𑁫𑁪𑁧. 𑀦𑀺𑀫𑀺𑀚𑀸𑀢𑀓𑀁 (𑁪)

𑁪𑁨𑁧. ‘‘𑀅𑀘𑁆𑀙𑁂𑀭𑀁 𑀯𑀢 𑀮𑁄𑀓𑀲𑁆𑀫𑀺𑀁, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀺𑀘𑀓𑁆𑀔𑀡𑀸;

𑀬𑀤𑀸 𑀅𑀳𑀼 𑀦𑀺𑀫𑀺𑀭𑀸𑀚𑀸, 𑀧𑀡𑁆𑀟𑀺𑀢𑁄 𑀓𑀼𑀲𑀮𑀢𑁆𑀣𑀺𑀓𑁄.

𑁪𑁨𑁨. ‘‘𑀭𑀸𑀚𑀸 𑀲𑀩𑁆𑀩𑀯𑀺𑀤𑁂𑀳𑀸𑀦𑀁, 𑀅𑀤𑀸 𑀤𑀸𑀦𑀁 𑀅𑀭𑀺𑀦𑁆𑀤𑀫𑁄;

𑀢𑀲𑁆𑀲 𑀢𑀁 𑀤𑀤𑀢𑁄 𑀤𑀸𑀦𑀁, 𑀲𑀗𑁆𑀓𑀧𑁆𑀧𑁄 𑀉𑀤𑀧𑀚𑁆𑀚𑀣;

𑀤𑀸𑀦𑀁 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀸, 𑀓𑀢𑀫𑀁 𑀲𑀼 𑀫𑀳𑀧𑁆𑀨𑀮𑀁.

𑁪𑁨𑁩. 𑀢𑀲𑁆𑀲 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬, 𑀫𑀖𑀯𑀸 𑀤𑁂𑀯𑀓𑀼𑀜𑁆𑀚𑀭𑁄;

𑀲𑀳𑀲𑁆𑀲𑀦𑁂𑀢𑁆𑀢𑁄 𑀧𑀸𑀢𑀼𑀭𑀳𑀼, 𑀯𑀡𑁆𑀡𑁂𑀦 𑀯𑀺𑀳𑀦𑀁 [𑀦𑀺𑀳𑀦𑀁 (𑀲𑀻. 𑀧𑀻.), 𑀯𑀺𑀳𑀢𑀁 (𑀲𑁆𑀬𑀸. 𑀓.)] 𑀢𑀫𑀁.

𑁪𑁨𑁪. 𑀲𑀮𑁄𑀫𑀳𑀝𑁆𑀞𑁄 𑀫𑀦𑀼𑀚𑀺𑀦𑁆𑀤𑁄, 𑀯𑀸𑀲𑀯𑀁 𑀅𑀯𑀘𑀸 𑀦𑀺𑀫𑀺;

‘‘𑀤𑁂𑀯𑀢𑀸 𑀦𑀼𑀲𑀺 𑀕𑀦𑁆𑀥𑀩𑁆𑀩𑁄, 𑀅𑀤𑀼 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄.

𑁪𑁨𑁫. ‘‘𑀦 𑀘 𑀫𑁂 𑀢𑀸𑀤𑀺𑀲𑁄 𑀯𑀡𑁆𑀡𑁄, 𑀤𑀺𑀝𑁆𑀞𑁄 𑀯𑀸 𑀬𑀤𑀺 𑀯𑀸 𑀲𑀼𑀢𑁄;

[𑀦𑀢𑁆𑀣𑀺 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼] 𑀆𑀘𑀺𑀓𑁆𑀔 𑀫𑁂 𑀢𑁆𑀯𑀁 𑀪𑀤𑁆𑀤𑀦𑁆𑀢𑁂, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀁’’ [𑀦𑀢𑁆𑀣𑀺 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼].

𑁪𑁨𑁬. 𑀲𑀮𑁄𑀫𑀳𑀝𑁆𑀞𑀁 𑀜𑀢𑁆𑀯𑀸𑀦, 𑀯𑀸𑀲𑀯𑁄 𑀅𑀯𑀘𑀸 𑀦𑀺𑀫𑀺𑀁;

‘‘𑀲𑀓𑁆𑀓𑁄𑀳𑀫𑀲𑁆𑀫𑀺 𑀤𑁂𑀯𑀺𑀦𑁆𑀤𑁄, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂;

𑀅𑀮𑁄𑀫𑀳𑀝𑁆𑀞𑁄 𑀫𑀦𑀼𑀚𑀺𑀦𑁆𑀤, 𑀧𑀼𑀘𑁆𑀙 𑀧𑀜𑁆𑀳𑀁 𑀬𑀫𑀺𑀘𑁆𑀙𑀲𑀺’’.

𑁪𑁨𑁭. 𑀲𑁄 𑀘 𑀢𑁂𑀦 𑀓𑀢𑁄𑀓𑀸𑀲𑁄, 𑀯𑀸𑀲𑀯𑀁 𑀅𑀯𑀘𑀸 𑀦𑀺𑀫𑀺;

‘‘𑀧𑀼𑀘𑁆𑀙𑀸𑀫𑀺 𑀢𑀁 𑀫𑀳𑀸𑀭𑀸𑀚 [𑀫𑀳𑀸𑀩𑀸𑀳𑀼 (𑀲𑀻. 𑀧𑀻.), 𑀤𑁂𑀯𑀭𑀸𑀚 (𑀓.)], 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀤𑀸𑀦𑀁 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀸, 𑀓𑀢𑀫𑀁 𑀲𑀼 𑀫𑀳𑀧𑁆𑀨𑀮𑀁’’.

𑁪𑁨𑁮. 𑀲𑁄 𑀧𑀼𑀝𑁆𑀞𑁄 𑀦𑀭𑀤𑁂𑀯𑁂𑀦, 𑀯𑀸𑀲𑀯𑁄 𑀅𑀯𑀘𑀸 𑀦𑀺𑀫𑀺𑀁;

‘‘𑀯𑀺𑀧𑀸𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁨𑁯. ‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀺;

𑀫𑀚𑁆𑀛𑀺𑀫𑁂𑀦 𑀘 𑀤𑁂𑀯𑀢𑁆𑀢𑀁, 𑀉𑀢𑁆𑀢𑀫𑁂𑀦 𑀯𑀺𑀲𑀼𑀚𑁆𑀛𑀢𑀺.

