦’’.

𑁧𑁦𑁦𑁨. ‘‘𑀆𑀘𑀭𑀺𑀬𑀸𑀦𑀁 𑀯𑀘𑀦𑀸, 𑀖𑀸𑀢𑁂𑀲𑁆𑀲𑀁 𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀜𑁆𑀘;

𑀧𑀼𑀢𑁆𑀢𑁂𑀳𑀺 𑀬𑀜𑁆𑀜𑀁 [𑀧𑀼𑀢𑁆𑀢𑁂𑀳𑀺 (𑀲𑀻. 𑀲𑁆𑀬𑀸. 𑀧𑀻.)] 𑀬𑀚𑀺𑀢𑁆𑀯𑀸𑀦 𑀤𑀼𑀘𑁆𑀘𑀚𑁂𑀳𑀺, 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀺’’.

𑁧𑁦𑁦𑁩. ‘‘𑀢𑀁𑀢𑀁 𑀧𑀺𑀢𑀸𑀧𑀺 𑀅𑀯𑀘, 𑀯𑀲𑀯𑀢𑁆𑀢𑀻 𑀑𑀭𑀲𑀁 𑀲𑀓𑀁 𑀧𑀼𑀢𑁆𑀢𑀁;

𑀬𑀜𑁆𑀜𑁄 𑀓𑀺𑀭 𑀢𑁂 𑀧𑀼𑀢𑁆𑀢, 𑀪𑀯𑀺𑀲𑁆𑀲𑀢𑀺 𑀘𑀢𑀽𑀳𑀺 𑀧𑀼𑀢𑁆𑀢𑁂𑀳𑀺’’.

𑁧𑁦𑁦𑁪. ‘‘𑀲𑀩𑁆𑀩𑁂𑀧𑀺 𑀫𑀬𑁆𑀳𑀁 𑀧𑀼𑀢𑁆𑀢𑀸 𑀘𑀢𑁆𑀢𑀸, 𑀘𑀦𑁆𑀤𑀲𑁆𑀫𑀺𑀁 𑀳𑀜𑁆𑀜𑀫𑀸𑀦𑀲𑁆𑀫𑀺𑀁;

𑀧𑀼𑀢𑁆𑀢𑁂𑀳𑀺 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦, 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀺’’.

𑁧𑁦𑁦𑁫. ‘‘𑀫𑀸 𑀢𑀁 𑀧𑀼𑀢𑁆𑀢 𑀲𑀤𑁆𑀤𑀳𑁂𑀲𑀺, 𑀲𑀼𑀕𑀢𑀺 𑀓𑀺𑀭 𑀳𑁄𑀢𑀺 𑀧𑀼𑀢𑁆𑀢𑀬𑀜𑁆𑀜𑁂𑀦;

𑀦𑀺𑀭𑀬𑀸𑀦𑁂𑀲𑁄 𑀫𑀕𑁆𑀕𑁄, 𑀦𑁂𑀲𑁄 𑀫𑀕𑁆𑀕𑁄 𑀳𑀺 𑀲𑀕𑁆𑀕𑀸𑀦𑀁.

𑁧𑁦𑁦𑁬. ‘‘𑀤𑀸𑀦𑀸𑀦𑀺 𑀤𑁂𑀳𑀺 𑀓𑁄𑀡𑁆𑀟𑀜𑁆𑀜, 𑀅𑀳𑀺𑀁𑀲𑀸 𑀲𑀩𑁆𑀩𑀪𑀽𑀢𑀪𑀩𑁆𑀬𑀸𑀦𑀁;

𑀏𑀲 𑀫𑀕𑁆𑀕𑁄 𑀲𑀼𑀕𑀢𑀺𑀬𑀸, 𑀦 𑀘 𑀫𑀕𑁆𑀕𑁄 𑀧𑀼𑀢𑁆𑀢𑀬𑀜𑁆𑀜𑁂𑀦’’.

𑁧𑁦𑁦𑁭. ‘‘𑀆𑀘𑀭𑀺𑀬𑀸𑀦𑀁 𑀯𑀘𑀦𑀸, 𑀖𑀸𑀢𑁂𑀲𑁆𑀲𑀁 𑀘𑀦𑁆𑀤𑀜𑁆𑀘 𑀲𑀽𑀭𑀺𑀬𑀜𑁆𑀘;

𑀧𑀼𑀢𑁆𑀢𑁂𑀳𑀺 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦 𑀤𑀼𑀘𑁆𑀘𑀚𑁂𑀳𑀺, 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀕𑀫𑀺𑀲𑁆𑀲𑀸𑀫𑀺’’.

𑁧𑁦𑁦𑁮. ‘‘𑀤𑀸𑀦𑀸𑀦𑀺 𑀤𑁂𑀳𑀺 𑀓𑁄𑀡𑁆𑀟𑀜𑁆𑀜, 𑀅𑀳𑀺𑀁𑀲𑀸 𑀲𑀩𑁆𑀩𑀪𑀽𑀢𑀪𑀩𑁆𑀬𑀸𑀦𑀁;

𑀧𑀼𑀢𑁆𑀢𑀧𑀭𑀺𑀯𑀼𑀢𑁄 𑀢𑀼𑀯𑀁, 𑀭𑀝𑁆𑀞𑀁 𑀚𑀦𑀧𑀤𑀜𑁆𑀘 𑀧𑀸𑀮𑁂𑀳𑀺’’.

