𑁫𑁪𑁩. 𑀪𑀽𑀭𑀺𑀤𑀢𑁆𑀢𑀚𑀸𑀢𑀓𑀁 (𑁬)

𑁭𑁮𑁪. ‘‘𑀬𑀁 𑀓𑀺𑀜𑁆𑀘𑀺 𑀭𑀢𑀦𑀁 𑀅𑀢𑁆𑀣𑀺, 𑀥𑀢𑀭𑀝𑁆𑀞𑀦𑀺𑀯𑁂𑀲𑀦𑁂;

𑀲𑀩𑁆𑀩𑀸𑀦𑀺 𑀢𑁂 𑀉𑀧𑀬𑀦𑁆𑀢𑀼, 𑀥𑀻𑀢𑀭𑀁 𑀤𑁂𑀳𑀺 𑀭𑀸𑀚𑀺𑀦𑁄’’.

𑁭𑁮𑁫. ‘‘𑀦 𑀦𑁄 𑀯𑀺𑀯𑀸𑀳𑁄 𑀦𑀸𑀕𑁂𑀳𑀺, 𑀓𑀢𑀧𑀼𑀩𑁆𑀩𑁄 𑀓𑀼𑀤𑀸𑀘𑀦𑀁;

𑀢𑀁 𑀯𑀺𑀯𑀸𑀳𑀁 𑀅𑀲𑀁𑀬𑀼𑀢𑁆𑀢𑀁, 𑀓𑀣𑀁 𑀅𑀫𑁆𑀳𑁂 𑀓𑀭𑁄𑀫𑀲𑁂’’.

𑁭𑁮𑁬. ‘‘𑀚𑀻𑀯𑀺𑀢𑀁 𑀦𑀽𑀦 𑀢𑁂 𑀘𑀢𑁆𑀢𑀁, 𑀭𑀝𑁆𑀞𑀁 𑀯𑀸 𑀫𑀦𑀼𑀚𑀸𑀥𑀺𑀧;

𑀦 𑀳𑀺 𑀦𑀸𑀕𑁂 𑀓𑀼𑀧𑀺𑀢𑀫𑁆𑀳𑀺, 𑀘𑀺𑀭𑀁 𑀚𑀻𑀯𑀦𑁆𑀢𑀺 𑀢𑀸𑀤𑀺𑀲𑀸.

𑁭𑁮𑁭. ‘‘𑀬𑁄 𑀢𑁆𑀯𑀁 𑀤𑁂𑀯 𑀫𑀦𑀼𑀲𑁆𑀲𑁄𑀲𑀺, 𑀇𑀤𑁆𑀥𑀺𑀫𑀦𑁆𑀢𑀁 𑀅𑀦𑀺𑀤𑁆𑀥𑀺𑀫𑀸;

𑀯𑀭𑀼𑀡𑀲𑁆𑀲 𑀦𑀺𑀬𑀁 𑀧𑀼𑀢𑁆𑀢𑀁, 𑀬𑀸𑀫𑀼𑀦𑀁 𑀅𑀢𑀺𑀫𑀜𑁆𑀜𑀲𑀺’’.

𑁭𑁮𑁮. ‘‘𑀦𑀸𑀢𑀺𑀫𑀜𑁆𑀜𑀸𑀫𑀺 𑀭𑀸𑀚𑀸𑀦𑀁, 𑀥𑀢𑀭𑀝𑁆𑀞𑀁 𑀬𑀲𑀲𑁆𑀲𑀺𑀦𑀁;

𑀥𑀢𑀭𑀝𑁆𑀞𑁄 𑀳𑀺 𑀦𑀸𑀕𑀸𑀦𑀁, 𑀩𑀳𑀽𑀦𑀫𑀧𑀺 𑀇𑀲𑁆𑀲𑀭𑁄.

𑁭𑁮𑁯. ‘‘𑀅𑀳𑀺 𑀫𑀳𑀸𑀦𑀼𑀪𑀸𑀯𑁄𑀧𑀺, 𑀦 𑀫𑁂 𑀥𑀻𑀢𑀭𑀫𑀸𑀭𑀳𑁄;

𑀔𑀢𑁆𑀢𑀺𑀬𑁄 𑀘 𑀯𑀺𑀤𑁂𑀳𑀸𑀦𑀁, 𑀅𑀪𑀺𑀚𑀸𑀢𑀸 𑀲𑀫𑀼𑀤𑁆𑀤𑀚𑀸’’.

𑁭𑁯𑁦. ‘‘𑀓𑀫𑁆𑀩𑀮𑀲𑁆𑀲𑀢𑀭𑀸 𑀉𑀝𑁆𑀞𑁂𑀦𑁆𑀢𑀼, 𑀲𑀩𑁆𑀩𑁂 𑀦𑀸𑀕𑁂 𑀦𑀺𑀯𑁂𑀤𑀬;

𑀩𑀸𑀭𑀸𑀡𑀲𑀺𑀁 𑀧𑀯𑀚𑁆𑀚𑀦𑁆𑀢𑀼, 𑀫𑀸 𑀘 𑀓𑀜𑁆𑀘𑀺 [𑀓𑀺𑀜𑁆𑀘𑀺 (𑀲𑀻. 𑀧𑀻. 𑀓.)] 𑀯𑀺𑀳𑁂𑀞𑀬𑀼𑀁’’.

𑁭𑁯𑁧. ‘‘𑀦𑀺𑀯𑁂𑀲𑀦𑁂𑀲𑀼 𑀲𑁄𑀩𑁆𑀪𑁂𑀲𑀼, 𑀭𑀣𑀺𑀬𑀸 𑀘𑀘𑁆𑀘𑀭𑁂𑀲𑀼 𑀘;

𑀭𑀼𑀓𑁆𑀔𑀕𑁆𑀕𑁂𑀲𑀼 𑀘 𑀮𑀫𑁆𑀩𑀦𑁆𑀢𑀼, 𑀯𑀺𑀢𑀢𑀸 𑀢𑁄𑀭𑀡𑁂𑀲𑀼 𑀘.

𑁭𑁯𑁨. ‘‘𑀅𑀳𑀫𑁆𑀧𑀺 𑀲𑀩𑁆𑀩𑀲𑁂𑀢𑁂𑀦, 𑀫𑀳𑀢𑀸 𑀲𑀼𑀫𑀳𑀁 𑀧𑀼𑀭𑀁;

𑀧𑀭𑀺𑀓𑁆𑀔𑀺𑀧𑀺𑀲𑁆𑀲𑀁 𑀪𑁄𑀕𑁂𑀳𑀺, 𑀓𑀸𑀲𑀻𑀦𑀁 𑀚𑀦𑀬𑀁 𑀪𑀬𑀁’’.