𑁪𑁩𑁦. ‘‘𑀦 𑀳𑁂𑀢𑁂 𑀲𑀼𑀮𑀪𑀸 𑀓𑀸𑀬𑀸, 𑀬𑀸𑀘𑀬𑁄𑀕𑁂𑀦 𑀓𑁂𑀦𑀘𑀺;

𑀬𑁂 𑀓𑀸𑀬𑁂 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀦𑀸𑀕𑀸𑀭𑀸 𑀢𑀧𑀲𑁆𑀲𑀺𑀦𑁄.

𑁪𑁩𑁧. ‘‘𑀤𑀼𑀤𑀻𑀧𑁄 [𑀤𑀼𑀢𑀺𑀧𑁄 (𑀓.)] 𑀲𑀸𑀕𑀭𑁄 𑀲𑁂𑀮𑁄, 𑀫𑀼𑀚𑀓𑀺𑀦𑁆𑀤𑁄 [𑀫𑀼𑀘𑀮𑀺𑀦𑁆𑀤𑁄 (𑀲𑀻. 𑀲𑁆𑀬𑀸. 𑀧𑀻.), 𑀫𑀼𑀚𑀓𑀺𑀦𑁆𑀢𑁄 (𑀓.)] 𑀪𑀕𑀻𑀭𑀲𑁄;

𑀉𑀲𑀺𑀦𑁆𑀤𑀭𑁄 [𑀉𑀲𑀻𑀦𑀭𑁄 (𑀲𑀻. 𑀧𑀻.)] 𑀓𑀲𑁆𑀲𑀧𑁄 𑀘 [𑀅𑀝𑁆𑀞𑀓𑁄 𑀘 (𑀲𑀻. 𑀧𑀻.), 𑀅𑀢𑁆𑀣𑀓𑁄 𑀘 (𑀲𑁆𑀬𑀸.)], 𑀅𑀲𑀓𑁄 𑀘 𑀧𑀼𑀣𑀼𑀚𑁆𑀚𑀦𑁄.

𑁪𑁩𑁨. ‘‘𑀏𑀢𑁂 𑀘𑀜𑁆𑀜𑁂 𑀘 𑀭𑀸𑀚𑀸𑀦𑁄, 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀩𑀳𑀽;

𑀧𑀼𑀣𑀼𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦, 𑀧𑁂𑀢𑀢𑁆𑀢𑀁 [𑀧𑁂𑀢𑀁 𑀢𑁂 (𑀲𑀻. 𑀧𑀻.)] 𑀦𑀸𑀢𑀺𑀯𑀢𑁆𑀢𑀺𑀲𑀼𑀁.

𑁪𑁩𑁩. ‘‘𑀅𑀣 𑀬𑀻𑀫𑁂 [𑀅𑀤𑁆𑀥𑀸 𑀇𑀫𑁂 (𑀲𑀻. 𑀧𑀻.), 𑀅𑀤𑁆𑀥𑀸𑀬𑀺𑀫𑁂 (𑀲𑁆𑀬𑀸.)] 𑀅𑀯𑀢𑁆𑀢𑀺𑀁𑀲𑀼, 𑀅𑀦𑀸𑀕𑀸𑀭𑀸 𑀢𑀧𑀲𑁆𑀲𑀺𑀦𑁄;

𑀲𑀢𑁆𑀢𑀺𑀲𑀬𑁄 𑀬𑀸𑀫𑀳𑀦𑀼, 𑀲𑁄𑀫𑀬𑀸𑀫𑁄 [𑀲𑁄𑀫𑀬𑀸𑀕𑁄 (𑀲𑀻. 𑀲𑁆𑀬𑀸. 𑀧𑀻.)] 𑀫𑀦𑁄𑀚𑀯𑁄.

𑁪𑁩𑁪. ‘‘𑀲𑀫𑀼𑀤𑁆𑀤𑁄 𑀫𑀸𑀖𑁄 𑀪𑀭𑀢𑁄 𑀘, 𑀇𑀲𑀺 𑀓𑀸𑀮𑀧𑀼𑀭𑀓𑁆𑀔𑀢𑁄 [𑀓𑀸𑀮𑀺𑀓𑀭𑀺𑀓𑁆𑀔𑀺𑀬𑁄 (𑀲𑀻. 𑀧𑀻.)];

𑀅𑀗𑁆𑀕𑀻𑀭𑀲𑁄 𑀓𑀲𑁆𑀲𑀧𑁄 𑀘, 𑀓𑀺𑀲𑀯𑀘𑁆𑀙𑁄 𑀅𑀓𑀢𑁆𑀢𑀺 [𑀅𑀓𑀺𑀢𑁆𑀢𑀺 (𑀲𑀻. 𑀧𑀻.), 𑀅𑀓𑀦𑁆𑀢𑀺 (𑀲𑁆𑀬𑀸.)] 𑀘.

𑁪𑁩𑁫. ‘‘𑀉𑀢𑁆𑀢𑀭𑁂𑀦 𑀦𑀤𑀻 𑀲𑀻𑀤𑀸, 𑀕𑀫𑁆𑀪𑀻𑀭𑀸 𑀤𑀼𑀭𑀢𑀺𑀓𑁆𑀓𑀫𑀸;

𑀦𑀴𑀕𑁆𑀕𑀺𑀯𑀡𑁆𑀡𑀸 𑀚𑁄𑀢𑀦𑁆𑀢𑀺, 𑀲𑀤𑀸 𑀓𑀜𑁆𑀘𑀦𑀧𑀩𑁆𑀩𑀢𑀸.