𑁧𑁦𑁦𑁯. ‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀳𑀢𑁆𑀣𑀻 𑀅𑀲𑁆𑀲𑁂 𑀘 𑀧𑀸𑀮𑁂𑀫.

𑁧𑁦𑁧𑁦. ‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀳𑀢𑁆𑀣𑀺𑀙𑀓𑀡𑀸𑀦𑀺 𑀉𑀚𑁆𑀛𑁂𑀫.

𑁧𑁦𑁧𑁧. ‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀅𑀲𑁆𑀲𑀙𑀓𑀡𑀸𑀦𑀺 𑀉𑀚𑁆𑀛𑁂𑀫.

𑁧𑁦𑁧𑁨. ‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲 [𑀇𑀤𑀁 𑀧𑀤𑀁 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺];

𑀬𑀲𑁆𑀲 𑀳𑁄𑀦𑁆𑀢𑀺 𑀢𑀯 𑀓𑀸𑀫𑀸, 𑀅𑀧𑀺 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑀸;

𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫’’.

𑁧𑁦𑁧𑁩. ‘‘𑀤𑀼𑀓𑁆𑀔𑀁 𑀔𑁄 𑀫𑁂 𑀚𑀦𑀬𑀣, 𑀯𑀺𑀮𑀧𑀦𑁆𑀢𑀸 𑀚𑀻𑀯𑀺𑀢𑀲𑁆𑀲 𑀓𑀸𑀫𑀸 𑀳𑀺;

𑀫𑀼𑀜𑁆𑀘𑁂𑀣 [𑀫𑀼𑀜𑁆𑀘𑀣 (𑀲𑀻. 𑀧𑀻.)] 𑀤𑀸𑀦𑀺 𑀓𑀼𑀫𑀸𑀭𑁂, 𑀅𑀮𑀫𑁆𑀧𑀺 𑀫𑁂 𑀳𑁄𑀢𑀼 𑀧𑀼𑀢𑁆𑀢𑀬𑀜𑁆𑀜𑁂𑀦’’.

𑁧𑁦𑁧𑁪. ‘‘𑀧𑀼𑀩𑁆𑀩𑁂𑀯 𑀔𑁄𑀲𑀺 𑀫𑁂 𑀯𑀼𑀢𑁆𑀢𑁄, 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀜𑁆𑀘𑁂𑀢𑀁;

𑀅𑀣 𑀦𑁄 𑀉𑀧𑀓𑁆𑀔𑀝𑀲𑁆𑀲 𑀬𑀜𑁆𑀜𑀲𑁆𑀲, 𑀓𑀲𑁆𑀫𑀸 𑀓𑀭𑁄𑀲𑀺 𑀯𑀺𑀓𑁆𑀔𑁂𑀧𑀁.

𑁧𑁦𑁧𑁫. ‘‘𑀲𑀩𑁆𑀩𑁂 𑀯𑀚𑀦𑁆𑀢𑀺 𑀲𑀼𑀕𑀢𑀺𑀁, 𑀬𑁂 𑀬𑀚𑀦𑁆𑀢𑀺 𑀬𑁂𑀧𑀺 𑀬𑀸𑀚𑁂𑀦𑁆𑀢𑀺;

𑀬𑁂 𑀘𑀸𑀧𑀺 𑀅𑀦𑀼𑀫𑁄𑀤𑀦𑁆𑀢𑀺, 𑀬𑀚𑀦𑁆𑀢𑀸𑀦𑀁 𑀏𑀤𑀺𑀲𑀁 𑀫𑀳𑀸𑀬𑀜𑁆𑀜𑀁’’.

𑁧𑁦𑁧𑁬. ‘‘𑀅𑀣 𑀓𑀺𑀲𑁆𑀲 𑀚𑀦𑁄 [𑀘 𑀦𑁄 (𑀲𑀻. 𑀲𑁆𑀬𑀸. 𑀧𑀻.)] 𑀧𑀼𑀩𑁆𑀩𑁂, 𑀲𑁄𑀢𑁆𑀣𑀸𑀦𑀁 𑀩𑁆𑀭𑀸𑀳𑁆𑀫𑀡𑁂 𑀅𑀯𑀸𑀘𑁂𑀲𑀺;

𑀅𑀣 𑀦𑁄 𑀅𑀓𑀸𑀭𑀡𑀲𑁆𑀫𑀸, 𑀬𑀜𑁆𑀜𑀢𑁆𑀣𑀸𑀬 𑀤𑁂𑀯 𑀖𑀸𑀢𑁂𑀲𑀺.