𑁭𑁯𑁩. 𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀉𑀭𑀕𑀸𑀦𑁂𑀓𑀯𑀡𑁆𑀡𑀺𑀦𑁄;

𑀩𑀸𑀭𑀸𑀡𑀲𑀺𑀁 𑀧𑀯𑀚𑁆𑀚𑀺𑀁𑀲𑀼, 𑀦 𑀘 𑀓𑀜𑁆𑀘𑀺 𑀯𑀺𑀳𑁂𑀞𑀬𑀼𑀁.

𑁭𑁯𑁪. 𑀦𑀺𑀯𑁂𑀲𑀦𑁂𑀲𑀼 𑀲𑁄𑀩𑁆𑀪𑁂𑀲𑀼, 𑀭𑀣𑀺𑀬𑀸 𑀘𑀘𑁆𑀘𑀭𑁂𑀲𑀼 𑀘;

𑀭𑀼𑀓𑁆𑀔𑀕𑁆𑀕𑁂𑀲𑀼 𑀘 𑀮𑀫𑁆𑀩𑀺𑀁𑀲𑀼, 𑀯𑀺𑀢𑀢𑀸 𑀢𑁄𑀭𑀡𑁂𑀲𑀼 𑀘.

𑁭𑁯𑁫. 𑀢𑁂𑀲𑀼 𑀤𑀺𑀲𑁆𑀯𑀸𑀦 𑀮𑀫𑁆𑀩𑀦𑁆𑀢𑁂, 𑀧𑀼𑀣𑀽 𑀓𑀦𑁆𑀤𑀺𑀁𑀲𑀼 𑀦𑀸𑀭𑀺𑀬𑁄;

𑀦𑀸𑀕𑁂 𑀲𑁄𑀡𑁆𑀟𑀺𑀓𑀢𑁂 𑀤𑀺𑀲𑁆𑀯𑀸, 𑀧𑀲𑁆𑀲𑀲𑀦𑁆𑀢𑁂 𑀫𑀼𑀳𑀼𑀁 𑀫𑀼𑀳𑀼𑀁.

𑁭𑁯𑁬. 𑀩𑀸𑀭𑀸𑀡𑀲𑀻 𑀧𑀩𑁆𑀬𑀥𑀺𑀢𑀸, 𑀆𑀢𑀼𑀭𑀸 𑀲𑀫𑀧𑀚𑁆𑀚𑀣;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀧𑀓𑁆𑀓𑀦𑁆𑀤𑀼𑀁, ‘‘𑀥𑀻𑀢𑀭𑀁 𑀤𑁂𑀳𑀺 𑀭𑀸𑀚𑀺𑀦𑁄’’.

𑁭𑁯𑁭. ‘‘𑀧𑀼𑀧𑁆𑀨𑀸𑀪𑀺𑀳𑀸𑀭𑀲𑁆𑀲 𑀯𑀦𑀲𑁆𑀲 𑀫𑀚𑁆𑀛𑁂, 𑀓𑁄 𑀮𑁄𑀳𑀺𑀢𑀓𑁆𑀔𑁄 𑀯𑀺𑀢𑀢𑀦𑁆𑀢𑀭𑀁𑀲𑁄;

𑀓𑀸 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑀸 𑀲𑀼𑀯𑀢𑁆𑀣𑀸, 𑀢𑀺𑀝𑁆𑀞𑀦𑁆𑀢𑀺 𑀦𑀸𑀭𑀺𑀬𑁄 𑀤𑀲 𑀯𑀦𑁆𑀤𑀫𑀸𑀦𑀸.

𑁭𑁯𑁮. ‘‘𑀓𑁄 𑀢𑁆𑀯𑀁 𑀩𑁆𑀭𑀳𑀸𑀩𑀸𑀳𑀼 𑀯𑀦𑀲𑁆𑀲 𑀫𑀚𑁆𑀛𑁂, 𑀯𑀺𑀭𑁄𑀘𑀲𑀺 𑀖𑀢𑀲𑀺𑀢𑁆𑀢𑁄𑀯 𑀅𑀕𑁆𑀕𑀺;

𑀫𑀳𑁂𑀲𑀓𑁆𑀔𑁄 𑀅𑀜𑁆𑀜𑀢𑀭𑁄𑀲𑀺 𑀬𑀓𑁆𑀔𑁄, 𑀉𑀤𑀸𑀳𑀼 𑀦𑀸𑀕𑁄𑀲𑀺 𑀫𑀳𑀸𑀦𑀼𑀪𑀸𑀯𑁄’’.

𑁭𑁯𑁯. ‘‘𑀦𑀸𑀕𑁄𑀳𑀫𑀲𑁆𑀫𑀺 𑀇𑀤𑁆𑀥𑀺𑀫𑀸, 𑀢𑁂𑀚𑀲𑁆𑀲𑀻 [𑀢𑁂𑀚𑀲𑀻 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀤𑀼𑀭𑀢𑀺𑀓𑁆𑀓𑀫𑁄;

𑀟𑀁𑀲𑁂𑀬𑁆𑀬𑀁 𑀢𑁂𑀚𑀲𑀸 𑀓𑀼𑀤𑁆𑀥𑁄, 𑀨𑀻𑀢𑀁 𑀚𑀦𑀧𑀤𑀁 𑀅𑀧𑀺.

𑁮𑁦𑁦. ‘‘𑀲𑀫𑀼𑀤𑁆𑀤𑀚𑀸 𑀳𑀺 𑀫𑁂 𑀫𑀸𑀢𑀸, 𑀥𑀢𑀭𑀝𑁆𑀞𑁄 𑀘 𑀫𑁂 𑀧𑀺𑀢𑀸;

𑀲𑀼𑀤𑀲𑁆𑀲𑀦𑀓𑀦𑀺𑀝𑁆𑀞𑁄𑀲𑁆𑀫𑀺, 𑀪𑀽𑀭𑀺𑀤𑀢𑁆𑀢𑁄𑀢𑀺 𑀫𑀁 𑀯𑀺𑀤𑀽’’.

𑁮𑁦𑁧. ‘‘𑀬𑀁 𑀕𑀫𑁆𑀪𑀻𑀭𑀁 𑀲𑀤𑀸𑀯𑀝𑁆𑀝𑀁, 𑀭𑀳𑀤𑀁 𑀪𑀺𑀲𑁆𑀫𑀁 𑀧𑁂𑀓𑁆𑀔𑀲𑀺;

𑀏𑀲 𑀤𑀺𑀩𑁆𑀬𑁄 𑀫𑀫𑀸𑀯𑀸𑀲𑁄, 𑀅𑀦𑁂𑀓𑀲𑀢𑀧𑁄𑀭𑀺𑀲𑁄.

𑁮𑁦𑁨. ‘‘𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀤𑀁, 𑀦𑀻𑀮𑁄𑀤𑀁 𑀯𑀦𑀫𑀚𑁆𑀛𑀢𑁄;

𑀬𑀫𑀼𑀦𑀁 𑀧𑀯𑀺𑀲 𑀫𑀸 𑀪𑀻𑀢𑁄, 𑀔𑁂𑀫𑀁 𑀯𑀢𑁆𑀢𑀯𑀢𑀁 [𑀯𑀢𑁆𑀢𑀯𑀢𑀺𑀁 (𑀲𑁆𑀬𑀸. 𑀓.)] 𑀲𑀺𑀯𑀁’’.

