𑁫𑁪𑁨. 𑀉𑀫𑀗𑁆𑀕𑀚𑀸𑀢𑀓𑀁 (𑁫)

𑁫𑁯𑁦. ‘‘𑀧𑀜𑁆𑀘𑀸𑀮𑁄 𑀲𑀩𑁆𑀩𑀲𑁂𑀦𑀸𑀬, 𑀩𑁆𑀭𑀳𑁆𑀫𑀤𑀢𑁆𑀢𑁄𑀬𑀫𑀸𑀕𑀢𑁄;

𑀲𑀸𑀬𑀁 𑀧𑀜𑁆𑀘𑀸𑀮𑀺𑀬𑀸 𑀲𑁂𑀦𑀸, 𑀅𑀧𑁆𑀧𑀫𑁂𑀬𑁆𑀬𑀸 𑀫𑀳𑁄𑀲𑀥.

𑁫𑁯𑁧. ‘‘𑀯𑀻𑀣𑀺𑀫𑀢𑀻 [𑀧𑀺𑀝𑁆𑀞𑀺𑀫𑀢𑀻 (𑀲𑀻. 𑀧𑀻.), 𑀯𑀺𑀤𑁆𑀥𑀺𑀫𑀢𑀻 (𑀲𑁆𑀬𑀸.)] 𑀧𑀢𑁆𑀢𑀺𑀫𑀢𑀻, 𑀲𑀩𑁆𑀩𑀲𑀗𑁆𑀕𑀸𑀫𑀓𑁄𑀯𑀺𑀤𑀸;

𑀑𑀳𑀸𑀭𑀺𑀦𑀻 𑀲𑀤𑁆𑀤𑀯𑀢𑀻, 𑀪𑁂𑀭𑀺𑀲𑀗𑁆𑀔𑀧𑁆𑀧𑀩𑁄𑀥𑀦𑀸.

𑁫𑁯𑁨. ‘‘𑀮𑁄𑀳𑀯𑀺𑀚𑁆𑀚𑀸 𑀅𑀮𑀗𑁆𑀓𑀸𑀭𑀸, 𑀥𑀚𑀺𑀦𑀻 𑀯𑀸𑀫𑀭𑁄𑀳𑀺𑀦𑀻;

𑀲𑀺𑀧𑁆𑀧𑀺𑀬𑁂𑀳𑀺 𑀲𑀼𑀲𑀫𑁆𑀧𑀦𑁆𑀦𑀸, 𑀲𑀽𑀭𑁂𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸.

𑁫𑁯𑁩. ‘‘𑀤𑀲𑁂𑀢𑁆𑀣 𑀧𑀡𑁆𑀟𑀺𑀢𑀸 𑀆𑀳𑀼, 𑀪𑀽𑀭𑀺𑀧𑀜𑁆𑀜𑀸 𑀭𑀳𑁄𑀕𑀫𑀸 [𑀭𑀳𑁄𑀕𑀢𑀸 (𑀲𑁆𑀬𑀸. 𑀓.)];

𑀫𑀸𑀢𑀸 𑀏𑀓𑀸𑀤𑀲𑀻 𑀭𑀜𑁆𑀜𑁄, 𑀧𑀜𑁆𑀘𑀸𑀮𑀺𑀬𑀁 𑀧𑀲𑀸𑀲𑀢𑀺.

𑁫𑁯𑁪. ‘‘𑀅𑀣𑁂𑀢𑁆𑀣𑁂𑀓𑀲𑀢𑀁 𑀔𑀢𑁆𑀬𑀸, 𑀅𑀦𑀼𑀬𑀦𑁆𑀢𑀸 𑀬𑀲𑀲𑁆𑀲𑀺𑀦𑁄;

𑀅𑀘𑁆𑀙𑀺𑀦𑁆𑀦𑀭𑀝𑁆𑀞𑀸 𑀩𑁆𑀬𑀣𑀺𑀢𑀸, 𑀧𑀜𑁆𑀘𑀸𑀮𑀺𑀬𑀁 [𑀧𑀜𑁆𑀘𑀸𑀮𑀻𑀦𑀁 (𑀩𑀳𑀽𑀲𑀼)] 𑀯𑀲𑀁 𑀕𑀢𑀸.

𑁫𑁯𑁫. ‘‘𑀬𑀁𑀯𑀤𑀸-𑀢𑀓𑁆𑀓𑀭𑀸 𑀭𑀜𑁆𑀜𑁄, 𑀅𑀓𑀸𑀫𑀸 𑀧𑀺𑀬𑀪𑀸𑀡𑀺𑀦𑁄;

𑀧𑀜𑁆𑀘𑀸𑀮𑀫𑀦𑀼𑀬𑀸𑀬𑀦𑁆𑀢𑀺, 𑀅𑀓𑀸𑀫𑀸 𑀯𑀲𑀺𑀦𑁄 𑀕𑀢𑀸.

𑁫𑁯𑁬. ‘‘𑀢𑀸𑀬 𑀲𑁂𑀦𑀸𑀬 𑀫𑀺𑀣𑀺𑀮𑀸, 𑀢𑀺𑀲𑀦𑁆𑀥𑀺𑀧𑀭𑀺𑀯𑀸𑀭𑀺𑀢𑀸;

𑀭𑀸𑀚𑀥𑀸𑀦𑀻 𑀯𑀺𑀤𑁂𑀳𑀸𑀦𑀁, 𑀲𑀫𑀦𑁆𑀢𑀸 𑀧𑀭𑀺𑀔𑀜𑁆𑀜𑀢𑀺.

𑁫𑁯𑁭. ‘‘𑀉𑀤𑁆𑀥𑀁 𑀢𑀸𑀭𑀓𑀚𑀸𑀢𑀸𑀯, 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀢𑀸;

𑀫𑀳𑁄𑀲𑀥 𑀯𑀺𑀚𑀸𑀦𑀸𑀳𑀺, 𑀓𑀣𑀁 𑀫𑁄𑀓𑁆𑀔𑁄 𑀪𑀯𑀺𑀲𑁆𑀲𑀢𑀺’’.

𑁫𑁯𑁮. ‘‘𑀧𑀸𑀤𑁂 𑀤𑁂𑀯 𑀧𑀲𑀸𑀭𑁂𑀳𑀺, 𑀪𑀼𑀜𑁆𑀚 𑀓𑀸𑀫𑁂 𑀭𑀫𑀲𑁆𑀲𑀼 𑀘;

𑀳𑀺𑀢𑁆𑀯𑀸 𑀧𑀜𑁆𑀘𑀸𑀮𑀺𑀬𑀁 𑀲𑁂𑀦𑀁, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀧𑀮𑀸𑀬𑀺𑀢𑀺’’ [𑀧𑀮𑀸𑀬𑀢𑀺 (𑀲𑀻. 𑀲𑁆𑀬𑀸.)].