𑁧𑁦𑁧𑁭. ‘‘𑀧𑀼𑀩𑁆𑀩𑁂𑀯 𑀦𑁄 𑀤𑀳𑀭𑀓𑀸𑀮𑁂 [𑀤𑀳𑀭𑀓𑁂 𑀲𑀫𑀸𑀦𑁂 (𑀲𑀻. 𑀧𑀻.)], 𑀦 𑀳𑀦𑁂𑀲𑀺 [𑀦 𑀫𑀸𑀭𑁂𑀲𑀺 (𑀲𑀻. 𑀧𑀻.)] 𑀦 𑀖𑀸𑀢𑁂𑀲𑀺;

𑀤𑀳𑀭𑀫𑁆𑀳𑀸 𑀬𑁄𑀩𑁆𑀩𑀦𑀁 𑀧𑀢𑁆𑀢𑀸, 𑀅𑀤𑀽𑀲𑀓𑀸 𑀢𑀸𑀢 𑀳𑀜𑁆𑀜𑀸𑀫.

𑁧𑁦𑁧𑁮. ‘‘𑀳𑀢𑁆𑀣𑀺𑀕𑀢𑁂 𑀅𑀲𑁆𑀲𑀕𑀢𑁂, 𑀲𑀦𑁆𑀦𑀤𑁆𑀥𑁂 𑀧𑀲𑁆𑀲 𑀦𑁄 𑀫𑀳𑀸𑀭𑀸𑀚;

𑀬𑀼𑀤𑁆𑀥𑁂 𑀯𑀸 𑀬𑀼𑀚𑁆𑀛𑀫𑀸𑀦𑁂 𑀯𑀸, 𑀦 𑀳𑀺 𑀫𑀸𑀤𑀺𑀲𑀸 𑀲𑀽𑀭𑀸 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬.

𑁧𑁦𑁧𑁯. ‘‘𑀧𑀘𑁆𑀘𑀦𑁆𑀢𑁂 𑀯𑀸𑀧𑀺 𑀓𑀼𑀧𑀺𑀢𑁂, 𑀅𑀝𑀯𑀻𑀲𑀼 𑀯𑀸 𑀫𑀸𑀤𑀺𑀲𑁂 𑀦𑀺𑀬𑁄𑀚𑁂𑀦𑁆𑀢𑀺;

𑀅𑀣 𑀦𑁄 𑀅𑀓𑀸𑀭𑀡𑀲𑁆𑀫𑀸, 𑀅𑀪𑀽𑀫𑀺𑀬𑀁 𑀢𑀸𑀢 𑀳𑀜𑁆𑀜𑀸𑀫.

𑁧𑁦𑁨𑁦. ‘‘𑀬𑀸𑀧𑀺 𑀳𑀺 𑀢𑀸 𑀲𑀓𑀼𑀡𑀺𑀬𑁄, 𑀯𑀲𑀦𑁆𑀢𑀺 𑀢𑀺𑀡𑀖𑀭𑀸𑀦𑀺 𑀓𑀢𑁆𑀯𑀸𑀦;

𑀢𑀸𑀲𑀫𑁆𑀧𑀺 𑀧𑀺𑀬𑀸 𑀧𑀼𑀢𑁆𑀢𑀸, 𑀅𑀣 𑀦𑁄 𑀢𑁆𑀯𑀁 𑀤𑁂𑀯 𑀖𑀸𑀢𑁂𑀲𑀺.

𑁧𑁦𑁨𑁧. ‘‘𑀫𑀸 𑀢𑀲𑁆𑀲 𑀲𑀤𑁆𑀤𑀳𑁂𑀲𑀺, 𑀦 𑀫𑀁 𑀔𑀡𑁆𑀟𑀳𑀸𑀮𑁄 𑀖𑀸𑀢𑁂𑀬𑁆𑀬;

𑀫𑀫𑀜𑁆𑀳𑀺 𑀲𑁄 𑀖𑀸𑀢𑁂𑀢𑁆𑀯𑀸𑀦, 𑀅𑀦𑀦𑁆𑀢𑀭𑀸 𑀢𑀫𑁆𑀧𑀺 𑀤𑁂𑀯 𑀖𑀸𑀢𑁂𑀬𑁆𑀬.

𑁧𑁦𑁨𑁨. ‘‘𑀕𑀸𑀫𑀯𑀭𑀁 𑀦𑀺𑀕𑀫𑀯𑀭𑀁 𑀤𑀤𑀦𑁆𑀢𑀺, 𑀪𑁄𑀕𑀫𑁆𑀧𑀺𑀲𑁆𑀲 𑀫𑀳𑀸𑀭𑀸𑀚;

𑀅𑀣𑀕𑁆𑀕𑀧𑀺𑀡𑁆𑀟𑀺𑀓𑀸𑀧𑀺, 𑀓𑀼𑀮𑁂 𑀓𑀼𑀮𑁂 𑀳𑁂𑀢𑁂 𑀪𑀼𑀜𑁆𑀚𑀦𑁆𑀢𑀺.