𑁮𑁦𑁩. ‘‘𑀢𑀢𑁆𑀣 𑀧𑀢𑁆𑀢𑁄 𑀲𑀸𑀦𑀼𑀘𑀭𑁄, 𑀲𑀳 𑀧𑀼𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡;

𑀧𑀽𑀚𑀺𑀢𑁄 𑀫𑀬𑁆𑀳𑀁 𑀓𑀸𑀫𑁂𑀳𑀺, 𑀲𑀼𑀔𑀁 𑀩𑁆𑀭𑀸𑀳𑁆𑀫𑀡 𑀯𑀘𑁆𑀙𑀲𑀺’’.

𑁮𑁦𑁪. ‘‘𑀲𑀫𑀸 𑀲𑀫𑀦𑁆𑀢𑀧𑀭𑀺𑀢𑁄, 𑀧𑀳𑀽𑀢𑀢𑀕𑀭𑀸 [𑀩𑀳𑀼𑀓𑀸 𑀢𑀕𑁆𑀕𑀭𑀸 (𑀲𑀻. 𑀲𑁆𑀬𑀸. 𑀧𑀻.)] 𑀫𑀳𑀻;

𑀇𑀦𑁆𑀤𑀕𑁄𑀧𑀓𑀲𑀜𑁆𑀙𑀦𑁆𑀦𑀸, 𑀲𑁄𑀪𑀢𑀺 𑀳𑀭𑀺𑀢𑀼𑀢𑁆𑀢𑀫𑀸.

𑁮𑁦𑁫. ‘‘𑀭𑀫𑁆𑀫𑀸𑀦𑀺 𑀯𑀦𑀘𑁂𑀢𑁆𑀬𑀸𑀦𑀺, 𑀭𑀫𑁆𑀫𑀸 𑀳𑀁𑀲𑀽𑀧𑀓𑀽𑀚𑀺𑀢𑀸;

𑀑𑀧𑀼𑀧𑁆𑀨𑀸𑀧𑀤𑁆𑀫𑀸 𑀢𑀺𑀝𑁆𑀞𑀦𑁆𑀢𑀺, 𑀧𑁄𑀓𑁆𑀔𑀭𑀜𑁆𑀜𑁄 [𑀧𑁄𑀓𑁆𑀔𑀭𑀜𑁆𑀜𑀸 (𑀲𑁆𑀬𑀸. 𑀧𑀻.)] 𑀲𑀼𑀦𑀺𑀫𑁆𑀫𑀺𑀢𑀸.

𑁮𑁦𑁬. ‘‘𑀅𑀝𑁆𑀞𑀁𑀲𑀸 𑀲𑀼𑀓𑀢𑀸 𑀣𑀫𑁆𑀪𑀸, 𑀲𑀩𑁆𑀩𑁂 𑀯𑁂𑀴𑀼𑀭𑀺𑀬𑀸𑀫𑀬𑀸;

𑀲𑀳𑀲𑁆𑀲𑀣𑀫𑁆𑀪𑀸 𑀧𑀸𑀲𑀸𑀤𑀸, 𑀧𑀽𑀭𑀸 𑀓𑀜𑁆𑀜𑀸𑀳𑀺 𑀚𑁄𑀢𑀭𑁂.

𑁮𑁦𑁭. ‘‘𑀯𑀺𑀫𑀸𑀦𑀁 𑀉𑀧𑀧𑀦𑁆𑀦𑁄𑀲𑀺, 𑀤𑀺𑀩𑁆𑀬𑀁 𑀧𑀼𑀜𑁆𑀜𑁂𑀳𑀺 𑀅𑀢𑁆𑀢𑀦𑁄;

𑀅𑀲𑀫𑁆𑀩𑀸𑀥𑀁 𑀲𑀺𑀯𑀁 𑀭𑀫𑁆𑀫𑀁, 𑀅𑀘𑁆𑀘𑀦𑁆𑀢𑀲𑀼𑀔𑀲𑀁𑀳𑀺𑀢𑀁.

𑁮𑁦𑁮. ‘‘𑀫𑀜𑁆𑀜𑁂 𑀲𑀳𑀲𑁆𑀲𑀦𑁂𑀢𑁆𑀢𑀲𑁆𑀲, 𑀯𑀺𑀫𑀸𑀦𑀁 𑀦𑀸𑀪𑀺𑀓𑀗𑁆𑀔𑀲𑀺;

𑀇𑀤𑁆𑀥𑀻 𑀳𑀺 𑀢𑁆𑀬𑀸𑀬𑀁 𑀯𑀺𑀧𑀼𑀮𑀸, 𑀲𑀓𑁆𑀓𑀲𑁆𑀲𑁂𑀯 𑀚𑀼𑀢𑀻𑀫𑀢𑁄’’.

𑁮𑁦𑁯. ‘‘𑀫𑀦𑀲𑀸𑀧𑀺 𑀦 𑀧𑀢𑁆𑀢𑀩𑁆𑀩𑁄, 𑀆𑀦𑀼𑀪𑀸𑀯𑁄 𑀚𑀼𑀢𑀻𑀫𑀢𑁄;

𑀧𑀭𑀺𑀘𑀸𑀭𑀬𑀫𑀸𑀦𑀸𑀦𑀁, 𑀲𑀇𑀦𑁆𑀤𑀸𑀦𑀁 [𑀇𑀦𑁆𑀤𑀸𑀦𑀁 (𑀲𑁆𑀬𑀸. 𑀓.)] 𑀯𑀲𑀯𑀢𑁆𑀢𑀺𑀦𑀁’’.

𑁮𑁧𑁦. ‘‘𑀢𑀁 𑀯𑀺𑀫𑀸𑀦𑀁 𑀅𑀪𑀺𑀚𑁆𑀛𑀸𑀬, 𑀅𑀫𑀭𑀸𑀦𑀁 𑀲𑀼𑀔𑁂𑀲𑀺𑀦𑀁;

𑀉𑀧𑁄𑀲𑀣𑀁 𑀉𑀧𑀯𑀲𑀦𑁆𑀢𑁄, 𑀲𑁂𑀫𑀺 𑀯𑀫𑁆𑀫𑀺𑀓𑀫𑀼𑀤𑁆𑀥𑀦𑀺’’.

𑁮𑁧𑁧. ‘‘𑀅𑀳𑀜𑁆𑀘 𑀫𑀺𑀕𑀫𑁂𑀲𑀸𑀦𑁄, 𑀲𑀧𑀼𑀢𑁆𑀢𑁄 𑀧𑀸𑀯𑀺𑀲𑀺𑀁 𑀯𑀦𑀁;

𑀢𑀁 𑀫𑀁 𑀫𑀢𑀁 𑀯𑀸 𑀚𑀻𑀯𑀁 𑀯𑀸, 𑀦𑀸𑀪𑀺𑀯𑁂𑀤𑁂𑀦𑁆𑀢𑀺 𑀜𑀸𑀢𑀓𑀸.