𑁪𑁩𑁬. ‘‘𑀧𑀭𑀽𑀴𑁆𑀳𑀓𑀘𑁆𑀙𑀸 𑀢𑀕𑀭𑀸, 𑀭𑀽𑀴𑁆𑀳𑀓𑀘𑁆𑀙𑀸 𑀯𑀦𑀸 𑀦𑀕𑀸;

𑀢𑀢𑁆𑀭𑀸𑀲𑀼𑀁 𑀤𑀲𑀲𑀳𑀲𑁆𑀲𑀸, 𑀧𑁄𑀭𑀸𑀡𑀸 𑀇𑀲𑀬𑁄 𑀧𑀼𑀭𑁂.

𑁪𑁩𑁭. ‘‘𑀅𑀳𑀁 𑀲𑁂𑀝𑁆𑀞𑁄𑀲𑁆𑀫𑀺 𑀤𑀸𑀦𑁂𑀦, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀅𑀦𑀼𑀢𑁆𑀢𑀭𑀁 𑀯𑀢𑀁 𑀓𑀢𑁆𑀯𑀸, 𑀧𑀓𑀺𑀭𑀘𑀸𑀭𑀻 𑀲𑀫𑀸𑀳𑀺𑀢𑁂.

𑁪𑁩𑁮. ‘‘𑀚𑀸𑀢𑀺𑀫𑀦𑁆𑀢𑀁 𑀅𑀚𑀘𑁆𑀘𑀜𑁆𑀘, 𑀅𑀳𑀁 𑀉𑀚𑀼𑀕𑀢𑀁 𑀦𑀭𑀁;

𑀅𑀢𑀺𑀯𑁂𑀮𑀁 𑀦𑀫𑀲𑁆𑀲𑀺𑀲𑁆𑀲𑀁, 𑀓𑀫𑁆𑀫𑀩𑀦𑁆𑀥𑀽 𑀳𑀺 𑀫𑀸𑀡𑀯𑀸 [𑀫𑀸𑀢𑀺𑀬𑀸 (𑀲𑀻. 𑀧𑀻.)].

𑁪𑁩𑁯. ‘‘𑀲𑀩𑁆𑀩𑁂 𑀯𑀡𑁆𑀡𑀸 𑀅𑀥𑀫𑁆𑀫𑀝𑁆𑀞𑀸, 𑀧𑀢𑀦𑁆𑀢𑀺 𑀦𑀺𑀭𑀬𑀁 𑀅𑀥𑁄;

𑀲𑀩𑁆𑀩𑁂 𑀯𑀡𑁆𑀡𑀸 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀘𑀭𑀺𑀢𑁆𑀯𑀸 𑀥𑀫𑁆𑀫𑀫𑀼𑀢𑁆𑀢𑀫𑀁’’.

𑁪𑁪𑁦. 𑀇𑀤𑀁 𑀯𑀢𑁆𑀯𑀸𑀦 𑀫𑀖𑀯𑀸, 𑀤𑁂𑀯𑀭𑀸𑀚𑀸 𑀲𑀼𑀚𑀫𑁆𑀧𑀢𑀺;

𑀯𑁂𑀤𑁂𑀳𑀫𑀦𑀼𑀲𑀸𑀲𑀺𑀢𑁆𑀯𑀸, 𑀲𑀕𑁆𑀕𑀓𑀸𑀬𑀁 𑀅𑀧𑀓𑁆𑀓𑀫𑀺.

𑁪𑁪𑁧. ‘‘𑀇𑀫𑀁 𑀪𑁄𑀦𑁆𑀢𑁄 𑀦𑀺𑀲𑀸𑀫𑁂𑀣, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀥𑀫𑁆𑀫𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀯𑀡𑁆𑀡𑀁 𑀉𑀘𑁆𑀘𑀸𑀯𑀘𑀁 𑀩𑀳𑀼𑀁.

𑁪𑁪𑁨. ‘‘𑀬𑀣𑀸 𑀅𑀬𑀁 𑀦𑀺𑀫𑀺𑀭𑀸𑀚𑀸, 𑀧𑀡𑁆𑀟𑀺𑀢𑁄 𑀓𑀼𑀲𑀮𑀢𑁆𑀣𑀺𑀓𑁄;

𑀭𑀸𑀚𑀸 𑀲𑀩𑁆𑀩𑀯𑀺𑀤𑁂𑀳𑀸𑀦𑀁, 𑀅𑀤𑀸 𑀤𑀸𑀦𑀁 𑀅𑀭𑀺𑀦𑁆𑀤𑀫𑁄.

𑁪𑁪𑁩. ‘‘𑀢𑀲𑁆𑀲 𑀢𑀁 𑀤𑀤𑀢𑁄 𑀤𑀸𑀦𑀁, 𑀲𑀗𑁆𑀓𑀧𑁆𑀧𑁄 𑀉𑀤𑀧𑀚𑁆𑀚𑀣;

𑀤𑀸𑀦𑀁 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀸, 𑀓𑀢𑀫𑀁 𑀲𑀼 𑀫𑀳𑀧𑁆𑀨𑀮𑀁’’.

𑁪𑁪𑁪. 𑀅𑀩𑁆𑀪𑀼𑀢𑁄 𑀯𑀢 𑀮𑁄𑀓𑀲𑁆𑀫𑀺𑀁, 𑀉𑀧𑁆𑀧𑀚𑁆𑀚𑀺 𑀮𑁄𑀫𑀳𑀁𑀲𑀦𑁄;

𑀤𑀺𑀩𑁆𑀩𑁄 𑀭𑀣𑁄 𑀧𑀸𑀢𑀼𑀭𑀳𑀼, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁪𑁪𑁫. 𑀤𑁂𑀯𑀧𑀼𑀢𑁆𑀢𑁄 𑀫𑀳𑀺𑀤𑁆𑀥𑀺𑀓𑁄, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀦𑀺𑀫𑀦𑁆𑀢𑀬𑀺𑀢𑁆𑀣 𑀭𑀸𑀚𑀸𑀦𑀁, 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀁.