𑁧𑁦𑁨𑁩. ‘‘𑀢𑁂𑀲𑀫𑁆𑀧𑀺 𑀢𑀸𑀤𑀺𑀲𑀸𑀦𑀁, 𑀇𑀘𑁆𑀙𑀦𑁆𑀢𑀺 𑀤𑀼𑀩𑁆𑀪𑀺𑀢𑀼𑀁 𑀫𑀳𑀸𑀭𑀸𑀚;

𑀬𑁂𑀪𑀼𑀬𑁆𑀬𑁂𑀦 𑀏𑀢𑁂, 𑀅𑀓𑀢𑀜𑁆𑀜𑀼𑀦𑁄 𑀩𑁆𑀭𑀸𑀳𑁆𑀫𑀡𑀸 𑀤𑁂𑀯.

𑁧𑁦𑁨𑁪. ‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀳𑀢𑁆𑀣𑀻 𑀅𑀲𑁆𑀲𑁂 𑀘 𑀧𑀸𑀮𑁂𑀫.

𑁧𑁦𑁨𑁫. ‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀳𑀢𑁆𑀣𑀺𑀙𑀓𑀡𑀸𑀦𑀺 𑀉𑀚𑁆𑀛𑁂𑀫.

𑁧𑁦𑁨𑁬. ‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀅𑀧𑀺 𑀦𑀺𑀕𑀴𑀩𑀦𑁆𑀥𑀓𑀸𑀧𑀺, 𑀅𑀲𑁆𑀲𑀙𑀓𑀡𑀸𑀦𑀺 𑀉𑀚𑁆𑀛𑁂𑀫.

𑁧𑁦𑁨𑁭. ‘‘𑀫𑀸 𑀦𑁄 𑀤𑁂𑀯 𑀅𑀯𑀥𑀺, 𑀤𑀸𑀲𑁂 𑀦𑁄 𑀤𑁂𑀳𑀺 𑀔𑀡𑁆𑀟𑀳𑀸𑀮𑀲𑁆𑀲;

𑀬𑀲𑁆𑀲 𑀳𑁄𑀦𑁆𑀢𑀺 𑀢𑀯 𑀓𑀸𑀫𑀸, 𑀅𑀧𑀺 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑀸;

𑀪𑀺𑀓𑁆𑀔𑀸𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫’’.

𑁧𑁦𑁨𑁮. ‘‘𑀤𑀼𑀓𑁆𑀔𑀁 𑀔𑁄 𑀫𑁂 𑀚𑀦𑀬𑀣, 𑀯𑀺𑀮𑀧𑀦𑁆𑀢𑀸 𑀚𑀻𑀯𑀺𑀢𑀲𑁆𑀲 𑀓𑀸𑀫𑀸 𑀳𑀺;

𑀫𑀼𑀜𑁆𑀘𑁂𑀣 𑀤𑀸𑀦𑀺 𑀓𑀼𑀫𑀸𑀭𑁂, 𑀅𑀮𑀫𑁆𑀧𑀺 𑀫𑁂 𑀳𑁄𑀢𑀼 𑀧𑀼𑀢𑁆𑀢𑀬𑀜𑁆𑀜𑁂𑀦’’.

𑁧𑁦𑁨𑁯. ‘‘𑀧𑀼𑀩𑁆𑀩𑁂𑀯 𑀔𑁄𑀲𑀺 𑀫𑁂 𑀯𑀼𑀢𑁆𑀢𑁄, 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀜𑁆𑀘𑁂𑀢𑀁;

𑀅𑀣 𑀦𑁄 𑀉𑀧𑀓𑁆𑀔𑀝𑀲𑁆𑀲 𑀬𑀜𑁆𑀜𑀲𑁆𑀲, 𑀓𑀲𑁆𑀫𑀸 𑀓𑀭𑁄𑀲𑀺 𑀯𑀺𑀓𑁆𑀔𑁂𑀧𑀁.

𑁧𑁦𑁩𑁦. ‘‘𑀲𑀩𑁆𑀩𑁂 𑀯𑀚𑀦𑁆𑀢𑀺 𑀲𑀼𑀕𑀢𑀺𑀁, 𑀬𑁂 𑀬𑀚𑀦𑁆𑀢𑀺 𑀬𑁂𑀧𑀺 𑀬𑀸𑀚𑁂𑀦𑁆𑀢𑀺;

𑀬𑁂 𑀘𑀸𑀧𑀺 𑀅𑀦𑀼𑀫𑁄𑀤𑀦𑁆𑀢𑀺, 𑀬𑀚𑀦𑁆𑀢𑀸𑀦𑀁 𑀏𑀤𑀺𑀲𑀁 𑀫𑀳𑀸𑀬𑀜𑁆𑀜𑀁’’.

𑁧𑁦𑁩𑁧. ‘‘𑀬𑀤𑀺 𑀓𑀺𑀭 𑀬𑀚𑀺𑀢𑁆𑀯𑀸 𑀧𑀼𑀢𑁆𑀢𑁂𑀳𑀺, 𑀤𑁂𑀯𑀮𑁄𑀓𑀁 𑀇𑀢𑁄 𑀘𑀼𑀢𑀸 𑀬𑀦𑁆𑀢𑀺;

𑀩𑁆𑀭𑀸𑀳𑁆𑀫𑀡𑁄 𑀢𑀸𑀯 𑀬𑀚𑀢𑀼, 𑀧𑀘𑁆𑀙𑀸𑀧𑀺 𑀬𑀚𑀲𑀺 𑀢𑀼𑀯𑀁 𑀭𑀸𑀚𑀸.