𑁮𑁧𑁨. ‘‘𑀆𑀫𑀦𑁆𑀢𑀬𑁂 𑀪𑀽𑀭𑀺𑀤𑀢𑁆𑀢𑀁, 𑀓𑀸𑀲𑀺𑀧𑀼𑀢𑁆𑀢𑀁 𑀬𑀲𑀲𑁆𑀲𑀺𑀦𑀁;

𑀢𑀬𑀸 𑀦𑁄 𑀲𑀫𑀦𑀼𑀜𑁆𑀜𑀸𑀢𑀸, 𑀅𑀧𑀺 𑀧𑀲𑁆𑀲𑁂𑀫𑀼 𑀜𑀸𑀢𑀓𑁂’’.

𑁮𑁧𑁩. ‘‘𑀏𑀲𑁄 𑀳𑀺 𑀯𑀢 𑀫𑁂 𑀙𑀦𑁆𑀤𑁄, 𑀬𑀁 𑀯𑀲𑁂𑀲𑀺 𑀫𑀫𑀦𑁆𑀢𑀺𑀓𑁂;

𑀦 𑀳𑀺 𑀏𑀢𑀸𑀤𑀺𑀲𑀸 𑀓𑀸𑀫𑀸, 𑀲𑀼𑀮𑀪𑀸 𑀳𑁄𑀦𑁆𑀢𑀺 𑀫𑀸𑀦𑀼𑀲𑁂.

𑁮𑁧𑁪. ‘‘𑀲𑀘𑁂 𑀢𑁆𑀯𑀁 𑀦𑀺𑀘𑁆𑀙𑀲𑁂 𑀯𑀢𑁆𑀣𑀼𑀁, 𑀫𑀫 𑀓𑀸𑀫𑁂𑀳𑀺 𑀧𑀽𑀚𑀺𑀢𑁄;

𑀫𑀬𑀸 𑀢𑁆𑀯𑀁 𑀲𑀫𑀦𑀼𑀜𑁆𑀜𑀸𑀢𑁄, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀳𑀺 𑀜𑀸𑀢𑀓𑁂’’.

𑁮𑁧𑁫. ‘‘𑀥𑀸𑀭𑀬𑀺𑀫𑀁 𑀫𑀡𑀺𑀁 𑀤𑀺𑀩𑁆𑀬𑀁, 𑀧𑀲𑀼𑀁 𑀧𑀼𑀢𑁆𑀢𑁂 𑀘 𑀯𑀺𑀦𑁆𑀤𑀢𑀺;

𑀅𑀭𑁄𑀕𑁄 𑀲𑀼𑀔𑀺𑀢𑁄 𑀳𑁄𑀢𑀺 [𑀳𑁄𑀳𑀺 (𑀲𑁆𑀬𑀸.)], 𑀕𑀘𑁆𑀙𑁂𑀯𑀸𑀤𑀸𑀬 𑀩𑁆𑀭𑀸𑀳𑁆𑀫𑀡’’.

𑁮𑁧𑁬. ‘‘𑀓𑀼𑀲𑀮𑀁 𑀧𑀝𑀺𑀦𑀦𑁆𑀤𑀸𑀫𑀺, 𑀪𑀽𑀭𑀺𑀤𑀢𑁆𑀢 𑀯𑀘𑁄 𑀢𑀯;

𑀧𑀩𑁆𑀩𑀚𑀺𑀲𑁆𑀲𑀸𑀫𑀺 𑀚𑀺𑀡𑁆𑀡𑁄𑀲𑁆𑀫𑀺, 𑀦 𑀓𑀸𑀫𑁂 𑀅𑀪𑀺𑀧𑀢𑁆𑀣𑀬𑁂’’.

𑁮𑁧𑁭. ‘‘𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑁂 𑀪𑀗𑁆𑀕𑁄, 𑀳𑁄𑀢𑀺 𑀪𑁄𑀕𑁂𑀳𑀺 𑀓𑀸𑀭𑀺𑀬𑀁;

𑀅𑀯𑀺𑀓𑀫𑁆𑀧𑀫𑀸𑀦𑁄 𑀏𑀬𑁆𑀬𑀸𑀲𑀺, 𑀩𑀳𑀼𑀁 𑀤𑀲𑁆𑀲𑀸𑀫𑀺 𑀢𑁂 𑀥𑀦𑀁’’.

𑁮𑁧𑁮. ‘‘𑀓𑀼𑀲𑀮𑀁 𑀧𑀝𑀺𑀦𑀦𑁆𑀤𑀸𑀫𑀺, 𑀪𑀽𑀭𑀺𑀤𑀢𑁆𑀢 𑀯𑀘𑁄 𑀢𑀯;

𑀧𑀼𑀦𑀧𑀺 𑀆𑀕𑀫𑀺𑀲𑁆𑀲𑀸𑀫𑀺, 𑀲𑀘𑁂 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀺’’.

𑁮𑁧𑁯. ‘‘𑀇𑀤𑀁 𑀯𑀢𑁆𑀯𑀸 𑀪𑀽𑀭𑀺𑀤𑀢𑁆𑀢𑁄, 𑀧𑁂𑀲𑁂𑀲𑀺 𑀘𑀢𑀼𑀭𑁄 𑀚𑀦𑁂;

𑀏𑀣 𑀕𑀘𑁆𑀙𑀣 𑀉𑀝𑁆𑀞𑁂𑀣, 𑀔𑀺𑀧𑁆𑀧𑀁 𑀧𑀸𑀧𑁂𑀣 𑀩𑁆𑀭𑀸𑀳𑁆𑀫𑀡𑀁.

𑁮𑁨𑁦. 𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀉𑀝𑁆𑀞𑀸𑀬 𑀘𑀢𑀼𑀭𑁄 𑀚𑀦𑀸;

𑀧𑁂𑀲𑀺𑀢𑀸 𑀪𑀽𑀭𑀺𑀤𑀢𑁆𑀢𑁂𑀦, 𑀔𑀺𑀧𑁆𑀧𑀁 𑀧𑀸𑀧𑁂𑀲𑀼 𑀩𑁆𑀭𑀸𑀳𑁆𑀫𑀡𑀁.

𑁮𑁨𑁧. ‘‘𑀫𑀡𑀺𑀁 𑀧𑀕𑁆𑀕𑀬𑁆𑀳 𑀫𑀗𑁆𑀕𑀮𑁆𑀬𑀁, 𑀲𑀸𑀥𑀼𑀯𑀺𑀢𑁆𑀢𑀁 [𑀲𑀸𑀥𑀼𑀘𑀺𑀢𑁆𑀢𑀁 (𑀧𑀻.)] 𑀫𑀦𑁄𑀭𑀫𑀁;

𑀲𑁂𑀮𑀁 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁, 𑀓𑁄 𑀇𑀫𑀁 𑀫𑀡𑀺𑀫𑀚𑁆𑀛𑀕𑀸’’.