𑁪𑁪𑁬. ‘‘𑀏𑀳𑀺𑀫𑀁 𑀭𑀣𑀫𑀸𑀭𑀼𑀬𑁆𑀳, 𑀭𑀸𑀚𑀲𑁂𑀝𑁆𑀞 𑀤𑀺𑀲𑀫𑁆𑀧𑀢𑀺;

𑀤𑁂𑀯𑀸 𑀤𑀲𑁆𑀲𑀦𑀓𑀸𑀫𑀸 𑀢𑁂, 𑀢𑀸𑀯𑀢𑀺𑀁𑀲𑀸 𑀲𑀇𑀦𑁆𑀤𑀓𑀸;

𑀲𑀭𑀫𑀸𑀦𑀸 𑀳𑀺 𑀢𑁂 𑀤𑁂𑀯𑀸, 𑀲𑀼𑀥𑀫𑁆𑀫𑀸𑀬𑀁 𑀲𑀫𑀘𑁆𑀙𑀭𑁂’’.

𑁪𑁪𑁭. 𑀢𑀢𑁄 𑀭𑀸𑀚𑀸 𑀢𑀭𑀫𑀸𑀦𑁄, 𑀯𑁂𑀤𑁂𑀳𑁄 𑀫𑀺𑀣𑀺𑀮𑀕𑁆𑀕𑀳𑁄;

𑀆𑀲𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀦, 𑀧𑀫𑀼𑀔𑁄 𑀭𑀣𑀫𑀸𑀭𑀼𑀳𑀺.

𑁪𑁪𑁮. 𑀅𑀪𑀺𑀭𑀽𑀴𑁆𑀳𑀁 𑀭𑀣𑀁 𑀤𑀺𑀩𑁆𑀩𑀁, 𑀫𑀸𑀢𑀮𑀺 𑀏𑀢𑀤𑀩𑁆𑀭𑀯𑀺;

‘‘𑀓𑁂𑀦 𑀢𑀁 𑀦𑁂𑀫𑀺 𑀫𑀕𑁆𑀕𑁂𑀦, 𑀭𑀸𑀚𑀲𑁂𑀝𑁆𑀞 𑀤𑀺𑀲𑀫𑁆𑀧𑀢𑀺;

𑀬𑁂𑀦 𑀯𑀸 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀧𑀼𑀜𑁆𑀜𑀓𑀫𑁆𑀫𑀸 𑀘 𑀬𑁂 𑀦𑀭𑀸’’.

𑁪𑁪𑁯. ‘‘𑀉𑀪𑀬𑁂𑀦𑁂𑀯 𑀫𑀁 𑀦𑁂𑀳𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀬𑁂𑀦 𑀯𑀸 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀧𑀼𑀜𑁆𑀜𑀓𑀫𑁆𑀫𑀸 𑀘 𑀬𑁂 𑀦𑀭𑀸’’.

𑁪𑁫𑁦. ‘‘𑀓𑁂𑀦 𑀢𑀁 𑀧𑀞𑀫𑀁 𑀦𑁂𑀫𑀺, 𑀭𑀸𑀚𑀲𑁂𑀝𑁆𑀞 𑀤𑀺𑀲𑀫𑁆𑀧𑀢𑀺;

𑀬𑁂𑀦 𑀯𑀸 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀧𑀼𑀜𑁆𑀜𑀓𑀫𑁆𑀫𑀸 𑀘 𑀬𑁂 𑀦𑀭𑀸’’.

𑁪𑁫𑁧. ‘‘𑀦𑀺𑀭𑀬𑁂 [𑀦𑀺𑀭𑀺𑀬𑀁 (𑀲𑁆𑀬𑀸. 𑀓.)] 𑀢𑀸𑀯 𑀧𑀲𑁆𑀲𑀸𑀫𑀺, 𑀆𑀯𑀸𑀲𑁂 [𑀆𑀯𑀸𑀲𑀁 (𑀲𑁆𑀬𑀸. 𑀓.)] 𑀧𑀸𑀧𑀓𑀫𑁆𑀫𑀺𑀦𑀁;

𑀞𑀸𑀦𑀸𑀦𑀺 𑀮𑀼𑀤𑁆𑀤𑀓𑀫𑁆𑀫𑀸𑀦𑀁, 𑀤𑀼𑀲𑁆𑀲𑀻𑀮𑀸𑀦𑀜𑁆𑀘 𑀬𑀸 𑀕𑀢𑀺’’.

𑁪𑁫𑁨. 𑀤𑀲𑁆𑀲𑁂𑀲𑀺 𑀫𑀸𑀢𑀮𑀺 𑀭𑀜𑁆𑀜𑁄, 𑀤𑀼𑀕𑁆𑀕𑀁 𑀯𑁂𑀢𑀭𑀡𑀺𑀁 𑀦𑀤𑀺𑀁;

𑀓𑀼𑀣𑀺𑀢𑀁 𑀔𑀸𑀭𑀲𑀁𑀬𑀼𑀢𑁆𑀢𑀁, 𑀢𑀢𑁆𑀢𑀁 𑀅𑀕𑁆𑀕𑀺𑀲𑀺𑀔𑀽𑀧𑀫𑀁 [𑀅𑀕𑁆𑀕𑀺𑀲𑀫𑁄𑀤𑀓𑀁 (𑀓.)].

𑁪𑁫𑁩. 𑀦𑀺𑀫𑀻 𑀳𑀯𑁂 𑀫𑀸𑀢𑀮𑀺𑀫𑀚𑁆𑀛𑀪𑀸𑀲𑀣 [𑀫𑀸𑀢𑀮𑀺𑀫𑀚𑁆𑀛𑀪𑀸𑀲𑀺 (𑀲𑁆𑀬𑀸.)], 𑀤𑀺𑀲𑁆𑀯𑀸 𑀚𑀦𑀁 𑀧𑀢𑀫𑀸𑀦𑀁 𑀯𑀺𑀤𑀼𑀕𑁆𑀕𑁂;

‘‘𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸, 𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀇𑀫𑁂 𑀦𑀼 𑀫𑀘𑁆𑀘𑀸 𑀓𑀺𑀫𑀓𑀁𑀲𑀼 𑀧𑀸𑀧𑀁, 𑀬𑁂𑀫𑁂 𑀚𑀦𑀸 𑀯𑁂𑀢𑀭𑀡𑀺𑀁 𑀧𑀢𑀦𑁆𑀢𑀺’’.