𑁧𑁦𑁩𑁨. ‘‘𑀬𑀤𑀺 𑀓𑀺𑀭 𑀬𑀚𑀺𑀢𑁆𑀯𑀸 𑀧𑀼𑀢𑁆𑀢𑁂𑀳𑀺, 𑀤𑁂𑀯𑀮𑁄𑀓𑀁 𑀇𑀢𑁄 𑀘𑀼𑀢𑀸 𑀬𑀦𑁆𑀢𑀺;

𑀏𑀲𑁆𑀯𑁂𑀯 𑀔𑀡𑁆𑀟𑀳𑀸𑀮𑁄, 𑀬𑀚𑀢𑀁 𑀲𑀓𑁂𑀳𑀺 𑀧𑀼𑀢𑁆𑀢𑁂𑀳𑀺.

𑁧𑁦𑁩𑁩. ‘‘𑀏𑀯𑀁 𑀚𑀸𑀦𑀦𑁆𑀢𑁄 𑀔𑀡𑁆𑀟𑀳𑀸𑀮𑁄, 𑀓𑀺𑀁 𑀧𑀼𑀢𑁆𑀢𑀓𑁂 𑀦 𑀖𑀸𑀢𑁂𑀲𑀺;

𑀲𑀩𑁆𑀩𑀜𑁆𑀘 𑀜𑀸𑀢𑀺𑀚𑀦𑀁, 𑀅𑀢𑁆𑀢𑀸𑀦𑀜𑁆𑀘 𑀦 𑀖𑀸𑀢𑁂𑀲𑀺.

𑁧𑁦𑁩𑁪. ‘‘𑀲𑀩𑁆𑀩𑁂 𑀯𑀚𑀦𑁆𑀢𑀺 𑀦𑀺𑀭𑀬𑀁, 𑀬𑁂 𑀬𑀚𑀦𑁆𑀢𑀺 𑀬𑁂𑀧𑀺 𑀬𑀸𑀚𑁂𑀦𑁆𑀢𑀺;

𑀬𑁂 𑀘𑀸𑀧𑀺 𑀅𑀦𑀼𑀫𑁄𑀤𑀦𑁆𑀢𑀺, 𑀬𑀚𑀦𑁆𑀢𑀸𑀦𑀁 𑀏𑀤𑀺𑀲𑀁 𑀫𑀳𑀸𑀬𑀜𑁆𑀜𑀁.

𑁧𑁦𑁩𑁫. [𑀅𑀬𑀁 𑀕𑀸𑀣𑀸 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦 𑀤𑀺𑀲𑁆𑀲𑀢𑀺] ‘‘𑀲𑀘𑁂 𑀳𑀺 𑀲𑁄 𑀲𑀼𑀚𑁆𑀛𑀢𑀺 𑀬𑁄 𑀳𑀦𑀸𑀢𑀺, 𑀳𑀢𑁄𑀧𑀺 𑀲𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦𑀁;

𑀪𑁄𑀯𑀸𑀤𑀺 𑀪𑁄𑀯𑀸𑀤𑀺𑀦 𑀫𑀸𑀭𑀬𑁂𑀬𑁆𑀬𑀼𑀁, 𑀬𑁂 𑀘𑀸𑀧𑀺 𑀢𑁂𑀲𑀁 𑀅𑀪𑀺𑀲𑀤𑁆𑀤𑀳𑁂𑀬𑁆𑀬𑀼𑀁’’ [𑀅𑀬𑀁 𑀕𑀸𑀣𑀸 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦 𑀤𑀺𑀲𑁆𑀲𑀢𑀺].

𑁧𑁦𑁩𑁬. ‘‘𑀓𑀣𑀜𑁆𑀘 𑀓𑀺𑀭 𑀧𑀼𑀢𑁆𑀢𑀓𑀸𑀫𑀸𑀬𑁄, 𑀕𑀳𑀧𑀢𑀬𑁄 𑀖𑀭𑀡𑀺𑀬𑁄 𑀘;

𑀦𑀕𑀭𑀫𑁆𑀳𑀺 𑀦 𑀉𑀧𑀭𑀯𑀦𑁆𑀢𑀺 𑀭𑀸𑀚𑀸𑀦𑀁, 𑀫𑀸 𑀖𑀸𑀢𑀬𑀺 𑀑𑀭𑀲𑀁 𑀧𑀼𑀢𑁆𑀢𑀁.

𑁧𑁦𑁩𑁭. ‘‘𑀓𑀣𑀜𑁆𑀘 𑀓𑀺𑀭 𑀧𑀼𑀢𑁆𑀢𑀓𑀸𑀫𑀸𑀬𑁄, 𑀕𑀳𑀧𑀢𑀬𑁄 𑀖𑀭𑀡𑀺𑀬𑁄 𑀘;

𑀦𑀕𑀭𑀫𑁆𑀳𑀺 𑀦 𑀉𑀧𑀭𑀯𑀦𑁆𑀢𑀺 𑀭𑀸𑀚𑀸𑀦𑀁, 𑀫𑀸 𑀖𑀸𑀢𑀬𑀺 𑀅𑀢𑁆𑀭𑀚𑀁 𑀧𑀼𑀢𑁆𑀢𑀁.