𑁫𑁯𑁯. ‘‘𑀭𑀸𑀚𑀸 𑀲𑀦𑁆𑀣𑀯𑀓𑀸𑀫𑁄 𑀢𑁂, 𑀭𑀢𑀦𑀸𑀦𑀺 𑀧𑀯𑁂𑀘𑁆𑀙𑀢𑀺;

𑀆𑀕𑀘𑁆𑀙𑀦𑁆𑀢𑀼 𑀇𑀢𑁄 [𑀢𑀢𑁄 (𑀲𑀻. 𑀲𑁆𑀬𑀸.)] 𑀤𑀽𑀢𑀸, 𑀫𑀜𑁆𑀚𑀼𑀓𑀸 𑀧𑀺𑀬𑀪𑀸𑀡𑀺𑀦𑁄.

𑁬𑁦𑁦. ‘‘𑀪𑀸𑀲𑀦𑁆𑀢𑀼 𑀫𑀼𑀤𑀼𑀓𑀸 𑀯𑀸𑀘𑀸, 𑀬𑀸 𑀯𑀸𑀘𑀸 𑀧𑀝𑀺𑀦𑀦𑁆𑀤𑀺𑀢𑀸;

𑀧𑀜𑁆𑀘𑀸𑀮𑁄 𑀘 𑀯𑀺𑀤𑁂𑀳𑁄 𑀘 [𑀧𑀜𑁆𑀘𑀸𑀮𑀸 𑀘 𑀯𑀺𑀤𑁂𑀳𑀸 𑀘 (𑀲𑀻. 𑀧𑀻.)], 𑀉𑀪𑁄 𑀏𑀓𑀸 𑀪𑀯𑀦𑁆𑀢𑀼 𑀢𑁂’’.

𑁬𑁦𑁧. ‘‘𑀓𑀣𑀁 𑀦𑀼 𑀓𑁂𑀯𑀝𑁆𑀝 𑀫𑀳𑁄𑀲𑀥𑁂𑀦, 𑀲𑀫𑀸𑀕𑀫𑁄 𑀆𑀲𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀓𑀘𑁆𑀘𑀺 𑀢𑁂 𑀧𑀝𑀺𑀦𑀺𑀚𑁆𑀛𑀢𑁆𑀢𑁄, 𑀓𑀘𑁆𑀘𑀺 𑀢𑀼𑀝𑁆𑀞𑁄 𑀫𑀳𑁄𑀲𑀥𑁄’’.

𑁬𑁦𑁨. ‘‘𑀅𑀦𑀭𑀺𑀬𑀭𑀽𑀧𑁄 𑀧𑀼𑀭𑀺𑀲𑁄 𑀚𑀦𑀺𑀦𑁆𑀤, 𑀅𑀲𑀫𑁆𑀫𑁄𑀤𑀓𑁄 𑀣𑀤𑁆𑀥𑁄 𑀅𑀲𑀩𑁆𑀪𑀺𑀭𑀽𑀧𑁄;

𑀬𑀣𑀸 𑀫𑀽𑀕𑁄 𑀘 𑀩𑀥𑀺𑀭𑁄 𑀘, 𑀦 𑀓𑀺𑀜𑁆𑀘𑀺𑀢𑁆𑀣𑀁 𑀅𑀪𑀸𑀲𑀣’’ [𑀅𑀪𑀸𑀲𑀺𑀢𑁆𑀣 (𑀓.)].

𑁬𑁦𑁩. ‘‘𑀅𑀤𑁆𑀥𑀸 𑀇𑀤𑀁 𑀫𑀦𑁆𑀢𑀧𑀤𑀁 𑀲𑀼𑀤𑀼𑀤𑁆𑀤𑀲𑀁, 𑀅𑀢𑁆𑀣𑁄 𑀲𑀼𑀤𑁆𑀥𑁄 𑀦𑀭𑀯𑀻𑀭𑀺𑀬𑁂𑀦 𑀤𑀺𑀝𑁆𑀞𑁄;

𑀢𑀣𑀸 𑀳𑀺 𑀓𑀸𑀬𑁄 𑀫𑀫 𑀲𑀫𑁆𑀧𑀯𑁂𑀥𑀢𑀺, 𑀳𑀺𑀢𑁆𑀯𑀸 𑀲𑀬𑀁 𑀓𑁄 𑀧𑀭𑀳𑀢𑁆𑀣𑀫𑁂𑀲𑁆𑀲𑀢𑀺’’.

𑁬𑁦𑁪. ‘‘𑀙𑀦𑁆𑀦𑀜𑁆𑀳𑀺 𑀏𑀓𑀸𑀯 𑀫𑀢𑀻 𑀲𑀫𑁂𑀢𑀺, 𑀬𑁂 𑀧𑀡𑁆𑀟𑀺𑀢𑀸 𑀉𑀢𑁆𑀢𑀫𑀪𑀽𑀭𑀺𑀧𑀢𑁆𑀢𑀸;

𑀬𑀸𑀦𑀁 𑀅𑀬𑀸𑀦𑀁 𑀅𑀣 𑀯𑀸𑀧𑀺 𑀞𑀸𑀦𑀁, 𑀫𑀳𑁄𑀲𑀥 𑀢𑁆𑀯𑀫𑁆𑀧𑀺 𑀫𑀢𑀺𑀁 𑀓𑀭𑁄𑀳𑀺’’.

𑁬𑁦𑁫. ‘‘𑀚𑀸𑀦𑀸𑀲𑀺 𑀔𑁄 𑀭𑀸𑀚 𑀫𑀳𑀸𑀦𑀼𑀪𑀸𑀯𑁄, 𑀫𑀳𑀩𑁆𑀩𑀮𑁄 𑀘𑀽𑀴𑀦𑀺𑀩𑁆𑀭𑀳𑁆𑀫𑀤𑀢𑁆𑀢𑁄;

𑀭𑀸𑀚𑀸 𑀘 𑀢𑀁 𑀇𑀘𑁆𑀙𑀢𑀺 𑀫𑀸𑀭𑀡𑀢𑁆𑀣𑀁 [𑀓𑀸𑀭𑀡𑀢𑁆𑀣𑀁 (𑀲𑀻. 𑀧𑀻.)], 𑀫𑀺𑀕𑀁 𑀬𑀣𑀸 𑀑𑀓𑀘𑀭𑁂𑀦 𑀮𑀼𑀤𑁆𑀤𑁄.

𑁬𑁦𑁬. ‘‘𑀬𑀣𑀸𑀧𑀺 𑀫𑀘𑁆𑀙𑁄 𑀩𑀴𑀺𑀲𑀁, 𑀯𑀗𑁆𑀓𑀁 𑀫𑀁𑀲𑁂𑀦 𑀙𑀸𑀤𑀺𑀢𑀁;

𑀆𑀫𑀕𑀺𑀤𑁆𑀥𑁄 𑀦 𑀚𑀸𑀦𑀸𑀢𑀺, 𑀫𑀘𑁆𑀙𑁄 𑀫𑀭𑀡𑀫𑀢𑁆𑀢𑀦𑁄.

𑁬𑁦𑁭. ‘‘𑀏𑀯𑀫𑁂𑀯 𑀢𑀼𑀯𑀁 𑀭𑀸𑀚, 𑀘𑀽𑀴𑀦𑁂𑀬𑁆𑀬𑀲𑁆𑀲 𑀥𑀻𑀢𑀭𑀁;

𑀓𑀸𑀫𑀕𑀺𑀤𑁆𑀥𑁄 𑀦 𑀚𑀸𑀦𑀸𑀲𑀺, 𑀫𑀘𑁆𑀙𑁄𑀯 𑀫𑀭𑀡𑀫𑀢𑁆𑀢𑀦𑁄.