𑁪𑁫𑁪. 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀯𑀺𑀧𑀸𑀓𑀁 𑀧𑀸𑀧𑀓𑀫𑁆𑀫𑀸𑀦𑀁, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁫𑁫. ‘‘𑀬𑁂 𑀤𑀼𑀩𑁆𑀩𑀮𑁂 𑀩𑀮𑀯𑀦𑁆𑀢𑀸 𑀚𑀻𑀯𑀮𑁄𑀓𑁂, 𑀳𑀺𑀁𑀲𑀦𑁆𑀢𑀺 𑀭𑁄𑀲𑀦𑁆𑀢𑀺 𑀲𑀼𑀧𑀸𑀧𑀥𑀫𑁆𑀫𑀸;

𑀢𑁂 𑀮𑀼𑀤𑁆𑀤𑀓𑀫𑁆𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁, 𑀢𑁂𑀫𑁂 𑀚𑀦𑀸 𑀯𑁂𑀢𑀭𑀡𑀺𑀁 𑀧𑀢𑀦𑁆𑀢𑀺’’.

𑁪𑁫𑁬. ‘‘𑀲𑀸𑀫𑀸 𑀘 𑀲𑁄𑀡𑀸 𑀲𑀩𑀮𑀸 𑀘 𑀕𑀺𑀚𑁆𑀛𑀸, 𑀓𑀸𑀓𑁄𑀮𑀲𑀗𑁆𑀖𑀸 𑀅𑀤𑀦𑁆𑀢𑀺 [𑀅𑀤𑁂𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.) 𑀏𑀯𑀫𑀼𑀧𑀭𑀺𑀧𑀺] 𑀪𑁂𑀭𑀯𑀸;

𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸, 𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀇𑀫𑁂 𑀦𑀼 𑀫𑀘𑁆𑀘𑀸 𑀓𑀺𑀫𑀓𑀁𑀲𑀼 𑀧𑀸𑀧𑀁, 𑀬𑁂𑀫𑁂 𑀚𑀦𑁂 𑀓𑀸𑀓𑁄𑀮𑀲𑀗𑁆𑀖𑀸 𑀅𑀤𑀦𑁆𑀢𑀺’’.

𑁪𑁫𑁭. 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀯𑀺𑀧𑀸𑀓𑀁 𑀧𑀸𑀧𑀓𑀫𑁆𑀫𑀸𑀦𑀁, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁫𑁮. ‘‘𑀬𑁂 𑀓𑁂𑀘𑀺𑀫𑁂 𑀫𑀘𑁆𑀙𑀭𑀺𑀦𑁄 𑀓𑀤𑀭𑀺𑀬𑀸, 𑀧𑀭𑀺𑀪𑀸𑀲𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀳𑀺𑀁𑀲𑀦𑁆𑀢𑀺 𑀭𑁄𑀲𑀦𑁆𑀢𑀺 𑀲𑀼𑀧𑀸𑀧𑀥𑀫𑁆𑀫𑀸, 𑀢𑁂 𑀮𑀼𑀤𑁆𑀤𑀓𑀫𑁆𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁;

𑀢𑁂𑀫𑁂 𑀚𑀦𑁂 𑀓𑀸𑀓𑁄𑀮𑀲𑀗𑁆𑀖𑀸 𑀅𑀤𑀦𑁆𑀢𑀺’’.

𑁪𑁫𑁯. ‘‘𑀲𑀚𑁄𑀢𑀺𑀪𑀽𑀢𑀸 𑀧𑀣𑀯𑀺𑀁 𑀓𑀫𑀦𑁆𑀢𑀺, 𑀢𑀢𑁆𑀢𑁂𑀳𑀺 𑀔𑀦𑁆𑀥𑁂𑀳𑀺 𑀘 𑀧𑁄𑀣𑀬𑀦𑁆𑀢𑀺;

𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸, 𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀇𑀫𑁂 𑀦𑀼 𑀫𑀘𑁆𑀘𑀸 𑀓𑀺𑀫𑀓𑀁𑀲𑀼 𑀧𑀸𑀧𑀁, 𑀬𑁂𑀫𑁂 𑀚𑀦𑀸 𑀔𑀦𑁆𑀥𑀳𑀢𑀸 𑀲𑀬𑀦𑁆𑀢𑀺’’.

𑁪𑁬𑁦. 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀯𑀺𑀧𑀸𑀓𑀁 𑀧𑀸𑀧𑀓𑀫𑁆𑀫𑀸𑀦𑀁, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁬𑁧. ‘‘𑀬𑁂 𑀚𑀻𑀯𑀮𑁄𑀓𑀲𑁆𑀫𑀺 𑀲𑀼𑀧𑀸𑀧𑀥𑀫𑁆𑀫𑀺𑀦𑁄, 𑀦𑀭𑀜𑁆𑀘 𑀦𑀸𑀭𑀺𑀜𑁆𑀘 𑀅𑀧𑀸𑀧𑀥𑀫𑁆𑀫𑀁;

𑀳𑀺𑀁𑀲𑀦𑁆𑀢𑀺 𑀭𑁄𑀲𑀦𑁆𑀢𑀺 𑀲𑀼𑀧𑀸𑀧𑀥𑀫𑁆𑀫𑀸 [𑀲𑀼𑀧𑀸𑀧𑀥𑀫𑁆𑀫𑀺𑀦𑁄 (𑀓.)], 𑀢𑁂 𑀮𑀼𑀤𑁆𑀤𑀓𑀫𑁆𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁;

𑀢𑁂𑀫𑁂 𑀚𑀦𑀸 𑀔𑀦𑁆𑀥𑀳𑀢𑀸 𑀲𑀬𑀦𑁆𑀢𑀺’’.