𑁧𑁦𑁩𑁮. ‘‘𑀭𑀜𑁆𑀜𑁄 𑀘𑀫𑁆𑀳𑀺 𑀅𑀢𑁆𑀣𑀓𑀸𑀫𑁄, 𑀳𑀺𑀢𑁄 𑀘 𑀲𑀩𑁆𑀩𑀚𑀦𑀧𑀤𑀲𑁆𑀲 [𑀲𑀩𑁆𑀩𑀤𑀸 𑀚𑀦𑀧𑀤𑀲𑁆𑀲 (𑀲𑀻. 𑀧𑀻.)];

𑀦 𑀓𑁄𑀘𑀺 𑀅𑀲𑁆𑀲 𑀧𑀝𑀺𑀖𑀁, 𑀫𑀬𑀸 𑀚𑀸𑀦𑀧𑀤𑁄 𑀦 𑀧𑀯𑁂𑀤𑁂𑀢𑀺’’.

𑁧𑁦𑁩𑁯. ‘‘𑀕𑀘𑁆𑀙𑀣 𑀯𑁄 𑀖𑀭𑀡𑀺𑀬𑁄, 𑀢𑀸𑀢𑀜𑁆𑀘 𑀯𑀤𑁂𑀣 𑀔𑀡𑁆𑀟𑀳𑀸𑀮𑀜𑁆𑀘;

𑀫𑀸 𑀖𑀸𑀢𑁂𑀣 𑀓𑀼𑀫𑀸𑀭𑁂, 𑀅𑀤𑀽𑀲𑀓𑁂 𑀲𑀻𑀳𑀲𑀗𑁆𑀓𑀸𑀲𑁂.

𑁧𑁦𑁪𑁦. ‘‘𑀕𑀘𑁆𑀙𑀣 𑀯𑁄 𑀖𑀭𑀡𑀺𑀬𑁄, 𑀢𑀸𑀢𑀜𑁆𑀘 𑀯𑀤𑁂𑀣 𑀔𑀡𑁆𑀟𑀳𑀸𑀮𑀜𑁆𑀘;

𑀫𑀸 𑀖𑀸𑀢𑁂𑀣 𑀓𑀼𑀫𑀸𑀭𑁂, 𑀅𑀧𑁂𑀓𑁆𑀔𑀺𑀢𑁂 𑀲𑀩𑁆𑀩𑀮𑁄𑀓𑀲𑁆𑀲’’.

𑁧𑁦𑁪𑁧. ‘‘𑀬𑀁 𑀦𑀽𑀦𑀸𑀳𑀁 𑀚𑀸𑀬𑁂𑀬𑁆𑀬𑀁, 𑀭𑀣𑀓𑀸𑀭𑀓𑀼𑀮𑁂𑀲𑀼 𑀯𑀸;

𑀧𑀼𑀓𑁆𑀓𑀼𑀲𑀓𑀼𑀮𑁂𑀲𑀼 𑀯𑀸 𑀯𑁂𑀲𑁆𑀲𑁂𑀲𑀼 𑀯𑀸 𑀚𑀸𑀬𑁂𑀬𑁆𑀬𑀁;

𑀦 𑀳𑀚𑁆𑀚 𑀫𑀁 𑀭𑀸𑀚 𑀬𑀜𑁆𑀜𑁂 [𑀬𑀜𑁆𑀜𑀢𑁆𑀣𑀸𑀬 (𑀲𑀻. 𑀧𑀻.)] 𑀖𑀸𑀢𑁂𑀬𑁆𑀬’’.

𑁧𑁦𑁪𑁨. ‘‘𑀲𑀩𑁆𑀩𑀸 𑀲𑀻𑀫𑀦𑁆𑀢𑀺𑀦𑀺𑀬𑁄 𑀕𑀘𑁆𑀙𑀣, 𑀅𑀬𑁆𑀬𑀲𑁆𑀲 𑀔𑀡𑁆𑀟𑀳𑀸𑀮𑀲𑁆𑀲;

𑀧𑀸𑀤𑁂𑀲𑀼 𑀦𑀺𑀧𑀢𑀣, 𑀅𑀧𑀭𑀸𑀥𑀸𑀳𑀁 𑀦 𑀧𑀲𑁆𑀲𑀸𑀫𑀺.

𑁧𑁦𑁪𑁩. ‘‘𑀲𑀩𑁆𑀩𑀸 𑀲𑀻𑀫𑀦𑁆𑀢𑀺𑀦𑀺𑀬𑁄 𑀕𑀘𑁆𑀙𑀣, 𑀅𑀬𑁆𑀬𑀲𑁆𑀲 𑀔𑀡𑁆𑀟𑀳𑀸𑀮𑀲𑁆𑀲;

𑀧𑀸𑀤𑁂𑀲𑀼 𑀦𑀺𑀧𑀢𑀣, 𑀓𑀺𑀦𑁆𑀢𑁂 𑀪𑀦𑁆𑀢𑁂 𑀫𑀬𑀁 𑀅𑀤𑀽𑀲𑁂𑀫’’.