𑁮𑁨𑁨. ‘‘𑀮𑁄𑀳𑀺𑀢𑀓𑁆𑀔𑀲𑀳𑀲𑁆𑀲𑀸𑀳𑀺, 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀢𑀁;

𑀅𑀚𑁆𑀚 𑀓𑀸𑀮𑀁 𑀧𑀣𑀁 [𑀧𑀤𑀁 (𑀲𑀻. 𑀧𑀻.)] 𑀕𑀘𑁆𑀙𑀁, 𑀅𑀚𑁆𑀛𑀕𑀸𑀳𑀁 𑀫𑀡𑀺𑀁 𑀇𑀫𑀁’’.

𑁮𑁨𑁩. ‘‘𑀲𑀼𑀧𑀘𑀺𑀡𑁆𑀡𑁄 𑀅𑀬𑀁 𑀲𑁂𑀮𑁄, 𑀅𑀘𑁆𑀘𑀺𑀢𑁄 𑀫𑀳𑀺𑀢𑁄 [𑀫𑀸𑀦𑀺𑀢𑁄 (𑀓.)] 𑀲𑀤𑀸;

𑀲𑀼𑀥𑀸𑀭𑀺𑀢𑁄 𑀲𑀼𑀦𑀺𑀓𑁆𑀔𑀺𑀢𑁆𑀢𑁄, 𑀲𑀩𑁆𑀩𑀢𑁆𑀣𑀫𑀪𑀺𑀲𑀸𑀥𑀬𑁂.

𑁮𑁨𑁪. ‘‘𑀉𑀧𑀘𑀸𑀭𑀯𑀺𑀧𑀦𑁆𑀦𑀲𑁆𑀲, 𑀦𑀺𑀓𑁆𑀔𑁂𑀧𑁂 𑀥𑀸𑀭𑀡𑀸𑀬 𑀯𑀸;

𑀅𑀬𑀁 𑀲𑁂𑀮𑁄 𑀯𑀺𑀦𑀸𑀲𑀸𑀬, 𑀧𑀭𑀺𑀘𑀺𑀡𑁆𑀡𑁄 𑀅𑀬𑁄𑀦𑀺𑀲𑁄.

𑁮𑁨𑁫. ‘‘𑀦 𑀇𑀫𑀁 𑀅𑀓𑀼𑀲𑀮𑁄 [𑀓𑀼𑀲𑀮𑀁 (𑀓.)] 𑀤𑀺𑀩𑁆𑀬𑀁, 𑀫𑀡𑀺𑀁 𑀥𑀸𑀭𑁂𑀢𑀼𑀫𑀸𑀭𑀳𑁄;

𑀧𑀝𑀺𑀧𑀚𑁆𑀚 𑀲𑀢𑀁 𑀦𑀺𑀓𑁆𑀔𑀁, 𑀤𑁂𑀳𑀺𑀫𑀁 𑀭𑀢𑀦𑀁 𑀫𑀫’’.

𑁮𑁨𑁬. ‘‘𑀦 𑀘 𑀫𑁆𑀬𑀸𑀬𑀁 𑀫𑀡𑀻 𑀓𑁂𑀬𑁆𑀬𑁄, 𑀕𑁄𑀳𑀺 [𑀓𑁂𑀳𑀺 (𑀓.)] 𑀯𑀸 𑀭𑀢𑀦𑁂𑀳𑀺 𑀯𑀸;

𑀲𑁂𑀮𑁄 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄, 𑀦𑁂𑀯 𑀓𑁂𑀬𑁆𑀬𑁄 𑀫𑀡𑀻 𑀫𑀫’’.

𑁮𑁨𑁭. ‘‘𑀦𑁄 𑀘𑁂 𑀢𑀬𑀸 𑀫𑀡𑀻 𑀓𑁂𑀬𑁆𑀬𑁄, 𑀕𑁄𑀳𑀺 [𑀓𑁂𑀳𑀺 (𑀓.)] 𑀯𑀸 𑀭𑀢𑀦𑁂𑀳𑀺 𑀯𑀸;

𑀅𑀣 𑀓𑁂𑀦 𑀫𑀡𑀻 𑀓𑁂𑀬𑁆𑀬𑁄, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’.

𑁮𑁨𑁮. ‘‘𑀬𑁄 𑀫𑁂 𑀲𑀁𑀲𑁂 𑀫𑀳𑀸𑀦𑀸𑀕𑀁, 𑀢𑁂𑀚𑀲𑁆𑀲𑀺𑀁 𑀤𑀼𑀭𑀢𑀺𑀓𑁆𑀓𑀫𑀁;

𑀢𑀲𑁆𑀲 𑀤𑀚𑁆𑀚𑀁 𑀇𑀫𑀁 𑀲𑁂𑀮𑀁, 𑀚𑀮𑀦𑁆𑀢𑀫𑀺𑀯 𑀢𑁂𑀚𑀲𑀸’’.

𑁮𑁨𑁯. ‘‘𑀓𑁄 𑀦𑀼 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦, 𑀲𑀼𑀧𑀡𑁆𑀡𑁄 𑀧𑀢𑀢𑀁 𑀯𑀭𑁄;

𑀦𑀸𑀕𑀁 𑀚𑀺𑀕𑀻𑀲𑀫𑀦𑁆𑀯𑁂𑀲𑀺, 𑀅𑀦𑁆𑀯𑁂𑀲𑀁 𑀪𑀓𑁆𑀔𑀫𑀢𑁆𑀢𑀦𑁄.

𑁮𑁩𑁦. ‘‘𑀦𑀸𑀳𑀁 𑀤𑀺𑀚𑀸𑀥𑀺𑀧𑁄 𑀳𑁄𑀫𑀺, 𑀦 𑀤𑀺𑀝𑁆𑀞𑁄 𑀕𑀭𑀼𑀴𑁄 𑀫𑀬𑀸;

𑀆𑀲𑀻𑀯𑀺𑀲𑁂𑀦 𑀯𑀺𑀢𑁆𑀢𑁄𑀢𑀺 [𑀯𑀺𑀢𑁆𑀢𑁄𑀲𑁆𑀫𑀺 (𑀲𑁆𑀬𑀸. 𑀓.)], 𑀯𑀚𑁆𑀚𑁄 𑀩𑁆𑀭𑀸𑀳𑁆𑀫𑀡 𑀫𑀁 𑀯𑀺𑀤𑀽’’.

𑁮𑁩𑁧. ‘‘𑀓𑀺𑀁 𑀦𑀼 𑀢𑀼𑀬𑁆𑀳𑀁 𑀩𑀮𑀁 𑀅𑀢𑁆𑀣𑀺, 𑀓𑀺𑀁 𑀲𑀺𑀧𑁆𑀧𑀁 𑀯𑀺𑀚𑁆𑀚𑀢𑁂 𑀢𑀯;

𑀓𑀺𑀲𑁆𑀫𑀺𑀁 𑀯𑀸 𑀢𑁆𑀯𑀁 𑀧𑀭𑀢𑁆𑀣𑀤𑁆𑀥𑁄, 𑀉𑀭𑀕𑀁 𑀦𑀸𑀧𑀘𑀸𑀬𑀲𑀺’’.