𑁬𑁦𑁮. ‘‘𑀲𑀘𑁂 𑀕𑀘𑁆𑀙𑀲𑀺 𑀧𑀜𑁆𑀘𑀸𑀮𑀁, 𑀔𑀺𑀧𑁆𑀧𑀫𑀢𑁆𑀢𑀁 𑀚𑀳𑀺𑀲𑁆𑀲𑀢𑀺;

𑀫𑀺𑀕𑀁 𑀧𑀦𑁆𑀣𑀸𑀦𑀼𑀩𑀦𑁆𑀥𑀁𑀯 [𑀧𑀣𑀸𑀦𑀼𑀧𑀦𑁆𑀦𑀁𑀯 (𑀲𑀻. 𑀲𑁆𑀬𑀸. 𑀧𑀻.)], 𑀫𑀳𑀦𑁆𑀢𑀁 𑀪𑀬𑀫𑁂𑀲𑁆𑀲𑀢𑀺’’.

𑁬𑁦𑁯. ‘‘𑀫𑀬𑀫𑁂𑀯 𑀩𑀸𑀮𑀫𑁆𑀳𑀲𑁂 𑀏𑀴𑀫𑀽𑀕𑀸, 𑀬𑁂 𑀉𑀢𑁆𑀢𑀫𑀢𑁆𑀣𑀸𑀦𑀺 𑀢𑀬𑀻 𑀮𑀧𑀺𑀫𑁆𑀳𑀸;

𑀓𑀺𑀫𑁂𑀯 𑀢𑁆𑀯𑀁 𑀦𑀗𑁆𑀕𑀮𑀓𑁄𑀝𑀺𑀯𑀟𑁆𑀠𑁄, 𑀅𑀢𑁆𑀣𑀸𑀦𑀺 𑀚𑀸𑀦𑀸𑀲𑀺 𑀬𑀣𑀸𑀧𑀺 𑀅𑀜𑁆𑀜𑁂’’.

𑁬𑁧𑁦. ‘‘𑀇𑀫𑀁 𑀕𑀮𑁂 𑀕𑀳𑁂𑀢𑁆𑀯𑀸𑀦, 𑀦𑀸𑀲𑁂𑀣 𑀯𑀺𑀚𑀺𑀢𑀸 𑀫𑀫;

𑀬𑁄 𑀫𑁂 𑀭𑀢𑀦𑀮𑀸𑀪𑀲𑁆𑀲, 𑀅𑀦𑁆𑀢𑀭𑀸𑀬𑀸𑀬 𑀪𑀸𑀲𑀢𑀺’’.

𑁬𑁧𑁧. ‘‘𑀢𑀢𑁄 𑀘 𑀲𑁄 𑀅𑀧𑀓𑁆𑀓𑀫𑁆𑀫, 𑀯𑁂𑀤𑁂𑀳𑀲𑁆𑀲 𑀉𑀧𑀦𑁆𑀢𑀺𑀓𑀸;

𑀅𑀣 𑀆𑀫𑀦𑁆𑀢𑀬𑀻 𑀤𑀽𑀢𑀁, 𑀫𑀸𑀥𑀭𑀁 [𑀫𑀠𑀭𑀁 (𑀲𑀻.), 𑀫𑀸𑀥𑀼𑀭𑀁 (𑀲𑁆𑀬𑀸.), 𑀫𑀸𑀞𑀭𑀁 (𑀧𑀻.)] 𑀲𑀼𑀯𑀧𑀡𑁆𑀟𑀺𑀢𑀁.

𑁬𑁧𑁨. ‘‘𑀏𑀳𑀺 𑀲𑀫𑁆𑀫 𑀳𑀭𑀺𑀢𑀧𑀓𑁆𑀔 [𑀳𑀭𑀻𑀧𑀓𑁆𑀔 (𑀲𑀻. 𑀧𑀻.)], 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀳𑀺 𑀫𑁂;

𑀅𑀢𑁆𑀣𑀺 𑀧𑀜𑁆𑀘𑀸𑀮𑀭𑀸𑀚𑀲𑁆𑀲, 𑀲𑀸𑀴𑀺𑀓𑀸 𑀲𑀬𑀦𑀧𑀸𑀮𑀺𑀓𑀸.

𑁬𑁧𑁩. ‘𑀢𑀁 𑀩𑀦𑁆𑀥𑀦𑁂𑀦 [𑀢𑀁 𑀧𑀢𑁆𑀣𑀭𑁂𑀦 (𑀲𑀻. 𑀧𑀻.), 𑀢𑀁 𑀲𑀦𑁆𑀣𑀯𑁂𑀦 (𑀲𑁆𑀬𑀸.)] 𑀧𑀼𑀘𑁆𑀙𑀲𑁆𑀲𑀼, 𑀲𑀸 𑀳𑀺 𑀲𑀩𑁆𑀩𑀲𑁆𑀲 𑀓𑁄𑀯𑀺𑀤𑀸;

𑀲𑀸 𑀢𑁂𑀲𑀁 𑀲𑀩𑁆𑀩𑀁 𑀚𑀸𑀦𑀸𑀢𑀺, 𑀭𑀜𑁆𑀜𑁄 𑀘 𑀓𑁄𑀲𑀺𑀬𑀲𑁆𑀲 𑀘.

𑁬𑁧𑁪. ‘‘‘𑀆𑀫𑁄’𑀢𑀺 𑀲𑁄 𑀧𑀝𑀺𑀲𑁆𑀲𑀼𑀢𑁆𑀯𑀸, 𑀫𑀸𑀥𑀭𑁄 𑀲𑀼𑀯𑀧𑀡𑁆𑀟𑀺𑀢𑁄;

𑀅𑀕𑀫𑀸𑀲𑀺 𑀳𑀭𑀺𑀢𑀧𑀓𑁆𑀔𑁄 [𑀳𑀭𑀻𑀧𑀓𑁆𑀔𑁄 (𑀲𑀻. 𑀧𑀻.)], 𑀲𑀸𑀴𑀺𑀓𑀸𑀬 𑀉𑀧𑀦𑁆𑀢𑀺𑀓𑀁.

𑁬𑁧𑁫. ‘‘𑀢𑀢𑁄 𑀘 𑀔𑁄 𑀲𑁄 𑀕𑀦𑁆𑀢𑁆𑀯𑀸𑀦, 𑀫𑀸𑀥𑀭𑁄 𑀲𑀼𑀯𑀧𑀡𑁆𑀟𑀺𑀢𑁄;

𑀅𑀣𑀸𑀫𑀦𑁆𑀢𑀬𑀺 𑀲𑀼𑀖𑀭𑀁, 𑀲𑀸𑀴𑀺𑀓𑀁 𑀫𑀜𑁆𑀚𑀼𑀪𑀸𑀡𑀺𑀓𑀁.