𑁧𑁦𑁪𑁪. ‘‘𑀓𑀧𑀡𑀸 [𑀓𑀧𑀡𑀁 (𑀲𑀻. 𑀧𑀻.)] 𑀯𑀺𑀮𑀧𑀢𑀺 𑀲𑁂𑀮𑀸, 𑀤𑀺𑀲𑁆𑀯𑀸𑀦 𑀪𑀸𑀢𑀭𑁂 [𑀪𑀸𑀢𑀭𑁄 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀉𑀧𑀦𑀻𑀢𑀢𑁆𑀢𑁂;

𑀬𑀜𑁆𑀜𑁄 𑀓𑀺𑀭 𑀫𑁂 𑀉𑀓𑁆𑀔𑀺𑀧𑀺𑀢𑁄, 𑀢𑀸𑀢𑁂𑀦 𑀲𑀕𑁆𑀕𑀓𑀸𑀫𑁂𑀦’’.

𑁧𑁦𑁪𑁫. ‘‘𑀆𑀯𑀢𑁆𑀢𑀺 𑀧𑀭𑀺𑀯𑀢𑁆𑀢𑀺 𑀘, 𑀯𑀲𑀼𑀮𑁄 𑀲𑀫𑁆𑀫𑀼𑀔𑀸 𑀭𑀜𑁆𑀜𑁄;

𑀫𑀸 𑀦𑁄 𑀧𑀺𑀢𑀭𑀁 𑀅𑀯𑀥𑀺, 𑀤𑀳𑀭𑀫𑁆𑀳𑀸 𑀬𑁄𑀩𑁆𑀩𑀦𑀁 𑀧𑀢𑁆𑀢𑀸’’.

𑁧𑁦𑁪𑁬. ‘‘𑀏𑀲𑁄 𑀢𑁂 𑀯𑀲𑀼𑀮 𑀧𑀺𑀢𑀸, 𑀲𑀫𑁂𑀳𑀺 𑀧𑀺𑀢𑀭𑀸 𑀲𑀳;

𑀤𑀼𑀓𑁆𑀔𑀁 𑀔𑁄 𑀫𑁂 𑀚𑀦𑀬𑀲𑀺, 𑀯𑀺𑀮𑀧𑀦𑁆𑀢𑁄 𑀅𑀦𑁆𑀢𑁂𑀧𑀼𑀭𑀲𑁆𑀫𑀺𑀁;

𑀫𑀼𑀜𑁆𑀘𑁂𑀣 𑀤𑀸𑀦𑀺 𑀓𑀼𑀫𑀸𑀭𑁂, 𑀅𑀮𑀫𑁆𑀧𑀺 𑀫𑁂 𑀳𑁄𑀢𑀼 𑀧𑀼𑀢𑁆𑀢𑀬𑀜𑁆𑀜𑁂𑀦’’.

𑁧𑁦𑁪𑁭. ‘‘𑀧𑀼𑀩𑁆𑀩𑁂𑀯 𑀔𑁄𑀲𑀺 𑀫𑁂 𑀯𑀼𑀢𑁆𑀢𑁄, 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀜𑁆𑀘𑁂𑀢𑀁;

𑀅𑀣 𑀦𑁄 𑀉𑀧𑀓𑁆𑀔𑀝𑀲𑁆𑀲 𑀬𑀜𑁆𑀜𑀲𑁆𑀲, 𑀓𑀲𑁆𑀫𑀸 𑀓𑀭𑁄𑀲𑀺 𑀯𑀺𑀓𑁆𑀔𑁂𑀧𑀁.

𑁧𑁦𑁪𑁮. ‘‘𑀲𑀩𑁆𑀩𑁂 𑀯𑀚𑀦𑁆𑀢𑀺 𑀲𑀼𑀕𑀢𑀺𑀁, 𑀬𑁂 𑀬𑀚𑀦𑁆𑀢𑀺 𑀬𑁂𑀧𑀺 𑀬𑀸𑀚𑁂𑀦𑁆𑀢𑀺;

𑀬𑁂 𑀘𑀸𑀧𑀺 𑀅𑀦𑀼𑀫𑁄𑀤𑀦𑁆𑀢𑀺, 𑀬𑀚𑀦𑁆𑀢𑀸𑀦𑀁 𑀏𑀤𑀺𑀲𑀁 𑀫𑀳𑀸𑀬𑀜𑁆𑀜𑀁’’.