𑁮𑁩𑁨. ‘‘𑀆𑀭𑀜𑁆𑀜𑀺𑀓𑀲𑁆𑀲 𑀇𑀲𑀺𑀦𑁄, 𑀘𑀺𑀭𑀭𑀢𑁆𑀢𑀁 𑀢𑀧𑀲𑁆𑀲𑀺𑀦𑁄;

𑀲𑀼𑀧𑀡𑁆𑀡𑁄 𑀓𑁄𑀲𑀺𑀬𑀲𑁆𑀲𑀓𑁆𑀔𑀸, 𑀯𑀺𑀲𑀯𑀺𑀚𑁆𑀚𑀁 𑀅𑀦𑀼𑀢𑁆𑀢𑀭𑀁.

𑁮𑁩𑁩. ‘‘𑀢𑀁 𑀪𑀸𑀯𑀺𑀢𑀢𑁆𑀢𑀜𑁆𑀜𑀢𑀭𑀁, 𑀲𑀫𑁆𑀫𑀦𑁆𑀢𑀁 𑀧𑀩𑁆𑀩𑀢𑀦𑁆𑀢𑀭𑁂;

𑀲𑀓𑁆𑀓𑀘𑁆𑀘𑀁 𑀢𑀁 𑀉𑀧𑀝𑁆𑀞𑀸𑀲𑀺𑀁, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄.

𑁮𑁩𑁪. ‘‘𑀲𑁄 𑀢𑀤𑀸 𑀧𑀭𑀺𑀘𑀺𑀡𑁆𑀡𑁄 𑀫𑁂, 𑀯𑀢𑁆𑀢𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀯𑀸;

𑀤𑀺𑀩𑁆𑀩𑀁 𑀧𑀸𑀢𑀼𑀓𑀭𑀻 𑀫𑀦𑁆𑀢𑀁, 𑀓𑀸𑀫𑀲𑀸 𑀪𑀕𑀯𑀸 𑀫𑀫.

𑁮𑁩𑁫. ‘‘𑀢𑁆𑀬𑀸𑀳𑀁 𑀫𑀦𑁆𑀢𑁂 𑀧𑀭𑀢𑁆𑀣𑀤𑁆𑀥𑁄, 𑀦𑀸𑀳𑀁 𑀪𑀸𑀬𑀸𑀫𑀺 𑀪𑁄𑀕𑀺𑀦𑀁;

𑀆𑀘𑀭𑀺𑀬𑁄 𑀯𑀺𑀲𑀖𑀸𑀢𑀸𑀦𑀁, 𑀅𑀮𑀫𑁆𑀧𑀸𑀦𑁄𑀢𑀺 [𑀆𑀮𑀫𑁆𑀩𑀸𑀦𑁄𑀢𑀺 (𑀲𑀻. 𑀧𑀻.), 𑀆𑀮𑀫𑁆𑀩𑀸𑀬𑀦𑁄𑀢𑀺 (𑀲𑁆𑀬𑀸.)] 𑀫𑀁 𑀯𑀺𑀤𑀽’’.

𑁮𑁩𑁬. ‘‘𑀕𑀡𑁆𑀳𑀸𑀫𑀲𑁂 𑀫𑀡𑀺𑀁 𑀢𑀸𑀢, 𑀲𑁄𑀫𑀤𑀢𑁆𑀢 𑀯𑀺𑀚𑀸𑀦𑀳𑀺;

𑀫𑀸 𑀤𑀡𑁆𑀟𑁂𑀦 𑀲𑀺𑀭𑀺𑀁 𑀧𑀢𑁆𑀢𑀁, 𑀓𑀸𑀫𑀲𑀸 𑀧𑀚𑀳𑀺𑀫𑁆𑀳𑀲𑁂’’.

𑁮𑁩𑁭. ‘‘𑀲𑀓𑀁 𑀦𑀺𑀯𑁂𑀲𑀦𑀁 𑀧𑀢𑁆𑀢𑀁, 𑀬𑁄 𑀢𑀁 𑀩𑁆𑀭𑀸𑀳𑁆𑀫𑀡 𑀧𑀽𑀚𑀬𑀺;

𑀏𑀯𑀁 𑀓𑀮𑁆𑀬𑀸𑀡𑀓𑀸𑀭𑀺𑀲𑁆𑀲, 𑀓𑀺𑀁 𑀫𑁄𑀳𑀸 𑀤𑀼𑀩𑁆𑀪𑀺𑀫𑀺𑀘𑁆𑀙𑀲𑀺’’.

𑁮𑁩𑁮. ‘‘𑀲𑀘𑁂 𑀢𑁆𑀯𑀁 [𑀲𑀘𑁂 𑀳𑀺 (𑀲𑀻. 𑀧𑀻. 𑀓.)] 𑀥𑀦𑀓𑀸𑀫𑁄𑀲𑀺, 𑀪𑀽𑀭𑀺𑀤𑀢𑁆𑀢𑁄 𑀧𑀤𑀲𑁆𑀲𑀢𑀺 [𑀪𑀽𑀭𑀺𑀤𑀢𑁆𑀢𑀁 𑀧𑀤𑀺𑀲𑁆𑀲𑀲𑀺 (𑀓.)];

𑀢𑀫𑁂𑀯 𑀕𑀦𑁆𑀢𑁆𑀯𑀸 𑀬𑀸𑀘𑀲𑁆𑀲𑀼, 𑀩𑀳𑀼𑀁 𑀤𑀲𑁆𑀲𑀢𑀺 𑀢𑁂 𑀥𑀦𑀁’’.

𑁮𑁩𑁯. ‘‘𑀳𑀢𑁆𑀣𑀕𑀢𑀁 𑀧𑀢𑁆𑀢𑀕𑀢𑀁, 𑀦𑀺𑀓𑀺𑀡𑁆𑀡𑀁 𑀔𑀸𑀤𑀺𑀢𑀼𑀁 𑀯𑀭𑀁;

𑀫𑀸 𑀦𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀢𑁆𑀣𑁄, 𑀲𑁄𑀫𑀤𑀢𑁆𑀢 𑀉𑀧𑀘𑁆𑀘𑀕𑀸’’.

𑁮𑁪𑁦. ‘‘𑀧𑀘𑁆𑀘𑀢𑀺 𑀦𑀺𑀭𑀬𑁂 𑀖𑁄𑀭𑁂, 𑀫𑀳𑀺𑀲𑁆𑀲𑀫𑀧𑀺 𑀯𑀺𑀯𑀭𑀢𑀺 [𑀫𑀳𑀺𑀲𑁆𑀲𑀫𑀯 𑀤𑀻𑀬𑀢𑀺 (𑀲𑀻. 𑀧𑀻.), 𑀫𑀳𑀺𑀫𑀲𑁆𑀲 𑀯𑀺𑀦𑁆𑀤𑁆𑀭𑀻𑀬𑀢𑀺 (𑀲𑁆𑀬𑀸.)];

𑀫𑀺𑀢𑁆𑀢𑀤𑀼𑀩𑁆𑀪𑀻 𑀳𑀺𑀢𑀘𑁆𑀘𑀸𑀕𑀻, 𑀚𑀻𑀯𑀭𑁂𑀯𑀸𑀧𑀺 𑀲𑀼𑀲𑁆𑀲𑀢𑀺 [𑀚𑀻𑀯𑀭𑁂 𑀘𑀸𑀧𑀺 𑀲𑀼𑀲𑁆𑀲𑀭𑁂 (𑀲𑀻. 𑀧𑀻.)].

𑁮𑁪𑁧. ‘‘𑀲𑀘𑁂 𑀢𑁆𑀯𑀁 [𑀲𑀘𑁂 𑀳𑀺 (𑀲𑀻. 𑀧𑀻. 𑀓.)] 𑀥𑀦𑀓𑀸𑀫𑁄𑀲𑀺, 𑀪𑀽𑀭𑀺𑀤𑀢𑁆𑀢𑁄 𑀧𑀤𑀲𑁆𑀲𑀢𑀺;

𑀫𑀜𑁆𑀜𑁂 𑀅𑀢𑁆𑀢𑀓𑀢𑀁 𑀯𑁂𑀭𑀁, 𑀦𑀘𑀺𑀭𑀁 𑀯𑁂𑀤𑀬𑀺𑀲𑁆𑀲𑀲𑀺’’.

𑁮𑁪𑁨. ‘‘𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦, 𑀏𑀯𑀁 𑀲𑀼𑀚𑁆𑀛𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀫𑀳𑀸𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫, 𑀏𑀯𑀁 𑀫𑁄𑀓𑁆𑀔𑀸𑀫 𑀧𑀸𑀧𑀓𑀸’’.

𑁮𑁪𑁩. ‘‘𑀳𑀦𑁆𑀤 𑀤𑀸𑀦𑀺 𑀅𑀧𑀸𑀬𑀸𑀫𑀺, 𑀦𑀸𑀳𑀁 𑀅𑀚𑁆𑀚 𑀢𑀬𑀸 𑀲𑀳;

𑀧𑀤𑀫𑁆𑀧𑁂𑀓𑀁 [𑀧𑀤𑀫𑁂𑀓𑀁 (𑀲𑁆𑀬𑀸. 𑀓.)] 𑀦 𑀕𑀘𑁆𑀙𑁂𑀬𑁆𑀬𑀁, 𑀏𑀯𑀁 𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑀸’’.

𑁮𑁪𑁪. ‘‘𑀇𑀤𑀁 𑀯𑀢𑁆𑀯𑀸𑀦 𑀧𑀺𑀢𑀭𑀁, 𑀲𑁄𑀫𑀤𑀢𑁆𑀢𑁄 𑀩𑀳𑀼𑀲𑁆𑀲𑀼𑀢𑁄;

𑀉𑀚𑁆𑀛𑀸𑀧𑁂𑀢𑁆𑀯𑀸𑀦 𑀪𑀽𑀢𑀸𑀦𑀺, 𑀢𑀫𑁆𑀳𑀸 𑀞𑀸𑀦𑀸 𑀅𑀧𑀓𑁆𑀓𑀫𑀺.

𑁮𑁪𑁫. ‘‘𑀕𑀡𑁆𑀳𑀸𑀳𑁂𑀢𑀁 𑀫𑀳𑀸𑀦𑀸𑀕𑀁, 𑀆𑀳𑀭𑁂𑀢𑀁 𑀫𑀡𑀺𑀁 𑀫𑀫;

𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀪𑁄, 𑀬𑀲𑁆𑀲 𑀮𑁄𑀳𑀺𑀢𑀓𑁄 𑀲𑀺𑀭𑁄.

𑁮𑁪𑁬. ‘‘𑀓𑀧𑁆𑀧𑀸𑀲𑀧𑀺𑀘𑀼𑀭𑀸𑀲𑀻𑀯, 𑀏𑀲𑁄 𑀓𑀸𑀬𑁄 𑀧𑀤𑀺𑀲𑁆𑀲𑀢𑀺 [𑀓𑀸𑀬’𑀲𑁆𑀲 𑀤𑀺𑀲𑁆𑀲𑀢𑀺 (𑀲𑀻. 𑀧𑀻.)];

𑀯𑀫𑁆𑀫𑀺𑀓𑀕𑁆𑀕𑀕𑀢𑁄 𑀲𑁂𑀢𑀺, 𑀢𑀁 𑀢𑁆𑀯𑀁 𑀕𑀡𑁆𑀳𑀸𑀳𑀺 𑀩𑁆𑀭𑀸𑀳𑁆𑀫𑀡’’.

𑁮𑁪𑁭. ‘‘𑀅𑀣𑁄𑀲𑀥𑁂𑀳𑀺 𑀤𑀺𑀩𑁆𑀩𑁂𑀳𑀺, 𑀚𑀧𑁆𑀧𑀁 𑀫𑀦𑁆𑀢𑀧𑀤𑀸𑀦𑀺 𑀘;

𑀏𑀯𑀁 𑀢𑀁 𑀅𑀲𑀓𑁆𑀔𑀺 𑀲𑀢𑁆𑀣𑀼𑀁 [𑀲𑀝𑁆𑀞𑀼𑀁 (𑀲𑀻. 𑀧𑀻.), 𑀬𑀼𑀝𑁆𑀞𑀼𑀁 (𑀲𑁆𑀬𑀸.), 𑀲𑀼𑀢𑁆𑀢𑀼𑀁 (𑀓.)], 𑀓𑀢𑁆𑀯𑀸 𑀧𑀭𑀺𑀢𑁆𑀢𑀫𑀢𑁆𑀢𑀦𑁄’’.

𑁮𑁪𑁮. ‘‘𑀫𑀫𑀁 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀁;

𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀳𑀝𑁆𑀞𑀸𑀦𑀺, 𑀲𑀸𑀯𑀁 [𑀲𑀸𑀫𑀁 (𑀲𑀻. 𑀧𑀻.)] 𑀚𑀸𑀢𑀁 𑀫𑀼𑀔𑀁 𑀢𑀯.

𑁮𑁪𑁯. ‘‘𑀧𑀤𑁆𑀫𑀁 𑀬𑀣𑀸 𑀳𑀢𑁆𑀣𑀕𑀢𑀁, 𑀧𑀸𑀡𑀺𑀦𑀸 𑀧𑀭𑀺𑀫𑀤𑁆𑀤𑀺𑀢𑀁;

𑀲𑀸𑀯𑀁 𑀚𑀸𑀢𑀁 [𑀬𑀦𑁆𑀢𑀁 (𑀓.)] 𑀫𑀼𑀔𑀁 𑀢𑀼𑀬𑁆𑀳𑀁, 𑀫𑀫𑀁 𑀤𑀺𑀲𑁆𑀯𑀸𑀦 𑀏𑀤𑀺𑀲𑀁.