𑁬𑁧𑁬. ‘𑀓𑀘𑁆𑀘𑀺 𑀢𑁂 𑀲𑀼𑀖𑀭𑁂 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀯𑁂𑀲𑁆𑀲𑁂 𑀅𑀦𑀸𑀫𑀬𑀁;

𑀓𑀘𑁆𑀘𑀺 𑀢𑁂 𑀫𑀥𑀼𑀦𑀸 𑀮𑀸𑀚𑀸, 𑀮𑀩𑁆𑀪𑀢𑁂 𑀲𑀼𑀖𑀭𑁂 𑀢𑀼𑀯𑀁’ [𑀢𑀯 (𑀲𑀻. 𑀧𑀻.)].

𑁬𑁧𑁭. ‘𑀓𑀼𑀲𑀮𑀜𑁆𑀘𑁂𑀯 𑀫𑁂 𑀲𑀫𑁆𑀫, 𑀅𑀣𑁄 𑀲𑀫𑁆𑀫 𑀅𑀦𑀸𑀫𑀬𑀁;

𑀅𑀣𑁄 𑀫𑁂 𑀫𑀥𑀼𑀦𑀸 𑀮𑀸𑀚𑀸, 𑀮𑀩𑁆𑀪𑀢𑁂 𑀲𑀼𑀯𑀧𑀡𑁆𑀟𑀺𑀢.

𑁬𑁧𑁮. ‘𑀓𑀼𑀢𑁄 𑀦𑀼 𑀲𑀫𑁆𑀫 𑀆𑀕𑀫𑁆𑀫, 𑀓𑀲𑁆𑀲 𑀯𑀸 𑀧𑀳𑀺𑀢𑁄 𑀢𑀼𑀯𑀁;

𑀦 𑀘 𑀫𑁂𑀲𑀺 𑀇𑀢𑁄 𑀧𑀼𑀩𑁆𑀩𑁂, 𑀤𑀺𑀝𑁆𑀞𑁄 𑀯𑀸 𑀬𑀤𑀺 𑀯𑀸 𑀲𑀼𑀢𑁄’’.

𑁬𑁧𑁯. ‘‘𑀅𑀳𑁄𑀲𑀺𑀁 𑀲𑀺𑀯𑀺𑀭𑀸𑀚𑀲𑁆𑀲, 𑀧𑀸𑀲𑀸𑀤𑁂 𑀲𑀬𑀦𑀧𑀸𑀮𑀓𑁄;

𑀢𑀢𑁄 𑀲𑁄 𑀥𑀫𑁆𑀫𑀺𑀓𑁄 𑀭𑀸𑀚𑀸, 𑀩𑀤𑁆𑀥𑁂 𑀫𑁄𑀘𑁂𑀲𑀺 𑀩𑀦𑁆𑀥𑀦𑀸’’.

𑁬𑁨𑁦. ‘‘𑀢𑀲𑁆𑀲 𑀫𑁂𑀓𑀸 𑀤𑀼𑀢𑀺𑀬𑀸𑀲𑀺, 𑀲𑀸𑀴𑀺𑀓𑀸 𑀫𑀜𑁆𑀚𑀼𑀪𑀸𑀡𑀺𑀓𑀸;

𑀢𑀁 𑀢𑀢𑁆𑀣 𑀅𑀯𑀥𑀻 𑀲𑁂𑀦𑁄, 𑀧𑁂𑀓𑁆𑀔𑀢𑁄 𑀲𑀼𑀖𑀭𑁂 𑀫𑀫’’.

𑁬𑁨𑁧. ‘‘𑀢𑀲𑁆𑀲𑀸 𑀓𑀸𑀫𑀸 𑀳𑀺 𑀲𑀫𑁆𑀫𑀢𑁆𑀢𑁄, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂;

𑀲𑀘𑁂 𑀓𑀭𑁂𑀬𑁆𑀬 [𑀓𑀭𑁂𑀬𑁆𑀬𑀸𑀲𑀺 (𑀲𑀻.), 𑀓𑀭𑁂𑀬𑀼 (𑀲𑁆𑀬𑀸.), 𑀓𑀭𑁂𑀬𑁆𑀬𑀸𑀲𑀺 𑀫𑁂 (𑀧𑀻.)] 𑀑𑀓𑀸𑀲𑀁, 𑀉𑀪𑀬𑁄𑀯 𑀯𑀲𑀸𑀫𑀲𑁂’’.

𑁬𑁨𑁨. ‘‘𑀲𑀼𑀯𑁄𑀯 𑀲𑀼𑀯𑀺𑀁 𑀓𑀸𑀫𑁂𑀬𑁆𑀬, 𑀲𑀸𑀴𑀺𑀓𑁄 𑀧𑀦 𑀲𑀸𑀴𑀺𑀓𑀁;

𑀲𑀼𑀯𑀲𑁆𑀲 𑀲𑀸𑀴𑀺𑀓𑀸𑀬𑁂𑀯 [𑀲𑀸𑀴𑀺𑀓𑀸𑀬 𑀘 (𑀲𑀻. 𑀧𑀻.)], 𑀲𑀁𑀯𑀸𑀲𑁄 𑀳𑁄𑀢𑀺 𑀓𑀻𑀤𑀺𑀲𑁄’’.

𑁬𑁨𑁩. ‘‘𑀬𑁄𑀬𑀁 𑀓𑀸𑀫𑁂 [𑀬𑀁 𑀬𑀁 𑀓𑀸𑀫𑀻 (𑀲𑀻. 𑀧𑀻.)] 𑀓𑀸𑀫𑀬𑀢𑀺, 𑀅𑀧𑀺 𑀘𑀡𑁆𑀟𑀸𑀮𑀺𑀓𑀸𑀫𑀧𑀺;

𑀲𑀩𑁆𑀩𑁄 𑀳𑀺 𑀲𑀤𑀺𑀲𑁄 𑀳𑁄𑀢𑀺, 𑀦𑀢𑁆𑀣𑀺 𑀓𑀸𑀫𑁂 𑀅𑀲𑀸𑀤𑀺𑀲𑁄’’.

𑁬𑁨𑁪. ‘‘𑀅𑀢𑁆𑀣𑀺 𑀚𑀫𑁆𑀧𑀸𑀯𑀢𑀻 [𑀚𑀫𑁆𑀩𑀸𑀯𑀢𑀻 (𑀲𑀻. 𑀲𑁆𑀬𑀸.), 𑀘𑀫𑁆𑀧𑀸𑀯𑀢𑀻 (𑀓.)] 𑀦𑀸𑀫, 𑀫𑀸𑀢𑀸 𑀲𑀺𑀯𑀺𑀲𑁆𑀲 [𑀲𑀺𑀩𑁆𑀩𑀺𑀲𑁆𑀲 (𑀲𑀻. 𑀧𑀻.)] 𑀭𑀸𑀚𑀺𑀦𑁄;

𑀲𑀸 𑀪𑀭𑀺𑀬𑀸 𑀯𑀸𑀲𑀼𑀤𑁂𑀯𑀲𑁆𑀲, 𑀓𑀡𑁆𑀳𑀲𑁆𑀲 𑀫𑀳𑁂𑀲𑀻 𑀧𑀺𑀬𑀸.