𑁧𑁦𑁪𑁯. ‘‘𑀲𑀩𑁆𑀩𑀭𑀢𑀦𑀲𑁆𑀲 𑀬𑀜𑁆𑀜𑁄 𑀉𑀧𑀓𑁆𑀔𑀝𑁄, 𑀏𑀓𑀭𑀸𑀚 𑀢𑀯 𑀧𑀝𑀺𑀬𑀢𑁆𑀢𑁄;

𑀅𑀪𑀺𑀦𑀺𑀓𑁆𑀔𑀫𑀲𑁆𑀲𑀼 𑀤𑁂𑀯, 𑀲𑀕𑁆𑀕𑀁 𑀕𑀢𑁄 𑀢𑁆𑀯𑀁 𑀧𑀫𑁄𑀤𑀺𑀲𑁆𑀲𑀲𑀺’’.

𑁧𑁦𑁫𑁦. ‘‘𑀤𑀳𑀭𑀸 𑀲𑀢𑁆𑀢𑀲𑀢𑀸 𑀏𑀢𑀸, 𑀘𑀦𑁆𑀤𑀓𑀼𑀫𑀸𑀭𑀲𑁆𑀲 𑀪𑀭𑀺𑀬𑀸𑀬𑁄;

𑀓𑁂𑀲𑁂 𑀧𑀓𑀺𑀭𑀺𑀢𑁆𑀯𑀸𑀦 [𑀧𑀭𑀺𑀓𑀺𑀭𑀺𑀢𑁆𑀯𑀸𑀦 (𑀲𑀻. 𑀧𑀻.), 𑀯𑀺𑀓𑀺𑀭𑀺𑀢𑁆𑀯𑀸𑀦 (𑀲𑁆𑀬𑀸. 𑀓.)], 𑀭𑁄𑀤𑀦𑁆𑀢𑀺𑀬𑁄 𑀫𑀕𑁆𑀕𑀫𑀦𑀼𑀬𑀸𑀬𑀺𑀁𑀲𑀼 [𑀫𑀕𑁆𑀕𑀫𑀦𑀼𑀬𑀦𑁆𑀢𑀺 (𑀲𑀻. 𑀧𑀻.), 𑀫𑀕𑁆𑀕𑀫𑀦𑀼𑀬𑀸𑀬𑀦𑁆𑀢𑀺 (𑀲𑁆𑀬𑀸.)].

𑁧𑁦𑁫𑁧. ‘‘𑀅𑀧𑀭𑀸 𑀧𑀦 𑀲𑁄𑀓𑁂𑀦, 𑀦𑀺𑀓𑁆𑀔𑀦𑁆𑀢𑀸 𑀦𑀦𑁆𑀤𑀦𑁂 𑀯𑀺𑀬 𑀤𑁂𑀯𑀸;

𑀓𑁂𑀲𑁂 𑀧𑀓𑀺𑀭𑀺𑀢𑁆𑀯𑀸𑀦 [𑀧𑀭𑀺𑀓𑀺𑀭𑀺𑀢𑁆𑀯𑀸𑀦 (𑀲𑀻. 𑀧𑀻.), 𑀯𑀺𑀓𑀺𑀭𑀺𑀢𑁆𑀯𑀸𑀦 (𑀲𑁆𑀬𑀸. 𑀓.)], 𑀭𑁄𑀤𑀦𑁆𑀢𑀺𑀬𑁄 𑀫𑀕𑁆𑀕𑀫𑀦𑀼𑀬𑀸𑀬𑀺𑀁𑀲𑀼’’ [𑀫𑀕𑁆𑀕𑀫𑀦𑀼𑀬𑀦𑁆𑀢𑀺 (𑀲𑀻. 𑀧𑀻.), 𑀫𑀕𑁆𑀕𑀫𑀦𑀼𑀬𑀸𑀬𑀦𑁆𑀢𑀺 (𑀲𑁆𑀬𑀸.)].

𑁧𑁦𑁫𑁨. ‘‘𑀓𑀸𑀲𑀺𑀓𑀲𑀼𑀘𑀺𑀯𑀢𑁆𑀣𑀥𑀭𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀺𑀬𑁆𑀬𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸, 𑀬𑀜𑁆𑀜𑀢𑁆𑀣𑀸𑀬 𑀏𑀓𑀭𑀸𑀚𑀲𑁆𑀲.

𑁧𑁦𑁫𑁩. ‘‘𑀓𑀸𑀲𑀺𑀓𑀲𑀼𑀘𑀺𑀯𑀢𑁆𑀣𑀥𑀭𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;

𑀦𑀺𑀬𑁆𑀬𑀦𑁆𑀢𑀺 𑀘𑀦𑁆𑀤𑀲𑀽𑀭𑀺𑀬𑀸, 𑀫𑀸𑀢𑀼 𑀓𑀢𑁆𑀯𑀸 𑀳𑀤𑀬𑀲𑁄𑀓𑀁.

𑁧𑁦𑁫𑁪. ‘‘𑀓𑀸𑀲𑀺𑀓𑀲𑀼𑀘𑀺𑀯𑀢𑁆𑀣𑀥𑀭𑀸, 𑀓𑀼𑀡𑁆𑀟𑀮𑀺𑀦𑁄 𑀅𑀕𑀮𑀼𑀘𑀦𑁆𑀤𑀦𑀯𑀺𑀮𑀺𑀢𑁆𑀢𑀸;