𑁮𑁫𑁦. ‘‘𑀓𑀘𑁆𑀘𑀺 𑀦𑀼 𑀢𑁂 𑀦𑀸𑀪𑀺𑀲𑀲𑀺 [𑀢𑁂 𑀦𑀸𑀪𑀺𑀲𑀬𑀺 (𑀲𑀻.), 𑀢𑁂 𑀦𑀸𑀪𑀺𑀲𑁆𑀲𑀲𑀺 (𑀲𑁆𑀬𑀸.)], 𑀓𑀘𑁆𑀘𑀺 𑀢𑁂 𑀅𑀢𑁆𑀣𑀺 𑀯𑁂𑀤𑀦𑀸;

𑀬𑁂𑀦 𑀲𑀸𑀯𑀁 𑀫𑀼𑀔𑀁 𑀢𑀼𑀬𑁆𑀳𑀁, 𑀫𑀫𑀁 𑀤𑀺𑀲𑁆𑀯𑀸𑀦 𑀆𑀕𑀢𑀁’’.

𑁮𑁫𑁧. ‘‘𑀲𑀼𑀧𑀺𑀦𑀁 𑀢𑀸𑀢 𑀅𑀤𑁆𑀤𑀓𑁆𑀔𑀺𑀁, 𑀇𑀢𑁄 𑀫𑀸𑀲𑀁 𑀅𑀥𑁄𑀕𑀢𑀁;

𑀤𑀓𑁆𑀔𑀺𑀡𑀁 𑀯𑀺𑀬 𑀫𑁂 𑀩𑀸𑀳𑀼𑀁, 𑀙𑁂𑀢𑁆𑀯𑀸 𑀭𑀼𑀳𑀺𑀭𑀫𑀓𑁆𑀔𑀺𑀢𑀁;

𑀧𑀼𑀭𑀺𑀲𑁄 𑀆𑀤𑀸𑀬 𑀧𑀓𑁆𑀓𑀸𑀫𑀺, 𑀫𑀫 𑀭𑁄𑀤𑀦𑁆𑀢𑀺𑀬𑀸 𑀲𑀢𑀺.

𑁮𑁫𑁨. ‘‘𑀬𑀢𑁄𑀳𑀁 [𑀬𑀢𑁄 𑀢𑀁 (𑀲𑀻.)] 𑀲𑀼𑀧𑀺𑀦𑀫𑀤𑁆𑀤𑀓𑁆𑀔𑀺𑀁, 𑀲𑀼𑀤𑀲𑁆𑀲𑀦 𑀯𑀺𑀚𑀸𑀦𑀳𑀺;

𑀢𑀢𑁄 𑀤𑀺𑀯𑀸 𑀯𑀸 𑀭𑀢𑁆𑀢𑀺𑀁 𑀯𑀸, 𑀲𑀼𑀔𑀁 𑀫𑁂 𑀦𑁄𑀧𑀮𑀩𑁆𑀪𑀢𑀺’’.

𑁮𑁫𑁩. ‘‘𑀬𑀁 𑀧𑀼𑀩𑁆𑀩𑁂 𑀧𑀭𑀺𑀯𑀸𑀭𑀺𑀁𑀲𑀼 [𑀧𑀭𑀺𑀘𑀸𑀭𑀺𑀁𑀲𑀼 (𑀲𑀻. 𑀧𑀻.)], 𑀓𑀜𑁆𑀜𑀸 𑀭𑀼𑀘𑀺𑀭𑀯𑀺𑀕𑁆𑀕𑀳𑀸;

𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸, 𑀪𑀽𑀭𑀺𑀤𑀢𑁆𑀢𑁄 𑀦 𑀤𑀺𑀲𑁆𑀲𑀢𑀺.

𑁮𑁫𑁪. ‘‘𑀬𑀁 𑀧𑀼𑀩𑁆𑀩𑁂 𑀧𑀭𑀺𑀯𑀸𑀭𑀺𑀁𑀲𑀼 [𑀧𑀭𑀺𑀘𑀸𑀭𑀺𑀁𑀲𑀼 (𑀲𑀻. 𑀧𑀻.)], 𑀦𑁂𑀢𑁆𑀢𑀺𑀁𑀲𑀯𑀭𑀥𑀸𑀭𑀺𑀦𑁄;

𑀓𑀡𑀺𑀓𑀸𑀭𑀸𑀯 𑀲𑀫𑁆𑀨𑀼𑀮𑁆𑀮𑀸, 𑀪𑀽𑀭𑀺𑀤𑀢𑁆𑀢𑁄 𑀦 𑀤𑀺𑀲𑁆𑀲𑀢𑀺.

𑁮𑁫𑁫. ‘‘𑀳𑀦𑁆𑀤 𑀤𑀸𑀦𑀺 𑀕𑀫𑀺𑀲𑁆𑀲𑀸𑀫, 𑀪𑀽𑀭𑀺𑀤𑀢𑁆𑀢𑀦𑀺𑀯𑁂𑀲𑀦𑀁;

𑀥𑀫𑁆𑀫𑀝𑁆𑀞𑀁 𑀲𑀻𑀮𑀲𑀫𑁆𑀧𑀦𑁆𑀦𑀁, 𑀧𑀲𑁆𑀲𑀸𑀫 𑀢𑀯 𑀪𑀸𑀢𑀭𑀁’’.

𑁮𑁫𑁬. ‘‘𑀢𑀜𑁆𑀘 𑀤𑀺𑀲𑁆𑀯𑀸𑀦 𑀆𑀬𑀦𑁆𑀢𑀺𑀁, 𑀪𑀽𑀭𑀺𑀤𑀢𑁆𑀢𑀲𑁆𑀲 𑀫𑀸𑀢𑀭𑀁;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀧𑀓𑁆𑀓𑀦𑁆𑀤𑀼𑀁, 𑀪𑀽𑀭𑀺𑀤𑀢𑁆𑀢𑀲𑁆𑀲 𑀦𑀸𑀭𑀺𑀬𑁄.

𑁮𑁫𑁭. ‘‘𑀧𑀼𑀢𑁆𑀢𑀁 𑀢𑁂𑀬𑁆𑀬𑁂 𑀦 𑀚𑀸𑀦𑀸𑀫, 𑀇𑀢𑁄 𑀫𑀸𑀲𑀁 𑀅𑀥𑁄𑀕𑀢𑀁;

𑀫𑀢𑀁 𑀯𑀸 𑀬𑀤𑀺 𑀯𑀸 𑀚𑀻𑀯𑀁, 𑀪𑀽𑀭𑀺𑀤𑀢𑁆𑀢𑀁 𑀬𑀲𑀲𑁆𑀲𑀺𑀦𑀁’’.