𑁬𑁨𑁫. ‘‘𑀭𑀝𑁆𑀞𑀯𑀢𑀻 [𑀭𑀣𑀯𑀢𑀻 (𑀲𑀻. 𑀧𑀻.), 𑀭𑀢𑀦𑀯𑀢𑀻 (𑀲𑁆𑀬𑀸.)] 𑀓𑀺𑀫𑁆𑀧𑀼𑀭𑀺𑀲𑀻, 𑀲𑀸𑀧𑀺 𑀯𑀘𑁆𑀙𑀁 𑀅𑀓𑀸𑀫𑀬𑀺;

𑀫𑀦𑀼𑀲𑁆𑀲𑁄 𑀫𑀺𑀕𑀺𑀬𑀸 𑀲𑀤𑁆𑀥𑀺𑀁, 𑀦𑀢𑁆𑀣𑀺 𑀓𑀸𑀫𑁂 𑀅𑀲𑀸𑀤𑀺𑀲𑁄’’.

𑁬𑁨𑁬. ‘‘𑀳𑀦𑁆𑀤 𑀔𑁆𑀯𑀸𑀳𑀁 𑀕𑀫𑀺𑀲𑁆𑀲𑀸𑀫𑀺, 𑀲𑀸𑀴𑀺𑀓𑁂 𑀫𑀜𑁆𑀚𑀼𑀪𑀸𑀡𑀺𑀓𑁂;

𑀧𑀘𑁆𑀘𑀓𑁆𑀔𑀸𑀦𑀼𑀧𑀤𑀜𑁆𑀳𑁂𑀢𑀁, 𑀅𑀢𑀺𑀫𑀜𑁆𑀜𑀲𑀺 𑀦𑀽𑀦 𑀫𑀁’’.

𑁬𑁨𑁭. ‘‘𑀦 𑀲𑀺𑀭𑀻 𑀢𑀭𑀫𑀸𑀦𑀲𑁆𑀲, 𑀫𑀸𑀥𑀭 𑀲𑀼𑀯𑀧𑀡𑁆𑀟𑀺𑀢;

𑀇𑀥𑁂𑀯 𑀢𑀸𑀯 𑀅𑀘𑁆𑀙𑀲𑁆𑀲𑀼, 𑀬𑀸𑀯 𑀭𑀸𑀚𑀸𑀦 𑀤𑀓𑁆𑀔𑀲𑀺 [𑀤𑀓𑁆𑀔𑀺𑀲𑀺 (𑀧𑀻.)];

𑀲𑁄𑀲𑁆𑀲𑀺 [𑀲𑁄𑀲𑁆𑀲𑀲𑀺 (𑀲𑀻.)] 𑀲𑀤𑁆𑀤𑀁 𑀫𑀼𑀤𑀺𑀗𑁆𑀕𑀸𑀦𑀁, 𑀆𑀦𑀼𑀪𑀸𑀯𑀜𑁆𑀘 𑀭𑀸𑀚𑀺𑀦𑁄’’.

𑁬𑁨𑁮. ‘‘𑀬𑁄 𑀦𑀼 𑀔𑁆𑀯𑀸𑀬𑀁 𑀢𑀺𑀩𑁆𑀩𑁄 𑀲𑀤𑁆𑀤𑁄, 𑀢𑀺𑀭𑁄𑀚𑀦𑀧𑀤𑁂 [𑀢𑀺𑀭𑁄𑀚𑀦𑀧𑀤𑀁 (𑀧𑀻. 𑀓.)] 𑀲𑀼𑀢𑁄;

𑀥𑀻𑀢𑀸 𑀧𑀜𑁆𑀘𑀸𑀮𑀭𑀸𑀚𑀲𑁆𑀲, 𑀑𑀲𑀥𑀻 𑀯𑀺𑀬 𑀯𑀡𑁆𑀡𑀺𑀦𑀻;

𑀢𑀁 𑀤𑀲𑁆𑀲𑀢𑀺 𑀯𑀺𑀤𑁂𑀳𑀸𑀦𑀁, 𑀲𑁄 𑀯𑀺𑀯𑀸𑀳𑁄 𑀪𑀯𑀺𑀲𑁆𑀲𑀢𑀺’’.

𑁬𑁨𑁯. ‘‘𑀏𑀤𑀺𑀲𑁄 𑀫𑀸 [𑀦𑁂𑀤𑀺𑀲𑁄 𑀢𑁂 (𑀲𑀻.)] 𑀅𑀫𑀺𑀢𑁆𑀢𑀸𑀦𑀁, 𑀯𑀺𑀯𑀸𑀳𑁄 𑀳𑁄𑀢𑀼 𑀫𑀸𑀥𑀭;

𑀬𑀣𑀸 𑀧𑀜𑁆𑀘𑀸𑀮𑀭𑀸𑀚𑀲𑁆𑀲, 𑀯𑁂𑀤𑁂𑀳𑁂𑀦 𑀪𑀯𑀺𑀲𑁆𑀲𑀢𑀺’’.

𑁬𑁩𑁦. ‘‘𑀆𑀦𑀬𑀺𑀢𑁆𑀯𑀸𑀦 𑀯𑁂𑀤𑁂𑀳𑀁, 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪𑁄;

𑀢𑀢𑁄 𑀦𑀁 𑀖𑀸𑀢𑀬𑀺𑀲𑁆𑀲𑀢𑀺, 𑀦𑀲𑁆𑀲 𑀲𑀔𑀻 𑀪𑀯𑀺𑀲𑁆𑀲𑀢𑀺’’.

𑁬𑁩𑁧. ‘‘𑀳𑀦𑁆𑀤 𑀔𑁄 𑀫𑀁 𑀅𑀦𑀼𑀚𑀸𑀦𑀸𑀳𑀺, 𑀭𑀢𑁆𑀢𑀺𑀬𑁄 𑀲𑀢𑁆𑀢𑀫𑀢𑁆𑀢𑀺𑀬𑁄;

𑀬𑀸𑀯𑀸𑀳𑀁 𑀲𑀺𑀯𑀺𑀭𑀸𑀚𑀲𑁆𑀲, 𑀆𑀭𑁄𑀘𑁂𑀫𑀺 𑀫𑀳𑁂𑀲𑀺𑀦𑁄;

𑀮𑀤𑁆𑀥𑁄 𑀘 𑀫𑁂 𑀆𑀯𑀲𑀣𑁄, 𑀲𑀸𑀴𑀺𑀓𑀸𑀬 𑀉𑀧𑀦𑁆𑀢𑀺𑀓𑀁’’ [𑀉𑀧𑀦𑁆𑀢𑀺𑀓𑀸 (𑀲𑀻. 𑀓.)].

𑁬𑁩𑁨. ‘‘𑀳𑀦𑁆𑀤 𑀔𑁄 𑀢𑀁 𑀅𑀦𑀼𑀚𑀸𑀦𑀸𑀫𑀺, 𑀭𑀢𑁆𑀢𑀺𑀬𑁄 𑀲𑀢𑁆𑀢𑀫𑀢𑁆𑀢𑀺𑀬𑁄;

𑀲𑀘𑁂 𑀢𑁆𑀯𑀁 𑀲𑀢𑁆𑀢𑀭𑀢𑁆𑀢𑁂𑀦, 𑀦𑀸𑀕𑀘𑁆𑀙𑀲𑀺 𑀫𑀫𑀦𑁆𑀢𑀺𑀓𑁂;

𑀫𑀜𑁆𑀜𑁂 𑀑𑀓𑁆𑀓𑀦𑁆𑀢𑀲𑀢𑁆𑀢𑀁 [𑀑𑀓𑁆𑀓𑀦𑁆𑀢𑀲𑀦𑁆𑀢𑀁 (𑀲𑁆𑀬𑀸. 𑀧𑀻. 𑀓.)] 𑀫𑀁, 𑀫𑀢𑀸𑀬 𑀆𑀕𑀫𑀺𑀲𑁆𑀲𑀲𑀺’’.