𑁪𑁬𑁨. ‘‘𑀅𑀗𑁆𑀕𑀸𑀭𑀓𑀸𑀲𑀼𑀁 𑀅𑀧𑀭𑁂 𑀨𑀼𑀡𑀦𑁆𑀢𑀺 [𑀣𑀼𑀦𑀦𑁆𑀢𑀺 (𑀲𑀻. 𑀲𑁆𑀬𑀸.), 𑀨𑀼𑀦𑀦𑁆𑀢𑀺 (𑀧𑀻.)], 𑀦𑀭𑀸 𑀭𑀼𑀤𑀦𑁆𑀢𑀸 𑀧𑀭𑀺𑀤𑀟𑁆𑀠𑀕𑀢𑁆𑀢𑀸;

𑀪𑀬𑀜𑁆𑀳𑀺 𑀫𑀁 𑀯𑀺𑀤𑀦𑁆𑀢𑀺 𑀲𑀽𑀢 𑀤𑀺𑀲𑁆𑀯𑀸, 𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀇𑀫𑁂 𑀦𑀼 𑀫𑀘𑁆𑀘𑀸 𑀓𑀺𑀫𑀓𑀁𑀲𑀼 𑀧𑀸𑀧𑀁, 𑀬𑁂𑀫𑁂 𑀚𑀦𑀸 𑀅𑀗𑁆𑀕𑀸𑀭𑀓𑀸𑀲𑀼𑀁 𑀨𑀼𑀡𑀦𑁆𑀢𑀺’’.

𑁪𑁬𑁩. 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀯𑀺𑀧𑀸𑀓𑀁 𑀧𑀸𑀧𑀓𑀫𑁆𑀫𑀸𑀦𑀁, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁬𑁪. ‘‘𑀬𑁂 𑀓𑁂𑀘𑀺 𑀧𑀽𑀕𑀸𑀬 𑀥𑀦𑀲𑁆𑀲 [𑀧𑀽𑀕𑀸𑀬𑀢𑀦𑀲𑁆𑀲 (𑀲𑀻. 𑀧𑀻.)] 𑀳𑁂𑀢𑀼, 𑀲𑀓𑁆𑀔𑀺𑀁 𑀓𑀭𑀺𑀢𑁆𑀯𑀸 𑀇𑀡𑀁 𑀚𑀸𑀧𑀬𑀦𑁆𑀢𑀺;

𑀢𑁂 𑀚𑀸𑀧𑀬𑀺𑀢𑁆𑀯𑀸 𑀚𑀦𑀢𑀁 𑀚𑀦𑀺𑀦𑁆𑀤, 𑀢𑁂 𑀮𑀼𑀤𑁆𑀤𑀓𑀫𑁆𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁;

𑀢𑁂𑀫𑁂 𑀚𑀦𑀸 𑀅𑀗𑁆𑀕𑀸𑀭𑀓𑀸𑀲𑀼𑀁 𑀨𑀼𑀡𑀦𑁆𑀢𑀺’’.

𑁪𑁬𑁫. ‘‘𑀲𑀚𑁄𑀢𑀺𑀪𑀽𑀢𑀸 𑀚𑀮𑀺𑀢𑀸 𑀧𑀤𑀺𑀢𑁆𑀢𑀸, 𑀧𑀤𑀺𑀲𑁆𑀲𑀢𑀺 𑀫𑀳𑀢𑀻 𑀮𑁄𑀳𑀓𑀼𑀫𑁆𑀪𑀻;

𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸, 𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀇𑀫𑁂 𑀦𑀼 𑀫𑀘𑁆𑀘𑀸 𑀓𑀺𑀫𑀓𑀁𑀲𑀼 𑀧𑀸𑀧𑀁, 𑀬𑁂𑀫𑁂 𑀚𑀦𑀸 𑀅𑀯𑀁𑀲𑀺𑀭𑀸 𑀮𑁄𑀳𑀓𑀼𑀫𑁆𑀪𑀺𑀁 𑀧𑀢𑀦𑁆𑀢𑀺’’.

𑁪𑁬𑁬. 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀯𑀺𑀧𑀸𑀓𑀁 𑀧𑀸𑀧𑀓𑀫𑁆𑀫𑀸𑀦𑀁, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁬𑁭. ‘‘𑀬𑁂 𑀲𑀻𑀮𑀯𑀦𑁆𑀢𑀁 [𑀲𑀻𑀮𑀯𑀁 (𑀧𑀻.)] 𑀲𑀫𑀡𑀁 𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀳𑀺𑀁𑀲𑀦𑁆𑀢𑀺 𑀭𑁄𑀲𑀦𑁆𑀢𑀺 𑀲𑀼𑀧𑀸𑀧𑀥𑀫𑁆𑀫𑀸;

𑀢𑁂 𑀮𑀼𑀤𑁆𑀤𑀓𑀫𑁆𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁, 𑀢𑁂𑀫𑁂 𑀚𑀦𑀸 𑀅𑀯𑀁𑀲𑀺𑀭𑀸 𑀮𑁄𑀳𑀓𑀼𑀫𑁆𑀪𑀺𑀁 𑀧𑀢𑀦𑁆𑀢𑀺’’.

𑁪𑁬𑁮. ‘‘𑀮𑀼𑀜𑁆𑀘𑀦𑁆𑀢𑀺 𑀕𑀻𑀯𑀁 𑀅𑀣 𑀯𑁂𑀞𑀬𑀺𑀢𑁆𑀯𑀸 [𑀅𑀯𑀺𑀯𑁂𑀞𑀬𑀺𑀢𑁆𑀯𑀸 (𑀓.)], 𑀉𑀡𑁆𑀳𑁄𑀤𑀓𑀲𑁆𑀫𑀺𑀁 𑀧𑀓𑀺𑀮𑁂𑀤𑀬𑀺𑀢𑁆𑀯𑀸 [𑀧𑀓𑀺𑀮𑁂𑀤𑀬𑀺𑀢𑁆𑀯𑀸 (𑀲𑀻. 𑀧𑀻.)];

𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸, 𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀇𑀫𑁂 𑀦𑀼 𑀫𑀘𑁆𑀘𑀸 𑀓𑀺𑀫𑀓𑀁𑀲𑀼 𑀧𑀸𑀧𑀁, 𑀬𑁂𑀫𑁂 𑀚𑀦𑀸 𑀮𑀼𑀢𑁆𑀢𑀲𑀺𑀭𑀸 𑀲𑀬𑀦𑁆𑀢𑀺’’.

𑁪𑁬𑁯. 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀯𑀺𑀧𑀸𑀓𑀁 𑀧𑀸𑀧𑀓𑀫𑁆𑀫𑀸𑀦𑀁, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁭𑁦. ‘‘𑀬𑁂 𑀚𑀻𑀯𑀮𑁄𑀓𑀲𑁆𑀫𑀺 𑀲𑀼𑀧𑀸𑀧𑀥𑀫𑁆𑀫𑀺𑀦𑁄, 𑀧𑀓𑁆𑀔𑀻 𑀕𑀳𑁂𑀢𑁆𑀯𑀸𑀦 𑀯𑀺𑀳𑁂𑀞𑀬𑀦𑁆𑀢𑀺 𑀢𑁂;

𑀯𑀺𑀳𑁂𑀞𑀬𑀺𑀢𑁆𑀯𑀸 𑀲𑀓𑀼𑀡𑀁 𑀚𑀦𑀺𑀦𑁆𑀤, 𑀢𑁂 𑀮𑀼𑀤𑁆𑀤𑀓𑀸𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁;

𑀢𑁂𑀫𑁂 𑀚𑀦𑀸 𑀮𑀼𑀢𑁆𑀢𑀲𑀺𑀭𑀸 𑀲𑀬𑀦𑁆𑀢𑀺.

𑁪𑁭𑁧. ‘‘𑀧𑀳𑀽𑀢𑀢𑁄𑀬𑀸 𑀅𑀦𑀺𑀕𑀸𑀥𑀓𑀽𑀮𑀸 [𑀅𑀦𑀺𑀔𑀸𑀢𑀓𑀽𑀮𑀸 (𑀲𑀻. 𑀲𑁆𑀬𑀸. 𑀧𑀻.)], 𑀦𑀤𑀻 𑀅𑀬𑀁 𑀲𑀦𑁆𑀤𑀢𑀺 𑀲𑀼𑀧𑁆𑀧𑀢𑀺𑀢𑁆𑀣𑀸;

𑀖𑀫𑁆𑀫𑀸𑀪𑀺𑀢𑀢𑁆𑀢𑀸 𑀫𑀦𑀼𑀚𑀸 𑀧𑀺𑀯𑀦𑁆𑀢𑀺, 𑀧𑀻𑀢𑀜𑁆𑀘 [𑀧𑀺𑀯𑀢𑀁 𑀘 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀢𑁂𑀲𑀁 𑀪𑀼𑀲 𑀳𑁄𑀢𑀺 𑀧𑀸𑀦𑀺.

𑁪𑁭𑁨. ‘‘𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸, 𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀇𑀫𑁂 𑀦𑀼 𑀫𑀘𑁆𑀘𑀸 𑀓𑀺𑀫𑀓𑀁𑀲𑀼 𑀧𑀸𑀧𑀁, 𑀧𑀻𑀢𑀜𑁆𑀘 𑀢𑁂𑀲𑀁 𑀪𑀼𑀲 𑀳𑁄𑀢𑀺 𑀧𑀸𑀦𑀺’’.

𑁪𑁭𑁩. 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀯𑀺𑀧𑀸𑀓𑀁 𑀧𑀸𑀧𑀓𑀫𑁆𑀫𑀸𑀦𑀁, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁭𑁪. ‘‘𑀬𑁂 𑀲𑀼𑀤𑁆𑀥𑀥𑀜𑁆𑀜𑀁 𑀧𑀮𑀸𑀲𑁂𑀦 𑀫𑀺𑀲𑁆𑀲𑀁, 𑀅𑀲𑀼𑀤𑁆𑀥𑀓𑀫𑁆𑀫𑀸 𑀓𑀬𑀺𑀦𑁄 𑀤𑀤𑀦𑁆𑀢𑀺;

𑀖𑀫𑁆𑀫𑀸𑀪𑀺𑀢𑀢𑁆𑀢𑀸𑀦 𑀧𑀺𑀧𑀸𑀲𑀺𑀢𑀸𑀦𑀁, 𑀧𑀻𑀢𑀜𑁆𑀘 𑀢𑁂𑀲𑀁 𑀪𑀼𑀲 𑀳𑁄𑀢𑀺 𑀧𑀸𑀦𑀺’’.

𑁪𑁭𑁫. ‘‘𑀉𑀲𑀽𑀳𑀺 𑀲𑀢𑁆𑀢𑀻𑀳𑀺 𑀘 𑀢𑁄𑀫𑀭𑁂𑀳𑀺, 𑀤𑀼𑀪𑀬𑀸𑀦𑀺 𑀧𑀲𑁆𑀲𑀸𑀦𑀺 𑀢𑀼𑀤𑀦𑁆𑀢𑀺 𑀓𑀦𑁆𑀤𑀢𑀁;

𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸, 𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀇𑀫𑁂 𑀦𑀼 𑀫𑀘𑁆𑀘𑀸 𑀓𑀺𑀫𑀓𑀁𑀲𑀼 𑀧𑀸𑀧𑀁, 𑀬𑁂𑀫𑁂 𑀚𑀦𑀸 𑀲𑀢𑁆𑀢𑀺𑀳𑀢𑀸 𑀲𑀬𑀦𑁆𑀢𑀺’’.

𑁪𑁭𑁬. 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀯𑀺𑀧𑀸𑀓𑀁 𑀧𑀸𑀧𑀓𑀫𑁆𑀫𑀸𑀦𑀁, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁭𑁭. ‘‘𑀬𑁂 𑀚𑀻𑀯𑀮𑁄𑀓𑀲𑁆𑀫𑀺 𑀅𑀲𑀸𑀥𑀼𑀓𑀫𑁆𑀫𑀺𑀦𑁄, 𑀅𑀤𑀺𑀦𑁆𑀦𑀫𑀸𑀤𑀸𑀬 𑀓𑀭𑁄𑀦𑁆𑀢𑀺 𑀚𑀻𑀯𑀺𑀓𑀁;

𑀥𑀜𑁆𑀜𑀁 𑀥𑀦𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁, 𑀅𑀚𑁂𑀴𑀓𑀜𑁆𑀘𑀸𑀧𑀺 𑀧𑀲𑀼𑀁 𑀫𑀳𑀺𑀁𑀲𑀁 [𑀫𑀳𑀻𑀲𑀁 (𑀲𑀻. 𑀧𑀻.)];

𑀢𑁂 𑀮𑀼𑀤𑁆𑀤𑀓𑀫𑁆𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁, 𑀢𑁂𑀫𑁂 𑀚𑀦𑀸 𑀲𑀢𑁆𑀢𑀺𑀳𑀢𑀸 𑀲𑀬𑀦𑁆𑀢𑀺’’.