𑁬𑁩𑁩. ‘‘𑀢𑀢𑁄 𑀘 𑀔𑁄 𑀲𑁄 𑀕𑀦𑁆𑀢𑁆𑀯𑀸𑀦, 𑀫𑀸𑀥𑀭𑁄 𑀲𑀼𑀯𑀧𑀡𑁆𑀟𑀺𑀢𑁄;

𑀫𑀳𑁄𑀲𑀥𑀲𑁆𑀲 𑀅𑀓𑁆𑀔𑀸𑀲𑀺, 𑀲𑀸𑀴𑀺𑀓𑀸𑀯𑀘𑀦𑀁 𑀇𑀤𑀁’’.

𑁬𑁩𑁪. ‘‘𑀬𑀲𑁆𑀲𑁂𑀯 𑀖𑀭𑁂 𑀪𑀼𑀜𑁆𑀚𑁂𑀬𑁆𑀬 𑀪𑁄𑀕𑀁, 𑀢𑀲𑁆𑀲𑁂𑀯 𑀅𑀢𑁆𑀣𑀁 𑀧𑀼𑀭𑀺𑀲𑁄 𑀘𑀭𑁂𑀬𑁆𑀬’’;

‘‘𑀳𑀦𑁆𑀤𑀸𑀳𑀁 𑀕𑀘𑁆𑀙𑀸𑀫𑀺 𑀧𑀼𑀭𑁂 𑀚𑀦𑀺𑀦𑁆𑀤, 𑀧𑀜𑁆𑀘𑀸𑀮𑀭𑀸𑀚𑀲𑁆𑀲 𑀧𑀼𑀭𑀁 𑀲𑀼𑀭𑀫𑁆𑀫𑀁;

𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁬𑁩𑁫. ‘‘𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑁆𑀯𑀸, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀬𑀤𑀸 𑀢𑁂 𑀧𑀳𑀺𑀡𑁂𑀬𑁆𑀬𑀸𑀫𑀺, 𑀢𑀤𑀸 𑀏𑀬𑁆𑀬𑀸𑀲𑀺 𑀔𑀢𑁆𑀢𑀺𑀬’’.

𑁬𑁩𑁬. ‘‘𑀢𑀢𑁄 𑀘 𑀧𑀸𑀬𑀸𑀲𑀺 𑀧𑀼𑀭𑁂 𑀫𑀳𑁄𑀲𑀥𑁄, 𑀧𑀜𑁆𑀘𑀸𑀮𑀭𑀸𑀚𑀲𑁆𑀲 𑀧𑀼𑀭𑀁 𑀲𑀼𑀭𑀫𑁆𑀫𑀁;

𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄’’.

𑁬𑁩𑁭. ‘‘𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑁆𑀯𑀸, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀅𑀣𑀲𑁆𑀲 𑀧𑀸𑀳𑀺𑀡𑀻 𑀤𑀽𑀢𑀁, [𑀦𑀢𑁆𑀣𑀺 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼] 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀁 [𑀦𑀢𑁆𑀣𑀺 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼];

𑀏𑀳𑀺 𑀤𑀸𑀦𑀺 𑀫𑀳𑀸𑀭𑀸𑀚, 𑀫𑀸𑀧𑀺𑀢𑀁 𑀢𑁂 𑀦𑀺𑀯𑁂𑀲𑀦𑀁’’.

𑁬𑁩𑁮. ‘‘𑀢𑀢𑁄 𑀘 𑀭𑀸𑀚𑀸 𑀧𑀸𑀬𑀸𑀲𑀺, 𑀲𑁂𑀦𑀸𑀬 𑀘𑀢𑀼𑀭𑀗𑁆𑀕𑀺𑀬𑀸 [𑀘𑀢𑀼𑀭𑀗𑁆𑀕𑀺𑀦𑀺𑀬𑀸 (𑀓.)];

𑀅𑀦𑀦𑁆𑀢𑀯𑀸𑀳𑀦𑀁 𑀤𑀝𑁆𑀞𑀼𑀁, 𑀨𑀻𑀢𑀁 𑀓𑀧𑀺𑀮𑀺𑀬𑀁 [𑀓𑀫𑁆𑀧𑀺𑀮𑁆𑀮𑀺𑀬𑀁 (𑀲𑀻. 𑀧𑀻.)] 𑀧𑀼𑀭𑀁’’.

𑁬𑁩𑁯. ‘‘𑀢𑀢𑁄 𑀘 𑀔𑁄 𑀲𑁄 𑀕𑀦𑁆𑀢𑁆𑀯𑀸𑀦, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀧𑀸𑀳𑀺𑀡𑀺;

‘𑀆𑀕𑀢𑁄’𑀲𑁆𑀫𑀺 𑀫𑀳𑀸𑀭𑀸𑀚, 𑀢𑀯 𑀧𑀸𑀤𑀸𑀦𑀺 𑀯𑀦𑁆𑀤𑀺𑀢𑀼𑀁.

𑁬𑁪𑁦. ‘𑀤𑀤𑀸𑀳𑀺 𑀤𑀸𑀦𑀺 𑀫𑁂 𑀪𑀭𑀺𑀬𑀁, 𑀦𑀸𑀭𑀺𑀁 𑀲𑀩𑁆𑀩𑀗𑁆𑀕𑀲𑁄𑀪𑀺𑀦𑀺𑀁;

𑀲𑀼𑀯𑀡𑁆𑀡𑁂𑀦 𑀧𑀝𑀺𑀘𑁆𑀙𑀦𑁆𑀦𑀁, 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀁’’’.

𑁬𑁪𑁧. ‘‘𑀲𑁆𑀯𑀸𑀕𑀢𑀁 𑀢𑁂𑀯 [𑀢𑁂 (𑀲𑀻.), 𑀢𑁂𑀧𑀺 (𑀲𑁆𑀬𑀸.), 𑀢𑁂𑀦 (𑀧𑀻.)] 𑀯𑁂𑀤𑁂𑀳, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁;

𑀦𑀓𑁆𑀔𑀢𑁆𑀢𑀁𑀬𑁂𑀯 𑀧𑀭𑀺𑀧𑀼𑀘𑁆𑀙, 𑀅𑀳𑀁 𑀓𑀜𑁆𑀜𑀁 𑀤𑀤𑀸𑀫𑀺 𑀢𑁂;

𑀲𑀼𑀯𑀡𑁆𑀡𑁂𑀦 𑀧𑀝𑀺𑀘𑁆𑀙𑀦𑁆𑀦𑀁, 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀁’’.

𑁬𑁪𑁨. ‘‘𑀢𑀢𑁄 𑀘 𑀭𑀸𑀚𑀸 𑀯𑁂𑀤𑁂𑀳𑁄, 𑀦𑀓𑁆𑀔𑀢𑁆𑀢𑀁 𑀧𑀭𑀺𑀧𑀼𑀘𑁆𑀙𑀣 [𑀧𑀭𑀺𑀧𑀼𑀘𑁆𑀙𑀢𑀺 (𑀲𑁆𑀬𑀸. 𑀓.)];

𑀦𑀓𑁆𑀔𑀢𑁆𑀢𑀁 𑀧𑀭𑀺𑀧𑀼𑀘𑁆𑀙𑀺𑀢𑁆𑀯𑀸, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀧𑀸𑀳𑀺𑀡𑀺.

𑁬𑁪𑁩. ‘‘𑀤𑀤𑀸𑀳𑀺 𑀤𑀸𑀦𑀺 𑀫𑁂 𑀪𑀭𑀺𑀬𑀁, 𑀦𑀸𑀭𑀺𑀁 𑀲𑀩𑁆𑀩𑀗𑁆𑀕𑀲𑁄𑀪𑀺𑀦𑀺𑀁;

𑀲𑀼𑀯𑀡𑁆𑀡𑁂𑀦 𑀧𑀝𑀺𑀘𑁆𑀙𑀦𑁆𑀦𑀁, 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀁’’.

𑁬𑁪𑁪. ‘‘𑀤𑀤𑀸𑀫𑀺 𑀤𑀸𑀦𑀺 𑀢𑁂 𑀪𑀭𑀺𑀬𑀁, 𑀦𑀸𑀭𑀺𑀁 𑀲𑀩𑁆𑀩𑀗𑁆𑀕𑀲𑁄𑀪𑀺𑀦𑀺𑀁;

𑀲𑀼𑀯𑀡𑁆𑀡𑁂𑀦 𑀧𑀝𑀺𑀘𑁆𑀙𑀦𑁆𑀦𑀁, 𑀤𑀸𑀲𑀻𑀕𑀡𑀧𑀼𑀭𑀓𑁆𑀔𑀢𑀁’’.

𑁬𑁪𑁫. ‘‘𑀳𑀢𑁆𑀣𑀻 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻, 𑀲𑁂𑀦𑀸 𑀢𑀺𑀝𑁆𑀞𑀦𑁆𑀢𑀺 𑀯𑀫𑁆𑀫𑀺𑀢𑀸 [𑀯𑀫𑁆𑀫𑀺𑀓𑀸 (𑀲𑁆𑀬𑀸. 𑀓.)];

𑀉𑀓𑁆𑀓𑀸 𑀧𑀤𑀺𑀢𑁆𑀢𑀸 𑀛𑀸𑀬𑀦𑁆𑀢𑀺, 𑀓𑀺𑀦𑁆𑀦𑀼 𑀫𑀜𑁆𑀜𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁬𑁪𑁬. ‘‘𑀳𑀢𑁆𑀣𑀻 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻, 𑀲𑁂𑀦𑀸 𑀢𑀺𑀝𑁆𑀞𑀦𑁆𑀢𑀺 𑀯𑀫𑁆𑀫𑀺𑀢𑀸 [𑀯𑀫𑁆𑀫𑀺𑀓𑀸 (𑀲𑁆𑀬𑀸. 𑀓.)];

𑀉𑀓𑁆𑀓𑀸 𑀧𑀤𑀺𑀢𑁆𑀢𑀸 𑀛𑀸𑀬𑀦𑁆𑀢𑀺, 𑀓𑀺𑀁 𑀦𑀼 𑀓𑀸𑀳𑀦𑁆𑀢𑀺 [𑀓𑀸𑀳𑀢𑀺 (𑀓.)] 𑀧𑀡𑁆𑀟𑀺𑀢’’.

𑁬𑁪𑁭. ‘‘𑀭𑀓𑁆𑀔𑀢𑀺 𑀢𑀁 𑀫𑀳𑀸𑀭𑀸𑀚, 𑀘𑀽𑀴𑀦𑁂𑀬𑁆𑀬𑁄 𑀫𑀳𑀩𑁆𑀩𑀮𑁄;

𑀧𑀤𑀼𑀝𑁆𑀞𑁄 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 [𑀧𑀤𑀼𑀝𑁆𑀞𑁄 𑀢𑁂 𑀩𑁆𑀭𑀳𑁆𑀫𑀤𑀢𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻.)], 𑀧𑀸𑀢𑁄 𑀢𑀁 𑀖𑀸𑀢𑀬𑀺𑀲𑁆𑀲𑀢𑀺’’.

𑁬𑁪𑁮. ‘‘𑀉𑀩𑁆𑀩𑁂𑀥𑀢𑀺 𑀫𑁂 𑀳𑀤𑀬𑀁, 𑀫𑀼𑀔𑀜𑁆𑀘 𑀧𑀭𑀺𑀲𑀼𑀲𑁆𑀲𑀢𑀺;

𑀦𑀺𑀩𑁆𑀩𑀼𑀢𑀺𑀁 𑀦𑀸𑀥𑀺𑀕𑀘𑁆𑀙𑀸𑀫𑀺, 𑀅𑀕𑁆𑀕𑀺𑀤𑀟𑁆𑀠𑁄𑀯 𑀆𑀢𑀧𑁂.

𑁬𑁪𑁯. ‘‘𑀓𑀫𑁆𑀫𑀸𑀭𑀸𑀦𑀁 𑀬𑀣𑀸 𑀉𑀓𑁆𑀓𑀸, 𑀅𑀦𑁆𑀢𑁄 𑀛𑀸𑀬𑀢𑀺 𑀦𑁄 𑀩𑀳𑀺;

𑀏𑀯𑀫𑁆𑀧𑀺 𑀳𑀤𑀬𑀁 𑀫𑀬𑁆𑀳𑀁, 𑀅𑀦𑁆𑀢𑁄 𑀛𑀸𑀬𑀢𑀺 𑀦𑁄 𑀩𑀳𑀺’’.

𑁬𑁫𑁦. ‘‘𑀧𑀫𑀢𑁆𑀢𑁄 𑀫𑀦𑁆𑀢𑀦𑀸𑀢𑀻𑀢𑁄, 𑀪𑀺𑀦𑁆𑀦𑀫𑀦𑁆𑀢𑁄𑀲𑀺 𑀔𑀢𑁆𑀢𑀺𑀬;

𑀇𑀤𑀸𑀦𑀺 𑀔𑁄 𑀢𑀁 𑀢𑀸𑀬𑀦𑁆𑀢𑀼, 𑀧𑀡𑁆𑀟𑀺𑀢𑀸 𑀫𑀦𑁆𑀢𑀺𑀦𑁄 𑀚𑀦𑀸.

𑁬𑁫𑁧. ‘‘𑀅𑀓𑀢𑁆𑀯𑀸𑀫𑀘𑁆𑀘𑀲𑁆𑀲 𑀯𑀘𑀦𑀁, 𑀅𑀢𑁆𑀣𑀓𑀸𑀫𑀳𑀺𑀢𑁂𑀲𑀺𑀦𑁄;

𑀅𑀢𑁆𑀢𑀧𑀻𑀢𑀺𑀭𑀢𑁄 𑀭𑀸𑀚𑀸, 𑀫𑀺𑀕𑁄 𑀓𑀽𑀝𑁂𑀯 𑀑𑀳𑀺𑀢𑁄.

𑁬𑁫𑁨. ‘‘𑀬𑀣𑀸𑀧𑀺 𑀫𑀘𑁆𑀙𑁄 𑀩𑀴𑀺𑀲𑀁, 𑀯𑀗𑁆𑀓𑀁 𑀫𑀁𑀲𑁂𑀦 𑀙𑀸𑀤𑀺𑀢𑀁;

𑀆𑀫𑀕𑀺𑀤𑁆𑀥𑁄 𑀦 𑀚𑀸𑀦𑀸𑀢𑀺, 𑀫𑀘𑁆𑀙𑁄 𑀫𑀭𑀡𑀫𑀢𑁆𑀢𑀦𑁄.

𑁬𑁫𑁩. ‘‘𑀏𑀯𑀫𑁂𑀯 𑀢𑀼𑀯𑀁 𑀭𑀸𑀚, 𑀘𑀽𑀴𑀦𑁂𑀬𑁆𑀬𑀲𑁆𑀲 𑀥𑀻𑀢𑀭𑀁;

𑀓𑀸𑀫𑀕𑀺𑀤𑁆𑀥𑁄 𑀦 𑀚𑀸𑀦𑀸𑀲𑀺, 𑀫𑀘𑁆𑀙𑁄𑀯 𑀫𑀭𑀡𑀫𑀢𑁆𑀢𑀦𑁄.

𑁬𑁫𑁪. ‘‘𑀲𑀘𑁂 𑀕𑀘𑁆𑀙𑀲𑀺 𑀧𑀜𑁆𑀘𑀸𑀮𑀁, 𑀔𑀺𑀧𑁆𑀧𑀫𑀢𑁆𑀢𑀁 𑀚𑀳𑀺𑀲𑁆𑀲𑀲𑀺;

𑀫𑀺𑀕𑀁 𑀧𑀦𑁆𑀣𑀸𑀦𑀼𑀩𑀦𑁆𑀥𑀁𑀯, 𑀫𑀳𑀦𑁆𑀢𑀁 𑀪𑀬𑀫𑁂𑀲𑁆𑀲𑀢𑀺.

𑁬𑁫𑁫. ‘‘𑀅𑀦𑀭𑀺𑀬𑀭𑀽𑀧𑁄 𑀧𑀼𑀭𑀺𑀲𑁄 𑀚𑀦𑀺𑀦𑁆𑀤, 𑀅𑀳𑀻𑀯 𑀉𑀘𑁆𑀙𑀗𑁆𑀕𑀕𑀢𑁄 𑀟𑀲𑁂𑀬𑁆𑀬;

𑀦 𑀢𑁂𑀦 𑀫𑀺𑀢𑁆𑀢𑀺𑀁 𑀓𑀬𑀺𑀭𑀸𑀣 𑀥𑀻𑀭𑁄 [𑀧𑀜𑁆𑀜𑁄 (𑀧𑀻.)], 𑀤𑀼𑀓𑁆𑀔𑁄 𑀳𑀯𑁂 𑀓𑀸𑀧𑀼𑀭𑀺𑀲𑁂𑀦 [𑀓𑀸𑀧𑀼𑀭𑀺𑀲𑁂𑀳𑀺 (𑀓.)] 𑀲𑀗𑁆𑀕𑀫𑁄.

𑁬𑁫𑁬. ‘‘𑀬𑀤𑁂𑀯 [𑀬𑀁 𑀢𑁆𑀯𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀚𑀜𑁆𑀜𑀸 𑀧𑀼𑀭𑀺𑀲𑀁 [𑀧𑀼𑀭𑀺𑀲𑁄 (𑀲𑁆𑀬𑀸. 𑀓.)] 𑀚𑀦𑀺𑀦𑁆𑀤, 𑀲𑀻𑀮𑀯𑀸𑀬𑀁 𑀩𑀳𑀼𑀲𑁆𑀲𑀼𑀢𑁄;

𑀢𑁂𑀦𑁂𑀯 𑀫𑀺𑀢𑁆𑀢𑀺𑀁 𑀓𑀬𑀺𑀭𑀸𑀣 𑀥𑀻𑀭𑁄, 𑀲𑀼𑀔𑁄 𑀳𑀯𑁂 𑀲𑀧𑁆𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄’’.

𑁬𑁫𑁭. ‘‘𑀩𑀸𑀮𑁄 𑀢𑀼𑀯𑀁 𑀏𑀴𑀫𑀽𑀕𑁄𑀲𑀺 𑀭𑀸𑀚, 𑀬𑁄 𑀉𑀢𑁆𑀢𑀫𑀢𑁆𑀣𑀸𑀦𑀺 𑀫𑀬𑀻 𑀮𑀧𑀺𑀢𑁆𑀣𑁄;

𑀓𑀺𑀫𑁂𑀯𑀳𑀁 𑀦𑀗𑁆𑀕𑀮𑀓𑁄𑀝𑀺𑀯𑀟𑁆𑀠𑁄, 𑀅𑀢𑁆𑀣𑀸𑀦𑀺 𑀚𑀸𑀦𑀸𑀫𑀺 [𑀚𑀸𑀦𑀺𑀲𑁆𑀲𑀁 (𑀲𑀻. 𑀲𑁆𑀬𑀸. 𑀧𑀻.)] 𑀬𑀣𑀸𑀧𑀺 𑀅𑀜𑁆𑀜𑁂.

𑁬𑁫𑁮. ‘‘𑀇𑀫𑀁 𑀕𑀮𑁂 𑀕𑀳𑁂𑀢𑁆𑀯𑀸𑀦, 𑀦𑀸𑀲𑁂𑀣 𑀯𑀺𑀚𑀺𑀢𑀸 𑀫𑀫;

𑀬𑁄 𑀫𑁂 𑀭𑀢𑀦𑀮𑀸𑀪𑀲𑁆𑀲, 𑀅𑀦𑁆𑀢𑀭𑀸𑀬𑀸𑀬 𑀪𑀸𑀲𑀢𑀺’’.

𑁬𑁫𑁯. ‘‘𑀫𑀳𑁄𑀲𑀥 𑀅𑀢𑀻𑀢𑁂𑀦, 𑀦𑀸𑀦𑀼𑀯𑀺𑀚𑁆𑀛𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀓𑀺𑀁 𑀫𑀁 𑀅𑀲𑁆𑀲𑀁𑀯 𑀲𑀫𑁆𑀩𑀦𑁆𑀥𑀁, 𑀧𑀢𑁄𑀤𑁂𑀦𑁂𑀯 𑀯𑀺𑀚𑁆𑀛𑀲𑀺.

𑁬𑁬𑁦. ‘‘𑀲𑀘𑁂 𑀧𑀲𑁆𑀲𑀲𑀺 𑀫𑁄𑀓𑁆𑀔𑀁 𑀯𑀸, 𑀔𑁂𑀫𑀁 𑀯𑀸 𑀧𑀦 𑀧𑀲𑁆𑀲𑀲𑀺;

𑀢𑁂𑀦𑁂𑀯 𑀫𑀁 𑀅𑀦𑀼𑀲𑀸𑀲, 𑀓𑀺𑀁 𑀅𑀢𑀻𑀢𑁂𑀦 𑀯𑀺𑀚𑁆𑀛𑀲𑀺’’.