𑁪𑁭𑁮. ‘‘𑀕𑀻𑀯𑀸𑀬 𑀩𑀤𑁆𑀥𑀸 𑀓𑀺𑀲𑁆𑀲 𑀇𑀫𑁂 𑀧𑀼𑀦𑁂𑀓𑁂, 𑀅𑀜𑁆𑀜𑁂 𑀯𑀺𑀓𑀦𑁆𑀢𑀸 [𑀯𑀺𑀓𑀢𑁆𑀢𑀸 (𑀲𑀻. 𑀧𑀻.)] 𑀩𑀺𑀮𑀓𑀢𑀸 𑀲𑀬𑀦𑁆𑀢𑀺 [𑀧𑀼𑀦𑁂𑀓𑁂 (𑀲𑀻. 𑀧𑀻.)];

𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸, 𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀇𑀫𑁂 𑀦𑀼 𑀫𑀘𑁆𑀘𑀸 𑀓𑀺𑀫𑀓𑀁𑀲𑀼 𑀧𑀸𑀧𑀁, 𑀬𑁂𑀫𑁂 𑀚𑀦𑀸 𑀩𑀺𑀮𑀓𑀢𑀸 𑀲𑀬𑀦𑁆𑀢𑀺’’.

𑁪𑁭𑁯. 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀯𑀺𑀧𑀸𑀓𑀁 𑀧𑀸𑀧𑀓𑀫𑁆𑀫𑀸𑀦𑀁, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁮𑁦. ‘‘𑀑𑀭𑀩𑁆𑀪𑀺𑀓𑀸 𑀲𑀽𑀓𑀭𑀺𑀓𑀸 𑀘 𑀫𑀘𑁆𑀙𑀺𑀓𑀸, 𑀧𑀲𑀼𑀁 𑀫𑀳𑀺𑀁𑀲𑀜𑁆𑀘 𑀅𑀚𑁂𑀴𑀓𑀜𑁆𑀘;

𑀳𑀦𑁆𑀢𑁆𑀯𑀸𑀦 𑀲𑀽𑀦𑁂𑀲𑀼 𑀧𑀲𑀸𑀭𑀬𑀺𑀁𑀲𑀼, 𑀢𑁂 𑀮𑀼𑀤𑁆𑀤𑀓𑀫𑁆𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁;

𑀢𑁂𑀫𑁂 𑀚𑀦𑀸 𑀩𑀺𑀮𑀓𑀢𑀸 𑀲𑀬𑀦𑁆𑀢𑀺.

𑁪𑁮𑁧. ‘‘𑀭𑀳𑀤𑁄 𑀅𑀬𑀁 𑀫𑀼𑀢𑁆𑀢𑀓𑀭𑀻𑀲𑀧𑀽𑀭𑁄, 𑀤𑀼𑀕𑁆𑀕𑀦𑁆𑀥𑀭𑀽𑀧𑁄 𑀅𑀲𑀼𑀘𑀺 𑀧𑀽𑀢𑀺 𑀯𑀸𑀢𑀺;

𑀔𑀼𑀤𑀸𑀧𑀭𑁂𑀢𑀸 𑀫𑀦𑀼𑀚𑀸 𑀅𑀤𑀦𑁆𑀢𑀺, 𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸;

𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺, 𑀇𑀫𑁂 𑀦𑀼 𑀫𑀘𑁆𑀘𑀸 𑀓𑀺𑀫𑀓𑀁𑀲𑀼 𑀧𑀸𑀧𑀁;

𑀬𑁂𑀫𑁂 𑀚𑀦𑀸 𑀫𑀼𑀢𑁆𑀢𑀓𑀭𑀻𑀲𑀪𑀓𑁆𑀔𑀸’’.

𑁪𑁮𑁨. 𑀢𑀲𑁆𑀲 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺, 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀯𑀺𑀧𑀸𑀓𑀁 𑀧𑀸𑀧𑀓𑀫𑁆𑀫𑀸𑀦𑀁, 𑀚𑀸𑀦𑀁 𑀅𑀓𑁆𑀔𑀸𑀲𑀺𑀚𑀸𑀦𑀢𑁄.

𑁪𑁮𑁩. ‘‘𑀬𑁂 𑀓𑁂𑀘𑀺𑀫𑁂 𑀓𑀸𑀭𑀡𑀺𑀓𑀸 𑀯𑀺𑀭𑁄𑀲𑀓𑀸, 𑀧𑀭𑁂𑀲𑀁 𑀳𑀺𑀁𑀲𑀸𑀬 𑀲𑀤𑀸 𑀦𑀺𑀯𑀺𑀝𑁆𑀞𑀸;

𑀢𑁂 𑀮𑀼𑀤𑁆𑀤𑀓𑀫𑁆𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁, 𑀫𑀺𑀢𑁆𑀢𑀤𑁆𑀤𑀼𑀦𑁄 𑀫𑀻𑀴𑁆𑀳𑀫𑀤𑀦𑁆𑀢𑀺 𑀩𑀸𑀮𑀸.

𑁪𑁮𑁪. ‘‘𑀭𑀳𑀤𑁄 𑀅𑀬𑀁 𑀮𑁄𑀳𑀺𑀢𑀧𑀼𑀩𑁆𑀩𑀧𑀽𑀭𑁄, 𑀤𑀼𑀕𑁆𑀕𑀦𑁆𑀥𑀭𑀽𑀧𑁄 𑀅𑀲𑀼𑀘𑀺 𑀧𑀽𑀢𑀺 𑀯𑀸𑀢𑀺;

𑀖𑀫𑁆𑀫𑀸𑀪𑀺𑀢𑀢𑁆𑀢𑀸 𑀫𑀦𑀼𑀚𑀸 𑀧𑀺𑀯𑀦𑁆𑀢𑀺, 𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸;